“ಪುರುಶಪ್ರದಾನ್ ಸಮಾಜ್ ವ್ಯವಸ್ಥೇಂತು ಏಕಾಚ್ ವೆಳಾ ಏಕ್ ಆವಯ್ ಆನಿ ಶಿಕ್ಶಕಿ ಜಾವ್ನ್ ಸಮಾಜಿಕ್ ಬದ್ಲಾವಣ್ ಹಾಡುಂಕ್ ಪ್ರೇತನ್ ಕೆಲ್ಲಿ ಮಹಾನ್ ಚೇತನಾ ಶ್ರೀಮತಿ ವಿಮಲಾ ವಿ. ಪೈ.” ಮ್ಹಣಾಲೊ ಕರ್ನಾಟಕಾಂತ್ ಕೊಂಕ್ಣಿ ಶಿಕ್ಪಾಚೊ ಮುಕೆಲಿ ಪ್ರೊ| ಡೊ| ಕಸ್ತೂರಿ ಮೋಹನ ಪೈ. ಸುಕ್ರಾರಾ, 9 ಸಪ್ತೆಂಬರ್ 2022 ವೆರ್, ಸಾಂಜೆವೆಳಾ 4.30 ವೊರಾರ್, ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಮಾಂಡುನ್ ಹಾಡ್ಲೆಲ್ಯಾ ಶೃದ್ದಾಂಜಲಿ ಸಭೆಂತ್ ಸಪ್ಟಂಬರ್ 6 ವೆರ್ ಬೆಂಗ್ಳುರಾಂತ್ ದೆವಾದೀನ್ ಜಾಲ್ಲಿ ವಿಶ್ವ ಕೊಂಕ್ಣಿ ಕೆಂದ್ರಾಚಿ ಪಾತ್ರೊನ್ ಶ್ರೀಮತಿ ವಿಮಲಾ ವಿ. ಪೈ ಹಿಕಾ ಉತ್ರಾಂ ನಮಾನ್ ಪಾಟವ್ನ್ ತೋ ಉಲಯ್ತಾಲೊ.
ಶ್ರೀಮತಿ ವಿಮಲಾ ಪೈ ಹಿಚೆ ಸಾಂಗಾತಾ ಆಪ್ಲ್ಯಾ ಕುಟ್ಮಾಚಿ ಲಾಂಬ್ ಕಾಳಾಚಿ ಸಳಾವಳ್ ಉಡಾಸ್ ಕರುನ್ ಪ್ರೊ| ಡೊ| ಪೈ ಮ್ಹಣಾಲೊ ” ತಿಣೆ ಕೆದಾಳಾಯ್ ಮ್ಹಣ್ಚೆಂ ಆಸ್ಲ್ಲೆಂ, ಮ್ಹಾಕಾ ವೆಗಿಂ ಮರಣ್ ಯೇಂವ್ಕ್ ಜಾಯ್. ಮ್ಹಜಿಂ ಅಂಗಾಂಗಾಂ ಸಾರ್ಕಿಂ ಕಾಮ್ ಕರ್ತಾನಾ ತಿಂ ಮ್ಹಾಕಾ ದಾನ್ ಕರುಂಕ್ ಜಾಯ್. ಪೂಣ್ ಆಪ್ಲ್ಯಾ 89 ವರ್ಸಾಂಚ್ಯಾ ಅಯುಶ್ಯಾಂತ್ ಅಂಗಾಂಗ್ ದಾನ್ ಕರ್ನ್ ಕರ್ಚೆ ಪ್ರಾಸ್ ವರ್ತೆಂ ದಾನಾಚೆಂ ಕಾಮ್, ಕೊಂಕ್ಣಿ ಮಾತ್ ನ್ಹಯ್, ಸಮಕಾಳೀನ್ ಸಮಾಜಾಂತ್ ಶಿಕಪ್, ಭಲಾಯ್ಕಿ ಆನಿ ಭುಕೆಥಾವ್ನ್ ಮುಕ್ತಿ ಹ್ಯಾ ಶೆತಾಂನಿ ಯೋಗ್ದಾನ್ ದೀವ್ನ್ ತಿಣೆ ಕೆಲಾಂ. ಜ್ಯಾ ದಿಸಾ ಸಮಾಜಾಂತ್ ಅಶಿಕ್ಪಿ, ಅಸ್ವಸ್ಥ್ ಆನಿ ಭುಕೆಲ್ಲೆ ಆಸ್ಚೆನಾಂತ್ ತೆ ದಿಸಾ ಸಮಾಜ್ ಸ್ವತಂತ್ರ್ ಜಾತಾ ಮ್ಹಣ್ ತಿ ಪಾತ್ಯೆಲಿ ಆನಿ ತ್ಯಾ ದಿಶೆನ್ ಆಪ್ಲ್ಯಾ ತಾಂಕಿಭಿತರ್ ತಿ ವಾವುರ್ಲಿ. ತಿಚೆಥಾವ್ನ್ ಆಮಿ ಪ್ರೇರಣ್ ಜೊಡುಂಕ್ ಜಾಯ್”
“ತಿಚೆ ಭಿತರ್ ಏಕ್ ಖರಿ ಶಿಕ್ಶಕಿ ಆಸ್ಲಿ. ತಿಚ್ಯಾ ಶಿಕ್ಶಕಾಂಚೆರ್ ತಿಕಾ ವರ್ತೊ ಅಭಿಮಾನ್ ಆನಿ ಗವ್ರವ್ ಆಸ್ಲೊ. ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಕೀರ್ತಿ ಮಂದಿರಾಂತ್ ಆಪ್ಲ್ಯಾ ಗುರುಚಿ ತಸ್ವೀರ್ ಪಳೆವ್ನ್ ತಿ ಅಭಿಮಾನಾನ್ ಭರ್ಲ್ಲಿ ಆಸಾ. ಆಮಿ ಕೊಂಕ್ಣಿ ಶಿಕ್ಶಕಿಂಕ್ ಯೂನಿಫೊರ್ಮ್ ಕಾಪ್ಡಾಂ ವಾಂಟ್ಲೆಲ್ಯಾ ದಿಸಾ, ಹಾಜರ್ ಅಸ್ಲ್ಲಿ ತೀ, ಆಪ್ಣಾಕೂಯ್ ಏಕ್ ಯೂನಿಫೊರ್ಮ್ ಕಾಪಡ್ ಜಾಯ್ ಮ್ಹಣ್ ವಿಚಾರ್ನ್ ನ್ಹೆಸ್ಲಿ ಆನಿ ಆಮ್ಚೆ ಸಾಂಗಾತಾ ಬಸೊನ್ ತಿಣೆ ಫೊಟೊ ಕಾಡ್ಲೊ. ಹೆಂ ತಿಚೆಂ ಸಾದೆಂಪಣ್ ಮಾತ್ ನಯ್ ಶಿಕ್ಶಕ್ ವೃತ್ತೆಥಂಯ್ ನಿಷ್ಠಾ ಆನಿ ಮೋಗ್ ದಾಕಯ್ತಾ. ಕನ್ನಡ ಭಾಸ್ ಆನಿ ಸಾಹಿತ್ಯಾಂತ್ ತಿಕಾ ಪಾಂಡಿತ್ಯ್ ಆಸ್ಲೆಂ. ತಿಚ್ಯಾ ಕಾಳಾರ್ ಕೊಂಕ್ಣೆಂತ್ ಶಿಕೊಂಕ್ ಅವ್ಕಾಸ್ ನಾತ್ಲೊ ಮ್ಹಳ್ಳೆ ಚುರ್ಚುರೆಯ್ ತಿಕಾ ಆಸ್ಲೆ. ತೆ ಚುರ್ಚುರೆ ತಿಣೆ ಕೊಂಕ್ಣಿ ಶಿಕ್ಪಾ ಅಭಿಯಾನಾಕ್ ಮೊಟೊ ತೆಂಕೊ ದಿಂವ್ಚೆ ಮಾರಿಫಾತ್ ನಿವಾರುನ್ ಘೆತ್ಲೆ. ತಿಚ್ಯಾ ಅತ್ಮ್ಯಾಕ್ ಸದ್ಗತಿ ಮಾಗ್ತಾಂ” ಮ್ಹಣಾಲೊ ಪ್ರೊ| ಡೊ| ಕಸ್ತೂರಿ ಮೊಹನ್ ಪೈ.
