ಪೂಣ್ ಏಕ್‌ಚ್ ಘಡಿ.
ಧರ್ನಿರ್ ಗಳ್‌ಲ್ಲ್ಯಾ ಕ್ಲೋಡಿಯಾಚಿ ಯಾಂತ್ರಿಕ್ ದೀಶ್ಟ್ … ಥಂಯ್ ಥಾವ್ನ್‌ಚ್ ಕ್ಲೈವಾಚ್ಯಾ ಮೊಬಾಯ್ಲ್ ಸ್ಕ್ರೀನಾರ್ ಆಪ್ಟಾಲಿ.
‘ದೋನ್ ವಿಣ್ಗಿಂ ಕುಡಿ.!.’
ಹೆಂ ಪಳೆತಾಂ ಪಳೆತಾಂ…ಹರ್ದ್ಯಾಂತ್ಲೆಂ ಧಡ್ಢಡೆ ಚಡಾತ್ತ್ ಗೆಲೆ. ತ್ಯಾ ಘಡ್ಯೆ ತಾಕಾ ಥಂಯ್ ಘಾಲ್ಲಿ ತಿ ದೀಶ್ಟ್ ಕಾಡುಂಕ್ ಜಾಲಿನಾಂ. ತ್ಯಾ ವೆಳಾ … ತಾಚೆ ಮತಿಂ ಕಿತೆಂಗೀ ಜಗ್ಲೊಂಕ್ ಲಾಗ್ಲೆಂ. ಆನಿ ತ್ಯಾ ದೃಶ್ಯಾಂತ್ …
ಆಪುಣ್ ಬಚಾವ್ ಜಾಂವ್ಚಿ ಕಾಂಯ್ ತರೀ ಖುಣಾಂ ದಿಶ್ಟೆಕ್ ಪಡ್ತಿತ್‌ಗೀ ಮ್ಹಣ್ ಆಪ್ಲಿ ಗುಂಡಾಯೆಚಿ ದೀಶ್ಟ್ ಧಾಂವ್ಡಾಂವ್ಚ್ಯಾರ್ ಪಡ್ಲೆಂ.
ಹ್ಯಾವೆಳಾ ತ್ಯಾ ದೃಶ್ಯಾಂತ್ … ರಿಸೊರ್ಟಾಂತ್ ಘಡ್ಲೆಲ್ಯಾ ಘಡಿತಾಚ್ಯಾ ಸತಾ ಥಾವ್ನ್ ಚುಕೊವ್ನ್ ಘೆಂವ್ಕ್ … ಫಟಿಚಿ ವಾಟ್ ತೆಂ ಸೊಧುಂಕ್ ಲಾಗ್ಲೆಂ.
ಥೊಡಿಂಚ್ಚ್ ಸೆಕುಂದಾಂ. ಆನಿ ತ್ಯಾ ಥೊಡ್ಯಾಚ್ಚ್ ಸೆಕುಂದಾನಿ ತೆಂ ಯಶಸ್ವೀ ಜಾಲೆಂಚ್ಚ್.
ಎಕಾಚ್ಚಾಣೆಂ ಏಕ್ ಆಶಾಕಿರಣ್ ಅನಿರೀಕ್ಶಿತ್ ಥರಾನ್ ತಾಚ್ಯಾ ಮತಿಂ ಜಗ್ಲೊಂಕ್ ಲಾಗ್ಲೆಂ!
‘ರಿಸೋರ್ಟಾಚ್ಯಾ ಖಟ್ಲ್ಯಾರ್ ಆಸ್ಲೆಲ್ಯೊ ತ್ಯೊ ದೋನ್ ವಿಣ್ಗಿಂ ಕುಡಿ ಲೈಂಗಿಕ್ ಉದ್ವೇಗಾಚ್ಯಾ ಮಿಸ್ಳೊನೆರ್ ಮೊಗಾ ಮಿಲನಾಂತ್ ಆಸ್‌ಲ್ಲಿಂ ವ್ಹಯ್.
ಪೂಣ್ ತ್ಯಾ ಸತಾ ವಿರೋಧ್ ಫಟ್ ಧರುನ್ ಝಜ್ಚಿ … ಏಕ್ ವಿಶಿಶ್ಟ್ ಗಜಾಲ್ ಸಟ್ಟ್ ಕರುನ್ ತಾಚ್ಯಾ ದಿಶ್ಟೆಕ್ ಸಾಂಪಡ್ಲಿ! ಥಂಯ್ಸರ್ …
ಲೈಂಗಿಕ್ ಉದ್ವೇಗಾಚ್ಯಾ ಮಿಲನಾಂತ್ ಆಸ್ಲೆಲ್ಯಾ ತ್ಯಾ ವಿಣ್ಗಿಂ ಕುಡಿಂಚ್ಯಾ ಮುಖಮಳಾಂಚಿ ವಳಕ್ ಧರೊಂಕ್ ಅಸಾಧ್ಯ್ ಜಾತಾಲೆಂ. ಮ್ಹಳ್ಯಾರ್ ತಾಂಚಿ ವಳಕ್ ಧರ್ಚಿ ಯಾ ರುಜ್ವಾತ್ ದಾಕಂವ್ಚಿ ಕಸಲಿಂಚ್ ಖುಣಾಂ ಥಂಯ್ಸರ್ ದಿಸಾನಾತ್‌ಲ್ಲಿಂ!
‘ಖಟ್ಲ್ಯಾರ್ ಆಸ್‌ಲ್ಲಿ ತಿ ಸ್ತ್ರೀ … ಆಪುಣ್. ಆನಿ ತೊ ಪುರುಶ್ … ನೈಜಿಲ್ … ವ್ಹಯ್.
ಹೆಂ ತಾಕಾ ಸ್ಪಶ್ಟ್ ಜಾಲ್ಲೆಂ. ತರೀ ತಿಂ ಆಮಿಂಚ್ಚ್ … ‘ಆಪುಣ್ ಆನಿ ನೈಜಿಲ್’…ಮ್ಹಳ್ಳೆಂ ಕಳಿತ್‌ಚ್ಚ್ ಜಾಯ್ನಾತ್‌ಲ್ಲೆಂ!!’
ಆಪ್ಲ್ಯಾ ತ್ಯಾ ಕೀಳ್ ಕರ್ನ್ಯಾ ಥಾವ್ನ್ ಬಚಾವಿ ಜೊಡ್ಚಿ ಹಿ ಗಜಾಲ್ … ತ್ಯಾಘಡ್ಯೆ ಕ್ಲೊಡಿಯಾಚ್ಯಾ ಚತುರ್ ಮತಿಕ್ ಚುರುಕ್ ಕರಿಲಾಗ್ಲಿ.
ಆಪ್ಣಾಚೆಂ ಅನಿಸ್ಕಳ್ಪಣ್ … ತಿ ಅನೀತ್ ವಾಯ್ಟ್ ಕರ್ನಿ … ಧಾಂಪುನ್ ವ್ಹರ್ಚೆಂ ಹೆಂ ಚತುರ್ ಚಿಂತಾಪ್ ತಾಚ್ಯಾ ಮತಿಂ ವಯ್ರ್ ವಯ್ರ್ ಛಾಪುನ್ ಆಸ್ತಾನಾಂ … ಖಿಣಾನ್ ತೆಂ ಕ್ಲೈವಾಕ್ ಭೆಶ್ಟಾವ್ನ್ ತಾಚೆರ್ ಧಾಡ್ ಘಾಲ್ಚ್ಯಾ ಧೈರಾನ್ ಭರ್ಲೆಂ! ಆನಿ ದುಸ್ರೆಚ್ಚ್ ಘಡ್ಯೆ…
ಅನೀತೆಚ್ಯಾ ದುಬಾವೆಂತ್ ಆಪ್ಣಾಕ್ ಖೆಂಡುನ್ ಆಸ್ಚ್ಯಾ ಕ್ಲೈವಾಕ್ … ತಶೆಂಚ್ಚ್ ಪಾಟಿಂ ಖೆಂಡುನ್ ತಾಚಿ ಕಾತ್ ಸೋಲ್ನ್ ಧರ್ನಿಕ್ ಶೆವ್ಟುಂಚಿ ಉತ್ರಾಂ .. .ತಾಚ್ಯಾ ಮತಿಂ ರೂಪಿತ್ ಜಾಲಿಂ. ಆನಿ ಕ್ಶಣಾನ್ … ಕ್ಲೈವಾನ್ ತಾಚೊ ವಿಚಾರ್ ಕರುನ್ ತಾಕಾ ವಿಚಾರ್‌ಲ್ಲೆಂ ತೆಂಚ್ಚ್ ಸವಾಲ್…
‘ಕಸಲೆಂ ಹೆಂ ?! ಮ್ಹಳ್ಳೆಂ ಸವಾಲ್ …
ತಾಕಾಚ್ಚ್ ಪಾಟಿಂ ತಾಚ್ಯಾ ಮುಸ್ಕಾರಾಕ್ ಮಾರ್ಚ್ಯಾಪರಿಂ ವಿಚಾರಿಲಾಗ್ಲೆಂ …
“ಕಸಲೆಂ ಹೆಂ.?!…ಕಸಲೆಂ ಹೆಂ ಮ್ಹಣ್…ಸಾಂಗ್…! ” ದಬಾವೆನ್ ಭರ್ಲೆಂಲೆಂ ತೆಂಚ್ಚ್ ಸವಾಲ್ ವಯ್ರ್ ವಯ್ರ್ ಘಾಲುನ್ ತಾಕಾ ಕಾಲುಬುಲೆಂ ಕರಿಲಾಗ್ಲೆಂ. ಆನಿ ಮುಂದರುನ್ ಪರತ್ ವಿಚಾರಿಲಾಗ್ಲೆಂ …
“ಖಂಯ್ಚ್ಯಾ ಚೆಡಿಯೆ ತಸಲ್ಲ್ಯಾ ಸ್ತ್ರೀಯೆಚೆಂ … ಬುರ್ಶೆಂ ಲೈಂಗಿಕ್ ಸಡಿಳಾಯೆಚೆಂ ಪಿಂತುರ್ ಹೆಂ?! ಮ್ಹಜ್ಯಾ ಗೈರ್ ಹಾಜ್ರೆರ್ …
ಅಸಲಿಂ ಲೈಂಗಿಕ್ ಸಡಿಳಾಯೆಚ್ಯಾ ಸ್ತ್ರೀಯೆಚಿಂ ವಿಪರೀತ್ ಲೈಂಗಿಕ್ ಹೊರ್ಬೊಸ್ ಭರ್ಲೆಲೆಂ ಕರ್ತುಬ್ … ಮೊಬಾಯ್ಲಾರ್ ಪಳೆವ್ನ್ ಸಂತೊಸುನ್ … ಹ್ಯಾ ಮಾರಿಫಾತ್ ತುಜ್ಯಾ ಲೈಂಗಿಕ್ ಅಸ್ಕಾತ್ಕಾಯೆಚ್ಯಾ ಪುರುಶತ್ವಾಕ್ ಜಾಗೊಂವ್ಚೆಂ ಪ್ರೇತನ್ ಕರುನ್ ಆಸ್ತಾಯ್?!”.
“ಕ್…ಕ್ಲೋಡಿಯಾ … ಕ .. ಕಸಲೆಂ ಉಲಯ್ತಾಯ್ ತುಂ?!… ” ಗಾಗೆಲೊ ಲಜೆಕ್ ಸಾಂಪಡ್ಲೊಲೊ ಕ್ಲೈವ್. ಆನಿ ಕ್ಲೋಡಿಯಾಚಿಂ ಹಿಂ ಅನಿರೀಕ್ಶಿತ್ ಹಿಂಸಾ ದಿಂವ್ಚ್ಯಾ ಸವಲಾಂಕ್ ಸಗ್ಳೊಚ್ಚ್ ಧೆಧೆಸ್ಪರ್ ತೊ ಜಾಲೊ.
ಹೆಂ ಪಾರ್ಕಿಲ್ಲೆಂ…ಕ್ಲೊಡಿಯಾ…
“ಕ್ಲೋಡಿಯಾ … ಕ್ಲೋಡಿಯಾ … ಕಸಲೆಂ … ಕ್ಲೋಡಿಯಾ?…ತುಜ್ಯಾ ತ್ಯಾ ಬುರ್ಶ್ಯಾ ವೊಂಟಾಂನಿ ಮ್ಹಜೆಂ ನಾಂವ್ ಕಾಡಿನಾಕಾ.” ಝಾಂಕುಳ್ಳೆಂ ತೆಂ. ಆನಿ ಮುಂದರುನ್ …
“ವಿಡಿಯೊಂತ್ಲ್ಯಾ ಕಾಮೋನ್ಮಧಿಕ್ ಬುರ್ಶ್ಯಾ ಸ್ತ್ರೀಯೆಕ್ ಹಾಂವ್ ಮ್ಹಣ್ ಬೊಟ್ ಜೊಕುನ್, ಮ್ಹಜೆರ್ ಫಟ್ ಬದ್ಲಾಮ್ ಘಾಲ್ತಾಯ್. ಆನಿ ಮ್ಹಾಕಾ ಭೆಶ್ಟಾಂವ್ಕ್ ಪಳೆತಾಯ್. ತುಜೆರ್ ವಿಶ್ವಾಸ್ ಮೋಗ್ ದವರುನ್, ತುಜಿ ಅಸಹಾಯೆಕತಾ ತುಜೆಂ ಜಿವಿತ್ ಪಿಡ್ಡ್ಯಾರ್ ಜಾಯ್ನಾಶೆಂ ಜಾಗ್ರುತ್ ಆಸ್ಚ್ಯಾ ಮ್ಹಾಕಾ…
‘ವಾಯ್ಟ್ ಚಾಲಿಚಿ, ಅನೀತಿಚಿ!’ ಮ್ಹಣ್ ಬೋಟ್ ಜೊಕುನ್ … ಮ್ಹಾಕಾ ತುಜ್ಯಾ ಮುಟಿಂತ್ ದವರ್ಚೆಂ ಪ್ರೇತನ್ ತುಂ ಕರುನ್ ಆಸಾಯ್.
