ಕೊಂಕ್ಣಿ ಸಮಾಜೆಕ್ ಆರ್ಸೊ ಧರ್ಚೆಂ ಪುಸ್ತಕ್ – ಪಡ್‌ಸಾದ್

ವೆವೆಗ್ಳ್ಯಾ ವಾವ್ರಾಮುಖಾಂತ್ರ್  ಕೊಂಕ್ಣಿ ಸಾಹಿತ್ ಶೆತಾಂತ್ ಅತ್ವಿಚ್ಚ್ ಛಾಪ್ ಮಾರುನ್, ಪಾಟ್ಲ್ಯಾ 35 ವರ್ಸಾಂ ಥಾವ್ನ್ ಆಪ್ಲೊ ಖಳ್ಮಿತ್ ನಾತ್‌ಲ್ಲೊ ಸಾಹಿತಿಕ್ ವಾವ್ರ್ ಕರುನ್, ಕೊಣಾಚ್ಯಾಯ್ ಪ್ರಶಂಸೆಕ್ ಲಬ್ದನಾಶೆಂ, ಕೊಂಕ್ಣಿಚ್ಚ್ ಅಪ್ಲೆಂ ಮಿಸಾಂವ್ ಕರ್ನ್ ಆಯಿಲ್ಲೊ ಮಾನೆಸ್ತ್ ವಲ್ಲಿ ಕ್ವಾಡ್ರಸ್, ಅಜೆಕಾರ್ ಹಾಣೆಂ ಲಿಖ್ಲೆಲ್ಯಾ ವಯ್ಚಾರಿಕ್ ಸಂಪಾದಕೀಯ್ ಲೇಕನಾಂಚೊ ಪುಂಜೊ ಪಡ್‌ಸಾದ್.  ಹ್ಯಾ ಬುಕಾಂತ್ 20 ಲೇಖನಾಂ ಪ್ರಸ್ತುತ್ ಜಾಲ್ಯಾಂತ್. ಹಾಂವ್ ವಲ್ಲಿಚೊ ಮಿತ್ರ್ ಆನಿ ಅಭಿಮಾನಿ ಮ್ಹಳ್ಳೊ  ಸಂಬಂದ್ ಬಗ್ಲೆಕ್ ದವರ್ನ್, ಎಕ್ ವಾಚ್ಪಿ ಜಾವ್ನ್ ನಿಶ್ಪಕ್ಷ್ ಜಾವ್ನ್ , ಬರಯ್ಣಾರಾನ್ ಹ್ಯಾ ಲೇಖನಾಂನಿ ದಾಖಲ್ ಕೆಲ್ಲಿ ಅಭಿವ್ಯಕ್ತಿ, ಸಂಘರ್ಶ್ ಆನಿ  ಅನ್ಮೋಲ್ ಅನ್ಬೋಗ್ ಸಾಹಿತಿಉಕ್ ನದ್ರೆನ್ ಕಶೆಂ ಚಡ್ ರುಚಿಕ್ ಕರ್ಯೆತೆಂ ಮ್ಹಣ್ ದಾಖವ್ನ್ ದಿಂವ್ಚೆಂ ಲ್ಹಾನ್ ಪ್ರೇತನ್ ಹಾಂಗಾಸರ್ ಕರ್ಚೆಂ ಧಯ್ರ್ ಘೆತಾಂ.