ವಿಶ್ವ ಕೊಂಕಣಿ ವಿದ್ಯಾರ್ಥಿ ನಿಧಿಚೊ ಮುಕೆಲಿ ಪ್ರದೀಪ್ ಜಿ. ಪೈ ಹಾಣಿ – ಟಿ, ವಿ. ರಮಣ ಪೈ ಅನಿ ವಿಮಲಾ ವಿ. ಪೈ ಹೊಸ್ಟೆಲ್ ಬ್ಲೊಕಾಚೊ ಉಲ್ಲೇಕ್ ಕರುನ್ “ಶಿಕ್ಪಾ ಸಾಂಗಾತಾ ಬರಿ ವಸ್ತೆ ವೆವಸ್ತಾಯ್ ಗರ್ಜೆಚಿ ಮ್ಹಣ್ ತಿ ಬರ್ಯಾನ್ ಜಾಣಾಸ್ಲಿ. ಸಾರ್ಕೆಂ 10.10.10 ವೆರ್ ಬುನ್ಯಾದೆ ಫಾತೊರ್ ಘಾಲ್ನ್, 11.11.11 ವೆರ್ ಹೊಸ್ಟೆಲ್ ಬ್ಲೊಕಾಚೆಂ ಕಾಮ್ ಪೂರ್ಣ್ ಜಾಂವ್ಚೆಪರಿಂ ತಿಣೆ ಪಳಯ್ಲೆಂ. ವೆಳಾಕ್ ಆನಿ ಶಿಸ್ತೆಕ್ ತಿಚ್ಯಾ ಜಿಣ್ಯೆಂತ್ ಮಹತ್ವ್ ಆಸ್ಲೊ. ಏಕ್ ದೀಸ್ ಮಂಗ್ಳುರಾಕ್ ಆಯಿಲ್ಲಿ ತಿ ಹಾಂಗಾಸರ್ ಅಸ್ವಸ್ಥ್ ಜಾಲ್ಲಿ . ತರೀ, ಚಿಕಿತ್ಸಾ ಘೆವ್ನ್ ವೆಳಾರ್ ತಿಣೆ ತಿಚೆಂ ಪಯ್ಣ್ ಮುಂದರಿಲ್ಲೆಂ ಮ್ಹಜ್ಯಾ ಉಡಾಸಾಂತ್ ಆಸಾ” ಮ್ಹಣ್ ಆಪ್ಲ್ಯಾ ಅನ್ಬೋಗಾಂತ್ಲೆ ವಿಚಾರ್ ವಾಂಟುನ್ ಘೆತ್ಲೆ.
ವಿಶ್ವ ಕೊಂಕ್ಣಿ ಕೇಂದ್ರಾಚೊ ಅಧ್ಯಕ್ಷ್ ಸಿಎ ನಂದಗೋಪಾಲ ಶೆಣೈ ಹಾಣಿ ಶ್ರೀಮತಿ ವಿಮಲಾ ವಿ. ಪೈ ವಿಶ್ವ ಕೊಂಕ್ಣಿ ಕೇಂದ್ರಾಕ್ ಪ್ರೇರಣಾ ಸ್ತೋತ್ರ್ ಜಾವ್ನಾಸ್ಲಿ ಮ್ಹಣ್ ಸಾಂಗೊನ್ ಕೇಂದ್ರಾ ತರ್ಫೆನ್ ಅರ್ಗಾಂ ಪಾಟಯ್ಲಿಂ.
