ಭೋವ್ ಭಾಗೆವಂತ್ (ಸಾಂತಿಮಾದ್ರ್) ವಾತಿಕಾನ್ ದುಸ್ರಿ ಕ್ರೀಸ್ತಿ ಎಕ್ತಾರಾಚಿ (ಎಕುಮೆನಿಕಲ್) ವಿಶ್ವಸಭಾ ಜುವಾಂವ್ ತೆವಿಸಾವ್ಯಾನ್ (ಆಂಜೆಲೊ ಗಿಸೆಪ್ಪ್ / ಜೋಸೆಫ್ ಕಾಡ್ದಿನಾಲ್ ರೊಂಕಾಲಿ) ಆಪಯಿಲ್ಲಿ. ಪವಿತ್ರ್‌ಸಭೆಂತ್ ನವೆಂ ವಾರೆಂ ಯೇಂವ್ (ಅಗ್ಗಿಯಾರೆಮೆಂತೊ) ಮ್ಹಣ್ಚೊ ತಾಚೊ ಉಲೊ ಆಸ್‌ಲ್ಲೊ. ಖರ‍್ಯಾನ್ ತೊ ಭಾಗೆವಂತ್ ಬಾಪ್ ಜಾವ್ನ್ ವಿಂಚುನ್ ಯೆತಾನಾಂ ಮಿಕ್ವಾಲ್ಲ್ಯಾ ಪ್ರಾಯೆಚೊ (ಇಂತೆರಿಮ್ ಪಾಪಾ ಮ್ಹಣ್ಂಚ್ ತಾಕಾ ವಿಂಚ್‌ಲ್ಲೊ) ಕಥೊಲಿಕ್ ಪವಿತ್ರ್‌ಸಭೆಚ್ಯಾ ತ್ಯಾ ಕಾಳಾಚ್ಯಾ ಪ್ರಮುಕಾಂನಿ ತಾಕಾ ವ್ಹರ‍್ತೊ ಅಸಹಕಾರ್ ದಾಕಯಿಲ್ಲೊ. ತಾಚ್ಯಾ ಮರ‍್ಣಾ ವೆಳಾರ್‌ಯ್ ಸಭಾ ಪುರ‍್ತಿ ಜಾಂವ್ಕ್ ನಾತ್‌ಲ್ಲಿ.
ತಾಚೆ ನಂತರ್ ಆಯಿಲ್ಲ್ಯಾ ಪಾಪಾ ಪಾವ್ಲ್ ಸವ್ಯಾನ್ ಸಭಾ ಮುಂದರುನ್ ವೆಲಿ. ತಾಕಾ ಹಿ ಸಭಾ ಯಶಸ್ವಿ ಜಾಂವ್ಚ್ಯಾಕ್ ವ್ಹಡ್ ಅಡ್ಕಳ್ ಕೊಣಾಥಾವ್ನ್ ಯೆತಾ ಮ್ಹಳ್ಳೆಂ ಸಮ್ಜುನ್ ದಿಯೆಸೆಜಿಂನಿ ತರ‍್ನ್ಯಾ ತರ‍್ನ್ಯಾಂಕ್ ಬಿಸ್ಪ್ ನೆಮ್ಚಿ ಆಲೋಚನ್ ಕೆಲಿ. ಹಾಚೊ ಫಳ್ ಜಾವ್ನ್ 31 ವರ್ಸಾಂ ಪ್ರಾಯೆಚೊ ಅಲ್ಪೊನ್ಸ್ ಮಥಾಯಸ್ ಚಿಕ್ಮಗ್ಳುರ‍್ಚೊ ಬಿಸ್ಪ್ ಜಾಲೊ. 39ವರ‍್ಸಾಂಚೊ ಬಾಜಿಲ್ ಸೊಜ್ ಮಂಗ್ಳುರ‍್ಚೊ ಬಿಸ್ಪ್ ಜಾಲೊ. ಅಸಲ್ಯಾ ಸಭಾರ್ ತರ‍್ನಾಟ್ಯಾಂ ನಿಮ್ತಿಂ ಸಭೆನ್ ಜಾಗತಿಕ್ ಪವಿತ್ರ್‌ಸಭೆಂತ್ ವಿಸ್ತೃತ್ ಆನಿ ಕ್ರಾಂತಿಕಾರಿ ಬದ್ಲಪ್ ಹಾಡ್ಲೆಂ.
ವಾತಿಕಾನ್ ವಿಶ್ವಸಭೆನ್ ಹಾಡ್ಲಲ್ಯಾ ಸಭಾರ್ ಬದ್ಲಪಾಂ ಮಧೆಂ ಲಾಯಿಕ್ ಭಾವಾಡ್ತ್ಯಾಂಚ್ಯಾ ಬಳ್ವಂತ್ಪಣಾಚೆಂ ಕಾರ‍್ಯಾಯೋಜನ್ ಮಹತ್ವಾಚೆಂ. ಧಾರ್ಮಿಕ್ ಆನಿ ಆಧ್ಯಾತ್ಮಿಕ್ ಬದ್ಲಪಾಂಸವೆಂ ಸ್ಥಳೀಯ್ ಪವಿತ್ರ್‌ಸಭೆಚ್ಯಾ ಆಡಳ್ತ್ಯಾಂತ್ ಆನಿ ತ್ಯಾ ಮುಕಾಂತ್ರ್ ಪವಿತ್ರ್‌ಸಭೆಕ್ ಬಳ್ವಂತ್ ಕರ‍್ಚ್ಯಾಂತ್ ಲಾಯಿಕಾಂಚಿ ಸಕತ್ ವಾಪಾರ‍್ಚ್ಯಾಕ್ ವಿವಿಧ್ ಮಾಂಡಾವಳಿ ತ್ಯಾ ಸಭೆಂತ್ ರುಪಿತ್ ಕೆಲ್ಯೊ. ಜಾಗತಿಕ್ ಮಟ್ಟಾರ್ ವಿವಿಧ್ ದಿಯೆಸೆಜಿಂನಿ ಹ್ಯಾ ದಿಶೆಂತ್ ಮೆಟಾಂ ಕಾಡ್ಲಿಂ.
ಜಶೆಂ ಚಡಾವತ್ ದಿಯೆಸೆಜಿಂನಿ ತಶೆಂಚ್ ಉದೆಂತಿಚೆಂ ರೋಮ್ ಮ್ಹಣ್ ನಾಂವಾಡ್ಲಲ್ಯಾ ಮಂಗ್ಳುರಾಂತ್ ಹೆಂ ಸುಧಾರಣ್ ಚಡ್ ವೆವಸ್ಥಿತ್ ಆನಿ ವಿಸ್ತಾರ್ ರುಪಾರ್ ಕಾರ‍್ಯಾರುಪಾಕ್ ಹಾಡ್ಚ್ಯಾಕ್ ವಿವಿಧ್ ಯೋಜನಾಂ ಘಾಲಿಂ. ಬಿಸ್ಪ್ ಬಾಜಿಲಾಚ್ಯಾ ಮುಕೇಲ್ಪಣಾಂತ್ ಸ್ಥಳಿಕ್ ಕೊಂಕ್ಣಿ ಭಾಶೆಂತ್ ಲಿತುರ‍್ಜಿ ರುಪಿತ್ ಕರ‍್ಚ್ಯಾಕ್ ಪವಿತ್ರ್ ಪುಸ್ತಕಾಂಚೆಂ, ಮಿಸಾಂ ಪುಸ್ತಕಾಂಚೆಂ ಆನಿ ವಿವಿಧ್ ಮಾಗ್ಣ್ಯಾಂ ಪುಸ್ತಕಾಂಚೆಂ ಭಾಶಾಂತರ್ ತ್ವರಿತ್‌ಗತೆನ್ ಚಲ್ಲೆಂ. ಹ್ಯಾ ದಿಶೆನ್ ವಾವುರ‍್ಚ್ಯಾಕ್ ಮಂಗಳ ಜ್ಯೋತಿ ರುಪಿತ್ ಕೆಲೆಂ.
