ಆಪೊಣ್ಯಾ ತಾಳ್ಯಾಕ್…ಪೊಲಿಸ್ ಮ್ಹಳ್ಳ್ಯಾ ಭಿರಾಂತೆನ್…ಏಕ್ ಪಾವ್ಟಿಂ ರಿಶಭಾಚೆಂ ಕಾಳಿಜ್ ಮಾತ್ಸೆಂ ಉಡೊನ್ ಪಡ್ಲೆಂ!
ಖಿಣಾನ್ ತಾಚಿ ಚಾಲ್ ಥಾಂಬ್ಲಿ. ಆನಿ ಹಳ್ತಾರ್ ಆಪ್ಲಿ ದೀಶ್ಟ್ ದೆಗೆನ್ ರಾವ್ಲೆಲ್ಯಾ ಕಾರಾಚೆರ್ ಬದ್ಲಿಲಾಗ್ಲೊ.
‘ಕಾರ್ಡಿಯಾನ್…’!
ತಾಣೆಂ ಅಂದಾಜ್ ಕೆಲ್ಲೆಲ್ಯಾಪರಿಂ ತೆಂ ಪೊಲಿಸ್ ಕಾರ್ ನ್ಹಂಯ್. ಬಗಾರ್…ಕಾರ್ಡಿಯಾನ್ ಆಸ್‌ಲ್ಲೆಂ ಕಾರ್!! ತ್ಯಾಘಡ್ಯೆ ಸಮಧಾನೆಚೊ ಸ್ವಾಸ್ ತಾಣೆಂ ಸೊಡ್ಲೊ. ಆನಿಂ…
ಕಾರ್ಡಿಯಾನಾಕ್ ಬೆಫಿಕೆರ್ ಕರಿನಾಸ್ತಾಂ…ಅಮ್ಸರಿಂ ತೊ ಕಾರಾಸರ್ಶಿಂ ಆಯ್ಲೊ.
“ಯೇ ಬಸ್.”… ಕಾರ್ಡಿಯಾನಾನ್ ಕಾರಾಚೆಂ ದಾರ್ ಉಗ್ತೆಂ ಕೆಲೆಂ.
ಪೂಣ್ ಬಸ್ಚ್ಯಾ ಆದಿಂ ರಿಶಭ್ ಏಕ್ ಘಡಿ ಚಿಂತುಂಕ್ ಪಡ್ಲೊ. ನಂತರ್ ಧಯ್ರ್ ಘೆವ್ನ್ ಹಳ್ವಾಯೆರ್… ಕಾರಾರ್ ಬಸ್ಲೊ. ಕಾರ್ ಚಾಲು ಜಾಲೆಂ. ಆನಿ ತವಳ್‌ಚ್ಚ್ ಕಾರ್ಡಿಯಾನಾನ್ ಆಪ್ಲೆ ವೋಂಟ್ ವೆಗ್ಳೆ ಕೆಲೆ…
“ರಿಶಭ್…ತುಂ ಅಮ್ಸರ್ಲೊಯ್!.”
“ಅಮ್ಸರ್ ಕೆಲ್ಲೆಂ ಹಾಂವೆಂ ನ್ಹಂಯ್…ಕ್ಲೈವಾನ್. ನೀಜ್ ಗಜಾಲ್… ‘ಜರ್ ಹಾಂವ್ ಸಾಂಗಿನ್ ತರ್…’ ತುಮಿಂಯೀ ಹೆಂ ವೊಪ್ತೆಲ್ಯಾತ್.”
“ಹುಂ…ಕಿತೆಂಯೀ ತೆಂ ಜಾಂವ್…ಪೂಣ್ ಏಕ್… ‘ಜರ್ ಹಾಂವ್ ಸಾಂಗಿನ್ ತರ್’…ಮ್ಹಣ್ ಕ್ಲೋಡಿಯಾಕ್ ಬ್ಲ್ಯಾಕ್ ಮೇಯ್ಲ್ ಕರುನ್ ಧಮ್ಕಿ ದೀವ್ನ್ ಧೊಸುನ್ ಆಸ್ಚ್ಯಾ ತುಂವೆಂ…
ಕ್ಲೋಡಿಯಾಚ್ಯಾ ಖುನ್ಯೆಕ್…ಕ್ಲೈವಾಚೆರ್ ಫಾರಿಕ್ಪಣ್ ಘೆತ್ಲೆಂ ತರೀ ಕಿತ್ಯಾ? ತುಕಾ … ಎಕಾಕಾಕಿ ತಸೊಯೀ ಮೋಗ್ ಹುಸ್ಕೊ ಉದೆಂವ್ಕ್ ಕಾರಣ್ ತರೀ ಕಸಲೆಂ?!”