ಕೊಂಕ್ಣಿ ಸಾಹಿತಿ ಆನಿ ಪತ್ರ್ಕರ್ತ್ ಎಚ್ಚೆಮ್, ಪೆರ್ನಾಲ್ ಹಾಣಿ ” ಶ್ರೀಮತಿ ವಿಮಲಾ ವಿ. ಪೈ ಏಕ್ ಉತ್ತೀಮ್ ಶಿಕ್ಷಕಿ ಜಾವ್ನಾಸ್ಲಿ ಮ್ಹಣ್ಚ್ಯಾಕ್ ತಿಚೆ ಸೂಕ್ಷ್ಮ್ ವಿಚಾರ್ಚ್ ಸಾಕ್ಸ್. ತಿಚೆ ಭಿತರ್ ಏಕ್ ಶಿಕ್ಶಕಿ ಮಾತ್ರ್ ನ್ಹಯ್, ಏಕ್ ಮೊಗಾಳ್ ಕೊಂಕ್ಣಿ ಆವಯ್ ಆಸ್ಲಿ. ಪುಣ್ ತಿಚ್ಯಾ ಆವಯ್ಚ್ಯಾ ಮೊಗಾಂತ್ ಬೆದ್ಬಾವ್ ನಾತ್ಲೊ. ದೆಕುನ್ ಆಪ್ಲೊ ಪೂತ್ ಮೋಹನದಾಸ್ ತಿಚ್ಯಾ ಕ್ಲಾಶಿಂತ್ ಶಿಕ್ತಾನಾ ತಾಕಾ ವಿದ್ಯಾರ್ಥಿಪರಿಂ ಶಿಸ್ತೆನ್ ದವರುಂಕ್, ಆನಿ ಹೆರ್ ಸಗ್ಳ್ಯಾ ವಿದ್ಯಾರ್ಥಿಂಕ್ ಶಿಕಯ್ತಾನಾ ಎಕಾ ಆವಯ್ಚೊ ಮೋಗ್ ವಾಂಟುಂಕ್ ತಿಕಾ ಸಾಧ್ಯ್ ಜಾಲೆಂ. ತಿಚೆಥಂಯ್ ಸಗ್ಳ್ಯಾಂಕ್ ಸಾಂಗಾತಾ ಘೆವ್ನ್ ಚಲ್ಚೆಂ ‘ಇನ್ಕ್ಲೂಸಿವ್ ಸಂಯ್ಭ್’ ಆಸ್ಲೆಂ. ಕೊಂಕ್ಣಿ ಸಮಾಜ್ ಏಕ್ ಸಶಕ್ತ್ ಸಮಾಜ್ ಜಾಯ್ಜೆ ಮ್ಹಣ್ ತಿ ಆಶೆಲಿ. ಖಂಯ್ಚ್ಯಾಯ್ ಪ್ರದೇಶಾಚೊ ಕೊಂಕ್ಣಿ ಭಾಶಿಕ್ ಲೋಕ್ ಕೊಂಕ್ಣಿ ಸಮಾಜೆಚ್ಯಾ ಸಶಕ್ತೀಕರಣಾಥಾವ್ನ್ ಭಾಯ್ರ್ ಉರೊಂಕ್ ನಜೊ ಮ್ಹಳ್ಳೆಂ ಚಿಂತಪ್ ತಿಕಾ ಆಸ್ಲೆಂ. ಇತ್ಲೆಂ ಮಾತ್ ನ್ಹಯ್, ಪುರುಶ್ ಪ್ರದಾನ್ ಸಮಾಜ್ ವೆವಸ್ತೆಂತ್ ಏಕ್ ರಾಕ್ವಲಿ ಜಾವ್ನ್ ದಾದ್ಲ್ಯಾಚೊ ಪಾತ್ರ್ ಒಳ್ಕೊನ್ ಘೆವ್ನ್ಚ್ ಸ್ತ್ರಿಯಾಂಚ್ಯಾ ಸಶಕ್ತೀಕರಣಾಕ್ ತಿ ವಾವುರ್ಲಿ. ಸಗ್ಳ್ಯಾಂಕ್ ಸಾಂಗಾತಾ ಘೆವ್ನ್ ಚಲ್ಚೊ ತಿಚೊ ‘ಇನ್ಕ್ಲೂಸಿವ್ ಗೂಣ್’ ಆಮ್ಚ್ಯಾ ಜಿಣ್ಯೆಂತ್ ಆಪ್ಣಾಯ್ಲ್ಯಾರ್ ತೀಚ್ ತಿಕಾ ಪಾಟಂವ್ಚಿ ಖರಿ ಶ್ರದ್ದಾಂಜಲಿ ಜಾಂವ್ಕ್ ಪಾವ್ತೆಲಿ ” ಮ್ಹಣೊನ್ ಸಾಹಿತಿ ಆನಿ ಕಲಾಕಾರಾಂ ತರ್ಫೆನ್ ಶೃದ್ದಾಂಜಲಿ ಪಾಟಯ್ಲಿ.
ಮಾಲ್ಘಡಿ ಕವಯತ್ರಿ – ಸಾಹಿತಿ, ನಿರೂಪಕಿ ಶ್ರೀಮತಿ ಶಕುಂತಲಾ ಆರ್. ಕಿಣಿ ಹಿಣೆ ಕಶೆಂ ಶ್ರೀಮತಿ ವಿಮಲಾ ವಿ. ಪೈ ಅಕ್ಷಯಪಾತ್ರೆ ಯೆವ್ಜಣೆ ಮಾರಿಫಾತ್ ಭುಕೆಮುಕ್ತಿಕ್ ಆಪ್ಲ್ಯಾ ಪುತಾಕ್ ಪ್ರೇರಣ್ ಜಾಲಿ ಮ್ಹಳ್ಳೆ ವಿಶ್ಯಾಂತ್ ಉಲ್ಲೇಕ್ ಕರುನ್ ” ಏಕ್ ದೀಸ್ ಟಿ.ವಿ. ಮೋಹನದಾಸ ಪೈ ಹಾಂಕಾ ಅಕ್ಷಯಪಾತ್ರೆ ಯೆವ್ಜಣೆಚಿ ಆಲೊಚೆನ್ ಕಶಿ ಆಯ್ಲಿ ? ಮ್ಹಣ್ ವಿಚಾರ್ಲೆಲ್ಯಾಕ್ ತಾಣೆಂ ಮ್ಹಳ್ಳೆಂ ಆಸಾ- ‘ಮ್ಹಜಿ ಆವಯ್ ಲ್ಹಾನ್ ಆಸ್ತಾನಾ ಜಾಯ್ತಿ ಭುಕೆನ್ ಕಶ್ಶಾಲ್ಲಿ. ಸಮಾಜಾಂತ್ ಭುಕ್ ನಿವಾರಣೆಚೊ ಮಹತ್ವ್ ಹಾಂವ್ ತಿಚೆಥಾವ್ನ್ ಜಾಣಾಂ ಜಾಲೊಂ’ ಮ್ಹಳ್ಳೆಂ ಆಸಾ. ಎಕಾ ಆವಯ್ನ್ ಆಪ್ಲ್ಯಾ ಪುತಾಚ್ಯಾ ಕಾನಾಂತ್ ಹೆ ವಿಚಾರ್ ಘಾಲ್ಲೆ ನಿಮ್ತಿಂ ಆಜ್ ಅಕ್ಷಯಪಾತ್ರೆ ಯೆವ್ಜಣೆದ್ವಾರಿಂ ಲಕ್ಷಾಂತರ ಲೊಕಾಚಿ ಭುಕ್ ನಿವಾರಣ್ ಜಾತಾ. ಹಾಚೆವರ್ತಿ ಸಮಾಜ್ ಸೆವಾ ದುಸ್ರಿ ನಾ” ಮ್ಹಣೊನ್ ಶ್ರೀಮತಿ ವಿಮಲಾ ವಿ ಪೈ ಹಿಚ್ಯಾ ಆತ್ಮ್ಯಾಕ್ ಸದ್ಗತಿ ಪ್ರಾಪ್ತ್ ಜಾಂವ್ ಮ್ಹಣ್ ಮಾಗ್ಲೆಂ.
