ಮೋದಿಚ್ಯೆಂ ಹರ್ ಘರ್ ತಿರಂಗಾ ಅಭಿಯಾನ್

“ಆಜಾದಿ ಕಾ ಅಮೃತ್ ಮಹೋತ್ಸವ್” ಸುವಾಳ್ಯಾರ್, ಹರ್ ಘರ್ ತಿರಂಗಾ ಅಭಿಯಾನ್ ಕರುಂಕ್ ಪ್ರಧಾನಿ ಮೋದಿನ್ ದಿಲ್ಲೊ ಉಲೊ ಏಕ್ ಮಹತ್ವಾಚ್ಯೆಂ ಆನಿಂ ಸ್ವಾಗತಾರ್ಹ್ ಮೇಟ್ ಜಾವ್ನಾಸಾ. ನಾಗ್ರಿಕಾಂನಿಂ ತಿರಂಗಾ ಬಾವ್ಟೊ ಆಪ್ಲ್ಯಾ ಘರಾ ಹಾಡುನ್, ಫಾವೊತ್ಯಾ ಮಾನಾನ್ ಉಭಂವ್ಚಿ ಪ್ರಕ್ರಿಯಾ ಆಮ್ಚ್ಯಾ ಕೆಂದ್ರೀಯ್ ಸರ್ಕಾರಾನ್ ಅರಂಭ್ ಕೆಲ್ಯಾ. ಹಿ ಹೊಗ್ಳಿಕೆಕ್ ಫಾವೊ ಜಾಲ್ಲಿ ಪ್ರಕ್ರಿಯಾ. ಖಂಯ್ಸರ್  ಹೊಗ್ಳಿಕ್ ದೀಂವ್ಕ್ ಜಾಯ್ ಥೈಂಸರ್ ಹೊಗ್ಳಿಕ್ ದಿಂವ್ಚ್ಯೆಂ ಅಧಿಕ್ ಗರ್ಜ್ಯೆಚೆಂ.

“ಹ್ಯಾ ವರ್ಸಾ ಆಮಿಂ ಆಜಾದಿ ಕಾ ಅಮೃತ್ ಮಹೋತ್ಸವ್ ಸಂಭ್ರಮಿತನಾಂ, ಹರ್ ಘರ್ ತಿರಂಗಾ ಆಂದೋಲನ್ ಮಜ್ಬೂತ್ ಕರ‍್ಯಾಂ. ಅಗೋಸ್ತ್ 13 ಥಾವ್ನ್ 15 ಮ್ಹಣಾಸರ್, ಆಪ್ಲ್ಯಾ ಘರಾ ತಿರಂಗಾ ಬಾವ್ಟೊ ಉಭವ್ಯಾಂ ವ ಪ್ರದರ್ಶನ್ ಕರ‍್ಯಾಂ. ಹೆಂ ಆಂದೋಲನ್ ಆಮ್ಚ್ಯಾ ರಾಶ್ಟ್ರೀಯ್ ಬಾವ್ಟ್ಯಾ ಸಂಗಿಂ ಆಮ್ಚೊ ಸಂಬಂಧ್ ವಾಡಂವ್ದಿ”, ಅಶೆಂ ಮ್ಹಳಾಂ ಆಮ್ಚ್ಯಾ ಪ್ರಧಾನಿ ಮೋದಿನ್.

ರಾಶ್ಟ್ರೀಯ್ ಬಾವ್ಟ್ಯಾಚಿ ಮೂಳ್ ವಿನ್ಯಾಸ್:

ಸಕಯ್ಲ್ ಚಿಟ್ಕಾಯಿಲ್ಲಿ ತಸ್ವೀರ್, ಶ್ರೀ ಪಿಂಗಲಿ ವೆಂಕಯ್ಯಾ‌ಜಿಕ್ ಹೊ ಬಾವ್ಟೊ ಡಿಜಾಯ್ನ್ ಕೆಲ್ಲಿ ಮ್ಹಣ್ ಮಾನ್ ದಿತಾ. ತಾಚ್ಯಾ ಡಿಜಾಯ್ನಾಚ್ಯಾ ಆಧಾರಾರ್, ಆಮ್ಚೊ ರಾಶ್ಟ್ರೀಯ್ ಬಾವ್ಟೊ ವಿನ್ಯಾಸ್ ಕೆಲ್ಲೊ.

