ಸಿಜ್ಯೆಸ್ ಆನಿ ಹಾಂವ್ : ಥೊಡೆ ಉಡಾಸ್

ಹ್ಯಾಚ್ಚ್ 2022 ಇಸ್ವಿ ಮೇ ಅಟ್ಟಾವೀಸ್ ತಾರ್ಕೆಚ್ಯಾ ಸಕಾಳಿಂಚ್ಯಾ  … ವೊರಾರ್ ಕವಿ ಮೆಲ್ವಿನ್ ರೊಡ್ರಿಗಾಸಾಚೆಂ ಮ್ಹಾಕಾ ಫೊನ್ ಆಯ್ಲೆಂ.

“ರೋನ್ … ಸಿಜ್ಯೆಸ್ ಸೀರಿಯಸ್ ಆಸಾ!” ಕಾಳ್ಜಾಕ್ ಅನಿರೀಕ್ಶಿತ್  ಧಖೊ ದಿಂವ್ಚಿ ಹಿ ಖಬಾರ್ ಆಯ್ಕಾಲ್ಲ್ಯಾ ಥೊಡ್ಯಾಚ್ಚ್  ಮಿನುಟಾಂನಿಂ … ಪರತ್ ಮೆಲ್ವಿನಾಚೆಂ ಫೊನ್ ಯೆತಾಸ್ತಾಂ …

ಹಾಂವ್ ಡೊಲ್ಫಿ ಕಾಸ್ಸಿಯಾ ಸಂಗಿ ಮೊಬಾಯ್ಲಾರ್ … ಸಿಜ್ಯೆಸ್ ರಿಸ್ಕೆರ್ ಆಸ್ಲೆಲ್ಯಾ ವಿಶಿಂಚ್ಯಾ ಸಂವಾದೆರ್ ಆಸ್‌ಲ್ಲೊಂ. ತ್ಯಾಚ್ಚ್ ಘಡ್ಯೆ ಹಾಂವೆಂ ಸಂಪರ್ಕ್ ಸಂಪಯ್ಲೊ  ಆನಿ ಮೆಲ್ವಿನಾಕ್ ಪಾಟಿಂ ಫೊನ್ ಕೆಲೆಂ.

ತವಳ್ … ಆಯ್ಕೊಂಕ್ ನಾಕಾ ಆಸ್ಲೆಲಿ … ಸೊಸುಂಕ್ ಅಸಾಧ್ಯ್ ಜಾಲ್ಲಿ ಖಬಾರ್ ಮ್ಹಜ್ಯಾ ಕಾನಾಂಕ್ ಆಪ್ಟಾಲಿ.

“ರೋನ್…ಸಿಜ್ಯೆಸ್ ಅಂತರ್ಲೊ!”

ಖಿಣಾನ್ ಹಿ ಖಬರ್ ಕಾಳ್ಜಾಕ್ ಧಖೊ ದಿತಾಸ್ತಾಂ … ಮ್ಹಜ್ಯಾ ಹಾತಿಂತ್ಲೆಂ ಮೊಬಾಯ್ಲ್ ನಿಯಂತ್ರಣಾವಿನ್ಹಾ  ಸವ್ಕಾಸ್ ಮೆಜಾರ್ ಗಳ್ಳೆಂ!

ಮ್ಹಜೊ ಈಶ್ಟ್, ಸಾಂಗಾತಿ … ಲೇಖಕ್ ಮಿತ್ರ್ … ಸಿಜ್ಯೆಸ್ … ಆನಿ ಮ್ಹಾಕಾ ‘ಸಾಸ್ಣಾಕ್ ನಾಂ ಜಾಲೊ!’

ಯೆದೊಳ್ ಕೆನ್ನಾಂ ಕೆನ್ನಾಂ … ಥಂಯ್ ಹಾಂಗಾ … ರೋಸ್ ಕಾಜ್ರಾ ಮಾಟ್ವಾಂನಿ … ಲೇಖಕ್ ಸಮ್ಮೇಳ್ ಕಾರ್ಯಾಂನಿ … ಸಂಘಟನ್ ಮೀಟಿಂಗಾನಿಂ ಮ್ಹಾಕಾ ತೋ ಮೆಳಾತ್ತ್ ಆಸ್ಲೊಲೊ … ಮ್ಹಾಕಾ ಸಾಂಗಾತ್ ದೀವ್ನ್ ಆಸ್ಲೊಲೊ …

ಸಿಜ್ಯೆಸ್ … ಹ್ಯಾ ಮುಕಾರ್ ಮ್ಹಾಕಾ ನಾಂಚ್ಚ್ ನಾಂ ಜಾಲೊ!

