ಕಿಟಾಳ್ ಸಂಪಾದಕ್ ಎಚ್ಚೆಮಾಕ್ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ

ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ 2022  ವ್ಯಾ ವರ್ಸಾಚ್ಯೊ ಗೌರವ್ ಪ್ರಶಸ್ತ್ಯೊ ಜಾಹೀರ್ ಕೆಲ್ಲ್ಯೊ ಆಸುನ್,  ಸಾಹಿತ್ಯ್ ಶೆತಾಂತ್  ಎಚ್ಚೆಮ್, ಪೆರ್ನಾಲ್, ಮಂಗ್ಳುರ್,  ಕಲಾ ಶೆತಾಂತ್ ರಮೇಶ್ ಕಾಮತ್, ಬೆಂಗ್ಳುರ್ ಆನಿ ಲೋಕ್‌ವೇದ್ ಶೆತಾಂತ್ ಕುಮುದಾ ಗಡಕರ್, ಕಾರ್ವಾರ್ ಹಾಂಕಾಂ ಪ್ರಶಸ್ತ್ಯೊ ಫಾವೊ ಜಾಲ್ಯಾತ್. ಪ್ರಶಸ್ತಿ ಪ್ರದಾನ್ ಕಾರ್ಯೆಂ – ಆಯ್ತಾರಾ 2022 ಸಪ್ತೆಂಬರ್ 18 ವೆರ್ ಕಾಶಿಮಠ, ಬೆಂಗ್ಳುರಾಂತ್ ಚಲ್ತಲೆಂ ಮ್ಹಣ್ ಅಕಾಡೆಮಿಚೊ ಅಧ್ಯಕ್ಶ್ ಡಾ| ಕೆ.  ಜಗದೀಶ ಪೈ ಹಾಣಿ ಪತ್ರಾ ಪರಿಷದೆಂತ್ ಕಳಯ್ಲಾಂ.

ಉಂಚ್ಲ್ಯಾ ಶಿಕ್ಪಾಚೊ ಮಂತ್ರಿ ಡಾ| ಸಿ. ಎನ್. ಅಶ್ವತ್ ನಾರಾಯಣ ತಶೆಂ ಕನ್ನಡ ಆನಿ ಸಂಸ್ಕೃತಿಚೊ ಮಂತ್ರಿ ವಿ. ಸುನಿಲ್ ಕುಮಾರ್ ಪ್ರಶಸ್ತ್ಯೊ ಪ್ರದಾನ್ ಕರ್ಚೆ ಆಸುನ್, ಮಂಗ್ಳುರ್ ದಕ್ಷಿಣ್ ವಿದಾನ್ ಸಭೆಚೊ ಶಾಸಕ್  ವೇದವ್ಯಾಸ್ ಕಾಮತ್, ವಿದಾನ್ ಪರಿಷತ್ ಸಾಂದೊ ಪ್ರತಾಪ್ ಸಿಂಹ ನಾಯಕ್, ಡಾ| ಎನ್. ಮಂಜುಳ, ಪ್ರಕಾಶ್ ಜೆ. ಟಿ., ವಿ.ಎನ್.ಮಲ್ಲಿಕಾರ್ಜುನ ಸ್ವಾಮಿ, ಜಯಶ್ರೀ ಶಾನುಬಾಗ್ ಆನಿ ಉದ್ಯಮಿ ಡಾ| ಪಿ. ದಯಾನಂದ ಪೈ ಕಾರ್ಯಾಕ್ ಹಾಜರ್ ಸಯ್ರೆ ಜಾವ್ನ್ ಹಾಜರ್ ಆಸ್ತೆಲೆ ಮ್ಹಳಾಂ.