ಅಮ್ಚೊ ಬಾವ್ಟೊ ತೀನ್ ರಂಗ್ ಪಟ್ಟ್ಯೊ ಅಸ್ಲಲೊ. ಹೆ ಪಟ್ಟೆ ಸಮಾನ್ ರೂಂದಾಯೆಚ್ಯೊ. ವಯ್ಲಿ ಪಟ್ಟಿ ಕೇಸರಿ, ಮಧ್ಲಿ ಧೊವಿ ಆನಿಂ ಸಕಯ್ಲಿ ಪಾಚ್ವಿ. ಧೊವ್ಯಾ ಪಟ್ಟೆಚ್ಯಾ ಕೇಂದ್ರಾ ಥಾವ್ನ್ 24 ಕಾಡಿಯೊ ಆಸ್ಚ್ಯೆಂ ನೇವಿ ನೀಳ್ ಚಕ್ರ್ ಪರ್ಜಳ್ತಾ. ಕೇಸರಿ ರಂಗ್ ಆಮ್ಚಿ ತಾಕತ್ ಆನಿಂ ಧಯ್ರ್ ಹಾಂಚ್ಯೆಂ ಪ್ರತಿನಿಧಿತ್ವ್. ಧೊವೊ ರಂಗ್ ಶಾಂತಿ ಆನಿಂ ಪವಿತ್ರತಾ ಹಾಂಚ್ಯೆಂ ಪ್ರತಿನಿಧಿತ್ವ್. ಪಾಚ್ವೊ ರಂಗ್ ಉತ್ಪತ್ತಿ ಆನಿಂ ವೃದ್ಧಿ ಹಾಂಚ್ಯೆಂ ಪ್ರತಿನಿಧಿತ್ವ್. 24 ಕಾಡಿಯೊ ಮ್ಹಳ್ಯಾರ್ ಧರ್ಮ್ ಚಕ್ರ್. ಹೆಂ ಚಕ್ರ್ ಮ್ಹಳ್ಯಾರ್ ಕೆದ್ನಾಂಯೀ ಚಲಾವ್ಣೆಚೆಂ ಪ್ರತಿರೂಪ್. ಬಾವ್ಟ್ಯಾರ್, ಹೆಂ ಚಕ್ರ್ ನಿರಂತರ್ ಪ್ರೇತನ್ ಆನಿಂ ಪ್ರಗತಿ ಹಾಂಚ್ಯೆಂ ಪ್ರತಿನಿಧಿತ್ವ್ ಕರ‍್ತಾ. ಧರ್ಮ್ ಚಕ್ರ್ ಮ್ಹಳ್ಯಾರ್ ಆಮ್ಚೊ ದೇಸ್ ಕಾನೂನ್ ಕಾಯ್ದ್ಯಾಂ ಪ್ರಮಾಣೆಂ ಪ್ರಗತಿ ಕರ್ತಲೊ ಶಿವಾಯ್ ಕೋಣ್ ಎಕ್ಲ್ಯಾ ಮುಖೆಲ್ಯಾಚ್ಯಾ ಅನಿಯಂತ್ರಿತ್ ಫರ್ಮಾಣಾಂ ಪ್ರಮಾಣೆಂ ನಹಿಂ.

ಇತಿಹಾಸ್ ಸಾಕ್ಸ್ ದಿತಾ:

ಇತಿಹಾಸ್ ಹ್ಯಾ ಸತಾಚಿ ಸಾಕ್ಸ್ ದಿತಾ ಕಿ ಹಿಂದು ಮಹಾಸಭಾ ವ ತಾಚಿ ಸಂತತ್ ರಾಶ್ಟ್ರೀಯ್ ಸ್ವಯಂ-ಸೇವಕ್ ಸಂಘ್ (RSS) ಆಮ್ಚ್ಯಾ ಸ್ವತಂತ್ರ್ ಅಂದೋಳನಾಂತ್ ವಾಂಟೆಲಿ ಜಾವ್ನಾಂತ್. ಜಮ್ಮು- ಕಾಶ್ಮೀರ್ ಮಹಾರಾಜ (ಹಿಂದು) ಜಾಂವ್ ಹೈದರಾಬಾದ್ ನಿಜ಼ಾಮ್ (ಮುಸ್ಲಿಂ) ಜಾಂವ್ ಬ್ರಿಟಿಶ್ ರಾಜ್ವಟ್ಕೆ ವಿರೋದ್ ಝುಜೊಂಕ್ ನಾಂತ್. ಕೇವಲ್, ತವಳ್ಚ್ಯಾ ಅಖಿಲ್ ಭಾರತೀಯ್ ಕೊಂಗ್ರೆಸ್ ಪಾಡ್ತಿಚ್ಯಾ ಮುಖೆಲ್‍ಪಣಾಖಾಲ್ ಸ್ವತಂತ್ರ್ ಅಂದೋಳನ್ ಚಲ್ಲೆಂಲೆಂ. ಹಾಚೊ ಅರ್ಥ್ ನಹಿಂ ಕಿ ಸರ್ವ್ ಸ್ವಾತಂತ್ರ್ ಸೈನಿಕ್ ಆಯ್ಚ್ಯಾ ಕೊಂಗ್ರೆಸ್ ಪಾಡ್ತಿಚ್ಯೆ ಸಾಂದೆ.