♦ ♦ ♦

ಮ್ಹಜ್ಯಾ ಉಗ್ಡಾಸಾ ಪರ್ಮಾಣೆಂ ಕೊರೊನಾಚ್ಯಾ ಥೊಡ್ಯಾ ತೆಂಪಾ ಆದಿಂ ಥಾವ್ನ್ ಬಹುಶ್ಹ 2019 ಅಗೊಸ್ತ್ ಸಪ್ಟೆಂಬರ್ ಥಾವ್ನ್ ಆಮಿಂ ದೊಗೀ ಖಾಸ್ಗೆನ್ ಭೆಟುಂಕ್ನಾಂವ್.  ಪೂಣ್ ತ್ಯಾ ಆದಿಂ … ತಾಚೆಂ ಘರ್ ದುರುಸ್ತ್ ಜಾವ್ನ್ ಆಸ್ತಾಂ …

ತೊ ಮ್ಹಜ್ಯಾ ಲಾಗಿಂ ತವಳ್ ತವಳ್ ಮ್ಹಜ್ಯಾ ವಳ್ಕಿಚ್ಯಾ ಎಲೆಕ್ಟ್ರಿಶನ್, ಪ್ಲಂಬರಾಂಕ್, ಕಾರ್ಪೆಂಟರಾಂಕ್ ತಾಚ್ಯಾ ಕಾಮಾಕ್ ಧಾಡುಂಕ್ ವಿನಂತಿ ಕರುನ್ ಆಸ್‌ಲ್ಲೊ. ಆನಿಂ ಹಾಂವ್ ಧಾಡ್ತಾಲೊಂ.

ಹ್ಯಾ ವೆಳಾ ಮ್ಹಾಕಾ ಕಳಿತ್ ಜಾಲ್ಲೆ ಪರ್ಮಾಣೆಂ ತ್ಯಾ ವೆಳಾ … ತಾಚೊ ಪೆಂಯ್ಟಿಂಗ್ ಕಾಂಟ್ರಾಕ್ಟರ್ … ಗಾಯಕ್ ಬಜ್ಜೋಡಿಚೊ ಜೆರಿ ಡಿಸೋಜಾ ಜಾವ್ನ್ ಆಸ್‌ಲ್ಲೊ. ತಾಣೆಂ ಸಿಜ್ಯೆಸಾಚ್ಯಾ ಘರ‍್ಚೆಂ  ಪೆಂಯ್ಟಿಂಗ್ ಕಾಮ್ ಸಂಪೊನ್ ದೋನ್ ತೀನ್ ದಿಸಾಂನಿಂಚ್  3 ಸಪ್ಟೆಂಬರ್  2019 ವೆರ್…

ಜೆರಿ …  ಬಿಜೈ ಸ್ಟೇಜಿರ್ ಗಾವ್ನ್ ಆಸ್ತಾಂ ಆಸ್ತಾಂಚ್ ಅಚಾನಕ್ ಜಾವ್ನ್  ಪಡ್ಲೊ  ಆನಿ ತಾಣೆ ನಿಮಾಣೊ ಸ್ವಾಸ್ ಸೊಡ್ಲೊ!

ಹಿ ಅನಿರೀತಕ್ಶಿತ್ ಮರ್ಣಾ ದಖೊ ದಿಂವ್ಚಿ ಗಜಾಲ್ ಆಯ್ಕಾತಾಂ … ಹೆಂಚ್ಚ್ ಮರಣ್ … ಸುಮಾರ್ ದೇಡ್ ವರ್ಸಾ ನಂತರ್ ಆಪ್ಲ್ಯಾ ಜಿವಿತಾ ವಾಟೆರ್‌ಯೀ ಮೇಟ್ ಘಾಲ್ತೆಲೆಂ ಮ್ಹಣ್ … ಸಿಜ್ಯೆಸ್ ನೆಣಾಂ ಆಸ್‌ಲ್ಲೊ!

25ವ್ಯಾ ಫೆಬ್ರೆರ್ 2021 ಚ್ಯಾ ದಿಸಾ ಸಿಜ್ಯೆಸ್, ತಾಕಾ ಆಪ್ಣಾಂವ್ಕ್ ಸಖಾನಾತ್ಲೆಲ್ಯಾ ಪಿಡೆಕ್ ಸಾಂಪಡ್ಲೊ. ಆನಿ ತ್ಯಾ ನಂತರ್ ತೊ ಪರ್ದ್ಯಾ ಪಾಟ್ಲ್ಯಾನ್ ಲಿಪ್ಲೊ ಆನಿ ಥಂಯ್ಚ್ ಉರ್ಲೊ.

