spot_imgspot_img
spot_img

ಮರ್ಣಾಕ್ ಆನಿ ಮನ್ಶ್ಯಾಕ್ ಗವ್ರವ್ ದಿಯಾ.

CVCLMNನ್ಶಾಜಿವಿತಾಂತ್ ‘ಮರಣ್’ ಏಕ್ ಮಾತ್ ಸತ್. ಸತಾನ್ ಸೊಡ್ವಣ್ ದಿತಾಂವ್ ಮ್ಹಣ್ ಭಾಸಾಂವ್ಚಿಂ ಸಂಸಾರಾಂತ್ಲಿಂ ಹರ್ ಧರ್ಮಾಂ, ಕ್ರೀಸ್ತಾಂವ್ಪಣಾಕ್ ಧರುನ್, ಮರಣ್ ಮ್ಹಳ್ಳ್ಯಾ ಸತಾಚೆರ್ ಬಾಂದುನ್ ಹಾಡ್ಲ್ಯಾಂತ್. ಮರಣ್ ಮನ್ಶ್ಯಾಕ್ ಸುಟ್ಕಾ ದಿತಾ ಮಾತ್ ನಯ್ ಸತಾ ಸಾಂಗಾತಾ ಎಕ್ವಟಾಯ್ತಾ ಮ್ಹಣ್ ಚಡಾವತ್ ಧರ್ಮಾಂಚೆಂ ಪಾತ್ಯೆತಾತ್.  ಹ್ಯಾ ಸತಾಕ್ ಕೋಣ್ ಸರ್ಗಿಂಚೆಂ ರಾಜ್ ಮ್ಹಣ್ತಾತ್, ಕೋಣ್ ಜನ್ನತ್ ಮ್ಹಣ್ತಾತ್ ಆನಿ ಕೋಣ್ ವೈಕುಂಟ್!

ಜಶೆಂ ಧರ್ಮ್ ಮನ್ಶ್ಯಾಚಿ ಖಾಸ್ಕಿ ಗಜಾಲ್ ತಶೆಂ ಮರಣ್‌ಯೀ ಮನ್ಶ್ಯಾಚಿ ಖಾಸ್ಕಿ ಗಜಾಲ್. ಮನ್ಶ್ಯಾಚೊ ಹ್ಯೊ ಖಾಸ್ಕಿ ಗಜಾಲಿ ಖಾಸ್ಕಿಚ್ ಜಾವ್ನ್   ಉರ್ಲ್ಯಾರ್ ಸಮಾಜಿಕ್ ಭಲಾಯ್ಕೆಕ್ ಬರೆಂ. ಖಾಸ್ಕಿ ಜಾವ್ನ್ ಆಸಜೆ ಜಾಲ್ಲೆಂ ಧರ್ಮ್ ಎಕಾಹಂತಾ ಬಾಯ್ರ್ ಸರ್ವಜಣಿಕ್ ಥಳಾಕ್ ಆಯ್ಲ್ಯಾರ್,  ಜಿಂ ಅನಾಹುತಾಂ ಘಡ್ಟಾತ್, ತಸಲಿಂಚ್ ಅನಾಹುತಾಂ ಖಾಸ್ಕಿ ಜಾವ್ನ್ ಉರಜೆ ಜಾಲ್ಲೆಂ ಮನ್ಶ್ಯಾಚೆಂ ಮರಣ್ ಎಕಾ ಹಂತಾಬಾಯ್ರ್ ಸರ್ವಜಣಿಕ್ ಥಳಾಕ್ ಹಾಡ್ಲ್ಯಾರೀ ಜಾತಾತ್. ಮರಣ್ ಪಾವ್‌ಲ್ಲ್ಯಾಚಾ ಕುಟ್ಮಾಚ್ಯಾಂಕ್, ಮೊಗಾಚ್ಯಾಂಕ್ ಧೊಶಿ ಜಾತಾತ್. ಪುನೀತ್ ರಾಜ್‌ಕುಮಾರಾಚ್ಯಾ ಮರ್ಣಾ ಉಪ್ರಾಂತ್ ಕುಟ್ಮಾಚ್ಯಾಂಕ್ ಆನಿ ಮೊಗಾಚ್ಯಾಂಕ್ ಜಾಲ್ಲ್ಯೊ ಧೊಶಿ ಹಾಂಗಾ ಉಡಾಸ್ ಕರ‍್ಯೆತ್.

ಮರಣ್ ಪಾವ್‌ಲ್ಲ್ಯಾ ವೆಕ್ತಿಕ್ ಮುಕಾರ್ ದವರುನ್, ಖಾಸ್ಕಿ ವಾದ್ ಸರ್ವಜಣಿಕ್ ಥಳಾಂನಿ ಲೊಕಾಚೆರ್ ಥಾಪುಂಕ್ ಪಳಯ್ಲ್ಯಾರ್, ವಾದ್ –  ವಿವಾದ್ ಸುರು ಜಾವ್ನ್ , ವೀದ್ – ವಾವ್ಳಿ ಜಾವ್ನ್, ಮರಣ್ ಪಾವ್‌ಲ್ಲ್ಯಾ ವೆಕ್ತಿಕ್ ಸಮಾದಾನೆಚೊ ವಿಶೆವ್ ಸಯ್ತ್ ಮೆಳಾನಾತ್ಲೆಪರಿಂ ಜಾಂವ್ಚಿ ಸಾಧ್ಯತಾ ಚಡ್ ಆಸ್ತಾ. ಪಾಟ್ಲ್ಯಾ ದಿಸಾಂನಿ ಸಂಸಾರಾಕ್ ಅಂತರ್ಲೆಲೊ ಫಾಮಾದ್ ಕೊಂಕ್ಣಿ ಹಾಸ್ಯ್ ಸಾಹಿತಿ ಸಿಜ್ಯೆಸ್ ತಾಕೊಡೆ ವಿಶ್ಯಾಂತ್, ತಾಚ್ಯಾ ಪಿಡೆವಿಶ್ಯಾಂತ್, ತಾಚ್ಯಾ ಮರ್ಣಾರಿತಿ ವಿಶ್ಯಾಂತ್ ಸಮಾಜಿಕ್ ಥಳಾಂನಿ ಪಾಸಾಯೊ ಮಾರುನ್ ಆಸ್ಚ್ಯಾ ಸಂದೇಶಾಂಚೊಂ ಚಡೊನ್ ಯೆಂವ್ಚೊ ಸಂಕೊ ಅಸಲ್ಯಾ  ಎಕಾ ದುಬಾವಾಕ್ ಇಡೆಂ ದಿತಾ.

