ಡೊ. ಚಾರ್ಲ್ಸ್ ಲೋಬೊ – ’ಚಾಯ್‍ವಾಲಾ ಆನಿ ಹೆರ್ ಕಥಾ’ – ಏಕ್ ವಳಖ್

[ಪಯ್ಲೊ ಕಥಾ ಸಂಗ್ರಹ್ “ಕೂಸಮ್ಮ ಆನಿ ಹೆರ್ ಕಥಾ” ಪರ್ಗಟ್ ಜಾವ್ನ್ ಆತಾಂ ಪಾಂಚ್ ವರ್ಸಾಂ ಸೊಂಪ್ಲ್ಯಾ ಉಪ್ರಾಂತ್ ಡೊ. ಚಾರ್ಲ್ಸ್ ಲೋಬೊಚೊ ದುಸ್ರೊ ಕಥಾ ಸಂಗ್ರಹ್ “ಚಾಯ್‍ವಾಲಾ ಆನಿ ಹೆರ್ ಕಥಾ” 2022 ಸಪ್ಟೆಂಬರ್ 4 ತಾರಿಕೆರ್, ತಾಂಚ್ಯಾ ಘರಾಂತ್  ಲೋಕಾರ್ಪಣ್ ಜಾಲೊ. 

ಡೊ. ಚಾರ್ಲ್ಸ್ ಲೋಬೊ ಇಜಯಾಂತ್ 1961 ವರ್ಸಾ ಜಲ್ಮಲ್ಲೊ. ತಾಚ್ಯೊ ಜಾಯ್ತ್ಯೊ ಕಾಣಿಯೊ ’ಝೆಲೊ’ ಮಾಸಿಕ್ ಪತ್ರಾರ್ ಪರ್ಗಟ್ ಜಾಲ್ಲ್ಯೊ ಆಸಾತ್. ತಾಚೊ ನಾಟಕ್ ’ಜುದಾಸಾಚೆ ಭಾವ್’ ಬೋವ್ ಫಾಮಾದ್ ಜಾಲ್ಲೊ. ಮಂಗ್ಳುರ್ ವಿಶ್ವವಿದ್ಯಾಲಯ ಥಾವ್ನ್ ರಾಜ್ಯ್‌ಶಾಸ್ತ್ರ್ ವಿಭಾಗಾಂತ್ ತಾಣೆ ಪಯ್ಲೆಂ ರ‍್ಯಾಂಕ್ ಆಪ್ಣಾಯಿಲ್ಲೆಂ. ಥೊಡಿಂ ವರ್ಸಾಂ ಪ್ರಾಧ್ಯಾಪಕ್ ಜಾವ್ನ್ ಸೆವಾ ದಿಲ್ಲ್ಯಾ ತಾಣೆಂ, ಉಪ್ರಾಂತ್ ಕೇಂದ್ರ್ ಸರ್ಕಾರಾಚಿ ಸಿವಿಲ್ ಸರ್ವಿಸ್ ಪರಿಕ್ಷಾ 1987 ವರ್ಸಾ ಬರೊವ್ನ್, ತಾಂತುನ್ ಉತ್ತೀರ್ಣ್ ಜಾವ್ನ್ ಇಂಡಿಯನ್ ಪೋಸ್ಟಲ್ ಸರ್ವಿಸ್ ಅಧಿಕಾರಿ ಜಾವ್ನ್ ಜಾಯ್ತ್ಯಾ ಹುದ್ದ್ಯಾಂನಿ ವಾವ್ರ್ ಕೆಲಾ.

ಕರ್ನಾಟಕ ರಾಜ್ಯಾಚೊ ಚೀಫ್ ಪೋಸ್ಟ್‌ಮಾಸ್ಟರ್ ಜನರಲ್ ಜಾವ್ನ್ ತೀನ್ ವರ್ಸಾಂ ಸೆವಾ ದಿಲ್ಲ್ಯಾ ತಾಣೆಂ, ತಮಿಳುನಾಡು ರಾಜ್ಯಾಚೊ ಚೀಫ್ ಪೋಸ್ಟ್‌ಮಾಸ್ಟರ ಜನರಲ್ ಜಾವ್ನ್ ದೋನ್ ವರ್ಸಾಂ, ಕೇಂದ್ರ್ ಸರ್ಕಾರಾಚ್ಯಾ ಸಾಮಾಜಿಕ್ ನೀತ್ ಆನಿ ಸಶಕ್ತೀಕರಣ್ ಇಲಾಖ್ಯಾಂತ್ ದಿರೆಕ್ತೊರ್ ಜಾವ್ನ್, ಗೊಂಯ್ ರಾಜ್ಯಾಚೊ ಪೋಸ್ಟ್‌ಮಾಸ್ಟರ್ ಜನರಲ್ ಜಾವ್ನ್ ವಾವ್ರ್ ದಿಲಾ. 2020 ವರ್ಸಾ ತಾಕಾ ’ಮೆಂಬರ್ ಪೋಸ್ಟಲ್ ಸರ್ವಿಸಸ್ ಬೋರ್ಡ್’ ಮ್ಹಣ್ ನೇಮಕ್ ಕೆಲೊ. 2015ವ್ಯಾ ವರ್ಸಾ ಕರ್ನಾಟಕ ಯುನಿವರ್ಸಿಟಿ ಥಾವ್ನ್ ಪಿಎಚ್‍ಡಿ ಪದ್ವಿ ತಾಣೆ ಜೊಡ್ಲ್ಯಾ.

ತಾಚೊ ’ಕೂಸಮ್ಮ ಆನಿ ಹೆರ್ ಕಥಾ’ ಕಥಾ ಸಂಗ್ರಹ್ 2017 ವರ್ಸಾ ವೈಭವ್ ಪ್ರಕಾಶನಾನ್ ಉಜ್ವಾಡಾಕ್ ಹಾಡಲ್ಲೊ. ಆತಾಂ ’ಚಾಯ್‍ವಾಲ್ ಆನಿ ಹೆರ್ ಕಥಾ’ ದೈವಿಕ್ ಅಮೃತ್ ಪ್ರಕಾಶನಾನ್ ಉಜ್ವಾಡಾಕ್ ಹಾಡ್ಲಾ. ಹ್ಯಾ ಪುಸ್ತಕಾಕ್ ಕನ್ನಡ ಸಾಹಿತಿ ನಾ. ಡಿಸೋಜಾನ್ ಪಯ್ಲೆಂ ಉತರ್ ಬರಯ್ಲಾಂ. ಹ್ಯಾ ಪುಸ್ತಕಾಂತ್ ತೆರಾ ಕಾಣಿಯೊ ಆಸಾತ್. ತಾಚ್ಯಾ ಪುಸ್ತಕಾವಿಶಿಂ ವಳಖ್ ದಿಂವ್ಚೆಂ ಕಾಮ್ ಹ್ಯಾ ಲೇಖನಾ ಮಾರಿಫಾತ್ ಕೆಲಾಂ.]

ಡೊ. ಚಾರ್ಲ್ಸ್ ಲೋಬೊ ಆನಿ ಮ್ಹಜಿ ವಳಕ್ ಚಡುಣೆಂ ಚಾಳೀಸ್ ವರ್ಸಾಂ ಆದ್ಲಿ. ಸಾಂ. ಲುವಿಸ್ ಕೊಲೆಜಿಂತ್ ಪಿಯುಸಿಂತ್ ಶಿಕ್ತಾನಾ ಹಾಂವ್ ಬಾರೆಬೈಲ್ ಮ್ಹಜೆ ಮಾವ್ಶೆಗೆರ್ ರಾವ್ತಾಲೊಂ. ಇಜಯಾಂತ್ಲ್ಯಾನ್ ಆಮಿ ಚಲುನ್ ವೆಚೆಂ ಆಸಲ್ಲೆಂ. ಆತಾಂ ತೊ ಆಮ್ಚ್ಯಾ ಸಮಾಜಾಂತ್ ಉಂಚಾಯೆಕ್ ವಾಡ್ಲಾ. ತಾಕಾ ಕಶೆಂ ಸಂಭೋದನ್ ಕರ್ಚೆಂ ಹೆಂ ಮ್ಹಾಕಾ ಕಳನಾ. ಲ್ಹಾನ್ಪಣಾಚೆ ಸಳಾವಳೆಕ್ ಲಾಗುನ್ ಡೊ. ಚಾರ್ಲ್ಸ್ ಲೋಬೊ ಮ್ಹಣ್ ಆಪೊಂವ್ಚ್ಯಾಂತ್ ಅತ್ವೆಂ ಅತ್ವೆಂ ಭೊಗ್ತಾ. ಚಾರ್ಲ್ಸ್ ಮ್ಹಣುನ್ ಆಪೊಂವ್ಚ್ಯಾಂತ್ ಇಂಗ್ಲಿಷ್ ಮರ್ಜಿ ವಯ್ರ್ ಪಡ್ತಾ.  ಇಜಯ್ ಇಗರ್ಜೆಚ್ಯಾ ಆದ್ಲ್ಯಾ ಆಲ್ತಾರಾರ್ ಸೊಭೊನ್ ಆಸಲ್ಲೊ ಸಾಂ. ಫ್ರಾನ್ಸಿಸ್ ಸಾವೆರ್ ತೊ ಇಗರ್ಜೆಕ್ ಗೆಲ್ಲ್ಯಾ ಸಂದರ್ಭಾರ್ – “ಚಾರ್ಲಿ, ತುಂ ಮ್ಹಾಕಾ ಕಿತೆಂ ದಿತಾಯ್ರೆ” ಮ್ಹಣುನ್ ವಿಚಾರ‍್ತಾಲೊ ಮ್ಹಣುನ್ ಥೊಡ್ಯಾ ಮ್ಹಯ್ನ್ಯಾಂ ಆದಿಂ ಇಗರ್ಜೆಂತ್ಲ್ಯಾ ಸನ್ಮಾನಾಚ್ಯಾ ಕಾರ್ಯಾವೆಳಾರ್, ದಿಯೆಸೆಜಿಚ್ಯಾ ಪ್ರತಿಭಟನಾಚ್ಯಾ ವಿಧಾನಾಕ್ ತುಕ್ಲಾವ್ನ್ ಉಲಯ್ತಾನಾ ಮಾರ್ಮಿಕ್ ರಿತಿನ್ ತಾಣೆ ಸಾಂಗಲ್ಲೆಂ. ಸಾವೆರ್ ಸಾಯ್ಬಾಚಿ ಸಳ್ಗಿ ಹಾಂವ್‍ಯ್ ಘೆತಾಂ ಆನಿ ಚಾರ್ಲಿ ಮ್ಹಣುನ್‍ಚ್ ತಾಕಾ ಆಪಯ್ತಾಂ.

