ಮದ್ಧ್ಯಾ ಪ್ರದೇಶಾಂತ್ಲ್ಯಾ ಜಬಲ್‌ಪೂರ್ ಮ್ಹಳ್ಳ್ಯಾ ಗಾಂವಾಂತ್, ಸಂಜಯ್ ವೀರ್ ಪ್ರಸಾದ್, ಶಿಕ್ಪಾಂತ್ ಸನದ್ ಜೊಡ್ತಚ್, ಬಾಪಾಯ್ಚ್ಯೆ ಖುಶೆಪ್ರಕಾರ್, ಇಂಡಿಯನ್ ಆರ್ಮಿಂತ್ ಭರ್ತಿ ಜಾಂವ್ಕ್ ಗೆಲೊ.
ಶಿಕಾಪ್ ಆಸ್ಚೆಸಂಗಿಂ ಕುಡಿನ್ ಲಾಂಬ್‌ದೀಗ್ ಆಸೊನ್, ಕಸ್ರತಿ ತೊ ಜಾವ್ನಾಸ್‌ಲ್ಲ್ಯಾನ್, ಕೂಡ್ಲೆಚ್ ತಾಚೆಂ ಸೆಲೆಕ್ಷನ್ ಜಾವ್ನ್ ತಾಕಾ, CDS (Combined Defence Services Exam) – ಕ್ ಧಾಡ್ಲೆಂ. ಪರಿಕ್ಷೆಂತ್ ಉತ್ತೀರ್ಣ್ ಜಾಲ್ಲ್ಯಾ ಸಂಜಯಾಕ್ ಫುಡ್ಲ್ಯಾ ಟ್ರೈನಿಂಗಾಕ್‌ಯಿ ಧಾಡ್ಲೆಂ.
ಟ್ರೈನಿಂಗ್ ಮುಗ್ದೊನ್ ಆಯಿಲ್ಲೊ ಸಂಜಯ್, ಲೆಫ್ಟಿನೆಂಟ್ ಆಫಿಸರ್ ಜಾವ್ನ್ ಆರ್ಮಿಂತ್ ಕಾಮ್ ಕರುಂಕ್ ಲಾಗ್ಲೊ. ಫುಡ್ಲ್ಯಾ ಚಾರ್ ವರ‍್ಸಾಂನಿ ಸಂಜಯ್ಕ್ ಕೆಪ್ಟನಾಚ್ಯಾ ಹುದ್ಧ್ಯಾಕ್ ನೇಮಕ್ಲೊ. 28 ವರ‍್ಸಾಂಚೆ ಪ್ರಾಯೆರ್, 2004-ಂತ್ ಸಂಜಯ್ ವೀರ್ ಪ್ರಸಾದ್, ಪ್ರಮೀಳಾ ಶ್ರೀವಾತ್ಸವ್ ಮ್ಹಳ್ಳ್ಯೆ, 21 ವರ‍್ಸಾಂಚೆ ಬರ‍್ಯಾ ಕುಟ್ಮಾಂತ್ಲ್ಯೆ ಚಲಿಯೆಸಂಗಿಂ ಲಗ್ನಂತ್ ಎಕ್ವಟ್ಲೊ.
ಪ್ರಮೀಳಾ ಪಳಂವ್ಕ್ ಭೋವ್ ಆಕರ್ಶಿತ್ ಆನಿ ಸೊಭಾಯೆಚಿ ಇಮಾಜ್ ಜಾವ್ನಾಸ್‌ಲ್ಲೆಂ. ತೆಂಯಿ ಆಪ್ಲೆಂ ಗ್ರ್ಯಾಜೂವೇಶೆನ್ ಸಂಪವ್ನ್, ಘರಾಚ್ ಆಸ್‌ಲ್ಲೆಂ ಆನಿ ತಾಕಾ ಸಂಜಯ್ಚಿ ಸೈರಿಕ್ ಆಯಿಲ್ಲಿ.
ಕಾಜಾರಾಕ್ ದೋನ್ ಮಹಿನ್ಯಾಂಚಿ ರಜಾ ಘೆವ್ನ್ ಆಯಿಲ್ಲೊ ಸಂಜಯ್, ಆಪ್ಲ್ಯಾ ಹೊಕ್ಲೆಕ್ ಘೆವ್ನ್ ಸಭಾರ್ ಸುಂದರ್ ಜಾಗ್ಯಾಂನಿ, ಹನಿಮೂನಾಕ್ ಗೆಲ್ಲೊ. ಏಕ್ ಘಡಿಯಿ ಹೊಕ್ಲೆಕ್ ತಾಣೆ ಆಪ್ಣಾ ಥಾವ್ನ್ ಪಯ್ಸ್ ಸೊಡುಂಕ್ ನಾತ್‌ಲ್ಲೆಂ.
