ಕಾರ್‌ವಾರಾಂತ್ ‘ಕರಿ’ ಪುಸ್ಚಿಂ ಕಾಮಾಂ ?

ಆದ್ಲ್ಯಾ ಹಪ್ತ್ಯಾಂತ್ ಕಾರ್‌ವಾರ್‌ ನಗರಸಭೆಚಾ ಥೊಡ್ಯಾ ರಸ್ತ್ಯಾಂಕ್ ನವೆ ಫಲಕ್ ಘಾಲ್ಲೆ ವರ್ವಿಂ ಉತ್ತರ್ ಕನ್ನಡಾಂತ್ ಪರತ್ ಭಾಶ್ಷೆಚ್ಚೆೊ ವಿವಾದ್ ಉಟ್ಲಾ. ಕಾರ್‌ವಾರ್ ನಗರಸಭೆನ್ ರಸ್ತ್ಯಾಂಕ್ ಘಾಲ್ಲ್ಯಾ ನವ್ಯಾ ಫಲಕಾಂಚೆರ್ ಕನ್ನಡ ಭಾಶೆ ಸಕಯ್ಲ್ ದೇವನಾಗಿರಿ ಲಿಪಿಚಾ ಕೊಂಕ್ಣೆಂತ್ ರಸ್ತ್ಯಾಚಿಂ ನಾಂವಾ ಬರಯಿಲ್ಲಿಂ. ಕಾರ್‌ವಾರ್ ತಾಲೂಕಾಂತ್ ಕೊಂಕ್ಣಿ ಭಾಸ್ ಉಲಂವ್ಚೊ ಲೋಕ್ 2011 ಖಾನೆಸ್‌ಮಾರಿ ಪ್ರಕಾರ್ ಸುಮಾರ್ 78 ಪ್ರತಿಶತ್ ಆಸಾ ದೆಕುನ್ ನಗರಸಭೆನ್ ಫಲಕಾಂಚೆರ್ ದೊನೀ ಭಾಸಾಂನಿ, ಮ್ಹಳ್ಯಾರ್ ರಾಜ್ಯ್ ಭಾಸ್ ಆನಿ ಥಳೀಯ್ ಭಾಸ್  ರಸ್ತ್ಯಾಂಚಿ ನಾಂವಾ ಬರಂವ್ಚೊಂ ಪ್ರಯೋಗ್ ಕೆಲ್ಲೊ. ಪೂಣ್ ಥೊಡ್ಯಾ ಕುರ್ಡ್ಯಾ ಕನ್ನಡ ಭಾಷಾಭಿಮಾನಿಂನಿ ( ಅಭಿಮಾನಿ ಮಣ್ಚೆಂಯ್ ಚೂಕ್)  ಹ್ಯಾ ಫಲಕಾಂಚೆರ್ ಕೊಂಕ್ಣೆಂತ್ ಬರಯ್ಲೆಲ್ಯಾ ನಾಂವಾಂಕ್ ಕಾಳೊ ತೀಂತ್ ಪುಸುನ್ ನಾಂವಾಂ ಮಾಜ್ವಾಯ್ಲಿಂ. ಆನಿ ಹ್ಯಾ ವರ್ವಿಂ ಕೊಂಕ್ಣಿ ಲೋಕ್ ಚಾಳ್ವಾಲೊ. ನಿಜಾಯ್ಕೀ ಹೊ ವಿವಾದ್ ಕರ್ಚೆ ತಸಲೊ ವ್ಹಡ್ ವಿಶಯ್ ನಯ್ ತರೀ, ಥೊಡ್ಯಾ ಮೂಳ್‌ಭೂತ್‌ವಾದಿಂನಿ ಭಾಶೆಚೊ ಗೊಂಗೊ ದಾಕವ್ನ್  ಸಮಾಧಾನ್ ಬಿಗ್ಡಾಂವ್ಚೆಂ ಪ್ರೇತನ್ ಕೆಲಾಂ ತೆಂ ನೆಗಾರುಂಕ್ ಜಾಯ್ನಾ. ಬೆಳಗಾಂತ್ ಕನ್ನಡ ಆನಿ  ಮರಾಠಿ ವಿವಾದ್ ಚಾಲು ಆಸ್ತಾನಾಂಚ್ ( ಗಡಿ ವಾದ್ ಅಜೂನ್ ಸುಪ್ರಿಂ ಕೋರ್ಟಾಂತ್ ಆಸಾ) ಸಮಾದಾನೆನ್ ಆಸ್ಚ್ಯಾ ಕಾರ್‌ವಾರಾಂತ್, ಕನ್ನಡ ಆನಿ ಕೊಂಕ್ಣಿ ಭಾಷಿಕಾಂ ಮಧೆಂ ಭಾಶೆ ಖಾತಿರ್ ಝಗ್ಡೆಂ, ತಕ್ರಾರ್ ಉಬ್ಜಲ್ಯಾತ್.