’ಚಾಯ್‍ವಾಲಾ ಆನಿ ಹೆರ್ ಕಥಾ’ ಪುಸ್ತಕಾಂತ್ ಚಾಯ್‍ವಾಲಾ ನಾಂವಾಚಿ ಏಕ್ ಕಥಾ ಆಸಾ. ವಾಚ್ಚೆ ಪಯ್ಲೆಂ ಹೊ ಚಾಯ್‍ವಾಲಾ ಆಮ್ಚ್ಯಾ ದೇಶಾಚೊ ಮುಕೆಲಿ ಕಾಂಯ್ ನ್ಹಯ್‍ಮೂ ಮ್ಹಳ್ಳೆಂ ಚಿಂತಪ್ ಕೊಣಾಯ್ಕಿ ಯೇನಾಸ್ತಾಂ ರಾಂವ್ಚೆಂನಾ. ಪುಣ್ ಹೊ ಚಾಯ್‍ವಾಲಾ ದೋನ್ ಬ್ಯಾಗಾಂನಿ ದೋದೋನ್ ಚಾಯೆಚೆ ಆನಿ ಕಾಫಿಯೆಚೆ ಫ್ಲಾಸ್ಕ್ ಘೆವ್ನ್ ದಿಸಾಕ್ ಚ್ಯಾರ್ ಚ್ಯಾರ್ ಟ್ರಿಪ್ಪಾಂ ಮಾರ್ನ್ ಪೊಟಾಚೆ ಪೊಡಿ ಖಾತೀರ್ ಕುಡಿಂತ್ಲೆಂ ಏಕ್ ಕುಟ್ಟೆಂ ರಗತ್ ಅರ್ಧೆಂ ಕುಟ್ಟೆಂ ಕರ‍್ಚೊ ಬೆಂಗ್ಳುರ‍್ಚೊ ಸೆಂತಿಲ್.  ಹ್ಯಾ ತಾಚ್ಯಾ ಬಿಸ್ನೆಸಾಂತ್ ಉತ್ತರ್ ಭಾರತಾಚ್ಯಾ ತಿವಾರಿಚಿ ಎಂಟ್ರಿ ಜಾಲ್ಯಾ ಉಪ್ರಾಂತ್ ಚಾಯ್‍ವಾಲ್ಯಾಂಚ್ಯಾ ಸಂಸಾರಾಂತ್ಲೆಂ ಝುಜ್ ಕಶೆಂ ಸುರು ಜಾತಾ ಮ್ಹಳ್ಳೆಂ ಹಿ ಕಾಣಿ ದಾಕಯ್ತಾ.

’ನೋಕಿಯಾ’ ಕಾಣಿಯೆಂತ್ ನೋಕಿಯಾ ಆನಿ ನೊಯೆಲಾ ಮದೆಂ ವಾಟ್ಸಪ್ ಚ್ಯಾಟಾ ಥಾವ್ನ್ ಕಿರ್ಲಲ್ಲೊ ಸಂಬಂಧ್ ಕಸೊ ಮೊಗಾಂತ್ ಮುಕಾರ್ ವೆತಾ ಮ್ಹಳ್ಳೆಂ ಬೋವ್ ಸುಂದರ್ ರಿತಿನ್ ಚಾರ್ಲಿನ್ ಸಾಂಗ್ಲಾಂ.

’ಏಕ್ ಕುಟಮ್’ ಕಾಣಿ ಬೋವ್ ಪರಿಣಾಮ್‍ಕಾರಿ ರಿತಿನ್ ಆಯ್ಲ್ಯಾ. ಕೊಣಾಯ್ಕಿ ವಾಚ್ತಾನಾ ಅಸ್ವಸ್ಥ್ ಕರ್ನ್ ಸೊಡ್ತಾ.  ದೆವೊತ್ ಕುಟ್ಮಾಂತ್ಲ್ಯಾ ಜೊನಿಚೆಂ ಜಿವಿತ್ ಕಶೆಂ ಪಿಡ್ಡ್ಯಾರ್ ಜಾತಾ ಮ್ಹಳ್ಳೆಂ ಹೆ ಕಾಣಿಯೆಂತ್ ವಾಚುಂಕ್ ಮೆಳ್ತಾ. ಹಿ ಕಾಣಿ ವಾಚ್ತಾನಾ ಭಿತರ‍್ಲ್ಯೊ ಲ್ಹಾನ್ ಲ್ಹಾನ್ ಹೆರ್ ಕಾಣಿಯೊಂ ಉಗ್ಡಾಪ್ಯೊ ಜಾತಾತ್. ದಾಕ್ಲ್ಯಾಕ್ : ಇಗರ್ಜೆಚ್ಯಾ ಮೈದಾನಾರ್ ಕಶೆಂ ಕವಾಯತ್ ಸುರು ಜಾತಾ, ವಂದೇ ಮಾತರಂ ಕಿತ್ಯಾಕ್ ಆಯ್ಕುಂಕ್ ಮೆಳ್ತಾ, ಕ್ರಿಸ್ತಾಂವಾಂ ಕಿತ್ಯಾಕ್ ಕ್ರಿಸ್ತಾಂವಾಂಚೆರ್ ಹಲ್ಲೊ ಕರ್ತಾತ್ – ಹಾಕಾ ಮುಳಾವೆಂ ಕಾರಣ್ ಕೊಣ್? ಮ್ಹಳ್ಳೆಂ ಹಿ ಕಾಣಿ ಚಿಂತುಂಕ್ ಲಾಯ್ತಾ. ಮ್ಹಣ್ತಾನಾ ಚಾರ್ಲಿ ಏಕ್ ಕಾಣಿ ಸಾಂಗ್ತಾನಾ, ತ್ಯೆ ಕಾಣಿಯೆಂತ್ಲ್ಯಾ ಹೆರ್ ಕಾಣಿಯಾಂ ಮಾರಿಫಾತ್ ತುಜ್ಯಾ ಅಂತಸ್ಕರ್ನಾಕ್ ಕುಟ್ಟಿತಾ. ಮ್ಹಾಕಾ ತರೀ ಕಾಣಿಯೆಗಾರಾಚಿ ಹಿ ವಿಶೇಸ್ ತಾಂಕ್ ತಶೆಂ ಭೊಗ್ತಾ.

