ಯೊಮ್ ಕಿಪುರ್ – ಭಿತರ‍್ಲ್ಯಾನ್ ಆನಿ ಭಾಯ್ಲ್ಯಾನ್ ….

ದೆವಾ ಆನಿ ಮನ್ಶ್ಯಾ ಸಂಬಂದಾಕ್  ಲಾಗ್ಶಿಲ್ಯಾನ್ ನಾತೆಂ ಜೊಡಲ್ಲೊ ರಾಶ್ಟ್ರ್ ಇಸ್ರಾಯೆಲ್ ತರ್ ದೆವಾನ್ ವಿಂಚುನ್ ಕಾಡಲ್ಲೊ ಲೋಕ್ ಜುದೆವ್. ಸಂಸಾರಾಚ್ಯಾ ಉಗಮಾಚ್ಯಾ ಸುರ್ವೆರ್ ಥಾವ್ನ್ ದೆವಾಕ್ ಮೊಗಾಚಿ ಮಾತಿ ಆನಿ ತ್ಯಾ ಮಾತ್ಯೆಚಿಂ ಮನ್ಶ್ಯಾಂ – ಸಗ್ಳ್ಯಾ ಸಂಸಾರಾರ್ ತಾಂಚ್ಯಾ ಧಾರ್ಮಿಕ್ ಆಚರಣಾಂನಿ ಅಖ್ಖ್ಯಾ ಯುಗಾಂನಿ ವಿಶೇಸ್ ರಿತಿಂನಿ ಅವ್ವಲ್ ಜಾವ್ನ್ ದಿಸೊನ್ ಯೆತಾತ್.  ದೆವಾನ್ ಹ್ಯಾ ಭುಂಯ್ಚೆರ್ ಮನ್ಶ್ಯಾ ರುಪಿಂ ದಾಡ್‌ಲ್ಲ್ಯಾ ಜೆಜುಕ್ರೀಸ್ತಾಕ್ ಭಾವಾರ್ಥುನ್ ಮಾನುನ್ ಘೆಂವ್ಚೆ ಹಾರಿ-ಹಾರಿಂಚೆ ಪಾಟ್ಲಾವ್ದಾರ್ ಎಕೆ ಕುಶಿನ್ ತರ್,  ದೆವಾಬಾಪಾಕ್ ಆರಾದುನ್ ದೇವ್ ಪುತಾಕ್ ನೆಗಾರ್ಚೆ ಥೊಡ್ಯಾ ಸಂಕ್ಯಾನ್ ಜುದೆವ್ ಅನ್ಯೆಕಾ ಕುಶಿನ್ ವೆಗ್ಳೊನ್ ವೆತಾತ್.

ಜೆರಾಲ್ ರಿತಿನ್ ಪಳಯ್ಲ್ಯಾರ್ ತಾಂಚ್ಯಾ ಮಾಲ್ಘಡ್ಯಾಂಚಿ ಪಾತ್ಯೆಣಿ ಆತಾಂಚ್ಯಾ ಕಾಳಾಚ್ಯಾ ಜುದೆವಾಥಂಯ್ ತಿತ್ಲ್ಯಾ ದಾಟಾಯೆನ್ ನಾಂ ತರ್‌ಯಿ – ಫೆಸ್ತಾ ಪರ್ಬೆ ದಿಸಾಂನಿ ಬಾಯ್ಲ್ಯಾ ದಿಕಾವೆಕ್ ತರ್‌ಯೀ ತ್ಯೊ ದಿಸೊನ್ ಯೆತಾತ್. ಪರ್ನೊ ತೆಸ್ತಾಮೆಂತ್ ವ್ಹಡಾ ಮಾನಾನ್, ಭಾವಾರ್ಥಾನ್ ಆರಾದುಂಚೆ ಪ್ರಸ್ತುತ್ ಕಾಳಾಚೆ ಜುದೆವ್ ಆತಾಂಯ್ ಆಪ್ಲ್ಯಾ ಮಾಲ್ಘಡ್ಯಾಂಚ್ಯೊ ರಿತ್ಯೊ ರಿವಾಜ್ಯೊ  ವ್ಹಡಾ ಶ್ರದ್ದೆನ್ ಪಾಳ್ತಾತ್.