ಕರ್ನೆಕ್ ಏಕ್ ಪಾಟಿಂಕರ್ನಿ ಆಸ್ತಾಚ್ ಮ್ಹಳ್ಳಿ ಗಜಾಲ್ ಸಗ್ಳ್ಯಾಂಕ್ ಕಳಿತ್ ಆಸ್ಚಿಚ್. ಆತಾಂ, ಕರ್ನಾಟಕ ರಕ್ಷಣಾ ವೇದಿಕೆ (ಕರವೇ) ನಾಂವಾರ್  ಕುಮಟಾ ಆನಿ ದಾಂಡೇಲಿ ಥಾವ್ನ್ ಯೇವ್ನ್ ಥೊಡ್ಯಾಂನಿ ಆದಾರ್‌ಲ್ಲ್ಯಾ ಕರ್ತುಬಾಂ ವರ್ವಿಂ ಆತಾಂ ಕೊಂಕ್ಣಿ ಉಲಂವ್ಚೊ ಕಾರ್‌ವಾರ್‌ಚೊ  ಲೋಕ್ ಉಚಾಂಬಳ್ ಜಾಲಾ. ಆದ್ಲ್ಯಾ ಸುಕ್ರಾರಾ ಜೂನ್ 17 ವೆರ್ ಕೊಂಕ್ಣಿ ಲೊಕಾನ್ ಬ್ಲ್ಯಾಕ್ ಡೇ ಆಚರಣ್ ಕರುನ್ ಜಾಥಾ ಕಾಡ್ಲೊ. ಜಾಥಾಂತ್ ಉತ್ತರ್ ಕನ್ನಡಾಚಾ ಕೊಂಕ್ಣಿ ಲೊಕಾಂಕ್ ಸಾಥ್ ದೀಂವ್ಕ್ ಮಹಾರಾಷ್ಟ್ರ, ಗೊಯಾಂ ಆನಿ ಹೆರ್ ರಾಜ್ಯಚಾ ಕೊಂಕ್ಣಿ ಸಂಘಟನಾಚೆ ಮುಖೆಲಿ ಹಾಜರ್ ಆಸ್ಲೆ. ಕೊಂಕ್ಣಿ ಭಾಶೆಕ್ ಕನ್ನಡ ಭಾಶೆಚ್ಯಾ ನಾಂವಾನ್ ಕೆಲ್ಲ್ಯಾ ಅಕ್ಮಾನಾವಿಶಿಂ ಆಕ್ರೋಶ್ ವೆಕ್ತ್ ಕರುಂಕ್ ಹೊ ಜಾಥಾ ಮಾಂಡುನ್ ಹಾಡ್‌ಲ್ಲೊ.  ಜಿಲ್ಲಾಧಿಕಾರಿಕ್ ಫಿರ್ಯಾದ್ ದೀವ್ನ್ ಕೊಂಕ್ಣಿ ಭಾಶೆಕ್ ಅಕ್ಮಾನ್ ಕೆಲ್ಲ್ಯಾಂಚೇರ್ ಕಾನೂನೀ ಕ್ರಮ್ ಕ್ರಮ್ ಘೆಂವ್ಕ್ ಜಾಯ್ ಮ್ಹಣ್ ಕೊಂಕ್ಣಿ ಲೊಕಾನ್ ಮಾಗ್ಣೆಂ ಕೆಲೆಂ. ಸಾಂಗಾತಾ ನಗರ್‌ಸಭೆಕ್ ನಾಮ್‌ಫಲಕ್ ಕೊಂಕ್ಣಿ ಭಾಶೆಂತ್ ಬರಂವ್ಕ್ 15 ದಿಸಾಚಿ ಗಡ್ ದಿಲ್ಯಾ. ಇತ್ಲೆಂ ಜಾಲ್ಲೆಂಚ್, ಪಯ್ಲೆಂ ಕ್ರಮ್ ಜಾವ್ನ್ 5 ಜಣಾಂ ವಿರೋದ್ ಎಫ್ ಐ ಆರ್ ದಾಕಲ್ ಜಾಲಾಂ.