’ಭಿಂವ್ಕುರೊ’ ಕಾಣಿ ಸ್ವಾತಂತ್ರ್ಯ್ ಚಳುವಳೆ ಕಾಳಾಚೊ ವಿಷಯ್ ಘೆವ್ನ್ ಚಿತ್ರಿತ್ ಜಾಲ್ಯಾ.  ಬ್ರಿಟಿಶಾಂಚ್ಯಾ ಕಾಳಾಂತ್ಲ್ಯಾ ಕ್ರಿಸ್ತಾಂವ್ ಘರಾಂಚೆಂ ವರ್ಣನ್ ಹಾಂಗಾಸರ್ ಸುಂದರ್ ರಿತಿನ್ ಆಯ್ಲಾಂ. ಕಾಣಿ ಸಮಾಪ್ತ್ ಜಾತಾನಾ ಜೆಂ ವಿಶೇಸ್ ಸೂಚನ್ ದಿಲಾಂ ತ್ಯಾ ವರ್ವಿಂ ಜೋಸೆಫಾಚಿ ಹಿ ಕಾಣಿ ನೀಜ್ ಕಾಣಿ ಮ್ಹಳ್ಳೆಪರಿಂ ಭೊಗ್ತಾ.

ಯಾಜಕಾಂಚ್ಯಾ ಅನೈತಿಕ್ ಸಂಬಂಧಾಂಚೆರ್ ’ಬ್ರೇಕಿಂಗ್ ನ್ಯೂಸ್’ ಕಥಾ ದೀಷ್ಟ್ ಚರಯ್ತಾ. ತ್ಯಾವರ್ವಿಂ ದಿಯೆಸೆಜಿಚ್ಯೆ ಮರ್ಯಾದಿಚೆರ್ ಯೆಂವ್ಚಿಂ ಕಂಟಕಾಂ ತೊ ಸಾಂಗ್ತಾ. ರೇಗೊ, ಜರ್ನಲಿಸ್ಟ್ ವೊಲ್ಟರಾಲಾಗಿಂ ಪಾದ್ರಿಂನಿ ಕಾಜಾರ್ ಜಾಂವ್ಚೆವಿಶಿಂ ಉಲಯ್ತಾನಾ, “ಬೇಡ ನಂಬಬೇಡ, ಹೆಣ್ಣಿನಿಂದಲೇ ನಾನು ಕೆಟ್ಟೆನು” ಮ್ಹಳ್ಳೆಂ ಕನ್ನಡ ಪದ್ ರೇಡಿಯೊಚೆರ್ ವ್ಹಾಜ್ತಾ ಆನಿ ತವಳ್,  ಮೀಟ್ ಖೆಲ್ಲ್ಯಾಕ್ ಗಳ್ಯಾಕಡೆ ಲಾಸನಾಸ್ತಾಂ ರಾವನಾ.

’ಇಮಾಜ್ ಜಾಲೊ ಮನೀಸ್’ – ಕಥಾ ವಿಣಲ್ಲೆಂ ತಂತ್ರ್ ಆಪುರ್ಬಾಯೆಚೆಂ. ಚಾಫ್ರಾದೆಕೊಸ್ತಾಚ್ಯಾ ’ಸುಣೆಂ ಮಾಜರ್ ಹಾಸ್ತಾ’ ನಾಟಕಾಂತ್ ಸುಣ್ಯಾನ್ ಆನಿ ಮಾಜ್ರಾನ್ ಉಲೊಂವ್ಚೆಂ ತಂತ್ರ್ ಆಮಿ ಪಳೆಲಾಂ ಆಸ್ತಲೆಂ. ಎಡ್ಡಿ ಸಿಕೆರಿಚ್ಯಾ ’ವರ್ಸಾಕ್ ಏಕ್ ಪಾವ್ಟಿಂ’ ನಾಟಕಾಂತ್ ಪಾಯ್ನೆಲಾಂತ್ಲ್ಯಾ ಆವಯ್ ಬಾಪಾಯ್ನ್ ಉಲೊಂವ್ಚೆಂ ಆಮಿ ಪಳೆಲಾಂ. ಹಾಂಗಾಸರ್ ಹೆ ಕಥೆಂತ್ ಬೆಂಗ್ಳುರ್ಚ್ಯಾ ಕಬ್ಬನ್ ಪಾರ್ಕ್ ಆನಿ ಆಸ್‌ಪಾಸಾಂತ್ಲ್ಯೊ ಇಮಾಜಿ ಉಲಯ್ತಾತ್ ಆನಿ ಆಮ್ಕಾಂ ಇತಿಹಾಸ್ ಉಗ್ಡಾಪೆಂ ಕರ್ತಾತ್.

’ಮೋಗ್’ ಕಾಣಿಯೆಂತ್ ಐಟಿ ಕಾಮೆಲ್ಯಾಂಚೆಂ ಜಿವಿತ್ ಬೋವ್ ಆಪುರ್ಬಾಯೆನ್ ಚಿತ್ರಿತ್ ಜಾಲಾಂ.  ’ಭುರ್ಗಿಂ ಕರುಂಕ್ ಪಂದ್ರಾ ಮಿನುಟಾಂ ಪುರೊ’ ಮ್ಹಣ್ಚೆಂ ಹಾಸೊ ಹಾಡಯ್ತಾತ್ ತರೀ, ಮನ್ಶಾನ್ ಸೊದುನ್ ಕಾಡಲ್ಯಾ ಗ್ಯಾಲಕ್ಸಿಂನಿ ಆಸ್ಚ್ಯಾ ಬಿಲಿಯ ಬಿಲಿಯಾ ಜೀವಿಂ ಮದೆಂ ಮನ್ಶಾಜಿವಿತಾಕ್ ಆಸ್ಚೊ ಅರ್ಥ್ ಆನಿ ತಾಚೆಂ ಮೊಲ್ ಹೆಂ ಏಕಚ್ ವಾಕ್ಯೆಂ ಹಲ್ಕಂದಾವ್ನ್ ಸೊಡ್ತಾ. Dinks ಮ್ಹಳ್ಯಾರ್ Double income no kids ಮ್ಹಳ್ಳೆಂ ನವೆಂಚ್ acronym ಹಾಂಗಾಸರ್ ಜೊಕ್ತೆಂ ಮ್ಹಣುನ್ ದಿಸ್ತಾ. ಹೆಂ ನಾಂವ್ ಚಾರ್ಲಿಚೆಂಚ್ ಕಾಂಯ್, ವಾ ಆದಿಂ ಥಾವ್ನ್ ಆಸಲ್ಲೆಂ ಹ್ಯಾವಿಶಿಂ ಮ್ಹಾಕಾ ಖಬರ್ ನಾ.