ಸಂಸಾರಾಂತ್ ಜಿಯೆಂವ್ಚ್ಯಾ ಹರ್ ಮನ್ಶ್ಯಾಕ್ ತಾಚಿಂಚ್ ಮ್ಹಳ್ಳಿಂ ಖಾಸ್ಕಿ ಸಂವೇದನಾಂ ಆಸ್ತಾತ್. ಸಂಸಾರಾಕ್ ತೆ ಸರ್ಲ್ಯಾ ಉಪ್ರಾಂತ್ ತಾಂಚ್ಯಾ ಸಂವೇದನಾಂಕ್ ಮೋಲ್ ದಿಂವ್ಚೆಂ ಕಾಮ್ ಹರ್ಯೆಕ್ಲ್ಯಾಕ್ ಬಾಂದ್ತಾ. ಕವಿ ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ಡೊಟ್ ಕೊಮಾಚೆರ್ ಸಿಜ್ಯೆಸಾಕ್ ಉತ್ರಾಂ ನಮಾನ್ ಪಾಟವ್ನ್ ಬರಯಿಲ್ಲ್ಯಾ ಉತ್ರಾಂನಿ ಹಿಂ ಸಂವೇದನಾಂ ಬೋವ್ ಸೊಂಪ್ಯಾನ್ ವೆಕ್ತ್ ಜಾಲ್ಯಾಂತ್.  “ಮರಣ್ ಜಾಯ್ತೆ ಪಾವ್ಟಿಂ ಆಮ್ಚ್ಯಾ ಜಿವಿತಾಚೊ ಅರ್ಥ್ ಸೊದುನ್ ಕಾಡುಂಕ್ ಆಮ್ಕಾಂ ಆಹ್ವಾನ್ ದಿತಾ. ಸಂವ್ಸಾರಾಕ್ ಬುದ್ಧ, ಸೊಕ್ರೇಟಿಸ್, ಜೀಜಸ್, ಮಾರ್ಕ್ಸ್, ಗಾಂಧಿ, ಟೊಲ್‌ಸ್ಟೊಯ್, ಐನ್‌ಸ್ಟೈನ್ ತಸಲೆ ಮ್ಹಾನ್ ವ್ಯಕ್ತಿ ಯೇವ್ನ್ ಗೆಲ್ಯಾತ್. ಕೊಣಾಚ್ಯಾನ್‍ಯ್ ಮರಣ್ ಆಡಾಂವ್ಕ್ ಸಾಧ್ಯ್ ಜಾಂವ್ಕ್ ನಾ. ಪುಣ್ ತಾಂಣಿ ಕೆಲ್ಲೆಂ ಬರೆಂ ಕಾಮ್ ಮರ್ಣಾವರ್ವಿಂ ಸೊಂಪೊಂವ್ಕ್ ಜಾಂವ್ಕ್ ನಾ. ತೆಂ ಆಜೂನ್ ಉರ‍್ಲಾಂ. ತ್ಯಾಚ್ ಭರ್ವಶ್ಯಾನ್ ಸಿಜ್ಯೆಸಾನ್ ಕೆಲ್ಲೆಂ ಬರೆಂ ಕಾಮ್, ತಾಣೆ ರಚಲ್ಲೆಂ ಸಾಹಿತ್ಯ್ ಆಮಿ ಉಡಾಸಾಂತ್ ದವರ‍್ಯಾಂ, ಸಾಂಬಾಳುನ್ ದವರ‍್ಯಾಂ.”  ಕವಿ ಮೆಲ್ವಿನಾಚಿಂ ಹಿಂ ಉತ್ರಾಂ ಫಕತ್ ಸಿಜ್ಯೆಸಾಚ್ಯಾ ಸಂದರ್ಭಾರ್ ಮಾತ್ ನಯ್, ಸಂಸಾರಾಕ್ ಸರೊನ್ ವೆಚ್ಯಾ ಪೂಣ್ ಸಾಸ್ಣಾಕ್ ಉಡಾಸಾಂತ್ ಉರ್ಚ್ಯಾ ಹರ್ ವೆಕ್ತಿಕ್ ಲಾಗು ಜಾತಾತ್. ಪೂಣ್, ತಾಣಿ ಕೆಲ್ಲೆಂ ಬರೆಂ ಕಾಮ್, ತಾಣಿ ರಚಲ್ಲೆಂ ಸಾಹಿತ್ಯ್ ಉಡಾಸಾಂತ್ ದವರ್ಚ್ಯಾ ಪ್ರಕ್ರಿಯೆಂತ್ –  ಸರ್‌ಲ್ಲ್ಯಾ ವೆಕ್ತಿಕ್, ತಾಚ್ಯಾ ಕುಡಿಕ್, ತಾಚ್ಯಾ ಕುಟ್ಮಾ ಸಾಂದ್ಯಾಂಚ್ಯಾ ಭೊಗ್ಣಾಂಕ್ ಆನಿ ಖಾಸ್ಕಿಪಣಾಕ್, ಸಂವೇದನಾಂಕ್ ಗವ್ರವ್ ದಿಂವ್ಚೆಂಯ್ ತಿತ್ಲ್ಯಾಚ್ ಗರ್ಜೆಚೆಂ.

IMG 2034

ವರ್ತ್ಯಾ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್, ಕೊಂಕ್ಣಿ ಲೋಕ್ ಆಜ್ ಕಿತ್ಲೊ ಸಂವೇದನಾಂವೀಣ್ ಜಾಲಾ ಮ್ಹಣ್ಚ್ಯಾಕ್ ಸಿಜ್ಯೆಸ್ ಸರ್‌ಲ್ಲೆ ದಿಸಾಥಾವ್ನ್ ಧರುನ್ ಆತಾಂ ಪರ್ಯಾಂತ್ ಸಮಾಜಿಕ್ ಥಳಾಂನಿ ಪಾಸಾಯೊ ಮಾರುನ್ ಆಸ್ಚೆ ಸಂದೇಶ್‌ಚ್ ಸಾಕ್ಸ್ ! ಹೆ ಸಂದೇಶ್ ಕೋಣ್ ರಚ್ತಾತ್? ಕಿತ್ಯಾಕ್ ಪಾರ್ವರ್ಡ್ ಕರ್ತಾತ್? ಸಂದೇಶ್ ರಚ್ತೆಲ್ಯಾಂಚೊಂ, ಪಾರ್ವರ್ಡ್ ಕರ್ತೆಲ್ಯಾಂಚೊಂ ಉದ್ದೇಶ್ ತರೀ ಕಿತೆಂ? ಸರ್ಲೆಲ್ಯಾಕ್ ವ್ಹಡ್ ಕರ್ಚೊ ವಾ ಸರ್ಲೆಲ್ಯಾಚಿಂ ಆನಿ ಲೊಕಾಚಿಂ ನಕ್ಲಾಂ ಕರ್ಚೊ?