ಹ್ಯಾಚ್ ಕಾರ್ಯಾಂತ್ ಕೊಂಕಣಿ ಸಿರಿಸಂಪದ, ಪ್ರಶಸ್ತಿ ಪುರಸ್ಕೃತಾಚೆಂ ವಳ್ಕೆ ಪುಸ್ತಕ್, ಆನಿ ಭುಂಯ್‍ಕಾಂಪ್, ಬ್ರುಗನ ಸಾಂಗಿಲ್ಲೆ  ಪುಲ್ಲಾ ಕಾಣಿಯಾಂ ಪುಸ್ತಕ್ ಉಗ್ತಾವಣ್ ಜಾತೆಲಿಂ. ಪತ್ರಾ ಪರಿಷದೆಂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ್ ಡಾ| ಜಗದೀಶ್ ಪೈ  ಹಾಂಚೆ ಸಾಂಗಾತಾ, ಸಾಂದೆ ಅರುಣ್ ಜಿ. ಶೇಟ್, ಕೆನ್ಯೂಟ್ ಜೀವನ್ ಪಿಂಟೊ, ನವೀನ್ ನಾಯಕ್, ಗೋಪಾಲಕೃಷ್ಣ ಭಟ್ ಆನಿ ರೆಜಿಸ್ತ್ರಾರ್ ಮನೋಹರ್ ಕಾಮತ್ ಹಾಜರ್ ಆಸ್ಲೆ.

ಎಚ್ಚೆಮ್ ಪೆರ್ನಾಳ್ ಲಿಕ್ಣೆನಾಂವಾನ್ ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ಒಳ್ಕೆಚೊ ಹೆನ್ರಿ ಮೆಂಡೋನ್ಸಾ – ಕೊಂಕಣಿ, ಕನ್ನಡ, ಇಂಗ್ಲಿಷ್, ಹಿಂದಿ ಆನಿ ಮರಾಠಿ ಭಾಸಾಂನಿ ಬರಯ್ತೇ ಆಸಾ. ಸುರ್ವಾತೆರ್ ತಾಚಿಂ ಬರ್ಪಾಂ ಆನಿ ವೆಂಗ್ಯ್‌ಚಿತ್ರಾಂ ಕನ್ನಡ ಪತ್ರಾಂನಿ ಪರ್ಗಟ್ ಜಾಲಿಂ. 80 ಧಾಕ್ಡ್ಯಾಂತ್  ‘ಯುವಕ್’ ಪತ್ರಾರ್ ವ್ಯಂಗ್ಯ್‌ಚಿತ್ರ್‌ಕಾರ್ ಜಾವ್ನ್ ಕೊಂಕ್ಣೆಕ್ ಪ್ರವೇಶ್ ಜಾಲ್ಲ್ಯಾ ಪಾಸುನ್ ತಾಚ್ಯೊ ಕವಿತಾ, ಕಾಣಿಯೊ, ಲೇಖನಾಂ ಆನಿ ಪ್ರಬಂದ್ ವಿವಿಧ್ ಕೊಂಕಣಿ ಪತ್ರಾಂನಿ ಆನಿ ಜಾಳಿಜಾಗ್ಯಾಂನಿ ಫಾಯ್ಸ್  ಜಾತೇ ಆಸಾತ್.

 750 ಲಾಗಿಂ ಕವಿತಾ, ಶೆಂಬರಾಂ ವಯ್ರ್ ಮಟ್ವ್ಯೊ ಕಾಣಿಯೊ, 2,000 ವಯ್ರ್ ಪ್ರಬಂದ್ ಆನಿ ಲೇಖನಾಂ ಪಾಟ್ಲ್ಯಾ 38 ವರ್ಸಾಂನಿ ತಾಣೆ ಫಾಯ್ಸ್ ಕೆಲ್ಯಾಂತ್.  ’ಚಲ್ಯಾಂಕ್ ಚತ್ರಾಯ್’ (1999), ’ಕೈದ್ಯಾಚ್ಯೊ ಕವಿತಾ’ (2004), ’ಬಾಮುಣಾಚೆಂ ಚೆಡುಂ’ (2006) – ತಾಚೆ ಪರ್ಗಟಿತ್ ಕವಿತಾ ಜಮೆ. ‘ದೆವಾಕ್ ಸೊಡ್‌ಲ್ಲೊ ಪಾಡೊ’ ( 2002)   ’ಬೀಗ್ ಆನಿ ಬಿಗಾತ್’ (2016) ತಾಚ್ಯಾ ಮಟ್ವ್ಯಾ ಕಾಣಿಯಾಂಚೆಂ ಪುಸ್ತಕ್.  ’ಕೊಂಕಣಿ ಕಾವ್ಯೆಂ: ರೂಪಾಂ ಆನಿ ರೂಪಕಾಂ’ (2021) ಆಧುನಿಕ್ ಕೊಂಕ್ಣಿ ಕಾವ್ಯಾಚ್ಯಾ ವಿಮರ್ಷಾತ್ಮಕ್ ಪ್ರಬಂದಾಂಚೊಂ ಜಮೊ.

