ಆಬ್ಳೆಸ್ಪಣ್!

ವಿನೋದಾಚ್ಯಾ ಬಾಪಾಯ್ಚೆಂ ವ್ಹಡ್ಲೆಂ ಕುಟಾಮ್. ತಾಚೊ ಬಾಪ್ಲ್ಯೊ ರಾಘವ್ ಆರ್ಕಿಟೆಕ್ಟ್ ಇಂಜಿನಿಯೆರ್. ಆಪ್ಲ್ಯಾ ಬರ‍್ಯಾ ಕಾಮಾನ್ ಆನಿ ಭುದ್ವಂತ್ಕಾಯೆನ್ ತಾಣೆ ಮಸ್ತು ಪಯ್ಶೆ ಜೊಡ್‌ಲ್ಲೆ. ಮುಂಬಯ್ತ್ ಫ್ಲೆಟಾಂ ಆನಿ ಗಾಂವಾಂತ್ ಆಸ್ತಿ ಆಸೊನ್, ತಾಚ್ಯಾ ಕುಟ್ಮಾಂತ್ ತೊ ಮಸ್ತು ಗ್ರೇಸ್ತ್. ಪುಣ್ ಏಕ್ ನಂಬರ್ ಕಾಂಜೂಸ್! ತಾಚ್ಯಾ ಕಾಂಜೂಸ್ಪಣಾಕ್, ಪಯ್ಶ್ಯಾಂ ಖಾತಿರ್ ಕಿತೆಂಯ್ ಕರ‍್ಚೊ, ದಯಾ ದಕ್ಷೆಣ್ ನಾತ್‌ಲ್ಲೊ, ಪಡ್ಪಶಿ ಮ್ಹಳ್ಯಾರ್‌ಯಿ ಉಣೆಂಚ್.

ಪ್ರಾಯ್ ಭರ‍್ತಾನಾ ನಿವೃತ್ತ್ ಜಾವ್ನ್, ರಾಘವ್ ಪರೇಲಾಂತ್ ವಿಶಾಲ್ ಫ್ಲೆಟಾಂತ್ ಆಪ್ಲ್ಯಾ ಬಾಯ್ಲೆಸಂಗಿಂ ರಾವ್ತಾಲೊ. ಇತ್ಲಿ ಗ್ರೇಸ್ತ್‌ಕಾಯ್ ಆಸೊನ್‌ಯಿ, ತಾಚ್ಯಾ ಕುಟ್ಮಾಕ್ ವ ಹೆರ್ ಕೊಣಾಯ್ಕಿ ತಾಣೆ ಆಪ್ಲ್ಯಾ ಸಗ್ಳ್ಯೆ ಜಿಣ್ಯೆಂತ್ ಎಕಾ ಮಯ್ಶ್ಯಾಚಿ ಕುಮೊಕ್ ಕೆಲ್ಲಿನಾ. ತಾಚ್ಯಾ ಕಾಂಜೂಸ್ಪಣಾಕ್ ಸರಿ ಜಾಲ್ಲಿ ತಾಚಿ ಬಾಯ್ಲ್ ಪುಷ್ಪಾ. ಹಿಂ ಘೊವ್-ಬಾಯ್ಲಾಂ ಎಕಾಮೆಕಾಚೆಂ ಪ್ರತಿಬಿಂಬಾಂ ಜಾವ್ನಾಸ್‌ಲ್ಲಿಂ-ಆಪ್ಲ್ಯಾ ಸ್ವಾರ್ಥಿ ಸವಾಯಾಂನಿ. ದೆಕುನ್ ಹಾಂಚೆ ಥಾವ್ನ್ ಸಗ್ಳೆಂ ಕುಟಾಮ್ಂಚ್ ಪಯ್ಸ್ ಜಾಲ್ಲೆಂ.

ರಾಘವ್-ಪುಷ್ಪಾಕ್, ದೆವಾನ್ ಸಂತಾನ್‌ಯಿ ದೀಂವ್ಕ್ ನಾತ್‌ಲ್ಲೆಂ. ಹಿಂ ದೊಗಾಂಚ್ ಆಪ್ಲಿ ಪಿಟ್ಟಾಸಿ ಜಿಣಿ ಜಿಯೆವ್ನ್ ಆಸ್‌ಲ್ಲಿಂ. ರಾಘವಾಕ್ 65 ವರ‍್ಸಾಂ ಭರ‍್ತಾನಾ, ತಾಚಿ ಭಲೈಕಿ ಪಾಡ್ ಜಾಲಿ. ಸವ್ಕಾಸ್ ತಾಚಾ ದಾವ್ಯಾ ಕುಶಿಕ್ ಆರ್ ಮಾರ‍್ಲಿ. ಏಕ್ ಕೂಸ್ ಹಾಲೊಂಕ್ ಜಾಯ್ನಾತ್‌ಲ್ಲೊ ರಾಘವ್ ಕಷ್ಟಾಂನಿ ವಾಂಕ್ಡೆ ಚಲೊಂಕ್ ಸಕ್ತಾಲೊ. ಘೊವಾಚಿ ಚಾಕ್ರಿ ಕರ‍್ತಾಂ ಕರ‍್ತಾನಾ, ಫುಷ್ಪಾ ಪಿಡೆಂತ್ ಪಡ್ಲಿ ಆನಿ ವೆಗ್ಗಿಂಚ್ ಪೆಲ್ಯಾ ಸಂಸಾರಾಕ್ ಸೆರ್ವಾಲಿ!