ಪಿಂಟು ಮ್ಹಳ್ಳಾರ್ ಪಿಂಟೊಗೆಲೊ ದುಕ್ರಾಪಿಲೊ. ಆಯ್ಲೆವಾರ್ ಜೊರ್ಜ್ ಫೆರ್ನಾಂಡಿಸಾಚಿ ಆತ್ಮಚರಿತ್ರಾ ಆಟಾಪ್ಚೊ ಬೂಕ್ ಪರ್ಗಟ್ ಜಾಲೊ. ತ್ಯಾ ಸಂದರ್ಭಾರ್ ತಾಚೊ ಭಾವ್ ಮೈಕಲ್ ಮ್ಹಾಕಾ ಮೆಳ್ಳೊ. ತಾಂಚ್ಯಾ ಘರಾಂತ್ ಪಾಂಚ್ ಭಾವಾಂ ಸಾಂಗಾತಾ, ಸವೊ ಜಾವ್ನ್ ತಾಂಚೊ ಪೆಟೊ ಬ್ಲೇಕಿ ಫೆರ್ನಾಂಡಿಸ್ ಕಸೊ ಆಸಲ್ಲೊ ಮ್ಹಣುನ್ ಬೋವ್ ಆತುರಾಯೆಚಿ ಗಜಾಲ್ ತಾಣೆ ಸಾಂಗ್ಲಿ. ತಶೆಂಚ್ ಹೊ ದುಕ್ರಾಪಿಲೊ ’ಪಿಂಟು’ ರೊಜಾರ್ ಮಾವ್ಶೆಚೊ ಮ್ಹಣುನ್ ಹಿ ಕಾಣಿ ವಾಚ್ತಾನಾ ಮ್ಹಾಕಾ ಭೊಗ್ಲೆಂ. ಹ್ಯೆ ಕಾಣ್ಯೆಂತ್ ಇಜಯ್ಗಾರಾಂಚಿ ಕಳ್ಯಾಂಚಿ ಕೃಶಿ ಕಿತ್ಲಿ ಎಕೆ ಉಂಚಾಯೆರ್ ಆಸಲ್ಲಿ ಮ್ಹಳ್ಳೆಂ ಸಮ್ಜತಾ. ಹೆ ಕಾಣಿಯೆಂತ್ ಇಜಯ್ಚ್ಯಾ ಕಳ್ಯಾಂವಿಶಿಂ ಖೂಬ್ ತೋಖ್ಣಾಯ್ ಕೆಲ್ಲಿ ಝಳ್ಕತಾ.

’ಆಂಗಡ್’ – ಇಜಯ್ಚ್ಯಾ ಕೊಣೀ ಎಕ್ಲ್ಯಾ ಸಂತಾನಾಮಾಚಿ ಜಾಂವ್ ಯೆತಾ. ಸಂತಾನಾಮಾಚ್ಯೆ ಆಂಗ್ಡಿಕ್ ಏಕ್ ಇತಿಹಾಸ್ ಆಸಲ್ಲೊ, ಹೊ ಸಗ್ಳೊ ಇತಿಹಾಸ್ ಪುತಾಚ್ಯಾ ಸೊರ‍್ಯಾ ಬಾರಾನ್ ಮಾರ್ನ್ ಸೊಡ್ಲೊ ಮ್ಹಣುನ್ ಹಿ ಕಾಣಿ ಸಾಂಗ್ತಾ. ಮಾಗೀರ್ ಹಿ ಆಂಗಡ್ ಮ್ಹಳ್ಯಾರ್ ಸಾತ್ವೆಂ ಸ್ತೆಸಾಂವ್, ಮಿಸಾ ಜಾವ್ನ್ ಘರಾ ವೆತಾನಾ ಸೋಡಾ ಪಿಯೆಂವ್ಕ್ ಇಜಯ್ಗಾರಾಂನಿ ಹಾಂಗಾಸರ್ ಥೋಡೆಂ ರಾಂವ್ಚೆಂ ಆಸಲ್ಲೆಂ ಮ್ಹಣ್ ಸಾಂಗ್ತಾನಾ, ಇಗರ್ಜೆಂತ್ಲ್ಯಾ ಖುರ್ಸಾವಾಟೆಚ್ಯಾಕೀ ಇಜಯ್ಗಾರಾಂನಿ ಸದಾಂ ಜಿಯೆವ್ನ್ ಆಸಲ್ಲಿ ಖುರ್ಸಾವಾಟ್ ಮುಕ್ಲೆಂ ಸ್ಥಾನ್ ಘೆತಾ.

’ಮೊಸ್ರಿ ಮಾವ್ಶಿ’ ಕಾಣಿ ರೆತಿರೆಚೆರ್ ವಿಸ್ವಾಸ್ ದವರ‍್ಚಿ ಕಥಾ. ರೆತಿರೆವರ್ವಿಂ ಮೊಸ್ರಿ ಮಾವ್ಶೆಚೊ ಮೊಸೊರ್ ಕಸೊ ಮಾಯಾಗ್ ಜಾತಾ ತೆಂ ಹ್ಯೆ ಕಾಣಿಯೆಂತ್ ಸಾಂಗ್ಲಾಂ.  ಹ್ಯೆ ಕಾಣಿಯೆಂತ್ ಇಜಯ್ಚಿಂ ಪುರಾಯ್ ಮನ್ಶಾಂ ಆಸಾತ್.

