ತಡ್‌ಜೋಡ್

‘ತುಜ್ಯಾ ಇಸ್ಟಾಕ್ ಜೋನಿಕ್ ಆಶ್ರಮಾಕ್ ಧಾಡ್ಲಾ ಕಂಯ್, ತಾಚೆ ದೊನ್‌ಯೀ ಪಾಂಯ್ ಕಾತರ್ಲ್ಯಾತ್ ಕಂಯ್’

ಹಾಂವ್ ಬೊಂಬೊಯ್ ಥಾವ್ನ್ ಗಾಂವಾಕ್ ಯೆಂವ್ಚ್ಯಾದಿಂ ಆಯಿಲ್ಲಿ ಗಿಲ್ಬರ‍್ಟಾಚಿ ವಾಟ್ಸಪ್ ಮೆಸೇಜ್ ವಾಚುನ್ ಮ್ಹಜ್ಯಾ ಮತಿಂತ್ ಎಕಾಪಾಟ್ಲ್ಯಾನ್ ಏಕ್ ಸವಾಲಾಂ ಉಭಿಂ ಜಾಲಿಂ.

“ತುಂ, ಹಾಂವ್ ಆನಿ ಜೋನಿ ಎಕಾಚ್ ಇಸ್ಕೊಲಾಂತ್ ಸಾಂಗಾತಾ ಶಿಕೊನ್ ಆಯಿಲ್ಲೆ ಆತಾಂ ಜೋನಿ ಫಕತ್ ಮ್ಹಜೊ ಈಸ್ಟ್ ಜಾಲೊ? ಕಿತೆಂ ಜಾಲೆಂ ಜೋನಿಕ್?, ಹ್ಯಾ ಪ್ರಾಯೆರ್ ತಾಕಾ ಆಶ್ರಮಾಕ್ ಕಿತ್ಯಾಕ್ ಧಾಡ್ಲಾ? ತಾಚಿಂ ಭುರ್ಗಿಂ ಕಿತೆಂ ಕರ್ತಾತ್? ಕಂಯ್ ಆಸಾತ್?”

ಮ್ಹಜಿ ಆತುರಾಯ್ ತಡ್ವುಂಕ್ ಜಾಯ್ನಾಸ್ತಾಂ ಗಿಲ್ಬರ‍್ಟಾಕ್ ಫೊನಾಚೆರ್ ಸವಾಲ್ ಕೆಲೆಂ.

“ತಾಚ್ಯಾ ದೊಗಾಂ ಪುತಾಂಪಯ್ಕಿಂತ್ ಎಕ್ಲೊ ಲಂಡನಾಂತ್ ಆನಿ ದುಸ್ರೊ ಅಮೆರಿಕಾಂತ್ ಆಸಾ, ತಾಂಕಾಂ ಜೋನಿಕ್ ಥಂಯ್ ವ್ಹರುಂಕ್ ಜಾಯ್ನಾ ತಶೆಂಚ್ ಹಾಂಗಾ ಯೇಂವ್ಕ್‌ಯೀ ಜಾಯ್ನಾ ದೆಕುನ್ ಡಾಡಾಕ್ ಬರಿ ಸವ್ಲತಾಯ್ ಮೆಳುಂದಿ ಮ್ಹಣುನ್ ತಾಣಿಂಚ್ ಆಶ್ರಮಾಕ್ ಧಾಡ್ಲಾ ಕಂಯ್”

“ಆನಿ ಕಿತ್ಯಾಕ್ ತಾಚೆ ಪಾಂಯ್ ಕಾತರ್ಲ್ಯಾತ್?”

“ತಾಕಾ ಡಯಬಿಟಿಸ್ ಆಸ್ಲೆಂ, ಗ್ಯಾಂಗರಿನ್ ಸುರು ಜಾವ್ನ್ ತೇಂಪ್ ಜಾಲ್ಲೊ, ಪುಣ್ ಎಕ್ಸುರೊ ಜೋನಿ ಸರಾಗ್ ಪಿಯೆತಾಲೊ ಆನಿ ಅಪ್ಲ್ಯಾ ಭಲಾಯ್ಕೆಚಿ ಪರ್ವಾ ಕರಿನಾತ್ಲೊ, ಶಿತ್ ವಚೊನ್ ಪೇಜ್ ಜಾತಾನಾ ಕಳ್ಳೆಂ, ದೆಕುನ್ ಹೊಸ್ಪಿಟ್ಲಾಂತ್ ಡೊಕ್ಟರಾಂನಿ ತಾಚೊ ಜೀವ್ ವಾಂಚಂವ್ಚ್ಯಾಕ್ ಏಕ್ ಪಾಂಯ್ ಪುರ್ತೊ ದುಸ್ರೊ ಪಾಂಯ್ ಅರ್ಧೊ ಕಾತರ್ಲಾ”

ಆಯ್ಕುನ್ ಮ್ಹಜೆಂ ಕಾಳಿಜ್ ಏಕ್ ಘಡಿ ಕಾಂಪ್ಲೆಂ. ಕೆದಿಂಚ್ ಚಿಂತುಂಕ್ ನಾ ಆಜ್ ಜೋನಿಕ್ ಜಾಲ್ಲಿ ಗತ್ ಫಾಲ್ಯಾಂ ಅಪ್ಣಾಕ್‌ಯೀ ಯೇತ್‌ಕಾಯ್?