ವಿಶ್ವ ಕೊಂಕ್ಣಿ ಕೇಂದ್ರಾಚೊ ಕಾರ್ಯದರ್ಶಿ ಸಿಎ ಗಿರಿದರ ಕಾಮತ್ ಹಾಣಿ ಸಂತಾಪ್ ನಿರ್ಣಯ್ ಮಾಂಡ್ಲೊ, ಸಿಇಒ ಗುರುದತ್ ಬಂಟ್ವಾಳ್ಕರ್ ಹಾಣಿ ಯೆವ್ಕಾರ್ ಮಾಗೊನ್ ಕಾರ್ಯೆಂ ಚಲಯ್ಲೆಂ. ಸಭೆಂತ್ ಹಾಜರ್ ಆಸ್ಲೆಲ್ಯಾ ಸಮೆಸ್ತಾಂನಿ ಶ್ರಿಮತಿ ವಿಮಲಾ ವಿ. ಪೈ ಹಿಚ್ಯಾ ತಸ್ವಿರೆಕ್ ಫುಲಾಂ – ಪಾಕ್ಳ್ಯಾಂಚೊಂ ಮಾನ್ ಅರ್ಪಿಲೊ ಆನಿ ಎಕಾ ಮಿನುಟಾಚೆಂ ಮಾವ್ನ್ ಸಾಂಬಾಳ್ನ್ ಸದ್ಗತಿಚೆಂ ಮಾಗ್ಣೆಂ ಭೆಟಯ್ಲೆಂ.
ಸಭೆಕ್ ವಿಶ್ವ ಕೊಂಕ್ಣಿ ಕೇಂದ್ರಾಚೆ ಟಸ್ಟಿ ಮಾನೆಸ್ತ್ ಬಿ. ಆರ್. ಭಟ್, ಮಾನೆಸ್ತ್ ವಿಲಿಯಮ್ ಡಿ ಸೊಜಾ, ಮಾನೆಸ್ತ್ ರಮೇಶ್ ನಾಯಕ್, ಕವಿ ಮೆಲ್ವಿನ್ ರೊಡ್ರಿಗಸ್, ಡೊ| ಬಿ. ದೇವದಾಸ ಪೈ ತಶೆಂ ಶ್ರೀಮತಿ ಉಷಾ ಮೋಹನ್ ಪೈ, ಶ್ರಿಮತಿ ಗೀತಾ ಸಿ. ಕಿಣಿ, ಶ್ರೀ ಬಸ್ತಿ ಮಾದವ ಆನಿ ಶ್ರೀಮತಿ ಗೌರಿ ಮಾದವ ಶೆಣೈ, ಲೇಖಕ್ ವಿಲಿಯಮ್ ಪಾಯ್ಸ್ , ಹೇಮಾಚಾರ್ಯ, ಆರ್ಸೊ ಸಂಪಾದಕ್, ಕವಿ ವಿಲ್ಸನ್ ಕಟೀಲ್, ಕಲಾಕಾರ್ ಎಡ್ಡಿ ಸಿಕೇರ್, ಕವಿ ರೋಶು, ಬಜ್ಪೆ ಆನಿ ಜಾಯ್ತೆ ಬರಯ್ಣಾರ್ ಹಾಜರ್ ಆಸ್ಲೆ.
