ಉಡಾಸಾಚಿ ಪಿಡಾ – ಡಿಮೆನ್ಶಿಯಾ

ಡಿಮೆನ್ಶಿಯಾ ಮ್ಹಳ್ಯಾರ್ ಉಗ್ಡಾಸಾಚೊ ವಿಸರ್. ರಾಷ್ಟ್ರೀಯ್ ಡಿಮೆನ್ಶಿಯಾ ಜಾಗ್ರಣೆಚೊ ಹಫ್ತೊ ಆಚರಣ್ –  ಸಪ್ಟೆಂಬರ್ ಅಟ್ರಾ ತಾರಿಕೆ ಥಾವ್ನ್ ಚೊವೀಸ್ ತಾರಿಕೆ ಮಧೆಂ ಯೆತಾ ತರ್, ಸಪ್ಟೆಂಬರ್ ಎಕ್ವೀಸ್ ತಾರಿಕೆರ್ ವಿಶ್ವ್ ಅಲ್ಜಿಮರ್ಸ್ ದೀಸ್ ಆಚರಣ್ ಕರ‍್ತಾತ್. ಆಲ್ಜಿಮರ್ಸ್ ಪಿಡಾ ಸುಮಾರ್ 50-70 ಪರ್ಸೆಂಟ್ ಡಿಮೆನ್ಶಿಯಾಕ್ ಕಾರಣ್ ಜಾತಾ. ಹಾಚ್ಯಾ ಪರಿಣಾಮಾವರ್ವಿಂ ಮತಿಆಘಾತ್, ಆರ್ ಮಾರ್ಚೆಂ, ಪಾರ್ಕಿನ್ಸನ್ ಅಸಲ್ಯೊ ಪಿಡಾ ಉದೆಂವ್ಚಿ ಸಾದ್ಯತಾ ಆಸಾ ಮ್ಹಣ್ ತಜ್ಞ್ ವಯ್ಜ್ ಸಾಂಗ್ತಾತ್.

ಆಲ್ಜಿಮರ್ಸ್ ಪಿಡಾ ಮ್ಹಳ್ಯಾರ್ ಮಾನಸಿಕ್ ದಬಾವಾವರ್ವಿಂ ಉಗ್ಡಾಸಾಚಿ ಸಕತ್ ನಾಸ್ ಜಾಂವ್ಚಿ ಪಿಡಾ. 1906 ಇಸ್ವೆಂತ್ ಜರ್ಮನಿಚಾ ಆಲೋಯ್ಸ್ ಆಲ್ಜಿಮರ್ಸ್ ಮ್ಹಳ್ಯಾ ಡೊಕ್ಟಾರಾನ್ ಹಿ ಪಿಡಾ ಸೊಧುನ್ ಕಾಡ್‌ಲ್ಲಿ. .ಆಲ್ಜಿಮರ್ಸ್ ಪಿಡಾ ಉಡಾಸ್ ಸಕ್ತೆಚೊ ನಾಸ್ ಆನಿಂ ಹ್ಯಾ ವರ್ವಿಂ ದಿಸ್ಪಡ್ತೆಂ ಮನ್ಶಾನ್ ಕರಿತ್ ಆಸ್ಲೆಲ್ಲ್ಯಾ ಕರಿಜೆ ಆಸ್ಲೆಲ್ಯಾ ವಾವ್ರ್ ಆನಿ ಕರ್ತುಬಾಂಚ್ಯಾ ವಿಸರಾವರ್ವಿಂ ತೊ ನಷ್ಟ್ ಕಷ್ಟಾಂಕ್ ಸಾಂಪ್ಡಾತಾ.

