ಘಮಂಡ್

“ಆಯ್ಲಿಂ ಗತಿಗಟ್ಟಾಚಿಂ ತುಜಿಂ ಸೆಜಾರ್ಚಿಂ. ಹಾತಾಂತ್ ಕಾಂಯ್ ಭಿಕ್ ಘಾಲ್ ಸಾಯ್ಬಾ. ಹಾಂಕಾ ಪೊಟಾಕ್ ಘಾಲುಂಕ್ ಜಾಯ್ನಾ ಜಾಲ್ಯಾರ್ ಭುರ್ಗಿಂ ಕಾಲ್ಯಾಕ್ ಕರ್ಚಿಂ? ಆತಾಂ ಧುವೆಕ್ ಕಾಜಾರ್ ಕರುಂಕ್ ಭಾಯ್ರ್ ಸರ್ಲಾ ಆನಿ ಆಮ್ಚೆಲಾಗಿ ಪಯ್ಶೆ ವಿಚಾರುಂಕ್ ಆಯ್ಲಾಸ್ತಲೊ ಲಜ್ಮಾಂಡೊ! ತಾಚ್ಯಾ ಹಾತಾಂತ್ ಏಕ್ ಪಾಂಯ್ಶಿ ಘಾಲ್, ಕೊಣಾಚ್ಯಾ ಗಳ್ಯಾಕ್ ಬಾಂದುದಿ ಧುವೆಕ್… ಭಿಕಾರಿ”

ಏಕ್‌ಚ್ ಪಾವ್ಟಿಂ ಡೆವಿಡ್ ನಿದೆಂತ್ಲೊ ಉಡೊನ್ ಪಡ್ಲೊ. ಕಿತ್ಲ್ಯಾಗೀ ವರ್ಸಾಂ ಆದಿಂ ತಾಚ್ಯಾ ಸೆಜಾರ್ಚ್ಯಾ ಕಾತ್ರಿನ್ ಮೌಶೆನ್ ತಾಚ್ಯಾ ಆನಾಕ್ ಹಿಣ್ಸುಣ್ ಸಾಂಗ್‌ಲ್ಲಿಂ ಕಠೋರ್ ಉತ್ರಾಂ! ಆಜ್ ಪರ್ತ್ಯಾನ್ ತಾಚ್ಯಾ ಸಪ್ಣಾಂತ್ ಆಯಿಲ್ಲಿಂ!!

ತೆಂ ದೃಶ್ಯ್ ಆತಾಂಯ್ ತಾಚ್ಯಾ ದೊಳ್ಯಾ ಮುಕಾರ್ ಆಸಾ. ತಾಚ್ಯಾ ಆನಾಚಿ ಅಸಹಾಯಕ್ ಸ್ಥಿತಿ. ಕಾತ್ರಿನ್ ಮೌಶೆಚೆಂ ವಿದ್ರೂಪ್ ರುಪ್ಣೆಂ ಆನಿ ತಾಂಚಿ ಧುವ್ ವಿಲ್ಮಾಚಿ ನೆಣಾರಿ ದೀಶ್ಟ್!

ಡೆವಿಡಾಚೊ ಆನ್ ಹಳ್ಳೆಚ್ಯಾ ಇಸ್ಕಾಲಾಚೊ ಹೆಡ್-ಮಾಸ್ಟೆರ್. ಸಕಾಳಿಂ ಗಾದ್ಯಾಂತ್ ನಾಂಗೊರ್ ಒಡ್ಚೊ ರಯ್ತ್ ಆನಿ ಉಪ್ರಾಂತ್ ದಿಸಾಕ್ ಇಸ್ಕೊಲಾಂತ್  ಭುರ್ಗ್ಯಾಂಕ್ ಶಿಕೊಂವ್ಚೊ ಮೆಸ್ತ್ರಿ. ಕಾತ್ರಿನ್ ಮೌಶೆ ತಸಲ್ಯಾ ದುಡ್ವಾದಾರಾಂ ಮುಕಾರ್ ಭಿಕಾರಿ. ತ್ಯಾ ದಿಸಾ ಹಾತ್ ಜೋಡ್ನ್ ಆಪ್ಲ್ಯಾ ಎಕಾಚ್ಚ್ ಧುವೆಚ್ಯಾ ಕಾಜಾರಾಕ್ ಪಯ್ಶೆ ಮಾಗೊಂಕ್ ಗೆಲ್ಲೆ ತವಳ್ ಕಾತ್ರಿನ್ ಮೌಶೆನ್ ಸಾಂಗ್‌‌ಲ್ಲ್ಯಾ ಉತ್ರಾಂನಿ ಡೆವಿಡಾಚ್ಯಾ ಆವಯ್ಕ್ ಮೊಸ್ತು ದುಕ್‌ಲ್ಲೆಂ. ತಿಣೆ ಘೊವಾಕ್ ಸಾಂಗ್ಲೆ “ಬೆಜಾರ್ ಪಾವಾನಾಕಾತ್ ತುಮಿ , ದೇವ್ ಆಮ್ಕಾಂ ವಾಟ್ ದಾಕಯ್ತಾಲೊ… ಖಂಯ್ ಪುಣಿ.” ಆನಿ ಪಾಲ್ವಾನ್ ದುಖಾಂ ಪುಸ್‌ಲ್ಲಿಂ.

ಉಪ್ರಾಂತ್, ಡೆವಿಡಾಚ್ಯಾ ಆನಾನ್ ಶಿಕಯಿಲ್ಲ್ಯಾ ಬೊಂಬಯ್ ಕಾಮಾರ್ ಆಸ್ಚ್ಯಾ ಥೊಡ್ಯಾ ಭುರ್ಗ್ಯಾಂ ಲಾಗಿಂ ಮಾಗೊನ್ ಕಶ್ಟಾಂನಿ ಧುವೆಚೆಂ ಕಾಜರ್ ಕೆಲೆಂ. ತ್ಯಾ ಕಾಳಾರ್ ದೋತ್ ದೀಂವ್ಕ್ ಆಸ್ಲಿ. ಭಾಂಗಾರ್ ತಶೆಂ ಐವಜ್. ಡೆವಿಡ್ ದಾವ್ಯಾ ಕ್ಲಾಸಿಂತ್ ಶಿಕ್ತಾಲೊಂ. ತ್ಯಾ ದೀಸ್ ತಾಣೆ ನಿಚೆವ್ ಕೆಲೊ ಆಪ್ಣೆಂ ಮುಕಾರ್ ಶಿಕಜೆ, ಆಪ್ಲ್ಯಾ ಪಾಯಾಚೆರ್ ಉಬೆ ರಾವಾಜೆ ಆನಿ ದುಬ್ಳ್ಯಾ ಕುಟ್ಮಾಕ್ ವಯ್ರ್ ಹಾಡಿಜೆ! ತಾಕಾಯ್ ಪಿ.ಯು.ಸಿ. ಕರುಂಕ್ ಮೊಸ್ತು ಮ್ಹನ್ ಆಸ್ಲೆಂ ಪೂಣ್ ತಾಚ್ಯಾ ಆನಾಲಾಗಿಂ ತಾಕಾ ಶಿಕಂವ್ಚ್ಯಾಕ್ ತಾಂಕ್ ನಾತ್ಲಿ. ತಾಚ್ಯಾ ಆನಾಚೊ ಈಶ್ಟ್ ಎಕ್ಲೊ ಬೊಣ್ಕೊ ತವಳ್ ಘರಾ ಆಯ್ಲೊ.

“ಮಾಸ್ಟ್ರಾಮಾ, ಮ್ಹಾಕಾ ಏಕ್ ಕಾಮಾಚೊ ಚೆಡೊ ಜಾಯ್, ಬೊಂಬಯ್ ಮ್ಹಜ್ಯಾ ಹೊಟ್ಲಾಂತ್ ಕಾಮ್ ಕರುಂಕ್.”

“ಜಾಯ್ತ್ ಆಸ್ಲ್ಯಾರ್ ಕೊಣಿ ಸಾಂಗ್ತಾ ತುಕಾ.” ಆನಾನ್ ತಾಕಾ ಭರ್ವಸೊ ದಿಲೊ.

ತೆದ್ನಾ ಡೆವಿಡಾಚ್ಯಾ ಮತಿಂತ್ ಏಕ್ ಆಲೋಚನ್ ಆಯ್ಲಿ. ಆನಿ ತಾಣೆ ಆನಾಲಾಗಿಂ ಧಯ್ರಾನ್ ಸಾಂಗ್ಲೆ. ” ಆನಾ ಹಾಂವ್ ಬೊಂಬಯ್ ವೆತಾಂ ಕಾಮ್ ಕರುಂಕ್”

ಆನ್ ಥಟಾಕ್ಲೊ . . . “ನಾ ಪುತಾ, ತುಕಾ ಮುಕಾರ್ ಶಿಕೊಂಕ್ ಆಸಾ. ಆನಿ ತುಂವೆ ಹೊಟ್ಲಾಂತ್ ಕಾಮ್ ಕರ್ಚಿ ಗರ್ಜ್ ನಾ”

ತವಳ್ ಬೊಣ್ಕ್ಯಾನ್ ಆನಾಕ್ ಧಯ್ರ್ ದಿಲೆಂ. “ತಾಕಾ ಹಾಂವ್ ಶಿಕಯ್ತಾಂ ಮಾಸ್ಟ್ರಾಮಾ. ದಿಸಾಕ್ ಕಾಮ್ ಕರುಂದಿ ಆನಿ ಸಾಂಜೆರ್ ಶಿಕೊಂದಿ. ತಾಚಿ ಬಂದೊಬಸ್ತ್ ಹಾಂವ್ ಕರ್ತಾಂ . . . ತುಂ ಖಂತ್ ಕರಿನಾಕಾ”

ಡೆವಿಡಾಕ್ ಆನಾನ್ ಪಯ್ಶ್ಯಾಂ ಖಾತಿರ್ ಲೊಕಾಲಾಗಿಂ ಹಾತ್ ವೊಡ್ಡಾಂವ್ಚೆಂ ಪಳೆವ್ನ್ ಪುರೊ ಜಾಲ್ಲೆಂ ಆನಿ ತಾಚ್ಯಾ ಕುಟ್ಮಾಕ್ ವಯ್ರ್ ಹಾಡುಂಕ್ ತಾಣೆ ಕಾಮ್ ಕರ್ಚಿ ಏಕ್‌ಚ್ ವಾಟ್ ದಿಸ್ತಾಲಿ. ಶಿಕಪ್ ಮುಕಾರುನ್ ವ್ಹರ್ಚೆಂ ಉಪ್ರಾಂತ್. ತಾಚ್ಯಾ ಆನಾನ್ ಆನಿ ಮಾಂಯ್ನ್ ತಾಕಾ ಬೊಂಬಯ್ ವೆಚೆಂ ನಾಕಾ ಮ್ಹಳೆಂ ತರೀ ತಾಣೆ ಘಟ್ಟ್ ನಿಚೆವ್ ಕೆಲ್ಲೊ. ವಚುಂಕ್ ಭಾಯ್ರ್ ಸರ್ತಾನಾ ವಿಲ್ಮಾ ಗುಲೊಬ್ ಹಾಡ್ನ್ ಆಯ್ಲೆಂ. ತಾಂಚೆಂ ಸಗ್ಳೆಂ ಭುರ್ಗೆಂಪಣ್ ಸಾಂಗಾತಾ ಖರ್ಚಾಲ್ಲೆಂ. ಡೆವಿಡಾನ್ ಗುಲೊಬ್ ಘೆತ್ಲೊ ಆನಿ ವಿಲ್ಮಾಕ್ ‘ಬಾಯ್’ ಮ್ಹಳೆಂ. ವಿಲ್ಮಾನ್ ವಿಚಾರ್ಲೆಂ “ದಾಟ್ಟು ಮ್ಹಾಕಾ ಸೊಡ್ನ್ ವೆತಾಯ್ಗೀ?” ತಾಚ್ಯಾ ದೊಳ್ಯಾನಿ ದುಖಾಂ ದೆಂವ್ಲಿಂ. ಡೆವಿಡ್ ರಿಕ್ಷಾರ್ ಬಸ್ಲೊ  . . ಬೊಂಬಯ್ಚೆಂ ಬಸ್ಸ್ ಧರುಂಕ್. ವಿಲ್ಮಾನ್ ಮ್ಹಳ್ಳೆಂ ತಾಕಾ ಆಯ್ಕಾನಾಸ್ತಾನಾ ರಾವ್ಲೆಂ ನಾ “ದಾಟ್ಟು ಮ್ಹಾಕಾ ವಿಸ್ರಾನಾಕಾ, ಕಾಗತ್ ಬರಯ್”. ಪುಣ್ ತಾಣೆ ನಿಚೆವ್ ಕೆಲ್ಲೊ ’ಆಪುಣ್ ಘರ್ಚ್ಯಾಂಕ್ ಮಾತ್ರ್ ಕಾಗತ್ ಬರಯ್ತಾಲೊಂ’

