ಹಾಸನ್ ಶಹರಾ ಭಾಯ್ರ್‌ ವಸ್ತಿ ಕರ್ನ್‌ ಆಸ್ಚಾ ಹಾಂವೆ ಕಾಮಾಕ್ ಲಾಗೊನ್‌ ದಿಸಾಕ್‌ ತೀನ್-ಚಾರ್ ಪಾವ್ಟಿಂ, ಪಾವ್ಟಿಂಕ್‌ ಆಟ್‌ ಕಿ.ಮೀ., ಬೈಕಾರ್ ಶ್ಹೆರಾಕ್ ಯೆಂವ್ಚೆಂ, ಪಾಟಿಂ ವೆಚೆಂ ಅನಿವಾರ್ಯ್‌ ಜಾವ್ನಾಸಾ. ವಾಟೆರ್‌ ಸದಾಂಯ್ ಲಿಫ್ಟ್‌ ವಿಚಾರ್ನ್‌ ಹಾತ್‌ ಉಕಲ್ಚೆ ಸಬಾರ್. ಇಸ್ಕೊಲಾಚಿಂ ಭುರ್ಗಿಂ, ದಿಸಾ ವಾವ್ರಾಚೆ, ರೈತ್‌ ಆನಿ ಕೋಣ್‌ ಎಕ್ಲೊಂಚ್‌ ಆಸ್ತಾನಾ ಲಿಫ್ಟ್‌ ವಿಚಾರ್ತೆಲ್ಯಾಂಕ್‌ ಹಾಂವೆ ಕೆದಿಂಚ್‌ ನೆಗಾರ್ಲೆಲ್ಲೆಂ ನಾ. ಲಿಫ್ಟ್‌ ವಿಚಾರ್ತೆಲೆಲೆ ಚಡಾವತ್‌ ಸಕ್ಕಡ್‌ ಶ್ಹೆರಾಂತ್‌ ತುರ್ತ್‌ ಕಾಮ್ ಆಸ್ಚೆಚ್. ಸಬಾರ್ ಪಾವ್ಟಿಂ ತಾನೆಲ್ಲ್ಯಾಂಕ್‌ ವೈನ್‌ ಶೊಪಾಂಕ್‌ ಪಾವಾಯಿಲ್ಲೆಂಯ್‌ ಆಸಾ!
ತ್ಯಾ ಎಕಾ ದಿಸಾ ಸಾಂ. ಜುಜೆ ಇಸ್ಕೊಲಾಚಾ ಮುಕ್ಲ್ಯಾನ್ಂಚ್‌ ವಚೊಂಕ್‌ ಆಸುಲ್ಲೆಂ. ಮ್ಹಜೆಂಚ್‌ alma mater. ಹಾಂವ್ ಶಿಕ್ತಾನಾ ಬೋವ್‌ ದುಬ್ಳೆಂ ದಿಸ್ತಾಲೆಂ. ತೊ ಕಾಳ್‌ ಉತ್ರೊನ್‌ ಘೆಲಾ. ಸಗ್ಳ್ಯಾನಿಂ ಪ್ರಗತಿ ಜಾಲ್ಯಾ. ಇಸ್ಕೊಲ್‌ ಅತ್ಯಾಧುನಿಕ್‌ ಜಾಲಾಂ. ಚೆರ್ಕ್ಯಾಂಚೆ ಇಸ್ಕೊಲ್‌ ಆಸುಲ್ಲೆಂ ತೆಂ ಆತಾಂ ಚಲಿಯಾಂಕೀ ಘೆತಾತ್. ಇಸ್ಕೊಲ್‌ ಮ್ಹಣೊಂನಂಚ್‌ ನ್ಹಯ್. ಹಾಂವ್ ಜಲ್ಮಾಲ್ಲೊ ಗಾಂವ್, ಆತಾಂ ಫಾತಿಮಾಪುರ. ಥೊಡ್ಯಾ ವರ್ಸಾಂ ಉಪ್ರಾಂತ್ ತೆಂ ದುಸ್ರೆಂ ಕಸಲೆಂ ನಾಂವ್‌ ವ್ಹಾವೊವ್ನ್‌ ಘೆತಾ ಪಳೆಜೆ. ಸಕ್ಟಾಂಚಿ ಅಸ್ಮಿತಾಯ್ ಜಾಗೃತ್‌ ಜಾಲ್ಯಾ! ಆರ್ಥಿಕ್‌ , ಶೈಕ್ಷಣಿಕ್‌ ಪ್ರಗತಿ ಜೊಡುನ್ ಆಸ್ಚೆ ಬರಿಂಚ್‌ ಮ್ಹನಿಸ್‌ ಆಪ್ಲಿ ಅಸ್ಮಿತಾಯ್ ಪುರಾಣಾಂತ್ ಸೊದುನ್‌ ಆಸಾ!
ಇಸ್ಕೊಲಾಚಾ ಗೇಟಿ ಮುಕಾರ್‌ ಪಾವ್ತೆಚ್‌ ಚಾರ್ ಪಾಂಚ್ ವಿದ್ಯಾರ್ಥಿನಿಂ ಮ್ಹಜಾ ಬೈಕಾಕ್‌ ವೆಡೊ ಘಾಲೊ.
ʼಪಳೆಯಾ ಭುರ್ಗ್ಯಾನೊಂ, ಹಾಂವ್ ಅಸಲ್ಯಾ ವಾಟೆರ್‌ ವೆತೆಂ ಆಸಾಂ. ಎಕ್ಲ್ಯಾನಂಚ್‌ ಚಡ್ಚೆಂ ಆಸ್ಲ್ಯಾರ್‌ ಚಡ್ಯೆತ್.ʼ
ಹ್ಯಾ ಚೆರ್ಕ್ಯಾಂ ಮಧೆಂ ಚಿಕ್ಕೆ ಬಳೀಷ್ಟ್‌ ಆಸುಲ್ಲೊ ಚೆರ್ಕೊ ಉರ್ಲೆಲ್ಯಾಂಕ್‌ ದೆಗೆಕ್‌ ಲೊಟುನ್‌ ಬಾಯ್ಕಾರ್‌ ಚಡೊನ್‌ ಬಸ್ಲೊ. ‘ಚಲ್ಯಾಂ, ಅಂಕಲ್.’ ತಾಣೆ ಹುಕುಮ್‌ ದಿಲಿ. ಹಾಂವೆ ಬೈಕ್‌ ಚಾಲೂ ಕೆಲೆಂ.