ಹಾಚೊ ಸುರ‍್ವೆಚೊ ಹಂತ್ ಉತ್ರೊನ್ ಮಧ್ಯಮ್ ಹಂತ್ ಸುಮಾರ್ ದೋನ್ ಥಾವ್ನ್ ಧಾ ವರ್ಸಾಂ ಪರ್ಯಾಂತ್ ಆಸೊಂಕ್ ಪುರೊ. ಹ್ಯಾ ಹಂತಾರ್ ತೊ ಆಪ್ಣಾಚಿಂ ಲ್ಹಾನ್-ಲ್ಹಾನ್ ಕಾಮಾಂ ಕರುಂಕ್ ಸಕ್ತಾ. ಪೂಣ್ ಸಂಕೀರ್ಣ್ ಕಾಮಾ ಕರುಂಕ್ ಕಷ್ಟಾತಾ. ಆದ್ಲಿ ಆನಿ ಪ್ರಸ್ತುತ್ ಘಡಿತಾಂ – ಗಜಾಲಿ ಮಿಸ್ಳೊನ್ ತೆ ಘುಸ್ಪೊಡಾಂತ್ ಶಿರ್ಕಾತಾತ್. ತೆ ತಾರೀಕ್, ದೀಸ್, ಮಹಿನೊ, ಒಳಕ್ ಪಾರ್ಕುಂಚ್ಯಾಂತ್ ಅಸಮರ್ಥ್ ಜಾತಾತ್.  ಖಾಂವ್ಚೆ – ಜೆಂವ್ಚೆ ವಿಶಿಂ,  ನಿತಳಾಯೆವಿಶಿಂ ಉದಾಸೀನ್ ಜಾತಾತ್.

ನಿಮಾಣೊ ಹಂತ್ ಸುಮಾರ್ ಏಕ್ ಥಾವ್ನ್ ತೀನ್-ಚಾರ್ ವರ್ಸಾಂ ಆಸ್ತಾ. ಹ್ಯಾ ಹಂತಾರ್ ಪಿಡೆಸ್ತ್ ಅಪ್ಲೆಂ ಖಾಣ್-ಜೆವಾಣ್ ಆಪುಣ್‌ಚ್ ಸೆಂವ್ಚ್ಚಾಕ್ ಸಕಾನಾ. . ಆಪ್ಲೊ ಉಗ್ಡಾಸ್ ತೀವ್ರ್ ಥರಾನ್ ಹೊಗ್ಡಾಯ್ತಾ. ಎಕಾಎಕಿ ವಳ್ಕೆಂಚಾಕ್,  ಖಾಸ್ ಕುಟ್ಮಾಂಚ್ಯಾಂಕ್ ಸಯ್ತ್ ವಳ್ಕುಂಚಿ ಸಕತ್ ಹೊಗ್ಡಾಯ್ತಾ. ಚೊವೀಸ್ ವರಾಂ ಸಾಂಗಾತಾ ಆಸ್ಲೆಲ್ಲ್ಯಾಂಕ್ ಎಕಾ ಸಕಾಳಿಂ ಉಟ್ತಾನಾ “ತುಂ ಕೋಣ್ ?” ಮ್ಹಣ್ ತೊ ವಿಚಾರ‍್ತಾ ! ಆಪ್ಲ್ಯಾ ಕುಡಿಚೊ ಕರ್ನ್ಯೊ ಕರ್ಚ್ಯಾಂತ್ ಆಪ್ಲೆಂ ನಿಯಂತ್ರಣ್ ಹೊಗ್ಡಾಯ್ತಾ.

ಆಲ್ಜಿಮರ್ಸ್ ಪ್ರಾಥಮಿಕ್ ಥಾವ್ನ್  ಹಂತ್ ಹಂತ್ ಜಾವ್ನ್  ಲಕ್ಶಣಾಂ ವಾಡೊನ್ ವೆಚಿ ಮತಿಚಿ ಪಿಡಾ ಜಾವ್ನಾಸಾ. ಹಿ ಸುರ‍್ವಾತೆರ್ ಗುಪಿತ್ ಜಾವ್ನ್ ಹಳ್ತಾರ್ ವಾಡೊನ್ ಪುಣ್ ಥಿರ್ ಜಾವ್ನ್ ಥೊಡ್ಯಾ ವರ್ಸಾಂನಿಂ ತೀವ್ರ್ ಜಾವ್ನ್ ವೆತಾ. ಹಾಚಿ ಸುರ‍್ವಾತ್ ಮದ್ಯಮ್ ಪ್ರಾಯೆರ್ ಜಾಲಿ ತರ್ ಹಾಚೊ ಜಬ್ಬೊರ್ ಪರಿಣಾಮ್ ಉಪ್ರಾಂತ್ಲ್ಯಾ ಉತರ್ ಪ್ರಾಯೆರ್ ಜಾತಾ.

