ಅಸ್ತಿತ್ವವಾದ್ ಆನಿ ಕನ್ನಡ ಸಾಹಿತ್ಯ್

ಏಕ್ ಕಾಣಿ ಆಶಿ ಆಸಾ : ವಾಲ್ಮೀಕಿ ಋಷಿ ಜಾಂವ್ಚ್ಯಾಧಿಂ ವಾಟ್ಸುರ‍್ಯಾಂಕ್ ಆಡಾವ್ನ್ ತಾಂಕಾಂ ಲುಟ್ತಾಲೊ ಆನಿ ಆಪ್ಲ್ಯಾ ಬಾಯ್ಲ್ ಭುರ್ಗ್ಯಾಂಕ್ ಪೊಸ್ತಾಲೊ. ಆಪ್ಲ್ಯಾ ಕರ್ನ್ಯಾಂಕ್ ಆನಿ ತ್ಯಾ ವರ್ವಿಂ ಆಪ್ಣೆ ಅಧಾರ್ಚ್ಯಾ ಪಾತ್ಕಾಂತ್ ತೀಂಯ್ ಭಾಗಿದಾರ್ ಮ್ಹಣ್ ತೊ ಪಾತ್ಯೆಲ್ಲೊ. “ತಾಂಚ್ಯೆ ಖಾತಿರ್‌ಚ್ ನ್ಹಯ್ವೇ ಹಾಂವೆ ಹೆಂ ಸಕ್ಕಡ್ ಕರ್ಚೆಂ?” ಮ್ಹಣ್ ತಾಚೆಂ ತರ್ಕ್. ಎಕಾ ದಿಸಾ ಥೊಡ್ಯಾ ಸಾಧುಂಕ್ ಆಡಾಯ್ತಾನಾ ತಾಣಿಂ “ತುಜ್ಯಾ ಪಾತ್ಕಾಂತ್ ತುಜ್ಯಾ ಘರ್ಚಿಂ ಭಾಗಿದಾರ್ ಜಾವ್ನ್ ಆಸಾತ್‌ಗೀ ? ಮ್ಹಣ್ ಪಯ್ಲೆಂ ವಚೊನ್ ತಾಂಚ್ಯೆಲಾಗಿಂ ವಿಚಾರ್” ಮ್ಹಣ್ ತಾಕಾ ಸಾಂಗ್ಲೆಂ ಖಂಯ್. ಆನಿ ತಾಣೆ ಹೆಂ ಸವಾಲ್ ಬಾಯ್ಲೆ ಭುರ್ಗ್ಯಾಂಲಾಗಿಂ ವಿಚಾರ್ತಾನಾ ತಾಣಿ “ತುಜ್ಯಾ ಪಾತ್ಕಾಂಕ್ ತುಂಚ್ ಜವಾಬ್ದಾರ್, ಆಮಿ ತಾಂತು ವಾಂಟೆಲಿ ನಾಂವ್” ಮ್ಹಣ್ ಜಾಪ್ ದಿಲಿ ಖಂಯ್! ಹೆಂ ಆಯ್ಕೊನ್ ವಾಲ್ಮೀಕಿಕ್ ಜ್ಞಾನೋದಯ್ ಜಾಲೆಂ. ಮನಿಸ್ ಆಪ್ಲ್ಯಾ ಸರ್ವ್ ಕರ್ತುಬಾಂಕ್,  ಬರ‍್ಯಾ ಯಾ ವಾಯ್ಟ್ , ಆಪುಣ್ಂಚ್ ಕಾರಣ್ ಆನಿ ಜವಾಬ್ದಾರಿ ಜಾವ್ನಾಸಾ ಮ್ಹಳ್ಳೆಂ ತಾಕಾ ಸಮ್ಜಾಲೆಂ.

ವ್ಹಯ್ಲ್ಯಾ ಕಾಣಿಯೆವರ್ವಿಂ ಭಾರತೀಯ್ ತತ್ವ ಗಿನ್ಯಾನಾಂತ್ ಅಸ್ತಿತ್ವವಾದಾಚಿಂ ಪಾಳಾಂ ಆಸ್ಚಿಂ ದಿಸ್ತಾತ್. ಕನ್ನಡ ಸಾಹಿತ್ಯಾವಿಶಿಂ ಸಾಂಗ್ಚೆಂ ತರ್, ಅಸ್ತಿತ್ವವಾದಾಚಿಂ ಲಕ್ಷಣಾಂ, “ನವ್ಯ ಸಾಹಿತ್ಯ” ದ್ವಾರಿಂ ಮ್ಹಣ್ ಸಾಂಗ್ಯೆತ್. ತಶೆಂ ಪಳೆಂವ್ಕ್ ಗೆಲ್ಯಾರ್  ಕನ್ನಡ ಸಾಹಿತ್ಯಾಂತ್  ‘ಅಧುನಿಕತಾ’ ಮ್ಹಣ್ಚಾ ತಸಲ್ಯಾ ಸಾಹಿತ್ಯಾಚಿ ಸುರ್ವಾತ್ ಜಾಲ್ಲಿಚ್ ನವ್ಯ ಸಾಹಿತ್ಯ ಕಾಳಾರ್. ಹಾಚ್ಯೆ ಪಾಟ್ಲ್ಯಾನ್ ಪಾಶ್ಚಾತ್ಯ್ ಸಾಹಿತ್ಯಾಚೊ ದಾಟ್ ಪ್ರಭಾವ್ ಆಸ್‌ಲ್ಲೊ. ಬಿ. ಎಮ್. ಶ್ರೀ ಚ್ಯಾ “ಇಂಗ್ಲಿಷ್ ಗೀತೆಗಳು’” ಕವಿತಾಂ ದ್ವಾರಿಂ ಕನ್ನಡಾಂತ್ ನವೆಸಾಂವ್ ಉದೆಲ್ಲೆಂ. ಕನ್ನಡ ಸಾಹಿತಿ ತಶೆಂ ವಾಚ್ಪಿ ಸಯ್ತ್ ಇಂಗ್ಲಿಷ್ ಸಾಹಿತ್ಯ್ ವಾಚುಂಕ್ ಲಾಗ್ಲೆ. ಹೆಂ ಜಾಲ್ಲೆಂ 20 ವ್ಯಾ ಶತಮಾನಾಂತ್. ನವ್ಯ ಸಾಹಿತ್ಯ್ ಉದೆಲ್ಲೆಂ 20 ವ್ಯಾ ಶತಮಾನಾಚ್ಯಾ 1950-70 ವ್ಯಾ ಮಧೆಂಗಾತ್. “ವಸ್ತು ವಿಷಯ್” (thematic) ಆನಿ ತಂತ್ರ್ ಯಾ ಶೈಲಿ (technique or style) ಮ್ಹಳ್ಳ್ಯಾ ದೋನ್ ಆಯಾಮಾಂ ದ್ವಾರಿಂ.

