ಸಾಂತಾ’ಕೀ ಸೊಡಿನಾತ್ಲಿ ‘ಜಾತ್’

ಪಾಪಾ ಫ್ರಾನ್ಸಿಸಾನ್ ವಾತಿಕಾನಾಂತ್ ಭಾರತೀಯ್ ಮುಳಾಚ್ಯಾ ದೇವಸಹಾಯಮ್ ಪಿಳ್ಳೆಕ್ ಸಾಂತ್ ಮ್ಹಣ್ ಪಾಚಾರ್‌ಲ್ಲಿ ಖಬರ್ ಸಂಭ್ರಮ್ಯಾಂ ಮ್ಹಣ್ತಾನಾಂಚ್, ಕರ್ನಾಟಕಾಂತ್ ಮತಾಂತರ್ ನಿಶೇದ್ ಕಾನುನಾಕ್ ರಾಜ್ಯಾಪಾಲ್ ಗೇಲ್ಹೋಟಾನ್  ಮ್ಹೊರ್ ದಾಂಬ್ಲ್ಯಾ. ಕಥೊಲಿಕ್ ಮುಕೆಲ್ಯಾಂನಿ, ಬೆಂಗ್ಳುರ್ಚೊ ಆರ್ಚ್ ಬಿಸ್ಪ್ ಪೀಟರ್ ಮಚಾದೋಚ್ಯಾ ಫುಡಾರ್ಪಣಾರ್ ರಾಜ್ಯ್‌ಪಾಲ್ ಗೆಲ್ಹೋಟಾಕ್ ಭೆಟೊನ್ “ತುಮಿ ಮತಾಂತರ್ ನಿಶೇದ್ ಕಾನುನಾಕ್ ಅನುಮೋದನ್ ದಿಲ್ಯಾರ್ ಕಥೊಲಿಕ್ ಸಮಾಜೆಕ್ ಅನ್ಯಾಯ್ ಜಾತಾ”  ಮ್ಹಣ್ ಆಡ್ದೊಸ್ ಮಾಗ್‌ಲ್ಲೊ ತರೀ, ರಾಜ್ಯ್‌ಪಾಲಾನ್ ಕಥೊಲಿಕ್ ಸಮುದಾಯಾಚ್ಯಾ ಮಾಗ್ಣ್ಯಾಕ್ ಕಾನ್ ದಿಲ್ಲೆಪರಿಂ ದಿಸಾನಾ. ಕ್ರಿಸ್ತಾಂವ್ ಧರ್ಮಾಕ್  ಮತಾಂತರ್ ಜಾವ್ನ್ ಮಾಡ್ತಿರ್ ಮೆಲ್ಲೆ ಖಾತಿರ್ ದೇವಸಹಾಯಮ್ ಪಿಳ್ಳೆನ್ ಸಾಂತ್ ಜಾಂವ್ಚ್ಯಾಕ್ ಆನಿ ಕರ್ನಾಟಕಾಚೊ ರಾಜ್ಯ್‌ಪಾಲ್  ಗೆಲ್ಹೋಟಾನ್ ಮತಾಂತರ್ ನಿಶೇದ್ ಕಾಯ್ದ್ಯಾಕ್ ಅನುಮೋದನ್ ದಿಂವ್ಚ್ಯಾಕ್ ಶೀದಾ ಸಂಬಂದ್ ನಾ ತರೀ, ದೇವಸಹಾಯಮ್ ಪಿಳ್ಳೆಕ್ ವಾತಿಕಾನಾನ್  ಸಾಂತ್ ಮ್ಹಣ್ ಪಾಚಾರ್‌ಲ್ಲೊ ವೇಳ್ ಆನಿ ಕರ್ನಾಟಕಾಂತ್ ರಾಜ್ಯ್‌ಪಾಲ್ ಗೆಲ್ಹೋಟಾನ್ ಮತಾಂತರ್ ನಿಶೇದ್ ಕಾನುನಾಚೆರ್ ಮ್ಹೊರ್ ದಾಂಬ್‌‌ಲ್ಲೊ ವೇಳ್ ಫಕತ್ ‘ಆಕಸ್ಮಿಕ್’ ಜಾವ್ನ್ ಆಸೊಂಕ್ ಸಾಧ್ಯ್ ನಾ.

