ಸಾಂ. ಪ್ರಾನ್ಸಿಸ್ ಸಾವೆರಾಕ್ ಸಮರ್ಪಿಲ್ಲ್ಯಾ ಇಜಯ್ ಫಿರ್ಗಜೆಚ್ಯಾ ಸಿಮೆಸ್ತ್ರಿಂತ್ ಅಧಿಕೃತ್ ಥರಾನ್ ಪುರ್ಲ್ಲಿಂ ಜೋರ್ಜ್ ಫೆರ್ನಾಂಡಿಸಾಚಿಂ ಹಾಡಾಂ ಪುರ್ತಿಂ ಮಾತ್ಯೆಕ್ ಸಾರೆಂ ಜಾಂವ್ಕ್ ನಾಂತ್, ಕದ್ರಿ ಪಾರ್ಕಾಥಾವ್ನ್ ಲಾಲ್ಬಾಗ್ ಪರ್ಯಾಂತ್ಲ್ಯಾ ರಸ್ತ್ಯಾಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ದೀಜಾಯ್ ಮ್ಹಳ್ಳಿ ಲದಿನ್ ಮಂಗ್ಳುರಿ ಕ್ರೀಸ್ತಾಂವ್ ಸಮುದಾಯಾನ್ ಪರ್ತ್ಯಾನ್ ಸುರು ಕೆಲ್ಯಾ. ಕಾಪುಚಿನಾಂಚ್ಯಾ ತಾಬೆನ್ ಆಸ್ಚ್ಯಾ ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಸಾಲಾಥಾವ್ನ್ ವ್ಹೆವಾರ್ ಕರ್ಚ್ಯಾ ‘ಕೊಂಕಣಿ ಲೇಖಕ್ ಸಂಘಟನಾ’ಚ್ಯಾ ಅಧ್ಯಕ್ಷಾನ್ ಫುಡ್ಕಾಯ್ ಘೆವ್ನ್, ಮಂಗ್ಳುರ್ಚ್ಯಾ ಪತ್ರಿಕಾ ಭವನಾಂತ್ ಹ್ಯಾ ನವ್ಯಾ ಲದಿನೆಕ್ 6 ಮೇ 2022, ಸುಕ್ರಾರಾ ದಿಸಾ ಚಾಲನ್ ದಿಲಾಂ. ಜೋರ್ಜ್ ಫೆರ್ನಾಂಡಿಸಾಚಿಂ ಹಾಡಾಂ ಮಾತ್ಯೆಸಾರೆಂ ಜಾಂವ್ಚೆಂ ಪಯ್ಲೆಂ, ಕಸಲಿ ತರೀ ಕಸ್ರತ್ ಕರ್ನ್ ತಾಚೆಂ ನಾಂವ್ ಮಂಗ್ಳುರ್ಚ್ಯಾ ಖಂಯ್ಚ್ಯಾ ತರೀ ಠಾಣ್ಯಾಕ್ ವಾ ಠಿಕಾಣ್ಯಾಕ್ ದವರ್ನ್ಚ್ ಸುದ್ದ್ ಮ್ಹಣ್ ಮಂಗ್ಳುರಿ ಕೊಂಕ್ಣಿ ಸಮಾಜಾನ್ ಸೊಪುತ್ ಘೆತ್ಲಾಗಾಯ್ ? ಮ್ಹಳ್ಳೆಂ ಪ್ರಶ್ನ್ ಆತಾಂ ವಯ್ರ್ ಪಡ್ಲಾಂ.
ಡೆಲ್ಲಿ ಥಾವ್ನ್ ಹಾಡ್ಲ್ಲಿಂ ಜೋರ್ಜ್ ಫೆರ್ನಾಂಡಿಸಾಚಿಂ ಹಾಡಾಂ ಇಜಯ್ ಸಿಮೆಸ್ತ್ರಿಂತ್ ಪುರ್ಚ್ಯಾ ಪಯ್ಲೆಂಚ್ ಅಸಲಿ ಏಕ್ ಲದಿನ್ ಸುರು ಜಾಲ್ಲಿ. ತಾಚಿಂ ಹಾಡಾಂ ಅಧಿಕೃತ್ ಥರಾನ್ ಪುರ್ಲ್ಲೆಂಚ್ ಕಥೊಲಿಕ್ ಸಭಾ ಮ್ಹಳ್ಳ್ಯಾ ದಿಯೆಸೆಜಿಚ್ಯಾ ಸಂಘಟನಾಚ್ಯಾ ಮುಕೆಲ್ಪಣಾರ್ ಏಕ್ ಪರ್ಗಟ್ ಸಭಾ ಆಪವ್ನ್ ಮಂಗ್ಳುರ್ಚ್ಯಾ ರಯ್ಲ್ ಥಳಾಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ದವರಿಜಾಯ್ ಮ್ಹಣ್ ಠರಾವ್ ಮಾಂಡ್ಲ್ಲೊ. ಹ್ಯಾ ಸಭೆಕ್ ಮಂಗ್ಳುರಿ ಕ್ರಿಸ್ತಾಂವ್ ಸಮಾಜಾಚೊ ಪರಮೋಚ್ಛ್ ವ್ಹಡಿಲ್ ಜಾವ್ನಾಸ್ಚೊ ದಿಯೆಸೆಜಿಚೊ ಬಿಸ್ಪ್ ಖುದ್ ಹಾಜರ್ ಆಸ್ಲೊ. ಪರ್ಗಟ್ ಸಭಾ ಜಾಲಿ, ಪತ್ರಾಂನಿ ವರ್ದಿ ಆಯ್ಲಿ , ಜಾಳಿಜಾಗ್ಯಾಂನಿ ಫೊಟೊ ಛಾಪ್ಲೆ , ಚ್ಯಾನೆಲಾಂನಿ ಖಬರ್ ಫಾಯ್ಸ್ ಜಾಲಿ. ಆತಾಂ, ಸಭೆಕ್ ಹಾಜರ್ ಜಾಲ್ಲ್ಯಾಂನಿ ಹಾತ್ ವಯ್ರ್ ಉಕಲ್ನ್ ಮಾಂಡ್ಲ್ಲ್ಯಾ ಠರಾವಾಚೆಂ ಕಿತೆಂ ಜಾಲೆಂ? ಕಥೊಲಿಕ್ ಸಭೆನ್ ಹೊ ಠರಾವ್ ಕೊಣಾಕ್ ವರ್ನ್ ಪಾವಯ್ಲೊ? ಹ್ಯಾ ಠರಾವಾಚೆರ್ ಕಾಂಯ್ ತರೀ ಪ್ರಗತಿ ಜಾಲ್ಯಾಗಿ ? ಹ್ಯಾ ಪ್ರಶ್ನಾಂಚೆರ್ ಕಥೊಲಿಕ್ ಸಭೆನ್ ಏಕ್ ಪತ್ರಿಕಾ ಗೋಷ್ಠಿ ಆಪವ್ನ್ ಪಬ್ಲಿಕಾಕ್ ಕಳಯ್ಲ್ಯಾರ್ ಬರೆಂ ಅಸ್ತೆಂ. ಪತ್ರಿಕಾ ಗೋಷ್ಠಿ ಆಪಂವ್ಕ್ ಜಾಯ್ನಾ ಜಾಲ್ಯಾರ್ ಕಾಂಯ್ ನಜೊ, ಕಥೊಲಿಕ್ ಸಭೆಕ್ ತಾಂಚೆಂಚ್ ಮ್ಹಳ್ಳೆಂ ಮುಖವಾಣಿ ಆಸಾ – ತಾಂತು ತರೀ ಕಳಯ್ಲ್ಯಾರ್ ಉಪ್ಕಾರ್ ಜಾಯ್ತ್!
