ಪಾಟ್ಲ್ಯಾ 80 ವರ್ಸಾಂ ಪಾಸುನ್ ಮಹಾರಾಷ್ಟಾಂತ್ ಕೊಂಕಣಿ ಭಾಶೆಚ್ಯಾ ಉದರ್ಗತೆ ಖಾತಿರ್ ಎಕೀನ್ಪಣಾನ್ ವಾವುರ್ಚೊ ಮಾಲ್ಘಡೊ ಸಂಸ್ಥೊ ಕೊಂಕಣಿ ಭಾಷಾ ಮಂಡಳ್, ಮಹಾರಾಷ್ಟ್ರ – ಆಯ್ತಾರಾ, 21 ಅಗೊಸ್ತ್ 2022ವೆರ್ ಸಾಂಜೆಚ್ಯಾ 6.00 ವರಾಂಚೆರ್, ಎಸ್. ಕೆ. ಬೋಲೆ ಮಾರ್ಗ್, ದಾದರ್ ಪಶ್ಚಿಮ್, ಮುಂಬಯ್ ಹಾಂಗಾಸರ್ ಆಸ್ಚ್ಯಾ ಡಾ| ಆಂಟೊನಿಯೊ ದ ಸಿಲ್ವಾ ಹೈಸ್ಕೂಲ್ ಸಾಲಾಂತ್; ಪದಾಂ – ನಾಚ್ ಆನಿ ಮನೋರಂಜನಾನ್ ಭರ್ಲಲೊ ತೀಸಾವೊ ಕೊಂಕ್ಣಿ ಮಾನ್ಯತಾ ದಿವಸ್ ಆನಿ ಸಂಸ್ಥ್ಯಾಚೊ 80ವೊ ವಾರ್ಷಿಕೋತ್ಸವ್ ವ್ಹಡಾ ದಬಾಜೆನ್ ಆಚರಣ್ ಕರ್ತಾ ಮ್ಹಣ್ ಕೊಂಕಣಿ ಭಾಷಾ ಮಂಡಳ್, ಮಹಾರಾಷ್ಟ್ರ ಹಾಚೊ ಅಧ್ಯಕ್ಶ್ ಮಾನೆಸ್ತ್ ಜೋನ್ ಡಿ’ಸಿಲ್ವಾ, ಉಪಾಧ್ಯಕ್ಷ್ ಮಾನೆಸ್ತ್ ಆಲ್ಬರ್ಟ್ ಡಬ್ಲ್ಯೂ ಡಿ’ಸೊಜಾ, ಕಾರ್ಯಾಧ್ಯಕ್ಷ್ ಮಾನೆಸ್ತ್ ಹೆನ್ರಿ ಲೋಬೊ, ಜೆರಾಲ್ ಕಾರ್ಯದರ್ಶಿ ಮಾನೆಸ್ತ್ ಲೋರೆನ್ಸ್ ಡಿ’ಸೊಜಾ ಕಮಾನಿ, ಸಹ ಕಾರ್ಯದರ್ಶಿ ಮಾನೆಸ್ತ್ ಜೋನ್ ಆರ್. ಪಿರೇರಾ, ಗವ್ರವ್ ಖಜಾನ್ದಾರ್ ಮಾನೆಸ್ತ್ ವಾಲ್ಟರ್ ಡಿ’ಸೊಜಾ, ಜೆರಿಮಿರಿ ಆನಿ ಕಾರ್ಯಕಾರಿ ಸಮಿತಿಚ್ಯಾ ಸಾಂದ್ಯಾಂನಿ ಪತ್ರಾಪರ್ಗಟ್ಣೆಂತ್ ಕಳಯ್ಲಾಂ.
ಹ್ಯಾ ಕಾರ್ಯಾಕ್ ಸೆವೆನ್ ಐಲ್ಯಾಂಡ್ಸ್ ಶಿಫ್ಫಿಂಗ್ ಕಂಪೆನಿ ಹಾಚೊ ಅಧ್ಯಕ್ಷ್ ಆನಿ ಆಡಳ್ತ್ಯಾ ನಿರ್ದೇಶಕ್ ಕ್ಯಾ| ತೊಮಸ್ ಡಬ್ಲ್ಯೂ ಪಿಂಟೊ ಮುಕೆಲ್ ಸಯ್ರೊ ಜಾವ್ನ್, ಫಾಮಾದ್ ವಕೀಲ್, ಪಿ. ವಾಜ್ ಆನಿ ಕಂಪೆನಿ ಹಾಚೊ ಆಡಳ್ತ್ಯಾ ಭಾಗಿದಾರ್ ವಕೀಲ್ ಪೀಯೂಸ್ ವಾಜ್ ಆನಿ ಡಾ| ಆಂಟೊನಿಯಾ ದ ಸಿಲ್ವ ಟ್ರಸ್ಟ್ ಹಾಚೊ ಆಡಳ್ತ್ಯಾ ಟ್ರಸ್ಟಿ ಮಾನೆಸ್ತ್ ಜೋಸೆಫ್ ಡಿ’ಸೊಜಾ ಮಾನಾಚೆ ಸಯ್ರೆ ಜಾವ್ನ್ ಹಾಜರ್ ಆಸ್ತಲೆ.