ಹಾಂವೆ ಆನಿಕೀ ಚವ್ತಿ ಗೇರ್‌ ಘಾಲುಂಕ್‌ ನಾ. ಬೋವ್ಶಾ ಚಾರ್ಶಿಂ ಮೀಟರಾಂ ಗೆಲಾಂ. ಡಿಸ್ಟ್ರಿಕ್ಟ್‌ ಸ್ಟೇಡಿಯಮಾ ಲಾಗ್ಗಿಂ ಪಾವ್ಲಾಂ ಇತ್ಲೊಂಚ್.
ಚೆರ್ಕೊ, ‘ಅಂಕಲ್, ರಾವಯ್, ರಾವಯ್!! ಹಾಂವ್ ಹಾಂಗಾಚ್‌ ದೆಂವ್ಚೊಂ’ ಮ್ಹಣೊನ್‌ ಬೊಬಾಟುಂಕ್‌ ಲಾಗ್ಲೊ. ಫಕತ್‌ ಸ್ಟೇಡಿಯಮಾ ಲಾಗ್ಗಿಂ ದೆಂವೊಂಕ್‌ ಹ್ಯಾ ಚೆರ್ಕ್ಯಾನ್‌ ಲಿಫ್ಟ್‌ ವಿಚಾರ್ಲೆಂ ನೆ ಮ್ಹಣೊನ್‌ ರಾಗಾನ್‌ ಕಡ್ಕಡೊನ್‌ ಬ್ರೇಕ್‌ ಘಾಲಿತ್ತ್‌ ಪಾಟಿಂ ಘುಂವ್ಲೊಂ. ಹಾಂವೆ ಬೈಕ್‌ ಥಾಂಬಾಂವ್ಚೆ ಪಯ್ಲೆಂಚ್ ತೊ ಚೆರ್ಕೊ ದೆಂವೊನ್‌ ‘ಥ್ಯಾಂಕ್ಯೂ ಅಂಕಲ್’ ಮ್ಹಣೊನ್‌ ಖಿಣಾನ್‌ ಮಾಯಾಗ್‌ ಜಾಲೊ. ಆತಾಂಚಾ ಭುರ್ಗ್ಯಾಂಕ್‌ ಜಾಂವ್‌ ತರ್ನಾಟ್ಯಾಂಕ್‌ ಕಿತೆಂ ಜಾಲಾಂ ಗಾಯ್? ಸದಾಂ ಹಾರ್ಲಿಕ್ಸ್‌, ಬೋರ್ನ್‌ವಿಟಾ ಪಿಯೆಂವ್ಚಾ ಹ್ಯಾ ಭುರ್ಗ್ಯಾಂಕ್‌ ಏಕ್ ಅರ್ಧೆಂ ಕಿ.ಮೀ. ಯೀ ಚಲೊಂಕ್‌ ನಾಕಾ!?
ಯಾದೇಂ…
ಮ್ಹಾಕಾ ಮ್ಹಜಾ ಪ್ರಾಥಮಿಕ್‌ ಇಸ್ಕೊಲಾಚಾ ದಿಸಾಂಚೊ ಉಡಾಸ್‌ ಆಯ್ಲೊ.
ಭಾರತಾಕ್‌ ಸ್ವಾತಂತ್ರ್‌ ಲಾಬ್‌ಲ್ಲೆಂ ತರೀ ಗೊರ‍್ಯಾ ಸಾಯ್ಬಾಂಚಾ ಆಡಳ್ತ್ಯಾಖಾಲ್‌ ಆಸ್ಚಾ ಕಾಫ್ಯೆ ತೊಟಾಂತ್‌ ಮ್ಹಜೊ ಪಪ್ಪಾ ರೈಟರ್‌ ಜಾವ್ನ್ ಘೊಳ್ತಾಲೊ. ಆಮಿಂ ವಸ್ತಿ ಕರುನ್ ಆಸ್ಚ್ಯಾ ತೊಟಾಚಾ ಘರಾ ಥಾವ್ನ್ ಅಡೇಜ್‌ – ತೀನ್ ಕಿ.ಮೀ., ಅಂತರಾರ್‌ ‘ಮೂಗಲಿ’ ನಾಂವಾಚಾ ಗಾಂವಾಂತ್‌, ಪಯ್ಲ್ಯಾ ಕ್ಲಾಸಿ ಥಾವ್ನ್ ಚವ್ತೆ ಪರ್ಯಾಂತ್ ಪ್ರಾಥಮಿಕ್‌ ಇಸ್ಕೊಲ್‌ ಆಸುಲ್ಲೆಂ. ಏಕ್‌ಚ್‌ ಕೂಡ್‌, ಎಕ್‌ಚ್‌ ಮಾಸ್ತೆರ್. ಮಾಸ್ತೆರ್ ತಾಲ್ಲೂಕ್‌ ಕೇಂದ್ರ್‌ ಸಕ್ಲೆಶ್ಪುರ್‌ ಥಾವ್ನ್ ಸದಾಂ ಬಸ್ಸಾರ್ ಯೆತಾಲೊ. ಆಮಿಂಯ್‌, ಎಸ್ಟೆಟಿಚಿಂ ಸಾತಾಟ್‌ ಭುರ್ಗಿಂ ತ್ಯಾಚ್ ವಗ್ತಾ ಬಸ್ಸ್‌ ಸ್ಟೊಪಾಕ್‌ ಪಾವ್ತೆಲ್ಯಾಂವ್.