ಮ್ಹಜೆಂ ಗಾಂವ್ಚೆಂ ಪಯ್ಣ್ ಸುರು ಜಾಲ್ಲೆಪರಿಂಚ್ ಜೋನಿ, ಗಿಲ್ಬರ‍್ಟ್ ಆನಿ ಮ್ಹಜ್ಯಾ ತರ್ನಾಟ್‌ಪಣಾಲೆ ದೀಸ್ ಯಾದಿಂತ್ ಆಯ್ಲೆ. ಜೋನಿ ಪ್ರಾಯೆನ್ ಮ್ಹಜ್ಯಾಕೀ ತೀನ್-ಚ್ಯಾರ್ ವರ್ಸಾಂ ವ್ಹಡ್, ಪುಡ್ಪುಡಿತ್ ಕುಡಿಚೊ ಗೊರ್‌ಶ್ಯಾ ಕಾತಿಚೊ ಹಾಸ್ಕುರ‍್ಯಾ ತೊಂಡಾಚೊ ಜೋನಿ ಭೋವ್ ಸಾದೊ. ಭೋವ್ಶಾ ಇಸ್ಕೊಲಾಂತ್ ತಾಕಾ ಚಿಡಾಯ್ನಾತ್ಲೊ ಎಕ್ಲೊಯ್ ಆಸ್ಚೊನಾ. ಪುಣ್ ಕೊಣಾಚೆರ್‌ಯೀ ತಾಣೆಂ ಶಿಣ್ ಉಚಾರ್‌ಲ್ಲೊ ಜಾಂವ್, ಝಗ್ಡೆಂ ಕೆಲ್ಲೆಂ ಜಾಂವ್ ಹಾಂವೆಂ ಪಳೆಂವ್ಕ್ ನಾತ್ಲೆಂ.

ತಾಚ್ಯಾಚ್ ಘರಾ ಲಾಗ್ಶಿಲೊ ಗಿಲ್ಬರ‍್ಟ್, ಜೋನಿ ಹಾಂವ್ ಅಶೆಂ ತೆಗಾಂಯ್ನೀ ತರ್ನಾಟ್‌ಪಣ್ ವೆಂಗುನ್ ಆಪಾಪ್ಲಿ ಫುಡಾರಾಚಿ ವಾಟ್ ವಿಂಚುನ್ ಎಕಾಮೆಕಾಥಾವ್ನ್ ಮಾತ್ಶೆಂ ಪಯ್ಸ್ ಪಾವ್‌ಲ್ಲ್ಯಾಂವ್.

ಗಾಂವಾಂತ್‌ಚ್ ಉದ್ಯಮ್ ಕರುನ್ ಉಪ್ರಾಂತ್ ಕಾಜರ್ ಜಾತಾನಾ ಹಾಂವ್ ಕೊಲೆಜ್ ಸಂಪವ್ನ್ ಕಾಮಾಕ್ ಸೆರ್ವಲ್ಲೊಂ, ಅಪ್ಣಾಚೆಂ ಕಾಜಾರ್ ಆಸಾ ಆನಿ ಮ್ಹಜೊ ದೆಡೊ ತುವೆಂಚ್ ಜಾಯ್ಜಯ್ ಮ್ಹಣುನ್ ಮ್ಹಾಕಾ ಮೊಗಾನ್ ವಿಚಾರ್‌ಲ್ಲೆಂ ದೆಕುನ್ ಹಾಂವ್ ಸಯ್ತ್ ದೋನ್ ದಿಸಾಂಚಿ ರಜಾ ಕಾಡುನ್ ತಾಚ್ಯಾ ಕಾಜಾರಾಕ್ ಪಾವ್‌ಲ್ಲೊಂ. ಉಪ್ರಾಂತ್ ತಾಕಾ ಮೆಳ್ಚ್ಯಾದಿಂ ಹಾಂವ್ ಪರ್ಗಾಂವಾಕ್ ಪಾವ್‌ಲ್ಲೊಂ.

***

ಸಭಾರ್ ವರ‍್ಸಾಂ ಉಪ್ರಾಂತ್ ಹಾಂವ್ ಗಲ್ಫಾಂತ್ಲೊ ಗಾಂವಾಕ್ ಆಯಿಲ್ಲ್ಯೆವೆಳಾರ್ ಗಿಲ್ಬರ‍್ಟ್ ಆನಿ ಜೋನಿಸವೆಂ ಸಾಂಜೆಚೊ ವೇಳ್ ಖರ್ಚಿತಾಲೊಂ.

ಗಿಲ್ಬರ‍್ಟ್ ಅಪ್ಲೆಂ ತೋಟ್ ಸಾಂಬಾಳ್ತಾಲೊ, ಪಂಪಾಚ್ಯಾ ಬಾಂಯ್ಚೆಂ ಉದಕ್ ಫುಲಾಂಝಡಾಂಕ್ ದಿತಾಸ್ತಾಂ, ತ್ಯಾ ಝಡಾಂ ಭಂವಾರಿ ಆಸ್ಚ್ಯಾ ಉಪ್ಕಾರಾಕ್ ಪಡಾನಾಸ್ಚ್ಯಾ ಝಡಾಂಕ್ ಬುಡ್ಡುನ್ ತೊಟಾಭಾಯ್ರ್ ಉಡಯ್ತಾಲೊ.

ಎಕಾ ಸಾಂಜೆರ್ ಆಮಿ ಉಲವ್ನ್ ಆಸ್ತಾನಾ ಜೋನಿ ವಿಚಾರಿಲಾಗ್ಲೊ; “ತುಂ ಗಲ್ಫಾಂತ್ ಇತ್ಲ್ಯಾ ಜೊಡಿಂತ್ ಆಸಾಯ್, ಪುಣ್ ತುಕಾ ಭುರ್ಗಿಂ ನಾಂತ್, ತರ್ ತುಜೊ ಫುಡಾರ್ ಕಸೊ ಜಾಯ್ತ್ ಮ್ಹಣುನ್ ಚಿಂತ್ಲಾಂಯ್‌ವೆ ತುವೆಂ?”