ಆತಾಂ ರಾಘವ್ ಎಕ್ಲೊ ಜಾಲ್ಲೊ.

ತ್ಯಾಚ್ ದಿಸಾಂನಿ ವಿನೋದಾಚೆಂ ಕಾಜಾರ್ ತಾಣೆ ಮೋಗ್ ಕೆಲ್ಲ್ಯಾ ವಾಯ್ಲೆಟ್ ಮ್ಹಳ್ಳ್ಯೆ ಕ್ರೀಸ್ತಾಂವ್ ಚಲಿಯೆಸಂಗಿಂ, ತಾಚ್ಯಾ ಘರ‍್ಚ್ಯಾಂಚಾ ಮರ್ಜೆ ವಿರೋಧ್ ಜಾಲ್ಲ್ಯಾನ್, ತೊ ಆಪ್ಲ್ಯೆ ಹೊಕ್ಲೆಕ್ ಘೆವ್ನ್ ವಿಂಗಡ್ ಬಾಡ್ಯಾಚೆಂ ಘರ್ ಕರುನ್ ರಾವ್ತಾಲೊ.

ವಿನೋದ್ ಸಾಧೊ ಆನಿ ಉಣಿ ಆನ್ಕೂಲ್ ಆಸ್‌ಲ್ಲೊ ಮನಿಸ್ ಜಾಲ್ಲ್ಯಾನ್, ತಾಣೆ ಚಿಂತ್ಲೆಂ ಆಪ್ಲ್ಯಾ ಬಾಪ್ಲ್ಯಾಚಾ ವ್ಹಡ್ಲ್ಯಾ ಫ್ಲೆಟಾಂತ್ ತಾಚಿ ಚಾಕ್ರಿ ಕರುನ್ ರಾವ್ಲ್ಯಾರ್, ಬಾಪ್ಲ್ಯೊ (ರಾಘವ್) ಆಪ್ಲ್ಯಾ ಆಸ್ತಿಂತ್ಲೆಂ ಕಾಂಯ್ ತರೀ ದೀತ್ ಮ್ಹಣ್. ತಶೆಂ ತೊ ಏಕ್ ದೀಸ್ ಆಪ್ಲ್ಯಾ ಹೊಕ್ಲೆಕ್ ಸಾಂಗಾಲಾಗ್ಲೊ-

“ವಾಯ್ಲೆಟ್ ಮ್ಹಜೊ ಏಕ್ ಬಾಪ್ಲ್ಯೊ ಪರೇಲ್ ರಾವ್ತಾ. ಮಸ್ತು ಗ್ರೇಸ್ತ್ ಆನಿ ತಾಕಾ ತಾಚಿಂ ಆಪ್ಲಿಂ ಮ್ಹಳ್ಳಿಂ ಕೊಣ್ಂಚ್ ನಾಂತ್. ಮೌಶಿಯಿ ಸರ‍್ಲ್ಯಾ. ಹ್ಯಾ ದಿಸಾಂನಿ ತೊ ಸಿಕ್ ಆಸಾ. ಆಮಿಂ ತಾಚೆಸಂಗಿಂ ರಾವೊಂಕ್ ಯಾಗಿ?”

“ಪುಣ್ ಕಿತ್ಯಾಕ್ ಆಮಿಂ ಆಮ್ಚೆಂ ಘರ್ ಆಸ್ತಾನಾ, ತಾಚೆಸಂಗಿಂ ರಾವೊಂಕ್ ವೆಚೆಂ?”

“ಹೆಂ ಆಮ್ಚೆಂ ಘರ್ ನಹಿಂನೆ ವಾಯ್ಲೆಟ್….? ಬಾಡ್ಯಾಚೆಂ. ತೊ ಎಕ್ಲೊಚ್ ಆಸಾ ಆನಿ ತಾಕಾ ಪೆರಾಲಾಯ್ಸ್ ಜಾಲಾಂ. ತಾಚೆಂ ವ್ಹಡ್ಲೆಂ ಫ್ಲ್ಲೆಟ್ ಆಸಾ. ಆಮಿಂ ತಾಚಿ ಇಲ್ಲಿ ಚಾಕ್ರಿ ಕರುನ್ ತಾಚ್ಯಾ ಘರಾಂತ್ ಸುಶೆಗಾತ್ ರಾವ್ಯೆತ್.”

“ತರ್ ಕಿತೆಂ ಆಮಿಂ ತುಜ್ಯಾ ಆಂಕಲಾಚ್ಯಾ ಘರಾ, ತೊ ಮರ‍್ತಾನಾ ಸಗ್ಳೆಂ ಆಮ್ಕಾಂ ಸೊಡ್ತಲೊ ಮ್ಹಳ್ಳ್ಯಾ ಆಶೆನ್‌ಗೀ ವೆಚೆಂ? ಜೆಂ ಕಿತೆಂ ಆಮ್ಚೆಂ, ತೆಂ ಆಮ್ಚೆಂಚ್ ಉರ‍್ತಾ. ಹೆರಾಂಚೆಂ ಕೆದಿಂಚ್ ಆಮ್ಚೆಂ ಜಾಂವ್ಚೆಂನಾ”

“ತುಕಾ ಸಾಂಗ್ಲೆಂನೇ, ಮ್ಹಜ್ಯಾ ಬಾಪ್ಲ್ಯಾಕ್, ತಾಚಿಂ ಕೊಣ್ಂಚ್ ನಾಂತ್ ಮ್ಹಣ್?”

