ಎಂಸಿಸಿ ಬ್ಯಾಂಕ್ ವಾರ್ಶಿಕ್ ಜೆರಾಲ್ ಜಮಾತ್ : 10% ಡಿವಿಡೆಂಡ್ ಘೋಶಣ್.

2021 – 22 ಆರ್ಥಿಕ್ ವರ್ಸಾಂತ್ ಶತಮಾನೋತ್ತರ್ ದಶಮಾನೋತ್ಸವಾಚ್ಯಾ ಸಂಭ್ರಮಾರ್ ಆಸ್ಚ್ಯಾ ಎಂ.ಸಿ.ಸಿ. ಬ್ಯಾಂಕಾನ್ 8.27 ಕೊರೊಡ್ ಲಾಭ್ ಜೊಡ್ಚೆಸವೆಂ, ಬ್ಯಾಂಕಾಚಾ ಚರಿತ್ರೆಂತ್ ಪಯ್ಲೆ ಪಾವ್ಟಿಂ ಐತಿಹಾಸಿಕ್ 138% ಪ್ರಗತಿ ದಾಖಲ್ ಕೆಲ್ಯಾ ಆಸುನ್, ರಿಜರ್ವ್ ಬ್ಯಾಂಕಾಚಾ ನಿರ್ದೇಶನಾಖಾಲ್ ಹಿಶೆದಾರಾಂಕ್ 10% ಲಾಭಾವಾಂಟೊ ಜಾಹೀರ್ ಕೆಲಾ.

ಕೊಡಿಯಾಳ್‌ಬಯ್ಲ್ ಮಂಗ್ಳುರ್, ಸಾಂ. ಲುವಿಸ್ ಪದ್ವೆ ಪೂರ್ವ್ ಕೊಲೆಜಿಚ್ಯಾ ಲೊಯೊಲಾ ಸಭಾಸಾಲಾಂತ್, ಆಯ್ತಾರಾ 25 ಸಪ್ತೆಂಬರ್ 2022 ವೆರ್ ಸಕಾಳಿಂ 11 ವ್ಹರಾಂಚೆರ್ ಚಲ್ಲೆಲ್ಲ್ಯಾ ವಾರ್ಶಿಕ್ ಜೆರಾಲ್ ಜಮಾತೆರ್ ಬ್ಯಾಂಕಾಚೊ ಅಧ್ಯಕ್ಷ್ ಮಾನೆಸ್ತ್ ಅನಿಲ್ ಲೋಬೊ ಹಾಣೆ ಲಾಭಾವಾಂಟೊ ಘೋಶಿತ್ ಕೆಲೊ.

ಬ್ಯಾಂಕ್ ಶಿಬಂದೆನ್ ಮಾಗ್ಣ್ಯಾಗಿತಾ ದ್ವಾರಿಂ ಜಮಾತೆಕ್ ಚಾಲನ್ ದಿಲೆಂ. 2021 ದಸೆಂಬರ್ 23 ವೆರ್ ದೆವಾದೀನ್ ಜಾಲ್ಲೊ ಬ್ಯಾಂಕಾಚೊ ನಿರ್ದೇಶಕ್ ಡಿ. ಜೆ. ಪತ್ರಾವೊ ಆನಿ 2021 – 22 ಆರ್ಥಿಕ್ ವರ್ಸಾಂತ್ ದೆವಾದೀನ್ ಜಾಲ್ಲ್ಯಾ  ಬ್ಯಾಂಕಾಚ್ಯಾ ಸಾಂದ್ಯಾಂಕ್ ಬ್ಯಾಂಕಾಚೊ ನಿರ್ದೇಶಕ್ ಮಾನೆಸ್ತ್ ಮಾರ್ಸೆಲ್ ಮ್ಯಾಥ್ಯೂ ಡಿ’ಸೊಜಾ ಹಾಣಿ ಶೃದ್ದಾಂಜಲಿ ಪಾಟಯ್ಲಿ ಆನಿ ಜಮಾತೆನ್ ಏಕ್ ಮಿನುಟ್ ಮೌನ್ ರಾವೊನ್ ಆತ್ಮ್ಯಾಂಕ್ ಶಾಂತಿ ಮಾಗ್ಲಿ.