2006  ವ್ಯಾ ವರ್ಸಾ ’ದಾಯ್ಜ್.ಕಾಮ್’ ಹಾಣಿಂ ತಾಕಾ ’ವರ್ಸಾಚೊ ಕವಿ’ ಮ್ಹಣ್ ವಿಂಚುನ್ ಕಾಡ್‍ಲ್ಲೊ. ಮಂಗ್ಳುರ್ ಆನಿ ಮುಂಬಯ್ ಆಕಾಶವಾಣಿಂತ್ ತಾಚಿಂ ಕಾರ್ಯಕ್ರಮಾಂ ಸಾದರ್ ಜಾಲ್ಯಾಂತ್.

ಕಿಟಾಳ್ . ಕೊಮ್ ಜಾಳಿಜಾಗ್ಯಾಚೊ ಸ್ಥಾಪಕ್ ಆನಿ ಸಂಪಾದಕ್ ಜಾವ್ನಾಸ್ಚೊ ತೋ ಪಾಟ್ಲ್ಯಾ 12 ವರ್ಸಾಂ ಮೆರೆನ್ ಖಳನಾಸ್ತಾನಾ ಕಿಟಾಳ್ ಜಾಳಿಸುವಾತ್ ಚಲವ್ನ್ ಆಯ್ಲಾ.  2013  ವ್ಯಾ ವರ್ಸಾ ಪಂದ್ರಾಳೆಂ ಜಾವ್ನ್ ಸ್ಥಾಪನ್ ಕೆಲ್ಲೆಂ ’ಆರ್ಸೊ’ ಕೊಂಕ್ಣಿ ನೇಮಾಳೆಂ ಆತಾಂ ಮಯ್ನ್ಯಾಳೆಂ ಜಾವ್ನ್ ಕವಿ ವಿಲ್ಸನ್ ಕಟೀಲ್ ಹಾಚ್ಯಾ ಸಂಪಾದಕ್ಪಣಾರ್ ಫಾಯ್ಸ್ ಜಾತೇ ಆಸಾ. ಎವರ್‌ಶೈನ್ ಪ್ರಕಾಶನ್ ಹಾಚೊ ಸಂಪಾದಕ್ ಜಾವ್ನ್ , ಉಪ್ರಾಂತ್ ಕಿಟಾಳ್ ಪಬ್ಲಿಕೇಶನ್ಸ್ ಮ್ಹಳ್ಳೊ ಪ್ರಕಾಶನ್ ಸಂಸ್ಥ್ಯಾ ಮಾರಿಫಾತ್ ತಾಣೆ ಗುಣಾಮೊಲಾಚಿಂ ಕೊಂಕ್ಣಿ  ಪುಸ್ತಕಾಂ ಫಾಯ್ಸ್ ಕೆಲ್ಯಾಂತ್.    ತರುಣ್ ಲೇಖಕಾಂಕ್ ಉತ್ತೇಜನ್ ದಿಂವ್ಚ್ಯಾಕ್ 2012 ವ್ಯಾ ವರ್ಸಾ ಪಾಸುನ್ ಅಬುದಾಬಿಚೊ ಅನಿವಾಸಿ ಉದ್ಯಮಿ ಮಾನೆಸ್ತ್ ಲಿಯೋ ರೊಡ್ರಿಗಸ್ ಕುಟಮ್ ಹಾಂಚ್ಯಾ ಪ್ರಾಯೋಜಕ್ಪಣಾರ್  ’ಕಿಟಾಳ್ ಯುವ ಪ್ರಶಸ್ತಿ’ ಆಸಾ ಕೆಲ್ಯಾ.