ವಿಪರ್ಯಾಸ್ ಪಳಯಾ – ಆಜ್ ಜೊರ್ಜ್ ಫೆರ್ನಾಂಡಿಸಾಚ್ಯಾ ನಾಂವಾರ್ ರಸ್ತೊ ಜಾಯ್ಜೆ ಮ್ಹಣ್ತಲೊಯ್ ಮಂಗ್ಳುರಿ ಕಥೊಲಿಕ್ ಆನಿ ಕಾಲ್ ಮಂಗ್ಳುರ್ಚ್ಯಾ ರಯ್ಲ್ ಥಳಾಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ದೀಜಾಯ್ ಮ್ಹಣ್ತಲೆಯ್ ಮಂಗ್ಳುರಿ ಕಥೊಲಿಕ್. ದೊಗಾಂಕೂಯ್ ದಿಯೆಸೆಜ್ ಮಂಗ್ಳುರ್. ದೊಗಾಂಯ್ಕೀ ಬಿಸ್ಪ್ ಏಕ್. ದೊಗಾಂಯ್ಚೊ ಶೆವೊಟ್ ಸಯ್ತ್ ಏಕ್ – ಕಶೆಂ ತರೀ ಜೋರ್ಜ್ ಪೆರ್ನಾಂಡಿಸಾಚೆಂ ನಾಂವ್ ಮಂಗ್ಳುರಾಂತ್ ಜೀವ್ ದವರಿಜೆ ! ಆತಾಂ ಉಟ್ತಾ ಪ್ರಶ್ನ್ – ದೊಗಾಂಯ್ಚೊ ಶೆವೊಟ್ ಏಕ್ , ದೊಗಾಂಯ್ನೀ ಪ್ರತಿನಿಧಿತ್ವ್ ಕರ್ಚಿ ಸಮಾಜ್ ಏಕ್, ಸಮಾಜಾಚೊ ವ್ಹಡಿಲ್ ಏಕ್ ಆಸ್ತಾನಾ – ವಾಟೊ ಕಿತ್ಯಾಕ್ ವೆವೆಗ್ಳ್ಯೊ ?
ಥೊಡ್ಯಾಂಕ್ ರಯ್ಲ್ ವೇ ಥಳಾಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ಜಾಯ್ ಆನಿ ಥೊಡ್ಯಾಂಕ್ ಕದ್ರಿ – ಲಾಲ್ಬಾಗ್ ರಸ್ತ್ಯಾಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ಜಾಯ್ ? ಕಿತ್ಯಾಕ್ ಹೊ ಸಂಘರ್ಷ್ ? ಹಾಚ್ಯಾ ಪಾಟ್ಲೆಂ ರಾಜಾಂವ್ ಕಿತೆಂ ? ಫಲ್ಯಾಂ ಆನಿ ಕೋಣ್ ಉಟ್ತಲೊ ಆನಿ ಪ್ರೆಸ್ ಕೊನ್ಪರೆನ್ಸ್ ಆಪವ್ನ್ ಮ್ಹಣ್ತಾಲೊ – ಜೋರ್ಜ್ ಫೆರ್ನಾಂಡಿಸ್ ಸೆಮಿನರಿಂತ್ ಶಿಕ್ಲ್ಲೊ, ದೆಕುನ್ ಸೆಮಿನರಿಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ದೀಜೆ, ಜೋರ್ಜ್ ಫೆರ್ನಾಂಡಿಸ್ ಸೆಮಿನರಿ ಥಾವ್ನ್ ಪಾಟಿಂ ಯೇವ್ನ್ ಮಂಗ್ಳುರ್ಚ್ಯಾ ಸೆಂಟ್ರಲ್ ಮಯ್ದಾನಾಚ್ಯಾ ಪಾರ್ಕಾಚ್ಯಾ ಬಾಂಕಾರ್ ನಿದ್ಲ್ಲೊ, ತ್ಯಾ ಮಯ್ದಾನಾಕ್, ಮಯ್ದಾನಾಂತ್ಯ್ಲಾ ಪಾರ್ಕಾಕ್ ಆನಿ ಅಜೂನ್ ಉರ್ಲಾ ತರ್ ಪಾರ್ಕಾಂತ್ಲ್ಯಾ ತ್ಯಾ ಬಾಂಕಾಕೀ – ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ದೀಜೆ ! ಮಂ. ಕ್ರಿ . ಸಮುದಾಯಾಚೆಂ ನಾಂವಾಂಚೆಂ ಪಿಶೆಂ ಹ್ಯಾ ಸಮಾಜಾಕ್ ಖಂಯ್ ವರ್ನ್ ಪಾವಯ್ತ್ ?