ಸ್ವತಂತ್ರ್ ಸೈನಿಕ್ ಮ್ಹಣ್ತನಾಂ, ಮ್ಹಾಕಾ ಉಡಾಸ್ ಯೆತಾ ಆಮ್ಚ್ಯಾ ಮಾಜಿ ಆನಿಂ ಸ್ವರ್ಗೀಯ್ ಪ್ರಧಾನಿ ಶ್ರೀ ನರಸಿಂಹ ರಾವ್ ಹಾಚೊ. ಆಪ್ಲ್ಯೆ ಅರ್ಧ್ಯಾ ಆತ್ಮ್-ಕತೆಂತ್ (Quasi-autobiography) ತೊ ಬರಯ್ತಾ ಕಿ ಆಪುಣ್ ಹ್ಯೆದರಾಬಾದ್ ನಿಜ಼ಾಮ್ ರಾಜ್ವಟ್ಕೆ  ವಿರೋದ್ ಝುಜ್ಲಲೊ ಆನಿಂ ಜಯ್ಲಾಕ್ ಗೆಲ್ಲೊ ಸ್ವತಂತ್ರ್ ಸೈನಿಕ್. ಅಸಲ್ಯಾಂ ಮಹಾರಾಜ, ನಿಜ಼ಾಮ್, ರಾಯಾಂ ಆನಿಂ ರಾಯ್-ಕುಂವರಾಂ ವಿರೋದ್ ಹಿಂದು ಮಹಾಸಭಾ ವ ರಾಶ್ಟ್ರೀಯ್ ಸ್ವಯಂ-ಸೇವಕ್ ಸಂಘ್ ಝುಜ್ಲ್ಯಾತ್ ಆನಿಂ ಜಯ್ಲಾಕ್ ಗೆಲ್ಯಾತ್ ಮ್ಹಳ್ಳೊ ದಾಕ್ಲೊ ಚ್ಯರಿತ್ರೆಂತ್ ನಾಂ.

ಶ್ರೀ ನರೆಂದ್ರ ಮೋದಿ ಹ್ಯಾಚ್ ರಾಶ್ಟ್ರೀಯ್ ಸ್ವಯಂ-ಸೇವಕ್ ಸಂಘಾಚೊ ದೆವೋತ್ ಸಾಂದೊ. ಹೊ ಸಂಘ್‌ಚ್ ತಾಚ್ಯೆಂ ಕುಟಾಮ್. ಆಪ್ಲ್ಯೆ ಬಾಯ್ಲೆಕ್ ಸಯ್ತ್ ಸೊಡ್ನ್ ತೊ ಗೆಲಾ ಹ್ಯಾ ಸಂಘಾಚ್ಯಾ ಆದರ್ಶಾಂ ಖಾತಿರ್. ಮ್ಹಣ್ತನಾಂ, ತಾಚ್ಯಾ ಅದೇಶಾ ಖಾಲ್ ಹರ್ ಘರ್ ತಿರಂಗಾ ಅಂದೋಲನ್ ಹ್ಯಾ ವರ್ಸಾ ಪ್ರರಂಭ್ ಕೆಲಾಂ ದೆಕುನ್ ಆಮ್ಚಿ ಖುಶಿ ದೊಡಿ ಜಾಯ್ಜೆ.

