ಆದ್ಲ್ಯಾ ಹಫ್ತ್ಯಾಂತ್ ರುಪಯ್ 539 ಯೆಟುನ್, The Life and Times of George Fernandes ಬೂಕ್ ಹಾಡಯ್ಲೊ. ಜೊರ್ಜ್ ಫೆರ್ನಾಂಡಿಸಾಚಿ ಹಿ ನವೀನ್ ಜಿಣ್ಯೆ ಕಥಾ ವಾಚಿಜೆ ಮ್ಹಣ್ ಮ್ಹಕಾ ಮಸ್ತ್ ಮನ್ ಜಾಲ್ಲೆಂ. ತಶೆಂ ಮ್ಹಣ್ ಹಾಂವ್ ಜೊರ್ಜ್ ಫೆರ್ನಾಂಡಿಸಾಚೊ ಭಕ್ತ್ ನಹಿಂ; ವಾಜ್ಬಿ ಕಾರಣಾಂಕ್ ಲಾಗುನ್. ತಿಂ ಕಾರಣಾಂ ನಂತರ್ ಸಾಂಗ್ಯಾಂ.
“ಹ್ಯಾ ಬೂಕಾಚ್ಯಾ ಮೋಲಾಕ್ 20-25 ವ್ಹಡ್ ಬಾಂಗ್ಡೆ ಯೆತೆ” ಮ್ಹಣಾಲಿ ಮ್ಹಜಿ ಯೆಜ್ಮಾನ್.
“ತಶೆಂ ರುಪಯ್ 1200 ಯೆಟುನ್ ಏಕ್ ಕಿಲೊ ಸುರ್ಮಾಯ್ ಮಾಸ್ಳಿ ಹಾಡ್ತಾಂ ತೆದ್ನಾಂ ತುಜಿ ಜೀಬ್ ಚಲನಾಂ. ಮೋಲ್ ದೀವ್ನ್ ಸಾಹಿತ್ ಘೆತನಾಂ ಮಾತ್ರ್ ತುಜ್ಯೆ ದೊಳೆ ವೊಳ್ತಾತ್.” ಮ್ಹಜ್ಯಾ ಪ್ರತಿರೋದಾಕ್ ತಿಣೆಂ ಗಣ್ಣೆಂ ಕೆಲೆಂ ನಾಂ.
“ಜೊರ್ಜ್ ಫೆರ್ನಾಂಡಿಸಾ ವಿಷ್ಯಾಂತ್ ಕಿತೆಂ ತುಕಾ ಕಳೊಂಕ್ ಜಾಯ್? ಹಾಂವ್ ಕಾಂಯ್ ಬಾರಾ-ತೆರಾ ವ್ಹರ್ಸಾಂಚಿಂ ಆಸ್ಲಿಂ. ತವಳ್ ಮ್ಹಜೊ ಪಪ್ಪಾ ತಾಚೊ ಪಾಟ್ಲಾವ್ದಾರ್ ಆಸ್ಲೊ. ಆಮಿಂ ವಸ್ತಿ ಕರುಂಕ್ ಉಮರ್-ಖಾಡಿಂತ್ ಬಾಡ್ಯಾಕ್ ಕೊಟ್ರಿ ಘೆತ್ಲೆಲಿ. ತ್ಯಾ ಬಿಲ್ಡಿಂಗಾಚ್ಯಾ ಉದ್ಗಾಟಣಾಕ್ ತೊ ಮುಖೆಲ್ ಸಯ್ರೊ ಜಾವ್ನ್ ಆಯಿಲ್ಲೊ. ಉದ್ರೆಗಾನ್ ತಾಚೊ ಹಾತ್ ಧರ್ನ್, ಜೊರ್ಜ್ ಫೆರ್ನಾಂಡಿಸ್ ಜೈ ಮ್ಹಣ್ ವ್ಹಡ್ಲ್ಯಾನ್ ನಾರೊ ಹಾಂವೆಂ ದಿಲ್ಲೊ.”
“ಬಹುಶ್ಯಾ ತವಳ್ ತೊ ಬೊಂಬಯ್ ಕೊರ್ಪೊರೇಶಾನಾಂತ್ ಉಮರ್-ಖಾಡಿ ವಾರ್ಡಾಚೊ ಕಂವ್ಸಿಲರ್ ಅಸ್ಲೊ. ವ್ಹರ್ಸ್ 1967-ಮೂ? ತವಳ್ ಹಾಂವ್ ಬೊಳಿಯೆ ಹೈಸ್ಕೂಲಾಂತ್ ಶಿಕ್ತಾಲೊಂ. ಬೊಂಬಯ್ ಥಾವ್ನ್ ಏಲ್. ಏಮ್. ಡಿಕೊಸ್ತಾನ್ ಪರ್ಗಟ್ಚೆಂ ಕೊಂಕ್ಣಿ ಹಫ್ತ್ಯಾಳೆಂ, ‘ಪಯ್ಣಾರಿ’ ಖಳಾನಾಸ್ತಾನಾಂ ವಾಚ್ತಾಲೊಂ. ಆಪ್ರೂಪ್ ಮ್ಹಜಿಂ ಮಟ್ವಿಂ ಸಮಾಜಿಕ್-ಧರ್ಮಿಕ್ ಲೇಕನಾಂ ಪಾಯ್ಸ್ ಜಾತಲಿಂ. ಮ್ಹಕಾ ಸಾರ್ಕೊ ಉಡಾಸ್ ಆಸಾ. ಜೊರ್ಜ್ ಫೆರ್ನಾಂಡಿಸ್ ಲೋಕ್-ಸಭೆಕ್ ಉಮೇದ್ವಾರ್ ಜಾಲ್ಲೊ. ತ್ಯಾ ಚುನಾವಣೆ ವೆಳಾರ್, ಪಯ್ಣಾರಿನ್ ಸಾಂಕಳ್ ಲೇಕನಾವಳ್ ಪಾಯ್ಸ್ ಕೆಲ್ಲಿ.”
