ನಟ್ – ನಿರ್ದೇಶಕ್, ಶಿಕ್ಶಕ್, ಸಂಗೀತ್‌ಗಾರ್ – ಸಿದ್ದಾಪುರ್, ಹಾರ್ಸಿಕಟ್ಟಾಚೊ ಮಾನೆಸ್ತ್ ಗುರುಮೂರ್ತಿ ವಿ. ಎಸ್, ನಮ ತುಳುವೆರ್, ಕಲಾ ಸಂಘಟನೆ(ರಿ), ನಾಟ್ಕದೂರು, ಮುದ್ರಾಡಿ, ಉಡುಪಿ ಹಾಣಿ ದಿಂವ್ಚ್ಯಾ 2022 ವ್ಯಾ ವರ್ಸಾಚ್ಯಾ ಬಿ. ವಿ. ಕಾರಂತ ಯುವ ಪ್ರಶಸ್ತೆಕ್ ವಿಂಚುನ್ ಆಯ್ಲಾ. ಹಿ ಪ್ರಶಸ್ತಿ ತಾಕಾ ಸೊಮಾರಾ, 26 ಸಪ್ಟೆಂಬರ್ 2022 ವೆರ್ ರಾತಿಂ 8.00 ವ್ಹರಾಂಚೆರ್ ಚಲ್ಚ್ಯಾ ಅವ್ವ ನನ್ನವ್ವ ರಂಗೋತ್ಸವಾಂತ್, ಸಂಸ್ಕೃತಿ ಇಲಾಖೊ, ಡೆಲ್ಲಿ ಆನಿ ಕನ್ನಡ ಆನಿ ಸಂಸ್ಕೃತಿ ಇಲಾಖೊ, ಕರ್ನಾಟಕ ಹಾಂಚ್ಯಾ ಸಹಯೋಗಾಂತ್ ಚಲ್ಚ್ಯಾ ಕಾರ್ಯಕ್ರಮಾಂತ್ ಪ್ರದಾನ್ ಕರ‍್ತಲೆ. ಕಾರ್ಯಾಕ್ ಕರ್ನಾಟಕ ಸರ್ಕಾರಾಚೊ ಕನ್ನಡ ಆನಿ ಸಂಸ್ಕೃತಿ ಖಾತ್ಯಾಚೊ ಮಂತ್ರಿ ಶ್ರೀ ವಿ. ಸುನಿಲ್ ಕುಮಾರ್, ಕನ್ನಡ ಆನಿ ಸಂಸ್ಕೃತಿ ಇಲಾಖ್ಯಾಚಿ ಸಹಾಯಕ್ ನಿರ್ದೇಶಕಿ ಶ್ರೀಮತಿ ಪೂರ್ಣಿಮಾ ಆನಿ ಹೆರ್ ಮಾನೆಸ್ತ್ ಉಪಸ್ಥಿತ್ ಆಸ್ತಲೆ.
ಎಂ.ಎ. ಕೊಂಕ್ಣಿ ಪದವೀಧರ್, ನೀನಾಸಂ (ರಿ), ಹೆಗ್ಗೋಡು, ಸಾಗರ, ಶಿವಮೊಗ್ಗ ಹಾಂಗಾ ಥಾವ್ನ್ ರಂಗ ಶಿಕ್ಷಣಾಂತ್ ಡಿಪ್ಲೋಮಾ ಶಿಕಪ್ ಜೊಡ್ಪಿ, ಕಾರವಾರ (ಉ.ಕ) ಜಿಲ್ಲ್ಯಾಚ್ಯಾ ಸಿದ್ದಾಪುರ ತಾಲುಕೆಚ್ಯಾ ಹಾರ್ಸಿಕಟ್ಟಾಚೊ ಗುರುಮೂರ್ತಿ ವಿ.ಎಸ್. ನಾಟಕ್, ಸಂಗೀತ್ ಆನಿ ಶಿಕ್ಷಣ್ ಶೆತಾಂನಿ ಎಕೀನ್ಪಣಾನ್ ವಾವುರ್ನ್ ಆಸಾ. ದಕ್ಷಿಣ್ ಭಾರತ್ ಹಿಂದಿ ಪ್ರಚಾರ್ ಸಭಾ, ಮದ್ರಾಸ್ ಹಾಣಿಂ ಚಲಯಿಲ್ಲ್ಯಾ ’ಪ್ರವೀಣ’ ’ವಿಶಾರದಾ’ ಆನಿ ’ಪ್ರವೇಷಿಕ’ ಪರಿಕ್ಷೆಂತ್ ಉತ್ತೀರ್ಣ್ ಜಾವ್ನ್, ಹಿಂದಿ ಭಾಶೆಂತ್ ಪ್ರವೀಣತಾ ತಾಣೆ ಜೋಡ್ನ್ ಘೆತ್ಲ್ಯಾ.