ಉತ್ತರ್ ಕನ್ನಡಾಂತ್ ಕೊಂಕ್ಣಿ ಲೋಕ್ 

ಕೊಂಕ್ಣಿ ಭಾಶೆಕ್, ಕೊಂಕ್ಣಿ ಸಾಹಿತ್ಯ್  ಫಾವೊತಿ ಮಾನ್ಯತಾ ಮೆಳಜಾಯ್ ಮ್ಹಣ್ ವಾವುರ್ಲೆಲ್ಯಾ ಪ್ರದೇಶಾಂ ಪೈಕಿ ಕಾರ್‌ವಾರ್ ಪಯ್ಲ್ಯಾ  ಸ್ಥಾನಾರ್ ಆಸಾ. ದುಸ್ರೆಂ ಮಹಾಝುಜ್ ಸುರು ಜಾಲ್ಲ್ಯಾ ವೆಳಾರ್ ಆನಿ ಭಾರತಾಚಾಂತ್ ಸುಟ್ಕೆಝುಜ್ ಚಾಲು ಆಸ್ತಾನಾಂಚ್ ಕುಮಟಾಚೊ ಕೊಂಕ್ಣಿ ವಾವ್ರಾಡಿ ಪ್ರಖ್ಯಾತ್ ವಕೀಲ್, ಬರವ್ಪಿ ದೆ| ಮಾಧವ್ ಮಂಜುನಾಥ್ ಶಾನುಭಾಗಾನ್ ರಾಷ್ಟ್ರ‍್ ಮಟ್ಟಾಚಿ ಅಖಿಲ್ ಭಾರತೀಯ ಕೊಂಕಣಿ ಪರಿಷದ್ 1939 ಇಸ್ವೆಂತ್ ಕಾರ್ವಾರಾಂತ್ ಸ್ಥಾಪನ್ ಕರುನ್ ಪಯ್ಲೆಂ ಕೊಂಕ್ಣಿ ಸಮ್ಮೇಳನ್ ಮಾಂಡುನ್ ಹಾಡ್ಲೆಂ. ಮಾಧವ್ ಶಾನುಭಾಗಾನ್ ಕರ್ನಾಟಕಾಚಾ ವಿವಿಂಗಡ್ ತಾಲೂಕಾಂನಿ ಆನಿ ಹೆರ್ ಪ್ರದೇಶಾಂಕ್ ಪ್ರವಾಸ್ ಕರುನ್ ಶಿಂಪಡ್ಲೆಲ್ಯಾ ಕೊಂಕ್ಣಿ ಲೊಕಾಕ್ ಏಕ್ ಭಾಸ್, ಏಕ್ ಲಿಪಿ ಆನಿ ಏಕ್ ಸಾಹಿತ್ಯ್ ಹ್ಯಾ ಬೊಂದೆರಾಖಾಲ್ ಎಕ್ವಟಾಂವ್ಚೆ ಪ್ರೇತನ್ ಕೆಲ್ಲೆಂ ತೆಂ ಕೊಂಕ್ಣಿ ಭಾಶೆಚ್ಯಾ ವಾವ್ರಾಚಾ ಚರಿತ್ರೆಂತ್ ಮಹತ್ವಾಚೆಂ ಘಡಿತ್.  ತಾಣೆಂ ಸ್ಥಾಪನ್ ಕೆಲ್ಲಿ ಅಖಿಲ್ ಭಾರತೀಯ ಕೊಂಕ್ಣಿ ಪರಿಷದ್ 1961 ಇಸ್ವೆಂತ್ ಗೊಂಯಾಕ್ ವರ್ಗ್ ಜಾಲಿ. ಆತಾಂಯ್ ಹಿ ಪರಿಷದ್ ಕಾರ್ಯಾಳ್ ಆಸಾ ಆನಿ ಕೊಂಕ್ಣೆಚೊ ವಾವ್ರ್ ಕರುನ್ ಆಸಾ ತಿ ಅಭಿಮಾನಾಚಿ ಗಜಾಲ್. ಹಾಕಾ ಮಾಧವ್ ಶಾನುಭಾಗಾನ್ ಘಾಲ್ಲಿ  ಭದ್ರ್ ಬುನ್ಯಾದ್‌ಚ್ ಕಾರಣ್ ಜಾವ್ನಾಸಾ.

ಕರ್ನಾಟಕಾಂತ್ ಉತ್ತರ್ ಕನ್ನಡ್ ಜಿಲ್ಲ್ಯಾಂತ್ ಕೊಂಕ್ಣಿ ಉಲಂವ್ಚೊ  ಲೋಕ್ ಚಡ್  ಆಸಾತ್ ತೆಂ ಸತ್ ಸಬಾರಾಂಕ್ ಕಳಿತ್ ನಾಂ ತಶೆಂ ದಿಸ್ತಾ. 2011 ವ್ಯಾ ಖಾನೆಸ್‌ಮಾರಿ ಪ್ರಕಾರ್ ಉತ್ತರ್ ಕನ್ನಡ್ ಜಿಲ್ಲ್ಯಾಂತ್ ಕೊಂಕ್ಣಿ ಉಲಂವ್ಚೊ ಲೋಕ್ 2,61,807.  ದುಸ್ರ್ಯಾ ಸ್ಥಾನಾರ್ ದಕ್ಷಿಣ್ ಕನ್ನಡ್ ಜಿಲ್ಲೊ ಆನಿ ತಿಸ್ರ್ಯಾ ಸ್ಥಾನಾರ್ ಉಡುಪಿ ಆಸಾ. ಕೊಂಕ್ಣಿ ಉಲಂವ್ಚೊ ಲೋಕ್ ಕರಾವಳಿ ತಡಿರ್ – ಭಟ್ಕಳ್, ಹೊನ್ನಾವರ್, ಕುಮಟಾ, ಅಂಕೋಲಾ ಆನಿ ಕಾರ್ವಾರ್ ಆನಿ ಗೊಂಯಾಚಾ ಗಡಿಚೆರ್ ಆಸ್ಚ್ಯಾ ತಾಲೂಕಾಂನಿ ಆಸಾತ್ ತರ್, ಕಾನಡಿ ಭಾಷೆಚೊ ಲೋಕ್ ಮಲ್ನಾಡ್ ಪ್ರದೇಶಾಚಾ ಸಿರ್ಸಿ, ಸಿದ್ದಾಪುರ, ಎಲ್ಲಾಪುರ, ಮುಂಡಗೋಡು, ಹಳಿಯಾಳ ತಾಲುಕಾಂನಿ ಕನ್ನಡ ಉಲಂವ್ಚೊ ಲೋಕ್ ವಸ್ತಿ ಕರ್ತಾತ್. ಕಾರ್ವಾರಾಂತ್ ಸುಮಾರ್ 70 ಪ್ರತಿಶತ್ ಕೊಂಕ್ಣಿ ಉಲಂವ್ಚೊ ಲೋಕ್ ಆಸಾ. ಕಶೆಂ ಕೊಡ್ಯಾಳಾಂತ್ ತುಳು ಭಾಸ್ ಹರ್ಯೆಕ್ ಲೋಕ್ ಉಲಯ್ತಾ ತಶೆಂ ಕಾರ್ವಾರಾಂತ್ ಕೊಂಕ್ಣಿ ಚಡ್ತಾವ್ ಲೊಕಾಚಿ ಮಾಂಯ್ ಭಾಸ್ ತಶೆಂಚ್ ಬಾಜಾರ್ ಭಾಸ್‌ಯೀ ಜಾವ್ನಾಸಾ. ಕೊಂಕ್ಣಿ ಭಾಸ್ ಉಲಯ್ತೆಲೆ  ಉತ್ತರ್ ಕನ್ನಡ್ ಜಿಲ್ಲ್ಯಾಚಾ ಹರ್ಯೆಕಾ ತಾಲೂಕಾಂತ್ ಶಿಂಪ್ಡೊನ್ ಆಸಾತ್. ಆನಿ ಹ್ಯಾ ಕಾರಣಾಕ್ ಲಾಗೊನ್ ಕೊಂಕ್ಣಿ ಲೋಕ್ ಚಡ್ ಸಂಖ್ಯಾನ್  ಆಸ್ಚೆ ಉತ್ತರ್ ಕನ್ನಡಾಚೆ ಥೊಡೆ ತಾಲೂಕ್ ಗೊಂಯಾಕ್ ಮೆಳಯ್ಜಾಯ್ ಮ್ಹಣ್ ಥೊಡ್ಯಾಂನಿ ಆಂದೋಲನ್ ಕೆಲ್ಲೆಂ ಆಸಾ.