ಹ್ಯಾ ಸುವಾಳ್ಯಾರ್ ಧಾವೆಂತ್, ಬಾರಾವೆಂತ್ ಆನಿ ಹೆರ್ ಪದ್ವಿ ತಶೆಂ ಪದ್ಯುತ್ತರ್ ಪರೀಕ್ಶೆಂನಿ ಅನುಕ್ರಮಾನ್ 85%, 80% ಆನಿ 75% ವಯ್ರ್ ಅಂಕ್ ಜೊಡ್ಲೆಲ್ಯಾ ಸಂಸ್ಥ್ಯಾಚಾ ಸಾಂದ್ಯಾಂಚ್ಯಾ ಭುರ್ಗ್ಯಾಂಕ್ 2022ವ್ಯಾ ವರ್ಸಾಚೆ ಪ್ರತಿಭಾ ಪುರಸ್ಕಾರ್ ಪ್ರದಾನ್ ಕರ್ತಲೆ. ಹೆ ಖಾತಿರ್ ಸಂಸ್ಥ್ಯಾಚಾ ಸಾಂದ್ಯಾಂನಿಂ ತಾಂಚ್ಯಾ ಭುರ್ಗ್ಯಾಂಚ್ಯಾ ಮಾರ್ಕ್ಸ್ ಶೀಟಾಚಿ ಫೊಟೊಪ್ರತಿ, ಪಾಟ್ಲ್ಯಾನ್ ಮೆಂಬರ್ಶಿಫ್ ಸಂಕೊ, ಟೆಲಿಫೊನ್ ಸಂಕೊ ಆನಿ ನಾಂವ್ ಬರವ್ನ್ ಸಂಸ್ಥ್ಯಾಚ್ಯಾ ಕಾರ್ಯಾಲಯಾಂತ್ 15 ಅಗೊಸ್ತ್ 2022 ಭಿತರ್ ಪಾವಿತ್ ಜಾಯ್ಶೆಂ ಧಾಡುನ್ ದೀಜಾಯ್ ಮ್ಹಣೊನ್ ಜೆರಾಲ್ ಕಾರ್ಯದರ್ಶಿ ಮಾನೆಸ್ತ್ ಲೊರೆನ್ಸ್ ಡಿ’ಸೊಜಾ, ಕಮಾನಿ ಹಾಣಿ ಸಂಸ್ಥ್ಯಾಚ್ಯಾ ಸಾಂದ್ಯಾಂಕ್ ಕಳಯ್ಲಾಂ.
ಮಹಾರಾಷ್ಟ್ರಾಂತ್ ಕೊಂಕಣಿ ಭಾಷಾ ಮಂಡಳ್ ಸಂಸ್ಥೊ, ದೇಶ್ ಸ್ವತಂತ್ರ್ ಜಾಂವ್ಚ್ಯಾಕೀ ಪಯ್ಲೆಂ, 5 ಎಪ್ರಿಲ್ 1942 ವೆರ್ – ತವಳ್ ತವಳ್ ಕೊಂಕ್ಣೆಕ್ ಲಗ್ತಿಂ ಅಧಿವೇಶನಾಂ ಮಾಂಡುನ್ ಹಾಡ್ಚಿಂ, ಸಭಾ ಚಲಂವ್ಚ್ಯೊ, ಪ್ರದರ್ಶನಾಂ ಮಾಂಡುನ್ ಹಾಡ್ಚಿಂ, ಕೊಂಕ್ಣಿ ಗ್ರಂಥಾಲಯಾಂ, ಕ್ಲಾಶಿ, ಇಸ್ಕೊಲಾಂ ಚಲಂವ್ಚಿಂ, ಪುಸ್ತಕಾಂ, ಸಬ್ದಾಕೋಶ್ ಫಾಯ್ಸ್ ಕರ್ಚೆ ತಸಲೆ ಉದ್ದೇಶ್ ದವರ್ನ್ ಸ್ಥಾಪನ್ ಜಾಲ್ಲೊ. ತವಳ್ ಪಾಸುನ್ ಆಜ್ ಪರ್ಯಾಂತ್ ಕೊಂಕಣಿ ಭಾಷಾ ಮಂಡಳ್, ಮಹಾರಾಷ್ಟ್ರ ಸಂಸ್ಥೊ ಕೊಂಕ್ಣಿ ಭಾಸ್ ಆನಿ ಸಂಸ್ಕೃತೆಚ್ಯಾ ಉದರ್ಗತೆಖಾತಿರ್ ಖಳ್ಮಿತ್ ನಾಸ್ತಾನಾ ವಾವುರ್ನ್ ಆಯ್ಲಾ. ಮುಂಬಯ್ತ್ ಅಖಿಲ್ ಭಾರತ್ ಕೊಂಕ್ಣಿ ಪರಿಷದೆಚಿಂ ಅಧಿವೇಶನಾಂ ಆಯೋಜಿತ್ ಕೆಲ್ಯಾಂತ್. ಮುಂಬಯ್ ಮ್ಹಾಶೆರಾಂತ್ 1970 ಆನಿ 1971 ವ್ಯಾ ವರ್ಸಾ ಆಯೋಜನ್ ಕೆಲ್ಲೆಂ ಮಾಂಡೊ ಫೆಸ್ತ್, 1973 ವ್ಯಾ ಆಯೋಜನ್ ಕೆಲ್ಲೆಂ ಕುಡ್ಮಿ ಫೆಸ್ತ್ ಆನಿ 2004 ವ್ಯಾ ವರ್ಸಾ ಫಾಮಾದ್ ಶಣ್ಮುಖಾನಂದ ಹೊಲಾಂತ್ ಮಾಂಡುನ್ ಹಾಡ್ಲ್ಲಿ ಕೊಂಕಣ್ ದಾಯ್ಜ್ ಯಾತ್ರಾ ಮಹಾರಾಷ್ಟಾಚ್ಯಾ ಕೊಂಕ್ಣಿ ಚರಿತ್ರೆಂತ್ ಯಾದ್ಗಾರ್ ದಾಕ್ಲೆ ಜಾವ್ನ್ ಉರ್ಲ್ಯಾತ್.