‘ಥೂ ’… ತುಜ್ಯಾ ಜಲ್ಮಾಕ್.”
ಕ್ಲೋಡಿಯಾಚ್ಯಾ ತೊಂಡಾ ಥಾವ್ನ್ … ಆಪ್ಣಾಕ್ ಕೀಳ್ ಕರುನ್, ಲಜೆಕ್ ಸಾಂಪ್ಡಂವ್ಚಿ ಉತ್ರಾಂ, ವಯ್ರ್ ವಯ್ರ್ ಆಪ್ಣಾಕ್ ಖೆಂಡ್ತಾಸ್ತಾನಾಂ … ಯೆದೊಳ್ ರಾಗಾನ್ ಕಾಂಪೊನ್ ಆಸ್ಚೊ ಕ್ಲೈವ್ …
ಎಕಾಚ್ಚಾಣೆಂ ಕೀಳ್ ಭೊಗ್ಣಾಂನಿಂ ಧೆಧೆಸ್ಪರ್ ಜಾಲೊ. ಪಿಸೊಚ್ಚ್ ತೊ ಜಾಲೊ.
ಕ್ಲೋಡಿಯಾನ್ ತಾಚೆಂ ದಾದ್ಲೆಂಪಣ್ ನಾಗ್ಡೆಂ ಕೆಲ್ಲ್ಯಾ ಪರಿಣಾಮಾನ್ … ಖಿಣಾನ್ ತಾಚ್ಯಾ ವೊಂಟಾಂಕ್ ಶಿಂವೊಣ್ ಪಡ್ಲಿ.! ಮೌನ್ ತೊ ಜಾಲೊ.!!
ಹಿ ತಾಚಿ ಸಲ್ವೊಣ್ ಪಾರ್ಕಿಲ್ಲೆಂಚ್ಚ್ … ಕ್ಲೋಡಿಯಾಕ್ …. ಕ್ಲೈವಾಚ್ಯಾ ಮೌನ್‌ಪಣಾಚೆರ್ ಧಾಡ್ ಘಾಲ್ಚೆಂ ಧೈರ್ ಚಡ್ಲೆಂ. ತೆಂ ವೊಗೆಂಚ್ಚ್ ರಾವ್ಲೆಂನಾಂ …
“ಮ್ಹಜ್ಯಾ ಗೈರ್ ಹಾಜ್ರೆರ್ … ತುಜ್ಯಾ ಕಾನಾಂಕ್ ವಾಂಯ್ಗಿಂ ಬಾಂದುಂಕ್ ಆನಿ ಕೋಣ್ ಹಾಂಗಾಸರ್ ಯೆತಾ? ಕಾಂಯ್ ತಾಚೆ ಸಂಗಿ ತಿಂ ವಾಯ್ಟ್ ಚಾಲಿಂಚಿ ಬಾಯ್ಲಾಂಯೀ … ಯೇವ್ನ್ ತುಜಿ ತಕ್ಲಿ ಪಾಡ್ ಕರುನ್ ಪೈಶೆ ಲುಟ್ತಾತ್?!
ಹಾಂವ್ ಹೆಂ ಸಗ್ಳೆ ಅಶೆಂಚ್ಚ್ ಸೊಡಿಶಿನಾಂ. ಮ್ಹಾಕಾ ಅಸಲಿಂ ಸಗ್ಳಿಂ ಗಲೀಜ್ ಕರ್ತುಬಾಂ ಸೊಸುಂಕ್‌ಯೀ ಜಾಯ್ನಾಂ. ಹಾಂವ್ ಹೆಂ ಸಗ್ಳೆಂ ತುಜ್ಯಾ ಪಪ್ಪಾ ಮಾಮ್ಮಿಕ್ ತಿಳ್ಸುನ್ … ತಶೆಂಚ್ಚ್ ಪೊಲಿಸಾಂಕ್ ದೂರ್ ದೀವ್ನ್…”
“ಕ್ಲೋಡಿಯಾ…!” ಧೆಧೆಸ್ಪರಾನ್ ಮಧೆಂಚ್ಚ್ ಬೊಬಾಟ್ಲೊ ಕ್ಲೈವ್. “ಆನಿ ಆತಾಂ ತುಂ… ‘ಡ್ಯಾಡಿ ಮಾಮ್ಮಿ…ಪೊಲಿಸ್… ’… ಮ್ಹಣ್ ಕಿತೆಂ ಕಿತೆಂ ಕರುಂಕ್ ವೊಚಾನಾಕಾ … ಪ್ಲೀಜ್…”
ಕ್ಲೈವಾಚಿ ಮಾನ್ ಮರ್ಯಾದ್ ವೆಚಿಂ ಹಿಂ ಭಿವ್ಕುರಿಂ ಉತ್ರಾಂ … ತಾಚಿ ಸಲ್ವೊಣ್ ಸ್ಪಶ್ಟ್ ಥರಾನ್ ದಾಕಯ್ತಾಲಿಂ. ಆನಿ ಆತಾಂ ಹಿ ತಾಚಿ ಸಲ್ವೊಣ್ …
ಕ್ಲೋಡಿಯಾಕ್ ತಾಚೆ ಥಾವ್ನ್ ಸುಟ್ಕಾ ಘೆಂವ್ಚೊ ಆವ್ಕಾಸ್ ದೀಲಾಗ್ಲಿ! ಖಿಣಾನ್ ತೊ ಆವ್ಕಾಸ್ ಆರಾವ್ನ್ … ತಕ್ಶಣ್ ತೆಂ ಮ್ಹಣಾಲೆಂ …
“ಛೀ…ಆನಿ ಮ್ಹಾಕಾ ತುಜೆರ್ ಕಿಂಚಿತ್ತ್ ವಿಶ್ವಾಸ್ ನಾಂ. ಭರ್ವೊಸೊಯೀ ನಾಂ. ತುಜೆ ತಸಲ್ಯಾ ಕೀಳ್ ಪತಿ ಮುಕಾರ್ … ಆನಿ ಏಕ್ ಘಡಿ ಹಾಂವ್ ರಾಂವ್ಚಿಂ ನಾಂ.!”
ಉತ್ರಾಂ ಬರಾಬರ್ … ಕ್ಲೈವಾ ಥಾವ್ನ್ ಸುಟ್ಕಾ ಮೆಳುನ್ ಭಾಯ್ರ್ ವೆಚೊ ಹೊ ಆವ್ಕಾಸ್ ಖಿಣಾನ್ ಆರಾಯಾಗ್ಲೆಂ. ಆನಿ ಎಕಾಚ್ಚಾಣೆಂ ಕಠಿಣ್ ರಾಗಾಚೆಂ ವರ್ತನ್ ಕರುನ್ …
‘ಧಡ್ ಧಡ್’ ಕರುನ್ ತೆಂ ಕುಡಾ ಭಾಯ್ರ್ ಮೆಟಾಂ ಘಾಲಿಲಾಗ್ಲೆಂ. ಆನಿ ಘಡ್ಯೆನ್… ‘ಧಡ್…ಧಡಾಲ್ಲ್’ ವ್ಹಡಾ ಆವಾಜಾನ್ ಬಾಗಿಲ್ ಧಾಂಪಿಲಾಗ್ಲೆಂ. ದುಸ್ರೆಚ್ಚ್ ಘಡ್ಯೆ …
‘ಕ್ರೀಂ ಕ್ರೀಂ’ ಭಾಯ್ಲ್ಯಾನ್ ಬಾಗ್ಲಾಚಿ ಖಿಳ್ ಘಾಲ್ಚೊ ಆವಾಜ್ … ಕ್ಲೈವಾಚ್ಯಾ ಕಾನಿಂ ಆಪ್ಟಾಲೊ!.
ಖಿಳ್ ಘಾಲ್ಚೊ ಹೊ ಆವಾಜ್ ಆಯ್ಕಾಲ್ಲೊಚ್ಚ್ … ಸಗ್ಳೊಚ್ಚ್ ಪಿಸಾಂತುರ್ ಜಾಲ್ಲೊ ತೊ … ತಕ್ಶಣ್ ಯಾಂತ್ರಿಕ್ ಥರಾನ್ ವ್ಹಡಾನ್ ಬೊಬಾಟ್ ಮಾರಿಲಾಗ್ಲೊ …
“ಕ್ಲೋಡಿಯಾ…ಕ್ಲೋಡಿಯಾ…ಕಿತೆಂ ಕರ್ತಾಯ್ ಕ್ಲೋಡಿಯಾ ?! … ಬಾಗಿಲ್ ಕಾಡ್! … ಬಾಗಿಲ್ ಕಾಡ್ ಕ್ಲೋಡಿಯಾ…”
ಪೂಣ್ … ಧೆಧೆಸ್ಪರಾಚ್ಯಾ ಕ್ಲೈವಾನ್ ರಾಗಾನ್ ಬೊಬಾಟ್ಚ್ಯಾ ಹ್ಯಾ ಬೊಬೆಕ್ … ಕ್ಲೋಡಿಯಾ ಥಾವ್ನ್ ಕಸಲಿಚ್ಚ್ ಪ್ರತಿಕ್ರಿಯಾ ಮೆಳ್ಳಿನಾಂ.!. ಆನಿ ತಶೆಂಚ್ಚ್ ಕ್ಲೈವಾಚಿ ಬೊಬಾಟ್ ಯೀ ರಾವ್ಲಿನಾಂ!!.
ಕ್ಲೈವ್ ಬೊಬಾಟುನ್‌ಚ್ ರಾವ್ಲೊ … ಆನಿ ಕ್ಲೋಡಿಯಾನ್ ತೊಂಡ್ ಉಗ್ತೆಂಚ್ಚ್ ಕೆಲೆಂನಾಂ.!.
ಆತಾಂ ಕ್ಲೊಡಿಯಾ ಥಾವ್ನ್ ತಸಲಿಚ್ಚ್ ಜಾಪ್ ನಾಂ … ಆವಾಜ್ ನಾಂ.!
ಅಸಹಾಯಕತೆಚೆಂ ಹೆಂ ಧೆಧೆಸಸ್ಪರ್ ಭರಿತ್ ಭಿರಾಂತೆಚೆಂ ಪರಿಗತ್ … ಕ್ಲೈವಾಕ್ …
‘ಹ್ಯಾ ಕುಡಾಂತ್ ಆಪುಣ್ ಎಕ್ಸುರೊ ಆನಿ ಅಸಹಾಯೆಕ್.’ ಮ್ಹಣ್ ಮತಿಕ್ ಕಠಿಣ್ ಧೊಸುಂಕ್ ಲಾಗ್ಲೆಂ. ಆನಿ ಸಗ್ಳೊಚ್ಚ್ ನಿರಾಶೆಂತ್ ಬುಡ್ಲೊಲೊ ತೊ…
‘ಆಪುಣ್ ಕ್ಲೋಡಿಯಾ ಮುಕಾರ್ ಕೀಳಾಂತ್ಲೊ ಕೀಳ್ ಜಾಲೊಂ. ತಾಣೆಂ ಮ್ಹಾಕಾ ನಗ್ಡ್ಯಾಂತ್ಲೆಂ ನಾಗ್ಡೆಂ ಕರುನ್ ಧರ್ನಿಕ್ ಶೆವ್ಟಾಯ್ಲೆಂ.’ ಮ್ಹಳ್ಳ್ಯಾ ಸಲ್ವೊಣೆಚ್ಯಾ ವಿರಾರಾಯೆಂತ್ ಸಗ್ಳೊಚ್ಚ್ ಪಿಸಾಂತುರ್ ಜಾಲೊ.
ಆನಿ … ಕ್ರೋಧ್ ಅಕ್ರೋಶಾಚ್ಯಾ ಖಿನ್ನತೆಂತ್ ವ್ಹಡಾ ತಾಳ್ಯಾನ್ …
“ಕ್ಲೋಡಿಯಾ …ಕ್ಲೋಡಿಯಾ…!” ಮ್ಹಣ್ ಪರತ್ ಬೊಬಾಟ್ ಮಾರಿಲಾಗ್ಲೊ.