“ಆತಾಂ ನಾಂತ್. ಫಾಲ್ಯಾಂ ತೊ ಸರ‍್ತಾನಾ, ತಾಚಿಂ ಸಗ್ಳಿಂ ಪಯ್ಸ್ ಜಾಲ್ಲಿ ಆಪಾಪಿಂ ಯೆತೆಲಿಂ, ಆಸ್ತಿ ಖಾತಿರ್”

“ಆರೆ ದೆವಾ, ತುಕಾ ಸಮ್ಜ್ಜಾನಾ ಕಿತ್ಯಾಕ್, ಹಾವೆಂ ಸಾಂಗ್ಚೆಂ….?” ವಿನೋದ್ ವಿರಾರ್ ಜಾಲೊ.

“ಮ್ಹಜ್ಯಾ ಬಾಪ್ಲ್ಯಾಕ್ ಸಂತಾನ್ಂಚ್‌ ನಾ. ತಾಚಿಂ ಕೊಣ್‌ಯಿ ಆಪ್ಲಿಂ ಆಸಾತ್ ಜಾಲ್ಯಾರ್, ತಿಂ ಫಕತ್ತ್ ಮ್ಹಜ್ಯಾ ಕುಟ್ಮಾಂತ್ಲಿಂ. ಪುಣ್ ತಾಚ್ಯಾ ಪಿಟ್ಟಾಸಿ ಸವಯಂಕ್ ಲಾಗೊನ್, ಸಗ್ಳಿಂ ತಾಚೆ ಥಾವ್ನ್ ಪಯ್ಸ್ ಜಾಲ್ಯಾಂತ್. ಆತಾಂ ತೊ ಹೆಲ್ಪ್‌ಲೆಸ್ಸ್ ಆಸ್ತಾನಾ, ಆಮಿಂ ತಾಚೆಸಂಗಿಂ ರಾವೊನ್ ತಾಚಿ ಚಾಕ್ರಿ ಕೆಲ್ಯಾರ್, ತೊ ಮೊವಾಳುನ್, ತಾಚೆಂ ಸಗ್ಳೆಂ ಆಮ್ಕಾಂಚ್ ದಿತೊಲೊ. ತಾಕಾ ದೀಂವ್ಕ್‌ಚ್ ಪಡ್ತೆಲೆಂ. ಹೆರ್ ವಾಟ್ ನಾ ತಾಕಾ”

“ಪಳೆ ವಿನೋದ್ ಪೆಲ್ಯಾಚ್ಯಾ ವಸ್ತುಚಿ ಆಶಾ ಕರ್ಚಿ ಬರಿ ನಹಿಂ. ಮೆಳ್ಚೆಂ ಆಸ್ಲ್ಯಾರ್ ಕಸೆಂಯಿ ಮೆಳ್ತಾ. ಆಶೆವ್ನ್ ರಾವೊನ್, ನಿರಾಶಾ ಲಾಭ್ಲ್ಯಾರ್ ಸೊಸುಂಕ್ ಜಾಯ್ನಾಂ”

“ತುವೆಂ ಸಾಂಗ್ಚೆಂ ಸಾರ್ಕೆಂ ವಾಯ್ಲೆಟ್, ಪುಣ್ ಹಾಂವ್ ಅಸಾಹಾಯಕ್ ಆಸಾಂ. ಜಾತಿ ಭಾಯ್ರ್ ವಚೊನ್ ತುಜೊ ಮೋಗ್ ಕರುನ್, ತುಜೆಲಾಗ್ಗಿಂ ಕಾಜಾರ್ ಜಾಲ್ಲ್ಯಾನ್, ಮ್ಹಾಕಾ ಮ್ಹಜ್ಯಾ ಬಾಪಾಯ್ಚೆಂ ಘರ್‌ಯಿ ಸೊಡುಂಕ್ ಪಡ್ಲೆಂ. ಬಹುಷಾ ಮ್ಹಜ್ಯಾ ನಶೀಭಾಂತ್ ಮ್ಹಜ್ಯಾ ಬಾಪ್ಲ್ಯಾಚಿ ಆಸ್ತ್ ಭಗಯ್ಲ್ಯಾ….”

“ಪುಣ್ ಮ್ಹಾಕಾ ತೆಂ ಸಾರ್ಕೆಂ ಮ್ಹಣ್ ಭಗಾನಾ ವಿನೋದ್. ಆಮಿಂ ಆಸ್‌ಲ್ಲ್ಯಾಂತ್ ಸುದಾರ‍್ಸುನ್ ರಾವ್ಯಾಂ. ಆಮ್ಚಿ ಸ್ಥಿತಿ ಅಶಿಚ್ ಉರ‍್ಚಿನಾ. ಆಮಿಂ ದೊಗಾಂಯ್ ಕಾಮ್ ಕರುನ್ ಆಮ್ಚೆಂ ಸ್ವತಾಃಚೆಂ ಘರ್ ಕರ‍್ಯಾಂ….”