ಹ್ಯಾ ಮಾರೆಕಾರ್ ಪಿಡೆವಿಶಿಂ ಮತಿಚ್ಯಾ ಪಿಡೆಚಿ ತಜ್ಞ್ ವಯ್ಜ್   ಪ್ರೊ| ಸುಪ್ರಿಯಾ ಹೆಗ್ಡೆ  ಬರಯ್ತಾ –

“ಡಿಮೇನ್ಶಿಯಾಚಿಂ ಪ್ರಾಥಮಿಕ್ ಲಕ್ಶಣಾಂ ವಿವಿಧ್ ಜಣಾಂಕ್ ವಿವಿಧ್ ರಿತಿರ್ ಆಸ್ತಾತ್. ಉಗ್ಡಾಸಾಚಿ ಸಕತ್ ನಾಸ್ ಜಾಂವ್ಚಿ,  ವಿಶೇಷ್ ಜಾವ್ನ್ ಪ್ರಸ್ಥುತ್ ಜಾಲ್ಲಿಂ ಹೆವ್ಶಿಲಿಂ ಘಡಿತಾಂ ತೊ ವಿಸ್ರಾತಾ. ಪೂಣ್ ಬೋವ್ ಆದ್ಲಿಂ ಘಡಿತಾಂ ತಾಕಾ ಉಗ್ಡಾಸಾಕ್ ಯೆತಾತ್. ಡಿಮೆನ್ಶಿಯಾ ಆಸ್ಲೆಲ್ಲ್ಯಾಂಕ್ ಸದಾಂಚಿ ಕಾಮಾಂ ಕರುಂಕ್ ವಿಸರ್ ಪಡ್ತಾ. ಹಾಕಾ ಅಪ್ರೇಶಿಯಾ ಮ್ಹಣ್ತಾತ್ . ಡಿವೆನ್ಶಿಯಾಂತ್ ವಳ್ವಳ್ಚೆ ಪಿಡೆಸ್ತ್ ಆಪ್ಲ್ಯಾ ಕುಡಿಚ್ಯಾ ನಿತಳಾಯೆವಿಶಿಂ … ನ್ಹಾಂವ್ಚೆವಿಶಿಂ … ನ್ಹೆಸಾಣ್ ನ್ಹೆಸ್ಚೆ ವಿಶಿಂ ವಿಸ್ರೊನ್ ತೆಂ ಕರುಂಕ್ ಕಷ್ಟಾತಾತ್. ಹ್ಯಾವರ್ವಿಂ ತಾಂಕಾ ಸ್ವತಂತ್ರ್ ಜಾವ್ನ್ ಆಪ್ಲಿಂ ಕಾಮಾಂ ಕರುಂಕ್ ಸಾದ್ಯ್ ನಾಸ್ತಾಂ ತೆ ಹೆರಾಂಚೆರ್ ಪಾತ್ಯೆವ್ನ್ ತಾಂಚಾ ಮಜತೆಕ್ ಆಶೆತಾತ್.”

