“ದಿಶ್ಟಾವೊ ಆನಿ ಧಯ್ರ್ ಅಸ್ಲ್ಯಾರ್ ಶೆವೊಟ್ ಜೊಡ್ಚೆಂ ಜಿವಿತಾಂತ್ ಕಶ್ಟಾಂಚೆಂ ನ್ಹಯ್ ” ಮ್ಹಣಾಲೊ ಎಂ.ಸಿ.ಸಿ. ಬ್ಯಾಂಕಾಚೊ ಅಧ್ಯಕ್ಶ್ ಮಾನೆಸ್ತ್ ಅನಿಲ್ ಲೋಬೊ. ತೋ ಮಂಗ್ಳುರ್ಚ್ಯಾ ಎಂಸಿಸಿ ಬ್ಯಾಂಕ್ ಸಭಾಭವನಾಂತ್, ಪಥದರ್ಶಿನಿ ಸೇವಾ ಟ್ರಸ್ಟ್ ಹಾಣಿ ಮಾಂಡುನ್ ಹಾಡ್ಲೆಲ್ಯಾ ವಿದ್ಯಾರ್ಥಿ ವೇತನ್ ವಾಂಟಪ್ ಆನಿ ವೃತ್ತಿ ಮಾರ್ಗದರ್ಶನ್ ಕಾರ್ಯಕ್ರಮಾಚೊ ಅಧ್ಯಕ್ಷ್ ಜಾವ್ನ್ ಉಲಯ್ತಾಲೊ.
“ಕಶ್ಟ್ ನಾತ್‌ಲ್ಲೆಂ ಜಿವಿತ್ ನಾ. ಜಿವಿತಾಂತ್ ಅಡ್ಕಳ್ಯೊ ಧಯ್ರಾನ್ ಫುಡ್ ಕರ್ಚೆಂಚ್ ಪಂಥಾಹ್ವನ್. ಮ್ಹಜ್ಯಾ ಜಿವಿತಾಂತೀ ಮ್ಹಾಕಾ ಜಾಯ್ತೆ ಅಡ್ಕಳ್ಯೊ ಫುಡ್ ಕರುಂಕ್ ಪಡ್ಲ್ಯಾತ್. ಹಾಂವೆ ಧಯ್ರ್ ಸಾಂಡುಂಕ್ ನಾ. ಜಿವಿತಾಂತ್ ಸಾಧನ್ ಕರಿಜಯ್ ತರ್ ವಿದ್ಯಾರ್ಥಿ ಆಸ್ತಾನಾಂಚ್ ಏಕ್ ಸ್ಪಶ್ಟ್ ದಿಶ್ಟಾವೊ ದವರ್ಲ್ಯಾರ್ ಬರೆಂ. ಸಲ್ವಣಿ ತಾತ್ಕಾಲಿಕ್. ಕೆದಾಳಾಯ್ ಧಯ್ರ್ ಸಾಂಡಿನಾಯೆ” ಮ್ಹಣ್ ಮಾನೆಸ್ತ್ ಅನಿಲ್ ಲೋಬೊನ್ ವಿದ್ಯಾರ್ಥಿಂಕ್ ಸಲಹಾ ದಿಲಿ.