“ಸರ್…ಹಾಂವ್ ಕ್ಲೋಡಿಯಾಚ್ಯಾ ಲಗ್ನಾಂ ನಂತರ್‌ಯೀ ತಾಚ್ಯಾ ಮೊಗಾರ್ ಆಸ್‌ಲ್ಲೊಂ. ಪೂಣ್ ಹಾಂವೆಂ ಖುನ್…ಫಾರಿಕ್ಪಣ್ ಘೆತ್ಲಾಂ ಮ್ಹಣ್…ಅಶೆಂ ಸರ್ವ್ ಕಿತೆಂ ತುಮಿ ಸಾಂಗ್ತಾತ್ ತೆಂ ಮಾಕಾ ಸಮ್ಜಾನಾಂ. ಹಾಂವೆ ಕಿತೆಂಚ್ಚ್ ಕರುಂಕ್ ನಾಂ…ಕೆಲಾಂ ತೆಂ ಕ್ಲೈವಾನ್.”
“ಕ್ಲೈವಾನ್ ಕೆಲ್ಲಿ ಕ್ಲೊಡಿಯಾಚಿ ಖುನ್!. ಆನಿ ತುಂವೆಂ ಕೆಲ್ಲೆಂ ಕ್ಲೈವಾ…”.
“ಹಾಂವೆಂ ಕಿತೆಂ ಕೆಲಾಂ?!”. ಮಧೆಂಚ್ಚ್ ಮ್ಹಣಾಲೊ ರಿಶಭ್. “ಹಾಂವ್ ರಾತಿಚೆಂ ಸಿಮತ್ರೆಂತ್ ನಿದ್ತಾಂ…ದಿಸಾಚೆಂ ಸರಳ್ ಘೆವ್ನ್ ಭಂವ್ತಾಂ…”
“ರಿಶಭ್…ಹ್ಯಾ ಕಾರ್ಡಿಯಾನಾಕ್ ಆನಿಕೀ ತುಂ ವೊಳ್ಕಾನಾಂಯ್.?!…ಪೊಲಿಸಾಂಕ್ ದಿಂವ್ಚಿ ಜಾಪ್ ತುಂ ಮ್ಹಾಕಾ ದೀವ್ನ್ ಫಟಯ್ತಾಯ್ ತರ್…ತುಕಾ ಮ್ಹಜೆರ್ ಪಾತ್ಯೆಣಿಂ ನಾಂ ಮ್ಹಣ್ ಜಾಲೆಂ.
ಆನಿ ಜರ್ ಪಾತ್ಯೆಣಿ ನಾಂ ತರ್…ಆತಾಂಚ್ಚ್ ದೇಂವ್ ಆನಿ ಚಲ್.”
“ಸರ್ ಪಾತ್ಯೆಣಿಂ ನಾತ್‌ಲ್ಲಿ ತರ್…ಹಾಂವ್ ಕಾರಾರ್ ಚಡ್ತೊನಾಂ. ಆನಿ ಆತಾಂ ತುಮಿ ರಾಗಾನ್… ‘ಕಾರಾ ಥಾವ್ನ್ ದೇಂವ್’ ಮ್ಹಳ್ಯಾರೀ ದೆಂವೊನ್…ತುಮ್ಚಿ ಪಾತ್ಯೆಣಿಂ ಆನಿ ಸಹಕಾರ್ ಹೊಗ್ಡಾಂವ್ಕ್ ಮ್ಹಾಕಾ ನಾಕಾ.” ತಕ್ಶಣ್ ಮ್ಹಣಾಲೊ ರಿಶಭ್.
ಹೆಂ ಆಯ್ಕಾಲೆಂಚ್ಚ್ …“ರಿಶಬ್ ತುಂ ಕರ್ನ್ಯಾಂನಿಂ ಮಾತ್ರ್ ನ್ಹಂಯ್ …ಉತ್ರಾಂನಿಂಯೀ ರಿಶಭ್ ತೊ ರಿಶಭ್‌ಚ್ಚ್ ಸಯ್”. ಕಾರ್ಡಿಯಾನ್ ಅಮ್ರುಕೊ ಹಾಸ್ಲೊ. “ಅಸಲ್ಯಾ ಸರ್ವ್ ತುಜ್ಯಾ ಸಂಗ್ತೆ ಖಾತಿರ್ ಹಾಂವ್ ತುಜಿ ಸಳಾವಳ್ ‘ಲಾಯ್ಕ್’ ಕರ್ತಾಂ. ತರೀ ಮಾಕಾ ಕ್ಲೈವಾಚೆರ್ ತುಜೆಂ ಫಾರಿಕ್ಪಣ್…”
ತವಳ್‌ಚ್ಚ್ ರಿಶಭ್ ವಿಚಾರಿಲಾಗ್ಲೊ…
“ಸರ್…ಮ್ಹಜ್ಯಾ ಜಿವಿತಾವಿಶಿಂ ಅಶಿಯೀ ತುಮ್ಕಾ ಆತುರಾಯ್ ಕಿತ್ಯಾ?”
