ಏಕ್ ಘಡಿ ತಾಂಚೆ ದೊಗಾಂಯ್ಚೆ ದೊಳೆ ಎಕಾಮೆಕಾ ಝಗ್ಡೊಂಕ್ ಲಾಗ್ಲೆ.
“ರಿ…ರಿಶಭ್…!”…ಗಾಗೆಲೊ ಕ್ಲೈವ್…
ಆಪ್ಲ್ಯಾ ಮುಕಾರ್ ಎಕಾ ದೊಳ್ಯಾಚೊ ರಿಶಭ್ ಉಬೊ ಆಸ್ ಲ್ಲೊ ಪಳೆವ್ನ್.
‘ಯೆದೊಳ್ ಹೊ ವಿದ್ರೂಪ್ ರಾಕ್ಕೊಸ್…ರಸ್ತ್ಯಾರ್ ಭಂವಾತ್ತ್ ಆಸ್ಲ್ಲೊ. ಆನಿ ಆತಾಂ … ಎಸಿಡಾನ್ ದೊಳೊ ಕೊಂಕುನ್ ಗೆಲ್ಲೊ … ಹೊ ಎಕಾ ದೊಳ್ಯಾಚೊ … ರಿಶಭ್ … ಬೊಂಗ್ಲ್ಯಾಂತ್ಲ್ಯಾ ಆಪ್ಣಾಚಾ ಮಾಳಿಯೆ ರುಮಾಂತ್ … ಆಪ್ಣಾ ಮುಕಾರ್‌ಚ್ಚ್ ಉಭೊ ಆಸಾ.!’. ಹೆಂ ಸಗ್ಳೆಂ ಮತಿಂ ಘುಂವೊನ್ ಆಸ್ತಾಂ…
ರಿಶಭಾಚ್ಯಾ ವಿದ್ರೂಪ್ ಎಸಿಡ್ ಘಾಯಾಂಚ್ಯಾ ದೊಳ್ಯಾಂತ್ಲಿಂ ಕ್ರೂರ್ ಕಿರ್ಣಾಂ…ಹಾಚ್ಯಾ ಕಾಳ್ಜಾಚ್ಯಾ ಶಿರಾಂಚೆರ್ ಧಾಡ್ ಘಾಲುಂಕ್ ಲಾಗ್ಲಿಂ.
ಹ್ಯಾಘಡ್ಯೆ…‘ಕಿತೆಂ?!…ಕಸಲೆಂ?!’ ಮ್ಹಣ್ ಕ್ಲೈವ್ ಬಾರೀಕಾಯೆನ್ ಕಾಂಪಾತ್ತ್ ಆಸ್ತಾಂ…
ಧೆಧೆಸ್ಪರಾಚ್ಯಾ ಕಠಿಣ್ ವಿರಾರಾಯೆಚ್ಯಾ ಕ್ರೋಧಾರ್ ಆಸ್ಲೆಲ್ಲ್ಯಾ ರಿಶಭಾನ್…ಕಸಲ್ಲೊಚ್ಚ್ ಸಭ್ಧ್ ಕಾಡ್ಲೊನಾಂ. ಬಗಾರ್ ತೊ ಕ್ಲೈವಾಚ್ಯಾ ಖಟ್ಲ್ಯಾ ಸರ್ಶಿಂ ಆಸ್ಲೆಲ್ಯಾ ವೀಲ್ ಚೇರಾಸರ್ಶಿಂ ಗೆಲೊ. ಆನಿ ತೆಂ ವೀಲ್ ಚೇರ್ ಖಟ್ಲ್ಯಾ ಸರ್ಶಿಲೆಂ ಥಾವ್ನ್ ವಿಂಗಡ್ ಕರುನ್ ಜನೆಲಾ ಸರ್ಶಿಂ ವ್ಹೆಲೆಂ.
ಹ್ಯಾವೆಳಾ ಕ್ಲೈವಾಕ್…ರಿಶಭಾನ್ ಆಪ್ಣಾಚ್ಯಾ ವೀಲ್ ಚೇರಾಚೊ ತೊ ಆಧಾರ್ ಚುಕೈಲೊಲೊ ಪಳೆತಾನಾಂ…ಸಟ್ಟ್ ಕರುನ್ ‘ಆಪ್ಣಾಕ್ ಕಸೆಲೆಂಗೀ ಅನಾಹುತ್ ರಾಕೊನ್ ಆಸಾ!’ ಮ್ಹಳ್ಳೆಂ ಮತಿಕ್ ಆಪ್ಟಾಲೆಂ!.
ಹ್ಯಾವೆಳಾ ರಿಶಭಾಚಿ ಘಂಭೀರ್ ಮೌನತಾ ಆನಿ ತಾಚೆಂ ತೆಂ ಭೆಂ ಉಟಂವ್ಚೆಂ ವರ್ತನ್…ಆಪ್ಲ್ಯಾ ರುಂದಾಲ್ಲ್ಯಾ ದೊಳ್ಯಾಂನಿ ಪಳೆತ್ತ್ ಆಸ್ತಾಸ್ತಾಂ…ರಿಶಭ್ ಸವ್ಕಾಸ್ ಕುಡಾ ಥಾವ್ನ್ ಭಾಯ್ರ್ ಗೆಲೊ.
ಹೆಂ ದೆಕ್‌ಲ್ಲೆಂಚ್ಚ್ ಕ್ಲೈವ್…‘ಆತಾಂ ಜಾಲ್ಲೆಂ ಜಾತಾ. ಹೊ ಆವ್ಕಾಸ್ ಸೊಡ್ಚೊ ನ್ಹಂಯ್. ಧರ್ನಿರ್ ಲೊಳುನ್ ತರೀ ಅಪಾಯ್ ಚುಕವ್ನ್ ಭಾಯ್ರ್ ಪಡ್ಯಾಂ…ಆನಿ ರಿಶಭಾ ಥಾವ್ನ್ ಸುಟ್ಕಾ ಜೊಡ್ಯಾಂ’ ಮ್ಹಳ್ಳ್ಯಾ ಚಿಂತ್ನಾಂನಿಂ ಮಾತ್ಸೆಂ ಚುರುಕ್ ಜಾಲೊ.
ಆನಿ ಖಟ್ಲ್ಯಾರ್ ಥಾವ್ನ್ ದೆಂವೊಂಕ್ ಉರ್ಡಾಲಾಗ್ಲೊ. ತಿತ್ಲೆಂಚ್ಚ್ ತೊ ಜಾಣಾಂ…ತವಳ್‌ಚ್ಚ್ ದುಬಾವೆರ್ ಆಸ್ಚೊ ರಿಶಭ್…ಸಟ್ಟ್ ಕರುನ್ ಭಿತರ್ ಆಯ್ಲೊ.
“ಕಿತೆಂ?… ಮ್ಹಜೆ ಥಾವ್ನ್ ಚುಕೊವ್ನ್ ಘೆಂವ್ಕ್ ಪಳೆತಾಯ್?. ತಶೆಂ ತರ್ ತೆನ್ನಾಂ…ಮ್ಹಜ್ಯಾ ರಿವಾಲ್ವರಾಂತ್ಲೆ ಗುಳೆ…ತುಜ್ಯಾ ಹರ್ದ್ಯಾಂತ್ಲ್ಯಾ ಧಯ್ರಾಕ್ ಭೆಸಾಂ ಭೆಸಾಂ ಕರುನ್ ಚಿರ್ತೆಲೆ.”
ಹೆಂ ಆಯ್ಕಾಲ್ಲೆಂಚ್ಚ್ ಯೆದೊಳ್‌ಚ್ಚ್ ಭಿರಾಂತೆನ್ ಕಂಗಾಲ್ ಜಾಲ್ಲೊ ಕ್ಲೈವ್…ಘಡ್ಯೆನ್ ಸ್ಥಭ್ಧ್ ಜಾಲೊ.
ನೀಜ್ ತರ್ ತ್ಯಾ ಘಡ್ಯೆ…‘ಆಪ್ಣಾಂ ಲಾಗಿಂ ರಿವಾಲ್ವರ್ ಆಸಾ ಮ್ಹಣ್ ರಿಶಭಾನ್ ಉಚಾರ್ಲೆಲಿ ಫಟ್’ ಯಶಸ್ವೀ ಜಾಲ್ಲಿ. ರಿವಾಲ್ವಾರಾಚ್ಯಾ ಭಿರಾಂತೆನ್ ಕ್ಲೈವಾಕ್…ನಿಶ್ಕ್ರೀಯ್ ಕೆಲ್ಲೆಂ.
ಹೆಂ ಪಾರ್ಕಿಲ್ಲೆಂಚ್ಚ್…ರಿಶಭ್ ಪರತ್ ಕುಡಾ ಥಾವ್ನ್ ಭಾಯ್ರ್ ವೆಚೆಂ ಧಯ್ರ್ ಆರಾಯ್ಲೆಂ. ಆನಿ ಕುಡಾಂತ್ಲೊ ಭಾಯ್ರ್ ಗೆಲೊ.
ತಾಚೆಂ ತೆಂ ವರ್ತನ್ ಪಳೆತಾನಾಂ…‘ಮುಕಾರ್ ಆಪ್ಣಾಕ್ ಕಿತೆಂ ರಾಕೊನ್ ಆಸಾ?!’ ಮ್ಹಳ್ಯಾ ಭಿರಾಂತೆರ್ ಕ್ಲೈವ್ ಚಡ್ಪಡೊಂಕ್ ಲಾಗ್ಲೊ. ಅಶೆಂ ಆಸ್ತಾಂ…ಉಪ್ರಾಂತ್ಲ್ಯಾ ಥೊಡ್ಯಾವೆಳಾನ್… ರಿಶಭ್…ಕಸಲೆಂಗೀ ಜಡಾಯೆಚಿ ಲೊಂಕ್ಡಾ ವಸ್ತ್ ವೋಡ್ನ್ ಹಾಡ್ಚೊ ಆವಾಜ್ ಕ್ಲೈವಾಚ್ಯಾ ಕಾನಾಂಕ್ ಮಾರ್ಲೊ.!. ಹೆಂ ಆಯ್ಕಾತಾಂ…
ಕ್ಲೈವಾಚಿ ಭಿರಾಂತ್ ದೊಡ್ತಿ ಜಾಲಿ. ಹ್ಯಾ ವೆಳಾ ತಾಚೆ ರುಂದಾಲ್ಲೆ ದೊಳೆ ತ್ಯಾ ಆವಾಜಾ ತೆವ್ಶಿನ್ ಖಂಚುನ್ ರಾವ್ಲೆ. ತವಳ್ ಚ್ಚ್ ಬಾಗ್ಲಾ ಲಾಗಿಂ…
ರಿಶಭಾಚೊ ತಾಳೊ ತಾಕಾ ಆಯ್ಕಾಲೊ…
“ಹಾಂವ್ ಉಜ್ಯಾಕ್… ಉಜ್ಯಾನ್‌ಚ್ಚ್ ಫಾರಿಕ್ಪಣ್ ದೀಂವ್ಕ್ ಆಯ್ಲಾಂ.!” ಆನಿ ಉತ್ರಾಂ ಬರಾಬರ್ ತೊ ರುಮಾ ಭಿತರ್ ರಿಗ್ಲೊ. ಹ್ಯಾವೆಳಾ…
ತಾಣೆಂ ಧರ್ನಿರ್ ವೋಡ್ನ್ ಹಾಡ್ಚಿ ವಸ್ತ್ ಪಳೆತಾಂ…ಕ್ಲೈವ್ ಎಕಾಚ್ಚಾಣೆಂ ಧಿಘ್ಭ್ರಾಂತ್ ಜಾಲೊ!.
