‘ಜೆಜು ಕ್ರಿಸ್ತಾಚ್ಯಾ ಮೊವಾಳ್ ಮೊಗಾನ್’ ಮ್ಹಣ್ಚೆಂ ಸೆವೆ ದ್ಯೇಯ್ ವಾಕ್ಯ್ ಘೆವ್ನ್, ಬಾವೀಸ್ ವರ್ಸಾಂ ತ್ಯಾಚ್ ಮೊವಾಳಾಯೆನ್ ಹ್ಯಾ ಎದ್ಯಾ ವ್ಹಡಾ ದಿಯೆಸೆಜಿಕ್, ಆಪ್ಲ್ಯಾ ಜಿವಿತಾಂತ್ ಹಾಸ್ತೆಂ ಮುಕಾಮಳ್ ಆನಿ ಮಯ್ಪಾಸಿ ಜಿನೊಸ್ ಘೆವ್ನ್ಂಚ್ ಮುಕೇಲ್ಪಣ್ ದಿಲ್ಲ್ಯಾ ಬಿಸ್ಪ್ ಲುವಿಸ್ ಪಾವ್ಲ್ ಸೋಜ್ ಹಾಂಚ್ಯಾ ಗೊವ್ಳಿಕ್ ಸೆವೆಚಿಂ ೨೫ ವರ್ಸಾಂ ಸಂಭ್ರಮ್ಚಿಂ ಮ್ಹಣ್ ದಿಯೆಸೆಜಿನ್ ಆದ್ಲ್ಯಾ ವರ್ಸಾ ಮೇ ೧೫, ೨೦೨೧ ವೆರ್ ನಿರ್ಧಾರ್ ಕೆಲ್ಲೊ ತರೀ, ಕೊರೋನಾ ಕಾರಣಾನ್ ತೆಂ ಕಾರ್ಯೆಂ ಚಲ್ಲೆಂ ನಾಂ. ವೆಗ್ಗಿಂಚ್ ತಾಕಾ ಉಲ್ಲಾಸುಂಚೆಂ ಕಾರ್ಯೆಂ ಚಲ್ತಲೆಂ ಆನಿ ಹ್ಯಾ ಕಾರ್ಯಾಂತ್ ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆನ್ ಸಂಗ್ರಹಿತ್ ಕೆಲ್ಲೊ ಅಭಿನಂದನ್ ಪುಸ್ತಕ್ ಏಕ್ ಲೊಕಾರ್ಪಣ್ ಜಾತಲೊ.
ಸಾಂತ್ ಲುವಿಸಾಚ್ಯಾ ಫೆಸ್ತಾ ದಿಸಾ ಜೂನ್ ೨೧, ೧೯೪೧ ವೆರ್ ಹೆಕ್ಕೊಟ್ಟುಚ್ಯಾ (ಆದಿಂ ಆಗ್ರಾರ್ ಆನಿ ಆತಾಂ ಫರ್ಲಾ ಫಿರ್ಗಜ್ ಮಥಾಯಸ್ ಸೊಜಾ ಆನಿ ಇಜಾಬೆಲ್ಲಾ ಸೊಜಾ ಹಾಂಚ್ಯಾ ದೆವೊತ್ ಕುಟ್ಮಾಂತ್ ಸವೊ ಭುರ್ಗೊ ಜಾವ್ನ್ ಲುವಿಸ್ ಪಾವ್ಲ್ ಸೋಜ್ ಜನ್ಮಾಲೊ. ಹಾಂಚ್ಯಾ ಕುಟ್ಮಾಂತ್ ಮ್ಯಾಕ್ಸಿಮ್ ಡಿಸೋಜಾ, ಭಯ್ಣ್ ಜ್ಯಾನಿಸ್ (ಅಪೊಸ್ತಲಿಕ್ ಕಾರ್ಮೆಲ್), ಸೆಲಿನ್ ಡಿಸೋಜಾ, ಬಾಪ್ ಚಾರ್ಲ್ಸ್ ಡಿಸೋಜಾ (ಮಿಷಿಯೋನರಿ ಯಾಜಕ್ ಆನಿ ಉಪ್ರಾಂತ್ ಡೆಲ್ಲಿ ಆರ್ಚ್ ದಿಯೆಸೆಜಿಚೊ ವಿಗಾರ್ ಜೆರಾಲ್), ಸೋಫಿಯಾ ಡಿಸೋಜಾ (ಸೊಫಿ ಟಿಚೆರ್) ಉಪ್ರಾಂತ್ ಬಿಸ್ಪ್ ಎಲೋಷಿಯಸ್ ಆನಿ ನಿಮಾಣೊ ಮೈಕೆಲ್ ಡಿಸೋಜಾ ಅಶೆಂ ಒಟ್ಟುಕ್ ಸಾತ್ ಜಣಾಂ.