2018 ವ್ಯಾ ವರ್ಸಾ ತಾಚ್ಯಾ ’ಬೀಗ್ ಆನಿ ಬಿಗಾತ್’ ಕಥಾ ಪುಸ್ತಕಾಕ್  ವಿಶ್ವ ಕೊಂಕಣಿ ಕೇಂದ್ರಾಚಿ  ಶ್ರೀಮತಿ ವಿಮಲ ವಿ. ಪೈ ಪ್ರಶಸ್ತಿ ಫಾವೊ ಜಾಲ್ಯಾ. ತ್ಯಾಚ್ ವರ್ಸಾ ಕವಿತಾ ಟ್ರಸ್ಟಾನ್ ಕೊಂಕ್ಣಿ  ಕವಿತೆಚ್ಯಾ ವಾವ್ರಾಖಾತಿರ್ ಪಾಟಂವ್ಚಿ  ’ಮಥಾಯಸ್ ಕುಟ್ಮಾಚಿ ಕವಿತಾ ಪ್ರಶಸ್ತಿ’ಯ್ ತಾಕಾ ಪ್ರಾಪ್ತ್ ಜಾಲ್ಯಾ. ಕವಿತಾ ಪಬ್ಲಿಕೇಶನ್ಸ್ ಹಾಣಿ ಫಾಯ್ಸ್ ಕೆಲ್ಲ್ಯಾ ’ಕೊಂಕಣಿ ಕಾವ್ಯೆಂ: ರೂಪಾಂ ಆನಿ ರೂಪಕಾಂ’ ಪುಸ್ತಕಾಕ್ 2021 ಚೊ ಉತ್ತೀಮ್ ಪುಸ್ತಕ್ ಮ್ಹಣ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಥಾವ್ನ್ ಪುಸ್ತಕ್ ಬಹುಮಾನ್ ಫಾವೊ ಜಾಲಾಂ.

ಶ್ರೀ ರಮೇಶ್ ಕಾಮತ್

ಪ್ರಸ್ತುತ್ ಬೆಂಗ್ಳುರ್ ನಿವಾಸಿ, ರಮೇಶ್ ಕಾಮತ್ ಹಾಣಿ ಕೊಂಕ್ಣಿ ನಾಟಕ್, ಸಿನೆಮಾ ಆನಿ ಸಾಹಿತ್ಯ್ ಶೆತಾಂತ್ ಜಾಯ್ತೆಂ ಕಾಮ್ ಕೆಲಾಂ. ಆಯ್ಲೆವಾರ್ ಈಜಿಪ್ಟಾಂತ್ ಚಿತ್ರೀಕರಣ್ ಜಾಲ್ಲೆಂ ಭುರ್ಗ್ಯಾಂಚೆಂ ಸಿನೆಮಾ ಅಪ್ಸರಾಧಾರ ಧರುನ್ ತೀನ್ ಕೊಂಕ್ಣಿ ಸಿನೆಮಾ ತಾಣೆ ನಿರ್ಮಾಣ್ ಆನಿ ನಿರ್ದೇಶನ್ ಕೆಲ್ಯಾಂತ್.  1971 ತೆ  1975 ಪರ್ಯಾಂತ್ ಪೂನಾಂತ್ ಶಿಕೊನ್ ಆಸ್ತಾನಾ  ಜಿ.ಎಸ್ ಬಿ ಸಂಸ್ಥ್ಯಾಂನಿ ಕಾರ್ಯಾಳ್ ಆಸುನ್ ಪ್ರತಿಷ್ಠಿತ್ ಬಾಲ ಗಂಧರ್ವ ರಂಗ ಮಂದಿರಾಂತ್  ಪಾಂಚ್ ಕೊಂಕ್ಣಿ  ನಾಟಕ್ ತಾಣೆ ಪ್ರದರ್ಶನ್ ಕೆಲ್ಯಾತ್. 1980 ವ್ಯಾ  ವರ್ಸಾ ಕೊಂಕ್ಣಿ ಏಕ್ ಸಾಹಿತ್ಯಿಕ್ ಭಾಸ್ ಮ್ಹಣ್ ರಾಷ್ಟ್ರೀಯ್ ಮಾನ್ಯತಾ ಮೆಳ್ಚೆ ಪಯ್ಲೆಂಚ್, ಪಯ್ಲೆ ಪಾವ್ಟಿಂ ಸಾರಸ್ವತ್ ಕೊಂಕ್ಣೆಂತ್  ಜನ ಮನ ಮ್ಹಳ್ಳೆಂ ಸಿನೆಮಾ ನಿರ್ಮಾಣ್ ಕರುನ್ ತಾಣೆ ನಿರ್ದೇಶನ್ ಕೆಲಾಂ.

