ಎಂಸಿಸಿ ಬ್ಯಾಂಕಾಚ್ಯಾ ಶತಮಾನೋತ್ತರ್ ದಶಮಾನೋತ್ಸವ್ ಆಚರಣ್ ಸಂದರ್ಭಿ ಎಂಸಿಸಿ ಬ್ಯಾಂಕಾಚ್ಯಾ ಬಜ್ಪೆ ಶಾಖ್ಯಾಚಿ ಗ್ರಾಹಕ್ ಸಂಪರ್ಕ್ ಸಭಾ, ಆಯ್ತಾರಾ, ಸಪ್ತೆಂಬರ್ 11 ತಾರಿಕೆರ್ ಬಜ್ಪೆಚ್ಯಾ ಸಾಂ ಜುಜೆ ಇಗರ್ಜೆಚ್ಯಾ ಸಾಲಾಂತ್ ಮಾಂಡುನ್ ಹಾಡ್‌ಲ್ಲಿ.
ಎಂ.ಸಿ.ಸಿ. ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊನ್ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಘೆತ್‌ಲ್ಲೆಂ.
ಬಜ್ಪೆ ಸಾಂ. ಜುಜೆ ಇಗರ್ಜೆಚೊ ವಿಗಾರ್, ಮಾನಾಧಿಕ್ ಬಾಪ್ ಡಾ| ರೊನಾಲ್ಡ್ ಕುಟಿನ್ಹಾ ಹಾಣಿಂ ಸಬೆಚೆಂ ಉದ್ಘಾಟನ್ ಕರ್ನ್, ಕಠಿಣ್ ಪರಿಶ್ರಮ್ ಆನಿ ಪಾತ್ಯೆಣಿ ದವರ್ನ್ ಸಮಾಜೆಕ್ 110 ವರ್ಸಾಂಚಿ ಸಮರ್ಪಿತ್ ಸೆವಾ ದಿಲ್ಲ್ಯಾ ಬ್ಯಾಂಕಾಚ್ಯಾ ಆಡಳ್ತ್ಯಾ ಸಮಿತಿ, ಸಿಬ್ಬಂದಿ ಆನಿ ಗ್ರಾಹಕಾಂಕ್ ಶಾಬಾಸ್ಕಿ ಪಾಠಯ್ಲಿ. ಬದ್ಲಾವಣ್ ಕೆದಳಾಯೀ ಸವಲಾಂನಿ ಭರ್ಲೆಲೆ ಜಾವ್ನಾಸ್ತಾಂ, ತೆಂ ಸರ್ವ್ ಫುಡ್ ಕರ್ನ್ ಮುಖಾರ್ ವಚುಂಕ್ ಅಮಿಂ ಕೆದ್ನಾಯೀ ತಯಾರ್ ಅಸುಂಕ್ ಜಾಯ್. ಬ್ಯಾಂಕಾಚಾ ಆಡಳ್ತ್ಯಾ ಸಮಿತಿ, ಸಿಬ್ಬಂದಿ ಆನಿ ಗ್ರಾಹಕಾಂ ಮಧ್ಲೊ ಸಂಬಂಧ್ ತೀನ್ ಚಕ್ರಾಚ್ಯಾ ವಾಹನಾ ಪರಿಂ, ಜರ್ ಹ್ಯಾ ವಾಹನಾಚೆಂ ಏಕ್ ಚಕ್ರ್ ಪಾಡ್ ಜಾಯ್ತ್ ತರ್ ತೆಂ ವಾಹನ್ ಮುಖಾರ್ ವಚಾನಾ, ಕಿತ್ಯಾಕ್ ತೀನಿಯೀ ಚಕ್ರಾಂ ಮಧೆಂ ಸಮನ್ವಯ್ ಆನಿ ಸಮಾನತೆಚೆಂ ಗರ್ಜ್ ಅಸಾ. ತಶೆಂಚ್ ಬ್ಯಾಂಕಾಚ್ಯಾ ವಾವ್ರಾಂತ್‌ಯೀ, ಬ್ಯಾಂಕಾಚೆ ಆಡಳ್ತ್ಯಾ ಸಮಿತಿ, ಸಿಬ್ಬಂದಿ ಆನಿ ಗ್ರಾಹಕಾಂ ಮಧೆಂ ಸಮನ್ವತೆಚಿ ಅವಶ್ಯಕತಾ ಅಸಾ. ಆಮಿಂ ಸರ್ವಾಂನಿ ಆಮ್ಚೆಂ ಖಾತಿರ್, ಆಮ್ಚ್ಯಾ ಭುರ್ಗ್ಯಾಂ ಖಾತಿರ್ ಆನಿ ಸಮಾಜೆ ಖಾತಿರ್ ಉರವ್ಣಿಂ ಕರಿಜಾಯ್. ಅತಾಂಚೆಂ ಗ್ರಾಹಕ್ ಬ್ಯಾಂಕಾಂಚ್ಯಾ ಸಿಬ್ಬಂದಿ ಥಾವ್ನ್ ತ್ವರಿತ್, ನಿಖರ್ ಆನಿ ಗ್ರಾಹಕ್ ಸ್ನೇಹಿ ಸೇವಾ ಅಪೇಕ್ಷಿತಾ, ಹೆಂ ಆಮಿಂ ಸಮ್ಜೊವ್ನ್ ತ್ಯಾ ಪರಿಂ ಸ್ಪಂದನ್ ಕರಿಜಾಯ್ ಮ್ಹಣೊನ್ ಉಲೊ ದಿಲೊ.
ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೋನ್ ಅಪ್ಲ್ಯಾ ಅಧ್ಯಕ್ಷೀಯ್ ಭಾಷಣಾಂತ್ ಗ್ರಾಹಕಾಂಚೆ ಸಮಸ್ಯೆ ಸಮ್ಜಂಕ್ ಆನಿ ತ್ಯಾ ಸಮಸ್ಯಾಂಕ್ ಪರಿಹಾರ್ ದಿಂವ್ಚ್ಯಾ ಉದ್ದೇಶಾನ್ ಗ್ರಾಹಕ್ ಸಂಪರ್ಕ್ ಸಭಾ ಅಸಾ ಕೆಲ್ಯಾ, ಬ್ಯಾಂಕಾಚೆಂ ಗ್ರಾಹಕ್ ಮ್ಹಸ್ತ್ ಭುದ್ವಂತ್ ಅಸಾತ್ ಆನಿ ಆಮ್ಚೆಂ ಬ್ಯಾಂಕ್ ತಾಂಚ್ಯಾ ಸರ್ವ್ ಗರ್ಜಾಂಕ್ ಪಾವೊಂಕ್ ಸದಾಂಚ್ ತಯಾರ್ ಅಸಾ ಆನಿ ಹ್ಯಾ ಖಾತಿರ್ ಮ್ಹಸ್ತ್ ವಾವ್ರ್ ಕರ್ತಾ. ಬ್ಯಾಂಕಾನ್ 2022 ವರ್ಸಾಂತ್ 8.27 ಕೊರೊಡ್ ನಿವ್ವಳ್ ಲಾಭ್ ಅಪ್ಣಾಯ್ಲಾಂ, ತಶೆಂಚ್ ಎನ್.ಪಿ.ಎ ಪ್ರಮಾಣ್ 1.60% ಕ್ ಪಾವ್ಲಾಂ ಮ್ಹಣ್ ತಾಣೆಂ ಸಾಂಗ್ಲೆಂ. ಬ್ಯಾಂಕಾಚ್ಯಾ ಗ್ರಾಹಕಾಂಕ್ ಉತ್ತೀಮ್ ಸೆವಾ ದಿಂವ್ಚ್ಯಾ ಉದ್ದೇಶಾನ್, ಬ್ಯಾಂಕಾಚ್ಯಾ ಸಿಬ್ಬಂದಿಕ್, ಬ್ಯಾಂಕಾಂತ್ ತವಳ್ ತವಳ್ ಸೂಕ್ತ್ ತರಬೇತಿ ದೀವ್ನ್‌ಚ್ ಅಸಾಂವ್, ಸರ್ವ್ ಗ್ರಾಹಕಾಂನಿ ತಾಂಚ್ಯಾ ಕುಟ್ಮಾಂಚ್ಯಾ ಸಾಂದ್ಯಾಂಚಿ ತಶೆಂಚ್ ತಾಂಚ್ಯಾ ಹಿತೈಷಿಂಚಿ ಬ್ಯಾಂಕ್ ಅಕೌಂಟ್ಸ್ ಎಂಸಿಸಿ ಬ್ಯಾಂಕಾಂತ್ ಕರುಂಕ್ ಉತ್ತೇಜನ್ ಕರ್ನ್ ಬ್ಯಾಂಕಾಂಕ್ ಫುರ್ತೊ ಸಹಾಕಾರ್ ದೀಂವ್ಕ್ ಉಲೊ ದಿಲೊ. ಎದೊಳ್ ಮ್ಹಣಾಸರ್ ಬ್ಯಾಂಕಾಂಕ್ ಭರ್ಪೂರ್ ಸಹಕಾರ್ ದಿಲ್ಲ್ಯಾ ಮಾಲ್ಘಡ್ಯಾಂ ಗ್ರಾಹಕಾಂಚೊ ಉಪ್ಕಾರ್ ಬಾವುಡ್ಲೊ. ಅಮ್ಚ್ಯಾ ಬ್ಯಾಂಕಾಂತ್ ದವರ್ಚ್ಯಾ ಠೇವಣಿಂಕ್ ಆರ್‌ಬಿಐಚಿ ಡಿ.ಐ.ಸಿ.ಜಿ.ಸಿ. ಗ್ಯಾರಂಟಿ ಅಸಾ ಮ್ಹಣೊನ್ ತಾಣೆಂ ಮುಂದರುನ್ ಮ್ಹಳೆಂ.
ಮಳವೂರು ಗ್ರಾಮ ಪಂಚಾಯತಿಚಿ ಅದ್ಲಿ ಅಧ್ಯಕ್ಷಿಣ್ ನಿರ್ಮಲ ಚಂದ್ರಶೇಖರ್, ಉದ್ಯಮಿ ತೆಲ್ಮಾ ಆರ್. ಫೆರ್ನಾಂಡಿಸ್ ಗೌರವಾನ್ಮಿತ್ ಸಯ್ರೆ ಜಾವ್ನ್ ಹಾಜರ್ ಅಸ್‌ಲ್ಲಿಂ.
ಸಪ್ತೆಂಬರ್ ಮಹಿನ್ಯಾಂತ್ ಅಪ್ಲೊ ಜಲ್ಮಾ ದಿವಸ್ ಆಚರಣ್ ಕೆಲ್ಲ್ಯಾ ಗ್ರಾಹಾಕಾಂಕ್ ಹ್ಯಾ ವೆಳಿಂ ಮ್ಹಾನ್ ಕೆಲೊ. ಮಾಲ್ಗಡ್ಯಾ ಗ್ರಾಹಕಾಂಕ್ ಶಾಲು ಪ್ರಾಂಗ್ರುನ್, ಪುಲಾಂಚೊ ತುರೊ ದೀವ್ನ್ ಅಭಿನಂದನ್ ಪಾಠಯ್ಲೆಂ. ಸಿ.ಎ. ಪರೀಕ್ಷೆಂತ್ ಅಪ್ಲ್ಯಾ ಪಯ್ಲ್ಯಾ ಪ್ರಯತನಾಂತ್‌ಚ್ ಉತ್ತಿರ್ಣ್ ಜಾಲ್ಲ್ಯಾ ಶರ್ಲಿ ಮಿಸ್ಕಿತ್, ಮಹಿಳಾ ಉದ್ಯಮಿ ಹೆಲೆನ್ ರೀಟಾ ಡಿಸಿಲ್ವಾ, ಸಂಗೀತ ಕ್ಷೇತ್ರಾಂತ್ ವಿಶಿಷ್ಠ್ ಸಾಧನ್ ಕೆಲ್ಲ್ಯಾ ಸೊನಾಲಿ ನೊರೊನ್ಹಾ, ಜಾನ್ಸಿ ಫೆರ್ನಾಂಡಿಸ್ ಅನಿ ಮೆಲೋನಾ ಸಲ್ಡಾನಾ ಹಾಂಕಾ ಸನ್ಮಾನ್ ಕೆಲೊ.