ಆಗ್ರಾರಾಂತ್ಲ್ಯಾ ಇಗರ್ಜೆ ಇಸ್ಕೊಲಾಂತ್ ಸುರ್ವಿಲೆಂ ಶಿಕಪ್ ಸಂಪಯ್ತಚ್ ಲುವಿಸ್ ಸೋಜ್ ಎಸ್ ವಿ ಎಸ್ ಕೊಲೆಜಿಂತ್ ಹೈಸ್ಕೂಲ್ ಆನಿ ಪಿಯುಸಿ ಶಿಕ್ಪಾಕ್ ಮ್ಹಣ್ ಭರ್ತಿ ಜಾಲೊ. ಶಿಕ್ಪಾಂತ್ ಎಕ್ದಮ್ ಚುರುಕ್ ಆಸ್ಲ್ಲೊ ತೊ ದೆವಾಚೆಂ ನಿರ್ಮೊಣೆಂ ವಿಚಿತ್ರ್ ಮ್ಹಣ್ಚೆಪರಿಂ ೧೯೫೮ ಇಸ್ವೆಂತ್ ಸಾಂತ್ ಜುಜೆ ಸೆಮಿನರಿಕ್ ಯಾಜಕೀ ತರ್ಭೆತಿ ಖಾತಿರ್ ಭರ್ತಿ ಜಾಲೊ. ೧೯೬೬ ಡಿಸೆಂಬರ್ ೩ ವೆರ್ ತಾಕಾ ಬಿಸ್ಪ್ ಬಾಜಿಲ್ ಸಾಲ್ವಾದೊರ್ ಸೊಜಾನ್ ಯಾಜಕೀ ದೀಕ್ಷಾ ದಿಲಿ. ಯಾಜಕ್ಪಣಾಚ್ಯಾ ಪಯಿಲ್ಲ್ಯಾ ಚಾರ್ ವರ್ಸಾಂ (೧೯೬೬-೧೯೭೦) ತೊ ಕೊರ್ಡೆಲ್ ಭಾಗೆವಂತ್ ಖುರ್ಸಾಚ್ಯಾ ಫಿರ್ಗಜೆಂತ್ ಸಹಾಯಕ್ ವಿಗಾರ್ ಜಾವ್ನಾಸ್ಲ್ಲೊ ಥಂಯ್ ಆಸ್ತಾನಾಂ ತಾಣೆ ಕರ್ನಾಟಕ ವಿಶ್ವವಿದ್ಯಾಲಯಾಥಾವ್ನ್ ಪದ್ವಿ ಶಿಕಪ್ ಸಂಪಯ್ಲೆಂ. ೧೯೭೧ ಇಸ್ವೆಂತ್ ತಾಕಾ ಬಿಸ್ಪಾಚೊ ಕಿರ್ಯಾಲ್ (ಸೆಕ್ರೆಟರಿ) ನೆಮ್ಲೊ. ಉಪ್ರಾಂತ್ (೧೯೭೨-೭೬) ತಾಕಾ ರೊಮಾಂತ್ ಕ್ಯಾನನ್ ಲೊ (ಪವಿತ್ರ್ಸಭೆಚೆಂ ಕಾನೂನ್) ಶಿಕುಂಕ್ ಧಾಡ್ಲೊ ಆನಿ ಥಂಯ್ಸರ್ ತಾಣೆ ಕ್ರಿಸ್ತಾಂವ್ ಕಾಜಾರಿ ಕಾಯ್ದ್ಯಾ ವಿಶಿಂ ವಿಶಿಷ್ಟ್ ಅಧ್ಯಯನ್ ಚಲಯ್ಲೆಂ. ತಾಚ್ಯಾ ಶಿಕ್ಪಾಂತ್ ದಾಕಯಿಲ್ಲ್ಯಾ ಹುಷಾರ್ಗಾಯೆಥಾವ್ನ್ ಆಕರ್ಷಿತ್ ಜಾವ್ನ್ ಪವಿತ್ರ್ಸಭೆಚ್ಯಾ ವ್ಹಡಿಲಾಂನಿ ರೊಮನ್ ರೋಟಾಚ್ಯಾ (ಪವಿತ್ರ್ಸಭೆಚೆಂ ಮಹೋನ್ನತ್ ನಿತಿಯಾಸಣ್) ವಕೀಲ್ ಮಂಡಳೆಂತ್ ಸಾಂಧೊ ನೆಮ್ಲೊ. ತ್ಯಾ ಸ್ಥಾನಾಕ್ ಪಾವ್ಲ್ಲೊ ಪಯಿಲ್ಲೊ ಭಾರತೀಯ್ ವೆಕ್ತಿ ತೊ.
೧೯೭೬ ವ್ಯಾ ವರ್ಸಾ ಮಂಗ್ಳುರಾಕ್ ಪಾಟಿಂ ಯೆತಚ್ ತಾಕಾ ದಿಯೆಸೆಜಿಚೊ ಛಾನ್ಸಲರ್ ನೆಮ್ಲೊ ಆನಿ ಲಾಂಬ್ ಕಾಳ್ ತೊ ದಿಯೆಸೆಜಿಚೊ ಛಾನ್ಸಲರ್ ಜಾವ್ನಾಸುನ್ ಬಿಸ್ಪ್ ಬಾಜಿಲಾಚ್ಯಾ ಕಾರ್ಭಾರ್ಪಣಾಕ್ ಆಧಾರ್ ದಿಲೊ. ೧೯೮೪ ವ್ಯಾ ವರ್ಸಾ ದಿಯೆಸೆಜಿಚೊ ಜುಡೀಷಿಯಲ್ ವಿಗಾರ್ ಜಾವ್ನ್ ತಾಕಾ ನೆಮ್ಲೊ. ತಾಚೆಸವೆಂ ದಿಯೆಸೆಜಿಚ್ಯಾ ದೇವ್ ಆಪೊವ್ಣ್ಯಾ ಕೇಂದ್ರಾಚೊ ನಿರ್ದೇಶಕ್ ಜಾವ್ನ್ ತಶೆಂಚ್ ಗ್ಲ್ಯಾಡ್ಸಮ್ ಮೈನರ್ ಸೆಮಿನರಿಚೊ ನಿರ್ದೇಶಕ್ ಜಾವ್ನ್ಯಿ ತಾಕಾ ನೆಮ್ಲೆಂ. ದಿಯೆಸೆಜಿಚ್ಯಾ ದೇವ್ ಆಪೊವ್ಣ್ಯಾ ಕೇಂದ್ರಾಚೊ ನಿರ್ದೇಶಕ್ ಜಾವ್ನಾಸ್ತಾಂ ಸಭಾರ್ ಯುವಜಣಾಂಕ್ ಯಾಜಕ್ಪಣಾಥಂಯ್ ತಾಣೆ ಆಕರ್ಷಿತ್ ಕೆಲಾಂ. ಛಾನ್ಸಲರ್ ಆನಿ ಜುಡೀಷಿಯಲ್ ವಿಗಾರ್ ಜಾವ್ನಾಸ್ತಾನಾಂಚ್ ಕಾಸ್ಸಿಯಾ ಫಿರ್ಗಜೆಚೊ ವಿಗಾರ್ ಜಾವ್ನ್ಯೀ ೧೯೮೭ ಥಾವ್ನ್ ತಾಣೆ ಸೆವಾ ದಿಲ್ಯಾ ಹಾಚೆ ಸವೆಂ ೧೯೮೭ ಥಾವ್ನ್ ದಿಯೆಸೆಜಿಚ್ಯಾ ಸ್ತ್ರೀಯಾಂಚ್ಯಾ ಮಂಡಳೆಚೊ ಅತ್ಮೀಕ್ ನಿರ್ದೇಶಕ್ ಜಾವ್ನ್ಯೀ ತೊ ವಾವುರ್ಲಾ.
