ಎಂ.ಸಿ.ಸಿ. ಬ್ಯಾಂಕಾನ್ 110 ವರ್ಸಾಂ ಸಂಪಯ್ಲ್ಯಾ ವಕ್ತಾ ಕುಲ್ಶೇಕರ್ ಶಾಖ್ಯಾಚ್ಯಾ ಗ್ರಾಹಕಾಂ ಖಾತಿರ್ ಗ್ರಾಹಕ್ ಸಂಪರ್ಕ್ ಸಭಾ ಬಜ್ಜೋಡಿ ಇನ್ಫೆಂಟ್ ಮೇರಿ ಇಗರ್ಜೆಚ್ಯಾ ಸಭಾಗಣಾಂತ್, 2022 ಸಪ್ತೆಂಬರ್ 10 ತಾರಿಕೆರ್ ಸಾಂಜೆರ್ 6 ವರಾರ್ ಮಾಂಡುನ್ ಹಾಡ್‌ಲ್ಲಿ.
ಎಂ.ಸಿ.ಸಿ. ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊನ್ ಕಾರ್ಯಾಚೆ ಅಧ್ಯಕ್ಷ್ ಸ್ಥಾನ್ ಘೆತ್‌ಲ್ಲೆಂ.
ಬಿಕರ್ನಕಟ್ಟ ಬಾಳೊಕ್ ಜೆಜುಚ್ಯಾ ಪುಣ್‌ಶೆತಾಚೊ ನಿರ್ದೇಶಕ್ ಮಾನಾಧಿಕ್ ಬಾಪ್ ರೋವೆಲ್ ಶುಭ್‌ದೀಪ್ ಡಿಸೋಜಾನ್ ಕಾರ್ಯಾಚೆಂ ಉದ್ಘಾಟನ್ ಕರ್ನ್ ಉಲವ್ನ್ ಎಂ.ಸಿ.ಸಿ. ಬ್ಯಾಂಕಾನ್ ಸಮಾಜೆಕ್ 110 ವರ್ಸಾಂಚಿ ನಿರಂತರ್ ನಿಸ್ವಾರ್ಥ್ ಬ್ಯಾಂಕಿಂಗ್ ಸೆವಾ ದಿಲ್ಲ್ಯಾ ಖಾತಿರ್ ಬ್ಯಾಂಕಾಚ್ಯಾ ಅಧ್ಯಕ್ಷ್, ಆಡಳ್ತ್ಯಾ ಮಂಡಳಿಚೆ ಸಾಂದೆ ಆನಿ ಸಿಬ್ಬಂದಿ ವರ್ಗಾಕ್ ಶಾಭಾಸ್ಕಿ ಪಾಠಯ್ಲಿ. ಬ್ರಿಟಿಷಾಂನಿ ಅಮ್ಚೊ ಭಾರತ್ ದೇಶ್ ಸೊಡ್ನ್ ಗೆಲ್ಲ್ಯಾ ತವಳ್ ಭಾರತಾಚಿ ಆರ್ಥಿಕ್ ಸ್ಥಿತಿಗತಿ ಮಸ್ತ್ ಕಷ್ಟಾಂಚಿ ಜಾವ್ನ್ ಆಸ್‌ಲ್ಲಿ. ಸ್ವಾತಂತ್ರ್ಯಾಚ್ಯಾ ಪಯ್ಲೆಂ ಅಸ್ಥಿತ್ವಾಂತ್ ಅಸ್‌ಲ್ಲೆ ಸಬಾರ್ ಸಂಸ್ಥೆ ದುಸ್ರ್ಯಾ ಸಂಸ್ಥ್ಯಾ ಸಾಂಗಾತಾ ವಿಲೀನ್ ಜಾಲೆ ಆನಿ ಥೊಡೆಂ ಸಂಸ್ಥೆ ದಿವಾಳಿ ಜಾವ್ನ್ ನಪಂಯ್ಜ್ ಜಾಲೆ. ಪೂಣ್ ಎಂ.ಸಿ.