1982 ವ್ಯಾ ವರ್ಸಾ ಕೊಂಕಣಿ ಜಾನಪದ್ ಪದಾಂಚಿಂ ಕ್ಯಾಸೆಟ್ ತಯಾರ್ ಕೆಲ್ಯಾ. ಶ್ರೀ. ಪ್ರವೀಣ್ ನಾಯಕ್ ಹಾಚ್ಯಾ ನಿರ್ದೇಶನಾಖಾಲ್  ಬೆಂಗ್ಳುರ್ ದೂರದರ್ಶನಾಂತ್ ಜಾಯ್ತ್ಯಾ ನಾಟಕಾಂನಿ ತಾಣೆ ನಟನ್ ಕೆಲಾಂ. ರಂಜನಾ ಆರ್ಟ್ಸ್ ಹ್ಯಾ ಸಂಸ್ಥ್ಯಾಚೊ ಅಧ್ಯಕ್ಷ್ ಜಾವ್ನ್ –  ಮೈಸೂರ್, ಮಂಗ್ಳುರ್, ಬೆಂಗ್ಳುರ್, ಚೆನ್ನೈ, ಪುಣೆ, ಮುಂಬೈ, ಡೆಲ್ಲಿ ಅಶೆಂ  ದೇಶ್‌ಭರ್  30 ಪ್ರಾಸ್ ಚಡ್ ನಾಟಕ್ ಪ್ರದರ್ಶನ್ ಕೆಲ್ಯಾತ್. ಹರ್ ವರ್ಸಾ ಭುರ್ಗ್ಯಾಂಕ್ ಕೊಂಕ್ಣಿ ನಾಟಕ್ ಶಿಬಿರಾಂ ತೋ ಮಾಂಡುನ್  ಹಾಡ್ತಾ. NAKA (ಅಸೋಸಿಯೇಷನ್ ​​ಆಫ್ ಯುಎಸ್) ಹಾಣಿ 2016 ವ್ಯಾ ವರ್ಸಾ ತಾಚ್ಯಾ ಕೊಂಕ್ಣಿ ವಾವ್ರಾಕ್ ಜಿವಿತಾವ್ದೆಚೊ ಪುರಸ್ಕಾರ್ ಪಾಟವ್ನ್ ಮಾನ್ ಕೆಲಾ.  2016 ವ್ಯಾ ವರ್ಸಾ ಆ ವೈ ಜಾ ಸಾ ಮ್ಹಳ್ಳೆಂ ಪಯ್ಲೆಂ  ಭುರ್ಗ್ಯಾಂಚೆಂ ಸಿನೆಮಾ ಕೊಂಕ್ಣೆಂತ್  ನಿರ್ಮಾಣ್ ಆನಿ ನಿರ್ದೇಶನ್ ಕೆಲಾಂ.