ಪೂಣ್ ಹೆಂ ಮಾಕಾ ಕಳಿತ್‌ಚ್ಚ್ ನಾತ್‌ಲ್ಲೆಂ. 2022 ತಾಣೆಂ ಮ್ಹಾಕಾ ನವ್ಯಾ ವರ್ಸಾಚೆ ಶುಭಾಶಯ್ ಪಾಟಯಿಲ್ಲೆ. ಹಿಚ್ಚ್ ಮ್ಹಜಿ ಆನಿ ತಾಚಿ ನಿಮಾಣಿ ಗಾಂಚ್ ಜಾಂವ್ಕ್ ಪಾವ್ಲಿ!

♦ ♦ ♦

ಸಿಜ್ಯೆಸ್ ಮ್ಹಾಕಾ ಪ್ರಪ್ರಥಮ್ ಪಾವ್ಚಿಂ ಭೆಟ್‌ಲ್ಲೊ ಸುಮಾರ್ ಪನ್ನಾಸ್ ವರ್ಸಾಂ ಆದಿಂ. ತ್ಯಾ ವೆಳಾ … ಹಾಂವೆ ಮ್ಹಜ್ಯಾ ದೋನ್ ತೀನ್ ಸಾಂಕಳ್ ಕಾಣ್ಯೆ ಮುಖಾಂತರ್ … ಕೊಂಕ್ಣಿ ಸಾಹಿತ್ಯ್  ವರ್ತುಲಾಕ್ ಮೇಟ್ ದವರ್ಲೆಂಲೆಂ ಮಾತ್ರ್. ತ್ಯಾವೆಳಾ …

ಥೊಡೆ ಲೇಖಕ್ ತಶೆಂ ಮ್ಹಜೆ ಅಭಿಮಾನಿ ಮ್ಹಾಕಾ ಮೆಳೊಂಕ್ ಮ್ಹಜ್ಯಾ ಡಿಪ್ಯಾಕ್ ಭೆಟ್ ದೀವ್ನ್ ಆಸ್‌ಲ್ಲೆ. ತ್ಯಾ ಪೈಕಿ ಪ್ರಮುಖ್ ಸಿಜ್ಯೆಸ್ ಆನಿ ಆಸ್ಟಿನ್ ಡಿಸೋಜಾ ಪ್ರಭು ಜಾವ್ನ್ ಆಸ್‌ಲ್ಲೆ.

“ರೋನ್ ಹಾಂವ್ ಸಿಜ್ಯೆಸ್ … ಸಿಜ್ಯೆಸ್ ತಾಕೊಡೆ” ಮ್ಹಳೆಂ ತಾಣೆಂ ಪಯಿಲ್ಲ್ಯಾನ್ ಪಯ್ಲೆಂ ಮ್ಹಾಕಾ ಭೆಟ್ ದೀವ್ನ್ ವಳ್ಕೆಚೊ ಹಾತ್ ಮೆಳೈಲ್ಲ್ಯಾ ಸಂಧರ್ಭಿಂ. ತೆಂ ಕೆನ್ನಾಂ … ಖಂಯ್ಚ್ಯಾ ಇಸ್ವೆಂತ್ ಆತಾಂ ಮ್ಹಾಕಾ ಉಗ್ಡಾಸಾಂತ್ ನಾಂ. ಪೂಣ್ …

1974 ಜುಲಾಯ್ ಮಯ್ನ್ಯಾಂತ್ ಮ್ಹಜಿ ‘ಇಂಟರ್ ವ್ಯೂ’ ಘೆಂವ್ಕ್ ತೊ ಆಯಿಲ್ಲೊ. ತೆಂ ಮ್ಹಾಕಾ ರುಜ್ವಾತೆ ಸಂಗಿ ಆತಾಂಯ್ ಉಗ್ಡಾಸಾಂತ್ ಆಸಾ.

ತ್ಯಾ ದೀಸ್ ಕಾಣಿಕ್ ಪತ್ರಾಂತ್ ಫಾಯ್ಸ್ ಕರುಂಕ್ ಮ್ಹಜಿ ಇಂಟರ್ ವ್ಯೂ  ಘೆಂವ್ಕ್ ತೊ ಆಯಿಲ್ಲೊ. ಆನಿ ತಿ ಇಂಟರ್ ವ್ಯೂ ಉಪ್ರಾಂತ್ 1974 ಅಗೋಸ್ತಾಚ್ಯಾ ಕಾಣಿಕ್ ಪತ್ರಾರ್ ಪರ್ಗಟ್ ಜಾಲ್ಲಿ.