ನವ್ಯ ಸಾಹಿತ್ಯಾಂತ್ ವಾಪಾರ್ಲೆಲಿ ಭಾಸ್ ವೆಗ್ಳಿಚ್ ಆಸೊನ್ ಆನಿ ತ್ಯಾ ಮುಖಾಂತ್ರ್ ವಾಚ್ಪ್ಯಾಂಕ್ ಚಿಂತ್ಪಾಂಕ್ ಲಾಂವ್ಚೆಂ ಪ್ರಯತನ್ ಚಲ್ಲೆಂ.  ಹ್ಯಾ ಅಧುನಿಕತಾ ಯಾ ನವ್ಯ ಚಳುವಳಿಂತ್ ಪಯ್ಲ್ಯಾ ಫಂಗ್ತೆರ್ ಆಸ್ಚಿಂ ನಾಂವಾ ಕನ್ನಡ ಸಾಹಿತ್ಯ್ ವಾಚ್ತೆಲ್ಯಾ ಸರ್ವಾಂಕ್ ಒಳ್ಕಿಚಿಂ – ಗೋಪಾಲಕೃಷ್ಣ ಅಡಿಗ, ಎ ಕೆ. ರಾಮಾನುಜನ್, ಶಾಂತಿನಾಥ ದೇಸಾಯಿ, ಯು.ಆರ್, ಅನಂತ ಮೂರ್ತಿ, ಪಿ. ಲಂಕೇಶ್,ರಾಮಚಂದ್ರ ಶರ್ಮ, ಗಂಗಾಧರ ಚಿತ್ತಾಲ, ಚಂದ್ರಶೇಖರ ಕಂಬಾರ, ಚಂದ್ರಶೇಖರ ಪಾಟೀಲ, ಗಿರೀಶ್ ಕಾರ್ನಾಡ್, ಗಿರಿ, ನ.ರತ್ನ ಆನಿ ಹೆರಾಂಚಿಂ.  ಹಾಂಚೆರ್ ಪಾಶ್ಚ್ಯಾತ್ಯ್ ಸಾಹಿತ್ಯಾಚೊ ಪ್ರಭಾವ್ ತಸೆಂ ಅಸ್ತಿತ್ವವಾದಿ ಚಿಂತ್ಪಿ ಹೈಡಗರ್, ಸಾತ್ರ್, ಆಲ್ಬರ್ಟ್ ಕಮೂ, ಕಾಫ್ಕಾ, ಟಿ .ಎಸ್. ಯೆಲಿಯೆಟ್, ಬ್ರೆಕ್ಟ್  ಆನಿ ಹೆರಾಂಚೊ ಪ್ರಭಾವ್ ಆಸ್‌ಲ್ಲೊ. ಕನ್ನಡಾಂತ್ ‘ನವ್ಯ ಕವಿತೆ’ ವಿಶ್ಯಾಂತ್ ಪಯ್ಲೆಂ ಪಾವ್ಟಿಂ ಉಲ್ಲೇಕ್ ಕೆಲ್ಲೊ ವಿ. ಕೃ . ಗೋಕಾಕಾನ್, 1937 ವ್ಯಾ ವರ್ಸಾ ಮ್ಹಣ್ಯೆತ್. ಹ್ಯಾ ಲೇಕನಾಂತ್ ಕನ್ನಡ ಸಾಹಿತ್ಯಾಂತ್ ಅಸ್ತಿತ್ವವಾದಿ ಚಿಂತಪ್ ಹಾಡ್‌ಲ್ಲ್ಯಾ ಥೊಡ್ಯಾ ಬರಯ್ಣಾರಾಂಚ್ಯಾ ಸಾಹಿತ್ಯಾ ವಿಶಿಂ ಸಮ್ಜೊಂಚೆಂ ಪ್ರೇತನ್ ಕೆಲಾಂ.

ಗೊಪಾಲಕೃಷ್ಣ  ಅಡಿಗ

‘ನವೋದಯ’ ಕಾಳಾರ್‌ಚ್ ಬರಂವ್ಕ್ ಸುರು ಕೆಲ್ಯಾರೀ, ಉಪ್ರಾಂತ್ ಅಡಿಗ ‘ನವ್ಯ’ ಯುಗಾಕ್ ಚಡ್ ಲಾಗ್ಸಿಲೊ ಜಾಲೊ. ನವೋದಯ ಸಾಹಿತ್ಯಾಂತ್ ಹಾಣೆಂ ಭರ್ವಸೊ, ದೇಶ್ ಭಕ್ತ್, ಪರಿಸರ್ ಇತ್ಯಾದಿ ವಿಶಯಾಂಚೆರ್ ಕಾವ್ಯ್ ರಚ್ಲೆಂ. ನವ್ಯ ಯುಗಾಂತ್ ಅಸ್ತಿತ್ವವಾದಾಚಿಂ ಲಕ್ಶಣಾಂ ಘೆವ್ನ್ ಹಾಚೆಂ ಕಾವ್ಯ್ ಜಲ್ಮಾಲೆಂ. ಹಾಚ್ಯಾ ‘ಚಂಡ ಮದ್ದಳೆ’ (1954) ಕಾವ್ಯ್ ಸಂಕಲಾನಾಂತ್ ಹೆಂ ಪಳೆವ್ಯೆತ್. ಹಾಚೆರ್ ಟಿ. ಎಸ್.ಯೆಲಿಯೆಟಾನ್ ಬರಯಿಲ್ಲೆಂ ಕವನ್ ‘ದ ವೇಷ್ಟ್ ಲ್ಯಾಂಡ್’ ಹಾಚೊ ಪ್ರಭಾವ್ ಆಸಾ ತೆಂ ಸ್ಪಷ್ಟ್ ಜಾತಾ. ತರೀ ಪಾಶ್ಚ್ಯಾತ್ಯ್ ಸಾಹಿತ್ಯಾಚೊ  ಪ್ರಭಾವ್ ಭಾರತೀಯ್ ಸಾಹಿತ್ಯ್ ಯಾ ಕನ್ನಡ ಸಾಹಿತ್ಯಾಂತ್ ಜಾಯ್ಜೆ  ತಿತ್ಲೊ ಪರಿಣಾಮ್ ಅಡಿಗಾಚ್ಯೆ ಕಾಳಾರ್ ಜಾಲೊ ನಾ.

