21 ಜೂನ್ 2022 ವೆರ್ 82 ವೊ ಜಲ್ಮಾದೀಸ್ ಸಂಭ್ರಮ್ಚ್ಯಾ ಬಿಸ್ಪ್ ಅ| ಮಾ| ದೊ| ಲುವಿಸ್ ಪಾವ್ಲು ಸೊಜಾ ವಿಶ್ಯಾಂತ್ ವಿಶೇಸ್ ಲೇಕನ್.
ಬಿಸ್ಪ್ ಜಾಂವ್ಚೆ ಪಯ್ಲೆಂ ತೊ ಆಮ್ಕಾಂ ಸಕ್ಡಾಂಕ್ ‘ಫಾದರ್ ಎ ಪಿ’, ದೆಕಿಕ್ ‘ಆಜ್ ವ್ಹಡ್ಲ್ಯಾ ಫೆಸ್ತಾಕ್ ಫಾದರ್ ಎ ಪಿ ಪ್ರಧಾನ್ ಯಾಜಕ್’, ‘ಮ್ಹಜ್ಯಾ ಭಯ್ಣಿಚ್ಯಾ ರೆಸ್ಪೆರಾಕ್ ಫಾದರ್ ಎ ಪಿ ಚೊ ಶೆರ್ಮಾಂವ್’, ‘ಆಜ್ ಫಾದರ್ ಎ ಪಿ ಮೀಟಿಂಗಾಕ್ ಯೇಂವ್ಕ್ ನಾ’ ಅಶೆಂ ಆಮಿ ಉಲಯ್ತಾಲ್ಯಾಂವ್. ಹೊ ಆಮ್ಚ್ಯಾ ಮೊಗಾಚೊ ಫಾದರ್ ಎ ಪಿ ಬಿಸ್ಪ್ ಜಾಲೊ. ಬಿಸ್ಪ್ ಜಾಲ್ಯಾ ಉಪ್ರಾಂತ್ ಫಾದರ್ ಎ. ಪಿ.ಕ್ ಕಶೆಂ ಆಪೊಂವ್ಚೆಂ ಮ್ಹಣ್ಚೆಂ ಸವಾಲ್ ಸಭಾರ್ ಪಾದ್ರ್ಯಾಬಾಂಚ್ಯಾ ಮತಿಂತ್ ಕರ್ಕರ್ಯಾಂಚೆಂ ಜಾಲೆಂ. ಹೆಂ ತಾಣೆಂ ಪಾರ್ಕಿಲೆಂ ಮ್ಹಣ್ ದಿಸ್ತಾ. ಕಿತ್ಯಾಕ್ ಮ್ಹಳ್ಯಾರ್ ಮ್ಹಾಕಾ ಉಗ್ಡಾಸ್ ಆಸ್ಲ್ಲ್ಯಾ ಪರ್ಮಾಣೆಂ, ತಾಚ್ಯಾ ಕೊನ್ಸೆಕ್ರಾರಾಚ್ಯಾ ಸೆರೆಮನಿ ಉಪ್ರಾಂತ್ಲ್ಯಾ ಅಭಿನಂಧನ್ ಕರ್ಚ್ಯಾ ಕಾರ್ಯಾಂತ್ ಉಲಯ್ತಾನಾಂ ನವ್ಯಾ ಗೊವ್ಳಿ ಬಾಪಾನ್, ‘ಆನಿ ಮುಕಾರ್ಯಿ ತುಮಿಂ ಮ್ಹಾಕಾ ಎ ಪಿ ಮ್ಹಣ್ ಆಪಯ್ಲ್ಯಾರ್ ಮ್ಹಾಕಾ ಖುಶಿಚ್’ ಮ್ಹಣುನ್ ಯಾಜಕಾಂಕ್ ಪರ್ವಣ್ಗಿ ದಿಲ್ಲಿ.