♥ ♥ ♥

ವಾಯ್ಟ್ ಸಪ್ಣಾನ್ ಡೆವಿಡಾಚಿ ನೀದ್ ಪಾಡ್ ಜಾಲ್ಲಿ. ಎ.ಸಿ ಬಂದ್ ಕರ್ನ್ ತೊ ಉಟ್ಲೊ ಆನಿ ಲಾಯ್ಟ್ ಚಾಲು ಕರ್ನ್ ಡೈರಿಚೆರ್ ಎಕೊಡಿ ದೀಶ್ಟ್ ಘಾಲಿ. 10:30 ವೊರಾಂಚೆರ್ ಮೀಟಿಂಗ್ ವಿದ್ ಹಬ್ಶಾನ್ ಅಡ್ಕೊ ಪರ್ಚೇಸ್ ಮೆನೆಜರ್, ದೊನ್ಪಾರಾಂ 02:00 ವೊರಾಂಚೆರ್ ಮೀಟಿಂಗ್ ವಿದ್ ಆಡ್ಮಾ ಲೊಜಿಸ್ಟಿಕ್ ಮೆನೆಜರ್. ತಾಣೆ ಡೈರಿ ದಾಂಪ್ಲಿ. ಭಾಯ್ರ್ ಯೇವ್ನ್ ಬೊಟ್ಲೆರಾಕ್ ಉಲೊ ದಿಲೊ. ಬೊಟ್ಲೆರ್ ನಿದೆಂತ್ಲೊ ಉಡೊನ್ ಪಡ್ಲೊ. ” ಕಿತೆಂ ಜಾಲೆಂ ಧನ್ಯಾ?”

“ಕಾಂಯ್ ನಾ ಇಲ್ಲೆಂ ವೆಗಿಂ ಜಾಗ್ ಜಾಲಿ . . . ಇಲ್ಲಿ ಚಾ ಕರ್ನ್ ಹಾಡ್”

“ಜಾಯ್ತ್ ಸರ್”

ಸಕಾಳಿಂ 6 ವರಾರ್ “ಖಲೀಜ್ ಟಾಮ್ಸ್” ತಾಚ್ಯಾ ಬಾಗ್ಲಾ ಭಾಯ್ರ್ ಪಡ್ತಾಲೆಂ. ಚಾ ಪಿಯೊವ್ನ್ ಖಬ್ರೆ ಪೇಪರ್ ವಾಚ್ಲೆಂ. ಸ ವರಾರ್ ನಾಸ್ಟೊ ಕೆಲೊ ಆನಿ ಸಾತ್ ವರಾರ್ ಪಾರ್ಕಿಂಗ್ ಲೊಟಾಕ್ ಯೇವ್ನ್ ಕಾರಾರ್ ಬಸ್ಲೊ, ಮುಸಾಫಾ ದಫ್ತರಾಕ್ ವಚುಂಕ್. ತಾಚೆಂ ದಫ್ತರ್ ಸಾರ್ಕೆಂ 8 ವರಾರ್ ಸುರು ಜಾತಾಲೆಂ ಆನಿ ಸಾರ್ಕೆಂ 8:30 ಒಫಿಸ್ ಮೀಟಿಂಗ್. ಡೆವಿಡ್ ಕಠೀಣ್ ಶಿಸ್ತೆಚೊ ಮನಿಸ್. ಸಗ್ಳೆಂ ತಾಕಾ ವೆಳಾರ್ ಜಾಯ್ಜೆ.

ರೀಮ್ ಐಲೆಂಡಾ ಥಾವ್ನ್ ಮುಸಾಫಾಕ್ ಆತಾಂ ಸುಪರ್ ಹೈವೆ ಜಾಲ್ಲ್ಯಾನ್ 20 ಮಿನುಟಾಂ ಭಿತರ್ ಡೆವಿಡಾಕ್ ದಫ್ತರಾಕ್ ಪಾವೊಂಕ್ ಜಾತಾಲೆಂ. ಆದಿಂ ಅಬುಧಾಬಿ ಟೌನಾಚ್ಯಾ ಮದ್ಲ್ಯಾನ್ ವೆತಾನಾ ಒಫಿಸಾಕ್ ಪಾವೊಂಕ್ ಅರ್ಧೆಂ ವೊರಾ ವಯ್ರ್ ಲಾಗ್ತಾಲೆಂ. ಡೆವಿಡಾನ್ ಮ್ಯೂಸಿಕ್ ಬಟನ್ ದಾಂಬ್ಲೊ. “ಪಯ್ಸ್, ಪಯ್ಸ್, ಆಮ್ಚ್ಯಾ ಭುಂಯ್ತಾಳಾ, ನೆಣಾ ತುಜೊ ಆಖೇರ್ ಖಂಯ್ಸರ್, ಥಂಯ್ಸರ್ ಎಕಾ ಲ್ಹಾನ್ಶ್ಯಾ ಮಂಗ್ಳುರಾ” ಆಂಟೋನಿ ತೌರೊಚೆಂ ಮಂಗ್ಳುರಾಕ್ ವರ್ಣುಂಚೆಂ ಪದ್. ಗಾಂವ್ಚೆ ಯಾದಿ ಜಿವಾಳ್ ಕರ್ಚೆಂ. ಕೊಂಕ್ಣಿ ಮನ್ಶಾಂ ಸಂಸಾರಾಚ್ಯಾ ಖಂಯ್ಚ್ಯಾ ಕೊನ್ಶ್ಯಾರ್ ಆಸ್ಲ್ಯಾರೀ ತಾಂಕಾಂ ಕೊಂಕ್ಣಿಂ ಪದಾಂ ಆಯ್ಕಾಜೆ. ಪದ್ ಆಯ್ಕಾತಾಂ, ಆಯ್ಕಾತಾಂ … ಡೆವಿಡಾಚಿಂ ಚಿಂತ್ನಾಂ ಗಾಂವಾಕ್ ಪಾಟಿಂ ಧಾಂವ್ಲಿಂ.

ವಿಲ್ಮಾಚೆಂ ಕಾಗತ್ ತಾಚ್ಯಾ ದೊಳ್ಯಾಂ ಮುಕಾರ್ ಆಯ್ಲೆಂ.

” ದಾಟ್ಟು, ಮ್ಹಜ್ಯಾ ಡ್ಯಾಡಿನ್ ಪಿಯೊನ್ ಆನಿ ಜುಗಾರ್ ಖೆಳೊನ್ ಸಗ್ಳೆ ಪಯ್ಶೆ ಹೊಗ್ಡಾಯ್ಲ್ಯಾತ್. ಆಮ್ಗೆರ್ ದೀಸ್ ಆನಿ ರಾತ್ ಮಾಸ್ – ಮಾಸ್ಳೆಚೆಂ ಜೆವಣ್ ಆನಿ ಮ್ಹಜ್ಯಾ ಮಾಮ್ಮಿಕ್ ಭಾಂಗಾರ್ ಆನಿ ಶ್ರಂಗಾರ್ ಮ್ಹಣ್ ದುಡು ವಿಬಾಡ್ ಜಾಲಾ. ಆಮ್ಚೆಂ ಬಾಡ್ಯಾಕ್ ದಿಲ್ಲೆಂ ಕಾರ್ ವಿಕಿಜೆ ಪಡ್ಲೆಂ. ಬ್ಯಾಂಕಾಂತ್ ಆಸ್‌ಲ್ಲೆ ಮ್ಹಾಕಾ ಆನಿ ಮ್ಹಜ್ಯಾ ದಾಕ್ಟ್ಯಾ ಭಾವಾಚ್ಯಾ ಶಿಕ್ಪಾಕ್ ಜಾಲೆ. ಅತಾಂ ಆಮಿ ರಿಣಾಂತ್ ಬುಡ್ಲ್ಯಾಂವ್. ತುಜ್ಯಾ ಮಾಂಯ್ಕ್ ಆನಿ ಆನಾಕ್ ಮ್ಹಜ್ಯಾ ಮಾಮ್ಮಿನ್ ಮೊಸ್ತು ದುಕಯ್ಲಾಂ. ತಿಕಾ ಭೊಗ್ಸಿತೊಲೊಯ್ ಮ್ಹಣ್ ಪಾತ್ಯೆತಾಂ. ತುಂ ಆನಿ ಹಾಂವ್ ಸದಾಂಚ್ ಫ್ರೆಂಡ್ಸ್ ಜಾವ್ನಾಸ್ಲ್ಯಾಂವ್. ತುಕಾ ಮ್ಹನ್ ಆಸಾ ಜಾಲ್ಯಾರ್ ಮ್ಹಾಕಾ ಬಿ.ಕೊಮ್. ಕರುಂಕ್ ಇಲ್ಲೆ ಪಯ್ಶೆ ಧಾಡ್. ತುಜೊ ವಡ್ಲೊ ಉಪ್ಕಾರ್.”

ವಿಲ್ಮಾ ಡೆವಿಡಾಕ್ ಭುರ್ಗ್ಯಾಪಣಾರ್ ಥಾವ್ನ್ ಬೋವ್ ಲಾಗ್ಶಿಲೆಂ ಜಾಲ್ಲ್ಯಾನ್ ತಾಕಾ ಬಿ.ಕೊಮ್ ಕರುಂಕ್ ತಾಣೆ ಪಯ್ಶೆ ದಾಡ್ಲೆ ಆನಿ ತಶೆಂಚ್ ತಾಚೆಂ ಬಿ.ಕೊಮ್. ಜಾಲ್ಲೆಂಚ್ ಗಲ್ಫಾಕ್ ಹಾಡ್ಲೆಂ. ಆತಾಂ ತೆಂ ತಾಚ್ಯಾ ಕಂಪೆನಿಂತ್ ಎಕೌಂಟೆಂಟ್ ಜಾವ್ನ್ ಕಾಮ್ ಕರ್ನ್ ಆಸಾ. ಏಕ್ ಸೊಬಿತ್ ಸುಂದರ್ ಗುಲೊಬ್ ಜಾವ್ನ್ ಫುಲೊನ್ ರಾವ್ಲಾಂ , 25 ವರ್ಸಾಂಚಿ ಸೊಬಾಯೆಚಿ ಬಾವ್ಲಿ. ಡೆವಿಡಾಕ್ ತಾಚೆರ್ ಗುಪಿತ್ ಮೋಗ್ ಉದೆಲಾ ಪುಣ್ ಸಾಂಗೊಂಕ್ ಘಮಂಡ್ ಸುಟಾನಾ. ಆತಾಂ ತೋ ವ್ಹಡ್ಲೊ ಬಿಸ್ನೆ‌ಸ್‌ಮ್ಯಾನ್. ಪೂಣ್ ವಿಲ್ಮಾನ್ ಪ್ರಸ್ತಾಪ್ ಕಾಡ್ಲ್ಯಾರ್ ನಾ ಮ್ಹಣಾಸೊನಾ! ಪುಣ್ ವಿಲ್ಮಾ  . . . ???