ತಾಚೊ ವಿರೊದಿ ಉಮೇದ್ವರ್ ಎಸ್. ಕೆ. ಪಾಟಿಲ್. ತೊ ಸ್ವಾತಂತ್ರ್ ಸೇನಾನಿ, ಮಾಲ್ಗಡೊ ಕೊಂಗ್ರೆಸ್ ಮುಖೆಲಿ, ತೀನ್ ಪಾವ್ಟಿಂ ಬೊಂಬೈಚೊ ಮೇಯರ್, ಆನಿಂ ಹರ್ ಕೊಂಗ್ರೆಸ್ ಸರ್ಕಾರಾಂನಿಂ ಯೂನಿಯನ್ ಮಂತ್ರಿ. ವಯ್ಲ್ಯಾನ್, ಕೊಂಗ್ರೆಸ್ ಪಾಡ್ತಿಚ್ಯಾ ಖಜಾಣ್ಯಾಚೊ ಮಾಲಿ. ತೊ ಗೊಲಿಯಾತ್ ಆನಿಂ ಜೊರ್ಜ್ ದಾವಿದ್. ತರಿಪುಣ್ ಜೊರ್ಜಾಚ್ಯಾ ಶ್ಯಾಥೆ ವಯ್ರ್ ಭರ್ವಾಸೊ ದವರ್ನ್ ರಾಮ್ ಮನೋಹರ್ ಲೋಹಿಯಾನ್ ತಾಕಾ ಸಂಯುಕ್ತಾ ಸೊಶಲಿಸ್ತ್ ಪಾಡ್ತಿಚೊ ಉಮೆದ್ವಾರ್ ಕೆಲ್ಲೊ. 47.2% ಮತ್ ತಾಕಾ ಪಡ್ಲೆ ಆನಿಂ 29, 434 ವೊಟಾಂಚ್ಯಾ ಬಹುಮತಾನ್ ಜೋರ್ಜ್ ಜಿಕ್ಲೊ. ಜೊರ್ಜ್ ದ ಜಯಂಟ್ ಕಿಲ್ಲರ್. ದೇಸ್-ಭರ್ ತಾಚೆಂ ನಾಂವ್ ಗಾಜ್ಲೆಂ. ಪಯ್ಣಾರಿನ್ ವಿಶೇಸ್ ಆಂಕೊ ಕಾಡ್ಲೊ. ಬೊಂಬಯ್ಚ್ಯಾ ಫುಟ್-ಪಾತಿರ್ ಥಾವ್ನ್ ದಿಲ್ಲಿಚ್ಯಾ ಪಾರ್ಲಮೆಂಟಾಚ್ಯೆಂ ತಾಚ್ಯೆಂ ಪಯ್ಣ್ ಅದ್ಭುತ್ ಮ್ಹಣ್ತನಾಂ, ಪಯ್ಣಾರಿನ್ ತಶೆಂ ಕರಿನಾಸ್ತಾನಾ ರಾವ್ಯೆತ್?
“ಹಿ ಜೀಕ್ ತಾಚಿ ನಹಿಂ. ಬಗಾರ್, ದಕ್ಷಿಣ್ ಬೊಂಬಯಿಂತ್ ತವಳ್ ವಸ್ತಿ ಕರ್ತೆಲ್ಯಾ ಲಾಕೊಂ ಕಾಮೆಲ್ಯಾಂಚಿ. ಹೊಟ್ಲಾಂತ್ಲೆ ಕಾಮ್ಗಾರ್, ಟೆಕ್ಸಿ ಡ್ರಾಯ್ವರ್, BEST ಕಾಮ್ಗಾರ್, ಡೊಕ್ ಕಾಮೆಲಿ, ಮುನಿಸಿಪಲ್ ಕಾಮೆಲಿ, ರೇಯ್ಲ್ ಕಾಮ್ಗಾರ್, ಜವ್ಳಿ ಮಿಲ್ಲಾಂಚ್ಯೆಂ ಕಾಮೆಲಿ ಆನಿಂ ಚಿಲ್ಲರ್ ದಂದ್ಯಾಂಚ್ಯೆ ಮಾಲಿಕ್ ತಾಚ್ಯೆ ಭಕ್ತ್. ಸಕ್ಟಾಂಕ್ ಏಕ್ವಟಾವ್ನ್, ತಾಂಚ್ಯಾ ಹಕ್ಕಾಂ ಖಾತಿರ್ ತೊ ನಹಿಂ-ಗೀ ಝುಜ್ಲಲೊ? ಖರೊಚ್, ಸಾಮಾನ್ಯ್ ಜಣಾಂಚೊ ಸೊಡ್ವಣ್-ದಾರ್ ತೊ. ತಾಕಾ ಜಿಕಯ್ನಾಸ್ತಾಂ ಸೊಡ್ನ್ ಘಾಲುಂಕ್ ಜಾತಾ?”
ಯೆಜ್ಮಾನಿಚ್ಯೆಂ ಹೆಂ ಲ್ಹಾನ್ಶೆಂ ಭಾಶಣ್ ಚೀತ್ ದೀವ್ನ್ ಅಯ್ಕತಚ್, ಮ್ಹಜಿ ಕೂಸ್ ಮಾಂಡ್ಲಿ.
“ಡೊಕ್ ಕಾಮೆಲಿ ಲೇಬರ್ ಯೂನಿಯನಾಚೊ ಪರಮೋಚ್ಚ್ ಮುಖೆಲಿ ಪ್ಲಾಸಿಡ್ ಡಿ ಮೆಲ್ಲೊ ಅಸ್ಲೊ ನೇ? ತಾಚೊ ಶಿಸ್ ನಹಿಂಗೀ ಜೊರ್ಜ್? ಪ್ಲಾಸಿಡ್ ಕೊಂಕ್ಣೊ ಆನಿಂ ಕೆನರಾ ಕ್ರಿಸ್ತಾಂವ್. ತ್ಯಾ ಕಾಳಾರ್, ಬೊಂಬಯ್ ದಕ್ಶಿಣ್ ವಠಾರಾಂತ್ ಕೆನರಾ, ಕಾರ್ವಾರ್ ಆನಿಂ ಗೊಂಯ್ಚೆ ದರಬಸ್ತ್ ಕ್ರಿಸ್ತಾಂವ್ ವಸ್ತಿ ಕರ್ತೆಲೆ. ಹಾಂಚೊ ಪಾತ್ರೊನ್ ಸಾಂತ್ ಪ್ಲಾಸಿಡ್. ತಾಣೆಂ ಜೊರ್ಜಾಕ್ ಮಾಲ್ಗಡೆ ಸೊಶಲಿಸ್ತ್ ಮುಖೆಲಿ ಮಧು ಲಿಮಯೆಚಿ ಆನಿಂ ರಾಮ್ ಮನೋಹರ್ ಲೋಹಿಯಾಚಿ ವಳೊಕ್ ಕರ್ನ್ ದಿಲಿ. 1958 ಇಸ್ವೆಂತ್ ಪ್ಲಾಸಿಡಾಕ್ ಅಕಾಲಿಕ್ ಮರಣ್ ಆಯ್ಲೆಂ. ಪ್ಲಾಸಿಡಾಚಿ ವಿರಾಸತ್ ಜೊರ್ಜಾಕ್ ಮೆಳ್ಳಿ. ಲೋಹಿಯಾ ಜವಾಹರ್-ಲಾಲ್ ನೆಹ್ರುಚೊ ಕಟ್ಟ್ ವಿರೋದಿ. ತಾಚಿಂ ಶಿಕ್ಣಾಂ ಜೋರ್ಜಾನ್ ಆಪ್ಣಾಯ್ಲಿಂ. ಜಿಣಿ ಭರ್ ನೆಹ್ರು-ಗಾಂಧಿ ಕುಟ್ಮಾಚೊ ದುಸ್ಮಾನ್ ತೊ ಜಾಲೊ. ಇಂದಿರಾ ಗಾಂಧಿಕ್ ಅಸ್ಕತ್ ಕರಿಜೆ ಮ್ಹಳ್ಳಿ ಪಿತೂಳ್ ಮಾಂಡೂನ್ ಆಸ್ಲೆಲ್ಯಾ “ಸಿಂಡಿಕೇಟ್” ಕೊಂಗ್ರೆಸ್-ಗಾರಾಂ ಮಧೆಂ ಎಸ್. ಕೆ. ಪಾಟಿಲ್ ಎಕ್ಲೊ. ತಾಕಾ ಸಲ್ವಾಯ್ಜೆ ಮ್ಹಣ್ ನೆಹ್ರುಚೊ ಖಾಸ್ ಮಿತ್ರ್ ಕ್ರಿಶ್ಣಾ ಮೆನನಾನ್ ಜೊರ್ಜಾಕ್ ಗುಪ್ತ್ ಕುಮಕ್ ಕೆಲ್ಲಿ ಮ್ಹಣ್ ಹಾಂವೆಂ ವಾಚ್ಲಾಂ.” ಕುಡ್ಸಿಲೆಂ ಹಾಂವೆಂ.
ಚ್ಯಾರ್ ವ್ಹರ್ಸಾಂ ಉಪ್ರಾಂತ್, ಇಂದಿರಾ ಗಾಂಧಿನ್ ಆವ್ಧೆ ಪಯ್ಲೆಂ ಜೆರಾಲ್ ಎಲಿಸಾಂವ್ ಘೊಶಿತ್ ಕೆಲೆಂ. ಜೊರ್ಜ್ ಪರತ್ ಸಂಯುಕ್ತ ಸೊಶಲಿಸ್ತ್ ಪಾಡ್ತಿಚೊ ಉಮೇದ್ವಾರ್ ರಾವ್ಲೊ. ಪದ್ವೆರ್ ಅಸ್ಲಲೊ ಎಮ್. ಪಿ ತೊ. ಹ್ಯಾ 1971 ಚುನಾವೆಕ್ ಇಂದಿರಾ ಕೊಂಗ್ರೆಸಾನ್ ನಾಂವ್ ನಾತ್ಲೆಲ್ಯಾ ತಿಚ್ಯಾ ಎಕಾ ಸಮರ್ತಕಾಕ್ ಟಿಕೆಟ್ ದಿಲಿ. ಜೊರ್ಜಾನ್ ಜಿಕಾಜೆಚ್ ಆಸ್ಲೆಂ. ಪುಣ್, ಜೊರ್ಜ್ ದ ಜಯಂಟ್ ಕಿಲ್ಲರ್ ಕೇವಲ್ 30, 377 ವೋಟ್ ಲಾಭೊನ್ ತಿಸ್ರ್ಯಾ ಸ್ಥಾನಾರ್ ಪಾಟಿಂ ಉರ್ಲೊ. ಹ್ಯೆ ನಾಲಿಸಾಯೆಚ್ಯೆ ಸಲ್ವಣೆಚ್ಯೆಂ ಪಾಠ್-ಥಳ್ ಕಿತೆಂ?
ಯೆಜ್ಮಾನಿಕ್ ತಿಚಿಚ್ ಮಾಹೆತ್ ಆಸ್ಲಿ:
“ಮ್ಹಜ್ಯಾ ಪಪ್ಪಾ ಮಮ್ಮಿನ್ ಲೆಗುನ್ ಜೊರ್ಜಾಕ್ ವೋಟ್ ದೀವ್ನಾ. ಕಿತ್ಯಾಕ್, ಪಪ್ಪಾ ತವಳ್ ಇಂದಿರಾ ಗಾಂಧಿಚ್ಯಾ ನೀತಿಂಕ್ ಭಾರಿಚ್ ಮೆಚ್ವಲ್ಲೊ. ಜೊರ್ಜ್ ಫೆರ್ನಾಂಡಿಸಾಚ್ಯಾ ಬೊಂಬಯ್ ಲೇಬರ್ ಬ್ಯೇಂಕಾಚೊ ಹಿಶೆದಾರ್ ಸಾಂದೊ ಪಪ್ಪಾ. ತಾಕಾ ಟೆಕ್ಸಿ ಘೆಂವ್ಕ್ ಮನ್ ಆಸ್ಲೆಂ ಪುಣ್ ಲೇಬರ್ ಬ್ಯೇಂಕಾನ್ ಲೋನ್ ದೀವ್ನಾ. ಇಂದಿರಾ ಗಾಂಧಿನ್ ಬ್ಯೇಂಕಾಂ ನೇಶನಲಾಯ್ಜ್ ಕೆಲ್ಲ್ಯಾನ್, ಪಪ್ಪಾಕ್ ಸಿಂಡಿಕೇಟ್ ಬ್ಯೇಂಕಾ ಥಾವ್ನ್ ಲೋನ್ ಮೆಳ್ಳೆಂ. ಬ್ಯೇಂಕಾಚ್ಯೆ ಜಾಮಿನೆರ್ ಪಪ್ಪಾನ್ ಟೆಕ್ಸಿ ಘೆತ್ಲಿ. ಮಜ್ಗಾಂವ್ ಡೊಕಾಂತ್ ಎಲೆಕ್ಟ್ರಿಶಿಯನ್ ಕಾಮೆಲಿ ಆಸ್ಲಲೊ ಪಪ್ಪಾ ಟೆಕ್ಸಿ ಮಾಲಿಕ್-ಚಾಲಕ್ ಜಾಲೊ. ಆಮ್ಚಿ ಆರ್ಥಿಕ್ ಸ್ಥಿತಿ ಸುಧ್ರಾಲಿ. ದುಬ್ಳ್ಯಾಂಚಿ ಕಾಳ್ಜಿ ಆಸ್ಲೆಲಿ ಖರಿ ಸೊಶಲಿಸ್ತ್ ಇಂದಿರಾ. ತಿಕಾ ವಿರೋದ್ ಕರ್ಚೊ ಜೊರ್ಜ್ ಪೊಕೊಳ್ ಸೊಶಲಿಸ್ತ್ (psuedo socialist), ಅಶೆಂ ಪಪ್ಪಾಚೊ ವಾದ್.”
ಜೊರ್ಜ್ ಫೆರ್ನಾಂಡಿಸಾಕ್ ಪಯ್ಲ್ಯಾ ಪಾವ್ಟಿಂ psuedo socialist ಲೇಬಲ್ ದಿಲ್ಲೆಂ M.O. Mathai ನ್. ಮಥಾಯ್ ನೆಹ್ರುಚೊ ಮಾಜಿ ಸ್ಪೆಶಿಯಲ್ ಅಸಿಸ್ಟೆಂಟ್. ಉಪ್ರಾಂತ್ ತೊ ಇಂದಿರಾ ವಿರೋದಿ ಜಾಲ್ಲೊ ತರ್-ಯೀ, ಮೊರಾರ್ಜಿ ದೇಸಾಯ್ ಪ್ರಧಾನಿ ಜಾತಚ್ ಜೊರ್ಜ್ ಫೆರ್ನಾಂಡಿಸ್ ಮಂತ್ರಿ ಜಾಲ್ಲೊ ತಾಕಾ ಅವ್ಡೊಂಕ್ ನಾಂ. ತಾಚ್ಯೆ ದೋನ್ ಬೂಕ್ ಆಸಾತ್. My days with Nehru ಆನಿಂ Reminiscenses of Nehru Era ಹಾಂವೆಂ ವಾಚ್ಲ್ಯಾತ್. ಜೊರ್ಜಾ ವಿಷಿಂ ಮಥಾಯಿನ್ ತಶೆಂ ಮ್ಹಳಾಂ.