ರಜಾ ಮುಗ್ದೊನ್ ಪಾಟಿಂ ಕಾಮಾಕ್ ಗೆಲ್ಲ್ಯಾ ಸಂಜಯ್ಕ್, ಥೊಡ್ಯಾಚ್ ದಿಸಾಂನಿ, ಪ್ರಮೀಳಾ ಆವಯ್ ಜಾಂವ್ಕ್ ಆಸ್ಚ್ಯಾ ಸಂತೋಸಾಚಿ ಖಭಾರ್ ಮೆಳ್ಳಿ. ಸಂಜಯ್ ಭೋವ್ ಸಂತೊಸ್ಲೊ. ಪ್ರಮೀಳಾಕ್ ಏಕ್ ದೀಸ್‌ಯಿ ಫೊನ್ ಕರುಂಕ್ ಚುಕಾನಾತ್‌ಲ್ಲೊ. ಕಾಂಯ್ ಕಾಮಾನ್ ತಾಕಾ ಪುರ್ಸತ್ ಲಾಭ್ಲಿನಾ ತರ್, ರಾತ್ಚ್ಯಾ ಮೊಧ್ಯಾನೆರ್‌ಯೀ ಹೊಕ್ಲೆಕ್ ಫೊನ್ ಕರುನ್ ತಿಚಿ ಭಲಾಯ್ಕಿ ವಿಚಾರೂನ್ ದೊಸ್ತಾಲೊ. ಅಶೆಂ ಜಾವ್ನಾಸ್‌ಲ್ಲೆಂ ಹಾಂಚೆಂ ಮೋಗ್ ಭರ್‌ಲ್ಲೆಂ ಕಾಜಾರಿ ಜೀವನ್. ಪಯ್ಸ್ ಆಸೊನ್‌ಯಿ ಎಕಾಮೆಕಾಚ್ಯಾ ಕಾಳ್ಜಾಂತ್ ಹಿಂ ಜಿಯೆತಾಲಿಂ.
2005-ಂತ್ ಜೂಲಾಯ್ಚ್ಯಾ 8 ತಾರಿಕೆರ್, ಪ್ರಮೀಳಾನ್ ಎಕಾ ಚೆರ್ಕ್ಯಾ ಭುರ್ಗ್ಯಾಕ್ ಜನಮ್ ದಿಲೊ. ಪ್ರಮೀಳಾಚ್ಯಾ ಸಂತೋಸಾಕ್ ಗಡ್ ನಾತ್‌ಲ್ಲಿ. ತಶೆಂ ಸಂಜಯ್ಚ್ಯಾ ಸಂತೋಸಾಕ್ ಅಂತ್ಯ್ ನಾತ್‌ಲ್ಲಿ ಊಂಚಾಯ್, ಅಂತ್ರಳ್ ಚಡೊಂಕ್ ಸಕ್‌ಲ್ಲಿ. ತೊ ರಜಾ ಘೆವ್ನ್ ಕೂಡ್ಲೆಚ್ ಗಾಂವಾಕ್ ಪಾವ್ಲೊ.
ಆಪ್ಲ್ಯಾ ಸೊಭೀತ್ ಆನಿ ಮುಗ್ಧ್ ಚೆರ್ಕ್ಯಾಕ್ ಪಳವ್ನ್, ಸಂಜಯ್ ದೊಡ್ಯಾ ಸಂತೋಸಾನ್ ಭರ್ತಾನಾ, ತೆಣೆ ಪ್ರಮೀಳಾಯಿ ಸೊಂತೋಸಾನ್ ಫುಮಾರ್ ಜಾಲ್ಲಿ. ಚೆರ್ಕ್ಯಾಕ್ ಪ್ರವೀಣ್ ಮ್ಹಳ್ಳ್ಯಾ ನಾಂವಾನ್ ತಾಣಿಂ ವಲಾಯ್ಲೆಂ.
ಭುರ್ಗೊ ಪ್ರವೀಣ್ ಭೋವ್ ಕೊಂಡಟ್ಯಾಂಣಿ ವಾಡೊನ್ ಆಯ್ಲೊ. ಸಂಜಯ್ ಹರ‍್ಯೇಕಾ ವರ್ಸಾ ರಜೆರ್ ಯೆತಾಲೊ. ಪ್ರವೀಣಾಕ್ ಚಾರ್ ವರ್ಸಾಂ ಭರ್ತಾನಾ, ಪ್ರಮೀಳಾನ್ ಆನ್ಯೇಕಾ ಚೆಡ್ವಾ ಭುರ್ಗ್ಯಾಕ್ ಜನಮ್ ದಿಲೊ. ತಾಕಾ ತಾಣಿಂ ಪ್ರೀಯಾಂಕಾ ಮ್ಹಳ್ಳೆಂ ನಾಂವ್ ದಿಲೆಂ. ಸಂಜಯ್ ಜೆದ್ನಾಂಯ್ ರಜೆರ್ ಯೆತಾಲೊ, ತೆದ್ನಾಂ ಭುರ್ಗೊ ಪ್ರವೀಣ್ ಬಾಪಾಯ್ಚ್ಯಾ ಪಿಸ್ತುಲೆಸಂಗಿ ಖೆಳ್ತಾಲೊ.
“ತುಂ ಆಯಿಲ್ಲ್ಯಾ ವೆಳಾ, ತುಜಿ ಸರ್ವಿಸ್ ರಿವೊಲ್ವರ್ ಲಿಪವ್ನ್ ದವರ್ ಸಂಜಯ್. ತಿ ಖೆಳ್ಚಿ ಟೋಯ್ ನಹಿಂ. ಪರಾಮಶೆನ್ ಟ್ರಿಗ್ಗರ್ ದಾಂಬೂನ್ ಗೆಲ್ಯಾರ್, ಅನಾಹುತ್ ಘಡೊಂಕ್ ಆಸಾ…” ಪ್ರಮೀಳಾ ಘೊವಾಕ್ ಸಾಂಗಾಲಾಗ್ಲಿ.