ಆತಾಂ … ದೇವಸಹಾಯಮ್ ಪಿಳ್ಳೆ ಜಾವ್ನ್ ಗೆಲ್ಲೊ ಆಜೀಕ್ ಕಾಂಯ್ 300 ವರ್ಸಾಂ ಆದಿಂ. ತಮಿಳ್ನಾಡುಚ್ಯಾ ಕನ್ಯಾಕುಮಾರಿಂತ್  ಜಲ್ಮಾಕ್ ಆಯಿಲ್ಲೊ ತೋ, ಜಾತಿವೆವಸ್ತೆಕ್ ಕಾಂಠಾಳೊನ್ ಕ್ರೀಸ್ತಾಂವ್ ಜಾಲೊ ಆನಿ ತೋ ‘ಮತಾಂತರ್’ ಜಾಲೊ, ಮಾತ್ ನಯ್ ‘ಮತ್ ಪ್ರಚಾರಕ್’ ಜಾಲೊ ಮ್ಹಳ್ಳ್ಯಾ ಕಾರಣಾಕ್ ಲಾಗೊನ್ ಉಂಚ್ಲ್ಯಾ ಜಾತಿಚ್ಯಾ ಪ್ರಭುತ್ವಾನ್ ತಾಚಿ ಖುನ್ ಕೆಲಿ ಮ್ಹಳ್ಳೆಂ ತಾಚಿ ಜಿಣ್ಯೆಕಥಾ ವಾಚ್ತಾನಾ ಕಳೊನ್ ಯೆತಾ. ಆತಾಂ, ದೆಶಾಂತ್ ಆನಿ ಪ್ರದೇಶಾಂತ್ ಮತಾಂತರ್ ನಿಶೇದ್ ಕಾಯ್ದೊ ಗಿದಾಪರಿಂ ಕಥೊಲಿಕಾಂಕ್ ಬೊಂಚಾಂವ್ಕ್ ಯೆತಾನಾ ತಿನ್ಶಿಂ ವರ್ಸಾಂ ಆದಿಂ ಮತಾಂತರ್ ಜಾವ್ನ್, ಮಾಡ್ತಿರ್ ಮೆಲ್ಲ್ಯಾ ದೇವಸಹಾಯಮ್ ಪಿಳ್ಳೆಕ್ ಸಾಂತ್ ಮ್ಹಣ್ ಪಾಚಾರುನ್ ಕಥೊಲಿಕ್ ಪವಿತ್ ಸಭಾ ಆಜ್ ಕಿತೆಂ ಸಾಂಗೊಂಕ್ ಆಶೆತಾ? ಮ್ಹಳ್ಳ್ಯಾ ಗಜಾಲಿಚೆರ್ ನಿಯಾಳ್ ಘೆಂವ್ಚಿ ಗರ್ಜ್ ಆಸಾ ಮ್ಹಣ್ ಮ್ಹಾಕಾ ದಿಸ್ತಾ.