♥ ♥ ♥

ಬೊಂಬಂಯ್ತ್ ದಿಸಾಕ್ ಬೊಣ್ಕಾಚ್ಯಾ ಹೊಟ್ಲಾಂತ್ ಕಪ್ – ಬೊಶಿ ಕರ್ನ್, ಆನಿ ರಾತಿಕ್ ಶಿಕೊನ್ ಡೆವಿಡಾನ್ ಬಿ. ಕೊಮ್ ಕೆಲೆಂ. ಗಲ್ಫಾಕ್ ಯೆಂವ್ಚ್ಯಾ ಪುಡೆಂ ಎಕಾ ಹಫ್ತ್ಯಾಕ್ ಗಾಂವಾಂಕ್ ವ್ಹಚೊನ್ ಆಯಿಲ್ಲೊ, ಮಾಂಯ್ ಆನಿ ಆನಾಲಾಗಿ ಥೊಡೊ ವೇಳ್ ಖರ್ಚುಂಕ್. ಆತಾಂ ತಾಚೆಂ ಘರ್ ಲ್ಹಾನ್ ನಳ್ಯಾಂಚಾ ಘರಾ ಥಾವ್ನ್, ಮಜ್ಬೂತ್ ಬೊಂಗ್ಲೊ ಜಾಲ್ಲೆಂ. ತಾಚೊ ಭಾವ್ ತಾಚೆ ಸಾಂಗಾತಾ ದಫ್ತರಾಂತ್ ಕಾಮ್ ಕರ್ನ್ ಆಸಾ – ಲೊಜಿಸ್ಟಿಕ್ ಸುಪರ್‌ವೈಸರ್ ಜಾವ್ನ್.

ಗಲ್ಫಾಕ್ ಪಾವ್‌ಲ್ಲೊಚ್ ಎಕಾ ನಾವಾಡ್ದಿಕ್ ಶಿಫ್ಫಿಂಗ್ ಕಂಪೆನಿಂತ್ ಕಾಮ್ ಕರ್ನ್ ಪಾಂಚ್ ವರ್ಸಾಂ ಉಪ್ರಾಂತ್ ತಾಚೆಂಚ್ ಉದ್ಯಮ್ ತಾಣೆ ಸುರು ಕೆಲೆಂ. ಆನಿ ಆತಾಂ ತೆಂ ಮೊಸ್ತು ಅಬಿವೃದ್ದಿ ಜಾಲಾಂ. ತಾಚ್ಯಾ ದಫ್ತರಾಂತ್ ಆತಾಂ ವೀಸ್ ಜಣ್ ಕಾಮ್ ಕರ್ತಾತ್ ಆನಿ ತಾಚೊ ದಾಕ್ಟೊ ಬಾವ್ ಜೆಮ್ಮಿ ಆನಿ ವಿಲ್ಮಾ ಎಕಾ ವರ್ಸಾ ಆಧಿಂ ಭರ್ತಿ ಜಾಲ್ಲಿಂ. ತಾಚೊ ದಾಕ್ಟೊ ಬಾವ್ ಲೊಜಿಸ್ಟಿಕ್ ಡಿವಿಜನ್ ಸಾಂಬಾಳ್ಟಾನಾ, ವಿಲ್ಮಾ ಎಕೌಂಟ್ಸ್ ಸಾಂಬಾಳ್ತಾ. ಖುದ್ ಡೆವಿಡ್ ಮಾರ್ಕೆಟಿಂಗ್ ಸಾಂಬಾಳ್ತಾ. ದಫ್ತರಾಂತ್ ಡೆವಿಡ್ ಖಡಕ್ ಶಿಸ್ತೆಚೊ ಮನಿಸ್. ಕಾಮ್ ಕರುಂಕ್ ಮಾತ್ರ್ ಆವ್ಕಾಸ್, ಟೈಮ್ ಪಾಸ್ ಕರುಂಕ್ ನಾ. ವೆಳಾರ್ ದಫ್ತರಾಕ್ ಪಾವಾಜೆ. ಕಾಮೆಲ್ಯಾಂಕ್ ಬೊರೊ ಸಾಂಬಾಳ್ ದಿತಾ. ಪೂಣ್ ಕಾಮಾಚ್ಯಾ ಗಜಾಲಿಂತ್ ಕೊಣಾಯ್ಕೀ ಕಸಲಿಚ್ ಸೊಡ್ ದೊಡ್ ನಾ. ಸಗ್ಳೆ ತಾಕಾ ಒಫಿಸಾಂತ್ ‘ಘಮಂಡಿ’, ‘ಕಾಳಿಜ್ ನಾತ್‌ಲ್ಲೊ ಮನಿಸ್’ ಮ್ಹಣ್ ಪಾಟ್ಲ್ಯಾನ್ ಸಾಂಗ್ತಾತ್. ಮುಕಾರ್ ಸಾಂಗೊಂಕ್ ಕೊಣಾಯ್ಕೀ ಧಯ್ರ್ ನಾ. ಪೂಣ್ ಡೆವಿಡ್ ಗುಪಿತ್ ಕಶ್ಟಾಂತ್ ಆಸ್ಲೆಲ್ಯಾಂಕ್ ಕುಮೊಕ್ ಕರ್ತಾ. ಗಾಂವಾಂತ್ ಥಾವ್ನ್ ಸಬಾರ್ ದುಬ್ಳ್ಯಾ ಭುರ್ಗ್ಯಾಂಚಿಂ ಮಾಗ್ಣಿಂ ತಾಕಾ ಯೇವ್ನ್‌ಚ್ ಆಸ್ತಾತ್ ಆನಿ ಜಾತಾ ತಿತ್ಲಿ ಕುಮಕ್ ತೋ ಕರ್ನ್ ಆಸ್ತಾ, ಪೂಣ್ ಘುಟಾನ್. ಹೆಂ ಕೊಣಾಯ್ಕೀ ಕಳಿತ್ ನಾ.

ತಾಣೆ ಒಫಿಸಾಕ್ ಪಾವ್ಲ್ಯಾ ಉಪ್ರಾಂತ್ ಸಾರ್ಕೆಂ ಸಾಡೆ ಆಟ್ ವರಾರ್ ಸ್ಟಾಫ್ ಮೀಟಿಂಗ್ ಆನಿ ಜೊಬ್ ಆಲೊಟ್ಮೆಂಟ್.

ಪೂಣ್ ಆಜ್ , ರಾತಿಚ್ಯಾ ಸಪ್ಣಾಂತ್ ತಾಕಾ ಕಿತೆಂಗೀ ವಿರಾರ್ ಕೆಲ್ಲೆಂ ಆನಿ ತೆಂಚ್ ತಾಚ್ಯಾ ಮತಿಂತ್ ಘುಂವ್ತಾಲೆಂ ಜಾಲ್ಲ್ಯಾನ್ ತಾಣೆ ಮಟ್ವ್ಯಾನ್ ಮೀಟಿಂಗ್ ಆಕೇರ್ ಕೆಲೆಂ. ಉಪ್ರಾಂತ್ ಆಸ್‌ಲ್ಲೆಂ ಕ್ಲೈಂಟ್ ಮಿಟಿಂಗ್ ರದ್ ಕೆಲೆಂ. ಕಿತ್ಯಾಕ್‌ಗೀ ತಾಚ್ಯಾ ಮತಿಕ್ ಸುಶೆಗ್ ನಾತ್ಲೊ.

ಧಾ ವರಾರ್ ರಾಜನ್ ತಾಚ್ಯಾ ಕ್ಯಾಬಿನಾಕ್ ಆಯ್ಲೊ.

“ಸರ್, ಏಕ್ ಗಜಾಲ್ ಸಾಂಗೊಂಕ್ ಜಾಯ್ ಸರ್. ತುಮಿ ಫ್ರೀ ಆಸ್ಲ್ಯಾರ್” ತಾಣೆ ನಮೃತಾಯೆನ್ ವಿಚಾರ್ಲೆಂ. ಡೆವಿಡ್ ಸಿಸಿಟಿವಿಂತ್ ಒಫಿಸ್ ಪಳೆವ್ನ್ ಆಸ್ಲೊ. ರಾಜನ್ ಕೇರಳಾಚೊ. ತಾಣೆಂ ಕಂಪೆನಿಕ್ ಬರೆಂ ಬಿಜ್ನೆಸ್ ಹಾಡ್ಲಾಂ ಆನಿ ಬರೊ ಪಾಗ್‌ಯೀ ಘೆತಾ.

“ಹಾಂವ್ ಫ್ರೀ ನಾ. ಪೂಣ್ ಭಿತರ್ ಆಯ್ಲಾಯ್ ತರ್, ಸಾಂಗ್ ಕಿತೆಂ ಗಜಾಲ್.” ಡೆವಿಡಾಚಿ ಖಡಕ್ಕ್ ಜಾಪ್ ಆಯ್ಕೊನ್ ತೊ ಕಾವ್ಜೆಲೊ.

“ಸರ್, ಗಾಂವಾಂತ್ ಮ್ಹಜ್ಯಾ ಭಯ್ಣಿಕ್ ಯೆಂವ್ಚ್ಯಾ ಹಫ್ತ್ಯಾಂತ್ ಕಾಜರ್ ಘಟ್ ಜಾಲಾಂ. ಎಕ್ ಪಂದ್ರಾ ದಿಸಾಂಕ್ ಮ್ಹಾಕಾ ರಜಾ ಜಾಯ್ ಸರ್.”

“ತುಂ ಬರೆಂ ಕರ್ನ್ ಜಾಣಾಯ್ ರಾಜನ್, ತುಕಾ ರಜಾ ಯೆಂವ್ಚಾ ವರ್ಸಾ ಆನಿ ಮಧೆಂಚ್ ರಜಾ ದೀಂವ್ಕ್ ಜಾಯ್ನಾ. ಆತಾಂ ಕಶೆಂ ತುಂವೆ ವಿಚಾರ್ಚೆಂ ? “.

“ಸರ್ ಹಾಂವ್ ಜಾಣಾ, ಪೂಣ್ ಭಯ್ಣಿಕ್ ಬರಿ ಸಯ್ರಿಕ್ ಆಯ್ಲ್ಯಾ ಆನಿ ತಾಕಾ ಜಾಂವ್ಚೊ ನೊವ್ರೊ ಬಾಹ್ರೆಯ್ನ್ ಆಸ್‌ಲ್ಲ್ಯಾನ್ ಕಾಜರ್ ಜಾವ್ನ್ ಪಾಟಿಂ ವೆತಾ ಖಂಯ್. ತಶೆಂ ಘರ್ಚ್ಯಾಂನಿ ಮ್ಹಾಕಾ ಆರ್ಜೆಂಟ್ ಗಾಂವಾಕ್ ಯೇಜಾಯ್ ಮ್ಹಣ್ ಆಜ್ ಸಕಾಳಿಂ ಫುಡೆಂ ಫೊನ್ ಕೆಲ್ಲೊ. ಸರ್ ಪ್ಲೀಸ್ ಹಾಂವ್ ಯೆಂವ್ಚ್ಯಾ ವರ್ಸಾ ವಚಾನಾ ಗಾಂವಾಕ್. ಆತಾಂ ಇಲ್ಲಿ ರಜಾ ದಿಯಾ ಸರ್, ಉಪ್ಕಾರ್ ತುಮ್ಚೊ” ರಾಜನ್ ತಕ್ಲಿ ಬಾಗೊನ್ ರಾವ್‌ಲ್ಲೊ.

“ಹಾಂವೆ ಸಾಂಗ್ಚೆ ಸಾಂಗೊನ್ ಜಾಲಾಂ. ಹಾಂಗಾ ಸಕ್ಡಾಂಕ್ ತಾಚೆಂ ಖುಶೆ ಪರ್ಮಾಣೆ ರಜಾ ದೀಂವ್ಕ್ ಜಾಯ್ನಾ. ಮ್ಹಾಕಾ ಮ್ಹಜೆಂ ಬಿಸ್ನೆಸ್ ಗರ್ಜೆಚೆಂ. ತುಮ್ಚೆ ಖಾಸ್ಗಿ ಸಮಸ್ಸೆ ಘೆವ್ನ್ ಮ್ಹಜೆಲಾಗಿಂ ಯೇನಾಕಾತ್. ತುಜಿ ರಜಾ ತುಜೊ ವೇಳ್ ಯೆತಾನಾ ಘೆ. ತುಂವೆ ಆತಾಂ ವಚ್ಯೆತ್!”