“ಮಿಲಿಟರಿ ಆಫಿಸರಾಚೊ ಪೂತ್ ಮ್ಹಜೊ ಭುರ್ಗೊ. ರಿವೊಲ್ವರ್ ತೊ ಪರಮಶೆನ್ ನಹಿಂ, ನೀಜ್ ಚಲಯ್ತೊಲೊ ದುಸ್ಮಾನಾಂಚೆರ್. ಹಾಂವ್ ಶಿಕಯ್ತೊಲೊಂ ತಾಕಾ ಪಿಸ್ತುಲ್ ಕಶಿ ಚಲಂವ್ಚಿಗಿ ಮ್ಹಣ್” ಸಂಜಯ್ ಬಾಯ್ಲೆಲಾಗ್ಗಿಂ ಪುತಾಚಿ ಬಡಾಯ್ ಉಲಯ್ಲೊ ಆನಿ ಉಪ್ರಾಂತ್ ತೊ ನೆಂಟ್ಯಾ ಚೆರ್ಕ್ಯಾಕ್ ಪಿಸ್ತುಲ್ ದಾಖವ್ನ್ ಸಾಂಗಾಲಾಗ್ಲೊ –
“ಪುತಾ ಹ್ಯೆ ಪಿಸ್ತುಲೆಂತ್ಲೆಂ ಬುಲೆಟ್ಸ್, ಹ್ಯಾ ರೌಂಡ್ ಸ ಬೆರೆಲಾಂನಿ ಭರೊನ್ ಆಸ್ತಾತ್. ಹೆಂ ಅಶೆಂ ಘುಂವ್ಡಾವ್ನ್, ಹೆಂ ಟ್ರಿಗ್ಗರ್ ಪಾಟಿಂ ವಡ್ಚೆಂ ಆನಿ ತೆಂ ದಾಂಬೂನ್ ತುಜ್ಯಾ ದುಸ್ಮಾನಾಚೆರ್ ಫಾರ್ ಸೊಡ್ಚೊ. ಪುಣ್ ಉಗ್ಡಾಸ್ ದವರ್, ತುವೆಂ ಗುಳೊ ಸೊಡ್ಚೊ, ಫಕತ್ತ್ ತುಜ್ಯಾ ಅತ್ಮ ರಕ್ಷಣೆಕ್ ಮಾತ್ರ್ ಶಿವಾಯ್, ರಾಗಾಚ್ಯಾ ಆವೇಶಾರ್ ಕೊಣಾಯ್ಚೊ ಜೀವ್ ಕಾಡುಂಕ್ ನಹಿಂ”
“ಪಯ್ಲೆಂ ತೊ ವ್ಹಡ್ ಜಾಂವ್ದಿ. ಬರೆಂ ಶಿಕೊನ್ ತುಜೆಪರಿಂ ವ್ಹಡ್ಲೊ ಆಫಿಸರ್ ಜಾಂವ್ದಿ. ದೇಶಾಚ್ಯಾ ರಕ್ಷಣೆಕ್ ಲಡಾಯೆಕ್ ವಚೊಂದಿ ಆನಿ ಥಂಯ್ಸರ್ ದುಸ್ಮಾನಾಂಕ್ ಗುಳೊ ಸೊಡೊಂದಿ. ತುಂ ಆತಾಂಚ್ ತಾಕಾ ಪಿಸ್ತೊಲೆಚಿ ತರ್ಬೆತಿ ದೀನಾಕಾ” ಪ್ರಮೀಳಾ ಘೊವಾಕ್ ಹಾಸೊನ್ ಮ್ಹಣಾಲಿ ಆನಿ ಆಪ್ಲ್ಯಾ ಕಾಮಾರ್ ಪಡ್ಲಿ.
ವೇಳ್ ಪಾಶಾರ್ ಜಾಲ್ಲೆ ಪರಿಂ, ವರ‍್ಸಾಂಯಿ ಧಾಂವೊನ್ ಗೆಲಿಂ. ಚೆರ್ಕೊ ಪ್ರವೀಣ್ ಪಂದ್ರಾ ಸಂಪೊನ್ ದಾವೆ ಕ್ಲಾಸಿಕ್ ಪಾವ್‌ಲ್ಲೊ. ಪ್ರಮೀಳಾ, ಆಪ್ಲ್ಯಾ ಪುತಾನ್ ಬರೆಂ ಶಿಕೊನ್, ಬಾಪಾಯ್ ಪರಿಂ ಮಿಲಿಟರಿಂತ್ ರಿಗೊನ್, ತಾಚ್ಯಾಕ್‌ಯಿ ವ್ಹಡ್ಲ್ಯಾ ಹುದ್ಧ್ಯಾಕ್ ಪಾವೊಂಕ್ ಜಾಯ್ ಮ್ಹಳ್ಳಿಂ ಚಿಂತ್ನಾಂ, ಆಟವ್ನ್ ತಾಚೆಂ ಶಿಕಾಪ್ ಘೆತಾಲಿ.
ಪ್ರಾಯ್ಮೆರಿಂತ್ ಶಿಕೊನ್ ಆಸ್ತಾನಾ ಹುಶ್ಯಾರ್ ಆಸ್‌ಲ್ಲೊ ಪ್ರವೀಣ್, ಸೆಕೆಂಡರಿಕ್ ಪಾವ್‌ಲ್ಲೊಚ್, ಶಿಕ್ಪಾಂತ್ ಅಸ್ಕತ್ ದಿಸೊಂಕ್ ಸುರು ಜಾಲ್ಲೊ. ಹಾಚೆಂ ಕಾರಣ್, ಆವಯ್ ಬಾಪಾಯ್ನ್ ಕೆಲ್ಲೊ ಲೆಖಾ ವರ‍್ತೊ ಕೊಂಡಾಟೊ ವ ಪುತಾನ್ ವಿಚಾರ್‌ಲ್ಲೆಂ ಕಿತೆಂಯಿ ತೆಂ ಜಾಂವ್, ಹಾಡುನ್ ದಿಲ್ಲೊ ಪರಿಣಾಮ್?