ಪತ್ರ್ಗಾರಿಕೆಂತ್ಲ್ಯಾ ಮ್ಹಜ್ಯಾ ಇತ್ಲ್ಯಾ ವರ್ಸಾಂಚ್ಯಾ ಅನ್ಭೊಗಾಂತ್ ಹಾಂವೆ ಮಂಗ್ಳುರಿ ಕ್ರೀಸ್ತಾಂವ್ ಸಮಾಜಾಂತ್ ಆಸ್ಚೆ ತಿತ್ಲೆಂ ‘ಪ್ರಚಾರಾಚೆಂ ಪಿಶೆಂ’ ಆನಿ ‘ಚಲಾವಣೆರ್ ಉರ್ಚೊ ಹೊರ್ಬೊಸ್’ ಹೆರ್ ಖಂಯ್ಚ್ಯಾಯ್ ಸಮಾಜಾಂತ್ ಪಳಯಿಲ್ಲೆಂ ನಾಂಚ್! ಹೆರ್ ಸಮಾಜಾಂತ್ಲೊ ಲೋಕ್ ಚಡ್ ಮ್ಹಳ್ಯಾರ್ ಸಮಾಜೆಕ್ ವಿಶೇಸ್ ಯೋಗ್ದಾನ್ ದಿಲ್ಲೊ ತಾಂಚ್ಯಾ ಸಮಾಜಾಂತ್ಲೊ ವೆಕ್ತಿ ಸರ್ಲ್ಲೆ ಫರಾ ತ್ಯಾ ವೆಕ್ತಿಚ್ಯಾ ಉಡಾಸಾಕ್ ಏಕ್ ಸ್ಮಾರಕ್ ವಿಚಾರ್ಚೆಂ ಹಾಂವೆ ಪಳಯ್ಲಾಂ. ಬಾಬಾ ಸಾಹೇಬ್ ಅಂಬೇಡ್ಕರ್, ಕರುಣಾನಿಧಿ, ಡೊ. ರಾಜ್ಕುಮಾರ್ ವಾ ಮಂಜೇಶ್ವರ ಗೋವಿಂದ ಪಯ್! ಪೂಣ್ ಮಂಗ್ಳುರಿ ಕ್ರೀಸ್ತಾಂವ್ ಸಮಾಜಾಚೊ ಲೋಕ್ ಮಾತ್ ಆಪ್ಯ್ಲಾಂತ್ಲೊ ಕೋಣ್ ಮನಿಸ್ ಗೆಲ್ಲೊಚ್ ತಾಚ್ಯಾ ನಾಂವಾರ್ ರಸ್ತೊ ಜಾಯ್, ರಯ್ಲ್ ಠಾಣ್ಯಾಕ್ ತಾಚೆಂ ನಾಂವ್ ದವರಿಜಾಯ್, ಬಸ್ ಸ್ಟ್ಯಾಂಡ್ ಜಾಯ್, ವಿಮಾನ್ ಥಳಾಕ್ ತಾಚೆಂ ನಾಂವ್ ದವರಿಜಾಯ್ ಮ್ಹಣ್ ಸಳ್ ಸುರು ಕರ್ತಾ. ಮ್ಹಾಕಾ ಸದಾಂಚ್ ಧೊಸ್ಚೆಂ ಪ್ರಶ್ನ್ – ಮರೊನ್ ಸಾರ್ಕೆಂ ಮಾತ್ಯೆಕ್ ಪಾವ್ನ್ ಜಾಂವ್ಕ್ ನಾ, ಸಾರತುಕಾಯೆನ್ ಏಕ್ ಶ್ರದ್ದಾಂಜಲಿ ಸಭಾ ಜಾಂವ್ಕ್ ನಾ, ಹ್ಯಾ ಮಂ. ಕ್ರಿ ಸಮಾಜಾಕ್ ಇತ್ಲೋಯ್ ಆಮ್ಸೊರ್ ಕಿತ್ಯಾಕ್ ? Why so much of a hurry ?
ಹಾಂವೆ ಸಮ್ಜಾಲ್ಲೆ ಪರ್ಮಾಣೆ – ಕಾರಣ್ ಸ್ಪಶ್ಟ್! ಮಂಗ್ಳುರಿ ಕ್ರಿಸ್ತಾಂವ್ ಸಮಾಜಾನ್ ನಾಂವ್ ಜಾಯ್ಜೆ ಮ್ಹಣ್ ಮಾಗ್ಣೆ ಕರ್ತೆಲ್ಯಾಂಕ್ ಮೆಲ್ಯಾ ಉಪ್ರಾಂತ್ ವ್ಯಾಲಿಡಿಟಿ ನಾ! ಮಾಗಿರ್ ತೋ ಫೆರ್ನಾಂಡಿಸ್ ಜೋರ್ಜ್ ಆಸುಂ ವಾ ಓಸ್ಕರ್! ಹಾಂಗಾಸರ್ ವಯ್ರ್ ಹಾಂವೆ ಉಲ್ಲೇಕ್ ಕೆಲ್ಲಿಂ ನಾಂವಾಂ ಪಳಯ್ಲ್ಯಾರ್ ಸ್ಪಶ್ಟ್ ಕಳ್ತಾ – ಬಾಬಾ ಸಾಹೇಬ್ ಅಂಬೇಡ್ಕರ್ ಥಾವ್ನ್ ಮಂಜೇಶ್ವರ ಗೋವಿಂದ ಪಯ್ ಪರ್ಯಾಂತ್, ತಾಣಿ ಸಂಸಾರಾಕ್ ಸರೊನ್ ವರ್ಸಾಂಚ್ ಪಾಶಾರ್ ಜಾಲ್ಯಾರೀ ತಾಂಚಿ ವ್ಯಾಲಿಡಿಟಿ (ಪ್ರಸ್ತುತತಾ) ಅಜೂನ್ ಚಾಲು ಆಸಾ, ಆಯ್ಚ್ಯಾ ಸಮಾಜಿಕ್ ಸಂದರ್ಭಾರೀ ತೆ ತಿತ್ಲೆಚ್ ಪ್ರಸ್ತುತ್ ಆಸಾತ್.