ಎಕಾ ಸಂದೇಶಾಂತ್ “ಆಮ್ಚೆಂ ಮಧೆಂ ಇತ್ಲೊ ಬರೋ ಏಕ್ವಟ್ ಆಸೊನ್’ಯೀ ಆಯಿನ್ನ್ ವೆಳಾರ್ ಆಮಿ ಕಿತೆಂಗೀ ಚುಕ್ಲ್ಯಾಂವ್ ಮ್ಹಣ್ ಆಮ್ಕಾಂ ಬೊಗ್ತಾ ನಂಯ್ಗೀ..? (ಆವ್ಚಿತ್ತ್ ಯಾ ಆಕಸ್ಮಿಕ್ ಮರಣ್ ತರ್ ತಿ ಗಜಾಲ್ ದುಸ್ರಿ ) …. ಆಜ್ ಯಾಜಕಾನ್ ಸಾಂಗ್ಲೆ ಕೀ ದೆವಾನ್ ದಿಲ್ಲಿಂ ತಾಲೆಂತಾ ಖಂಚಿಯೀ ತಾಣೆಂ ಲಿಪಯ್ಲಿನಾಂತ್. ತರ್ ತಾಚಾ ನಾ ಬಲಾಯ್ಕೆ ವಿಶಿಂ ಆಮಿ ಕಿತ್ಯಾಕ್ ಲಿಪಯ್ಲೆಂ? ಮರ್ಣಾಚಿ ಘಡಿ ಕೊಣಾಯ್ಚಾನಿ ಬದ್ಲುಂಕ್ ಜಾಯ್ನಾ ತೆಂ ಖರೆಂ , ಕಾಂಯ್ ನಾ ತರೀ ಮಾಗ್ಣ್ಯಾಚೆ ಬಳ್ ಪುಣೀ ದಿವ್ಯೆತೆಂ! (ಆನಿ ಮುಖಾರ್ ಆಶೆಂ ಜಾಂವ್ಚೆಂ ನಾ , ಜಾಂವ್ಚೆಂ ನಾಕಾ)”   ಮ್ಹಳ್ಳೆಂ ರುದಾನ್ ಆಸಾ.

ಅನ್ಯೇಕಾ ಸಂದೇಶಾಂತ್  “ಆಮ್ಚೊಚ್ ಮಿತ್ರ್ ಸಿಜ್ಯೆಸಾನ್ ಆಪ್ಲ್ಯಾ ಮೊರ್ನಾಚ್ಯಾ ರಿತಿಂತ್ ಕಾಂಯ್ ಲಿಸಾಂವಾಂ ಶಿಕಯ್ಲ್ಯಾಂತ್” ಮ್ಹಣ್ ಸುರು ಕರುನ್, “ತಾಣೆ ಮರ್ಣಾಕ್ ಬ್ಯಾಂಡ್ ಕರುಂಕ್ ನಾ, ತಾಚ್ಯಾ ಮರ್ಣಾಕ್ ಗೊವ್ಳಿಕ್ ಬಾಪ್, ವಿಗಾರ್ ಜೆರಾಲಾಂಕ್ ವಿಂಚುಂಕ್ ನಾ, ಬರಿ ಪೇಟ್ ಕರುಂಕ್ ನಾ, ಕೂಡ್ ಲಾಸ್ಲ್ಯಾ – ಪುರುಂಕ್ ನಾ ಮ್ಹಣ್ ಸಾಂಗೊನ್ ನಿಮಾಣೆಂ – “ಹೆ ಆಪೂರ‍್ಬಾಯೆಚೆ ಗಜಾಲಿ, ಆಮಿ ಕಿತ್ಲೆ ಜಣ್ ಆಪ್ಣಾಚೆ ಕರುಂಕ್ ಸಕ್ತಾಂವ್?”  ಮ್ಹಣ್ ಲೊಕಾಕ್ ಸವಾಲ್ ವಿಚಾರ್ಲಾಂ.

ಮನ್ಶ್ಯಾಚಿ ಭಲಾಯ್ಕಿ – ತಾಚಿ ಖಾಸ್ಕಿ ಗಜಾಲ್. ಕಿತೆಂ ಖಾಯ್ಜೆ, ಕಿತೆಂ ಪಿಯೆಜೆ ಆನಿ ಭಲಾಯ್ಕಿ ಕಶಿ ಸಾಂಬಾಳಿಜೆ ಮ್ಹಳ್ಳಿ ತಾಚಿ ಖಾಸ್ಕಿ ವಿಂಚವ್ಣ್. ಭಲಾಯ್ಕಿ ಪಾಡ್ ಜಾತಾನಾ ಖಂಯ್ಚ್ಯಾ ದಾಕ್ತೆರಾಲಾಗಿಂ ವಚಜೆ, ಕಸಲಿ ಚಿಕಿತ್ಸಾ ಘೆಜೆ,  ಕೊಣಾಕ್ ಸಾಂಗಾಜೆ – ತೀಯ್ ತಾಚಿ ಖಾಸ್ಕಿ ವಿಂಚವ್ಣ್.  ವಯ್ಜಾನ್ ಸಯ್ತ್ ತಾಚೆಲಾಗಿಂ ಉಪಚಾರಾಕ್ ಯೆಂವ್ಚ್ಯಾ ಮನ್ಶ್ಯಾಚಾ ಪಿಡೆವಿಶ್ಯಾಂತ್, ತಾಕಾ ದಿಲ್ಲ್ಯಾ ಚಿಕಿತ್ಸೆ ವಿಶ್ಯಾಂತ್, ಥೊಡ್ಯಾ ವಿಶೇಸ್ ಸಂದರ್ಭಾಂನಿಂ ಸರ್ಕಾರಾಕ್/ಕೊಡ್ತಿಕ್ ಸೊಡ್ಲ್ಯಾರ್, ಹೆರ್ ಖಂಯ್ಸರೀ ಪರ್ಗಟ್ ಸಾಂಗೊಂಕ್ ನಾ ಮ್ಹಳ್ಳೆಂ ಕಾನುನ್ ಆಸಾ. ಹರ್ ಮನ್ಶ್ಯಾಕ್ ಆಪ್ಲ್ಯಾ ಭಲಾಯ್ಕೆ ವಿಶ್ಯಾಂತ್ ಪರ್ಗಟ್ ಥರಾನ್ ಸಾಂಗಾನಾಸ್ತಾಂ ರಾಂವ್ಚೆಂ ಹಕ್ ಆಸಾ. ಆಮ್ಕಾಂ ಕಿತ್ಯಾಕ್ ಸಾಂಗೊಂಕ್ ನಾ ? ಮ್ಹಣ್ ನಾಭಲಾಯ್ಕೆಂತ್ ಆಸ್ಚ್ಯಾ ವೆಕ್ತಿಕ್ ಜಾಂವ್, ತಾಚ್ಯಾ ಕುಟ್ಮಾಕ್ ಜಾಂವ್ ವಿಚಾರ್ಚೆಂ ಹಕ್ ಕೊಣಾಯ್ಕೀ ನಾ. ಜರಿ ಕೋಣ್, ಸಂಬಂದಿತ್ ವೆಕ್ತಿಕ್  ವಾ ತಾಚ್ಯಾ ಕುಟ್ಮಾಕ್ ಸಾಂಗಾನಾಸ್ತಾನಾ ತಾಚ್ಯಾ ಭಲಾಯ್ಕೆಚೆ ವಿಶಯ್ ಸರ್ವಜಣಿಕ್ ಕರ್ತಾ ಜಾಲ್ಯಾರ್, ತೋ ತ್ಯಾ ವೆಕ್ತಿಚ್ಯಾ ಸಂವೇದನಾಂಕ್, ಖಾಸ್ಕಿಪಣಾಕ್ ಅಗವ್ರವ್ ದಾಕಯ್ತಾ ಮ್ಹಣ್ ಜಾಲೆಂ.