ಪಡ್‌ಸಾದ್ ಪುಸ್ತಕಾಂತ್ ಮಿಸ್ಳೆಲ್ಲಿ ಕೊಂಕ್ಣಿ ಭಾಸ್ ವಾಪಾರ್ಲ್ಯಾ. ಅಮಿ ಜಾಣಾಂವ್ ಗೊಂಯ್ಚೆ ಕೊಂಕ್ಣಿ ಸಬ್ದ್ ಆನಿ ಮಂಗ್ಳುರ್ಚೆ ಸಬ್ದ್ ಎಕ್ ಥರ್ ನಾಂತ್. ಮಹಾರಾಶ್ಟ್ರ ಕೊಂಕ್ಣಿ ಅನಿ ಕಾರ್ವರೀ ಕೊಂಕ್ಣೆಂತ್ ಖೂಬ್ ತಪವಾತ್ ಆಸಾ. ಉಲವ್ಣೆ ಜಾಂವ್, ಉಚ್ಚಾರ್ ಜಾಂವ್, ಬರಯ್ಲೆಲೆಂ ಜಾಂವ್ ಅಪ್ಲೆ ಮೂಳ್ ದವರ್ನ್ ಬರಯ್ಲ್ಯಾರ್ ಎಕಾ ವರ್ಗಚ್ಯಾ ವಾಚ್ಪ್ಯಾಂಕ್ ತರೀ ಸಂಪೂರ್ಣ್ ರೀತಿನ್ ಪಾವ್ತಾ. ಸಬಾರ್ ಲೇಖನಾಂನಿ ಲೇಖಕಾನ್ ವೆವೆಗ್ಳ್ಯಾ ಬೊಲಿಂತ್ಲೆ ಸಬ್ದ್ ವಪಾರ್ಲ್ಯಾತ್. ಹೆರ್ ಭಾಶೆಚೊ ಪ್ರಭಾವ್ ವಿಶೇಸ್ ಜಾವ್ನ್ ಮರಾಠಿ, ಗೊಂಯ್ಚ್ಯಾ ಕೊಂಕ್ಣೆಂತ್ಲೆ ಸಬ್ದ್ ವಾಚುಂಕ್ ಮೆಳ್ತಾತ್. ಎಕೆ ವಾಟೆನ್ ಹೆಂ ಚೂಕ್ ನ್ಹಯ್. ಸಾಹಿತ್ಯಾಚಿ ವಾಡಾವಾಳ್ ಜಾತಾ ಅನಿ ಆಮಿ ಸೀಮೊ ಘಾಲ್ನ್ ರಾಂವ್ಚೆಂ ಸಾರ್ಕೆಂ ನ್ಹಯ್ ಮ್ಹಳ್ಳೊ ವಾದ್ ಅಸೊಂಕ್ ಪುರೊ. ಅನ್ಯೇಕೆ ವಾಟೆನ್ ಎಕೆ ಬೊಲಿಂತ್ಲೊ ಸಬ್ಡ್ ಅನ್ಯೇಕ್ ಬೌಗೊಳಿಕ್ ಗಾಂವಾಂತ್ಲ್ಯಾ ಬೊಲಿಕ್ ಅನರ್ಥ್ ಜಾತಾ. ಆಮಿ ಇಷ್ಟಾಂಕ್ ಅನಿ ದುಸ್ಮಾನಾಂಕ್ ದೊಗಾಂಯ್ಕೀ ಎಕಾಚ್ ವೆಳಾರ್ ಸಮದಾನ್ ಕರುಂಕ್ ಜಾಯ್ನಾ.

ಕೊಂಕ್ಣಿ ಪ್ರಸ್ತುತ್ ಕೆಲ್ಲಿ ರೀತ್ ಬರೀ ಅಸಾ. ಥೊಡ್ಯಾ ಲೇಖನಾಂನಿ ವೆವೆಗ್ಳ್ಯಾ ಸಂಗ್ತಿಂಚೊ ಉಲ್ಲೇಖ್ ಜಾತಾ, ಮೂಳ್ ಸಂದೇಶಾಕ್ ಅತೀರೇಕ್ ಜಾಲ್ಯಾರೀ ಲೇಖಕ್ ಪಾಟಿಂ ವಿಶಯಾಕ್ ಹಾಡ್ತಾ. ಸೋಂಪಿ, ಸಾದಾ, ಸುಡಾಳ್ ಅನಿ ಸಮ್ಜಾಸಾರ್ಕಿ ಕೊಂಕ್ಣಿ ಅನಿ ವಿಶಯಾದಾರಿತ್ ಬರವ್ಪ್ ಲೊಕಾಕ್ ರುಚ್ತಾ. ಲೇಖನಾಂನಿ  “ಕೊಂಕ್ಣಿ” ಅನಿ ಕೊಂಕ್ಣೆ ಖಾತಿರ್ ವಾವ್ರ್ ಹ್ಯಾ ಪಾಠ್ ಥಳಾಚೆರ್ ಸಗ್ಳಿ ಲೇಖನಾಂ ವ್ಹಾಳ್ತಾತ್. ಸಂಶೋದಾತ್ಮಾಕ್ ಅಂಕಿ ಅಂಶ್ ದಿಲ್ಲೆ ತರ್ ಹ್ಯಾ ಪುಸ್ತಕಾಚೊ ಭರ್ಮ್ ಆನಿ ಜಡಾಯ್ ಚಡ್ತಿ ಮ್ಹಣ್ ಮ್ಹಜಿ ಅಭಿಪ್ರಾಯ್.