ಬಾಬಾ ಸಾಹೇಬ್ ಅಂಬೇಡ್ಕರ್, ಕರುಣಾನಿಧಿ, ಶಿವರಾಮ ಕಾರಂತ ವಾ ಆಯ್ಲೆವಾರ್ ಮಂಗ್ಳುರ್ಚ್ಯಾ ಕೊಡಿಯಾಳ್ಬಯ್ಲಾಂತ್ಲ್ಯಾ ವೃತ್ತಾಕ್ ವಸ್ತೆಕ್ ಆಯಿಲ್ಲೊ ರಾಷ್ಟಕವಿ ಮಂಜೇಶ್ವರ್ ಗೋವಿಂದ ಪಯ್! – ತಾಂಚ್ಯಾ ನಾಂವಾರ್ ಏಕ್ ರಸ್ತೊ, ವೃತ್ತ್ ಜಾಯ್ಜೆ ಜಾಲ್ಯಾರ್ ವರ್ಸಾಂಚ್ ಲಾಗ್ಲಿಂ. ಆಜ್ಯೀ ಆಮ್ಕಾಂ ತೇ ತಿತ್ಲೆಚ್ ಪ್ರಸ್ತುತ್. ಮಂಜೇಶ್ವರ ಗೋವಿಂದ ಪಯ್ ಹಾಣಿ ವರ್ಸಾಂ ಆದಿಂ ಬರಯಿಲ್ಲೆಂ ಕಾವ್ಯೆಂ ಗೊಲ್ಗೋಥಾ ಆಜ್ಯ್ ಆಮ್ಕಾಂ ವಿಜ್ಮಿತ್ ಕರ್ತಾ. (ಮಯ್ಸೂರ್ ವಿಶ್ವವಿದ್ಯಾಲಯಾಚೊ ಪ್ರೊ| ದೊ| ಎಡ್ವರ್ಡ್ ನೊರೊನ್ಹಾನ್ ಹೊ ಬೂಕ್ ಕೊಂಕ್ಣೆಕ್ ಹಾಡ್ಲಾ ) ವರ್ಸಾಂ ಆದಿಂ ತೆ ಆಮ್ಕಾಂ ಸಾಂಡುನ್ ಗೆಲೆ ತರೀ, ತಾಂಚಿ ವ್ಯಾಲಿಡಿಟಿ ವಾಡೊನ್ ಗೆಲಿ ಶಿವಾಯ್ ಉಣಿ ಜಾಲ್ಲಿ ನಾ.
ಹ್ಯಾ ತುಲನಾಂತ್ – ಮಂಗ್ಳುರಿ ಕ್ರೀಸ್ತಾಂವ್ ಸಮಾಜಾನ್ ಹಠಾಕ್ ಪಡೊನ್ ಮಂಗ್ಳುರ್ಚ್ಯಾ ಖಂಯ್ಚ್ಯಾ ತರೀ ಸರ್ವಜಣಿಕ್ ಥಳಾಕ್ ನಾಂವ್ ಫಿಕ್ಸ್ ಕರುಂಕ್ ಸೊಧ್ಚ್ಯಾ ಜೋರ್ಜ್ ಫೆರ್ನಾಂಡಿಸಾಚಿ ವ್ಯಾಲಿಡಿಟಿ ಶಿವರಾಮ ಕಾರಂತ ವಾ ಗೋವಿಂದ ಪಯ್ ಪರಿಂ ಕಾಳಾಚಿ ತಪಾಸ್ಣಿ ಫುಡ್ ಕರುಂಕ್ ಸಕ್ಲ್ಯಾ ವಾ ಸಕತ್ ? ಮ್ಹಜೆ ಪರ್ಮಾಣೆ – ಬಿಲ್ಕುಲ್ ನಾ! ಹೆಂ ಕಳಿತ್ ಆಸೊನ್ಚ್ ಕ್ರೀಸ್ತಾಂವ್ ಸಮಾಜಾಕ್ ಇತ್ಲೊ ದರ್ವಡ್ ಆನಿ ಅಮ್ಸೊರ್! ಮಂಗ್ಳುರ್ ದಿಯೆಸೆಜ್ಚ್ ಆಪ್ಲಿ ಕರ್ಮ ಭುಂಯ್ ಕರ್ನ್ ಘೆತ್ಲ್ಲೆ ಫ್ರಾದ್ ಆಲ್ಫ್ರೆಡ್ ರೋಚ್, ಮೊ| ರಾಯ್ಮುಂದ್ ಮಸ್ಕರೇನ್ಹಸ್ ತಸಲೆ ದೇವೊತ್ ಯಾಜಕ್ ಅಜೂನ್ ಸಾಂತ್ ಮ್ಹಣ್ ಕುರ್ವಾರ್ ಜಾಂವ್ಕ್ ರಾಕೊನ್ ಆಸ್ತಾನಾ, ಪಯ್ಶಿಲ್ಯಾ ಬಿಹಾರಾಂತ್ಲೆಂ ಮುಜಾಫರಪುರ ಆಪ್ಲಿ ಕರ್ಮ್ ಭುಂಯ್ ಕರ್ನ್ ಘೆತ್ಲ್ಲ್ಯಾ ಜೋರ್ಜ್ ಫೆರ್ನಾಂಡಿಸಾಕ್, ತೋ ಫಕತ್ ಮಂಗ್ಳುರಾಂತ್ ಜಲ್ಲಲ್ಲೊ ಮ್ಹಳ್ಳ್ಯಾ ಎಕಾಚ್ ಎಕಾ ಕಾರಣಾಕ್ ಲಾಗೊನ್ ಸರೊನ್ ಫುರ್ತೆಂ ಮಯ್ನೊಯ್ ಜಾಂವ್ಕ್ ನಾ, ಕಶೆಂ ತರೀ ಮಂಗ್ಳುರಾಂತ್ ಪ್ರತಿಷ್ಠಾಪಿತ್ ಕರಿಜೆಚ್ ಮ್ಹಳ್ಯಾರ್ ?