ಭಾರತಾಕ್ ಸುಟ್ಕಾ ಮೆಳೊನ್ ಧಾ ವರ್ಸಾಂ ಸಂಪ್ತಾನಾಂಚ್ ಸಾಹಿತ್ಯ್ ಬೆಜಾರಾಯೆನ್, ಭ್ರಮನಿರಸನ್ ಜಾವ್ನ್ ಆಸ್ಚೆಂ ಪಳೆವ್ಯೆತ್. ಕನ್ನಡಾಚ್ಯೆ ಸಂದರ್ಭಾರ್ ಪಳೆಲ್ಯಾರ್, ನವ್ಯ ಸಾಹಿತ್ಯ್ ಮ್ಹಳ್ಯಾರ್ ಅಸ್ತಿತ್ವವಾದಿ ಸಾಹಿತ್ಯ್ ಆನಿ ಅಸ್ತಿತ್ವವಾದಿ ಸಾಹಿತ್ಯ್ ಮ್ಹಳ್ಯಾರ್ ನವ್ಯ ಸಾಹಿತ್ಯ್ ಮ್ಹಣೊಂಕ್ ಜಾಯ್ನಾ ಜಾಲ್ಯಾರೀ ಅಸ್ತಿತ್ವವಾದಾಚಿ ಏಕ್ ಗಾಂಚ್ ನವ್ಯ ಸಾಹಿತ್ಯಾಂತ್ ಆಸ್ಚೊ ಪಳೆವ್ಯೆತ್. ಹಾಂಗಾಸರ್ ದೇಶ್ ಸುಟ್ಕೆಚ್ಯಾಕೀ ವ್ಯಕ್ತಿ ಸ್ವಾತಂತ್ರ್ಯ್ ಚಡ್ ದಿಸ್ತಾ.

ಅಸ್ತಿತ್ವವಾದಿಚಿಂ ಧೋರಣಾಂ, ಯಾ ಮೌಲ್ಯಂ ಅಡಿಗಾಚ್ಯಾ ಕವಿತೆಂನಿ ಧರ್ ಧರ್ ಮ್ಹಣ್ ದಿಸಾನಾತ್ಲ್ಯಾರೀ ಕವಿತೆಂನಿ  ವಿಚಾರ್, ಭಾಸ್, ಶೈಲಿ ಇತ್ಯಾದಿಂತ್ ತಾಣೆಂ ನವೆಸಾಂವ್ ಹಾಡ್ಲೆಂ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ‘ಹಳೆ ಮನೆಯ ಮಂದಿ’ (1953) ಕವನಾಚೆಂ ಏಕ್ ಚರಣ್ ವಾಚ್ಲ್ಯಾರ್ –

ನೀರು ತುಂಬಿದ್ದಂತೆ ಕಂಡ ಕೆರೆಯಲ್ಲೀಜು ಬುದ್ದಕೂಡಲೆ ಇದ್ದ
ನಿರೆಲ್ಲವೂ ಬತ್ತಿ ಕಾಲು ಕೆಸರಲ್ಲಿ ಸಿಕ್ಕಿದ ಹಾಗೆ
ಹೊಟ್ಟೆ ತುಂಬಾ ಸತ್ಯ ಶಿವಸುಂದರದ ಜಳ್ಳಿನುಪ್ಪಿಟ್ಟು ತಿಂದು,
ಮಂತ್ರಪೂತ ನಲ್ಲಿಯ ಬೀರನೆರಡು ಲೋಟಾ ಹೀರಿ
ಹೊರ ಬಿದ್ದೆ.
ಅಪ್ಪಟ ಯುರೋಪು ಮಾದರಿ ಹೋಟೆಲಿಗೆ ಚಿಮ್ಮಿ
ಸೋಫಾದ ಮೆಲಕ್ಕೆ ಬಿದ್ದೆ.

ಹಾಂಗಾ ಜಿಣ್ಯೆ ದೀಶ್ಟ್ ಆಸಾ. ಕಾವ್ಯಾಚೆಂ ಸತ್ವ್ ಅಸಾ. ಸಾಂಗಾತಾ ‘ಅಸಂಗತ್’ ವಿಚಾರ್. ಏಕಾ ಕಡೆ ಕಿರ್ಂಚೆನ್ ಭರ್ಲಲೊ ಪರ್ನೊ ವಾಳ್, ಆನ್ಯೆಕಾ ಕಡೆ ಆಮ್ಚಿ ಸಂಸ್ಕ್ರತಿ –  ಭಾಯ್ರ್ ಯುರೋಪ್ ಮಾದರಿಚೊ ಸೊಫಾ. ಹ್ಯಾ ದೊಗಾಂ ಮಧೆಂ ಮನಿಸ್ ‘ಅತಂತ್ರ್’ ಜಾವ್ನಾಸಾ.

ಹಿಮಗಿರಿಯ ಕಂದರ (1953), ಗೊಂದಲಪುರ (1953), ಚಂಡೆ ಮದ್ದಳೆ (1954) , ವರ್ಧಮಾನ(1970) ಅಸಲ್ಯಾ ಕಾವ್ಯ್ ಸಂಕಲಾನಿ ನವ್ಯ ಸಾಹಿತ್ಯ್ ರೂಪಿತ್ ಜಾಂವ್ಚೆಂ ಪಳೆಮ್ವ್ಕ್ ಮೆಳ್ತಾ.