ಕಿಂಡರ್ ಗಾರ್ಟನ್ ಕಾಣಿಯೆಂತ್ ಇಗರ್ಜೆಚೆಂ ಮ್ಹಳ್ಯಾರ್ ಫಿರ್ಗಜ್ ಸಲ್ಹಾ ಮಂಡಳಿಚೆಂ ಪೊಲಿಟಿಕ್ಸ್ ವಯ್ರ್ ಪಡ್ಲಾಂ. ಕ್ಲಾಶಿಂತ್ ಬಾ.. ಬಾ. ಬ್ಲೆಕ್‍ಶೀಪ್ ಶಿಕಯ್ತಾನಾ ಭಾಯ್ರ್ ಬಾಂದುನ್ ಘಾಲ್ಲ್ಯೊ ಬೊಕ್ಡ್ಯೊ ಬೇಂ ಬೇಂ ಕರ್ನ್ ಮ್ಯೂಸಿಕ್ ಕರ್ಚೆಂ ಆಸಾ ಪಳೆಯಾ, ತೆಂ ಏಕ್ ಚಿತ್ರಣ್ ಬೋವ್ ಸುಂದರ್ ರಿತಿನ್ ಆಯ್ಲಾಂ.

ಹ್ಯಾ ಭಾಯ್ರ್ ’ಮನೀಸ್’ ಮ್ಹಳ್ಯಾರ್ ಕಿತೆಂ ಕಥಾ ವಿಜ್ಞಾನಾಕುಶಿಂ ಆಮ್ಚಿ ಮತ್ ವ್ಹರ‍್ತಾ. ಜಿ. ಓ. ಮ್ಹಳ್ಳಿ ಆನ್ಯೇಕ್ ಕಾಣಿಯ್ ಆಸಾ.

ಚಾರ್ಲಿನ್ ಸಾಟಾಂಚೆರ್ ಕಾಣಿ ಸಾಂಗ್ಚೆ ಕಲೆಥಂಯ್ ಚಡೀತ್ ಆಸಕ್ತ್ ದಾಕಯ್ಲ್ಯಾ. ತಾಚ್ಯಾ ಕಾಮಾನಿಮ್ತಿಂ ಹಾಚ್ಯಾ ಆದಿಂ ತಿ ಸಾಧ್ಯತಾ ನಾತಲ್ಲಿ ಕೊಣ್ಣಾ. ಹಿ ಕಾಣಿ ಸಾಂಗ್ಚಿ ಕಲಾ ಚಾರ್ಲಿಕ್ ಸೈಂಭಾಥಾವ್ನ್ ಆಯ್ಲ್ಯಾ ಮ್ಹಳ್ಳೆಂ ಖಂಡಿತ್. ಕಥಾಕಾರ್ ಜಾವ್ನ್ ಏಕ್ ಕಥಾ ಗುಂತುನ್ ವೆತಾನಾ ತ್ಯೆ ಕಥೆಭಿತರ್ ಜಾಯ್ತ್ಯೊ ಹೆರ್ ಕಥಾ, ಚಡಿತ್ ವಿವರಾಂವ್ಕ್ ವಚನಾಸ್ತಾಂ, ಗುಪ್ತಿಂ ವಿಣುನ್ ವೆತಾ. ತ್ಯೊ ಘೆಂವ್ಕ್ ಕೆದಳಾ ಎಕಾ ವಾಚ್ಪ್ಯಾಕ್ ಸಾಧ್ಯ್ ಜಾತಾ, ತವಳ್ ತೆ ಕಥೆಚೊ ಸ್ಕೋಪ್ ವಾಡುನ್ ವೆತಾ. ಆತಾಂ ದಾಕ್ಲ್ಯಾಕ್ ಕೆಂಳ್ಬೊ ಘೆವ್ಯಾಂ: ಎಕಾ ಕೆಂಳ್ಬ್ಯಾಚಿ ಕಾಣಿ ಸರ್ವಾಂಕ್ ಕಳಿತ್ ಆಸಾ, ತಾಚಿಂ ಫಾಳೆತಾಂ, ಕಾಂಡಿ, ಗಡಾಯ್, ಕೆಳಿಂ, ಮೊಕೆ ಇತ್ಯಾದಿ. ಪುಣ್ ಹಿ ಕಾಣಿ ವಿಣುನ್ ವೆತಾನಾ, ಗಡಾಯಾಂತ್ಲ್ಯಾ ಘೊಡ್ಕ್ಯಾಂಕ್ ಪಳೆವ್ನ್ ಪಾಣ್ಯಾಂತ್ಲಿಂ ಕೆಳಿಂ ಕೊಣೆಂ ತುಟಯ್ಲಿಂ ಮ್ಹಣುನ್ ಸೊದುನ್ ಕಾಡ್ಚೆಂ ಆಸಾ ಪಳೆಯಾ, ತಸಲಿ ಏಕ್ ತಾಂಕ್ ಚಾರ್ಲಿಕ್ ಆಸ್ಚಿ ಹೆಂ ಕಥೆಂನಿ ಉಟುನ್ ದಿಸ್ತಾ.