‘ಗ್ಯಾಸಾಚೊ ಹಾಂಡೊ.’!.
“ಮೈ ಗಾಡ್!…” ಉಧ್ಗಾರ್ಲೊ ಕ್ಲೈವ್…ಆಪ್ಣಾ ಮುಕಾರ್… ‘ಆಪ್ಣಾಚೆಂ ಮರಣ್ ಸಾಂಕೇತಿಕ್ ರುಪಾನ್ ಉಬೆಂ ಆಸ್ಲೆಲೆಂ’…ಪಳೆವ್ನ್!. ಆನಿ…
“ರಿ…ರಿಶಭ್ ಪ್ಲೀಜ್…ಮಾಕಾ ಮಾಫ್ ಕರ್…ಮಾಕಾ ಮಾಫ್ ಕರ್ ರಿಶಭ್…ಪ್ಲೀಜ್ ತಶೆಂ ಕರಿನಾಕಾ”…ಬೊಬಾಟಿಲಾಗ್ಲೊ ಕ್ಲೈವ್.
“ಮಾಫ್?…ತುಜ್ಯಾ ಧಾರುಣ್ ಕಾಳ್ಜಾನ್ ಆಧಾರ್ಲೆಲ್ಯಾ ಭಯಾನಕ್ ಕರ್ನ್ಯಾನ್…ತುಕಾ ಮಾಫ್ ಕರ್ಚೆಂ…ತುಜ್ಯಾ ಬಿರ್ಮೊತೆ ವಿನಂತೆಕ್ ಕಾನ್ ದಿಂವ್ಚೆಂ ಹೆಂ ಸರ್ವ್ ಮಾಜ್ವಾಶೆಂ ಕೆಲಾಂ. ತುಂ ತುಜ್ಯಾ ಪಾತ್ಕಾ ಖಾತಿರ್… ದೆವಾಲಾಗಿಂ ಮಾಫ್ ಮಾಗ್.
ಹಾಂವ್ ಯೆದೊಳ್‌ಚ್ಚ್…ತುಜ್ಯಾಕೀ ಭಯಾನಕ್ ಫಾರಿಕ್ಪಣ್ ಆಧಾರುಂಕ್‌ಚ್ಚ್ ಮ್ಹಣ್ ಆಯ್ಲಾಂ.!.”
“ನಾಂ ಪ್ಲೀಜ್ ರಿಶಭ್…ಪ್ಲೀಜ್…”
“ನಾಂ ಕ್ಲೈವ್…ತುಂವೆಂ ಮ್ಹಜ್ಯಾ ಕ್ಲೋಡಿಯಾಕ್ ಮ್ಹಜೆ ಥಾವ್ನ್ ಅಪಹರ್ಸಿಲೆಂಯ್. ಅಪಹರ್ಸಿಲೆಂ ತರೀ ಜಾಲೆಂ. ಆಜ್ ಎಕಾಎಕಿ ತಾಕಾ ಹುಲ್ಪಾಯ್ಲೆಂಯ್.!. ದೊಳ್ಯಾಂತ್ ರಗಾತ್ ನಾತ್ಲೆಲ್ಯಾ ಫಡ್ಪಶ್ಯಾ…ಏಕ್‌ಚ್ಚ್ ಏಕ್ ದೀಸ್ ತುಂ ಸೈರಣ್ ಘೆತೊಯ್ ನ್ಹಂಯ್.
‘ಕ್ಲೊಡಿಯಾಚಿ…ವಾಸ್ತವಿಕ್ ಗಜಾಲ್ ಕಸಲಿ…ತೆಂ ಅಶೆಂಯೀ ಕಿತ್ಯಾ ಕರುನ್ ಆಸಾ?’ ಮ್ಹಣ್ ಪಾರ್ಕಿತೊಯ್ ನ್ಹಂಯ್…?”
“ಮ್ಹಳ್ಯಾರ್?!…ಕಸಲಿ ಗಜಾಲ್…?” ಮಿಸ್ತೆರಾಕ್ ಸಾಂಪಡ್ಲೊಲೊ ಕ್ಲೈವ್ ಉದ್ಗಾರ್ಲೊ…“ಕಸಲೆಂ ತುಂ ಸಾಂಗುನ್ ಆಸಾಯ್?!”
“ಕ್ಲೋಡಿಯಾ…ತುಜಿ ಲೈಂಗಿಕ್ ಅಸ್ಕತ್ಕಾಯ್ ಸಮಾಜೆ ಥಾವ್ನ್ ಲಿಪೊವ್ನ್ ವ್ಹರ್ಚ್ಯಾ ಪ್ರಕ್ರಿಯೆರ್… ತುಜೆಂ ಪಿಂಪ್ರೆಂ ತಾಚ್ಯಾ ಗರ್ಬಾಂತ್ ಕಿರ್ಲಾಲಾಂ…ಮ್ಹಣ್ ಸಮಾಜೆಕ್ ದಾಕೊಂವ್ಕ್ ಅತ್ರೆಗ್ಲೆಂ. ಆನಿಹ್ಯಾ ಪ್ರಕ್ರಿಯೆ ಖಾತಿರ್ ಯೆದೊಳ್ ಪರ್ಯಾಂತ್ ಆಪ್ಣೆಂ ಜಗವ್ನ್ ದವರ್ಲೆಂಲೆಂ…
ಆಪ್ಲೆಂ ನಿಸ್ಕಳ್‌ಪಣ್ ತಾಣೆಂ ತುಜೆ ಖಾತಿರ್ ಹೊಗ್ಡಾಯ್ಲೆಂ!.”
“ಹೆಂ ಕಿತೆಂ ಮ್ಹಣ್ತಾಯ್?!…ಹಿಗಜಾಲ್ ಹಾಂವ್ ನೆಣಾಂಚ್ಚ್. ಮಾಕಾ ತಾಣೆಂ ಸಾಂಗೊಂಕ್‌ಚ್ಚ್ ನಾಂ!.”…ವಿಜ್ಮಿತೆನ್ ಮದೆಂಚ್ಚ್ ಬಡ್ಬಡ್ಲೊ ಕ್ಲೈವ್.
“ಸಾಂಗ್ ಲ್ಲೆಂ ತರ್…ತಾಣೆಂ ಆಧಾರ್ಲೆಲಿ ‘ತಿ ಕರ್ನಿಂ’ ತುಂ ಪೊಪ್ತೊಯ್?”
ಆತಾಂ ರಿಶಭಾಚ್ಯಾ ಹ್ಯಾ ಜಿರೊಂವ್ಕ್ ಸಖಾನಾತ್ಲೆಲ್ಲ್ಯಾ ಕ್ಲಿಶ್ಟ್ ಸವಾಲಾಕ್…ಜಾಪ್ ಸೊದ್ಚ್ಯಾ ಥಳಾರ್ ಭಂವಾತ್ತ್…
‘ಕ್ಲೋಡಿಯಾವಿಶಿಂ…ಆಪ್ಣೆಂ ಕ್ಲೋಡಿಯಾ ಸಂಗಿ ಜಿಯೆಲೆಲ್ಲ್ಯಾ ಲಗ್ನಾಂ ಜಿವಿತಾಂತ್ಲ್ಯಾ ಘಡಿತಾಂ ವಿಶಿಂ’…ಕ್ಲೈವ್ ಯಾಂತ್ರಿಕ್ ಥರಾನ್ ಚಿಂತುಂಕ್ ಪಡ್ಲೊ.
ಅಶೆಂ ಕ್ಲೈವ್ ಆಪ್ಲ್ಯಾ ಲಗ್ನಾ ಜಿವಿತಾಚ್ಯಾ ಚಿಂತ್ನಾಂ ವರ್ತುಲಾಂತ್ ಭಂವಾತ್ತ್ ಆಸ್ತಾಂ…
ತಾಚೆ ಮುಕಾರ್ ಉಬೊ ಆಸ್ಚೊ ರಿಶಭ್…
ಮತಿಂತ್ ಚ್ಚ್ ಆಪ್ಣಾಕ್…ಅಗಸ್ಟರಾನ್ ಮೊಬಾಯ್ಲಾರ್ ತಿಳ್ಸಿಲ್ಲೆಂ ತೆಂ ಆಂಗ್ ಶಿರ್ಶಿರಾಂವ್ಚೆಂ ಭಯಾನಕ್ ಘಡಿತಾ ವಿಶಿಂಚ್ಯಾ ಚಿಂತ್ನಾಂ ಭಂವಾರಿ ಆಸ್ಲ್ಲೊ…
***
ತ್ಯಾ ರಾತಿಂ…
ನಿಶಭ್ದೆಚ್ಯಾ ನಿರ್ಜನ್ ಘಾಢ್ ಅಂದ್ಕಾರಾಚ್ಯಾ ರಸ್ತ್ಯಾರ್…ಕ್ಲೋಡಿಯಾ ಆಪ್ಲೆಂ ಕಾರ್ ಪಾಟಿಂ ಆಪ್ಲ್ಯಾ ಬೊಂಗ್ಲ್ಯಾ ಕುಶಿನ್ ಡ್ರೈವ್ ಕರುನ್ ಆಸ್‌ಲ್ಲೆಂ.
ಹ್ಯಾವೆಳಾ ಅಗಸ್ಟರ್‌ಯೀ ಗುಪಿತ್ ಥರಾನ್…ತ್ಯಾ ಕಾರಾಚೊ ಪಾಟ್ಲಾವ್ ಕರುನ್ ಆಸ್ಲ್ಲೊ.
ಕ್ಲೋಡಿಯಾ ಡ್ರೈವ್ ಕರುನ್ ಆಸ್ತಾಂ ಆಸ್ತಾಂ…ತೆಂ ಆಪ್ಲ್ಯಾ ಗರ್ಬಾಂತ್ ಜಲ್ಮೊಂಕ್ ಆಸ್ಚ್ಯಾ ಆಪ್ಲ್ಯಾ ಬಾಳಾವಿಶಿಂ ಪುಳಕಿತ್ ಜಾವ್ನ್ ಆನಂದಾಚ್ಯಾ ಲಾರಾಂನಿಂ ಉಪ್ಯೆವ್ನ್ ಆಸ್‌ಲ್ಲೆಂ.
ಅಸಲ್ಯಾವೆಳಾ…ಎಕಾಚ್ಚಾಣೆಂ ರಸ್ತ್ಯಾ ಮಧೆಂಚ್ಚ್ ತಾಣೆಂ ಕಾರಾಚಿ ಬ್ರೇಕ್ ದಾಂಬ್ಲಿ.!.
ಥಂಯ್ಸರ್ ರಸ್ತ್ಯಾ ಮಧೆಂಚ್ಚ್…ಕಾರಾಚ್ಯಾ ಲಾಯ್ಟಾ ಪ್ರಕಾಸಾಂತ್…
ಲಾಂಬ್ ಕೆಸಾಂನಿ ಆಪ್ಲೆಂ ಮುಖಮಳ್ ಲಿಪವ್ನ್ ಆಸ್ಚಿ…ಏಕ್ ವೆಕ್ತಿ ಉಬಿ ಆಸ್ ಲ್ಲಿ.!.
ಹೆಂ ಪಳೆಲ್ಲೆಂಚ್ಚ್…ಪಾಟ್ಲ್ಯಾನ್ ಆಸ್ಚ್ಯಾ ಅಗಸ್ಟರಾಚ್ಯಾ ಬೈಕಾಚಿ ಬ್ರೇಕೀ ಪಡ್ಲಿ. ಆನಿ ಭಿರಾಂತೆ ಮಿಸ್ತೆರಾನ್ ತೊ ಪುಸ್ಪುಸ್ಲೊ …“ಮೆಲ್ಲೆಂ…?!”
ರಸ್ತ್ಯಾ ಮಧೆಂ ಕಾರ್ ಉಬೆಂ ಜಾಲ್ಲೆಂಚ್ಚ್…ರಸ್ತ್ಯಾ ವಯ್ಲಿ ತಿ ನಿಘೂಢ್ ವೆಕ್ತಿ ಮಾತ್ಸೆಂ ಹಾಲಾಲಾಗ್ಲಿ. ಉಪ್ರಾಂತ್ ಸವ್ಕಾಸ್ ಕಾರಾಸರ್ಶಿಂ ಮೆಟಾಂ ಘಾಲುಂಕ್ ಲಾಗ್ಲಿ!.
ಆನಿ ಆಗಸ್ಟರ್…‘ಮುಕಾರ್ ಕಿತೆಂ ಘಡ್ತಾ?!’ ಮ್ಹಳ್ಳ್ಯಾ ಆತುರಾಯೆಚ್ಯಾ ದೊಳ್ಯಾಂನಿಂ ಪಳೆತ್ತ್ ಆಸ್ತಾಂ…
ತಿ ವೆಕ್ತಿ ಕಾರಾಲಾಗಿಂ ಪಾವ್ಲಿ. ಆನಿ ಕಾರಾರ್ ಆಸ್ಚ್ಯಾ ಕ್ಲೊಡಿಯಾ ಆನಿ ನೈಜಿಲಾ ಸಂಗಿಂ… ಕಿತೆಂಗೀ ಉಲಂವ್ಕ್ ಲಾಗ್ಲಿ.
ಆನಿ ತಶೆಂ ತಿಂ ಉಲೈತ್ತ್ ಆಸ್ತಾಂ ಆಸ್ತಾಂ…ಏಕ್‌ಚ್ಚ್ ಏಕ್ ಘಡಿ. ಸಟ್ಟ್ ಕರುನ್ ತಾಚ್ಯಾ ಹಾತಿಂ ಕೇನ್ ಆಸ್ಚೆಂ…ಆನಿ ತಾಂತ್ಲೆಂ ಕಸಲೆಂಗೀ ಕಾರಾಚೆರ್ ವೆವೆಗ್ಗಿಂ ವೊತುನ್ ಆಸ್ಚೆಂ ಪಳೆತ್ತ್ ಆಸ್ತಾಂ…
ಅಗಸ್ಟರ್… ‘ಕಿತೆಂ?!…ಕಸಲೆಂ?!…ಕಿತೆಂ ಜಾಯ್ತ್ ಆಸಾ…?!!’ ಮ್ಹಣ್ ತೊ ಅಂದಾಜ್ ಕರುನ್ ಆಸ್ತಾಂಚ್ಚ್…
ಎಕಾಚ್ಚಾಣೆಂ…ಕಾರಾರ್ ‘ಭಗ್ಗ್ ’ ಕರುನ್ ಕಾರಾರ್ ಉಜೊ ಉಟ್ಲೊ.!.
ಆನಿ ತ್ಯಾಚ್ಚ್ ಘಡ್ಯೆ…ಅಗಸ್ಟರ್…ಕಾರಾಲಾಗಿಂ ಧಾಂವೊಂಕ್ ಚಿಂತ್ಚ್ಯಾ ವಗ್ತಾ…ಎಕಾಚ್ಚಾಣೆಂ ಕಾರ್ ಸಗ್ಳೆಂ…ಉಜ್ಯಾಚೊ ಮುದೊಚ್ಚ್ ಜಾವ್ನ್ ಜಳೊಂಕ್ ಲಾಗ್ಲೆಂ.!.
ಆನಿ ಘಡ್ಯೆನ್ ವ್ಹಡ್ ಮಾಪಾಚೊ ಧುವ್ರಾನ್ ಬುಡ್ಲೊಲೊ ಭಿರಾಂಕುಳ್ ಉಜೊ…ಮಳ್ಬಾ ಕುಶಿಂ ಧಾಂವ್ಚೊ ದಿಸೊಂಕ್ ಲಾಗ್ಲೊ!.
ದುಸ್ರೆಂ ಕಿತೆಂಚ್ಚ್ ತಾಕಾ ದಿಸ್ಲೆಂನಾಂ.!…ಫಕತ್ತ್ ಉಜೊ…ಉಜೊ!. ಆನಿ ಧುವೊರ್…!!
***
ಆನಿ ಹೆಂ ಭಿರಾಂಕುಳ್ ಘಡಿತ್…ಆತಾಂ ಹಾಂಗಾಸರ್ ಕ್ಲೈವಾ ಮುಕಾರ್ ಆಸ್ಚೊ ರಿಶಭ್ ಚಿಂತುನ್ ತಳ್ಮಳ್ತಾನಾಂ…ತ್ಯಾ ಭಿರಾಂಕುಳ್ ಉಜ್ಯಾಂತ್…
ಕ್ಲೋಡಿಯಾ ಆನಿ ನೈಜಿಲ್… ಜಿವಿಂ ಜಿವಿಂ ಹುಲ್ಪೊನ್ ಆಸ್ಚೆಂ ಭಯಾನಕ್ ಘಡಿತ್…ರಿಶಭಾಕ್ ಕ್ರೋಧಾಚ್ಯಾ ತಶೆಂ ಧೆಧೆಸ್ಪರಾಚ್ಯಾ ಕೊಂಡಾಂತ್ ಬುಡಯ್ಲಾಗ್ಲೆಂ.!. ಆನಿ ತೊ ದಾಂತ್ ಚಾಬುನ್ ಬೊಬಾಟ್ಲೊ…
“ಕ್ಲೈವ್…ಮ್ಹಜ್ಯಾ ಕ್ಲೋಡಿಯಾಕ್ ಜಿವೆಂ ಜಿವೆಂ ಹುಲ್ಪಾಯ್ಲೆಂಯ್ ನ್ಹಂಯ್ ಫಟಿಂಗಾ.”
ಏಕ್ ಘಡಿ ತಾಕಾ ಉಲಂವ್ಕ್‌ಚ್ಚ್ ಜಾಲೆಂನಾಂ. ನಂತರ್ ಭರುನ್ ಯೆಂವ್ಚ್ಯಾ ದುಕಾನಿಂ ತೊ ಮ್ಹಣಾಲೊ. ಆತಾಂ ಹಾಂವ್…ಮ್ಹಜ್ಯಾ ಕ್ಲೋಡಿಯಾಚ್ಯಾ ಖುನ್ಯೆಗಾರಾಚೆಂ ಫಾಶ್ಯೆ ತೀರ್ಪ್ ಘೆವ್ನ್‌ಚ್ಚ್ ಆಯ್ಲಾಂ.!.
“ಫಾ…ಫಾಶ್ಯೆ ತೀರ್ಪ್?!.” ಮರ್ಣಾ ಭಿರಾಂತೆನ್ ಗಳೊ ಫುಮಾರ್ ಜಾವ್ನ್ ಗಾಗೆಲೊ ಕ್ಲೈವ್
“ಹುಂ…ತುಜೆಂ ಫಾಶ್ಯೆ ತೀರ್ಪ್!…ಕ್ಲೋಡಿಯಾಚ್ಯಾ ಖುನ್ಯೆವರ್ವಿಂ ತುಂವೆಂ ಮ್ಹಜ್ಯಾ ಫಾರಿಕ್ಪಣಾನ್ ಜೋಡ್ನ್ ಘೆಂವ್ಚೆಂ ಫಾಶ್ಯೆ ಮರಣ್.!.
ಆನಿ ಹ್ಯಾ ಖಾತಿರ್ ಹಾಂವೆ ವಿಂಚ್ಲಾಂ…ಗ್ಯಾಸ್ ಹಾಂಡೊ.
ಜೊ ತುವೆಂ ಕ್ಲೋಡಿಯಾಚ್ಯಾ ಖುನ್ಯೆಕ್ ವಿಂಚ್ಲೆಲ್ಯಾ ಪೆಟ್ರೊಲ್ ಕ್ಯಾನಾ ಪ್ರಾಸ್…ಭಯಾನಕ್!.
