ಪಾಟ್ಲ್ಯಾ ದಿಸಾಂನಿ ಮಂಗ್ಳುರ‍್ಚ್ಯಾ ಬಿಸ್ಪಾನ್ ಐಸಿವೈಎಮ್ಮಾಚ್ಯಾ ಎಕಾ ಕಾರ್ಯಾಂತ್ ಉಲಯಿಲ್ಲೊ ವೀಡಿಯೊ ವೈರಲ್ ಜಾಲೊ. ಐಸಿವೈಎಮ್ ಮ್ಹಳ್ಯಾರ್ ಮಝಾ ಮಾರ‍್ಚೆಂ, ಪಿಕ್ನಿಕ್ ಕರ‍್ಚೆಂ ಸಂಘಟನ್ ಮ್ಹಣ್ಚೊ ಕಾಳ್ ಪಾಶಾರ್ ಜಾವ್ನ್ ಗೆಲಾ. ಆತಾಂ ಐಸಿವೈಮ್ಮಾಂತ್ ವಕೀಲ್, ಪ್ರೊಫೆಸರ್ ಹುದ್ದೆದಾರ್ ಜಾತಾತ್ ಮ್ಹಣ್ ವ್ಹಡಿಲ್ ಆಪ್ಲ್ಯಾ ಸಂದೇಶಾಂತ್ ಸಾಂಗ್ಚೆಂ ದಿಸ್ತಾ. ಆತಾಂ ದಿಯೆಸೆಜಿಚ್ಯಾ ವ್ಹಡಿಲಾನ್ ಮ್ಹಳ್ಳ್ಯಾ ಹ್ಯಾ ಉತ್ರಾಂಕ್ ಕಿತೆಂ ಅರ್ಥ್ ಲಾಯ್ಜೆ?
ಆಮ್ಚ್ಯಾ ಕಾಳಾರ್ (ಮ್ಹಾಕಾ ಆತಾಂ ಪನ್ನಾಸ್ ಉತರ‍್ಲಿಂ) ಐಸಿವೈಎಮ್ ಅನ್ಪಡಾಂಚೆಂ ಸಂಘಟನ್ ಜಾವ್ನಾಸ್‌ಲ್ಲೆಂಗೀ? ಆಮ್ಚ್ಯಾ ಕಾಳಾರ್ ಐಸಿವೈಎಮ್ಮಾಂತ್ ಆಸ್‌ಲ್ಲ್ಯಾಂನಿ ಫಕತ್ ಪಿಕ್ನಿಕಾಂ ಕರ್ನ್, ಮಝಾ ಮಾತ್ರ್ ಕೆಲ್ಲಿಗೀ? ಆಮ್ಚೆಪಯ್ಕಿತ್ಲೆಂ ಕೊಣೀ ವಕೀಲ್, ಪ್ರೊಫೆಸರ್, ದಾಕ್ತೆರ್ ಜಾಂವ್ಕ್ ನಾಂತ್‌ಗೀ? ಆಮ್ಕಾಂ ಕಸಲೊಚ್ ಘನ್, ಮಾನ್, ಗವ್ರವ್ ಮ್ಹಳ್ಳೊ ನಾತ್‌ಲ್ಲೊ‌ಚ್‌ಗೀ ?