***
“ಜೊರ್ಜ್ ಫೆರ್ನಾಂಡಿಸಾಕ್ ಅನ್ಯೇಕ್ ಲೇಬಲ್ ಲಾಯಿಲ್ಲೆಂ ಥೊಡ್ಯಾ ತಾಚ್ಯಾ ಪ್ರತಿಸ್ಪರ್ಧಿಂನಿಂ. ತೊ ಎಕ್ಲೊ ಗುಪ್ತಿ ಕೋಮುವಾದಿ (Closet Communalist) ಮ್ಹಣ್. ಹ್ಯಾ ವಿಶಿಂ ಮಸ್ತ್ ಸಾಂಗೊಂಕ್ ಮ್ಹಕಾ ಮನ್ ಅಸಾ. ಪುಣ್, ಅತಾಂ ನಾಕಾ. ಅನ್ಯೆಕ್ ಪಾವ್ಟಿಂ. ತೊ ಕೋಮುವಾದಿ ಮ್ಹಣ್ ಹಾಂವೆಂ ಪಯ್ಲೆಂ ಆಯ್ಕಲ್ಲೆಂ ಮ್ಹಜ್ಯಾ ಮುಕಂದ್ ವಾವ್ರಾಡಿ ಸಾಂಗತ್ಯಾಂ ಥಾವ್ನ್. 1973 ಮಾಯ್ ಮಹಿನ್ ತೊ, ಹಾಂವ್ ಟ್ರೇಯ್ನಿ ಇಜ್ನೆರ್ ಜಾವ್ನ್ ಮುಕಂದಾಂತ್ ಭರ್ತಿ ಜಾಲ್ಲೊಂ ಮಾತ್ರ್. ಮ್ಹಜ್ಯೆ ಗುಜ್ರಾತಿ ಒಫಿಸರ್ ಕೆಂಟಿನಾಂತ್ ಗಪ್ಪಾ ಮಾರ್ತೆಲೆ. ಏಕ್ ದೀಸ್ ಆಮ್ಚೊ, ಮುಕಂದ್ ಅಯರ್ನ್ ಏಂಡ್ ಸ್ಟೀಲ್ ಕಂಪ್ಣೆಚೊ, ಚೇರ್-ಮೆನ್ ವಿರೆನ್ ಶಾ, ತಾಚಿ ದುಸ್ರಿ ಬಾಯ್ಲ್ ಆನಿಂ ಜೊರ್ಜ್ ಫೆರ್ನಾಂಡಿಸಾ ವಿಷ್ಯಾಂತ್ ’ಗೆ ಖಬ್ರೊ’ ಅಶಾರ್ ಪಾಶಾರ್ ಜಾಲ್ಯೊ. ಜೊರ್ಜ್ ಆನಿಂ ವಿರೆನ್ ಶಾ ರಾಜಕೀಯ್ ಸಾಂಗಾತಿ. ಜೊರ್ಜ್ ವಿರೆನ್ ಶಾಚೊ ಉಜ್ವೊ ಹಾತ್. ಅನಿಂ ಕಿತೆಂ, ಕಿತೆಂ ’ಗೆ’ ಖಬ್ರೊ ತವಳ್ ತವಳ್ ಹಾಂವೆಂ ಅಯ್ಕಲ್ಯೊ ಪುಣ್ ಹಾಂವ್ ಪಾತಿಯೆಂವ್ಕ್ ನಾಂ. ಪುಣ್, ಉಜೊ ನಾಸ್ತಾನಾಂ, ಧುಂವರ್ ಉಠಾನಾಂ ಮ್ಹಣ್ತಾತ್ ನೇ? 1974-75 ಆವ್ಧೆಂತ್ ಕುಖ್ಯಾತ್ ಜಾಲಿ ಬರೋಡಾ ಡಯ್ನಾಮೈಟ್ ಫಿತೂರಿ. ಹಾಂತು ವಿರೆನ್ ಶಾ ಜೋರ್ಜಾಚೊ ಸಹಯೋಗಿ; ಕೊಡ್ತ್ ಕೇಜಿಂತ್ ತೊ ಚಡ್-ಯಂತ್ರಿ ನಂಬರ್ 14. ಗುಜ್ರಾತಾಂತ್ ಡಯ್ನಾಮೈಟ್ ಖರೀದಿಂತ್ ವಿರೆನ್ ಶಾ ಏಕ್ ಬಾಗಿದಾರ್. ಹ್ಯಾ ನಂತರ್ ಮ್ಹಕಾ ಗುಜ್ರಾತಿ ಗಪ್ಪ ಭೆಸ್ಟೆಂಚ್ ನಹಿಂ ಮ್ಹಣ್ ಭೊಗ್ಲೆಂ.
“ವಿರೆನ್ ಶಾ, ಮುಕಂದ್ ಆನಿಂ ಜೊರ್ಜಾ ವಿಷಿಂ ಉಲ್ಲೇಕ್ ಕರ್ತನಾ ಉಡಾಸ್ ಕರಿಜೆ ಪಡ್ತಾ ಕಿ ಮುಕಂದ್ ಲೇಬರ್ ಯೂನಿಯನಾಚೊ ತವಳ್ಚೊ ಮುಖೆಲಿ ಜಾವ್ನಾಸ್ಲೊ ದತ್ತ ಸಾಮಂತ್. ತೊ ಭಾರೀಚ್ ಉಪ್ರಾಳಿ ಮನಿಸ್. ಕಮುನಿಸ್ತಾಂ ಪ್ರಾಸ್ ಚಡ್ ಖತರ್ನಾಕ್! ಪುಣ್, ಜೊರ್ಜ್ ಸಯ್ತ್ ತಾಚ್ಯೆ ಮೆಳಿಂತ್ ಆಸ್ಲೊ. ತಶೆಂಚ್ ಮುಖ್ಯ್ ಮಂತ್ರಿ ಶರದ್ ಪವಾರ್. ಆನಿಂ ಶಿವ್ ಸೇನಾಚೊ ಮುಖೆಲಿ ಬಾಳ್ ಠಾಕ್ರೆ. ಸೊಶಲಿಸ್ತ್, ಬಹುಶ್ಯಾ ಮಾತ್ಶಿ ಕಮುನಿಸ್ತ್, ಆನಿಂ ಕಟ್ಟ್ ಸೆಕುಲರ್ ಇಂದಿರಾ ಗಾಂಧಿ ಮಾತ್ರ್ ಜೊರ್ಜ್ಯಾಕ್ ದುಸ್ಮಾನ್ ನಂಬರ್ ವನ್. ಹಿ ಫಾಟ್ ಥಳ್ ಜೊರ್ಜಾಕ್ “ಅವ್ಕಾಸ್-ವಾದಿ (opportunist), ಗಿರ್ಗಿಟ್ (Chameleon)” ಅಸಲೆ ಬಿಲ್ಲೆ ಜೋಡ್ನ್ ದಿಂವ್ಕ್. ಜೀವನ್ ಚರಿತ್ರಾ ಲೇಕಕ್ ರಾಹುಲ್ ರಾಮಗುಂಡಮ್ ಬರಯ್ತಾ: George Fernandes has the knack of being in the good books of all his prime ministers. ಮೋರಾರ್ಜಿ ದೇಸಾಯ್, ವಿ ಪಿ ಸಿಂಘ್, ಆನಿಂ ಅಟಲ್ ಬಿಹಾರಿ ವಾಜ್ಪೆಯಿ ಹಾಂಚ್ಯೆಂ ಮಧೆಂ ಸಾಮಾನ್ಯ್ ಭೂಥಳ್ ನಾಂ. ತರ್-ಯೀ, ತೊ ಮೊರಾರ್ಜಿಚೊ ಉದ್ಯೋಗ್ ಮಂತ್ರಿ, ವಿ.ಪಿ.ಸಿಂಘಾಚೊ ರೇಯ್ಲ್ ಮಂತ್ರಿ ಆನಿಂ ವಾಜ್ಪೇಪಿಚೊ ರಕ್ಶಾ ಮಂತ್ರಿ!