ಲಾಯಿಕಾಂಕ್ ದಿಯೆಸೆಜಿಚ್ಯಾ ಆನಿ ಪಿರ‍್ಗಜೆಂಚ್ಯಾ ಗೊವ್ಳಿಕ್ ಆಡಳ್ತ್ಯಾಂತ್ ಚಡ್ ಆನಿ ಚಡ್ ಮಾಪಾನ್ ವಾಂಟೆಲಿ ಕರ‍್ಚ್ಯಾಕ್ ಆದ್ಲಿ ಆಡಳ್ತೆದಾರ್ ಆನಿ ಜುಂತಾಚಿ ವೆವಸ್ತಾ ಆಕೇರ್ ಕೆಲಿ. ಆದ್ಲ್ಯಾ ವೆವಸ್ತ್ಯಾಂತ್ ಪಿರ‍್ಗಜೆಚ್ಯಾ ಬೊಟಾಂತ್ ಮೆಜ್ಯೆತ್ ತಿತ್ಲ್ಯಾ ಗ್ರೇಸ್ತ್ ಆನಿ ಬಳ್ವಂತ್ ಕುಟ್ಮಾಂಚ್ಯಾ ಮುಟಿಂತ್ ಸರ‍್ವ್ ನಿಯಂತ್ರಣ್ ಆಸ್‌ಲ್ಲೆಂ. ತ್ಯಾ ನಿಮ್ತಿಂ ವಿವಿಧ್ ಫಿರ‍್ಗಜಾಂನಿ ವಿವಿಧ್ ನಮುನ್ಯಾಚೆ ತಿಕ್ಕಾಟ್ ಆನಿ ವಾಂಟೆಫಾಂಟೆಜಾವಪ್ ನಿರಂತರ್ ಚಲ್ತಾಲೆಂ. ತೆಂ ಅಕೇರ್ ಕರ್ನ್ ಸರ‍್ವ್ ಲೊಕಾಂಕ್ ಆಪ್ಲ್ಯಾ ಫಿರ‍್ಗಜೆಚ್ಯಾ ವೆವ್ಹಾರಾಂನಿ ವಾಂಟೆಲ್ಪಣ್ ದಿಲೆಂ (ಆಡಳ್ತೆದಾರ್ ಆನಿ ಜುಂತ್ ವೆವಸ್ತ್ಯಾಚಿ ಸಾರ‍್ಕಿ ವಳಕ್ ನಾಸ್ತಾನಾಂ ತ್ಯಾ ವೆವಸ್ತ್ಯಾಕ್ ಪುಗಾರುನ್ ಬರಯಿಲ್ಲೆಂ ತವಳ್ ತವಳ್ ಆಯ್ಕುಂಕ್ ಮೆಳ್ತಾ ತಿ ದುಸ್ರಿ ಗಜಾಲ್)
ಪಯ್ಲ್ಯೆಪಾವ್ಟಿಂ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಷದೆಚೆಂ ಸಂವಿಧಾನ್: 1971-72
ಮಂಗ್ಳುರ್ ದಿಯೆಸೆಜಿಂತ್ ಪವಿತ್ರ್‌ಸಭೆಂತ್ ಲಾಯಿಕ್ ಭಾವಾಡ್ತ್ಯಾಂಚ್ಯಾ ಮೆತೆರ‍್ಪಣಾಕ್ ಆನಿ ಮುಕೇಲ್ಪಣಾಕ್ ಮ್ಹಣ್ ರುಪಿತ್ ಕೆಲ್ಲ್ಯಾ ಪಯಿಲ್ಲ್ಯಾ ಗೊವ್ಳಿಕ್ ಪರಿಷದೆಚ್ಯಾ ನಿಯಮ್ ಪುಸ್ತಕಾಂತ್ ಬಿಸ್ಪ್ ಬಾಜಿಲಾನ್ ಲಿಕ್ಲಲೆಂ ವಿಸ್ತೃತ್ ಪ್ರಸ್ತಾವನ್ ಅಶೆಂ ಆಸಾ –
‘…ವೆಳಾಕಾಳಾಚೆ ಘುರ‍್ತ್ ಸಮ್ಜುನ್ ಪಾಪಾ ಜುವಾಂವ್ ತೆವಿಸಾವ್ಯಾನ್ ಪವಿತ್ರ್‌ಸಭೆಂತ್ ನವೊ ಜೀವ್ ಭರುಂಕ್ ಫಾವೊತ್ಯೊ ವಾಟೊ ಸೊಧ್ಚ್ಯಾಕ್ ವಾತಿಕಾನ್ ದುಸ್ರಿ ವಿಶ್ವಸಭಾ ಆಪಯ್ಲಿ. ಹೊ ನವೊ ಜೀವ್ ಕ್ರಿಸ್ತಾಥಾವ್ನ್ ಯೇಜಯ್ ದೆಕುನ್ ತಾಚ್ಯಾ ಸುವಾರ‍್ತೆಂತ್ ಆಸ್‌ಲ್ಲೆ ಕ್ರಿಸ್ತಾಂವ್ ಶಿಕವ್ಣೆಕ್ ಆಮಿ ವಚಾಜಯ್. ಹೆಂ ಸೂತ್ರ್ ಘೆವ್ನ್ ವಾತಿಕಾನ್ ವಿಶ್ವಸಭೆನ್ ನವೆ ಮನೋಭಾವ್ ದಾಕವ್ನ್ ದಿಲ್ಯಾತ್ ಆನಿ ತ್ಯಾ ಪರ‍್ಮಾಣೆಂ ಚಲುಂಕ್ ನವ್ಯೊ ಬಾಂಧಾವಳಿ ಆನಿ ನಿಯಮಾಂ ಸೂಚಯ್ಲ್ಯಾಂತ್. ಹೆಂ ನವೀಕರಣಾಚೆಂ ಕಾಮ್ ಚಲ್ತಚ್ ಆಸಾ ತರೀ ಆಮ್ಕಾಂ ಗರ‍್ಜೆ’ಪುರ‍್ತೆಂ ತಾಚೆಂ ಮಾರ‍್ಗದರ‍್ಶನ್ ಮೆಳ್ಳಾಂ. ವಾತಿಕಾನ್ ವಿಶ್ವಸಭೆಚ್ಯಾ ನವೀಕರಣಾಚ್ಯಾ ಉಲ್ಯಾಕ್ ಭಾರತಾಂತ್ಲಿ ಸಗ್ಳಿ ಪವಿತ್ರ್‌ಸಭಾ ಜಾಗಿ ಜಾಲಿ ಆನಿ ತಿಚಿ ಶಿಕವ್ಣ್ ಆತಾಂಚ್ಯೆ ಆಮ್ಚ್ಯೆ ಪರಿಸ್ಥಿತಿಕ್ ತಾಳ್ ಪಡಾಶೆಂ ಕರುಂಕ್ ಮೆಟಾಂ ಕಾಡುಂಕ್ ಲಾಗ್ಲಿ. ವ್ಹಡ್ಯೆ ಉರ‍್ಭೆನ್ 1969 ಮೇಯಾಂತ್ ಭಾರತಾಂತ್ಲೆ ಸುಮಾರ್ ಪಾಂಯ್ಶಿಂ ಪ್ರತಿನಿಧಿ ಆಸುನ್ ಅಖಿಲ್ ಭಾರತ್ ಸಮ್ಮೇಳನ್ ’ಆಯ್ಚ್ಯಾ ಭಾರತಾಂತ್ ಪವಿತ್ರ್‌ಸಭಾ’ ಮ್ಹಳ್ಳ್ಯಾ ವಿಷಯಾಚೆರ್ ಜಮ್ಲೆಂ. ಆಮ್ಚ್ಯೆ ದಿಯೆಸೆಜಿಂತ್‌ಯೀ 1968 ದಸೆಂಬ್ರಾಂತ್ ಹಾಕಾ ತಯಾರಾಯ್ ಚಲಯಿಲ್ಲಿ ತುಮಿಂ ಜಾಣಾಂತ್ ಆನಿ ಆಮ್ಚ್ಯೆ ಭೊಂವ್ತಿಂಚ್ಯೊ ಸಮಸ್ಯಾ ಆಮಿ ಸೊಧುನ್ ಕಾಡ್ನ್ ಗರ‍್ಜ್ ಆಸ್ಚೆ ಪರಿಹಾರ್ ಹಾಡುಂಕ್ ಪ್ರಯತನ್ ಕೆಲ್ಲೆಂ. ಆಮ್ಚ್ಯಾ ಸಾಧನಾಚೊ ಫಳ್ ಅಖಿಲ್ ಭಾರತ್ ಸಮ್ಮೇಳನಾಕ್ ಧಾಡುನ್ ಆಮ್ಚಿ ಥೊಡಿ ಸೆವಾ ತ್ಯಾ ಸಮ್ಮೇಳನಾಕ್ ಆಮಿ ದಿಲ್ಯಾ. ತಿತ್ಲ್ಯಾರ್ ಆಮಿ ವೊಗಿಂ ರಾವುಂಕ್ ನಾಂವ್. ಪೂಣ್ 1969 ದಸೆಂಬ್ರಾಚ್ಯೆ ಆಖ್ರೇಕ್ ಪರ‍್ತುನ್ ಆಮಿ ಸಾಂಗಾತಾ ಮೆಳ್ಳ್ಯಾಂವ್ ಆನಿ ಆಮ್ಚ್ಯಾ ಸಾಧನಾಂತ್ ಆಮಿ ಕಿತ್ತುನ್ ಪರ‍್ಯಾಂತ್ ಯಶಸ್ವಿ ಜಾಲ್ಯಾಂವ್ ಯಾ ಆಮಿ ಕಶೆಂ ನವೀಕರಣ್ ಕಾರ‍್ಯಾಕ್ ಹಾಡ್ಚೆಂ ಮ್ಹಣ್ ಸೊಧುಂಕ್, ಸಗ್ಳ್ಯಾ ಭಾರತಾಂತ್ಲ್ಯೆ ಪವಿತ್ರ್‌ಸಭೆಚ್ಯೆ ಮಾಹೆತಿಚೊ ಆಧಾರ್ ಆನಿ ಪ್ರೇರಣ್ ಘೆವ್ನ್ ಮುಕಾರ್ ಸರ‍್ಲ್ಯಾಂವ್. ದಿಯೆಸೆಜಿಚ್ಯಾ ದೋನ್‌ಯೀ ಸಮ್ಮೇಳನಾಂನಿ, ಆಮ್ಚ್ಯಾ ದಿಯೆಸೆಜಿಚ್ಯಾ ದೆವಾಚ್ಯೆ ಪರ‍್ಜೆಚ್ಯಾ ಪ್ರತಿನಿಧಿಂನಿ ವಾಂಟೊ ಘೆತ್‌ಲ್ಲೊ. ತಿತ್ಲೆಂಚ್ ನ್ಹಂಯ್ ಆಸ್ತಾಂ, ದಿಯೆಸೆಜಿಚೆ ಸರ‍್ವ್ ಯಾಜಕ್ ಆಮ್ಚ್ಯೆ ದಿಯೆಸೆಜಿಚ್ಯೆ ಚರಿತ್ರೆಂತ್ ಪಯಿಲ್ಲೆ ಪಾವ್ಟಿಂ 1970 ಮಾರ‍್ಚ್ ಆನಿ ಜೂನಾಂತ್ ಸಾಂಗಾತಾ ಮೆಳ್ಳೆ ಆನಿ ಯಾಜಕೀ ಸೆವೆಂತ್ ನವೀಕರಣಾಚಿಂ ವಿಧಾನಾಂ ಸೂಕ್ಷಿಮಾಯೆನ್ ವೊರೊವ್ನ್, ತಾಂಚ್ಯಾ ಜಾಣ್ವಾಯೆ ಆನಿ ಮಾಹೆತಿಚೊ ಆಧಾರ್ ದೀವ್ನ್ ಸಭಾರ್ ಥರಾಂನಿ ಹೆಂ ಕಾಮ್ ತಾಣಿಂ ಸಂಪಯ್ಲೆಂ. ಇತ್ಲ್ಯಾ ಭಾವಾಡ್ತ್ಯಾಂಚ್ಯಾ, ಧಾರ‍್ಮಿಕಾಂ ಆನಿ ಯಾಜಕಾಂಚ್ಯಾ ಮಾಗ್ಣ್ಯಾ ಆನಿ ಪ್ರಾಚಿತಾಚೊ ತಶೆಂಚ್ ವಾಂವ್ಟಿಚೊ ಫಳ್ ದೆವಾನ್ ಆಮ್ಕಾಂ ಲಾಭಯ್ಲಾ. ಹಾಂತುಂ ಪ್ರತ್ಯೇಕ್ ಥರಾನ್ ಪವಿತ್ರ್‌ಆತ್ಮ್ಯಾಚೊ ಹಾತ್ ಆಸಾ ಮ್ಹಣ್ ಆಮಿ ಪಾತ್ಯೆತಾಂವ್. ಸಗ್ಳಿ ಮಂಗ್ಳುರ್ ದಿಯೆಸೆಜ್ ಆಜ್ ಹ್ಯಾ ನವೀಕರಣಾಕ್ ಹಾತಾಕ್’ಹಾತ್ ದೀವ್ನ್ ಉತ್ತೇಜನ್ ದಿತಾ ಜಾಲ್ಲ್ಯಾನ್, ಹ್ಯಾ ಆಮ್ಚ್ಯಾಗೊವ್ಳಿಕ್ ಪತ್ರಾ ಮುಖಾಂತ್ರ್ ಥೊಡ್ಯಾ ಮಹತ್ವಾಚ್ಯಾ ವಿಷಯಾಂಚೆರ್ ಆಮ್ಚೆ ಆದೇಶ್ ತುಮ್ಕಾಂ ಪಾಠಯ್ತಾಂವ್, ಆನಿ ಹೆ ಸರ‍್ವ್ 1971 ಜನೆರ್ ಪಯ್ಲ್ಯೆ ತಾರಿಕೆರ್ ಕಾರ‍್ಯಾರುಪಾಕ್ ಹಾಡಿಜಯ್ ಮ್ಹಣ್‌ಅಪೇಕ್ಷಿತಾಂವ್.’