ಹ್ಯೆ ಪಾವ್ಟಿಂ ರಜೆರ್ ಯೆತಾನಾ, ಕಿತೆಂ ಹಾಡುಂಕ್ ಜಾಯ್…. ಸಂಜಯ್ನ್ ಬಾಯ್ಲೆಕ್ ಫೊನಾರ್ ವಿಚಾರ್‌ಲ್ಲೆಂ.
“ಮ್ಹಾಕಾ ಕಾಂಯ್ ನಾಕಾ. ಪ್ರವೀಣಾಚೊ ’ಬರ್ಥ್ ಡೇ’ ಯೆತಾ. ತಾಕಾ ಜಾಲ್ಯಾರ್ ಕಾಂಯ್ ಹಾಡುನ್ ಯೇ” ಮ್ಹಣ್ ಪ್ರಮೀಳಾನ್ ಜಾಪ್ ದಿಲ್ಲಿ.
ಎಕಾ ಮಹಿನ್ಯಾಕ್ ರಜೆರ್ ಆಯಿಲ್ಲ್ಯಾ ಬಾಪಾಯ್ನ್, ಪುತಾಕ್ ನವೆಂ ಮೊಬಾಯ್ಲ್ ಗಿಫ್ಟ್ ಕೆಲೆಂ. ಪ್ರವೀಣಾಚೊ ಸಂತೋಸ್ ಸಾಂಗ್ಚೊ ನಹಿಂ.
ನವೆಂ ಮೊಬಾಯ್ಲ್ ಆಪ್ಣಾಯಿಲ್ಲೊ ಪ್ರವೀಣ್, ಸಗ್ಳೊ ದೀಸ್ ಮೊಬಾಯ್ಲಾಚೆರ್‌ಚ್ ಆಸ್ತಾಲೊ. ಇಸ್ಕೊಲಾಕ್‌ಯಿ ವರ‍್ತಾಲೊ. ಮಿತ್ರಾಂ ಸಗಿಂ ಮೆಳುನ್, ಮೊಬಾಯ್ಲಾಂತ್ ಆಸ್ಚೆ ನವೆ ನವೆ ಗೇಮ್ಸ್ ಶಿಕ್ಲೊ.
ಇಸ್ಕೊಲಾ ಥಾವ್ನ್ ಘರಾ ಯೆತಚ್, ಪ್ರವೀಣ್ ಮೊಬಾಯ್ಲಾಚೆರ್‌ಚ್ ಆಸ್ತಾಲೊ. ಹೆಂ ಆವಯ್ಕ್ ಬರೆಂ ದಿಸಾನಾತ್‌ಲ್ಲೆಂ. ತಿ ತಾಕಾ ಪುರ್ಪುರ‍್ತಾಲಿ ಆನಿ ಬೂದ್ ಸಾಂಗ್ತಾಲಿ. ಪುಣ್ ಪ್ರವೀಣ್ ಆವಯ್ಕ್ ಕೇರ್ ಕರಿನಾ ಜಾಲೊ.
“ತುಂ ರಜೆರ್ ಯೇವ್ನ್ ತೀನ್ ಹಫ್ತೆ ಜಾಲೆ ಸಂಜಯ್. ಪುಣ್ ತುಕಾ ತುಜ್ಯಾ ಪುತಾವಿಶಿಂ ಕಿತೆಂಚ್ ಕಳಿತ್ ನಾ. ತೊ ಮ್ಹಜೆಂ ಏಕ್‌ಯಿ ಆಯ್ಕಾನಾ. ಫಕತ್ತ್ ಮೊಬಾಯ್ಲೆರ್ ಆಸ್ತಾ. ಶಿಕ್ಪಾಂತ್ ತಾಕಾ ಇಂಟ್ರೆಸ್ಟ್‌ಚ್ ನಾ. ಲ್ಹಾನ್ ಆಸ್ತಾನಾ ಇತ್ಲೊ ಹುಶ್ಯಾರ್ ಆಸ್‌ಲ್ಲೊ ತೊ, ವ್ಹಡ್ ಜಾತಾನಾ ಶಿಕ್ಪಾಂತ್ ಅಸ್ಕತ್ ಜಾಲಾ.”
“ಹಾಂವ್ ಸಮ್ಜಯ್ತಾಂ ಪ್ರಮೀಳಾ ಪ್ರವೀಣಾಕ್. ತುಂ ಖಂತ್ ಕರಿನಾಕಾ. ತೊ ವಾಡ್‌ಲ್ಲೊ ಭುರ್ಗೊ. ತರ್ನೆಂ ರಗಾತ್ ವಾಡ್‌ಲ್ಲ್ಯಾ ಭುರ್ಗ್ಯಾಂಚೆಂ. ತಾಂಕಾಂ ಮೊಗಾನ್ ಸಮ್ಜಾಂವ್ಕ್ ಜಾಯ್. ನಾತರ್ ಗಜಾಲ್ ವಾಯ್ಟಾಕ್ ಪಡೊಂಕ್ ಸಾಧ್ಯ್ ಆಸಾ.” ಸಂಜಯ್ ಬಾಯ್ಲೆಕ್ ಸಮ್ಜಯ್‌ಲಾಗ್ಲೊ.
“ತುಜೊ ಮತ್ಲಬ್, ತರ್ನೆಂ ರಾಗಾತ್ ಮ್ಹಣೊನ್, ತಾಂಚ್ಯೊ ಚೂಕಿಯಿ ತಿದ್ವುಂಕ್ ನಜೊಗಿ?”