ಮ್ಹಜಾ ಪ್ಪಪ್ಪಾಕ್ ಆನಿಂ ತಾಚಿ ಭಯ್ಣ್ ಮ್ಹಜಾ ಅಂಟಿಕ್ ಆತ್ತಾತ್ತಾಂ ಜೆವ್-ಲ್ಲೆಂ ಖೆಲ್ಲೆಂ ಪಿಯೆಲ್ಲೆಂ ಉಗ್ಡಾಸಾಕ್ ಯೇನಾತ್‌ಲ್ಲೆಂ. ( ಅಸಲೆ ಪಿಡೆಸ್ತ್ ವಕ್ತಾಂ ಘೆತ್‌ಲ್ಲೆ ಉಗ್ಡಾಸ್ ನಾಸ್ತಾಂ ಪರತ್ ಪರತ್ ಘೆಂವ್ಚೆಂ ಆಸಾ. ಹ್ಯಾವಿಶಿಂ ಘರ್ಚ್ಯಾಂನಿ ಜಾಗ್ರುತ್ ಆಸ್ಚೆಂ ಬರೆಂ.) ಪೂಣ್ ಸಾಠ್ ಸತ್ತರ್ ವರ್ಸಾಂ ಆದ್ಲೆಂ ಇಸ್ಕೊಲಾಚೆ ವಿಷಯ್, ತವಳ್ಚಿಂ ಪೊಕ್ರಿಪಣಾಂ, ಆವಯ್ ಬಾಪಾಯ್ನ್ ಮಾರ್‌ಲ್ಲೆಂ, ಪೆರಾಂ ಆಂಬೆಂ ಚೋರ್ನ್ ಖೆಲ್ಲೆ ವಿಶಿಂ ಸಾರ್ಕೆಂ ವಿವರುನ್ ಆಮ್ಕಾಂ ಹಾಸಯ್ತಾಲಿಂ.

ಅಸಲೆ ಪಿಡೆಸ್ತ್ ಗರ್ಮಿ ದಿಸಾಂನಿಂ ದಾಟ್ ವಸ್ತುರಾಂ ಎಕಾಪ್ರಾಸ್ ಚಡ್ ನ್ಹೆಸುನ್ ಆಸ್ಚೆಂ , ವಿಚಾರ್ಲ್ಯಾಂಕ್ ಕಿತೆಂಯೀ ವಸ್ತು ಪಯ್ಶೆ ದೀವ್ನ್ ಸೊಡ್ಚೆಂ , ಮುಕ್ಲೆಂ ಪರಿಣಾಮ್ ಅರ್ಥ್ ಕರುನ್ ಘೆನಾಸ್ತಾಂ ಆಸ್ತಿಚಾ ದಾಸ್ತಾವೇಜಾಂಕ್ ದಸ್ಕತ್ ಘಾಲ್ನ್ ದಿಂವ್ಚೆಂ –  ಹೆಂ ಸರ್ವ್ ಕರ್ನ್ ಆಪುಣ್ ಕಷ್ಟಾಂಕ್ ಸಾಂಪಡ್ತಾತ್. ಅಸಲ್ಯಾಚ್ಚ್ ಕಾರಣಾಕ್ ಲಾಗೊನ್ ಆಸ್ತಿಚಾ ದಸ್ತಾವೆಜಾಚೆರ್ ದಸ್ಕತ್ ಘಾಲಿತ್ ಮ್ಙಳ್ಳ್ಯಾ ದುಬಾವೆರ್ ಆಲ್ಜಿಮರ್ಸಾಂತ್ ವೊಳ್ವಳೊನ್ ಆಸ್ಚಾ  ಶ್ರೀಮಾನ್ ಜೋರ್ಜ್ ಫೆರ್ನಾಂಡಿಸಾಚಿ ಪತಿಣ್ ಆನಿಂ ಭಾವಾಂ ಮದೆಂ ವ್ಯಾಜ್ಯ್ ಚಲೊನ್ ಆಸ್‌ಲ್ಲೊ.