“ತುಜೆಂ ತೆಂ ವಿಚಿತ್ರ್ ವಿಶಿಶ್ಟ್ ವೆಕ್ತಿತ್ವ್!… ಮ್ಹಾಕಾ …ತುಜ್ಯಾ ಜಿವಿತಾ ಥಂಯ್ ಆಕರ್ಶಕ್ ಕರುಂಕ್ ಸಖ್ಲಾಂ. ತ್ಯಾ ದೆಕುನ್ ತುಕಾ ಜರ್ ಮನ್ ಆಸಾ ತರ್…ಸಾಂಗ್. ನಾಂ ತರ್ ವ್ಹಡ್ ನಾಂ.”
“ಸರ್…ಕ್ಲೋಡಿಯಾ ಮ್ಹಜ್ಯಾ ಜಿವಿತಾಂತ್ಲೆಂ ಉಬೊನ್ ಕ್ಲೈವಾಚ್ಯಾ ಜಿವಿತಾಂತ್ ರಿಗ್ಲೆಂ ವ್ಹಯ್. ತರೀ…ತಾಚೆ ಥಂಯ್ ಮ್ಹಜೊ ಮೋಗ್ ಹುಸ್ಕೊ…ದೀಸ್ ವೆತಾಂ ವೆತಾಂ ವಾಡಾತ್ತ್ ಆಸ್‌ಲ್ಲೊ ಶಿವಾಯ್ ಉಣೊ ಜಾಲೊನಾಂ.
ಪೂಣ್ ಕ್ಲೋಡಿಯಾಕ್…ಮ್ಹಜ್ಯಾ ಜಿವಿತಾಂತ್ಲೆಂ ಹುಮ್ಟೊನ್ ಕ್ಲೈವಾಚ್ಯಾ ಪಾಸ್ಳೆಕ್ ಘಾಲುನ್ ವಿಶ್ವಾಸ್ ಘಾತ್ ಕೆಲ್ಲ್ಯಾ ಫ್ರೆಡ್ಡಾನ್…ನಂತರ್ ಮ್ಹಜ್ಯಾ ಕುಡಿಚೆರ್ ಎಸಿಡ್ ಘಾಯ್ ಕರುನ್…ಮ್ಹಜೆಂ ಜಿವಿತ್ ಪಿಡ್ಡ್ಯಾರ್ ಕರುನ್ ಘಾಲೆಂ.
ಹ್ಯಾ ವರ್ವಿಂ…ಮ್ಹಜಿ ಆರ್ಥಿಕ್ ಸ್ಥಿತಿ ಧರ್ನಿಕ್ ಸಮಾ ಜಾಲ್ಲೆ ವೆಳಾ…ಆನಿ ಕಿತೆಂ ಕರುಂ?.
ಚೊರುಂಕ್ ಮ್ಹಾಕಾ ನಾಕಾ … ಭಿಕ್ ಮಾಗೊಂಕ್ ಅಂತಸ್ಕರ್ನ್ ಸೊಡಿನಾಂ.
ಅಸಲ್ಯಾ ಘಂಭೀರ್ ಸ್ಥಿತೆವೆಳಾ … ಉಪಾವ್ ನಾಸ್ತಾಂ ಘಂಭೀರ್ ಉಪಾವ್‌ಚ್ಚ್ ವಿಂಚ್ಲೊ. ಆನಿ ಮ್ಹಜ್ಯಾ ಕ್ಲೋಡಿಯಾಕ್‌ಚ್ಚ್ …ಬ್ಲ್ಯಾಕ್ ಮೇಯ್ಲ್ ಕರಿಜಾಯ್ ಪಡ್ಲೆಂ. ಆನಿಂ ಕೆಲೆಂ.”
“ತ್ಯಾಚ್ಚ್ ಪರ್ಮಾಣೆ … ತುಕಾ ಕ್ಲೈವಾಚೆರ್ ಫಾರಿಕ್ಪಣ್ ಕರಿಜಾಯ್ ಪಡ್ಲೆಂ. ಆನಿಂ ಕೆಲೆಂಯ್.” ರಿಶಭಾಚೆರ್‌ಚ್ಚ್ ದೀಶ್ಟ್ ಖಂಚವ್ನ್ ಮ್ಹಣಾಲೊ…ಕಾರ್ಡಿಯಾನ್.
“ಹಾಂವೆಂ ನ್ಹಂಯ್…‘ಕ್ಲೋಡಿಯಾ ವಯ್ಲ್ಯಾ ಮ್ಹಜ್ಯಾ ಖರ‍್ಯಾ ಮೊಗಾನ್ ತಾಚೆರ್ ಫಾರಿಕ್ಪಣ್ ಘೆತ್ಲೆಂ. ಕ್ಲೋಡಿಯಾಕ್ ಹಾಂವ್ ಬ್ಲಾಕ್ ಮೇಯ್ಲ್ ಕರ್ನ್ ಭೆಶ್ಟಾವ್ನ್ ಆಸ್ತಾನಾಂಯೀ…ತಾಚ್ಯಾ ದೊಳ್ಯಾಂ ಖಾಂಚಿನಿಂ ಮ್ಹಜ್ಯಾ ಮೊಗಾ ಖಾತಿರ್ ಉದೆಲ್ಲಿಂ ದುಖಾಂ ಹಾಂವೆ ಸಾರ್ಕೆಂ ಪಾರ್ಕಿಲ್ಲೆಂ. ತ್ಯಾವೆಳಾ…
ತಾಕಾ ದುಕವ್ನ್ ಆಸ್ಚಿ ತಿ ಆಮ್ಚ್ಯಾ ಮೊಗಾ ವೆಗ್ಳಾಚಾರಾಚಿ ದೂಕ್… ಮ್ಹಾಕಾಯೀ ತಡ್ವೊಂಕ್ ಜಾಯ್ನಾತ್‌ಲ್ಲೆಂ.!.