ಫಾದರ್ ಎ ಪಿಕ್ ಪಾಪ್ಸಾಯ್ಬಾನ್ ಬಿಸ್ಪ್ ಮ್ಹಣ್ ವಿಂಚುನ್ ಕಾಡ್ಲಾ ಮ್ಹಳ್ಳಿ ಖಬರ್ ಅಧಿಕೃತ್ ಥರಾನ್ ಹಾಂಗಾಸರ್ ಪರ್ಗಟ್ ಕೆಲ್ಲಿ ಘಡಿ ಮ್ಹಾಕಾ ಸಾರ್ಕಿ ಉಗ್ಡಾಸಾಂತ್ ಆಸಾ. ಹಾಂವ್ ತೆದ್ನಾಂ ಜೆಪ್ಪು ಸೆಮಿನರಿಂತ್ ಪ್ರಾಧ್ಯಾಪಕ್ ಆನಿ ಫಾದರ್ ಎ ಪಿ ಸೆಮಿನರಿಚೊ ರೆಕ್ಟರ್. ಸಾಂಜೆಚಿಂ ಸಾಧಾರ್ಣ್ ಸಾಡೆ ಪಾಂಚ್ ವೊರಾಂ, ಹಾಂವ್ ಎದೊಳ್ಚ್ ಖೆಳ್ಚ್ಯಾ ಮಯ್ದಾನಾಕ್ ಪಾವ್ಲ್ಲೊಂ ಆನಿ ಸೆಮಿನರಿಸ್ತಾಂನಿ ಯೇಂವ್ಕ್ ರಾಕುನ್ ಆಸ್ಲ್ಲೊಂ. ಎಕಾಚ್ಛಾಣೆಂ ಬಿಸ್ಪ್ ಬಾಜಿಲ್ ಸೆಮಿನರಿಕ್ ಆಯ್ಲೊ. ಹೆಣೆಂತೆಣೆಂ ಖೆಳುಂಕ್ ತಯಾರ್ ಜಾಂವ್ಚ್ಯಾ ಸೆಮಿನರಿಸ್ತಾಂಕ್ ಮುಕ್ಲ್ಯಾ ದಾರಾಲಾಗಿಂ ಭಿತರ್ಲ್ಯಾ ವಾಟೆನ್ ಸಾಂಗಾತಾ ಯೇಂವ್ಕ್ ತಾಣೆಂ ಆಪಯ್ಲೆಂ. ಸೆಮಿನರಿಚೆ ಥೊಡೆ ಪ್ರಾಧ್ಯಾಪಕ್ಯಿ ಥಂಯ್ಸರ್ ಆಯ್ಲೆ. ಥಂಯ್ ಸಾಧಾರ್ಣ್ ಪನ್ನಾಸ್ ಲೊಕಾಂಮಧೆಂ ಫಾದರ್ ಎ ಪಿಕ್ ಮಂಗ್ಳುರ್ಚೊ ಬಿಸ್ಪ್ ಜಾವ್ನ್ ವಿಂಚುನ್ ಕಾಡ್ಲ್ಲಿ ಬರಿ ಖಬರ್ ಅಧಿಕೃತ್ ಥರಾನ್ ಪರ್ಗಟ್ಣಿ ಜಾಲ್ಲಿ.
ಆಜ್ ವಾಮಂಜೂರಾಂತ್ ಸಾಂತ್ ಜುಜೆ ಇಂಜಿನಿಯರಿಂಗ್ ಕೊಲೆಜ್ ಶಿಕ್ಷಣ್ ಶೆತಾಂತ್ ಕರಾವಳಿಚ್ಯಾ ಕ್ರಿಸ್ತಾಂವ್ ಸಮುದಾಯೆಚೆಂ ಥಿಕ್ ಜಾವ್ನ್ ಪರ್ಜಳುನ್ ಆಸಾ. ಹ್ಯಾ ಸಂಸ್ಥ್ಯಾಧ್ವಾರಿಂ ವ್ಹಡ್ ಸಂಖ್ಯಾನ್ ಕ್ರಿಸ್ತಾಂವ್ ತಶೆಂ ಹೆರ್ ಧರ್ಮಾಂಚ್ಯಾ ಯುವಜಣಾಂಕ್ ಆಪ್ಣಾಕ್ ಎಕ್ ಭದ್ರ್ ಫುಡಾರ್ ಬಾಂದುಂಕ್ ಆವ್ಕಾಸ್ ಲಾಬ್ಲಾ. ಹ್ಯಾ ವ್ಹಡ್ ಯೋಜನಾಚೊ ಸ್ವಪ್ಣೆಲಿ ಆಸಾ ಬಿಸ್ಪ್ ಎ ಪಿ. ತಾಂಚ್ಯಾ ಜೆರಾಲ್ ಭಾಸಾಭಾಸಾಂನಿ ಹಾಂವೆಂ ವಿಷಯ್ ಜಮೊ ಕೆಲ್ಲ್ಯಾ ಪ್ರಕಾರ್ ಫಿರ್ಗಜಾಂಕ್ ತಾಣಿಂ ದಿಂವ್ಚ್ಯಾ ಭೆಟೆಂ ವೆಳಾರ್ ಥಂಯ್ ಜಾಯಿತ್ತ್ಯಾ ಹುಶಾರ್ ಯುವಕ್ – ಯುವತಿಂಕ್ ತಾಣಿಂ ಆಶೆಂವ್ಚ್ಯಾ ಇಂಜಿನಿಯರಿಂಗ್ ಶಿಕ್ಪಾಕ್ ವಚುಂಕ್ ಸಭಾರ್ ಆಡ್ಕಳಿ ಯೆತಾಲ್ಯೊ. ಹೆಂ ಆಯ್ಕುನ್ ತಾಚೆಂ ಗೊವ್ಳಿಕ್ ಕಾಳಿಜ್ ಜಿವಾಳ್ ಜಾಲೆಂ ಆನಿ ಆಮ್ಚಿಚ್ ಏಕ್ ಇಂಜಿನಿಯರಿಂಗ್ ಕೊಲೆಜ್ ಸ್ಥಾಪನ್ ಕರ್ಚೆಂ ಯೋಜನ್ ತಾಣಿಂ ಧಯ್ರಾನ್ ಹಾತಿಂ ಘೆತ್ಲೆಂ. ಹಾಂವ್ ಚಿಂತ್ತಾಂ ತ್ಯಾ ದಿಸಾಂನಿ ವಿಗಾರ್ ಜೆರಾಲ್ ಜಾವ್ನಾಸ್ಲಲ್ಯಾ ಬಾಪ್ ಫ್ರೆಡ್ ವಿ ಪಿರೇರ್ ತಾಂಚೆಥಾವ್ನ್ ಬಿಸ್ಪ್ ಲುವಿಕ್ ವಿಶೇಸ್ ಸಹಕಾರ್ ಆಸ್ಲ್ಲೊ.
ಹಿ ಕೊಲೆಜ್ ಉಜ್ವಾಡಾಕ್ ಯೆಂವ್ಚ್ಯಾ ತ್ಯಾ ಸುರ್ವಿಲ್ಯಾ ದಿಸಾಂನಿ ಹಾಂವ್ ವಾಮಂಜೂರ್ ಫಿರ್ಗಜೆಚೊ ವಿಗಾರ್ ಜಾಲ್ಲ್ಯಾನ್ ಥಂಯ್ಸರ್ ಮೆಟಾಂಮೆಟಾಂನಿ ಜಾಂವ್ಚಿ ಪ್ರಗತಿ ಪಳಂವ್ಕ್ ಮ್ಹಾಕಾ ಆವ್ಕಾಸ್ ಮೆಳ್ಲ್ಲೊ. ಗರ್ಜೆಕ್ ಜಾಯ್ ತೊ ಇತ್ಲೊ ವ್ಹಡ್ ಆಯ್ವಜ್ ಖಂಯ್ಥಾವ್ನ್ ಹಾಡ್ಚೊ? ವ್ಯಾವಹಾರಿಕ್ ದಿಷ್ಟಿನ್ ಅಸಲೆಂ ಸವಾಲ್ ಯೆಂವ್ಚೆಂ ವಾಜ್ಬಿ. ಹಾಂವ್ ಚಿಂತ್ತಾಂ ದೆವಾಚ್ಯಾ ಹಾತಾಂತ್ ಆಸ್ಚೆ ಸ್ವಪ್ಣೆಲಿ ಆನಿ ಪ್ರವಾದಿ ಆಸಾತ್ ತೆ ಅಸಲಿಂ ಸವಾಲಾಂ ವಿಚಾರಿನಾಂತ್. ತಸಲ್ಯಾಂಥಂಯ್ ದುಸ್ರ್ಯಾಚ್ ಎಕಾ ಗುಪಿತ್ ವರ್ಗಾಚಿಂ ಸಂಪನ್ಮೂಲಾಂ ಆಸ್ತಾತ್. ಅಸಲ್ಯಾ ಅತ್ಮೀಕ್ ಸಂಪನ್ಮೂಲಾಂಚೆರ್ ಪಾತ್ಯೆವ್ನ್ ಬಿಸ್ಪ್ ಲುವಿನ್ ಹೆಂ ಮಿಸಾಂವ್ ಸುರ್ವಾತ್ಲೆಂ. ಹ್ಯಾಚ್ ಭಾವಾಡ್ತಾಚ್ಯಾ ಮೆಟಾಂನಿ ತೆಂ ಮಿಸಾಂವ್ ಎಕಾ ಗಮನಾರ್ಹ್ ಹಂತಾಕ್ ಹಾಡ್ನ್ ಪಾವೊಂವ್ಕ್ ತಾಕಾ ಸಾಧ್ಯ್ ಜಾಲೆಂ. ’ಬಿಸ್ಪ್ ಲುವಿಕ್ ಆಪ್ಲ್ಯಾ ಸಗ್ಳ್ಯಾ ಗೊವ್ಳಿಕ್ಪಣಾಚ್ಯಾ ವಾವ್ರಾಚೆರ್ ಪಾಟಿಂ ದೀಷ್ಟ್ ಘಾಲ್ತಾನಾಂ ಸಾಂತ್ ಜುಜೆ ಇಂಜಿನಿಯರಿಂಗ್ ಕೊಲೆಜಿಚೆಂ ಪಿಂತುರ್ ದೊಳ್ಯಾಂ ಮುಕಾರ್ ಯೆತಾನಾಂ ವೊಂಟಾಂನಿ ಕಿತೆಂ ತರಿ ಗೊಡ್ ಗೊಡ್ ಭೊಗ್ತಾ ತೆಂ ಖಂಡಿತ್’ ಮ್ಹಣ್ ಹಾಂವ್ ಚಿಂತ್ತಾಂ.
ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ವಾ ವಾಡ್ಯಾ ಜಮಾತಿಂ ಬಾಬ್ತಿಂ ಜಾಂವ್ಚ್ಯಾ ಮ್ಹಿನತೆಕ್ ಬಿಸ್ಪ್ ಲುವಿಥಾವ್ನ್ ಭರ್ಪೂರ್ ಮಾಪಾನ್ ಉತ್ತೇಜನ್ ಆನಿ ಮಾರ್ಗದರ್ಶನ್ ಮೆಳ್ತಾಲೆಂ. ಹ್ಯಾ ಉದೆಶಿಂ ಜಾಂವ್ಚ್ಯಾ ಶಿಬಿರಾಂಕ್ ಹಾಜರ್ ಜಾವ್ನ್ ಆಪ್ಣಾಚೊ ಸಂದೇಶ್ ತೆ ದಿತಾಲೆ ಮಾತ್ರ್ ನ್ಹಂಯ್ ಪಾವ್ಟ್ ಜಾಲಿ ತರ್ ಥೊಡೊ ವೇಳ್ ಬಸುನ್ ಥಂಯ್ ಜಾವ್ನ್ ಆಸ್ಚ್ಯಾ ಶಿಕ್ಷಣಾಂತ್ ಪಾತ್ರ್ ಘೆತಾಲೆ. ಚಡ್ ಕರುನ್ ಫಿರ್ಗಜಾಂನಿ ಗೊವ್ಳಿಕ್ ಭೆಟೆಂಕ್ ಗೆಲ್ಲೆ ವೆಳಿಂ ವಾಡ್ಯಾ ಜಮಾತಿಂಕ್ ಹಾಜರ್ ಜಾತಾಲೆ. ಆನಿ ಗರ್ಜ್ಪಡ್ಲ್ಯಾರ್ ವಿಗಾರಾಕ್ ಹ್ಯಾ ವಿಶಿಂ ಗಂಭೀರಾಯೆಚ್ಯಾ ಉತ್ರಾಂನಿ ಇಲ್ಲಿ ಜಾಗ್ವಣ್ಯಿ ದಿತಾಲೆ. ವಾಡ್ಯಾ ಜಮಾತಿಂವಿಶಿಂ ತಯಾರ್ ಜಾಂವ್ಚ್ಯಾ ಸಿಡಿಂಕ್ ವಾ ಕಡ್ತಿಲೆಂಕ್ ತಾಂಚೆಥಾವ್ನ್ ಭರ್ಪೂರ್ ಉತ್ತೇಜನ್ ಮೆಳುನ್ ಆಸ್ಲ್ಲೆಂ.