ಪ್ರಸ್ತುತ್ ಕೊಂಗ್ರೆಸ್ ಪಾಡ್ತಿಚೊ ರಾಶ್ಟ್ರೀಯ್ ಜೆರಾಲ್ ಕಾರ್ಯದರ್ಶಿ, ಆದ್ಲೊ ವಿದಾನ್ ಪರಿಷತ್ ಸಾಂದೊ ತಶೆಂ ವಕೀಲ್ ಮಾನೆಸ್ತ್ ಐವನ್ ಸೊಜಾನ್ ಹರ್ ಸಂದರ್ಶನಾಂತ್ ಮ್ಹಣ್ಚೆಂ ಆಸಾ – ಮ್ಹಜೆಥಂಯ್ ಮುಕೇಲ್ಪಣಾಚೆಂ ದೆಣೆಂ ರುತಾ ಜಾಲ್ಲೆಂಚ್ ಐಸಿವೈಎಮ್ಮಾಥಾವ್ನ್. ಪೋರ್ ದುಬಯ್ಚ್ಯಾ ಮಾನೆಸ್ತ್ ಡಯಾನ್ ಡಿಸೊಜಾಚಿ ಫೇಸ್‌ಬುಕಾಚೆರ್ ಪೋಸ್ಟ್ ಕೆಲ್ಲಿ ಪರ್ನಿ ತಸ್ವೀರ್ ಪಳೆವ್ನ್ ಮ್ಹಾಕಾ ಐಸಿವೈಎಮಾಚೆ ಆದ್ಲೆ ಉಡಾಸ್ ಜಿವಾಳ್ಳೆ. ತ್ಯಾ ಕಾಳಾರ್ ಬಜಾಜ್ ಚೇತಕ್ ಸ್ಕೂಟರ್ ಘೆವ್ನ್ ತೊ ಗಾಂವಾ-ಗಾಂವಾಕ್ ಧಾಂವ್ಲಾ, ಐಸಿವೈಎಮ್ ಸಂಘಟನ್ ಬಾಂದುನ್ ಹಾಡ್ಲಾಂ. ಪಾಂಗ್ಳಾ ತಸಲ್ಯಾ ಲ್ಹಾನ್ ಗಾಂವಾಥಾವ್ನ್ ಮಂಗ್ಳುರ್ ಯೇವ್ನ್ ಮಾನೆಸ್ತ್ ಎಚ್. ಆರ್. ಆಳ್ವಾನ್ ಉಂಚ್ಲೆಂ ಶಿಕಪ್ ಜೊಡ್ಲಾಂ, ಉದ್ಯಮಾಂತ್ ಯಶಸ್ವೀ ಜಾಲಾ. ತಾಚಿ ಪತಿಣ್ ಕನ್ಸೆಪ್ಟಾ ಬಾಯ್ ಆಜ್ ಆಕಾಶವಾಣಿಂತ್ ಗಜೆಟೆಡ್ ಅಧಿಕಾರಿ. ತಿಣೆಂ ನಿರ್ಮಾಣ್ ಕೆಲ್ಲ್ಯಾ ರೇಡಿಯೊ ರೂಪಕಾಂಕ್ ರಾಶ್ಟ್ರೀಯ್ ಪ್ರಶಸ್ತಿ ಕಿತ್ಲ್ಯಾಗೀ ವರ್ಸಾಂ ಆದಿಂಚ್ ಮೆಳ್ಳ್ಯಾ.
ಹಾಂವೆಂ ಕೊಂಕ್ಣೆಂತ್ ಬರೊಂವ್ಕ್ ಧರ್‌ಲ್ಲೆಂ ಎಚ್. ಆರ್. ಆಳ್ವಾನ್ ಸುರು ಕೆಲ್ಲ್ಯಾ ಐಸಿವೈಎಮ್ಮಾಚ್ಯಾ ‘ಯುವಕ್’ ಪತ್ರಾಥಾವ್ನ್. ಮ್ಹಜೆಬರಿ ‘ಯುವಕ್’ ಪತ್ರಾಥಾವ್ನ್ ಹುಮೆದ್ ಜೋಡ್ನ್ ಬರೊಂವ್ಕ್ ಧರ್‌ಲ್ಲೆ ಆಜ್ ಕೊಂಕ್ಣೆಂತ್ ಆನಿ ಹೆರ್ ಭಾಸಾಂನಿ ಸಾಹಿತಿ, ಪತ್ರಕರ್ತ್ ಜಾಲ್ಯಾತ್. ಕಿತ್ಲೆಶೆ ಜಣ್ ಸರ್ಕಾರಿ ಅಧಿಕಾರಿ ಜಾಲ್ಯಾತ್. ದಾಕ್ತೆರ್ ಜಾಲ್ಯಾತ್. ವಿದೇಶಾಂನಿ ಉಂಚ್ಲ್ಯಾ ಹುದ್ದ್ಯಾಂಕ್ ಪಾವ್ಲ್ಯಾತ್. ಉಪ್ರಾಂತ್ ತೆಂ ಪತ್ರ್ ‘ಆಮ್ಚೊ ಯುವಕ್’ ಮ್ಹಳ್ಳ್ಯಾ ನಾಂವಾರ್ ನೋಂದಾಯಿತ್ ಜಾಲೆಂ. ಜಾಯ್ತಿಂ ವರ್ಸಾಂ ಫಾಯ್ಸ್ ಜಾಲೆಂ, ತೆಂಯ್ ಬ್ಲ್ಯಾಕ್ ಆನಿ ವೈಟ್ ಲೆಟರ್‌ಪ್ರೆಸ್ ಜಮಾನಾಂತ್. ಆಜ್ ವಕೀಲ್, ಪ್ರೊಫೆಸರ್ ಹುದ್ದೆದಾರ್ ಮ್ಹಣ್ ಬಡಾಯ್ ಉಲಯ್ತಲ್ಯಾಂಕ್ ಕನಿಶ್ಟ್ ‘ಆಮ್ಚೊ ಯುವಕ್’ ಪತ್ರಾಚಿ ಆರ್‌ಎನ್‌ಐ ನೊಂದಾವ್ಣಿ ಉರೊವ್ನ್ ಘೆಂವ್ಕ್ ಜಾಂವ್ಕ್ ನಾ. ತರ್ ಹೆ ವಕೀಲ್, ಫ್ರೊಫೆಸರ್ ಸಗ್ಳೆ ಖಂಯ್ಚ್ಯಾ ಪುರುಶಾರ್ಥಾಕ್? ಫಕತ್ ಕೋಟ್ ಘಾಲ್ನ್ ವೆದಿರ್ ಬಸೊಂಕ್? ಆನಿ ಬಿಸ್ಪಾಕರ‍್ನಾ ಝೆಲೆ ಘಾಲ್ನ್ ಘೆಂವ್ಕ್? ಪತ್ರಾಚಿ ನೊಂದಾವ್ಣಿ ಫಕತ್ ಏಕ್ ಗಜಾಲ್ ಮಾತ್ರ್. ಅಸಲ್ಯೊ ಹಜಾರ್ ಸಂಗ್ತಿ ಆಸಾತ್. ಆಜ್ ಐಸಿವೈಎಮ್ ಮ್ಹಳ್ಯಾರ್ ವಕೀಲ್, ದಾಕ್ತೆರ್, ಫ್ರೊಫೆಸರ್ ಹುದ್ದೆದಾರ್ ಮ್ಹಣ್ ಬಡಾಯ್ ಉಲಯ್ತಲ್ಯಾಂಕ್ ತಾಚಿ ಖಬರ್ ಆಸ್ಚಿ ನಾ.
ಆಮ್ಚಿ ಸಮಾಜ್ ಆಜ್ ಇತ್ಲೆ ಸಂಕಶ್ಟ್ ಫುಡ್ ಕರುನ್ ಆಸಾ, ಸಂಘಟನಾಚ್ಯಾ ಶಿಕ್ಪಿ ಹುದ್ದೆದಾರಾಂಕ್ ಉಗ್ತ್ಯಾನ್ ಎಕ್ ಸ್ಟೇಟ್‌ಮೆಂಟ್ ದಿಂವ್ಚಿ ತಾಂಕ್ ಆಸಾಗೀ? ಉಲಯ್ಜೆ ಜಾಲ್ಯಾರ್ ಪರ‍್ತ್ಯಾನ್ ತಾಂಕಾ ಐವನ್ ಜಾಯ್ ವಾ ಆನಿ ಕೋಣ್ ಜಾಯ್. ಚರ್ಚ್ ಎಟ್ಯಾಕ್ ಜಾಲ್ಲೆ ತವಳ್ ಉಲಂವ್ಕ್ ಕೆ. ಎಲ್. ಅಶೋಕ್, ಜಿ. ರಾಜಶೇಖರ್ ತಸಲ್ಯಾಂನಿ ಸಮುದಾಯಾಚ್ಯಾ ಕುಮ್ಕೆಕ್ ಯೇಜೆ ಪಡ್ಲೆಂ. ವಕೀಲ್, ದಾಕ್ತೆರ್, ಫ್ರೊಫೆಸರ್ ಹುದ್ದೆದಾರಾಂಚ್ಯಾ ಹ್ಯಾ ಸಂಘಟನಾಕ್ ಆಜ್‌ಯೀ ಏಕ್ ಸರ್ವಜಣಿಕ್ ಪ್ರತಿಭಟನ್ ಆಯೋಜನ್ ಕರ‍್ಚೆಂ ಧಯ್ರ್ ಆಸಾಗೀ? ಪಾಟ್ಲ್ಯಾ ದಿಸಾಂನಿ ಮತಾಂತರ್ ನಿಶೇದ್ ಕಾಯ್ದೊ ಯೆತಾ ಮ್ಹಣ್ತಾನಾ ಪ್ರತಿಭಟನ್ ಕರುಂಕ್ ವಿದ್ಯಾ ದಿನಕರ್ ಆನಿ ಶಬ್ಬೀರಾನ್ ಮುಕೆಲ್ಪಣ್ ಘೆಜೆ ಪಡ್ಲೆಂ. ಆಮ್ಚ್ಯಾ ಸಮುದಾಯಾಚಿ ಗತ್ ಪಳಯಾ – ತವಳ್‌ಯೀ ಉಲಂವ್ಕ್ ಮನಿಸ್ ನಾತ್ಲೆ, ಆಜ್‌ಯೀ ನಾಂತ್! ವಕೀಲ್, ಫ್ರೊಫೆಸರ್, ದೊತೊರ್ ಖಂಯ್ ಗೆಲೆ ? ಥಂಯ್ಸರ್ ಪಾವ್‌ಲ್ಲ್ಯಾ ದಿಯೆಸೆಜಿಚ್ಯಾ ಲಾಯಿಕ್ ಪಿ.