ಬಿಸ್ಪ್ ಬಾಜಿಲಾನ್ ದಿಯೆಸೆಜಿಂತ್ ಗೊವ್ಳಿಕ್ ಪರಿಷದ್ ರುಪಿತ್ ಕರ‍್ತಾನಾಂ ಪಿರ‍್ಗಜ್ ಸಭಾ (ಆದಿಂ ಜುಂತ್ ಮ್ಹಣ್ತಾಲೆ), ಪಿರ‍್ಗಜ್ ಗೊವ್ಳಿಕ್ ಪರಿಷದ್, ವಾರಾಡೊ ಗೊವ್ಳಿಕ್ ಪರಿಷದ್, ದಿಯೆಸೆಜಿಚಿ ಗೊವ್ಳಿಕ್ ಪರಿಷದ್ ಆನಿ ದಿಯೆಸೆಜಿಚಿ ಅರ‍್ಥಿಕ್ ಸಮಿತಿ ಅಶೆಂ ವಿವಿಧ್ ಸಂಘಟನಾಂಯ್ ರುಪಿತ್ ಕೆಲ್ಲಿಂ ಆನಿ ದಿಯೆಸೆಜಿಂತ್ಲ್ಯಾ ಅಪೊಸ್ತಲಿಕ್ ಸಂಘಟನಾಂಕ್ ಪ್ರಮಾಣಿಕ್ ವೆವಸ್ತಾ ಆಸಾ ಕೆಲ್ಲಿ.
ಮಂಗ್ಳುರ್ ಧರ್ಮ್-ಪ್ರಾಂತಾಚಿ (ದಿಯೆಸೆಜಿಚಿ) ಗೊವ್ಳಿಕ್ ಪರಿಷದ್
ಪಾಪಾ ಪಾವ್ಲ್ ಸವ್ಯಾನ್ ಆಪ್ಲ್ಯಾ Ecclesiae Sanctae ಅಪೊಸ್ತಲಿಕ್ ಪತ್ರಾಂತ್ ವಾತಿಕಾನ್ ವಿಶ್ವಸಭೆಚ್ಯಾ `Christus Dominus’ ದಸ್ತಾವೆಜಾಚ್ಯಾ 27 ವ್ಯಾ ಅಂಕಾಂತ್ ದಿಲ್ಲ್ಯೆ ಶಿಕವ್ಣೆಕ್ ಸರಿಜಾವ್ನ್, ದಿಯೆಸೆಜಿಂತ್ ಏಕ್ ಗೊವ್ಳಿಕ್ ಪರಿಷದ್ ಆಸಾಜಯ್ ಮ್ಹಣ್ ಸುಚನ್ ದಿಲಾಂ. 1969 ದಸೆಂಬ್ರಾಂತ್ ಆಮ್ಚ್ಯಾ ದಿಯೆಸೆಜಿಚ್ಯಾ ಕಾರ‍್ಯಾಕಾರಿ ಸಮ್ಮೇಳನಾನ್ ಏಕ್ ತಾತ್ಕಾಲಿಕ್ ಗೊವ್ಳಿಕ್ ಪರಿಷದ್ ಘಡ್ಲಿ; ಹಿಣೆಂ ಪಾಪಾ ಪಾವ್ಲಾನ್ ದಿಲ್ಲ್ಯಾ ಸುಚನಾಂಚೆರ್ ಗಮನ್ ದವ್ರುನ್ ದಿಯೆಸೆಜಿಚ್ಯೆ ಗೊವ್ಳಿಕ್ ಪರಿಷದೆಚೆಂ ಏಕ್ ಘಟನ್ ತಯಾರ್ ಕೆಲೆಂ. ತೆಂ ರಾಕ್ಣ್ಯಾ ಮುಖಾಂತ್ರ್ ಲೊಕಾಚಿ ಅಭಿಪ್ರಾಯ್ ಘೆವ್ನ್ ತಿದ್ವಿಲೆಂ ಆನಿ ಆತಾಂ ತೆಂ ಪೂರ‍್ಣ್ ಕೆಲಾಂ.
ಹಿ ಪರಿಷದ್ 1971 ಜನೆರ್ ಪಯ್ಲ್ಯೆರ್ ಕಾರ‍್ಯಾರುಪಾಕ್ ಯೆತೆಲಿ ಆನಿ ಹ್ಯಾ ಪಾಸತ್ 1970 ದಸೆಂಬರ್ ಅಖ್ರೆ ಭಿತರ್ ಫಾವೊತಿ ತಯಾರಾಯ್ ಕರುಂಕ್‌ಜಾಯ್. 1971 ಜನೆರಾಂತ್ ನೆಮ್ಲಲಿ ವಿಂಚವ್ಣ್ ಜಾತಚ್ ಜನೆರ್ ಅಂತ್ಯ ಭಿತರ್ ಹ್ಯೆ ಪರಿಷದೆಚಿ ಪಯ್ಲಿ ಜಮತ್ ಚಲಂವ್ಕ್‌ಜಾಯ್. ಹಿ ಗೊವ್ಳಿಕ್ ಪರಿಷದ್ ಮಂಗ್ಳುರಾಂತ್ಲ್ಯೆ ದೆವಾಚ್ಯೆ ಪ್ರಜೆಕ್ ಆಪ್ಲಿ ಜವಾಬ್ದಾರಿ ಪಾಳುಂಕ್ ಆಧಾರ್ ಜಾತೆಲಿ ಆನಿ ಆಮ್ಚ್ಯಾ ಗೊವ್ಳಿಕ್ ವಾವ್ರಾಂತ್ ಆಮ್ಕಾಂ ಕುಮಕ್ ಲಾಭ್ತೆಲಿ ಮ್ಹಣ್ ಆಮ್ಚಿ ಧೃಡ್ ಪಾತ್ಯೆಣಿ.” (ಧರ‍್ಮಾಧ್ಯಕ್ಷಾಚೆಂ ಗೊವ್ಳಿಕ್‌ಪತ್ರ್ ನವೀಕರಣಾಚೆಂ ಕಾರ‍್ಯಾರೂಪ್ – 1971)
1970 ಜೂನಾಂತ್ ಮಂಗ್ಳುರ್ ದಿಯೆಸೆಜಿಚ್ಯಾ ಸರ‍್ವ್ ಯಾಜಕ್ ಸಾಂಗಾತಾ ಮೆಳ್ಳೆ. ಹಾಚೊ ಫಳ್ ಜಾವ್ನ್ 1971 ಇಸ್ವೆಂತ್ ಮಂಗ್ಳುರ್ ದಿಯೆಸೆಜಿಂತ್ ಗೊವ್ಳಿ ಬಾಜಿಲಾನ್ ತಾಚ್ಯಾ ಪಯ್ಲ್ಯಾ ಗೊವ್ಳಿಕ್ ಪರಿಷದೆಚೆಂ ಸಂವಿಧಾನ್ ಉಗ್ತಾವಣ್ ಕೆಲೆಂ. ಹ್ಯಾ ಸಂವಿಧಾನಾಧ್ವಾರಿಂ (ಪಳೆ:- ಕ್ರಾಸ್ತಾ, ಬಾಪ್ ಜೆಬಿ – ಬಿಸ್ಪ್ ಬಾಜಿಲ್ ಆನಿ ಲಾಯಿಕ್ ಭಾವಾಡ್ತ್ಯಾಂಚೆಂ ಸಬಲೀಕರಣ್- ಬಿಸ್ಪ್ ಬಾಜಿಲ್ ಸಾಲ್ವಾದೊರ್ ಪರ‍್ಜಳಿಕ್ ನಕೆತ್ರ್ (2021) ಪಾನ್ 101- 104
ಹಾಂವ್ 1991 ಇಸ್ವೆಂತ್ ಮಂಗ್ಳುರ್ (ಅವಿಭಜಿತ್) ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಷಧೆಚೊ ಸಾಂಧೊ ಜಾಲೊಂ. ತ್ಯಾ ವರ್ಸಾ ದಿಯೆಸೆಜಿಚ್ಯಾ ಕ್ರಿಸ್ತಾಂವ್ ಜಿಣಿಯೆ ಸಮುದಾಯಾಚೊ ಅಧ್ಯಕ್ಷ್ ಮ್ಹಣ್ ವಿಂಚುನ್ ಆಯಿಲ್ಲ್ಯಾನ್ ಹುದ್ದ್ಯಾ ಹಕ್ಕಾನ್ ಹಾಂವ್ ಪರಿಷಧೆಚೊ ಸಾಂಧೊ ಜಾಲ್ಲೊಂ. ತ್ಯಾ ವೆಳಾರ್ ಹಾಂವ್ ಸಾಂತ್ ಲುವಿಸ್ ಕೊಲೆಜಿಂತ್ ಶಿಕಯ್ತಾಲೊಂ. ಥೊಡ್ಯಾಚ್ ತೆಂಪಾನ್ ಮ್ಹಾಕಾ ಸರ್ಕಾರಿ ನೇಮಕ್ಪಣ್ ಜಾಲೆಂ ಆನಿ ಹಾಂವ್ ಬಂಯ್ದೂರ್ ವಾವ್ರಾಕ್ ಲಾಗ್ಲೊಂ.