ಸಿ. ಬ್ಯಾಂಕ್ ಮಾತ್ರ್ ಹೆಂ ಸಗ್ಳಿಂ ಕಷ್ಟ್ ಅನ್ವಾರಾಂ ಫುಡ್ ಕರ್ನ್ ಆಜ್ ಯಶಸ್ವಿಚ್ಯಾ ಉಂಬ್ರಾಕ್ ಪಾವ್ಲಾಂ. ಮುಖ್ಲ್ಯಾ ದಿಸಾಂನಿ ಅಶೆಂಚ್ ಹ್ಯಾ ಬ್ಯಾಂಕಾಚಿ ಪ್ರಗತಿ ಜಾಂವ್ದಿ ಆನಿ ಅನಿಕಿಯೀ ಹೆಂ ಬ್ಯಾಂಕ್ ವಾಡೊಂದಿ ಮ್ಹಣೊನ್ ಬರೆಂ ಮಾಗ್ಲೆಂ. ಬ್ಯಾಂಕಾಚ್ಯಾ ಆಡಳಿತ್ ಮಂಡಳೆನ್ ಪುಡ್ಲ್ಯಾ ದಿಸಾಂನಿ ಬ್ಯಾಂಕಾಚೆ ಶಾಖೆ ವಿದೇಶಾಂತ್‌ಯೀ ಉಗ್ತೆಂ ಕರ್ಚೆಂ ವಿಶಿಂ ಚಿಂತಾಪ್ ಆಟಯ್ಜಾಯ್ ಮ್ಹಣ್ ತಿಳ್ಸುನ್ ಬ್ಯಾಂಕಾಕ್ ಬರೆಂ ಮಾಗ್ಲೆಂ.
ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೋನ್ ಅಪ್ಲ್ಯಾ ಅಧ್ಯಕ್ಷೀಯ್ ಭಾಷಣಾಂತ್ ಗ್ರಾಹಕಾಂಚೆ ಸಮಸ್ಯೆ ಸಮ್ಜಂಕ್ ಆನಿ ತ್ಯಾ ಸಮಸ್ಯಾಂಕ್ ಪರಿಹಾರ್ ಸೊದುಂಕ್ ಗ್ರಾಹಕ್ ಸಂಪರ್ಕ್ ಸಭಾ ಅಸಾ ಕೆಲ್ಯಾ. 2018ವೆರ್ 24 ಕೊರೊಡ್ ಅಸ್‌ಲ್ಲಿ ಎಂಸಿಸಿ ಬ್ಯಾಂಕಾಚ್ಯಾ ಕುಲ್ಶೇಕರ್ ಶಾಖ್ಯಾಚಿ ಠೇವ್ 2022 ಇಸ್ವೆಂತ್ 60 ಕೊರೊಡಾಕ್ ಪಾವ್ಲ್ಯಾ. ರೀಣ್ 9 ಕೊರೊಡ್ ಥಾವ್ನ್ 22 ಕೊರೊಡಾಕ್ ಪಾವ್ಲಾಂ ಮ್ಹಣೊನ್ ತಿಳ್ಸಿಲೆಂ. ಹ್ಯಾ ಯಶಸ್ವೆಕ್ ಕಾರಣ್‌ಕರ್ತ್ ಜಾಲ್ಲ್ಯಾ ಗ್ರಾಹಕಾಂಚೊ ತಾಣೆಂ ಉಪ್ಕಾರ್ ಬಾವುಡ್ಲೊ. ಬ್ಯಾಂಕಾಂನ್ ಹ್ಯಾ ವರ್ಸಾಂ 8.27 ಕೊರೊಡ್ ನಿವ್ವಳ್ ಲಾಭ್ ಅಪ್ಣಾಯ್ಲಾ, ತಶೆಂಚ್ ಎನ್.ಪಿ.ಎ 1.60% ಕ್ ಪಾವ್ಲಾಂ ಮ್ಹಣೊನ್ ಸಾಂಗ್ಲೆಂ.