ಬ್ಯಾಂಕಾಚೊ ಅಧ್ಯಕ್ಷ್ ಮಾನೆಸ್ತ್ ಅನಿಲ್ ಲೋಬೊನ್, ನಿರ್ದೇಶಕಾಂಕ್ ಆನಿ ಸಾಂದ್ಯಾಂಕ್ ಮಾನಾಚೊ ಯೆವ್ಕಾರ್ ಮಾಗೊನ್ ಸಭೆಚಿ ಕಾರ್ಯಾವಳ್ ಸುರು ಕೆಲಿ.

“ಆರ್ಥಿಕ್ ವರಸ್ 2021 – 22 ಹಾಂತು, ಬ್ಯಾಂಕಾನ್ 8.27 ಕೊರೊಡ್ ರುಪಯ್ ಲಾಭ್ ಜೊಡ್ಲಾ. ಬ್ಯಾಂಕಾಂತ್ ಠೇವ್ 532.08 ಕೊರೊಡ್ ರುಪ್ಯಾಂಕ್ ವಾಡೊನ್ ಆದ್ಲ್ಯಾ ವರ್ಸಾಚ್ಯಾ ತುಲನಾಂತ್ 16.47% ವೃದ್ದಿ ಜಾಲ್ಯಾ.. ದಿಂವ್ಚಿಂ ರಿಣಾಂ 328.56 ಕೊರೊಡ್ ರುಪ್ಯಾಂಕ್ ಪಾವೊನ್, ಆದ್ಲ್ಯಾ ವರ್ಸಾಚ್ಯಾ ತುಲನಾಂತ್ 7.16% ವೃದ್ದಿ ಜಾಲ್ಯಾ. ಆದ್ಲ್ಯಾ ವರ್ಸಾ 3.23% ಆಸ್‌ಲ್ಲಿ ಎನ್.ಪಿ.ಎ. ಪ್ರಸ್ತುತ್ ವರ್ಸಾ 1.60% ಕ್ ದೆಂವ್ಲ್ಯಾ. ಬ್ಯಾಂಕಾಚೊ ಬಂಡ್ವಾಳ್ 14.00% ವಾಡೊನ್ 615.06 ಕೊರೊಡ್ ರುಪಯ್ ಜಾಲಾ. ಹಿಶ್ಯಾ ಭಂಡ್ವಾಳ್, 31 ಮಾರ್ಚ್ 2022 ವೆರ್, 18.43 ಕೊರೊಡಾಕ್ ಪಾವ್ಲಾ. ಅಶೆಂ ಬ್ಯಾಂಕಾಚಿ ಎಕುಣ್ ವಾಡಾವಳ್ ದಾದೊಸ್ಕಾಯೆಚಿ ಆನಿ ಸಮಾದಾನೆಚಿ ಜಾಂವ್ಕ್ ಪಾವ್ಲ್ಯಾ.” ಮ್ಹಳ್ಳ್ಯಾ ಅನಿಲ್ ಲೋಬೊನ್, ಬ್ಯಾಂಕಾಚ್ಯಾ ಪ್ರಗತೆಂತ್ ಹಾತ್ ಮೆಳಯಿಲ್ಲ್ಯಾ ಸರ್ವ್ ಗ್ರಾಹಕಾಂಚೊಂ, ಸಾಂದ್ಯಾಂಚೊಂ, ಶಿಬಂದೆಚೊ ಹ್ಯಾ ವೆಳಿಂ ನಮೃ‌ಪಣಿಂ ಉಪ್ಕಾರ್ ಬಾವುಡ್ಲೊ.