ಗರ್ಜೆವೊಂತ್ ವಿದ್ಯಾರ್ಥಿಂಕ್ ಕುಮಕ್ ಕರ್ಚ್ಯಾ ಆನಿ ಸಾರ್ಕಿ ವಾಟ್ ದಾಕಂವ್ಚೆ ದಿಶೆನ್ ಮಾರ್ಗದರ್ಶನ್ ಶಿಬಿರಾಂ ಮಾಂಡುನ್ ಹಾಡ್ಚ್ಯಾ ಪಥದರ್ಶಿನಿ ತಸಲ್ಯಾ ಸಂಸ್ಥ್ಯಾಚಿ ಪ್ರಸ್ತುತ್ ಸಮಾಜೆಂತ್ ವರ್ತಿ ಗರ್ಜ್ ಆಸಾ ಮ್ಹಣೊನ್ ತಾಣೆ ಪಥದರ್ಶಿ ಸೇವಾ ಟ್ರಸ್ಟಾಚ್ಯಾ ವಾವ್ರಾಚಿ ತೊಕ್ಣಾಯ್ ಕೆಲಿ. ಸಾಂಗಾತಾ , ಸಹಕಾರಿ ರಂಗಾಂತ್ಲೆಂ ಪ್ರಮುಕ್ ಬ್ಯಾಂಕ್ ಜಾವ್ನಾಸ್ಚ್ಯಾ ಎಮ್.ಸಿ.ಸಿ. ಬ್ಯಾಂಕಾಥಾವ್ನ್ ಅಸಲ್ಯಾ ಸಮಾಜ್‌ಮುಕಿ ಕಾಮ್ ಕರ್ಚ್ಯಾ ಸಂಗ್ ಸಂಸ್ಥ್ಯಾಂಕ್ ಕೆದಾಳಾಯ್ ಸಭಾಸಾಲ್, ತರ್ಭೆತಿ ಸಾಲ್ ಆನಿ ಹೆರ್ ಸವ್ಲತ್ಯೊ ಫುಂಕ್ಯಾಕ್ ಮೆಳ್ತಲ್ಯೊ ಮ್ಹಣ್ ಭಾಸಾಯ್ಲೆಂ. ಎಮ್.ಸಿ.ಸಿ. ಬ್ಯಾಂಕಾಂತ್ ವಿದ್ಯಾರ್ಥಿಂಚ್ಯಾ ಉರವ್ಣೆ ಖಾತ್ಯಾಕ್ ಪಾಂಚ್ ಠಕ್ಕೆ ವಾಡ್ ಮೆಳ್ತಾ ತಶೆಂಚ್ ಹೆರ್ ಬ್ಯಾಂಕಾಂಚ್ಯಾ ತುಲನಾಂತ್ ಶಿಕ್ಪಾ ರೀಣ್ ಸ್ಪರ್ಧಾತ್ಮಕ್ ವಾಡಿರ್ ಮೆಳ್ತಾ. ಹ್ಯಾ ಸವ್ಲತೆಂಚೊ ವಿದ್ಯಾರ್ಥಿ ಆನಿ ಪೋಶಕಾಂನಿ ಫಾಯ್ದೊ ಜೊಡುಂಕ್‌ಯ್ ತಾಣೆ ಉಲೊ ದಿಲೊ.
ಮುಕೆಲ್ ಸಯ್ರೊ ಕರ್ನಾಟಕ ಲೋಕ ಸೇವಾ ಆಯೋಗಾಚೊ ಹಾಲಿ ಸಾಂದೊ, ತಶೆಂ ಮಾಲ್ಘಡೊ ಪತ್ರ್‌ಕರ್ತ್, ಪ್ರಾಧ್ಯಾಪಕ್ – ದೊ| ರೊನಾಲ್ಡ್ ಅನಿಲ್ ಫೆರ್ನಾಂಡಿಸ್ ಹಾಣಿ ವಿದ್ಯಾರ್ಥಿಂಕ್ ಸರ್ಕಾರಿ ಕಾಮಾಂ ಆಪ್ಣಾಂವ್ಚೆ ದಿಶೆನ್ ಪ್ರೇತನ್ ಜ್ಯಾರಿ ದವರುಂಕ್ ಸಾಂಗ್ಲೆಂ. ಸ್ವತಾಚೊ ದಾಕ್ಲೊ ದೀವ್ನ್ ಡೊ| ರೊನಾಲ್ಡ್ ಮ್ಹಣಾಲೊ – “ಬಾರತೀಯ್ ವಾರ‍್ಯಾ ಸಯ್ನಾಂತ್ ಭರ್ತಿ ಜಾಯ್ಜೆ ಮ್ಹಳ್ಳ್ಯಾ ಆಶೆಚಿ ಪಾಟ್ ಧರುನ್ ಚ್ಯಾರ್ ಚ್ಯಾರ್ ದೀಸ್ ರಯ್ಲಾರ್ ಪಯ್ಣ್ ಕರುನ್ ಸ್ಪರ್ಧಾತ್ಮಕ್ ಪರೀಕ್ಷಾ ಬರಂವ್ಕ್ ಆಪುಣ್ ವೆತಾಲೊಂ. ಗ್ರಂಥಾಲಯಾಂತ್ ಬಸೊನ್ ಎಂಪ್ಲೊಂಯ್ ಮೆಂಟ್ ನ್ಯೂಸ್ ವಾಚ್ತಾಲೊಂ. ಡಿಫೆನ್ಸ್, ಬ್ಯಾಂಕ್ ಮ್ಹಣೊನ್ ಹಾಂವೆ ಬರಯಿಲ್ಲ್ಯಾ ಪರೀಕ್ಷಾಂಕ್ ಲೇಕ್ ನಾ”
ಕರ್ನಾಟಕ ಲೋಕ ಸೇವಾ ಆಯೋಗಾಚ್ಯಾ ಪರೀಕ್ಷೆ ವಿಶ್ಯಾಂತ್ ಮಾಹೆತ್ ದೀವ್ನ್ ಡೊ| ರೊನಾಲ್ಡ್ ಮ್ಹಣಾಲೊ ” ಸರ್ಕಾರಿ ಪರೀಕ್ಶೆಂತ್ – ಪ್ರಿಲಿಮ್ಸ್, ಮೇಯ್ನ್ ಆನಿ ಸಂದರ್ಶನ್ ಅಶೆಂ ತೀನ್ ಹಂತ್ ಆಸ್ತಾತ್, ತೀನೂಯ್ ಹಂತ್ ಉತ್ತೀರ್ಣ್ ಜಾಲ್ಯಾ ಉಪ್ರಾಂತ್ ರ‍್ಯಾಂಕಿಂಗಾ ಪರ್ಮಾಣೆ ಗ್ರೂಪ್ ಎ.ಬಿ.ಸಿ ಆನಿ ಡಿ ಮ್ಹಣ್ ಕಾಮಾಂ ಮೆಳ್ತಾತ್. ಎ,ಸಿ, ಡಿವೈ‌ಎಸ್‌ಪಿ, ತಹಶೀಲ್ದಾರ್ ಅಸಲಿಂ ಸರ್ಕಾರಿ ಕಾಮಾಂ ಜೊಡುಂಕ್ ಕೆಪಿಎಸ್‌ಸಿ ಪರೀಕ್ಷಾ ಬರಯ್ಜೆ ಪಡ್ತಾ. ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ಕೆಪಿಎಸ್‌ಸಿ ಪರೀಕ್ಷಾ ಬರಂವ್ಚ್ಯಾ ಭುರ್ಗ್ಯಾಂ ಪಯ್ಕಿ ಕರಾವಳಿಚ್ಯಾ ವಿದ್ಯಾರ್ಥಿಂಚೊಂ ಸಂಕೊ ಬೋವ್ ಉಣೊ ಆಸಾ. ಎಕಾಚ್ ಪ್ರೇತನಾಂತ್ ಜೀಕ್ ಮೆಳ್ತಾ ಮ್ಹಣೊಂಕ್ ಜಾಯ್ನಾ, ಪೂಣ್ ಎಮ್.ಸಿ.ಸಿ. ಬ್ಯಾಂಕಾಚ್ಯಾ ಅಧ್ಯಕ್ಷಾನ್ ಸಾಂಗ್‌ಲ್ಲೆಪರಿಂ ಧಯ್ರ್ ಸಾಂಡಿನಾಯೆ. ಆನಿ ಹಟ್ ಸೊಡಿನಾಯೆ, ಪ್ರೇತನ್ ಜ್ಯಾರಿ ದವರಿಜೆ”
“ಸಾಮಾನ್ಯ್ ಜ್ಞಾನ್ ಸ್ಪರ್ಧಾತ್ಮಕ್ ಪರೀಕ್ಷೆಕ್ ಬೋವ್ ಗರ್ಜೆಚೆಂ ಆಸೊನ್ ಸದಾಂಯ್ ಪಂದ್ರಾ ತೆ ವೀಸ್ ಮಿನುಟಾಂ ಖಬ್ರೆ ಪತ್ರಾಂ ವಾಚ್ಚಿ ಸವಯ್ ಕೆಲ್ಯಾರ್ ಬರೆಂ. ಸಾಂಗಾತಾ ಹೆರ್ ಗಾಂವಾಂಕ್ ಪಯ್ಣ್ ಕರ್ಚೆಂ, ವೆವೆಗ್ಳ್ಯಾ ಪ್ರದೇಶಾಂ ವಿಶ್ಯಾಂತ್ ಮಾಹೆತ್ ಆಪ್ಣಾಂವ್ಚೀಯ್ ಬರಿ ಗಜಾಲ್. ಎಕಾ ತರೀ ಖೆಳಾಂತ್ ಆಸಕ್ತ್ ವಾಡವ್ನ್ ದಿಸಾಚೊ ಥೊಡೊ ವೇಳ್ ತರೀ ಖೆಳ್ಚೆಂ ಭಲಾಯ್ಕೆಕ್ ಬರೆಂ ಅನಿ ಶಿಕ್ಪಾಕ್ ಪೂರಕ್. ಸರ್ವಾಪ್ರಾಸ್ ಮಹತ್ವಾಚೆಂ ಮ್ಹಳ್ಯಾರ್ ಜ್ಯಾ ಗಾಂವಾಂತ್ / ಜಿಲ್ಲ್ಯಾಂತ್ ಆಮಿ ವಸ್ತಿ ಕರ್ತಾಂತ್, ತ್ಯಾ ಗಾಂವ್ಚೊ ಇತಿಹಾಸ್, ಸಂಸ್ಕೃತಿ, ಲೊಕಾಜಿವಿತ್, ಭಾಸ್, ಸಾಹಿತ್ಯ್ ಆನಿ ಪ್ರಾದೇಶಿಕತೆ ವಿಶ್ಯಾಂತ್ ಸಮ್ಜಣಿ ಆನಿ ಮಾಹೆತ್ ಜೊಡುನ್ ಘೆಂವ್ಚಿ. ಕೊಣೆಂಯ್ ಆಮ್ಚ್ಯಾ ಗಾಂವಾ ವಿಶ್ಯಾಂತ್ ವಿಚಾರ್ಲ್ಯಾರ್ ಉಣ್ಯಾರ್ ಉಣೆ ತೀನ್ ತೆ ಚ್ಯಾರ್ ಮಿನುಟಾಂ ಘಳಾಯ್ ಕರಿನಾಸ್ತಾನಾ ಉಲಂವ್ಚಿಂ ಶ್ಯಾತಿ ವಾಡವ್ನ್ ಘೆಂವ್ಕ್ ಜಾಯ್” ಮ್ಹಣ್ ಡೊ| ರೊನಾಲ್ಡ್ ಅನಿಲ್ ಫೆರ್ನಾಂಡಿಸ್ ಹಾಣಿ ವಿದ್ಯಾರ್ಥಿಂಕ್ ಸಲಹಾ ದಿಲಿ.
“ಎಮ್ಮೆಲ್ಲೆ ವಾ ಎಂಪಿ ಪಾಂಚ್ ಯಾ ಧಾ ವರ್ಸಾಂ ಪರ್ಯಾಂತ್ ಅಧಿಕಾರಾರ್ ಆಸ್ತಾ. ಪೂಣ್ ಏಕ್ ಸರ್ಕಾರಿ ಅಧಿಕಾರಿ ನಿವೃತ್ತೆಪರ್ಯಾಂತ್ ಅಧಿಕಾರಾರ್ ಆಸ್ತಾ. ಆನಿ ಹೊ ಅಧಿಕಾರ್ ತಾಣೆ ಲೊಕಾಚ್ಯಾ ಬರೆಪಣಾ ಖಾತಿರ್ ವಾಪಾರುಂಕ್ ಜಾಯ್ತೆ ಅವ್ಕಾಸ್ ಆಸಾತ್. ಕರಾವಳೆಚ್ಯಾ ವಿದ್ಯಾರ್ಥಿಂನಿ ಹ್ಯಾ ವಿಶ್ಯಾಂತ್ ಗಂಬೀರ್ಪಣಿ ಚಿಂತೂಂಕ್ ಜಾಯ್. ಹ್ಯಾ ದಿಶೆನ್ ಜೊಕ್ತೆಂ ಶಿಕಪ್ ಆನಿ ತಯಾರಿ ಕರುಂಕ್ ವಿದ್ಯಾರ್ಥಿಂಕ್ ಫಾವೊತೆಂ ಮಾರ್ಗದರ್ಶನ್ ಮೆಳ್ಚೆಪರಿಂ, ಪಥದರ್ಶಿನಿ ತಸಲ್ಯಾ ಸಂಸ್ಥ್ಯಾಂ ಸಾಂಗಾತಾ ಹೆರಾಂನಿಯ್ ಮುಕಾರ್ ಯೇಂವ್ಕ್ ಜಾಯ್” ಮ್ಹಣ್ ಡೊ| ರೊನಾಲ್ಡ್ ಅನಿಲ್ ಫೆರ್ನಾಂಡಿಸ್ ಹಾಣಿ ಅಭ್ಮಿಪ್ನಾರ್ಚಾಯ್ ವೆಕ್ತ್ ಕೆಲಿ.