ಮಂಗ್ಳುರ್ ಶೆರಾಂತ್ ಎಕೊಡಿ ಭಂವ್ಡಿ ಮಾರ್ಲ್ಯಾರ್, ರಸ್ತ್ಯಾಚ್ಯಾ ನಾಂವಾಂ ಪಾಟ್ಲ್ಯಾನ್ ಧಾಂವ್ಚಿ ಮಂಗ್ಳುರಿ ಕ್ರಿಸ್ತಾಂವ್ ಸಮಾಜಾಚಿ ಗಿರಾಂತ್ ಬೋವ್ ಪರ್ನಿ ಮ್ಹಳ್ಳೆಂ ಸಮ್ಜೊಂಕ್ ವೇಳ್ ಲಾಗಾನಾ. ಬ್ರಿಟ್ಟೊ, ಕುವೆಲ್ಲೊ, ಸಿಲ್ವ, ಆಲ್ವರೆಸ್, ಲೋಬೊ, ವಾಸ್, ಮಥಾಯಸ್, ಮ್ಹಣ್ ಭಿತರ್ಲ್ಯಾ ಗಲ್ಲ್ಯಾಂಕ್ ಸಯ್ತ್ ಪೊರ್ಬುಗೆಲಿಂ ನಾಂವಾಂ ದವರ್ನ್ ದಾದೊಸ್ಕಾಯ್ ಭೊಗ್ಚ್ಯಾಂತ್ ಕ್ರಿಸ್ತಾಂವ್ ಸಮಾಜೆಕ್ ಸಾಂಗ್ಲ್ಲೊ ಕೋಣ್ ನಾ! ಮಂಗ್ಳುರಾಂತ್ ಆದ್ಲ್ಯಾ ಬಿಸ್ಪಾಚ್ಯಾ ನಾಂವಾರ್ ಸಯ್ತ್ ಏಕ್ ರಸ್ತೊ ಆಸಾ. ಆತಾಂ ಹ್ಯಾ ಬಿರಿತ್ ಥಾವ್ನ್ ಮೋತಿ ಪರ್ಯಾಂತ್ ಕೊಣಾಕ್ ಪುಣೀ ವ್ಯಾಲಿಡಿಟಿ ಆಸ್ಲ್ಲಿಗೀ, ಆತಾಂ ಆಸಾಗೀ ? ಆಜ್ ತೆ ಕಿತ್ಲೆ ಪ್ರಸ್ತುತ್ ಆನಿ ಎಕಾ ರಸ್ತ್ಯಾಕ್ ನಾಂವ್ ದಿಂವ್ಚೆ ತಸಲಿ ಯೋಗ್ಯತಾ ತಾಂಚೆಥಂಯ್ ಕಿತೆಂ ಆಸ್ಲ್ಲಿ ಮ್ಹಳ್ಳೆವಿಶ್ಯಾಂತ್ ಕೋಣ್ ತರೀ ಉಜ್ವಾಡ್ ಫಾಂಕಯ್ತಿತ್ಗೀ? ಆಜ್ ಖಂಯ್ ತರೀ ಹೆ ವಿಶ್ಯಾಂತ್ ಉಲ್ಲೇಕ್ ಆಯ್ಕೊಂಕ್ ಮೆಳ್ತಾತ್ಗೀ ? ತಾಂಚ್ಯಾ ಸಂತತಿಚೆ ಕೋಣ್ ತರೀ ತಾಂಚ್ಯಾ ನಾಂವಾಚೊ ರಸ್ತೊ ಆಸ್ಚ್ಯಾ ವಠಾರಾಂತ್ ಪ್ರಸ್ತುತ್ ವಸ್ತಿ ಕರ್ತಾತ್ಗೀ ? ವಾ ಘರ್ ಜಾಗೊ ಆಸ್ಲ್ಲೊ ಸಗ್ಳೊ ಬಿಲ್ಡರಾಂಕ್ ವಿಕುನ್ ಕೆನಡಾ, ಆಸ್ಟ್ರೆಲಿಯಾ ಪಾವ್ಲ್ಯಾತ್ಗೀ ? ಪಿಳ್ಗೆಕ್ ಮಂಗ್ಳುರ್ ನಾಕಾ, ತರ್ ಮಂಗ್ಳುರ್ಚ್ಯಾ ರಸ್ತ್ಯಾಕ್ ತಾಂಚೆಂ ನಾಂವ್ ಕಿತ್ಯಾಕ್ ?
ತುಲನಾಂತ್ ಹೆರ್ ಸಮಜಾಚೊ ಲೋಕ್ ವಸ್ತಿ ಕರ್ಚ್ಯಾ ವಠರಾಂನಿ ಪಳಯ್ಲ್ಯಾರ್ ತೆ ನಾಂವಾ ಪಾಟ್ಲ್ಯಾನ್ ದಿವಾನಾ ಜಾಲ್ಲೆಂ ದಿಸಾನಾ. ತಾಂಚ್ಯಾ ರಸ್ತ್ಯಾಂಚಿಂ ಚಡಾವತ್ ನಾಂವಾ ವಠಾರಾಂತ್ಲ್ಯಾ ಸಂಸ್ಥ್ಯಾಂಚೆರ್ ವಾ ಧಾರ್ಮಿಕ್ ಕೇಂದ್ರಾಚೆರ್ ದವರ್ಲ್ಲಿಂ ಆಸ್ತಾತ್. ದಾಕ್ಲ್ಯಾಕ್ ಸೂರ್ಯನಾರಾಯಣ ಟೆಂಪಲ್ ರೋಡ್, ಬಾಲಿಕಾಶ್ರಮ ರಸ್ತೊ, ಕಾರ್ ಸ್ಟ್ರೀಟ್ ಅಶೆಂ. ರಸ್ತ್ಯಾಚೆಂ ನಾಂವ್ ವಠಾರಾಂತ್ಲ್ಯಾ ಸಂಸ್ಥ್ಯಾಚೆರ್ ಆಸ್ಚೆಂ ಆಡಳ್ತ್ಯಾ ಆನಿ ವ್ಹೆವಾರಾಚ್ಯಾ ನದ್ರೆನ್ ಪ್ರಾಯೋಗಿಕ್ ಆನಿ ಸಲೀಸ್. ಸಂಸ್ಥ್ಯಾಂತ್ ಸೆವಾ ವಾ ಸವ್ಲತ್ ಸೊಧುನ್ ಯೆತೆಲ್ಯಾಂಕ್ ಆನಿ ಪ್ರವಾಸ್ಯಾಂಕ್ ವಠಾರಾಂತ್ಲ್ಯಾ ಸಂಸ್ಥ್ಯಾಚಾ ನಾಂವಾಚೆರ್ ರಸ್ತೊ ಆಸ್ಲ್ಯಾರ್ ಸೊಧುಂಕ್ ಆನಿ ಸಂಸ್ಥ್ಯಾಕ್ ಪಾವೊಂಕ್ ಸುಲಭ್ ಜಾತಾ. ಹ್ಯಾ ಪಾಟಿಥಳಾರ್ ಸಾಂ. ಲುವಿಸ್ ಕೊಲೆಜ್ ಆಸ್ಚ್ಯಾ ರಸ್ತ್ಯಾಕ್ ಸಾಂ.