ಬುದ್ದು ಮ್ಹಣುನ್ ಲೆಕ್ಲೆಲ್ಯಾ ಜೋನಿನ್ ಮ್ಹಾಕಾ ಹೆಂ ಪ್ರಶ್ನ್ ಕೆಲ್ಲೆಂ ಆಯ್ಕುನ್ ಹಾಂವ್ ಅಜ್ಯಾಪ್ಲೊಂ, ಪುಣ್ ಜಾಪಿರುಪಾರ್ ತಾಕಾಯ್ ಏಕ್ ಪ್ರಶ್ನ್ ಕೆಲೆಂ;

“ತುಂ ಗಾಂವಾಂತ್ ಇತ್ಲೆಂ ಜೊಡ್ತಾಯ್, ತುಕಾ ಭುರ್ಗಿಂ ಆಸಾತ್ ಪುಣ್ ತುಜ್ಯಾ ಫುಡಾರಾವಿಶಿಂ ಕಿತೆಂಯ್ ಚಿಂತ್ಲಾಂಯ್?”

“ಮ್ಹಜಿ ಜೋಡ್ ಭುರ್ಗ್ಯಾಂಚ್ಯಾ ಶಿಕ್ಪಾಕ್ ವೆತಾ, ಭುರ್ಗಿಂ ಫಾಲ್ಯಾಂ ಆಮ್ಚ್ಯಾ ಉತರ್ ಪ್ರಾಯೆರ್ ಆಮ್ಕಾಂ ಪಾವ್ತಾತ್ ನ್ಹಯ್?, ಪುಣ್ ತುಂ ತುಜ್ಯಾ ಜೊಡಿಕ್ ಕಿತೆಂ ಕರ್ತಾಯ್?”

“ಹಾಂವ್ ಮ್ಹಜ್ಯಾ ಜೊಡಿಕ್ ಮ್ಯೂಚುವಲ್ ಫಂಡ್ಸಾಂತ್ ಜೊಡುನ್ ಆಸಾಂ”

“ಕಿತೆಂ? ಮ್ಯೂಚುವಲ್ ಫಂಡ್ಸ್? ತಾಂತುಂ ಮಾರ್ಕೆಟಿಚಿ ಕಿತ್ಲಿ ರಿಸ್ಕ್ ಆಸಾ ತುಂ ಜಾಣಾಂಯ್?” ಜೋನಿಚೆಂ ಕಾವ್ಜೆಲ್ಲೆಂ ಪ್ರಶ್ನ್ ಆಯ್ಕುನ್ ಹಾಂವೆಂ ಜಾಪ್ ದಿವುನ್ ಮ್ಹಳ್ಳೆಂ.

“ಜಿವಿತ್‌ಚ್ ಏಕ್ ವ್ಹಡ್ ರಿಸ್ಕ್ ನ್ಹಯ್? ಆಮಿ ಸಗ್ಳಿಂ ಆಮಿ ಆಜ್-ಫಾಲ್ಯಾಂ ಮೊರಾನಾಂವ್ ಮ್ಹಳ್ಳ್ಯಾ ಚಿಂತ್ಪಾನ್ ಜಿಯೆವ್ನ್ ಆಸಾಂವ್ ನ್ಹಯ್? ಕೊಣ್ ಜಾಣಾಂ ಕೆದ್ನಾಂ ಆಮಿ ಹ್ಯಾ ಸಂಸಾರಾಕ್ ಅಧೇವ್ಸ್ ಮಾಗೊಂಕ್ ಆಸಾ ಮ್ಹಣ್? ತುಂ ಮಾರ್ಕೆಟ್ ರಿಸ್ಕೆವಿಶಿಂ ಉಲಯ್ತಾಯ್, ಹಾಂವ್ ಜಿವಿತಾ ರಿಸ್ಕೆವಿಶಿಂ ಉಲಯ್ತಾಂ. ಜಿವಿತ್ ಮ್ಹಳ್ಯಾರ್ ಏಕ್ ತಡ್‌ಜೋಡ್ ನ್ಹಯ್?, ಆತಾಂ ಪಳೆ; ತುಕಾ ಭುರ್ಗಿಂ ಆಸಾತ್, ಆನಿ ಫಾಲ್ಯಾಂ ಅಪ್ಣಾಚಿಂ ಭುರ್ಗಿಂ ಅಪ್ಣಾಕ್ ಉತರ್ ಪ್ರಾಯೆರ್ ಪಾವ್ತೆಲಿಂ ಮ್ಹಳ್ಳ್ಯಾ ಭರ್ವಶ್ಯಾನ್ ತುಂ ತಾಂಚೆರ್ ವಿನ್ಯೋಗ್ ಕರ್ತಾಯ್, ತಶೆಂಚ್ ಹಾಂವ್ ಮ್ಯೂಚುವಲ್ ಫಂಡ್ಸಾಂತ್ ವಿನ್ಯೋಗ್ ಕರುನ್ ಆಸಾಂ, ದೊಗಾಂಯ್ಕೀ ರಿಸ್ಕ್ ಆಸಾ”

“ಛೆಕ್… ತುಂ ಖಂಚೆಂ ಖಂಚೆಸವೆಂ ತುಲನ್ ಕರುನ್ ಆಸಾಯ್? ಮ್ಯೂಚುವಲ್ ಫಂಡ್ಸ್ ಆನಿ ಕುಟ್ಮಾಕ್ ಕಸ್ಲೊ ಭಾಂದ್?” ಗಿಲ್ಬರ‍್ಟಾನ್ ಮಧೆಂ ಉಲವ್ಣೆಂ ಸುರು ಕೆಲ್ಲೆಂ.

“ಭಾಂದ್ ನಾ ಪುಣ್ ಲೋಜಿಕ್ ಆಸಾ ಗಿಲ್ಬರ‍್ಟ್, ಥೊಡ್ಯಾಚ್ ದಿಸಾಧಿಂ ತುಜ್ಯಾ ತೊಟಾಂತ್ಲ್ಯಾ ಝಡಾಂಕ್ ಉದಕ್ ದಿತಾಸ್ತಾಂ ತುವೆಂ ಕಶೆಂ ಉಪ್ಕಾರಾಕ್ ಪಡಾನಾಸ್ಚ್ಯಾ ಝಡಾಂಕ್ ಕಾಡ್ನ್ ಭಾಯ್ರ್ ಉಡವ್ನ್, ಫುಲಾಂ ದಿತಲ್ಯಾ ಝಡಾಂಕ್ ಮಾತ್ರ್ ಉದಕ್ ದಿಲೆಂಯ್, ತಶೆಂಚ್ ಮನಿಸ್ ಸಯ್ತ್ ಅಪ್ಣಾಕ್ ಉಪ್ಕಾರಾಕ್ ಪಡ್ತಲ್ಯಾಂಕ್ ಮಾತ್ರ್ ಲಾಗಿಂ ಕರ್ತಾ ನ್ಹಯ್?”