‌ದೆವಾನ್ ಸಗ್ಳೊ ಸಂಸಾರ್ ರಚುನ್ ಹಪ್ತ್ಯಾಚ್ಯಾ ಸಂಪವ್ಣೆಚ್ಯಾ ಸಾತ್ವ್ಯಾ ದೀಸಾ ಸುಶೆಗ್ ಘೆತಲ್ಲೊ ಸಾಬ್ಬಾತ್ ಜುದೆವಾಂಚ್ಯಾ ವಾಂಟ್ಯಾಚೊ ಪವಿತ್ರ್ ಆನಿ ಭಾಗೆವಂತ್ ದೀಸ್.  ಹಫ್ತ್ಯಾಚೊ ಪಯ್ಲೊ ದೀಸ್ ಆಯ್ತಾರ್ (ಯೊಮ್ ರಿಶೊನ್ ) ಇಸ್ರಾಯೆಲಾಂತ್ ವಸ್ತಿ ಕರ್ಚ್ಯಾ ಕಾಮೆಲ್ಯಾಂಕ್ ವೆಪಾರ್ ವಯ್ವಾಟಾಕ್ ಸುರ್ವೆಚೊ ದೀಸ್. ಉಪ್ರಾಂತ್ ಸುಕ್ರಾರಾಚೊ ದೊನ್ಪಾರ್ ಹಫ್ತ್ಯಾಚ್ಯಾ ಅಂತ್ಯಾಕ್ ಯೇವ್ನ್ ಪಾವ್ತಾನಾ, ಸಾಂಜೆರ್ ಸುರ್ಯಾ ಬುಡ್ಣೆಚ್ಯಾ  ಥೊಡ್ಯಾಚ್ ಘಡಿಯೆ ಪಯ್ಲೆಂ ಸಾಬ್ಬಾತಾಚೊ ಆರಂಬ್.

ಮನ್ಶ್ಯಾ ಕುಡಿಚೊ ವ್ಯಸ್ತ್ ವೇಳ್ ಸಂಪವ್ನ್ ಸುಶೆಗಾಚೊ ಧೀಗ್ ಉಸ್ವಾಸ್ ಘೆವುನ್ … ಸಾಬ್ಬಾತ್ ಆರಂಬ್ ಜಾತಾ. ಜುದೆವಾಂಚೆಂ ಮಾಗ್ಣ್ಯಾ ಮಂದಿರ್ ಸಿನೆಗೊಗಾನಿಂ ಸಾಬ್ಬಾತಾಚೊ ಆರಂಭ್ ಮಾಗ್ಣ್ಯಾನ್ ಆನಿ ಧ್ಯಾನಾನ್ ಸುರು ಜಾತಾ. ಥೊಡೆ ಅಪುಟ್ ಧಾರ್ಮಿಕ್ ಜುದೆವ್ ಹ್ಯಾ ಸಾಬ್ಬಾತಾಚ್ಯೊ ಕಠೀಣ್ ರೆಗ್ರ್ಯೊ ಚುಕಾನಾಸ್ತಾ ಪಾಳ್ತಾತ್. ಆಪುಟ್ ರೆಲಿಜಿಯೊಸ್ ಜುದೆವ್ ಸಾಬ್ಬಾತಾಚ್ಯಾ ದಿಸಾಚೆಂ ಜೆವಣ್ ಆದ್ಲ್ಯಾ ದಿಸಾ ರಾಂದುನ್ ತಯಾರ್ ಕರುನ್ ದವರ್ತಾತ್. ಸನ್ವಾರಾಚೊ ದೀಸ್ – ಫಕತ್ ದೈಹಿಕ್ ವಿಶೆವಾಕ್!  