ವಯ್ರ್ ಚಿಟ್ಕಾಯಿಲ್ಲಿ ತಸ್ವೀರ್ ಪಳೆಯಾ. ಭಗ್ವಾ ಬಾವ್ಟೊ ಘೆವ್ನ್ ಪುರ್ಶಾಂವ್ ಕಾಡ್ಚ್ಯೆ ಖಾಕಿ ಚಡ್ಡೆ-ವಾಲೆ ರಾಶ್ಟ್ರೀಯ್ ಸ್ವಯಂ-ಸೇವಕ್ ಆತಾಂ ಮೋದಿಚೊ ಆದೇಶ್ ಮಾಂದುನ್ ತಿರಂಗಾ ಘೆವ್ನ್ ಮೊಟರ್-ಸೈಕಲ್ ರೇಲಿ ಕಾಡ್ತಾತ್! ಹಿ ಕಾಳ್ಜಾಪೂರ್ವಕ್ ಜಾಲ್ಲಿ ಬದ್ಲಾವಣ್‌ಗೀ ಕೇವಲ್ ದಾಕವ್ಣೆ ಖಾತಿರ್ ಮಾತ್ರ್ ಕರ್ಚೊ ಸಯ್ಲಾಪ್ ತೆಂ ಕಳಿತ್ ನಾಂ. ಫೂಣ್, ಅಖ್ರೆಕ್ ತಿರಂಗಾಕ್ ಫಾವೊತೊ ಮಾನ್ ಮೆಳ್ಳೊ ಮ್ಹಣ್ ಆಮಿಂ ಸಂತೊಸ್ಲ್ಯಾಂವ್.

ಚ್ಯರಿತ್ರಾ ಕೋಣಾಕೀ ಭೊಗ್ಸಿನಾ. ರಾಶ್ಟ್ರೀಯ್ ಸ್ವಯಂ-ಸೇವಕ್ ಸಂಘಾನ್ ಆಮ್ಚ್ಯಾ ರಾಶ್ಟ್ರೀಯ್ ಬಾವ್ಟ್ಯಾಚೊ ತಿರಾಸ್ಕಾರ್ 2002 ಇಸ್ವೆ ಪರ‍್ಯಾಂತ್ ಕೆಲ್ಲೊ. ತವಳ್ ಪರ್ಯಾಂತ್, ಆಪ್ಲೊ ಭಗ್ವಾ ಬಾವ್ಟೊ‌ಚ್ ದೇಸಾಚೊ ಅಧಿಕೃತ್ ಬಾವ್ಟೊ ಜಾಯ್ಜೆ ಮ್ಹಣ್ ತಾಂಚೊ ನಾರೊ ಆಸ್ಲೊ.  ಮ್ಹಳ್ಯಾರ್, ಆಮ್ಚೊ ದೇಸ್ ಬಹು-ಜಾತೀಯ್, ಬಹು-ಧಾರ್ಮಿಕ್, ಬಹು-ಭಾಶಿ ಆನಿಂ ಬಹು-ವೈಚಾರಿಕ್ ಮ್ಹಳ್ಳೆಂ ಸತ್ ರಾಶ್ಟ್ರೀಯ್ ಸ್ವಯಂ-ಸೇವಕ್ ಸಂಘಾಕ್ ಆನಿಂ ತಾಚಿ ಸಂತತಿ ಭಾರತೀಯ್ ಜನತಾ ಪಾಡ್ತಿಕ್ ಮಾಂದುಂಕ್ ತಿತ್ಲಿಂ ವರ್ಸಾಂ ಲಾಗ್ಲಿಂ.

ಜಾಲ್ಲೆಂ ಜಾವ್ನ್ ಗೆಲಾಂ. ದೇರ್ ಆಯೆ ದುರುಸ್ತ್ ಆಯೆ.

ಹೆಂ ಬರವ್ನ್ ಆಸ್ತಾನಾಂ, ಮ್ಹಜ್ಯಾ ಹೌಜಿಂಗ್ ಕೊಲೊನಿಚ್ಯಾ ವಟಾರಾಂತ್ ಥಳೀಯ್ ರಾಜಕೀಯ್ ಸ್ವಯಂಸೇವಕ್ ಮೊಟರ್ ಸೈಕಲ್ ರೇಲಿ ಘೆವ್ನ್ ಆಯ್ಲ್ಯಾತ್. ಹರ್ಯೇಕ್ಲ್ಯಾ ಕಡೆಂ ತಿರಂಗಾ ಆಸಾತ್. ಹಾಂಗಾಚ್ಯೆಂ ಕೊರ್ಪೊರೇಶನ್ ಬಿಜೆಪಿಚ್ಯಾ ನಿಯಂತ್ರಣಾಚ್ಯೆರ್ ಆಸಾ. ದೆಕುನ್, ಮೋದಿಚೊ ಹರ್ ಘರ್ ತಿರಂಗಾ ಉಲೊ ತೆ ವ್ಹಡ್ ಭಾವಾಡ್ತಾಂತ್ ಪಾಳ್ತಾತ್. ಬರೆಂಚ್.