೧೯೯೫ ವ್ಯಾ ವರ್ಸಾ ಸಭಾರ್ ಘಡಿತಾಂ ಸಂಗಿಸಂಗಿ ಘಡ್ಲಿಂ. ಜೆಜ್ವಿತಾಂನಿ ಸಾಂತ್ ಜುಜೆ ಸೆಮಿನರಿ ದಿಯೆಸೆಜಿಕ್ ಹಾತಾಂತರ್ ಕೆಲಿ. ಬಾಪ್ ಲುವಿಸ್ ಪಾವ್ಲ್, ಸಾಂತ್ ಜುಜೆ ಸೆಮಿನರಿಚೊ ಪಯಿಲ್ಲಿ ದಿಯೆಸೆಜಿ ರೆಕ್ಟರ್ ಜಾವ್ನ್ ನೇಮಿತ್ ಜಾಲೊ. ೧೧ ಜನೆರ್ ೧೯೯೬ ವೆರ್ ಪಾಪಾ ಜುವಾಂವ್ ಪಾವ್ಲ್ ದುಸ್ರ್ಯಾನ್ ಬಾಪ್ ಲುವಿಸಾಕ್ ದುರ್ರಾ ದಿಯೆಸೆಜಿಚೊ ನಾಮ್ಸೂಚಕ್ (Titular) ಬಿಸ್ಪ್ ಆನಿ ಮಂಗ್ಳುರ್ ದಿಯೆಸೆಜಿಕ್ ಆಧಾರಿ ಬಿಸ್ಪ್ ಮ್ಹಣ್ ನೆಮ್ಲೊ. ಮೇ ೧೫, ೧೯೯೬ ವೆರ್ ಬಿಸ್ಪ್ ಬಾಜಿಲ್ ಸಾಲ್ವಾದೊರ್ ಸೊಜಾನ್ ರುಜಾಯ್ಚ್ಯಾ ಕಾಥೆದ್ರಾಲಾಂತ್ ಬಿಸ್ಪ್ ಮ್ಹಣ್ ತಾಕಾ ಕೊನ್ಸೆಕ್ರಾರ್ ಕೆಲೊ. ಬಿಸ್ಪ್ ಬಾಜಿಲ್ ಆವ್ಚಿತ್ ಮೊರ್ಣಾಕ್ ವಳಗ್ ಜಾಲೊ ತೆದ್ನಾಂ (೫.೯.೧೯೯೬) ಬಿಸ್ಪ್ ಲುವಿಸಾಕ್ ಮಂಗ್ಳುರ್ ದಿಯೆಸೆಜಿಚೊ ಆಡಳ್ತೆದಾರ್ ನೆಮ್ಲೊ ಆನಿ ೧೮ ದಶೆಂಬ್ರ್ ೧೯೯೬ ವೆರ್ ತಾಕಾ ಮಂಗ್ಳುರ್ ದಿಯೆಸೆಜಿಚೊ ಬಿಸ್ಪ್ ನೆಮ್ಲೊ ಆನಿ ೨೭ ದಶೆಂಬ್ರ್ ೧೯೯೬ ವೆರ್ ತಾಣೆ ಮಂಗ್ಳುರ್ಚ್ಯಾ ಬಿಸ್ಪಾಚಿ ಬಸ್ಕಾ ಸ್ವೀಕಾರ್ ಕೆಲಿ.