ಆರ್.ಒ ಪರ್ಮಾಣೆ 90 % ಸಿಸ್ಟರಾಂ ಪ್ರತಿಭಟನಾಕ್ ಹಾಜರ್ ಆಸ್ಲಿಂ. ತಾಂತುಯ್ 90% ಬೋವ್ಶಾ ಕೇರಳಾಚಿಂ ಆಸ್ತೆಲಿಂ. ಲಾಯಿಕ್ ಪಿ.ಆರ್.ಒ ನ್ ಖಾಸ್ಕೆನ್ ಸಿಸ್ಟರಾಂಚೆಂ ಧಯ್ರ್ ವಾಖಣ್ಲೆಂ. ತಾಳಿಯೊ ವಾಜಯ್ಲ್ಯೊ. ಪುಣ್ ಆಪುಣ್ ದಿಯೆಸೆಜಿಚೊ ಅಧಿಕೃತ್ ಪಿ. ಆರ್.ಒ ಜಾವ್ನ್ ಆಯ್ಲಾಂ ಮ್ಹಣ್ಚೆಂ ಧಯ್ರ್ ತಾಕಾಯ್ ನಾತ್ಲೆಂ. [ಹಾಂಗಾಸರ್ ದಿಲ್ಲೊ ವಿಡಿಯೊ ಪಳಯಾ]
ಹ್ಯಾ ತುಲನಾಂತ್ ಹೆರ್ ಸಮುದಯಾಚ್ಯಾ ಲೊಕಾನ್ ಜಿಲ್ಲಾಧಿಕಾರಿ ದಫ್ತರಾ ಮುಕಾರ್ ಕರ್ಚಿಂ ಪ್ರತಿಭಟನ್ ಪಳಯಾ, ಹಿಂಡ್ ಬಾಂದುನ್ ತರ್ನಾಟೆ – -ತರ್ನಾಟಿಂ ಯೆತಾತ್. ಇತ್ಲೆಂ ಮಾತ್ ನಯ್, ಸೊಮಿ ಖುದ್ ಬಾವ್ಟೊ ಘೆವ್ನ್ ಮುಕ್ಲ್ಯಾ ಫಂಗ್ತಿರ್ ಉಭೆ ರಾವ್ತಾತ್. ಆಮ್ಚೆ ಗೊವ್ಳಿ ? ತೆ ಲೊಕಾಕ್ ವಾತಿ ಪೆಟವ್ನ್ ವಾಟೆದೆಗೆರ್ ಸರ್ಪಳಿ ಕರ್ನ್ ಪ್ರತಿರೋಧ್ ದಾಖಯಾ ಮ್ಹಣ್ ಉಲೊ ದಿತಾತ್. ಸರ್ಪಳೆ ದಿಸಾ ತೆ ದಿಸಾನಾಂತ್!
ಆಸುಂ, ಆತಾಂ ಆಮ್ಚ್ಯಾ ಸಂಘಟನಾಂತ್ಲ್ಯಾ ಕಿತ್ಲ್ಯಾ ಫ್ರೊಫೆಸರಾಂನಿ ಮುಕೇಲ್ ವ್ಹಾಳಾಚ್ಯಾ ಮಿಡಿಯಾಂತ್ ಏಕ್ ಲೇಖನ್ ಬರಯಿಲ್ಲೆಂ, ಚ್ಯಾನೆಲಾಚ್ಯಾ ಪ್ಯಾನಲ್ ಡಿಸ್ಕಶನಾಂಕ್ ಗೆಲ್ಲೆಂ ಆಸಾ? ಎಕ್ಲ್ಯಾಕ್ ತರೀ ಸಮಾಜಿಕ್ ಬದ್ದತೆನ್ ಉಲೊಂವ್ಚಿ ತಾಂಕ್ ಆಸಾಗೀ? ಎಕಾ ತರೀ ವಕೀಲಾನ್ ಆಯ್ಲೆವಾರ್ ಕ್ರಿಸ್ತಾಂವ್ ಸಮಾಜೆಕ್ ಸಂಚಿಕಾರ್ ಜಶೆಂ ಉದೆವ್ನ್ ಆಯಿಲ್ಲ್ಯಾ ಮತಾಂತರ್ ಕಾಯ್ದ್ಯಾಚಿ ಸ್ಟಡಿ ಕೆಲ್ಯಾಗೀ? ಹ್ಯಾ ಕಾನೂನಾಥಾವ್ನ್ ಜಾವ್ಯೆತ್ ಜಾಲ್ಲ್ಯಾ ಸಂವಿಧಾನಿಕ್ ಹಕ್ಕಾಂಚ್ಯಾ ಉಲ್ಲಂಘನಾ ವಿಶ್ಯಾಂತ್ ಉಂಚ್ಲ್ಯಾ ಕೊಡ್ತಿಂನಿ ಸವಾಲ್ ಉಟೊಂವ್ಚಿ ತಯಾರಿ ಕೆಲ್ಯಾಗೀ?