“ಕಾಮ್ ಕರುನ್ ಆಮಿಂ ಸ್ವತಾಃಚೆಂ ಘರ್ ಕೆದಿಂಚ್ ಕರುಂಕ್ ಜಾಂವ್ಚೆಂನಾ ವಾಯ್ಲೆಟ್. ಆಜ್ ಆಸ್‌ಲ್ಲೆಂ ಘರಾಂಚೆಂ ಮೋಲ್, ಫಾಲ್ಯಾಂ ಡಬ್ಬಲ್ ಜಾತೆಲೆಂ. ಆಮಿಂ ಜೊಡುನ್ ಜಮಯಿಲ್ಲೆ ಪಯ್ಶೆ, ಪಾಲ್ಯಾಂಚ್ಯಾ ಮೊಲಾಕ್ ಉಣೆ ಪಡ್ತೆಲೆ ಆನಿ ಆಮ್ಚೆಂ ಘರ್ ಕೆದಿಂಚ್ ಜಾಂವ್ಚೆಂನಾ. ಆಮ್ಕಾಂ ಭುರ್ಗಿಂ ಜಾತಾನಾ, ಪಯ್ಶೆ ಉರಂವ್ಕ್‌ಯಿ ಜಾಂವ್ಚೆಂನಾ? ಶಿವಾಯ್ ಹಾಂವ್ ಕಾಂಯ್ ಲೊಕಾಚ್ಯಾ ಆಸ್ತಿಚಿ ಆಶಾ ಕರುನ್ ನಾ. ಮ್ಹಾಜ್ಯಾಚ್ ಬಾಪ್ಲ್ಯಾಚ್ಯಾ ಆಸ್ತಿಚಿ”

ವಿನೋದಾನ್ ಸಾಂಗ್ಚ್ಯಾಂತ್ ಸತ್ ಆಸಾ ಮ್ಹಣ್ ಸಮ್ಜಾಲ್ಲೆಂ ವಾಯ್ಲೆಟ್, ಆಪ್ಲ್ಯಾ ಅಂತಸ್ಕರ್ನಾಕ್ ಆಡೊವ್ ದವರುನ್, ವಿನೋದಾಚ್ಯಾ ಖುಶೆಕ್ ತಯಾರ್ ಜಾಲೆಂ.

ವಿನೋದ್ ತಾಚ್ಯಾ ಕ್ರೀಸ್ತಾಂವ್ ಹೊಕ್ಲೆಕ್ ಘೆವ್ನ್, ಆಪ್ಣಾಸಂಗಿಂ ರಾವೊಂಕ್ ಯೆತಾ ತೆಂ ಆಯ್ಕೊನ್, ಪಿಡೆಂತ್ ಆಸ್‌ಲ್ಲೊ ರಾಘವ್ ಒಪ್ಲೊ.

ವಾಯ್ಲೆಟ್ ರಾಘವಚಿ ಚಾಕ್ರಿ ಆಪ್ಲ್ಯಾ ಖರ‍್ಯಾ ಮಾಂವಾಚಿ ಕೆಲ್ಲೆಪರಿಂ, ಬರ‍್ಯಾ ಥರಾನ್ ಕರುನ್ ರಾವ್ಲಿ. ಬಾಡ್ಯಾಚ್ಯಾ ಲ್ಹಾನ್ ಘರಾ ಥಾವ್ನ್ ಬಾಪ್ಲ್ಯಾಚ್ಯಾ ವ್ಹಡ್ಲ್ಯಾ ಫ್ಲೆಟಾಂತ್, ವಿನೋದ್ ಆನಿ ವಾಯ್ಲೆಟ್ ರಾಜ್ ಕರುನ್ ಮರ್ಜೆನ್ ಜಿಯೆತಾನಾ, ವೆಗ್ಗಿಂಚ್ ತಾಂಕಾಂ ಏಕ್ ಚೆಡುಂ ಭುರ್ಗೆಂ ಜಾಲೆಂ, ತಾಕಾ ಮನಿಶಾ ಮ್ಹಣ್ ತಾಣಿಂ ವೊಲಾಯ್ಲೆಂ.