ಆಜ್ … ಸುಕ್ಶಿಮಾಯೆನ್ ಭಂವ್ತಿ ಪಳಯ್ಲ್ಯಾರ್, ತಿನ್ಶಿಂ ವರ್ಸಾಂ ಆದಿಂ ದೇವಸಹಾಯಮ್ ಪಿಳ್ಳೆಕ್ ಗುಳೊ ಮಾರ್ನ್ ಜಿವೆಶಿಂ ಮಾರ್‌ಲ್ಲಿ ಕ್ರೂರ್ ಜಾತಿವೆವಸ್ತಾ ಆತಾಂಯ್ ತಶೀಚ್ ಆಸಾ. ಮಾತ್ ನಯ್, ಗುಳೊ ಮಾರಿನಾಸ್ತಾನಾ ಜಿವೆಶಿಂ ಮಾರ್ಚ್ಯೊ ನವ್ಯೊ ನಾಜೂಕ್ ( ಸೊಫಿಸ್ಟಿಕೇಟೆಡ್ ) ವಾಟೊ ಸೊಧುನ್ ಆಸಾ. ಫಕತ್ ಹಿಂದು ಸಮಾಜಾಂತ್ ಮಾತ್ ನಯ್, ಕ್ರೀಸ್ತಾಂವ್, ಮುಸ್ಲಿಂ ಸಮಾಜಾಂತ್ ಸಯ್ತ್ ಜಾತಿವೆವಸ್ತಾ ಅಶಿ ರೊಂಬೊನ್ ಗೆಲ್ಯಾ ಕೀ, ಆಮ್ ದೀಸ್ ಉಗ್ತ್ಯಾ ರಸ್ತ್ಯಾರ್, ಫಕತ್ ದುಸ್ರ್ಯಾ ಪಾತ್ಯೆಣೆಚ್ಯಾ, ಜಾತಿಚ್ಯಾ ಚಲಿಯೆ – ಚಲ್ಯಾಲಾಗಿಂ ಕಾಜರ್ ಜಾಲಾಂ ಮ್ಹಳ್ಳೆ ಖಾತಿರ್ ಖುನಿಯೊ ಜಾತಾತ್ ಆನಿ ಹ್ಯಾ ಕ್ರೂರ್ ಖುನಿಯಾಂಕ್ ಮಾದ್ಯಮಾಂತ್ ‘ಮರ್ಯಾದಾ ಹತ್ಯಾ’ ಮ್ಹಣ್ ರಂಗಯ್ತಾತ್.

ಕಥೊಲಿಕಾಂ ಮಧೆಂಯ್ ಬಾಮುಣ್, ಚಾರೊಡಿ, ಸುದಿರ್ ಮ್ಹಣ್ಚೆ ಭೆದ್ ಕಾಂಯ್ ಉಣೆ ನಾಂತ್. ಯಾಜಕೀಪಣಾಚೆಂ ಶಿಕಪ್ ದಿಂವ್ಚ್ಯಾ ಸೆಮಿನರಿಂತ್ ಸಯ್ತ್ ಬಾಮುಣ್ – ಚಾರೊಡಿ, ಜಾತ್ – ಕುಳಿ, ಬೊಲಿ ಮ್ಹಣ್ ಭೆದ್ ಚಲ್ತಾತ್, ದಿಯೆಸೆಜಿಂನಿ ಯಾಜಕಾಂಚ್ಯಾ ನೆಮಕ್ಪಣಾಂತೀ ಬಾಮುಣ್ – ಚಾರೊಡಿ ಘರ್ಷಣಾಂ ಜಾತಾತ್ ಮ್ಹಳ್ಳಿ ಗಜಾಲ್ ಕಥೊಲಿಕ್ ಸಮಾಜಾಂತ್ ಆಜ್ ಲಿಪ್ತಿ ಉರೊಂಕ್ ನಾ. ಆನಿ ಅಸಲ್ಯಾ ಎಕಾ ಪರೀಕ್ಶೆಚ್ಯಾ ಕಾಳಾರ್ ಕ್ರೀಸ್ತಾಂವ್ ಧರ್ಮಾಕ್ ಮತಾಂತರ್ ಜಾಲ್ಲೆ ಖಾತಿರ್ ಪ್ರಭುತ್ವಾಚ್ಯಾ ಗುಳ್ಯಾಂಕ್ ಬಲಿ ಜಾಲ್ಲ್ಯಾ, ಭಾರತೀಯ್ ಮುಳಾಚ್ಯಾ ದೇವಸಹಾಯಮ್ ಪಿಳ್ಳೆಕ್ ವಾತಿಕಾನಾನ್ ಸಾಂತ್ ಪಾಚಾರ್ಚೆಂ ಕಾಮ್ ಕೆಲಾಂ.