ಕಾರ್ವಾರ್ ಆನಿ ಹೆರ್ ಥೊಡೆ ಕೊಂಕ್ಣಿ  ಉಲವ್ಪಿ ಚಡ್ ಸಂಖ್ಯಾನ್ ಆಸ್ಚೆ  ತಾಲೂಕ್ ಗೊಂಯಾಂಕ್ ಮೆಳಯ್ಲ್ಯಾರ್ ಹ್ಯಾ ತಾಲೂಕಾಂ ಸಾಂಗಾತಾ ಕಾರ್ವಾರ್ ಬಂದರ್, ಕೈಗಾ ಅಣುಸ್ಥಾವರ್, ಕದಂಬಾ ನೌಕೊ, ಕಾರ್ವಾರ್ ದರ್ಯಾ ತಡ್ ಆನಿ ವೀಜ್ ಉತ್ಪಾದನ್ ಕರ್ಚೆ 5 ಕಾಟ್‌ಬಾಂಧ್ (dams) ಹೆಂ ಸರ್ವ್ ಗೊಂಯಾಂಕ್ ಸುಲಭಾಯೆನ್ ಮೆಳ್ತಾತ್ ಮ್ಹಣ್ ಗೊಂಯ್ಚಾ ಸರ್ಕಾರಾಕ್ ಆಶಾ ದಾಕಂವ್ಚೆಂ ಪ್ರೇತನ್ ಚಲ್‌ಲ್ಲೆಂಯ್ ಆಸಾ.  ಪೂಣ್ ಹ್ಯಾ ವರ್ವಿಂ ಕಿತೆಂಚ್ ಫಾಯ್ದೊ ಜಾಂವ್ಕ್ ನಾ.

ಕರ್ನಾಟಕ ಆನಿ ಮಹಾರಾಷ್ಟ್ರ ಮಧೆಂ ಭಾಶೆಕ್ ಅನಿ ಗಡಿಕ್ ಲಾಗೊನ್ ವಾದ್ ವಿವಾದ್ ಸಬಾರ್ ಧಾಕ್ಡ್ಯಾಂ ಥಾವ್ನ್  ಚಾಲು ಆಸಾ. ಭಾಶೆಚೊ ಆನಿ ಗಡಿಚೊ ಗೊಂಗೊ ಜೀವ್ ದವರುಂಕ್ ಆನಿ ತ್ಯಾ ಮಾರಿಫಾತ್ ರಾಜಕೀ ಫಾಯ್ದೊ ಜೊಡುಂಕ್ ಫುಡಾರಿ ಸವೆಂ ಥೊಡೆ ಕುರ್ಡೆ ಭಾಷಾಭಿಮಾನಿ ಆನಿ ಕೋಮುವಾದಿ, ತವಳ್ ತವಳ್ ಲೊಕಾಕ್ ಉಚಾಂಬೊಳ್ ಕರ್ನ್ ಗೊಬ್ರಾಂತ್ಲೆಂ ಕಿಟಾಳ್ ಫುಂಕುನ್ ಉಜೊ ಲಾಯಿಲ್ಲೆ ಸಬಾರ್ ದಾಕ್ಲೆ ಆಸಾತ್. ಕಾರ್ವಾರಾಂತ್ ಕೊಂಕ್ಣಿ ಫಲಕಾಂಕ್ ಕಾಳೊ ತೀಂತ್  ಪುಸ್ಚೆಂಯ್ ಹ್ಯಾಚ್ ವರ್ಗಾಕ್ ಮೆಳ್ತಾ.