ಆನಿ ತೊ ಹಾಂಡೊ…ತುಜೆಂ ಮರಣ್ ಅತ್ರೆಗುನ್ ಆಸಾ. ಆನಿ ಹಾಂ…ಆಯ್ಕ್…
ಹ್ಯಾ ಗ್ಯಾಸ್ ಹಾಂಡ್ಯಾಪರಿಂ ಆನಿ ದೋನ್ ಗ್ಯಾಸ್ ಹಾಂಡೆ…ಥಂಯ್ಸರ್ ತುಜ್ಯಾ ಸ್ಟೋರ್ ರುಮಾಂತ್ ತುಕಾ ರಾಕೊನ್ ಆಸಾತ್. ತೆ ದೊನೀ ಹಾಂಡೆ…
ಹಾಂಗಾಸರ್ ಹಾಂವೆ ಹಾಡ್ಲೆಲ್ಯಾ ಗ್ಯಾಸ್ ಹಾಂಡ್ಯಾಕ್ ಸಾಂಗಾತ್ ದೀವ್ನ್ ಉಜ್ಯಾ ರಾಸ್ ಉಬ್ಜೊನ್ ತುಕಾ ಗ್ರಾಸುಂಕ್ ರಾಕುನ್ ಆಸಾತ್. ಆನಿ ಥೊಡ್ಯಾಚ್ಚ್ ವೆಳಾನ್ ಹೆ ತಿನೀ ಗ್ಯಾಸ್ ಹಾಂಡೆ ಎಕಾಪಟ್ ಏಕ್ ಉಜ್ಯಾ ರಾಶಿಂತ್ ಫುಟಾತ್ತ್ ಆಸ್ತಾನಾಂ…
ಮ್ಹಜೊ ಫಾರಿಕ್ಪಣಾಚೊ ಶಾಲೊ ತುಜೆರ್ ಬಸ್ತೊಲೊ.
ತವಳ್ ಉಟ್ಚೊ ತೊ ಭಯಾನಕ್ ಉಜೊ…ತುಂವೆ ಹುಲ್ಪಾಯಿಲ್ಲ್ಯಾ ಕಾರಾಚ್ಯಾ ಉಜ್ಯಾ ವರ್ನಿ ಪಾಂಚ್ ಸೊ ವಾಂಟ್ಯಾಂನಿಂ ಚಡ್…ತುಂವೆಂ ಚಿಂತುಂಕ್ ಅಸಾಧ್ಯ್ ಜಾಂವ್ಚ್ಯಾ ತಿತ್ಲೊ ವ್ಹಡ್ ಮಾಪಾಚೊ ಜಾವ್ನ್ ಆಸ್ತೊಲೊ!
ಆನಿ ತ್ಯಾ ಉಜ್ಯಾ ರಾಶೆಂತ್…ಸಗ್ಳೊ ತುಜೊ ಬೊಂಗ್ಲೊ ಹುಲ್ಪೊವ್ನ್ ನಾಸ್ ಕರುನ್ ಆಸ್ತಾಂ…
ಕಾರಾರ್…ಅಚಾನಕ್ ಉದೆಲ್ಲ್ಯಾ ಆಪ್ಲ್ಯಾ ಮರಣಾವಿಶಿಂ ನೆಣಾ ಆಸ್ಲೆಲ್ಯಾ…ಕ್ಲೋಡಿಯಾ ಪರಿಂ…ಯೆದೊಳ್ ತುಜೆಂ ಮರಣ್ ನೆಣಾ ಆಸ್-ಲ್ಲೊ…
ತುಂ…ಆನಿ ತುಜೊ ತೊ ಬ್ಯಾವರ್ಶಿ ಚೇಲಾ…
ಕ್ಲೊಡಿಯಾ ಆನಿ ನೈಜಿಲಾಪರಿಂ…ತ್ಯಾ ಉಜ್ಯಾಂತ್ ಜಿವೆ ಜಿವೆ ಜಳೊನ್ ಹಾಕ್ ಬೋಬ್ ಮಾರುನ್ ವಳ್ವಳ್ಯಾಂನಿಂ ಉಕ್ಡೊನ್ ಮೊರ್ತೆಲ್ಯಾತ್. ಆನಿ ತಶೆಂ ತುಮಿ ಮೊರುಂಕ್‌ಚ್ಚ್ ಜಾಯ್!.
ಹ್ಯಾವೆಳಾ…ಮ್ಹಜ್ಯಾ ಕ್ಲೊಡಿಯಾ ಖಾತಿರ್ ರಡುನ್ ದೆಂವ್ ಲ್ಲಿಂ ದುಖಾಂ…ತುಜ್ಯಾ ಮರಣಾವರ್ವಿಂ ಆನಂದೆಚಿ ದುಕಾಂ ಜಾವ್ನ್ ಬದಲ್ತೆಲಿಂ.! ಆನಿ ಹ್ಯಾ ಮ್ಹಜ್ಯಾ ಫಾರಿಕ್ಪಣಾಚ್ಯಾ ಪರಿಣಾಮಾನ್…ತುಜ್ಯಾ ಮಾಮ್ಮಿ ಡ್ಯಾಡಿಕ್…ಪೊಲಿಸಾಂಕ್…
ತುಜ್ಯಾ ಮೆಲ್ಲ್ಯಾ ಕುಡಿಚೆಂ ಕಸಲೆಂಚ್ಚ್ ಖುಣಾಂ ಪಳೆಂವ್ಕ್ ಮೆಳಾಶಿನಾಂತ್. ಶಿವಾಯ್ ಹಾಂವೆಂ ಆಧಾರ್ ಲ್ಲ್ಯಾ…ತುಜ್ಯಾ ಖುನ್ಯೆಚೆಂ ರುಜ್ವಾತ್ ಯೀ…ಹ್ಯಾ ತುಜ್ಯಾ ಬೊಂಗ್ಲ್ಯಾಚ್ಯಾ ಉಜ್ಯಾಂತ್ ಜಳೊನ್ ನಪೈಂಚ್ಚ್ ಜಾತೆಲೆಂ.!.”
ಅಶೆಂ ತೊ ಮ್ಹಣಾತ್ತ್ …ಜನೆಲಾ ಸರ್ಶಿಂ ಮೆಟಾಂ ಘಾಲಿಲಾಗ್ಲೊ. ಜನೆಲಾಸರ್ಶಿಂ ಪಾವ್ತಚ್ಚ್ ಥೊಡೊ ವೇಳ್…ಜನೆಲಾ ಬಾಯ್ರ್ ತೀಳ್ನ್ ಪಳೆಂವ್ಚ್ಯಾರ್ ಮಗ್ನ್ ಜಾಲೊ.
ಹೆಂ ಪಳೆತಾಂ… ‘ಹೊ ರಿಶಭ್…ತ್ಯಾ ಲಾಂಬ್ ಕೆಸಾಂಚ್ಯಾಕ್ ರಾಕೊನ್ ಆಸಾ.!’ ಮ್ಹಣ್ ಕ್ಲೈವಾಕ್ ಖಂಡಿತ್ ಜಾಲ್ಲೆಂ. ಆನಿ ಹ್ಯಾಚ್ಚ್ ವೆಳಾ…ಪರತ್ ರಿಶಭಾಚೊ ತಾಳೊ ಉಟ್ಲೊ…
“ಹುಂ ಕ್ಲೈವ್…ಆತಾಂ ತುಂ ತುಜ್ಯೊ ನಿಮಾಣಿ ಘಡಿ ಮೆಜುಂಕ್ ಆರಂಭ್ ಕರ್. ಆನಿ ಥೊಡ್ಯಾಚ್ಚ್ ವೆಳಾನ್ ತುಜೊ ಲಾಂಬ್ ಕೆಸಾಂಚೊ ಚೇಲಾ…ಆಪ್ಣಾಚಿ ನಿಮಾಣಿ ಘಡಿ ಮೆಜುಂಕ್… ಹಾಂಗಾಸರ್ ಭಿತರ್ ರಿಗ್ತೊಲೊ. ಆನಿ ತಿಚ್ಚ್ ಘಡಿ…
ಕ್ಲೈವ್…ತುಜಿ ಆನಿ ತಾಚಿ ನಿಮಾಣಿ ಘಡಿ ಜಾಂವ್ಕ್ ಪಾವ್ತೆಲಿ.!.”
“ರಿ…ರಿಶಭ್…ಪ್ಲೀಜ್…ಪರತ್ ಹಾಂವ್ ಹಾತ್ ಜೋಡ್ನ್ ಮ್ಹಜ್ಯಾ ಜಿವಾಚಿ ಭಿಕ್ ಮಾಗ್ತಾಂ…ಪ್ಲೀಜ್ ತುಜೆಂ ಮನ್ ಬದ್ಲಿ ಆನಿ ಮಾಕಾ ಮಾಫ್ ಕರ್”. ಹಾತ್ ಜೊಡುನ್ ವ್ಹಡಾನ್ ರಡೊಂಕ್ ಲಾಗ್ಲೊ…ಕ್ಲೈವ್.
ಪೂಣ್ ರಿಶಭಾಚೆಂ ‘ಮನ್ ಪರಿವರ್ತೆನ್…ಜಾಯ್ತ್ ಯಾ ನಾಂ?!’ ಮ್ಹಣ್ ಪಾರ್ಕುಂಚಿ ತಿತ್ಲೊ ವೇಳ್ ತಾಕಾ ಮೆಳ್ಳೊನಾಂ. ಕಿತ್ಯಾ…
ತವಳ್‌ಚ್ಚ್ ಭಾಯ್ರ್ ಗೆಟಿಲಾಗಿಂ ಬಾಯ್ಕಾಚೊ ಆವಾಜ್ ಆಯ್ಕಾಲೊ. ಆತಾಂ ಕ್ಲೈವ್ ಪರತ್ ವ್ಹಡಾನ್ ಬಚಾವೆಚಿ ಭಿಕ್ ಮಾಗೊಂಕ್ ಲಾಗ್ಲೊ.
ಆನಿ ತೊ ಪೊರಾತ್ತುನ್ ಭೊಬಾಟುಂಕ್ ಲಾಗ್ಲೊ. ತ್ಚಾಚ್ಚ್ ಥೊಡ್ಯಾಚ್ಚ್ ಘಡಿಯಾಂನಿಂ…
ಮಾಳಿಯೆ ಮೆಟಾಂ ಚಡ್ಚೊ ಆವಾಜ್ ಆಯ್ಕೊಂಕ್ ಲಾಗ್ಲೊ.
ಆನಿ ಹೊ ಆವಾಜ್…ಜನೆಲಾಲಾಗಿಂ ಉಬೊ ಆಸ್ಚ್ಯಾ ರಿಶಭಾಚ್ಯಾ ಫಾರಿಕ್ಪಣಾಚಿ…ಘಡಿ ಉದೆಂವ್ಕ್ ಕಾರಾಣ್ ಜಾಲಿ. ಘಡ್ಯೆನ್ ರಿಶಭ್ ತೆಂ ಉಗ್ತೆಂ ಆರ್ಶ್ಯಾ ಜನೆಲ್ ಧಾಂಪಿಲಾಗ್ಲೊ. ಆನಿ ಅಮ್ಸರಿಂ ಜನೆಲಾ ಥಾವ್ನ್ ವೆಗ್ಳೊ ಜಾಲೊ.
