ಸಂಕೀರ್ಣತೆನ್ ಆನಿ ಸಾದ್ಯಾಪಣಾನ್ ಭರ್ಲೆಲೆಂ ಸಾಹಿತ್ಯ್ ರಚ್ಚೆ ಮಾರಿಫಾತ್ ಸರ್ವ್ ವರ್ಗಾಚ್ಯಾ ಲೊಕಾಕ್ ಪಾವ್ಲ್ಲ್ಯಾ ಬೋವ್ ಥೊಡ್ಯಾಚ್ ಕೊಂಕ್ಣಿ ಸಾಹಿತಿಂ ಪಯ್ಕಿ ಜ್ಞಾನಪೀಠ ಪುರಸ್ಕೃತ್ ಸಾಹಿತಿ ದಾಮೋದರ್ ಮಾವಜೋ ಪಯ್ಲ್ಯಾ ಸ್ಥಾನಾರ್ ಆಸಾ. ತಾಚ್ಯಾ ಸಾಹಿತ್ಯಾಂತ್ ಕೊಂಕ್ಣಿ ಕುಳಾರ್ ಗೊಂಯ್ಚ್ಯಾ ಸೊಸ್ಣಿಕ್ ಆನಿ ಸೊಡ್ದೊಡಿಚ್ಯಾ ಸಮಾಜಾಚೆಂ ಆನಿ ಸಂಸ್ಕೃತಿಚೆಂ ದರ್ಶನ್ ಜಾತಾ. ಜಿಂ ಮೌಲ್ಯಾಂ ತಾಚ್ಯಾ ಬರ್ಪಾಂನಿ ತೋ ಪ್ರತಿಪಾದಿತ್ ಕರ್ತಾ, ತೀಂಚ್ ತಾಚ್ಯಾ ಜಿಣ್ಯೆಂತ್ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ಮಾವಜೋ ಸಮಸ್ತ್ ಕೊಂಕ್ಣೆಚ್ಯಾ ಅಸ್ಮಿತಾಯೆಚೊ ಆನಿ ಖೆರಿತ್ಪಣಾಚೊ ಪ್ರತೀಕ್. ವಿಶ್ವ ಕೊಂಕ್ಣಿ ಮಂದಿರಾಚೆಂ ಹೆಂ ಕೀರ್ತ್ ಮಂದಿರ್ ಆಜ್ ತಾಚ್ಯಾ ತಸ್ವಿರೆನ್ ಸಂಪೂರ್ಣ್ಕಾಯೆನ್ ಭರ್ಲೆಂ. ಕೆದಾಳಾಯ್ ಮ್ಹಳ್ಳೆಪರಿಂ ಅಜ್ ಪರತ್ ಮ್ಹಣ್ತಾಂ – ವಿಶ್ವ ಕೊಂಕಣಿ ಕೇಂದ್ರಾಚಿ ವಾಸ್ತು, ಬಸ್ತಿ ಮಾಮಾಚ್ಯಾ ಉಡಾಸಾಕ್ ವಾಮನ್ ವನ ಮ್ಹಣ್ ವೊಲಾಯ್ಜೆ. ವನ ಮ್ಹಳ್ಯಾರ್ ರಾನ್, ಜಾಣ್ವಾಯ್ ಮ್ಹಣ್ಯೀ ಅರ್ಥ್ ಜಾತಾ” ಮ್ಹಣಾಲೊ ಡಾ| ಎಂ. ಪ್ರಭಾಕರ್ ಜೋಶಿ, ವಿಶ್ರಾಂತ್ ಪ್ರಾಧ್ಯಾಪಕ್, ಚಿಂತ್ಪಿ ಆನಿ ಯಕ್ಷಗಾನ ವಿದ್ವಾಂಸ್. ಡಾ| ಜೋಶಿ, ವಿಶ್ವ ಕೊಂಕಣಿ ಕೇಂದ್ರಾಚ್ಯಾ ಕೀರ್ತಿ ಮಂದಿರಾಂತ್, ಮಂಗ್ಳಾರಾ, 24 ಆಗಸ್ಟ್ 2022 ವೆರ್ ಸಾಂಜೆಚ್ಯಾ 4.00 ವೊರಾರ್, ಜ್ಞಾನಪೀಠ್ ಪುರಸ್ಕೃತ್ ಕೊಂಕ್ಣಿ ಸಾಹಿತಿ ದಾಮೋದರ ಮಾವಜೋ ಹಾಂಚಿ ತೆಲಾಬಣಾಚಿ ತಸ್ವೀರ್ ಉಗ್ತಾವ್ನ್ ಉಲಯ್ತಾಲೊ. ಹ್ಯಾ ಸಂದರ್ಭಾರ್ ತಾಂಚೆ ಸಾಂಗಾತಾ ತಾಂಚಿ ಪತಿಣ್ ಬಾಯ್ ಶೈಲಾ ಹಾಜರ್ ಆಸ್ಲಿ.