ಚಾಯ್‍ವಾಲ ಕಾಣಿಯೆಂತ್ ವಯ್ಲಿ ಜಾತ್ ಆನಿ ಸಕಯ್ಲೆ ಜಾತಿಮದ್ಲೊ ಸಂಘರ್ಶ್ ದಿಸ್ತಾ.  “ಸೆಂತಿಲಾಚೆ ಚಾಯೆಂತ್ ರಾಮ್ ರಾಮಾಚೊ ಧುಂವರ್ ಯೇನಾತಲ್ಲೊ ಆನಿ ತಾಚೆ ತಕ್ಲೆರ್ ಲ್ಹಾನ್ಶಿ ಶೆಂಡಿ ನಾತಲ್ಲಿ. ಹೆಂ ದೋನೀ ನಾತ್ಲ್ಯಾರ್ ಅದ್ರಕ್‍ವಾಲಿ ಚಾಯ್ ಕಶಿ ಜಾಂವ್ಚಿ” ಹೆಂ ವಾಕ್ಯೆಂ ಜೊಕ್ತೆ ರಿತಿನ್ ಆಯ್ಚ್ಯಾ ಸಮಾಜಾಂತ್ಲ್ಯಾ ಘಡಿತಾಂಕ್ ಬೋಟ್ ಜೊಕುನ್ ಮ್ಹಳ್ಳೆಬರಿ ಆಯ್ಲಾಂ. ಪಿಂಟು ಕಾಣಿಯೆಂತ್ ತೊ ಎಕಾಕಡೆ ಅಶೆಂ ಸಾಂಗ್ತಾ: “ಮ್ಹೆಳೆಂ ಆನಿ ಭಾಯ್ರ್ ದವರುಂಕ್ ಫಾವೊ ಮ್ಹಣುನ್ ಲೆಕಲ್ಲ್ಯಾ ಸಮಾಜಾಂತ್ ಬಾಬಾ ಸಾಹೇಬ್ ತಸಲೆ ಬುದ್ವಂತ್ ಜಲ್ಮತಾತ್”. ಆಮಿ ಕೊಣಾಯ್ಕಿ ಕೀಳ್ ಮ್ಹಣುನ್, ಲ್ಹಾನ್ ಮ್ಹಣುನ್ ಲೆಕ್ಚ್ಯಾಂತ್ ಲೇಖಕ್ ವಿಸ್ವಾಸ್ ದವರ್ನಾ ಮ್ಹಳ್ಳೆಂ ಹಾಂಗಾಸರ್ ಕಳ್ತಾ ಆನಿ ತಾಚ್ಯಾ ಚಿಂತ್ಪಾಚೆಂ ಮೊಟೆಂ ಕಾಪ್ ಆಮ್ಕಾಂ ಖಾಂವ್ಕ್ ಲಾಯ್ತಾ.

’ಏಕ್ ಕುಟಮ್’ ಕಾಣಿಯೆಂತ್ ಇಗರ್ಜೆಚ್ಯಾ ಗ್ರೌಂಡಾರ್ ಸುರು ಜಾಂವ್ಚೆಂ ಕವಾಯತ್, ವಂದೇ ಮಾತರಂ – ಇಗರ್ಜೆಚೆರ್ ಯೆಂವ್ಚ್ಯಾ ಸಂಕಷ್ಟಾಂಚ್ಯೊ ಕುರು ಜಾವ್ನ್ ಝಳ್ಕೆಕ್ ಪಡ್ತಾತ್.

ಏಕ್ ಗಂಭೀರ್ ವಿಶಯಾಚೆರ್ ’ಭಿಂವ್ಕುರೊ’ ಕಾಣಿ ಭಾಶ್ಯ್ ಕರ್ತಾ. ಟೆರರಿಸ್ಟ್ ಮ್ಹಳ್ಯಾರ್ ಕೊಣ್? ಕಾಳ್ ಸರ್ತಾನಾ ಆಯ್ಚೆ ಟೆರರಿಸ್ಟ್ ಫಾಲ್ಯಾಂ ಮಾಡ್ತಿರ್ ಜಾಂವ್ಕ್ ಸಾಧ್ಯ್ ಆಸಾ. ಪೊರ್ವಾಂ ದೇಶ್‍ಭಕ್ತ್ ಜಾವ್ಯೆತಾತ್ – ಮ್ಹಳ್ಳೆಂ ಚಿಂತಪ್ ಹಿ ಕಾಣೀ ತುಮ್ಚೆ ಸಮೊರ್ ದವರ್ತಾ. ಆಪ್ಲೆಂ ಧೋರಣ್ ಪಾಳ್ಚೆಖಾತೀರ್ ಜೋಸೆಫಾನ್ ಸರ್ಕಾರಿ ಕಾಮಾಕ್ ರಾಜಿನಾಮೊ ದಿಂವ್ಚಿ ಗಜಾಲ್ ಆಸಾ ಪಳೆಯಾ, ಆಯ್ಚ್ಯಾ ಧೋರಣಾಂ ನಾತಲ್ಲ್ಯಾ ಸಮಾಜಾಕ್ ತಶೆಂ ಮನ್ಶಾಂಕ್ ಕೊಂಕ್ತಾ.

ಚಾರ್ಲಿಚಿ ಭಾಸ್ ಆನಿ ತಾಣೆ ವಾಪರ್ಚೆ ಅಲಂಕಾರ್ ಬೋವ್ ಸೊಭಿತ್ ಆಸಾತ್. ಸೊಭಿತ್ ಮಾತ್ರ್ ನ್ಹಯ್ ಅಸಲೆ ಅಲಂಕಾರ್ ಆಪ್ರೂಪ್ ಜಾಲ್ಲ್ಯಾನ್ ಚಾರ್ಲಿಕ್ ನ್ಹಯ್ ತರ್ ತಾಚೆ ಭಾಶೆಕ್ ಏಕ್ ಪಾವ್ಟಿಂ ವೆಂಗ್ಯಾಂ ಮ್ಹಳ್ಳೆಬರಿ ಜಾತಾ.