ಪವಿತ್ ಸಭೆಂತ್ ಸಾಂತ್ ಮ್ಹಣ್ ಪಾಚಾರಿಜಾಯ್ ತರ್ ಸಾಂತ್ / ಸಾಂತಿಣ್ ಉಮೇದ್ವಾರಾಚ್ಯಾ ನಾಂವಾರ್ ಏಕ್ ತರೀ ಅಜಾಪ್ ದಾಕಲ್ ಜಾಂವ್ಕ್ ಜಾಯ್ ಮ್ಹಳ್ಳೆಂ ಅಲಿಖಿತ್ ನಿಯಮ್ ಚಾಲು ಆಸಾ. ಆನಿ ಹಿಂ ಅಜಾಪಾಂ ನೊವೊದ್ ಠಕ್ಕೆ ಭಲಾಯ್ಕೆ ವಿಗ್ಯಾನಾಕ್ ಲಗ್ತಿಚ್. ಟ್ಯೂಮರ್ ಮಾಯಾಕ್ ಜಾಲೆಂ, ಗರ್ಭಾಂತ್ ಭುರ್ಗ್ಯಾನ್ ಕೂಸ್ ಪರ್ತಿಲಿ, ಶಸ್ತ್ರ್‌ಚಿಕಿತ್ಸಾ ನಾಸ್ತಾನಾ ಪಿಡಾ ಗೂಣ್ ಜಾಲಿ … ಅಶೆಂ ಹಿ ವಳೆರಿ ವಾಡೊನ್ ವೆತಾ. ಕನ್ಯಾಕುಮಾರಿಚ್ಯಾ ದೇವಸಹಾಯಮ್ ಪಿಳ್ಳೆಕ್ ಸಾಂತ್ ಪಾಚಾರುಂಕ್ ಕುಮ್ಕೆಕ್ ಆಯಿಲ್ಲೆಂಯ್ ಅಸಲೆಂಚ್ ಏಕ್ ಅಜಾಪ್.

Father Joseph Elphinstone about St. Lazarus Devasahayam courtesy : Vatican Radio

ಆತಾಂ … ಸಾಂತ್ / ಸಾಂತಿಣ್ ಉಮೇದ್ವಾರಾಂನಿ ತಾಂಚ್ಯಾ ಜಿವಿತಾವ್ಧೆಂತ್ ಸಮಾಜಿಕ್ ಬದ್ಲಾವಣ್ ಹಾಡುಂಕ್, ಸಮಾಜೆಂತ್ಲ್ಯಾ ಮೆರೆವಯ್ಲ್ಯಾ ಲೊಕಾಕ್ ವಯ್ರ್ ಉಕ್ಲುಂಕ್ ಕಾಡ್‌ಲ್ಲಿ ವಾಂವ್ಟ್, ಭೊಗ್‌ಲ್ಲೆ ಕಶ್ಟ್ ಆನಿ ಅಕ್ಮಾನ್, ಹೊಗ್ಡಾಯಿಲ್ಲೊ ಜೀವ್ ಸಯ್ತ್ ಸಾಂತ್ ಜಾಂವ್ಕ್ ಮುಕೆಲ್ ಮಾಪ್ ಮ್ಹಣ್ ಕಥೊಲಿಕ್ ಪವಿತ್ ಸಭಾ ಕಿತ್ಯಾಕ್ ಲೆಕಾಕ್ ಧರಿನಾ ? ಮ್ಹಳ್ಳೆವಿಶಿಂ ಮ್ಹಾಕಾ ದುಬಾವ್ ಆಸಾತ್. ಮದರ್ ತೆರೆಜಾ ತಸಲ್ಯಾ ಆವಯ್ನ್  ಸಾಂತ್ ಜಾಯ್ಜೆ ಜಾಲ್ಯಾರೀ ಪಿಡಾ ಗೂಣ್ ಕರ್ಚೆಂ, ಭಲಾಯ್ಕೆ ವಿಗ್ಯಾನಾಚಾ ಮಿತಿಕ್ ಮೆಳಾನಾತ್ಲೆಂ ಅಜಾಪ್ ಕಿತ್ಯಾಕ್ ಕರ್ನ್ ದಾಕಯ್ಜೆ ? ದೇವಸಹಾಯಮ್ ಪಿಳ್ಳೆನ್ ತಿನ್ಶಿಂ ವರ್ಸಾಂ ಆದಿಂ ಜಾತಿವೆವಸ್ತೆಚೆರ್ ದರ್ಜ್ ಕೆಲ್ಲೊ ಪ್ರತಿರೋಧ್ ಸಮಾಜಿಕ್ ಪರಿವರ್ತನಾಚ್ಯಾ ಖಂಯ್ಚ್ಯಾಯ್ ಅಜಾಪಾಕ್ ಕಿತ್ಯಾಕ್ ಉಣೊ ? ಹ್ಯಾ ಪ್ರಶ್ನಾಂಕ್ ಪವಿತ್ ಸಭೆನ್ ಜಾಪಿ ಸೊಧಿಜೆ.