“ಶಾಖ್ಯಾಂವಾರ್ ಚಲಯಿಲ್ಲ್ಯಾ ಗ್ರಾಹಕ್ ಸಮಾವೇಶಾಂಕ್ ಗ್ರಾಹಕ್ ಆನಿ ಸಾಂದ್ಯಾಂ ಥಾವ್ನ್ ಬರೊಚ್ ಪ್ರೋತ್ಸಾವ್ ಲಾಭ್ಲಾ. ದೆಶಾಂತ್ ತಶೆಂ ವಿದೇಶಾಂತ್ ಉಂಚ್ಲೆಂ ಶಿಕಪ್ ಜೊಡುಂಕ್ ಆಶೆಂವ್ಚ್ಯಾ ಭುರ್ಗ್ಯಾಂಕ್ ಹೆರ್ ಬ್ಯಾಂಕಾಪ್ರಾಸ್ ಉಣ್ಯಾ ವಾಡಿರ್ ಶಿಕ್ಪಾ ರೀಣ್ ಬ್ಯಾಂಕಾಂತ್ ಮೆಳ್ತಾ. ವಿದ್ಯಾರ್ಥಿ ಉರವ್ಣೆ ಖಾತ್ಯಾಂಕ್ ವಾಡ್‌ಯೀ ಚಡ್ ಮೆಳ್ತಾ.  ಬ್ಯಾಂಕಾಚೊ ಮುಕೆಲ್ ಶೆವೊಟ್ ಸಮಾಜೆಚ್ಯಾ ಆನಿ ಸಮುದಾಯಾಚ್ಯಾ ಗರ್ಜಾಂಕ್ ಪಾಂವ್ಚೊ ಜಾವ್ನಾಸಾ. ವೆಪಾರ್ – ವಯ್ವಾಟಾಕ್ ಆನಿ ಉದ್ಯಮಾಂಕ್ ಬ್ಯಾಂಕಾಥಾವ್ನ್ ರೀಣಾಂ ದಿಲ್ಯಾರ್ ಮಾತ್ ಬ್ಯಾಂಕಾಚಿ ಪ್ರಗತಿ ಜಾತಾ. ಜಾಯ್ತ್ಯಾಂಕ್ ಕಾಮಾಚೆ ಅವ್ಕಾಸ್ ಮೆಳ್ತಾತ್. ಹೆಂ ಚಿಂತಪ್ ಆಮಿ ಮತಿಂತ್ ಘೆಜೆ.  ಸಮುದಾಯ್ ಆನಿ ಸಮಾಜೆಚ್ಯಾ  ಪ್ರಗತಿಚೆಂ ಚಿಂತಪ್ ಘೆವ್ನ್ ವಾವುರ್ತಾನಾ ಅಡ್ಕಳಿ ಯೆಂವ್ಚೊ, ಧೊಶಿ ಫುಡ್ ಕರುಂಕ್ ಮೆಳ್ಚೆಂ ಸಹಜ್. ಹರ್ಯೇಕಾಕ್ ಕಾನುನಾಂತ್ ಅವ್ಕಾಸ್ ಆಸಾ. ಪೂಣ್ ಅಪ್ರಪಚಾರ್ ಕರ್ಚೊ, ಬ್ಯಾಂಕಾಚ್ಯಾ ಗ್ರಾಹಕಾಂಚೆಂ ನಾಂವ್ ಪಾಡ್ ಕರ್ಚೆಂ – ಹೆಂ ಕೆದಾಳಾಚ್ ಸೊಸುಂಕ್ ಸಾಧ್ಯ್ ನಾ. ಸೊಸ್ಣಿಕಾಯೆಕೀ ಏಕ್ ಮೀತ್ ಆಸ್ತಾ. ಬ್ಯಾಂಕಾಚಿ ಸೊಸ್ಣಿಕಾಯ್ ಅಸ್ಕತ್ಕಾಯ್ ಮ್ಹಣ್ ಕೊಣೆಂಚ್ ಚಿಂತ್ಚೆಂ ನಾಕಾ. ಬ್ಯಾಂಕಾಚಿ ಪ್ರಗತಿ ಸೊಸಿನಾತ್ಲೆ  ಥೊಡೆ ಬ್ಯಾಂಕಾವಿಶ್ಯಾಂತ್ ಫಟ್ಕಿರೆ ಖಬ್ರೊ ಕರ್ತಾತ್. ಕಿತ್ತೂನ್ ಪರ್ಯಾಂತ್ ಮ್ಹಳ್ಯಾರ್ ಬ್ಯಾಂಕಾಥಾವ್ನ್ ರೀಣ್ ಘೆ‌ತ್‌ಲ್ಲ್ಯಾ ಗ್ರಾಹಕಾಂಚೆಂ ನಾಂವ್ ಪಾಡ್ ಕರ್ತಾತ್. ತರ್ ಬ್ಯಾಂಕಾನ್ ಉದ್ಯಮಿಂಕ್ ರೀಣ್ ದೀಂವ್ಕ್‌ಚ್ ನಾಂಗೀ ? ದೆಶಾಚ್ಯಾ ಕಾನುನಾ ಪ್ರಕಾರ್ ತಿರ್ವೊ ಭರ್ನ್, ವೆಪಾರ್ ಕರ್ಚೆ ಉದ್ಯಮಿ ಕಿತೆಂ ಬೆನಾಮಿಯೆ? ಬ್ಯಾಂಕ್ ಆಪ್ಲ್ಯಾ ಗ್ರಾಹಕಾಂಚೊಂ ಅಕ್ಮಾನ್ ಕೆದಿಂಕ್‌ಚ್ ಸೊಸಿನಾ. ಗ್ರಾಹಕಾಂವರ್ವಿಂ ಬ್ಯಾಂಕ್ ಚಲ್ತಾ ಶಿವಾಯ್, ಬೆಬುನ್ಯಾದ್ ಆರೋಪ್ ಮಾಂಡ್ತೆಲ್ಯಾಂಚ್ಯಾ  ಫಕತ್ ಹಜಾರ್ ರುಪಯ್ ಹಿಶ್ಯಾಂತ್ ಬ್ಯಾಂಕ್ ಚಲಾನಾ. ಪ್ರೆಸ್ ಕೊನ್ಫರೆನ್ಸ್ ಆಪವ್ನ್  ಬ್ಯಾಂಕಾಚೆಂ ನಾಂವ್ ಪಾಡ್ ಕರ‍್ತೆಲ್ಯಾಂಚೆಂ ಬ್ಯಾಂಕಾಂತ್ ಎಕಾಂವ್ಟ್ ನಾ. ತೆ ಬ್ಯಾಂಕಾಂತ್ ವ್ಹೆವಾರ್ ಕರಿನಾಂತ್. ಫಕತ್ ಆರೋಪ್ ಮಾತ್ ಮಾಂಡ್ತಾತ್. ಪಾಟ್ಲ್ಯಾ ದಿಸಾಂನಿ ಬ್ಯಾಂಕಾಚಿ ಪ್ರಗತಿ ಸೊಸುಂಕ್ ತಾಂಕಾನಾಸ್ತಾನಾ, ಅಪಪ್ರಚಾರ್ ಚಲ್ತಾನಾ, ಬ್ಯಾಂಕಾ ಸಾಂಗಾತಾ ಘಟ್ ರಾವ್‌ಲ್ಲ್ಯಾ ಗ್ರಾಹಕಾಂಕ್, ಸಾಂದ್ಯಾಂಕ್ ಬ್ಯಾಂಕ್ ಋಣಿ ಆಸಾ ” ಮ್ಹಣ್ ಮಾನೆಸ್ತ್ ಅನಿಲ್ ಲೋಬೊನ್ ಹ್ಯಾ ವೆಳಿಂ ಸ್ಪಶ್ಟ್ ಉಚಾರ್ಲೆಂ.