2021 ವ್ಯಾ ವರ್ಸಾಚಾ ಸುರ್ವೆರ್‌ ಮಹಾರಾಷ್ಟ್ರಾಚೊ ಮುಕೆಲ್ ಮಂತ್ರಿ ಉದ್ಧವ್ ಠಾಕ್ರೆನ್ ವಿವಾದಾತ್ಮಕ್ ವಾಕ್ಮೂಲ್ ದೀವ್ನ್ ಕರ್ನಾಟಕಾಂತ್ ಆಸ್ಚ್ಯಾ ಚಡಿತ್ ಸಂಕ್ಯಾಚಾ ಮರಾಠಿ ಉಲಂವ್ಚ್ಯಾ ಲೊಕಾಕ್ ಮಹಾರಾಷ್ಟ್ರ ಸಾಂಗಾತಾ ಮೆಳಂವ್ಕ್ ಆಪುಣ್ ಬದ್ಧ್ ಆಸಾ ಮ್ಹಣ್ ಸಾಂಗ್‌ಲ್ಲೆಂ. ತಾಚ್ಯಾ ಪಯ್ಲೆಂ  2019 ವ್ಯಾ ಇಸ್ವೆಂತ್ ತ್ಯಾ ವೆಳಾರ್ ಮಹಾರಷ್ಟ್ರಾಂತ್ ಮಂತ್ರಿ ಜಾವ್ನಾಸ್ಲೆಲ್ಯಾ  ಅಜಿತ್ ಪವಾರಾನ್ ಕರ್ನಾಟಕಾಚೆ ಬೆಳಗಾಂ, ನಿಪ್ಪಾಣಿ ಆನಿ ಕಾರ್ವಾರ್ ಪ್ರದೇಶ್ ಮಹಾರಾಷ್ಟ್ರಾಂತ್ ಮೆಳೊಂಕ್ ಜಾಯ್ ಮ್ಹಣ್  ಸಾಂಗ್‌ಲ್ಲೆಂ ಮಾತ್ ನಯ್,  ಹೆಂ ಸಪಣ್ ಶಿವಸೇನಾಚೊ ಸ್ಥಾಪಕ್ ಬಾಳ್ ಸಾಹೇಬ್ ಠಾಕ್ರೆಚೆಂ ಮಣ್ ಸಾಂಗೊನ್ ಶಾಂತಿ ಕದ್ವಳಾಂವ್ಚೆಂ ಪ್ರೇತನ್ ಕೆಲ್ಲೆಂ. ಮಹಾರಾಷ್ಟ್ರಾಚೆ ರಾಜಕಾರಣಿ ಭಾಶೆಚೊ ಹೊ  ಗೊಂಗೊ ಜಿವೊ ದವರುಂಕ್ ತವಳ್ ತವಳ್ ಅಸಲಿಂ ವಾಕ್ಮೂಲಾಂ ದೀವ್ನ್‌ಚ್ ಆಸ್ತಾತ್.

ಕೊಂಕಣಿ ಮಂಚಾಚಿ ಕಿತಾಫತಿ 

ಅತಾಂ ಕರ್ನಾಟಕಾಚಾ ತಾಬೆಂತ್ ಆಸ್ಚ್ಯಾ ಬೆಳಗಾಂ ಆನಿ ಕೇರಳಾಂತ್ ಆಸ್ಚ್ಯಾ ಕಾಸರಗೋಡು ಸೊಡುನ್ ಕಾರ್ವಾರಾಂತ್ ಗಡ್ ಆನಿ ಭಾಷೆ ಸಂಬಂಧಿ ತಕ್ರಾರ್ ನಾತ್‌‌ಲ್ಲೆಚ್ ಮ್ಹಣ್ಯೆತ್. ಮಹಾರಾಷ್ಟ್ರಾಚ್ಯಾ ರಾಜಕಾರಣಿಂಕ್ ಆಮಿ ಕಾಂಯ್ ಉಣೆ ನಾಂವ್ ಮ್ಹಣ್ ಕಾರ್‌ವಾರ್‌ಚ್ಯಾ ಥೊಡ್ಯಾ ತುಂಡು ಕೊಂಕ್ಣಿ ಫುಡಾರ‍್ಯಾಂನಿ ಕಾರ್‌ವಾರಾಂತ್ ಭಾಶೆಚ್ಯಾ ನಾಂವಾರ್ ವಿವಾದ್ ಸುರು ಕೆಲ್ಲೊ.  ಕೊಂಕಣಿ ಮಂಚ್ ನಾಂವಾಚ್ಯಾ ಏಕಾ ಸಂಘಟನಾನ್ 2020 ವ್ಯಾ ಇಸ್ವೆಂತ್ ಕಾರ್ವಾರ್ ಧರ್ನ್ ಉತ್ತರ್ ಕನ್ನಡ್ ಜಿಲ್ಲ್ಯಾಚಾ ಜೊಯಿಡಾ ತಾಲುಕಾಂತ್ ಕೊಂಕ್ಣಿ ಉಲಂವ್ಚೊ ಲೋಕ್ ಚಡ್ ಆಸಾ ದೆಕುನ್ ಹ್ಯಾ ತಾಲೂಕಾಂಕ್ ಗೊಯಾಂ ರಾಜ್ಯಾಕ್ ಮೆಳಯ್ಜಾಯ್ ಮ್ಹಣ್  ಆಂದೋಲನ್ ಸುರು ಕೆಲೆಂ.