ಥೊಡ್ಯಾ ಸಂಧರ್ಭಾನಿಂ ಆಮಿ ಉಲಯ್ತಾನಾ ಥೊಡೆ ಸಭ್ಧ್ ಮೆಳೊಂಕ್ ಕಷ್ಟಾತಾಂವ್. ಪೂಣ್ ಡಿಮೆನ್ಶಿಯಾಕ್ ಒಳಗ್ ಜಾಲ್ಲೊ ಬೋವ್ ಸರಳ್ ಸಾಮಾನ್ಯ್ ಸಬ್ದ್‌ಚ್ ವಿಸ್ರಾತಾ. ಆನಿಂ ಉತ್ರಾಂಮದೆಂ ಸಂಬಂದ್ ನಾತ್‌ಲ್ಲೆ ಸಬ್ದ್ , ವಿಷಯ್ ವಿಂಚುನ್, ಸಂಬಂದ್ ನಾತ್ಲೆಲಿಂ ಉತ್ರಾಂ ಉಲಯ್ತಾ.  ಹ್ಯಾವರ್ವಿಂ ತಾಂಚಿಂ ಉತ್ರಾಂ ತಾಣಿಂ ಲಿಖ್‌ಲ್ಲೆಂ ಸಮ್ಜೊಂಕ್ ಕಷ್ಟ್ ಮಾರ್ತಾತ್.

ಕೊಂಕ್ಣೆಚೊ ಮಹಾನ್ ಸಾಹಿತಿ, ಕೊಂಕ್ಣೆಂತ್ಲಿ ಮಹಾನ್ ಕಾದಂಬರಿ ಮ್ಹಣ್ ಸಾಂಗ್ಯೆತ್ ತಸಲಿ ‘ವೇಳ್-ಘಡಿ ಲಿಖ್ಲೆಲೊ ಶ್ರೀಮಾನ್ ಎ.ಟಿ.ಲೋಬೊ ತಾಚ್ಯಾ ಉತರ್ ಪ್ರಾಯೆರ್ ಹ್ಯಾಚ್ ಪಿಡೆನ್ ವಳ್ವಳೊನ್ ಆಸ್ಲೊ. ತೊ ತಾಚ್ಯಾ ತರ್ನಾಟ್ಯಾ ಪ್ರಾಯೆರ್ ರಾತಿಂಚೆಂ ಲೈಟಾಚಾ ಖಂಬ್ಯಾಮುಳಿಂ ಬಸೊನ್ ಬರಯ್ತಾಲೊ ಖಂಯ್ . ಆನಿಂ ತಾಕಾ ಆಲ್ಜಿಮರ್ಸ್ ಪಿಡೆನ್ ಗ್ರಾಸಿಲ್ಲ್ಯಾ ವೆಳಾರ್ ತೊ ಲೈಟೊ ಖಂಬ್ಯಾಮುಳಿಂ ಉಬೊ ರಾವುನ್  ಆಪ್ಲ್ಯಾಯಿತ್ಲ್ಯಾಕ್  ಉಲವ್ನ್  ಆಸ್ತಾಲೊ ಖಂಯ್!

ಆಲ್ಜಿಮರ್ಸ್ ಪಿಡೆಸ್ತ್ ರಾತ್‌ಗೀ ದೀಸ್‍ಗೀ ಮ್ಹಣ್  ಸಮ್ಜೊಂಕ್ ಘುಸ್ಪೊಡ್ತಾತ್. ಅಸಲೆ ಆಪ್ಣಾಕ್ ಆಪ್ಲ್ಯಾ ಚಟುವಟಿಕೆಂತ್ ನಿಯಂತ್ರಣ್ ಚುಕ್ಲಾಂ ಮ್ಹಣ್ ಕಳ್ತಾನಾಂ ತೆ ಮನೋದಬಾವ್ ಖಿನ್ನಾತಾ ಆಳ್ಸಾಯೆನ್ ಅವಿಶ್ರಾಂತೆನ್ ನಿರ್ಲೆಪ್ತ್ ಜಾತಾತ್. ಡಿಮೆನ್ಶಿಯಾಚೊ ಆಪಾಪ್ಲಿ ವಸ್ತು ಅಸಹಜ್ ಜಾಗ್ಯಾಂನಿಂ ದವರ್ತಾತ್ ಆನಿಂ ಉಪ್ರಾಂತ್ ಹೆರ್ ಕಡೆನ್ ಸೊದುನ್ ಆಸ್ತಾತ್. ದಾಕ್ಲ್ಯಾಕ್ ಆಪ್ಲೆಂ ವೋಚ್ ಫ್ರಿಜ್ಜಾಂತ್ ದವರ್ನ್ ಸಗ್ಳ್ಯಾನ್  ಸೊಧುನ್ ಆಸ್ತಾತ್.