ತ್ಯಾಚ್ಚ್ ಪರ್ಮಾಣೆಂ … 1975 ಇಸ್ವೆಂತ್ ಕಥೊಲಿಕ್ ಯುವಜಣ್ ಸಂಚಾಲನಾಚ್ಯಾ ವಾರ್ಶಿಕ್ ಸಹಮಿಲನ್ ಸಂಧರ್ಭಿಂ … ಕಥೊಲಿಕ್ ಯುವ ನೆಕೆತ್ರಾಂಕ್ ಸನ್ಮಾನ್ ಕರುಂಕ್ ಸಂಚಾಲನಾಚ್ಯಾಂನಿ ಯೆವ್ಜಿಲ್ಲೆಂ.

ಹ್ಯಾ ಕಾರ್ಯಕ್ರಮಾ ವೆಳಾ … ಯುವಜಣಾಂಚಿ ಪ್ರತಿಭಾ ತಶೆಂ ಅಂಕ್ರೆಲ್ಲಿ ದೆಣಿಂ ರುತಾ ಕರುಂಕ್ ಆನಿ ತಾಂಕಾ ಉತ್ತೇಜನ್ ದೀಂವ್ಕ್ ಹೆಂ ಸನ್ಮಾನ್ ಕಾರ್ಯೆಂ ಆಸಾ ಕೆಲ್ಲೆಂ.

ಹ್ಯಾ ಕಾರ್ಯಕ್ರಮಾ ವೆಳಾ  … ಮ್ಹಜೆ ಸವೆಂ ಆನಿ ತೇಗ್ ಯುವ ತಾಲೆಂತ್ವಂತಾಂಕ್ ಸನ್ಮಾನ್ ಕೆಲ್ಲೊ. ಶಿಕ್ಪಾ ರಂಗಾಂತ್ ಕು. ಜೆನೆವಿವ್ ಮೆಂಡೊನ್ಸಾ, ಖೆಳಾ ರಂಗಾಂತ್ ಆರ್ಥರ್ ಡಿಸೋಜಾ, ಸಮಾಜ್ ಸೇವಾ ಕ್ಶೇತ್ರಾಂತ್ ವಕೀಲ್ ಶಿರ್ತಾಡಿ ವಿಲಿಯಂ ಪಿಂಟೊ ಆನಿ ಲೇಖನ್ ರಂಗಾಂತ್ ಮ್ಹಾಕಾ (ರೋನ್ ರೋಚ್ ಕಾಸ್ಸಿಯಾ)  ಸನ್ಮಾನ್ ಕೆಲ್ಲೊ.

ಹ್ಯಾ ಕಾರ್ಯಾವೆಳಿಂ ಆಸ್ಟಿನ್, ಸಿಜ್ಯೆಸ್, ಫಾ|ವಿಲ್ಯಮ್ ಗೊನ್ಸಾಲ್ವಿಸ್, ಫಾ| ಮಾರ್ಕ್ ವಾಲ್ಡರ್ ಹಾಜರ್ ಆಸ್‌ಲ್ಲೆ.

ಹ್ಯಾ ಕಾರ್ಯಾಚೊ ಕಾರ್ಯ ನಿರ್ವಾಹಕ್ ಸಿಜ್ಯೆಸ್ ಆನಿಂ ವರ್ದಿಯೀ ಸಿಜ್ಯೆಸಾನ್ ತಯಾರ್ ಕೆಲ್ಲಿ.

ಅಸಲ್ಯಾ ಸರ್ವ್ ಘಡಿತಾಂ ದ್ವಾರಿಂ ಆಮ್ಚೆಂ ಸಾಂಗತ್ಪಣ್, ಆಮ್ಚಿ ಇಶ್ಟಾಗತ್ … ಸಳಾವಳ್ ಬರಿಚ್ಚ್ ವಾಡೊನ್ ಗೆಲಿ. ಆನಿ ಉಪ್ರಾಂತ್ ತಿ ಸಳಾವಳ್ ಬರಿಚ್ಚ್ ದಾಟ್ ಜಾಲಿ.