ತೆ ಬಿಸ್ಪ್ ಬಾಜಿಲ್ ಸಾಲ್ವಾದೊರ್ ಸೊಜಾಚ್ಯಾ ಗೊವ್ಳಿಕ್ಪಣಾಚೆ ದೀಸ್. ಬಂಯ್ದೂರ್‌ಥಾವ್ನ್ ಯೇವ್ನ್ ಪಾವ್ತಾನಾಂ ಕಾಂಯ್ ಥೊಡೊ ತಡವ್ ಜಾತಾಲೊ ಜಾಲ್ಲ್ಯಾನ್ ಹಾಂವ್ ನಿಮಾಣ್ಯಾ ಬಾಂಕಾಂನಿ ಬಸ್ತಾಲೊಂ. ಮ್ಹಜ್ಯಾ ಉಗ್ಡಾಸಾಂ ಪರ‍್ಮಾಣೆಂ ತವಳ್ ಛಾನ್ಸಲರ್ ಆಸ್‌ಲ್ಲೊ ಬಿಸ್ಪ್ ಲುವಿಸ್ ಪಾವ್ಲ್ ಸೊಜ್ ಆನಿ ಬಾಪ್ ವಿಕ್ಟರ್ ಮಚಾದೊ (ಸೀನಿಯರ್) ಸಯ್ತ್ ಚಡಾವತ್ ಪಾಟ್ಲ್ಯಾ ಬಾಂಕಾಂನಿ ಬಸ್ತಾಲೆ. ಹಾಂವ್ ಬಂಯ್ದೂರ್‌ಥಾವ್ನ್ ಯೆತಾಲೊಂ ಜಾಲ್ಲ್ಯಾನ್ ಮ್ಹಾಕಾ ಹರ‍್ಯೆಕಾ ಮೀಟಿಂಗಾಕ್ ರೂ. 100/- (ರುಪೊಯ್ ಶೆಂಭೊರ್) ಬಸ್ಸ್‌ಚಾರ‍್ಜ್ ದಿತಾಲೆ.
ತವಳ್ಚ್ಯಾ ಮೀಟಿಂಗಾಂತ್ ಎಕ್ದಮ್ ಭರ‍್ಮ್ ಆನಿ ಸಭೆಚೆಂ ಘನ್ ಉಟುನ್ ದಿಸ್ತಾಲೆಂ. ಸಭೆಚ್ಯಾ ಸುರ‍್ವೆರ್ ಮೀಸ್ ಆಸ್ತಾಲೆಂ ಆನಿ ಬಿಸ್ಪ್ ಆಪ್ಣಾಚೊ ಸಂದೇಶ್ ಶೆರ‍್ಮಾಂವಾಂತ್‌ಚ್ ದಿತಾಲೊ. ಸಭೆಂತ್ ಖಂಚ್ಯಾಯ್ ಪ್ರಚಲಿತ್ ವಿಷಯಾಂಚೆರ್ ಕೋಣ್‌ಯ್ ಜಾಣಾರ‍್ಯಾಥಾವ್ನ್ ಉಪನ್ಯಾಸ್ ಆಸ್ತಾಲೆಂ ಆನಿ ಉಪ್ರಾಂತ್ ಸಾಂಧ್ಯಾಂಕ್ ಭಾಸಾಭಾಸ್ ಚಲಂವ್ಕ್ ಉಗ್ತೊ ಆವ್ಕಾಸ್ ಆಸ್ತಾಲೊ. ಬಿಸ್ಪ್ ಬಾಜಿಲ್ ಕೆದಿಂಚ್ ಭಾಸಾಭಾಸೆಂತ್ ಮಧೆಂ ಮೆತೆರ್ ಜಾಯ್ನಾತ್‌ಲ್ಲೊ. ಇತ್ಲೆಂಕೀ ಮ್ಹಳ್ಯಾರ್ ಉಪನ್ಯಾಸ್ ಚಲ್ತಾನಾಂ ತೊಚ್ ವೆದಿ ವಯ್ಲ್ಯಾನ್ ಉಟುನ್ ಯೇವ್ನ್ ಸಾಂಧ್ಯಾಂ ಮಧೆಂ ಬಸುನ್ ಹರ‍್ಯೆಕ್ ವಿಷಯ್ ಜಿಕುನ್ ಧರ‍್ತಾಲೊ. ಭಾಸಾಭಾಸ್ ಸಂಪ್ಲ್ಯಾ ಉಪ್ರಾಂತ್ ಬಿಸ್ಪ್ ’ಆನಿ ಕೊಣಾಯ್ಕೀ ಉಲೊಂವ್ಕ್ ಆಸಾಗೀ?’ ಮ್ಹಣ್ ವಿಚಾರ‍್ತಾಲೊ. ನಾಂ ಮ್ಹಣ್ ಜಾಲ್ಯಾ ಉಪ್ರಾಂತ್ ತೊ ಕಾಂಯ್ ಪಂದ್ರಾ – ವೀಸ್ ಮಿನುಟಾಂನಿ ಸಗ್ಳ್ಯಾ ಉಪನ್ಯಾಸಾಚೊ ಆನಿ ಸಂವಾದಾಚೊ ಸಾರ್ ದಿತಾಲೊ. ನಿಮಾಣೆಂ ’ತುಮಿಂ ಸಾಂಗ್‌ಲ್ಲೆಂ ಸಕ್ಕಡ್ ಹಾಂವೆಂ ಆಯ್ಕುನ್ ಜಾಲೆಂ, ಹ್ಯಾ ಪಾಟ್‌ಭುಂಯ್ತ್ ಮ್ಹಜೆ ನಿರ‍್ಧಾರ್ ಕಿತೆಂ ತೆ ವೆಗ್ಗಿಂಚ್ ತುಮ್ಕಾಂ ಕಳಯ್ತಾಂ, ತುಮ್ಚೊ ಸಹಕಾರ್ ಆಶೆತಾಂ’ ಮ್ಹಣ್ ಸಾಂಗ್ತಾಲೊ. ತಾಚೊ ಟಾಯ್ಮಿಂಗ್ ಕಿತ್ಲೊ ಪರ‍್ಫೆಕ್ಟ್ ಮ್ಹಳ್ಯಾರ್ ತಿತ್ಲೆಂ ಸಾಂಗ್ತಾನಾಂಚ್ ಇರ‍್ಮಿದೆಚಿ ಘಾಂಟ್ ಮಾರ‍್ತಾಲಿ ಆನಿ ಬಿಸ್ಪ್ ಜೊರಾನ್ ಆಮೊರಿ ಶಿಕಯ್ತಾಲೊ. ಆಮೊರೆ ಉಪ್ರಾಂತ್ ಸಕ್ಡಾಂಕ್ ಬೆಸಾಂವ್ ಆನಿ ಸಾದೆಂ ಜೆವಣ್.
ಗೊವ್ಳಿಕ್ ಪರಿಷದೆಂತ್ ಸಭಾರ್ ಮಹತ್ವಾಚ್ಯೊ ತರ‍್ಬೆತ್ಯೊ ಆಮ್ಕಾಂ ದಿಲ್ಲೊ ಉಗ್ಡಾಸ್. ತ್ಯಾ ಪಯ್ಕಿ ಬಾಪ್ ಅರ‍್ಥರ್ ಪಿರೇರಾಚಿ ‘ಗೊವ್ಳಿಕ್ ವಾವ್ರ್ ಮ್ಹಳ್ಯಾರ್ ಕಿತೆಂ’ ಮ್ಹಣ್ಚೆ ವಿಶಿಂ ತರ‍್ಭೆತಿ, ಮಾನೆಸ್ತ್ ತೊಮಾಸ್ ಕ್ವಾಡ್ರಸಾನ್ ದಿಲ್ಲಿ ತರ‍್ಭೆತಿ, ಬಾಪ್ ವಿಶೆಂತ್ ಮೊಂತೇರೊನ್ ಮುಕೆಲ್ಪಣಾವಿಶಿಂ ದಿಲ್ಲಿ ತರ‍್ಭೆತಿ ಆಜೂನ್ ಮ್ಹಜ್ಯಾ ಮತಿಂತ್ ಆಸಾ. ಪಯ್ಲೆಂ ಪಯ್ಲೆಂ ಖಂಚ್ಯಾಯ್ ವಿಷಯಾರ್ ತರ‍್ಭೆತಿ ದಿಲ್ಯಾರ್ ತಾಚೊ ಫಳ್ ಕಿತೆಂ ಆನಿ ವಾರಾಡೊ ತಶೆಂಚ್ ಫಿರ‍್ಗಜೆ ಹಂತಾರ್ ತಾಚೊ ಫಳ್ ಕಿತೆಂ ಮ್ಹಣ್ ಸ್ಪಷ್ಟ್ ಕರ‍್ನ್‌ಘೆಂವ್ಕ್ ಸ್ಥಳೀಯ್ ತರ‍್ಭೆತ್‌ದಾರಾಂಚೆ ಪಂಗಡ್ ವಾವುರ‍್ತಾಲೆ. ಮ್ಹಜ್ಯಾ ಉಗ್ಡಾಸಾ ಪರ‍್ಮಾಣೆಂ ದೆ. ಮಾನೆಸ್ತ್ ಡೆನಿಸ್ ಡಿಸಿಲ್ವಾ (ಸೀನಿಯರ್), ದೆ. ಮಾನೆಸ್ತ್ ಫ್ರಾನ್ಸಿಸ್ ದಾಂತಿ, ಮಾನೆಸ್ತ್ ಕಾಸ್ಮೀರ್ ಮಿನೇಜಸ್, ಮಾನೆಸ್ತ್ ಎಲ್ ಜೆ ಫೆರ‍್ನಾಂದ್, ಮಾನೆಸ್ತ್ ವಲೇರಿಯನ್ ಮೊರಾಸ್, ಮಾನೆಸ್ತ್ ತೊಮಾಸ್ ಕ್ವಾಡ್ರಸ್ ಆನಿ ಹೆರ್ ಮುಕೆಲ್ಯಾಂನಿ ಹ್ಯಾ ಜಾಣ್ವಾಯ್ ಉತ್ರಂವ್ಚ್ಯಾ ವಾವ್ರಾಂತ್ ವ್ಹರ‍್ತಿ ಸೆವಾ ದಿಲ್ಯಾ.