ಹಾಂವ್ ಸಿಜ್ಯೆಸಾಚ್ಯಾ ಘರ್ಚ್ಯಾ ಮಾಳಿಯೆರ್ ಸುಮಾರ್ ದೇಡ್ ವರ್ಸ್ ಭಾಡ್ಯಾಕ್ ರಾವ್ಲಾಂ. ದಾಯ್ಜಿ ದುಬಯ್ ಸಂಗಟನಾನ್ ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಸಾಲಾಂತ್ ಮಾಂಡುನ್ ಹಾಡ್‌ಲ್ಲ್ಯಾ ಕೊಂಕ್ಣಿ ನಾಟಕ್ ಸ್ಪರ್ಧ್ಯಾಂಕ್ ಆಮಿ ಸಾಂಗಾತಾ ವರಯ್ಣಾರ್ ಆಸ್‌ಲ್ಲ್ಯಾಂವ್. ಸಾಂಗಾತಾ ಸ್ಪರ್ಧ್ಯಾಚೆ ನಾಟಕ್ ಪಳೆಂವ್ಕ್ ವೆತೆಲ್ಯಾಂವ್ ಆನಿ ಸಾಂಗಾತಾ ಪಾಟಿಂ ಯೆತೆಲ್ಯಾಂವ್. ಹಾಂವ್ ಕೊಂಕ್ಣಿ ಲೇಖಕಾಂಚ್ಯಾ ಎಕ್ವಟಾಚೊ ಕಾರ್ಯದರ್ಶಿ ಆಸ್ತಾನಾ ಸಿಜ್ಯೆಸಾಚಾ ಮಾರ್ಗದರ್ಶನಾಖಾಲ್ ಡೊ| ಆಸ್ಟಿನ್ ಪ್ರಭು ಸಂಗಿ ಸಂವಾದ್ ಕಾರ್ಯೆಂ ಮಾಂಡುನ್ ಹಾಡ್‌ಲ್ಲೆಂ ಆಸಾ. ಸಿಜ್ಯೆಸ್ ಕಿತ್ಲೊ ಸಂವೇದನಾಶೀಲ್ ಮನಿಸ್ ಮ್ಹಳ್ಯಾರ್, ಹಾಂವ್ ತಾಚ್ಯಾ ಘರ್ಚ್ಯಾ ಮಾಳಿಯೆರ್ ರಾವ್ತಾಲೊಂ ತರೀ, ಮುಖಾಮುಖಿ ಸಾಂಗ್ಲ್ಯಾರ್ ಮ್ಹಾಕಾ ಬೆಜಾರ್ ಜಾಯ್ತ್ ಮ್ಹಣ್ ಥೊಡ್ಯೊ ಗಜಾಲಿ ತೋ ಮ್ಹಾಕಾ ಇ ಮೇಯ್ಲಾರ್ ಬರಯ್ತಾಲೊ.

ಮಾರ್ಚ್ 11 ತಾರಿಕೆರ್ ಮ್ಹಾಕಾ ದಾಂತಾಂಚ್ಯಾ ಚಿಕಿತ್ಸೆಕ್ ಫಾ| ಮುಲ್ಲರ್ ಆಸ್ಪತ್ರೆಕ್ ಗೆಲ್ಲೆ ತವಳ್ ಸಿಜ್ಯೆಸ್ ಮುತಾಕೊಶಾಚ್ಯಾ ಒಪಿಡಿ ಭಾಯ್ರ್ ದಾಕ್ತೆರಾಕ್ ರಾಕೊನ್ ಬಸ್‌ಲ್ಲೊ ಮ್ಹಾಕಾ ಮೆಳ್ಳೊ. ತ್ಯಾ ದಿಸಾ ಸುಮಾರ್ ಪಂದ್ರಾ ಮಿನುಟಾಂಭರ್ ಥಂಯ್ಚ್  ಬಾಂಕಾರ್ ಬಸೊನ್ ಆಮಿ ಉಲಯ್ಲ್ಯಾಂವ್.  “ದಾಕ್ತೆರಾನ್ ಏಕ್ ತಪಾಸ್ಣಿ ಇಲ್ಲೆಶೆಂ ವೆಗ್ಗಿಂ ಕರುಂಕ್ ಸಾಂಗ್‌ಲ್ಲೆಂ ಜಾಲ್ಯಾರ್ ಕಾಂಯ್ ಭಲಾಯ್ಕಿ ಬರಿ ಉರ‍್ತಿ”  ಮ್ಹಣ್ತಾನಾ ತಾಚ್ಯಾ ದೊಳ್ಯಾಂನಿ ಮ್ಹಾಕಾ ಪಳೆಂವ್ಕ್ ಜಾಂವ್ಕ್ ನಾ. ತ್ಯಾಚ್ ದಿಸಾ ಎಡಿ ನೆಟ್ಟೊಕ್ ಕೊಂಕ್ಣಿ ಲೇಖಕ್ ಸಂಘಟನಾನ್ ಪ್ರಶಸ್ತಿ ಜಾಹಿರ್ ಕರ್ಚೆ ವಿಶ್ಯಾಂತ್ ಪ್ರೆಸ್ ಕೊನ್ಪರೆನ್ಸ್ ಆಸಾ ಕೆಲ್ಲೆಂ. ಹಾಂವೆ ಲೋವ್ ವಿಶಯ್ ಬದ್ಲಿಲೊ “ಎಡಿ ನೆಟ್ಟೊಕ್ ಕೊಂಕ್ಣಿ ಲೇಖಕ್ ಸಂಘಟನಾಚಿ ಪ್ರಶಸ್ತಿ ಆಸಾನೆ ?” ಮ್ಹಣ್ತಾನಾ “ವ್ಹಯ್ಗೀ, ಮ್ಹಾಕಾ ಖಬರ್ ನಾ” ಮ್ಹಣಾಲೊ. ಉಟ್ಚ್ಯಾ ಪಯ್ಲೆಂ ಹಾಂವ್ ಆನಿ ಮ್ಹಜಿ ಪತಿಣ್ ಸಾಂಜೆರ್ ಘರಾ ಮೆಳೊಂಕ್ ಯೆತಾಂವ್ ಮ್ಹಣ್ತಾನಾ ತಾಣೆ ಮ್ಹಳೆಂ ” ನಾಕಾ, ನಾಕಾ … ಕಾಲೆಂಯ್ ಆಸ್ಲ್ಯಾರ್ ಫೊನಾರ್ ಉಲವ್ಯಾಂ. ಮೆಳ್ಚೆಂ ಜಾತಾ ತಿತ್ಲೆಂ ಆಡಾಂವ್ಚೆಂ ಬರೆಂ ,ಹ್ಯಾ ದಿಸಾಂನಿ ರಿಸ್ಕ್ ನಾಕಾ ದೆಕುನ್ ಕೊಣಾಯ್ಕೀ ಮೆಳಾನಾ” ಹಾಂವ್ ದಾಂತಾಂಚ್ಯಾ ದಾಕ್ತೆರಾಕ್ ಮೆಳೊನ್ ಪಾಟಿಂ ಯೆತಾನಾ, ತೋ ಅನ್ಕಾಲಜಿ ಒಪಿಡಿಂತ್ ದಾಕ್ತೆರಾಕ್ ರಾಕ್ತಾಲೊ. ಹಿ ಗಜಾಲ್ ತೆಚ್ ದಿಸಾ ಮ್ಹಜ್ಯಾ ಆನಿ ತಾಚ್ಯಾ ದೊಗಾಂಯ್ಚ್ಯಾ,  ಖಾಸ್ ಇಶ್ಟಾಲಾಗಿಂ ಹಾಂವೆ ವಾಂಟುನ್ ಘೆತ್ಲಿ.