ಮಾಸ್ತೆರ್ ಬಸ್ಸಾರ್ ಥಾವ್ನ್ ದೆಂವ್‌ಲ್ಲೊಚ್‌ ತಾಕಾ ಉಕಲ್ನ್‌ ವ್ಹರ್ಚೆಂ ಏಕ್ ಸೊಡ್ನ್‌ ತಾಣಿ ಹಾಡ್ಚೊ ದುಸ್ರ್ಯೊ ಸಕ್ಕಡ್‌ ವಸ್ತು ಪಂತಾಟಾರ್‌ ಮ್ಹಳ್ಳೆ ಬರಿಂ ಆಮಿಂ ಭುರ್ಗಿಂ ಘೆವ್ನ್‌ ಕಿಂದರಿ ಜೋಗಿ ಪಾಟ್ಲ್ಯಾನ್‌ ವೆಚಾ ಉಂದ್ರಾಂ ಬರಿಂ ತಾಚೊ ಪಾಟ್ಲಾವ್‌ ಇಸ್ಕೊಲಾ ಕುಶಿಕ್ ಕರ್ತೆಲ್ಯಾಂವ್. ಬಸ್ಸ್‌ ಸ್ಟೊಪಾರ್‌ ಥಾವ್ನ್ ಇಸ್ಕೊಲಾಕ್‌ ಸುಮಾರ್ ದೇಡ್‌ ಕಿ.ಮೀ. ಅಂತರ್‌ ಆಸುಲ್ಲೊ. ಆಮ್ಚೊ ಮಾಸ್ತೆರ್ ಆಮ್ಚಾ ಹಾತಿಂ ಕಿತೆಂ ಸೊಂಪಯ್ಲ್ಯಾರೀ ತಾಚಿ ಭುತಿ ಮಾತ್ರ್‌ ಅಪ್ಡೊಂಕ್‌ ದೀನಾತ್ಲೊ! ಆಮ್ಚಿ ಸಾವ್ಳಿಯ್‌ ತಾಚಾ ಭುತಿಯೆರ್‌ ಪಡಾನಾತ್ಲೆ ಬರಿಂ ಜಾಗ್ರೂತ್ಕಾಯೆನ್‌ ಆಸ್ತಾಲೊ. ತ್ಯಾ ಫುಡೆಂ ಹ್ಯಾ ‘ಅಪಡನಾಸ್ಚಾ’ ವಿಶಿಂ ಹಾಂವ್ ನೆಣಾಸ್ಲೊಂ. ಆಮಿಂ ಭುರ್ಗಿಂ ಚಡಾವತ್‌ ತೊಟಾಂತ್‌ ಘೊಳ್ತೆಲ್ಯಾಂಚಿ. ದಲಿತ್‌ ತುಳು, ತಮಿಳ್‌ ತಶೆಂ ವಾಸೆ ವೊಳ್ಚಾ ‘ಮೇದರು’ ಮ್ಹಳ್ಳ್ಯಾಪಾಟಿಂ ಉರ್ಲೆಲ್ಯಾ ಜಾತಿಚಾ ಕುಟ್ಮಾಂಚಿ ಜಾವ್ನಾಸ್ಲ್ಯಾಂವ್. ಖರಿ ಗಜಾಲ್‌ ಕಿತೆಂ ಮ್ಹಳ್ಯಾರ್ ತ್ಯಾ ವಗ್ತಾ ಆಮ್ಚಾ ಅವಯ್‌ ಬಾಪಾಂಯ್ಕ್‌ ಆಮ್ಚಾ ಶಿಕ್ಪಾ ವಿಶಿಂ ವಿಶೇಸ್‌ ಉಮೆದ್‌ ನಾತ್ಲಿ. ತಾಂಕಾ ಆಮ್ಕಾಂ ಕಲೆಕ್ಟರ್‌, ಇಜ್ನೆರ್‌ ವ ದಾಕ್ತೆರ್‌ ಕರ್ಚಿ ಆಕಾಂಕ್ಷಾ ಬಿಲ್ಕುಲ್‌ ನಾತ್ಲಿ. ದಿಸಾಚೆಂ ತರೀ ಇಸ್ಕೊಲ್‌ ಮ್ಹಳ್ಳೆಲ್ಯಾ ಎಕಾ ಜಯ್ಲಾಂತ್‌ ಆಸೊಂದಿತ್‌ ಮ್ಹಳ್ಳೊ ಮನೋಭಾವ್‌ ತಾಂಚೊ. ತ್ಯಾ ವಗ್ತಾ, ಚಡಾವತ್‌ ವ್ಹಡಾನಿಂ ಉಲ್ಲೇಕ್‌ ಕರ್ಚಿ ಆನಿ ಆಮ್ಕಾಂ ಬಾಯ್ಪಾಟ್‌ ಜಾಲ್ಲಿ ಗಾದ್‌ ಮ್ಹಳ್ಯಾರ್: ‘ಜೋಕ್ಲು ಇತ್ತಿನಾಡೆ ಎನ್ನಾನ್ನ್‌ ಕಾಂಪೊಡ್ಚಿ.’ ಮ್ಹಳ್ಳಿ. ಗೊಟೊ ಭರ್‌ ಗೊರ್ವಾಂ ಆಸುಲ್ಲೆ ಬರಿಂ, ಎಕಾ ಘರಾ ಸಾತಾಟ್‌ ಭುರ್ಗಿಂ ಆಸ್ತಾಲಿಂ. ಸನ್ವಾರ್‌ ಆಯ್ತಾರ್‌ ಆಯ್ಲೊ ಮ್ಹಳ್ಯಾರ್ ಆಮ್ಚಾ ವ್ಹಡಿಲಾಂಕ್‌ ಮಸ್ತು ಕಿರ್ಕಿರಿ ಜಾತಾಲಿ.
ಇಸ್ಕೊಲಾಕ್‌ ವೆಚಿ ಆನಿ ಪಾಟಿಂ ಯೆಂವ್ಚಿ ಚಡುಣೆ ಸ ಕಿ.ಮೀ. ವಾಟ್‌ ಆಮಿಂ ಆನಿಕೀ ಏಕ್ ದೋನ್ ಕಿ.ಮೀ.ರಾಂಕ್‌ ವಿಸ್ತಾರಾಯ್ತಾಲ್ಯಾಂವ್. ವಾಟೆರ್‌ ಮೆಳ್ಚಾ ರೂಕಾಂಕ್‌ ಚಡೊನ್‌, ಖಾಂವ್ಕ್‌ ಸಕ್ಚಾ ಫಳಾಂಚಾ ರೂಕಾಂತ್ಲಿಂ ತರ್ನಿ ಫಳಾಂಯ್‌ ಸೊಡ್ನಾಸ್ತಾಂ ಖುಂಟುನ್‌ ಭೊಕಾಯಿತ್ತ್ ಕಶೆಂಯ್‌ ಮಂದ್‌ ಉಜ್ವಾಡ್‌ ಆಸ್ತಾನಾ ಘರಾ ಪಾವ್ತೆಲ್ಯಾಂವ್.
‘ಓಹ್‌, ಕೊರ್ಗಾರಾಂ ಆಯ್ಲಿಂ’ ಮ್ಹಣ್ತಾಲಿ ಮ್ಹಜಿ ಮಮ್ಮಾ ಆಮ್ಚೊ ವೇಸ್‌ ಪಳೆವ್ನ್‌, ಮ್ಹಾಕಾ ಆನಿ ಮ್ಹಜಾ ಭಯ್ಣಿಕ್‌ ದೆಕ್‌ಲ್ಲೆಂಚ್!