ರಾಘವಾಚಿಂ ಮುಂಬಂಯ್ತ್ ದೋನ್ ಹೆರ್ ಫ್ಲೆಟಾಂ ಬಾಡ್ಯಾಕ್ ಆಸ್‌ಲ್ಲಿಂ. ತ್ಯಾ ಫ್ಲೆಟಾಂಚೆಂ ಬಾಡೆಂ ಶೀದಾ ರಾಘವಾಚ್ಯಾ ಎಕೌಂಟಾಕ್ ವೆತಾಲೆಂ. ವಿನೋದಾನ್ ತ್ಯಾ ವಿಶಿಂ ಕಸಲಿಚ್ ಖಂತ್ ಕರುಕ್‌ನಾ. ತೊ ಜಾಣಾ ಆಸ್‌ಲ್ಲೊ, ಆಜ್ ನಹಿಂ ತರ್ ಫಾಲ್ಯಾಂ, ಸಗ್ಳೆಂ ತಾಂಕಾಂಚ್ ಮೆಳ್ತಾ ಮ್ಹಣ್. ತಾಂಚ್ಯಾ ಘರ‍್ಚೊ ಖರ್ಚ್ ಆನಿ ಬಾಪ್ಲ್ಯಾಚ್ಯಾ ವಕ್ತಾಕ್ ವಿನೋದಾನ್ ಜೊಡ್‌ಲ್ಲೆ ಪಯ್ಶೆ ಪಾವಾನಾತ್ಂತ್ ಮ್ಹಣೊನ್, ವಾಯ್ಲೆಟಾನ್ ಘರಾಚ್ ಟ್ಯೂಶೆನಾ ದೀಂವ್ಕ್ ಸುರು ಕೆಲಿಂ.

ದೀಸ್ ವೆತಾಂ ವೆತಾಂ ರಾಘವ್ ಚಡ್ ಸಿಕ್ ಜಾಲೊ. ವಿನೋದ್ ಕಾಮಾಕ್ ವೆತಾಲೊ ಆನಿ ವಾಯ್ಲೆಟಾಚ್ಯಾ ಮಾತ್ಯಾರ್, ಬಾಪ್ಲ್ಯಾಚಿ ಆನಿ ತಿಚ್ಯಾ ಬಾಳ್ಶ್ಯಾಚಿ ಜಿಮ್ಮೆಧಾರಿ ಆಸ್‌ಲ್ಲಿ. ತರೀ, ಆಜ್ ಕರ‍್ಚ್ಯಾ ನಿಸ್ವಾರ್ಥಿ ಚಾಕ್ರೆಕ್, ಪಾಟ್ಲ್ಯಾನ್ ಮೆಳೊಂಕ್ ಆಸ್ಚ್ಯಾ ಅಪಾರ್ ಗ್ರೇಸ್ತ್ ಕಾಯೆಚೆಂ ಚಿಂತಾಪ್, ಮತಿಕ್ ದಾದೊಸ್ಪಣ್ ದಿತಾಲೆಂ ತಿಕಾ.

ವರ‍್ಸಾಂ ಪಂದ್ರಾ ಉತ್ರಾಲ್ಲಿಂ ತರೀ, 80 ವರ‍್ಸಾಂ ಮಿಕ್ವಾಲ್ಲೊ ರಾಘವ್ ಮೊರೊಂಕ್ ನಾತ್‌ಲ್ಲೊ. ತಾಚ್ಯಾ ಸಗ್ಳ್ಯಾ ಹಾತಾಂ ಪಾಂಯಾಂಕ್ ಆರ್ ಮಾರೂನ್, ಉಲೊಂಕ್ ಸೈತ್ ತೊ ಸಕಾನಾತ್‌ಲ್ಲೊ. ಘಾಲ್ಲೆ ಕಡೆನ್ಂಚ್ ಆಸ್ತಾಲೊ ಜಾಲ್ಲ್ಯಾನ್, ಕುಡಿಚ್ಯೊ ಗರ್ಜೊಯಿ ತಾಚ್ಯಾ ತಿಳುವಳ್ಕೆವಿಣೆ ಬಿಛಾಣ್ಯಾರ್‌ಚ್ ಜಾತಾಲ್ಯೊ. ಸಗ್ಳ್ಯಾ ಘರಾಂತ್ ಘಾಣ್ ಜಾತಾನಾ, ವಾಯ್ಲೆಟಾಕ್ ರಾಘವಾಚೊ ಗೂ-ಮೂತ್ ಕಾಡೂನ್ ನಿತಳಾಯ್ ಕರುಂಕ್ ಮಸ್ತು ಕಷ್ಟ್ ಜಾತಾಲೆ. ತರೀ ಏಕ್ ಆಶಾ ಆನಿ ಚಿಂತಾಪ್ ಆಸ್‌ಲ್ಲೆಂ, ಆಜ್ ನಹಿಂ ತರ್ ಫಾಲ್ಯಾಂ ಮ್ಹಾತಾರೊ ಮರ‍್ತಚ್, ತಾಚಿ ಸಗ್ಳಿ ಆಸ್ತ್ ಆಪ್ಲಿ ಜಾತೆಲಿ ಮ್ಹಳ್ಳ್ಯಾ ಸಂತೋಸಾಚೆಂ.

ಘಡ್ಯೆ ಘಡ್ಯೆ ಮ್ಹಾತಾರೊ ಆಂಗಾರ್‌ಚ್ ಕುಡಿಚ್ಯೊ ಗರ್ಜೊ ತಿರ‍್ಸಿತಾನಾ, ತಾಚೆಂ ವಸ್ತೂರ್ ಬದ್ಲಿ ಕರುಂಕ್ ವಾಯ್ಲೆಟಾಕ್ ಕಷ್ಟ್ ಜಾತಾಲೆ. ದೆಕುನ್ ಪಾಟ್ಲ್ಯಾ ಥೊಡ್ಯಾ ತೆಂಪಾ ಥಾವ್ನ್, ತಿಣೆ ಮ್ಹಾತಾರ‍್ಯಾಕ್ ಉಗ್ತೆಂಚ್ ದವರುಂಕ್ ಸುರು ಕೆಲ್ಲೆಂ ಮಾತ್ರ್ ನಹಿಂ, ತಾಚೆಂ ಬಿಛಾಣೆಂ ಸೈತ್ ಗ್ಯಾಲೆರಿಂತ್ ಹಾಂತ್ಳುನ್ ಮ್ಹಾತಾರ‍್ಯಾಕ್ ಥಂಯ್ಚ್ ವರ್ಗಾಯ್ಶಿಲ್ಲೆಂ.