ಆಜ್ ಸೋಶಿಯಲ್ ಮೀಡಿಯಾ ಆಸಾ, ಸ್ಮಾರ್ಟ್ ಫೊನಾಂ ಆಸಾತ್. ಅಸಲೆಂ ಕಸಲೆಂಚ್ ನಾತ್‌ಲ್ಲ್ಯಾ ಕಾಳಾರ್ ಆತಾಂ ಚಿಕಾಗೊಂತ್ ಆಸ್ಚ್ಯಾ ದೊ| ಓಸ್ಟಿನ್ ಡಿಸೋಜಾ ಪ್ರಭುನ್ ತ್ಯಾಗಿ ಮಸೂದಾವಿರೋಧ್ ಮಂಗ್ಳುರಾಂತ್ ಐತಿಹಾಸಿಕ್ ಬ್ರಹತ್ ಪ್ರತಿಭಟನ್ ಕೆಲ್ಲೆಂ. (ಹಾಂಗಸರ್ ದಿಲ್ಲೊ ಫೇಸ್ ಬುಕ್ ಪೋಸ್ಟ್ ಪಳಯಾ)
ಆಜ್ ತಾಂತ್ರಿಕತಾ, ಸಂಪರ್ಕ್ ಮಾದ್ಯಮಾಂ ಇತ್ಲಿಂ ವಾಡ್ಲ್ಯಾಂತ್ ತರೀ, ತವಳ್ ಜಮೊ ಕೆಲ್ಲ್ಯಾ ಜಮ್ಯಾಚ್ಯಾ ಧಾಂತ್ ಏಕ್ ವಾಂಟೊ ಸರ್ವಜಣಿಕ್ ಪ್ರತಿಭಟನಾಕ್ ಜಮೊ ಕರುಂಕ್ ಆಯ್ಚ್ಯಾ ವಕೀಲ್, ಫ್ರೊಫೆಸರ್, ದಾಕ್ತೆರ್ ಹುದ್ದೆದಾರಾಂಕ್ ಸಾಧ್ ಆಸಾಗೀ?
ಆಜ್ ಉಲಯಿಲ್ಲೆಂ ಸಗ್ಳೆಂಯ್ ರೆಕೋರ್ಡ್ ಜಾವ್ನ್, ರೆಕೋರ್ಡ್ ಜಾಲ್ಲೆಂ ಸಗ್ಳೆಂ ವೈರಲ್ ಜಾಂವ್ಚ್ಯಾ ಕಾಳಾರ್ ಉಲೊಂವ್ಕ್ ಉತ್ರಾಂ ವಿಂಚ್ಚೆಪಯ್ಲೆಂ ದೊಡ್ತಿ ಜಾಗ್ರುತ್ಕಾಯ್ ಸಾಂಬಾಳಿಜೆ ಪಡ್ತಾ. ಸಮಡ್ತಿಚ್ಯಾ ವ್ಹಡಿಲಾಂನಿ ತಿದೊಡಿ ಜಾಗ್ರುತ್ಕಾಯ್ ಸಾಂಬಾಳಿಜೆ ಪಡ್ತಾ.
