ಎಮ್ಸಿಸಿ ಬ್ಯಾಂಕಾಚ್ಯಾ 2022 ವ್ಯಾ ವರ್ಸಾಚೊ ವಾರ್ಷಿಕ್ ಸಾಧನಾಚೊ ವಿಮರ್ಸೊ 2022 ಜೂನ್ 25ವೆರ್ ಬ್ಯಾಂಕಾಚ್ಯಾ ಶ್ರೀ ಪಿಎಫ್ಎಕ್ಸ್ ಸಲ್ಡಾನ್ಹಾ ಮೆಮೊರಿಯಲ್ ಹೊಲಾಂತ್ ಚಲವ್ನ್ ವೆಲೊ. ಕಂಕನಾಡಿ ಶಾಖ್ಯಾಚ್ಯಾ ಸಿಬಂದೆನ್ ಮಾಗ್ಣ್ಯಾ ವಿಧಿ ಚಲವ್ನ್ ವರ್ಚಾ ಸವೆಂ ವಿಮರ್ಸೊ ಆರಂಭ್ ಜಾಲೊ.
ಕಿನ್ನಿಗೊಳಿ ಫಿರ್ಗಜ್ ವಿಗಾರ್ ಮಾ|ಬಾ| ಫಾವುಸ್ತಿನ್ ಲೋಬೊ ಹಾಣಿಂ ದಿವೊ ಪೆಟವ್ನ್ ಕಾರ್ಯಾಚೆಂ ಉಗ್ತಾವಣ್ ಕೆಲೆಂ ಆನಿ ಕಾರ್ಯಾಕ್ ಭಾಗ್ ಘೆಂವ್ಕ್ ಅವ್ಕಾಸ್ ಕರ್ನ್ ದಿಲ್ಲ್ಯಾ ಬ್ಯಾಂಕಾಚ್ಯಾ ಆಡಳ್ತ್ಯಾ ಮಂಡಳೆಚೊ ಉಪ್ಕಾರ್ ಬಾವುಡ್ನ್ ಬರೆಂ ಮಾಗ್ಲೆಂ. ಅಪ್ಲ್ಯಾ ಪ್ರಾಸ್ತಾವಿಕ್ ಉತ್ರಾನಿಂ, ಬ್ಯಾಂಕ್ ಹರ್ ಎಕಾ ವ್ಯಕ್ತಿಚ್ಯಾ ಜಿಣ್ಯೆಂತ್ ಗರ್ಜೆಚೆಂ ಜಾವ್ನಾಸಾ, ಗ್ರಾಹಕಾಂಚಿ ಅಭಿವೃದ್ದಿ ಜಾಲ್ಯಾರ್ ಮಾತ್ರ್ ಬ್ಯಾಂಕಾಚಿ ಅಭಿವೃದ್ದಿ ಜಾಲ್ಲೆಬರಿ, ಬ್ಯಾಂಕಿಂಗ್ ಶೆತಾಂತ್ ಯಶಸ್ವಿ ಅಪ್ಣಾಯ್ಜೆ ತರ್ ಗ್ರಾಹಕಾಂಚಿ ಖುಶಿ ಆನಿ ತೃಪ್ತಿ ಬೋವ್ ಗರ್ಜೆಚಿ, ವಾವ್ರಾಡ್ಯಾನಿಂ ಸಮರ್ಪಿತ್ ಮನೋಭಾವಾನ್ ದುಸ್ರ್ಯಾಂಚ್ಯಾ ಬರ್ಯಾಪಣಾಖಾತಿರ್ ಮೊವಾಳ್ ಸೆವಾ ದಿಲ್ಲ್ಯಾ ಮುಖಾಂತ್ರ್ ಬ್ಯಾಂಕಾಚ್ಯಾ ಪ್ರಗತೆಕ್ ಆಪ್ಲಿ ದೆಣ್ಗಿ ದಿವ್ಯೆತ್. ತ್ಯಾ ದೆಕುನ್ ಗ್ರಾಹಕಾಂಕ್ ಉತ್ತೀಮ್ ಸೆವಾ ದಿಂವ್ಚಾ ಮುಖಾಂತ್ರ್ ಬ್ಯಾಂಕಾಚ್ಯಾ ಅಭಿವೃದ್ದಿ ಖಾತಿರ್ ವಾವ್ರುಂಕ್ ತಾಣಿಂ ಉಲೊ ದಿಲೊ.