ಏಕ್ ಪಾವ್ಟಿಂ ಹಾಂವ್ ಆನಿ ಬಿಸ್ಪ್ ಲುವಿ ಕಾರಾರ್ ಸಾಂಗಾತಾ ಪಯ್ಣ್ ಕರ್ನ್ ಆಸ್ಲ್ಲ್ಯಾಂವ್. ಉಲಯ್ತಾಂ ಉಲಯ್ತಾಂ ನೊವೆನ್ ಮಾಗ್ಣ್ಯಾಚೊ ವಿಷಯ್ ಆಯ್ಲೊ. ಹಾಂವೆಂ ’ಹ್ಯಾ ದಿಸಾಂನಿ ನೊವೆನಾಕ್ ಆಮ್ಚ್ಯಾ ಲೊಕಾಮಧೆಂ ಭಾರಿಚ್ ಮಾರ್ಕೆಟ್ ಆಸಾ’ ಅಶೆಂ ಮ್ಹಳ್ಳೆಂ ಮ್ಹಾಕಾ ಉಗ್ಡಾಸ್, ಹ್ಯಾ ಉತ್ರಾಧ್ವಾರಿಂ ಅಶೀರ್ ಭಕ್ತಿಪಣಾಚ್ಯಾ ಮಾಗ್ಣ್ಯಾಕ್ ಆನಿ ಜೆರಾಲ್ ಥರಾನ್ ಸಗ್ಳ್ಯಾ ಕ್ರಿಸ್ತಿ ಜಿಣ್ಯೆಂತ್ ಆಮ್ಚ್ಯಾ ಲೊಕಾಂನಿ ಭಕ್ತಿಪಣಾಚ್ಯಾ ಅಭ್ಯಾಸಾಂಕ್ ಉತ್ತೇಜನ್ ದಿಂವ್ಚ್ಯಾಂತ್ ಹಾಂವ್ ಇಲ್ಲೆಂ ಪಾಟಿಂ ತೆಂ ತಾಣೆಂ ಪಾರ್ಕಿಲ್ಲೆಂ. ಎದೊಳ್ಚ್ ಮ್ಹಜ್ಯಾ ಜಾಯಿತ್ತ್ಯಾ ಲೆಕನಾಂನಿ ಹೊ ವಿಷಯ್ ತಾಂಚ್ಯಾ ಗಮನಾಕ್ ಆಯಿಲ್ಲೊ. ಬಿಸ್ಪ್ ಲುವಿನ್ ಸಾಧಾರ್ಣ್ ‘ಫಾದರ್ ಲೀಮಾ, ಆದ್ಲೆಂ ಸಕ್ಕಡ್ ಎಕ್ಚ್ ಪಾವ್ಟಿಂ ಭಾಯ್ರ್ ಉಡೊಂವ್ಕ್ ಜಾಯ್ನಾಂ, ಆಮಿ ಲೊಕಾಕ್ ಸವ್ಕಾಸ್ ನವ್ಯಾಪಣಾಕ್ ಆಪೊವ್ನ್ ವ್ಹರುಂಕ್ ಆಸಾ’ ಅಶೆಂ ಸಾಂಗ್ಲ್ಲೆಂ ಮ್ಹಾಕಾ ಉಗ್ಡಾಸಾಂತ್ ಆಸಾ. ಹಾಂವೆಂ ಪಳಯಿಲ್ಲ್ಯಾ ಪ್ರಕಾರ್ ಆಪ್ಣಾಚ್ಯಾ ಸಗ್ಳ್ಯಾ ವಾವ್ರಾಂತ್ ನವೆಂಪಣ್ ಹಾಡುಂಕ್ ತಾಣಿಂ ಕಾಂಯ್ ದರ್ವೊಡ್ ಕರುಂಕ್ ನಾಂ. ಆಮ್ಚೊ ಕ್ರಿಸ್ತಾಂವ್ ಲೋಕ್ ಸಮೊಡ್ತ್ ಪಾಳ್ಚ್ಯಾ ಶಯ್ಲಿಂತ್ ಚಡ್ಶೆಂ ಸಾಂಪ್ರದಾಯಿಕ್ ಅಶೆಂ ತೊ ಜಾಣಾಂ ಆಸ್ಲ್ಲೊ. ಆನಿ ಲೊಕಾಕ್ ದುಕೊಂವ್ಕ್ಯೀ ತಾಕಾ ನಾಕಾ ಆಸ್ಲ್ಲೆಂ ತಶೆಂ ದಿಸ್ತಾ. ಮಯ್ಪಾಸಿ ಮನೋಭಾವ್ ಆನಿ ತಾಚೆಥಾವ್ನ್ ಉಬ್ಜುನ್ ಯೆಂವ್ಚಿ ದಾಕ್ಷೆಣ್ ತಾಚೆಥಂಯ್ ದಿಸುನ್ ಯೆತಾಲಿ. ಹಿ ದಾಕ್ಷೆಣ್ ಪ್ರವಾದ್ಪಣಾಕ್ ಇಲ್ಲಿ ಅಡ್ಕಳ್ ಅಡ್ಕಳ್ ಜಾಲಿ ಜಾಂವ್ಕ್ಯೀ ಪುರೊ, ತರ್ಯಿ ವಾಂಜೆಲಾಥಾವ್ನ್ ಪ್ರೇರಿತ್ ಜಾವ್ನ್ ಆಪಾ’ಪ್ಲ್ಯಾ ಫಿರ್ಗಜಾಂನಿ ನವೆಂಪಣ್ ಹಾಡುಂಕ್ ವಾವುರ್ತಲ್ಯಾ ಯಾಜಕಾಂಕ್ ತಾಂಚೆಥಾವ್ನ್ ಭರ್ಪೂರ್ ಉತ್ತೇಜನ್ ಮೆಳುನ್ ಆಸ್ಲ್ಲೆಂ.