“ತಶೆಂ ನಹಿಂ. ರಾಗಾನ್ ಸಮ್ಜಾವ್ನ್ ತಾಂಕಾ ಹಟ್ಟಾಕ್ ಪಡಂವ್ಚ್ಯಾ ಪ್ರಾಸ್, ಮೊಗಾನ್ ಸಮ್ಜಾಂವ್ಕ್ ಜಾಯ್”
“ತೆಂ ತುಂ ಕರ್. ಮ್ಹಜ್ಯಾನ್ ಸಾಧ್ಯ್ ನಾ. ತೊ ಹ್ಯಾ ದಿಸಾಂನಿ ಖಂಚೆಂಚ್ ಆಯ್ಕಾನಾ. ಫಕತ್ತ್ ಮೊಬಾಯ್ಲಾಚೆರ್ ಕಸಲೆಗಿ ಗೇಮ್ಸ್ ಖೆಳೊನ್ ಆಸ್ತಾ … ತುಂ ಏಕ್ ಕಾಮ್ ಕರ್. ತಾಕಾ ಮೊಬಾಯ್ಲ್ ಇಸ್ಕೊಲಾಕ್ ವರೂಂಕ್ ಸೊಡಿನಾಕಾ”
“ವ್ಹಯ್. ತಶೆಂಚ್ ಕರ‍್ತಾಂ”
“ಮ್ಹಾಕಾ ಥೊಡ್ಯಾ ಕಾಮಾನ್, ಇಂಡೋರ್ ವಚುಂಕ್ ಆಸಾ ಪ್ರಮೀಳಾ. ತುಂಯಿ ಯೆತಯ್ಗಿ? ದೋನ್ ತೀನ್ ದಿಸಾಂನಿ ಪಾಟಿಂ ಯೆವ್ಯಾಂ.”
“ಮನ್ ಆಸಾ ಸಂಜಯ್ ಮ್ಹಾಕಾ …” ಪ್ರಮೀಳಾ ಮ್ಹಣಾಲಿ. “ಕಾಜಾರಾಚ್ಯಾ ಸುರ‍್ವೆರ್ ಹನಿಮೂನಾಕ್ ತುವೆಂ ಮ್ಹಾಕಾ ಮಸ್ತು ಜಾಗ್ಯಾಂನಿ ಭಂವ್ಡಾಯ್ಲಾಂಯ್. ತೆಂಚ್ ಪಯಿಲ್ಲೆಂ ಆನಿ ನಿಮಾಣೆ. ಉಪ್ರಾಂತ್ ಹಾಂವ್ ಆವಯ್ ಜಾಲಿಂ ಆನಿ ಘರ‍್ಚ್ಯಾ ವಣೊದಿನಿಂ ಖೈದ್ ಜಾಲಿಂ.”
“ದೆಕುನ್ಂಚ್ ಸಾಂಗ್ಲೆಂ, ತುಂಯಿ ಯೇ ಮ್ಹಣ್. ಆತಾಂ ಭುರ್ಗಿಂ ವ್ಹಡ್ ಜಾಲ್ಯಾಂತ್ ತಿಂ ಸುದಾರ‍್ಸುನ್ ಘೆತೆಲಿಂ”
“ಭುರ್ಗ್ಯಾಂಚೆಂ ಇಸ್ಕೊಲ್ ನಾತ್‌ಲ್ಲೆಂ ತರ್, ಹಾಂವ್ ಖಂಡಿತ್‌ಯಿ ಯೆತಿಂ ಸಂಜಯ್. ಪ್ರೀಯಾಂಕಾಚಿ ಖಂತ್ ನಾ. ತೆಂ ಬರೆಂ ಕರುನ್ ಶಿಕ್ತಾ. ಪುಣ್ ಪ್ರವೀಣಾಕ್ ಪಾತ್ಯೆಂವ್ಕ್ ಜಾಯ್ನಾಂ. ಹಾಂವ್ ಘರಾಂತ್ ನಾ ಜಾಲ್ಯಾರ್, ತೊ ಇಸ್ಕೊಲಾಕ್‌ಯಿ ವೆಚೊನಾ. ತುಂ ವಚೂನ್ ವೆಗ್ಗಿಂ ಪಾಟಿಂ ಯೇ. ನೆಕ್ಸ್ಟ್ ಟಾಯ್ಮ್ ತುಂ ರಜೆರ್, ಭುರ್ಗ್ಯಾಂಕ್ ರಜ್ಯಾ ಮೆಳ್ತಾನಾಂಚ್ ಯೆಂವ್ಚೆಂ ಪ್ರಯತನ್ ಕರ್. ಆಮಿಂ ಸಗ್ಳಿಂ ಸಾಂಗಾತಾ ಖಂಯ್ಸರ್‌ಯಿ ಪಯ್ಶಿಲ್ಯಾ ಗಾಂವಾಕ್ ವಚ್ಯಾಂ.”
♥ ♥ ♥
ಸಂಜಯ್ ಇಂಡೊರ್ ಗೆಲ್ಲ್ಯಾ ದುಸ್ರ್ಯಾ ದಿಸಾ, ಪ್ರವೀಣ್ ಇಸ್ಕೊಲಾಥಾವ್ನ್ ಆಯಿಲ್ಲೊಚ್ ಮೊಬಾಯ್ಲ್ ಘೆವ್ನ್ ಬಸ್ಲೊ. ಪ್ರೀಯಾಂಕಾ ಆಪ್ಲೆಂ ಶಿಕಾಪ್ ಕರುನ್ ಬಸ್‌ಲ್ಲೆಂ.
