ರಂಗಪ್ಪ ಕಾಮತ್ ಯುವಉದ್ಯಮಿಂಕ್ ವಾಟೆದಿವೊ – ಶ್ರೀನಿವಾಸ ವಿ. ದೆಂಪೊ

“ರಂಗಪ್ಪ ಕಾಮತ್ ಆಪ್ಲ್ಯಾ ಹೊಟೇಲ್ ಉದ್ಯಮಾನ್ ಎಕಾ ಪಿಳ್ಗೆಚ್ಯಾ ಹಜಾರೊಂ ತರ್ನಾಟ್ಯಾಂಥಂಯ್ ಪ್ರೇರಣ್ ಭರ್‌ಲ್ಲೊ ಮಹಾನ್ ಮನಿಸ್. ಆಯ್ಚ್ಯಾ ದಿಸಾ ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಕೀರ್ತಿ ಮಂದಿರಾಂತ್ ಅನಾವರಣ್ ಜಾಲ್ಲಿ  ತಾಚಿ ತಸ್ವೀರ್ ಫುಡಾರಾಂತ್ ಹಜಾರೊಂ ತರ್ನಾಟ್ಯಾಂಕ್ ಪ್ರೇರಣಾದಾಯಿ ಜಾತೆಲಿ ಮ್ಹಣ್ಚ್ಯಾಕ್ ದುಬಾವ್ ನಾ” ಮ್ಹಣಾಲೊ ಗೊಂಯ್ಚ್ಯಾ ದೆಂಪೊ ಸಮೂಹಾಚೊ ಅಧ್ಯಕ್ಷ್ ಮಾನೆಸ್ತ್ ಶ್ರೀನಿವಾಸ ವಿ. ದೆಂಪೊ. ಮಾನೆಸ್ತ್ ದೆಂಪೊ ವಿಶ್ವ ಕೊಂಕಣಿ ಕೀರ್ತಿ ಮಂದಿರಾಂತ್, ಸನ್ವಾರಾ 18 ಜೂನ್ 2022 ವೆರ್ ದೊನ್ಪಾರಾಂ 1.45 ವ್ಹರಾಂಚೆರ್ ಸ್ವರ್ಗೆಸ್ತ್ ರಂಗಪ್ಪ ಕಾಮತ್ ಹಾಂಚಿ ತಸ್ವೀರ್ ಅನಾವರಣ್ ಕರುನ್ ಉಲಯ್ತಾಲೊ.

“18 ಜೂನ್ ಗೊಂಯಾಂತ್ ಕ್ರಾಂತಿ ದೀಸ್ ಮ್ಹಣ್ ಮಾನಾಯ್ತಾತ್. 1948 ವ್ಯಾ ವರ್ಸಾ, ಆಯ್ಚ್ಯಾ ದಿಸಾ ದೊ| ರಾಮ ಮನೋಹರ ಲೋಹಿಯಾನ್ ಗೊಂಯಾಂತ್ ಸುಟ್ಕೆ ಕ್ರಾಂತಿಕ್ ಚಾಲನ್ ದಿಲ್ಲೆಂ. ಆನಿ ತ್ಯಾ ಕ್ರಾಂತೆವರ್ವಿಂ ಗೊಂಯ್ ಫುಡ್ತುಗೆಜ್ ರಾಜಾಥಾವ್ನ್ ಮುಕ್ತ್ ಜಾಲೆಂ.  ಅಸಲ್ಯಾ ಎಕಾ ಪಾವನ್ ದಿಸಾ ಹೊಟೇಲ್ ಉದ್ಯಮಾಂತ್ ಕ್ರಾಂತಿಚ್ ಕರುನ್, ಹಜಾರೊಂ ತರ್ನಾಟ್ಯಾಂಚಾ ಜಿವಿತಾಕ್ ವಾಟೆದಿವೊ ಜಾಲ್ಲ್ಯಾ ರಂಗಪ್ಪ ಕಾಮತ್ ಹಾಂಚಿ ತಸ್ವೀರ್ ಅನಾವರಣ್ ಕರ್ಚೊ ಅವ್ಕಾಸ್ ಮ್ಹಾಕಾ ಫಾವೊ ಜಾಲಾ ತೆಂ ಮ್ಹಜೆಂ ಭಾಗ್ ಮ್ಹಣಾಜಾಯ್.” ಮ್ಹಣ್ ಮಾನೆಸ್ತ್ ದೆಂಪೊ ಹ್ಯಾ  ಸುವಾಳ್ಯಾರ್ ಮ್ಹಣಾಲೊ.