ಥೊಡ್ಯಾ ಮಯ್ನ್ಯಾ ಆಧಿಂ ಹಾಂವ್ ಕಾಮ್ ಕರುನ್ ಆಸ್ಚಾ ಕಟ್ಟೋಣಾಚೊ ಧನಿ , ಚಡುಣೆ ಮ್ಹಜಾಚ್ ಪ್ರಾಯೆಚೊ, ಆಪ್ಲ್ಯಾ ಚಾರ್-ಪಾಂಚ್ ವರ್ಸಾಚಾ ನಾತ್ವಾಕ್‌ ಘೆವ್ನ್‌ ಆಯಿಲ್ಲೊ. ಭುರ್ಗೊ ಕಿತ್ಲೊ ವೇಳ್‌ ತಾಚೆ ಸರ್ಶಿಂ ರಾವಾತ್? ಏಕ್ ಲೋಡ್‌ ರೇಂವ್‌ ರಾಸ್‌ ಪಡೊನ್‌ ಆಸ್ಲಿ. ಭುರ್ಗೊ ತಾಚೆ ಥಾವ್ನ್ ನಿಕ್ಳೊನ್‌ ರೆಂವೆರ್‌ ಚಡೊನ್‌ ಖೆಳೊಂಕ್‌ ಮಾತ್ರ್‌ ನ್ಹಯ್ ಲೊಳೊಂಕೀ ಲಾಗ್ಲೊ. ಆಮಿಂ ದೊಗೀ ಹೆಂ ದೃಶ್ಯ್‌ ಪಳೆವ್ನ್‌ ಆಮ್ಚಾ ಬಾಳ್ಪಣಾಕ್‌ ಪಾವ್‌ಲ್ಲ್ಯಾಂವ್!
“ಥೊಡ್ಯಾ ವೇಳಾನ್‌ ಮ್ಹಜಿ ಸುನ್‌ ಯೆತಾ. ತಮಾಸೊ ಪಳೆ!” ಮ್ಹಣಾಲೊ ಧನಿ.
ತಿ ಆಯ್ಲಿಚ್! ತಿಣೆ ಪಳೆಲೆಂ! ಆನಿ, ತಿಚೆಂ ತೋಂಡ್‌ ವಿವರ್ಣ್‌ ಜಾಲೆಂ!!
“ತೂಂಯ್‌ ಕಾಲೆಂ ಡ್ಯಾಡಿ?!! ಯಶ್ ತ್ಯಾ dirty ಮಾತ್ಯೆಂತ್‌ ಲೊಳೊನ್‌ ಆಸಾ! ತುಂ ಮಜೇನ್‌ ಪಳೆವ್ನ್‌ ಆಸಾಯ್!!” ಮ್ಹಣೊನ್‌ ಶಿಣೊನ್ ಚೆರ್ಕ್ಯಾಕ್‌ ಎಕಾಚ್‌ ಹಾತಾಂತ್‌ ಬಾವ್ಳ್ಯಾಕ್‌ ಧರ್ನ್‌ ವೊಡಿತ್ತ್ ಕಾರಾಚಾ ಪಾಟ್ಲ್ಯಾ ಸೀಟಿರ್‌ ಉಡವ್ನ್‌ ಮ್ಹಳ್ಳೆ ಬರಿಂ ಕಾರ್‌ ಘೆವ್ನ್‌ ಪಾಟಿಂ ಚಲ್ತೆಚ್‌ ರಾವ್ಲೆಂ!
“ಆತಾಂ ಚೆರ್ಕ್ಯಾಕ್‌ ಡೆಟ್ಟೊಲ್‌ ಸಾಬು ಆನಿ ಕಿತೆಂ ಪೂರಾ ಪುಸುನ್‌ ಧುವ್ನ್‌ ಕಾಡ್ತಾ ಪರ್ಯಾಂತ್ ತಾಕಾ ಸಮಧಾನ್‌ ನಾ!” ಮ್ಹಣೊನ್‌ ತೃಪ್ತೆನ್‌ ಹಾಸಾಲಾಗ್ಲೊ ಧನಿ.
ಶ್ಹೆರಾಕ್…
…. ಮ್ಹಾಕಾ ಚವ್ತೆ ಕ್ಲಾಸಿ ಥಾವ್ನ್ ಭಡ್ತಿ ಮೆಳ್‌ಲ್ಲಿಚ್ ಹಾಸನ್ ಜೆಜ್ವಿತಾಂಚಾ ಸಾ. ಜುಜೆ ಇಸ್ಕೊಲಾಕ್‌ ಘಾಲೆಂ. ಶ್ಹೆರಾ ಭಾಯ್ಲ್ಯಾಚೆರ್ಕ್ಯಾಂಕ್‌ ಹಾಂಗಾ ಬೋರ್ಡಿಂಗ್‌ ಆಸುಲ್ಲೆಂ. ದುಬ್ಳ್ಯಾ ಕ್ರಿಸ್ತಾಂವ್‌ ಭುರ್ಗ್ಯಾಂಕ್‌ ಹಾಂಗಾ ಮಸ್ತು ರಿಯಾಯ್ತ್‌ ಆಸುಲ್ಲಿ. ಚಡುಣೆ ‘ಇಂದಿರಾ ಕ್ಯಾಂಟಿನ್‌’ ಹಾಚೆ ಬರಿಂ. ಗಾಂವಾಂತ್ಲೆ ಬರಿಂ ಹಾಂಗಾ ಇಸ್ಕೊಲಾಕ್‌ ಚಡ್‌ ಚಲಾಜೆ ಮ್ಹಣ್ ನಾತ್ಲೆಂ. ಬೋರ್ಡಿಂಗಾ ಥಾವ್ನ್ ದಾಂಟೊನ್‌ ಪಡ್ಲ್ಯಾರ್‌ ಇಸ್ಕೊಲಾಚಾ ಮೆಟಾರ್‌ ಮ್ಹಳ್ಳೆ ತಿತ್ಲೆಂ ಲಾಗ್ಗಿಂ. ಪುಣ್ ಹಾಂಗಾ ಧಾರಾಳ್‌ ಖೆಳೊಂಕ್‌ ಅವ್ಕಾಸ್ ಆಸ್ಲೊ. ಗಾಂವ್ ವ ಶ್ಹೆರ್. ಇಸ್ಕೊಲಾಚಾ ಗೇಟಿ ಭಿತೆರ್‌ ಕಸಲೆಂಚ್‌ ಫರಕ್‌ ನಾತ್ಲೆಂ!