ಮ್ಹಜಿ ದುಸ್ರಿ ಅವ್ದಿ ಬಿಸ್ಪ್ ಬಾಜಿಲ್ ಸೊಜಾಚ್ಯಾ ನಿಮಾಣ್ಯಾ ಗೊವ್ಳಿಕ್ ಪರಿಷಧೆಂತ್. ತ್ಯಾ ವೆಳಾರ್ ಹಾಂವ್ ಸಿಎಲ್‌ಸಿ (ಕ್ರಿಜಿಸ) ಚೊ ಅಧ್ಯಕ್ಷ್ ಜಾವ್ನ್ ದುಸ್ರ್ಯಾ ಆವ್ದೆಕ್ ವಿಂಚುನ್ ಆಯಿಲ್ಲೊಂ ಆನಿ ಪರಿಷಧೆಚ್ಯಾ ಅವ್ದೆ ಮಧ್ಘಾತ್ ಮ್ಹಜಿ ಸಿಎಲ್‌ಸಿ ಅಧ್ಯಕ್ಷಾಚಿ ಅವ್ದಿ ಸಂಪ್ಲ್ಲಿ ತರಿ ಗೊವ್ಳಿಬಾಪಾನ್ ಮ್ಹಾಕಾ ಪರಿಷಧೆಂತ್ ಮುಂದರುಂಕ್ ನಾಮ್‌ನಿರ‍್ದೇಶ್ ದಿಲ್ಲೊ. ಗೊವ್ಳಿಕ್ ಪರಿಷಧೆಂತ್ ಮ್ಹಜಿ ತಿಸ್ರಿ, ಚವ್ತಿ ಆನಿ ಪಾಂಚ್ವಿ ಅಶೆಂ ತೀನ್ ಅವ್ದ್ಯೊ ಬಿಸ್ಪ್ ಲುವಿಸ್ ಪಾವ್ಲ್ ಸೊಜ್ ಬಾಪಾಚ್ಯಾ ಗೊವ್ಳಿಕ್ಪಣಾಂತ್ ಚಲ್ಲ್ಯೊ. ಹ್ಯಾ ಪಯ್ಕಿ ಪಾಂಚ್ವ್ಯಾ ಅವ್ದೆಂತ್ ಹಾಂವ್ ಕಾರ‍್ಯದರ‍್ಶಿ ಜಾಲ್ಲೊಂ. ಬಿಸ್ಪ್ ಪೆದ್ರು ಪಾವ್ಲ್ ಸೊಜ್ ಬಾಪಾನ್ ಸಂರಚನ್ ಕೆಲ್ಲ್ಯಾ ತಾಚ್ಯಾ ಪಯಿಲ್ಲ್ಯಾ ಪುರ‍್ತ್ಯಾ ಗೊವ್ಳಿಕ್ ಪರಿಷಧೆಂತ್‌ಯ್ ಮ್ಹಾಕಾ ನಾಮಕರಣ್ ಕರ್ನ್ ಸೆವೆಚೊ ಆವ್ಕಾಸ್ ದಿಲೊ.
ಬಿಸ್ಪ್ ಲುವಿಸ್ ಪಾವ್ಲ್ ಸೊಜಾಚ್ಯಾ ಕಾಳಾಚ್ಯಾ ಮ್ಹಜ್ಯಾ ಪಯ್ಲ್ಯಾ ಅವ್ದೆಂತ್ ಹಾಂವ್ ಇಲ್ಲೊ ಹುಳ್ವುಳೊ ಆಸ್‌ಲ್ಲೊಂ ಆನಿ ಬಿಸ್ಪಾಥಂಯ್ ಮ್ಹಾಕಾ ತಿಕ್ಕೆಶೆ ಸಳಾವಳ್ ಆಸ್‌ಲ್ಲ್ಯಾನ್ ಪರಿಷಧೆಚ್ಯಾ ಸಭೆಂತ್ ಚಡ್ ಸವಾಲಾಂ ಘಾಲ್ತಾಲೊಂ. ತರೀ ಬಿಸ್ಪ್‌ಸಾಯ್ಬ್ ಹೆಂ ಸಕ್ಕಡ್ ಸಮಾಧಾನೆನ್ ಆಯ್ಕುನ್ ನಿಮಾಣೆಂ ‘ಫ್ರೊಫೆಸರ್ ಬರೆಂ ಉಲಯ್ತಾ’ ಮ್ಹಣ್ತಾಲೊ. ತಾಣೆಂ ಮ್ಹಜೆಥಂಯ್ ಕಸ್ಲಿ ತಾಂಕ್ ದೆಕ್ಲಿ ಹಾಂವ್ ನೆಣಾಂ ತ್ಯಾ ಅವ್ದೆಚ್ಯಾ ಅಕ್ರೇಕ್ ದಿಯೆಸೆಜಿಚ್ಯಾ ಸರ‍್ವ್ ಗೊವ್ಳಿಕ್ ಪರಿಷಧೆಂಚಿಂ ನಿಯಮಾಂ ತಿದ್ವಣ್ ಕರುಂಕ್ ಆಸಾ ಕೆಲ್ಲ್ಯಾ ತೀನ್ ಸಾಂಧ್ಯಾಂಚ್ಯಾ ಸಮಿತಿಂತ್ ಮ್ಹಾಕಾ ಸಾಂಧೊ ಕೆಲ್ಲೊ. ಅಶೆಂಚ್ ದುಸ್ರ್ಯಾ ಅವ್ದೆಚ್ಯಾ ಅಕ್ರೇಕ್‌ಯ್ ಮ್ಹಾಕಾ ಹೊ ಆವ್ಕಾಸ್ ಲಾಬ್ಲೊ. ದುಸ್ರೆಪಾವ್ಟಿಂ ಪರಿಷಧೆಚಿಂ ನಿಯಮಾಂ ತಿದ್ವಣ್ ಕರ‍್ತಾನಾಂ ಮಾ. ಬಾಪ್ ಲೊರೆನ್ಸ್ ಸಿ. ಡಿಸೋಜಾ, ಮಾನೆಸ್ತ್ ಸುಶೀಲ್ ನೊರೊನ್ಹಾ ಆನಿ ಹಾಂವ್ ವಾವುರ‍್ಲ್ಯಾಂವ್. ತ್ಯಾ ಸಂದರ‍್ಭಾರ್ ಚಡಾವತ್ ನಿಯಮಾಂನಿ ಬದ್ಲಾಪ್ ಆಮಿ ಹಾಡ್‌ಲ್ಲೆಂ ಆನಿ ತ್ಯಾ ಪರ‍್ಯಾಂತ್ ಮಂಡಳಿ ಮ್ಹಣ್ ಆಸ್‌ಲ್ಲೆಥಂಯ್ ಪರಿಷಧ್ ಮ್ಹಣ್ಚೊ ಸಬ್ಧ್ ಆಮಿ ಹಾಡ್‌ಲ್ಲೊ.
ಬಿಸ್ಪ್ ಲುವಿಸ್ ಪಾವ್ಲ್ ಸೊಜಾಚ್ಯಾ ಕಾಳಾರ್ ಮ್ಹಜ್ಯಾ ಪಯ್ಲ್ಯಾ ಅವ್ದೆಂತ್ ಮಾನೆಸ್ತ್ ಸುಶಿಲ್ ನೊರೊನ್ಹಾ ಕಾರ‍್ಯದರ‍್ಶಿ ಆಸ್‌ಲ್ಲೊ. ದುಸ್ರ್ಯಾ ಆವ್ದೆಂತ್ ಮಾನೆಸ್ತಿಣ್ ರೊಜಿ ಪಿಂಟೊ ಕಾರ‍್ಯದರ‍್ಶಿ ಜಾಲ್ಲಿ. ಹಿ ಎದೊಳ್ ಏಕ್‌ಮಾತ್ರ್ ಸ್ತ್ರೀ ಕಾರ‍್ಯದರ‍್ಶಿ ತಿಸ್ರ್ಯಾ ಅವ್ದೆಂತ್ ಹಾಂವ್ ಕಾರ‍್ಯದರ‍್ಶಿ ಜಾವ್ನ್ ವಿಂಚುನ್ ಆಯ್ಲೊಂ. ಬಿಸ್ಪ್ ಲುವಿಸ್ ಸೊಜಾಚ್ಯಾ ಕಾಳಾರ್ ಹರ‍್ಯೆಕಾ ಅವ್ಧೆಚ್ಯಾ ಪಯ್ಲ್ಯಾ ಜಮತಿಂಕ್ ಮಾತ್ರ್ ಮೀಸ್ ಆಸ್ತಾಲೆಂ ಹೆರ್ ಜಮತಿ ಮಾಗ್ಣ್ಯಾಧ್ವಾರಿಂ ಸುರ‍್ವಾತ್ತಾಲ್ಯೊ. ಚರ‍್ಚಾ ಚಡ್ ಕಾಳ್ ಚಲ್ತಾಲಿ ಆನಿ ಸಭಾರ್‌ಪಾವ್ಟಿಂ ಬಿಸ್ಪ್ ಮಧೆಂ ಮಧೆಂ ಸಲಹಾಸುಚನಾಂ ದಿತಾಲೊ. ಹರ‍್ಯೆಕಾ ಸಾಂಧ್ಯಾಕ್ ಸುಶೆಗಾಯೆನ್ ಉಲೊಂವ್ಕ್ ಆವ್ಕಾಸ್ ಲಾಬ್ತಾಲೊ. ತ್ಯಾ ದಿಸಾಂನಿ ಜಮತೆಚೆ ಮಿನುಟ್ ವಿಸ್ತಾರ್ ಜಾವ್ನ್ ಬರವ್ನ್ ವಿಗಾರ್ ಜೆರಾಲಾಕ್ ದಾಕವ್ನ್ ಉಪ್ರಾಂತ್ ಛಾಪ್ಯಾಕ್ ಧಾಡ್ಚಿ ವೆವಸ್ತಾ ಆಸ್‌ಲ್ಲಿ.
ಅಜಾಪಿಂ ಮ್ಹಳ್ಳೆಪರಿಂ ಬಿಸ್ಪ್ ಪೀಟರ್ ಪಾವ್ಲ್ ಸಲ್ಡಾನ್ಹಾನ್ ಮ್ಹಾಕಾ ತಾಚ್ಯಾ ಗೊವ್ಳಿಕ್ ಪರಿಷಧೆಕ್ ನಾಮಾಂಕಿತ್ ಕೆಲೆಂ. ಮ್ಹಾಕಾ ಫಕತ್ 54 ವರ್ಸಾಂ ಪ್ರಾಯ್ ಹ್ಯಾ ಭಿತರ್‌ಚ್ ತೆಗಾಂ ಬಿಸ್ಪಾಂನಿ ಮ್ಹಾಕಾ ತಾಂಚ್ಯಾ ಗೊವ್ಳಿಕ್ ಪರಿಷಧೆಂತ್ ಸಾಂಧೆಪಣ್ ದಿಲಾಂ ಮಾತ್ರ್ ನ್ಹಂಯ್ ಬಿಸ್ಪ್ ಲುವಿಸ್ ಪಾವ್ಲ್ ಸೊಜಾನ್ ಸಭಾರ್ ದಿಯೆಸೆಜಿಂಕ್ ಆನಿ ಸಂಘಟನಾಂಕ್ ಮ್ಹಾಕಾ ತರ‍್ಬೆತ್ದಾರ್ ಜಾವ್ನ್ ಧಾಡ್ಲಾಂ. ಹ್ಯಾ ದೆಣ್ಯಾಂಖಾತಿರ್ ಹಾಂವ್ ದೆವಾಕ್ ಅರ‍್ಗಾಂ ದಿತಾಂ ಆನಿ ಹ್ಯಾ ತೆಗಾಂಯ್ ಬಿಸ್ಪಾಂಚೊ ಉಪ್ಕಾರ್ ಆಟಯ್ತಾಂ.