“ಆಮ್ಚ್ಯಾ ಮಾಲ್ಘಡ್ಯಾಂಚಿಂ ಒಳಕ್ ತರ್ನ್ಯಾಂಕ್ ಕರುನ್ ದೀವ್ನ್, ತಾಂಚೆಥಂಯ್ ಪ್ರೇರಣಾ ಭರ್ಚೆಂ ಕಾಮ್ ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಕೀರ್ತಿ ಮಂದಿರಾಥಾವ್ನ್ ಜಾತಾ ತಿ ಗಜಾಲ್ ತೊಕ್ಣಾಯೆಚಿ ಆನಿ ವರ್ತ್ಯಾ ಅಭಿಮಾನಾಚಿ. ಸ್ವರ್ಗೆಸ್ತ್ ಬಸ್ತಿ ವಾಮನ್ ಮಾಮಾಕ್ ಹಾಂವ್ ಲಾಗ್ಶಿಲ್ಯಾನ್ ಒಳ್ಕಾತಾಂ. ತೋ ಎಕ್ಟೊಚ್ ಗೊಂಯಾ ಯೆತಾಲೊ. ಜಾಯ್ತೆ ಪಾವ್ಟಿಂ ಹಾಂವ್ ತಾಕಾ ಮೆಳ್ಳಾಂ. ಗೊಂಯಾಂತೀ ಏಕ್ ಕೊಂಕ್ಣಿ ಕೇಂದ್ರ್ ಉಬಾರ್ಚಿ ಇಚ್ಛಾ ತಾಕಾ ಆಸ್‌ಲ್ಲಿ. ಕೊಂಕ್ಣೆಚ್ಯಾ ಸಂದರ್ಭಾರ್ ತಾಣೆ ಘೆತ್‌ಲ್ಲೆಂ ಮುಕೆಲ್ಪಣ್ ಖರ‍್ಯಾನ್ ಬೋವ್ ವರ್ತೆಂ. ಆಮ್ಚ್ಯಾ ಸಮಾಜೆಕ್ ರಂಗಪ್ಪ ಕಾಮತ್, ಬಸ್ತಿ ವಾಮನ್ ಮಾಮ್ ತಸಲ್ಯಾ ಪ್ರೇರಣಾದಾಯೀ ಮುಕೆಲ್ಯಾಂಚಿಂ ವರ್ತಿ ಗರ್ಜ್ ಆಸಾ.” ಮ್ಹಣ್ ಮಾನೆಸ್ತ್ ದೆಂಪೊನ್ ವಿಶ್ವ ಕೊಂಕಣಿ ಕೇಂದ್ರಾಚೊ ಸ್ಥಾಪಕ್ ಬಸ್ತಿ ವಾಮನ್ ಮಾಮಾಚೊ ಹ್ಯಾ ಸಂದರ್ಬಾರ್ ಉಡಾಸ್ ಕಾಡ್ಲೊ.

“ಜಿವಿತಾಂತ್ ಪಯ್ಶೆ ಸರ್ವಸ್ವ್ ನಯ್. ಫಕತ್ ಪಯ್ಶೆ ಕರುಂಕ್ ಉದ್ಯಮ್ ಕರ್ಚೆಂ ವಾಜ್ಬಿ ನಯ್ ಮ್ಹಣ್ ಮ್ಹಜಿ ಅಭಿಪ್ರಾಯ್. ಜಶೆಂ ಮ್ಹಜ್ಯಾ ಅಜ್ಯಾನ್, ಖುದ್ ಮುಕೆಲ್ ಮಂತ್ರಿನ್, ಸರ್ಕಾರಾ ಥಾವ್ನ್  ಪರ್ವಣ್ಗಿ ದಿತಾಂವ್ ಮ್ಹಳ್ಯಾರೀ, ಕ್ಯಾಸಿನೊ ದಂದೊ ಕರಿನಾಂವ್ ಮ್ಹಣ್ಚೊ ಸ್ಪಶ್ಟ್ ನಿರ್ಧಾರ್ ಘೆತ್ಲೊ, ತಶೆಂ ರಂಗಪ್ಪ ಕಾಮತ್ ಹಾಣಿ ಆಪ್ಲ್ಯಾ ಹೊಟೆಲಾಂನಿ ಮಾಸ್ – ಮಾಸ್ಳೆಚೆಂ ಜೆವಣ್ ವಾಡ್ಚೆನಾಂವ್ ಮ್ಹಳ್ಳೊ ಸ್ಪಶ್ಟ್ ನಿರ್ಧಾರ್ ಘೆತ್‌ಲ್ಲೊ. ಆಜ್‌ಯೀ ಮ್ಹಜ್ಯಾ ಆಜ್ಯಾಪಾಸುನ್ ಆಮ್ಚಿ ಸಗ್ಳಿ ಪೀಡಿ ಆಮ್ಚ್ಯಾ ಮಾಲ್ಘಡ್ಯಾಂನಿಂ ಕೆಲ್ಲೊ ನಿರ್ಧಾರ್ ಏಕ್ ‘ಉದ್ಯಮ್ ಧರ್ಮ್’ ಕಶೆಂ ಪಾಳುನ್ ಆಸಾಂವ್, ತಶೆಂಚ್ ರಂಗಪ್ಪ ಕಾಮತಾಚಿ ಸಗ್ಳಿ ಪೀಡಿ ತಾಂಚ್ಯಾ ವ್ಹಡಿಲಾಂನಿ ಘೆತ್‌ಲ್ಲೊ ನಿರ್ಧಾರ್ ಏಕ್ ‘ಉದ್ಯಮ್ ಧರ್ಮ್’ ಕಶೆಂ ಪಾಳುನ್ ಆಸಾ” ಮ್ಹಣಾಲೊ ಮಾನೆಸ್ತ್ ದೆಂಪೊ.

ಕೊಂಕ್ಣಿ ಭಾಶೆಚ್ಯಾ ಸಂದರ್ಭಾರ್ ಉಲವ್ನ್ ಮಾನೆಸ್ತ್ ದೆಂಪೊನ್ ಮ್ಹಳೆಂ ” ಆಜ್ ಕೊಂಕ್ಣಿ ಭಾಸ್ ಡಿಜಿಟಲ್ ಸಶಕ್ತೀಕರಣಾಕ್ ಆಯ್ತಿ ಆಸಾ.  ಡಿಜಿಟಲ್ ಸಶಕ್ತೀಕರಣ್ ಆಯ್ಚ್ಯಾ ಕಾಳಾಚಿ ಗರ್ಜ್. ಆಮ್ಕಾಂ ಪ್ರಗತಿ ಜಾಯ್. ಪುಣ್ ಆಮ್ಚ್ಯಾ ಆವಯ್ ಭಾಶೆಚೊ ಮೋಗ್, ಮಾಲ್ಘಡ್ಯಾಂಕ್ ದೀಜಾಯ್ ಜಾಲ್ಲೊ ಗವ್ರವ್, ಕುಲದೇವತಾಂಕ್ ದೀಜಾಯ್ ಜಾಲ್ಲೊ ಮಾನ್ ಆನಿ ಆಮ್ಚಿ ಸಂಸ್ಕೃತಿ ಪ್ರಗತೆಚ್ಯಾ ಧಾಂವ್ಣೆಂತ್ ಆಮಿ ವಿಸ್ರೊಂಕ್ ನಜೊ. ಪ್ರಗತೆ ಸಾಂಗಾತಾ ನಮ್ರತಾಯೆನ್ ವಾಗ್ಚೆಂ ತಿತ್ಲ್ಯಾಚ್ ಮಹತ್ವಾಚೆಂ. ಉದ್ಯಮಾಂತ್ ಉಂಚಾಯೇಕ್ ಪಾವ್ಲ್ಯಾ ಉಪ್ರಾಂತೀ ಮಾಲ್ಘಡ್ಯಾಂಥಂಯ್ ಆನಿ ಸಮಡ್ತಿಚ್ಯಾ ಸೊಮಿಯಾಂ ಥಂಯ್ ಕಶೆಂ ನಮೃತಾಯೆನ್ ವಾಗ್ಚೆಂ ಮ್ಹಣ್ಚ್ಯಾಕ್ ಅಮ್ಕಾಂ ರಂಗಪ್ಪ ಕಾಮತ್ ಏಕ್ ನಿದರ್ಶನ್. ಹೆ ಗೂಣ್ ಆಮಿ ತಾಂಚೆಥಾವ್ನ್ ಶಿಕೊಂಕ್ ಆಸಾತ್”