ಪೂಣ್ ಹ್ಯಾವೆಳಾ … ಥಂಯ್ಚ್ ಬಾಗ್ಲಾ ಭಾಯ್ರ್ ಉಬೆಂ ಆಸ್ಲೆಲ್ಯಾ ಕ್ಲೋಡಿಯಾಕ್…
ಕ್ಲೈವಾಕ್ ಮೆಳ್‌ಲ್ಲ್ಯಾ ಆಪ್ಲ್ಯಾ ತ್ಯಾ ಅನೀತೆಚ್ಯಾ ಹಳ್ಶಿಕ್ ದೃಶ್ಯಾಂಕ್ … ಆಪ್ಣೆಂ ಫಟ್ ಕರುನ್ … ತಾಚೆ ಥಾವ್ನ್ ಆಪ್ಣೆಂ ಸುಟ್ಕಾ ಜೊಡ್‌ಲ್ಲೆಂಚ್ಚ್ ವ್ಹಡ್ ಸಾಧನ್ ಜಾಲ್ಲೆಂ.
ಆನಿ ಆತಾಂ ಪರತ್ ಕ್ಲೈವಾಕ್ ಮುಖಾಮುಖಿ ಮೆಳ್ಚೆಂ ಧಯ್ರ್ ತಾಚೆ ಥಂಯ್ ನಾತ್‌ಲ್ಲೆಂಚ್ಚ್. ತಾಕಾ ತೆಂ ನಾಕಾಚ್ಚ್ ನಾಕಾ ಜಾಲ್ಲೆಂ.!.
ತ್ಯಾದೆಕುನ್ ಕಸಲಿಚ್ ಪ್ರತಿಕ್ರಿಯಾ ವ್ಯಕ್ತ್ ಕರಿನಾಸ್ತಾಂ … ತೆಂ ಮೌನ್‌ಚ್ ಉಬೆಂ ಆಸ್‌ಲ್ಲೆಂ.
ಪೂಣ್ ತ್ಯಾ ಮೌನತೆಂತ್ … ಆತಾಂ ತಾಚೆ ಮತಿಂ…
‘ದುಸ್ರೆ ದೀಸ್ … ಪರತ್ ಆಪ್ಣೆಂ ರಿಸೊರ್ಟಾಕ್ ವೆಚೆಂ ಯಾ ನಾಕಾ?!’. ಮ್ಹಳ್ಳೆಂ ಸವಾಲ್ ತಾಕಾ ಧೊಸುಂಕ್ ಆರಂಭ್ ಜಾಲೆಂ!.
‘ಕ್ಲೈವಾಚೊ ದುಬಾವೆಚೊ ಕ್ರೋಧ್ … ಆನಿ ಆಪ್ಣಾಚೆಂ ಅಪ್ರಾದಿ ಮನ್ ’…ಹೆಂ ದೊನೀ ತಾಕಾ ರಿಸೊರ್ಟಾಕ್ ವೆಚ್ಯಾಕ್ ಅಡ್ಕಳ್ ಘಾಲ್ತಾಸ್ತಾಂ …
‘ವೆಚೆಂ ಯಾ ನಾಕಾ?! …ವೆಚೆಂ ಯಾ ನಾಕಾ?!!’…ಮ್ಹಳ್ಳ್ಯಾ ಚಿಂತ್ನಾಂತ್ ತೆಂ ಮಿಸ್ಳೊನ್ ಗೆಲೆಂ.
ನಿಮಾಣೆಂ ತೆಂ…‘ಆಪ್ಲ್ಯಾ ಗರ್ಭಾಕ್ ಜಿವ್ಸಣ್ ದಿಂವ್ಚಿ ಪ್ರಕ್ರಿಯಾ … ದೋನ್ ದಿಸಾಂಚೆಂ ಮ್ಹಣ್ ಆಪ್ಣೆಂ ಪಯ್ಲೆಂಚ್ಚ್ ಯೆವ್ಜಿಲ್ಲೆಂ. ಆನಿ ಹಿ ಲೈಂಗಿಕ್ ಮಿನ್ಹತ್ ನಿರ್ಫಳ್ ಜಾಯ್ನಾಶೆಂ…
ಆಪ್ಣೆಂ ದುಸ್ರ್ಯಾ ದಿಸಾಯೀ ವೆಚೆಂ ಬರೆಂ!. ಜಾಲ್ಲೆಂ ಜಾತಾ … ವೆಚೆಂ ತೆಂ ವೆಚೆಂಚ್ಚ್ … ಮಾಗಿರ್ಚೆಂ ಮಾಗಿರ್ ಪಳೆಂವ್ಯಾಂ!’ ಮ್ಹಳ್ಳ್ಯಾ ನಿರ್ಧಾರಾರ್ …
ಆಪ್ಲ್ಯಾ ಕುಡಾಂತ್ ಆನಿಕೀ ಆವಾಜೊನ್ ಗಲಾಟೊ ಕರ್ನ್ ಆಸ್ಚ್ಯಾ ಕ್ಲೈವಾಚ್ಯಾ ಬೊಬೆಕ್ …
ಕ್ಲೊಡಿಯಾ ಆಪ್ಲ್ಯಾ ದೊನೀ ಹಾತಾಂನಿ ದೊನೀಂ ಕಾನ್ ಧಾಂಪಿಲಾಗ್ಲೆಂ!.
♥ ♥ ♥
ದುಸ್ರೆ ದೀಸ್ … ದನ್ಪರಾಂ ಸುಮಾರ್ ಸಾಡೆ ಬಾರಾ ವರಾರ್ … ಆದ್ಲ್ಯಾ ದಿಸಾಪರಿಂ …
ಕ್ಲೋಡಿಯಾ ಆನಿ ನೈಜಿಲ್ … ಪರತ್ ರಿಸೊರ್ಟಾಚ್ಯಾ ವಿಲ್ಲಾಕ್ ಮೇಟ್ ದವರಿಲಾಗ್ಲಿಂ.
ಹ್ಯಾ ವೆಳಾ … ಕ್ಲೈವಾಚ್ಯಾ ಬೊಂಗ್ಲ್ಯಾಂತ್ ಸಗ್ಳೊಚ್ಚ್ ಧೆಧೆಸ್ಪರ್ ಆನಿ ನಿರಾಶೆಚ್ಯಾ ಎಕ್ಸುರ್ಪಣಾಂತ್ ಆಸ್ಲೆಲ್ಯಾ ಕ್ಲೈವಾಚ್ಯಾ ಮತಿಂ…
ಸಟ್ಟ್ ಕರುನ್ ಫ್ರೆಡ್ಡ್ ಜಗ್ಲಾಲೊ!. ಘಡ್ಯೆನ್ ತೊ ಮೊಬಾಯ್ಲಾರ್ ಫ್ರೆಡ್ಡಾಚೆಂ ನಂಬ್ರಾಂ ದಾಂಬಿಲಾಗ್ಲೊ.
ಪೂಣ್ ಜಾಪ್ ನಾಂ. ಅಸಹಾಯೆಕತೆಚ್ಯಾ ಸಂಧರ್ಬಿ … ಸಹಾಯೆ ಖಾತಿರ್ ಪರತ್ ಪರತ್ ಕೋಲ್ ಕರಿಲಾಗ್ಲೊ. ಪೂಣ್ ತಾಚಿ ಜಾಪ್ ನಾಂಚ್ಚ್ ನಾಂ. “ಫಂಟಿಗ್ ಖೈಂಚೊ. ಉಪ್ಕಾರಾಕ್ ಪಡಾನಾತ್ಲೊಲೊ ಪಡ್ಪೊಶಿ.” ರಾಗಾನ್ ಗಾಳಿ ದೀಲಾಗ್ಲೊ ಕ್ಲೈವ್.
ತ್ಯಾಚ್ಚ್ ಘಡ್ಯೆ … ಪ್ರಸ್ತುತ್ಚ್ಯಾ ಪರಿಗತೆಕ್ ಹೊಚ್ಚ್ ಫ್ರೆಡ್ಡ್ ಕಾರಣ್ ಮ್ಹಳ್ಳೆಂ ಮತಿಕ್ ಯೆತಾಸ್ತಾಂ ತೊ ತಾಕಾ ಗಾಳಿಯಾಂ ವಯ್ರ್ ಗಾಳಿ ದೀಲಾಗ್ಲೊ.
‘ಫ್ರೆಡ್ಡಾ ನಿಮ್ತಿಂ ಕ್ಲೋಡಿಯಾ ಮ್ಹಜಾ ಜಿವಿತಾಂತ್ ಆಯ್ಲೆಂ. ಆನಿಂ ಹ್ಯಾವರ್ವಿಂ…
‘ಆಪ್ಣಾಕ್‌ಯೀ ಸುಖ್ ನಾಂ … ಆನಿ ಕ್ಲೋಡಿಯಾಕ್ ಯೀ ಸುಖ್ ನಾಂ ಜಾಲೆಂ!.’ ಹ್ಯಾವೆಳಾ ತಾಚ್ಯಾ ಜಿವಿತಾಂತ್ ಘಡ್ಲೆಲಿಂ ಘಡಿತಾಂ ಎಕಾ ವಯ್ರ್ ಏಕ್ ಉಗ್ಡಾಸಾಕ್ ಯೆತಾಸ್ತಾನಾಂ …
ಆಪ್ಣಾಚೆರ್ ಫ್ರೆಡ್ಡಾಚೆಂ ಬೆಫಿಕೆರ್ಪಣ್, ವಂಚನ್, ಘಾತ್, ತಾಣೆಂ ಅದಾರ್ಲೆಲಿಂ ಕೊಡು ಘಡಿತಾಂ … ಹೆಂ ಸರ್ವ್ ತೊ ಮತಿಂತ್ ಚಿಂತ್ತಾ… ಚಿಂತ್ತಾ…
ಫ್ರೆಡ್ಡಾ ವಿರೋಧ್ ಫಾರಿಕ್ಪಣಾಚಿ ಚಿಂತ್ನಾಂ ತಾಚೆ ಥಂಯ್ ಉದೆಂವ್ಕ್ ಲಾಗ್ಲಿಂ!
ಹ್ಯಾಚ್ಚ್ ಆಯಿನ್ನ್ ವೆಳಾ … ರಸ್ತ್ಯಾರ್ ಚಲುನ್ ಆಸ್ಚ್ಯಾ …
ರಿಶಭಾಚ್ಯಾ ಮತಿಂಯೀ ಫ್ರೆಡ್ಡಾ ವಿರೋಧ್ ಚಿಂತ್ನಾಂ ಧಾಂವಾತ್ತ್ ಆಸ್‌ಲ್ಲಿಂ. ಹ್ಯಾ ವೆಳಾ ಕ್ರೋಧಾನ್ ಬುಡ್ಲೊಲೊ ತೊ …
‘ಆಪ್ಣಾಕ್ ಪಾಟ್ಲ್ಯಾನ್ ಸುರಿ ಮಾರುನ್ ಘಾತ್ ಕೆಲ್ಲ್ಯಾ ಕೀಳ್ ಕರ್ತುಬಾಂಕ್ … ತಾಕಾ ಖೋಟ್ ಘಾಲ್ನ್ ಧರ್ನಿಕ್ ಆಪ್ಟಾಯ್ತಾಲೊಂ!. ಆನಿ ಹೊ ಸರಳ್ ತಾಚ್ಯಾ ಗೊಮ್ಟ್ಯಾಂತ್ ರಿಗವ್ನ್ … ರಗಾತ್ ಉಸ್ಳಾಯ್ತೊಲೊಂ.!!.’
ಮ್ಹಣ್ ಆಪ್ಲೆ ವೋಂಟ್ ಚಾಬೊನ್ … ಹಾತಿಂ ಆಸ್ಲೊಲೊ ಸರಳ್ ಬಳಾನ್ ಧರ್ನಿಕ್ ಮಾರ್ತೊಲೊ …
‘ಟ್ಟಾಂಯ್…ಟ್ಟಾಂಯ್…ಟ್ಟಾಂಯ್…’!
♥ ♥ ♥
ಅಶೆಂ ರಿಶಬ್ … ಫ್ರೆಡ್ಡಾ ವಯ್ಲ್ಯಾ ಫಾರಿಕ್ಪಣಾಚ್ಯಾ ಚಿಂತ್ನಾಂನಿಂ ವೆಸ್ತ್ ಜಾವ್ನ್ ಆಸ್ತಾಂ …
ಕ್ಲೈವಾಚ್ಯಾ ಬೊಂಗ್ಲ್ಯಾಂತ್ …
ಲಾಂಬ್ ಕೆಸಾಂಚೊ ತರ್ನಾಟೊ ಆನಿ ಕ್ಲೈವಾ ಮದೆಂ ಗಂಬೀರ್ ಸಂವಾದ್ ಚಲಾತ್ತ್ ಆಸ್‌ಲ್ಲೊ.
ಕ್ಲೋಡಿಯಾನ್ ಆಪ್ಲ್ಯಾ ಫಟ್ಕಿರ‍್ಯಾ ಉತ್ರಾಂ ಫಾರಾಂನಿಂ ಕ್ಲೈವಾಕ್ ಬನಾವ್ನ್ ವಿರಾರ್ ಕೆಲ್ಲ್ಯಾವಿಶಿಂ ಆಯ್ಕಾತಾನಾಂ … ಲಾಂಬ್ ಕೆಸಾಂಚೊ ತರ್ನಾಟೊ …
ಆಪ್ಣೆಂ ಹಾಡ್ಲೆಲಿ ರುಜ್ವಾತ್ ಕ್ಲೊಡಿಯಾನ್ ‘ಫಟ್ ಮ್ಹಣ್ ಕೆಲ್ಲಿ ರೀತ್’ ಆಯ್ಕೊನ್ … ತೊಯೀ ಕ್ರೋಧಾನ್ ಬುಡ್ಲೊ. ಆನಿ ಹ್ಯಾವೆಳಾ ತೊ …
‘ಫಟ್ ಕ್ಲೊಡಿಯಾಚಿ …ಸತ್ ಆಪ್ಣಾಚೆಂ!’ ಮ್ಹಣ್ ರುಜ್ವಾತೆ ಸವೆಂ ಕ್ಲೋಡಿಯಾಚಿ ಫಟಿಂಚಿ ಜಾಳ್ ಸುತಾಂ ಸುತಾಂ ಸೊಡಯ್ಲಾಗ್ಲೊ. ಆನಿ ಕ್ಲೋಡಿಯಾ ವಿರೋಧ್ ಕ್ಲೈವಾಚಿ ಕ್ರೋಧಾಚಿ ಸಾಯ್ ದಾಟಾಯಿತ್ತ್ ರಾವ್ಲೊ.