” 2010 ಇಸ್ವೆ ಥಾವ್ನ್ ಜೊರ್ಜಾನ್ ಡಿಮೆಂತ್ಸಿಯಾ ಆನಿಂ ಹೆರ್ ಮೆಂದ್ವಾಚ್ಯೆ ಪಿಡೆಂ ವರ್ವಿಂ ಮಾಂದ್ರಿ ಧರ್ಲೆಲಿ. ಲಗ್ಬಗ್ ಪಾಂತೀಸ್ ವರ್ಸಾಂ ಜೊರ್ಜಾಚಿ ಘರ್-ಸಾಂಗಾತಿ ಆಸ್ಲಿ ಜಯಾ ಜೇಟ್ಲಿ. ತಿಕಾ ಜೊರ್ಜಾನ್ ಆಪ್ಣೆಂ ರಚ್ಲೆಲ್ಯಾ ’ಸಮತಾ ಪಾಡ್ತಿಚಿ’ ಅಧ್ಯಕ್ಶಿಣ್ ನೆಮ್ಲೆಲೆಂ. 2010 ಜನೆರಾಂತ್, ಜೊರ್ಜಾಚಿ ವೆಗ್ಳಾಚಾರ್ ಜಾಲ್ಲಿ ಪತಿಣ್ ಲೈಲಾ ಕಬಿರ್ ಫೆರ್ನಾಂಡಿಸ್ ಪರತ್ ಘರಾ ಆಯ್ಲಿ. ಜೊರ್ಜಾಕ್ ಜಬರ್-ದಸ್ತೆನ್ ಆಪ್ಲ್ಯೆ ತಾಬೆಂತ್ ತಿಣೆಂ ಘೆತ್ಲೆಂ. ಹ್ಯಾ ವರ್ವಿಂ ಕಂಗಾಲ್ ಜಾವ್ನ್ ಕುನ್ನಾಸ್ ಕಾಡುಂಕ್ ಮ್ಹಣ್ ದಿಸ್ತಾ 2017 ಇಸ್ವೆಂತ್ ಜಯಾ ಜೈಟ್ಲಿನ್ ಆಪ್ಲಿ ಆತ್ಮ್-ಕಥಾ ಬರಯ್ಲಿ: Life Among the Scorpions: Memoirs of a Woman in Indian Politics. ಜೊರ್ಜ್ ಸಯ್ತ್ ಏಕ್ಲೊ ವಿಚ್ಚು ಅಶೆಂ ತಿ ಹಿಶಾರೊ ಕರ‍್ತಾ. ಕುಟ್ಮಾ ಜಿಣ್ಯೆಂತ್ ಆನಿಂ ಮೋಗಾ ಪ್ರಣಾಳಿನಿಂ ಸಯ್ತ್ ಜೊರ್ಜ್ ಅಸ್ಥಿರ್ ಮ್ಹಣ್ ದಿಸ್ತಾ. ತೊ ಸ್ಥಿರ್ ಆಸ್ಲೊ ತರ್ ಕೇವಲ್ ನೆಹ್ರು-ಗಾಂಧಿ ವಂಶಾವಳಿ ವಿರುದ್ಧ್.
“1971 ಬಾಂಗ್ಲಾ ಮುಕ್ತಿ ಝುಜಾಂತ್ ಪ್ರಚಂಡ್ ಜಯ್ತ್ ಮೆಳೊಂಕ್ ಇಂದಿರಾ ಗಾಂಧಿಚ್ಯೆಂ ವ್ಹಡ್ ಯೋಗ್-ದಾನ್ ಆಸಾ. ಜನ ಸಂಘ್ ಮುಖೆಲಿ ಅಟಲ್ ಬಿಹಾರಿ ವಾಜ್ಪೇಯಿನ್ ಲೆಗುನ್ ತಿಕಾ “ಮ್ಹಾ-ದುರ್ಗಾ” ಮ್ಹಣ್ ಪ್ರಶಂಶಾ ದಿಲ್ಲಿ ಆಸಾ. ತರ್-ಯೀ, ಜೊರ್ಜಾ ಕಡೆಂ ತಿಕಾ ಹೊಗ್ಳುಂಕ್ ಉತ್ರಾಂ ನಾತ್ಲಿಂ. ಬದ್ಲೆಕ್, ತಿ ’ಹಾಂವೆಂ ಪಳೆಯಿಲ್ಲಿ ಮ್ಹಾ-ಕೋಮುವಾದಿ’ ಮ್ಹಣ್ ತಾಣೆಂ ಪ್ರಚಾರ್ ಕೆಲೊ. ದೆಸಾಚ್ಯಾ ಸೂಕ್ಶ್ಮ್ ಆನಿಂ ರಾಜತಂತ್ರಿಕ್ ಅನುಸ್ಥಾಪನಾಂನಿಂ, ಜಶೆಂ ಕಿ ಮ್ಹಾ- ಶೆರಾಂಚಿಂ ಉದ್ಕಾ ಸರಬರಾಯೆಚಿಂ ತಳಿಂ, ಅಣು-ಕೇಂದ್ರ್ ಇತ್ಯಾದಿ ಜಾಗ್ಯಾಂನಿಂ, ಮುಸ್ಲಿಮಾಂಕ್ ಡ್ಯೂಟಿ ದಿಂವ್ಕ್ ನಜೊ ಅನಿಂ ತಾಂಕಾಂ ರಜ್ಯೆರ್ ಧಾಡಿಜೆ ಮ್ಹಣ್ ತಿಣೆಂ ಆದೇಶ್ ದಿಲ್ಲೊ ಮ್ಹಣಾಲೊ ಜೊರ್ಜ್.”
ಮ್ಹಜ್ಯೆಂ ಲಾಂಬ್ ಸ್ವಗತ್ ಭಾಶಣ್ ಆಯ್ಕೊನ್ ಯೆಜ್ಮಾನಿನ್ ಜಾಂಬೊಯ್ ಕಾಡ್ಲಿ ದೆಕುನ್ ಹಿಶಾರೊ ಮ್ಹಕಾ ಮೆಳ್ಳೊ. ಮಸ್ತ್ ಸಾಂಗೊಂಕ್ ಆಸಾ ತೆಂ ಅನ್ಯೇಕ್ ಸಂಧರ್ಬಾರ್ ಸಾಂಗ್ಯಾಂ ಮ್ಹಣ್ ಮತಿಂತ್ ಚಿಂತ್ಲೆಂ.