ಬಿಸ್ಪಾನ್ ಸಾಂಗ್ಚ್ಯಾಂತ್ ಕಾಂಯ್ ಇಲ್ಲೆಂ ಸತ್ ಆಸೊಂಕ್ ಪುರೊ, ಪೂಣ್ ತವಳ್ಚೊ ಕಾಳ್ ತಸೊಚ್ ಆಸ್ಲೊ. ಎಚ್ ಆರ್. ಆಳ್ವ, ಡಯಾನ್, ಐವನ್ ತಸಲೆ ಮುಕೆಲಿ ಐಸಿವೈಎಮ್ಮಾಂತ್ ಆಸ್‌ಲ್ಲೆ. ಹಾಂವ್‌ಯ್ ತ್ಯಾಚ್ ಕಾಳಾಚೊ. ಮಂಗ್ಳುರ್ಚೊ ಫಾಮಾದ್ ವಕೀಲ್ ಮಾನೆಸ್ತ್ ಎಮ್. ಪಿ. ನೊರೊನ್ಹಾ ( ಪ್ರಸ್ತುತ್ ದಿಯೆಸೆಜಿಚೋಯ್ ವಕೀಲ್), ತಾಚೊ ಭಾವ್ ಸುಶೀಲ್ ನೊರೊನ್ಹಾ ( ಪ್ರಸ್ತುತ್ ಜೆ.ಡಿ.ಎಸ್. ಪಾಡ್ತಿಂತ್ ಉಂಚ್ಲೊ ಹುದ್ದೆದಾರ್) ಆನಿ ಹೆರ್ ಆಮ್ಕಾಂ ಸೀನಿಯರ್. ಮಂಗ್ಳುರ್ ದಿಯೆಸೆಜಿಂತ್ ತವಳ್ ಕಿತ್ಲ್ಯೊ ಯುನಿವರ್ಸಿಟಿ ಆಸ್‌ಲ್ಲ್ಯೊ? ಕಿತ್ಲ್ಯೊ ಕಾನೂನ್ ಕೊಲೆಜಿ ಆಸ್‌ಲ್ಲ್ಯೊ? ಕಿತ್ಲ್ಯೊ ಮೆಡಿಕಲ್ ಕೊಲೆಜಿ ಆಸ್‌ಲ್ಲ್ಯೊ? ಆಮ್ಚ್ಯಾ ಆವಯ್-ಬಾಪಯ್ಕ್ ಆಮ್ಕಾಂ ಉಂಚ್ಲೆಂ ಶಿಕಪ್ ದಿಂವ್ಚಿ ತಾಂಕ್ ಆಸ್‌ಲ್ಲಿಗೀ?
ತರೀ ತಾಣಿಂ ಆಮ್ಕಾಂ ಶಿಕಯ್ಲಾಂ. ಥೊಡೆ ಕಾಮ್ ಕರ‍್ತಾನಾ ಶಿಕ್ಲ್ಯಾತ್. ಆಜ್ ಕರಾವಳೆಂತ್ ಮೆಟಾ ಮೆಟಾಕ್ ಇಂಜಿನಿಯರಿಂಗ್ ಕೊಲೆಜಿ, ಮೆಡಿಕಲ್ ಕೊಲೆಜಿ ಆಸಾತ್. ಹರ‍್ಯೆಕೆ ಕೊಲೆಜಿಂತ್ ಪಿ.ಜಿ. ಸೆಂಟರಾಂ ಆಸಾತ್. ಶಿರ್ವಾಂ ತಸಲ್ಯಾ ಗಾಂವಾಂತ್ ಸಯ್ತ್ ಸ್ನಾತಕೋತ್ತರ್ ಶಿಕಪ್ ಮೆಳ್ತಾ. ಶಿರ್ವಾಂ ಥಾವ್ನ್ ಇಲ್ಲೆಂ ಮುಕಾರ್ ಬಂಟಕಲ್ಲಾಂತ್ ಮೊಠಾಚಿ ಇಂಜಿನಿಯರಿಂಗ್ ಕೊಲೆಜ್ ಆಸಾ. ನಿಟ್ಟೆಂತ್ ಇಂಜಿನಿಯರಿಂಗ್ ಕೊಲೆಜ್ ಆಸಾ. ಪೂಣ್ ದಿಯೆಸೆಜಿಕ್ ಗ್ರಾಮೀಣ್ ಪ್ರದೇಶಾಂತ್ ಏಕ್ ಉಂಚ್ಲ್ಯಾ ಶಿಕ್ಪಾ ಸಂಸ್ಥೊ ಉಬಾರುಂಕ್ ಜಾಂವ್ಕ್ ನಾ. ಶಹರಾಂನಿ ಸಗ್ಳೆ ಶಿಕ್ಪಾ ಸಂಸ್ಥೆ ಉಭೆ ಕರ್ತಾತ್. ಗ್ರಾಮೀಣ್ ಭುರ್ಗ್ಯಾಂಚಿಂ ಗತ್ ಕಿತೆಂ? ಆಮ್ಚ್ಯಾ ಕಾಳಾರ್ ಸ್ನಾತಕೋತ್ತರ್ ಶಿಕ್ಪಾಕ್ ಮಂಗ್ಳುರ್ ಯುನಿವರ್ಸಿಟಿ ಸೊಡ್ಲ್ಯಾರ್ ದುಸ್ರಿ ವಾಟ್‌ಚ್ ನಾತ್ಲಿ. ಉಡುಪಿಂತ್ ಸಯ್ತ್ ಪಿ.ಜಿ. ಸೆಂಟರ್ ನಾತ್ಲೆಂ. ಆತಾಂ, ಖುದ್ ಪಾದ್ರಿ ಆನಿ ಸಿಸ್ಟರಾಂ ವಕೀಲ್ ಆಸೊನ್‌ಯೀ ಇತ್ಲ್ಯಾ ವರ‍್ಸಾಂನಿ ಏಕ್ ಕಾನೂನ್ ಕೊಲೆಜ್ ಸುರು ಕರುಂಕ್ ಎದ್ಯೆ ವ್ಹಡ್ ದಿಯೆಸೆಜಿಕ್ ಸಾಧ್ ಜಾಲೆಂಗೀ? ತರ್ ಹೆ ಉಪದೆಸ್ ಕೊಣಾಕ್?