ತರೀ ಮ್ಹಜ್ಯಾ ಆರ್ಥಿಕ್ ಸ್ಥಿತಿಚಿ ಸಲ್ವೊಣಿ ಮ್ಹಜೆ ಮನ್ ಧಾರುಣ್ ಕರ್ಚ್ಯಾಕ್ ಪ್ರೇರಿತ್ ಕರ್ತಾಲಿ. ಆನಿ ಹಾಂವೆಂ ಸಗ್ಳೆಂ ವಿಸ್ರೊನ್ … ಕ್ಲೋಡಿಯಾಕ್…‘ಜರ್ ಹಾಂವ್ ಸಾಂಗಿನ್ ತರ್…’ ಮ್ಹಣ್ ಬ್ಲ್ಯಾಕ್ ಮೇಯ್ಲ್ ಕರಿಜಾಯ್ ಪಡ್ತಾಲೆಂ.!.
ವೊಟ್ಟಾರೆ…ಆಮಿಂ ದೊಗೀಂ ನೀಜ್ ಖರ‍್ಯಾ ಮೊಗಾಚ್ಯಾ ಭೊಗ್ಣಾಂನಿಂ ಭಿತರ್ಲ್ಯಾ ಭಿತರ್ ಲಾಸುನ್ ಆಸ್ತೆಲ್ಲ್ಯಾಂವ್ ತೆಂ ಖರೆಂ.
ಪೂಣ್ ಆಮ್ಚಿ ಆಮ್ಚಿ ತಿ ಅಸಾಹಾಯೆಕತಾ ಆಮ್ಚ್ಯಾ ವಿರೋಧ್ ಖೆಳ್ ಖೆಳುನ್ ಆಸ್‌ಲ್ಲಿ.
ಪರಿಣಾಮ್ ಜಾವ್ನ್ ತ್ಯಾ ದೊಳ್ಯಾಂತ್ ರಗಾತ್ ನಾತ್ಲೆಲ್ಯಾ ಕ್ಲೈವಾನ್…ನಿಶ್ಟುರ್ ರಿತಿನ್ ಕ್ಲೋಡಿಯಾಚಿ ಖುನ್ ಕೆಲ್ಲ್ಯಾವೆಳಿಂ…
‘ಮ್ಹಜೆಂ ಕ್ಲೋಡಿಯಾ ಆನಿ ಸಾಸ್ಣಾಕ್ ಮ್ಹಾಕಾ ನಾಂ!’ ಮ್ಹಳ್ಳೆಂ ತೆಂ ಆಯ್ಕೊನ್ ಹಾಂವ್ ಶಿರಿಂ ಚುಕ್ಲೊಂ. ತ್ಯಾ ವೆಳಾ ಮ್ಹಜ್ಯಾ ಕಾಳ್ಜಾಕ್ ಮಾರ್ಲೊಲೊ ತೊ…‘ಕ್ಲೋಡಿಯಾ ಆನಿ ನಾಂಚ್ಚ್ ನಾಂ!’ ಮ್ಹಳ್ಳೊ ಭಾಲೊ…ಮಾಕಾ ಕ್ರೋಧಾನ್ ತಶೆಂ ಧೆಧೆಸ್ಪರಾನ್ ಪಿಸೊ ಕರಿಲಾಗ್ಲೊ.
ಅಸಲೆಂ ಕ್ರೋಧ್ ಆನಿ ಧೆಧೆಸ್ಪರಾಚಿ ಪರಿಗತ್ ಮ್ಹಾಕಾ ವಯ್ರ್ ವಯ್ರ್…ಕ್ಲೈವಾಚ್ಯಾ ಫಾರಿಕ್ಪಣಾಕ್ ಜಾಗಯ್ತ್ ಆಸ್ತಾನಾಂ…ಮ್ಹಾಕಾ ಫಾರಿಕ್ಪಣ್ ಘೆಜಾಯ್ ಪಡ್ಲೆಂ…ಆನಿ ಘೆತ್ಲೆಂ.!.