ಅಧ್ಯಕ್ಷ್ ಸ್ಥಾನ್ ಘೆತ್ಲ್ಯಾ ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊ ಉಲವ್ನ್ ಗ್ರಾಹಕಾಂ ಮಧೆಂ ಬರೊ ಬ್ಯಾಂಕಿಂಗ್ ಸಂಬಂಧ್ ದವರ್ನ್ ವಾವ್ರುಂಕ್ ಬ್ಯಾಂಕಾಚ್ಯಾ ಸಿಬ್ಬಂದೆಕ್ ಉಲೊ ದಿಲೊ. ಬ್ಯಾಂಕಾಚ್ಯಾ ಪ್ರಗತೆಕ್ ರೀಣ್ ದಿಂವ್ಚೆ ಭೋವ್ ಗರ್ಜೆಚೆಂ, ದೆಕುನ್ ಬರ್ಯಾ ಫಳಾಭರಿತ್ ರೀಣಾಚೊ ಪ್ರಮಾಣ್ ಚಡಂವ್ಕ್ ಸರ್ವ್ ಸಿಬಂದೆನ್ ಮುಕ್ಲ್ಯಾ ದಿಸಾನಿಂ ಚಡಿತ್ ಪ್ರಯತ್ನ್ ಕರಿಜಾಯ್, ತಶೆಂಚ್ ಬ್ಯಾಂಕಾಕ್ ಯೆಂವ್ಚ್ಯಾ ಹರ್ಯೆಕಾ ಗ್ರಾಹಕಾಕ್ ಬರೊ ಸ್ವಾಗತ್ ದೀವ್ನ್ ಉತ್ತೀಮ್ ಸೆವಾ ದಿಜಾಯ್ ಮ್ಹಣ್ ಉಲೊ ದಿಲೊ. 2021 -22 ವರ್ಸಾ ಬ್ಯಾಂಕಾಚ್ಯಾ ಪ್ರಗತೆಕ್ ಕಾರಣ್ ಜಾಲ್ಲ್ಯಾ ಶಾಖ್ಯಾಚ್ಯಾ ಮ್ಯಾನೆಜರ್ ಆನಿ ಸಿಬಂದೆಕ್ ಶಾಭಾಷ್ಕಿ ಪಾಟವ್ನ್ 2022 – 23 ವರ್ಸಾ ಬ್ಯಾಂಕಾಚ್ಯಾ ಶಾಖ್ಯಾಂಕ್ ದಿಲ್ಲೊ ವಾವ್ರ್ ಫಳಾಭರಿತ್ ಕರುಂಕ್ ಸರ್ವ್ ಸಿಬಂದೆನ್ ಸಹಕಾರ್ ಆನಿ ಪಾಟಿಂಬೊ ದೀಜಾಯ್ ಮ್ಹಣ್ ಉಲೊ ದಿಲೊ.
ಕೆನರಾ ಬ್ಯಾಂಕಾಚೊ ನಿವೃತ್ತ್ ವ್ಯವಸ್ಥಾಪಕ್ ತಶೆಂಚ್ ಬ್ಯಾಂಕಾಚೊ ಸಲಹೆಗಾರ್ ಮ್ಯಾಕ್ಷಿಮ್ ಕ್ಯಾಸ್ತೆಲಿನೊ ಹಾಣಿಂ ಬ್ಯಾಂಕಾಂತ್ ಜಾಗ್ರತಿ ಮ್ಹಳ್ಳ್ಯಾ ವಿಷಯಾಚೆರ್ ಮಾಹೆತ್ ದಿಲಿ. ಸರ್ವ್ ಸಿಬಂದೆಕ್ ಬ್ಯಾಂಕಾಂತ್ ಅಸ್ಲ್ಲ್ಯಾ ಸರ್ವ್ ಸೌಲಭ್ಯ ವಿಶಿ ಜಾಣ್ವಾಯ್ ಅಸಾಜೆ. ಬ್ಯಾಂಕಾಂತ್ ಅಸ್ಚ್ಯಾ ಸೌಲಭ್ಯ ಅನಿ ಬ್ಯಾಂಕಾಂತ್ ಪಾಳಿಜಾಯ್ ಜಾಲ್ಲ್ಯಾ ನೀತಿ-ನಿಯಮಾಂ ವಿಶಿಂ ಜಾಣ್ವಾಯ್ ಅಸ್ಲ್ಯಾರ್ ಮಾತ್ರ್ ಗ್ರಾಹಕಾಂಕ್ ಘಳಾಯ್ ನಾಸ್ತಾಂ ಸೆವಾ ದೀಂವ್ಕ್ ಸಾಧ್ಯ್ ಜಾತಾ ಮ್ಹಣ್ ತಾಣೆಂ ತಿಳ್ಸಿಲೆಂ.