ಹಾಂವ್ ವಿದ್ಯಾರ್ಥಿ ಸಂಘಟನಾಂತ್ ಆಸ್ತಾನಾ ಕಾಮ್ರೆಡ್ ಕೆ. ಆರ್. ಶ್ರೀಯಾನಾನ್ ಮ್ಹಳ್ಳೆಂ ಏಕ್ ಉತರ್ ಆತಾಂಯ್ ಮ್ಹಾಕಾ ಉಡಾಸ್ ಆಸಾ – ಹೆ ಥೊಡೆ ಮುಕೆಲಿ ಆಸಾತ್ ಪಳೆ, ಬರೀ ಪಾಜೂನ್ ವೊಣದಿಕ್ ಖೊವಯಿಲ್ಲ್ಯೆ ಕೊಯ್ತೆಬರಿ – ಫಕತ್ ಶೋ!
ಐಸಿವೈಮ್- ಅಸಲ್ಯಾ ವಕೀಲ್, ಪ್ರೊಫೆಸರ್, ದೊತೊರಾಂಚಿ ಶೋಕೇಜ್ ಕರಿಜೆ ಮ್ಹಣ್ತಾಗೀ ವ್ಹಡಿಲ್?
► ಎಚ್ಚೆಮ್, ಪೆರ್ನಾಲ್
ಮೊಗಾಳ್ ಎಚ್ಚೆಮ್,
ತುಜೆಂ ವಿಶ್ಲೇಶಣಾತ್ಮಕ್ ಲೇಖನ್ ವಾಚುನ್ ಮ್ಹಾಕಾ ಸಂತಾಪ್ ಉಟ್ಲೊ ತಾಂತುಂಯ್ ಆಮ್ಚ್ಯಾ ಬಿಸ್ಪಾನ್ ಉಲಯಿಲ್ಲಿಂ ಉತ್ರಾಂ ಆಯ್ಕೊನ್! ಏಕಾ ಧಾರ್ಮಿಕ್ ವ್ಹಡಿಲಾನ್ ಆದ್ಲ್ಯಾ ಸಿವೈಎಮ್ ಕಾರ್ಯಕಾರಿ ಸಮಿತಿ ಸಾಂದ್ಯಾಂಕ್ ಹ್ಯಾಪರಿಂ ಉಣ್ಯಾ ಮೊಲಾಚ್ಯಾ ಉತ್ರಾಂನಿ ಹಿಣ್ಸುಂಕ್ ಫಾವೊ ನ್ಹಂಯ್ ಆಸ್ಲೆಂ. ತ್ಯಾ ವೆಳಾರ್ ಆಮಿಂ ಕಿತೆಂ ಸರ್ವ್ ಕೆಲಾಂ ತಿ ಏಕ್ ಚರಿತ್ರಾ. ಆಮ್ಚ್ಯೆ ಮಧೆಂಯ್ ಆಸ್ಲೆ ಯುವ ಉದ್ಯಮಿ, ಪತ್ರ್‌ಕರ್ತ್, ಕಲಾಕಾರ್, ವೃತ್ತಿಪರ್, ವಕೀಲ್, ಇತ್ಯಾದಿ, ಇತ್ಯಾದಿ. ಹಾಂಚೊ ಸರ್ವಾಂಚೊ ಉಗ್ತ್ಯಾನ್ ಮಾನ್ ಕಾಡ್‍ಲ್ಲ್ಯಾ ಬಿಸ್ಪಾನ್ ಖಂಡಿತ್ ಜಾವ್ನ್ ಉಗ್ತ್ಯಾನ್ ಕ್ಷಮಾ ಅಪೇಕ್ಷುಂಚಿ ಗರ್ಜ್ ಆಸಾ. ಉಲಯ್ತಾನಾ ಉತ್ರಾಂ ವಿಂಚುನ್ ಉಲಂವ್ಚಿ ಅತೀ ಗರ್ಜ್ ಆಸಾ. ಮೈಕ್ ಮೆಳ್‍ಲ್ಲೊಚ್ಚ್ ಕಿತೆಂಚ್ ಗುಮಾನ್ ನಾಸ್ತಾಂ ಕೊಣಾಯ್ಕಿ ತೆ ಉಣೆ ಶಿಕ್ಪಿ, ಸಮಾಜೆಂತ್ ಹುದ್ದೆ ನಾಸ್ಲೆ, ವೃತ್ತಿಪರ್ ನ್ಹಂಯ್ ಆಸ್ಲೆ ಮ್ಹಣ್ ಹಿಣ್ಸುಂಚೆಂ ಸಮಾ ನ್ಹಂಯ್.