ಮಾನೆಸ್ತಿಣ್ ರೊಜಿಬಾಯ್ ಕಾರ‍್ಯದರ‍್ಶಿ ಆಸ್ತಾನಾಂ ಹಾಂವ್ ಸಾಂದೊ. ತ್ಯಾ ವೆಳಾರ್ ಆಮ್ಚ್ಯಾ ಲೊಕಾಕ್ ಉಂಚ್ಲ್ಯಾ ಶಿಕ್ಪಾತೆವ್ಶಿಂ ಆನಿ ಉಂಚ್ಲ್ಯಾ ಕಾಮಾಂಥಂಯ್ ಆಕರ‍್ಶಿತ್ ಕರ‍್ಚಿ ಗರ‍್ಜ್ ಆಸಾ ಮ್ಹಣ್ ಹಾಂವೆಂ ದೊ’ದೋನ್ ಜಮತೆಂನಿ ದೆಮಾಂದ್ (ಡಿಮಾಂಡ್) ಘಾಲ್ಲ್ಯಾಕ್ ಬಿಸ್ಪ್‌ಸಾಯ್ಬಾನ್ ತ್ಯಾ ವಿಶಿಂ ಏಕ್ ಕಾರ‍್ಯಯೋಜನ್ ಮಾಂಡ್ಚಿ ಜವಾಬ್ಧಾರಿ ಮ್ಹಾಕಾಚ್ ದಿಲಿ. ಬಾಪ್ ಫಾವುಸ್ತಿನ್ ಲೋಬೊ ತವಳ್ ಸಿಒಡಿಪಿ-ಐಎಸ್‌ಡಿ ನಿರ‍್ದೇಶಕ್ ಆಸ್‌ಲ್ಲೆ ಆನಿ ಬಾಪ್ ಒನಿಲ್ ಸೊಜ್ ಸಹ ನಿರ‍್ದೇಶಕ್ ಆಸ್‌ಲ್ಲೆ. ತಾಂಚ್ಯಾ ಮಾರ‍್ಗದರ‍್ಶನಾನ್ ದಿಯೆಸೆಜಿಚೆಂ ಕ್ಯಾಪ್ ಸೆಲ್ ಆಮಿ ಉಬೆಂ ಕೆಲೆಂ. ಮುಕಾರ್ ಬಾಪ್ ಒನಿಲ್ ಸಿಒಡಿಪಿ ನಿರ‍್ದೇಶಕ್ ಜಾಲೆ, ತಾಣಿಂ ಹ್ಯಾ ಯೋಜನಾಕ್ ವ್ಹರ‍್ತೊ ಜೀವ್ ಭರ‍್ಲೊ. ಸಗ್ಳ್ಯಾ ದಿಯೆಸೆಜಿಂತ್ ಕ್ಯಾಪ್ ಸೆಲ್ಲಾನ್ ನವೊ ಹುರುಪ್ ಭರ್‌ಲ್ಲಿ ಗಜಾಲ್ ಮ್ಹಾಕಾ ತರಿ ವ್ಹಡ್ ಅಭಿಮಾನಾಚಿ.
ಹ್ಯಾಚ್ ಸಂದರ‍್ಭಿಂ ಬಿಸ್ಪ್ ಲುವಿಸ್ ಪಾವ್ಲ್ ಸೊಜಾಚ್ಯಾ ಗೊವ್ಳಿಕ್‌ಪಣಾಚೊ ದಾಕ್ಡ್ಯಾ (10 ವರ‍್ಸಾಂಚೊ) ಸಂಭ್ರಮ್ ಆಯ್ಲೊ ಆನಿ ಆಮಿ ಗೊವ್ಳಿಕ್ ಪರಿಷಧೆಂತ್ ಹೊ ಸಂಭ್ರಮ್ ದಿಯೆಸೆಜಿಚ್ಯಾ ಎಕ್ವಟಾಚೊ ಸಂಕೇತ್ ಜಾವ್ನ್ ಗದ್ದಾಳಾಯೆನ್ ಆಚರಣ್ ಕರ‍್ಚ್ಯಾಕ್ ಆಲೋಚೆನ್ಯೊ ದಿಲ್ಯೊ. ತ್ಯಾ ವೆಳಿಂ ಆಮಿ ಕಿತ್ಲೆಂ ಒತ್ತಾಯ್ ಕೆಲ್ಯಾರೀ ಆಪ್ಣಾಕ್ ಕಸಲೊಚ್ ವೆಕ್ತಿ ಕೇಂದ್ರೀತ್ ಸಂಭ್ರಮ್ ನಾಕಾ ಮ್ಹಣುನ್ ತ್ಯಾ ಖಾತಿರ್ ಕಾಂಯ್ ಖರ‍್ಚ್ ಕರ‍್ಚೊ ಆಸಾ ತರ್ ತೊ ದುಡು ದಿಯೆಸೆಜಿಕ್ ಏಕ್ ದುಬ್ಳ್ಯಾ ಪಿಡೆಸ್ತಾಂಚಿ ವಯ್ದ್ಯಕೀಯ್ ನಿಧಿ ಕರ್ನ್ ತಾಂತುಂ ಘಾಲುಂಕ್ ತಾಣೆಂ ಆಲೋಚನ್ ದಿಲಿ. ಹ್ಯಾ ಕಾರ‍್ಯಯೋಜನಾಂತ್ ಮಾನೆಸ್ತ್ ಸುಶೀಲ್ ನೊರೊನ್ಹಾ, ಬಾಪ್ ಬ್ಯಾಪ್ಟಿಸ್ಟ್ ಮಿನೇಜಸ್, ಬಾಪ್ ಜೆ ಪಿ ತಾವ್ರೊ ಆನಿ ಅಸಲ್ಯಾ ಹೆರಾಂಚೊ ವಾವ್ರ್ ವ್ಹರ‍್ತೊ ಆಸ್‌ಲ್ಲೊ. ತಾಂಚೆಸವೆಂ ಸಕ್ರಿಯ್ ರಿತಿನ್ ವಾಂಟೊ ಘೆಂವ್ಕ್ ಮ್ಹಾಕಾ ಸಾಧ್ಯ್ ಜಾಲೆಂ ಮ್ಹಣ್ಚೆಂ ಮ್ಹಾಕಾ ಖರ‍್ಯಾನ್ ಅಭಿಮಾನಾಚೆಂ.
ಹಾಂವೆಂ ಕಾಂಯ್ 15 ವರ್ಸಾಂ ಪುಣಿಂ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಷದೆಚ್ಯಾ ಸಭೆಂನಿ ಬಸುನ್ ಆನಿ ಕಾಂಯ್ 30 ವರ್ಸಾಂ ಪುಣಿಂ ಪವಿತ್ರ್‌ಸಭೆಚ್ಯಾ ವಿವಿಧ್ ವೆವಸ್ತ್ಯಾಂನಿ ವಾವ್ರ್ ಕರ್ನ್ ಜೊಡ್‌ಲ್ಲ್ಯಾ ಅನ್ಭವಾನ್ ಕಾಂಯ್ ದೋನ್ ತೀನ್ ಸುಚನಾಂ ಅಶಿಂ ದಿವ್ಯೆತಾ. ಹ್ಯಾ ಕಾಳಾರ್ ಹಿಂ ಸುಚನಾಂ ದೀಂವ್ಕ್ ಆನಿ ದೋನ್ ಮಹತ್ವಾಚಿಂ ಕಾರಣಾಂ ಆಸಾತ್.
ಪಯ್ಲೆಂ ಕಾರಣ್ : ಮಂಗ್ಳುರ್ ದಿಯೆಸೆಜಿಚೆ ಗೊವ್ಳಿಕ್ ಪರಿಷಧೆಕ್ ಎದೊಳ್‌ಚ್ 50 ವರ್ಸಾಂ ಪ್ರಾಯ್ ಹ್ಯಾ ಪನ್ನಾಸ್ ವರ‍್ಸಾಂನಿ ಹ್ಯಾ ಗೊವ್ಳಿಕ್ ಪರಿಷಧೆಂನಿ (ಜಾಂವ್ ದಿಯೆಸೆಜಿ/ ವಾರಾಡೊ ವಾ ಫಿರ‍್ಗಜಾಂನಿ) ವಾವ್ರ್ ಆನಿ ಸೆವಾ ದೀವ್ನ್ ಆಮ್ಚ್ಯಾ ಲೊಕಾಕ್ ಗೊವ್ಳಿಕ್ ವಾವ್ರಾಚೊ ಅನ್ಭವ್ ಬರೊ ಜಾಲಾ ಮ್ಹಣ್ಯೆತಾ.
ದುಸ್ರೆಂ ಕಾರಣ್ : ಹೆಂ ವರ‍್ಸ್ ಸಿನಡ್ಯಾಲಿಟಿಚೆಂ – ಅಖ್ಖ್ಯಾ ಪವಿತ್ರ್‌ಸಭೆನ್ ಸಾಂಗಾತಾ ಯೇಂವ್ಕ್ ಆಸಾ ಆನಿ ಸಹಪಯ್ಣ್ ಚಲಂವ್ಕ್ ಆಸಾ. ತಶೆಂ ಮ್ಹಣ್ತಾಂ ಸಂಗಿಂ ಚಲ್ಚೆಂ ಕಾಮ್ ಸಲೀಸ್ ಜಾಂವ್ಕ್ ಎಕಾಮೆಕಾಚೆರ್ ಚಡ್ ಆನಿ ಚಡ್ ವಿಶ್ವಾಸ್ ವಾಡವ್ನ್ ಘೆಂವ್ಚೆಂ ಚಡ್ ಗರ‍್ಜೆಚೆಂ.
