“ದೋನ್ ವರ್ಸಾಂಚ್ಯಾ ಲಾಕ್‌ಡಾವ್ನಾ ಉಪ್ರಾಂತ್ ಸವ್ಕಾಸ್ ಸಮಾಜಿಕ್ ಜೀವನ್ ಸಹಜ್ ಸ್ಥಿತೆಕ್ ಪಾಟಿಂ ಯೆತೇ ಆಸಾ. ವೆಪಾರ್ – ವಯ್ವಾಟ್ ಸುರು ಜಾಲೆಪರಿಂ, ನಾಟಕ್, ಕಲಾಪ್ರದರ್ಶನಾಂ ಆನಿ ಸಾಂಸ್ಕೃತಿಕ್ ಕಾರ್ಯೀಂಯ್ ಆದ್ಲೆಪರಿಂ ಸಾದರ್ ಜಾಂವ್ಕ್ ಲಾಗ್ಲ್ಯಾಂತ್. ಮನ್ಶ್ಯಾಚ್ಯಾ ವೆಸ್ತ್ ಜಿವಿತಾಂತ್ ಮನೊರಂಜನ್ ಗರ್ಜೆಚೆಂ ಜಾವ್ನಾಸಾ. ಕೊಂಕ್ಣಿ ನಾಟಕಾಂನಿ ಮನೊರಂಜನಾ ಸವೆಂ ಆಯ್ಲೆವಾರ್ ನವೆ ಪ್ರಯೋಗ್ ಜಾಲ್ಲೆ ಪಳೆಂವ್ಕ್ ಮೆಳ್ತಾತ್. ಕಲಾಕಾರಾಂ ಥಂಯ್ ವೃತ್ತಿಪರತಾ ಆನಿ ಪ್ರಬುದ್ದತಾ ಪಳೆಂವ್ಕ್ ಮೆಳ್ತಾ. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಕೊಂಕ್ಣಿ ನಾಟಕ್ ಕಲಾಕಾರಾಂಕ್ ಪ್ರೋತ್ಸಾವ್ ದಿಂವ್ಚ್ಯಾ ಇರಾದ್ಯಾನ್ ಮಾಂಡುನ್ ಹಾಡ್‌ಲ್ಲೊ ನಾಟಕೋತ್ಸವ್ 2022 ಹೊಗ್ಳಿಕೆಚೊ. ಅಸಲೊಚ್ ಪ್ರೋತ್ಸಾವ್ ನಾಟಕ್ ಬರಯ್ತೆಲ್ಯಾಂಕೀ ಅಕಾಡೆಮಿನ್ ದೀಜಾಯ್.” ಮ್ಹಣಾಲೊ ಮಾನೆಸ್ತ್ ಅನಿಲ್ ಲೋಬೊ, ಎಂಸಿಸಿ ಬ್ಯಾಂಕ್ ಹಾಚೊ ಅಧ್ಯಕ್ಷ್.
ಸೊಮಾರಾ 26 ಸಪ್ತೆಂಬರ್ 2022 ವೆರ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್, ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಸಾಲಾಂತ್ ಸಪ್ತೆಂಬರ್ 26 ಥಾವ್ನ್ ಅಕ್ತೋಬರ್ 1 ತಾರಿಕೆ ಪರ್ಯಾಂತ್ ಮಾಂಡುನ್ ಹಾಡ್‌ಲ್ಲ್ಯಾ ನಾಟಕೋತ್ಸವ್ 2022 ಕಾರ್ಯೆಂ, ಗುಮಟ್ ಬಡವ್ನ್ ಉಗ್ತಾವಣ್ ಕರ್ನ್ ತೋ ಉಲಯ್ತಾಲೊ.
ಮುಕಾರುನ್ ಮಾನೆಸ್ತ್ ಲೋಬೊ ಮ್ಹಣಾಲೊ ” ಆಮ್ಚಿ ಕೊಂಕ್ಣಿ ಭಾಸ್ ಆಜ್ ರಾಷ್ಟ್ರ‍ೀಯ್ ಭಾಸ್ ಜಾವ್ನ್ ಸೊಭ್ತಾ. ಕೊಂಕ್ಣಿ ಭಾಶೆಂತ್ ಸಿವಿಲ್ ಸರ್ವಿಸ್ ಪರೀಕ್ಷಾ ಬರಂವ್ಕ್ ಸಯ್ತ್ ಆಮ್ಕಾಂ ಅವ್ಕಾಸ್ ಆಸಾ. ಅಸಲೆ ಅವ್ಕಾಸ್ ಆಮಿ ವಾಪಾರುಂಕ್ ಶಿಕಜೆ. ತಶೆಂಚ್ ನವೆಂಸಾಂವಾನ್ ಭರ್‌ಲ್ಲ್ಯೊ ನಾಟಕ್ ಕೃತಿಯೊ ಆನಿ ನವೆ ರಂಗ್ ಪ್ರಯೋಗ್ ಕರ್ಚೆ ಮುಕಾಂತ್ರ್ ರಾಷ್ಟ್ರ‍ೀಯ್ ಮಟ್ಟಾರ್ ಕೊಂಕ್ಣೆಚೊ ಭರ್ಮ್ ಚಡಯ್ಜಾಯ್”
ಹ್ಯಾ ಸಂದರ್ಭಾರ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ್ ಡೊ| ಕೆ. ಜಗದೀಶ ಪೈ ಹಾಣಿ ” ಪಯ್ಲೆಂ ಗಾಂವಾ ಗಾಂವಾಂನಿ ಹಫ್ತ್ಯಾಂಗಟ್ಲ್ಯಾನ್ ನಾಟಕಾಚಿಂ ಪ್ರದರ್ಶನಾಂ ಚಲ್ತಾಲಿಂ. ಮಾಸ್ಟರ್ ಹಿರಣ್ಣಯ್ಯ ತಸಲೆ ಮಾಲ್ಘಡೆ ಕಲಾಕಾರ್ ನಾಟಕ್ ಮಂಡಳಿ ಘೆವ್ನ್ ಗಾಂವಾರ್ ಯೇವ್ನ್ ಟೆಂಟ್ ಮಾರ್ತಾಲೆ. ಏಕ್‌ಚ್ ನಾಟಕ್ ದಿಸಾಂ ದೀಸ್ ಚಲ್ತಾಲೊ ತರೀ, ಸದಾಂಯ್ ಪ್ರೇಕ್ಷಕ್ ಆಸ್ತಾಲೆ. ಮುದುಕನ ಮದುವೆ ತಸಲೆ ನಾಟಕ್ ಪರ್ತ್ಯಾನ್ ಪರ್ತ್ಯಾನ್ ಪಳಂವ್ಚೊ ಪ್ರೇಕ್ಷಕ್ ವರ್ಗ್ ಆಸ್ಲೊ. ರಮಾನಂದ ಚೂರ್ಯಚೆ ಕೊಂಕ್ಣಿ ನಾಟಕ್ ಸಯ್ತ್ ಆಮ್ಕಾಂ ತವಳ್ ತವಳ್ ಪಳೆಂವ್ಕ್ ಮೆಳ್ತಾಲೆ. ಫೂಣ್ ಆತಾಂ ಟೆಲಿವಿಷನ್ ಸಿರಿಯಲಾಂ, ಸಿನೆಮಾ ಆನಿ ಯೂ ಟ್ಯೂಬ್ ಮ್ಹಣೊನ್ ಗಾಂವಾಂನಿ ನಾಟಕ್ ಚಲಾನಾಂತ್, ನಾಟಕ್ ಮಂಡಳೀಯ್ ನಾಂತ್.” ಮ್ಹಣ್ ಆಪ್ಲಿ ಬೆಜಾರಾಯ್ ಉಚಾರ್ಲಿ.