ರಾಜನ್ ಜಾಪ್ ಕಾಡಿನಾಸ್ತಾನಾ ಪಾಟಿಂ ಗೆಲೊ.

♥ ♥ ♥

ಮಹಿನ್ಯಾಚಿ ಅಕೇರಿ ಜಾಲ್ಲ್ಯಾನ್ ವಿಲ್ಮಾ ಇಲ್ಲೆಂ ವ್ಯಸ್ತ್ ಆಸ್ಲೆಂ. ಸಗ್ಳ್ಯಾಂಚೊಂ ಮಹಿನ್ಯಾಚೊ ಪಾಗ್ ತಯಾರ್ ಕರುಂಕ್ ಆಸ್ಲೊ ಆನಿ ದನ್ಯಾಕ್ ದಾಕವ್ನ್ ಮಂಜೂರಿ ಘೆಂವ್ಕ್ ಆಸ್ಲಿ.  ತೆ ಉಪ್ರಾಂತ್ ಸಗ್ಳ್ಯಾಂಚ್ಯಾ ಬ್ಯಾಂಕ್ ಎಕಾಂವ್ಟಾಂತ್ ಪಾಗ್ ಜಮೊ ಕರುಂಕ್ ಆಸ್ಲೊ. ತಾಂಚ್ಯಾ ಕಂಪೆನಿಂತ್ ತೀನ್ ಡಿವಿಜನಾಂ ಆಸ್ಲಿಂ. ಲೊಜಿಸ್ಟಿಕ್, ಮಾರ್ಕೆಟಿಂಗ್ ಆನಿ ಎಡ್ಮಿನ್. ತಶೆಂ ಸಗ್ಳ್ಯಾ ಡಿಪಾರ್ಟ್‌ಮೆಂಟಾಂಚೊಂ ಪಾಗ್ ತಯಾರ್ ಜಾಯ್ಜೆ. ತೆಂ ಎಕ್ಸೆಲ್ ಶೀಟಿಂತ್ ಅಪ್ಡೇಟ್ ಕರ್ನ್ ಆಸ್ಲೆಂ. ತೆದ್ನಾ, ತಾಚ್ಯಾ ಕ್ಯಾಬಿನಾಚ್ಯಾ ದಾರಾಕ್ ಕೊಣೆಂಗೀ ಬಡಯಿಲ್ಲೆಂ ಆಯ್ಕಾಲೆಂ.

“ಯೆಸ್ ಪ್ಲೀಸ್, ಕಮ್ ಇನ್”.

ರಾಜನ್ ಭಿತರ್ ಆಯ್ಲೊ . ತಾಚೆಂ ಮುಖಮಳ್ ಬಾವ್‌ಲ್ಲೆಂ.

“ಹೊ, ರಾಜನ್, ಹಾಂವ್ ಇಲ್ಲೆಂ ಬಿಜಿ ನೆ … ಕಾಂಯ್ ಅರ್ಜೆಂಟ್ ಆಸಾಗಿ?”

“ವ್ಹಯ್ ಮ್ಯಾಮ್. ದೋನ್ ಮಿನುಟಾಂ ತುಮ್ಚೆಲಾಗಿಂ ಉಲಂವ್ಕ್ ಆಸ್ಲೆಂ”.

“ಒಕೆ, ವೆಗಿಂ ಸಾಂಗ್, ಮ್ಹಾಕಾ ಮೊಸ್ತು ಕಾಮ್ ಆಸಾ”.

“ಮ್ಹಾಕಾ ತುರ್ತಾನ್ ಗಾಂವಾಕ್ ವಚಾಜೆ ಆಸ್ಲೆಂ ಮ್ಯಾಮ್”.

“ಆರೆ ಬಾಬಾ, ತುಕಾ ರಜಾ ಜಾಯ್ ತರ್ ಬೊಸಾಕ್ ಸಾಂಗ್‌ನೆ, ಹಾಂವೆ ಪರ್ಮಿಶನ್ ದೀಂವ್ಕ್ ಜಾತಾಗೀ ತುಕಾ ರಾಜನ್” ವಿಲ್ಮಾನ್ ಹಕೀಗತ್ ಸಾಂಗ್ಲಿ.

“ಹಾಂವ್ ಗೆಲ್ಲೊಂ ಮ್ಯಾಮ್, ಪುಣ್ ತಾಣೆ ರಜಾ ದೀಂವ್ಕ್ ಇನ್ಕಾರ್ ಕೆಲೆಂ.”

“ಹೊ, ಗಾವಾಂತ್ ಕಿತೆಂ ಅರ್ಜಂಟ್?”

“ಮ್ಹಜ್ಯಾ ದಾಕ್ಟ್ಯಾ ಭಯ್ಣಿಕ್ ಕಾಜರ್ ಆಸಾ. ತಶೆಂ ಪರ್ಮಿಶನ್ ವಿಚಾರುಂಕ್ ಬೊಸಾಲಾಗಿಂ ಗೆಲ್ಲೊಂ. ಪುಣ್ ತುಕಾ ಗೊತ್ತು ಆಸಾ ನೆ ತೊ ಕಸೊ ಮ್ಹಣ್. ಹಾಂವೆ ಚಿಂತ್ಲೆಂ ಮ್ಹಜ್ಯಾ ಭಯ್ಣಿಚ್ಯಾ ಕಾಜಾರಾಕ್ ತರಿ ರಿಯಾಯ್ತಿ ಕರ್ತಾಲೊ ಮ್ಹಣ್. ಪೂಣ್ ತಾಣೆ ಖಡಾಖಡ್ ಜಾಯ್ನಾ ಮ್ಹಳೆಂ ಮ್ಯಾಮ್.” ತಾಚ್ಯಾ ದೊಳ್ಯಾಂನಿ ದುಕಾಂ ಆಯ್ಲಿಂ.

ವಿಲ್ಮಾಕ್ ತಾಚಿಂ ದುಕಾಂ ಪಳವ್ನ್ ಭಿರ್ಮತ್ ದಿಸ್ಲಿ. ಏಕ್ ಪರಿಶ್ರಮಿ, ಮೊಸ್ತು ಕಶ್ಟ್ ಕಾಡ್ನ್, ಹ್ಯಾ ಗಲ್ಫಾಚ್ಯಾ ವೊತಾಕ್ ಮುಸಾಫಾ ಥಾವ್ನ್, ಶೆಂಬೊರ್-ದೊನ್ಶಿಂ ಮಯ್ಲಾಂ ಪಯ್ಸ್  ಓಯ್ಲ್ – ಫೀಲ್ಡಾಂನಿ ಆಸ್ಚ್ಯಾ ಉನ್ನತ್ ತೆಲಾಚ್ಯಾ ಕಂಪೆನಿಂಕ್ ಡ್ರೈವ್ ಕರ್ನ್ ವಚುನ್, ಬೊರೆಂ ಬಿಸ್ನೆಸ್ ಹಾಡ್ನ್ ತಾಣೆಂ ಕಂಪೆನಿಕ್ ಬರೊ ಮುನಾಫೊ ಹಾಡ್ಲಾ ಆನಿ ಆಜ್ ಬೊಸ್ ತಾಕಾ ಏಕ್ ರಜಾ ದೀಂವ್ಕ್ ಇನ್ಕಾರ್ ಕಾರ್ತಾ. ಹೊ ಧನಿಗೀ ಕಾಳಿಜ್ ನಾತ್‌ಲ್ಲೊ ಮ್ಹನಿಸ್? ವಿಲ್ಮಾಕ್ ರಾಗಾನ್ ಥಂಯ್ ರಾವೊಂಕ್ ಜಾಲೆ ನಾ. ರಾಜನಾಕ್ ತಾಣೆ ವಚೊಂಕ್ ಸಾಂಗ್ಲೆಂ ಆನಿ ಬೊಸಾಲಾಗಿಂ ಆಪುಣ್ ಉಲಯ್ತಾಂ ಮ್ಹಳೆಂ.

ವಿಲ್ಮಾಕ್ ಕಿತೆಂ ಕರ್ಚೆಂ ಮ್ಹಣ್ ಕಳ್ಳೆಂ ನಾ. ಆಪ್ಣಾಕ್ ತಾಣೆ ವಿಜಾ ದೀವ್ನ್ ಆಬುಧಾಬಿ ಹಾಡ್ಲಾಂ, ಕಾಮ್ ದಿಲಾಂ ವ್ಹಯ್. ಪೂಣ್ ಹಾಂಗಾ ಜಯ್ಲಾಚೆಂ ವಾತಾವರಾಣ್. ಕಾಮ್, ಕಾಮ್ .. .. ಫಕತ್ ಕಾಮ್! ಸಿಸಿಟಿವಿ ಆನಿ ಕಾಲೆಂ ಕರ್ಮಾಂ!! ‘ದಿಸ್ ಈಜ್ ಟೂ ಮಚ್. ಈಟ್ಸ್ ಟೈಮ್ ಟು ಕನ್‌ಫ್ರಂಟ್ ಹಿಮ್.’ ತಾಣೆ ನಿಚೆವ್ ಕೆಲೊ ಆನಿ ಶೀದಾ ಬೊಸಾಚ್ಯಾ ಕ್ಯಾಬಿನಾಕ್ ರಿಗ್ಲೆಂ. ತೆಂ ರಾಗಾರ್ ಆಸ್‌ಲ್ಲೆಂ.

“ತುಕಾ ಮ್ಹಜ್ಯಾ ಕ್ಯಾಬಿನಾಕ್ ಯೆಂವ್ಚ್ಯಾ ಪಯ್ಲೆಂ ನೊಕ್ ಕರಿಜೆ ಮ್ಹಣ್ ಗೊತ್ತುನಾಂಗೀ ವಿಲ್ಮಾ?”

ಪುಣ್ ತಾಣೆಂ ತಾಚ್ಯಾ ಸಾವಾಲಾಕ್ ಜಾಪ್ ದಿಲಿ ನಾ.

“ರಾಜನ್ ರಜಾ ವಿಚಾರುಂಕ್ ಆಯಿಲ್ಲೊಗೀ?”

“ವ್ಹಯ್, ಹಾಂವೆ ಇನ್ಕಾರ್ ಕೆಲೆಂ. ತಾಕಾ ರಜಾ ಯೆಂವ್ಚ್ಯಾ ವರ್ಸಾ ಜ್ಯೂನಾಂತ್. ತಶೆಂ ಮಧೆಂ ಕೊಣಾಯ್ಕೀ ರಜಾ ದೀಂವ್ಕ್ ಜಾಯ್ನಾ. ಆತಾಂ ತುಕಾ ಕಿತೆಂ ಜಾಯ್ ಸಾಂಗ್ ? “

“ಪುಣ್ ತಾಚ್ಯಾ ಭಯ್ಣಿಕ್ ಕಾಜರ್ ಆಸಾ ಆನಿ ತಾಣೆ ಗಾಂವಾಕ್ ಗೆಲ್ಲ್ಯಾ ಶಿವಾಯ್, ತಾಚ್ಯಾ ಪ್ರಾಯೆಸ್ತ್ ಆವಯ್ – ಬಾಪಾಯ್ಕ್ ಸಗ್ಳೆಂ ಕಾಜಾರಾಚೆಂ ವೊಜೆಂ ವಾವಂವ್ಕ್ ಕಿತ್ಲೆ ಕಶ್ಟ್ ಜಾತಾತ್ ತೆಂ ಜಾಣಾಂಯ್ಗೀ ? “

“ಶಟ್ ಅಪ್. ಇಟ್ಸ್ ನನ್ ಒಫ್ ಯುವರ್ ಬಿಸ್ನೆಸ್. ಮ್ಹಜ್ಯಾ ಸ್ಟಾಫಾಕ್ ಖಂಯ್ ದವ್ರಿಜೆ ಮ್ಹಣ್ ಮ್ಹಾಕಾ ಕಳಿತ್ ಆಸಾ”