ಲುವಿಸ್ ಕೊಲೆಜ್ ರಸ್ತೊ ನಾಂವ್ ಆಸುಂಕ್ ಜಾಯ್ ಆಸ್ಲೆಂ. ಲೇಡಿ ಹಿಲ್ ಇಸ್ಕೊಲ್ ಆಸ್ಚ್ಯಾ ವಠಾರಾಚ್ಯಾ ವೃತ್ತಾಕ್ ಲೇಡಿಹಿಲ್ ಸರ್ಕಲ್ ನಾಂವ್ ಆಸುಂಕ್ ಜಾಯ್ ಆಸ್ಲೆಂ. ವಿಪರ್ಯಾಸ್ ಮ್ಹಳ್ಯಾರ್ ಆಜ್ ಕದ್ರಿ ಪಾರ್ಕಾಥಾವ್ನ್ ಲಾಲ್ಬಾಗ್ ಪರ್ಯಾಂತ್ಲ್ಯಾ ರಸ್ತ್ಯಾಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ದೀಜಾಯ್, ಕಂಕ್ನಾಡಿ ರಯ್ಲ್ ಥಳಾಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ದವರಿಜಾಯ್ ಮ್ಹಣ್ತೆಲ್ಯಾಂನಿ, ಸಾಂ. ಲುವಿಸ್ ಕೊಲೆಜ್ ರಸ್ತ್ಯಾಚೆಂ ನಾಂವ್ ಬದ್ಲಿತಾನಾ, ಲೇಡಿ ಹಿಲ್ ಸರ್ಕಲಾಚೆಂ ನಾಂವ್ ಬದ್ಲಿತಾನಾ ಏಕ್ ಆವಾಜ್ ಕಾಡ್ಲ್ಲೊ ನಾ. ಕಿತ್ಯಾಕ್? ಸೊಡ್ಯಾಂ – ಕೊರ್ಪೊರೇಶನಾನ್ ಪೇಪರ್ ನೋಟಿಸಾಂ ದೀವ್ನ್ ಒಬ್ಜೆಕ್ಶನ್ ಘಾಲುಂಕ್ ವೇಳ್ ದಿಲ್ಲೊ ನಯ್? ಏಕ್ ಒಬ್ಜೆಕ್ಶನ್ ತರೀ ಘಾಲ್ಲೆಂ ಆಸಾಗೀ ?
ಆತಾಂ, ಮುಕೆಲ್ ಪ್ರಶ್ನ್ – ಕದ್ರಿ ಪಾರ್ಕಾಥಾವ್ನ್ ಲಾಲ್ಬಾಗ್ ಪರ್ಯಾಂತ್ಲ್ಯಾ ರಸ್ತ್ಯಾಕ್ , ಮಂಗ್ಳುರ್ಚ್ಯಾ ರಯ್ಲ್ ಥಳಾಕ್ ಜೋರ್ಜ್ ಫೆರ್ನಾಂಡಿಸಾಚೆಂ ನಾಂವ್ ಕಿತ್ಯಾಕ್ ದೀಜಾಯ್? ಜೋರ್ಜ್ ಫೆರ್ನಾಂಡಿಸಾಚಿ ಕರ್ಮ್ ಭುಂಯ್ ಪಯ್ಶಿಲ್ಯಾ ಬಿಹರಾಂತ್ಲೆಂ ಮುಜಾಫರಪುರ. ಥಂಯ್ಸರ್ ತಾಚಿ ಪುತ್ಳಿ ಎದೊಳ್ಚ್ ಉಬಾರ್ಲ್ಲಿ ಆಸಾ. ಥಂಯ್ಚ್ಯಾ ರಸ್ತ್ಯಾಂಕ್, ರಯ್ಲ್ ಥಳಾಂಕ್, ಬಸ್ ಥಳಾಂಕ್, ಪಾರ್ಕಾಂಕ್ ತಾಚೆಂ ನಾಂವ್ ದೀಂವ್. ಆಕ್ಶೇಪ್ ನಾ. ಪೂಣ್ ಮಂಗ್ಳುರಾಂತ್ ಕಿತ್ಯಾಕ್ ? ಮಂಗ್ಳುರಿ ಮುಳಾಚ್ಯಾ ಕ್ರೀಸ್ತಾಂವ್ ಆವಯ್ ಬಾಪಯ್ಕ್ ಜಲ್ಮಲ್ಲೊ ಮ್ಹಳ್ಳ್ಯಾ ಎಕಾಚ್ ಕಾರಣಾಕ್ ಹಾಂಗಾಚ್ಯಾ ರಸ್ತ್ಯಾಕ್, ರಯ್ಲ್ ಥಳಾಕ್ ತಾಚೆಂ ನಾಂವ್ ದೀಜಾಯ್ ಮ್ಹಳ್ಯಾರ್?
ಕೋಣ್ ಮ್ಹಣೊಂಕ್ ಪುರೊ – ರಯ್ಲ್ ಮಂತ್ರಿ ಜಾವ್ನ್ ತಾಣೆ ಬರೆಂ ಕಾಮ್ ಕೆಲಾಂ. ರಾಕೊಣ್ ಮಂತ್ರಿ ಜಾವ್ನ್ ಬರೆಂ ಕಾಮ್ ಕೆಲಾಂ. ವ್ಹಯ್ – ಬರೆಂ ಕಾಮ್ ಕರುಂಕ್ಚ್ ನಯ್ ತಾಕಾ ವಿಂಚ್ಲ್ಲೆಂ? ಆಪುಣ್ ತೆಂ ಕಾಮ್ ಕರ್ತಾಂ ಮ್ಹಣ್ ಸ್ವಂತ್ ಖುಶೆನ್, ಲೊಕಾಕ್ ಭಾಸಾವ್ನ್ ನಂಯ್ ತಾಣೆಂ ವೋಟ್ ಮಾಗ್ಲ್ಲೊ ಆನಿ ಲೊಕಾನ್ ತಾಕಾ ವೋಟ್ ದಿಲ್ಲೊ? ಸರ್ಕಾರಿ ಅಧಿಕಾರಿನ್ ವಾ ಮಂತ್ರಿನ್ ತಾಚ್ಯಾ ಕಾರ್ಯಕಾಳಾರ್ ಜಾಲ್ಲ್ಯಾ ಕಾಮಾಂಕ್ ಸರ್ವ್ ಆಪುಣ್ ಬಾಪುಯ್ ಮ್ಹಣ್ಚೆಂ ಅತಾರ್ಕಿಕ್ ಮಾತ್ ನಯ್, ಹಾಸ್ಯಾಸ್ಪದ್!