” ಹಾಂವೆಂ ಜೆ. ಬಿ. ಮೊರಾಯೆಸಾನ್ 1999 ಇಸ್ವೆಂತ್ ಛಾಪ್ಲೆಲಿ ಏಕ್ ಸಾಹಸಿ ಜೀಣ್ ಶಿರ್ಶಕಾಚಿ ಜೊರ್ಜಾಚಿ ಜಿಣ್ಯೆ ಕಾಣಿ ವಾಚ್ಲ್ಯಾ. ತ್ಯಾ ಬೂಕಾಂತ್ ಅಸಲೆಂ ಕಾಂಯ್ ವಾಚುಂಕ್ ಮೆಳಾನಾಂ. ತುಂವೆಂ ವಿವರುಂಚ್ಯೆಂ ಸಕ್ಕಡ್ ಬಕ್ವಾಸ್ ಮ್ಹಣ್ತಾಂ ಹಾಂವ್.” ಯೆಜ್ಮಾನಿನ್ ತಿಚೆಂ ಮಟ್ವೆಂ ತೀರ್ಪ್ ದಿಲೆಂ. ತಿಕಾ ಸೊಡ್ನ್ ದೀನಾಸ್ತಾನಾಂ, ಪಾಟಿಂ ಜಾಪ್ ಹಾಂವೆಂ ದಿಲಿ: “ಮೊರಾಸ್ ಜೊರ್ಜ್ ಫೆರ್ನಾಂಡಿಸಾಚೊ ಭಕ್ತ್ ಚಡ್, ಚರಿತ್ರಾಕಾರ್ ಉಣೊ. ತೆಂ ಪುಸ್ತಕ್ ಹಾಂವೆಂ ದೋನ್-ತೀನ್ ಪಾಟಿಂ ವಾಚ್ಲಾಂ ದೆಕುನ್ ಸಾಂಗ್ತಾಂ”.
***
1977 ಮಾರ್ಚ್ ಮಹಿನ್ಯಾಂತ್, ಕೊಣೆಂಚ್ ಚಿಂತುಂಕ್ ನಾಂ ತೆದ್ನಾಂ ಸರ್ವಾಧಿಕಾರಿ ಇಂದಿರಾ ಗಾಂಧಿನ್ ಎಮರ್ಜೆನ್ಸಿ ಪಾಟಿಂ ಕಾಡ್ಲಿ. ಪ್ರತಿಪಕ್ಶೆಚ್ಯಾ ರಾಜಕಾರಣಿಂಕ್ ಜಯ್ಲಾಂತ್ಲೆಂ ಸೊಡ್ಲೆಂ. ಲೋಕ್ ಸಭೆಕ್ ನವೆಂ ಎಲಿಸಾಂವ್ ಪಾಚಾರ್ಲೆಂ. ಪುಣ್, ತಿಚೊ ದುಸ್ಮಾನ್ ನಂಬರ್ ವನ್ ಜೊರ್ಜ್ ಕ್ರಿಮಿನಲ್ ಕೈದಿ ದೆಕುನ್ ಸುಟ್ಲೊ ನಾಂ. ಜೋರ್ಜ್ ಫೆರ್ನಾಂಡಿಸ್ ತವಳ್ ಬರೋಡಾ ಡಯ್ನಾಮಯ್ಟ್ ಕೇಜಿಂತ್ ಶಿರ್ಕೊನ್ ಪಡೊನ್ ಕೈದಿ ನಂಬರ್ ವನ್ ಜಾವ್ನ್ ಜಯ್ಲಾಂತ್ ಆಸ್ಲೊ. 1973 ಇಸ್ವೆಂತ್ ಜೊರ್ಜಾನ್ All India Railwaymen’s Federation (AIRF) ಸಂಘಟನಾಚ್ಯೆ ಫಿರ್ಜೆಂತ್-ಪಣ್ ಘೆತ್ಲೆಂ. ತಾಚ್ಯಾ ಪಯ್ಲೆಂ ಪಾಂಚ್ ವ್ಹರ್ಸಾಂ ಅವ್ಧೆಕ್ ಪೀಟರ್ ಅಲ್ವಾರಿಸ್ ಫಿರ್ಜೆಂತ್ ಆಸ್ಲೊ ತವಳ್ ಶಾಂತಿ-ಸಮದಾನ್ ಆಸ್ಲೆಂ. ಜೊರ್ಜ್ ಕಟ್ಟ್ ಅಂದೋಳನ್-ಕಾರಿ ಮ್ಹಣ್ತಚ್, ವಾತಾವರಣ್ ಬಿಗಡ್ಲೆಂ. ತಾಣೆಂ ಭಾರತ್ ಬಂಧ್ ಆಪಯ್ಲೆಂ. 1974 ಮಾಯ್ 8 ತಾರಿಕೆರ್ ಸುರು ಕರ್ನ್, ದೇಸ್ ಭರ್ ಸತ್ರಾ ಲಾಖ್ ರಯ್ಲ್ ವಾವ್ರಾಡಿ ಮುಶ್ಕರ್ ಕರುಂಕ್ ಲಾಗ್ಲೆ. ತಾಂಕಾಂ ಸಹಕಾರ್ ದೀವ್ನ್, ಟೆಕ್ಸಿವಾಲೆ, ರಿಕ್ಶಾವಾಲೆ, ಹೆರ್ ಜೆರಾಲ್ ಕಾಮ್ಗಾರ್ ಸಯ್ತ್ ಸ್ಟ್ರಾಯ್ಕ್ ಕರಿಲಾಗ್ಲೆ. ಹೆಂ ಸ್ಟ್ರಾಯ್ಕ್, ಇಂದಿರಾ ಗಾಂಧಿನ್ ಮಿಲಿಟರಿ ಶಿಬಂದಿ ವಾಪ್ರುನ್ ಮೊಡ್ಲೆಂ. ಕಾಮ್ಗಾರಾಂ ಮಧೆಂ ಫುಟ್ ದಿಸೊನ್ ಯೆತಚ್ ಜೊರ್ಜಾನ್ ಮುಶ್ಕರ್ ಪಾಟಿಂ ಕಾಡ್ಲೆಂ. ಅಪರಾಜಿತ್ ಜಾಲ್ಲೆ ರಯ್ಲ್ ಕಾಮೆಲಿ ಪ್ರತ್ಯೇಕ್ ಜಾವ್ನ್ ಚಾಲಕ್ ಖುಬ್ಳಾಲೆ. ಜೊರ್ಜಾಚ್ಯೆಂ ಭದ್ರ್ ಕೊಟೆಂ ಕೊಸ್ಳಾಲೆಂ. ಹೆಂ ಸ್ಟ್ರಾಯ್ಕ್ ಏಕ್ ಕಾರಣ್ ಮ್ಹಣ್ತಾತ್, ಇಂದಿರಾ ಗಾಂಧಿನ್ 25 ಜೂನ್ 1975-ವ್ಯೆರ್ ದೇಸ್ ಭರ್ ತುರ್ತು ಪರಿಸ್ಥಿತಿ ಪಾಚಾರುಂಕ್.