“ಒಹೊ ತಶೆಂ ತರ್. ಸರ್, ಮ್ಹಾಕಾ ಆನಿ ಹಾಂಗಾ ರಾವೊಂಕ್ ಸಾದ್ಯ್ ನಾ. ಹ್ಯಾ ಮಯ್ನ್ಯಾಚ್ಯಾ ಅಕೆರಿ ವರೇಗ್ ಹಾಂವ್ ಕಾಮ್ ಕರ್ತಾಂ. ತುಂವೆ ಮ್ಹಾಕಾ ಮೊಸ್ತು ಕುಮಕ್ ಕೆಲ್ಯಾಯ್. ತುಕಾ ದೇವ್ ಬೊರೆಂ ಕರುಂ. ಪುಣ್ ಕೊಣಾಲಾಗಿಂ ಘಮಂಡ್ ಆನಿ ಹಂಕಾರ್ ಅಸಾ ಆನಿ ಆಪ್ಲ್ಯಾ ಕಾಮ್ ಕರ್ಚ್ಯಾ ಕಾಮೆಲ್ಯಾಂಚೊ ಮೋಗ್ ನಾ ತರ್ ತ್ಯಾ ಒಫಿಸಾಂತ್ ವಾ ಕಂಪೆನಿಂತ್ ಕಾಮ್ ಕರ್ಚೆಂ ವ್ಯರ್ಥ್! ಜಾಂವ್ಕ್ ಪುರೊ ತುಂ ಏಕ್ ವ್ಹಡ್ಲೊ ಸಿಸ್ಟಮಾಚೊ ಮನಿಸ್ ಆನಿ ತುಂವೆ ಬಿಜ್ನೆಸಾಂತ್ ವ್ಹಡ್ ಸಾಧನ್ ಕೆಲಾಂಯ್. ಪೂಣ್ ಉಡಾಸ್ ದವರ್, ತುಜ್ಯಾ ಸಾಧನಾ ಪಾಟ್ಲ್ಯಾನ್ ತುಜ್ಯಾ ಕಾಮೆಲ್ಯಾಂಚೊ ಮೊಟೊ ವಾಂಟೊ ಆಸಾ. ತಿಂ ಎವಾರ್ಡ್ಸ್ ನಿಜಾಯ್ಕೀ ತಾಂಕಾ ಫಾವೊ”

“ವಿಲ್ಮಾ, ಯು ಬೆಟರ್ ಸ್ಟೊಪ್ ದಿಸ್ ನೊನ್‌ಸೆನ್ಸ್.”

“ಯು ಬೆಟರ್ ಲಿಸನ್ ಸರ್. ಐ ಯಾಮ್ ನೊಟ್ ಯುವರ್ ಸರ್ವೆಂಟ್. ಹಾಂವ್ ಜಾಣಾ ತುಕಾ ಮ್ಹಜ್ಯಾ ಕುಟ್ಮಾಚೆರ್ ಖಾಸ್ಗಿ ರಾಗ್ ಆಸಾ. ಪೂಣ್ ತೊ ರಾಗ್ ಆನಿ ದ್ವೇಶ್ ಕಿತ್ತೂನ್ ಪರ್ಯಾಂತ್ ದವರ್ತಲೊಯ್? ತುಜೆಂ ಸಗ್ಳೆಂ ಜಿವಿತ್ ತ್ಯಾಚ್ ಚಿಂತ್ನಾನಿ ಅನಿ ಭೊಗ್ಣಾಂನಿ ಆಕೇರ್ ಜಾತೆಲೆಂ. ತುಕಾ ಸಾಂಗ್ಚ್ಯಾಂತ್ ಕಾಂಯ್ ಅರ್ಥ್ ನಾ. ತುಂವೆ ಮ್ಹಾಕಾ ಕೆಲ್ಲ್ಯಾ ಸರ್ವ್ ಉಪ್ಕಾರಾಂಕ್ ದೇವ್ ಬರೆಂ ಕರುಂ … ಐ ವಿಲ್ ಕ್ವಿಟ್ ಮೈ ಜೋಬ್. ಸಗ್ಳ್ಯಾಂಚೊಂ ಪಾಗ್ ರೆಡಿ ಜಾಲ್ಯಾ ಉಪ್ರಾಂತ್ ಹಾಂವ್ ಹಾಂಗಾಥಾವ್ನ್  ನಿಕಾಳ್ತಾಂ. ಮ್ಹಾಕಾ ಮ್ಹಜ್ಯಾ ಕಾಮೆಲಿ ಮಿತ್ರಾಂಕ್ ಕಶ್ಟಾರ್ ಘಾಲುಂಕ್ ನಾಕಾ. ಬಾಯ್ ಮಿ| ಡೇವಿಡ್.”

ವಿಲ್ಮಾ ಕ್ಯಾಬಿನಾಚೆಂ ದಾರ್ ಲೊಟುನ್ ಭಾಯ್ರ್ ಆಯ್ಲೆಂ. ತಾಚಿ ಕೂಡ್ ಸಗ್ಳಿ ಕಾಂಪ್ತಾಲಿ. ಕ್ಯಾಬಿನಾಕ್ ಆಯಿಲ್ಲೆಂಚ್ ಏಕ್ ಗ್ಲಾಸ್ ಉದಕ್ ಎಕಾಚ್ ಘೊಟಾಕ್ ಮ್ಹಳ್ಳೆಬರಿಂ ಪಿಯೆಲೆಂ. ಇಲ್ಲ್ಯಾ ವೆಳಾನ್ ತೆಂ ಥಂಡ್ ಜಾಲೆಂ. ದನ್ಯಾಕ್ ಬರೆಂ ಲಾಗೊಂಕ್ ನಾ ಜಾಂವ್ಕ್ ಪುರೊ, ಪೂಣ್ ತಾಚೊ ರಾಗ್ ತಾಣೆ ಭಾಯ್ರ್ ಘಾಲ್ಲೊ. ತಾಕಾ ಆತಾಂ ಬರೆಂ ಲಾಗೊಂಕ್ ಲಾಗ್‌ಲ್ಲೆಂ.

ವಿಲ್ಮಾನ್ ರಾಜನಾಕ್ ಆಪವ್ನ್ ಘಡ್‌ಲ್ಲಿ ಗಜಾಲ್ ಸಾಂಗ್ಲಿ. ರಜಾ ಮೆಳ್ಚೊ ಭರ್ವಸೊ ನಾತ್ಲೊ. ತೊ ಬಾವ್ಡೊ ಬೆಜಾರಾಯೆನ್ ಪಾಟಿಂ ಗೆಲೊ.

ವಿಲ್ಮಾ ತಾಚ್ಯಾ ಕಾಮಾಕ್ ಲಾಗ್ಲೆಂ.

ತಾಚ್ಯಾ ಮತಿಂತ್ ವಿವಿಧ್ ಚಿಂತ್ನಾಂ ಘುಂವ್ತಾಲಿಂ, ಕಾಮಾಚೆರ್ ಗುಮಾನ್ ದೀಂವ್ಕ್ ಜಾಂವ್ಕ್ ನಾ. ಕಂಪ್ಯೂಟರ್ ಬಂದ್ ಕರ್ನ್, ಕ್ಯಾಬಿನ್ ಲೋಕ್ ಕರ್ನ್ ತೆಂ ಒಫಿಸಾಥಾವ್ನ್ ಭಾಯ್ರ್ ಆಯ್ಲೆಂ.  ಟ್ಯಾಕ್ಸಿ ಧರ್ನ್ ಶೀದಾ ರುಮಾಕ್ ಗೆಲೆಂ. ತ್ಯಾ ದಫ್ತರಾಂತ್ ತಾಕಾ ಏಕ್ ಘಡಿ ರಾವೊಂಕ್ ನಾಕಾ ಆಸ್ಲೆಂ.

♥ ♥ ♥

ವಿಲ್ಮಾಚಿ ಉತ್ರಾಂ ಆಯ್ಕೊನ್ ಡೆವಿಡ್ ಶೆರ್ಮೆಲ್ಲೊ. ‘ಕಿತ್ಲೆಂ ಧಯ್ರ್ ಹ್ಯಾ ಚೆಡ್ವಾಕ್. ಹಾಂವೆ ಶಿಕೊವ್ನ್, ಹಾಂವೆ ವಿಜಾ ದೀವ್ನ್, ಆಜ್ ತೆಂ ಮ್ಹಾಕಾಚ್ ಮುಕಾರ್ ರಾವ್ಲೆಂ. ಇಟ್ಸ್ ಶೊಕಿಂಗ್.’ ವಿಲ್ಮಾಚ್ಯಾ ಆವಯ್ನ್ ಸಾಂಗಿಲ್ಲಿಂ ಉತ್ರಾಂ ಪರ್ತ್ಯಾನ್ ತಾಚ್ಯಾ ಮತಿಕ್ ಆಯ್ಲಿಂ. ಸಾಂಗಾತಾ ರಾತಿಂ ಪಡ್‌ಲ್ಲೆಂ ತೆಂ ದಳ್ದಿರೆಂ ಸಪಣ್.

“ಕಿತ್ಯಾಕ್ ಹಾಂವ್ ಇತ್ಲೊಂ ನಿಶ್ಟುರ್ ಜಾಲೊಂ? ಎಕಾಲೆಕಾರ್ ವಿಲ್ಮಾನ್ ಸಾಂಗ್ಚೆಂ ಸತ್. ಕಿತ್ಲೊ ತೇಂಪ್ ಹಾಂವೆ ಹಗೆಂ ಧರ್ಚೆಂ? ಆನಿ ಆಜ್ ಜರ್ ಹಾಂವ್ ಇತ್ಲೊ ವಯ್ರ್ ಪಾವ್ಲಾಂ ತರ್ ಮ್ಹಜ್ಯಾ ಕಾಮೆಲ್ಯಾಂನಿ ಹ್ಯಾ ಮರುಭುಂಯ್ತ್, ಘಾಮ್ ಪೀಳ್ನ್, ಕಶ್ಟ್ ಕಾಡ್ನ್, ಮ್ಹಜಿ ಕಂಪೆನಿ ಇತ್ಲ್ಯಾ ಉದರ್ಗತೆಕ್ ಪಾವಯ್ಲ್ಯಾ ತೆಂಯ್ ಖರೋಖರ್ ಸತ್. ಮ್ಹಾಕಾ ಮಾತ್ರ್ ತಾಂಚೆ ಮುಖಾರ್ ಲ್ಹಾನ್ ಜಾಂವ್ಕ್ ನಾಕಾ. ಹ್ಯಾ ಸಗ್ಳ್ಯಾಕ್ ಕಾರಣ್ ವಿಲ್ಮಾಚಿ ಆವಯ್. ಪುಣ್ ತಿ ಆತಾಂ ಪ್ರಾಯೆಸ್ತ್ ಜಾವ್ನ್ ಯೆತಾ ಆನಿ ನೆಣಾಂ ಕೆದ್ನಾ ತಾಂಚೆ ಜೀವನ್ ಆಖೇರ್ ಜಾತಾ. ತರ್ ಹಾಂವೆ ಅನಿಕೀ ತಿಚೆರ್ ಹಗೆಂ ದವರ್ನ್ ಕಿತೆಂ ಫಾಯ್ದೊ?”

♥ ♥ ♥

ವಿಲ್ಮಾ ತ್ಯಾ ದೊನ್ಪಾರಾಂ ಜೇಂವ್ಕ್ ನಾ. ಫ್ರಿಜ್ಜಾಂತ್ ಆಸ್‌ಲ್ಲೊ ಇಲ್ಲೊ ಒರೆಂಜ್ ಜ್ಯೂಸ್ ಪಿಯೊನ್ ತೆಂ ನಿದೊಂಕ್ ಗೆಲೆಂ. ತಾಚ್ಯಾ ಜಿವಾಕ್ ನಯ್, ಮತಿಕ್ ಪುರಾಸಣ್ ಜಾಲ್ಲಿ. ಮುಖಾರ್ ಆಪ್ಣಾಚಿ ಗತ್ ಕಿತೆಂ ತೆಂ ನೆಣಾಸ್ಲೆಂ. ರಾಗಿಶ್ಟ್ ಬೊಸ್ ಆಪ್ಣಾಕ್ ಆನಿ ಮುಕಾರ್ ತ್ಯಾ ಒಫಿಸಾಂತ್ ರೀಗ್ ದಿತಾಗೀ ನಾ ತೆಂ ಭಿಲ್ಕುಲ್ ನೆಣಾಸ್ಲೆಂ.