ಮುಂದರುನ್ ವರಕವಿ ದ. ರಾ. ಬೇಂದ್ರೆಚ್ಯಾ ಉತ್ರಾಂಚೊಂ ಉಲ್ಲೇಕ್ ಕರುನ್ ಡೊ| ಪೈನ್ ಮ್ಹಳೆಂ ” ಜಿಣ್ಯೆಂತ್ ನಾಟಕ್ ಆಸಜೆ, ನಾಟಕಾಂತ್ ಜೀವನ್ ಆಸಜೆ ಮ್ಹಳಾಂ ವರಕವಿ ಬೇಂದ್ರೆನ್. ಜಿಣ್ಯೆಂತ್ ನಾಟಕ್ ಕರ್ಚೆಂ ಕಾಂಯ್ ಕಶ್ಟಾಂಚೆಂ ನ್ಹಯ್. ಆಮಿ ತೆ ಸದಾಂ ಕರ್ತಾಂವ್. ಪೂಣ್ ನಾಟಕಾಂತ್ ಜೀವನ್ ಹಾಡ್ಚೆಂ ಮ್ಹಳ್ಯಾರ್ – ತೆಂ ಕಾಮ್ ಸುಲಭಾಚೆಂ ನ್ಹಯ್. ಬೋವ್ ಕಶ್ಟಾಂಚೆಂ ಆನಿ ವಾಂವ್ಟಿಚೆಂ “
ಆಪ್ಲ್ಯಾ ಉಲವ್ಪಾಂತ್ ನಾಟಕಿಸ್ತ್ ಗಿರೀಶ್ ಚಂದ್ರ ಘೋಶ್ ಹಾಚ್ಯಾ ನಟನಾಚೆರ್ ಈಶ್ವರ ಚಂದ್ರ ವಿದ್ಯಾಸಾಗರ್ ಹಾಣಿ ಮಾರ್‌ಲ್ಲ್ಯಾ ವ್ಹಾಣೆಚೊ ಆನಿ ಮೊಹಮ್ಮದ್ ಪೀರ್ ಹಾಂಚ್ಯಾ ನಟನಾಚೆರ್ ನಂಜಪ್ಪಾನ್ ಮಾಫ್ ಕೆಲ್ಲ್ಯಾ ರೀಣಾಚೊ ಉಲ್ಲೇಕ್ ಕರ್ನ್ ಡೊ| ಕೆ. ಜಗದೀಶ ಪೈ ಮ್ಹಣಾಲೊ ” ನಾಟಕಾಂತ್ ಮನೋರಂಜನ್ ಜರೂರ್ ಜಾಯ್. ಪೂಣ್ ಮನೋರಂಜನಾ ಬರಾಬರ್ ಮನೋಬೋಧನೆಯ್ ಆಸೊಂಕ್ ಜಾಯ್. ಮನೋಬೋಧನೆ ಆಸ್ಲ್ಯಾರ್ ಮಾತ್ ಮನೋಪರಿವರ್ತನೆ ಸಾಧ್ಯ್ ಜಾತಾ. ತವಳ್ ನಾಟಕ್ ಯಶಸ್ವೀ ಜಾತಾ.”
ಉದ್ಘಾಟನ್ ಕಾರ್ಯಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ರಿಜಿಸ್ಟ್ರ‍ಾರ್ ಮಾನೆಸ್ತ್ ಮನೋಹರ್ ಕಾಮತ್, ಕೊಂಕಣಿ ಸಾಂಸ್ಕೃತಿಕ ಸಂಗಾಚೊ ಹುದೆದಾರ್ ಮಾನೆಸ್ತ್ ಗುಲ್ವಾಡಿ ರಾಮದಾಸ್, ಕೊಂಕ್ಣಿ ನಾಟಕ್ ಸಭೆಚೊ ಉಪಾಧ್ಯಕ್ಷ್ ಮಾನೆಸ್ತ್ ಲಿಸ್ಟನ್ ಸೊಜ್ ವೆದಿರ್ ಹಾಜರ್ ಆಸ್ಲೆ.