ಜನರಲ್ ಮ್ಯಾನೇಜರ್ ಸುನಿಲ್ ಮಿನೇಜಾನ್ 2021-22ವ್ಯಾ ಆರ್ಥಿಕ್ ವರ್ಸಾಚಿ ಪ್ರಗತಿ ಪ್ರಸ್ತುತ್ ಕರ್ನ್ ಮುಕ್ಲ್ಯಾ ವರ್ಸಾ ಬ್ಯಾಂಕಾನ್ ಯೆವ್ಜಿಲ್ಲಿಂ ಯೋಜನಾಂ ಜಾರಿ ಕರಿಜಾಯ್ ಮ್ಹಣ್ ಉಲೊ ದಿಲೊ. 2021-22ವ್ಯಾ ವರ್ಸಾ ಶಾಖ್ಯಾನಿ ಕೆಲ್ಲ್ಯಾ ಸಾಧನಾಚೊ ಸವಿಸ್ತಾರ್ ವಿವರ್ ದೀವ್ನ್ ಪಾಂಚ್ ಶಾಖ್ಯಾನಿಂ ಕೆಲ್ಲ್ಯಾ ಉತ್ತೀಮ್ ವಾವ್ರಾಚೊ ವಿವರ್ ದೀವ್ನ್ ತಾಂಕಾ ಶಾಭಾಸ್ಕಿ ಪಾಟಯ್ಲಿ.
ಪದ್ಮಶ್ರೀ ಪುರಸ್ಕ್ರತ್ ಹರೆಕಳ ಹಾಜಬ್ಬಾಕ್ ಬ್ಯಾಂಕಾಚ್ಯಾ ಆಡಳ್ತೆ ಮಂಡಳಿ ಆನಿ ಸಿಬಂದೆ ವರ್ಗಾ ತರ್ಫೆನ್ ಪುಲಾಂಚೊ ತುರೊ, ಉಡಾಸಾಚಿ ಕಾಣಿಕ್ ಶಾಲ್ ಪಾಂಗ್ರುನ್ ಆನಿ ದುಡ್ವಾಚಿ ಕುಮಕ್ ದೀವ್ನ್ ಸನ್ಮಾನ್ ಕೆಲೊ. ಆಪ್ಲ್ಯಾ ಉಲೊವ್ಪ್ಯಾಂತ್ ಅಪ್ಣಾಕ್ ಸನ್ಮಾನ್ ಕೆಲ್ಲ್ಯಾ ಬ್ಯಾಂಕಾಚೊ ಆನಿ ಸಂಬಂಧ್ ಜಾಲ್ಲ್ಯಾ ಸರ್ವಾಂಚೊ ತಾಣೆಂ ಉಪ್ಕಾರ್ ಬಾವುಡ್ಲೊ.
2021-22 ವರ್ಸಾ ಉತ್ತೀಮ್ ಸಾಧನ್ ಕೆಲ್ಲ್ಯಾ ಕಂಕನಾಡಿ, ಕುಲ್ಶೇಕರ್, ಬಜ್ಪೆ, ಉಳ್ಳಾಲ್ ಆನಿ ಕಾರ್ಕೊಳ್ ಶಾಖ್ಯಾಚ್ಯಾ ಮ್ಯಾನೇಜರ್, ಕ್ರಮ್ ಪ್ರಕಾರ್ ಐಡಾ ಪಿಂಟೊ, ಜ್ಯೋತಿ ವಿಲ್ಮಾ ಸಿಕ್ವೇರಾ, ಕ್ಲಿಫರ್ಡ್ ಡಿಕೋಸ್ತಾ, ಜಸಿಂತಾ ಫೆರ್ನಾಂಡಿಸ್ ಆನಿ ರಾಯನ್ ಪ್ರವೀಣ್ ಹಾಂಕಾ ವಯುಕ್ತಿಕ್ ಥರಾನ್ ಶಾಲ್ ಪಾಂಗ್ರುನ್, ಫುಲಾಂ ತಶೆಂಚ್ ಉಡಾಸಾಚಿ ಕಾಣಿಕ್ ದೀವ್ನ್ ಸನ್ಮಾನ್ ಕರ್ನ್ ಶಾಖ್ಯಾಚ್ಯಾ ಸರ್ವ್ ಸಿಬಂದೆ ಸವೆ ಕಂಕನಾಡಿ, ಕುಲ್ಶೇಕರ್, ಬಜ್ಪೆ, ಉಳ್ಳಾಲ್ ಆನಿ ಕಾರ್ಕೊಳ್ ಶಾಖ್ಯಾಂಕ್ ಉತ್ತೀಮ್ ಸಾಧನ್ ಪ್ರಶಸ್ತಿ ಹಸ್ತಾಂತರ್ ಕೆಲಿ.