ಹ್ಯಾ ಸಂದರ್ಭಾರ್ ಉಲವ್ನ್ ಬಾಯಿ ಮಾವ್ಜೊನ್ ಮ್ಹಳೆಂ “ಆಮ್ಕಾಂ ವಿಶ್ವ ಕೊಂಕಣಿ ಕೇಂದ್ರ್ ಮ್ಹಳ್ಯಾರ್ ಬಸ್ತಿ ವಾಮನ್ ಶೆಣಯ್. ಕಶೆಂ ತುಮ್ಕಾಂ ಗೊಂಯ್ ಕುಳಾರ್ ತಶೆಂ ಆಮ್ಕಾಂ ವಿಶ್ವ ಕೊಂಕ್ಣಿ ಕೇಂದ್ರ್ ಆಮ್ಚೆಂ ದುಸ್ರೆಂ ಘರ್. ಡಾ| ಜೋಶಿನ್ ಬಸ್ತಿ ಮಾಮಾ ವಿಶ್ಯಾಂತ್ ಉಚಾರ್ಲ್ಲ್ಯಾ ವಿಚಾರಾಂಕ್ ಮ್ಹಜೊ ಸಹಮತ್ ಆಸಾ. ಹಾಂವ್ ಏಕ್ ಸಾದೊ ಮನಿಸ್. ಮ್ಹಾಕಾ ಅಲ್ತಾರಿ ಆಂವಡ್ನಾಂತ್. ತರೀ ಮ್ಹಜ್ಯಾ ಘರಾಂತ್ ಮ್ಹಾಕಾ ಮೆಳ್ಲ್ಲೊ ಮಾನ್ ಹಾಂವ್ ನಮೃತಾಯೇನ್ ಸ್ವೀಕಾರ್ ಕರ್ತಾಂ ಆನಿ ಮ್ಹಜಿ ತಸ್ವೀರ್ ಕೀರ್ತಿ ಮಂದಿರಾಂತ್ ಉಬಾರ್ಲ್ಲೆ ಖಾತಿರ್ ವಿಶ್ವ ಕೊಂಕ್ಣಿ ಕೇಂದ್ರ್ ಅಧ್ಯಕ್ಷ್ ಆನಿ ಟ್ರಶ್ಟಿಂಚೊಂ ಅಬಾರ್ ಮಾಂದ್ತಾಂ”
ವಿಶ್ವ ಕೊಂಕಣಿ ಕೇಂದ್ರಾಚೊ ಅಧ್ಯಕ್ಷ್ ಸಿ.ಎ. ನಂದಗೋಪಾಲ ಶೆಣೈ ಹಾಣಿ ಯೆವ್ಕಾರ್ ಮಾಗೊ. ಕೊಂಕಣಿ ಕವಿ ಮತ್ತು ವಿಶ್ವ ಕೊಂಕಣಿ ಕೇಂದ್ರಾಚೊ ಟ್ರಸ್ಟಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ. ಕಾರ್ಯದರ್ಶಿ ಸಿ.ಎ. ಗಿರಿಧರ ಕಾಮತ್ ಹಾಣಿ ದಿನ್ವಾಸ್ ಪಾಟಯ್ಲೆ.
ವಿಶ್ವ ಕೊಂಕಣಿ ಕೇಂದ್ರಾಚೊ ಉಪಾಧ್ಯಕ್ಶ್ ಗಿಲ್ಬರ್ಟ್ ಡಿ’ಸೊಜಾ, ಖಜಾನ್ದಾರ್ ಬಿ. ಆರ್. ಭಟ್, ಟ್ರಸ್ಟಿ ರಮೇಶ್ ನಾಯಕ್, ಶಕುಂತಲಾ ಆರ್. ಕಿಣಿ, ಸಿಇಓ ಗುರುದತ್ತ ಬಂಟ್ವಾಳ್ಕರ್, ಸಂಶೋಧನಾ ವಿಭಾಗಾಚೊ ನಿರ್ದೇಶಕ್ ಡಾ| ಬಿ. ದೇವದಾಸ ಪೈ, ಅನಿವಾಸಿ ಉದ್ಯಮಿ ಆನಿ ದಾನಿ ಜೇಮ್ಸ್ ಮೆಂಡೋನ್ಸಾ, ಕವಿತಾ ಟ್ರಸ್ಟ್ ಅಧ್ಯಕ್ಷ್ ಕಿಶೂ, ಬಾರ್ಕೂರ್, ಕವಿ ಟೈಟಸ್ ನೊರೊನ್ಹಾ, ಕುಡ್ಪಿ ರಜನಿಕಾಂತ ಶೆಣೈ ಆನಿ ಹೆರ್ ಹ್ಯಾ ಸುವಾಳ್ಯಾರ್ ಹಾಜರ್ ಆಸ್ಲೆ.