ಮತಿಚ್ಯಾ ಧ್ಯಾನಾಂನಿ, ಮಾಗ್ಣ್ಯಾನ್ ಹರ್ಯೆಕ್ಲೊ ಸನ್ವಾರ್ ಖರ್ಚಿತಾ. ರೆಲಿಜಿಯೊಸ್ ನ್ಹಯ್ ಆಸಲ್ಲ್ಯಾಕ್ ಸಾಬ್ಬಾತ್ ಮ್ಹಳ್ಯಾರ್ ತಾಂಚ್ಯಾ ಹೆರಾ ದಿಸಾಂಚ್ಯಾ ರಾಟಾವಳೆಥಾವ್ನ್ ಸುಟ್ಕಾ ಘೆವ್ನ್ –  ದೈಹಿಕ್ ವಿಶ್ವ್ಯಾಂಕ್ ಸುಟ್ಕಾ ದೀವ್ನ್ ಕುಟ್ಮಾ ಸಾಂಗಾತಾ ವೇಳ್ ಸಾರ‍್ಚೆಂ –  ರಿಲ್ಯಾಕ್ಸ್  ವೀಕೆಂಡ್!

‌ಜುದೆವ್ ಪರ್ನ್ಯಾ ಸೊಲ್ಲ್ಯಾಂತ್ ಆಚರಣ್ ಜಾಂವ್ಚಿಂ ಸಬಾರ್ ಫೆಸ್ತಾಂ ಆತಾಂಯ್ ಸಂಭ್ರಮ್ತಾತ್. ಸುರ್ವೆರ್ ಸರಿಸುಮಾರ್ ಎಪ್ರಿಲ್ ಮಯ್ನ್ಯಾಂತ್ ಆಚರುಂಚೆಂ “ಪೆಸಾಕ್” ಮ್ಹಳ್ಯಾರ್ ಬೆಖಮಿರ್ ಉಂಡ್ಯಾಚಿ ಪರಬ್ ( Pesach) ( Passover) ಆಮ್ಚ್ಯಾ ಕಥೊಲಿಕಾಂನಿ  ಸಂಭ್ರಂಮ್ಚ್ಯಾ –  ಜೆಜುಚ್ಯಾ ಕಶ್ಟಾ ಮರ್ಣಾಚ್ಯಾ ಸಂಭ್ರಮಾಚ್ಯಾ ಕಾಳಾರ್ ಯೆತಾ.  ಉಪ್ರಾಂತ್ ಯೆಂವ್ಚೆಂ ” ಶಬುವೊತ್ ” ಪೆಂತೆಕೊಸ್ತ್ , ಉಪ್ರಾಂತ್ ಜುದೆವಾಂಚೆ ನವೆ ವರಸ್ “ರೊಶ್ ಹಾಶಾನಾ” (Rosh Hashana) ತಾಚ್ಯಾ ಸಾಂಗಾತಾಚ್ ಸಂಬ್ರಮ್ಚೆ ”ಯೊಮ್ ಕಿಪುರ್”, “ಸುಕೊತ್ ”ಆನಿಂ “ ಪುರಿಮ್ ” ತಸಲಿಂ ಸಭಾರ್ ಧಾರ್ಮಿಕ್ ಫೆಸ್ತಾಂ ಆದ್ಲ್ಯಾ ಸಾಂಜೆಚ್ಯಾ ಜೆವ್ಣಾಂತ್ ಆರಂಬ್ ಜಾವ್ನ್ ದುಸ್ರ್ಯಾ ದಿಸಾಚ್ಯಾ ಸಾಂಜೆ ಪರ್ಯಾಂತ್ ಆಚರಣ್ ಜಾವ್ನ್ ಸಂಪ್ತಾತ್. ಹ್ಯಾ ಸರ್ವಯ್ ಪರ್ಬೆಂನಿ ಎಕ್ ಪರಬ್ ಜುದೆವ್ ಬೋವ್ ಶ್ರದ್ದೆನ್ ಆನಿ ಬೋವ್ ಮಾನಾನ್ ಅಜೂನ್‌ಯೀ ಸಂಭ್ರಮ್ತಾತ್  – ತಿಚ್ ಯೊಮ್ ಕಿಪುರ್ ( Yom Kippur )  ಮ್ಹಳ್ಯಾರ್ ಪ್ರಾಚಿತಾಚೊ ದೀಸ್.