ಭಲಾಯ್ಕೆ ವಿಗ್ಯಾನ್ ಆಜ್ ಬೋವ್ ಮುಕಾರ್ ಪಾವ್ಲಾಂ ವ್ಹಯ್. ಗರ್ಜ್ ನಾ ಜಾಲ್ಯಾರೀ ಥೊಡೆ ಪಾವ್ಟಿಂ ವಿಶೇಸ್ ತಪಾಸ್ಣ್ಯೊ ಕರಯ್ತಾತ್. ಪೂಣ್  ಗರ್ಜ್ ಆಸ್‌ಲ್ಲೆಕಡೆ ಥೊಡೆ ಪಾವ್ಟಿಂ ತಪಾಸ್ಣ್ಯೊ ಜಾಯ್ನಾಂತ್. ಭಲಾಯ್ಕೆ ವಿಗ್ಯಾನಾನ್ ಯಂತ್ರಾಂನಿ ಜಾಯ್ತಿ  ಪ್ರಗತಿ ಕೆಲ್ಯಾ ವ್ಹಯ್ ಜಾಲ್ಯಾರೀ, ತಪಾಸ್ಣಿ ಕರಿಜೆ ವಾ ನಾಕಾ, ಕರಿಜೆ ಜಾಲ್ಯಾರ್ ಖಂಯ್ಚಿ ವಿಶೇಸ್ ತಪಾಸ್ಣಿ ಕರಿಜೆ ಮ್ಹಳ್ಳೊ ನಿರ್ಧಾರ್ ಮನ್ಶ್ಯಾನ್‌ಚ್ ಘೆಂವ್ಚೊ ಪಡ್ತಾ ಜಾಲ್ಲ್ಯಾನ್ – ಜಾಯ್ತ್ಯಾ ಸಂದರ್ಭಾಂನಿ ಮನ್ಶ್ಯಾಚಾ ಜಿವಿತಾಂತ್ ವೇಳ್‌ಯೀ ಖೆಳ್ತಾ. ಆನಿ ಅಸಲ್ಯಾ ಸಂದರ್ಬಾಂನಿ ಮನ್ಶ್ಯಾಕ್ ವೇಳಾಚೆರ್ ಭೊರ್ ಘಾಲ್ನ್ ರಾಂವ್ಚೆಂ ಸೊಡ್ಲ್ಯಾರ್ ದುಸ್ರಿ ವಾಟ್‌ಯೀ ಆಸಾನಾ. ಹಿ ಆಯ್ಚಿ ವಸ್ತುಸ್ಥಿತಿ. ಅಸಲ್ಯಾ ವಸ್ತುಸ್ಥಿತಿಕ್ ಕೋಣ್ ಯಾಜಕ್ “ತಾಚಾ  ನಾ –  ಬಲಾಯ್ಕೆ ವಿಶಿಂ ಆಮಿ ಕಿತ್ಯಾಕ್ ಲಿಪಯ್ಲೆಂ?” ಮ್ಹಣ್ ಪ್ರಶ್ನ್ ವಿಚಾರ್ತಾ ಜಾಲ್ಯಾರ್ – ತೆಂ ಸಾರ್ಕೆಂ ನಯ್! ಖಂಯ್ಚ್ಯಾಯ್  ಯಾಜಕಾಕ್ ವಾ ಹೆರ್ ಕೊಣಾಯ್ಕೀ ಸರ್ವಜಣಿಕ್ ಥಳಾರ್ ಅಸಲೆಂ ಸವಾಲ್ ವಿಚಾರ್ಚೆಂ ಹಕ್ ನಾ. ಭಲಾಯ್ಕಿ ಮನ್ಶ್ಯಾಚಿ ಖಾಸ್ಕಿ ಗಜಾಲ್, ತೆ ವಿಶ್ಯಾಂತ್ ಸಾಂಗ್ಚೆಂ, ಸಾಂಗಾನಾಸ್ತಾನಾ ರಾಂವ್ಚೆಂ ಹಕ್ ತಾಚೆಂ ಖಾಸ್ಕಿ. ಹಿ ಜಾಲಿ ಗಜಾಲ್ ಯಾಜಕಾಚಿ.