ಕಮುನಿಸ್ತ್ ಆನಿಂ ಆದಿವಾಸಿಂಚ್ಯೆ ಬಾವ್ಟೆ:

ರಾಶ್ಟ್ರೀಯ್ ಸ್ವಯಂ-ಸೇವಕ್ ಸಂಘಾಕ್ ಮಾತ್ರ್ ನಹಿಂ, ಹೆರ್ ಥೊಡ್ಯಾಂ ರಾಜಕೀಯ್ ಆಂದೊಳನಾಂಕ್ ತಾಂಚ್ಯೆಚ್ ಬಾವ್ಟೆ ಆಸ್ಲೆ. ದಾಕ್ಲ್ಯಾಕ್, ಕಮುನಿಸ್ತಾಂಚೊ ತಾಂಬ್ಡೊ ಬಾವ್ಟೊ. ಕಮುನಿಸ್ತ್ ಪಾಡ್ತ್ ಸ್ವತಂತ್ರ್ಯಾ ಪೈಲೆಂ ಥಾವ್ನ್ ಆಸ್ಲಿ. 1947 ಇಸ್ವೆಂತ್ ಆಮಿಂ ಸ್ವತಂತ್ರ್ ಜಾತಾನಾಂ, ಕಮುನಿಸ್ತ್ ಪಾಡ್ತಿಕ್ ದುಸ್ರೆಂಚ್ ಭಗ್ಲೆಂ: ಯೇ ಆಜ಼ಾದಿ ಜೂಟಿ ಹೆ ಮ್ಹಣ್ ತಾಣಿಂ ನಾರೊ ದಿಲೊ. ತಾಂಚ್ಯಾ ಪಾಡ್ತಿಕ್ ಲಗ್ತಿ ಜಾಲ್ಲ್ಯಾ ಖಂಯ್ಚ್ಯಾಯೀ ಅಫಿಸಾಂಚ್ಯಾ ಬಾವ್ಟ್ಯಾ-ಥಳಾರ್ ತಿರಂಗಾ ಬಾವ್ಟೊ ತಾಣಿಂ ಉಭಾರುಂಕ್ ನಾಂ. ತಾಂಚೊ ತಾಂಬ್ಡೊ ಬಾವ್ಟೊಚ್ “ಪಾಟಿಂ ಉರ್ಲೆಲ್ಯಾ, ದಗ್ದಲ್ಲ್ಯಾ, ದುಬ್ಳ್ಯಾ ಲೋಕಾಚ್ಯಾ ಸಂಘರ್ಶಾಚೊ ಪ್ರತೀಕ್” ಜಾವ್ನ್ ಉಭ್ಲೊ.

1964 ಇಸ್ವೆಂತ್, ಚೀನಿ ಝುಜಾ ವರ್ವಿಂ ಕಮುನಿಸ್ತ್ ಪಾಡ್ತ್ ಪುಟ್ಲಿ ಆನಿಂ CPI (M) ಮ್ಹಳ್ಳಿ ನವಿ ಪಾಡ್ತ್ ಜನ್ಮಾಲಿ. ಹ್ಯಾ ಪಾಡ್ತಿಚ್ಯೆ ಸರ್ಕಾರ್ ಅಸ್ತಮ್ತಿ ಬೆಂಗಾಲಾಂತ್ ತಶೆಂ ಕೇರಳಾಂತ್ ಜಾಯಿತ್ತಿಂ ವರ್ಸಾಂ ಅಧಿಕಾರಾರ್ ಆಸ್ಲೆ. ತರಿಪೂಣ್, ತಾಂಚ್ಯಾ ಪಾಡ್ತಿಚ್ಯಾ ಅಫಿಸಾಂತ್ ಕೆದ್ನಾಂಯೀ ತಿರಂಗ್ ಬಾವ್ಟೊ ಉಭಯಿಲ್ಲೊ ನಾಂ. 2021 ಇಸ್ವೆಂತ್, ಪಯ್ಲ್ಯಾ ಪಾವ್ಟಿಂ CPI (M) ಮುಖ್ಯಾಲಯ್ ಆನಿಂ ಶಾಖಾ-ಅಫಿಸಾಂನಿಂ ತಿರಂಗಾ ಉಭ್ಲೊ.