ಎ.ಕೆ. ರಾಮಾನುಜನ್

ಅಡಿಗಾಚ್ಯಾಕೀ ಪ್ರಾಯೆನ್ ಧಾ ವರ್ಸಾಂ ಲ್ಹಾನ್ ಜಾಲ್ಯಾರೀ ಕನ್ನಡ ಸಾಹಿತ್ಯಾಂತ್ ಹಾಚೆಂ ನಾಂವ್ ಮಹತ್ವಾಚೆಂ. ಹಾಣೆಂ ಬರಯಿಲ್ಲೊ ಸುರ್ವೆಚೊ ಕವಿತಾ ಪುಂಜೊ  ‘ಹೊಕ್ಕುಳಲ್ಲಿ ಹೂವಿಲ್ಲ’ (1964) ಕನ್ನಡ ನಾಹಿತ್ಯ್ ವಲಯಾಂತ್ ಭಾರಿಚ್ ಆವಾಜ್ ಕರುಂಕ್ ಸಕ್ಲೊ. ‘ಚಂಡೆ ಮದ್ದಳೆ’ ಪ್ರಗಟ್ ಜಾಲ್ಲ್ಯೆ ಧಾ ವರ್ಸಾಂ ಉಪ್ರಾಂತ್ ಹಾಚೊ ಕವಿತಾ ಪುಂಜೊ ಪ್ರಗಟ್ ಜಾಲ್ಲೊ.  ಹಾಂಗಾಸರ್ ಅಡಿಗಾಚೊ ಆವಾಜ್, ಧಾಂವ್ಣಿಂ ನಾಸ್ತಾನಾ, ಸಾಮಾನ್ಯ್ ಶೈಲೆನ್ ಬರಯಿಲ್ಲಿಂ 39 ಕವಿತಾ ಆಸಾತ್. ಶೈಲಿಚಾಕೀ ವ್ಹಡ್ ಏಕ್ ನವೆಸಾಂವ್ ವಾಚ್ಪ್ಯಾಂನಿ , ವಿಮರ್ಶಕಾಂನಿ ಹ್ಯಾ ಕವಿತೆಂನಿ ಪಳೆಲೆಂ. ಚಡಾವತ್ ಕವಿತಾ ಮನ್ಶ್ಯಾಚಿ ಪರಿಚಯ್ ( ಐಡೆಂಟಿಟಿ) ಹ್ಯಾ  ಸಂಬಂಧಿತ್ ಜಾವ್ನಾಸಾತ್.

ನಾಂವ್ಂಚ್ ವಿವಾದಾತ್ಮಕ್ ತಶೆಂ ನಿಶೇಧಾತ್ಮಕ್. ವಿಶ್ಣುಚ್ಯಾ ಹಜಾರ್ ನಾಂವಾ ಪೈಕಿ ಏಕ್ ನಾಂವ್ ‘ಕಮಲನಾಭ’, ಮ್ಹಳ್ಯಾರ್ ಬೊಂಬ್ಲೆಂತ್ ಫುಲ್ ಆಸಾ ಮ್ಹಳ್ಳಿ ಎಕ್ ಪಾತ್ಯೆಣಿ. ಹಿ ಪಾತ್ಯೆಣಿಂಚ್ ನಾಕಾ ಮ್ಹಣ್ ‘ಸೊಡ್ನ್ ದಿಂವ್ಚೊ’  ಮನೋಭಾವ್ ಕವಿತೆಂತ್ ದಿಸ್ತಾ.

ಹಾಚ್ಯಾ ಆನ್ಯೆಕಾ ‘ಕಾರಣ’ ನಾಂವಾಚ್ಯೆ ಕವಿತೆಂತ್ ಕಾವ್ಯ್ ನಾಯಕ್ ಚಾಳಿಸ್ ವರ್ಸಾಂ ಭರ್ತಾನಾ ರೂಕಾಚಿಂ ಕದೆಲಾಂ, ಮೆಜಾಂ ಇತ್ಯಾದಿ ಪಳೆವ್ನ್ ವಿಪ್ರೀತ್ ಥರಾನ್ ರಡ್ತಾ. ದಾಕ್ತೆರ್ ಯೇವ್ನ್ ಇಂಜೆಕ್ಶನ್ ತೊಪುನ್ ವೆತಾ. ತೀನ್ ದಿಸಾಂ ಉಪ್ರಾಂತ್ ನಿದೆಂತ್ಲೊ ಉಟ್ಲೊಲೊ ತೊ ತಸೆಂ ಕಿತ್ಯಾಕ್ ಜಾಲೆಂ ಮ್ಹಳ್ಳೆಂಚ್ ವಿಸ್ರಾತಾ.

ಮಂಗೋಲಿಯದಲ್ಲಿ ಒಬ್ಬ ರಾಜ
ಇದ್ದನಂತಲ್ಲ
ಅವನು ಯಾವುದೋ
ದೂರ ದೇಶಕ್ಕೆ ದಂಡೆತ್ತಿ ಹೋದಾಗ
ಅಲ್ಲೊಂದು ಹೊಸ ಹಕ್ಕಿ ಹಾಡು ಕೇಳಿಸಿ
ಆ ಹಾಡು ನನಗೆ ಬೇಕು ಎಂದು
ಹಾಡಿಗೆಂದು ಹಕ್ಕಿ ಹಿಡಿದು
ಹಕ್ಕಿಯ ಜೊತೆಗೆ ಗೂಡೆತ್ತಿ
ಗೂಡಿನಡಿ ರೆಂಬೆ
ರೆಂಬೆಗೆ ಕೊಂಬೆ
ಕೊಂಬೆಗೆ ಮರ
ಮರದಡಿಯ ಬೇರು
ಬೇರು ಸುತ್ತಿನ ಹೆಂಟೆ ಮಣ್ಣು
ಆ ಊರು
ನೀರು
ಹಿಂಗಾರು
ಆ ಪ್ರದೇಶ
ದೇಶ
ಆ ಇಡೀ ರಾಜ್ಯ
ಎಲ್ಲ ಹೊತ್ತು ಹಾಕಬೇಕು
ಎನ್ನಿಸಿ
ಇದ್ದ ಬಿದ್ದ ಆನೆ ಕುದುರೆ ರಥ
ಸೈನ್ಯ ಎಲ್ಲ ಕೂಡಿಸಿ
ಇಡೀ ರಾಜ್ಯವನ್ನೆಲ್ಲ ಗೆದ್ದು
ತನ್ನ ಸಾಮ್ರಾಜ್ಯಕ್ಕೆ ಸೇರಿಸಿಕೊಂಡು
ಮನೆಗೇ ಹೋಗಲಿಲ್ಲ.
(ಆ ಹಕ್ಕಿ ಬೇಕಾದರೆ)