“ಪುತಾ ತುಂ ದಾವೆ ಕ್ಲಾಸಿಕ್ ಪಾವ್ಲಾಯ್. ಹ್ಯೆ ಪಾವ್ಟಿಂ ತುಕಾ ಬೋರ್ಡ್ ಎಕ್ಸಾಮ್. ತುಂ ಶಿಕ್ಪಾಂತ್ ಅಸ್ಕತ್ ಜಾಲಾಯ್. ಬೋರ್ಡ್ ಎಕ್ಸಮೆಂತ್ ಬರೆ ಪರ್ಸಂಟೇಜ್ ಮೆಳ್ಣಾತ್ಲ್ಯಾರ್ ತುಕಾ ಬರ‍್ಯಾ ಕೊಲೆಜಿಂತ್ ಎಡ್ಮಿಷೆನ್ ಮೆಳ್ಚೆನಾ” ಪ್ರಮೀಳಾ ಪುತಾಕ್ ಮೊಗಾನ್ ಸಮ್ಜಯ್‌ಲಾಗ್ಲಿ.
“ಹಾಂವ್ ಜಾಣಾ ಮ್ಹಾಕಾ ಬೋರ್ಡ್ ಎಕ್ಸಮ್ ಹ್ಯಾ ವರ್ಸಾ ಮ್ಹಣ್. ಎಕ್ಸಮೆಕ್ ಮಸ್ತು ವೇಳ್ ಆಸಾ. ತ್ಯಾ ಟಾಯ್ಮಾರ್ ಹಾಂವ್ ಶಿಕ್ತಾಂ” ಪ್ರವೀಣ್ ಆವಯ್ನ್ ಸಾಂಗ್‌ಲ್ಲೆಂ ಕೇರ್ ಕರಿನಾಸ್ತಾಂ, ಮೊಬಾಯ್ಲ್ ಘೆವ್ನ್ ಭಾಯ್ರ್ ಗೆಲೊ.
ಆವಯ್ಕ್ ಕಠೀಣ್ ರಾಗ್ ಆಯ್ಲೊ. ತಿ ಪುತಾಕ್ ರಾಕೊನ್ ರಾವ್ಲಿ. ಘರಾ ಪಾಟಿಂ ಆಯಿಲ್ಲೊ ಪೂತ್, ಮೊಬಾಯ್ಲ್ ಮೆಜಾರ್ ದವರುನ್ ಆಪ್ಲ್ಯಾ ಕೂಡಾಕ್ ಗೆಲೊ. ತೆಂ ಪಳಯಿಲ್ಲ್ಯಾ ಆವಯ್ನ್, ಕೂಡ್ಲೆ ಮೊಬಾಯ್ಲ್ ಕಾಡುನ್ ಲಿಪಯ್ಲೆಂ.
ಕುಡಾಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಪ್ರವೀಣಾಕ್, ಮೆಜಾರ್ ಮೊಬಾಯ್ಲ್ ದಿಸ್ಲೆಂನಾ. ತೊ ಶಿಕೊನ್ ಆಸ್‌ಲ್ಲ್ಯಾ ಭಯ್ಣಿಕ್ ವಿಚಾರಿಲಾಗ್ಲೊ. ಆಪ್ಣಾಕ್ ಕಳಿತ್‌ನಾ ಸಾಂಗಾಲಾಗ್ಲೆಂ ಪ್ರೀಯಾಂಕಾ.
“ತುಜೆಂ ಮೊಬಾಯ್ಲ್ ಮ್ಹಜೆಲಾಗ್ಗಿಂ ಆಸಾರೆ. ತೆಂ ತುಕಾ, ತುಜೆಂ ಶಿಕಾಪ್ ಮುಗ್ದಾಸರ್ ಮೆಳ್ಚೆಂನಾ” ಪ್ರಮೀಳಾ ಮ್ಹಣಾಲಿ.
“ಮ್ಹಾಕಾ ಮ್ಹಜೆಂ ಮೊಬಾಯ್ಲ್ ಫಾಟಿಂ ದೀ. ತೆಂ ಮ್ಹಾಕಾ ಪಪ್ಪಾನ್ ಹಾಡುನ್ ದಿಲ್ಲೆಂ” ಪ್ರವೀಣ್ ರಾಗಾನ್ ಆವಯ್ಕ್ ಸಾಂಗಾಲಾಗ್ಲೊ.
ಮಾಮ್ಮಿ, ತಾಕಾ ಮೊಬಾಯ್ಲ್ ದೀನಾಕಾ. ತೊ ಮೊಬಾಯ್ಲಾಚೆರ್ ‘ಪಬ್ಜೀ’ ಗೇಮ್ ಖೆಳ್ತಾ … ಪ್ರೀಯಾಂಕಾ ಆವಯ್ಕ್ ಸಾಂಗಾಲಾಗ್ಲೆಂ.
“ಪಬ್ಜೀ ? ತೊ ಕಸಲೊ ಖೆಳ್?”
“ತೊ ಖೆಳ್ ಬರೊ ನಹಿಂ ಮ್ಹಣ್ ಆಯ್ಕಾಲಾಂ, ಮ್ಹಜ್ಯಾ ಫ್ರೆಂಡ್ಸಾಂ ಥಾವ್ನ್ ಮಾಮ್ಮಿ”
“ತುಂ ತೊಂಡ್ ಧಾಂಪ್‌ಗೋ. ನಾ ಜಾಲ್ಯಾರ್ ತುಕಾ ಕಾಭಾರ್ ಕಾಡುಂಕ್ ಆಸಾಂ…” ಪ್ರವೀಣ್ ಭಯ್ಣಿಕ್ ಧಮ್ಕಿಲಾಗ್ಲೊ.