ತಶೆಂ ಮ್ಹಣ್ ಆಮಿಂ ಸರ್ವ್ ವಿಶಯಾಂನಿಂ ಎಕಾ ಮನಾಚೆ ಜಾವ್ನ್ ನಾತ್‌ಲ್ಲ್ಯಾಂವ್. ಆಮ್ಚೆ ಮಧೆಂ ವಾದ್  – ವಿವಾದ್, ಚರ್ಚಾ ಜಾತೇ ಆಸ್ತಾಲಿ.  ಪೂಣ್ ಮನಸ್ಥಾಪ್ ಕೆದಿಂಚ್ಚ್ ಉದೆಲ್ಲೊ ನಾ. ಆಮ್ಚ್ಯಾ ಸಾಂಗಾತ್ಪಣಾಕ್ ಕೆದಿಂಚ್ಚ್ ಕುರಾಡ್ ಪಡ್‌ಲ್ಲಿಯೀ ನಾಂ.

ಪೂಣ್ ಸಾಹಿತ್ಯ್ ಸಂಘಟನ್… ಲೇಖನಾಂ … ಕಾಣ್ಯೊ … ಅಸಲ್ಯಾ ವಿಶಿಂ ಆಮ್ಚೆಂ ಮಧೆಂ ತವಳ್ ತವಳ್ ವಾದ್ – ವಿವಾದ್,  ಚರ್ಚಾ ಜಾತೇ ಆಸ್ತಾಲಿ. ತರೀ ಖಂಯ್ ತರೀ ಆಮಿಂ ಭೆಟ್ಲೆಲ್ಯಾ ವೆಳಾ ಆಮ್ಚೆಂ ಸಾಂಗಾತ್ಪಣ್ ಆಸ್ತಾಲೆಂಚ್ಚ್.

ಅಶೆಂ ತೊ ಏಕ್ ವೇಳ್ ಆಸ್‌ಲ್ಲೊ … ಕೊಂಕಣಿ ಲೇಖಕಾಂಚೊಂ ಎಕ್ವಟ್ ಸಂಘಾವಿಶಿಂ ಸಬಾರ್ ಕೊಂಕ್ಣಿಂ ಲೇಖಕಾಂ ಮಧೆಂ ದೋನ್ ತೀನ್ ವಾಂಟೆ ಫಾಂಟೆ ಜಾವ್ನ್ ಮನಸ್ಥಾಪ್ ಉದೆಲ್ಲೊ. ಅಸಲ್ಯಾ ವೆಳಾ ತಾಂತಾಂಚ್ಯಾಂ ಸಮರ್ಥನೆ ಖಾತಿರ್ ಖಾಸ್ಗೆನ್ ತಶೆಂ ಫೊನಾರ್ ವಾದ್ ವಿವಾದ್ ಚಲ್ತೇ ಆಸ್‌ಲ್ಲೊ.

ಅಸಲ್ಯಾ ಕಾಳಾರ್ . . .  ತ್ಯಾಎಕಾ ದಿಸಾ ಬೊಂಬಯ್ ಥಾವ್ನ್ ಅಸ್ವಸ್ತ್ ಜಾವ್ನ್ ಮಂಗ್ಳುರಾಕ್ ಆಯಿಲ್ಲೊ ಎಕ್ ಲೇಖಕ್ ಹಾಂಗಾಸರ್ ಸರ್ಲೊ. ಸರ್ಲೆಲ್ಯಾ ಲೇಖಾಕಾಕ್ ಮಾತ್ಯೆಕ್ ಪಾವೊನ್ ಪಾಟಿಂ ಯೆತಾಸ್ತಾಂ ಹಾಂವ್ ಆನಿ ಸಿಜ್ಯೆಸ್ ಸಾಂಗಾತಾ ಮೆಟಾಂ ಘಾಲಿತ್ತ್ ಆಸ್‌ಲ್ಲ್ಯಾಂವ್.

ತ್ಯಾ ವೆಳಾ ಹರ್ಶೆಂಚ್ಯಾ ಪರಿಂ … ತ್ಯಾ ದೀಸ್‌ಯೀ ಆಮ್ಚೆ ಮಧೆಂ ಸಾಹಿತ್ಯ್ – ಸಂಘಟನಾ ವಿಶ್ಯಾಂತ್ ವಿಚಾರ್ ಉದೆಲೆ. ಆನಿ ಉಲೈತ್ತ್ ಉಲೈತ್ತ್ .. .ಕೊಂಕ್ಣಿ ಎಕ್ವಟ್ ಸಂಘಟನಾವಿಶಿಂಚ್ಯಾ ವಿಶಯಾಚೆರ್ ವೊಚುನ್ ಪಾವ್ಲ್ಯಾಂವ್.