ಕಾಮಾ ಥಾವ್ನ್ ಸಾಂಜೆರ್ ಘರಾ ಯೆಂವ್ಚ್ಯಾ ವಿನೋದಾಕ್ ತೆಂ ಸಗ್ಳೆಂ ಪಡೊನ್ ವಚೊಂಕ್ ನಾತ್‌ಲ್ಲೆಂ. ಆಪ್ಲಿ ಬಾಯ್ಲ್ ಮ್ಹಾತಾರ‍್ಯಾಚಿ ದೀಸ್ ರಾತ್ ಚಾಕ್ರಿ ಆನಿ ನಿತಳಾಯ್ ಕರ‍್ತಾ ತೆಂಚ್ ವರ‍್ತೆಂ ಜಾವ್ನಾಸ್‌ಲ್ಲೆಂ ತಾಕಾ.

ಮನಿಶಾ ವ್ಹಡ್ ಜಾಲ್ಲೆಂ. ಥೊಡೆಪಾವ್ಟಿಂ ತಾಚ್ಯೊ ಮಿತ್ರಿಣ್ಯೊ ಘರಾ ಯೆತಾನಾ, ವಾಯ್ಲೆಟಾಕ್ ರಾಗ್ ಯೆತಾಲೊ. ಕಿತ್ಯಾಕ್ ಗ್ಯಾಲೆರಿಂತ್ ನಾಗ್ಡೊ ಬಿಛಾಣ್ಯಾರ್ ದವರ್‌ಲ್ಲ್ಯಾ ಬಾಪ್ಲ್ಯಾಕ್, ಕೊಣ್‌ಯಿ ಪಳಯ್ತಿತ್ ತರ್, ಕಿತೆಂ ಚಿಂತುಂಕ್ ಆಸಾತ್ ಮ್ಹಳ್ಳ್ಯಾ ಲಜೆನ್.

ನಿಮಾಣೆ 85 ವರ‍್ಸಾಂಚಾ ಪ್ರಾಯೆರ್ ರಾಘವ್ ಮರಾಣ್ ಪಾವ್ಲೊ!

ತಾಚ್ಯಾ ಮರ್ಣಾಕ್ ರಿವಾಜಿ ಪ್ರಕಾರ್ ಕುಟ್ಮಾಚಿಂ ಸಗ್ಳಿಂ ಆಯಿಲ್ಲಿಂ. ವಿನೋದಾನ್ ಬಾಪ್ಲ್ಯಾಚ್ಯಾ ಮರ್ಣಾಚಿಯಿ ಬರ‍್ಯಾ ಥರಾನ್ ಬಂದೋಬಸ್ತ್ ಕೆಲ್ಲಿ. ಲೊಕಾಚ್ಯಾ ನದ್ರೆಕ್ ದೂಖೆಸ್ತ್‌ಪಣಾಚೊ ವೇಸ್, ಮುಖಾಮೊಳಾರ್ ತೊ ನೆಸ್‌ಲ್ಲೊ ತರೀ, ಮನಾಂತ್, ಬಾಪ್ಲ್ಯಾನ್ ಸೊಡುನ್ ಗೆಲ್ಲ್ಯಾ ಆಸ್ತ್-ಪಯ್ಶ್ಯಾಂಚೆಂ ಲೇಕ್ ಘಾಲುನ್ ಆಸ್‌ಲ್ಲೊ.

ಉಪ್ರಾಂತ್ ಕಿತೆಂ ಜಾಲೆಂ?

ವೀಸ್ ವರ‍್ಸಾಂ ಗೂ-ಮೂತಾಂತ್ ಲೊಳ್ಚ್ಯಾ, ಆರ್ ಮಾರೂನ್ ಆಸ್‌ಲ್ಲ್ಯಾ ಬಾಪ್ಲ್ಯಾಚಿ ಚಾಕ್ರಿ ಕೆಲ್ಲ್ಯಾ ತ್ಯಾ ಪಾಪ್ ಪುತ್ಣ್ಯಾಕ್ ಆನಿ ತಾಚ್ಯಾ ಬಾಯ್ಲ್ ಭುರ್ಗ್ಯಾಕ್ ರಾಘವಾನ್ ಏಕ್ ಪಯ್ಸೊಯಿ ಸೊಡುಂಕ್ ನಾತ್‌ಲ್ಲೊ! ತಾಚ್ಯಾ ಸವಯಾಂಕ್ ಕಾಂಠಳೊನ್, ತಾಕಾ ಪಯ್ಸ್ ದವರ್‌ಲ್ಲ್ಯಾ ತಾಚ್ಯಾ ಕುಟ್ಮಾಕ್ ಆಪ್ಲ್ಯಾ ಆಸ್ತಿಂತ್ಲೊ ಏಕ್ ಪಯ್ಸೊಯಿ ವಚಾನಾಶೆಂ, ಪಯ್ಲೆಂಚ್ ತಾಣೆ ವೀಲ್ ಕರುನ್ ಸಗ್ಳೆಂ ಟ್ರಸ್ಟಾಕ್ ವಚಾಶೆಂ ಕೆಲ್ಲೆಂ!