ಆಪ್ಲಿ ವಸ್ತು ಮೆಳಾನಾತ್ಲೆಲ್ಲ್ಯಾವೆಳಾ ಹೆರಾಂಚೆರ್ ಚೊರ್ಲಾಂ ಮ್ಹಣ್ ದುಬಾವ್ ಕರ್ಚೊ. ಕುಟ್ಮಾಂ ಸಾಂದ್ಯಾಂಚೆರ್ ಸದಾಂ ದುಬಾವೊನ್ ಆಸೊನ್ ಖಿನ್ನತೆಂತ್ ಆಸ್ಚೆಂ, ಕಾರಾಣ್ ನಾಸ್ತಾಂ ಭಾವಾನಾತ್ಮಕ್ ಜಾಂವ್ಚೆಂ, ತವಳ್ ತವಳ್ ಮುಕಾರ್ ರಾಗಾನ್ ಪುರ್ಪುರೊನ್ ಆಸ್ಚೆಂ. ತಾಂಚ್ಯಾ ಹವ್ಯಾಸಾನಿಂ ನಿರ್ಲಕ್ಶ್ . ಚಡ್ ಆನಿಂ ಚಡ್ ನಿದೆಗ್ ಒಳಗ್ ಜಾಂವ್ಚೆಂ. ಹ್ಯಾಸರ್ವ್ ವಿಶಯಾಂನಿಂ ತೆ ವಳ್ವಳೊನ್ ಆಸ್ತಾತ್.

ಆಪ್ಣಾಕ್ ಬರೊಚ್ಚ್ ಪರಿಚಿತ್ ಜಾಗೊ ಆಪ್ಲೆಂ ಘರ್ ರಸ್ತೊ ತೆ ವಿಸರ್ತಾತ್ ಆನಿಂ ತೆ ಖಂಯ್ ಪಾವ್ಲ್ಯಾತ್ ಮ್ಹಳ್ಳೆಂ ವಿಸರ್ನ್ ಅಪರಿಚಿತ್ ಜಾಗ್ಯಾರ್ ಎಕ್ಸುರೊ ಜಾವ್ನ್ ಕಷ್ಟಾಂಕ್ ಸಾಂಪಡ್ಲೆಲೆ ಆಸಾತ್. ದಿವ್ಯಾ ಶ್ರೀಧರನ್ ಮ್ಹಳ್ಳಿ ಲೇಖಕಿ ಆಪ್ಲ್ಯಾ ಲೇಖನಾಂತ್ ಆಪ್ಲ್ಯಾ 80 ವರ್ಸಾಂ ಪ್ರಾಯೆಚಾ ಆಲಿಜಿಮರ್ಸ್ ಪಿಡೆಚಾ ಬಾಪಯ್ ವಿಶಿಂ ಬರವ್ನ್   … ತೊ ಘರಾ ಬಾಯ್ರ್ ವಚೊನ್ ಸತ್ರಾ ಘಂಟೆ ನಪಂಯ್ಚ್ ಜಾಲ್ಲ್ಯಾ ವಿಶಿಂ ತಿಳ್ಸಿತಾ . ಭಾರಾತಾಚಾ 3.7 ಮಿಲಿಯನ್ ಆಲಿಜಿಮರ್ಸ್ ಪಿಡೆಂತ್ ವಳ್ವಳ್ಚಾ ಪಿಡೆಸ್ತಾಂಪಯ್ಕಿ ಆಪ್ಲೊ ಬಾಪೊಯ್ ಎಕ್ಲೊ ಮ್ಹಣ್.ತಿ ಮ್ಹಣ್ತಾಲಿ.