“ಜಯ್ಲಾಂತ್ ಬಸ್ಲೆಲ್ಯಾ ಜೊರ್ಜಾಕ್ ಹಾತಾಂಕ್ ಸಾಂಕ್ಳಿ ಆನಿಂ ಪಾಂಯಾಂಕ್ ಖೊಡೆ ಘಾಲ್ನ್ ಕೊಡ್ತಿಕ್ ಹಾಡ್ತಲೆ. ತೆದ್ನಾಂ, ಹಾತ್ ಉಬಾರುನ್, ಮೂಟ್ ವಾರ‍್ಯಾರ್ ಮಾರುನ್ , ಘಾಮಾಂತ್ ಬುಡ್ಲಲೊ ಆನಿಂ ಅಸ್ಕತ್ ದಿಸ್ಚೊ ಜೊರ್ಜ್ ಏಕ್ಯೆ ಕಾಳಿ-ಧೊವಿ ತಸ್ವೀರೆ ಮುಖಾಂತ್ರ್ ಸಂಸಾರ್ ಭರ್ ನಾಂವಾದ್ದಿಕ್ ಜಾಲೊ. ಹಿ ತಸ್ವೀರ್ ಜಾಲಿ ಎಮೆರ್ಜೆನ್ಸಿ ವಿರುದ್ಧ್ ಏಕ್ ವ್ಹಡ್ ಸಂಕೇತ್. ಅಂತರ್-ರಾಷ್ರೀಯ್ ಹಂತಾರ್ ಜಾಲ್ಲ್ಯಾ ಹ್ಯಾ ಅಪ-ಪ್ರಚಾರಾ ವರ್ವಿಂ ಜಾಂವ್ಕ್ ಪುರೊ ಇಂದಿರಾ ಗಾಂಧಿಚ್ಯೆಂ ಕೊಶೆದ್ದ್ ಹಾಲ್ಲೆಂ. “
ಮದಾಮೆಚ್ಯೆಂ ವಯ್ಲೆಂ ರಾಜಾಂವ್ ಹೆರಾಂನಿಂ ಸಾಂಗ್ಚೆಂ ಹಾಂವೆಂ ಆಯ್ಕಲಾಂ.
“ಬೊಂಬಂಯ್ತ್ ಆಪ್ಲೆಂ ಟ್ರೇಡ್ ಯೂನಿಯನ್ ಕೊಟೆಂ ಹಾಲ್ಲಾಂ ಮ್ಹಣ್ ಸಮ್ಜಲ್ಲೊ ಜೊರ್ಜ್ ಬಿಹಾರಾಂತ್ಲ್ಯಾ ಲೋಕ್ ಸಭಾ ಶೆತ್ ಮುಜಾರಪ್ಪುರ್ ಥಾವ್ನ್ ಉಮೇದ್ವಾರ್ ಜಾಲೊ. ತಾಚ್ಯಾ ಸೊಶಲಿಸ್ತ್ ಸಾಂಗಾತ್ಯಾಂನಿಂ ತಾಚೊ ಪ್ರಚಾರ್ ಕೆಲೊ, ಕೈದಿ ವೇಸಾರ್ ಜೊರ್ಜಾಚಿಂ ಪೊಸ್ಟರಾಂ ಕ್ಶೆತ್ರಾಂತ್ ಚಿಪ್ಕಾಯ್ಲಿಂ. ಪ್ರಚಂಡ್ ಬಹುಮತೆನ್ ತೊ ಜಿಕ್ಲೊ. ಜೊರ್ಜಾಕ್ 1967 ಬೊಂಬಯ್ ದಕ್ಶಿಣ್ ಕ್ಶೇತ್ರಾಂತ್ ಲಾಭ್ಲೆಲ್ಯಾ ಜಯ್ತಾ ಪ್ರಾಸ್ ವರ್ತಿ ಜೀಕ್ ಹಿ. ವ್ಹಡ್ ಮಹತ್ವಾಚಿ ಕಿತ್ಯಾಕ್ ತ್ಯಾ ನಂತರ್ ಬಿಹಾರ್ ತಾಚಿ ಕರ್ಮಭೂಮಿ ಜಾಲಿ.”
ಯೆಜ್ಮಾನಿಕ್ ಕಿತ್ಯಾಕ್ ಕೊಣ್ಣಾಂ, ಕ್ರಿಸ್ತಾಂವ್ ದೆಕುನ್ ಮಾಂಯ್-ಗಾಂವಾಕ್ ತಾಣೆಂ ಪರತ್ ವಚಾಜೆ ಆಸ್ಲೆಂ ಮ್ಹಣ್ ಭೊಗ್ಲೆಂ:
“ತೊ ಆಮ್ಚೊ ಕೆನರಾ ಕತೊಲಿಕ್. ಆಪ್ಲ್ಯಾ ಮಾಂಯ್-ಗಾಂವಾಕ್ ಪಾಟಿಂ ಕಿತ್ಯಾಕ್ ತೊ ಗೆಲೊ ನಾಂ? ಕೊಡಿಯಾಳ್ ಪೆಂಟೆಂತ್ಲ್ಯಾ ಬಸ್ಸ್ ಆನಿಂ ಹೊಟೆಲ್ ಮಜ್ದೂರಾಂಕ್ ಎಕ್ವಟಾವ್ನ್ ತಾಂಚೊ ಪಾಗ್ ಆನಿಂ ಭಾತೆಂ ವಾಡಯ್ಜೆ ಮ್ಹಣ್ ಮುಶ್ಕರ್ ಕೆಲ್ಲೊ ಕ್ರಾಂತಿಕಾರಿ ತರ್ನಾಟೊ ತೊ. ತಾಕಾ ಬೊಂಬಯ್ ವಚೊಂಕ್ ಬಸ್ಸಾಚಿ ಟಿಕೆಟ್ ಆನಿಂ ವಾಟೆ ಖರ್ಚಾಕ್ 20 ರುಪಯ್ ದಿಲ್ಲೆ ಹ್ಯಾ ಕಾಮೆಲ್ಯಾಂನಿಂ. ಮಂಗ್ಳೂರ್ ವ ಉಡ್ಪಿ ಲೊಕ್-ಸಭಾ ಶೆತಾಂತ್ ಉಮೇದ್ವಾರ್ ಜಾವ್ಯೆತೆಂ ನೆ?” ಖಂಡಿತ್ ಜಿಕ್ತೊ”. ಜೊರ್ಜ್ ಫೆರ್ನಾಂಡಿಸ್ ಕ್ರಿಸ್ತಾಂವ್ ದೆಕುನ್ ಕ್ರಿಸ್ತಾಂವಾಂಚೊ ಆನಿಂ ಕೊಂಕ್ಣೊ ದೆಕುನ್ ಸಾರಸ್ವತಾಂಚೊ ವೋಟ್ ತಾಕಾ ಮೆಳ್ತಲೊ ಮ್ಹಣ್ ಯೆಜ್ಮಾನಿಚ್ಯೆಂ ವಾಕ್ಮೂಲ್.