ಆತಾಂ – ಕೊ. ಲೇ. (ಕೊಂಕ್ಣಿ ಲೇಖಕಾಂಚ್ಯಾ) ಗಜಾಲಿಕ್ ಯೆವ್ಯಾಂ. ಸಿಜ್ಯೆಸಾನ್ ಆಪ್ಲ್ಯಾ ಮೊರ್ನಾಚ್ಯಾ ರಿತಿಂತ್ ಕಾಂಯ್ ಲಿಸಾಂವಾಂ ಶಿಕಯ್ಲ್ಯಾಂತ್ ಖಂಯ್. ಆನಿ ಹಿಂ ಲಿಸಾಂವಾಂ “ಆಮಿ ಕಿತ್ಲೆ ಜಣ್ ಆಪ್ಣಾಚೆ ಕರುಂಕ್ ಸಕ್ತಾಂವ್?”  ಮ್ಹಳ್ಳೆಂ ಸವಾಲ್ ಹೆ ಕೊ. ಲೇ ಸರ್ವಜಣಿಕ್ ಥಳಾಂನಿ ವಿಚಾರ್ತಾತ್. ಹಾಂಗಾ ‘ಆಮಿ’ ಮ್ಹಳ್ಯಾರ್ ಕೋಣ್ ? ಲೊಕಾಕ್ ಹೆಂ ಸವಾಲ್ ವಿಚಾರ್ಚೊ ಅಧಿಕಾರ್ ‘ತುಮ್ಕಾಂ’ ಕೊಣೆಂ ದಿಲಾ?

SC

ಆತಾಂ ಕೊಣಾಯ್ಚ್ಯಾಯ್  ಮರ್ಣಾಕ್  ಬ್ಯಾಂಡ್ ಕರಿಜೆಗೀ ನಾಕಾ? ಮರ‍್ಣಾ ಮಿಸಾಕ್ ಬಿಸ್ಪಾನ್, ವಿಗಾರ್ ಜೆರಾಲಾನ್ ಯೆಜೆಗೀ ನಾಕಾ?  ಕೂಡ್ ಫುರಿಜೆಗೀ – ಹುಲ್ಫಾಯ್ಜೆಗೀ? ಸಾತ್ವ್ಯಾ ದಿಸಾಕ್ ಮಿಸಾಕ್ ಜೆವಣ್ ದೀಜೆಗೀ,  ಫಳ್ಹಾರ್ ದೀಜೆ? ಮ್ಹಣ್ ಲೊಕಾಕ್ ಸಾಂಗೊಂಕ್ ‘ತುಮಿ’ ಕೋಣ್ ?

ಹಾಂಗಾಸರ್ ವಯ್ರ್ ಹಾಂವೆ ಸ್ಪಶ್ಟ್ ಸಾಂಗ್‌ಲ್ಲೆಪರಿಂ – ಮರಣ್ ಮನ್ಶ್ಯಾಚಿ ಬೋವ್ ಖಾಸ್ಕಿ ಗಜಾಲ್. ಶೆಂಬೊರ್ ಠಕ್ಕೆ ವಯಕ್ತಿಕ್ ಆನಿ ಸಂವೇದನಾಶೀಲ್. ಥೊಡ್ಯಾ ತೆಂಪಾ ಆದಿಂ ಏಕ್ ಫ್ಯಾಶನ್ ಸುರು ಜಾಲ್ಲೆಂ –  ಕೂಡ್ ಮೆಡಿಕಲ್ ಕೊಲೆಜಿಕ್ ದಾನ್!  ಕೊಣಾಕ್ ದಾನ್ ದೀಂವ್ಕ್ ಮನ್ ಆಸಾ, ತೋ ದಾನ್ ದಿತಾ. ಕೊಣಾಕ್  ಪುರುಂಕ್ ಜಾಯ್ ಮ್ಹಣ್ ಆಶಾ ಆಸಾ, ತಾಕಾ ಪುರ್ತಾತ್. ಕೊಣಾಕ್ ಫೊಂಡ್ ಬಾಂದುಂಕ್ ಜಾಯ್, ತೋ ಬಾಂದ್ತಾ.  ತಿ ತಾಂಚಿ ವಿಂಚವ್ಣ್ . ತೆ ವಿಶ್ಯಾಂತ್ ಸವಾಲ್ ಕರುಂಕ್ ಆಮಿ ಕೋಣ್? ಸಿಜ್ಯೆಸಾಕ್ ಕಿತೆಂ ಜಾಯ್ ಆಸ್ಲೆಂ ತಾಣೆ ತೆಂ ಕೆಲಾಂ, ತುಕಾ ಕಿತೆಂ ಜಾಯ್ ತುಂ ಕರ್, ಲೊಕಾಕ್ ಕಿತೆಂ ಜಾಯ್, ಲೋಕ್ ಕರ್ತಾಲೊ . . . ಎಕಾ ಮಿತಿ ಭಿತರ್, ಪವಿತ್ ಸಭೆಚ್ಯಾ ಪರಿಧೆ ಭಿತರ್! ಅಶೆಂ ಕರಾ,  ತಶೆಂ ಕರಾ ಮ್ಹಣ್ ತುಮ್ಚೆ ಖಾಸ್ಕಿ ಪಾತ್ಯೆಣ್ಯೊ ಲೊಕಾಚೆರ್ ಕಿತ್ಯಾಕ್ ಥಾಪ್ತಾತ್ ?