ಹಿ ಸರ್ವ್ ತಾಚಿ ಉತ್ರಾಂ … ಘಡಿತಾಂ … ವಯ್ರ್ ವಯ್ರ್ ಆಯ್ಕಾತ್ತ್ ಆಸ್ತಾಂ … ಕ್ಲೈವ್ …
‘ಆಪ್ಣಾಲಾಗಿಂ ಕ್ಲೋಡಿಯಾನ್ ಫಟಿ ವಯ್ರ್ ಫಟ್ ಮಾರುನ್, ಆಪ್ಲ್ಯಾ ಕೀಳ್ ಉತ್ರಾಂನಿಂ ಆಪ್ಣಾಕ್ ನಾಗ್ಡೆಂ ಕೆಲೆಂ. ಫಟ್ಕಿರ‍್ಯಾ ಉತ್ರಾಂನಿಂ ಧರ್ನಿಕ್ ಶೆವ್ಟಿಲೆಂ. ತ್ಯಾ ಶಿವಾಯ್ ಆಜ್‌ಯೀ …
ಪರತ್ ಮಾಕಾ ಬೆಫಿಕರ್ ಕರುನ್ … ತೆಂ ಪರ್ಕ್ಯಾ ದಾದ್ಲ್ಯಾ ಸಂಗಿ ಅನೈತಿಕ್ ಸಂಬಂದ್ ಮುಂದರುಂಕ್ ವೆಚೆಂ ಧೈರ್ ಘೆತ್ಲಾಂ ಮ್ಹಳ್ಯಾರ್ … ತೆಂ ‘ಆಪ್ಣಾಚ್ಯಾ ಮುಟಿ ಭಾಯ್ರ್ ಜಾಲೆಂ’ ಮ್ಹಳ್ಳೆಂ ತಾಕಾ ಕಠಿಣ್ ವಿರಾರ್ ಕರಿಲಾಗ್ಲೆಂ.!.
‘ಹ್ಯಾ ಮುಕಾರೀ ಹಿ ತಾಚಿಂ ಅನೈತಿಕ್ ಕರ್ತುಬಾಂ ಮುಂದರುನ್ ವೆತೆಲಿಂ … ಹ್ಯಾವರ್ವಿಂ ಮ್ಹಾಕಾ ತೆಂ ಧಣ್ಸುನ್‌ಚ್ ಆಸ್ತೆಲೆಂ!’. ಹಿಂ ಚಿಂತ್ನಾಂ ವಾಡಾತ್ತ್ ವೆತಾನಾಂ …
ಹೆಂ ಸಗ್ಳೆಂ ಆಪ್ಣಾಕ್ ಸೊಸುಂಕ್ ಜಾಯ್ಶೆನಾಂ. ತ್ಯಾ ಶಿವಾಯ್
ಅಸಲೆಂ ತಾಚಿ ಅನೀತಿಚಿ ಚಾಲ್ ಚಲಾತ್ತ್ ಆಸ್ತಾಂ … ಸಮಾಜೆಂತ್ ಆಪ್ಣಾಕ್ ತಶೆಂ ಆಪ್ಲ್ಯಾ ಕುಟ್ಮಾಕ್ ಆಸ್ಚೆಂ … ಉಂಚ್ಲೆಂ ಮಾನ್ ಮರ್ಯಾದ್ ವಾರ‍್ಯಾರ್ ಉಬ್ತೆಲಿ ಖಂಡಿತ್.
ಹ್ಯಾವರ್ವಿಂ ಆಪ್ಣೆಂ ಸಮಾಜೆಕ್ … ಫುಡ್ ಕರ್ಚೆಂ ತರೀ ಕಶೆಂ.?!.
‘ಛೆ…ಛೆ!…ಛೆ…!!’
ಸಗ್ಳೊಚ್ಚ್ ಪಿಸಾಂತುರ್ ಜಾವ್ನ್ … ತೊ ಧೆಧೆಸ್ಪರ್ ಜಾಲೊ. ಆನಿ ತ್ಯಾ ಎಕಾ ಘಡ್ಯೆ ತೊ ಎಕಾ ಥರಾಚ್ಯಾ ವಿಚಿತ್ರ್ ಮನೋಖಿನ್ನತೆಕ್ ಒಳಗ್ ಜಾವ್ನ್ ಎಕಾಚ್ಚಾಣೆಂ … ಏಕ್ ವಿಚಿತ್ರ್ ಕಠಿಣ್ ಬೋಬ್ ತೊ ಘಾಲಿಲಾಗ್ಲೊ.!.
ಆನಿ ಹ್ಯಾ ತಾಚ್ಯಾ ಅನಿರೀಕ್ಶಿತ್ ವ್ಹಡ್ ಬೊಬೆಕ್ … ಲಾಂಬ್ ಕೆಸಾಂಚೊ ತರ್ನಾಟೊ ಎಕಾಚ್ಚಾಣೆಂ ಉಡೊನ್ ಪಡ್ಲೊ!!.
ಹ್ಯಾಚ್ಚ್ ವೆಳಾ … ಕ್ಲೈವ್ ಸಗ್ಳೊಚ್ಚ್ ರಾಗಾನ್ ತಾಂಬ್ಡೊ ತಾಂಬ್ಡೊ ಜಾಲ್ಲೊ. ಆನಿ ತವಳ್ ಎಕಾಚ್ಚಾಣೆಂ ಸೈರಣ್ ಚುಕ್ಲೊಲೊ ತೊ… ಖಿಣಾನ್ ತ್ಯಾ ತರ್ನಾಟ್ಯಾಚ್ಯಾ ಗೊಮ್ಟ್ಯಾಕ್ ಬಳಾನ್ ದಾವ್ಲಿ ಮಾರಿಲಾಗ್ಲೊ.!
ಆನಿ ತಾಕಾ ಆಪ್ಣಾಚ್ಯಾ ಮುಸ್ಕಾರಾಲಾಗಿಂ … ಬಳಾನ್ ಲಾಗಿಂ ವೊಡ್ನ್ ಧರಿಲಾಗ್ಲೊ. ಆನಿ ತಾಚ್ಯಾ ಕಾನಿಂ ತಗ್ಸಾಲ್ಲ್ಯಾ ದಾಟ್ ಕರ್ಕಶ್ ಗರ್ಜೊವ್ಣೆಂ ತಾಳ್ಯಾನ್ … ಆಪ್ಣಾಚ್ಯಾ ಮತಿಂ ಉದೆಲ್ಲೆಂ ಭಯಾನಕ್ ಚಿಂತಾಪ್ ತಾಚ್ಯಾ ಕಾನಿಂ ಗರ್ಜೊಂಕ್ ಲಾಗ್ಲೊ.
ಆನಿ ತಿ ಯೋಜಿತ್ ಕೆಲ್ಲಿ ಭಿರಾಂಕುಳ್ ಮಾಂಡಾವಳ್ … ತಾಚ್ಯಾ ಕಾನಿಂ ಕ್ರೋಧಾಚ್ಯಾ ಕರ್ಕಶ್ ತಾಳ್ಯಾನ್ ಸಾಂಗಾತ್ತ್ ಗೆಲೊ!!.
ಕ್ಲೈವಾಚಿ ಹಿ ಭಿರಾಂಕುಳ್ ಯೋಜನ್ ಆಯ್ಕಾತಾಂ ಆಯ್ಕಾತಾಂ … ಲಾಂಬ್ ಕೆಸಾಂಚ್ಯಾ ತರ್ನಾಟ್ಯಾಚ್ಯಾ ಕುಡಿಂತ್ ಬಾರೀಕಾಯೆಚಿ ಕಾಂಪ್ ಸುಟ್ಲಿ.!. ಆನಿ ಖಿಣಾನ್ ತೊ ಗಾಗೆಲೊ…
“ನ್ಹಂ… ನ್ಹಂಯ್ ಕ್ಲೈವ್…ತ್ಯಾ ಉಪ್ರಾಂತ್ ಜಾಂವ್ಚೊ ಹಾಚೊ ಭಯಾನಕ್ ಪರಿಣಾಮ್ … ತಶೆಂ ತ್ಯಾ ಉಪ್ರಾಂತ್ ಮುಕಾರ್ ಕಿತೆಂ ಸಗ್ಳೆಂ ಜಾಯ್ತ್?! … ಹೆಂಸರ್ವ್ ತುಂವೆಂ …”
“ತಾಚೊ ಪರಿಣಾಮ್! … ಮುಕಾರ್ ಕಿತೆಂ ಸರ್ವ್ ಜಾಯ್ತ್!! .. .ಆನಿ ತ್ಯಾಖಾತಿರ್ ಹಾಂವೆಂ ಕಿತೆಂ ಕಿತೆಂ ಕರುಂಕ್ ಜಾಯ್ .. .ಕಿತೆಂ ಕರುಂಕ್ ಆಸಾ … ತೆಂ ಸಗ್ಳೆಂ ಹಾಂವ್ ತುಕಾ ನಂತರ್ ಸಾಂಗ್ತಾ.!!!.
ಆತಾಂ ತಿ ಚಿಂತ್ತಾ ತುಕಾ ನಾಕಾ … ಆತಾಂ ತುಂ ವಚ್. ಆನಿಂ ಹಾಂವೆಂ ಸಾಂಗ್ಲೆಂಲೆಂ ಕರ್!” ದಾಂತ್ ಚಾಬೊನ್ ಮಧೆಂಚ್ಚ್ ಗರ್ಜಾಲೊ ಕ್ಲೈವ್.
ಹ್ಯಾ ವೆಳಾ ತಾಚ್ಯಾ ಮುಖಮಳಾ ವಯ್ಲಿ ತಿ ಕ್ರೂರತಾ ಪಾರ್ಕಿತಾನಾಂ …‘ಕ್ಲೈವ್ ಅಸಲೊ ಏಕ್ ಕ್ರೂರ್ ಭಯಾನಕ್ ವೆಕ್ತಿತ್ವಾಚೊ ವೆಕ್ತಿ!’ ಮ್ಹಣ್ ತಾಕಾ ಪಾತ್ಯೆಂವ್ಕ್ ಜಾಲೆಂನಾಂ!.
ತವಳ್‌ಚ್ ಕ್ಲೈವ್ ಮುಂದರುನ್ ಮ್ಹಣಾಲಾಗ್ಲೊ …
“ಅಸಲ್ಲ್ಯಾ ಸಂಧಿಗ್ಧ್ ವೆಳಾ … ತುಜ್ಯಾ ಖಾಸ್ಗಿ ಭದ್ರತಿ ಖಾತಿರ್ … ತುಜಿ ಝಳಕ್ ಮಾತ್ರ್ ಕೊಣಾಕ್‌ಚ್ಚ್ ಝಳ್ಕಾ ನಾತ್ಲೆಲೆಪರಿಂ ತುಂವೆಂ ಜಾಗ್ರುತ್ ಘೆಂವ್ಕ್ ಜಾಯ್. ಉಪ್ರಾಂತ್ಲೆಂ ಕಿತೆಂ ತೆಂ?…ತೆಂ ಸರ್ವ್ ಹಾಂವ್ ಪಳೆತಾಂ.”
ಅಶೆಂ ‘ಸ್ಪೋರ್ಟ್ಸಾಂತ್ … ರಿಲೇ ಧಾಂವ್ಣೆಂತ್ ಎಕಾ ರನ್ನರಾ ಥಾವ್ನ್ ದುಸ್ರ್ಯಾ ರನ್ನಾರಾಕ್ ಬ್ಯಾಟನ್ ದಿಂವ್ಚೆ ಪರಿಂ … ಕ್ಲೈವಾನ್ ಆಪ್ಲೆಂ ಬ್ಯಾಟನ್ ಲಾಂಬ್ ಕೆಸಾಂಚ್ಯಾ ತರ್ನಾಟ್ಯಾಕ್ ದಿಲೆಂ.’
ನೀಜ್ ತರ್ ಅಸಲೆಂಚ್ಚ್ ‘ಬ್ಯಾಟನ್’ ರಿಶಭಾನ್ ಯೀ ಆಪ್ಲ್ಯಾ ಅಗಸ್ಟರಾಕ್ ದಿಲ್ಲೆಂ!.