“ಸೆಮಿನರಿ ಥಾವ್ನ್ ಪಾಟಿಂ ಕೊಡಿಯಾಳ್ ಆಯಿಲ್ಲೊ ಜೊರ್ಜ್ ಬಾಪೈನ್ ಘರಾ-ಭಾಯ್ರ್ ಘಾಲ್ಲೆಂ ದೆಕುನ್ ರಾವೊಂಕ್ ಏಕ್ ಬಿಡಾರ್ ಜಾಯ್ ಮ್ಹಣ್ ಸೊಶಲಿಸ್ತ್ ಪಾಡ್ತಿಂತ್ ಭರ್ತಿ ಜಾಲೊ. ಪಾಡ್ತಿಚ್ಯೆ ಕುಮ್ಕೆನ್ ‘ಕೊಂಕಣ್ ಯುವಕ್’ ಪತ್ರ್ ತಾಣೆಂ ಸುರು ಕೆಲೆಂ. ಥೊಡ್ಯಾಚ್ ಅಂಕ್ಯಾಂ ಉಪ್ರಾಂತ್, ‘ದೇವ್ ನಾ!’ ಮ್ಹಣ್ ಸಂಪಾದಕೀಯ್ ಪರ್ಗಟ್ಲೆಂ. ಭಿಸ್ಪಾನ್ ದಿಯೆಸೆಜಿಚ್ಯಾ ಪಾದ್ರಿಂಕ್ ಹುಕುಮ್ ದಿಲಿ ತೆಂ ಪತ್ರ್ ಜಳಂವ್ಕ್. ಭಾವಾಡ್ತಿ ಕತೊಲಿಕ್ ವಾಚ್ಪ್ಯಾಂನಿಂ ಪತ್ರಾಕ್ ಬಹಿಸ್ಕಾರ್ ಘಾಲೊ. ತವಳ್ ಖಾಸ್ಗಿ ಬಸ್ಸಾಂ ಆನಿಂ ಮಾಲಕಾಂಚೊ ಮುಖೆಲಿ ಕುಡ್ವಾ ಘರಾಣ್ಯಾಚೊ. ಕುಡ್ವಾಚೊ ಸಾರಸ್ವತ್ ಸಮೂದಾಯ್ ತಾಕಾ ಮತ್ ಘಾಲಿತ್-ಗೀ? ಕತೊಲಿಕ್ ಆನಿಂ ಸಾರಸ್ವತ್ ಹೆ ದೋನಿ ಕೊಂಕ್ಣೆ ಸಮೂದಾಯ್ ತವಳ್ ಇಂದಿರಾ ಗಾಂಧಿಚ್ಯೆ ಸಮರ್ತಕ್. ಟಿ. ಏ. ಪೈ ಆನಿಂ ಓಸ್ಕರ್ ಫೆರ್ನಾಂಡಿಸ್ ತಿಚ್ಯೆ ಖಾಸ್ ಮನಿಸ್. ತಾಂಚಿ ಖಂಯ್ ಬರೋಬರಿ ಕರ್ತಲೊ ಬಾವ್ಡೊ ಜೊರ್ಜ್?” ಜೊರ್ಜಾಚಿ ತರ್ನಾಟ್-ಪಣಾಚಿ ಚರಿತ್ರಾ ಆನಿಂ ದಿಯೆಸೆಜಿಚ್ಯಾ ಬಹಿಶ್ಕಾರಾ ವಿಷಿಂ ಮ್ಹಕಾ ಖಬರ್ ಆಸ್ಲಿ.
ಯೆಜ್ಮಾನ್: “ಬೆಂಗ್ಳುರಾಂತ್ ತಾಚ್ಯೆಂ ಬಾಪುಲ್-ಘರ್ ಆಸ್ಲೆಂ. ನೆಲಮಂಗಲಾಂತ್ ಆಸ್ತ್ ತಾಣೆಂ ಕಾಣ್ಗೆಲ್ಲಿ ಖೈಂ. ರೀಟಾಯರ್ಡ್ ಜಾವ್ನ್ ಆಪ್ಲ್ಯೆ ವಿಶಾಲ್ ಆಸ್ತಿಂತ್ ಬರೊ ಬೊಂಗ್ಲೊ ಬಾಂದುನ್, ರಾವಾಜೆ ಆನಿಂ ಸಮಾದಾನೆನ್ ಉರ್ಲೆಲಿ ಜಣಿ ಸಾರಿಜೆ ಮ್ಹಣ್ ತಾಚಿ ಅಭಿಲಾಶಾ ಆಸ್ಲಿ ಮ್ಹಣ್ತಾತ್.”
ಹಾಂವ್: “1984 ಒಕ್ತೊಬ್ರಾಂತ್ ಇಂದಿರಾ ಗಾಂಧಿಚಿ ಖುನಿ ಜಾಲಿ. ರಾಜೀವ್ ಗಾಂಧಿ ಪ್ರಧಾನಿ ಜಾಲೊ. ತಾಚ್ಯಾ ಮುಖೆಲ್-ಪಣಾರ್, ಜೆರಾಲ್ ಚುನಾವ್ ಜಾಲೊ. ನೆಹ್ರು-ಗಾಂಧಿ ವಂಶಾವಳಿಚೊ ಕಟ್ಟ್ ವಿರೋದಿ ಜೊರ್ಜಾಕ್ ಭೊಗ್ಲೆಂ ಕಿ ಬಡ್ಗಾ ಇಂಡಿಯಾಂತ್ ತೊ ಜಿಕ್ಚೊ ನಾಂ. ಕಿತ್ಯಾಕ್ ಕೊಂಗ್ರೆಸಾಕ್ sympathy wave ದಿಸ್ತೆಲಿ. ಬೆಂಗ್ಳುರ‍್ಚೊ ಮತ್-ದಾರ್ cosmopolitan. ಶಿಕ್ಪಿ ಜಣಾಂನಿಂ ಆಫ್ಣಾಕ್ ಜಿಕಂವ್ಚ್ಯೆಂ ಚಾನ್ಸ್ ಆಸಾ, ಅಶೆಂ ತಾಣೆಂ ಲೇಕ್ ಘಾಲೆಂ. ತಶೆಂ ಜಾಲೆಂ ನಾಂ. ತೊ ಸಲ್ವಲೊ. ಜಿಕ್ಲಲೊ ಜಾಲ್ಯಾರ್, ಆಪ್ಲ್ಯಾ ನೆಲಮಂಗಲ ಪ್ಲೊಟಾಂತ್ ಬೊಂಗ್ಲೊ ಬಾಂದ್ತೊ ಆನಿಂ ಥೈಂ ಶಿಫ್ಟ್ ಜಾತೊ ಕೊಣ್ಣಾಂ”.
“ತಾಚ್ಯೆಂ ನಶೀಬ್. ಘಡ್ಣಿ ಖೈಂ ಆಸಾ ಥೈಂ ವೊಡಿತ್ತ್ ವರ್ತಾ ನಶೀಬ್” ಲ್ಹಾನ್ ಚುಟುಕ್ ವಾಪ್ರುನ್ ಮದಾಮ್ ವೊಗಿ ಜಾಲಿ. ಮೌನ್-ಪಣಿಂ ಜೊರ್ಜಾ ಬಾಬ್ತಿನ್ ತಿಚ್ಯೆಂ ಭಕ್ತಿಪಣ್ ಆನಿಂ ತಾಚ್ಯೆರ್ ತಿಚೊ ಅಭಿಮಾನ್ “ಧರ್ ಧರ್” ಮ್ಹಣ್ ದಿಸ್ಲೊ ಮ್ಹಕಾ.
► ಫಿಲಿಪ್ ಮುದಾರ್ಥ್
*ಅನೀಕಿ ಆಸಾ ತೆಂ ಮುಖ್ಲ್ಯಾ ಅವಸ್ವರಾಂತ್…
Nice to read & understand the political carrier of social activist Mr George Fernandes
Thanks Philip
Good to read this typical Mudarthian piece laced with critical thoughts backed by evidence of course. Good job.
Beautiful narration on the Politiical journey of George Fernandes.I have also experienced,heard about his rise from taxi union leadership to All India Railway workers union to MP and Minister at the Centre.Very nice to read and understand the journey of social and political activist George Fernandes.
Waiting for the continuation.