ಹೊ ತಮಾಸೊ ಪಳಯಾ – ಕೊಂಕಣ್ ರಯ್ಲ್ ವೇ ಕೆಲ್ಲೆಂ ಇ. ಶ್ರೀಧರನಾನ್ ಮ್ಹಣ್ ತಾಚೆ ಅಭಿಮಾನಿ ಮ್ಹಣ್ತಾತ್. ಶ್ರೀಧರನ್ ಬಿಜೆಪಿ ಪಾಡ್ತಿಥಾವ್ನ್ ಎಲಿಸಾಂವಾಕ್ ರಾವ್ತಾ. ಪೋಖ್ರಾಣ್ ಕೆಲ್ಲೆಂ ಎ.ಪಿ.ಜೆ ಅಬ್ದುಲ್ ಕಲಮಾನ್ ಮ್ಹಣ್ ತಾಚೆ ಅಭಿಮಾನಿ ಮ್ಹಣ್ತಾತ್. ಬಿಜೆಪಿ ಪಾಡ್ತಿಚ್ಯಾ ಬಳಾರ್ ಕಲಾಂ ದೆಶಾಚೊ ಅಧ್ಯಕ್ಶ್ ಜಾತಾ. ಜೋರ್ಜ್ ಫೆರ್ನಾಂಡಿಸಾಚ್ಯಾ ನಾಂವಾರ್ ರಸ್ತೊ, ರಯ್ಲ್ ಥಳ್ ಜಾಯ್ ಮ್ಹಣ್ತಲೆ ಕೊಂಕಣ್ ರಯ್ಲ್ ವೇ, ಪೋಖ್ರಾಣ್ ಸಗ್ಳೆಂ ಕೆಲ್ಲೆಂ ಜೋರ್ಜ್ ಫೆರ್ನಾಂಡಿಸಾನ್ ಮ್ಹಣ್ತಾತ್. ವಾಜಪೇಯಿಚೆ ಅಭಿಮಾನಿ ಪೋಖ್ರಾಣ್ ವಾಜಪೇಯಿನ್ ಕೆಲ್ಲೆಂ ಮ್ಹಣ್ತಾತ್. ಆತಾಂ ನೀಜ್ ಜಾವ್ನ್ ಕೊಂಕಣ್ ರಯ್ಲ್ ವೇಚೊ ಬಾಪುಯ್ ಕೋಣ್ ? ಆನಿ ಪೋಖ್ರಾಣಾಚೊ ಬಾಪುಯ್ ಕೋಣ್? ಹೊ ಘುಸ್ಪಾ – ಗೊಂದೊಳ್ ಕಿತ್ಯಾಕ್ ?
ಕೊಂಕಣ್ ರಯ್ಲ್ ಆನಿ ಪೋಖ್ರಾಣ್ ಸೊಡ್ಲ್ಯಾರ್, ಜೋರ್ಜ್ ಫೆರ್ನಾಂಡಿಸಾಚೆಂ ಹೆರ್ ಸಾಧನ್ – ಕೋಕಾ ಕೋಲಾ ಕಂಪೆನಿಕ್ ಭಾರತಾಥಾವ್ನ್ ಧಾಂವ್ಡಾಯಿಲ್ಲೆಂ ಆನಿ ಪಾಕಿಸ್ತಾನಾಕ್ ಝುಜಾಂತ್ ಸಲ್ವಯಿಲ್ಲೆಂ. ಆತಾಂ ಹ್ಯಾ ತಾಚ್ಯಾ ಸಾಧನಾಂಚಿಂ ವ್ಯಾಲಿಡಿಟಿ ತರೀ ಕಿತ್ಲಿ ? ಜೋರ್ಜ್ ಫೆರ್ನಾಂಡಿಸಾನ್ ಧಾಂವ್ಡಾಯಿಲ್ಲ್ಯಾ ಕೋಕಾ ಕೋಲಾಕ್ ಭಾರತಾನ್ ಪಾಟಿಂ ಆಪಯ್ಲೆಂ, ಜೋರ್ಜ್ ಫೆರ್ನಾಂಡಿಸಾನ್ ಸಲ್ವಯಿಲ್ಲ್ಯಾ ಪಾಕಿಸ್ತಾನಾನ್ ಪುಲ್ವಾಮಾಂತ್ ಭಿತರ್ ರಿಗೊನ್ ಚಾಳೀಸ್ ಸೊಜೆರಾಂಕ್ ಮಾರ್ನ್ ಉಡಯ್ಲೆಂ. ಜೋರ್ಜ್ ಫೆರ್ನಾಂಡಿಸಾಚ್ಯಾ ಹ್ಯಾ ಸಾದನಾಂಚಿಂಯ್ ವ್ಯಾಲಿಡಿಟಿ ತಿತ್ಲ್ಯಾರ್ ಸಂಪ್ಲಿ!
ಜೋರ್ಜ್ ಫೆರ್ನಾಂಡಿಸ್, ಆಯ್ಲೆವಾರ್ ಮರಣ್ ಪಾವ್ಲ್ಲೊ ಅನ್ಯೇಕ್ ಕ್ರೀಸ್ತಾಂವ್ ಮುಕೆಲಿ ಓಸ್ಕರ್ ಫೆರ್ನಾಂಡಿಸಾಪರಿಂ ಫಕತ್ ಏಕ್ ರಾಜಕಾರಣಿ. ಸ್ವಧರ್ಮೀಯಾಂಕ್ ತೆ ಸಾಂತ್ ದಿಸ್ತಾತ್ ಜಾಂವ್ಕ್ ಪುರೊ, ಪೂಣ್, ಏಕ್ ಲೊಕಾಪ್ರತಿನಿಧಿ ಜಾವ್ನ್ ಯು. ಶ್ರೀನಿವಾಸ ಮಲ್ಯನ್ ಮಂಗ್ಳುರಾ ಖಾತಿರ್ ಕೆಲ್ಲೆಂ ತಿತ್ಲೆಂ ಕಾಮ್ ಮಂತ್ರಿ ಜಾವ್ನ್ ಆಸೊನೀ ಹ್ಯಾ ದೊಗಾಂ ಪಯ್ಕಿ ಕೊಣೆಂ ಎಕ್ಲ್ಯಾನ್ ಕೆಲ್ಲೆಂ ನಾ ಮ್ಹಣ್ ನಿಶ್ಟುರ್ಪಣಿ ಸಾಂಗಾಜಾಯ್ ಪಡ್ತಾ. ಇತ್ಲೆಂ ಆಸೊನೀ ಜೋರ್ಜ್ ಫೆರ್ನಾಂಡಿಸಾಚಿ ಮರ್ಣಾವಿಧಿ ದೋನ್ ಕಡೆ ಚಲ್ಲಿ ತರ್ ಓಸ್ಕರ್ ಫೆರ್ನಾಂಡಿಸಾಚಿ ತೀನ್ ಕಡೆ. ಪ್ರಚಾರ್ ಆಶೆಂವ್ಚ್ಯಾ ಟಿಪಿಕಲ್ ಮಂಗ್ಳುರಿ ಕ್ರಿಸ್ತಾಂವ್ ಮನಾಸ್ಥಿತೆನ್ ಮರ್ಣಾಂತೀ ಹ್ಯಾ ದೊಗಾಂ ಫೆರ್ನಾಂಡಿಸಾಚಿಂ ಪಾಟ್ ಸೊಡುಂಕ್ ನಾ ಆನಿ ಕಥೊಲಿಕ್ ಪವಿತ್ ಸಭೆನೀ ಹಾಂಚ್ಯಾ ‘ಪ್ರಚಾರಣಾಂ’ಕ್ ತಾಂಚ್ಯಾ ಮರ್ಣಾಂತೀ ಸಾಂಗಾತ್ ದಿಲೊ!