1. ಆಮ್ಚಿ ದಿಯೆಸೆಜ್ ಶಿಕ್ಪ್ಯಾಂಚಿ ದಿಯೆಸೆಜ್ ಮ್ಹಣ್ ಆಮಿ ಸಾಂಗ್ತಾಂವ್, ಲಾಂಬ್‌ಕಾಳಾಥಾವ್ನ್ ಹಾಂಗಾ ಭಾವಾಡ್ತ್ ಗೂಂಡ್ ವಾಡ್ಲಾ ಮ್ಹಣ್ ಸಾಂಗ್ತಾಂವ್. (ತಶೆಂ ಮ್ಹಣುನ್ ಭಾವಾಡ್ತ್ ದಂಡಳಾವ್ನ್ ಘೆವ್ನ್ ನವ್ಯಾ ನವ್ಯಾ ಪಂಗ್ಡಾಂಕ್ ಸೆರ‍್ವಾತಲ್ಯಾಂಚೊ ಆನಿ ವಿವಿಧ್ ಕಾರಣಾಂಕ್ ಲಾಗುನ್ ಕಥೊಲಿಕ್ ಪವಿತ್ರ್‌ಸಭಾ ಸೊಡ್ನ್ ವೆತಲ್ಯಾಂಚೊ ಸಂಕೊ ಕಾಂಯ್ ಉಣೊಂ ನಾಂ.) ಅಸಲ್ಯಾ ಪ್ರಗತಿಪರ್ ದಿಯೆಸೆಜಿಂತ್ ಲಾಯಿಕ್ ಭಾವಾಡ್ತ್ಯಾಂಕ್ ಗೊವ್ಳಿಕ್ ವಾವ್ರಾಂತ್ ಚಡ್ ಕ್ರಿಯಾಳ್ ಆನಿ ಶೀದಾ ಶೀದಾ ವಾಂಟೆಲ್ಪಣ್ ಲಾಭಾಜೆ. ಎದೊಳ್‌ಚ್ 50 ವರ್ಸಾಂ ಸಂಪವ್ನ್ ಮುಕಾರ್ ಸರುನ್ ಆಸ್ಚ್ಯಾ ಗೊವ್ಳಿಕ್ ಪರಿಷಧೆಂಕ್ ಪ್ರಜಾತಾಂತ್ರಿಕ್ ರೂಪ್ ಲಾಭ್ಚಿ ವ್ಹಡ್ ಗರ‍್ಜ್ ಆಸಾ. ಪವಿತ್ರ್‌ಸಭಾ ಧರ‍್ಮ್‌ತಾಂತ್ರಿಕ್ (ಥಿಯೋಕ್ರಾಸಿ) ತಿ ಪ್ರಜಾತಾಂತ್ರಿಕ್ ನ್ಹಂಯ್ ಖರೆಂ, ಪೂಣ್ ವಾತಿಕಾನ್ ದುಸ್ರ್ಯಾ ವಿಶ್ವಸಭೆ ಉಪ್ರಾಂತ್ ಚಡ್‌ಶ್ಯಾ ಭಾಗೆವಂತ್ ಬಾಪಾಂನಿ ಪವಿತ್ರ್‌ಸಭೆಕ್ ಪ್ರಜಾತಾಂತ್ರಿಕ್ ಸ್ಪಿರಿತಾನ್ ಭರ‍್ಚಿ ಗರ‍್ಜ್ ಆಸಾ ಮ್ಹಳ್ಳೆಂ ಚಿಂತಪ್ ದಿಲಾಂ ಆನಿ ವಾಂಟೆಲ್ಪಣಾಚ್ಯಾ ಪವಿತ್ರ್‌ಸಭೆಚೆಂ ಬಳ್ ದಿಲಾಂ.
ಪ್ರಸ್ತುತ್ ಆಮ್ಚ್ಯಾ ಸರ‍್ವ್ ಗೊವ್ಳಿಕ್ ಪರಿಷಧೆಂನಿ ಹುದ್ದ್ಯಾ ಹಕ್ಕಾನ್ ಆಸ್ಚ್ಯಾ ಆನಿ ನಾಮಕರಣ್ ಜೊಡ್ಲಲ್ಯಾ ಸಾಂದ್ಯಾಂಚೊ ಸಂಕೊ ಚಡ್. ಜೆ ವಿಂಚುನ್ ಯೆತಾತ್ ತೆ ಸಯ್ತ್ ಎಕ್ದಮ್ ಸೀಮಿತ್ ಸಾಂದ್ಯಾಂಮಧ್ಲ್ಯಾನ್ ವಿಂಚುನ್ ಯೆತಾತ್. ತ್ಯಾ ದೆಕುನ್ ಉಣ್ಯಾರ್ ವಾರಾಡ್ಯಾಂತ್ಲ್ಯಾನ್ ದೊಗಾಂ ಸಾಂದ್ಯಾಂಕ್‌ಪುಣಿಂ ತ್ಯಾ ವಾರಾಡ್ಯಾಚ್ಯಾ ಸರ‍್ವ್ 18 ವರ್ಸಾಂ ಮಿಕ್ವಾಲ್ಲ್ಯಾ ಕಥೊಲಿಕ್ ಭಾವಾಡ್ತ್ಯಾಂನಿ ಜೆರಾಲ್ ಎಲಿಸಾಂವ್ (ಚುನಾವಣ್/ ಇಲೆಕ್ಷನ್) ವೆವಸ್ತ್ಯಾಂತ್ ವಿಂಚುನ್ ಕಾಡ್ಚೆಪರಿಂ ಪ್ರೇತನಾಂ ಜಾಯ್ಜೆ.
2. ಮಂಗ್ಳುರ್ ದಿಯೆಸೆಜಿಚ್ಯೆ ಗೊವ್ಳಿಕ್ ಪರಿಷಧೆಂತ್ ಯಾಜಕಾಂಚೊ ಸಂಕೊ ವಿಪ್ರೀತ್ ಆಸಾ (ವಿಗಾರ್‌ವಾರ್, ದಿಯೆಸೆಜಿ ಕೇಂದ್ರಾಂಚೆ ಆನಿ ಅಪೊಸ್ತಲಿಕ್ ಸಂಘಟನಾಂಚೆ ನಿರ‍್ದೇಶಕ್ ಆನಿ ಆಯೋಗಾಂಚೆ ಸಂಯೋಜಕ್ ಮ್ಹಣುನ್ ಸುಮಾರ್ 50 ಜಣ್ ತೆಚ್ ಜಾಲೆ. ಆನಿ ಉಪ್ರಾಂತ್ ವಾರಾಡ್ಯಾಂಥಾವ್ನ್ ಎಕೇಕ್ ಯಾಜಕ್ ವಿಂಚುನ್ ಯೆತಾತ್. ತಶೆಂ ಜಾಲ್ಲ್ಯಾನ್ ಲಾಯಿಕ್ ಭಾವಾಡ್ತ್ಯಾಂಚೊ ಸಂಕೊ ಎಕ್ದಮ್ ಅಸಂತುಲಿತ್ ಜಾಲಾ. ಹೊ ಸಂಕೊ ಸಂತುಲಿತ್ ಕರಿಜೆ. ಯಾಜಕಾಂಚ್ಯಾ ಆನಿ ಧಾರ‍್ಮಿಕಾಂಚ್ಯಾ ಸಂಕ್ಯಾಪ್ರಾಸ್ ಲಾಯಿಕ್ ಭಾವಾಡ್ತ್ಯಾಂಚೊ ಸಂಕೊ ಏಕ್ ದೋನ್ ಪುಣಿ ಚಡ್ತಿಕ್ ಆಸಾಜೆ.
3. ತೆಚ್‌ಪರಿಂ ಆಮ್ಚ್ಯಾ ದಿಯೆಸೆಜಿಚ್ಯೆ ಆನಿ ತಿಚ್ಯೆ ಭಿತರ್ ಆಸ್ಚ್ಯಾ ಸರ‍್ವ್ ಗೊವ್ಳಿಕ್ ಪರಿಷಧೆಂನಿ ದಾದ್ಲ್ಯಾಂಚೊ ಸಂಕೊ ಚಡ್, ಸಂಘಟನಾಂಚೆ ಲಾಯಿಕ್ ಅಧ್ಯಕ್ಷ್ ದಾದ್ಲೆ ತರ್ ತೇಯಿ ದಾದ್ಲೆ. ಸ್ತ್ರೀಯೊ ವಾರಾಡ್ಯಾಂಚಿಂ ಚುನಾಯಿತ್ ಆನಿ ಸ್ತ್ರೀ ಧಾರ್ಮಿಕ್ ಸಭೆಂಚಿಂ (ಕೋಂಗ್ರಿಗೇಶನಾಂಚಿಂ) ಮೇಜರ್ ಸುಪೀರಿಯರ‍್ಸ್. ತಶೆಂ ಜಾಲ್ಲ್ಯಾನ್ ಪರಿಷದೆಂತ್ ಸ್ತ್ರೀಯಾಂಚೊ ಸಂಕೊ ಎಕ್ದಮ್ ಉಣೊ ಜಾತಾ. ದಾದ್ಲೆ ನಾಕಾತ್, ಯಾಜಕ್ ನಾಕಾತ್ ಮ್ಹಣುನ್ ಮ್ಹಜೊ ವಾದ್ ನ್ಹಂಯ್ ತ್ಯಾ ಬದ್ಲಾಕ್ ಸ್ತ್ರೀಯಾಂಚೊ ಸಂಕೊ ದಾದ್ಲ್ಯಾಂಚ್ಯಾ ಸಂಕ್ಯಾಕ್ ಸಮಾಸಮಿ ನಾಂ ತರ್ ಲಾಗಿಂಲಾಗಿಂ ಜಾಯ್ಜೆ. ತೊ ಸಂಕೊ ದಾದ್ಲ್ಯಾಂಚ್ಯಾ ಸಂಕ್ಯಾಕ್ ಸಮಾಸಮಿ ಕರ‍್ಚ್ಯಾಕ್ ವ್ಹಡಿಲಾಂನಿ ವಿಶೇಷ್ ಅರಕ್ಷಣ್ ವೆವಸ್ತಾ ಕರಿಜೆ.