ಆನಿ ರುಮಾಚ್ಯಾ ಬಾಗ್ಲಾ ಆಡೊಸಾರ್…ಆಪ್ಣೆಂ ಗ್ಯಾಸ್ ಹಾಂಡೊ ಹಾಡ್ನ್ ದವರ್ಲೆಲ್ಯಾ ದೆಗೆನ್…ಕ್ಲೈವಾಚ್ಯಾ ಚೇಲಾಕ್ ರಾಕೊನ್ ರಾವ್ಲೊ.
ಉಪ್ರಾಂತ್ಲ್ಯಾ ತ್ಯಾಚ್ಚ್ ಥೊಡ್ಯಾ ಸೆಕುಂದಾನಿಂ…
ಬಾಗ್ಲಾ ಆಡೊಸಾರ್ ಆಸ್ಚೊ ರಿಶಭ್…ಗ್ಯಾಸ್ ಹಾಂಡ್ಯಾ ಸರ್ಶಿಂ ಬಾಗ್ವೊಲೊ. ಆನಿ ಮುಕ್ಲ್ಯಾ ಭಯಾನಕ್ ಕ್ರಿಯಾಕ್ ಕಾರ್ಯಾಳ್ ಜಾಂವ್ಚ್ಯಾಕ್ ಆಯ್ತೊ ಜಾಲೊ.
ತವಳ್‌ಚ್ಚ್ ಬಾಗ್ಲಾಚೊ ಆವಾಜ್ ಉಟ್ಲೊ.
‘ಕರ್ರ್…ಕ…ಕರ್ರ್…’
ಬಾಗ್ಲಾ ಆವಾಜ್ ಆಯ್ಕಾಲ್ಲ್ಯಾ ತ್ಯಾಚ್ಚ್ ಘಡ್ಯೆ…ರಿಶಭಾಚಿಂ ಬೊಟಾಂ…ಗ್ಯಾಸ್ ಹಾಂಡ್ಯಾಚೊ ‘ನೋಬ್’ ಘುಂವ್ಡಾವ್ನ್ ಗ್ಯಾಸ್ ‘ರಿಲೀಸ್’ ಕರಿಲಾಗ್ಲಿಂ.
ಖಿಣಾನ್…ಎಕಾಚ್ಚಾಣೆಂ ಗ್ಯಾಸಾಚೊ ವಾಸ್ ಕುಡಾಂತ್ ಭರೊನ್ ಯೆತಾಸ್ತಾಂ…ತೊ ವಾಸ್ ಕ್ಲೈವಾಚ್ಯಾ ನಾಕಾಕ್ ಆಪ್ಟಾಲೊ!. ಆನಿ ಘಡ್ಯೆನ್…ಮುಕ್ಲೆಂ ಭಯಾನಕ್ ಉಜ್ಯಾ ದುರಂತ್ ತಾಚ್ಯಾ ಕಾಳ್ಜಾಕ್ ಆಪ್ಟಾತಾನಾಂ…ಯಾಂತ್ರಿಕಾಯೆನ್ ತೊ ಖಟ್ಲ್ಯಾರ್ ಉರ್ಡೊಂಕ್ ಲಾಗ್ಲೊ.!.
ಆನಿ ತ್ಯಾ ಉರ್ಡೊಣೆ ಸಂಗಿ…ಯಾಂತ್ರಿಕಾಯೆನ್ ಅಕಾಂತೆಚಿ ಬೊಬಾಟ್ ಉಟಾಜಾಯ್ ತರ್…
ಲಾಂಬ್ ಕೆಸಾಂಚೊ ಅಮ್ಸರಿಂ ಬಾಗ್ಲಾ ಭಿತರ್ ಮೇಟ್ ದವರಿಲಾಗ್ಲೊ.
ಆನಿ ತ್ಯಾಚ್ಚ್ ಘಡ್ಯೆ…ಕುಡಾಂತ್ಲೊ ತೊ ಗ್ಯಾಸಾಚೊ ವಾಸ್ ತಾಚ್ಯಾ ನಾಕಾಕ್ ಆಪ್ಟೊಂಚ್ಯಾ ಫುಡೆಂ…ಕ್ರೋಧಾನ್ ಖಡ್ಕಡ್ಚ್ಯಾ ರಿಶಭಾಚಿ ಫಾರಿಕ್ಪಣಾಚಿ ಬಳಾಧಿಕ್ ಖೋಟ್…ತಾಚ್ಯಾ ಪೆಂಕ್ಟಾರ್ ಬಸ್ಲಿ!.
ಆನಿ ತೊ “ದೆವಾ ಮ್ಹಜಾ…” ಉದ್ಗಾರಾನ್…ಧಿಘ್ಬ್ರಾಂತ್ ಜಾವ್ನ್ ಖಟ್ಲ್ಯಾರ್ ಆಸ್ಚ್ಯಾ ಕ್ಲೈವಾಚ್ಯಾ ಆಂಗಾರ್ ವೊಮ್ತೊಚ್ಚ್ ಪಡ್ಲೊ!.
ಆತಾಂ ಅಚಾನಕ್ ಪೆಂಕಾಡ್ ಮೊಡ್ಚೆಪರಿಂ ಪಡ್ಲೆಲ್ಯಾ ಖೊಟೆಕ್…ಉಟ್ಲೆಲ್ಯಾ ಕಠಿಣ್ ದುಖೆನ್…
‘ಕಿತೆಂ?!…ಕಶೆಂ?…ಕಸಲೆಂ?! ಘಡುನ್ ಆಸಾ…?!’ ಮ್ಹಣ್ ಕ್ಲೈವಾಚ್ಯಾ ಆಂಗಾ ಥಾವ್ನ್ ದೆಗೆನ್ ಉದೊರೊ ಪಡೊನ್…ಖಟ್ಲ್ಯಾರ್ ಚಡ್ಪಡೊನ್ ಆಸ್ತಾಂ ಆಸ್ತಾಂ…
ತ್ಯಾಚ್ಚ್ ಕ್ಶಣಾಂ…ರಿಶಭ್…ಕುಡಾ ಭಾಯ್ರ್ ಪಾವೊಂಕ್ ಅಮ್ಸರ್ಲೊ!. ಆನಿ ತಶೆಂಚ್ಚ್…ಅಮ್ಸರಿಂ ಅಮ್ಸರಿಂ ಮೆಟಾಂ ದೆಂವೊಂಕ್ ಲಾಗ್ತಾನಾಂ…
ಎಕಾಚ್ಚಾಣೆಂ ತೊ ಘುಂವ್ಲೊ. ಆನಿ ಘಳಾಯೆವಿಣೆಂ…ಹಾತಾಂತ್ ಆಸ್ಲೊಲೊ ಲೈಟರ್ ಪೆಟಯ್ ಲಾಗ್ಲೊ!. ಆನಿ ಖಿಣಾನ್…
ಜಳೊನ್ ಆಸ್ಚೊ ತೊ ಲೈಟರ್…ಕ್ಲೈವಾಚ್ಯಾ ರುಮಾ ಕುಶಿನ್ ಬಳಾನ್ ಉಡಯ್ ಲಾಗ್ಲೊ!. ಆನಿ ಲೈಟರ್ ಉಡಯಿಲ್ಲೆಂ ಮಾತ್ರ್ ತೊ ಜಾಣಾಂ… ದುಸ್ರ್ಯಾಚ್ಚ್ ಕ್ಶಣಾಂ… ‘ಭುಗ್ಗ್ !’ ಕರುನ್ ಉಜ್ಯಾಚೊ ವ್ಹಡ್ ಏಕ್ ಗುಳೊ ರೂಮಾಂತ್ ಭರ್ಲೊ.!
ಆನಿ ಖಿಣಾನ್ ಸಗ್ಳ್ಯಾ ಬೊಂಗ್ಲ್ಯಾಂತ್ ಥಂಯ್ ಹಾಂಗಾ ವಿಸ್ತಾರುಂಕ್ ಆರಂಭ್ ಜಾಲೊ.!!.
ತ್ಯಾ ಘಡ್ಯೆ…ತ್ಯಾ ಭಂವಾರಿಂ ಚಡೊನ್ ಆಸ್ಚ್ಯಾ ಉಜ್ಯಾಚಿ ತಿ ದಾವ್ ಆನಿ ತಿ ಧಾಂವ್ ಪಳೆತಾಸ್ತಾಂ…ತೊ ಭಿರಾಂಕುಳ್ ಉಜೊ…
‘ಆಪ್ಣಾಕೀ ಭಸ್ಮುಂಕ್…ಆಪ್ಣಾಚೆ ಪಾಟ್ಲ್ಯಾನ್ ಆಪ್ಣಾಕ್ ಧಾಂವ್ಡಾವ್ನ್ ಯೇತ್ ಆಸಾ!’ ಮ್ಹಳ್ಳೆಂ ಮತಿಕ್ ಆಪ್ಟಾತಾನಾಂ…ಮರಣಾ ಭಿರಾಂತೆನ್ ಬುಡ್ಲೊಲೊ…
ರಿಶಭ್…ಆಪ್ಲಿ ಧಾಂವ್ ದೊಡ್ತಿ ಕರಿಲಾಗ್ಲೊ. ಆನಿ ಧಾಂವ್ತಾ ಧಾಂವ್ತಾ…ಬೊಲ್ಸಾಂತ್ಲಿ…ಆಪ್ಲಿ ವಳಕ್ ಲಿಪೊಂವ್ಚೆ ಮಾತ್ಯಾ ಚೆಪೆಂ…ಮಾತ್ಯಾಕ್ ಚಡಯ್ಲಾಗ್ಲೊ. ಆನಿ ಪುರ್ತಿ ವಳಕ್ ಲಿಪಂವ್ಚ್ಯಾಕ್ ಕಪಾಲಾ ಥಾವ್ನ್ ಸಕಯ್ಲ್ ವೊಡಿಲಾಗ್ಲೊ.
ಆನಿ ತ್ಯಾಚ್ಚ್ ಘಡ್ಯೆ…ಬೊಂಗ್ಲ್ಯಾಂತ್ ವ್ಹಡ್ ಏಕ್ ಭಯಾನಕ್ ಆವಾಜ್ ಆವಾಜ್ಲೊ!.
ಆನಿ ಸಗ್ಳ್ಯಾ ಭೊಗ್ಲ್ಯಾಂತ್ ವಿಸ್ತಾರ್ ಲ್ಲೊ ಉಜ್ಯಾ ಜಿಬೊ ಚಡ್ ಆನಿ ಚಡ್ ಚಡಾತ್ತ್ ಆಸೊನ್…ತವಳ್ ತವಳ್ ಬೊಂಗ್ಲ್ಯಾಂತ್ ನಾನಾ ರಿತಿಚೊ ಆವಾಜ್ ದೀತ್…ತೆಣೆಂ ಹೆಣೆಂ ವಾಡಾತ್ತ್ ಆಸ್ಲ್ಲೊ!.