ಕಾರ್ಯಾಚೊ ಮಾನಾಚೊ ಸಯ್ರೊ ಕರಾವಳಿ ಅಭಿವೃದ್ದಿ ಪ್ರಾಧಿಕಾರ ಹಾಚೊ ಕಾರ್ಯದರ್ಶಿ, ಸರಕಾರಿ ಅಧಿಕಾರಿ ಮಾನೆಸ್ತ್ ಪ್ರದೀಪ್ ಡಿ’ಸೊಜಾ ಹಾಣಿ ವಿದ್ಯಾರ್ಥಿಂ ಸಾಂಗಾತಾ ಆಪ್ಲ್ಯಾ ಅನ್ಭೊಗಾಂತ್ಲೆಂ ವಿಚಾರ್ ವಾಂಟುನ್ ಘೆತ್ಲೆ. “ಸರ್ಕಾರಿ ಕಾಮ್ ಮ್ಹಳ್ಯಾರ್, ಜೀವ್ ಆಸ್ತಾಸರ್ ತುಮ್ಕಾಂ ಆನಿ ತುಮ್ಚೆ ಉಪ್ರಾಂತ್ ತುಮ್ಚ್ಯಾ ಕುಟ್ಮಾಕ್ ಸರ್ಕಾರ್ ಪೊಸ್ತಾ. ಮ್ಹಜೊ ಪಪ್ಪ ಸರ್ಕಾರಿ ಕಾಮಾರ್ ಆಸ್‍‌ಲ್ಲೊ. ಆತಾಂ ತೋ ನಾಂ ತರೀ, ತಾಚೆಂ ಪೆನ್ಶನ್ ಮ್ಹಜ್ಯಾ ಆವಯ್ಕ್ ಯೆತಾ. ಆಮ್ಚ್ಯಾ ಕುಟ್ಮಾಂತ್ ಚಡಾವತ್ ಜಣ್ ಸರ್ಕಾರಿ ಕಾಮಾರ್‌ಚ್ ಆಸ್ಲೆ. ಹಾಂವ್ ಸ್ನಾತಕೋತ್ತರ್ ಶಿಕಪ್ ಶಿಕೊನ್ ಪ್ರಾಧ್ಯಾಪಕಾಚೆಂ ಕಾಮ್ ಕರ್ತಾನಾ ಅಚಾನಕ್ ಏಕ್ ದೀಸ್ ಲೈಬ್ರೆರಿಂತ್ ಪತ್ರಾಂತ್ ಆಯಿಲ್ಲೆಂ ಜಾಯ್ತಾರ್ ಪಳೆವ್ನ್ ಹಾಂವೆ ಸ್ಪರ್ಧಾತ್ಮಕ್ ಪರೀಕ್ಷಾ ಬರಯ್ಲಿ. ಸಂಖ್ಯಾಶಾಸ್ತ್ರ್ ಶಿಕೊನ್ ಕೊಲೆಜಿಂತ್ ಶಿಕಯ್ತಾಲೊಂ ತರೀ, ತೆ ಪರ್ಯಾಂತ್ ಅಸಲೊ ಏಕ್ ಹುದ್ದೊ ಸರ್ಕಾರಾಂತ್ ಆಸಾ ಮ್ಹಣ್ ಮ್ಹಾಕಾ ಕಳಿತ್ ನಾತ್ಲೆಂ. ಸರ್ಕಾರಿ ಕಾಮ್ ಮ್ಹಳ್ಯಾರ್ ಪಯ್ಶಿಲ್ಯಾ ಗಾಂವಾಂಕ್ ವರ್ಗಾವಣ್ ಜಾತಾ, ವಚಜೆ ಪಡ್ತಾ ಮ್ಹಣ್ ಚೂಕ್ ಸಮ್ಜಣಿ ಆಸಾ. ತುಮ್ಚೆಂ ಕಾಮ್ ಬರೆಂ ಆಸ್ಲ್ಯಾರ್ ಜಾಯ್ತೆ ಪಾವ್ಟಿಂ ತುಮ್ಕಾಂ ಜಿಲ್ಲ್ಯಾಂತ್‌ಚ್ ಉರವ್ನ್ ಘೆತಾತ್. ಹಾಂವ್ ಕಾಜಾರ್ ಜಾತಾನಾ ಮ್ಹಜಿ ಪತಿಣ್ ಉಂಚ್ಲೆಂ ಶಿಕಪ್ ಜೊಡುನ್‌ಯೀ ಖಾಸ್ಗಿ ಸಂಸ್ಥ್ಯಾಂತ್ ಕಾಮ್ ಕರುನ್ ಆಸ್ಲಿ. ಹಾಂವೆ ತಿಕಾ ಸ್ಪರ್ಧಾತ್ಮಕ್ ಪರೀಕ್ಷಾ ಬರಂವ್ಕ್ ಉತ್ತೇಜನ್ ದಿಲೆಂ ಆನಿ ತಿಣೆ ಪರೀಕ್ಷಾ ಬರವ್ನ್ ತಿ ಉತ್ತೀರ್ಣ್ ಜಾಲಿ. ಏಕ್‌ಚ್ ಪಾವ್ಟಿಂ ತಿಕಾ ದೋನ್ ಸರ್ಕಾರಿ ಇಲಾಖ್ಯಾಂ ಥಾವ್ನ್ ಕಾಮಾಚೊ ಅವ್ಕಾಸ್ ಸೊಧುನ್ ಆಯ್ಲೊ. ಆತಾಂ ತಿ ಸರ್ಕಾರಾಚ್ಯಾ ಗ್ರಂಥಾಲಯ್ ಇಲಾಖ್ಯಾಂತ್ ವಾವುರ್ನ್ ಆಸಾ.”
“ಕರಾವಳೆಚ್ಯಾ ಲೊಕಾಥಂಯ್ ಸರ್ಕಾರಾಚೆಂ ಕಾಂಯ್ ನಾಕಾ ಮ್ಹಳ್ಳೊ ಮನೋಭಾವ್ ರೊಂಬೊನ್ ಗೆಲಾ. ಆಮ್ಚ್ಯಾ ಲೊಕಾಕ್ ಸರ್ಕಾರಿ ಬಸ್ಸಾಂ ನಾಕಾತ್, ಆಮ್ಚ್ಯಾ ಲೊಕಾಕ್ ಸರ್ಕಾರಿ ಇಸ್ಕೊಲಾಂ ನಾಕಾತ್, ಆಮ್ಚ್ಯಾ ಲೊಕಾಕ್ ಸರ್ಕಾರಿ ಆಸ್ಪತ್ರ್ಯೊ ನಾಕಾತ್. ಹಾಂವ್ ಹಾಂಗಾ ಹೆರಾಂಕ್ ಬೋಟ್ ಜೊಕುನ್ ಉಲಯ್ನಾ, ಮ್ಹಜೀಚ್ ಗಜಾಲ್ ಸಾಂಗ್ತಾಂ – ಆಮ್ಗೆರ್‌ಚ್ ಹಾಂವ್ ಮಾತ್ ಲೆಡಿ ಗೋಶನ್ ಅಸ್ಪತ್ರೆಂತ್ ಜಲ್ಮಾಲ್ಲೊಂ. ಮ್ಹಜಿಂ ಭಾಂವ್ಡಾಂ ಸಗ್ಳಿಂ ಖಾಸ್ಗಿ ಆಸ್ಪತ್ರೆಂತ್ ಜಲ್ಮಲ್ಲಿಂ. ಸರ್ಕಾರಿ ಸೆವಾ ಮ್ಹಳ್ಯಾರ್ ಸುಮಾರ್ ಮ್ಹಣ್ಚ್ಯಾ ಮನಾಸ್ಥಿತೆಥಾವ್ನ್ ಆಮಿ ಭಾಯ್ರ್ ಯೇಂವ್ಕ್ ಜಾಯ್. ಕೊರೊನಾ ವೆಳಾರ್ ಸರ್ವ್ ಖಾಸ್ಗಿ ಕಂಪ್ಣೆಂನಿ ಕಾಮೆಲ್ಯಾಂಕ್ ಸಾಂಬಾಳ್ ಅರ್ಧೊ ಕೆಲೊ ವಾ ದಿಲೊ ನಾ. ಪುಣ್ ಸರ್ಕಾರಾನ್ ಆಮ್ಕಾಂ ಕಾಮ್‌ಯೀ ದಿಲೆಂ, ಸಾಂಬಾಳ್‌ಯೀ ಪುರ್ತೊ ದಿಲೊ” ಮ್ಹಣ್ ಮಾನೆಸ್ತ್ ಪ್ರದೀಪ್ ಡಿಸೊಜಾ ಹಾಣಿ, ಸರ್ಕಾರಿ ಸೆವಾ ಆನಿ ಕಾಮಾಚೊ ಮಹತ್ವ್ ಮಾರ್ಮಿಕ್ ಥರಾನ್ ವಿದ್ಯಾರ್ಥಿಂಕ್ ಸಮ್ಜಾಯ್ಲೊ.