ಹ್ಯಾ ಪುಸ್ತಕಾಂತ್ ಮುಖ್‌ಪಾನಾರ್ ಹಿಂ ಲೇಖನಾಂ ಸಂಪಾದಕೀಯ್ ಮ್ಹಣ್ ಲಿಖ್ಲಾಂ ತರೀ ಸರ್ವ್ ಲೇಖನಾಂ ಸಂಪಾದಕೀಯ್ ತಶೆಂ ಬೊಗಾನಾಂತ್, ಹಾಂತುಂ ಉಂಚ್ಲಿಂ ಉಲವ್ಪಾಂ, ಅಪ್ಲೊ ವಯಕ್ತಿಕ್ ಅನ್ಬೋಗ್ ಆನಿ ಕೊಂಕ್ಣಿ ಲೊಕಾ ಭೆಟೆಚೆ ಕಳ್ಕಳೆಂ, ಕೊಂಕ್ಣಿ ಭಾಶೆಚ್ಯಾ ಪ್ರಗತೆಚಿಂ ಸಪ್ಣಾಂ ಆಸಾತ್. ಥೊಡಿಂ ಲೇಕನಾಂ ತಾರ್ಕಿಕ್ ತರ್ ಥೊಡಿಂ ವೈಚಾರಿಕ್. ಪಡ್‌ಸಾದ್ ಪುಸ್ತಕಾಂತ್ ಪ್ರಸ್ತುತ್ ಕೆಲ್ಲಿಂ ಹರ್ ಲೇಖನಾಂ ವೈಚಾರಿಕ್ ನ್ಹಯ್ ಅನಿ ಸಂಪಾದಕೀಯ್ ನ್ಹಯ್. ಪ್ರಸ್ತುತ್ ಕಾಳಾಕ್ ಲೇಕಕಾನ್ ಅಪ್ಲ್ಯಾ ನದ್ರೆನ್ ಪಳೆವ್ನ್, ಅಪ್ಲ್ಯಾ ಅನ್ಬೋಗಾನ್ ಪಾಜುನ್, ಅಪ್ಲ್ಯಾ ಚಿಂತ್ಪಾದಾರಿನ್ ಬೆಂಡುನ್ ಪುಡ್ಲ್ಯಾ ಕೊಂಕ್ಣಿ ಪರ್ಜೆಕ್ ಉಬಿ ಕೆಲ್ಲಿ ವಾಟ್, ಎಕ್ ಹಾತ್ ಖಾಂಬೊ, ಎಕ್ ಮಾರ್ಗ್‌ದದರ್ಶಿ ತಶೆಂ ಮ್ಹಾಕಾ ಭೊಗ್ತಾ. ಕಾಂಯ್ ಥೊಡಿಂ ಲೇಖನಾಂ ನಿಶ್ಟುರಾಯೆನ್ ಅಪ್ಲಿ ದೂಖ್ ಉಚಾರ್ಚಿಂ “ಪಡ್‌ಸಾದ್” ಪುಸ್ತಕಾಂತ್ ಪ್ರಸ್ತುತ್ ಜಾಲ್ಯಾಂತ್.

ಲೇಖಕ್ ಅಪ್ಲೆ ಚಿಂತಾಪ್ ಲೊಕಾ ವಯ್ರ್ ಥಾಪಿನಾ. ವಿಶಯ್ ಸಾದ್ಯಾ ವಾಚ್ಪ್ಯಾಂಕ್ ಪಾವಾಯ್ತಾ. ಅಪ್ಲಿಂ ಧೋರಣಾಂ/ಧ್ಯೇಯ್ ವಾಚ್ಪ್ಯಾ ಥಂಯ್ ಥಾಪಿನಾ. ಹ್ಯಾ ಪುಸ್ತಾಕಾಂತ್ಲಿ 20 ಲೇಖನಾಂ ಹಾಕಾ ಸಾಕ್ಸ್. ಲೇಖಕಾಚೊ ಉಲೊ ಲೊಕಾಕ್ ಜಾಗಂವ್ಚೊ ಆನಿ ಚತ್ರಾಯ್ ದಿಂವ್ಚೊ ಮಾತ್.

ಹ್ಯಾ ಪುಸ್ತಕಾಂತ್ ಲೇಖಕಾಚಿ ಕೊಂಕ್ಣೆ ಥಂಯ್ ಅಸ್ಚಿ ಕಾಳ್ಜಿ ಅನಿ ಹುಸ್ಕೊ ಉಟೊನ್ ದಿಸ್ತಾ. ವೀಸ್ ಲೇಖನಾಂ ಪಯ್ಕಿ 16 ಕೊಂಕ್ಣಿ, ಕೊಂಕ್ಣೆಕ್ ಲಗ್ತಿ. ಲೇಖನಾಂ ಸಕಾಳಿಕ್ ನ್ಹಯ್ ತರೀ ಸರ್ವ್‌ಕಾಳಿಕ್ ಉಪ್ಯೊಗಾಚೊ , ಗರ್ಜೆಚಿ ಮಾಹೆತ್ ಅನಿ ಕೊಂಕ್ಣೆ ವಯ್ಲೊ ಖತ್ಕೊತೊ ಮೋಗ್ ವ್ಯಕ್ತ್ ಕರ್ತಾತ್.