ಹ್ಯಾವೆಳಾ ತಾಚೆಂ ಅಂತಸ್ಕರ್ನ್ ತಾಕಾ ಭೆಶ್ಟಾಯ್ಲಾಗ್ಲೆಂ…
‘ರಿಶಭ್…ಪಾಟಿಂ ಪಳೆನಾಕಾ!…ದೀಶ್ಟ್ ತುಜಿ ಪಾಟಿಂ ಪರ್ತಿನಾಕಾ…!!’
ಹ್ಯಾವೆಳಾ … ಬೊಂಗ್ಲ್ಯಾ ಬೊವಾರಿಚ್ಯಾ ತ್ಯಾ ದಾಟ್ ಅಂದ್ಕಾರಾಂತ್…ವ್ಹಡ್ ಮಾಪಾಚೊ ಉಜೊ ಬೊಂಗ್ಲೊ ಸಗ್ಳೊ ಆವೃತ್ತ್ ಜಾಯ್ತ್ ಆಸೊನ್…ತೊ ಬೊಂಗ್ಲೊ ಬಹೃತ್ ಉಜ್ಯಾನ್ ಧಗ ಧಗ ಕರುನ್ ಹುಲ್ಪೊಂಕ್ ಲಾಗ್ ಲ್ಲೊ.
ಆನಿ ಆತಾಂ…ಥೊಡ್ಯಾಚ್ಚ್ ಥೊಡ್ಯಾ ಸೆಕುಂದಾ ಆದಿಂ ಆರಂಭ್ ಜಾಲ್ಲೆಂ ಹೆಂ ಉಜ್ಯಾ ಘಡಿತ್…ಆತಾಂ ಭೃಹತ್ ಥರಾನ್ ವಾಡೊನ್…ಬೊಂಗ್ಲೊ ಸಗ್ಳೊ ಲಾಸುನ್ ಆಸ್ತಾನಾಂ…
ಕೊಣಾಯ್ಟಾಯೀ ನದ್ರೆಕ್ ಪಡಾನಾತ್ಲೆಲೊ…ರಿಶಭ್…
ತ್ಯಾ ದಾಟ್ಟ್ ಕಾಳಾಕಾಂತ್ಲ್ಯಾ…ಘಾಢ್ ನಿಶಭ್ದತೆಂತ್… ಆಪ್ಲಿಂ ಧಾವಾಂ ಧಾವಿಂಚಿ ಚಾಲ್…ದೊಡಿ ತಿದೊಡಿ ಕರುನ್, ಸೆಕುಂದಾಂ ಸೆಕುಂದಾಂನಿ ವಾಡಾಯಿತ್ತ್…ಬೊಂಗ್ಲ್ಯಾ ಥಾವ್ನ್ ಸುಮಾರ್ ಪಯ್ಸ್…ಪಾವ್ ಲ್ಲೊ. ಆನಿ ತೊ ಆನಿಕೀ ತಸಲಿಚ್ಚ್ ಚಾಲ್ ಚಲಾತ್ತ್ ಆಸ್ ಲ್ಲೊ.
ಆನಿ ತ್ಯಾವೆಳಾ…
ಕ್ಲೈವಾಚೊ ಬೊಂಗ್ಲೊ ಭಿರಾಂಕುಳ್ ಉಜ್ಯಾ ಜಿಬಾಂನಿಂ ಧಗ ಧಗಾ ಜಳೊನ್…ಕಾಳ್ಯಾಂತ್ಲೊ ಕಾಳೊ ಧುಂವೊರ್ ಅಂತ್ರಾಳಾ ಕುಶಿನ್ ಧಾಂವಾತ್ತ್ ಆಸ್ತಾನಾಂ…
ಕ್ಲೋಡಿಯಾಕ್ ಕಾರಾ ಸಮೇತ್ ಹುಲ್ಪಾಂವ್ಕ್…‘ಖುನ್ಯೆ ಬ್ಯಾಟನ್’ ದಿಲ್ಲ್ಯಾ… ಕ್ಲೈವಾಚಿಂ…
ಆನಿಂ ಕ್ಲೈವಾ ಥಾವ್ನ್ ಖುನ್ಯೆ ಬ್ಯಾಟನ್ ಘೆತ್ಲೆಲ್ಯಾ…ತಾಚ್ಯಾ ಚೇಲಾಚಿ ಹಾಡಾಂ…ತ್ಯಾ ಭಯಾನಕ್ ಉಜ್ಯಾಂತ್…
‘ಲಟಾ…ಲಟಾ…ಲಟಾ ‘ ಕರುನ್ ಆವಾಜ್ ದೀವ್ನ್…ಬೊಬಾಟುನ್ ಆಸ್‌ಲ್ಲಿಂ.!.
***
ಅಸಲ್ಯಾ ವೆಳಾ…
ರಿಶಭಾ ಥಾವ್ನ್… ಕ್ಲೋಡಿಯಾಚ್ಯಾ ಬಚಾವೆ ಖಾತಿರ್ ಬ್ಯಾಟನ್ ಘೆತ್ಲೊಲೊ ಅಗಸ್ಟರ್…
ಆಪ್ಣೆಂ ದೆಕ್ಲೆಲ್ಯಾ ಭಯಾನಕ್ ಕಾರ್ ದುರಂತೆಚ್ಯಾ ಭಿರಾಂತೆನ್…ಆಪ್ಲೆಂ ಬಾಯ್ಕ್ ಮೀತ್ ಮಿರ್ವಾಲ್ಲ್ಯಾ ವೇಗಾನ್ ಧಾಂವ್ಡಾಯಿತ್ತ್ ಆಸ್ಲ್ಲೊ.
‘ಚಿಂತಿನಾತ್ಲೆಲ್ಯಾ ಘಡ್ಯೆ…ಅಚಾನಕ್ ಕಾರ್ ಜಳೊಂಕ್ ಲಾಗ್ಲೆಲ್ಯಾ ಉಜ್ಯಾ ಆಕ್ಟ್ಯಾಂತ್…
ಕ್ಲೊಡಿಯಾ ಆನಿ ನೈಜಿಲ್…ಕಾರಾ ಭಿತರ್ ಶಿರ್ಕೊನ್…ಅಸಹಾಯೆಕೆಂತ್ ಕಾರಾ ಭಿತರ್ ಚಡ್ಪಡೊನ್ ವಳ್ವಾಳೊನ್ ವಳ್ವೊಳೊನ್ ಜಿವಿಂ ಜಿವಿಂ ಹುಲ್ಪೊನ್ ಆಸ್ಚೆಂ…
ಭಯಾನಕ್ ಉಜ್ಯಾ ದೃಶ್ಯ್!…
ಆಪ್ಣಾಕ್ ಕೋಣ್ ಮ್ಹಣ್ ನೆಣಾ ಆಸ್ಲೆಲ್ಯಾ ಅಪರಿಚಿತಾ ಥಾವ್ನ್ ಮೆಳ್ಳ್ಯಾ ಕಂಟ್ರಾಕ್ಟಾಂತ್…ಆಪ್ಣಾಕ್ ಪಳೆಂವ್ಕ್ ಮೆಳಾತ್?!’ ಮ್ಹಣ್ ತಾಣೆಂ ಸ್ವಪ್ಣಾಂತೀ ಚಿಂತುಂಕ್ ನಾತ್‌ಲ್ಲೆಂ.!.
ಆನಿಂ ಆತಾಂ ಸುಮಾರ್ ಅರ್ಧ್ಯಾ ವೊರಾನ್…ಕ್ಲೈವಾಚ್ಯಾ ಬೊಂಗ್ಲ್ಯಾ ಮುಕಾರ್ ತೊ ಪಾವ್ತಾಸ್ತಾಂ…
ಆಪ್ಣೆ ದೆಕ್ಲೆಲ್ಯಾ ಕಾರಾ ಉಜ್ಯಾ ಅನಾಹುತಾ ಪ್ರಾಸ್…ಭಯಾನಕ್ ಭಿರಾಂಕುಳ್ ಉಜ್ಯಾ ಘಡಿತ್… ತಾಕಾ ಹಾಂಗಾಸರ್ ದಿಶ್ಟೆಕ್ ಪಡ್ಲೆಂ.!. ಹೆಂ ಪಳೆತಾಂ ತಾಚೊ ಸ್ವಾಸ್ ಏಕ್ ಪಾವ್ಟಿಂ ಥಾಂಬ್ಲೊ.!!
ಆತಾಂ ತೊ ಸಗ್ಳೊಚ್ಚ್ ಕಾಂಪೊಂಕ್ ಲಾಗ್ಲೊ. ಆನಿ ತೆಂ ಬಿರಾಂಕುಳ್ ದೃಶ್ಯ್ ಪಳೆತ್ತ್ ಆಸ್ಚ್ಯಾ…ತ್ಯಾಚ್ಚ್ ಘಡ್ಯೆ…
ಎಕಾಚ್ಚಾಣೆಂ ತಾಚೆಂ ಬಾಯ್ಕಾ ವಯ್ಲೆಂ ನಿಯಂತ್ರಣ್ ಚುಕ್ಲೆಂ. ಆನಿ ತೊ ಧರ್ನಿಕ್ ಆಪ್ಟಾಲೊ!.
ಪೂಣ್ ತೊ ಬೈಕಾ ಸಮೇತ್ ಧರ್ನಿಕ್ ಆಪ್ಟಾಲ್ಲೊ ಆವಾಜ್…ಥಂಯ್ಸರ್ ಜಮೊ ಜಾಲ್ಲ್ಯಾ ಲೊಕಾಚ್ಯಾ ಗಲಾಟ್ಯಾಂತ್ ಲಿಪೊನ್ ಗೆಲೊ.
ಥಂಯ್ಸರ್ ಜಮೊ ಜಾಲ್ಲಿಂ ಸಗ್ಳಿಂ, ವ್ಹಡ್ ಮಾಪಾನ್ ಜಳೊನ್ ಆಸ್ಚ್ಯಾ ತ್ಯಾ ಬೊಂಗ್ಲ್ಯಾಚ್ಯಾ ಉಜ್ಯಾ ಥಂಯ್ ಭಿರಾಂತೆಚ್ಯಾ ಹಾಹಾಕಾರಾಂತ್ ಬುಡೊನ್ ಆಕಾಂತೆಂತ್ ಬುಡೊನ್ ಗೆಲ್ಲಿಂ!.