ಹೆಂ ಆಯ್ಕಾತಾಂ ಘಡ್ಯೆನ್ ಕಾರ್ಡಿಯಾನ್ ಏಕ್ ಘಡಿ ಮೌನ್ ಜಾಲೊ. ನಂತರ್ ಕಾಳ್ಜಾಂತ್ ಭರುನ್ ಯೆಂವ್ಚ್ಯಾ ಉಮಾಳ್ಯಾಂನಿಂ ಉಚಾರಿಲಾಗ್ಲೊ…
“ಖರೊ ಮೋಗ್ ಕಿತೆಂ?…ನೀಜ್ ತರ್ ತಾಚಿ ತಿ ಅಖಂಡ್ ಸಕತ್ ಕಸಲಿ?!…ಮ್ಹಣ್ ಹಾಂವ್ ತುಜ್ಯಾ ಹ್ಯಾ ಖರ‍್ಯಾ ಮೊಗಾ ವರ್ವಿಂ ಜಾಣಾಂ ಜಾಲೊಂ”
“ಸರ್…ಅಸಲೊಚ್ಚ್ ಹಾಚ್ಯಾಕೀ ವರ್ತೊ ಮೋಗ್ ಕ್ಲೋಡಿಯಾಕ್ ಮ್ಹಜೆಂ ಥಂಯ್ ಆಸ್‌ಲ್ಲೊ!.” ಘಧ್ಘದಿತ್ ತಾಳ್ಯಾನ್ ಉಚಾರಿಲಾಗ್ಲೊ ರಿಶಭ್. ಆನಿ ಮುಂದರುನ್…
“ಆಮಿಂ ದೊಗೀಂ ಜಿಣಿಂ ಭರ್ ವೆವಗ್ಳ್ಯಾ ಅಸಹಾಯಕತೆಚಿ ನಿರಾಶಿ ಧೆಧಸ್ಪರ್ ಜಿವಿತ್ ಮೌನ್‌ಪಣಾನ್ ಸರುನ್ ಆಸ್‌ಲ್ಲ್ಯಾಂವ್.!…
ಆನಿ ಅಸಲ್ಯಾ ಜಿವಿತಾಂತ್ಲಿ ಘುಂವ್ಡಿ ಆಶೆವ್ನ್…ಕ್ಲೋಡಿಯಾ ಆಪ್ಲ್ಯಾ ಗರ್ಭಾಂತ್ ಆಪ್ಲೆಂ ಮ್ಹಳ್ಳ್ಯಾ ಬಾಳಾಕ್ ಆಶೆಲೆಂ. ಪುಣ್ ತ್ಯಾ ದಳ್ದಿರ್ ಕ್ಲೈವಾನ್…” ಮುಕಾರ್ ತಾಚೊ ತಾಳೊ ಫುಮಾರ್ ಜಾವ್ನ್ ತಾಕಾ ಉಲೊಂವ್ಕ್ ಜಾಲೆಂನಾಂ.!! ”
ಹೆಂ ಆಯ್ಕಾತಾಂ…ಕಾರ್ಡಿಯಾನಾಚ್ಯಾ ದೊಳ್ಯಾಂನಿಂ ದುಖಾಂ ಭರ್ಲಿಂ. ಉಪ್ರಾಂತ್ ಥೊಡ್ಯಾ ವೆಳಾನ್ ಧೀರ್ಘ್ ಸ್ವಾಸ್ ಸೊಡುನ್ ಕಾರ್ಡಿಯಾನ್ ಮ್ಹಣಾಲಾಗ್ಲೊ…
“ಪೂಣ್ ರಿಶಭ್…ಆತಾಂ ಜಾಲ್ಲೆಂ ಜಾಲೆಂ ಮ್ಹಣ್… ಹ್ಯಾ ಉಪ್ರಾಂತ್… ‘ಕ್ಲೋಡಿಯಾ…ಕ್ಲೈವ್… ತೊ ಬೊಂಗ್ಲೊ…’ ಹೆಂ ಸರ್ವ್ ವಿಸ್ರೊನ್…ತುಜ್ಯಾ ಕಾಳ್ಜಾ ಮನಾಂತ್ಲೆಂ ಹುಮ್ಟೊನ್ ಭಾಯ್ರ್ ಘಾಲ್. ಆನಿ ಆಜ್ ಥಾವ್ನ್ ಮ್ಹಜ್ಯಾ ಆಫಿಸಾಕ್ ಯೆ.”
“ಥ್ಯಾಂಕ್ಸ್ ಸರ್. ಜರೂರ್ ಹಾಂವ್ ಯೆತಾಂ. ಪೂಣ್ ಪ್ರಸ್ತುತ್ಚ್ಯಾ ಪರಿಗತೆಂತ್ ನ್ಹಂಯ್. ತಾಕಾ ಫಾವೊ ತೊ ಕಾಳ್ ಯೇಂವ್ಕ್ ಆಸಾ. ಆನಿ ತವಳ್ ಹಾಂವ್ ಜರೂರ್ ತುಮ್ಚ್ಯಾ ಆಫಿಸಾಚಿಂ ಮೆಟಾಂ ಚಡ್ತಲೊಂ. ಆನಿ ತುಮ್ಚ್ಯಾ ದಾರಾರ್ ಠೊಕೆ ಮಾರ್ತೊಲೊಂ.”