ಲೇಕಕ್ ಥೊಡ್ಯಾ ಕಡೆ ಘುಸ್ಪೊಡ್ಲಾ ಯಾ ಮಲ್ಟಿಪಲ್ ವಿಶಯ್ ಎಕೆ ಲೇಖನಾಂತ್ ಹಾಡುನ್ ಅಪ್ಲೊ ವಾದ್ ವಾಚ್ಪ್ಯಾಂಕ್ ಸೊಡ್ತಾ. ನಿದರ್ಶನಾಕ್ “ಮಾಸ್ಕ್, ಶಿಕ್ಷಣ್ ಅನಿ ಯೋಗ್ಯತಾ” (ಪಾನ್ 15) ಲೇಖಕ್ ಅಪುರ್ಬಾಯೆನ್ ಅಮ್ಚೆ ಅದ್ಲೆ ದೀಸ್, ವಾವ್ರ್, ನಾಗರಿಕತಾ, ಪ್ರಕೃತೆ ಸಂಗಿಂ ಸಂಬಂಧ್ ವಿವರಿತಾ. ವಾಚ್ತಾನಾ ವೆಗ್ಳ್ಯಾಚ್ಚ್ ಎಕಾ ಸಂಸಾರಾಕ್ ಅಪವ್ನ್ ವರ್ತಾ. “ಹ್ಯಾ ಬದ್ಲಾವಣೆಂತ್ ಅಮಿಂ ಕಿತೆಂ ಹೊಗ್ಡಾವ್ನ್ ಅಯ್ಲ್ಯಾಂವ್ ತೆಂ ನಿಯಾಳ್ ಕರ್ಚೊ ಮ್ಹಜೊ ಇರಾದೊ”(ಪಾನ್ 16) ಮ್ಹಣ್ತಾ ಲೇಕಕ್. ಅನಿ ಅಚಾನಕ್ (ಪಾನ್ 17) ಕೊಂಕ್ಣಿ ಭಾಸ್, ಕೊಂಕ್ಣಿ ಕಾರ್ಯಿಂ, ಸರ್ಕಾರಿ ದುಡು ಕಸೊ ಅನ್ನಾಡ್ಪನಾನ್ ಫಾರ್ತಾತ್, ಮುಂಬಯ್ ಶೆರಾಂತ್ “ಕೊಂಕ್ಣಿ ಅಕಾಡಮಿ” ನಾ ಅಸ್ಚೆಂ ಉಣೆಪಣ್, ಕೊಂಕ್ಣಿ ಚಳ್ವಳ್ ಕರ್ತೆಲ್ಯಾಂಕ್ ಕೊಂಕ್ಣೆಚಿ ಸಾಳಾಂ ಪಾಳಾಂ ಸೊಡ್ ವಯ್ರ್ ದಿಸ್ಚೆಂ ಖೊಲೆಗೀ ಖೊಲಿಯೊ ತೆಂಯೀ ನೆಣಾಂ ಅಸ್ಚೆಂ ದೌರ್ಬಾಗ್ಯ್ ಮ್ಹಣ್ ಸುಡಾಳ್ ಉತ್ರಾಂನಿ ಸಮ್ಜಾಯ್ತಾ. ಅನಿ ಪರತ್ ಲೇಖನಾಚ್ಯಾ ವಿಶಯಾಕ್ ಯೇವ್ನ್ ಕಸ್ಲಿ ಯೋಗ್ಯತಾ, ಶಿಕಾಪ್ ಅಮ್ಚ್ಯಾ ಮುಕೆಲ್ಯಾಂಕ್ ಅಸಾ ಅನಿ ಕಶೆಂ ತೊಂಡ್ ದಾಂಪುನ್, ಮಾಸ್ಕ್(ಮುಖ್ಡೆಂ) ಘಾಲುನ್ ಕೊಂಕ್ಣಿ ಶೆತಾಂತ್ ಹಾತ್ ಮೆಳೆಂ ಕರಿನಾಶೆಂ ಕೃಶಿ ಕರ್ತಾತ್ ಅನಿ ನಾಂವ್ ಜೊಡ್ತಾತ್ ತೆಂ ಮಾರ್ಮಿಕ್ ರೀತಿನ್ ಸಾದರ್ ಕರ್ತಾ. ಹಾಂಗಾ ದೋನ್ ಜಬ್ಬೊರ್ ವಿಶಯ್, ಗುಂಡಾಯೆನ್ ಅನಿ ಬಾರ್ಕಾಯೆನ್ ಸಂಸೊದಾತ್ಮಾಕ್ ಪ್ರಸ್ತುತ್ ಕರ್ಯೆತ್ ಅಸ್ಲೆ ತರೀ ಲೇಖಕ್ ಹಾಂಗಾ ಸಂಕೀರ್ಣ್ ರೀತಿನ್ ವಾಚ್ಪ್ಯಾಂಕ್ ತುಲನ್ ಕರುಂಕ್ ಸೊಡ್ತಾ ತಶೆಂ ಭೊಗ್ತಾ.