ಪೂಣ್, ಭಾಶೆಚ್ಯಾ ಆಧಾರಾರ್ ಲೊಕಾ ಥಂಯ್ ಗುಸ್ಪೊಡ್ ಗೊಂದೊಳ್ ಉಬ್ಜಂವ್ಚ್ಯಾ ತಾಂಚ್ಯಾ ಪ್ರೇತನಾಂಕ್ ಕಾರ್ವಾರ್‌ಚಾ ಕೊಂಕ್ಣಿ ಲೊಕಾನ್ ವ್ಹಡ್ ಸಾಂಗಾತ್ ದಿಲೊ ನಾ ದೆಕುನ್ ತಾಂಚ್ಯಾ ಪ್ರೇತನಾಕ್ ಜೀಕ್ ಮೆಳೊಂಕ್ ನಾ. ಸುಮಾರ್ 15 ವರ್ಸಾಂ ಆದಿಂಚ್ ಸ್ಥಾಪನ್ ಜಾಲ್ಲೊ ಥಳೀಯ್ ಸಂಸ್ಥೊ  ಜಾವ್ನಾಸ್ಚ್ಯಾ ಕೊಂಕಣಿ ಮಂಚ್ ಹಾಚ್ಯಾ ಫುಡಾರ‍್ಯಾಂನಿ (ಆಖಿಲ್ ಭಾರತೀಯ್ ಕೊಂಕ್ಣಿ ಪರಿಷದಾಚಿ ಕಾರ್ಯಾಧಕ್ಷ್ ಜಾವ್ನಾ‌ಸ್ಚಿ ಉಷಾ ರಾಣೆ ಆನಿ ಕಾರ್ವಾರ್ ಕೌನ್ಸಿಲರ್ ಆಶಾ ಪಾಲಂಕರ್ ಹಾಣಿಂ ತ್ಯಾ ವೆಳಾರ್ ಕೊಂಕ್ಣಿ ಮಂಚಾಚೆ ಪುಡಾರ‍್ಪಣ್ ಘೆತ್‌ಲ್ಲೆಂ) ಗೊಂಯಾಂಕ್ ಹೆ ತಾಲುಕ್ ಮೆಳಂವ್ಚೆಂ ಮ್ಹಣ್  ಯೆವ್ಜಣ್ ತಯಾರ್ ಕೆಲ್ಲಿ.

ಉತ್ತರ್ ಕನ್ನಡಾಚೆ ತಾಲೂಕ್ ಗೊಂಯಾಂತ್ ಮೆಳಂವ್ಕ್ ಪ್ರೇತನ್ ಕರ್ತಾತ್ ತಿ ಖಬರ್ ತವಳ್ ಕನ್ನಡ ಸಂಘಟನಾಂಚ್ಯಾ ಕಾನಾಕ್ ಪಡ್ಲಿ ಆನಿ ವಿಷಯ್ ಗಂಭೀರ್ ಜಾಲೊ. ಹಾಕಾ ಪ್ರತಿಕ್ರಿಯಾ ಜಾವ್ನ್ ಬೆಂಗ್ಳುರ್ ಥಾವ್ನ್ ಆಯ್ಲೆಲ್ಯಾ ಥೊಡ್ಯಾ ಕನ್ನಡ ಸಂಗಟನಾಚ್ಯಾ ಸಾಂದ್ಯಾಂನಿಂ ಕೊಂಕಣಿ ಮಾಂಚಿಯೆಚ್ಯಾ ಫುಡಾರ‍್ಯಾಂಚೆರ್ ಉಗ್ತ್ಯಾ ಜಾಗ್ಯಾರ್ ತಾಂತ್ಯಾ ಮಾರ್ನ್ ಪ್ರತಿಭಟನ್ ಕೆಲೆಂ. ಹೆಂ ಜಾಲ್ಲೆಂಚ್ ಕೊಂಕಣಿ ಮಂಚಾಚೆ ಫುಡಾರಿ ತವಳ್ಚೊ ಗೊಂಯ್ಚೊ ಮುಖೆಲ್ ಮಂತ್ರಿ ಮನೋಹರ್ ಪರಿಕ್ಕರಾಕ್ ವಚೊನ್ ಮೆಳ್ಳೆ ಆನಿ ಹ್ಯಾ ವಿಶಿಂ ತಾಕಾ ಫಿರ್ಯಾದ್ ದಿಲಿ ಆನಿ ತಾಚೊ ಪಾಟಿಂಬೊ ಮಾಗ್ಲೊ. “ತುಮಿ ಕಿತೆಂಗೀ ಗೊಯಾಂ ಯೇಂವ್ಕ್ ತಯಾರ್ ಆಸಾತ್.  ಪೂಣ್ ಆಮಿಂ ಗೊಂಯ್ಚೊ ಲೋಕ್ ತುಮ್ಕಾಂ ಘೆಂವ್ಕ್ ತಯಾರ್ ನಾಂವ್” ಮ್ಹಣ್ ಪರಿಕ್ಕರಾನ್ ಖಡಕ್ಕ್ ಜಾಪ್ ದೀವ್ನ್ ಕೊಂಕ್ಣಿ ಮಂಚಾಚ್ಯಾ ಉದ್ದೇಶಾಚೆರ್ ಶೆಳೆಂ ಉದಾಕ್ ವೊತುನ್ ಪಾಟಿಂ ದಾಡ್ಲೆಂ ಖಂಯ್!