ಅಶೆಂ ಕ್ಲೋಡಿಯಾ ಭಂವ್ತಿ ಭಂವೊನ್ ಆಸ್ಚ್ಯಾ … ಹ್ಯಾ ವಿಶಿಶ್ಟ್ ಮಿಸ್ತೆರ್ ಮಿಸ್ಲೊವ್ಣ್ಯಾ ಪರಿಗತೆಂತ್ …
ದೋಗ್ ಬ್ಯಾಟನ್ ದಿಲ್ಲೆ … ಆನಿ ದೋಗ್ ಬ್ಯಾಟನ್ ಘೆತ್ಲೆಲ್ಲೆ ಆಸ್‌ಲ್ಲೆ.!
ಬ್ಯಾಟನ್ ದಿಲ್ಲೆ … ಕ್ಲೈವ್ ಆನಿ ರಿಶಭ್ ತರ್ …
ಬ್ಯಾಟನ್ ಘೆತ್ಲೆಲ್ಲೆ … ಲಾಂಬ್ ಕೆಸಾಂಚೊ ತರ್ನಾಟೊ ಆನಿ ಅಗಸ್ಟರ್!.
♥ ♥ ♥
ಹಾಂಗಾಸರ್ ಆಪ್ಲೆಂ ಬ್ಯಾಟನ್ ಘೆವ್ನ್ ರುಮಾ ಭಾಯ್ರ್ ಪಡ್ಲೊಲೊ ಲಾಂಬ್ ಕೆಸಾಂಚೊ ತರ್ನಾಟೊ … ಸೆಕುಂದಾನಿಂ ಬೊಂಗ್ಲ್ಯಾಚ್ಚ್ಯಾ ದಾರಾಲಾಗಿಂ ಪಾವ್ಲೊ. ಆನಿ ದಾರಾರ್ ಪಳೆತಾನಾಂ … ಎಕಾಚ್ಚಾಣೆಂ ಥಟಕ್ಕ್ ಜಾಲೊ.
ಥಂಯ್ಸರ್ … ಏಕ್ ಅಪರಿಚಿತ್ ವೆಕ್ತಿ ಉಬಿ ಆಸ್‌ಲ್ಲಿ.
ತಿಕಾ ಆಪ್ಲ್ಯಾ ರುಂದಾಲ್ಯಾ ದೊಳ್ಯಾಂನಿಂ ಪಳೆತ್ತ್ ಆಸ್ತಾಂ … ತವಳ್‌ಚ್ಚ್ ತಿ ವೆಕ್ತಿ … ಕ್ಲೈವಾಚ್ಯಾ ಬೊಂಗ್ಲ್ಯಾ ಭಿತರ್ ರಿಗುನ್ ಜಾಲ್ಲಿ. ತಿಚೆಂ ಹೆಂ ದುಬಾವಿ ವರ್ತನ್ ಹೊ ತರ್ನಾಟೊ ಪಳೆತ್ತ್ ಆಸ್ತಾಂ …
ತೊ ಅಪರಿಚಿತ್ … ಕ್ಲೈವಾಚ್ಯಾ ರುಮಾಚಿ ಮೆಟಾಂ ಚಡೊಂಕ್ ಲಾಗ್ಲೊ.
ತವಳ್‌ಚ್ ಹ್ಯಾ ದುಬಾವೆ ಅಪರಿಚಿತಾ ವಿಶಿಂ ಕ್ಲೈವಾಕ್ ತಿಳ್ಸುಂಕ್ ತಾಣೆಂ ಮೊಬಾಯ್ಲ್ ಕಾಡ್ಲೆಂ. ಆನಿ ಹ್ಯಾವಿಶಿಂ ಅಮ್ಸರಿಂ ಅಮ್ಸರಿ … ಕ್ಲೈವಾಕ್ ಸಾಂಗಿಲಾಗ್ಲೊ. ತವಳ್ ಕ್ಲೈವ್ ಎಕಾಚ್ಚಾಣೆಂ …
“ಕೋಣ್?!” ಮ್ಹಣ್ ಬಡ್ಬಡ್ಲೊ. ತ್ಯಾಚ್ಚ್ ವೆಳಾ …
‘ಕರ್…ಕರ್ರ್’…ಕುಡಾಚೆಂ ಬಾಗಿಲ್ ಉಗ್ತೆಂ ಜಾಲೆಂ.
ಆನಿ ಕ್ಲೈವ್ ಬಾಗ್ಲಾ ಕುಶಿಂ ಪಳೆತಾಂ … ಥಂಯ್ಸರ್ ಆಸ್ಲೆಲ್ಯಾ ವೆಕ್ತಿಕ್ … ಪಳೆವ್ನ್ ಎಕಾಚ್ಚಾಣೆಂ ತಾಚೆ ದೊಳೆ ರುಂದಾಲೆ. ತವಳ್‌ಚ್ಚ್ ತೊ ಮೊಬಾಯ್ಲಾರ್ ಆಸ್ಚ್ಯಾ ತರ್ನಾಟ್ಯಾಕ್ ಕ್ಶೀಣ್ ತಾಳ್ಯಾನ್ ಮ್ಹಣಾಲೊ …
“ಹುಂ…ಆತಾಂ ತುಂ ವಚ್.”
ಹೆಂ ಆಯ್ಕಾಲ್ಲೆಂಚ್ಚ್ ಲಾಂಬ್ ಕೆಸಾಂಚೊ … ಬೊಂಗ್ಲ್ಯಾಂತ್ ಅಪರಿಚಿತ್ ವೆಕ್ತಿ ಆಸ್ಲೆಲ್ಯಾನ್ … ಹರ್ಶೆಂಚೆ ಪರಿಂ ಭೊಂಗ್ಲ್ಯಾ ದಾರ್ ಚಾವಿಯೆನ್ ಫಿಚಾರ್ ಕರಿನಾಸ್ತಾನಾಂ … ತಿ ಚಾವಿ ತಶಿಚ್ಚ್ ಬೊಲ್ಸಾಕ್ ಪಾಟಿಂ ಘಾಲಿಲಾಗ್ಲೊ.
ಆನಿ ರಿಸೋರ್ಟಾ ಕುಶಿನ್ ಧಾಂವ್ಡಾಂವ್ಕ್ ಬಾಯ್ಕ್ ಸ್ಟಾರ್ಟ್ ಕರಿಲಾಗ್ಲೊ.
ಹಾಂಗಾಸರ್ ಕ್ಲೈವಾಚ್ಯಾ ಕುಡಾಚ್ಯಾ ದಾರಾರ್ ಉಬೊ ಆಸ್ಚೊ ವೆಕ್ತಿ ಜಾವ್ನ್ ಆಸ್ ಲ್ಲೊ …
ಕ್ಲೊಡಿಯಾಚೊ ಡ್ಯಾಡಿ.!
♥ ♥ ♥
ತ್ಯಾ ಘಡ್ಯೆ … ಸಬಾರ್ ತೆಂಪಾ ನಂತರ್ ಮುಖಾಮಖಿ ಜಾಲ್ಲೆ …
ಕ್ಲೋಡಿಯಾಚೊ ಡ್ಯಾಡಿ ಆನಿ ಕ್ಲೈವ್ …
ಫಕತ್ತ್ ಎಕಾಮೆಕಾ ಪಳೆಂವ್ಚಾರ್‌ಚ್ಚ್ ಪಡ್‌ಲ್ಲೆ. ದೊಗೀ ಕಿತೆಂ ಉಲೊಂವ್ಚೆಂ …ಕಶೆಂ ಆರಂಭ್ ಕರ್ಚೆಂ ಮ್ಹಳ್ಳೆಂ ಸಮ್ಜಾನಾಸ್ತಾಂ ಮೌನ್ ಆಸ್‌ಲ್ಲೆ.
ಥೊಡ್ಯಾ ಸೆಕುಂದಾನಿಂ … ರುಮಾಂತ್ ಕ್ಲೊಡಿಯಾಚ್ಯಾ ಡ್ಯಾಡಿಚೊಚ್ಚ್ ತಾಳೊ ಉಟ್ಲೊ …
“ಕಸೊ ಆಸಾಯ್ ಕ್ಲೈವ್.?”
“ಖಟ್ಲ್ಯಾರ್ ಪಡೊನ್ ಆಸ್ಚ್ಯಾಲಾಗಿಂ … ಹೆಂ ಕಸಲೆಂ ಸವಾಲ್ ಡ್ಯಾಡಿ?!” ಕಾಳ್ಜಾಕ್ ತೊಪ್ಚ್ಯಾಪರಿಂ ಪಾಟಿಂ ಸವಾಲ್ ಘಾಲೆಂ ಕ್ಲೈವಾನ್.
ಹೆಂ ಆಯ್ಕೊನ್ ಕ್ಲೊಡಿಯಾಚ್ಯಾ ಡ್ಯಾಡಿಕ್ … ಹ್ಯಾಘಡ್ಯೆ ‘ಆನಿ ಕಶೆಂ ಮುಂದರುಂ?’ ಮ್ಹಣ್ ಸಮ್ಜಾನಾಸ್ತಾಂ ಏಕ್ ಪಾವ್ಟಿಂ ತೊ ಸಗ್ಳೊಚ್ಚ್ ಕಾಲುಬುಲೊ ಜಾಲೊ. ನಂತರ್ ಹಾಳ್ವಾಯೆನ್ ಮ್ಹಣಾಲೊ …
“ಹಾಂವೆಂ … ಹ್ಯಾಆದಿಂಚ್ಚ್ ಯೇಜಾಯ್ ಮ್ಹಣ್ ಚಿಂತ್‌ಲ್ಲೆಂ. ಪೂಣ್…”
“ಪೂಣ್…ಕಾಜಾರಾ ಆದಿಂಚ್ಚ್ ಕ್ಲೋಡಿಯಾನ್ ಹಾಂಗಾಸರ್ ಯೇಂವ್ಕ್ ಅಡ್ವಾರ್ಲೆಲ್ಯಾನ್ … ತುಮಿ ಹಾಂಗಾಸರ್ ಯೆಂವ್ಚೆಂ ಧೈರ್ ತರೀ ಘೆಂವ್ಚೆಂ ಕಶೆಂ.?” ಡ್ಯಾಡಿಚಿಂ ಅಧುರಿಂ ಉತ್ರಾಂ ಸವಾಲ್ ಘಾಲುನ್ ಸಂಪೈಲೆಂ ಕ್ಲೈವಾನ್. ತ್ಯಾಘಡ್ಯೆ …
ಕ್ಲೈವಾಚೆಂ ಹೆಂ ಸವಾಲ್ ತಾಕಾ ಚಾಬೊಂಕ್ ಜಾಯ್ನಾಚ್ಚೊ ಲೊಂಕ್ಡಾ ಚಣೊ ಜಾಲೊ. ಉಪ್ರಾಂತ್ಲ್ಯಾ ಥೊಡ್ಯಾ ಘಡಿಯಾಂನಿಂ …
“ಹ್…ಹೂಂ…” ಧೀರ್ಘ್ ಸ್ವಾಸ್ ಸೊಡ್ಲೊ ಡ್ಯಾಡಿನ್. ಆನಿ ವಿಶಯ್ ಬದ್ಲುನ್ ತೊ ಮುಂದರಿಲಾಗ್ಲೊ…“ಹೆಂ…ಭಾಯ್ರ್ ಕಾರ್ ನಾಂ. ಕ್ಲೋಡಿಯಾ…ಖಂಯ್ ಗೆಲಾಂ?.”
‘ಆಪುಣ್ ಖೈಂ ವೆತಾಂ … ಖೈಂಯ್ ಆಸಾಂ … ಕಿತೆಂ ಕರುನ್ ಆಸಾಂ’ … ಹೆಂ ಸರ್ವ್ ಕ್ಲೋಡಿಯಾನ್ ಮ್ಹಜೆಲಾಗಿಂ ಸಾಂಗುನ್ ವೆಚೆಂ … ಲಗ್ನಾ ಜಿವಿತಾಂತ್ ಮೊಗಾ ಸಂವಾದೆಚ್ಯಾ ಸಳಾವಳೆರ್ ಆಸ್ಚೆ ದೀಸ್ ಸಂಪೊನ್ ಗೆಲ್ಯಾತ್ ಡ್ಯಾಡಿ. ಕ್ಲೋಡಿಯಾನ್ ತೆ ಸಂಪೈಲ್ಯಾತ್.
ಪೂಣ್ ತೆಂ ಖಂಯ್ ಖಂಯ್ ವೆತಾ … ಕಸಲ್ಯಾ ಗರ್ಜೆನ್ ಕೊಣಾ ಸಂಗಿಂ ಆಸಾ … ಕಿತೆಂ ಕರುನ್ ಆಸಾ … ತೆಂ ಸಗ್ಳೆಂ ಹಾಂವ್ ಮಾತ್ರ್ ಜಾಣಾಂ ಆಸ್ತಾಂ.”
“ಖಂಯ್ ಖಂಯ್ … ಕೊಣಾ ಸಂಗಿ … ಖೈಂಸರ್ … ಮ್ಹಳ್ಯಾರ್?!”… ಎಕಾಚ್ಚಾಣೆ ಕ್ಲೋಡಿಯಾಚ್ಯಾ ಡ್ಯಾಡಿಚೆಂ ಸೈರಣ್ ಚುಕ್ಲೆಂ.
“ಮಟ್ವ್ಯಾನ್ ಸಾಂಗ್ಚೆಂ ತರ್ … ತಾಚೆಂ ಕಾಳಿಜ್ … ಸಳಾವಳ್ … ಸೊಡ್ದೊಡ್ … ತಾಣೆಂ ಕಾಡ್ಚಿಂ ಮೆಟಾಂ … ಹೆಂ ಸರ್ವ್ … ಲಗ್ನಾಂ ಸಂಭಂದಾಕ್ ವಿಸ್ರಾಲ್ಲ್ಯಾಂತ್.”