‌ಹೊ ದೀಸ್ ಜುದೆವಾಂಚ್ಯಾ ತಾರಿಕೆ ಪಂಚಾಂಗಾಂತ್ ಬೊವ್ ಪವಿತ್ರ್ ದೀಸ್. ಹರ್ಯೆಕ್ ಜುದೆವ್ ಹ್ಯಾ ದಿಸಾ ಉಪಾಸ್ ಆನಿ ಧ್ಯಾನಾ ಸಾಂಗಾತಾ ಆಪ್ಣೆಂ ಕೆಲ್ಲ್ಯಾ ಪಾತ್ಕಾಂಕ್ ಭೊಗ್ಸಾಣ್ಯಾಚಿ ಮಾಫಿ ಉಚಾರುನ್ ದೆವಾಲಾಗಿಂ ಲಾಗ್ಶಿಲ್ಯಾನ್ ಸಂವಾದ್ ಚಲೊಂವ್ಕ್ ಪೆಚಾಡ್ತಾ. ಜರ್ ಹರ್ಯೆಕ್ಲೊ ಸರ್ವ್ ಪಶ್ಚತ್ತಾಪಾಂಚಿಂ ಕರ್ನಿಂ ಆಧಾರುನ್ ತಾಚೆಲಾಗಿ ಭೊಗ್ಸಾಣೆಂ ಮಾಗ್ತಾನಾ, ದೇವ್ ತಾಚಿ ಪಾತ್ಕಾಂ ಭೊಗ್ಸುನ್ ತಾಚೆರ್ ಮುಕ್ಲ್ಯಾ ಜಿವಿತಾಕ್ ಶಿಂವೊರಾಚಿ ಬೆಸಾಂವಾಂ ವೊತ್ತಾ ಮ್ಹಳ್ಳೆಂ, ಹರ್ಯೆಕಾ ಜುದೆವಾಚಿ ಅದಿಮಾಗಾಂ ಥಾವ್ನ್ ಪಾತ್ಯೆವ್ನ್ ಆಯಿಲ್ಲಿ ಪಾತ್ಯೆಣಿ. ‌ಯೊಮ್ ಕಿಪುರ್ ಜುದೆವಾಚ್ಯಾ ನವ್ಯಾ ವರ್ಸಾಚ್ಯಾ ( Jewish New Year) ನೋವ್ ದೀಸಾ ಉಪ್ರಾಂತ್ ಯೆತಾ.