ಬೆಥನಿ ಸಭೆಚಿಂ ಪ್ರಾಂತೀಯ್ ವ್ಹಡಿಲ್ನ್ ಸುಪೀರಿಯರ್ ರೆ. ಸಿಸ್ಟರ್ ಸಿಸಿಲಿಯಾ ಮೆಂಡೋನ್ಸ ಬಿ.ಎಸ್., ಮಂಗ್ಳುರ್ ಕ್ಷೇತ್ರಾಚೊ ಮಾಜಿ ಶಾಸಕ್ ತಶೆಂಚ್ ಮೆ| ಸಿಲಾ ಅಗ್ರೋಟೆಕ್ ಪ್ರೈವೇಟ್ ಲಿಮಿಟೆಡಾಚೊ ಅಧ್ಯಕ್ಷ್ ಆನಿ ಆಡಳಿತ್ ನಿರ್ದೇಶಕ್ ಜೆ. ಆರ್. ಲೋಬೊ, ಕುಲ್ಶೇಕರ್ ಪ್ರಗತಿ ಕೋ-ಅಪರೇಟಿವ್ ಸೊಸೈಟಿಚೊ ಅಧ್ಯಕ್ಷ್ ತಶೆಂಚ್ ಬೆನ್ಸ್ ಸಂಸ್ಥೆಚೊ ಮಾಲಕ್ ಬೆನೆಟ್ ಡಿಸಿಲ್ವಾ, ಉದ್ಯಮಿ ತಶೆಂಚ್ ಆಶೋಕ್ ನಗರ್ ಲಯನ್ಸ್ ಕ್ಲಬ್ ಹಾಚಿ ಅಧ್ಯಕ್ಷಿಣ್ ಲಯನ್ ಕುಸುಮಾ ಯು ರಾವ್, ಕೊರ್ಡೆಲ್ ಭಾಗೆವಂತ್ ಖುರ್ಸಾ ಇಗರ್ಜೆಚೊ ವಿಗಾರ್ ಮಾನಾಧಿಕ್ ಬಾಪ್ ಕ್ಲಿಪರ್ಡ್ ಫೆರ್ನಾಂಡಿಸ್ ಗೌರವಾನ್ವಿತ್ ಸಯ್ರೆ ಜಾವ್ನ್ ವೆದಿರ್ ಹಾಜರ್ ಅಸ್‌ಲ್ಲೆ.
ಸಪ್ತೆಂಬರ್ ಮಹಿನ್ಯಾಂತ್ ಅಪ್ಲೊ ಜಲ್ಮಾ ದಿವಸ್ ಆಚರಣ್ ಕೆಲ್ಲ್ಯಾ ಗ್ರಾಹಾಕಾಂಕ್ ಹ್ಯಾ ವೆಳಿಂ ಮ್ಹಾನ್ ಕೆಲೊ. ಮಾಲ್ಗಡ್ಯಾ ಗ್ರಾಹಕಾಂಕ್ ಶಾಲು ಪ್ರಾಂಗ್ರುನ್, ಪುಲಾಂಚೊ ತುರೊ ದೀವ್ನ್ ಅಭಿನಂದನ್ ಪಾಠಯ್ಲೆಂ. ಶೈಕ್ಷಣಿಕ್ ಆನಿ ವೃತ್ತಿಪರ್ ಕ್ಷೇತ್ರಾಂತ್ ವಿಶಿಷ್ಟ್ ಸಾಧನ್ ಕೆಲ್ಲ್ಯಾ ಗ್ರಾಹಕಾಂಚ್ಯಾ ಭುರ್ಗ್ಯಾಂಕ್ ಸನ್ಮಾನ್ ಕೆಲೊ.