ಆನಿ ಉಜ್ಯಾ ದುರಂತೆಚ್ಯಾ ಭಯಾನಕ್ ದೃಶ್ಯಾ ಥಂಯ್…ಅಗಸ್ಟರ್ ಧಿಗ್ಬ್ರಾಂತ್ ಜಾವ್ನ್ ತ್ಯಾ ಲೊಕಾ ಮದೆಂ ಏಕ್ ಜಾವ್ನ್, ಪಳೆತ್ತ್ ಆಸ್ಲ್ಲೊ.!.
ಅಶೆಂ ತೊ ಪಳೆತ್ತ್ ಆಸ್ಚ್ಯಾ ತ್ಯಾಎಕಾ ಘಡ್ಯೆ…ಪಯ್ಶಿಲ್ಯಾನ್ ಪೊಲಿಸ್ ಆನಿ ಎಂಬ್ಯುಲೆನ್ಸಾಂಚೆಂ ಸೈರಣ್ ಆಯ್ಕೊಂಕ್ ಲಾಗ್ಲೆಂ.!. ಘಡ್ಯೆನ್ ತೊ ಹಿ ಭಂಯಕರ್ ಉಜ್ಯಾ ಗಜಾಲ್…
ಆಪ್ಣಾಕ್ ಕಾಂಟ್ರಾಕ್ಟ್ ದಿಲ್ಲ್ಯಾ…ಯೆದೊಳ್ ದೆಕಾನಾತ್ಲಲ್ಯಾ ಪರ್ದ್ಯಾ ಪಾಟ್ಲ್ಲ್ಯಾ ವೆಕ್ತಿಕ್ ತಿಳ್ಸುಂಚ್ಯಾಕ್…ಆಪ್ಲೆಂ ಮೊಬಾಯ್ಲ್ ಜಾಗಯ್ಲಾಗ್ಲೊ.
‘ಕ್ರೀಂ…ಕ್ರೀಂ…ಕ್ರೀಂ…’
ಪೂಣ್ ತೆವ್ಶಿಲ್ಲ್ಯಾನ್ ಜಾಪ್ ನಾಂ.!. ಪರತ್ ಪರತ್ ಕೆಲೆಂ. ಜಾಪ್ ಚ್ಚ್ ನಾಂ!!. ನಾಂಚ್ ನಾಂ…!!!. ಆನಿ ಹ್ಯಾವೆಳಾ…ಸಟ್ಟ್ ಕರುನ್…
‘ಹೆಂ ದುರಂತ್ ಕಾಂಯ್ ತ್ಯಾ ಪರ್ದ್ಯಾ ಪಾಟ್ಲ್ಯಾ ವೆಕ್ತಿಂಚೆಂಚ್ಚ್ ಫಾರಿಕ್ಪಣ್?!.’ ಮ್ಹಳ್ಳೊ ಕಾಳಿಜ್ ಪೊಕೊರ್ಚೊ ದುಬಾವ್ ತಾಕಾ ಕಠಿಣ್ ಧೊಸುಂಕ್ ಲಾಗ್ಲೊ!.
ಘಡ್ಯೆನ್ ತಾಚಿ ಕಾಂಪ್ ದೊಡ್ತಿ ಜಾಲಿ.!. ಹ್ಯಾ ಆಯಿನ್ನ್ ವೆಳಾ ತಾಕಾ…
‘ತ್ಯಾ ಪರ್ದ್ಯಾ ಪಾಟ್ಲ್ಯಾ ವೆಕ್ತಿನ್ ಆಪ್ಣಾಕ್ ಕ್ಲೋಡಿಯಾಚ್ಯಾ ಭದ್ರತೆವಿಶಿಂ ಕಂಟ್ರಾಕ್ಟ್ ಕಿತ್ಯಾ ದಿಲ್ಲೆಂ.?!.’ ಮ್ಹಳ್ಳೆಂ ಸವಾಲ್ ತಾಕಾ ಕಠಿಣ್ ಥರಾನ್ ದೊಸುಂಕ್ ಲಾಗ್ಲೆಂ.
ಹ್ಯಾ ಕಂಟ್ರಾಕ್ಟಾ ಪಾಟ್ಲ್ಯಾನ್…ಉಜ್ಯಾನ್ ಜಿವೆಂ ಜಿವೆಂ ಜಳೊನ್ ಗೆಲ್ಲ್ಯಾ ಕ್ಲೋಡಿಯಾಚಿ…ಭದ್ರತಿ ತಶೆಂ ಬಚಾವಿಚೊ ಹುಸ್ಕೊ ಆಸ್ಲೆಲೆಂ ತೆಂ…
ತ್ಯಾ ಪರ್ದ್ಯಾ ಪಾಟ್ಲ್ಯಾ ಅಪರಿಚಿತ್ ವೆಕ್ತಿಚ್ಯಾ ಮೊಬಾಯ್ಲ್ ಸಂವಾದೆಂನಿಂ ಹಾಣೆಂ ಬರೆಂಚ್ಚ್ ಪಾರ್ಕಿಲ್ಲೆಂ.! ಆನಿ ಹೆಂ ತಾಕಾ ಉಗ್ಡಾಸಾಕ್ ಯೆತಾಸ್ತಾನಾಂ…
‘ಥೊಡ್ಯಾ ಘಡಿಯಾಂ ಆದಿಂ…ಕಾರಾರ್ ಕ್ಲೋಡಿಯಾ ಹುಲ್ಪಾಲ್ಲೆಂ!’…ಆನಿಂ ಆತಾಂ ಹಾಂಗಾಸರ್…
‘ತಾಚ್ಯಾ ಪತಿ ಕ್ಲೈವಾಚೆಂ, ಬೊಂಗ್ಲೊ ಹುಲ್ಪೊನ್ ಆಸ್ಚೆಂ!’ ಹೆಂ ಭಯಾನಕ್ ದೃಶ್ಯ್ ಪಳೆತಾಂ ಪಳೆತಾಂ…
ತ್ಯಾ ಪರ್ದ್ಯಾ ಪಾಟ್ಲ್ಯಾ ಅಪರಿಚಿತ್ ವೆಕ್ತಿಚ್ಯಾ ಜಿವಿತಾಂತ್…
‘ಕ್ಲೋಡಿಯಾ ಆನಿ ತಾಚಿ ಎಕಾಮೆಕಾಚಿ ಸಲ್ವಾಲ್ಲ್ಯಾ ಮೊಗಾಚಿ ಸಾವ್ಳಿ…ತಶೆಂ ಕ್ಲೊಡಿಯಾಚೆರ್ ತಾಕಾ ಆಸ್ಲೊಲೊ ಅಪರಿಮಿತ್ ಹುಸ್ಕೊ’…ಹೆಂ ಸರ್ವ್ ತಾಕಾ ವಯ್ರ್ ವಯ್ರ್ ಜಗ್ಲೊಂಕ್ ಲಾಗ್ಲೆಂ!.
ಆನಿ ಹೆಂ ತಾಚ್ಯಾ ಮತಿಂ ಜಗ್ಲಾತ್ತ್ ಆಸ್ತಾಂ…ಎಕಾಚ್ಚಾಣೆಂ ತಾಕಾ ಪೊಲಿಸಾಂಚೆಂ ಸೈರಣ್ ಪರತ್ ಆಯ್ಕಾಲಾಗ್ಲೆಂ!. ಆನಿ ತೆಂ ಸೈರಣ್ ಲಾಗಿಂ ಲಾಗಿಂ ಯೆಂವ್ಚೊ ಆವಾಜ್…ಜಬ್ಬೋರ್ ಜಾಯ್ತ್ ಆಸ್ತಾನಾಂ…
ಅಗಸ್ಟರಾಕ್…ಎಕಾಚ್ಚಾಣೆಂ ಆಪ್ಲ್ಯಾ ಜಿವಾಚಿ ರಿಸ್ಕ್ ಧೊಸುಂಕ್ ಲಾಗ್ಲಿ!.
‘ಪರ್ಧ್ಯಾ ಪಾಟ್ಲೊ ವೆಕ್ತಿ ಎದೊಳ್ ಚ್ಚ್ ಲಿಪೊನ್ ನಪೈಂಚ್ಚ್ ಜಾಲಾ. ಆನಿ ಆತಾಂ ಆಪುಣ್ ತಾಕಾ ವಿಸ್ರೊನ್…ಆಪ್ಣಾಚೆಂ ಭದ್ರತೆಚಿ ವಾಟ್ ಪಳೆಂವ್ಚಿ ಘಡಿ ಉದೆಲ್ಲ್ಯಾ!.
ಯೆದೊಳ್ ತಾಚ್ಯಾ ಸಂಪರ್ಕಾರ್ ಆಸ್ಲೊಲೊ ಹಾಂವ್…ಕಾಂಯ್ ಹ್ಯಾ ದುರಂತ್ ಘಡಿತಾಚ್ಯಾ ಪೊಲಿಸ್ ಸೊದ್ನೆರ್…ಆಪುಣ್ ಕಾಂಯ್ ಪೊಲಿಸಾಂಚ್ಯಾ ದುಬಾವೆಕ್ ಶಿರ್ಕಾಲೊಂ ತರ್?!’…ಮ್ಹಳ್ಳೆಂ ಚಿಂತಾಪ್ ಉಟ್ತಾನಾಂ…ಘಡ್ಯೆನ್ ತೊ ಆಪ್ಲೆಂ ಬಾಯ್ಕ್ ಸ್ಟಾರ್ಟ್ ಕರಿಲಾಗ್ಲೊ.
ಆನಿ ತ್ಯಾ ಉಜ್ಯಾ ಜಿಬಾಂನಿ ಜಳ್ಚ್ಯಾ ಬೊಂಗ್ಲ್ಯಾಚ್ಯಾ ಭಂವಾರಿ ಥಾವ್ನ್ ಖಿಣಾನ್…ಪಯ್ಸ್ ಆನಿ ಪಯ್ಸ್ ಧಾಂವ್ಚ್ಯಾ ದಾಂವ್ಣೆರ್…ಆಪ್ಲ್ಯಾ ಬಾಯ್ಕಾಚೊ ವೇಗ್ ಚಡ್ ಆನಿ ಚಡ್ ಕರಿತ್ತ್ ಗೆಲೊ.
ಹ್ಯಾ ಧಾಂವ್ಣೆರ್…ತೊ ಏಕ್ ವರೆವಿಂಗಡ್ ನಿರ್ಜನ್ ಸುರಕ್ಶಿತ್ ಪಳೆತ್ತ್ ಆಸ್ಲ್ಲೊ. ಆನಿ ತಸಲೊ ಏಕ್ ಜಾಗೊ ತಾಕಾ ಮೆಳ್‌ಲ್ಲೊಚ್ಚ್…ತಾಣೆಂ ತಾಚೆಂ ಬಾಯ್ಕ್ ರಾವಯ್ಲೆಂ. ಆನಿ..