ಕೊಂಕ್ಣಿ ವೆದಿ ಉಲವ್ಪ್ ಅನಿ ಬರವ್ಪ್ ದೋನ್ ವೆವೆಗ್ಳೆ ವಿಶಯ್. ಪಡ್‌ಸಾದ್ ಪುಸ್ತಕಾಚೆಂ ಪ್ರೀಂಟ್ ಜಾಂವ್ಚ್ಯಾದಿಂ ಜರ್ ಎಕ್ ನದರ್ ಬರ್ಪಾಂ ವಯ್ರ್ ಘಾಲ್ಲಿ ತರ್ ಥೊಡಿ ತಿದ್ವಣ್ ಬುಕಾಚೊ ಭರ್ಮ್ ಚಡಯ್ತಿ ಖಂಡಿತ್. ಪಾನ್ 20 ಡಿಜಿಟಲ್ ಕೊಂಕ್ಣೆ ಪುಡಾರ್ ವಯ್ರ್ ಕೆಲ್ಲೊ ಉಲವ್ಪ್ ಸಾದಾರ್ ಕೆಲಾಂ ಅನಿ ನಿಮಾಣ್ಯಾ ಕಡ್ವ್ಯಾಂತ್ “ಹಿ ಡಿಜಿಟಲ್ ಪತ್ರಿಕಾ ಅತಾಂ ತುಮ್ಚೆಂ ಹಾತಿಂ ಅಸಾ….” ಮ್ಹಣ್ತಾನಾಂ ಪುಡಾರಾವಿಶಿಂ ಲೇಖಕ್ ಉಲಾಯ್ತಾ ಜಾಂವ್ಕ್ ಪುರೊ. ಪುಣ್ ಸಗ್ಳ್ಯಾ ಲೆಕನಾಂತ್ ವೆವೆಗ್ಳ್ಯಾ ಬೊಲಿಂತ್ಲೆ ಸಬ್ದ್ ವಾಪಾರ್ಲ್ಯಾತ್. ಎಕೆ ಪರಿಸರಾಂತ್ಲೆ ಸಬ್ದ್ ಅನಿ ಎಕೆ ಗಾಂವಾಂತ್ ಅಬಾಸ್ ಅರ್ಥ್ ದಿತಾತ್ ಜಾಲ್ಲ್ಯಾನ್ ಎಕ್‌ಚ್ ಮಾಪಾಚಿ ಬೊಲಿ ವಾಪರ್‌ಲ್ಲಿ ತರ್ ಬರಿ ಅಸ್ತಿ.