ವರ್ತಮಾನ್ ಭಾರತೀಯ್ ಸಮಾಜ್, ಧರ್ಮ್ ಆನಿ ಜಾತಿಚ್ಯಾ ದ್ರುವೀಕರಣಾಂತ್ ದೇವಸಹಾಯಮ್ ಪಿಳ್ಳೆ ಜಿಯೆಲ್ಲ್ಯಾ ಕಾಳಾಪ್ರಾಸ್ ಪಾಟ್ಲ್ಯಾ ಕಾಳಾಕ್ ಪಾವ್ಲ್ಯಾ ಮ್ಹಳ್ಯಾರೀ ಆಜ್ ಚೂಕ್ ಜಾಂವ್ಚಿ ನಾ. ಫರಕ್ ಇತ್ಲೊಚ್ – ತ್ಯಾ ಕಾಳಾರ್ ಮನ್ಶ್ಯಾಕ್ ಉಂಚ್ಲೆಂ ಶಿಕಪ್ ನಾತ್‌ಲ್ಲೆಂ, ಆಜ್ ಉಂಚ್ಲೆಂ ಶಿಕಪ್ ಆಸಾ. ಪೂಣ್, ಶಿಕ್ಪಾನ್ ಮನ್ಶ್ಯಾಕ್ ಸೊಸ್ಣಿಕ್ ಕರ್ಚ್ಯಾ ಬದ್ಲಾಕ್ ಕ್ರೂರಿ ಕೆಲಾಂ. ಪಿಳ್ಳೆಚ್ಯಾ ಕಾಳಾರ್ ಪ್ರಭುತ್ವಾಚೆರ್, ಜಾತಿವೆವಸ್ತೆಚೆರ್ ಆವಾಜ್ ಉಟಯಿಲ್ಲ್ಯಾಕ್ ಮಾರ್ಲೆಂ ಮ್ಹಳ್ಳೆಂ ತರೀ ಸತ್ ಉಗ್ತಾಡಾಕ್ ಯೆತಾಲೆಂ, ಆಜ್, ಪ್ರಭುತ್ವಾಕ್ ಸವಾಲ್ ಕೆಲ್ಲ್ಯಾಕ್ ಪಯ್ಲೆಂ ‘ದೇಶ್‌ದ್ರೋಹಿ’ ಠರಾಯ್ತಾತ್ ಆನಿ ಉಪ್ರಾಂತ್ ವೆವಸ್ತಿತ್ ಜಿವೆಶಿಂ ಮಾರ್ತಾತ್. ಸಮಾಜಿಕ್ ಪರಿವರ್ತನಾ ಖಾತಿರ್ ಉಟಯಿಲ್ಲ್ಯಾ ಆವಾಜಾ ಪಾಸತ್  ‘ದೇಶ್‌ದ್ರೋಹಿ’ ಜಾವ್ನ್ ಪ್ರಭುತ್ವಾಚಾ ಹಾತಾಂತ್ ಮೆಲ್ಲೊ ಜೆಜ್ವಿತ್ ಯಾಜಕ್ ಸ್ಟ್ಯಾನ್ ಸ್ವಾಮಿ ಹ್ಯಾ ವಳೆರಿಂತ್ ಆಯ್ಲೆವಾರ್ಚಿ ಭರ್ತಿ.