ಕಿತೆಂ ಆಪ್ಲ್ಯಾ ದೇಶಾಕ್ ಕುಡ್ಸುಂಕ್ ತೊ ಆಶೆತಾಗೀ,ತ್ಯಾಚ್ ಸಂಗ್ತಿಂಕ್ ತೊ ಒಳಗ್ ಜಾತಾ. ರಾಮಾನುಜಾಚಿ ಅನ್ಯೇಕ್ ಫಾಮಾದ್ ಕವಿತಾ –  ಅಪ್ಪ ಮಗ.

ಬಚ್ಚಲು ಮನೆ ಗಂಗಾಳದಲ್ಲಿ
ಅಪ್ಪ ಮರೆತ ಹೊಸ ಹಲ್ಲು ಸ್ವತಂತ್ರವಾಗಿ
ಹಲ್ಲು ಕಿರಿಯಿತು.
ನಾನು ನೋಡಿದೆ.
(ಅಪ್ಪ, ಮಗ)

ಹಾಚಿ ಮಟ್ವಿ ಕಾದಂಬರಿ ಮತ್ತೊಬ್ಬನ ಆತ್ಮಚರಿತ್ರೆ (1978) ಅಸ್ತಿತ್ವಾವಿಶಿಂ ಸಭಾರ್ ಸವಾಲಾಂ ಉಟಯ್ತಾ. ಹ್ಯಾಚ್ ಕಾದಂಬರಿಂತ್ ಅಸಲೆಂ ಏಕ್ ಉಲವ್ಣೆಂ ಆಸಾ :

‘ತಕ್ಲೆಂತ್ ಕೆದ್ನಾಂ ಪಳೆಲಾರೀ ಬರಂವ್ಚೆ. ಕಿತೆಂ ಪಳೆಲಾರೀ, ಹೂಂಗ್ಲ್ಯಾರೀ ಬರಯ್ಜಾಯ್ ಮ್ಹಳ್ಳಿ ಪಾಡ್ ಆತುರಾಯ್. ಏಕ್ಲ್ಯಾಕ್ ಬರಂವ್ಚೆಂ ಕಿತ್ಲೆಂ ಪಿಶೆಂಗೀ ಮ್ಹಳ್ಯಾರ್ ತೊ ಏಕಾ ದಿಸಾ ಆಸೆಂ ಮ್ಹಣ್ತಾ: ‘ಮ್ಹಜೊ ಬಾಪಯ್ ಮೊರ್ತಾಸ್ತಾನಾ ,ಆಮಿ ಸಕ್ಡಾಂ ಲಾಗಿಂಚ್ ಆಸ್ಲೆಲ್ಯಾಂವ್. ತೊ ಉಸ್ವಾಸ್ ಸೊಡುಂಕ್ ಕಷ್ಟಾತಾಲೊ. ತಾಚ್ಯೆ ದೊಳೆ ವಯ್ರ್ ಸಕ್ಲಾ ವೆತಾಲೆ. ತೊಂಡಾಂತ್ ಒತ್ಲೆಲೆಂ ಉದಾಕ್ ಗಳ್ಯಾಂತ್ ದೆವಾನಾಸ್ತಾನಾ ತೊ ವಳ್ವಳ್ತಾಲೊ.ತೆದ್ನಾಂ ಮ್ಹಜ್ಯಾ ತಕ್ಲೆಂತ್ ಕಿತೆಂ ಚಲ್ತಾಲೆಂ ಗೊತ್ತಾಸಾವೇ? ತೆಂಚ್ ಬರಯ್ಜಾಯ್,ಜೊಕ್ತೆ ಸಬ್ದ್ ಘಾಲಿಜಾಯ್ ಇತ್ಯಾದಿ. ಥುತ್!’ ಮ್ಹಣ್ ಕಾಂಟಾಳ್ಳೊಂ’

ಯು.ಆರ್.ಅನಂತ ಮೂರ್ತಿ

ಹಾಚಿ ‘ಎದೆಂದೂ ಮುಗಿಯದ ಕಥೆ’ (1955) ಅಂತರ್ಮುಖಿ ಜಾವ್ನಾಸಾ. ಮನ್ಶ್ಯಾಕ್ ಸಂಸಾರಾಚಿ ಸಾರ್ಕಿ ಜಾಣ್ವಾಯ್ ಮೆಳ್ಚಿ ಭಾಯ್ಲ್ಯಾ ಅನ್ಭೊಗಾಂನಿ ನ್ಹಯ್, ಬದ್ಲಾಕ್ ಭಿತರ್ ಥಾವ್ನ್ ಮ್ಹಣ್ ಅಡಿಗಾ ಹ್ಯಾ ಬೂಕಾಕ್ ಬರಯಿಲ್ಲ್ಯಾ ಪಯ್ಲ್ಯಾ ಉತ್ರಾಂತ್ ಸಾಂಗ್ತಾ. ಮೂರ್ತಿ ಆಪ್ಲ್ಯಾ ಚಡಾವತ್ ಕಾದಂಬರಿನಿ ಅಸ್ತಿತ್ವವಾದಾಚಿಂ ತತ್ವಾಂ ವಾಪಾರ್ತಾ. ತಾಚಿ ವಿವಾದಾತ್ಮಕ್ ಕಾದಂಬರಿ ‘ಸಂಸ್ಕಾರ’ (1965) ಆನಿ ‘ಭಾರತೀಪುರ’ (1973) – ಕನ್ನಡಾಂತ್ ನವೆಸಾಂವ್ ಹಾಡ್ಲೆಲ್ಯೊ ಕಾದಂಬರಿ. ಸಂಸ್ಕಾರ ತ್ಯಾ ತೆಂಪಾರ್ ನಿಷೇಧಾಕ್ ಸಯ್ತ್ ಒಳಗ್  ಜಾಲ್ಲಿ.