“ಬ್ಯಾಂಕಾಚೊ ಶತಮಾನೋತ್ತರ್ ದಶಮಾನೋತ್ಸವ್ ಮಿಲಾಗ್ರಿಸ್ ಪದ್ವೆ ಪೂರ್ವ್ ಕೊಲೆಜಿಚ್ಯಾ ಮಯ್ದಾನಾರ್ 27 ನವೆಂಬರ್ 2022 ವೆರ್ ದಬಾಜಿಕ್ ಥರಾನ್ ಚಲ್ಚೊ ಆಸಾ. ಬ್ಯಾಂಕಾಚಾ ಪ್ರಗತೆಂತ್ ಹಾತ್ ಮೆಳಯಿಲ್ಲ್ಯಾ ಸಾಂದ್ಯಾಂನಿ ಆನಿ ಗ್ರಾಹಕಾಂನಿ ಹ್ಯಾ ಸಂಭ್ರಮಾಂತ್ ಜರೂರ್ ವಾಂಟೆಲಿ ಜಾಯ್ಜೆ ಮ್ಹಣ್ ಖಾಲ್ತಿ ವಿನಂತಿ” ಮ್ಹಣ್ ಹ್ಯಾ ಸಂದರ್ಭಾರ್ ಅಧ್ಯಕ್ಶ್ ಮಾನೆಸ್ತ್ ಅನಿಲ್ ಲೋಬೊನ್ ಸಾಂಗ್ಲೆಂ.