ತವಳ್ ಆಮ್ಚೆ ಮಧೆಂ ಪರತ್ ಬರಿಚ್ ಚರ್ಚಾ ಆನಿ ವಾದ್ ಚಲ್ಲೊ. ತೊ ತಾಚಿ ಆನಿ ಹಾಂವ್ ಮ್ಹಜಿ ಅಭಿಪ್ರಾಯ್ ಸಾಂಗೊನ್, ಸಮರ್ಥನ್ ಕರಿತ್ತ್ ಗೆಲ್ಯಾಂವ್.   ಹಿ ಜಾವ್ನಾಸ್‌ಲ್ಲಿ  ಆಮ್ಚ್ಯಾ  ಸಳಾವಳೆಂತ್ಲಿ ಗಜಾಲ್.

ಅಶೆಂಚ್, ಎಕಾ ಕೊಂಕ್ಣಿ ಸಮಾವೇಶಾ ವೆಳಾ … ಲ್ಯಾನ್ಸಿ ಪಿಂಟೊ ನಾಯಕ್ ಆನಿ ಸಿಜ್ಯೆಸ್ … ಹಾಂವ್ ಆಸ್ಲೆಲೆ ಥಂಯ್ ಆಯ್ಲೆ. ಆನಿಂ  ‘ಆಮಿ ಏಕ್ ಮಾಲ್ಘಡ್ಯಾಂ ಲೇಖಕಾಂಚೆಂ ಸಂಘಟನ್ ಬಾಂದ್ಯಾಂಗೀ?’ ಮ್ಹಣ್ ವಿಚಾರಿಲಾಗ್ಲೆ.

ತವಳ್ ಹಾಂವೆ ಸಂಘಟನ್ ಕರ್ಚ್ಯಾಕ್ ಶೀದಾ ಮ್ಹಜಿ ನಾಂ ಖುಶಿ ದಾಕೈಲಿ.

ತೆನ್ನಾಂ ತಾಣಿಂ ದೊಗಾಂಯ್ನೀ … ಸಂಘಟನ್ ಮ್ಹಳ್ಯಾರ್ ವ್ಹಡ್ ಮಟ್ಟಾರ್ ನ್ಹಂಯ್. ಆಮಿಂ ಥೊಡೆಚ್ಚ್ ಮ್ಹಳ್ಯಾರ್ ಸ –  ಸಾತ್ ಜಣಾಂನಿ ತವಳ್ ತವಳ್ ಸಾಂಗಾತಾ ಭೆಟ್ಚೆಂ. ಆನಿ ಸಾಹಿತ್ಯ್ ತಶೆಂ ಹೆರ್ ಸಂಗ್ತಿ ಉಲವ್ನ್ ವೇಳ್ ಪಾಶಾರ್ ಕರ್ಚೊ. ಹ್ಯಾ ತಾಂಚ್ಯಾ ಅಭಿಪ್ರಾಯೆಕ್ ಹಾಂವ್ ಒಪ್ಲೊಂ. ಆನಿ ಆಮ್ಕಾ ಆಮ್ಚ್ಯಾ ಮನಾ ಸಾರ್ಕ್ಯಾಚೆ ಕೋಣ್ ಜಾಯ್ತ್ ಮ್ಹಣ್ ವಿಂಚುಂಕ್ ಆಮಿಂ ಪಯಿಲ್ಲೆ ಪಾವ್ಟಿಂ ವಾಲೆನ್ಶಿಯಾ ಪಾರ್ಕಾಂತ್ ಮೆಳ್ಯಾಂ ಮ್ಙಣ್ ಸಿಜ್ಯೆಸಾನ್ ಉಚಾರ್ಲೆಂ.

ಪೂಣ್ ಥೊಡ್ಯಾಚ್ಚ್ ತೆಂಪಾನ್ ಲ್ಯಾನ್ಸಿ ಪಿಂಟೊ ನಾಯಕ್ ಅಚಾನಕ್ ದೆವಾಧೀನ್ ಜಾಲೊ. ಆನಿ ಆಮ್ಚಿ ಆಶಾ ನಿರ್ಫಳ್ ಜಾವ್ನ್ ಗೆಲಿ.