ಮ್ಹಜಿಂ ಉತ್ರಾಂ ಜಿರಂವ್ಕ್ ಗಿಲ್ಬರ‍್ಟ್ ಪ್ರೇತನ್ ಕರ್ನ್ ಆಸ್ಲೆಪರಿಂಚ್ ಹಾಂವೆಂ ಉಚಾರ್ಲೆಂ;

“ಪಳೆ ಜೋನಿ ಅಪ್ಲಿ ಜೋಡ್ ತಾಚ್ಯಾ ಕುಟ್ಮಾಕ್ ಮ್ಹಣೊನ್ ಗಳ್ಸಿತಾ, ಕುಟಮ್ ಮ್ಹಳ್ಯಾರ್ ಕಿತೆಂ? ಎಕಾಮೆಕಾಚ್ಯಾ ಬರೆಪಣಾಕ್ ಲಾಗುನ್ ಎಕಾಮೆಕಾ ಆಧಾರ್ ಜಾಂವ್ಚ್ಯಾಕ್ ಎಕಾಪ್ರಾಸ್ ಚಡಿತ್ ಮನ್ಶ್ಯಾಂನಿ ಎಕಾಥರಾಚೊ ಸೊಲ್ಲೊ ಕರುನ್ ಸಾಂಗಾತಾ ಜಿಯೆಂವ್ಚೆಂ ಆನಿ ತ್ಯಾ ಸೊಲ್ಲ್ಯಾಕ್ ಎಕೆಕಾ ನಾಂವಾನ್ ವೊಲಾಂವ್ಚೆಂ ತಿತ್ಲೆಂಚ್ ನ್ಹಯ್?, ಯೆತಾನಾ ಎಕ್ಸುರೆಚ್ ತಶೆಂಚ್ ವೆತಾನಾಂಯ್ ಎಕ್ಸುರೆಚ್ ಆಮಿ. ಹ್ಯಾ ಸಂಸಾರಿ ಚ್ಯಾರ್ ದಿಸಾಂಚ್ಯಾ ಜಿವಿತಾಂತ್ ಆಮಿ ಎಕಾಮೆಕಾ ತಡ್‌ಜೋಡ್ ಕರುನ್ ಜಿಯೆಂವ್ಚೆಂಚ್ ಜಿವಿತ್”

ಮ್ಹಜೆಂ ವಾರ್ಜಿಕ್ ಆಯ್ಕುನ್ ದೊಗ್‌ಯೀ ಕಿತೆಂಚ್ ಉಲಯ್ಲೆ ನಾಂತ್.

“ಗಿಲ್ಬರ‍್ಟ್ ಗ್ರೇಸ್ತ್ ಚೆಡ್ವಾಲಾಗಿಂ ಕಾಜಾರ್ ಜಾಲಾ, ಎಕ್ಲೆಂಚ್ ಚೆಡುಂ ಕಂಯ್ ತೆಂ, ತಾಕಾ ಕಿತೆಂಚ್ ಫಿಕಿರ್ ನಾ. ಪುಣ್ ಮ್ಹಾಕಾ ಗಲ್ಫಾಕ್ ವ್ಹರ್, ಗಾಂವಾಂತ್ ದಿಸಾನ್ ದೀಸ್ ಖರ್ಚ್ ಚಡ್ತಾ, ಉತ್ಪತ್ ಚಡಾನಾ, ಭುರ್ಗಿಂ, ತಾಂಚೆಂ ಶಿಕಪ್, ಫೀಸ್ ಮ್ಹಣುನ್ ಜೊಡ್‌ಲ್ಲೆಂ ಸರ್ವ್ ಮಯ್ನ್ಯಾಚ್ಯಾ ಅಖ್ರೇಕ್ ಸಂಪ್ತಾ. ಫಾಲ್ಯಾಂ ಭುರ್ಗ್ಯಾಂಕ್ ಚಡಿತ್ ಶಿಕಂವ್ಕ್ ಮ್ಹಜ್ಯಾನ್ ಸದ್ದ್ಯಾಕ್ ತಾಂಕ್ ನಾ”

ಜೋನಿ ಅಪ್ಲ್ಯಾ ಮತಿಚೆ ಕಳ್ವಳೆ ಮ್ಹಜೆಲಾಗಿಂ ಉಚಾರ್ತಾಲೊ.