ಸಲಹಾಂ ಸೂಚನಾಂ ದಿಂವ್ಚ್ಯಾ ಖಾತಿರ್ ತಶೆಂಚ್ ಗ್ರಾಹಕಾಂಚೆ ಸಮಸ್ಯೆ ಸಮ್ಜಂವ್ಚ್ಯಾ ಖಾತಿರ್ ವಿಚಾರ್ ವಿನಿಮಯ್ ಅಸಾ ಕೆಲೊ. ಗ್ರಾಹಕಾಂನಿ ಹ್ಯಾ ವಿಚಾರ್ ವಿನಿಮಯಾಂತ್ ಸಕ್ರೀಯ್ ರೀತಿನ್ ಭಾಗ್ ಘೆವ್ನ್ ಅಪ್ಲಿಂ ಅಮೂಲ್ಯ್ ಸಲಹಾಂ – ಸೂಚನಾಂ ಸಭೆಕ್ ದಿಲಿಂ. ಅಧ್ಯಕ್ಷಾನ್ ಗ್ರಾಹಕಾಂಚ್ಯಾ ಸರ್ವ್ ಸವಲಾಂಕ್ ಉತ್ತಮ್ ರೀತಿನ್ ಸ್ಪಂದನ್ ಕೆಲೆಂ.
ಬ್ಯಾಂಕಾಚೊ ಉಪಾಧ್ಯಕ್ಷ್ ಜೆರಾಲ್ಡ್ ಜೂಡ್ ಡಿಸಿಲ್ವಾ, ನಿರ್ದೇಶಕ್ ಡೇವಿಡ್ ಡಿಸೋಜ, ಅನಿಲ್ ಪತ್ರಾವೊ, ರೋಶನ್ ಡಿಸೋಜ, ಮಾರ್ಸೆಲ್ ಎಂ. ಡಿಸೋಜ, ವೃತ್ತಿಪರ್ ನಿರ್ದೇಶಕ್, ಸುಶಾಂತ್ ಸಿ. ಎ. ಸಲ್ಡಾನ್ಹಾ, ವ್ಯವಸ್ಥಾಪನ್ ಸಮಿತಿಚೆ ಸಾಂದೆ ಆಲ್ವಿನ್ ಪಿ. ಮೊಂತೇರೊ, ಫೆಲಿಕ್ಸ್ ಡಿಕ್ರೂಜ್, ಶರ್ಮಿಳಾ ಡಯನ ಮಿನೆಜಸ್, ಉಪ ಪ್ರಬಂಧಕ್ ಮಾನೆಸ್ತ್ ರಾಜ್ ಮಿನೆಜಸ್ ಹಾಜರ್ ಅಸ್‌ಲ್ಲೆಂ.
ಮಹಾಪ್ರಬಂಧಕ್ ಸುನಿಲ್ ಮಿನೆಜಸಾನ್ ಗ್ರಾಹಕ್ ಸಂಪರ್ಕ್ ಸಭೆಚೊ ಮಹತ್ವ್ ಸಭೆಕ್ ತಿಳ್ಸಿಲೊ. ಕುಲ್ಶೇಕರ್ ಶಾಖ್ಯಾಚಿ ನಿರ್ದೇಶಕಿ ಐರಿನ್ ರೆಬೆಲ್ಲೊನ್ ಯೆವ್ಕಾರ್ ಮಾಗ್ಲೊ. ಶಾಖ್ಯಾಚಿ ವ್ಯವಸ್ಥಾಪಕಿ ವಿಲ್ಮಾ ಜ್ಯೋತಿ ಸಿಕ್ವೇರಾನ್ ಉಪ್ಕಾರ್ ಬಾವುಡ್ಲೊ. ಅನಿಲ್ ಡಿಕುನ್ಹಾನ್ ಕಾರ್ಯೆಂ ಚಲವ್ನ್ ವೆಲೆಂ.