‌ಜುದೆವಾಚ್ಯಾ ಹೆರ್ ಫೆಸ್ತಾ ಸಾಂಗಾತಾ ಯೊಮ್ ಕಿಪುರ್ ಸಾಂಜೆಚ್ಯಾ ಸುರ್ಯಾಚ್ಯಾ ಬುಡ್ಣೆಚ್ಯಾ ಘಡಿಯೆಥಾವ್ನ್ ಸುರ್ವಾತ್ತಾ. ಪವಿತ್ರ್ ಗಾಂವ್ ಇಸ್ರಾಯೆಲಾಚೆ –  ಹರ್ಯೆಕಾ ಕೊನ್ಶ್ಯಾಂತ್ಲೆ ಜುದೆವ್ ಮುಕ್ಲ್ಯಾ ವೊರಾಂನಿ ಮೌನ್ ಆನಿ ಧ್ಯಾನಾಂತ್ ದೆವಾ ಲಾಗಿಂ ಸಂವಾದ್ ಚಲೊಂವ್ಚ್ಯಾಕ್ ತಯಾರ್ ಜಾತಾ. ಭಾಯ್ಲ್ಯಾನ್ ಆಂಗ್ಡಿಚ್ಯಾ ವೆವ್ಹಾರಾಚಿಂ ದಾರಾಂ ಧಾಂಪ್ತಾತ್, ಮಾಗ್ಣ್ಯಾಕ್ ಸಿನೆಗೊಗಾಚಿಂ ದಾರಾಂ ಉಘಡ್ತಾತ್, ಮನೊರಂಜನಾಚ್ಯೊ ಗಲಾಟೊ ಶಾಂತ್ ಜಾತಾ, ಸಗ್ಳ್ಯಾ ರಾಶ್ಟ್ರಾಂತ್ ಟೆಲಿವಿಶನ್ ಪ್ರಸಾರ್ ಸ್ಥಬ್ದ್ ಜಾತಾ. ವಿಮಾನಾಂ ಉಡಾವಣ್ ರಾವೊನ್ ವಿಶೆವ್ ಘೆತಾತ್, ಸರ್ಕಾರಿ ಬಸ್ಸಾಂ ಸೊಡ್ಯಾಂ, ಖಾಸ್ಗಿ ವಾಹನಾಂಯ್ ರಸ್ತ್ಯಾರ್ ಧಾಂವಾನಾಂತ್. ಯೊಮ್ ಕಿಪುರ್ ಅಶೆಂಚ್ ಆಸಜೆ –  ಮ್ಹಣೊನ್ ಇಸ್ರಾಯೆಲಾಚ್ಯಾ ಸರ್ಕಾರಾಚಿಂ ಕಾಂಯ್ ಕಾನೂನಾಂ ನಾಂತ್.  ಪುಣ್ ಜುದೆವಾಂಚ್ಯಾ ಧಾರ್ಮಿಕ್ ಕಾನೂನಾ ಪರ್ಮಾಣೆ ಹರ್ಯೆಕಾ ಜುದೆವಾಕ್ ಯೊಮ್ ಕಿಪುರಾಚ್ಯಾ ಸಾಂಜೆಚ್ಯಾ ಸುರ್ಯಾ ಬುಡ್ಣೆಚ್ಯಾ ಉಪ್ರಾಂತ್ ಕಿತೆಂಯ್ ಖಾಂವ್ಕ್ ಯಾ ಪಿಯೆಂವ್ಕ್ ಆಡ್ವಾರ್ಲಾಂ. ಕುಡಿಚ್ಯಾ ನಿತಳಾಯೆಕ್ , ಯಾ ಕೂಡ್ ಸುಗಂಧಾಂತ್ ಫರ್ಮಳಾಂವ್ಕ್ ಅವ್ಕಾಸ್ ನಾ. ಖಂಯ್ಚ್ಯಾಯ್ ರಿತಿಚೊ ಲೈಂಗಿಕ್ ಸಂಪರ್ಕ್ ಯೊಮ್ ಕಿಪುರ್ ಆಡ್ವಾರ್ತಾ.