“ಕಾಮತಾಚೆ ತಕ್ಲೆಚೆ ಕೇಸ್ ಝಡೊನ್ ಸಾಂತ್ ಆಂತೊನಿಚ್ಯಾ ಕೊಪೆಲಾಬರಿ ತಾಚೆಂ ಮಾತೆಂ ದಿಸ್ತಾಲೆಂ” ಹೆಂ ಏಕ್ ವಾಕ್ಯೆಂ ನೋಕಿಯಾ ಕಾಣಿಯೆಂತ್ಲೆಂ. “ಘಾಣೀಚ್ಯಾ ದುಕ್ರಾಚೆಂ ಮೂತ್ ಘಾಲ್ನ್ ಕೆಲ್ಲೆ ಮೊಗ್ರೆಂತ್ ಜಾಂವ್ಚ್ಯಾ ಕಳ್ಯಾಂಚೊ ಪರ್ಮಳ್ ಪಳೆರೆ ರೊನಿ” ಹೆಂ ವಾಕ್ಯೆಂ ಪಿಂಟು ಕಾಣಿಯೆಂತ್ಲೆಂ. “ಕಳೆ ಎಕಾ ದಿಸಾಚೆಂ ಬದಿಕ್, ಕಾಡ್ಲ್ಯಾರ್ ಆಮ್ಚೆ, ಸೊಡ್ಲ್ಯಾರ್ ದೆವಾಚೆ” ಸಾಂಗ್ಚೆಂ ಕಿತ್ಲೆಂ ಏಕ್ ಅರ್ಥಾಭರಿತ್.  “ಬೊಂಡೊ ತಾಸ್ತಾನಾ ತಾಚಿ ಪ್ರಾಯ್ ಹಾತಾಂನಿ ಪಳೆಲಿ” ಹೆಂ ವಾಕ್ಯೆಂ ’ಆಂಗಡ್’ ಕಾಣಿಯೆಂತ್ಲೆಂ. – ಅಸಲೆ ಅಲಂಕಾರ್ ಹ್ಯಾ ಪುಸ್ತಕಾಂತ್ ಶೆಂಭರಾಂನಿ ಆಸಾತ್.

ಇತ್ಲೆಂ ಮಾತ್ರ್ ನ್ಹಯ್ ಚಾರ್ಲಿನ್ ಇತ್ಲಿಂ ವರ್ಸಾಂ ಕೆಲ್ಲ್ಯಾ ಶಿಕ್ಪಾಚೆಂ, ಜಾಣಾ ಜಾಲ್ಲ್ಯಾ ಇತಿಹಾಸಾಚೆಂ, ಪಳೆಯಿಲ್ಲ್ಯಾ ಗಾಂವಾಂಚೆಂ, ತಶೆಂ ಮಾಯ್ಗಾಂವಾಚೆಂ ವಿವರಣ್ ಹ್ಯಾ ಕಾಣಿಯೆ ಪುಸ್ತಕಾಂತ್ ಜೊಕ್ತ್ಯಾ ಮಾಪಾನ್ ಆಯ್ಲಾಂ. ವೊಟರ‍್ಗೇಟ್ ಪ್ರಕರಣ್, ಫ್ರೆಂಚ್ ಫಿಲೊಸೊಫರ್, ಲೇಖಕ್ ವೊಲ್ಟೇರ್, ಡ್ಯಾನ್ ಬ್ರೌನಾಚಿಂ ಪುಸ್ತಕಾಂ, ಕ್ವೀನ್ ವಿಕ್ಟೋರಿಯಾ, ಕಿಂಗ್ ಎಡ್ವರ್ಡ್, ಮಾರ್ಕ್ ಕಬ್ಬನ್, ದಿವಾನ್ ಶೇಷಾದ್ರಿ ಅಯ್ಯರ್, ಚಾಮರಾಜೇಂದ್ರ ರಾಯ್, ಟಪ್ಪಾಲ್ ಖಾತ್ಯಾವಿಶಿಂ ಕಾಂಯ್ ಮ್ಹಾಯೆತ್, ದಾವಿದ್ ರಾಯ್ ಆನಿ ಉರಿಯಾಚೆ ಬಾಯ್ಲೆಚೊ ಉಲ್ಲೇಕ್ – ಹೆಂ ಪುರಾಯ್ ಚಾರ್ಲಿಚ್ಯಾ ಗಿನ್ಯಾನಾಕ್ ಗೊವಾಯ್ ಜಾವ್ನ್ ತಶೆಂಚ್ ಕಾಣಿಯೆಂತ್ಲ್ಯಾ ಪಾತ್ರಾಂಕ್ ಪೂರಕ್ ಜಾವ್ನ್ ಹಾಂಗಾಸರ್ ಉಲ್ಲೇಕ್ ಜಾಲ್ಯಾತ್.

ಹ್ಯಾ ಪುಸ್ತಕಾವಿಶಿಂ ಚಡಿತ್ ವಿಮರ್ಶಕಾಂನಿ ಉಲಯ್ಜಾಯ್. ಹಾಂವೆಂ ಫಕತ್ ತುಮ್ಕಾಂ ವಾಚ್ಪ್ಯಾಂಕ್ ಹೆಂ ಪುಸ್ತಕ್ ವಾಚ್ಚ್ಯಾಕ್ ಉರ್ಬಾ ಹುಮೆದ್ ಭರ್ಚೆಂ ಕಾಮ್ ಕೆಲಾಂ. ತಿತ್ಲೆಂಚ್. ಚಾರ್ಲಿ ಕೊಂಕಣಿಚ್ಯಾ ಖಂಯ್ಚ್ಯಾಯ್ ಕಥಾಕಾರ್ ಪ್ರಾಸ್ ಉಣೊ ನ್ಹಯ್ ಮ್ಹಳ್ಳೆಂ ಹಾಂವ್ ಖರ‍್ಯಾನ್ ಸಾಂಗ್ತಾಂ. ಆಮ್ಚ್ಯಾ ಸಮಾಜಾಕ್ ಕಾಣಿಯಾಂನಿ ಬಾಂದುನ್ ಧರುನ್, ಇತಿಹಾಸ್ ದಾಖಲೀಕರಣ್ ಕರ್ಚೆಂ ಕಾಮ್, ಸಮಾಜಾಕ್ ಆರ್ಸೊ ಧರ್ಚೆಂ ಕಾಮ್ ತಾಚೆ ಥಾವ್ನ್ ಬಳಾನ್ ಚಲುಂ ಅಶೆಂ ಆಶೆವ್ನ್ ಹ್ಯಾ ಪಯ್ಣಾಂತ್ ತಾಕಾ, ತುಮ್ಚ್ಯಾ ಸರ್ವಾಂ ತರ್ಫೆನ್ ಜೈತ್ ಮಾಗ್ತಾಂ.

► ಮೆಲ್ವಿನ್ ರೊಡ್ರಿಗಸ್