ಫಾದರ್ ಎ ಪಿ ನ್ ಮ್ಹಾಕಾ ಸ್ಕೂಟರ್ ಸೊಡುಂಕ್ ಶಿಕಯಿಲ್ಲೆಂ. ತೆದಾಳಾ ಹಾಂವೆಂ ನವೆಂ ಚೇತಕ್ ಕಾಣ್ಘೆಲ್ಲೆಂ. ಚಡ್ಶೆಂ ಆಮ್ಚೆಂ ಪ್ರ್ಯಾಕ್ಟೀಸ್ ಪಾದುವಾ ಇಸ್ಕೊಲಾಚ್ಯಾ ಮಯ್ದಾನಾರ್ ಚಲ್ತಾಲೆಂ. ಅಶೆಂ ಏಕ್ ಪಾವ್ಟಿಂ ಅಭ್ಯಾಸ್ ಕರ್ತಾನಾಂ ಆಮಿ ದೊಗೀ ಪಡ್ಲ್ಯಾಂವ್; ತ್ಯಾ ಮಯ್ದಾನಾರ್ ‘ಚಿಂಚಾರೆ ಫಾತೊರ್’ ಆಸ್ಲ್ಲೆ, ತಸಲ್ಯಾ ಫಾತ್ರಾಂಚೆರ್ ಸ್ಕೂಟರ್ ಘುಂವ್ಡಾಯ್ತಾನಾಂ ವೇಗ್ ಇಲ್ಲೊ ಉಣೊ ಕರುಂಕ್ ಆಸಾ. ಹಾಂವೆಂ ವೇಗ್ ಉಣೊ ಕರಿನಾಸ್ತಾನಾಂ ಗಾಡಿ ಘುಂವ್ಡಾಯಿಲ್ಲ್ಯಾನ್ ಸ್ಕೂಟರ್ ಆಡ್ ಪಡ್ಲೆಂ. ಮ್ಹಾಕಾ ಕಾಂಯ್ ಘಾಯ್ ಜಾಂವ್ಕ್ ನಾಂ, ಪಾಟ್ಲ್ಯಾನ್ ಬಸ್ಲ್ಲ್ಯಾ ಫಾದರ್ ಎ ಪಿ ಕ್ ಹಾತಾಕ್ ಇಲ್ಲೊ ಮಾರ್ ಜಾಲ್ಲೊ ಮ್ಹಾಕಾ ಉಗ್ಡಾಸ್ ಆಸಾ. ತಿತ್ಲೆಂ ಜಾಲ್ಯಾ ಉಪ್ರಾಂತ್ಯಿ ಪ್ರ್ಯಾಕ್ಟಿಸ್ ಬಂಧ್ ಕರುಂಕ್ ನಾಂ. ದೋನ್ ದಿಸಾ ಉಪ್ರಾಂತ್ ಪರ್ತ್ಯಾನ್ ಆಮಿ ಪಾದ್ವಾ ಇಸ್ಕೊಲಾಚ್ಯಾ ಮಯ್ದಾನಾರ್.
ಬಿಸ್ಪ್ ಲುವಿಚ್ಯಾ ತೊಂಡಾರ್ ಕೆದ್ನಾಂಯ್ ಹಾಸೊ, ಅಮ್ರಕ್ಯೊ ಹಾಸೊ ಪಳಂವ್ಕ್ ಮೆಳ್ತಾಲ್ಯೊ, ಹಾಂವೆಂ ಸಮ್ಜಾಲ್ಲ್ಯಾ ಪರ್ಮಾಣೆಂ ಅಧಿಕಾರಾರ್ ಆಸ್ಲ್ಲ್ಯಾ ಮನ್ಶಾಂಕ್ ತೊಂಡಾರ್ ಹಾಸೊ ದವ್ರುಂಕ್ ತಿತ್ಲೆಂ ಸುಲಭ್ ನ್ಹಂಯ್. ತಾಂಕಾಂ ಸಮಸ್ಯೆ ವಾ ಖಂಚ್ಯಾಯ್ ಕಷ್ಟಾಂಚಿ ಪರಿಸ್ಥಿತಿ ಕೆದ್ನಾಂಯ್ ಆಸ್ತಾ. ಪೂಣ್ ಬಿಸ್ಪ್ ಎ ಪಿ ತರೀ ತೊಂಡಾರ್ ಗಂಭೀರಾಯ್ ಪಾಂಗುರ್ನಾಸ್ತಾಂ ಮಯ್ಪಾಸಿ ಮನೋಭಾವಾಚೆ ವೆಕ್ತಿ. ಭುರ್ಗ್ಯಾಂಥಂಯ್ ತೆ ವಿಶಿಷ್ಟ್ ಮಯ್ಪಾಸ್ ದಾಕಯ್ತಾಲೆ ಜಾಲ್ಯಾರ್ ಪ್ರಾಯ್ವಂತಾಂ ಥಂಯ್ ನಮ್ರತಾಯ್ ದಾಕಯ್ತಾಲೆ. ತಾಂಚೆ ಪ್ರಸಂಗ್ ಶಿಕೊವ್ಣೆದಾಯಕ್, ಕಾಗ್ದಾಚೊ ಪ್ರಯೋಗ್ ಕರಿನಾಶೆಂ ಲೊಕಾಲಾಗಿಂ ಶೀದಾ ಉಲೊಂವ್ಚೆಪರಿಂ ತಾಂಚ್ಯಾ ಪ್ರಸಂಗಾಚಿ ಶಯ್ಲಿ. ತಿತ್ಲೊ ವಾವ್ರ್ ಆಸ್ಲ್ಲೊ ತರಿ ಬರ್ಯಾ ಭಲಾಯ್ಕೆಚೆಂ ದೆಣೆಂ ತಾಂಕಾಂ ದೆವಾನ್ ದಿಲ್ಲೆಂ. ಇತ್ಲಿಂ ವರ್ಸಾಂ ಹ್ಯಾ ವಿಸ್ತಾರ್ ಕರಾವಳಿಚೆರ್ ಕ್ರಿಸ್ತಾಂವ್ ತಶೆಂ ಹೆರ್ ಧರ್ಮಾಂಚ್ಯಾಂಕ್ಯಿ ಧಾರ್ಮಿಕ್ ಶೆತಾಂತ್ ಸೆವಾ ದಿಲ್ಲ್ಯಾ ತಾಂಕಾಂ ಉರ್ಲ್ಲ್ಯಾ ಸರ್ವ್ ವರ್ಸಾಂನಿ ಸರ್ವೆಸ್ಪರ್ ದೇವ್ ಬರ್ಯಾ ಭಲಾಯ್ಕೆನ್ ದವ್ರುಂದಿ ಅಶೆಂ ಆಸಾ ಆಮ್ಚ್ಯಾ ಸರ್ವಾಂಚೆಂ ಮಾಗ್ಣೆಂ.
► ಬಾಪ್ ಅಲ್ಪೊನ್ಸ್ ಡಿ’ಲಿಮಾ
First of thanks to Fr. D’Lima for a wonderful article on Bishop Aloysius Paul and highlighting his simplicity in life.
In this joyous occasion of his 82nd B’day wishing Bishop A. P. God’s blessings and good health. May God Almighty grant him long healthy and cheerful life.
Alponse, Pangla.
ಒಮ್ಮೆ ಜೆಪ್ಪು ಸೆಮಿನರಿ ಹಾಲ್ ನಲ್ಲಿ ಕೊಂಕಣಿ ಬಿಂಗಾರಿ ಸಂಘದವರ ಯಾವುದೋ ಕಾರ್ಯಕ್ರಮಕ್ಕೆ ನಾನು ಅತಿಥಿಯಾಗಿದ್ದೆ. ವೇದಿಕೆಯಲ್ಲಿ ನಿಯೋಜಿತ ಬಿಷಪ್ ಫಾ. ಎ. ಪಿ ಇದ್ದರು. ನನಗವರು ಅಂದು ಸಂಜೆ ತಮ್ಮ ಕೈಯಾರೆ ಚಹಾ ಬೆರೆಸಿ ಕೊಟ್ಟಿದ್ದರು. ನನ್ನ ಭಾಷಣದಲ್ಲಿ ನಾನು ಅವರ ಸರಳತೆಯನ್ನು ಕೊಂಡಾಡುತ್ತಾ ನಿಯೋಜಿತ ಬಿಷಪರ ಜೊತೆ ವೇದಿಕೆ ಹಂಚಿಕೊಳ್ಳುವ ನನ್ನ ಆತಂಕ ಹೇಗೆ ಅವರ ಸರಳ ಸ್ನೇಹಮಯ ನಡವಳಿಕೆಯಿಂದ ದೂರವಾಯ್ತು ಎಂದು ಹೇಳಿದ್ದೆ. ಅದಕ್ಕೆ ಉತ್ತರವಾಗಿ ಅವರು ತನಗೂ ಆಕಾಶವಾಣಿಯ ಅಧಿಕಾರಿಯ ಮುಂದೆ ತಾನು ಹೇಗೆ ಮಾತನಾಡಲಿ ಎಂಬ ತನ್ನ ಆತಂಕ ನನ್ನ ನಡವಳಿಕೆಯಿಂದ ದೂರವಾಯ್ತು ಎಂದು ಹೇಳಿದ್ದನ್ನು ಹೇಗೆ ಮರೆಯಲಿ?