***

ಹಾಂವ್ ಗಾಂವಾಕ್ ಪಾವೊನ್ ಥೊಡೆ ದೀಸ್ ಸರ್‌ಲ್ಲೆ, ತೊಟಾಗಾರ್ ಗಿಲ್ಬರ‍್ಟ್ ಗಾಂವಾಂತ್ ಆಸೊನ್‌ಯೀ ಜೋನಿಕ್ ಭೆಟೊಂಕ್ ಆಶ್ರಮಾಕ್ ಗೆಲ್ಲೊನಾ ತಾಕಾ ವಾ ಆಶ್ರಮ್ ಕಂಯ್ ಆಸಾ ಮ್ಹಳ್ಳೆಂ ಸಯ್ತ್ ನಖ್ಖೆಂ ಕಳಿತ್ ನಾಸ್ಚೆಂ ಮ್ಹಾಕಾ ಅಜ್ಯಾಪ್ ಕರ್ತಾಲೆಂ. ಮ್ಹಾಕಾ ಇತ್ಲ್ಯಾ ಕಾಳ್ಜೆನ್ ವಾಟ್ಸಾಪ್ ಮೆಸೇಜ್ ಕೆಲ್ಲ್ಯಾ ಗಿಲ್ಬರ‍್ಟಾಕ್ ಜೋನಿವಿಶಿಂ ಕಿತೆಂಚ್ ಕಳಿತ್ ನಾ ದೆಕುನ್ ದೊಗ್‌ಯೀ ತೆಂ ಆಶ್ರಮ್ ಸೊಧುನ್ ಯೆವ್ಯಾಂ ಮ್ಹಣ್ ಹಾಂವೆಂ ಸಾಂಗ್ತಾನಾಂಚ್ ಗಿಲ್ಬರ‍್ಟಾನ್ ಉಚಾರ್ಲೆಂ; “ತೊಟಾಕ್ ಉದಕ್ ದೀಂವ್ಕ್ ಆಸಾ, ತಶೆಂಚ್ ಕರೆಜ್ಮ್ ಸುರು ಜಾಲಾ, ರೆತಿರ್ ಆಸಾ ದೆಕುನ್ ಪಯ್ಸಿಲೊ ಎಕ್ಲೊ ಬರೊ ಪ್ರಸಂಗ್ ದಿತಲೊ ಪಾದ್ರಿ ರೆತಿರೆಕ್ ಯೆತಾ ಕಂಯ್ ದೆಕುನ್ ಮ್ಹಾಕಾ ಯೇಂವ್ಕ್ ಜಾಯ್ನಾ, ಪುಣ್ ತುಂ ಜೋನಿಕ್ ಮೆಳ್ಳ್ಯಾರ್ ಮ್ಹಜೆ ರೆಕಾದ್ ಪಾಟಯ್” ಮ್ಹಣಾಲೊ.

ಹಾಂವ್ ಜೋನಿನ್ ಆಸ್ಚ್ಯಾ ಆಶ್ರಮಾಕ್ ಸೊಧುನ್ ಆಸ್ಲೊಂ. ಎಕಾ ಸಕಾಳಿಂ ಘರಾಂತ್ಲೊ ಸುಟೊನ್ ಶೆರಾಕ್ ಪಾವೊನ್, ತ್ಯಾ ಇಗರ್ಜೆಥಾವ್ನ್ ಭಾಯ್ರ್ ಯೆಂವ್ಚ್ಯಾ ಥೊಡ್ಯಾ ಲೊಕಾಲಾಗಿಂ ವಿಚಾರ್ಲೆಂ “ಹಾಂಗಾ ಲಾಗ್ಸಾರ್ ಕಾಂಯ್ ಆಶ್ರಮ್ ಆಸಾಕಾಯ್?” ತೆ ಎಕಾಮೆಕಾ ಪ್ರಶ್ನಾರುಪಾರ್ ಪಳೆವ್ನ್ “ಆಮ್ಕಾಂ ಕಳಿತ್ ನಾ” ಮ್ಹಣತ್ ಆಪಾಪ್ಲಿ ವಾಟ್ ಧರುನ್ ಗೆಲೆ. ಲಾಗ್ಸಾರ್ ಏಕ್ ಹಿಂದು ದಾದ್ಲ್ಯಾಚಿ ಗುಡಾಚಿ ಆಂಗಡ್ ಆಸ್ಲಿ, ಹಾಂವೆಂ ತಾಚೆಲಾಗಿಂ ವಿಚಾರ್ ಕೆಲೊ. ಥೊಡೊ ವೇಳ್ ಚಿಂತುನ್ ಅಪ್ಣಾಕ್ ಕಳಿತ್ ಆಸಾ ಮ್ಹಣುನ್ ತ್ಯಾ ಆಶ್ರಮಾಕ್ ವಚೊಂಕ್ ದಿಲ್ಲ್ಯಾ ಹಿಶಾರ‍್ಯಾಖಾಲ್ ಥೊಡ್ಯಾಚ್ ವೆಳಾನ್ ಹಾಂವ್ ಸೊಧುನ್ ಆಶ್ರಮಾಕ್ ಪಾವ್ಲೊಂ.

ಆಶ್ರಮಾಚಿ ಗೇಟ್ ಬಂಧ್ ಆಸ್ಲಿ ದೆಕುನ್ ಹಾಂವ್ ಗೆಟಿಭಾಯ್ರ್ ಥಾವ್ನ್ ಗೆಟಿಭಿತರ್ ಮ್ಹಾಕಾ ವಿಚಾರ್ ಕರ್ತೆಲ್ಯಾಕ್ ಜಾಪ್ ದಿವುನ್ ಮ್ಹಳೆಂ “ಹಾಂವ್ ಜೋನಿ ಸುವಾರಿಸಾಕ್ ಮ್ಹೆಳೊಂಕ್ ಆಯ್ಲಾಂ”

ತಿತ್ಲ್ಯಾರ್ ಗೇಟ್ ಉಗ್ತಿ ಕೆಲಿ ಆನಿ ಹಾಂವ್ ಭಿತರ್ ಆಯಿಲ್ಲೊಂಚ್ ತಿ ಗೇಟ್ ಬಂಧ್ ಕರುನ್ ತೊ ಮ್ಹಣಾಲೊ “ಹಾಂಗಾ ಸಭಾರ್ ರಿತಿಚೆ ಮತಿಚೆ ಪಿಡೆಸ್ತ್ ಆಸಾತ್, ಗೇಟ್ ಉಗ್ತಿ ದವರ್ಲ್ಯಾರ್ ಭಾಯ್ರ್ ಧಾಂವ್ತಾತ್ ದೆಕುನ್ ಆಮಿ ಗೇಟ್ ಬಂಧ್ ದವರ್ತಾಂವ್”

ಹಾಂವ್ ಭಿತರ್ ಆಯಿಲ್ಲೆಪರಿಂಚ್ ಭಾಯ್ಲ್ಯಾ ಸಾಲಾಂತ್ ಬೊಸ್‌ಲ್ಲಿಂ ಮ್ಹಾಕಾಚ್ ನಿಸ್ತೇಜ್ ದೊಳ್ಯಾಂನಿ ಪಳೆತಾಲಿಂ. ಕೊಣಾಯ್ಚ್ಯಾಯ್ ತೊಂಡಾರ್ ಕಸ್ಲಿಂಚ್ ಭಗ್ಣಾಂ ನಾತ್ಲಿಂ, ಸಗ್ಳಿಂ ಎಕಾಥರಾಚ್ಯಾ ಕಾವ್ಜೆಣಿಂತ್ ದೊಳ್ಯಾಂಚ್ಯೊ ಆಸ್ಡ್ಯೊ ದಾಂಪಿನಾಸ್ತಾನಾ ಪಳೆತಾಲಿಂ. ತಾಂಕಾಂ ಹೆಂ ಸದಾಂಚೆಂ ಆಸುಯೆತಾ.