ಹಾಂವ್ ಹೆಂ ಲೇಖನ್ ಬರಯ್ತಾಂ ಮ್ಹಾಕಾ ಸುಮಾರ್ ಚಾಳಿಸ್ ಪನ್ನಾಸ್ ವರ್ಸಾಂ ಆದಿಂ ಹಾಂವ್ ಹುಬ್ಳಿಂತ್ ನಳ್ಯಾಂ ವ್ಹೆವಾರ್ ಕರುನ್ ಆಸ್ತಾಂ ಥಂಯ್ ತವಳ್ ತವಳ್ ಏಕ್ ಪ್ರಾಯೆಸ್ತ್ ಜೊಡೆಂ ಮ್ಹಾಕಾ ಪಳೆಂವ್ಕ್ ಮೆಳ್ತಾಲೆಂ. ಪತಿಣ್ ದಾದ್ಲ್ಯಾಕ್ ಮುತೊಂಕ್ ಸಯ್ತ್ ಕುಮೊಕ್  ಕರ್ತಾಲಿ. ಹೆಂ ಪಳೆವ್ನ್ ತವಳ್ ಹಾಂವ್ ಮ್ಹಜೆಯಿತ್ಲ್ಯಾಕ್ ಹಾಸ್ತಾಲೊಂ. ಪೂಣ್ ಆತಾಂ ತಾಕಾ ಗ್ರಾಸಿಲ್ಲ್ಯಾ ಆಲ್ಜಿಮರ್ಸ್ ಪಿಡೆಚೆಂ ಪರಿಣಾಮ್ ಚಿಂತ್ತಾಸ್ತಾನಾಂ ಮ್ಹಜಾ ಕಾಳ್ಜಾ ಕೊನ್ಶಾಂತ್ ಭೆಂ ಧೊಸುಂಕ್ ಲಾಗ್ತಾ! ಮ್ಹಾಕಾ ಮಾಹೆತ್ ಆಸ್ಚ್ಯಾ ಪರ್ಮಾಣೆಂ ಡಿಮೆನ್ಶಿಯಾಕ್ ವೊಕಾತ್ ನಾಂ!

ಫಕತ್ ಥೈರಾಯಿಡ್ ಉಪದ್ರ್  … ಶಿರಾಂ ಉಪದ್ರ್  … ಫೌಶ್ಟಿಕ್ ಆಹಾರ್ ಉಣೆಂ ಜಾವ್ನ್ ಜಾಂವ್ಚೆ ಸಮಸ್ಯೆ ಹೆಂಸರ್ವ್ ಪಯಿಲ್ಲೆಂಚ್ಚ್ ಸೊಧುನ್  ಕಾಡುನ್ ವೆಳಾರ್ ಚಿಕಿತ್ಸಾ ಕೆಲಿತರ್ ಡಿಮೆನ್ಶಿಯಾಚಿ ಸುರ್ವಾತ್ ಆನಿ ವಾಡಾವಳ್ ಥೊಡ್ಯಾ ಮಟ್ಟಾಕ್ ಆಡಾವ್ಯೆತ್. ನಿದೆ ಉಪದ್ರ್, ದುಬಾವ್ ಪ್ರವೃತ್ತಿ, ಎಕಾಣೆ ರಾಗ್, ಉಡಾಸಾ ಸಕ್ತೆಚೊ ನಾಸ್ ಹ್ಯಾ ಸರ್ವಾಕ್ ಥೊಡ್ಯಾ ವೊಕ್ತಾಂನಿಂ ನಿಯಂತ್ರಣ್ ಕರುಂಕ್ ಪ್ರಯತ್ನ್ ಕರ್ಯೆತ್. .ತ್ಯಾ ಖಾತಿರ್ ವೆಳಾರ್ ಶಿರಾಂಚ್ಯಾ ತಶೆಂ ಮನೋರೋಗ್ ತಜ್ಞ್ ದಾಕ್ತೆರಾಂಕ್ ಭೆಟ್ಚೆಂ ಗರ್ಜೆಚೆಂ ಜಾವ್ನಾಸಾ.