ಹಾಂವೆ ಪಳಯಿಲ್ಲೊ ಸಿಜ್ಯೆಸ್, ತಾಕೊಡೆ ಮ್ಹಳ್ಳೊ ಕೊಂಕ್ಣೆಚೊ ಅಪ್ರತಿಮ್ ಹಾಸ್ಯ್  ಸಾಹಿತಿ ವೆಕ್ತಿ ಸ್ವತಂತ್ರಾಕ್ ಮರ್ಯಾದ್ ದಿಲ್ಲೊ ಮನಿಸ್.  ಕಶೆಂ ತಾಕಾ ತಾಚೆಚ್ ಮ್ಹಳ್ಳೆ ಖಾಸ್ಕಿ ವಿಚಾರ್ ಆಸ್‌ಲ್ಲೆ , ತಸಲೆ ವೆಗ್ಳೆ ವಿಚಾರ್ ಹೆರಾಂಕೀ ಆಸೊಂಕ್ ಪುರೊ. ‘ಆಪ್ಲ್ಯಾ ಮರ‍್ಣಾಕ್ ಬಿಸ್ಪ್, ವಿಗಾರ್ ಜೆರಾಲ್ ಖಂಡಿತ್ ಯೆತಾಲೊ ಮ್ಹಣ್ ಚಿಂತ್ಚೆಂ ತಿತ್ಲೆಂ ವ್ಹಡ್ಪಣ್ ತಾಕಾ ನಾತ್‌ಲ್ಲೆಂಚ್! ತಾಣೆ ಫಕತ್ ಆಪ್ಲ್ಯಾ ಮೊರ್ನಾಚಿ ರೀತ್ ಆಪ್ಲ್ಯಾ ಫಿರ್ಗಜ್ ವಿಗಾರಾನ್ ಕರಿಜೆ ಮ್ಹಣ್ ಬರಯಿಲ್ಲ್ಯಾಕ್ – ‘ಗೊವ್ಳಿಕ್ ಬಾಪ್, ವಿಗಾರ್ ಜೆರಾಲಾಂಕ್ ವಿಂಚುಂಕ್ ನಾ’ ಮ್ಹಣ್ ಒಕ್ಕಾಣೆಂ ಬರಂವ್ಚೆ ಪಾಟ್ಲೊ ಉದ್ದೇಶ್ ತರೀ ಕಿತೆಂ ? ಹೆಂ ಒಕ್ಕಾಣೆಂ ಕೊಣಾಕ್ ಲ್ಹಾನ್ ಕರುಂಕ್ ? ಬಿಸ್ಪಾಕ್ – ವಿಗಾರ್ ಜೆರಾಲಾಕ್ ವಾ ಸಿಜ್ಯೆಸಾಕ್ ? ದಿಯೆಸೆಜಿಂತ್ ಕೋಣ್ ಕೊಂಕ್ಣಿ ಸಾಹಿತಿ ಸರ್ಲೊ ಜಾಲ್ಯಾರೀ, ತಾಚ್ಯಾ ಮೊರ್ನಾಕ್ ಗೊವ್ಳಿ ಬಾಪ್ ಆನಿ ವಿಗಾರ್ ಜೆರಾಲ್ ವೆತಾತ್‌ಗೀ? ಫಲ್ಯಾಂ ಆನಿ ಕೋಣ್ ಆಪ್ಣಾಚೆಂ ಮೋರ್ನ್ ಗೊವ್ಳಿ ಬಾಪಾನ್ ಆನಿ ವಿಗಾರ್ ಜೆರಾಲಾನ್‌ಚ್ ಕರಿಜಾಯ್ ಮ್ಹಣ್ ಬರಯ್ಲ್ಯಾರ್ ಬಿಸ್ಪಾಚಿ, ವಿಗಾರ್ ಜೆರಾಲಾಚಿ ಗತ್ ಕಿತೆಂ ಜಾಯ್ತ್ ? ಮೆಡಿಕಲ್ ಕೊಲೆಜಿಕ್ ಕೂಡ್ ದಾನ್ ದಿಂವ್ಚಿ ವಾ ಕೂಡ್ ಲಾಸ್ಜೆ ಪರ್ಯಾಂತ್ ಸಗ್ಳೆಂ ಸಾರ್ಕೆಂ, ಫಲ್ಯಾಂ ಕೋಣ್ ಎಕ್ಲೊ ಮ್ಹಾಕಾ ಸಿಮೆಸ್ತ್ರಿಂತ್ ಪುರ್ಚೆಂಚ್ ನಾಕಾ, ಮ್ಹಜ್ಯಾಚ್ ಘರ್ಚ್ಯಾ ಆಂಗ್ಣಾಂತ್ ಪುರಿಜಾಯ್ ಮ್ಹಣ್ ಸಾಂಗತ್ ಜಾಲ್ಯಾರ್ ಪವಿತ್ ಸಭೆಚಿ ಗತ್ ಕಿತೆಂ ಜಾಯ್ತ್ ?

ಸರ್‌ಲ್ಲ್ಯಾ ವೆಕ್ತಿನ್ ತಾಚಿ ಖುಶಿ ಬರಯ್ಲ್ಯಾ. ಕುಟ್ಮಾನ್ ಆನಿ ಫಿರ್ಗಜ್ ಕುಟ್ಮಾನ್ ಮೆಳೊನ್ ತಾಚಿ ಖುಶಿ ಪವಿತ್ ಸಭೆಚ್ಯಾ ಪರಿದೆ ಭಿತರ್ ಕಾರ್ಯಗತ್ ಕೆಲ್ಯಾ. ಆತಾಂ ಸರ್‌ಲ್ಲ್ಯಾಚಾ ಆತ್ಲ್ಯಾಕ್ ಸಮಾದಾನೆನ್ ವಿಶೆವ್ ಘೆಂವ್ಕ್ ಸೊಡಾ. ತಾಚ್ಯಾ ಕುಟ್ಮಾಕ್ ಆಪ್ಲ್ಯಾ ಮೊಗಾಚ್ಯಾ ಮನ್ಶ್ಯಾಕ್ ಹೊಗ್ಡಾಯಿಲ್ಲ್ಯಾ ದುಕಾಥಾವ್ನ್ ಭಾಯ್ರ್ ಯೇಂವ್ಕ್ ವೇಳ್ ದಿಯಾ. ಸಮಾಜಿಕ್ ಥಳಾಂನಿ ಸಿಜ್ಯೆಸಾಚ್ಯಾ ಮರ್ಣಾರಿತಿಚೆರ್ ತುಮ್ಚಿ ಕಮೆಂಟ್ರಿ ಬರವ್ನ್, ಪಾರ್ವರ್ಡ್ ಕರ್ನ್ ಗಲೀಜ್ ಕರ‍್ಚೆಬದ್ಲಾಕ್, ಟಿಶ್ಯೂ ಪೇಪರಾರ್ ಬರವ್ನ್ ಕೊಮೊಡಾಂತ್ ಘಾಲ್ನ್ ದಾಂಬೂನ್ ಫ್ಲಶ್ ಕರಾ!!!

ಕೊಂಕ್ಣಿ ಲೇಖಕ್ (ಕೊ. ಲೇ) ಆಸ್‌ಲ್ಲೆ ಪಯ್ಲೆಂ  ಮನಿಸ್ ಜಾಯಾ. ಮರ್ಣಾಕ್ ಆನಿ ಮರಣ್ ಪಾವ್‌ಲ್ಲ್ಯಾ ಚಾ ಖಾಸ್ಕಿಪಣಾಕ್, ತಾಚ್ಯಾ ವೆಕ್ತಿ ಸ್ವತಂತ್ರಾಕ್ ಮರ್ಯಾದ್ ದೀಂವ್ಕ್ ಶಿಕಾ. ಕಾಸಾಚ್ಯಾ ಉಪ್ಕಾರಾಕ್ ಪಡಾನಾತ್ಲೆ  ಮೆಸೇಜಿ ಬರವ್ನ್ ವೈರಲ್ ಕರ್ನ್ ಸುಖ್ ಭೊಗ್ಚೆಂ ರಾವಯಾ! Enough is Enough!  ಪುನೀತ್ ರಾಜ್‌ಕುಮಾರ್ ಮರ್ಣಾ ಉಪ್ರಾಂತ್ ತಾಚ್ಯಾ  ಕುಟ್ಮಾಚ್ಯಾಂನಿ ಲೊಕಾ ಮುಕಾರ್ ಯೇವ್ನ್, ಹಾತ್ ಜೋಡ್ನ್ “ದಯಾ ಕರುನ್ ರಾವಯಾ” ಮ್ಹಣ್ಚೆ ತಸಲಿ  ಪರಿಸ್ಥಿತಿ ಸಿಜ್ಯೆಸಾಚಾ ಕುಟ್ಮಾಕ್ ಯೆಂವ್ಚಿ ನಾಕಾ!