ಕೊಂಕ್ಣಿ ಏಕ್ ಸ್ವತಂತ್ರ್ ಭಾಸ್ ಮ್ಹಣ್ ಸಾಹಿತ್ಯ ಅಕಾಡೆಮಿ ಥಾವ್ನ್ ಮಾನ್ಯತಾ ಮೆಳೊಂಕ್, ಸಂವಿಧಾನಾಚ್ಯಾ ಅಟ್ವ್ಯಾ ವಳೆರಿಂತ್ ಕೊಂಕ್ಣೆಕ್ ಸ್ಥಾನ್ ಮೆಳೊಂಕ್ – ಕೊಂಕಣಿ ಭಾಷಾ ಮಂಡಳ್, ಮಹಾರಾಷ್ಟ್ರ ಸಂಸ್ಥೊ ಖೂಬ್ ವಾವುರ್ಲಾ. ಪ್ರಸ್ತುತ್ ಮಹಾರಾಷ್ಟ್ರಾಂತ್ ಕೊಂಕಣಿ ಸಾಹಿತ್ಯ ಅಕಾಡೆಮಿ ಜಾಯ್ ಮ್ಹಳ್ಳ್ಯಾ ದಿಶೆನ್ ಸಂಸ್ಥ್ಯಾಚೆ ಪ್ರಸ್ತುತ್ ಹುದ್ದೆದಾರ್ ಪ್ರಾಮಾಣಿಕ್ಪಣಿ ವಾವುರ್ನ್ ಆಸಾತ್.
ಹರ್ ವರ್ಸಾ ಅಗೋಸ್ತ್ ಮಯ್ನ್ಯಾಂತ್ ಕೊಂಕಣಿ ಭಾಷಾ ಮಂಡಳ್, ಮಹಾರಾಷ್ಟ್ರ ಕೊಂಕ್ಣಿ ಮಾನ್ಯತಾ ದಿವಸ್ ಆಚರಣ್ ಕರ್ತಾ. ಶಿಕ್ಪಾಂತ್ ಆನಿ ಖೆಳಾಂತ್ ಕೊಂಕ್ಣಿ ಭುರ್ಗ್ಯಾಂಕ್ ಉತ್ತೇಜನ್ ದೀಂವ್ಕ್, ಹರ್ ವರ್ಸಾ ವಾರ್ಷಿಕ್ ಕಾರ್ಯಕ್ರಮಾ ವೆಳಾರ್ ಪುರಸ್ಕೃತ್ ಕರ್ತಾ. ಪ್ರಸ್ತುತ್ ವರ್ಸಾ ಮಾನ್ಯತಾ ದಿವಸ್ ಆನಿ ಸಂಸ್ಥ್ಯಾಚೊ ವಾರ್ಷಿಕೋತ್ಸವ್ ಸಾಂಗಾತಾ ಆಚರಣ್ ಕರುಂಕ್ ಯೆವ್ಜಿಲಾಂ ಆಸುನ್ ಕಾರ್ಯಕ್ರಮಾ ಉಪ್ರಾಂತ್ ರುಚಿಚೆಂ ಜೆವಣ್ ಆಸ್ತಲೆಂ ಮ್ಹಣ್ ಆಮಂತ್ರಣ್ ಪತ್ರಾಂತ್ ಕಳಯ್ಲಾಂ. ಮುಂಬಯ್ ಆನಿ ಉಪನಗರಾಂನಿ ಜಿಯೆಂವ್ಚ್ಯಾ ಸರ್ವ್ ಕೊಂಕ್ಣಿ ಮೊಗಿಂಕ್ ಕಾರ್ಯಾಕ್ ಮೊಗಾಚೆಂ ಆಪವ್ಣೆಂ ಆಸಾ ಮ್ಹಣ್ ಹುದ್ದೆದಾರಾಂನಿ ಕಳಯ್ಲಾಂ.