“ಜೋನಿಕ್ ಹ್ಯಾ ಆಶ್ರಮಾಕ್ ಕೆದ್ನಾ ಆನಿ ಕೊಣೆ ಪಾವಯ್ಲೊ?”

ಮ್ಹಜ್ಯಾ ಪ್ರಶ್ನಾಕ್ ಥೊಡೊ ವೇಳ್ ಮಾವ್ನ್ ರಾವೊನ್ ತಾಣೆಂ ಜಾಪ್ ದಿಲಿ “ಆಮ್ಚ್ಯಾ ಲೊಕಾಕ್ ಅಜೂನ್ ಆಶ್ರಮ್ ಮ್ಹಳ್ಯಾರ್ ಕಿತೆಂ, ಪ್ರಾಯ್ವಂತಾಂಚೆಂ ಘರ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಕಳಿತ್ ನಾ, ಹೆಂ ಆಶ್ರಮ್ ನ್ಹಯ್, ಹೆಂ ಪ್ರಾಯ್ವಂತಾಂಚೆಂ ಘರ್. ಆಮ್ಚೊ ಜಾಯ್ತೊ ಲೋಕ್ ಪರ್ಗಾಂವಾಂತ್ ಆಸಾ ಆನಿ ಸಭಾರ್ ಕಾರಣಾಂಕ್ ಲಾಗುನ್ ತಾಂಕಾಂ ಅಪ್ಲ್ಯಾ ಉತರ್ ಪ್ರಾಯೆಚ್ಯಾಂಕ್ ತಾಂಚೆಸವೆಂ ಪರ್ಗಾಂವಾಕ್ ವರುಂಕ್ ಜಾಯ್ನಾ, ತಶೆಂಚ್ ತಾಂಕಾಂಯ್ ಹಾಂಗಾ ಯೆವುನ್ ರಾವುಂಕ್ ಜಾಯ್ನಾ ದೆಕುನ್ ತಸಲ್ಯಾಂಚಿ ಜತನ್ ಕರುಂಕ್ ಮ್ಹಣುನ್ ಪ್ರಾಯ್ವಂತಾಂಚಿಂ ಘರಾಂ ಆಸಾತ್ ಆನಿ ತಾಂಚಿ ಬರಿ ಕರುನ್ ಜತನ್ ಕರುಂಕ್ ಆಮಿ ಜೊಕ್ತ್ಯಾಂಕ್ ನಮ್ಯಾರ್ಲಾ, ತಾಂಕಾಂ ವೆಳಾರ್ ವ್ಹಕ್ತಾಂ, ಖಾಣ್-ಜೆವಣ್ ಆಮಿ ದಿತಾಂವ್. ಆಶ್ರಮ್ ಮ್ಹಳ್ಯಾರ್ ಚಡ್ ಕರುನ್ ಗತ್ ಆಧಾರ್ ನಾಸ್ತಾನಾ ವಾಟೆರ್ ಪಡ್ಲೆಲ್ಯಾಂಕ್ ವಿಂಚುನ್ ತಾಂಚಿ ಸೆವಾ ಚಾಕ್ರಿ ಕರ್ಚೆಂ ಘರ್”

ತೊ ಉಲವ್ನ್ ಮ್ಹಾಕಾ ಜೋನಿಚ್ಯಾ ಖಟ್ಲ್ಯಾತೆವ್ಶಿನ್ ವ್ಹರಿಲಾಗ್ಲೊ. ಜೋನಿ ಭಿತರ‍್ಲ್ಯಾ ಹಳ್ತಾಚ್ಯಾ ಕಾಳೊಕಾಚ್ಯಾ ಕುಡಾಂತ್ ನಿದ್ಲಲೊ. ತ್ಯಾ ಕುಡಾಂತ್ ತೀನ್ ದುಸ್ರಿಂ ಖಟ್ಲಿಂ ಆಸ್ಲಿಂ, ಎಕ್ಲೊ ನಿದ್ಲಲೆಕಡೆಚ್ ಪಿಂರ್ಗತಾಲೊ, ಜೋನಿ ಭೋವ್ಶಾ ನಿದೆಂತ್ ಆಸ್ಲೊ. ಕುಡಾಚೊ ದಿವೊ ಜಳಯ್ಲ್ಯಾರೀ ತೊ ಜಾಗೊ ಜಾಲೊನಾ ದೆಕುನ್ ತಾಕಾ ಹಾಲವ್ನ್ ಉಟಂವ್ಕ್ ಲಾಗ್ಲೊ. ಥೊಡ್ಯಾ ವೆಳಾನ್ ತೊ ಉಟ್ಲೊ ಆನಿ ಮ್ಹಾಕಾಚ್ ಪಳೆಲಾಗ್ಲೊ.

“ಮ್ಹಜಿ ವ್ಹಳೊಕ್ ಜಾಲಿವೆ?”