ಹಾಸನಾಂತ್ ಮ್ಹಜೆಂ ಎಸೆಸೆಲ್ಸಿ ಕಶೆಂಯ್‌ ಜಾಲೆಂ. ಕೊಲೆಜ್‌ ಕರ್ತೆಲ್ಯಾಂಕ್‌ ಬೋರ್ಡಿಂಗಾಂತ್‌ ಅವ್ಕಾಸ್ ನಾತ್ಲೊ. ಮ್ಹಜಾ ಪಪ್ಪಾನ್‌ ತೋಟಾಚಾ ಕಾಮಾಕ್ ರಾಜಿನಾಮೋ ದಿಲ್ಲೊ. ಇತ್ಲಿಂ ವರ್ಸಾಂ ಪಣ್ಗಿಲ್‌ ಸೊಡ್ಲೆಲ್ಲೆ ಆಮ್ಚೆ ಗಾದೆ ಕೃಶಿ ಕರುಂಕ್‌ ತಶೆಂ ಆಮ್ಚಿಂ ಸಾತಾಟ್‌ ಗೊರ್ವಾಂ ಚರಂವ್ಕ್‌ ಹಾಂವ್ ಘರಾಚ್‌ ರಾವ್ಲೊಂ. ಉಪ್ರಾಂತ್, ಸಕ್ಲೆಶ್ಪುರ್‌ ‘ಯಂಗ್ಸ್‌ (ಗೊರೊ ದಾನಿ) ಮುನ್ಸಿಪಲ್‌ ಹೈಸ್ಕೂಲ್’ ಹಾಂಗಾ ಇಕ್ರಾವಿ (ಪಿಯುಸಿ ಸಮಾನ್‌, ಎಕಾ ವರ್ಸಾಚಿ) ಕ್ಲಾಸ್‌ ಸುರು ಕೆಲ್ಯಾ ಮ್ಹಣ್ ಕಳ್ಳೆಂ. ಆಮ್ಚೊ ಗಾಂವ್ ಫಾತಿಮಾಪುರ, ಬೇಲೂರ್‌ ತಶೆಂ ಸಕ್ಲೇಶ್ಪುರ್ ಗಡಿಂ ಮಧೆಂ ಆಸೊನ್ ದೊನೀ ಕುಶಿಂಕ್‌ ಚಡುಣೆ ಅಟ್ರಾ ಕಿ.ಮೀ.ರಾಂಚೊ ಅಂತರ್‌ ಆಸುಲ್ಲೊ. ಹ್ಯಾ ತಾಲೂಕ್‌ ಕೇಂದ್ರಾಂ ಮಧೆಂ ಸಾಕಾಳಿಂ, ದನ್ಪರಾ ಆನಿ ಸಾಂಜೆರ್‌ ಎಕೇಕ್‌ ಬಸ್ಸ್‌ ಧಾಂವ್ತಾಲೆಂ. ತರೀ ಆಮ್ಚೊ ಸಂಪರ್ಕ್ ಸಕ್ಲೇಶ್ಪುರಾ ಕುಶಿಕ್‌ಚ್‌ ಚಡ್‌ ಆಸುಲ್ಲೊ. ಸಕ್ಲೇಶ್ಪುರಾಂತ್‌ ಮ್ಹಾಕಾ ಇಕ್ರಾವ್ಯಾ ಕ್ಲಾಸಿಕ್‌ ಸೀಟ್‌ ಮೆಳ್ಳಿ. ಹೈಸ್ಕೂಲಾಂತ್‌ ಹಾಂವ್ ಪಿಸಿಎಂ ವಿದ್ಯಾರ್ಥಿ ತರೀ ಇಕ್ರಾವ್ಯಾ ಕ್ಲಾಸಿಕ್‌ ಹಾಂವೆ ಇತಿಹಾಸ್‌, ಅರ್ಥ್‌ ಶಾಸ್ತ್ರ್‌ ಆನಿ ರಾಜ್‌ನೀತ್‌ ವಿಷಯ್ ಘೆತ್ಲೊ. ಸನ್ವಾರಾಚೆಂ ಸೊಡ್ನ್‌ ಹಫ್ತ್ಯಾಚಾ ದುಸ್ರ್ಯಾ ದಿಸಾನಿಂ ಇಸ್ಕೊಲಾಕ್‌ ವೆಳಾರ್‌ ವಚೊಂಕ್‌ ಮ್ಹಾಕಾ ಕಸಲೆಚ್‌ ತ್ರಾಸ್‌ ನಾತ್ಲೆ.
ಸನ್ವಾರಾಂಚೆ, ಹೈಸ್ಕೂಲ್ ರೆಗ್ರ್ಯಾಂ ಫರ್ಮಾಣೆ ಸಾಕಾಳಿಂಚಾ ಆಟಾಂಕ್‌ ಕ್ಲಾಶಿ ಸುರು ಜಾತಾಲ್ಯೊ ತರ್‌ ಮ್ಹಾಕಾ ತ್ಯಾ ವೆಳಾ ತೆಕಿದ್‌ ಕ್ಲಾಶಿಕ್‌ ಹಾಜರ್‌ ಜಾಂವ್ಕ್‌ ಸಾಧ್ಯ್‌ ನಾತ್ಲೆಂ. ಕ್ಲಾಸ್‌ ಸುರು ಜಾಂವ್ಚಾ ವಗ್ತಾಚ್‌ ಬಸ್ಸ್‌ ಆಮ್ಚಾ ಗಾಂವಾಕ್‌ ಪಾವ್ತಾಲೆಂ. ತಶೆಂ ಜಾವ್ನ್ ಹಾಂವೆ ಸಕ್ಲೇಶ್ಪುರಾಕ್‌ ಚಲೊನ್‌ ವೆಚೆಂ ಅನಿವಾರ್ಯ್‌ ಜಾಲ್ಲೆಂ. ಆದ್ಲ್ಯಾ ರಾತಿಂ ಉರ್ಲೆಲ್ಲೆಂ ಜೇವ್ನ್‌ ಹಾಂವ್ ಫಾಂತ್ಯಾಚಾ ಚಾರ್ ವೊರಾರ್‌ ಘರಾ ಥಾವ್ನ್ ಭಾಯ್ರ್‌ ಸರ್ತಾಲೊಂ. ತ್ಯಾ ವಗ್ತಾ ಫಾತಿಮಾಪುರ ತಾಂತ್ರಿಕ್‌ ಜಾವ್ನ್ ಏಕ್ ಗಾಂವ್‌ಚ್‌ ಜಾಂವ್ಕ್‌ನಾತ್ಲೊ. ಸಕ್ಲೇಶ್ಪುರ್ ಬೇಲೂರ್‌ ಗಡಿ ಮಧೆಂ ಆಮ್ಚೆಂ ಘರ್‌ ಆಸುಲ್ಲೆಂ. ತ್ಯಾ ಘರಾಚಾ ವೋಂಯ್ ದೆಗೆನ್‌ ಎಕಾ ಲಿಂಗಾಯತ್‌ ಪ್ಲಾಂಟರನಾನ್‌ ದಾನ್‌ ದಿಲ್ಲ್ಯಾ ಜಾಗ್ಯಾರ್‌ ಫಾತಿಮಾ ಮಾಯೆಕ್‌ ಸಮರ್ಪಿಲ್ಲಿ ಇಗರ್ಜ್‌ ಉಭಿ ಜಾಲ್ಯಾʼಪ್ರಾಂತ್‌ ತೊ ಭೊಂವಾರ್‌ ಫಾತಿಮಾಪುರ ಜಾಲೊ.