ಪಿಯುಸಿಂತ್ 91.60 ಠಕ್ಕೆ ಅಂಕ್ ಕಾಡ್ಲ್ಲ್ಯಾ ನಿರ್ದೇಶಕಿ ಡಾ| ಪ್ರೀಡಾ ಪ್ಲಾವಿಯ ಡಿಸೋಜಚಿ ಧುವ್ ರೇಶಾಲ್ ಎವೆಲಿನಿಯ ರೊಡ್ರಿಗಸ್, ಎಸ್ಎಸ್ಎಲ್ಸಿಂತ್ 99.84 ಠಕ್ಕೆ ಅಂಕ್ ಕಾಡ್ಲ್ಲ್ಯಾ ಬ್ಯಾಂಕಾಚ್ಯಾ ಆಡಳ್ತ್ಯಾ ಧಪ್ತರಾಚೊ ಅಕೌಂಟೆಂಟ್ ಲ್ಯಾನ್ಸಿ ಲೋಬೊಚಿ ಧುವ್ ಲವ್ಯಾ ರಿಶಾಲ್ ಲೋಬೊ, ಪಿಯುಸಿಂತ್ 95.50 ಠಕ್ಕೆ ಅಂಕ್ ಕಾಡ್ಲ್ಲ್ಯಾ ಕುಂದಾಪುರ ಶಾಖಾಚಿ ಸಿಬ್ಬಂದಿ ಜ್ಯೋತಿ ಬಾರೆಟ್ಟೊಚೊ ಪೂತ್ ಪ್ರಜ್ವಲ್ ಪೀಟರ್ ಬಾರೆಟ್ಟೊ ಆನಿ ಎಸ್ಎಸ್ಎಲ್ಸಿಂತ್ 97.76 ಠಕ್ಕೆ ಅಂಕ್ ಕಾಡ್ಲ್ಲ್ಯಾ ಕಾರ್ಕೊಳ್ ಶಾಖಾಚಿ ಅಕೌಂಟೆಂಟ್ ಅನಿತಾ ಡಿಸೋಜಚಿ ಧುವ್ ಸಿಯಾನ್ನಾ ಅಂಬ್ರೊಸಿನ ಡಿಸೋಜ ಹಾಂಕಾ ಶಾಲ್ ಪಾಂಗ್ರುನ್, ಫುಲಾಂ ಫಳಾಂ ತಶೆಂಚ್ ಯಥಿಸ್ತಿಕಾ ದೀವ್ನ್ ಮಾನ್ ಕೆಲೊ.
2022ವ್ಯಾ ವರ್ಸಾ ಭಾಂಗ್ರಾಳೊ ಜಲ್ಮಾ ದೀವಸ್ ಆಚರಣ್ ಕೆಲ್ಲ್ಯಾ ಆನಿ ಕರ್ಚ್ಯಾ ಸಿಬಂದೆಕ್ ಫುಲಾಂ ಆನಿ ಉಡಾಸಾಚಿ ಕಾಣಿಕ್ ದೀವ್ನ್ ಜಲ್ಮಾ ದಿಸಾಚೆ ಶುಭಾಷಯ್ ಪಾಟಯ್ಲೆ.
ನಿರ್ದೇಶಕ್ ಅನಿಲ್ ಪತ್ರಾವೊ, ಡೆವಿಡ್ ಡಿ’ಸೋಜ, ಹೆರಾಲ್ಡ್ ಮೊಂತೇರೊ, ರೋಶನ್ ಡಿಸೋಜ, ಮಾರ್ಸೆಲ್ ಡಿಸೋಜ, ಎಲ್ರೋಯ್ ಕ್ರಾಸ್ಟೊ, ಐರಿನ್ ರೆಬೆಲ್ಲೊ, ಡಾ. ಫ್ರೀಡಾ ಡಿಸೋಜಾ, ಶರ್ಮಿಳಾ ಮೀನೇಜಸ್, ಆಲ್ವಿನ್ ಮೊಂತೇರೊ, ಫೆಲಿಕ್ಸ್ ಡಿಕ್ರೂಜ್, ವ್ರತ್ತಿಪರ್ ನಿರ್ದೇಶಕ್ ಸಿ.ಜಿ.ಪಿಂಟೊ, ಸುಶಾಂತ್ ಸಲ್ಡಾನ್ಹಾ, ಉಪ ಮಹಾಪ್ರಬಂಧಕ್ ರಾಜ್ ಎಫ್. ಮಿನೇಜಸ್ ಹಾಜರ್ ಆಸ್ಲ್ಲೆ.
ಶಿರ್ವ ಶಾಖ್ಯಾಚೊ ಸಿಬಂದಿ ನೆವಿಲ್ ಡಿಸೋಜನ್ ಕಾರ್ಯೆಂ ಚಲವ್ನ್ ವೆಲೆಂ, ಜನರಲ್ ಮ್ಯಾನೆಜರ್ ಸುನಿಲ್ ಮಿನೇಜಾನ್ ಉಪ್ಕಾರ್ ಬಾವುಡ್ಲೊ.