“ವ್ಹಯ್.. ತುಂ ಜೋನ್ಸನ್ ನ್ಹಯ್?…. ಸೋರಿ.. ತುಜೆಂ ನಾಂವ್ ಯಾದಿಕ್ ಯೇನಾ”

ಏಕ್ ಘಡಿ ಹಾಂವ್‌ಚ್ ಮ್ಹಾಕಾ ಸಾಂಬಾಳುಂಕ್ ಲಾಗ್ಲೊಂ. ಸಮಧಾನೆನ್ ತಾಚ್ಯಾ ತೊಂಡಾರ್ ಹಾಸೊ ಹಾಡಂವ್ಚ್ಯಾಕ್ ವಿಚಾರ್ಲೆಂ “ತುಜ್ಯಾ ಕಾಜಾರಾಕ್ ದೆಡೊ ಕೊಣ್ ಆಸ್ಲೊ?”

ಜೋನಿ ಫಕತ್ ಹಾಸ್ಲೊ ದೆಕುನ್ ಹಾಂವೆಂಚ್ ಮ್ಹಜೆಂ ನಾಂವ್ ಸಾಂಗ್ತಾನಾ “ವ್ಹಯ್… ” ಮ್ಹಣಾಲೊ.

ಎಕಾ ತೆಂಪಾರ್ ದಾಟೊಮೊಟೊ ಆಸ್ಲೊ ಜೋನಿ ಆತಾಂ ಅರ್ಧೊ ಜಾಲ್ಲೊ. ತಾಚ್ಯಾ ಕುಡಿಚ್ಯಾ ದುಕಿಸವೆಂ ತಾಚ್ಯಾ ಮತಿಚ್ಯಾ ದುಕಿಕ್ ಸಯ್ತ್ ಪಾರ್ಕುಂಕ್ ವೇಳ್ ಗೆಲೊನಾ.

ತಾಚ್ಯಾ ಖಟ್ಲ್ಯಾರ್ ತಾಚ್ಯಾ ಕಾತರ್ಲೆಲ್ಯಾ ಪಾಂಯಾಲಾಗಿಂ ಬಸ್ಲೊಂ. ಜೋನಿ ಥೊಡೊ ವೇಳ್ ಮಾವ್ನ್ ರಾವ್ಲೊ ದೆಕುನ್ ಹಾಂವೆಂಚ್ ಪ್ರಶ್ನ್ ಕೆಲೆಂ

“ಕಸೊ ಆಸಾಯ್ ಜೋನಿ, ಕಿತೆಂ ಜಾಲೆಂ ತುಕಾ… ತುಜಿ ಬಾಯ್ಲ್ ಕಂಯ್ ಆಸಾ?”

“ಕಿತೆಂ ಸಾಂಗ್ಚೆಂ ತುಕಾ, ಸುನೆಚ್ಯಾ ಬಾಂಳ್ತೆರಾಕ್ ಮ್ಹಣುನ್ ಗೆಲ್ಲೆಂ ಕೋವಿಡ್ ಪಿಡೆನಿಮ್ತಿಂ ಪುತಾಸವೆಂ ಅಮೆರಿಕಾಂತ್ ಆಸಾ,  ತ್ಯಾ ಡೊಕ್ಟರಾಂನಿ ಮ್ಹಜ್ಯೆ ದೊನ್‌ಯೀ ಪಾಂಯ್ ಕಾತರ್ಲ್ಯಾತ್, ದೆಕುನ್ ಸಗ್ಳೊ ದೀಸ್ ಹಾಂಗಾಚ್ ಲೊಳ್ಚೆಂ, ಮ್ಹಾಕಾ ಉಟಂವ್ಕ್ ಸಯ್ತ್ ಮನ್ಶಾಂ ಜಾಯ್, ಮ್ಹಾಕಾ ಉಕಲ್ನ್ ವ್ಹೀಲ್-ಚೇರಾಚೆರ್ ಬಸಂವ್ಕ್ ಸಯ್ತ್ ಮನ್ಶಾಂ ಜಾಯ್. ಥೊಡೆಪಾವ್ಟಿಂ ಮ್ಹಾಕಾ ಹೊ ಜೀವ್‌ಚ್ ನಾಕಾ ಮ್ಹಣ್ ಜಾತಾ” ಜೋನಿಚ್ಯಾ ತಾಳ್ಯಾಂತ್ ಕೊಡು ಭಗ್ಣಾಂ ಆಯ್ಕುನ್ ಹಾಂವ್ ಥಂಡ್ ಜಾಲೊಂ.

“ತುಕಾ ಖಾಂವ್ಕ್ ತಶೆಂಚ್ ವ್ಹಕತ್ ಸಗ್ಳೆಂ ಮೆಳ್ತಾಕಿ ಜೋನಿ?”

“ಖಾಂವ್ಕ್ ಪಿಯೆಂವ್ಕ್ ಸಗ್ಳೆಂ ಮೆಳ್ತಾ ಪುಣ್ ಮ್ಹಜಿ ಗತ್ ಚಿಂತುನ್ ಮ್ಹಾಕಾ ಮ್ಹಜೆರ್ ಕಾಂಠಾಳೊ ಯೆತಾ” ಜೋನಿ ಉಲವ್ನ್ ಆಸ್ಲೊ.

ದುಡು ನ್ಹಯ್, ಖಾಣ್-ಪಿಯೊವ್ಣೆ ನ್ಹಯ್, ವೇಳ್ ಜಾಯ್ ಆಸ್ಲೊ ದೆಕುನ್ ಸುಮಾರ್ ವೇಳ್ ಜೋನಿಸವೆಂ ಬಸ್ಲೊಂ. ತಾಕಾ ಆಯ್ಕಲೊಂ ಆನಿ ವೆಗಿಂಚ್ ಮೆಳುಂಕ್ ಯೆತಾಂ ಮ್ಹಣ್ತಾನಾ, ಆಶ್ರಮಾಚೊ ವ್ಹಡಿಲ್ ಆಯ್ಲೊ ಆನಿ ಮ್ಹಣಾಲೊ;