‘ಸಾತ್ರ್ ಆನಿ ಅಸ್ತಿತ್ವವಾದ್’ ಮ್ಹಣ್ ತಾಣೆಂ ಬರಯಿಲ್ಲ್ಯಾ ಲೇಖನಾಂತ್ ಅಸ್ತಿತ್ವವಾದಾನ್ ಕೆಲ್ಲ್ಯಾ ಗೊಂದೊಳಾ ವಿಶಿಂ ತೊ ಬರಯ್ತಾ. ಸಂಸ್ಕಾರಾಂತ್ ಸಾತ್ರಾಚಿ ಸಾವ್ಳಿ ಆಸಾ. ‘ಮನ್ಶ್ಯಾಕ್ ರೂತಾ ಕರ್ಚ್ಯೆ ಪ್ರಕ್ರಿಯೆಂತ್ ಆರ್ಥಿಕ್, ಸಾಮಾಜಿಕ್ ಪ್ರಭಾವ್ ಘಾಲ್ತಾ ತರೀ, ಹ್ಯಾ ಪ್ರಭಾವಾಂತ್ ಶಿರ್ಕೊನ್ ಆಪ್ಲ್ಯಾ ಸ್ವಂತ್ ನಿರ್ಧಾರಾಚೆರ್ ಸಕ್ಕಡ್ ‘ಜಾಂವ್ಚೆಂ’ ಮ್ಹಣ್ ತೊ ಸಾಂಗ್ತಾ.

‘ಮಾಡ್ಡುಲೆಂ’ (ಹೊಲತಿ) ಚಂದ್ರಿಕಾ ಸಾಂಗಾತಾ ಸಂಭೋಗ್ ಕೆಲ್ಲ್ಯಾ ‘ಸಂಸ್ಕಾರಾಚೊ’ ನಾಯಕ್ ಬ್ರಾಮಣ್ ಪ್ರಾಣೇಶಾಚಾರ್ಯ ಮ್ಹಧ್ಯಾನೆ ರಾತಿಂ ಜಾಗೊ ಜಾವ್ನ್ ‘ಹಾಂವ್ ಖೈಂಸರ್ ಆಸಾಂ ?’, ‘ಹಾಂಗಾಸರ್ ಕಸೆಂ ಪಾವ್ಲೊಂ?’, ‘ಹೊ ಕಸಲೊ ಕಾಳೊಕ್?’ , ‘ಹೆಂ ಖಂಯ್ಚೆಂ ರಾನ್?’, ‘ಹೆಂ ಕೋಣ್?’ ಅಶೆಂ ಸವಾಲಾಂ ಆಪ್ಣಾಕ್‌ಚ್ ವಿಚಾರ್ತಾ. ಸಂಭೋಗ್ ಕರ್ನ್ ಏಕ್ ಕೂಡಿಚೊ ಅನುಭವ್ ಆನಿ ತಾಚೊ ಪರಿಣಾಮ್ ತಾಚ್ಯೆರ್ ಮಾನಸಿಕ್ ಆಘಾತ್ ಜಾವ್ನ್ ಬದ್ಲಾತಾ. ಸಂಭೋಗ್ ಕೆಲ್ಲ್ಯಾ ಪ್ರಾಣೆಶಾಚಾರ್ಯಕ್ ಅಪುಣ್ ಎದೊಳ್ ಜಿಯೆಲ್ಲಿ ಜಿಣಿ ಜಿಣಿಂಚ್ ನ್ಹಯ್, ಆತಾಂ ಆಪ್ಣಾಕ್ ‘ಸುಟ್ಕಾ’ ಮೆಳ್ಳಿ ಮ್ಹಣ್ ತೊ ಚಿಂತ್ತಾಂ.

ಕನ್ನಡಾಚೊ ಜೀನ್ ಪಾಲ್ ಸಾತ್ರ್ ಮ್ಹಣ್ ಅನಂತ ಮೂರ್ತಿಕ್ ವೊಲಾಯಿಲ್ಲೆಂ ಆಸಾ.

ಪಿ.ಲಂಕೇಶ್

ಕವಿ, ಕಾಣ್ಯೆಗಾರ್, ಪತ್ರ್‌ಕರ್ತ್, ಪಿ ಲಂಕೇಶ್ ಕನ್ನಡ ನವ್ಯ ಸಾಹಿತ್ಯಾಂತ್ ಏಕ್ ವ್ಹಡ್ ನಾಂವ್. ಹಾಚಿ ಕಾದಂಬರಿ ‘ಬಿರುಕು’ (1967) ಅಸ್ತಿತ್ವವಾದಾಚ್ಯಾ ಮೆಟಾಂನಿ ಚಲ್ತಾ. ‘ಏಕಾ ಪರಿಸರಾ ಥಾವ್ನ್ ಆನ್ಯೆಕಾಕ್ ಚುಕವ್ನ್ ಕಾಣ್ಘೆಂವ್ಚೊ ಆಪ್ಣಾಕ್‌ಚ್ ಆಪ್ಲ್ಯಾ‌ಪಣಾ ಥಾವ್ನ್ ಚುಕಂವ್ಕ್ ಪ್ರಯತನ್ ಕರ್ನ್ ಅಖ್ರೇಕ್ ಆಪ್ಣಾಕ್ ಚ್ ಒಳ್ಕುನ್ ಘೆಂವ್ಚಿ ಕಾಣಿ’ ಮ್ಹಣ್ ಲೇಖಕ್‌ಚ್ ಸಾಂಗ್ತಾ. ಪಾಶ್ಯಾತ್ಯ್ ಸಾಹಿತಿಂನಿ ಸಾಂಗ್ಚೆಂ ‘ಆತ್ಮ ವಂಚನೆ’ (Absurd) ಹ್ಯಾ ಕಾದಂಬರಿಂತ್ ಉಟೊನ್ ದಿಸ್ತಾ.