ಪರಿಕ್ಕರಾನ್ ಅಶೆಂ ಖಡಕ್ ಜಾಪ್ ದೀಂವ್ಕ್ ಕಾರಣ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ – ಕಾರ್ವಾರ್,  ಹಳಿಯಾಳ್, ಜೊಯಿಡಾ ಗೊಂಯಾಕ್ ಮೆಳ್ಳ್ಯಾರ್ ಗೊಂಯ್ಚೊ ಲೋಕ್ ಸಂಖೊ (demography) ಬದಲ್ತಾ ತೆಂ ಸತ್ ಪರಿಕ್ಕರಾಕ್ ಬರ‍್ಯಾನ್ ಕಳಿತ್ ಆಸ್‌ಲ್ಲೆಂ. ಹೆ ನವೆ ಪ್ರದೇಶ್ ಗೊಂಯಾಂತ್ ಮೆಲ್ಳ್ಯಾರ್ 3 ಲಾಕ್ ಹಿಂದು ಲೋಕ್ ಗೊಯಾಂಕ್ ವೆತಲೊ. ಹ್ಯಾ ವರ್ವಿಂ ಥಂಯ್ಸರ್ ಆಸ್ಚೊ ಕ್ರಿಸ್ತಾಂವ್ ಲೋಕ್ ಅಲ್ಪಸಂಖ್ಯಾತ್ ಜಾವ್ನ್ ತ್ಯಾ ವರ್ವಿಂ ಉಬ್ಜೊಂಚಿಂ ರಾಜಕೀಯ್ ಪರಿಗತ್ ಫುಡ್ ಕರುಂಕ್ ಖಂಯ್ಚೀಯ್ ರಾಜಕೀಯ್ ಪಾಡ್ತ್ ತಯಾರ್ ನಾ ಮ್ಹಳ್ಳೆಂ ಪರಿಕ್ಕರ್ ಜಾಣಾಸ್ಲೊ.

ಕಾರ್‌ವಾರಿ ಲೋಕ್ ವರ್ತ್ಯಾ ಸಮ್ಜಣೆಚೊ 

ಪರಿಕ್ಕರ್ ಸರ್ಲ್ಯಾ ಉಪ್ರಾಂತ್ ಆಡ್ ಪಡ್ಲೆಲೆಂ ಮಂಚ್ ಪರ್ತ್ಯಾನ್ ನೀಟ್ ಜಾಲೆಂ ಆನಿಂ ಕರ್ನಾಟಕಾಚೆ ಥೊಡೆ ಪ್ರದೇಶ್ ಗೊಂಯಾಂತ್ ಮೆಳಯ್ಜಾಯ್ ಮ್ಹಣ್  ಅಭಿಯಾನ್ ಸುರು ಕೆಲೆಂ. ಗೊಂಯ್ ಸರ್ಕಾರಾಕ್ ಪರ್ತ್ಯಾನ್ ಹ್ಯಾ ವಿಶಿಂ ಫಿರ್ಯಾದ್ ದಿಲಿ. ಕಾರ್ವಾರ್ ಆನಿ ಜೊಯಿಡಾಂತ್ ಕೊಂಕ್ಣಿ ಉಲಂವ್ಚೊ ಲೋಕ್ ಚಡ್ ಸಂಕ್ಯಾನ್ ಆಸಾ ದೆಕುನ್ ಹೆ ಪ್ರದೇಶ್ ಕರ್ನಾಟಕಾಂತ್ ಉರ್ಲ್ಯಾರ್ ಹ್ಯಾ ಲೊಕಾಕ್ ಅನ್ನ್ಯಾಯ್ ಜಾತಾ ಮ್ಹಣ್ ತಾಣಿ ವಾದ್ ಮಾಂಡ್ಲೊ. ತರೀ ಕೊಂಕ್ಣಿ ಮಂಚಾಚೆ ಪ್ರೇತನ್ ಸುಫಳ್ ಜಾಂವ್ಕ್ ನಾ ಕಿತ್ಯಾಕ್ ಹ್ಯಾ ತಾಲೂಕಾಂಚ್ಯಾ  ಕೊಂಕ್ಣಿ ಲೊಕಾನ್ ತಾಂಕಾ ತೆಂಕೊ ದೀಂವ್ಕ್ ಇನ್ಕಾರ್ ಕೆಲೆಂ. ಹ್ಯಾಚ್ಚ್ ವೆಳಾರ್ ಕಾರ್ವಾರ್ಚಾ ಕಾನಡಿ ಭಾಷೆಚಾ ಸಂಘಟನಾನಿಂ ಕೊಂಕಣಿ ಮಂಚಾಕ್ ಹ್ಯಾ ವಿಷಯಾಚೆರ್ ಭೆಶ್ಟೆಂಚ್ ‘ದುಸ್ಸಾಹಸ್’ ಕರುಂಕ್ ನಜೊ ಮ್ಹಣ್ ಕಡಕ್ಕ್ ತಾಕಿದ್ ದಿಲಿ. ತ್ಯಾ ಉಪ್ರಾಂತ್ ಥಂಡ್ ಪಡ್ಲೆಲೆಂ ಕೊಂಕ್ಣಿ ಮಂಚ್ ಪರ್ತ್ಯಾನ್ ಉಟೊನ್ ಉಭೆಂ ರಾವೊಂಕ್ ನಾ. ಕಾರ್‌ವಾರ್‌ಚ್ಯಾ ಕೊಂಕ್ಣಿ  ಲೊಕಾನ್ ಭಾಶೆಬಾಬ್ತಿನ್ ಖರ‍್ಯಾನ್ ಪರಿಪಿಕಾಯ್ ದಾಕಯ್ಲಿ ಆನಿ ತೆ ಅಸಲ್ಯಾ ಸಂಘಟನಾಚಾ ಪಾಸಾಂತ್ ಲೋಕ್ ಪಡೊಂಕ್ ನಾಂತ್. ಹಿ ಬೋವ್ ವರ್ತಿ ಗಜಾಲ್. ಆದ್ಲ್ಯಾ ಹಪ್ತ್ಯಾಂತ್ ಕಾರ್ವಾರಾಂತ್ ಕೊಂಕ್ಣಿ ಫಲಕಾಂಕ್ ಕಾಳಿ ತೀಂತ್ ಪುಸುನ್ ಕನ್ನಡ ಭಾಶೆಚ್ಯಾ  ನಾಂವಾರ್ ಲೊಕಾಚೆ ವಾಂಟೆ ಕರುನ್, ಶಾಂತಿ ಸಮಾಧಾನ್ ಕದ್ಳೊಂವ್ಚೆ ಪ್ರೇತನ್ ಕರ್ತೆಲ್ಯಾಂಕೀ ಕಾರ್‌ವಾರ್‌ಚೊ ಲೋಕ್ ದಿತೊಲೊ ಮ್ಹಣ್ಚ್ಯಾಕ್ ದುಬಾವ್ ನಾ. ಕಾರಣ್ – ಕಾರ್‌ವಾರ್‌ಚೊ ಲೋಕ್ ಸಮ್ಜಣೆಚೊ ಆಸಾ.