“ಕಿತೆಂ ಮ್ಹಣಾಯ್…?” ಆವಯ್ಚೆಂ ಥಾಪಾಡ್ ಪುತಾಚ್ಯಾ ಕಾನ್ಸುಲಾಕ್ ಪಡ್ಲೆಂ- “ತಿತ್ಲಿ ಹಿಮ್ಮತ್ ತುಜಿ…..? ತುಕಾ ಆನಿ ಮೊಬಾಯ್ಲ್ ಹಾಂವ್ ಸಸ್ಣಾಕ್ ದಿಂವ್ಚಿಂನಾ”
“ಮ್ಹಾಕಾ ಬರ‍್ಯಾನ್ ಮ್ಹಜೆಂ ಮೊಬಾಯ್ಲ್ ದೀ ಮಾಮ್ಮಿ. ನಾ ಜಾಲ್ಯಾರ್, ಹಾಂವ್ ಪಯ್ಲೆಂ ತುಕಾಚ್ ಕಾಭಾರ್ ಕಾಡ್ತಲೊಂ” ಪ್ರವೀಣ್ ಆವಯ್ಕ್ ರಾಗಾನ್ ದೊಳೆ ದಾಖವ್ನ್ ಮ್ಹಣಾಲೊ.
“ಮ್ಹಾಕಾ ಕಾಭಾರ್ ಕಾಡ್ತಾಯ್…? ಮ್ಹಾಕಾ…?” ಆವಯ್ ಪುತಾಚ್ಯಾ ಕಾನ್ಸುಲಾಕ್ ಥಾಪ್ಡಾಂ ವಯ್ರ್ ಥಾಪ್ಡಾಂ ಮಾರಿಲಾಗ್ಲಿ.
ಎಕಾಚ್ಫಾರಾ ಆವಯ್ಕ್ ಲೊಟುನ್ ಪ್ರವೀಣ್, ಕಾಬಾಟಾಂತ್ ಆಸ್‌ಲ್ಲಿ ಬಾಪಾಯ್ಚಿ ಪಿಸ್ತುಲ್ ಘೆವ್ನ್ ಆಯ್ಲೊ. “ಮ್ಹಾಕಾ ಮ್ಹಜೆಂ ಮೊಬಾಯ್ಲ್ ದೀ. ನಾ ಜಾಲ್ಯಾರ್ ತುಕಾ ಆತಾಂಚ್ ಕಾಡ್ತಾಂ…” ಆವಯ್ಚೆರ್ ಪಿಸ್ತುಲ್ ಜೊಕುನ್ ಸಾಂಗ್ತಾನಾ, ಎಕಾ ಘಡ್ಯೆಕ್ ಪ್ರಮೀಳಾ ಸ್ಥಬ್ಧ್ ಜಾಲಿ! ಪುಣ್ ತಿ ಭಿಂಯೆಲಿ ನಾ.
“ಕಾಡ್ ಮ್ಹಾಕಾ ಕಾಭಾರ್. ಪುಣ್ ತುಕಾ ಮೊಬಾಯ್ಲ್ ದಿಂವ್ಚಿಂನಾ… “
… ತ್ಯಾಚ್‌ಫರಾ ಏಕ್ ಫಾರ್ ಸುಟ್ಲೊ…
… ದುಸ್ರ್ಯೆ ಘಡ್ಯೆ ಆವಯ್ ರಗ್ತಾಚ್ಯಾ ಖೊಂಡಾಂತ್ ಧಡ್ಬಡ್ಲಿ.!!!
“ಪ್ರವೀಣ್…..!!!” ಪ್ರೀಯಾಂಕಾ ಕಿಂಕ್ರಾಟ್ಲೆಂ! ಧಾಂವೊನ್ ಯೇವ್ನ್ ಭಾವಾಚ್ಯಾ ಹಾತಾಂತ್ಲಿ ಪಿಸ್ತುಲ್ ವಡುನ್ ಘೆಂವ್ಚೆಂ ಪ್ರಯತನ್ ಕರ‍್ತಾನಾ, ಪ್ರವೀಣಾನ್, ತಾಕಾ ಬಳಾನ್ ಖೊಟ್ ಮಾರ‍್ಲಿ!
ತ್ಯೆ ಖೊಟೆಕ್ ಭಯ್ಣ್ ವಣ್ದಿಕ್ ಆಪ್ಟಾಲೆಂ! ತಾಕಾ ವಡೂನ್ ಪ್ರವೀಣಾನ್ ದುಸ್ರ್ಯಾ ಕೂಡಾಕ್ ವೆಲೆಂ ಆನಿ ಲಾಗ್ಗಿಂಚ್ ಆಸ್ಚೆಂ ಸ್ಟೂಲ್ ಉಕ್ಲುನ್, ತಾಚ್ಯೆ ತಕ್ಲ್ಯೆಕ್ ಮಾರ‍್ಲೆಂ!!! ತಕ್ಲೆಕ್ ಜಾಲ್ಲ್ಯಾ ಮಾರಾಕ್, ಪ್ರೀಯಾಂಕಾ ತಕ್ಲಿ ಘುಂವೊನ್ ಪಡ್ಲೆಂ! ಪ್ರವೀಣ್ ಆತಾಂ ಭಿಂಯೆಲೊ. ಕಿತೆಂ ಕರ‍್ಚೆಂ ತೆಂ
ಸಮ್ಜಾನಾಸ್ತಾಂ ಪಿಸ್ತುಲ್ ಥಂಯ್ಚ್ ಸೊಡುನ್, ತೊ ಘರ್ ಸೊಡುನ್ ಧಾಂವ್ಲೊಂ.
ಸುಮಾರ್ ವೆಳಾನ್ ಪ್ರೀಯಾಂಕಾ ಉಟ್ಚ್ಯಾ ಸ್ಥಿತೆರ್ ಆಯ್ಲೆಂ. ಸವ್ಕಾಸ್ ಕೂಡಾಂತ್ಲೆಂ ಭಾಯ್ರ್ ಯೆತಾನಾ, ಆವಯ್ ನಿರ್ಜೀವ್ ಪಡೊನ್ ಆಸ್ಚೆಂ ಪಳವ್ನ್, ತೆಂ ಆವಯ್ಚ್ಯಾ ಕುಡಿಚೆರ್ ಗಳ್ಳೆಂ.
ತ್ಯಾಚ್ ವೆಳಾ, ಆವಯ್ಚ್ಯಾ ಮೊಬಾಯ್ಲಾಚೆರ್ ಬಾಪಾಯ್ಚೆಂ ಕೋಲ್ ಪಳವ್ನ್, ಪ್ರೀಯಾಂಕಾ ಮೊಬಾಯ್ಲ್ ಘೆವ್ನ್ ಬೋಬ್ ಮಾರಿಲಾಗ್ಲೆಂ … “ಪಪ್ಪಾ…. “
“ಪ್ರೀಯಾಂಕಾ……? ಕಿತೆಂ ಜಾಲೆಂ…..?? ತುಂ ರಡ್ತಾಯ್ ಕಿತ್ಯಾಕ್???” ಬಾಪಯ್ ಘಡ್ಬಡೊನ್ ವಿಚಾರಿಲಾಗ್ಲೊ!
“ಮಾಮ್ಮಿಕ್ ಮಾರ‍್ಲೆಂ, ಪಪ್ಪಾ…. .ಮಾಮ್ಮಿಕ್ ತಾಣೆ ಮಾರ‍್ಲೆಂ…. ” ಪ್ರೀಯಾಂಕಾ ರಡಾಲಾಗ್ಲೆಂ.
“ಕೊಣೆ ಮಾರ‍್ಲೆಂ ಮಾಮ್ಮಿಕ್? ಹೆಂ ಕಿತೆಂ ಉಲಯ್ತಾಯ್ ಪುತಾ ತುಂ? ಮಾಮ್ಮಿ ಖಂಯ್ ಆಸಾ….?”
“ಮಾಮ್ಮಿ ಮೆಲಿ ಪಪ್ಪಾ….ಮಾಮ್ಮಿ ಮೆಲಿ. ಪ್ರವೀಣಾನ್ ಮಾಮ್ಮಿಕ್ ಗುಳೊ ಸೊಡ್ಲೊ!!!”
“ಕಿತೆಂ???” ಧುವೆನ್ ಸಾಂಗ್‌ಲ್ಲೆಂ ಆಯ್ಕೊನ್ ಸಂಜಯ್ಚ್ಯಾ ಪಾಂಯಾಂಥಳಾಚಿ ಧರ್ಣ್ ನಿಸ್ರಾಲಿ!!! ಫುಡೆಂ ತೊ ಉಲಂವ್ಕ್‌ಯಿ ಸಕ್ಲೊನಾ.
ಕೂಡ್ಲೆಚ್ ಫ್ಲಾಯ್ಟಾರ್, ಆಪ್ಲ್ಯಾ ಘರ‍್ಚ್ಯಾ ವಾಟೆಕ್ ಭಾಯ್ರ್ ಸರ‍್ಲೊ.
ಘರಾ ಪಾವ್‌ಲ್ಲ್ಯಾ ಸಂಜಯ್ನ್, ಧುವೆಕ್ ಆವಯ್ಚ್ಯಾ ನಿರ್ಜೀವ್ ಕುಡಿಸಂಗಿಂ, ಶೂನ್ಯ್ ಬಸೊನ್ ಆಸ್ಚೆಂ ಪಳಯ್ಲೆಂ! ಜಿವೆಂ ಕಾಳಿಜ್ ಹುಮ್ಟುನ್ ಕಾಡ್‌ಲ್ಲಿ ದೂಕ್ ತಾಕಾ ಭಗ್ಲಿ! ಬಾಪಾಯ್ಕ್ ಪಳವ್ನ್, ಪ್ರೀಯಾಂಕಾ ಬೊಬೊ ಮಾರೂನ್ ರಡಾಲಾಗ್ಲೆಂ.
“ಹೆಂ ಕಶೆಂ ಜಾಲೆಂ….?” ಸಂಜಯ್ ಪಿಂರ್ಗಾಲೊ.
“ಮಾಮ್ಮಿನ್ ಮೊಬಾಯ್ಲ್ ಲಿಪವ್ನ್ ದವರ್‌ಲ್ಲ್ಯಾಕ್, ತಾಣೆ ಮಾಮ್ಮಿಕ್ ಗುಳೊ ಸೊಡ್ಲೊ ಪಪ್ಪಾ…..” ಪ್ರೀಯಾಂಕಾ ಹುಸ್ಕೆಲೆಂ.
ಸಂಜಯ್ ಪುತಾಚೆರ್ ಧಾರೂಣಾಯೆನ್ ಭರ‍್ಲೊ. ತೊ ಜರ್, ಹಾತಾಕ್ ಮೆಳ್‌ಲ್ಲೊ ತರ್, ತಾಚಿ ಕೂಡ್ ತೊ ಗುಳ್ಯಾಂನಿ ತೀರ್ ಕರ‍್ತೊ ಆಸ್‌ಲ್ಲೊ.
ದುಸ್ರ್ಯೆ ಘಡ್ಯೆ ತಾಣೆ ಪೊಲಿಸ್ ಸ್ಟೇಶನಾಚೆಂ ನಂಬರ್ ಮೆಳಯ್ಲೆಂ!!!
► ಎಚ್. ಜೆ. ಗೋವಿಯಸ್