►ಎಚ್ಚೆಮ್

Support Free & Independent Media

Keep journalism alive – support free, independent media. Help us to do our work by making a contribution. Together, stronger. Together as one.

7 COMMENTS

  1. This is the nature of Mangalorean society. It all started when someone published the cause of his death, and then the events continued one after another. Feeling sad that there is no privacy even in death.

    5
    1
  2. Often or always, we the sheep follow leaders, of course different people choose different leaders to follow. We mangalore as have chosen to follow display of vadvikay, sailap, wealth, clout and few other ‘falan’ that money and vadpan bring. We have not chosen a single leader who makes it easy on resources, time, energy, display. How true it is, each one can verify around you.
    CGS was surely someone to reckon with. He has a huge fan base because he made us light hearted, not just that, he positively criticised the way we lost our heritage and culture to showmanship.
    If his desire to simplicity or ordinary Ness is given some visibility, so people follow his lead and learn to come out of the bubble, surely it is the right thing.
    Learned author and commentors may see it from your wisdom but there are another set of people who want more living and practiced examples of simplicity and lightness to imbibe in their lives.
    Yes, stop controversy.

    4
    5
  3. Rightly said. Shame on those who want to make a controversy on such personal issues. It reflects their poor personality

    7
    2
  4. Even I was taken back when I saw that circulation in the social media and that too in the brackets authors additional comments. Who has given him the authority to circulate Costs request to his beloved family and that too a private message.. Its shocking..
    Secondly, as you said it’s one’s own decision about steps to be taken aftermath of his or her death.
    Finally who are these so called konkani Lekhak to question the public what to do or follow the steps requested by Sir CGS.
    Let CGS lay peacefully.. Do not dig his grave.
    May his soul rest in peace..

    7
    2

LEAVE A REPLY

Please enter your comment!
Please enter your name here

ಎಚ್ಚೆಮ್ ಪೆರ್ನಾಲ್
ಎಚ್ಚೆಮ್ ಪೆರ್ನಾಳ್ ಲಿಕ್ಣೆನಾಂವಾನ್ ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ಒಳ್ಕೆಚೊ ಹೆನ್ರಿ ಮೆಂಡೋನ್ಸಾ, ಗಾಂವಾನ್ ಪೆರ್ನಾಳ್ಚೊ. ಪ್ರಸ್ತುತ್ ಕೊಂಕ್ಣಿ ಸಾಹಿತ್ಯ್ ಆನಿ ಸಮಾಜೆಕ್ ಸಮರ್ಪಿತ್ ಜಾಳಿಸುವಾತ್ ಕಿಟಾಳ್ ಹಾಚೊ ಸಂಪಾದಕ್ ತಶೆಂ ಆರ್ಸೊ ಮಯ್ನ್ಯಾಳ್ಯಾ ಪತ್ರಾಚೊ ಪ್ರಕಾಶಕ್. ಚಲ್ಯಾಂಕ್ ಚತ್ರಾಯ್(1999), ಕಯ್ದ್ಯಾಚೊ ಕವಿತಾ(2004), ಭಾಮುಣಾಂಚೆಂ ಚೆಡುಂ(2006) - ತಾಚೆ ಪ್ರಕಟಿತ್ ಕವಿತಾ ಜಮೆ. ದೆವಾಕ್ ಸೊಡ್‌ಲ್ಲೊ ಪಾಡೊ(2002), ಬೀಗ್ ಆನಿ ಬಿಗಾತ್ (2016) - ಮಟ್ವ್ಯಾ ಕಾಣಿಯಾಂ ಸಂಗ್ರಹ್. ಕೊಂಕಣಿ ಕಾವ್ಯೆಂ : ರುಪಾಂ ಆನಿ ರೂಪಕಾಂ (2021) ವಿಮರ್ಶ್ಯಾ ಲೇಖನಾಂಚೊ ಸಂಗ್ರಹ್. 2006 ವ್ಯಾ ವರ್ಸಾ ದಾಯ್ಜ್ ವರ್ಸಾಚೊ ಕವಿ ಪುರಸ್ಕಾರ್, 2018ವ್ಯಾ ವರ್ಸಾ ಬೀಗ್ ಆನಿ ಬಿಗಾತ್ ಕಾಣ್‍ಯಾಂ ಬುಕಾಕ್ ವಿಶ್ವ ಕೊಕ್ಣಿ ಕೇಂದ್ರಾನ್ ದಿಂವ್ಚಿ ಪ್ರತಿಷ್ಠಿತ್ ಶ್ರ‍ಿಮತಿ ವಿಮಲಾ ವಿ ಪೈ ಉತ್ತೀಮ್ ಬೂಕ್ ಪ್ರಶಸ್ತಿ ಫಾವೊ ಜಾಲ್ಯಾ. ಕೊಂಕ್ನಿ ಕವಿತೆಚ್ಯಾ ಉದರ್ಗತೆ ಖಾತಿರ್ ವಾವುರ್ಚೆಂ ಟ್ರಸ್ಟ್ ಕವಿತಾ ಟ್ರಸ್ಟ್ ಹಾಣಿ ಪಾಟಂವ್ಚೊ 2019ವ್ಯಾ ವರ್ಸಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ತಾಕಾ ಲಾಭ್ಲಾ.  2021  ವ್ಯಾ ವರ್ಸಾಚೊ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ದಿಂವ್ಚೊ ಉತ್ತೀಮ್ ಪುಸ್ತಕ್ ಪುರಸ್ಕಾರ್ 'ಕೊಂಕಣಿ ಕಾವ್ಯೆಂ : ರುಪಾಂ ಆನಿ ರೂಪಕಾಂ' ವಿಮರ್ಶ್ಯಾ ಲೇಖನಾಂಚ್ಯಾ ಸಂಗ್ರಹಾಕ್ ಫಾವೊ ಜಾಲಾ.   ಕೊಂಕ್ಣೆ ಶಿವಾಯ್ ಕನ್ನಡ, ಇಂಗ್ಲಿಷ್ ಭಾಸಾಂನೀಯ್ ತೋ ಬರಯ್ತಾ.