ಅಸಲ್ಯಾ ಎಕಾ ಪಾಟಿಥಳಾರ್ – ಪಸಂದೆಚೆಂ ನ್ಹೆಸಣ್ ನೆಸೊಂಕ್, ಪಸಂದೆಚೆಂ ಖಾಣ್ ಖಾಂವ್ಕ್, ಪಸಂದೆಚ್ಯಾ ಮನ್ಶ್ಯಾಕ್ ಜಿಣ್ಯೆಸಾಂಗಾತಿ ಜಾವ್ನ್ ವಿಂಚುಂಕ್ ಸ್ವತಂತ್ರ್ ನಾತ್‌ಲ್ಲ್ಯಾ ಗಾಂವಾಂತ್ – ಆಪ್ಲ್ಯಾ ಪಸಂದೆಚೆಂ ಧರ್ಮ್ ವಿಂಚ್ಚೆಂ ಸ್ವತಂತ್ರ್ ಆಶೆಂವ್ಚಿ ಗಜಾಲ್ ವೆಗಿಂಚ್ ಚಿಂತ್ಪಾ ಭಾಯ್ಲಿ ಜಾತೆಲಿ. ಜಲ್ಮಾಲ್ಲ್ಯಾ ಧರ್ಮಾಂತ್ ನಿಯತ್ತೆನ್ ಜಿಯೆಂವ್ಚೆಂ ಆನಿ ತೆಂ ಪಾಳ್ಚೆಂ – ಅಶೆಂ ಏಕ್ ಮಾತ್ ವಿಂಚವ್ಣ್ ಫುಡಾರಾಂತ್ ಉರ್ತೆಲಿ.  ಅಸಲ್ಯಾ ಎಕಾ ಅಸಹಾಯಕ್ ಪರಿಸ್ಥಿತೆಂತ್ ದೇವಸಹಾಯಮ್ ಪಿಳ್ಳೆಕ್ ಪವಿತ್ ಸಭೆನ್ ಸಾಂತ್ ಮ್ಹಣ್ ಪಾಚಾರ್‌ಲ್ಲಿ ಗಜಾಲ್, ಕಥೊಲಿಕಾಂಕ್ ಆನಿ ಜಾತಿವೆವಸ್ತಾ ವಾ ಹೆರ್ ಖಂಯ್ಚ್ಯಾಯ್ ಸಮಾಜಿಕ್ ಅನಿತೆವಿರೋದ್ ಝುಜೊಂಕ್ ಕಥೊಲಿಕ್ ಧರ್ಮಾಕ್ ದೇವಸಹಾಯಮ್ ಪಿಳ್ಳೆಪರಿಂ ಮತಾಂತರ್ ಜಾಂವ್ಕ್ ಸೊಧ್ತೆಲ್ಯಾಂಕ್ ಧಯ್ರ್ ಭರ್ತೆಲಿ ? ವಾ … ಆಜ್ ಕಾಲ್ ಪಾಸುನ್ ನಯ್, ಶೆಕ್ಡ್ಯಾಂ ಪಾಸುನ್ ಕಥೊಲಿಕ್ ಮತಾಂತರಾಂತ್ ಮೆತೆರ್ ಆಸ್ಲೆ  ಆನಿ ಮತಾಂತರ್ ಜಾಲ್ಲೆಖಾತಿರ್ ಮರಣ್ ಪಾವ್‌ಲ್ಲ್ಯಾಂಕ್ ಆತಾಂ ಇಟೆಲಿಥಾವ್ನ್ ಸಾಂತ್ ಕರ್ತಾತ್ ಮ್ಹಣ್ ನವಿ ಆರೋಪ್ ಪಟ್ಟಿ ತಯಾರ್ ಕರುನ್, ಭಾರತಾಂತ್ ಆತಾಂ ಜಿಯೆಂವ್ಚ್ಯಾ ಕಥೊಲಿಕಾಂಕ್ ಝಡ್ತೆಕ್ ಉಭೆಂ ಕರುಂಕ್ ಪ್ರಭುತ್ವಾಚ್ಯಾ ಹಾತಾಕ್ ಏಕ್ ಹಾತೆರ್ ದಿತೆಲಿ?