ಲೇಖಕ್ ಜೆಂ ಕಿತೆಂ ಚಿಂತಾ, ಜೆಂ ಕಿತೆಂ ಲಿಖ್ತಾ, ತೆಂ ಪಾಳ್ತಾ. ಸಗ್ಳ್ಯಾ ಲೆಖನಾಂನಿ ತಾಚೊ ದಿಶ್ಟಾವೊ ಕೊಂಕ್ಣಿ ಅನಿ ಕೊಂಕ್ಣೆಚಿ ಪ್ರಗತಿ. ತಾಕಾ ಗಡಿಚಿ ಬಂದಡ್ ನಾ, ಬೋಲಿಚಿ ಪರ್ವಾನಾಂ. ಕೊಂಕ್ಣಿ ಭಳಾದಿಕ್ ಜಾಯ್ತ್ ತರ್ ಅಪ್ಲಿ ಸೆವಾ, ವಾವ್ರ್ ಸಾರ್ಥಕ್ ಮ್ಹಳ್ಳೊ ಸುಸ್ಕಾರ್ ತಾಚೊ. ತ್ಯಾ ಪಾಟ್ ಥಳಾರ್ ತೊ ಭವ್ತಿಕ್ ಅನಿ ತಾತ್ವಿಕ್ ಸಂಸಾರಾ ಮಧೆಂ ಗೀಟ್ ವೊಡ್ತಾ. ಜಾಂವ್ಕ್ ಪುರೊ ಎಕೆ ಕಾಳಾರ್ ಧಾರ್ಮಿಕಾಂನಿ ತಾಂಚಿಂ ಪಾಳಾಂ ಘಟ್ ಕರುಂಕ್ ಥಳೀಯ್ ಭಾಸ್, ಜಿ ಕೊಂಕ್ಣಿ ಶಿಕಾಜೆ ಪಡ್ಲಿ, ವಾಗಾಯ್ಜೆ ಪಡ್ಲಿ ಅನಿ ಧರ್ಮ್ ಪ್ರಚಾರುಂಕ್ ಎಕ್ ಅಯ್ದ್ ತಶೆಂ ವಾಪಾರಿಜೆ ಪಡ್ಲೆಂ. ಪುಣ್ ಅಜ್ ಲೇಖಕ್ ಶಿಣ್ ಉಚಾರ್ತಾಕೀ ಅಮ್ಚಿ ಸಮಾಜ್ ‘ಧರ್ಮ್ ಕೇಂದ್ರಿತ್’ ಜಾಲ್ಯಾ, ‘ಭಾಸ್ ಅನಿ ಸಂಸ್ಕ್ರತಿ ಕೇಂದ್ರಿತ್’ ನ್ಹಯ್. ಜರ್ ಆಮ್ಚೆ ಲ್ಹಾನ್ ಸಮುದಾಯೆ ಭಿತರ್ ಅಸ್ಚೆ ವಾದ್, ಪ್ರಮಾಣಿಕರಣ್, ಉಲವ್ಪಾಂತ್ ತರೀ ಎಕ್ ಸಾಮಾನ್ ರೀತ್ ಹಾಡ್ಲ್ಯಾರ್ ಉಬೆ ಜಾಲ್ಲೆ ಸಮಸ್ಯೆ ಉಣೆ ಕರುನ್ ನವಿ ವಾಟ್ ರಚ್ಯೆತ್ ಕೊಣ್ಣಾ? ಹೊ ಉಲೊ ಸಾಹಿತಿಂಕ್, ಬರಯ್ಣಾರಾಂಕ್ ಮಾತ್ ನ್ಹಯ್, ಸಂಗೀತ್, ಕಲಾ, ನಾಟಕ್ ಹರ್ಯೆಕಾ ಪ್ರಕಾರಕ್ ಜಾಗ್ವಣೆಚೆಂ ಠೊಕೆ ಮಾರ್ತಾ. ಅಮ್ಚೆ ವಾಚ್ಪಿ ಆನಿ ಬರವ್ಪಿ ಕೊಂಕ್ಣಿ ಪುಡೆಂ ವರೊಂಕ್ ಸಲ್ವಲ್ಯಾತ್ ತೆಂ ಉಗ್ತ್ಯಾನ್ ಲೇಖಕ್ ಉಲ್ಲೇಖ್ ಕರಿನಾ ಪುಣ್ “ಧಾರ್ಮಿಕ್ ಶೆತ್‌ಚ್ ಅಮ್ಚೊ ಸಂಸಾರ್” ಹ್ಯಾ ವರ್ತುಲಾಂತ್ ಆಮ್ಚೆಂ ಚಿಂತಾಪ್ ಅನಿ ಬಾಂಯ್ತ್/ತಳ್ಯಾಂತ್ ಭಾಂದ್‌ಲ್ಲೆಂ ಉದಕ್ ಖಂಯ್ ವ್ಹಾಳೊಂಕ್ ಸಾದ್ಯ್? ಸವಾಲ್ ವಾಜ್ಬಿ ತರಿ ಆಮ್ಚೆ ಬರವ್ಪಿ ಸಮಾಜಿಕ್ ಜವಾಬ್ದಾರೆಂತ್ ಸಲ್ವಾಲ್ಯಾತ್ ಮ್ಹಣೊಂಕ್ ಲೇಖಕ್ ವಿಸ್ರಾನಾಂ.

ಇತ್ಲೆಂ ಮ್ಹಣ್ತಾನಾ ಕೊಣ್‌ಯೀ ಏಕ್ ಲೇಖಕ್ ಅಪ್ಲಿ ಸಮಾಜಿಕ್ ಜವಾಬ್ದಾರಿ ಕಿತ್ಲಿ ಪಾಳ್ತಾ? ತೆಂ ಸವಾಲ್ ದೊಸ್ತಾ. ಪಡ್‌ಸಾದ್ ಪಾನಾಂನಿ ತಾಕಾ ಸೊಂಪಿ ಜಾಪ್ ಲಾಬ್ತಾ. ವಲ್ಲಿ ಕ್ವಾಡ್ರಸ್, ಅಜೆಕಾರ್ ಎಕ್ ವ್ಯಕ್ತಿ ಜಾವ್ನ್ ತಾಚಿಂ ಮನ್ಶಾಪಣಾಚಿಂ ಮೌಲ್ಯಾಂ ಹಾಂವ್ ಹಾಂಗಾ ದುಂಪಾಯ್ನಾ. ಪಾನ್ 77 ಹಾಚೆರ್ “ಎಕ್ ನವೊ ಸಂಸಾರ್” ವಾಚುನ್ ಕಾಡ್ಲ್ಯಾರ್ ಲೇಖಕಾಚೆಂ ಕಾಳಿಜ್ ಸಮಾಜಿಕ್ ಕಾಳ್ಜೆಕ್ ಕಶೆಂ ಸ್ಪಂದನ್ ಕರ್ತಾ ತೆಂ ರುಜು ಜಾತಾ. ಹೆಂ ಲೇಖನ್ ಕೊಂಕ್ಣೆ ಖಾತಿರ್ ವಾವುರ್‌ಲ್ಲ್ಯಾ ಸೊಜೆರಾಚೆಂ ದುಖಾಳ್ ಚಿತ್ರಣ್ ದಿತಾ ತರೀ ‘ಪಡ್‌ಸಾದ್’ ಚಿಂತ್ಪಾ ಉದ್ದೇಶಾಂತ್ ಹೆಂ ಲೇಖನ್ ಅತ್ವೆಂಚ್ಚ್ ದಿಸ್ತಾ.