3. ದಿಯೆಸೆಜಿಚಿ ಗೊವ್ಳಿಕ್ ಪರಿಷದ್ ತ್ಯಾ ದಿಯೆಸೆಜಿಚಿ ಮಹತ್ವಾಚಿ ಏಕ್ ಮಂಡಳಿ ಜಾಲ್ಲ್ಯಾನ್ ತಿಚ್ಯಾ ವೆವ್ಹಾರಾಂತ್ ತೊಚ್ ಮಹತ್ವ್ ಆನಿ ಗಂಭೀರತಾ ದಿಸುನ್ ಯೇಜೆ. ‘ಆಸಾ ಮ್ಹಣ್ಚ್ಯಾಕ್ ಆಸಾ, ಜಾಯ್ಜೆಚ್ ಮ್ಹಣ್ ಕಾಂಯ್‌ನಾಂ’ ಮ್ಹಣ್ಚೆಂ ಚಿಂತಪ್ ಹಾಂಗಾಸರ್ ಆಯ್ಲ್ಯಾರ್ ಕಶೆಂ?’ 1994 ಮೇ ಮ್ಹಯ್ನ್ಯಾಂತ್ ಹಾಂವ್ ಡಾರ್ಜಿಲಿಂಗ್ ಪಾವ್‌ಲ್ಲೊಂ. 10 ಮೇ 1994 ವೆರ್ ರಾಷ್ಟ್ರಾಚ್ಯಾ ಸಿಎಲ್‌ಸಿಚಿ ಮಹಾಸಭಾ ಉದ್ಘಾಟಿತ್ ಕೆಲ್ಲೊ ಬಿಸ್ಪ್ ಎರಿಕ್ ಬೆಂಜಮಿನ್ ತಮಾಂಗ್ 14 ಮೇ ವೆರ್ ಸಾಸ್ಣಾಕ್ ಅಂತರ‍್ಲೊ. ತಾಚ್ಯಾ ನಿಕೆಪಾಚ್ಯಾ ಕಾರ‍್ಯಾಕ್ ಆಮ್ಕಾಂ ಸಕ್ಡಾಂಕ್ ಆಪಯಿಲ್ಲೆಂ ಪೂಣ್ ನಿಕೆಪಾಕ್ ಸಂಬಂಧಿ ವೆವಸ್ತ್ಯಾಚೊ, ಚಡ್‌ಕರ‍್ನ್ ತಾಕಾ ಖಂಯ್ ಮಾತಿಯೆಕ್ ಲಾಂವ್ಚೆಂ ಮ್ಹಣ್ಚೆವಿಶಿಂ ಎದೊಳ್‌ಯ್ ಅಂತಿಮ್ ವಿವರ್ ಲಾಬುಂಕ್‌ನಾತ್‌ಲ್ಲೆ, ತ್ಯಾ ವಿಶಿಂ ದಿಯೆಸೆಜಿಚ್ಯೆ ಗೊವ್ಳಿಕ್ ಪರಿಷದೆಂತ್ ಚರ‍್ಚಾ ಲಾಂಬ್‌ಕಾಳ್ ಚಲ್‌ಲ್ಲಿ. ನಿಮಾಣೆಂ ತೊ ಡಾರ್ಜಿಲಿಂಗ್ ದಿಯೆಸೆಜಿಚೊ ಪಯಿಲ್ಲೊ ಬಿಸ್ಪ್ ಮ್ಹಣ್ಚ್ಯಾ ಕಾರಣಾನ್ ತಾಚಿ ಕೂಡ್ ಖತಾವಿಣ್ ಗರ‍್ಭಿಸಂಭವಾಚ್ಯಾ ಕೊಪೆಲಾಭಿತರ್ ನಿಕೆಪುಂಕ್ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಷದೆನ್ ಪರ‍್ವಣ್ಗಿ ದಿಲ್ಲಿ. ಆಮ್ಚ್ಯಾ ದಿಯೆಸೆಜಿಂತ್‌ಯ್ ಗೊವ್ಳಿಕ್ ಪರಿಷದೆನ್ ಅಸಲೆ ನ್ಹಂಯ್ ತರೀ ಹೆರ್ ಗೊವ್ಳಿಕ್ ಆಡಳ್ತ್ಯಾಕ್ ಸಂಬಂಧ್ ಜಾಲ್ಲೆ ವಿಷಯ್ ವಿಸ್ತೃತ್ ಚರ‍್ಚಾ ಕರುಂಕ್, ತ್ಯಾ ವಿಷಯಾಂಚೆರ್ ನಿರ್ಣಯ್ ಘೆಂವ್ಕ್ ಆನಿ ವಿಸ್ತೃತ್ ಕಾರ‍್ಯಯೋಜನಾಂ ಮಾಂಡುನ್ ತಿಂ ಕಾರ‍್ಯರುಪಾಕ್ ಹಾಡುಂಕ್ ಆವ್ಕಾಸ್ ಆಸಾಜೆ.
4. ಗೊವ್ಳಿಕ್ ಪರಿಷದೆಂತ್ ಬರೆ ಬರೆ ವಿಷಯ್ ಚರ‍್ಚೆಕ್ ಯೆತಾತ್ ಆನಿ ತಾಚೆರ್ ವಾರಾಡ್ಯಾ ಮಟ್ಟಾರ್ ತಶೆಂಚ್ ಫಿರ‍್ಗಜಾಂನಿ ಸಯ್ತ್ ಸಮಾಲೋಚನ್ ಚಲ್ತಾ. ಎಕಾ ಜಮತೆಂತ್ ಚಲ್‌ಲ್ಲ್ಯಾ ಚರ‍್ಚೆಂಚೊ ಫಳ್ ಚಡ್ ಮ್ಹಳ್ಯಾರ್ ದುಸ್ರ್ಯಾ ಜಮತೆಂತ್ ಮಿನುಟಾಂಚ್ಯಾ ಸಂದರ‍್ಭಾರ್ ಚರ‍್ಚಾ ಜಾತಾ ಸೊಡ್ಲ್ಯಾರ್ ಉಪ್ರಾಂತ್ ಕೊಣಾಯ್ಕೀ ತಾಚಿ ಯಾದ್ ನಾಂ. ಎಕಾ ಮೀಟಿಂಗಾರ್ ಏಕ್ ವಿಷಯ್ ಉಪ್ರಾಂತ್ಲ್ಯಾಂತ್ ದುಸ್ರೊಚ್ ಏಕ್ ತರ್ ದಿಯೆಸೆಜಿಚ್ಯಾ ನಿರಂತರ್ ವಾಡಾವಳಿಂತ್ ಚಡ್ ಸೆವಾ ದಿಂವ್ಚ್ಯಾಕ್ ತ್ಯಾ ಮಂಡಳೆಕ್ ಭಂಗ್ ಜಾತಾತ್. ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಷದೆಚಿ ಅವ್ದಿ ತೀನ್ ವರ್ಸಾಂ. ಉಣ್ಯಾರ್ ಎಕಾ ಅವ್ದೆಕ್ ಏಕ್ ನಿರಂತರ್ ನಿರ‍್ಧಿಷ್ಟ್ ಕಾರ‍್ಯಯೋಜನ್ ಘಾಲ್ನ್‌ಘೆಂವ್ಚೆಂ ಗರ‍್ಜೆಚೆಂ ಮ್ಹಣ್ ಮ್ಹಾಕಾ ದಿಸ್ತಾ.
5. ಪ್ರಸ್ತುತ್ ಪರಿಷಧೆಂಚ್ಯಾ ವೆವಸ್ತ್ಯಾಂತ್ ಸಾಂಧೆ ಎಕ್ದಮ್ ಚರ‍್ಚಾ ಚಲಯ್ತಾತ್, ಯೋಜನಾಂ ಮಾಂಡ್ತಾತ್. ತ್ಯಾ ಯೋಜನಾಂಚ್ಯಾ ಸೊಭಾಯೆಕ್ ಸರ‍್ವ್ ಸಾಂಧೆ ಭುಲ್ತಾತ್ ತಶೆಂ ಅಧ್ಯಕ್ಷ್ ಜಾವ್ನಾಸ್ಚೊ ವಿಗಾರ್‌ಯ್ ಭುಲ್ತಾ. ಪೂಣ್ ತ್ಯಾ ಉಪ್ರಾಂತ್ ದುಡು ದಾನ್ ಮಾಗುನ್ ಹಾಡ್ಚೊ, ಖರ‍್ಚ್ ಕರ‍್ಚೊ ಸರ‍್ವ್ ಹಾರ್‌ಭಾರ್ ವಿಗಾರಾಚ್ಯಾ ಎಕ್ಲ್ಯಾಚ್ಯಾ ಮಾತ್ಯಾರ್ ಪಡ್ತಾ. ತೆಚ್ ಪರ‍್ಮಾಣೆಂ ದುಡು ಖರ‍್ಚ್ ಕರ‍್ಚೆಂ ಸಕ್ಕಡ್ ಕಾಮ್ ವಿಗಾರಾಚ್ಯಾ ಎಕ್ಲ್ಯಾಚ್ಯಾ ಹಾತಾಂತ್ ಘಾಲ್ಲ್ಯಾನ್ ಪಾರದರ‍್ಶಕತಾ ಉಣಿಂ ಜಾತಾ. ಮಾಗಿರ್ ದುರ‍್ಸೊಣೆಂ ಮೆಳ್ಚೆಂ ವಿಗಾರಾಕ್ ಮಾತ್ರ್. ದೆಕುನ್ ಫಿರ‍್ಗಜೆಚ್ಯಾ ಲವ್ಕಿಕ್ (ಟೆಂಪೋರಲ್) ಆಡಳ್ತ್ಯಾಚ್ಯಾ ಸರ‍್ವ್ ಗಜಾಲಿಂನಿ ವಿಗಾರಾಕ್ ಸಮಾಸಮ್ ಫಿರ‍್ಗಜ್ ಉಪಾಧ್ಯಕ್ಷಾಕ್ ಆನಿ ಕಾರ‍್ಯದರ‍್ಶಿಕ್ ಜವಾಬ್ಧಾರ್ ಕರಿಜೆ. ಚೆಕ್ಕ್ ಸಾಯ್ನ್ ಘಾಲ್ಚ್ಯಾ, ದುಡ್ವಾ ಆನಿ ಹೆರ್ ಆಸ್ತಿಚ್ಯಾ ಹಾರ್‌ಬಾರಾ ಚಲಂವ್ಚ್ಯಾಕ್ ಹೆ ತೆಗೀ ಸಿಗ್ನೇಟರಿ ಆಸಾಜೆ. ತೆಗಾಂ ಪಯ್ಕಿ ಉಣ್ಯಾನ್ ದೊಗಾಂನಿ ರುಜು ಘಾಲ್ಯಾರ್ ಮಾತ್ರ್ ತೆಂ ಸ್ವೀಕಾರ್ ಜಾಂವ್ಚಿ ವೆವಸ್ತಾ ವಾಡಾಜೆ. ದುಡು ಹಾಡ್ಚ್ಯಾಂತ್‌ಯ್ ತೆ ವಾಂಟೆಲಿ, ಖರ‍್ಚ್ ಕರ‍್ಚ್ಯಾಂತ್‌ಯ್ ತೆ ಸಮಾಸಮಿ ವಾಂಟೆಲಿ ಜಾಯ್ಜೆ.
► ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
Wonderful article Prof. Steevan. I fully support u. Need changes in financial matters in churches. Required joint signatories in church accounts. This is more important.
Wonderful article, an eye opener. We need change