ಫಾತಿಮಾಪುರ ಥಾವ್ನ್ ಪಾಂಚ್ ಕಿ.ಮೀ. ಚಲ್ಲ್ಯಾರ್‌ ‘ಬೆಳಗೋಡು’ ಮ್ಹಳ್ಳೊ ಗಾಂವ್ ಮೆಳ್ತಾಲೊ. ಹಾಂಗಾ ಥಾವ್ನ್ ಮ್ಹಜೆ ಬರಿಂಚ್‌ ಸಕ್ಲೇಶ್ಪುರಾಚಾ ಹೈಸ್ಕೂಲಾಕ್‌ ವೆಚಿಂ ಪಾಂಚ್-ಸ ಭುರ್ಗಿಂ ಮೆಳ್ತಾಲಿಂ. ಬೆಳಗೋಡು ಥಾವ್ನ್ ಚಾರ್ ಕಿ.ಮೀ., ಚಲೊನ್‌ ಗೆಲ್ಯಾರ್‌ ಬೆಂಗ್ಳೂರ್-ಮಂಗ್ಳೂರು ಹೈವೇ ಮೆಳ್ತಾಲೊ. ಹೊ ಗಾಂವ್ “ಬಾಗೆ ಹ್ಯಾಂಡ್‌ ಪೋಸ್ಟ್”. ಮ್ಹಜಾ ಮುಕ್ಲ್ಯಾ ಹೊಕ್ಲೆಚೊ ಗಾಂವ್. ಥೈಂ ಥಾವ್ನ್ ನೋವ್‌ ಕಿ.ಮೀ., ಚಲೊನ್‌ ಗೆಲ್ಯಾರ್‌ ಮಧೆಂ ಗುಲಗಳಲೆ, ಮಠಸಾಗರ, ಹೊಸೂರು … ಉಪ್ರಾಂತ್ ಸಕ್ಲೇಶ್ಪುರ್. ಹೆಣೆ ಥಾವ್ನ್ ಸಕ್ಲೇಶ್ಪುರ್ ಇಸ್ಕೊಲಾಂಕ್‌ ವೆಚಿಂ ಭುರ್ಗಿಂ ಸಾಂಗಾತಾ ಮೆಳ್ತಾನಾ ಆಮಿಂ ರಾಜ್‌ ರಸ್ತ್ಯಾರ್‌ ಚಡುಣೆ ತೀಸ್ ಚಾಳಿಸ್‌ ಭುರ್ಗಿಂ ಆಸ್ತೆಲ್ಯಾಂವ್!
ಹಫ್ತ್ಯಾಕ್‌ ಏಕ್ ಪಾವ್ಟಿಂ ಅಟ್ರಾ ಕಿ.ಮೀ. ಚಲ್ಪಾಚೆಂ ಮ್ಹಜೆಂ ಸಾಹಸ್‌ ಏಕ್ ಮಯ್ನೋಯ್‌ ಬಾಳ್ವಾಲೆಂ ನಾ. ಮ್ಹಜೆ ವಿಶಿಂ ಕಳಲ್ಲೆಂಚ್‌ ಸಕ್ಲೇಶ್ಪುರ್ಚೊ ವಿಗಾರ್‌ ವಿಕ್ಟರ್‌ ಸೆರಾವೊನ್‌ (ಆತಾಂ ದೆವಾಧಿನ್‌) ಮ್ಹಾಕಾ ಫಿರ್ಗಜೆ ಘರಾಂತ್‌ ರಾವೊನ್‌ ಇಸ್ಕೊಲಾಕ್‌ ವೆಚಿ ವೆವಸ್ತಾ ಕರುನ್ ದಿಲಿ. ಹೊಚ್ಚ್‌ ಫಾತಿಮಾಪುರ ಇಗರ್ಜೆಚೊ ಸ್ಥಾಪಕ್.
ಹೆಂ ಸಗ್ಳೆಂ ಘಡೊನ್‌ ಸಕ್ಲೇಶ್ಪುರ್ಚಾ ಹೇಮಾವತಿ ನಂಯ್‌ ಸಾಂಕ್ಯಾ ಪಂದ್ಲ್ಯಾನ್‌ ಕಿತ್ಲೆಂ ಕ್ಯೂಸೆಕ್‌ ಉದಾಕ್‌ ವ್ಹಾಳೊನ್‌ ಗೆಲಾಂಗೀ?
ದೀಸ್‌ ಗೆಲ್ಲೆ ಬರಿಂಚ್‌ ಬಸ್ಸಾಂ , ಟೆಂಪೆ ಚಡ್ಲೆಬರಿಂಚ್‌ ಸಕ್ಟಾಂನಿ ಚಲ್ಚೆಂಚ್‌ ಉಣೆ ಜಾಲೆಂ. ಆರ್ವಿಲ್ಯಾ ದಿಸಾನಿಂ ತರ್‌ ಘರಾಂ ಘರಾಂನಿ ಏಕ್ ದೋನ್ ಕಾರಾಂ , ಟೂ ವ್ಹೀಲಾರಾಂ ಮ್ಹಣೊನ್‌ ವಿದ್ಯಾರ್ಥಿ ಮಾತ್ರ್‌ ನ್ಹಯ್ ವ್ಹಡಿಲಾಂನಿಂಯ್‌ ಚಲ್ಚೆಂ ಉಣೆ ಜಾಲೆಂ.
ಮ್ಹಾಕಾ ಧಾಂವೊಂಕ್‌ ಸೊಡ್!