ತಿತ್ಲ್ಯಾರ್ ಮೊಬಾಯ್ಲ್ ವ್ಹಾಜ್‌ಲ್ಲೊ ಆವಾಜ್ ತಾಕಾ ಆಯ್ಕಾಲೊ. ತೆಂ ಸಪ್ಣೆತಾಗೀ ವಾ ಹಕೀಗತ್ ತೆಂ ನೆಣಾ ಜಾಲೆಂ. ನಿಮಾಣೆ ಕಶ್ಟಾಂನಿ, ನಿದೆಚ್ಯಾ ದೊಳ್ಯಾಂನಿ ಉಟ್ಲೆಂ ಆನಿ ಮೊಬಾಯ್ಲ್ ಹಾತಿಂ ಘೆತ್ಲೆಂ.

“ಥ್ಯಾಂಕ್ಸ್, ಮ್ಯಾಮ್ ” ರಾಜನ್ ತೆವ್ಶಿಲ್ಯಾನ್ ಉಲಯ್ತಾಲೊ.

“ಹೊ ಕಿತ್ಯಾಕ್ ಥ್ಯಾಂಕ್ಸ್ ರಾಜನ್? ಮ್ಹಾಕಾ ಸಮ್ಜಾನಾ”

“ಮ್ಯಾಮ್, ಮ್ಹಾಕಾ ಬೊಸಾನ್ ಎಕಾ ಹಫ್ತ್ಯಾಚಿ ನಯ್, ಎಕಾ ಮಹಿನ್ಯಾಚಿ ರಜಾ ದಿಲಿ”

” ಹೋ, ವ್ಹಯ್ಗೀ? ಲಕ್ಕಿ ತುಂ” ವಿಲ್ಮಾ ತಾಕಾಚ್ ಪಾತ್ಯೆನಾ ಜಾಲೆಂ.
.
“ತಿತ್ಲೆಂ ಮಾತ್ರ್ ನಯ್, ಮ್ಹಾಕಾ ಮ್ಹಜ್ಯಾ ಭಯ್ಣಿಚ್ಯಾ ಕಾಜಾರಾಕ್ 2000 ದಿರ‍್ಹಾಮ್ ಕ್ಯಾಶ್ ದಿಲೆ ಆನಿ ಪಾಲ್ಯಾಂ ತುಜೆಲಾಗಿಂ ಥಾವ್ನ್ ಸಾಂಬಾಳ್ ಘೆವ್ನ್ ಗಾಂವಾಕ್ ವ್ಹಚ್ ಮ್ಹಣ್ ಸಾಂಗ್ಲೆ” ತಾಚ್ಯಾ ಖುಶೆಕ್ ಘಡ್ ನಾತ್ಲಿ. ಸಂತೊಸಾನ್ ತಾಕಾ ಉತ್ರಾಂ ಯೇನಾತ್ಲಿಂ.

“ಜಾಯ್ತ್ ರಾಜನ್, ಫಾಲ್ಯಾಂ ಹಾಂವ್ ತುಜೊ ಸಾಂಬಾಳ್ ಬೆಂಕಾಕ್ ಟ್ರಾನ್ಸ್‌ಫರ್ ಕರ್ತಾಂ ಸಕಾಳಿಂ”

“ಮೊಸ್ತು ಥ್ಯಾಂಕ್ಸ್ ಮ್ಯಾಮ್ ತುಕಾ. ಜರ್‌ತರ್ ತುಂ ತಾಚೆಲಾಗಿಂ ಉಲೊಂವ್ಕ್ ನಾತ್ಲಿಯ್ ತರ್ ಭಿಲ್ಕುಲ್ ತೊ ಮ್ಹಾಕಾ ರಜಾ ದೀನಾಸ್ಲೊ. ತುಜೊ ಕಾಳ್ಜಾ ಥಾವ್ನ್ ಉಪ್ಕಾರ್”

“ಜಾಯ್ತ್ ರಾಜನ್, ಸಕಾಳಿಂ ಮೆಳ್ತಾಂ. ಆತಾಂ ವ್ಹಚ್ ವೆಗಿಂ ಇಲ್ಲೆಂ ಶೊಪಿಂಗ್ ಕರ್, ಭಯ್ಣಿಕ್ ಇಲ್ಲೆಂ ಭಾಂಗಾರ್ ಘೆ.”

“ಥ್ಯಾಂಕ್ಸ್ ಮ್ಯಾಮ್, ಥ್ಯಾಂಕ್ಯೂ ವೆರಿ ಮಚ್” ತಾಣೆಂ ಮೊಬಾಯ್ಲ್ ಬಂದ್ ಕೆಲೆಂ.

ವಿಲ್ಮಾನ್ ಏಕ್ ನೀಳ್ ಸ್ವಾಸ್ ಕಾಡ್ಲೊ. ತೆಂ ತಾಕಾಚ್ ಪಾತ್ಯೆನಾ ಜಾಲೆಂ. ತಾಚೆಂ ಟೆನ್ಶನ್ ಸದ್ದ್ಯಾಕ್ ಉಣೆ ಜಾಲೆಂ. ತಾಕಾ ಖಬರ್ ನಾಸ್ತಾಂ ಘಟ್ಟ್ ನೀದ್ ಪಡ್ಲಿ.

ಪಾಂಚ್ ವರಾರ್ ತಾಕಾ ಜಾಗ್ ಜಾಲಿ. ಮೊಬಾಯ್ಲ್ ಪಳೆತಾನಾ ತೀನ್ ಮಿಸ್ಸ್ ಕೊಲ್ಸ್. ತೇಂಯೀ ಬೊಸ್ – ಡೇವಿಡ್ ದಾಟ್ಟುಚಿಂ!

ವಿಲ್ಮಾನ್ ಭಿಯಾನ್ ಆನಿ ಕಾವ್ಜೆ ಣೆನ್ ಪಾಟಿಂ ಫೊನ್ ಕೆಲೊ.

“ಹಾಯ್ ವಿಲ್ಮಾ”

“ಹಾಯ್ ದಾಟ್ಟು”

“ಸಾಂಜೆರ್ ಫ್ರೀ ಆಸಾಯ್ಗಿ?”

“ವ್ಹಯ್ ದಾಟ್ಟು, ಕಿತ್ಯಾಕ್?”

“ಇಫ್ ಯು ಡೋಂಟ್ ಮೈಂಡ್ ಲೆಟ್ಸ್ ಗೊ ಫೊರ್ ಡಿನ್ನರ್ ಎಟ್ ಶೆರಾಟಾನ್?”

“ಹೊ, ಕಿತೆಂ ವಿಶೇಸ್ ದಾಟ್ಟು?”

” ಕಾಂಯ್ ನಾ. ಐ ಜಸ್ಟ್ ನೀಡ್ ಸಮ್ ಬ್ರೇಕ್. ತುಂ ಯೆತಾಯ್ ನೆ?”

“ಒಕೆ ದಾಟ್ಟು, ಕಿತ್ಲ್ಯಾ ವರಾರ್?”

“ಹಾಂವ್ ತುಕಾ ಸಾತ್ ವರಾರ್ ಪಿಕ್ ಕರ್ತಾಂ”

“ಒಕೆ ದಾಟ್ಟು. ಬಾಯ್”

ಮೊಬಾಯ್ಲ್ ಬಂದ್ ಕರ್ನ್ ವಿಲ್ಮಾ ತಾಕಾಚ್ ಪಾತ್ಯೆನಾ ಜಾಲೆಂ. ಪಯ್ಲೆ ಪಾವ್ಟಿಂ ತಾಣೆ ತಾಕಾ ಭಾಯ್ರ್ ಆಪೊವ್ನ್ ವರ್ಚೆಂ. ಸುರ್ವೆರ್ ಆಯಿಲ್ಲೆ ತೆದ್ನಾಂ ಶೊಪಿಂಗ್ ಮೊಲಾಕ್ ಆಪವ್ನ್ ವರ್ನ್ ನವಿ ಮುಸ್ತಾಯ್ಕಿ ತಾಣೆ ಕಾಣ್ಗೆವ್ನ್ ದಿಲ್ಲಿ. ತೆಂಚ್ ಮ್ಹಾಪ್…

ಬಿತರ್ಲೆ ಭಿತರ್ ತಾಕಾ ಇಲ್ಲಿ ಖ್ಹುಶಿಯ್ ಜಾಲಿ. ಸುರ್ವೆರ್ ತೆಂ ತಾಕಾ ಮೊಸ್ತು ಪಸಂದ್ ಕರ್ತಾಲೆಂ. ಪುಣ್ ತಾಚ್ಯಾ ಒಫಿಸಾಕ್ ಕಾಮಾಕ್ ಲಾಗ್ಲ್ಯಾ ಉಪ್ರಾಂತ್ ತಾಕಾ ಕಳ್ಳೆಂ ಕೀ ತೊ ಘಮಂಡಿ ಮನಿಸ್ ಮ್ಹಣ್. ಒಫಿಸಾಚೆಂ ವಾತಾವರಾಣ್ ಬಂಧಿಖಾನ್ಯಾಪರಿಂ ಆಸ್ಲೆಂ. ಸೀರಿಯಸ್ ಕಾಮ್ ಕರುಂಕ್, ಕಾಂಯ್ ಕುಶಾಲಾಯ್ ಉಲೊಂಕ್ ನಾ. ಕಾಮ್ ನಾಕಾ ತರ್ ವೆಗಿಂಚ್ಯಾಕ್ ಸೊಡುಂಕ್ ಜಾಯ್ನಾ, ವಿಜಾಚೆ ಸಮಸ್ಸೆ. ಕಾಮ್ ಸೊಡ್ಲ್ಯಾರ್ ವಿಜಾ ರದ್ ಕರ್ಯೆತ್ ಧನ್ಯಾನ್. ತಸೆಂ ಗಲ್ಫ್ ಗಾಂವಾನಿ ಚಡಾವತ್ ಧನಿ ಹಾಚೊ ಪಾಯ್ದೊ ಜೊಡ್ತಾಲೆ ಆನಿ ಬೊರೆಂ ಕಾಮ್ ಕರಯ್ತಾಲೆ ಕಾಮೆಲ್ಯಾಂ ಲಾಗಿಂ. ಡೇವಿಡ್ ಕಾಮಾಚ್ಯಾಂಕ್ ಬರೊ ಸಾಂಬಾಳ್ ದಿತಾಲೊ ಪುಣ್ ಕೊಣಾಯ್‌ಲಾಗಿಂ ಎಕ್ ಆತ್ಮೀಯತಾ ಮ್ಹಳ್ಳಿ ನಾತ್‌ಲ್ಲಿ. ತೊ ಒಫಿಸಾ ಥಾವ್ನ್ ಭಾಯ್ರ್ ಗೆಲ್ಯಾರೀ ಸಿಸಿಟಿವಿಂತ್ ತಪಾಸ್ಣಿ ಕರ್ತಾಲೊ, ಮೊಬಾಯ್ಲಾಚೆರ್. ಕಾಮೆಲ್ಯಾಂಕ್ ಏಕ್ ಸ್ವತಂತ್ರ್ ಮ್ಹಳ್ಳೆಂಚ್ ನಾತ್ಲೆಂ. ಫಕತ್ ಪೊಟಾಚ್ಯಾ ಗ್ರಾಸಾಕ್ ಆನಿ ಗಾಂವಾಂತ್ ಆಸ್ಚ್ಯಾ ಭಾಯ್ಲ್ ಭುರ್ಗ್ಯಾಂಚೆಂ ಚಿಂತುನ್ ತೆ ಕಾಮ್ ಕರ್ತಾಲೆ ಶಿವಾಯ್ ತಾಂಕಾಯ್ ದುಸ್ರಿ ವಾಟ್ ನಾತ್ಲಿ. ಏಕೇಕ್ ಪಾವ್ಟಿಂ ವಿಲ್ಮಾ ಚಿಂತಾಲೆಂ ಕೀ – ಕಿತ್ಯಾಕ್ ಆಪುಣ್ ಹ್ಯಾ ಜಯ್ಲಾಕ್ ಆಯ್ಲಿಂ ಮ್ಹಣ್.