“ಮ್ಹಳ್ಯಾರ್?!”…ಕಾರ್ಡಿಯಾನಾಚ್ಯಾ ಕಪಾಲಾರ್ ಮಿರಿಯೊ ಉದೆಲ್ಯೊ.
“ಮ್ಹಳ್ಯಾರ್…ಕ್ಲೈವಾ ವಯ್ಲೊ ಮ್ಹಜ್ಯಾ ಫಾರಿಕ್ಪಣಾಚೊ ಥಿಬೊ…ಪೊಲಿಸ್ ಕೇಜ್ ಫಾಯ್ಲಾ ಥಾವ್ನ್ ಮಾಜ್ವೊನ್…ತೆಂ ಪೊಲಿಸ್ ಫಾಯ್ಲ್ ಧಾಂಪುನ್ ವೆಚ್ಯಾ ಪರ್ಯಾಂತ್…
ಹಾಂವೆ ಅಶೆಂಚ್ಚ್ ರಸ್ತ್ಯಾರ್ ಚಲಾತ್ತ್ ಆಸೊಂಕ್ ಜಾಯ್. ಆನಿ ಚಲಾತ್ತ್ ಆಸ್ತೊಲೊಂ!.
“ಪೂಣ್ ರಿಶಭ್…ಏಕ್ ಹಾಂವ್ ಜಾಗಯ್ತಾಂ…ಪರತ್ ಹಿ ಪೊಲಿಸ್ ಕೇಜ್ ಫಾಯ್ಲ್ ಉಗ್ತೆಂ ಜಾಯ್ನಾಶೆಂ ಮಾತ್ರ್ ತುಂವೆಂ ಜಾಗ್ರುತ್ ಘೆಂವ್ಕ್ ಆಸಾ. ಆನಿ ಹ್ಯಾ ಖಾತಿರ್…ತುಜ್ಯಾ ಮತಿಂ ಆನಿಕೀ ಕಿತೆಂ ಧೊಸುನ್ ಆಸಾ…ತೆಂ ಸಗ್ಳೆಂ ವಿಸರ್.”
“ಮ್ಹಳ್ಯಾರ್ ತುಮಿಂ… ವಿಸರ್…ವಿಸರ್ ಮ್ಹಣ್… ಕಸಲೆಂ ವಿಸರ್ ಮ್ಹಣ್ ಸಾಂಗುನ್ ಆಸಾತ್?!” ತಕ್ಶಣ್ ವಿಚಾರಿಲಾಗ್ಲೊ ರಿಶಭ್.
“ಫೆಡ್ರಿಕಾಚೆಂ ಫಾರಿಕ್ಪಣ್!”….ತಕ್ಶಣ್ ಮ್ಹಣಾಲೊ ಕಾರ್ಡಿಯಾನ್.
ಹ್ಯಾಘಡ್ಯೆ ಏಕ್ ಪಾವ್ಟಿಂ ದೊಗಾಂಯ್ಚ್ಯೊ ದಿಶ್ಟಿ ಎಕಾಮೆಕಾ ಝಗ್ಡೊಂಕ್ ಲಾಗ್ಲ್ಯೊ. ನಂತರ್ ತಗ್ಸಾಲ್ಲ್ಯಾ ತಾಳ್ಯಾನ್ ರಿಶಭ್ ಮ್ಹಣಾಲೊ…
“ಪೂಣ್…ಫೆಡ್ರಿಕಾನ್ ಕೊಂಕುನ್ ಕಾಡ್‌ಲ್ಲೊ ಮ್ಹಜೊ ದೊಳೊ…ತಾಚೆಂ ಫಾರಿಕ್ಪಣ್ ಆಶೆವ್ನ್ ಆಸಾ.!”
“ರಿಶಭ್…ತುಂವೆಂ ಕ್ಲೈವಾಚೆರ್ ಆಧಾರ್‌ಲ್ಲ್ಯಾ ಫಾರಿಕ್ಪಣಾಚೆಂ ಭೆಂ … ಫೆಡ್ರಿಕಾಚ್ಯಾ ಕಾಳ್ಜಾಂತ್ ರೊಂಬೊನ್ ಗೆಲಾಂ. ಆನಿ ತಾಚ್ಯಾ ಕಾಳ್ಜಾಂತ್ ಜಲ್ಮಾಲ್ಲ್ಯಾ ಭಿರಾಂತೆಚ್ಯಾ ತ್ಯಾ ಪಿಂಪ್ರ್ಯಾನ್ ತಾಕಾ ಗಾಂವ್ ಸೋಡ್ನ್ ಪೊಳಾಪೊಳ್ ಘೆಶೆಂ ಕೆಲಾಂ!