ಪಾನ್ 85, “ಕೊಂಕ್ಣಿ ನಾಟಕ್ – ಎಕ್ ವಿಚಾರ್” ಲೇಖನ್ ಹಾಂಗಾ ಎಕ್ ವರ್ದಿ ತಶಿ ಪ್ರಸ್ತುತ್ ಜಾತಾ ಅನಿ ಅಪ್ಲ್ಯಾ ಜಿಣ್ಯೆ ವಾಟೆರ್ ದೆಖ್ಲೆಲ್ಯಾ ನಾಟಕ್ ಅನಿ ನಾಟಕಿಸ್ತಾಚೆಂ ವಿವರಣ್ ಸೊಡ್ಲ್ಯಾರ್ ಹೆಂ ವಯ್ಚ್ಯಾರಿಕ್ ಲೇಖನ್ ಮ್ಹಣ್ ಬೊಗಾನಾ. ಪಾನ್ 89, “ಮಯಾನಗರಿ, ಜೊಪಡ್ ಪಟ್ಟಿ ಅನಿ ವಯ್ರಸ್” ಯೀ ಹ್ಯಾಚ್ಚ್ ಸ್ಥರಾಚೆಂ ಅನಿ ಕಾಲೆತಿಚೆಂ ಲೇಖನ್ ಜಾವ್ನ್ ಆಸಾ.

ವಲ್ಲಿ ಕ್ವಾಡ್ರಸಾಚ್ಯಾ ಬರ್ಪಾಂನಿ ಜಬರ್ದಸ್ತ್ ಸವಲಾಂ ಅಸಾತ್, ದುಖಿ ವ್ಯಕ್ತ್ ಜಾತಾತ್, ನಿರಾಶಾ ನಿಶೆತಾ, ಧರ್ಮ್ ಆನಿ ರಾಜಕೀಯ್ ಥಾವ್ನ್ ಪಯ್ಸ್ ರಾವೊನ್ ಹ್ಯಾ ದೋನ್ ವಿಶಯಾಂಕ್‌ಚ್ ಚಿಮ್ಟೆ ಕಾಡ್ತಾ. ಕೊಣ್ ಫುಡಾರಿ ಕೊಂಕ್ಣಿ ಉದ್ದಾರ್ ಕರಿಜೆ ಆಸ್ಲೆಂ ತಾಂಚೆಂ ಮುಕ್ಡೆಂ ಅಪುರ್ಭಾಯೆನ್ ಅನಾವರಣ್ ಕರುನ್ ಕೊಂಕಣೆಚ್ಯಾ ಫುಡಾರಾವಿಶಿಂ ಸವಾಲಾಂ ಉಭಿಂ ಕರ್ತಾ.