ಡಿಮೆನ್ಶಿಯಾ ತಶೆಂ ಆಲ್ಜಿಮರ್ಸ್ ಪಿಡೆಸ್ತಾಂಕ್ ಚಡ್ ಆನಿ ಚಡ್ ಮೋಗ್ ದಾಕಂವ್ಚೊ , ತಾಂಕಾ ಆಪಡ್ನ್ ಜಾಗೊವ್ನ್ ಆಸ್ಚೆಂ , ಲ್ಹಾಲ್ಹಾನ್ ಸವಾಲಾಂ ಘಾಲುನ್ ತಾಂಚಾ ಜಾಪಿಕ್ ಸ್ಪಂದನ್ ದೀವ್ನ್ ಆಸ್ಚೆಂ, ಆದ್ಲ್ಯಾ ಘಡಿತಾಂಚೊ ಉಗ್ಡಾಸ್ ಹಾಡ್ಚೊ, ತಾಂಕಾಂ ಹಾಸ್ಯಾಲಾರಾಂನಿ ಹಾಸೊವ್ನ್ ಸಂತೊಸಾಂವ್ಚೆಂ, ತಾಂಚ್ಯಾ ಚಟುವಟಿಕೆಂ ಥಂಯ್ ಚಡ್ ಆನಿಂ ಚಡ್ ಗುಮಾನ್ ದೀವ್ನ್ ತಾಕಾ ಮೊಗಾನ್ ಸಹಕರ್ಸುನ್ ಆಸ್ಚೆಂ … ಹೆಂ ಸರ್ವ್ ಅಸಲ್ಯಾ ಪಿಡೆಸ್ತಾಂಕ್ ಬೋವ್ ಗರ್ಜೆಚೆಂ ಜಾವ್ನಾಸಾ.

ಮನ್ಶಾಚ್ಯಾ ಮರಣಾಕ್ ಕಾರಣ್ ಜಾಂವ್ಚಾ ಏಯಿಡ್ಸ್, ಕ್ಯಾನ್ಸರಾ ತಸ್ಲ್ಯಾ ಒಕಾತ್ ನಾತ್ಲೆಲ್ಯಾ  ಪಿಡೆವಿಶಿಂ ಆಯ್ಚೊ ಸಂಸಾರ್ ಚಿಂತೆಸ್ತ್ ಆಸಾ. ಪೂಣ್ ಜೀವಂತ್ ಆಸೊನ್ ಮರಣ್ ಪಾವ್ಲೆಲ್ಯಾಪರಿಂ ವಳ್ವಳೊಂಕ್ ಕಾರಣ್ ಕರ್ಚ್ಯಾ ಆಲ್ಜಿಮರ್ಸ್ ಪಿಡೆಕ್ ವೊಕತ್ ನಾಂ ಮ್ಹಳ್ಳ್ಯಾವಿಶಿಂ ಬೆಫಿಕೆರೆನ್ ಆಸಾ.

ತ್ಯಾದೆಕುನ್ ಹ್ಯಾ ಮಾರೆಕಾರ್ ಪಿಡೆಕ್ ವೆಗಿಂಚ್ಚ್ ವೊಕಾತ್ ಸೊದುನ್ ಕಾಡುನ್,  ಪ್ರಾಯೆಸ್ತ್ ಪಿಡೆಸ್ತ್ ಹ್ಯಾ ಪಿಡೆಥಾವ್ನ್ ನಿವಾರುಂದಿತ್ ಮ್ಹಣ್ ಮಾಗ್ಯಾಂ.

► ರೋನ್ ರೋಚ್ ಕಾಸ್ಸಿಯಾ