ಅಕಾಡೆಮಿಚೊ ಸಾಂದೊ ಮಾನೆಸ್ತ್ ಅರುಣ್ ಜಿ. ಶೇಟ್ ಹಾಣಿ ಯೆವ್ಕಾರ್ ಮಾಗೊನ್, ಕಾರ್ಯೆಂ ಚಲವ್ನ್ ವೆಲೆಂ. ನಾಟಕೋತ್ಸವ್ ಕಾರ್ಯಕ್ರಮಾಚೊ ಸದಸ್ಯ್ ಸಂಚಾಲಕ್ ಮಾನೆಸ್ತ್ ಕೆನ್ಯೂಟ್ ಜೀವನ್ ಪಿಂಟೊ ಹಾಣಿ ದಿನ್ವಾಸ್ ಪಾಟಯ್ಲೆ.
ಉತ್ಸವಾಚೊ ಪಯ್ಲೊ ನಾಟಕ್ ಜಾವ್ನ್ ಮಂಗ್ಳುರ್ಚ್ಯಾ ಅಸ್ತಿತ್ವ ಪಂಗ್ಡಾಥಾವ್ನ್ ಸಳ್ಗಿ ನಾಟಕ್ ಪ್ರದರ್ಶಿತ್ ಜಾಲೊ.
ಮಂಗ್ಳಾರಾ 27 ತಾರಿಕೆರ್ – ಕುಳ್ಳಪು ಕುಂದಾಪುರ ಪಂಗ್ಡಾಥಾವ್ನ್ ‘ತೀನ್ ರತ್ನ’, ಬುದ್ವಾರಾ 28 ತಾರಿಕೆರ್ ಮಾಂಡ್ ಪಂಗ್ಡಾಥಾವ್ನ್ ‘ಮುಕ್ಕಂ ಪೋಸ್ಟ್ ಬೊಂಬಿಲವಾಡಿ’, ಬ್ರೇಸ್ತಾರಾ 29 ತಾರಿಕೆರ್ ಸಾಧನ ಬಳಗ ಮಂಗಳೂರು ಹಾಂಚೆಥಾವ್ನ್ ‘ಗೋಟಾಲೊ’, ಸುಕ್ರಾರಾ 30 ತಾರಿಕೆರ್ ಕೊಂಕಣಿ ಸಾಂಸ್ಕೃತಿಕ ಸಂಘಥಾವ್ನ್ ‘ಆತ್ಮಲಿಂಗ’ ಆನಿ ಅಕ್ಟೋಬರ್ 1 ತಾರಿಕೆರ್ ಭೂಮಿಗೀತೆ ಸಾಂಸ್ಕೃತಿಕ ವೇದಿಕೆ ಪಾಟ್ಲಾ ಹಾಮ್ಚೆಥಾವ್ನ್ ‘ವಾಸಂಸಿ ಜೀರ್ನಾನಿ’ ನಾಟಕ್ ಪ್ರದರ್ಶನ್ ಜಾತೆಲೆ.
ಜುಸ್ತ್ 7.00 ವ್ಹರಾರ್ ಸುರು ಜಾಂವ್ಚ್ಯಾ ನಾಟಕಾಂತ್ ಕೊಂಕ್ಣಿ ನಾಟಕ್ ಪ್ರೇಮಿಂಕ್ ಮುಕ್ತ್ ಪ್ರವೇಶ್ ಆಸ್ತಾಲೊ ಮ್ಹಣ್ ಅಕಾಡೆಮಿನ್ ಕಳಯ್ಲಾಂ.
► ತಸ್ವಿರ‍್ಯೊ : ರೋಶನ್ ಮಾಡ್ತಾ, ಮಂಗ್ಳುರ್