ಆಧುನಿಕ್ ಕನ್ನಡ ಸಾಹಿತ್ಯಾಂತ್ ಫ್ಯಾಂಟಸಿ ( fantasy ) ಪಯ್ಲೆಂ ಲಂಕೆಶಾನ್ ವಾಪಾರ್ಲೆಂ. ಅಸ್ತಿತ್ವವಾದಾಚೊ ಆನ್ಯೆಕ್ ಅಂಶ್ ‘ಅಸಂಗತ’ ಸಯ್ತ್ ಬಿರುಕು ಕಾದಂಬರಿಂತ್ ದಿಸ್ತಾ. ಹಳ್ಳೆಂತ್ಲೊ ಬಸವರಾಜ ಬೆಂಗ್ಳುರಾಕ್ ಶಿಕಾಪ್ ಕರ್ಚ್ಯಾಕ್ ಯೆತಾ. ಬೆಂಗ್ಳುರಾಂತ್ಲ್ಯಾ ಪರಿಸರಾಂತ್ ತೊ ‘ಪರ್ಕಿ’ (stranger) ಜಾತಾ. ಫಟ್ಕಿರ‍್ಯಾ, ಮೊಸ್ರಾಚ್ಯೆ, ಶಿಂತ್ರಾಳ್ಯಾ, ಸಂಸಾರಾಂತ್ ಶಿರ್ಕಾಲಾಂ ಮ್ಹಣ್ ತಾಕಾ ಕಳ್ತಾ. ಹಾಚ್ಯೆ ಥಾವ್ನ್ ಭಾಯ್ರ್ ಯೆಂವ್ಚೆಂ ತಾಚೆಂ ಪ್ರಯತನ್. ಹ್ಯಾ ಕಾದಂಬರಿಂತ್ ಕಾಫ್ಕಾಚೊ ಆನಿ ಬೆಕೆಟಾಚೊ ಪ್ರಭಾವ್ ‘ಅಸಂಗತ್’ (absurd) ಮುಖಾಂತ್ರ್ ಆಸಾ. ಕಾದಂಬರಿಚೊ ನಾಯಕ್ ಬಸವರಾಜ ಹಾಣೆ ಆಪ್ಲ್ಯಾ ಸ್ಕಾಲರ್‌ಶಿಪ್ಪಾಚೊ ದುಡು ಕಾಣ್ಘೆಂವ್ಕ್ ಕರ್ಚೆಂ ಸಾಹಸ್, ಸರ್ಕಾರಿ ಧಪ್ತರಾಚಿಂ ಕೂಡಾಂ, ಮೆಟಾಂ, ಆಳ್ಶ್ಯಿ ಕಾಮ್ಗಾರ್, ಧುಳಿನ್ ಭರ್ಲೆಲಿಂ ಫಾಯ್ಲಾಂ ಇತ್ಯಾದಿ ಸಕ್ಕಡ್ ಕಾಫ್ಕಾಚೊ ಸಂಸಾರ್ ದಾಖಯ್ತಾತ್.  ಹ್ಯಾ ಕಾದಂಬರಿಂತ್ ಇಂಗ್ಲಿಶ್ ಸಯ್ತ್ ಆಸಾ.

‘ Ladies and gentlemen,what I am speak of…. The subject I am supposed to- no,I have decided to-no,the topic which in its faseination (sic)-no, Emerson was a great industrialist who mades his humble contribution to Philosophical Industrialism Thank you’.

ಸ್ಪೆಲ್ಲಿಂಗ್ ಚೂಕಿ. ಎಮರ್ಸನ್ ಇಂಡಸ್ಟೀಯಲಿಷ್ಟ್  ನ್ಹಯ್ ಇತ್ಯಾದಿ ವಾಚ್ತಾನಾ ಅಸ್ತಿತ್ವವಾದಾಚೆಂ ‘ಅಸಂಗತ್'(absurd) ರೂಪ್ ದಿಸೊನ್ ಯೆತಾ.

ಗಿರೀಶ್ ಕಾರ್ನಾರ್ಡ್

ನಾಟಕಾಂದ್ವಾರಿಂ ಕನ್ನಡ ಸಾಹಿತ್ಯ್ ಗಿರೆಸ್ತ್ ಕೆಲ್ಲ್ಯಾ ಕಾರ್ನಾಡಾಚೊ ಪಯ್ಲೊ ನಾಟಕ್ ‘ಯಯಾತಿ’ (1961). ದುಸ್ರೊ ‘ತುಘಲಕ್’ (1964) ಭಾರಿಚ್ ನಾಂವಾಡ್ಲೆಲೊ ನಾಟಕ್. ತಿಸ್ರೊ ‘ಹಯವದನ’ (1970). ಹೆ ತಿನೀ ನಾಟಕ್ ಚಾರಿತ್ರಿಕ್ ಘಡಿತಾಂಚೆರ್ ಭಾಂದ್ಲೆಲೆ ಜಾವ್ನಾಸಾತ್. ಯಯಾತಿಂತ್ ಪೂತಾಚ್ಯೆಂ ತರ್ನಾಟ್ಪಣ್ ಮ್ಹಾತಾರೊ ಜಾಲ್ಲೊ ಯಯಾತಿ ಆಪ್ಣಾಯ್ತಾ. ಪೂತಾಚಿ ಬಾಯ್ಲ್, ತಾಚಿ ಸುನ್ ಚಿತ್ರಲೇಖಾ ತೆದ್ನಾಂ ತಾಕಾ ಅಸ್ತಿತ್ವಾಚಿಂ ಸವಾಲಾಂ ವಿಚಾರ್ತಾನಾ ತೊ ಜಾಗೊ ಜಾತಾ. “ತೂಂವೆ ತುಜ್ಯಾ ಪೂತಾ ಥಾವ್ನ್ ತಾಚ್ಯೆಂ ತರ್ನಾಟ್ಪಣ್ ಲುಟ್ಲೆಂಯ್. ತ್ಯಾ ತರ್ನಾತ್ಪಣಾ ಸಾಂಗಾತಾ ತಾಕಾ ಚಿಡ್ಕುನ್ ಆಸ್ಲೆಲೆಂ ಸಕ್ಕಡ್ ಲುಟಿಜಾಯ್ ಮ್ಹಣ್ ತುಜಿ ಆಶಾ!” ಹೆಂ ಆಯ್ಕೊನ್ ತೊ ತರ್ನಾಟ್ಪಣ್ ಪಾಟಿಂ ಪೂತಾಕ್ ಒಪ್ಸಿತಾ. ಪರ್ತುನ್ ಮ್ಹಾತಾರೊ ಜಾತಾ. ಪೂಣ್,ತ್ಯಾ ವಗ್ತಾ ಚಿತ್ರಲೇಖಾ ವೀಕ್ ಪಿಯೆವ್ನ್ ಮೆಲಾಂ.