ಉಪಾಧ್ಯಕ್ಷ್ ಮಾನೆಸ್ತ್ ಜೆರಾಲ್ದ್ ಜೂಡ್ ಡಿ’ಸಿಲ್ವ ಹಾಣಿ 103 ವ್ಯಾ ವಾರ್ಷಿಕ್ ಜೆರಾಲ್ ಜಮಾತೆಚಿ ವರ್ದಿ ವಾಚ್ಲಿ. ಕಾರ್ಯಸೂಚಿ ಪ್ರಕಾರ್ 2021-22 ವರ್ಸಾಚೆಂ ಲೇಕ್ ಪಾಕ್, 2022-23 ವ್ಯಾ ವರ್ಸಾಚೆಂ ಬಜೆಟ್ ಮಂಡನ್ ಕರುನ್ ಸಭೆಚಿ ಮಾನ್ಯತಾ ಜೊಡುನ್ ಘೆತ್ಲಿ. ಸೂಚಿತ್ ಆವ್ಧೆ ಭಿತರ್ ಬರ್ಪಿನಿಶಿಂ ವಿಚಾರ್ಲೆಲ್ಯಾ ಸರ್ವ್ ಸವಾಲಾಂಕ್ ಅಧ್ಯಕ್ಷಾನ್ ಜಮಾತೆರ್ ಜಾಪಿ ದಿಲ್ಯೊ. ಸಾಂದ್ಯಾಥಾವ್ನ್ ಆಯಿಲ್ಲಿಂ ಸಲಹಾಂ – ಸೂಚನಾಂ ಮಾನುನ್ ಘೆವ್ನ್, ಶಾಸನಾತ್ಮಕ್ ಪರಿಧೆ ಭಿತರ್ ಅನುಷ್ಠಾನಾಕ್ ಘಾಲ್ಚಿ ಭಾಸ್ ಅಧ್ಯಕ್ಷ್ ಮಾನೆಸ್ತ್ ಅನಿಲ್ ಲೋಬೊನ್ ಜಮಾತೆಕ್ ದಿಲಿ.