ಅಸಲ್ಯಾಚ್ಚ್ ಚಿಂತ್ಪಾಂತ್ ಆಸ್ಲೊ ಕೊಣ್ಣಾ ಆದ್ಲೊ ಬಿಸ್ಪ್ ಬಾಜಿಲ್ ಸೊಜ್! ಕಿತ್ಯಾಕ್ ಮ್ಹಳ್ಯಾರ್ ಹಾಂವ್ 6 ವರ್ಸಾಂ ಅವಿಭಾಜಿತ್ ಮಂಗ್ಳುರ್ ದಿಯೆಸೆಜಿಚ್ಯಾ ಕೇಂದ್ರಿಕ್ ಸಮಿತಿಚೊ ಅಧ್ಯಕ್ಷ್ ಆನಿ ಏಕ್ ವರ್ಸ್ ಗೌರವ್ ಅಧ್ಯಕ್ಷ್ ಜಾಂವ್ನಾಸ್ಲೊಂ ತರೀ ಏಕ್‍ಚ್ಚ್ ಏಕ್ ವರ್ಸ್ ಮ್ಹಾಕಾ ತಾಣೆ ಅಂತರಾಷ್ಟ್ರೀಯ್ ಸಮ್ಮೇಳನಾಕ್ ಧಾಡ್‍ಲ್ಲೆಂ ನಾ. ಹೊಯ್ ಏಕಾ ಬಿಸ್ಪಾ ಥಾವ್ನ್ ಅಗೌರವ್ ತ್ಯಾ ಸ್ಥಾನಾಕ್. ಫಕತ್ ಹಾಂವ್ ಅಧ್ಯಕ್ಷ್ ಆಸ್ಲೊಂ ಮ್ಹಣ್ ?
ಬಿಸ್ಪಾಕ್ ಮನವಿ – ತುಜಿಂ ಉತ್ರಾಂ ಪಾಟಿಂ ಕಾಡ್! ತೆನ್ನಾಂಚೆ ಸಭಾರ್ ಆಜೂನ್ ಜಿವಂತ್ ಆಸಾತ್ ಆನಿ ತಾಂಕಾಂ ತುಂವೆಂ ಕರ್ಚೊ ಅಕ್ಮಾನ್ ಸೊಸುಂಕ್ ಜಾಯ್ನಾ.
ಡಾ. ಆಸ್ಟಿನ್ ಪ್ರಭು, ಚಿಕಾಗೊ
Thought full article.Yes we need professional education institutions far from city ,in rural areas. But we cannot blame our religion leadership,they did their best with the cooperation from catholic folks. I think our well educated people who had the might, our rich entrepreneurs who provide work for thousands, they could have taken initiative to start those professional institutions,like Mr Albert w D’Souza who established educational trust at Palghar near Mumbai Maharashtra.There are many persons are there in our Konkani Katholic community . Still opportunities are there they can do and show they are there for our children in future what do you say.
ಸುಪರ್ ಚಿಂತಾಪ್ ಆಟಯ್ಲಾ೦ಯ್ ಎಚ್ ಎಮ್ . ತಾಕೋಡೆ ತಸಲ್ಯಾ ಹಳ್ಳೆ ತಾವ್ನ್ ಮಂಗ್ಳೂರಾಕ್ ಪಾಂವ್ಚೆಂತ್ ಏಕ್ ವಡ್ ಸಾಹಸ್ ಜಾತೆಲೆಂ ಆಮ್ಚೆ ತಸಲ್ಯಾ ಯುವಜಣಾಂಕ್