ಯಕ್ಷಗಾನ್ ಕಲಾ ಕ್ಷೇತ್ರಾಂತ್ ತರ್ಭೆತಿ ಜೊಡುನ್, ಜ್ಞಾನಪೀಠ್ ಪ್ರಶಸ್ತಿ ವಿಜೇತ್ ದೆ| ಶಿವರಾಂ ಕಾರಂತ, ನಾಟಕಿಸ್ತ್ – ನಿರ್ದೇಶಕ್ ಅಕ್ಷರ ಕೆ. ವಿ. ಆನಿ ಹೆರ್ ಜಾಯ್ತ್ಯಾ ಮಾಲ್ಘಡ್ಯಾಂ ಥಾವ್ನ್ ನಾಟಕ್, ಯಕ್ಷಗಾನ ಆನಿ ಸಂಗೀತಾಂತ್ ವೃತ್ತೆ ಅನ್ಭೊಗ್ ತಾಣೆ ಜೊಡ್ಲಾ. 1992 ಥಾವ್ನ್ ಹವ್ಯಾಸಿ ಯಕ್ಷಗಾನ್ ಕಲಾವಿದ್ ಜಾವ್ನ್ ನೆರೆ, ಕಲಾಸಂಘ, ಕೂಟ ಆನಿ ಹೆರ್ ಮೇಳಾಂನಿ ತಾಣೆ ವಾಂಟೊ ಘೆತ್ಲಾ. 2003 ಇಸ್ವೆಂತ್ ’ಮುಖವರ್ಣಿಕೆ ಮತ್ತು ವೇಷಭೂಷಣ ಕಾರ್ಯಾಗಾರ’ ಹಾಂತುಂ ಭಾಂಗ್ರಾ ಪದಕ್ ತಾಣೆ ಆಪ್ಣಾಯ್ಲಾಂ. ಕರ್ನಾಟಕ ಜಾನಪದ್ ಆನಿ ಯಕ್ಷಗಾನ್ ಅಕಾಡೆಮಿನ್ ಚಲಯಿಲ್ಲ್ಯಾ ’ಸುವರ್ಣ ಕರ್ನಾಟಕ ಜಾನಪದ ಉತ್ಸವ’ ಹಾಂತುಂಯ್ ತಾಣೆ ವಾಂಟೊ ಘೆತ್ಲಾ.