ಕಾರ್ಯಕ್ರಮಾಂತ್ ಕಾಮತ್ ಹೊಟೆಲ್ ಸಮೂಹಾಚೊ ಅಧ್ಯಕ್ಷ್, ರಂಗಪ್ಪ ಕಾಮತ್ ಹಾಂಚೊ ಸುಪುತ್ರ್, ರಾಮಚಂದ್ರ ಕಾಮತ್ ಹಾಜರ್ ಆಸುನ್ “ಆಪ್ಲ್ಯಾ ಬಾಪಯ್ನ್ ಉದ್ಯಮಾಂತ್ ಆಮ್ಕಾಂ ದಾಕವ್ನ್ ದಿಲ್ಲ್ಯಾ ವಾಟೆರ್ ಆಮಿ ಚಲುನ್ ಆಸಾಂವ್. ಕಾಮತ್ ಹೊಟೆಲಾಂ ಮ್ಹಳ್ಯಾರ್ ನಿತಳಾಯ್ ಆನಿ ಸಾದ್ಯಾ ಲೊಕಾಕ್ ಬರೆಂ ರಾಂದ್ವಯೆಚೆಂ ಜೆವಣ್ ಮ್ಹಣ್ ದೇಖ್. ಆಮ್ಚ್ಯಾ ಬಾಪಯ್ನ್ ದಿಲ್ಲಿ ಹಿ ದೇಖ್ ಆಮಿ ಮುಕಾರುನ್ ವರ್ತೆಲ್ಯಾಂವ್.” ಮ್ಹಣಾಲೊ.  ಆಪ್ಲೊ ಬಾಪುಯ್ ರಂಗಪ್ಪ ಕಾಮತ್ ಹಾಂಚಿ ತಸ್ವೀರ್ ವಿಶ್ವ ಕೊಂಕಣಿ ಕೀರ್ತಿ ಮಂದಿರಾಂತ್ ಲಾವ್ನ್ ತಾಂಕಾ ಗವ್ರವ್ ದಿಲ್ಲ್ಯಾಕ್ ತಾಣಿ ವಿಶ್ವ ಕೊಂಕಣಿ ಕೇಂದ್ರಾಚೊ ಹ್ಯಾ ವೆಳಿಂ ನಮೃತಾಯೆನ್ ಅಬಾರ್ ವೆಕ್ತ್ ಕೆಲೊ.

ವಿಶ್ವ ಕೊಂಕಣಿ ವಿದ್ಯಾರ್ಥಿವೇತನ್ ವಿದ್ಯಾರ್ಥಿಂನಿ ಕೊಂಕ್ಣೆಚೆಂ ಅಭಿಮಾನ್ ಗೀತ್ ಗಾಂವ್ಚೆದ್ವಾರಿಂ ಚಾಲನ್ ದಿಲ್ಲ್ಯಾ ಕಾರ್ಯಾಂತ್, ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನಾಚೊ ಅಧ್ಯಕ್ಷ್ ಮಾನೆಸ್ತ್ ನಂದಗೋಪಾಲ ಶೆಣೈ ಹಾಣಿ ಯೆವ್ಕಾರ್ ಮಾಗೊನ್ ಮಾನೆಸ್ತ್ ಶ್ರೀನಿವಾಸ ವಿ. ದೆಂಪೊ ಹಾಂಚಿ ಸಂಕ್ಷಿಪ್ತ್ ಒಳಕ್ ಕರುನ್ ದಿಲಿ. ಆಪ್ಲ್ಯಾ ಪ್ರಾಸ್ತಾವಿಕ್ ಉತ್ರಾಂನಿಂ ಮಾನೆಸ್ತ್ ನಂದಗೋಪಾಲ ಶೆಣೈ  ಹಾಣಿ  ಪಾಟ್ಲ್ಯಾ ದಿಸಾಂನಿ ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಜಾಲ್ಲ್ಯಾ ಕಾರ್ಯಕ್ರಮಾಂಚಿಂ ಝಳಕ್ ದಿಲಿ ತಶೆಂಚ್ ಫುಡಾರಾಂತ್ ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಮಾಂಡುನ್ ಹಾಡ್‌ಲ್ಲ್ಯಾ ಯೋಜನಾಂ ವಿಶ್ಯಾಂತ್ ಮಟ್ವ್ಯಾನ್ ಒಳಕ್ ಕರುನ್ ದಿಲಿ.

ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ್ ನಿಧಿಚೊ ಕಾರ್ಯದರ್ಶಿ ಮಾನೆಸ್ತ್ ಪ್ರದೀಪ ಜಿ. ಪೈ ಹಾಣಿ ರಂಗಪ್ಪ ಕಾಮತ್ ಹಾಂಚಿ ಸವಿಸ್ತಾರ್ ಒಳಕ್ ಕರುನ್ ದಿಲಿ ಆನಿ ತಾಂಚೆ ಸಾಂಗಾತಾ ಖರ್ಚಿಲ್ಲೆ  ಅಮೊಲಿಕ್ ಘಡಿಯೊ ಮಾರ್ಮಿಕ್ ಥರಾನ್ ಸಭೆರ್ ವಾಂಟುನ್ ಘೆತ್ಲೆ.

ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನಾಚೊ ಕಾರ್ಯದರ್ಶಿ ಸಿಎ ಶ್ರೀ ಗಿರಿಧರ ಕಾಮತ್ ಹಾಣಿ ದಿನ್ವಾಸ್ ಪಾಟಯ್ಲೆ. ವಿಶ್ವ ಕೊಂಕ್ಣಿ ಕೇಂದ್ರಾಚೊ ಸಿಇಒ ಮಾನೆಸ್ತ್ ಗುರುದತ್ತ ಬಂಟ್ವಾಳಕಾರ್ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ.

ವೆದಿ ಕಾರ್ಯಾ ಉಪ್ರಾಂತ್ ವಿಶ್ವ ಕೊಂಕ್ಣಿ ಕೆಂದ್ರಾಚ್ಯಾ ದಸ್ತುರೆ ಪರ್ಮಾಣೆ ಮಾನೆಸ್ತ್ ಶ್ರಿನಿವಾಸ ವಿ. ದೆಂಪೊ ಆನಿ ಮಾನೆಸ್ತ್  ರಾಮಚಂದ್ರ ಆರ್. ಕಾಮತ್ ಹಾಂಚ್ಯಾ ಹಸ್ತುಕಿಂ ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಆವರಣಾಂತ್ ಝಾಡಾಂ ಲಾಯ್ಲಿಂ.

ಕಾರ್ಯಕ್ರಮಾಂತ್ ವಿಶ್ವ ಕೊಂಕ್ಣಿ ಕೇಂದ್ರಾಚೊ ಉಪಾಧ್ಯಕ್ಷ್ ಮಾನೆಸ್ತ್ ಗಿಲ್ಬರ್ಟ್ ಡಿ’ಸೊಜಾ, ಟ್ರಸ್ಟಿ ಮಾನೆಸ್ತ್ ವಿಲಿಯಮ್ ಡಿ’ಸೋಜಾ,  ಅಕಿಲ್  ಭಾರತ್ ಕೊಂಕ್ಣಿ ಪರಿಶದೆಚೊ ಅಧ್ಯಕ್ಶ್ ಮಾನೆಸ್ತ್ ಅರುಣ್ ಉಭಯ್‌ಕರ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ್ ಡೊ| ಕೆ.  ಜಗದೀಶ ಪಯ್, ಶಾಳಾಂನಿ ಕೊಂಕ್ಣಿ  ಶಿಕ್ಪಾಚೊ ಮುಕೆಲಿ ಡೊ| ಕಸ್ತೂರಿ ಮೋಹನ್ ಪಯ್, ಮಂಗ್ಳುರ್ ವಿಶ್ವವಿದ್ಯಾಲಯಾಚ್ಯಾ ಕೊಂಕ್ಣಿ ಅದ್ಯಯನ್ ಪೀಠಾಚೊ ಸಂಯೋಜಕ್ ಡೊ| ಜಯವಂತ ನಾಯಕ್, ಕೊಂಕ್ಣಿ ಭಾಶಾ ಮಂಡಳಾಚೊ ಅಧ್ಯಕ್ಷ್ ಎಮ್. ಆರ್. ಕಾಮತ್  ಆನಿ ಕೊಂಕ್ಣಿ  ಭಾಸ್, ಸಾಹಿತ್ಯ್ ಆನಿ ಸಾಂಸ್ಕೃತಿಕ್ ವಿಶ್ವಾಂತ್ಲೆಂ ಮಾನೆಸ್ತ್ – ಮಾನೆಸ್ತಿಣಿ, ಯುವಜಣ್, ವಿದ್ಯಾರ್ಥಿ ಅಶೆಂ ಸಾಲ್‌ಭರ್ ಲೋಕ್ ಹಾಜರ್ ಆಸ್ಲೊ.

ತಸ್ವಿರ‍್ಯೊ  : ಮಾಸ್ಟರ್ ಸ್ಟುಡಿಯೊ, ಮಂಗ್ಳುರ್