ಆನಿ … ಜರ್ ತುಜೆಂ ಹೆಂ ಫಾರಿಕ್ಪಣ್…ತಾಚಿ ಪಾಟ್ ಧರ್ನ್ ಸೊದುನ್ ಗೆಲೆಂ ತರ್…ಧಾಂಪುನ್ ಗೆಲ್ಲಿ… ‘ಕ್ಲೈವಾಚಿ ಕೇಜ್ ಫಾಯ್ಲ್’ ಪರತ್ ಉಗ್ತೆಂ ಜಾಂವ್ಕ್ ಕಾರಣ್ ಜಾತೆಲೆಂ ಖಂಡಿತ್.!.
ಅಸಲ್ಯಾ ಗಜಾಲೆವರ್ವಿಂ ಪೊಲಿಸ್ ಫಾಯ್ಲಾಂತ್ಲ್ಯೊ ಸುಮಾರ್ ಕೆಜಿ ಪರತ್ ಉಗ್ತೆ ಜಾಲ್ಲ್ಯೊ ಆಸಾತ್ … ಆನಿ ಜಾಯಿತ್ತ್ ಆಸಾತ್.”
ಹೆಂ ಆಯ್ಕಾತಾಂ … ಖಿಣಾನ್ ಆಪ್ಲೆಂ ಮುಖಮಳ್ ಘುಂವ್ಡಾವ್ನ್ … ರಿಶಭ್ ಕಾರಾ ಭಾಯ್ರ್ ಪಳೆಂವ್ಕ್ ಪಡ್ಲೊ. ಆನಿ ತಗ್ಸಾಲ್ಲ್ಯಾ ತಾಳ್ಯಾನ್ ವಿಚಾರಿಲಾಗ್ಲೊ…
“ಫೆಡ್ರಿಕಾಚ್ಯಾ ಬಚಾವೆಕ್…ತುಮಿ ಕಾಂಯ್ ತಾಕಾ ಹಿಶಾರೊ ದಿಲ್ಲೊ?…”
“ಹುಂ…ತುಜ್ಯಾ ಬಚಾವೆ ಖಾತಿರ್….ಫೆಡ್ರಿಕಾಚಿ ಬಚಾವಿ ಹಾಂವೆಂ ವಿಂಚ್ಲಿ!.” ಮ್ಹಣಾಲೊ ಕಾರ್ಡಿಯಾನ್. ಆನಿ ಮುಂದರುನ್…
“ಜರ್ ತೊ ಆಪ್ಲ್ಯಾ ಬಚಾವೆಕ್ ಪೊಲಿಸ್ ಡಿಪಾರ್ಟ್‌ಮೆಂಟಾಚ್ಯಾ ದಾರಾಕ್ ಪಾವ್ಲೊ ತರ್… ‘ಪೊಲಿಸ್ ಖೊಡೊ’ ತುಕಾ ಸೊಧುನ್ ಯೆತೊಲೊ. ಆನಿ ಹ್ಯಾ ಖಾತಿರ್…
ಹಾಂವೆ ತುಜ್ಯಾ ಫಾರಿಕ್ಪಣಾವಿಶಿಂ ತಾಕಾ ಜಾಗಯ್ಲೆಂ. ಆನಿ … ತಾಚ್ಯಾ ಜಿಬೆಕ್ ಲಗಾಮ್ ಘಾಲುನ್ ಶಹರ್ ಸೋಡ್ನ್ ವೆಚ್ಯಾಕ್…ತಾಕಾ ಕಡಕ್ಕ್ ಭೆಶ್ಟಾವ್ಣಿ ದಿಲಿ. ಆನಿ ಹ್ಯಾ ಶಹರಾಂತ್ ರಾವೊಂಕ್ ತಾಕಾ ಸೊಡ್ಲೆಂನಾಂ.
ಹ್ಯಾವರ್ವಿಂ…ಫಾರಿಕ್ಪಣಾಚ್ಯಾ ಭಿರಾಂತೆನ್…ಮನೋಖಿನ್ನತೆಂತ್…ದೇಶಾಂತರ್ ಜಾವ್ನ್ ಭಂವೊನ್ ಆಸ್ತೊಲೊ.
ಆನಿ ತುಜ್ಯಾ ಫಾರಿಕ್ಪಣಾಚೆಂ ಮರ್ಣಾಭೆಂ…ತಾಕಾ ಮೊರ್ತಾ ಪರ್ಯಾಂತ್ ಧೊಶಿತ್ತ್ ಆಸ್ತಾಲೆಂ. ಆನಿ ಹೆಂಚ್ಚ್…‘ಫೆಡ್ರಿಕಾ ವಯ್ಲೆಂ ತುಜೆಂ ಫಾರಿಕ್ಪಣ್!’ ಮ್ಹಣ್ ಮತಿಂತ್ ಖಂಚವ್ನ್ ಜಿಯೆ.”