ಸಿಜ್ಯೆಸಾಚ್ಯಾ ಅಂತಿಮ್ ದರ್ಶನಾಕ್ ತ್ಯಾಚ್ಚ್ ವಾಲೆನ್ಶಿಯಾ ಪಾರ್ಕಾ ದೆಗೆಂತ್ಲ್ಯಾನ್ ಹಾಂವ್ ಪಾಶಾರ್ ಜಾವ್ನ್ ವೆತಾಸ್ತಾಂ … ಹಿ ಯಾದ್ ಪರತ್ ಮ್ಹಾಕಾ ಧೊಸುಂಕ್ ಲಾಗ್ಲಿ.

ತಾಚ್ಯಾ ಮರಣಾಕ್ ಹಾಜರ್ ಜಾಲ್ಲ್ಯಾ ವೆಳಾ ಮ್ಹಜ್ಯಾ ಸವಯೆ ಪರ್ಮಾಣೆಂ ಹಾಂವ್ ನಿಮಾಣ್ಯಾ ಬಾಂಕಾಂ ಪೈಕಿ ಎಕಾ ಬಾಂಕಾರ್ ಬಸೊನ್ ಆಸ್‌ಲ್ಲೊಂ. ಸಿಜ್ಯೆಸ್‌ಯೀ ಕೊಣಾಯ್ಚಾಯೀ ಮರಣಾಕ್ ತೊ ಹಾಜರ್ ಜಾಲ್ಲ್ಯಾ ವೆಳಾ ಅಶೆಂಚ್ ನಿಮಾಣ್ಯಾ ಬಾಂಕಾಂನಿಂಚ್ಚ್  ಬಸ್ತಾಲೊ ಆನಿ ಮ್ಹಾಕಾ ಮೆಳ್ತಾಲೊ.

ಮಿಸಾವೆಳಾ ಶೆರ್ಮಾಂವಾರ್ ಯಾಜಕಾನ್ ಮ್ಹಳೆಂ … ‘ಹಾಸ್ಯಾಂಚೊ ಸಿಜ್ಯೆಸ್ ಆಜ್ ಹಾಸ್ಚ್ಯಾ ರಾಜಾಕ್ ಗೆಲೊ.’

ಹೆಂ ಆಯ್ಕಾತಾನಾಂ 1984 ಇಸ್ವೆಂತ್ ರಾಕ್ಣ್ಯಾರ್ ತಾಣೆಂ ಬರಯಿಲ್ಲಿ ತವಳ್ಚಿ ಪ್ರಧಾನಿ ಇಂದಿರಾಚಿ ಲದಿನ್ ಮ್ಹಜ್ಯಾ ಮತಿಕ್ ಆಯ್ಲಿ. ಆನಿ ತಾಚ್ಯಾ ಮರಣಾಕ್ ಹಾಂವ್ ಹಾಜರ್ ಆಸ್‌ಲ್ಲೊಂ ತರೀ .. .ತ್ಯಾ ವೆಳಾಯೀ ಸಿಜ್ಯೆಸಾನ್ ಆಪ್ಣಾಚ್ಯಾ ತ್ಯಾ ಲದಿನೆ ಮುಖಾಂತ್ರ್ ಮ್ಹಾಕಾ ಮತಿಂತ್‌ಚ್ಚ್ ಹಾಸೊಂಕ್ ಕೆಲೆಂ.

ನಿಮಾಣೆಂ ಸಿಜ್ಯೆಸಾವಿಶಿಂ ಸಾಂಗ್ಚೆ ತರ್ … ಸಿಜ್ಯೆಸ್ ದಾಕ್ಶೆಣ್ ನಾಸ್ತಾಂ … ಲಾಯಿಕಾಂಕ್ ತಶೆಂ ಧಾರ್ಮಿಕಾಂಕ್ ಸೈತ್ ಆಪ್ಲ್ಯಾ ಖಡಕ್ಕ್ ಉತ್ರಾಂನಿ ದಾಗ್ ದಿಂವ್ಚೊ ವೆಕ್ತಿ. ಕಿತೆಂ ತಾಕಾ ಸಾರ್ಕೆಂ ನ್ಹಂಯ್ ಮ್ಹಣ್ ದಿಸ್ತಾ ತೆಂ … ಹಾಸ್ಯ್ ರುಪಾರ್‌ಚ್ ಚಿಮ್ಟೆ ದೀವ್ನ್ ಆಪ್ಲಿ ನಾಖುಶಿ ತೋ ದಾಕಯ್ತಾಲೊ.