ಆತಾಂ, ವಿಪರ್ಯಾಸ್ ಪಳಯಾ – ದೇವಸಹಾಯಮಾಚ್ಯಾ ಗಜಾಲಿಂತ್ ಕಥೊಲಿಕ್ ಪವಿತ್ ಸಭೆ ಭಿತರ್‌ಚ್ ತಾಕಾ ಸಾಂತ್ ಕರ್ತಾನಾ, ಪಿಳ್ಳೆ ಮ್ಹಳ್ಳೆಂ ಜಾತಿಚೆಂ ನಾಂವ್ ದವರಿಜೆ ವಾ ನಾಕಾ ಮ್ಹಳ್ಳೆವಿಶ್ಯಾಂತ್ ಲಾಂಬ್ ಕಾಳಾಕ್ ತಕ್ರಾರ್ ಜಾಲ್ಲೆ ದಿಸೊನ್ ಯೆತಾತ್. ನೀಲಕಂದನ್ ಪಿಳ್ಳೆ  ಆಸ್‌ಲ್ಲೊ ಮನಿಸ್ ಲಾಜರಸ್ ದೇವಸಹಾಯಮ್ ಜಾಲ್ಯಾ ಉಪ್ರಾಂತೀ ತಾಕಾ ‘ಪಿಳ್ಳೆ’ ಮ್ಹಣ್ಚೆಂ ಜಾಲ್ಯಾರ್, ಜ್ಯಾ ಜಾತಿವೆವಸ್ತೆ ವಿರೋದ್ ತೋ ಝುಜ್ತಾಲೊ, ತೀಚ್ ವೆವಸ್ತಾ ಕಥೊಲಿಕ್ ಪವಿತ್ ಸಭೆಂತ್ ಮುಕಾರುನ್ ವೆಲ್ಲೆಪರಿಂ ಜಾತಾ, ತಾಚ್ಯಾ ಝುಜಾಚೊ ಉದ್ದೇಶ್‌ಚ್ ವೆರ್ಥ್ ಜಾತಾ –  ಮ್ಹಣ್ ಜಾಣ್ತ್ಯಾಂನಿ ಪ್ರತಿರೋಧ್ ದರ್ಜ್ ಕೆಲ್ಲೊ ಆಸಾ. ವಾತಿಕಾನ್ ನ್ಯೂಸ್ ಅಧಿಕೃತ್ ಜಾಳಿಜಾಗ್ಯಾರ್ Lazarus Devasahayam: ‘A saint for new beginnings’ ಮ್ಹಣ್ ಖಬರ್ ಫಾಯ್ಸ್ ಜಾಲ್ಯಾರೀ, ಥಳೀಯ್ ಭಾರತೀಯ್ ಪವಿತ್ ಸಭೆಂತ್ (ಮಂಗ್ಳುರ್ ದಿಯೆಸೆಜಿಚ್ಯಾ ಅಧಿಕೃತ್ ಜಾಳಿಜಾಗ್ಯಾರ್ ಫಾಯ್ಸ್ ಜಾಲ್ಲೆಂ ಪೋಸ್ಟರ್ ಹಾಂಗಾಸರ್ ಫಕತ್ ದಾಕ್ಲ್ಯಾಕ್ ಮ್ಹಣ್ ದಿಲಾಂ) ಸಾಂ. ಲಾಜರಸಾಕ್ ದೇವಸಹಾಯಮ್ ಸಾಂಗಾತಾ ಪಿಳ್ಳೆ  ಉರವ್ನ್ ಘೆತ್‌ಲ್ಲೆಂ ದಿಸ್ತಾ.

ಆತಾಂ ಪ್ರಶ್ನ್, ಕಥೊಲಿಕ್ ಪವಿತ್ ಸಭೆಕ್‌ಚ್, ಸಾಂತ್ ಕರ್ತಾನಾಂಯ್ ಲಾಜರಸ್ ದೇವಸಹಾಯಮಾಚಿ ಪಿಳ್ಳೆ ಜಾತ್ ಸೊಡುಂಕ್ ನಾಕಾ ತರ್, ಸಾಂ. ಲಾಜರಸ್ ದೇವಸಹಾಯಮಾಕ್, ಭಾರತಾಂತ್ ಜಾತಿವೆವಸ್ತೆ ವಿರೋಧ್ ಝುಜ್ತಾನಾ, ಮಾಡ್ತಿರ್ ಮೆಲ್ಲೊ ಸಾಂತ್ ಮ್ಹಣ್ ಪವಿತ್ ಸಭೆನ್ ವ್ಹಡ್ವಿಕಾಯ್ ಉಲಂವ್ಕ್ ಜಾತಾ ?

► ಎಚ್ಚೆಮ್, ಪೆರ್ನಾಲ್