“ಸರ್ … ತುಮ್ಚೆಂ ಜಾಗ್ವಣ್ ಖಂಡಿತ್ ಮತಿಂ ದವರ್ತಾಂ … ಕಿತ್ಯಾ ಮ್ಹಾಕಾ ಜೈಲಾಚ್ಯಾ ಸರಳಾಂ ಪಾಟ್ಲ್ಯಾನ್ ದೀಸ್ ಸಾರುಂಕ್ ನಾಕಾ. ಬಗಾರ್ ತುಮ್ಚ್ಯಾ ಸಂಗಿ ಜಿಯೆಂವ್ಕ್ ಜಾಯ್. ಆನಿ ಜಿಯೆತೊಲೊಂ.” ಮ್ಹಣಾಲೊ ರಿಶಭ್.
ಆನಿ ದುಸ್ರೊ ಸಬ್ದ್ ಕಾಡಿನಾಸ್ತಾಂ…ತೊ ಕಾರಾ ಥಾವ್ನ್ ದೆಂವ್ತಾಂ ಮ್ಹಣ್ತಾಸ್ತಾನಾಂ…
ಕಾರ್ಡಿಯಾನಾನ್ ತಾಚೊ ಬಾವ್ಳೊ ಧರ್ಲೊ… “ಕ್ಲೈವಾಚಿ ಹಿ ಫಾರಿಕ್ಪಣ್ ಗಜಾಲ್ ಆನಿ ಕೋಣ್ ಜಾಣಾಂ ಆಸಾತ್.?”
“ಸರ್…ಜಿವಂತ್ ಆಸ್ಚೆ ಆಮಿ ದೋಗ್…ಆನಿ ಮರಣ್ ಪಾವ್ಲೆಲೆ ತೆ ದೋಗ್…ಕ್ಲೈವ್ ಆನಿ ತಾಚೊ ಚೇಲಾ!”
“ಒಕೆ…ಪೂಣ್ ಉಗ್ಡಾಸ್ ದವರ್…ಹೊ ಕಾರ್ಡಿಯಾನ್…ತುಕಾ ಆಪ್ಲ್ಯಾ ಆಫಿಸಾಂತ್ ಪಳೆಂವ್ಕ್ ರಾಕೊನ್ ರಾವ್ತೊಲೊ.!.”
“ಖಂಡಿತ್ ಸರ್…ಪೂಣ್ ಆತಾಂ ಮಾತ್ರ್ ಹಾಂವೆ ಚಲಾತ್ತ್ ಆಸೊಂಕ್ ಜಾಯ್ ಆನಿ ಚಲಾತ್ತ್ ರಾವ್ತೊಲೊಂ. ಆನಿ ಪೊಲಿಸ್ ಕೇಸ್ ಫಾಯ್ಲ್ ಧಾಂಪ್ತಾ ಪರ್ಯಾಂತ್…ಹಾಂವ್ ಚಲಾತ್ತ್ ಆಸ್ತೊಲೊಂ.”
“ತ್ಯಾ ನಂತರ್…ಮ್ಹಜೆಂ ದಾರ್ ಬಡಯ್. ಹೊ ಕಾರ್ಡಿಯಾನ್…‘ಕೆನ್ನಾಂ ತುಜೊ ಹೊ ಸರಳ್ ತುಜೊ ಹಾತ್ ಸೊಡ್ತೊಲೊ…ಆನಿ ಮ್ಹಜೊ ಹಾತ್ ಧರ್ತೊಲೊ!’…ಮ್ಹಣ್ ತುಕಾ ರಾಕೊನ್ ಆಸ್ತೊಲೊ.!”
ತ್ಯಾಚ್ಚ್ ಘಡ್ಯೆ ರಿಶಭ್ … ಏಕ್ ಪಾವ್ಟಿ ಆಪ್ಲೊ ತೊ ಸರಳ್ ಪಳೆಂವ್ಚ್ಯಾರ್ ಪಡ್ಲೊ. ನಂತರ್ ಕಿತೆಂಚ್ಚ್ ಸಬ್ದ್ ತಾಣೆಂ ಕಾಡ್ಲೊನಾಂ. ಸಟ್ಟ್ ಕರುನ್ ಕಾರಾ ಥಾವ್ನ್ ದೆಂವ್ಲೊ. ಆನಿ ಕಾರ್ಡಿಯಾನಾಕ್ ಪಾಟ್ ಕರಿಲಾಗ್ಲೊ.
ತ್ಯಾಚ್ಚ್ ಘಡ್ಯೆ … ಕಾರ್ಡಿಯಾನಾಚ್ಯಾ ಕಾರಾಚೊ ಆವಾಜ್ ಉಟ್ಲೊ. ಹ್ಯಾವೆಳಾ…
ರಿಶಭಾಚೊ ಸರಳ್…ಸಿಮೆತ್ರೆ ಕುಶಿನ್ ವೆಚ್ಯಾ ರಸ್ತ್ಯಾರ್…ಆವಾಜ್ ದೀ ಲಾಗ್ಲೊ.
‘ಟಾಂಯ್ …ಟಾಂಯ್…ಟಾಂಯ್…!’
– ಸಮಾಪ್ತ್ –