ಟ್ರಸ್ಟಾಚೆ ಅಧಿಕಾರಿ ಯೇವ್ನ್, ಹಾಂಕಾಂ ಘರ್ ಖಾಲಿ ಕರ‍್ಚೆಂ ನೊಟೀಸ್ ದಿತಾನಾ, ಹಾಂಚ್ಯಾ ಮಾತ್ಯಾರ್ ಆಖಾಂತಾಚೊ ಘಡ್ಘಡೊ ಪಡ್‌ಲ್ಲೊ!

“ಸರ್ ಹಾಂವ್ ರಾಘವಚೊ ಪುತ್ನ್ಯೊ……” ವಿನೋದ್ ಅಧಿಕಾರಿಕ್ ಹಾತ್ ಜೊಡುನ್ ಸಾಂಗಾಲಾಗ್ಲೊ- “ಆಮಿಂ ಪಾಟ್ಲ್ಯಾ ವೀಸ್ ವರ‍್ಸಾಂ ಥಾವ್ನ್, ರಾಘವಾಚಿ ಚಾಕ್ರಿ ಕರುನ್ ಆಸಾಂವ್. ಆಮಿಂ ಕೊಣ್‌ಯಿ ಪರ್ಕಿಂ ನಹಿಂ, ತಾಚಿಂಚ್ ಆಪ್ಲಿಂ. ತಾಚ್ಯೆ ಚಾಕ್ರೆಂತ್ ಆಮಿಂ ಕಾಮ್ ಕರುನ್ ಜೊಡ್‌ಲ್ಲೆಂಯಿ ಖರ್ಚಾಲಾಂ. ಆತಾಂ ಆಮ್ಚೆಲಾಗ್ಗಿಂ ಕಾಂಯಿಂಚ್ ನಾ. ಆಮ್ಚೆಂ ಮ್ಹಳ್ಳೆಂ ಘರ್‌ಯಿ ನಾ. ಅಸಲ್ಯೆ ಸ್ಥಿತೆರ್ ಆಮಿಂ ಖಂಯ್ ವೆಚೆಂ…..?” ಸಾಂಗ್ತಾಂ ಸಾಂಗ್ತಾಂ ವಿನೋದ್ ರಡ್ತಾನಾ, ವಾಯ್ಲೆಟ್‌ಯಿ ರಡಾಲಾಗ್ಲಿ.

“ಹೆಂ ತುಮಿಂ ಪಯ್ಲೆಂ ಜಾಣಾ ಜಾಂವ್ಕ್ ಜಾಯ್ ಆಸ್‌ಲ್ಲೆಂ…..” ಅಧಿಕಾರಿ ರಡ್ಚ್ಯಾ ಘೊವ್ ಬಾಯ್ಲೆಕ್, ತಾಂಚಿ ಅಸಾಹಾಯೆಕತೆಚೆರ್ ಬಿರ್ಮೊತ್ ಪಾವೊನ್ ಸಾಂಗಾಲಾಗ್ಲೊ- “ದಿವಂಗತ್ ರಾಘವಾನ್, ತೊ ಕಾಮಾಥಾವ್ನ್ ನಿವ್ರತ್ ಜಾತಾನಾಂಚ್ ವೀಲ್ ಕರುನ್ ದವರ್‌ಲ್ಲೊ. ತುಮಿಂ ತ್ಯಾ ವೆಳಾ ಖಂಯ್ ಆಸ್‌ಲ್ಲ್ಯಾತ್? ಇತ್ಲಿ ವರ‍್ಸಾಂ ತಾಚಿ ಚಾಕ್ರಿ ಕರುನ್ ಆಸ್ತಾನಾ, ತುಮಿಂ ಕಿತ್ಯಾಕ್, ತಾಚೆ ಉಪ್ರಾಂತ್ ತಾಚ್ಯೆ ಆಸ್ತಿಕ್ ಕೋಣ್ ವಾರೆಸ್ದಾರ್ ಮ್ಹಣ್ ವಿಚಾರುಂಕ್‌ನಾ? ತೊ ಜೀವಾಂತ್ ಆಸ್ತಾನಾ, ಸಗ್ಳೆಂ ಸಾಧ್ಯ್ ಆಸ್‌ಲ್ಲೆಂ. ಪುಣ್ ಆತಾಂ ಆಮಿಂ ಕಾಂಯ್ ಕರುಂಕ್ ಜಾಯ್ನಾಂ. ಫಕತ್ತ್ ತುಮ್ಕಾಂ ಎಕಾ ಮಹಿನ್ಯಾಚೊ ವಾಯ್ದೊ ದೀಂವ್ಕ್ ಸಕ್ತಾಂವ್” ಮ್ಹಣ್ ಸಾಂಗೊನ್ ಅಧಿಕಾರಿ ಥಂಯ್ ಥಾವ್ನ್ ಗೆಲೊ.