“ಕ್ಲೈವ್ ಕಿತೆಂ ತುಂ ಸಾಂಗೊನ್ ಆಸಾಯ್?!”
“ಡ್ಯಾಡಿ … ತುಮ್ಕಾಂ ಹೆಂ ಕಳಿತ್ ಜಾಯ್ನಾಂ. ಕಿತ್ಯಾ ತುಮ್ಚ್ಯಾ ಕಾಳಾರ್ ಲಗ್ನ್ ಮ್ಹಳ್ಳೊ ಘಟ್ ಭಾಂದ್ ಘಡ್ಲೆಲೆ ನಂತರ್ … ಜಿವಿತಾಂತ್ ಎಕಾಮೆಕಾ ಪ್ರಮಾಣಿಕ್ಪಣ್ ಮೋಗ್ ಹುಸ್ಕೊ ಸೊಡ್ದೊಡ್ ಆಸ್‌ಲ್ಲೊ.
ಪತಿ ಯಾ ಪತಿಣೆಕ್ ಕಸಲೆಂಯೀ ಅನ್ವಾರ್ ಆಕಾಂತ್ ಯೇಂವ್ … ಆನಿ ಕಿತೇಂಯ್ ಜಾಂವ್ … ತಾಕಾ ಸಾಂಡ್ಚೆ ಯಾ ಬೆಫಿಕೆರೆನ್ ತಾಕಾ ಕೊನ್ಶಾಂತ್ ಘಾಲ್ಚಿ ಪರಿಗತ್ ಉದೆನಾತ್ಲಿ.
ಪೂಣ್ ಡ್ಯಾಡಿ … ಹೊ ಕಾಳ್ ವಿಂಗಡ್. ಹ್ಯಾ ಕಾಳಾರ್ ಅಸಹಾಯಕ್ ಪತಿಕ್ ಯಾ ಪತಿಣೆಕ್ ‘ಆಪ್ಣಾಕ್ ಏಕ್ ವೊಜೆಂ ’ ಮ್ಹಣ್ ಬೆಫಿಕೆರ್ ಕರುನ್ ಕೊನ್ಶಾಂತ್ ಲೊಟ್ಚೊ ಕಾಳ್.
ಪೂಣ್ ತುಮ್ಚೆಂ ಧುವ್ ಕ್ಲೊಡಿಯಾ ಆನಿಕೀ ಮುಕಾರ್ ಗೆಲಾಂ. ಪ್ರಸ್ತುತ್ ತೆಂ ಪತಿಚ್ಯಾ ಯಾ ಆನಿ ಕೊಣಾಯ್ಚ್ಯಾಯೀ ಮುಟಿಕ್ ಮೆಳಾನಾತ್ಲೆಲ್ಯಾ ಹಂತಾಕ್ ವಾಡೊನ್ ಗೆಲಾಂ!. ”
ಕ್ಲೈವಾಚಿ ಹಿಂ ಉತ್ರಾಂ … ತಶೆಂ ತಾಚೆಂ ಕ್ರೋಧಾಚೆಂ ಕೀಟ್ … ಕ್ಲೋಡಿಯಾಚ್ಯಾ ಡ್ಯಾಡಿಚ್ಯಾ ಕಾಳ್ಜಾಂತ್ … ಕ್ರೋಧಾಚೊ ಉಜೊ ಪೆಟೊಂವ್ಕ್ ಸಕ್ಲೆಂ. ತಕ್ಶಣಾಂಚ್ಚ್ ತೊ ಯಾಂತ್ರಿಕ್ ಥರಾನ್ ವಿಚಾರುಂಕ್ ಲಾಗ್ಲೊ …
“ತರ್ … ಆತಾಂ ಕ್ಲೋಡಿಯಾ ಖೈಂಸರ್ ಆಸಾ…?!”
“ಯೆದೊಳ್‌ಚ್ ಅನೈತಿಕ್ ವಾಟೆರ್ ಮೆಟಾಂ ಘಾಲುನ್ ಆಸ್ಚೆಂ ತೆಂ … ಆಜ್ ಮಯೂರ್ ರಿಸೋರ್ಟಾಂತ್ … ಆಪ್ಲ್ಯಾ ಪ್ರೇಮಿ ಸಂಗಿಂ ಮಿರೊವ್ನ್ ಆಸಾ!” ರಾಗಾನ್ ದಾಂತ್ ಕಿರ್ಕಿಲೆ ಕ್ಲೈವಾನ್ .
“ಮೈಗಾಡ್!”… ಧರ್ನ್ ಕೊಸ್ಳಾಲ್ಲ್ಯಾಪರಿಂ ಜಾವ್ನ್ ಎಕಾಚ್ಚಾಣೆಂ … ತೊ ಕ್ಲೈವಾಚ್ಯಾ ಖಟ್ಲ್ಯಾರ್ ಕೊಸಾಳ್ಳೊ. ಉಪ್ರಾಂತ್ಲಿ ಎಕ್‌ಚ್ಚ್ ಏಕ್ ಘಡಿ ತಾಕಾ ಥಂಯ್ಸರ್ ರಾಂವೊಂಕ್ ಜಾಲೆಂನಾಂ. ತೊ ರಾವ್ಲೊನಾಂ. ಖಿಣಾನ್ ತೊ ಉಬೊ ಜಾಲೊ. ಆನಿ ತೊ …
‘ಧಡ್…ಧಡ್!’ ಆವಾಜ್ ಉಟೊವ್ನ್ ರುಮಾ ಥಾವ್ನ್ ಭಾಯ್ರ್ ಗೆಲೊ.
ಆನಿ ತ್ಯಾವೆಳಾ ತಾಚ್ಯಾ ಕಾಳ್ಜಾಂತ್ ಪೆಟೊನ್ ಆಸ್ಚೊ ಕ್ರೋಧಾಚೊ ಉಜೊ … ತಾಚ್ಯಾ ಮೆಟಾಂಕ್ … ಮಯೂರ್ ರಿಸೊರ್ಟಾಚಿ ವಾಟ್ ದಾಕಯ್ಲಾಗ್ಲೊ!.
♥ ♥ ♥
ಹಾಂಗಾಸರ್ ರಿಸೊರ್ಟಾಂತ್ …
ಕ್ಲೋಡಿಯಾ …
ನೈಜಿಲಾಚ್ಯಾ ವಿಶಾಲ್ ಹರ್ದ್ಯಾರ್ ವಿಶೆವ್ ಘೆವ್ನ್ ಆಸ್‌ಲ್ಲೆಂ.
ಹ್ಯಾವೆಳಾ ತಾಚಿಂ ಬೊಟಾಂ ನೈಜಿಲಾಚ್ಯಾ ಹರ್ದ್ಯಾ ಲೊಂವೆರ್ ಖೆಳಾತ್ತ್ ಆಸ್ತಾಂ … ಮತ್ ತಾಚ್ಯಾ ಜಿವಿತಾಂತ್ ಪಾಶಾರ್ ಜಾವ್ನ್ ಗೆಲ್ಲ್ಯಾ ಕೊಡು ಘಡಿತಾಂ ಭಂವ್ತಿ ಭಂವಾತ್ತ್ ಆಸ್ .
ಹ್ಯಾವೆಳಾ … ತ್ಯಾಮಧೆಂ … ದೋನ್ ವಿಶಿಶ್ಟ್ ಗಜಾಲೆಂ ವಿಶಿಂ ತಾಚಿ ಮತ್ ಧೆಧೆಸ್ಪರಾನ್ ಬುಡ್‌ಲ್ಲಿ.
ಏಕ್ … ಆಪ್ಲೆಂ ಗರ್ಭ್ ಭರ್ಚ್ಯಾ ಅಸಹಾಯೆಕೆನ್ … ಕ್ಲೈವಾಕ್ ತಾಣೆಂ ವಿಶ್ವಾಸ್ ಘಾತ್ ಕೆಲ್ಲಿಂ ಭೊಗ್ಣಾಂ!.
ದುಸ್ರೆಂ … ಆಪ್ಣೆಂ ನೈಜಿಲಾವಿಶಿಂ ಘೆತ್ಲೊಲೊ ಆಪ್ಣಾಂವ್ಕ್ ಅಸಾಧ್ಯ್ ಜಾಂವ್ಚೊ … ಘಟ್ ನಿಚೆವ್!.
ಅಸಲ್ಯಾ ದೋನ್ ಗಜಾಲೆಂಚ್ಯಾ ಚಿಂತ್ನಾಂ ವೆಳಾ…ಯಾಂತ್ರಿಕ್ ರಿತಿರ್ ತಾಚ್ಯಾ ದೊಳ್ಯಾಂನಿ ದುಖಾಂ ಉದೆಲಿಂ. ಹಿಂ ದುಕಾಂ ನೈಜಿಲಾಚ್ಯಾ ಹರ್ದ್ಯಾರ್ ಗಳಾತ್ತ್ ಆಸ್ತಾಂ …ತೆಂ ನೈಜಿಲಾಲಾಗಿಂ ಪುಸ್ಪುಸ್ಲೆಂ …
“ನೈಜಿಲ್ … ಆಯ್ಚಿ ಹಿ ಆಮ್ಚಿ ಭೆಟ್ … ನಿಮಾಣಿ ಭೆಟ್!.”
“ನಿ…ನಿಮಾಣಿ ಭೆಟ್?!” ಅನಿರೀಕ್ಶಿತ್ ಉತ್ರಾಂ ಆಯ್ಕೊನ್ ನೈಜಿಲ್ ಗಾಗೆಲೊ.
“ನೈಜಿಲ್” … ಧೀರ್ಘ್ ಸ್ವಾಸ್ ಸೊಡ್ಲೊ ಕ್ಲೋಡಿಯಾನ್. “ಹ್ಯಾ ಉಪ್ರಾಂತ್ ತುಂ ಮ್ಹಾಕಾ ಭೆಟುಂಕ್ ಆಶೆಂವ್ಚಿ ತುಜಿ ತಿ ಭೆಟ್ .. .ಆನಿ ತುಜ್ಯಾ ವರ್ವಿಂ ಗರ್ಭ್ ಸಾಂಭಾವ್ಲೆಲ್ಯಾ ತ್ಯಾ ಮ್ಹಜ್ಯಾ ಬಾಳಾಚೆರ್ ದೀಶ್ಟ್ ಘಾಲುಂಕ್ ಆಶೆಂವ್ಚಿ ತುಜಿ ತಿ ಆಶಾ … ಹೆಂ ದೊನೀ ಮುಂದರಿಲೆಂಯ್ ತರ್…
ಹೆಂ … ತುಜ್ಯಾ ಆನಿ ಮ್ಹಜ್ಯಾ ಕುಟ್ಮಾಕ್ ಭೆಸಾಂ ಕರ್ತೆಲೆಂ! … ಹೆಂ ಮ್ಹಾಕಾ ಕೆದಿಂಚ್ಚ್ ಜಾಂವ್ಕ್ ನಾಕಾ.”
“ಕ್ಲೋಡಿಯಾ …” ಮಧೆಂಚ್ಚ್ ಉದ್ಗಾರ್ಲೊ ನೈಜಿಲ್ … “ಹ್ಯಾವಿಶಿಂ ಆತಾಂಚ್ಚ್ ನಿಚೆವ್ ಘೆನಾಕಾ … ಪ್ಲೀಜ್ … ಮ್ಹಾಕಾ ಆತಾಂಚ್ಚ್…ಕಿತೆಂಚ್ಚ್ …”
“ನೈಜಿಲ್… ಆಮ್ಚ್ಯಾ ದೊಗಾಂಯ್ಚ್ಯಾ ಕುಟ್ಮಾಚ್ಯಾ ಭಲಾಯ್ಕೆ ಪಾಸುನ್ … ಆಮಿಂ ದೊಗಾಂಯ್ನೀ ಎಕಾಮೆಕಾ ವಿಸ್ರುಂಕ್ ಆಸಾ … ಸಾಕ್ರಿಫಿಸ್ ಕರುಂಕ್ ಆಸಾ …
ಹಾಂವೆಂ ಮ್ಹಜ್ಯಾ ಕ್ಲೈವಾ ಪಾಸುನ್. ಆನಿ ತುಂವೆಂ … ತುಂವೆಂ ತುಜ್ಯಾ ಕುಟ್ಮಾ ಪಾಸುನ್. ಆನಿಂ ಹಾಂವೆ ಯೆದೊಳ್‌ಚ್ಚ್ ಹ್ಯಾವಿಶಿಂ ಘಟ್ ನಿಚೆವ್ ಕರುನ್ ಜಾಲಾ.
ಹಾಂತುನ್ ಹಾಂವೆಂ ಪಾಟಿಂ ಸರುಂಕ್ ನಾಂಚ್ಚ್ ನಾಂ. ಆನಿ ತುಂವೆಯೀ ಹ್ಯಾ ನಿಚೆವಾ ಥಾವ್ನ್ ಪಾಟಿಂ ಸರ್ಚೆ ಪರಿಂ ನಾಂ.