ರಾಶ್ಟ್ರೀಯ್ ಸ್ವಯಂ-ಸೇವಕ್ ಸಂಘ್ ಅನಿಂ ಕಮುನಿಸ್ತ್ ಪಾಡ್ತಿ ತಸ್ಲೆ ಸೊಡ್ನ್, ಹೆರ್ ಜಾಯಿತ್ತಿಂ ಆದಿವಾಸಿ ಸಂಘಟನಾಂ ಹ್ಯಾ ದೇಸಾಂತ್ ಆಸಾತ್. ತಾಂಚ್ಯೆ‌ಯೀ ಆಪ್ಲೆಚ್ ಬಾವ್ಟೆ ಆಸಾತ್. ದಾಕ್ಲ್ಯಾಕ್, ಸಕಯ್ಲ್ ಚಿಟ್ಕಾಯಿಲ್ಲ್ಯಾ ಪಿಂತುರಾಂತ್ ಥೊಡೆ ಬಾವ್ಟೆ ಉಭಂವ್ಚ್ಯೆಂ ಪಳೆಂವ್ಕ್ ಮೆಳ್ತಾ. ಬಾರಿಕಾಯೆನ್ ಪಳೆಲ್ಯಾರ್ ಹಿಂ ಆದಿವಾಸಿ ಸಂಘಟನಾಂ ತಿರಂಗ್ ಬಾವ್ಟ್ಯಾಕ್ ತಿರಸ್ಕಾರ್ ಕರಿನಾಂತ್. ತಾಂಚ್ಯಾಂ ಬಾವ್ಟ್ಯಾಂ ಮಧೆಂ ಏಕ್ ತಿರಂಗಾ ಉಭ್ತಾ.

ಪೂಣ್, ಏಕ್ ಸವಾಲ್ ಉಟಯ್ಜೆ ಪಡ್ತಾ. 75 ವರ್ಸಾಂ ಉತರ್ಲಿಂ ತರ್‌ಯೀ ಹಾಂಕಾಂ ಸ್ವತಂತ್ರ್ ಮೆಳ್ಳಾಂ‌? ಬ್ರಿಟಿಶ್ ರಾಜ್ವಟ್ಕೆ ಪ್ರಾಸ್ ಅಧಿಕ್ ಶೋಷಣ್ ಹೊ ಲೋಕ್ ಭಾರತೀಯ್ ಸ್ವದೆಶಿ ರಾಜ್ವಟ್ಕೆಂತ್ ಸೊಸುನ್ ನಾಂಗಿ? ತಾಂಚಿಂ ರಾಣಾಂ ತಶೆಂ ಜಮೀನ್ ಆತಾಂಚ್ಯಾ ಉದ್ಯೋಗ್-ಪತಿಂನಿಂ, ಘಣಿಕಾರಿಕ್ ಕಂಪ್ಣೆಂನಿಂ ಆನಿಂ ಪ್ರವಾಸಿ ಜಣಾಂಗಾಂನಿಂ ಆಪ್ಲ್ಯಾ ಸ್ವಾದೀನ್ ಕರುಂಕ್ ನಾಂತ್‌ಗೀ? ತಾಂಚ್ಯಾ ಸಂಘರ್ಶಾಚೊ ಏಕ್ ದಾಕ್ಲೊ ಸ್ವರ್ಗೀಯ್ ಫಾದರ್ ಸ್ಟೇನ್, ಜೆಜ್ವಿತ್ ಮಿಶನರಿ. ಹ್ಯಾ ಲೋಕಾಕ್ ಹರ್ ಘರ್ ತಿರಂಗಾ ಅಭಿಯಾನ್ ಕಿತ್ಲ್ಯಾ ಮಹತ್ವಾಚ್ಯೆಂ ಮ್ಹಣ್ ಚಿಂತಿಜೆ ಪಡ್ತಾ.

► ಫಿಲಿಪ್ ಮುದಾರ್ಥ್