ವಿದ್ಯಾರ್ಥಿ ಶರ‍್ಲಿನ್ ಆನಿ ಜೋಯ್ಲಿನ್ ಹಾಣಿ ಪ್ರಾರ್ಥನ್ ಗೀತ್ ಗಾವ್ನ್ ಕಾರ್ಯಾಕ್ ಚಾಲನ್ ದಿಲೆಂ. ಪಥದರ್ಶಿನಿ ಸೇವಾಟ್ರಸ್ಟ್ ಹಾಚೊ ಟ್ರಸ್ಟಿ ಮಾನೆಸ್ತ್ ಸುನಿಲ್ ಮಿನೇಜಸ್ ಹಾಣಿ ಯೆವ್ಕಾರ್ ಮಾಗೊನ್ ಕಾರ್ಯೆಂ ಚಲವ್ನ್ ವೆಲೆಂ. ಪ್ರೊ| ಸ್ಟೀವನ್ ಕ್ವಡ್ರಸ್ ಹಾಣಿ ಪಥದರ್ಶಿನಿ ಸೇವಾ ಟ್ರಸ್ಟಾಚ್ಯಾ ವಾವ್ರಾಚಿ ಮಟ್ವ್ಯಾನ್ ಝಳಕ್ ದಿಲಿ. ವಿದ್ಯಾರ್ಥಿಂಕ್ ಕುಮಕ್ ಮಾತ್ರ್ ನ್ಹಯ್, ಜೊಕ್ತೆಂ ಶಿಕಪ್ ಆನಿ ವೃತ್ತಿ ವಿಂಚುಂಕ್ ಮಾರ್ಗದರ್ಶನ್, ಸಮಾಜೆಂತ್ಲ್ಯಾ ಮೆರೆ ವಯ್ಲ್ಯಾ ವರ್ಗಾಕ್ ಚಿಕಿತ್ಸೆಕ್ ಕುಮಕ್, ವಸ್ತೆಕ್ ಕುಮಕ್ ದಿಂವ್ಚಿಂ ಕಾಮಾಂ ಪಥದರ್ಶಿನಿ ಸೇವಾ ಟ್ರಸ್ಟ್ ಪಾಟ್ಲ್ಯಾ ಸೊಳಾ ವರ್ಸಾಂ ಪಾಸುನ್ ಆಪ್ಲ್ಯಾ ತಾಂಕಿ ಭಿತರ್ ಕರುನ್ ಆಯ್ಲಾಂ, ಫುಡಾರಾಂತೀ ಕರ್ತಲೆಂ ಮ್ಹಣ್ ತಾಣೆ ಮ್ಹಳೆಂ. ಸ್ಥಾಪಕ್ ಟ್ರಸ್ಟಿ ಮಾನೆಸ್ತ್ ಅನ್ನು ಇಜಯ್ ಹಾಣಿ ದಿನ್ವಾಸ್ ಪಾಟಯ್ಲೆ.
ಕಾರ್ಯಕ್ರಮಾಚೊ ದುಸ್ರೊ ವಾಂಟೊ ಜಾವ್ನ್ ಶ್ರೀನಿವಾಸ ವಿಶ್ವವಿದ್ಯಾಲಯಾಂತ್ ಸಮಾಜ್ ವಿಗ್ಯಾನ್ ಆನಿ ಮಾನವಿಕಾ ವಿಭಾಗಾಚಿ ಡೀನ್ ಪ್ರೊ| ಲವೀನಾ ಡಿಮೆಲ್ಲೊ ಹಿಣೆ ವಿದ್ಯಾರ್ಥಿಂಕ್ ಜಿಣ್ಯೆ ಕೌಶಲ್ಯಾಂಚೆರ್ ತರ್ಭೆತಿ ದಿಲಿ. ಕಾರ್ಯಕ್ರಾಮಾಂತ್ ತೀಸ್ ಭುರ್ಗ್ಯಾಂನಿ ವಾಂಟೊ ಘೆತ್ಲೊ.