ತ್ಯಾದೆಕುನ್ ಆಮಿಂ ಹ್ಯಾ ರಿಸೊರ್ಟಾ ಭಾಯ್ರ್ ಮೇಟ್ ದವರ್ತಾಸ್ತಾಂ …
ತುಂವೆಂ ಮ್ಹಾಕಾ, ಸಾಸ್ಣಾಕ್ ವಿಸ್ರುಂಕ್ ಜಾಯ್!. ಆನಿಂ ಹಾಂವೆಯೀ ತುಕಾ…!!
♥ ♥ ♥
“ಹ … ಹಲೋ … ಹಲೋ ಸರ್…”
ಅಗಸ್ಟರಾಚೆಂ ಕೋಲ್. ಖಿಣಾನ್ ರಿಶಭ್ ಅಮ್ಸರಿಲಾಗ್ಲೊ…“ಸಾಂಗ್ ಅಗಸ್ಟರ್…”
ತೊ ಕಸಲೆಂಗೀ ಬೋವ್ ಮಹತ್ವಾಚಿ ಗಜಾಲ್ ಸಾಂಗ್ಚ್ಯಾ ಅಮ್ಸೊರಾರ್ ಆಸಾ ಮ್ಹಳ್ಳೆಂ ರಿಶಭಾಚ್ಯಾ ಮತಿಕ್ ಆದಾಳ್ಳೆಂ. ತವಳ್ ಅಗಸ್ಟರ್ ಸಾಂಗಾತ್ತ್ ಆಸ್‌ಲ್ಲೊ …
“ಸರ್ ರಿಸೋರ್ಟಾ ಥಾವ್ನ್ ಸುಮಾರ್ ದೊನ್ಶಿಂ ಮೀಟರಾಂ ಪೈಸ್ … ಕ್ಲೈವಾಚೊ ತೊ ಲಾಂಬ್ ಕೆಸಾಂಚೊ ತರ್ನಾಟೊ ಕಸಲ್ಯಾಗೀ ಸಂಶಯಾಸ್ಪದ್ ವರ್ತನೆರ್ … ಹ್ಯಾ ಭಂವಾರಿ ಭಂವೊನ್ ಆಸಾ.
ತಾಚೆಂ ಹೆಂ ದುಬಾವಿ ಚಾಲ್ ಚಮ್ಕಾಣ್ ಪಳೆತಾನಾಂ … ತೊ ಕಸಲ್ಯಾಗೀ ನಿಗೂಢ್ ಅಕ್ರಮ್ ಕರ್ನ್ಯಾಂಚ್ಯಾ ಗುಪಿತ್ ಹುಮೆದೆರ್ ಆಸಾಶೆಂ ಭೊಗ್ತಾ.
“ಮ್…ಮ್ಹಳ್ಯಾರ್…?!” ಬೊಬಾಟ್ಲೊ ರಿಶಭ್.
“ಕಿತ್ಯಾಕ್ ಗೀ ಮ್ಹಾಕಾ .. .ತೊ … ‘ಕೊಣಾಚಿಗೀ … ನಿಮಾಣಿ ಘಡಿ…!’ ತಯಾರ್ ಕರ್ತಾಶೆಂ ದಿಸ್ತಾ.!.”
“ನಿಮಾಣಿಂ ಘಡಿ…?!”…ಎಕಾಚ್ಚಾಣೆಂ ಉಧ್ಗಾರ್ಲೊ ರಿಶಭ್. ‘ನಿಮಾಣಿ ಘಡಿ!’ ಮ್ಹಳ್ಳೆಂ ಆಯ್ಕಾತಾಸ್ತಾಂ … ಥಟ್ಟ್ ಕರುನ್ ತಾಚ್ಯಾ ಹರ್ದ್ಯಾ ಧಡ್ಧಡ್ಯಾಂ ಮಧೆಂ …
‘ಕ್ಲೋಡಿಯಾಚೆಂ ರಿಸ್ಕ್…!’ ಧೊಶಿಲಾಗ್ಲೆಂ. ತವಳ್‌ಚ್ಚ್ ತೊ ಭಡ್ಭಡ್ಲೊ …
“ಅಗಸ್ಟರ್ … ಕೊಣಾಯ್ಕೀ ಕಿತೆಂಯೀ ಜಾಂವ್ … ಪೂಣ್ ಮ್ಹಜ್ಯಾ ಕ್ಲೋಡಿಯಾಕ್…”
“ನಾಂ … ನಾಂ … ಸರ್ … ಕ್ಲೋಡಿಯಾಚಿ ಬಚಾವಿ ತಾಚಿ ಭದ್ರತಿ .. .ತಿ ಮ್ಹಜ್ಯಾ ಮತಿಂ ಖಂಚೊನ್ ಆಸಾ. ಕ್ಲೊಡಿಯಾಚ್ಯಾ ರಿಸ್ಕೆ ವರ್ವಿಂ ತುಮ್ಚ್ಯಾ ಜಿವಿತಾಕ್ ಭಾಲೊ ತೊಪಾನಾಶೆಂ ಪಳೆಂವ್ಚಿ ಜವಾಬ್ದಾರಿ ಮ್ಹಜಿ.”
“ಒ.ಕೆ … ತರ್ … ಆತಾಂ ತುಂ ತುಕಾ ಕಿತೆಂ ಕರುಂಕ್ ಆಸಾ ತಾಂತುನ್ ವೆಸ್ತ್ ಜಾ.” ಉತ್ರಾಂ ಬರಾಬರ್ ತಾಣೆಂ ಕೋಲ್ ಕಟ್ಟ್ ಕೆಲೆಂ. ದುಸ್ರೆ ಘಡ್ಯೆ .. .ತೊ ಉಬೊ ಆಸ್ಲೆಲೆ ಥಂಯ್‌ಚ್ಚ್ …
ಕಸಲೆಂಗೀ ವಿಚಿತ್ರ್ ವಿಶಿಶ್ಟ್ ಚಿಂತ್ನಾಂ ಆಟಾಯ್ತ್ ರಾವ್ಲೊ.
ದೊನ್ ತೀನ್ ಮಿನುಟಾಂ ನಂತರ್ ಆಪುಣ್ ಉಬೊ ಆಸ್ಚ್ಯಾ ಬಿಲ್ಡಿಂಗಾಚ್ಯಾ ಆಡೊಸಾಂತ್ … ಆಪ್ಲ್ಯಾ ಹಾತಿಂತ್ಲೊ ತೊ ಸರಳ್ ಲಿಪವ್ನ್ ದವರುಂಕ್ ಯೋಗ್ಯ್ ಜಾಗೊ ಸೊಧಿಲಾಗ್ಲೊ. ಆನಿ ಲಿಪೈಲೊ.
ದುಸ್ರೆಘಡ್ಯೆ … ಆಪ್ಣೆಂ ನಿರ್ಧಾರ್ ಘೆತ್ಲೆಲೆಪರಿಂ … ಕ್ಲೈವಾಚ್ಯಾ ಬೊಂಗ್ಲ್ಯಾ ಕುಶಿಕ್ ವೆಚ್ಯಾಕ್ ರಿಕ್ಶಾ ಧರಿಲಾಗ್ಲೊ.
ಹ್ಯಾಚ್ಚ್ ಆಯಿನ್ನ್ ವೆಳಾ …
ತೊ ಲಾಂಬ್ ಕೆಸಾಂಚೊ ತರ್ನಾಟೊ … ಕ್ಲೈವಾನ್ ಮಾಂಡ್ಲೆಲ್ಯಾ ಭಯಾನಕ್ ಯೋಜನೆಚಿ ತಯಾರಿ ಅಕೇರ್ ಕರುನ್ …
ತೆಂ ಯೋಜನ್ ಜ್ಯಾರಿ ಕರ್ಚ್ಯಾಕ್ ವಿಂಚ್ಲೆಲ್ಯಾ ಫಲಾಣ್ಯಾ ತ್ಯಾ ಘಾಢ್ ಅಂದ್ಕಾರ್ ಬುಡ್ಲೆಲ್ಯಾ ಯೋಗ್ಯ್ ಜಾಗ್ಯಾರ್ …
ಕ್ಲೋಡಿಯಾಚ್ಯಾ ಕಾರಾಕ್ ರಾಕೊನ್ ರಾವೊನ್ ಆಸ್‌ಲ್ಲೊ!
♥ ♥ ♥
ಅಸಲ್ಲ್ಯಾ … ಹ್ಯಾ ಸರ್ವ್ ವಿಶಿಶ್ಟ್ ರೋಮಾಂಚಕ್ ಘಡಿತಾಂನಿ ಮಿಸ್ಳೊನ್ ಆಸ್ಚ್ಯಾ ವೆಳಾ … ವೇಳ್ ದಾಂವಾತ್ತ್ ಆಸ್‌ಲ್ಲೊ. ಘಡಿಯೊ ಉತ್ರೊನ್ ಮಿನುಟಾಂ ಪಾಶಾರ್ ಜಾಲಿಂ. ಮಿನುಟಾ ನಂತರ್ ವೊರಾಂ ಉತ್ರೊನ್ ಆಸ್‌ಲ್ಲಿಂ. ಅಸಲ್ಲ್ಯಾ ವೆಳಾ …
ಖಟ್ಲ್ಯಾರ್ ಆಸ್ಲೊಲೊ ಕ್ಲೈವ್ …
ಆಪ್ಣೆಂ ಬ್ಯಾಟನ್ ದಿಲ್ಲ್ಯಾ ಲಾಂಬ್ ಕೆಸಾಂಚ್ಯಾ ತರ್ನಾಟ್ಯಾಚ್ಯಾ ಮೊಬಾಯ್ಲ್ ಕೊಲಾಚ್ಯಾ ನಿರೀಕ್ಶಣೆರ್ ಆಸ್‌ಲ್ಲೊ.
ಅಸಲ್ಲ್ಯಾ ವೆಳಾ … ಜಾಂವ್ಕ್ ಆಸ್ಚ್ಯಾ ಭಯಾನಕ್ ಘಡಿತಾ ವಿಶಿಂ ತಾಚಿಂ ಚಿಂತ್ನಾಂ ಧಾಂವಾತ್ತ್ ಆಸ್ತಾಂ … ತಾಚ್ಯಾ ವೊಣೊದಿ ವಯ್ಲ್ಯಾ ಘಡಿಯಾಳಾಚೆರ್ … ರಾತಿಚಿಂ ಸಾಡೆ ನೋವ್ ವೊರಾಂ ವ್ಹಾಜ್ಲಿಂ.
ಆನಿ ಹ್ಯಾವೆಳಾ … ರಿಶಭ್ …
ಕ್ಲೈವಾಚ್ಯಾ ಬೊಂಗ್ಲ್ಯಾ ಮುಕಾರ್ ಬಾಂದ್ಪಾ ಕಾಮ್ ಚಾಲು ಆಸ್ಚ್ಯಾ ಬಿಲ್ಡಿಂಗಾಚ್ಯಾ ಆಡೋಸಾಂತ್ ಬಸೊನ್ ಆಸ್ ಲ್ಲೊ. ಆನಿ ತೊಯೀ ..
ಆಪ್ಣೆಂ ಬ್ಯಾಟನ್ ದಿಲ್ಲ್ಯಾ ಅಗಸ್ಟರಾಚ್ಯಾ ಕೊಲಾಚ್ಯಾ ನಿರೀಕ್ಶಣೆರ್ ವೇಳ್ ಪಾಶಾರ್ ಕರಿತ್ತ್ ಆಸ್‌ಲ್ಲೊ. ಅಶೆಂ …
ಕ್ಲೈವ್ … ಕ್ಲೋಡಿಯಾಚಿ ಆಕಾಂತೆಚಿ ಖಬಾರ್ ಆಯ್ಕೊಂಚ್ಯಾ ನಿರೀಕ್ಶೆರ್ ಆಸ್ತಾಂ …
ರಿಶಭ್ … ಕ್ಲೋಡಿಯಾಚ್ಯಾ ಮಿಸ್ತೆರಾ ಘಡಿತಾಚ್ಯಾ ಖಬ್ರೆಕ್ ರಾಕೊನ್ ಆಸ್‌ಲ್ಲೊ.
ಅಸಲ್ಲ್ಯಾ ವೆಳಾ ತಾಂಚ್ಯಾ ದೊಗಾಂಯ್ಚ್ಯಾ ಕಾಳ್ಜಾಂತ್ … ಯಾಂತ್ರಿಕ್ ರಿತಿರ್ ಕಸಲೆಗೀ ಭಿರಾಂತೆಚೆ ಧಡ್ಧಡೆ ಧಡ್ಧಡುನ್‌ಚ್ ಆಸ್‌ಲ್ಲೆ!.