ಚಲ್ಣಿ, ಧಾಂವ್ಣಿ … ಹ್ಯಾ ವಿಶಿಂ ಇತ್ಲೆಂ ಬರಯ್ಜೆ ಪಡ್ಲೆಂ ಕಿತ್ಯಾಕ್‌ ಮ್ಹಳ್ಯಾರ್ … ಸಾಮಾಜಿಕ್‌ ಜಾಳಿ ತಾಣಾಂತ್‌ ವಿನೋದ್‌ ಕಾಪ್ರಿಚೆಂ ಏಕ್ ಟ್ವಿಟ್ಟರ್‌ ಪೋಸ್ಟಿಂಗ್‌ ಸಕತ್‌ ವೈರಲ್‌ ಜಾಲ್ಲೆಂ. …
ವಿನೋದ್‌ ಕಾಪ್ರಿಚೆಂ ನಾಂವ್‌ ಹಾಂವೆ ಪಯ್ಲೆ ಪಾವ್ಟಿಂ ಆಯ್ಕಾಲ್ಲೆಂ ಹಾಸನ್ಚಾ ‘ಜನತಾ ಮಾಧ್ಯಮ’ ದಿಸಾಳ್ಯಾ ಪತ್ರಾಂತ್. ವಿನೋದ್‌ ಕಾಪ್ರಿ ಎಕ್ಲೊ ನಾಂವ್‌ ವೆಲ್ಲೊ ಸಾಕ್ಷ್ಯ್‌ಚಿತ್ರಕಾರ್‌. ತಾಚೆಂ 1232 kms. The Long Journey Home ಚಿತ್ರ್‌, 2020 ವ್ಯಾಂತ್‌ ಪ್ರದಾನ್‌ ಮಂತ್ರಿನ್‌ ಘೋಷಿತ್‌ ಕೆಲ್ಲ್ಯಾ ಅಚಾನಕ್‌ ಲೋಕ್ಡಾವ್ನಾ ಲಾಗೊನ್‌ ಉತ್ತರ್‌ ಪ್ರದೇಶಾಚಾ ಗಾಜಿಯಾಬಾದಾಂತ್‌ ಕಟ್ಟೋಣ್ ಕಾಮ್ ಕರುನ್ ಆಸ್ಲೆಲ್ಯಾ ಸಾತ್‌ ಜಣ್‌ ಬಿಹಾರಿ ತರ್ನಾಟ್ಯಾಂಚಿ ಪರಿಸ್ಥಿತಿ ವಿವರಾಯ್ತಾ. ಎಕಾಚ್ಛಾಣೆ ಕಾಮ್ ನಾ, ಕೆಲ್ಲ್ಯಾ ಕಾಮಾಕ್ ಕೂಲ್‌ ನಾ, ಹಾತಾಂತ್‌ ಪಯ್ಶೆ ನಾಂತ್, ರಾವೊಂಕ್‌ ಠಿಕಾಣೊ ನಾ. ಪಾಟಿಂ ಘರಾ, 1232 ಕಿ.ಮೀ., ಪಯ್ಶಿಲ್ಯಾ ಬಿಹಾರಾಂತ್ಲ್ಯಾ ’ಸಹಸ್ರಾ’ಕ್ ವಚೊಂಕ್‌ ಸಗ್ಳ್ಯಾಂನಿ ಬಂಧಡ್! ವಾಹನಾಂ ನಾಂತ್. ರಸ್ತ್ಯಾಕ್‌ ದೆಂವ್ಲ್ಯಾರ್‌ ಪೊಲಿಸಾಂಚೆ ಮಾರ್.
ಅಸಲ್ಯಾ ವಗ್ತಾ ಹ್ಯಾ ತರ್ನಾಟ್ಯಾಂಕ್‌ ಅಚಾನಕ್‌ ವಿನೋದ್‌ ಕಾಪ್ರಿ ಭೆಟ್ತಾ. ಥೊಡ್ಯಾ ದಿಸಾಂ ಲಾಗೊನ್‌ ತೊ ತಾಂಚಿ ಮಜತ್‌ ಕರುಂಕ್‌ ಸಕ್ತಾ. ಪುಣ್ ಅಸಲಿ ಕುಮಕ್‌ ಚಡ್‌ ದೀಸ್‌ ಬಾಳ್ವಾನಾ. ಸ್ವಾಭಿಮಾನಿ ಚೆರ್ಕೆ. ಕಸಲಿ ಸಮಸ್ಯಾ ತರೀ ಫುಡ್‌ ಕರುನ್ ಗಾಂವಾಕ್‌ ಪಾವ್ತೆಲ್ಯಾಂವ್ ಮ್ಹಣೊನ್‌ ಸಾತ್‌ ಸೈಕಲಾಂ ತಲಾಸ್‌ ಕರ್ನ್‌, ಪೊಲಿಸಾಂಚೆ ದೊಳೆ ಚುಕವ್ನ್ ಗಾಂವಾ ಕುಶಿಕ್ ಭಾಯ್ರ್‌ ಸರ್ತಾತ್. ತಾಂಚೊ ಪಾಟ್ಲಾವ್‌ ಕರ್ನ್‌ ವೆಚೊ ವಿನೋದ್‌ ಕಾಪ್ರಿ ಆನಿ ಎಕ್ಲೊ ಸಿನೆಮಾಟೋಗ್ರಾಫರ್‌ ನೋವ್‌ ದಿಸಾಂಚೆ ತಾಂಚೆ ಪಯ್ಣ್‌ ತಶೆಂ ಸಂಕಷ್ಟ್‌ ಹ್ಯಾ ಸಾಕ್ಷ್ಯ್‌ ಚಿತ್ರಾಂತ್‌ ದಾಕಲ್‌ ಕರ್ತಾತ್. ತಿತ್ಲೆಂಚ್‌ ನ್ಹಯ್, ಹ್ಯಾಚ್‌ ನಾಂವಾರ್‌ ಕಾಪ್ರಿಚೊ ಬೂಕ್‌ ಯೀ ಪ್ರಗಟ್‌ ಜಾಲೊ. ಹಾಂವೆ ತೊ ಮ್ಹಜಾ ಕಿಂಡಲಾಂತ್‌ ದೆಂವವ್ನ್‌ ವಾಚುಲ್ಲ್ಯಾ ಹಫ್ತ್ಯಾಂತ್‌ಚ್ಚ್‌ ‘ಹಿಂದೂ’ ಪತ್ರಾಚೊ ವರ್ಧೆಗಾರ್‌ ಜಿ.ಟಿ.ಸತೀಶ್‌ ಹಾಣೆ ಕನ್ನಡಾಕ್‌ ಅನುವಾದ್ ಕೆಲ್ಲೊ ಬೂಕ್‌ಯೀ ಹಾಸನಾಂತ್ ಮೊಕ್ಳಿಕ್‌ ಜಾಲೊ.