ರಂಗಾಯಣ ಮೈಸೂರ್ ಹಾಣಿಂ ಚಲಯಿಲ್ಲ್ಯಾ ಚಿಣ್ಣರ ಮೇಳ – ಮಕ್ಕಳ ರಂಗ ತರಬೇತಿ ಶಿಬಿರಾಂತ್ ಸಂಪನ್ಮೂಳ್ ವೆಕ್ತಿ ಜಾವ್ನ್, 2010 ಇಸ್ವೆಂತ್ ಚಲ್‌ಲ್ಲ್ಯಾ ವಿಶ್ವ ಕೊಂಕಣಿ ಸಮ್ಮೇಳನಾಂತ್ ಭುರ್ಗ್ಯಾಂಚ್ಯಾ ಕೊಂಕ್ಣಿ ಯಕ್ಷಗಾನಾಂತ್ ಪಯ್ಲೆಂ ಸ್ಥಾನ್ ತಾಣೆ ಆಪ್ಣಾಯ್ಲಾ. ನೀನಾಸಂ ಹಾಂತುಂ ವಿದ್ಯಾರ್ಥಿ ಜಾವ್ನಾಸ್ತಾನಾ – ಸೀತಾ ಸ್ವಯಂವರಂ, ಈ ಕೆಳಗಿನವರು, ನೆರಳಿರುಳು, ಭಾರತ ಯಾತ್ರೆ, ಹರಿಶ್ಚಂದ್ರ ಕಾವ್ಯ, ಶೇಕ್ಸ್‌ಪಿಯರ್ ನಾಟಕಾಂನಿ ನಟನ್ ಕೆಲಾಂ.
2012 – 2014 ಪರ್ಯಾಂತ್ ನೀನಾಸಂ ಹಾಂಗಾಸರ್ ಸಯ್ರೊ ಉಪನ್ಯಾಸಕ್ ಜಾವ್ನ್ ತಾಣೆ ಸೆವಾ ದಿಲ್ಯಾ. 2017 ಇಸ್ವೆಂತ್ ಕರ್ನಾಟಕಾಂತ್ಲ್ಯಾ ಎಮ್.ಎ. ಕೊಂಕ್ಣಿ ಶಿಕ್ಪಾಂತ್ ಪ್ರಥಮ್ ಸ್ಥಾನ್ ತಾಣೆ ಆಪ್ಣಾಯ್ಲಾಂ.
150 ನಾಚ್ ಪ್ರಕಾರ್, 40 ವ್ಹಾಜಂತ್ರಾಂ, ರಂಗ್ ಸಂಗೀತ್, ರಂಗ್ ವ್ಯಾಯಾಮ್, ಸ್ವರ್ ವ್ಯಾಯಾಮ್, ಥಿಯೇಟರ್ ಗೇಮ್ಸ್, ಫಿಂಗರ್ ಪ್ರಿಂಟ್ ಅನಾಲಿಸಿಸ್, ಕಳರಿ ಪಯಟ್ಟು, ಮಾರ್ಶಲ್ ಆರ್ಟ್, ನಾಚ್ ಸಂಯೋಜನ್, ಸಂಗೀತ್ ಸಂಯೋಜನ್, ಯಕ್ಷಗಾನ್ ಕೊಸ್ಟ್ಯೂಮ್, ಮೇಕಪ್, ಥರ್ಮೊಕೊಲ್ ವರ್ಕ್, ಥರ್ಮೊಫೋಮ್ ವರ್ಕ್, ಶಿವಣ್, ಮೇಕ್ ಅಪ್ ಆನಿ ಹೆರ್ ಜಾಯ್ತ್ಯಾ ವಿಶಯಾಂನಿ ತಾಕಾ ಕ್ಷಮತಾ ಆಸೊನ್, ಪ್ರಸ್ತುತ್ ಶುಭಂ ಕರೋತಿ ಮೈತ್ರೇಯಿ ಗುರುಕುಲಾಚೊ ಪ್ರಾಂಶುಪಾಲ್ ಜಾವ್ನ್ ತೋ ವಾವುರ್ನ್ ಆಸಾ. ಪ್ರಸ್ತುತ್ ಆವ್ದೆಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಹಾಂತುಂ ಸರ್ಕಾರಿ ಪ್ರತಿನಿಧಿ ಸಾಂದೊ ಜಾವ್ನ್ ಆಸ್ಚೊ ತೋ, ಗಗನ ಎಜ್ಯೂಕೇಶನಲ್ ಫೌಂಡೇಶನ್ ಹಾಚೊ ಸ್ಥಾಪಕ್ ಜಾವ್ನಾಸಾ.