ಶ್ರೀಮತಿ ಕುಮುದಾ ಗಡಕರ್

ಆವಯ್ ಥಾವ್ನ್ ಕೊಂಕ್ಣಿ ಜಾನಪದ್ ಕಲಾ ಶಿಕೊನ್, ಸಾದರ್ ಕರುನ್ ಆಯಿಲ್ಲ್ಯಾ ಕುಮುದಾ ಗಡಕರ್ ಹಿಚೊ ಪತಿ ಸಂಗೀತ್ ಶಿಕ್ಷಕ್ ಆನಿ ಕೀರ್ತನ್‌ಕಾರ್ ಜಾವ್ನಾಸೊನ್, ಮಾಂವ್ ತಬ್ಲಾ ವಾದಕ್ ಜಾವ್ನಾಸ್‌ಲ್ಲೊ. 60 ತೆ  70 ಕೊಂಕಣಿ ನಾಟಕಾಂನಿ ಆನಿ 100 ಚ್ಯಾಕೀ ಚಡ್ ಜಾನಪದ್ ಪೌರಾಣಿಕ ಕೊಂಕಣಿ ಖೆಳಾಂನಿ ತಿಣೆ ವಾಂಟೊ ಘೆತ್ಲಾ. ಪಾಟ್ಲ್ಯಾ 55 ವರ್ಸಾಂ ಪಾಸುನ್ ಕೊಂಕಣಿ ಜಾನಪದ ಕಲಾ ಜಾವ್ನಾಸ್ಚೆ –  ಧಾಲೊ, ಮಾಂಡೊ ಮಗಡಿ, ತೊಣೆಯಾಚ್, ದೀಪ ಮಾಳನಾಯಾಟೆ, ಸಂಪ್ರದಾಯಿಕ್ ಗಿತಾಂ ಪ್ರದರ್ಶನಾಂ ಕರುನ್ ಆಯ್ಲ್ಯಾ.  1992 ಥಾವ್ನ್ ಖಳನಾಸ್ತಾನಾ 10-15 ವರ್ಸಾಂ ಕಾರವಾರ್ ಕರಾವಳಿ ಉತ್ಸವಾಂತ್ ತಿಚ್ಯಾ ಪಂಗ್ಡಾನ್ ಪ್ರದರ್ಶನಾಂ ದಿಲ್ಯಾಂತ್.  2009 ಥಾವ್ನ್  2011 ಪರ್ಯಾಂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡಮಿನ್ ಉತ್ತರ ಕರ್ನಾಟಕಾಂತ್ 15  ಜಿಲ್ಲ್ಯಾಂನಿ ಮಾಂಡುನ್ ಹಾಡ್ಲೆಲ್ಯಾ  ಕೊಂಕಣಿ ಜಾಗೃತ ಅಭಿಯಾನ್ ಹಾಂತು ತಿಚ್ಯಾ ಪಂಗ್ಡಾನ್ ವಾಂಟೊ ಘೆತ್ಲಾ. ಕನ್ನಡ ಸಂಸ್ಕೃತಿ ಇಲಾಖೊ, ಕನ್ನಡ ಅಭಿವೃದ್ಧಿ ಪ್ರಾಧಿಕಾರ, ಮಾಂಡ್ ಸೊಬಾಣ್, ವಿಶ್ವ ಕೊಂಕ್ಣಿ ಕೇಂದ್ರ್ – ಅಶೆಂ ವೆವೆಗ್ಳ್ಯಾ ಸರ್ಕಾರಿ ತಶೆಂ ಖಾಸ್ಗಿ ಸಂಸ್ಥ್ಯಾಂನಿ ಮಾಂಡುನ್ ಹಾಡ್‌ಲ್ಲ್ಯಾ ಕಾರ್ಯಕ್ರಮಾಂನಿ ಕಲಾ ಪ್ರದರ್ಶನಾಂ ದಿಲ್ಯಾಂತ್. ಪ್ರಸ್ತುತ್ ತಿಚೆಂ ಘರಾಣೆಂ, ಕಾರ್ವಾರಾಂತ್ ಕಲೆಚ್ಯಾ ಶಿಕ್ಪಾಂತ್ ಆನಿ ಸಾದರ್ಪಣಾಂತ್ ದಿಸ್ಪಡ್ತೊ ಗ್ರಾಸ್ ಜೊಡುನ್, ದೀಸ್ ಸಾರುನ್ ಆಸಾ.