.….. ಮಾರ್ಚ್‌ 21, 2022 ವ್ಯಾ ಮ‍ಧ್ಯಾನ್‌ ರಾತಿಂ ವಿನೋದ್‌ ಕಾಪ್ರಿ ಡೆಲ್ಲಿ, ನೋಯ್ಡಾಚಾ ರಸ್ತ್ಯಾ ವಯ್ಲ್ಯಾನ್‌ ಘರಾ ಕುಶಿಕ್ ಡ್ರೈವ್‌ ಕರುನ್ ಆಸ್ಚಾ ವಗ್ತಾ ಪಾಟಿರ್‌ ಏಕ್ ಬ್ಯಾಗ್‌ ಉಮ್ಕಾಳಾವ್ನ್‌ ಧಾಂವೊನ್‌ ಆಸ್ಚಾ ಎಕ್ಲ್ಯಾ ಚೆರ್ಕ್ಯಾ ಭುರ್ಗ್ಯಾಕ್ ಪಳೆವ್ನ್‌ ಸಹಜ್‌ ಜಾವ್ನ್ ವಿಜ್ಮಿತ್‌ ಪಾವ್ತಾ.. ಭುರ್ಗೊ ಕಸಲ್ಯಾಗಿ ಸಂಕಷ್ಟಾಂತ್ ಆಸಾ ಮ್ಹಣೊನ್‌ ಚಿಂತುನ್‌ ತೊ ಚೆರ್ಕ್ಯಾಚಾ ಬಗ್ಲೆನ್‌ ಕಾರ್‌ ಚಲವ್ನ್‌ ಚೆರ್ಕ್ಯಾ ಲಾಗ್ಗಿಂ ಉಲಂವ್ಕ್‌ ಲಾಗ್ತಾ. ಚೆರ್ಕ್ಯಾಚೆಂ ನಾಂವ್‌ ಪ್ರದೀಪ್‌ ಮೆಹ್ರಾ. ಪ್ರಾಯ್‌ 19. ಮ್ಯಾಕ್‌ಡೊನಾಲ್ಡಾಂತ್‌ ಕಾಮ್ ಕರುನ್ ಆಸಾ. ಮ‍ಧ್ಯಾನ್‌ ರಾತಿಂ ತಾಚಿ ಶಿಫ್ಟ್‌ ಕಾಬಾರ್‌ ಜಾಲ್ಯಾ ಇತ್ಲಿಚ್ ... ಧಾ ಕಿ.ಮೀ.,ಪಯ್ಶಿಲ್ಯಾ ಅಲ್ಮೋರಾಂತ್‌ ವ್ಹಡಾ ಭಾವಾ ಸಂಗಿ ತಾಚೊ ಠಿಕಾಣೊ. ಅವಯ್‌ ಪಿಡೆಸ್ತ್. ಆಸ್ಪತ್ರೆಂತ್‌ ನಿದ್ಲ್ಯಾ. ಭಾವ್‌ ರಾತ್ಚಾ ಪಾಳಿಂತ್‌ ಕಾಮ್ ಕರ್ತಾ. ತಾಚೆ ಖಾತಿರ್‌ ರಾಂದುಂಕ್‌ ಆಸಾ. ಕಾಪ್ರಿ, ಭಿರ್ಮತ್‌ ಪಾವೊನ್‌ ‘ತುಕಾ ತುಜಾ ಬಿಡಾರಾ ತಿತ್ತುನ್‌ ಲಿಫ್ಟ್‌ ದಿತಾಂ ಯೇ.’ ಮ್ಹಣ್ತಾ. ಪುಣ್ ಚೆರ್ಕೊ ಕಾರಾ ಭಿತೆರ್‌ ಯೇಂವ್ಕ್‌ ಬಿಲ್ಕುಲ್‌ ತಯಾರ್‌ ನಾ!
Video credits: @vinodkapri pic.twitter.com/wWEhSHhv7n
— NewsMobile (@NewsMobileIndia) March 20, 2022
ತೊ ತಾಚೆಂ ಸಪಾಣ್‌ ಸಾಕಾರ್‌ ಕರುಂಕ್‌ ಪೆಚಾಡುನ್‌ ಆಸಾ.
‘ಹಾಂವ್ ಭಾರತೀಯ್‌ ಸೆನಾಕ್‌ ಭರ್ತಿ ಜಾಂವ್ಕ್‌ ತಾಲಿಮ್ ಕರುನ್ ಆಸಾಂ. ದಿಸಾಚೆಂ ಪುರ್ಸತ್‌ ನಾ. ರಾತ್ಚಾ ಹ್ಯಾ ವಗ್ತಾಚ್‌ ಮ್ಹಾಕಾ ಧಾಂವೊಂಕ್‌ ಪುರ್ಸತ್‌ ಮೆಳ್ಚಿ. ತುಮ್ಚೆಂ ಸಂಗಿ ಯೇಂವ್ಕ್‌ ಸಕಾನಾ. ದೇವ್ ಬರೆಂ ಕರುಂ ಸರ್!’ ಮ್ಹಣ್ತಾ ಚೆರ್ಕೊ.
ಹಾಂವ್ ಅಜ್ಯಾಪ್ಲೊಂ.
ತಾಚಾ ಪ್ರಾಯೆರ್‌ ಹಾಂವೀ ದರಬಸ್ತ್ ಚಲ್ತಾಲೊಂ, ಧಾಂವ್ತಾಲೊಂ!
ಕಚ್ಛಾ ದೈಹಿಕ್‌ ಸಕತ್‌ ಆಸುಲ್ಲಿ.
… ಪುಣ್ ಏಕ್ ನಿರ್ಧಿಷ್ಟ್‌ ಶೆವೊಟ್ ನಾತ್ಲೊ !
- ಜೆ.ವಿ.ಕಾರ್ಲೊ
Nice one Sir,
Liked the way you connected your beautiful past to Vinod Kapri twitter post and the conclusion. Thank you.
Thank you, Lawrence.
ಸದಾಂಚ್ಯೆ ಪರಿಂ ರುಚ್ಚೆಂ ಲೇಕ್. ದೇವ್ ಬರೆಂ ಕರುಂ, ಕಾರ್ಲೊ.
Thank you ಪಿಲಿಪ್.
While watching that video I was amazed at the sheer determination of that young boy to run 10kms that too after the duty just to keep himself fit to join Army.. However, latest new Agnipath decision has poured cold water on these Army aspirants unfortunately..
Secondly, this one incident made you to remember your good old hard days and current children inability to walk even half a km while you walked 18 kms for a week.
Sir hats off to you.. Wonderful narration of your home town Fathimapura..
Thank you Alphonse.