ಬಿಸ್ಪ್ ಜಾವ್ನ್ ಹುದ್ದೊ ಘೆತ್ಲ್ಲೆಂಚ್ ಬಿಸ್ಪ್ ಬಾಜಿಲಾನ್ ಸುರ್ವಾತುನ್ ಅರ್ದ್ಯಾರ್ ರಾವ್ಲ್ಲಿಂ ಸಭಾರ್ ಕಾಮಾಂ ತಾಣೆ ಪುರ್ತಿ ಕೆಲಿಂ ಮಾತ್ರ್ ನ್ಹಂಯ್ ದಿಯೆಸೆಜಿಂತ್ ನವೆಸಾಂವ್ ಹಾಡ್ಚಿಂ ಸಭಾರ್ ಕಾಮಾಂ ಹಾತಿಂ ಧರ್ಲಿಂ. ದಿಯೆಸೆಜಿಚೆಂ ಗೊವ್ಳಿಕ್ ಕೇಂದ್ರ್ ಸುವೆವಸ್ತಿತ್ ಕೆಲೆಂ. ಸಿಒಡಿಪಿಕ್ ಇನ್ಸ್ಟಿಟ್ಯೂಟ್ ಆಫ್ ಸೋಷಿಯಲ್ ಡೆವಲಪ್ಮೆಂಟ್ ಮ್ಹಣ್ಚೊ ವಿಭಾಗ್ ಕುಡ್ಸಿಲೊ ಆನಿ ರುಸೆಂಪ್ಕ್ ಆಧುನಿಕ್ ರೂಪ್ ದಿಲೆಂ. ೧೯೯೯ ಇಸ್ವೆಂತ್ ಫಾದರ್ ಮುಲ್ಲರ್ ಮೆಡಿಕಲ್ ಕೊಲೆಜ್ ಸುರ್ವಾತುನ್ ಸಮುದಾಯಾಚೆಂ ಲಾಂಬ್ಕಾಳಾಚೆಂ ಸೊಪಣ್ ಜಾರಿ ಕೆಲೆಂ ಮಾತ್ರ್ ನ್ಹಂಯ್ ಲೊಕಾಂಚ್ಯಾ ಭಲಾಯ್ಕೆ ಗರ್ಜೆಕ್ ಆಧುನಿಕ್ ವೆವಸ್ತಾ ಚಡಯ್ಲ್ಯೊ. ಸಾಂತ್ ಜುಜೆ ಇಂಜಿನಿಯರಿಂಗ್ ಕೊಲೆಜ್ ಸುರ್ವಾತುನ್ ಹಜಾರೋ ದುಬ್ಳ್ಯಾ ಕುಟ್ಮಾಂಚ್ಯಾ ಯುವಜಣಾಂಕ್ ಇಂಜಿನಿಯರಿಂಗ್ ಶಿಕ್ಪಾಕ್ ಯೇಂವ್ಕ್ ವಾಟ್ ಸೊಡಯ್ಲಿ. ದುಬ್ಳ್ಯಾ ವಿದ್ಯಾರ್ಥ್ಯಾಂಚ್ಯಾ ಉಂಚ್ಲ್ಯಾ ಶಿಕ್ಪಾ ಖಾತಿರ್ ಸಭಾರ್ ಇಸ್ಕೊಲಾಂ ಆನಿ ಕೊಲೆಜಿ ಸುರ್ವಾತುಂಕ್ ತಾಣೆ ಪ್ರೇರೇಪಣ್ ದಿಲೆಂ. ತಶೆಂಚ್ ಯುವಜಣಾಂಕ್ ಸರ್ಕಾರಿ ಉದ್ಯೋಗಾಂತೆವ್ಶಿಂ ಆಕರ್ಶಿತ್ ಕರ್ಚ್ಯಾಕ್ ಕೆರಿಯರ್ ಎಡ್ವಾನ್ಸ್ಮೆಂಟ್ ಸೆಲ್ಲ್ ರುಪಿತ್ ಕೆಲೆಂ. ಸಭಾರ್ ಸೆವೆಚಿಂ ಕಾರ್ಯಾ ಯೋಜನಾಂ ತಾಣೆ ಘಾಲ್ಲಿಂ. ಜಶೆಂ ಬಿಸ್ಪ್ ಬಾಜಿಲಾನ್ ಭಾವಾಡ್ತಾಚೆಂ ದೆಣೆಂ ಜಾವ್ನ್ ಬೀದರ್ ಮಿಸಾಂವ್ ಉಬೆಂ ಕೆಲೆಂ ತಶೆಂಚ್ ಸಾಮೆ (ಆಫ್ರಿಕಾ) ಮಿಸಾಂವ್ ವಾಡೊಂವ್ಚ್ಯಾಂತ್ ಗರ್ಜೆಚೆಂ ಕಾರ್ಯಯೋಜನ್ ತಾಣೆ ರುಪಿತ್ ಕೆಲೆಂ. ಉಡುಪಿ ದಿಯೆಸಎಜ್ ಸ್ವತಂತ್ರ್ ಜಾವ್ನ್ ವಾಡ್ಚ್ಯಾಕ್ ಜಾಯ್ಜಾಲ್ಲಿ ವೆವಸ್ತಾ ತಾಣೆ ಕೆಲ್ಲಿ.
ಲೊಕಾಂಚ್ಯಾ ಅತ್ಮಿಕ್ ಗರ್ಜೆಂಕ್ ಪರ್ನ್ಯಾಸೊಲ್ಲ್ಯಾ ಸಮೇತ್ ಸಗ್ಳೊ ಪವಿತ್ರ್ ಪುಸ್ತಕ್ ಕೊಂಕ್ಣೆಂತ್ ಲಾಭ್ಚೆಪರಿಂ ಕೆಲೆಂ. ಧಾರ್ಮಿಕ್ ಕೇಂದ್ರಾಂ, ಇಗರ್ಜೊ ದುರಸ್ತಿ ಆನಿ ನವ್ಯೊ ಕರುಂಕ್ ತಶೆಂಚ್ ಖಂಯ್ ಗರ್ಜ್ ಆಸಾತ್ ಥಂಯ್ ನವ್ಯೊ ಇಗರ್ಜೊ ಬಾಂದುಂಕ್ ಪಾಟಿಂಬೊ ದಿಲೊ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಕಾರ್ಯಾಳ್ ಕರ್ನ್ ಲೊಕಾಂಮಧೆಂ ಎಕ್ವಟ್ ವಾಡುಂಕ್ ತೊ ಪೆಚಾಡ್ಲೊ ಆನಿ ಫಿರ್ಗಜಾಂನಿ ವಾಡ್ಯಾವಾರ್ ಲಿತುರ್ಜೆಚೆಂ ಚಿಂತಪ್ ವಾಡಯ್ಲೆಂ. ಆಪ್ಲ್ಯಾ ಗೊವ್ಳಿಕ್ ಭೆಟೆಂವೆಳಿಂ ಕುಟ್ಮಾಂಚಿ ಭೆಟ್ ಕರ್ಚಿ ಆನಿ ಕುಟ್ಮಾಂಚ್ಯಾ ಎಕ್ವಟಾ ಖಾತಿರ್ ಪ್ರೇರೇಪಿತ್ ಕರ್ಚೆಂ ತಾಕಾ ವ್ಹಡ್ ಮಹತ್ವಾಚೆಂ ದಿಸ್ತಾಲೆಂ.
ಪ್ರಸ್ತುತ್ ಬಿಸ್ಪ್ ಲುವಿಸ್ ಪಾವ್ಲ್ ಸೋಜ್ ಆಪ್ಲ್ಯಾ ನಿವೃತ್ತೆ ಉಪ್ರಾಂತ್ ಸಾಂತ್ ಜುಜೆ ಸೆಮಿನರಿಂತ್ ನಿವೃತ್ತೆ ಜೀಣ್ ಸಾರ್ತಾ.