ಸಲಹಾಂ ಸೂಚನಾಂ ದಿಂವ್ಚ್ಯಾ ಖಾತಿರ್ ತಶೆಂಚ್ ಗ್ರಾಹಕಾಂಚೆ ಸಮಸ್ಯೆ ಸಮ್ಜಂವ್ಚ್ಯಾ ಖಾತಿರ್ ವಿಚಾರ್ ವಿನಿಮಯ್ ಅಸಾ ಕೆಲೊ. ಗ್ರಾಹಕಾಂನಿ ಹ್ಯಾ ವಿಚಾರ್ ವಿನಿಮಯಾಂತ್ ಸಕ್ರೀಯ್ ರೀತಿನ್ ಭಾಗ್ ಘೆವ್ನ್ ಅಪ್ಲಿಂ ಅಮೂಲ್ಯ್ ಸಲಹಾಂ – ಸೂಚನಾಂ ಸಭೆಕ್ ದಿಲಿಂ. ಅಧ್ಯಕ್ಷಾನ್ ಗ್ರಾಹಕಾಂಚ್ಯಾ ಸರ್ವ್ ಸವಲಾಂಕ್ ಉತ್ತಮ್ ರೀತಿನ್ ಸ್ಪಂದನ್ ಕೆಲೆಂ.
ಬ್ಯಾಂಕಾಚೊ ಉಪಾಧ್ಯಕ್ಷ್ ಜೆರಾಲ್ಡ್ ಜೂಡ್ ಡಿಸಿಲ್ವಾ, ಬ್ಯಾಂಕಾಚೆಂ ನಿರ್ದೇಶಕ್, ಅನಿಲ್ ಪತ್ರಾವೊ, ಮಾರ್ಸೆಲ್ ಎಂ. ಡಿಸೋಜ, ಐರಿನ್ ರೆಬೆಲ್ಲೊ, ವೃತ್ತಿಪರ್ ನಿರ್ದೇಶಕ್, ಸುಶಾಂತ್ ಸಿ. ಎ. ಸಲ್ಡಾನ್ಹಾ, ವ್ಯವಸ್ಥಾಪನ್ ಸಮಿತಿಚೆ ಸಾಂದೆ, ಆಲ್ವಿನ್ ಪಿ. ಮೊಂತೇರೊ, ಫೆಲಿಕ್ಸ್ ಡಿಕ್ರೂಜ್, ಶರ್ಮಿಳಾ ಡಯನ ಮಿನೆಜಸ್ ಹಾಜರ್ ಅಸ್‌ಲ್ಲಿಂ.
ಮಹಾಪ್ರಬಂಧಕ್ ಸುನಿಲ್ ಮಿನೆಜಸಾನ್ ಗ್ರಾಹಕ್ ಸಂಪರ್ಕ್ ಸಭೆಚೊ ಮಹತ್ವ್ ಸಭೆಕ್ ತಿಳ್ಸಿಲೊ. ಬಜ್ಪೆ ಶಾಖ್ಯಾಚೊ ನಿರ್ದೇಶಕ್ ಡೇವಿಡ್ ಡಿಸೋಜಾನ್ ಯೆವ್ಕಾರ್ ಮಾಗ್ಲೊ. ಶಾಖ್ಯಾಚೊ ವ್ಯವಸ್ಥಾಪಕ್ ಕ್ಲಿಪರ್ಡ್ ಡಿಕೋಸ್ತಾನ್ ಉಪ್ಕಾರ್ ಬಾವುಡ್ಲೊ. ವಯೋಲ ಫೆರಲ್ ಪಿಂಟೊನ್ ಕಾರ್ಯೆಂ ಚಲವ್ನ್ ವೆಲೆಂ.