ಅಸಲ್ಯಾ ಅಪ್ರೂಪ್ ವೆಕ್ತಿತ್ವಾಚ್ಯಾ ಸಿಜ್ಯೆಸಾಚಿ ಮರ್ಣಾ ರೀತ್ … ತಾಚೆ ನಿಮಾಣೆ ಆಶೆ ಪರ್ಮಾಣೆಂ ಜ್ಯಾರಿ ಕೆಲಿ. ಅಸಲ್ಯಾ ತಾಚ್ಯಾ ಮರಣಾ ರಿತಿಂತ್ … ಪಳೆತೆಲ್ಯಾಂಚ್ಯಾ ಕಾಳ್ಜಾಂತ್ ದುಖಾ ಉಜೊ ಜಳೊನ್ ಆಸ್ತಾ ಆಸ್ತಾನಾಂಚ್ಚ್ … ಥೊಡ್ಯಾಚ್ಚ್ ಥೊಡ್ಯಾ ಸೆಕುಂದಾನಿಂ… ಸಿಜ್ಯೆಸ್ ಆಮ್ಚ್ಯಾ ಮದ್ಲೊ ನಾಂ ಜಾಲೊ!

ಸುಮಾರ್ ದೇಡ್ ವರ್ಸ್ ಪರ್ಯಾಂತ್ ಮಾರೆಕಾರ್ ಪಿಡೆ ನಿಮ್ತಿಂ ಆಪ್ಲ್ಯಾ ಮರಣಾ ವಾಟೆರ್ ಆಸ್ತಾಂ … ಕೊಣಾಕ್‌ಚ್ಚ್ ಕಳುಂಕ್ ನೊಜೊ ಮ್ಹಣ್ ತೊ ಆಶೆಲ್ಲೊ!  ಹ್ಯಾ ವಿಶಿಂ … ‘ತಾಣೆಂ ಅಶೆಂ ಕಿತ್ಯಾಕ್ ಕೆಲೆಂ?!. ಆಮಿಂ ಸಗ್ಳೆ ತಾಚ್ಯಾ ವಿಶಿಂ ಮಾಗ್ತೆ ಆಸ್‌ಲ್ಲ್ಯಾಂವ್ ನ್ಹಂಹಿ?’ ಮ್ಹಣ್ ಮ್ಹಾಕಾ ಎಕ್ಲ್ಯಾಚೆಂ ಫೋನ್ ಆಯಿಲ್ಲೆಂ.

ಪೂಣ್ ಮ್ಹಜ್ಯಾ ಮತಿಂ ಹೆಂ ಕಾಂತಾಯ್ತಾಲೆಂ ಕೀ …‘ಆವ್ಕ್ ಆನಿ ಮಾಗ್ಣೆಂ ಎಕಾಮೆಕಾ ಶರಣಾಗತ್ ಜಾಯ್ನಾಂತ್!’ ಆವ್ಕ್ ಮಾಗ್ಣ್ಯಾಕ್ ತಕ್ಲಿ ಬಾಗಯ್ನಾಂ. ಮಾಗ್ಣೆಂ ಆವ್ಕಾಕ್ ವಾಡಾಯ್ನಾಂ. ಹಿ ದೆವಾಚಿ ಮಾಂಡಾವಳ್. ಮನ್ಶಾಕ್ ಫಕತ್ ಏಕ್ ಉತ್ರೊಣ್.

ಜೆಜುಚ್ಯಾ ಸ್ವರ್ಗಾ ರೋಹಣ್ ಫೆಸ್ತಾಚ್ಯಾ ಭಾಗಿ ದಿಸಾ … ಸಿಜ್ಯೆಸ್ ಮರ್ಣಾಕ್ ಶರಣಾಗತ್ ಜಾಲೊ. ಆನಿ ಆವ್ಕಾಕ್ ತಕ್ಲಿ ಬಾಗಯ್ಲಾಗ್ಲೊ. ಆನಿ ಆಮ್ಕಾಂ ಸಾಸ್ಣಾಕ್ ನಾಂ ಜಾಲೊ! ತರೀ, ತಾಚ್ಯಾ ನಮುನ್ಯಾವಾರ್ ಸಾಹಿತ್ಯಾದ್ವಾರಿಂ … ಸಾಹಿತ್ಯ್ ಸಂಸಾರಾಂತ್ ತಶೆಂ ಸಮಾಜೆಂತ್ ತೊ ಅಮರ್ ಜಾವ್ನ್ ಆಸ್ತೊಲೊ! ಆನಿ ಆಮ್ಚ್ಯಾ ಕಾಳ್ಜಾಂನಿಂ ಸಾಸ್ಣಾಕ್ ಜಿಯೆತಾಲೊ.

►  ರೋನ್ ರೋಚ್ ಕಾಸ್ಸಿಯಾ