ಆಲ್ಬರ್ಟ್ ಕಾಮೂಚೊ ನಾಯಕ್ ಕಲಿಗುಲ ಬರಿಚ್ ಕಾರ್ನಾಡಾಚೊ ತುಘಲಕ್. ಅಪುಣ್ಂಚ್ ದೇವ್ ಜಾಂವ್ಕ್ ಆಶೆಂವ್ಚೊ. ಅಸಾಧ್ಯ್ ಆಸ್ಚೆಂ ಸಾಧ್ಯ್ ಕರ್ಚ್ಯಾಕ್ ವದ್ದಾಡ್ಚೊ. ತುಘಲಕಾ ಥಂಯ್ ಆಸ್ಚ್ಯೊ ಸಕ್ಕಡ್ ಬೂದಿ ಅಸಹಾಯಕ್ ತಶೆಂ ಎಕ್ಸುರ್ಪಾಣಾಚೆಂ ಪರಿಣಾಮ್ ಸಯ್ತ್ ವ್ಹಯ್.

ಹಯವದನ ದುಸ್ರೆಂಚ್ ಸವಾಲ್ ಉಡಂವ್ಚೊ ನಾಟಕ್. ಕೂಡ್ ಆನಿ ಬೂದಿಕ್ ಅದಿಂ ಥಾವ್ನ್ ಆಸ್ಚ್ಯಾ ಸಂಬಂಧಾ ವಿಶ್ಯಾಂತ್. ಹ್ಯಾ ನಾಟಕಾಂತ್ ಕೂಡಿಚೊ ಸಂಕೇತ್ ಜಾವ್ನ್ ಕಪಿಲ ಆನಿ ಬೂದಿಕ್ ಸಂಕೇತ್ ಜಾವ್ನ್ ದೇವದತ್ತ – ಹಾಂಚಿ ತಕ್ಲಿ ಬದ್ಲಾತಾ. ದೇವದತ್ತಾಚಿ ಬಾಯ್ಲ್ ಹ್ಯಾ ದೊಗಾಂ ತಕ್ಲೆಚ್ಯಾ ಕೂಡಿಂತ್ ಕೊಣಾಚಿ ಆಪ್ಲ್ಯಾ ಘೊವಾಚಿ ಮ್ಹಣ್ ಸಮ್ಜೊಂವ್ಕ್ ಪ್ರಯತನ್ ಕರ್ಚಿ ಏಕ್ ಸಮಸ್ಯಾ ಜಾಲ್ಯಾರ್, ಹರ್ಯೆಕ್ ಜಿವಿ ಪೂರ್ಣಾವತಾರ್ ಆಪ್ಣಾಂವ್ಚೆಂ ಯಾ ಆಪ್ಣಾಂವ್ಕ್ ಜಾಯ್ನಾಸ್ಚೆಂ ಆನ್ಯೆಕ್ ಸಮಸ್ಯಾ. ಉಲಂವ್ಚೊ ಘೊಡೊ, ಉಲಯ್ನಾತ್ಲೆಲೆಂ ಭುರ್ಗೆಂ, ಪ್ರಕೃತಿಕ್  ವಿರೋಧ್ ವೆಚೇಂಯ್ ಏಕ್ ಸಮಸ್ಯಾ. ನಾಟಾಕಾಚ್ಯೆ ಅಖ್ರೇಕ್ ಘೊಡೊ ಉಲಯ್ನಾ ಆನಿ ಭುರ್ಗೆಂ ಉಲಯ್ತಾ.

ಹ್ಯಾ ವಯ್ಲ್ಯಾ ಚವ್ಗಾಂಕ್ ಸೊಡ್ನ್ ಕನ್ನಡಾಂತ್ ಅಸ್ತಿತ್ವವಾದಾಚಿಂ ಲಕ್ಷಣಾಂ ವಾಪಾರುನ್ ಕೃತಿಯೊ ರಚೆಲ್ಯಾಂ ಪಯ್ಕಿ ಗಿರಿ ( ಎಮ್.ಎನ್.ಹೆಗ್ಡೆ) ಚಿ ‘ಗತಿಸ್ಥಿತಿ’ ಕಾದಂಬರಿ, ನ. ರತ್ನಾ ಹಾಚೊ ‘ಎಲ್ಲಿಗೆ’ (1969) ಆನಿ ‘ಗೋಡೆ ಬೇಕೇ ಗೋಡೆ’ (1973) ನಾಟಕ್ ಆನಿ ಚಂದ್ರಶೇಖರ ಪಾಟೀಲ (ಚಂಪಾ) ಹಾಚೊ ‘ಕೊಡೆಗಳು’ (1969) ಆನಿ ‘ಅಪ್ಪ’ (1969) ನಾಟಕ್ ಪ್ರಮುಖ್ ಜಾವ್ನಾಸಾತ್.

(ಮುಖ್ಲ್ಯಾ ಅವಸ್ವರಾಂತ್ ಅಸ್ತಿತ್ವವಾದ್ ಸಿದ್ಧಾಂತಾಚೆರ್ ವಿಣ್ಲೆಲಿ ಏಕ್ ಕಾಣಿ ವಾಚುಂಕ್ ಮೆಳ್ತೆಲಿ) 

► ಉಬ್ಬ, ಮೂಡ್‌ಬಿದ್ರಿ