ಸರಳಜೀವಿ, ಸ್ನೇಹಮಯಿ ಬಿಷಪ್ ಫಾ. ಎ. ಪಿ ಯವರಿಗೆ 82 ನೇ ಜನ್ಮದಿನದ ಶುಭಾಶಗಳು. ಭಗವಂತನು ನಿಮಗೆ ಆಯುರಾರೋಗ್ಯವನ್ನು ನೀಡಿ ಸದಾ ಕಾಪಾಡಲಿ ಎಂಬ ಹಾರೈಕೆ.
ಆಮ್ಚ್ಯಾ ಸಮಾಜೆಚೆಂ ಥಿಕ್ , ಆಮ್ಚ್ಯಾ ಸಮಾಜೆಚೊ ಆಭಿಮಾನ್ , ಶಾಂತಿ – ಸಮಾಧಾನೆಚೊ ಪ್ರತೀಕ್ ಆಮ್ಚೊ ಆದ್ಲೊ ಭಿಸ್ಪ್ A.P.ಆಪ್ಣಾ ವಯ್ರ್ ಕೊಣಿ ಕಿತೆಂ ಆಪವಾದ್ ಮಾಂಡ್ಲ್ಯಾರ್ ಮೌನ್ ರಾವೊನ್ ಮುಖ್ಲ್ಯಾ ಮನ್ಶಾಕ್ ತಾಚ್ಯಾ ಸವಾಲಾಚಿ ಜವಾಬ್ ಮೆಳ್ಚ್ಯಾ ಬರಿ ಕರ್ಚೊ ಶಾಂತ್ ಸ್ವಭಾವಾಚೊ ತರೀ ಧೈಯ್ರಾಧಿಕ್ ಕಾಳ್ಜಾಚೊ ಆಮ್ಚೊ ಭಿಸ್ಪ್ A.P.ಪ್ರಗತಿಪರ್ ಮಂಗ್ಳೂರಾಚ್ಯಾ ಆಯ್ಚ್ಯಾ ಬದ್ಲಾವಣೆಂತ್ ಆಮ್ಚೊ ಭಿಸ್ಪ್ A.P.ಚೊ ಮೊಟೊ ಹಾತ್ ತಶೆಂಚ್ ದೂರ್ದ್ರಷ್ಟೆನ್ ಭರ್ಲ್ಲ್ಯೊ ಮುಂದಾಲೋಚನ್ಯೊ ಆಸ್ಲ್ಲ್ಯೊ ಮುಳ್ಳ್ಯಾರ್ ಆತೀಶಯೋಕ್ತಿ ಜಾಂವ್ಚೆಂ ನಾ.
ಹರ್ಯೆಕ್ಲ್ಯಾಕಿ ಆಪ್ಲ್ಯಾ ಕುಟ್ಮಾ ಸಾಂದ್ಯಾ ಬರಿ ಲೆಖ್ಚ್ಯಾ ಆಮ್ಚೊ ಭಿಸ್ಪ್ A.P,ವಿಶಿಂ ಸವಿಸ್ತಾರ್ ಜಾಣ್ವಾಯೆಚೆಂ ಲೇಖನ್ ಬೊರಯಿಲ್ಲ್ಯಾ ಮಾ|ದೊ|ಆಲ್ಫೋನ್ಸ್ ಡಿ’ಲಿಮಾ ಬಾಪಾಂಕ್ ಉಲ್ಲಾಸ್ ಆನಿ ಆಭಿನಂದನ್.
ಆಯ್ಚ್ಯಾ ದಿಸಾ ಆಪ್ಲ್ಯಾ ಜಿವಿತಾಂತ್ಲಿ ಯಶಸ್ವಿ 82 ವರ್ಸಾಂ ಆಮ್ಚೊ ಭಿಸ್ಪ್ A.P, ನ್ ಸಂಪೊಂವ್ಚ್ಯಾ ವಕ್ತಾ , ಮಾಗ್ತಾಂ ತಾಂಕಾಂ ಬೊರಿ ಭಲಾಯ್ಕಿ ಆನಿ ಲಾಂಬ್ ಆವ್ಕ್.ತುಮಿಂ ದಾಕಯ್ಲಿ ವಾಟ್ ಆಮ್ಕಾಂ ಸದಾಂಚ್ ಪ್ರೇರಣ್.