ಪೂಣ್ … ಆಜ್ ಕಿತೆಂಗೀ ಘಡಾನಾತ್ಲೆಂ ಘಡ್ಲೆಂ, ತಾಚ್ಯಾ ಮತಿಂತ್ ಆಸ್‌ಲ್ಲಿ ತಿ ಪುಗಾಸಾಣ್ ಪೂರಾ ತಾಣೆ ಭಾಯ್ರ್ ಘಾಲ್ಲಿ, ರಾಜನಾಚ್ಯಾ ರಜೆಚ್ಯಾ ನಿಬಾನ್. ಹರ್ಯೆಕ್ ಜಾಂವ್ಚೆ ಬರ‍್ಯಾಕ್ ಮ್ಹಣ್ತಾತ್.

♥ ♥ ♥

ವಿಲ್ಮಾನ್ ಏಕ್ ಸೊಬಿತ್ ಟಾಪ್ ಆನಿ ಲೂಸ್ ಪ್ಯಾಂಟ್ ವಿಂಚ್ಲೆಂ. ಇಲ್ಲೆಂ ಮೆಕಪ್ ಕೆಲೆಂ ಆನಿ ಮುಸ್ತಾಯ್ಕಿ ನೆಸೊನ್ ತಯಾರ್ ಜಾಲೆಂ. ಶೆರಾಟಾನ್ ಏಕ್ ಪಾಂಚ್‌ತಾರಾ ಹೊಟೆಲ್ ಆನಿ ತಶೆಂ ಥಂಯ್ ವೆತಾನಾ ಇಲ್ಲೆಂ ಟಿಪ್-ಟೊಪ್ ನ್ಹೆಸೊನ್ ವ್ಹಚಜೆ ಪಡ್ತಾ , ಹೆಂ ವಿಲ್ಮಾ ಬರ‍್ಯಾನ್ ಜಾಣಾಸ್ಲೆಂ. ಥಂಯ್ಸರ್ ಸಂಸಾರಾಚೊ ಲೋಕ್ ಜಮ್ತಾ, ವಿವಿದ್ ರೆಸ್ಟೊರೆಂಟಾಂನಿ. ತಶೆಂಚ್ ಬ್ಯಾಂಡ್ ಆನಿ ಮ್ಯೂಸಿಕ್ ಫುಲ್ ಬ್ಲಾಸ್ಟ್ ಚಲ್ತಾ.

ಪಾಂಚ್ ಮಿನುಟಾಂನಿ ಡೆವಿಡ್ ಆಯ್ಲೊ.

“ಹಾಯ್ ಸ್ವಾಗತ್ ವಿಲ್ಮಾ” ತೊ ಹಾಸ್‌ಲ್ಲೊ ವಿಲ್ಮಾನ್ ಪಯ್ಲೆ ಪಾವ್ಟಿಂ ಪಳಯ್ಲೆಂ ಮ್ಹಣ್ಯೆತ್.

“ಹಾಯ್ ದಾಟ್ಟು” ತೆಂಯೀ ಹಾಸ್ಲೆಂ. ತಾಚೆ ಸೊಬೀತ್ ಹಾಸೊ ಪಳೆವ್ನ್ ಡೆವಿಡಾಕ್ ಖುಶಿ ಜಾಲಿ. ಮೊಳ್ಬಾವಯ್ಲೊ ಚಂದ್ರ್ ತಾಚೆ ಮುಖಾರ್ ಉಬೊ ಆಸಾ ತಸೆಂ ಖಿಣಾಕ್ ತಾಕಾ ಭೊಗ್ಲೆಂ. ಕಾರಾರ್ ಬಸ್ಲ್ಯಾ ಉಪ್ರಾಂತ್ ತಾಣೆ ವಿಚಾರ್ಲೆಂ ” ಆತಾಂ ಕಶೆಂ ಆಸಾಯ್ ವಿಲ್ಮಾ?”

“ಆತಾಂ ಬೊರೀಂ ಆಸಾಂ”. ತಾಣೆ ಘಡಿಬರ್ ತಾಕಾಚ್ ಪಳೆಲೆಂ. ” ಸೊರಿ ಫೊರ್ ಮೈ ಔಟ್-ಬ್ರಸ್ಟ್.”

“ಇಟ್ಸ್ ಒಕೆ ವಿಲ್ಮಾ, ತುಂವೆ ಸಾರ್ಕೆಂ ಸಾಂಗ್ಲೆಂಯ್. ಭುರ್ಗ್ಯಾಪಣಾರ್ ಆಮಿ ಕಿತ್ಲೆಂ ಹಾಸ್ತೆಲ್ಯಾಂವ್ ಅನಿ ಗಮ್ಮತ್ ಕರ್ತೆಲ್ಯಾಂವ್. ಪುಣ್ ತ್ಯಾ ಎಕಾ ದಿಸಾ ತುಜ್ಯಾ ಮಾಮ್ಮಿನ್ ಮ್ಹಜ್ಯಾ ಪಪ್ಪಾಕ್ ಅಣ್ಕಿತಾನಾ ಮ್ಹಾಕಾ ಸೊಸ್ಲೆಂ ನಾ. ಹಾಂವೆ ಮ್ಹಾಕಾಚ್ ಧಾರುಣ್ ಕೆಲೊ. ತ್ಯಾ ದೀಸ್ ಮ್ಹಜೆ ಮ್ಹನ್ಶಾಪಣ್ ಸಾಂಡ್ಲೆ ಆನಿ ಹಾಂವ್ ತುಮಿ ಸಾಂಗಿಲ್ಲ್ಯಾಬರಿಂ ಎಕ್ ಜೀವ್ ನಾತ್‌ಲ್ಲೊ ರೊಬೊಟ್ ಕಸೊ ಜಾಲೊಂ” ಡೆವಿಡಾನ್ ಹಾಸೊನ್ ವಿಲ್ಮಾಕ್ ಪಳೆಲೆಂ. ವಿಲ್ಮಾಯ್ ಹಾಸ್ಲೆಂ.

“ಹಾಂ ಹಾಂವ್ ಜಾಣಾ ತೆಂ. ಲ್ಹಾನ್ಪಣಾರ್ ಕೆದ್ನಾ ಆಮ್ಚಾ ಮತಿಕ್ ಧಖೊ ಬಸ್ತಾ ತೊ ಘಾಯ್ ಸಾಸ್ಣಾಕ್ ಉರ್ತಾ ಆನಿ ಥಂಯ್ ಥಾವ್ನ್ ಭಾಯ್ರ್ ಯೆಂವ್ಚೆಂ ತಿತ್ಲೆಂ ಸುಲಬ್ ನಯ್ ದಾಟ್ಟು. ತುಂವೆ ಕೆಲ್ಲೆಂ ವಾಯ್ಟ್ ಮ್ಹಣ್ ಹಾಂವ್ ಸಾಂಗಾನಾ. ಎಕಾ ಕಟೀಣ್ ಪರಿಸ್ಥಿತಿಕ್ ಲಾಗೊನ್ ತುಂವೆ ತಿ ವಾಟ್ ಧರ್ಲಿಯ್ ಆನಿ ತುಂ ಯಶಸ್ವೀ ಜಾಲೊಯ್. ಪುಣ್ ತೆಂಚ್ ರಾಜಾಂವ್ ಮೊರ್ತಾ ವರೆಗ್ ಮುಖಾರ್ಸುಂಕ್ ಜಾತಾಗಿ ದಾಟ್ಟು ? ತುಂವೆ ಬಿಜ್ನೆಸ್ ಸುರು ಕೆಲೆಂಯ್ ಆನಿ ಆಮ್ಕಾಂ ಸರ್ವಾಂಕ್ ಜಿವಿತಾಚಿ ಆನಿ ಆಮ್ಚಿ ಆರ್ಥಿಕ್ ಪರಿಸ್ಥಿತಿ ಸುಧಾರುಂಕ್ ತುಜೆ ಸಂಗಿ ಆಮ್ಕಾಂಯ್ ಆಧಾರ್ ಜಾಲೊಯ್. ಪೂಣ್ ಆಮಿ ಫಕತ್ ಬಿಜ್ನೆಸ್‌ತ್ ಕೆಲ್ಯಾರ್ ಪಾವಾನಾ. ಆಮ್ಚ್ಯಾ ಜಿವಿತಾಂತ್ ಮೊಸ್ತು ಹೆರ್ ಆವ್ಕಾಸ್ ಆಮ್ಕಾಂ ಆಸಾತ್ ಆಮಿ ಆಮ್ಚೆಂ ಜಿವಿತ್ ರೂಪಿತ್ ಕರುಂಕ್. ಜಾಣ್ವಾಯ್ ಜೊಡುಂಕ್. ತ್ಯಾ ದೆಕುನ್ ಆಮಿ ಬೂಕ್, ಆತ್ಮ್‌ಕತಾ ವಾಚಿಜೆ ದಾಟ್ಟು. ಬಿಜ್ನೆಸಾ ಭಾಯ್ರ್ ಮೊಸ್ತು ಸಂಗ್ತಿ ಆಸಾತ್. ಆರ್ಟ್, ಸಿನೆಮಾ, ನೊವೆಲ್ಸ್, ಪೊಯೆಟ್ರಿ, ನಾಟಕ್. ಥರಾವಳ್ ವಾಟೊ ಆಮ್ಕಾಂ ಆಸಾತ್. ತೆ ಸರ್ವ್ ಆಮಿ ಫಕತ್ ಪಯ್ಶೆ ಜೊಡ್ಚ್ಯಾ ಭರಾನ್ ವಿಸ್ರಾತಾಂವ್ ಆನಿ ಆಮ್ಚಿ ಜಿಣಿ ಏಕ್ ರೊಲಾರ್ ಕೊಸ್ಟಾರ್ ಕರ್ತಾಂವ್ ಶಿವಾಯ್ ತಾಚೆಂ ಮೋಲ್ ವಿಸ್ರಾತಾಂವ್” ವಿಲ್ಮಾಚಿಂ ರಾಜಾಂವಾಚಿಂ ಉತ್ರಾಂ ಆಯ್ಕೊನ್ ಡೆವಿಡ್ ಏಕ್ ಪಾವ್ಟಿಂಚ್ಯಾಕ್ ವಿಜ್ಮಿತ್ ಜಾಲೊ. ತಾಕಾ ತಾಚಿಚ್ ಲಜ್ ಭಗ್ಲಿ ಆನಿ ಆಪುಣ್ ಕಿತ್ಲೊ ಲ್ಹಾನ್ ಮ್ಹನಿಸ್ ಮ್ಹಣ್ ಗಮ್ಲೆಂ. ತಾಣೆ ವಿಲ್ಮಾಚೆರ್ ಆಭಿಮಾನಾಚಿ ದೀಶ್ಟ್ ಘಾಲಿ . . . ಪಯ್ಲೆ ಪಾವ್ಟಿಂ ತಾಣೆ ತಾಚ್ಯಾ ಭುಜಾಚೆರ್ ಹಾತ್ ಘಾಲೊ ಆನಿ “ಶಬ್ಬಾಸ್ . . . ಯು ಅರ್ ಯೆ ಜೀನಿಯಸ್ ” ಮ್ಹಣಾಲೊ.