ತ್ಯಾ ಪರ್ದ್ಯಾ ಪಾಟ್ಲೊ ಅಪರಿಚಿತ್ ವೆಕ್ತಿ ಆನಿ ಆಪುಣ್ ಯೆದೊಳ್ ಮೊಬಾಯ್ಲ್ ಕೋಂಟೇಕ್ಟಾ ಖಾತಿರ್ ವಾಪಾರುನ್ ಆಸ್ಲೆಲೆಂ…ಮೊಬಾಯ್ಲ್ ಸಿಮ್ಮ್…
ಅಗಸ್ಟರಾನ್ ಮೊಬಾಯ್ಲಾ ಥಾವ್ನ್ ಭಾಯ್ರ್ ಕಾಡ್ಲೆಂ. ಆನಿ ಆಪ್ಲ್ಯಾ ಭದ್ರತಿ ಖಾತಿರ್…ಖಿಣಾನ್ ತೆಂ ಸಿಮ್ಮ್…ಎಕಾ ಫಾತ್ರಾರ್ ದವರ್ಲೆಂ. ಆನಿ ಆನ್ಯೇಕಾ ಫಾತ್ರಾನ್ ಧಾಡವ್ನ್ ಬಡವ್ನ್…ಚೂರಾನ್ ಚೂರ್ ಕರುನ್ ನಾಸ್ ಕೆಲೆಂ!.
ಆನಿ ಹ್ಯಾಕರ್ನೆ ಮುಖಾಂತರ್…ಪರ್ದ್ಯಾ ಪಾಟ್ಲ್ಯಾ ವೆಕ್ತಿಚೆಂ ಆನಿಂ ಅಗಸ್ಟರಾಚೆಂ ಸಂಪರ್ಕ್… ಸಾಸ್ಣಾಕ್ ಬಂದ್ ಜಾಲೆಂ.!.
ಆನಿ ಅಗಸ್ಟರ್…ಯೆದೊಳ್ ಪರ್ಯಾಂತ್ ಕೋಣ್ ಮ್ಹಣ್ ನೆಣಾಂ ಆಸ್ಚ್ಯಾ ತಾಕಾ ಪರ್ದ್ಯಾ ಪಾಟ್ಲೊ ಅಪರಿಚಿತ್ ಜಾವ್ನ್ ಆಸ್ಲೆಲ್ಯಾ…
ರಿಶಭಾಕ್…ತೊ ಸಸ್ಣಾಕ್ ವಿಸರ್ಲೊ.!!
***
ಹ್ಯಾ ಆಯಿನ್ನ್ ವೆಳಾ…
ತಾತ್ಕಾಲಿಕ್ ಜಾವ್ನ್ ಸರಳಾವಿಣೆಂ ಚಲಾತ್ತ್ ಆಸ್ಲೊಲ್ಲೊ…ರಿಶಭ್…
ಹ್ಯಾ ಕಾಳೊಕಾಚ್ಯಾ ರಸ್ತ್ಯಾರ್ ಸರಳಾ ಆದಾರ್ ನಾಸ್ತಾಂ, ಚಲಾತ್ತ್ ಆಸ್ಲ್ಲೊ. ಆನಿ ಚಲಾತ್ತ್ ಆನಿ ಚಲಾತ್ತ್…
ಥೊಡ್ಯಾ ವಳಾ ಆದಿಂ…ಆಪ್ಣೆಂ ಕ್ಲೈವಾಚ್ಯಾ ಬೊಂಗ್ಲ್ಯಾಕ್ ವೆಚ್ಯಾ ಆದಿಂ…ಆಪ್ಲೊ ತೊ ಸರಳ್ ಲಿಪವ್ನ್ ದವರ್ಲೆಲ್ಯಾ ಫಲಾಣ್ಯಾ ತ್ಯಾ ನಿರ್ಜನ್ ಜಾಗ್ಯಾಕ್ ಪಾವ್ಲೊ.
ಖಿಣಾನ್ ಥಂಯ್ ಥಾವ್ನ್…ಆಪ್ಣೆಂ ಲಿಪೊನ್ ದವರ್ಲೊಲೊ ತೊ ಸರಳ್ ವಿಂಚಿಲಾಗ್ಲೊ. ಆನಿ ಪರತ್ ಆಪ್ಲಿ ಚಾಲ್ ತ್ಯಾ ಸರಳಾ ಆವಾಜಾನ್ ಆರಂಭ್ ಕೆಲಿ.
‘ಟಾಂಯ್…ಟಾಂಯ್’…!.
***
ದುಸ್ರ್ಯಾ ದಿಸಾ ದೈನಿಕ್ ಪೇಪರಾಂ, ಟಿವಿ ಚ್ಯಾನೆಲ್ಯಾಂನಿಂ…ಲೊಕಾಂಚ್ಯಾ ವೊಂಟಾಂನಿಂ ತಶೆಂ, ಪೊಲಿಸ್ ವರ್ತುಲಾಂನಿಂ…ಹ್ಯೊ ದೋನ್ ಭಯಾನಕ್ ಉಜ್ಯಾ ಘಡಿತಾಂ ಆಶಾರ್ ಪಾಶಾರ್ ಜಾಯಿತ್ತ್ ಆಸ್‌ಲ್ಲಿಂ.
ಕ್ಲೋಡಿಯಾಚೆಂ ಕಾರ್ ದುರಂತ್…ಆನಿ ಕ್ಲೈವಾಚೊ ಬೊಂಗ್ಲ್ಯಾ ದುರಂತ್ ..
ಹೆಂ ದೊನೀಂ…ಸಗ್ಳ್ಯಾನ್ ಇತ್ಲ್ಯಾನ್ ವಿಸ್ತಾರುನ್‌ಚ್ಚ್ ಆಸ್ಲೆಲ್ಯಾ ತ್ಯಾ ದಿಸಾಂನಿಂ…
ಪೊಲಿಸ್ ಡಿಪಾರ್ಟ್‌ಮೆಂಟಾನ್…ಹ್ಯಾ ದಂದ್ವ್ ದುರಂತೆವಿಶಿಂ…ಬೋವ್ ಚುರುಕಾಯೆಚೆಂ ‘ಡಿಟೆಕ್ಟಿವ್’ ಸೊದ್ನಾಂ ಘಂಭೀರ್ ಥರಾನ್ ಆರಂಭ್ ಕೆಲ್ಲೆಂ.
ಅಸಲ್ಯಾ ವೆಳಾ…ರಿಶಭಾಚೊ ಸರಳಾಂ ಆವಾಜ್ ಮಾತ್ರ್ ಕೊಣಾಚಿಚ್ಚ್…ಕಿತೆಂಚ್ಚ್ ಪರ್ವಾನಾಸ್ತಾಂ…ಹರ್ಶೆಚೆಪರಿಂ ಶಹರಾಚ್ಯಾ ರಸ್ತ್ಯಾ ರಸ್ತ್ಯಾಂನಿ ಆವಾಜ್ ಕರಿತ್ತ್ ಆಸ್ಲ್ಲೊ.
ಅಶೆಂ ತೆಂ ಉಜ್ಯಾ ದುರಂತ್ ಘಡಿತ್ ಸಂಪುನ್ ತಿಸ್ರೊ ದೀಸ್ ಪಾಶಾರ್ ಜಾವ್ನ್…ಚವ್ತೊ ದೀಸ್ ಯೀ ಪಾಶಾರ್ ಜಾಲೊ. ಆನಿ ಪಾಂಚ್ವ್ಯಾದಿಸಾ…
ರಿಶಭಾಚೆಂ…ಕಾಳಿಜ್, ಮನ್, ಆತ್ಮೊ…ಕ್ಲೊಡಿಯಾಕ್ ವಿಸ್ರೊಂಕ್ ಸಖಾನಾಸ್ತಾಂ…ತಾಕಾ ಸೊಧುನ್ ಮ್ಹಳ್ಳೆಪರಿಂ…ರಸ್ತ್ಯಾರ್ ದೆದೆಸ್ಪರಾನ್ ಚಲಾತ್ತ್ ಆಸ್ತಾನಾಂ…
ತಾಚೆ ವೋಂಟ್… ‘ದೆವಾ ಮ್ಹಜೊ ಗುನ್ಯಾಂವ್ ಭೊಗ್ಸಿ. ಮ್ಹಜ್ಯಾ ಪಾತ್ಕಾ ಮುಕಾರ್ ತುಜೆಂ ಮುಖಮಳ್ ಲಿಪಯ್…ಆನಿ ಮಾಕಾ ಭೊಗ್ಸಿ…ದೆವಾ ಮಾಕಾ ಭೊಗ್ಸಿ’…ಅಶೆಂ ಆಪ್ಲೆಂ ಗುನ್ಯಾಂವ್ ಭೊಗ್ಸುಂಕ್ ಮಾಗಾತ್ತ್…ಆಸ್ ಲ್ಲೊ.!.ಅಸಲ್ಲ್ಯಾವೆಳಾ…
ಎಕಾಎಕಿ ಏಕ್ ಕಾರ್ ಥಟ್ಟ್ ಕರುನ್ ತಾಚ್ಯಾ ಲಾಗಿಂ…ಬೋವ್ ಲಾಗಿಂ ಯೇವ್ನ್ ಉಬೆಂ ಜಾಲೆಂ!. ಆತಾಂ…
ರಿಶಭ್ ಏಕ್ ಪಾವ್ಟಿಂ ಘಡ್ಭಡ್ಲೊ. ತರೀ…ತ್ಯಾಕುಶಿಂ ತಾಣೆಂ ಕಸಲೆಂಚ್ಚ್ ಗುಮಾನ್ ದಿಲೆಂನಾಂ. ಆನಿ ಯೆದೊಳ್-ಚ್ಚ್ ತಾಣೆಂ ನಿಚೆವ್ ಕೆಲ್ಲ್ಯಾಪರಿಂ…ಕಸಲ್ಲೊಚ್ಚ್ ಘುಸ್ಪಡ್…ಭೆಂ ವೆಕ್ತ್ ಕರಿನಾತ್ಲೆಲಿ ಆಪ್ಣಾಚಿ ಮಾಮೂಲ್ ಚಾಲ್…ಚಲಾತ್ತ್ …ಪೊಲಿಸಾಂಚ್ಯಾ ಸವಾಲಾಕ್ ಜಾಪ್ ವಿಂಚಿತ್ತ್ …ಚಾಲ್ ಮುಂದರುನ್ ರಾವ್ಲೊ.
ತ್ಯಾಚ್ಚ್ ವೆಳಾ…ತಾಕಾ ಆಯ್ಕಾಲೆಂ…
“ರಿಶಭ್…!”
► ಮುಕಾರುನ್ ಆಸಾ…