ಎದೊಳ್‌‌ಚ್ ಭಾಶೆಕ್ ಲಾಗೊನ್ ಮರಾಠಿ – ಕನ್ನಡ ಲೊಕಾ ಮಧೆಂ ಗಲಾಟೊ ಚಾಲು ಆಸಾ.  ಹೆರ್ ರಾಜ್ಯಾ ಮಧೆಂಯೀ ಗಡಿ ವಿವಾದ್ ಆಸಾತ್ ಆನಿ ತೆ ವರ್ವಿಂ ತವಳ್ ತವಳ್ ಗಲಾಟೊ ಜಾತಾ. ಸಬಾರಾಂಚೆಂ ಜೀವ್ ಗೆಲ್ಯಾತ್. ಲೊಕಾಚ್ಯಾ ಆನಿ ಸರ್ವಜಣಿಕ್ ಆಸ್ತ್ ಬದ್ಕಾಕ್  ನಷ್ಟ್ ಜಾಲಾ. ಅಶೆಂ ಆಸ್ತಾಂ ಅನಾವಶ್ಯಕ್ ಜಾವ್ನ್ ಭಾಶೆಚಿ ಗಜಾಲ್ ಮುಕಾರ್ ದವರುನ್,  ಲೊಕಾಕ್ ಉಚಾಂಬಳ್ ಕರ್ಚೆಂ ಆನಿ ಸಮಾಜಿಕ್ ಸಮಾದಾನ್ ಪಾಡ್ ಕರ್ಚೆಂ ಕಾಮ್ ಕೊಣೆಂಚ್ ಕರುಂಕ್ ನಜೊ ಮ್ಹಳ್ಳಿ ಜಾಣ್ವಾಯ್ ಭಾಶೆಚ್ಯಾ  ನಾಂವಾರ್ ಸಂಘಟನಾಂ ಬಾಂದ್ತೆಲ್ಯಾಂನಿ ಗುಮಾನಾಂತ್ ಘೆಂವ್ಕ್ ಜಾಯ್.  ಕಾರ್‌ವಾರ್‌ಚ್ಯಾ ಲೊಕಾನ್ ಅಸಲಿ ಪರಿಪಿಕಾಯ್ ಎದೊಳ್‌ಚ್ ದಾಕಯ್ಲ್ಯಾ ಆಸ್ತಾಂ, ಭಾಶೆಚ್ಯಾ ನಾಂವಾರ್ ಸಂಘಟನಾಂ ಬಾಂದುನ್ ಉಜೊ ಪೆಟಂವ್ಕ್ ಸೊಧ್ತೆಲ್ಯಾಂನಿ ಬೂದ್ ಶಿಕೊಂಕ್ ಜಾಯ್.

► ಫ್ಲೋರಿನ್ ರೋಚ್, ಕಾರ್‌ವಾರ್