“ಜೋನಿಕ್ ವೆಗಿಂಚ್ ಚಲುಂಕ್ ಕುಮೊಕ್ ಜಾಂವ್ಚೆಪರಿಂ ಮಿನತ್ ಕರುನ್ ಆಸಾಂ, ರೋಟರಾಕ್ಟ್ ಕ್ಲಬ್ಬಾಚ್ಯಾಂನಿ ಆರ್ಟಿಫಿಶಲ್ ಪಾಂಯ್ ಬಸಂವ್ಚಿ ತಯಾರಾಯ್ ಕೆಲ್ಯಾ, ಏಕ್ ದೋನ್ ಮಯ್ನ್ಯಾಂನಿ ಜೋನಿ ತ್ಯಾ ಆರ್ಟಿಫಿಶಲ್ ಪಾಂಯಾಂಚ್ಯಾ ಮಜತೆನ್ ಇಲ್ಲೆಂ ಚಲುಂಕ್ ಸಕ್ತಲೊ”

ತಾಚಿಂ ಉತ್ರಾಂ ಆಯ್ಕಲ್ಲೆಪರಿಂಚ್ ಮ್ಹಜ್ಯಾ ದೊಳ್ಯಾಂಚ್ಯಾ ಖಾಂಚಿಯೆಂನಿ ಅಪ್ಶೆಂಚ್ ದೋನ್ ದುಕಾಂಚೆ ಥೆಂಬೆ ಗಳೊನ್ ತ್ಯಾ ಧರ್ಣಿಚೆರ್ ಪಡೊನ್ ಜಿರ್ಲೆ.

ಹಾಂವ್ ಥಂಯ್ಚೊ ಉಟೊನ್ ಭಾಯ್ರ್ ಆಯ್ಲೊಂ. ಮುಕ್ಲ್ಯಾನ್ ಅನ್ಯೇಕ್ ಭಾಂದಾಪ್ ಅಸ್ಲೆಂ, ಥಂಯ್ಚರ್ ಜಾಯ್ತಿಂ ಭುರ್ಗಿಂ, ಪ್ರಾಯ್ವಂತಾಂ ಆಸ್ಲಿಂ.

“ತೆಂ ಆಶ್ರಮ್, ವಾಟೆರ್ ಗತ್ ನಾಸ್ತಾನಾ ಭಂವ್ಚ್ಯಾ, ರಸ್ತ್ಯಾದೆಗೆಂತ್ಲ್ಯಾ ಖಚ್ರ್ಯಾ ಡಬ್ಬ್ಯಾಂತ್ಲೆಂ ಖಾಣ್ ವಿಂಚುನ್ ಖಾತೆಲ್ಯಾಂಕ್ ಹಾಡ್ನ್ ಘಾಲಾಂ.. ಥೊಡ್ಯಾಂಕ್ ತಾಂಚ್ಯಾ ಭುರ್ಗ್ಯಾಂನಿಂಚ್ ಸಾಂಡ್ಲಾಂ, ದೆಕುನ್ ಗತ್ ಆಧಾರ್ ನಾತ್ಲ್ಯಾಂಕ್ ಥಂಯ್ ಆಮಿ ಪಳೆವ್ನ್ ಆಸಾಂವ್” ತೊ ವ್ಹಡಿಲ್ ಉಲವ್ನ್ ಆಸ್ಲೊ.

ಹಾಂವೆಂ ಭೋವ್ ಖಾಲ್ತೆಪಣಾನ್ ಮ್ಹಜ್ಯಾ ಬೊಲ್ಸಾಂತ್ ದೊಡುನ್ ದವರ್‌ಲ್ಲಿ ಏಕ್ ಚೆಕ್ ಕಾಡುನ್ ತಾಚ್ಯಾ ಹಾತಿಂ ದಿವುನ್ ಮ್ಹಳೆಂ “ಮ್ಹಜ್ಯೆ ತರ್ಫೆನ್ ಫುಲಾಚಿ ಪಾಕ್ಳಿ ಹಿ, ಕಾಂಯ್ ಗರ್ಜೆಕ್ ಪಡತ್ ತರ್ ತಿತ್ಲೆಂಚ್ ಪುರೊ”

ಹಾಂವ್ ಗೆಟಿಭಾಯ್ರ್ ಯೆತಚ್ ತಾಣೆಂ ಗೇಟ್ ಧಾಂಪ್ಲಿ.

ಆಟೊ ಮುಕಾರ್ ಗೆಲ್ಲೆಪರಿಂಚ್ ಹಾಂವ್ ಮೊಬಾಯ್ಲಾಚೆರ್ ಟಾಯ್ಪ್ ಕರುನ್ ಗಿಲ್ಬರ‍್ಟಾಕ್ ವಾಟ್ಸಾಪ್ ಮೆಸೇಜ್ ಟಾಯ್ಪ್ ಕರುನ್ ಆಸ್ಲೊಂ;

“ತುಂ ಗಾಂವಾಂತ್ ಆಸೊನ್ ಕಿತ್ಲೊ ಪಯ್ಸ್ ಆಸಾಯ್. ಜಿವಿತ್ ಸರ‍್ವಾಂಕ್ ಏಕ್ ಸಮಾನ್ ಆಸಾನಾ, ದರೇಕ್ಲ್ಯಾಕ್ ಜಿವಿತಾಶವೆಂ ತಡ್‌ಜೋಡ್ ಕರುಂಕ್ ಪಡ್ತಾಚ್….”

ಸುಮಾರ್ ವೆಳಾನ್ ಗಿಲ್ಬರ‍್ಟಾಚಿ ಜಾಪ್ ಆಯ್ಲಿ “ಜೋನಿ ಕಸೊ ಆಸಾ?”

ಆತಾಂ ಹಾಂವ್ ವಾಟ್ಸಾಪಾಚೆರ್ ಗಿಲ್ಬರ‍್ಟಾಕ್ ಬ್ಲೋಕ್ ಕರ‍್ಚ್ಯಾರ್ ಆಸ್ಲೊಂ.

►  ವಲ್ಲಿ ಕ್ವಾಡ್ರಸ್