“ಪೆಲ್ಯಾಚ್ಯಾ ಆಸ್ತಿಕ್ ಆಶೆವ್ನ್, ಆಮಿಂ ಆಮ್ಚೊ ಕರುಂಕ್ ಆಸ್ಚೊ ಫುಡಾರ್‌ಯಿ ಹೊಗ್ಡಾಯ್ಲೊ ವಿನೋದ್. ಬಾಡ್ಯಾಚ್ಯಾ ಘರಾಂತ್ ಆಸ್‌ಲ್ಲ್ಯಾಂವ್ ತರ್, ಫುಡಾರಾಚೆಂ ಚಿಂತುನ್, ದೊಗಾಯ್ನಿ ಕಾಮ್ ಕರುನ್, ಕಾಮಯಿಲ್ಲ್ಯಾ ಪಯ್ಶ್ಯಾಂನಿ ಕಾಂಯ್ ತರ್‌ಯ್ ಉರವ್ನ್, ವ ಬೆಂಕಾಚೆಂ ರೀಣ್ ಕಾಡುನ್, ಆಜ್ ಆಮ್ಚೆಂ ಮ್ಹಳ್ಳೆಂ ಸ್ವತಾಃಚೆಂ ಘರ್ ತರೀ ಕರುಂಕ್ ಸಕ್ತ್ಯಾಂವ್. ಪುಣ್ ಬಾಪ್ಲ್ಯಾಚಿ ಆಸ್ತ್ ಆಮ್ಚಿ ಜಾತೆಲಿ ಮ್ಹಣ್ ಚಿಂತುನ್ ಆಸ್‌ಲ್ಲ್ಯಾ ತುಜ್ಯಾ ಆಬ್ಳೆಸ್ಪಣಾ ನಿಮ್ತಿಂ, ಆಸ್‌ಲ್ಲೆಂಯಿ ಆಮಿಂ ಹೊಗ್ಡಾಯ್ಲೆಂ…..” ವಾಯ್ಲೆಟ್ ಭೋವ್ ಅಸಾಯಾಕತೆನ್ ರಡಾಲಾಗ್ಲಿ.

ವಿನೋದ್ ಆಪ್ಣೆ ಆನಿ ತಾಚ್ಯಾ ಬಾಯ್ಲೆನ್ ಕೆಲ್ಲ್ಯಾ, ಮೊಲ್ ಮೆಳಾನಾತ್‌ಲ್ಲ್ಯಾ ವೀಸ್ ವರ‍್ಸಾಂಚ್ಯಾ ಚಾಕ್ರೆಕ್ ಚಿಂತುನ್ ದೆದೆಸ್ಪರ್ ಜಾತಾನಾ, ಅಚಾನಕ್ ಲಾಯ್ಟ್  ಗೆಲೆ!

“ಕಿತೆಂ ಜಾಲೆಂ?” ಮ್ಹಣ್ ವಿನೋದ್ ಘಡ್ಬಡ್ತಾನಾ, ವಾಯ್ಲೆಟ್ ಸಾಂಗಾಲಾಗ್ಲಿ – “ಮಸ್ತು ತೇಂಪ್ ಥಾವ್ನ್, ಹ್ಯಾ ಫ್ಲೆಟಾಚ್ಯಾ ಲಾಯ್ಟಾಚೆಂ ಬಿಲ್ಲ್ ಭರುಂಕ್ ನಾತ್‌ಲ್ಲೆಂ. ನೊಟಿಸ್‌ಯಿ ಆಯಿಲ್ಲೆಂ. ಮ್ಹಜೆಲಾಗ್ಗಿಂ ಪಯ್ಶೆಯಿ ನಾತ್‌ಲ್ಲೆ. ಮಾತಾರೊ ಭರ‍್ತಲೊ ಮ್ಹಣ್ ಹಾಂವ್ ಬೇಫಿಕಿರ್ ಜಾಲ್ಲಿಂ. ಬಹುಷಾ ತಾಣಿಂ ಮಾತಾರೊ ಮೆಲೊ ಮ್ಹಣ್ ಕಳ್ತಚ್ ಲಾಯ್ಟ್ ಕಾತರ‍್ಲೆ!”

ಕಷ್ಟಾಂ ವಯ್ರ್ ಕಷ್ಟ್ ಹಾಂಚೆರ್ ಯೆತಾನಾ, ಟ್ರಸ್ಟಾಚ್ಯಾ ಅಧಿಕಾರಿನ್ ಹಾಂಚಿ ಬಿರ್ಮೊತ್ ಪಾವೊನ್ ದಿಲ್ಲೊ ಎಕಾ ಮಹಿನ್ಯಾಚೊ ವಾಯ್ದೊಯಿ ಹಾಂಚೆಂ ಖಾತಿರ್ ಉಪ್ಕಾರಾಕ್ ಪಡಾನಾ ಜಾಲೊ!!!

► ಎಚ್. ಜೆ. ಗೋವಿಯಸ್