‌ಹೆಂ ಸರ್ವ್ ಅಪುಟ್ ಧಾರ್ಮಿಕ್ ಮ್ಹಣೊನ್ ಇಸ್ರಾಯೆಲಾಂತ್ ವೊಲಾಂವ್ಚ್ಯಾ “ದತ್ತಿ” ಲೊಕಾಚೊ ಚಾರ್ ವೊಣದಿ ಮಧ್ಲೊ  ಭಿತರ‍್ಲೊ ಧಾರ್ಮಿಕ್ ಸಂಸಾರ್ ತರ್,  ಭಾಯ್ರ್ ಶಹರಾಂತ್ಲೊ  ಮೌನ್ ದಬಾಜೊ ಎಕಾ ವಿಭಿನ್ನ್ ಸಂಸಾರಾಚಿಂ ದಾರಾಂ ಉಗ್ತಿಂ ಕರ್ತಾ. ‌ಯೊಮ್ ಕಿಪುರಾಚಿ ಸಾಂಜ್ ಹೆರಾಂ ಸಾಂಜೆಬರಿ ನ್ಹಯ್.  ಹಿ ಸಾಂಜ್ ಏಕ್ ವೆಗ್ಳೊಚ್ ಭುಮಿ ವೈಕುಂಠ್.  ಹಿ ಸಾಂಜ್ ಮನ್ಶ್ಯಾನ್ ರಚ್ಲೆಲಿಂ ಯಾಂತ್ರಿಕ್ ರಚ್ನಾಂ ವಿಶೆವಾಕ್ ವಚೊನ್,  ಮನ್ಶ್ಯಾನ್ ಘರಾಭಾಯ್ರ್ ಯೇವ್ನ್ ಎಕ್ ನವೊಚ್ ಸಂಸಾರ್ ದೆಕ್ಚಿ ಸಾಂಜ್.  ಯೊಮ್ ಕಿಪುರಾಚಿ ಸಾಂಜ್  ದಾಕ್ಟುಲ್ಯಾ ಆಂಜಾಂನಿಂ ಆಪ್ಲ್ಯಾ ವ್ಹಡಿಲಾಂ ಸಾಂಗಾತಾ ಸೈಕಲಾರ್ ಸವಾರಿ ಕರುನ್ ವೆಚಿ, ಮೋಗ್ ಕರ್ಣಾರಾಂನಿ ಹಾತಾಂತ್ ಹಾತ್ ಧರುನ್ ನಿತ್ರಾಣೆಚ್ಯಾ ದಿಸಾಂನಿ ಜಬ್ಬೊರ್ ಝರೊನ್ ಶಾಂತ್ ಸುಶೆಗ್ ಘೆಂವ್ಚ್ಯಾ ಖಾಲಿ ರಸ್ತ್ಯಾರ್ ಬೆಫಿಕಿರ್ ಚಲ್ಚಿ ಆನಿ ಅಯ್ಶ್ಯಾಂಚೊ ಮ್ಹಾತಾರ‍್ಯಾನ್  ಆಪ್ಲ್ಯಾ ಸತ್ತರಾಚ್ಯಾ ಜ್ಯೊಲಿಯೆಟಾಸಂಗಿ ಮೆಟಾಕ್ ಮೇಟ್,  ಭುಜಾಕ್ ಭುಜ್ ದೀವ್ನ್  ಚಲ್ಚಿ.  ಹಿ ಸಾಂಜ್ ಹ್ಯಾ  ಶಹರಾಚ್ಯಾ ದೊಳ್ಯಾಂಕ್ ಅಜಾಪಾಚೊ ಭೊಂವಾರ್!

ಯೊಮ್ ಕಿಪುರಾಚ್ಯಾ ಧಾರ್ಮಿಕ್ ದಿಸಾಚ್ಯಾ ಸಿನೆಗೊಗಾಂತ್ಲ್ಯಾ ಪ್ರಾಚಿತಾಚ್ಯಾ ಆನಿ ಮಾಗ್ಣಾಚ್ಯಾ  ಭಿತರ್ಲ್ಯಾ ಸಂಸಾರಾ ತಿತ್ಲೊಚ್; ಭಾಯ್ಲೊ  … ಉಗ್ತೊ , ಜಿವೊ,  ಲೌಕಿಕ್ ಸಂಸಾರ್‌ಯೀ  ಅರ್ಥಾಭರಿತ್ ಜಾವ್ನ್  ದಿಸ್ತಾ .

‌► ಅನಿಲ್ ಬೈಂದೂರ್