ಅಶೆಂ ಘಡಿಯಾಂ ಥಾವ್ನ್ ಘಡಿಯಾಂ ಪಾಶಾರ್ ಜಾಯ್ತ್ ಆಸ್ತಾಂ … ತ್ಯಾ ಎಕಾ ಘಡ್ಯೆ … ಎಕಾಚ್ಚಾಣೆಂ …
‘ಕ್ರೀಂ…ಕ್ರೀಂ…’
ರಿಶಭಾಚೆಂ ಮೊಬಾಯ್ಲ್ ಆವಾಜುಂಕ್ ಲಾಗ್ಲೆಂ,
“ಅಗಸ್ಟರ್…”. ಮೊಬಾಯ್ಲ್ ಜಾಗೊವ್ನ್ ಬಡ್ಭಡ್ಲೊ ರಿಶಭ್. ಆನಿ ತೊ ಇತ್ಲೆಂ ಮ್ಹಣಾಜಾಯ್ ತರ್ … ಸಗ್ಳೊಚ್ಚ್ ಖರ್ಶೆವ್ನ್ ಆಸ್ಚೊ ಅಗಸ್ಚರ್ … ಅಚಾನಕ್ ಘಡ್ಲೆಲ್ಯಾ ಆಕಾಂತೆಚಿ ಖಬಾರ್ ಅಮ್ಸೊರಿ ಅಮ್ಸೊರಿ ಸಾಂಗಾತ್ತ್ ಗೆಲೊ.
ಹೆಂ ಆಯ್ಕಾತಾಂ ರಿಶಭ್ ಎಕಾಚ್ಚಾಣೆಂ ಧಿಘ್ಭ್ರಾಂತ್ ಜಾಲೊ.!.
ಆನಿ ಅಗಸ್ಟರ್ ಸಾಂಗೊನ್ ಆಸ್ಚಿ ಹಿ ಆಕಾಂತೆಚಿ ಭಯಾನಕ್ ಖಬಾರ್ …
ರಿಶಾಭಾಚೆಂ ಕಾಳಿಜ್ … ತಲ್ವಾರಿಚ್ಯಾ ಧಾರಿನ್ ಭೆಸಾಂ ಕರಿತ್ತ್ ಗೆಲಿ. ತಾಚಿಂ ಉತ್ರಾಂ ಹಾಚ್ಯಾ ಕಾಳ್ಜಾಂತ್ ಘಡ್ಘಡ್ಯಾ ಆವಾಜಾಚೆಂ ಧಡ್ಧಡೆ ಉಟೈಲಾಗ್ಲೆ. ಆನಿ ತ್ಯಾ ಮಧೆಂ ಎಕಾಚ್ಚಾಣೆಂ ತೊ ಬೊಬಾಟಿ ಲಾಗ್ಲೊ …
“ಮೈಗಾಡ್ !“
ತವಳ್‌ಚ್ಚ್ … ಧೆಧೆಸ್ಪರಾನ್ ಬುಡ್ಲೆಲ್ಯಾ ಅಗಸ್ಟರಾನ್ … ಆಪ್ಣಾಚಿ ನಿಮಾಣಿಂ ಉತ್ರಾಂ ಉತ್ರಾಯ್ಲಿಂ …
“ಸರ್ ಹಾಂವ್ ಸಲ್ವಾಲೊಂ … ಹಾಂವ್ ಸಲ್ವಾಲೊಂ … ಮ್ಹಾಕಾ ಮಾಫ್ ಕರ್.!. … “
ಹೆಂ ಆಯ್ಕಾತಾಂ … ಪುರ್ತ್ಯಾ ಸಲ್ವೊಣೆಚ್ಯಾ ಧೆಧೆಸ್ಪರಾನ್ ಬುಡ್ಲೊಲೊ ರಿಶಭ್ … ಎಕಾಚ್ಚಾಣೆಂ ಧರ್ನಿರ್ ಗಳ್ಳೊ!. ಆನಿಂ …
“ರಾ…ಸ್ಕಾಲ್…!” ಬೊಬಾಟ್ಲೊ ತೊ. ಆನಿ ಘಡ್ಯೆನ್ ಕೋಲ್ ಕಟ್ಟ್ ಕರಿಲಾಗ್ಲೊ.
ರಿಶಭಾಚ್ಯಾ ತ್ಯಾ ಕಠಿಣ್ ಬೊಬೆಂತ್ಲಿ ಕಠಿಣ್ ಕ್ರೋಧಾಚಿ ಸಾಯ್ ಪಾರ್ಕುನ್ … ತಿ ಆಪ್ಣಾಂವ್ಕ್ ಸಖಾನಾಸ್ತಾಂ … ಅಗಸ್ಟರ್ ಥಂಯ್ಚ್ ಬಸ್ಲೊ.
ಸಗ್ಳೊಚ್ಚ್ ಧೆಧೆಸ್ಪರ್ ಜಾಲ್ಲೊ ತೊ … ವಿರಾರಾಯೆಚ್ಯಾ ಭರಾರ್ ಮಾತೆಂ ಸಗ್ಳೆಂ ಖೊರ್ಪೊಂಕ್ ಲಾಗ್ಲೊ.!
♥ ♥ ♥
ಹೆಂ ಸರ್ವ್ ಘಡ್ಲೆಲ್ಯಾ ಥೊಡ್ಯಾಚ್ಚ್ ಥೊಡ್ಯಾ ಘಡಿಯಾಂನಿಂ …
ಹಾಂಗಾಸರ್ ಬೊಂಗ್ಲ್ಯಾಂತ್ ಖಟ್ಲ್ಯಾರ್ ಅಸ್ಲೊಲೊ ಕ್ಲೈವ್ … ಅಸಲ್ಯಾಚ್ಚ್ ಪರಿಗತೆರ್ ಚಡ್ಪಡೊನ್ ಆಸ್‌ಲ್ಲೊ!. ಥೊಡ್ಯಾಚ್ಚ್ ಘಡಿಯಾಂ ಆದಿಂ … ಲಾಂಬ್ ಕೆಸಾಂಚ್ಯಾನ್…
“… ‘ಸರ್…ಡನ್’…!” ಮ್ಹಣ್ ತಾಕಾ ಮೊಬಾಯ್ಲಾರ್ ಮೆಸ್ಸೇಜ್ ಧಾಡ್‌ಲ್ಲಿ!.
ಹೆಂ ವಾಚ್‌ಲ್ಲೆಂಚ್ಚ್ ತ್ಯಾಘಢ್ಯೆ ಥಾವ್ನ್ ಕ್ಲೈವಾಚಾ ಕಾಳ್ಜಾಂತ್ … ಯೆದೊಳ್ ನಾತ್ಲೆಲೆ ಜಬ್ಬೋರ್ ಧಡ್ಧಡೆ …ಆತಾಂ ಆರಂಭ್ ಜಾಲ್ಲೆ.!
‘ಆನಿ ಆತಾಂ ಥೊಡ್ಯಾಚ್ಚ್ ವೆಳಾನ್ … ಪೊಲಿಸ್ … ಭಂವಾರಿಚೊ ಲೋಕ್ … ಬೊಂಗ್ಲ್ಯಾಂತ್ ಯೋವ್ನ್ ಭರ್ತೆಲೆ. ಮ್ಹಾಕಾಯೀ ತೆ ಪೊಲಿಸ್ ಅಧಿಕಾರಿ ಸವಲಾಂ ಘಾಲ್ತೆಲೆ.
ಹ್ಯಾವೆಳಾ ಹಾಂವೆಂ ಬೋವ್ ಜಾಗ್ರೂತ್ ಆಸೊಂಕ್ ಜಾಯ್. ಹಾಂವೆಂ ಕರಯಿಲ್ಲ್ಯಾ ಖುನ್ಯೆಚೊ ಕಿಂಚಿತ್ತ್ ದುಬಾವ್ ಕೊಣಾಚ್ಯಾಚ್ ಮತಿ ಜಗ್ಲೊಂಕ್ ನೊಜೊ.
ಹಾಂವೆ ದಿಂವ್ಚ್ಯಾ ಜವಾಬೆನಿಂ ಹಾಂವೆ ಕೆಲ್ಲ್ಯಾ ಖುನ್ಯೆಚೆ ಕಸಲಿಚ್ಚ್ ಸಾಯ್ ದಿಸೊಂಕ್ ನೊಜೊ. ಕಸಲಿಚ್ಚ್ ರುಜ್ವಾತ್ ಮೆಳೊಂಕ್ ನೊಜೊ.
ಹಾಂವೆ ಕರಯಿಲ್ಲಿ ಕರ್ನಿ …ಲಿಪೊನ್‌ಚ್ ಆಸ್ಚ್ಯಾಪರಿಂ ಹಾಂವೆಂ ಜಾಗ್ರುತ್ಕಾಯ್ ಘೆವ್ನ್‌ಚ್ ಆಸೊಂಕ್ ಜಾಯ್.
ತ್ಯಾ ಶಿವಾಯ್ ಕ್ಲೋಡಿಯಾ ವಯ್ಲೆಂ ಮನಸ್ತಾಪ್, ಕ್ರೋಧ್ … ಜಿವಿತಾಂತ್ ಆಸ್ಲೆಲೆಂ ನಾಸಮಧಾನ್ ಹೆಂ ಸರ್ವ್ … ಕೊಣಾಚ್ಯಾಚ್ ಸವಾಲಾಂನಿಂ ಉಗ್ತಾಡಾಕ್ ಯೇಂವ್ಕ್ ನೊಜೊ.
ಬಗಾರ್ ಮ್ಹಜ್ಯಾ ಉತ್ರಾಂನಿಂ … ಆಮ್ಚ್ಯಾ ಎಕಾಮೆಕಾಚೊ ಗಾಡ್ ಮೊಗ್ … ಸುಖಿ ಜಿವಿತಾಚಿ ಸಾವ್ಳಿ … ಶಾಂತ್ ಸಮಧಾನ್ ತಾಂಕಾ ದಿಸೊಂಕ್ ಜಾಯ್.
ತಾಚೆ ಮರಣಾವಿಶಿಂ ಮ್ಹಜೆಂ ಕಾಳಿಜ್ ಧೆಧೆಸ್ಪರಾನ್ ಭರೊನ್ ಹಾಂವ್ ಪಿಸೊಚ್ಚ್ ಜಾಲಾಂಶೆಂ ಚತುರ್ ನಟನ್ ಮ್ಹಜೆ ಥಂಯ್ ಆಸೊಂಕ್ ಜಾಯ್.’
ಅಶೆಂ ಹೆಂ ಸಗ್ಳೆಂ ಚಿಂತುನ್ ತೊ … ತಯಾರ್ ಜಾಯ್ತ್ ಆಸ್ತಾನಾಂ …
‘ಠಪ್…ಠಪ್…ಠಪ್.!’
ಕ್ಲೈವಾಕ್ … ಕೋಣ್‌ಗೀ ಮೆಟಾಂ ಚಡುನ್ ಯೆಂವ್ಚೊ ಆವಾಜ್ ಆಯ್ಕೊಂಕ್ ಲಾಗ್ಲೊ.!.
‘ಕೋಣ್…?!…ಕೋಣ್ ಗಾಯ್?!’ … ಖಿಣಾನ್ ತಾಚೆ ಕಾಳ್ಜಾ ಧಡ್ಧಡೆ ದೊಡ್ತೆ ಜಾಲೆ!.
ವಯ್ರ್ ವಯ್ರ್ ಚಡೊನ್ ಯೆಂವ್ಚೊ ತೊ ಮೆಟಾಂ ಆವಾಜ್ … ಆತಾಂ ತಾಚ್ಯಾ ರುಮಾಚ್ಯಾ ಬಾಗ್ಲಾರ್ ಪಾವ್ತಾಸ್ತಾಂ … ಎಕಾಚ್ಚಾಣೆಂ ಗೊಮ್ಟಿ ಘುಂವ್ಡಾವ್ನ್ ತೊ ತೆವ್ಶಿನ್ ಪಳೆಲಾಗ್ಲೊ.
ತ್ಯಾ ಘಡ್ಯೆ … ಥಂಯ್ಸರ್ ದಾರಾರ್ ಉಬೊ ಆಸ್ಲೆಲೊ … ಹಾಕಾ ಪಳೆಲ್ಲೆಂಚ್ಚ್ ಆಪ್ಲ್ಯಾ ಮಾತ್ಯಾರ್ ಆಸ್ಚೆಂ ಚೆಪೆಂ ಕಾಡಿಲಾಗ್ಲೊ.
ತವಳ್‌ಚ್ ಕ್ಲೈವಾಚೆ ತೆ ಭಿರಾಂತೆ ದೊಳೆ … ಎಕಾಚ್ಚಾಣೆಂ ರುಂದಾಲೆ!.
ಬಾಗ್ಲಾರ್ ಉಬೊ ಆಸ್ಲೆಲ್ಯಾಕ್ ಪಳೆತಾನಾಂ … ಖಿಣಾನ್ ತಾಚಿ ಕಾಳ್ಜಾ ಶಿರ್ ಕಠಿಣ್ ಕಾಂಪೊಂಕ್ ಲಾಗ್ಲಿ. ತಾಚೆ ವೋಂಟ್ … ಸಬ್ದ್ ಕಾಡುಂಕ್ ಉರ್ಡೊಂಕ್ ಲಾಗ್ಲೆ. ಪೂಣ್ ತ್ಯಾ ಘಡ್ಯೆ …
ತಾಚ್ಯಾ ಸುಕ್ಲೆಲ್ಯಾ ಜಿಬೆ ಥಾವ್ನ್ ಉತ್ರಾಂಚ್ಚ್ ಸುಟ್ಲಿನಾಂತ್.!.
ಕಠಿಣ್ ಭಿರಾಂತೆನ್ ಬುಡ್ಲೆಲೆ ದೊಳೆ … ತಶೆಚ್ಚ್ ಉಗ್ತೆಚ್ಚ್ ಉರ್ಲೆ.!!.
► ಮುಂದರುನ್ ಆಸಾ