ಥೊಡಿಂ ತುಕ್ಲಾಯ್ಲೆಲಿ ಸವಲಾಂ ಹ್ಯಾ ಪುಸ್ತಕಾಂತ್ ಅಸಾತ್, ತ್ಯಾ ವಯ್ರ್‌ಚ್ಚ್ ಬಾರ್ಕಾಯೆಚಿಂ ಲೆಖನಾಂ ಬರವ್ಯೆತ್. ವೆಗ್ಳಿಂಚ್ಚ್ ಲೇಖನಾಂ, ಸಂವಾದ್, ಕಾಮಾಸಾಳಾಂ, ವಿಚಾರ್‌ಸಾತಿಂ, ಬಾಸಾಭಾಸ್ ಕರುಂಕ್ ಉಂಚ್ಲೆ ವಿಶಯ್ ಅಸಾತ್. ಲೇಖಕಾನ್ ವಿಂಚ್‌ಲ್ಲೆ ವಿಶಯ್ ಖಂಚ್ಯಾಯ್ ಶಿಕ್ಪಾ ಶಾಳಾಂತ್, ಯುನಿವರ್ಸಿಟಿಂತ್ ಸಾದರ್ ಕರ್ಯೆತ್ ತಸಲೆ. ಲೇಖಕಾನ್ ಉಲ್ಲೇಕ್ ಕೆಲ್ಲ್ಯೊ  ಹೆರ್ ಥೊಡ್ಯೊ  ಗಜಾಲಿ, ವಿಶಯ್ ಜಾವ್ನಾಸಾತ್: ಮಹಾರಾಶ್ಟಾಂತ್ ಕೊಂಕ್ಣಿ ಸಾಹಿತ್ಯ್ ಅಕಾದಮಿ ಕಿತ್ಯಾಕ್ ನಾಂ?, ಲಿಪಿ ವಾದ್-ವಿವಾದ್ ಲಾಬ್ ಕೊಣಾಕ್?, ಕಷ್ಟೊಂಚ್ಯೆ ಕೊಂಕ್ಣಿ ಬರಯ್ಣಾರ್ ಅನಿ ಕಲಾಕಾರ್, ವಿಮರ್ಸೊ ಅನಿ ವಿಶ್ಲೇಷಣ್ ಕಶೆಂ ಕರ್ಯೆತ್?, ಕೊಂಕ್ಣೆಂತ್ ಬರಂವ್ಕ್ ಕಳನಾತ್ಲೆ ಬರವ್ಪಿ ಅನಿ ಕವಿ , ಕೊಂಕ್ಣಿ ಭಾಸೆಚಿ ಸರ್ಜರಿ, ಅಮ್ಚ್ಯಾ ಸಮುದಾಯಾಂತ್ಲ್ಯೊ ರೀತಿ, ಸಂಸ್ಕ್ರತಿ ಅನಿ ವಿಕ್ರತಿ, ಕಾರ್ಯೆ ನಿರ್ವಾಹಣ್, ಸುಂಕಾಣ್, ಕೊಂಕ್ಣೀ ಟಿವಿ ಪ್ರೊಗ್ರಾಮ್ಸ್ ಅನಿ ಕೊಂಕ್ಣಿ ಖುನ್, ಅವಾರ್ಡಾಂ ಅನಿ ತಾಂಚಿಂ ಅರ್ಹತಾ … ಇತ್ಯಾದಿ.

ಅಶೆಂ ಸಬಾರ್ ವಿಶಯ್ ಅನ್ಬೋಗ್, ಗಿನ್ಯಾನ್, ಸಂಸೊದ್ ಅನಿ ಹೆರಾಂಚೆ ವಿಚಾರ್ ಘೆವ್ನ್ ಅತ್ವೊಚ್ಚ್ ದಸ್ತಾವೇಜ್ ಸಾರ್ಕೊ ಪುಸ್ತಕ್ ವಲ್ಲಿ ಕ್ವಾಡ್ರಸ್ ಅಜೆಕಾರ್ ಬರಯ್ತೆಲೊ ಮ್ಹಳ್ಳೊಚ್ ಮ್ಹಜೊ ಅಶಾವಾದ್. ತಾಚ್ಯಾ ಬರ್ಪಾಂಚೊ ತೀರ್ಲ್ ‘ಕೊಂಕ್ಣಿ’ ಮಾಸ್’ಯೀ ‘ಕೊಂಕ್ಣಿ’ ಹಾಡಾಂಯೀ ‘ಕೊಂಕ್ಣಿ’ ಅನಿ ರಗ್ತಾ ವಾಳೊಯೀ ‘ಕೊಂಕ್ಣಿ’ಚ್ಚ್.

ಲೋಕ್‌ಮತ್ ನೇಮಾಳೆಂ ತಶೆಂಚ್ ಮಾಧ್ಯಮಾಚೊ ದಿರೆಕ್ತೊರ್, ಪ್ರಧಾನ್ ಸಂಪಾದಕ್ ರಾಜು ನಾಯ್ಕಾನ್ ‘ಪಡ್‌ಸಾದ್’ ಪುಸ್ತಕಾಕ್ ಪಯ್ಲೆಂ ಉತಾರ್ ಲಿಖ್ಲಾಂ, ಶೈಲೇಂದ್ರ್ ಮೆಹ್ತಾನ್ ಪ್ರಸ್ತಾವನ್ ತಶೆಂಚ್ ಅಖಿಲ್ ಭಾರತೀಯ್ ಕೊಂಕ್ಣಿ ಪರಿಷತ್ ಅಧ್ಯಕ್ಷ್ ಉಷಾ ರಾಣೆನ್ ಪುಸ್ತಕಾಕ್ ಸೊಬಾಗೆಚಿಂ ಉತ್ರಾಂ ಬರಯ್ಲ್ಯಾಂತ್. 126 ಪಾನಾನಿಂ ಭರ್‌ಲ್ಲೆಂ ಹೆ ಪುಸ್ತಕ್ ವಲ್ಲಿ ಕ್ವಾಡ್ರಸಾಚ್ಯಾ ಸಂಪಾದಕೀಯ್ ಬರ್ಪಾಂಚೆಂ ತಿಸ್ರೆಂ ಆನಿ ಆಸಾವಾದಿ ಪ್ರಕಾಶನಾಚೆಂ 50 ವೆಂ ಪುಸ್ತಕ್ ಜಾವ್ನಾಸಾ.

► ಜಿಯೋ ಅಗ್ರಾರ್