“ವಿಲ್ಮಾ ತುಂ ಸಾಂಗ್ತಾಯ್ ತೆಂ ಖರೆಂ. ಆನಿ ಮುಖಾರ್ ಪುಣಿ ಹಾಂವ್ ಹ್ಯಾ ಸಂಗ್ತಿಚೆರ್ ಗುಮಾನ್ ದಿತಾಂ. ವ್ಹಯ್ ಹಾಂವೆ ಪಯ್ಶೆ ಕರ್ಚ್ಯಾ ಭರಾನ್, ಖರೆಂ ಜಿವಿತ್ ಕಿತೆಂ, ಜಿವಿತಾಂತ್ ಹೆರ್ ಕಿತ್ಲೆ ಸಂಗ್ತಿ ಆಮ್ಕಾಂ ಸಂತೊಸ್ ದಿತಾತ್ ಆನಿ ಆಮ್ಕಾ ಈಶ್ಟ್-ಮಂತ್ರ್ ಕಿತ್ಲ್ಯಾ ಗರ್ಜೆಚೆ ತೆಂ ಸಗ್ಳೆಂ ವಿಸ್ರಾಲ್ಲೊಂ. ಪುಣ್ ತುಂವೆ ಆಜ್ ಮ್ಹಾಕಾ ಜಾಗಯ್ಲೆಂಯ್. ತೆಂ ಹಾಂವ್ ಖಂಡಿತ್ ಮತಿಂತ್ ಧರ್ತಾಲೊಂ. ಥ್ಯಾಂಕ್ಸ್ ತುಕಾ ವಿಲ್ಮಾ”

“ದೇವ್ ಬೊರೆಂ ಕರುಂ ಧಾಟ್ಟು.” ತಾಣೆ ಎಕ್ ಲಾಂಬ್ ಉಸ್ವಾಸ್ ಸೊಡ್ಲೊ “ಮ್ಹಾಕಾ ಸಮ್ಜಾತಾ ತುಜಿ ಪರಿಸ್ಥಿತಿ. ತುಂವೆ ತುಕಾಚ್ ಬದ್ಲುಂಕ್ ಚಿಂತ್ಲಾಯ್ ತೆಂ ಬೋವ್ ಖುಶೆಚಿ ಗಜಾಲ್”

“ಥ್ಯಾಂಕ್ಸ್, ವಿಲ್ಮಾ ಏಕ್ ವಿಶಯ್ ಸಾಂಗು? ತುಂ ಒಪ್ತಾಯ್ ತರ್?”

“ಸಾಂಗ್ ದಾಟ್ಟು, ಪ್ಲೀಜ್”

“ಹಾಂವೆ ಕಾಜರ್ ಜಾಂವ್ಕ್ ಚಿಂತ್ಲಾಂ”

“ಹೊ, ರಿಯಲೀ? ಮ್ಹಾಕಾ ಪಾತ್ಯೆಂವ್ಕ್ ಜಾಯ್ನಾ. ತುಂ ರೊಬೊಟ್ ಕಾಜರ್ ಜಾತಾಯ್?”

“ಪುರೊ ವಿಲ್ಮಾ . . . ಸತ್ತ್. ಇಟ್ ಈಸ್ ಟೈಮ್ ಐ ಗೆಟ್ ಮ್ಯಾರಿಡ್.”

“ಪುಣ್ ಕಾಜರ್ ಜಾಂವ್ಕ್ ಎಕ್ ಚೆಡುಂ ಜಾಯ್ ನೆ??” ವಿಲ್ಮಾ ಹಾಸ್ಲೆಂ ಜ್ಯೋರಾನ್.

“ಚೆಡುಂ ಪಳೆಲಾಂ.. ಬೋವ್ ಸುಂದರ್ ಆಸಾ. ಸಬಾರ್ ದಿಸಾಂ ಥಾವ್ನ್ ತಾಕಾ ಪಳೆತಾಂ. ಪುಣ್ ವಿಚಾರುಂಕ್ ಧಯ್ರ್ ನಾ.” ವಿಲ್ಮಾಚಿ ಕಾಳ್ಜಾಚಿ ಉಡಿ ಏಕ್ ಪಾವ್ಟಿಂಚ್ಯಾಕ್ ಚಡ್ಲಿ. ತೆಂ ನಿಜಾಯ್ಕೀ ಡೆವಿಡಾಲಾಗಿಂ ಕಾಜಾರ್ ಜಾಂವ್ಕ್ ಆಶೆತಾಲೆಂ. ಪೂಣ್ ಒಫಿಸಾಕ್ ಕಾಮಾಕ್ ಲಾಗ್ಲ್ಯಾ ಉಪ್ರಾಂತ್ ಉಪ್ರಾಂತ್ ತಾಣೆ ಇಲ್ಲೆಂ ಪಾಟಿಂ ಕೆಲ್ಲೆಂ, ತಾಚೆಂ ಘಮಂಡ್ ಪಳೆವ್ನ್. ತಾಕಾ ಮೊಸ್ತು ದುಕ್‌ಲ್ಲೆಂ. ಪುಣ್ ಆತಾಂ ತೊ ಪರಿವರ್ತನ್ ಜಾಲಾ ತೆಂ ಆಯ್ಕೊನ್ ತಾಕಾ ತಾಚೆರ್ ಮೋಗ್ ವಾಡ್ಲೊ.

“ವಿಚಿತ್ರ್, ತುಕಾ ಇತ್ಲ್ಯಾ ಖಡಕ್ ಶಿಸ್ತೆಚ್ಯಾ ಮನ್ಶ್ಯಾಕ್ ವಿಚಾರುಂಕ್ ಧಯ್ರ್ ನಾ? ಪಾತ್ಯೆಂವ್ಕ್ ಕಶ್ಟ್”

“ವ್ಹಯ್ ವಿಲ್ಮಾ ದಾದ್ಲೆ ಇತ್ಲೆ ಕಠೋರ್, ಘಮಂಡಿ, ಸೆಲ್ಫ್ ಸೆಂಟರ್ಡ್ ಆಸ್ತಾತ್‌ಗೀ ತಾಂಕಾ ಎಕಾ ಚೆಡ್ವಾಚೊ ಮೋಗ್ ಜಾಲ್ಯಾರೀ ವಿಚಾರುಂಕ್ ಭಿಲ್ಕುಲ್ ಧಯ್ರ್ ಪಾವಾನಾ.”

“ಹೊ ತಶೆಂ. ಕಿತೇಂಯ್ ಜಾಂವ್, ಆತಾಂ ತರೀ ತಾಕಾ ಧಯ್ರಾನ್ ವಿಚಾರ್. ಜರ್ತರ್ ನಾ ಮ್ಹಳ್ಯಾರ್ ಕಿತೆಂ ಸಂಸಾರಾಂತ್ ದುಸ್ರಿಂ ಚೆಡ್ವಾಂ ನಾಂತ್‌ಗಿ ದಾಟ್ಟು”

ಆತಾಂ ವಿಲ್ಮಾಕ್‌ಚ್ ಧಯ್ರ್ ಚುಕ್ಲೆಂ ಜರ್ ಹಾಣೆ ದುಸ್ರ್ಯಾ ಕೊಣಾಚೊ ಮೋಗ್ ಕೆಲಾ ತರ್?

“ಆಸಾತ್ ವಿಲ್ಮಾ, ಮ್ಹಜ್ಯಾ ಪಯ್ಶ್ಯಾಂಕ್, ಗ್ರೆಸ್ತ್ ಕಾಯೆಕ್ ಸಬಾರ್ ಚೆಡ್ವಾಂ ಮೆಳೊಂಕ್ ಪುರೊ, ಪೂಣ್ ಮ್ಹಾಕಾ ಜಾಯ್ ತೆಂ ಮೆಳೊಂಕ್ ಕಶ್ಟ್.”

“ಹೋ ತಶೆಂ ಪುಣ್ ಕೊಣಿ ತುಜ್ಯಾ ಮತಿಂತ್ ಆಸಾಗೀ?”

“ವ್ಹಯ್ ಎಕ್ಲೆಂ ಆಸಾ. ತೆಂಚ್ ಭೆಂ ದಿಸ್ತಾ. ತೆಂ ಚಿಂತಾ ಹಾಂವ್ ಏಕ್ ಘಮಂಡಿ, ರೊಬೊಟ್ ಮ್ಹಣ್.”

“ಘಮಂಡಿ, ರೊಬೊಟ್ … ಅಕ್ರೇಕ್ ತರೀ ಒಪ್ಲೊಯ್ ನೆ. ತಾಚೆಂ ನಾಂವ್ ಸಾಂಗ್, ತುಕಾ ಜಾಯ್ನಾ ಜಾಲ್ಯಾರ್ ಹಾಂವ್ ಪ್ರಯತ್ನ್ ಕರ್ತಾಂ” ತಾಣೆ ಆಪದಯ್ರಾನ್ ಸಾಂಗ್ಲೆ.

“ಖಂಡಿತ್?”

“ಸಾಂಗ್ ಸಾಯ್ಬಾ..”

“ತಾಚೆಂ ನಾಂವ್ ವಿಲ್ಮಾ”!!!

ವಿಲ್ಮಾನ್ ಜಾಪ್ ದಿಲಿನಾ, ತಾಚೆಂ ತಾಣೆ ಮುಸ್ಕಾರ್ ಮಾತ್ ಪಳೆಲೆಂ. ತೊ ಮಸ್ಕಿರ‍್ಯೊ ಕರ್ತಾ ಮ್ಹಣ್ ತಾಣೆ ಚಿಂತ್ಲೆ. ಎಕಾ ಖಿಣಾಕ್ ತಾಕಾಚ್ ತೆಂ ಪಾತ್ಯೆನಾ ಜಾಲೆಂ. ವಿಲ್ಮಾಚಿ ಜಾಪ್ ನಾತ್ಲಿ ಪಳವ್ನ್ ತೋಯ್ ಕಾವ್ಜೆಲೊ..

“ವಿಲ್ಮಾ, ತೆಂಚ್ ಸಾಂಗೊಂಕ್ ಹಾಂವ್ ಭಿಯೆತಾಲೊಂ. ಪಳೆ ತುಂ ಮ್ಹಾಕಾ ಆತಾಂ ಪಾತ್ಯೆನಾಂಯ್, ತುಕಾಯ್ ಆತಾಂ ಶೊಕ್ ಜಾಲೊ ನೆ? ದುಸ್ರೆಂ ಕಿತೇಂಯ್ ಸಾಂಗೊಂಕ್, ಉಲೊಂಕ್ ಸಲೀಸ್ … ಪುಣ್ ಹಿ ಮೊಗಾಚಿ ಸಂಗತ್ ಯೆತಾನಾ, ತಿ ವೆಕ್ತಿ ಮೋಗ್ ಸ್ವೀಕಾರ್ ಕರ್ತಾಗೀ ವಾ ನೆಗಾರ್ತಾ ಮ್ಹಣ್ ಸಮ್ಜಂಕ್ ಮೊಸ್ತು ಕಶ್ಟ್. ಆನಿ ಎಕಾದಾವೆಳಾ ನಾ ಮ್ಹಣ್ ಸಾಂಗ್ಲ್ಯಾರ್ ತಾಚೆ ತಿತ್ಲಿ ಬೆಜಾರಾಯ್ ದುಸ್ರಿ ನಾ.”

“ಹೊ ತಸೆಂ. ಆನಿ ಎಕಾದಾವೆಳಾ ಜಾಯ್ತ್ ಮ್ಹಣ್ ಸಾಂಗ್ಲ್ಯಾರ್ ??? ” ವಿಲ್ಮಾ ಹಾಸ್ಲೆಂ. ಡೇವಿಡಾಥಂಯ್ ಜೀವ್ ಭರ್ಲೊ. “ತಾಚೆ ತಿತ್ಲೊ ಭಾಗಿ ದೀಸ್ ಮನ್ಶಾಚ್ಯಾ ಜಿವಿತಾಂತ್ ದುಸ್ರೊ ನಾ”

ತಿತ್ಲ್ಯಾರ್ ತಿಂ ಶೆರಾಟನ್ ಹೊಟೆಲಾಚ್ಯಾ ಪಾರ್ಕಿಂಗ್ ಲೊಟಾಕ್ ಪಾವ್‌ಲ್ಲಿಂ. ಡೇವಿಡಾನ್ ವಿಲ್ಮಾ ಖಾತಿರ್ ಕಾರಾಚೆಂ ದಾರ್ ಉಗ್ತೆಂ ಕೆಲೆಂ ಆನಿ ತಿಂ ಹಾತಾಕ್ ಹಾತ್ ಧರ್ನ್, ಶೆರಾಟಾನಾಚ್ಯಾ ಮೆಕ್ಸಿಕನ್ ರೆಸ್ಟೊರೆಂಟಾಕ್ ಗೆಲಿಂ.

► ಅಲ್ಪೋನ್ಸ್, ಪಾಂಗ್ಳಾ