ಸಪ್ತೆಂಬರ್ 25 ವೆರ್ ಆಪ್ಲೊ ಜಲ್ಮಾದೀಸ್ ಸಂಭ್ರಮ್ಚೊ, ಬ್ಯಾಂಕಾಚೊ ಮಹಾ ಪ್ರಬಂದಕ್ ಮಾನೆಸ್ತ್ ಸುನಿಲ್ ಮಿನೇಜಸ್ ಹಾಂಕಾ ಫುಲಾಂ ತುರ‍್ಯಾಂಸವೆಂ  ಜಲ್ಮಾದಿಸಾಚೆ ಶುಭಾಶಯ್ ಪಾಟವ್ನ್ ಮಾನ್ ಕೆಲೊ. ತಶೆಂಚ್ ಪಾಟ್ಲಿಂ ತೀನ್ ವರ್ಸಾಂ ಬ್ಯಾಂಕಾಂತ್ ವೃತ್ತಿಪರ್ ನಿರ್ದೇಶಕ್ ಜಾವ್ನ್ ಸೆವಾ ದೀವ್ನ್, ಭಲಾಯ್ಕೆ ನಿಮ್ತಿಂ ನಿವೃತ್ತಿ ಘೆತ್‌ಲ್ಲ್ಯಾ ಮಾನೆಸ್ತ್ ಮೈಕಲ್ ಡಿ’ಸೊಜಾ ಹಾಂಕಾಂ ತಾಂಚ್ಯಾ ಸೆವೆಕ್ ಫುಲಾಂತುರೊ ಪಾಟವ್ನ್ ಮಾನ್ ಕೆಲೊ.

ಜಮಾತೆರ್ ಬ್ಯಾಂಕಾಚೆ ನಿರ್ದೇಶಕ್ ಮಾನೆಸ್ತ್ ಆಂದ್ರು ಸೊಜ್, ಮಾರ್ಸೆಲ್ ಸೊಜ್, ಜೆ.ಪಿ. ರೊಡ್ರಿಗಸ್, ಎಲ್ರೊಯ್ ಕಿರಣ್ ಕ್ರಾಸ್ಟೊ, ರೋಶನ್ ಸೊಜ್, ಅನಿಲ್ ಪತ್ರಾವೊ, ಹೆರಾಲ್ಡ್ ಮೊಂತೆರೊ, ಡೆವಿಡ್ ಡಿಸೊಜಾ, ದೊ| ಜೆರಾಲ್ದ್ ಪಿಂಟೊ, ಮಾನೆಸ್ತಿಣ್ ಐರಿನ್ ರೆಬೆಲ್ಲೊ, ದೊ| ಫ್ರೀಡಾ ಸೊಜ್, ಆನಿ ವೃತ್ತಿಪರ್ ನಿರ್ದೇಶಕ್ ಮಾನೆಸ್ತ್ ಸಿ. ಜಿ. ಪಿಂಟೊ, ಮಾನೆಸ್ತ್ ಸುಶಾಂತ್ ಸಲ್ಡಾನ್ಹಾ, ಆನಿ ಆಡಳ್ತ್ಯಾ ಮಂಡಳೆಚೆ ಸಾಂದೆ ಮಾನೆಸ್ತಿಣ್ ಶರ್ಮಿಳಾ ಮಿನೇಜಸ್, ಮಾನೆಸ್ತ್ ಆಲ್ವಿನ್ ಮೊಂತೇರೊ, ಫೆಲಿಕ್ಸ್ ಡಿ’ಕ್ರುಜ್ ಸಾಂಗಾತಾ ಮಹಾ ಪ್ರಬಂದಕ್ ಮಾನೆಸ್ತ್ ಸುನಿಲ್ ಮಿನೇಜಸ್, ಉಪ ಮಹಾಪ್ರಬಂದಕ್ ಮಾನೆಸ್ತ್ ರಾಜ್ ಮಿನೇಜಸ್ ಹಾಜರ್ ಆಸ್ಲೆ.

ಮಹಾಪ್ರಬಂದಕ್ ಮಾನೆಸ್ತ್ ಸುನಿಲ್ ಮಿನೇಜಸ್ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ ಆನಿ ದಿನ್ವಾಸ್ ಪಾಟಯ್ಲೆ. ರಾಶ್ಟ್ರ್ ಗಾನಾಸವೆಂ ಕಾರ್ಯೆಂ ಸಂಪ್ಲೆಂ.