ಆತಾಂ, ಆಪ್ಲಿಂ ಸಂಘಟನಾಂ ‘ಚಲಾವಣೆರ್’ ದವರುಂಕ್ ಆನಿ ಸಂಘಟನಾಚೊ ಫುಡಾರಿ ಮ್ಹಳ್ಳ್ಯಾ ನಾತ್ಯಾನ್ ಆಪ್ಣೆಂ ‘ಪಬ್ಲಿಸಿಟಿ’ ಜೊಡುಂಕ್ ಸ್ವಧರ್ಮೀಯ್, ಇಜಯ್ಚ್ಯಾ ಸಿಮೆಸ್ತ್ರಿಂತೀ ಜೋರ್ಜ್ ಫೆರ್ನಾಂಡಿಸಾಕ್ ಸಮಾದಾನೆನ್ ವಿಶೆವ್ ಘೆಂವ್ಕ್ ಸೊಡಿನಾಂತ್ ತಿ ಗಜಾಲ್ ಮಾತ್ ನಿಜಾಯ್ಕೀ ಭಿರ್ಮತೆಚಿ! RIP ಫಕತ್ ಪೇಸ್ಬುಕಾಕ್ ಮಾತ್ ಸೀಮಿತ್ಗೀ ?
ಅಕೆರ್ ಕರ್ಚ್ಯಾ ಆದಿಂ ಏಕ್ ಸವಾಲ್ – ಮಹಾರಾಷ್ಟ್ರಾಂತ್ ಹಾಂವೆ ಪಳಯ್ಲಾಂ – ಜೆ ನಿಳ್ಯಾ ರಂಗಾಚಿಂ ಶೊಲಾಂ ಪಾಂಗುರ್ತಾತ್, ಜೈ ಬೀಮ್ ಮ್ಹಣ್ ಅಭಿಮಾನಾನ್ ಸಾಂಗ್ತಾತ್, ಜೋಪಡ್ ಪಟ್ಟೆಂತ್ ಜರೀ ಜಿಯೆತಾತ್, ತಾಂಚ್ಯಾ ಘರ್ಚ್ಯಾ ವಣದಿಚೆರ್ ಬಾಬಾ ಸಾಹೇಬ್ ಬೀಮ್ರಾವ್ ಅಂಬೇಡ್ಕರಾಚಿ ಪೋಟ್ರೇಟ್ ಚುಕಾನಾ. ಹ್ಯಾ ವರ್ಗಾಚ್ಯಾ ಲೊಕಾಕ್ ಖರೆ ಅಭಿಮಾನಿ ಮ್ಹಣ್ ಮಾಂದುನ್ ಘೆವ್ಯೆತಾ.
ಪೂಣ್ ಆಪುಣ್ ಜೋರ್ಜ್ ಫೆರ್ನಾಂಡಿಸ್ ಅಭಿಮಾನಿ, ತಾಚ್ಯಾ ನಾಂವಾರ್ ರಸ್ತೊ ಜಾಯ್, ನಿಲ್ದಾಣ್ ಜಾಯ್ ಮ್ಹಣ್ತೆಲ್ಯಾಂಚಾ ಘರಾಂತ್ ಜೋರ್ಜ್ ಫೆರ್ನಾಂಡಿಸಾಚಿ ಎಕ್ ತರೀ ಪೋಟ್ರೇಟ್ ಆಸಾಗೀ ? ಸೊಡ್ಯಾಂ ಹಾಂಚ್ಯಾ ಸಂಘಟನಾಂಚ್ಯಾ ದಫ್ತರಾಂನಿ ತರೀ ಜೋರ್ಜ್ ಫೆರ್ನಾಂಡಿಸಾಚಿ ಏಕ್ ಪೊಟ್ರೇಟ್ ದವರ್ಲ್ಯಾಗೀ ? ಜೆ. ಬಿ. ಮೊರಾಯಸಾನ್ ಕೊಂಕ್ಣೆಂತ್ ಬರಯಿಲ್ಲ್ಯಾ ಜೋರ್ಜ್ ಫೆರ್ನಾಂಡಿಸ್ ಅತ್ಮ್ಕಥನಾಚ್ಯಾ ಬುಕಾಚಿ ಏಕ್ ಪ್ರತಿ ಹಾಂಚೆಲಾಗಿಂ ಆಸಾಗೀ ? ಆದ್ಲ್ಯಾ ವರ್ಸಾ ಕನ್ನಡಾಂತ್ ಪಾಯ್ಸ್ ಜಾಲ್ಲ್ಯಾ ಜೋರ್ಜ್ ಫೆರ್ನಾಂಡಿಸ್ ಬುಕಾಚಿ ಏಕ್ ಪ್ರತಿ ಆಸಾಗೀ ? ತ್ಯಾ ಬುಕಾಂತ್ ಜೋರ್ಜ್ ಫೆರ್ನಾಂಡಿಸಾ ವಿಶ್ಯಾಂತ್ ಕೊಣೆಂ ಕಿತೆಂ ಸಾಂಗ್ಲಾಂ ಮ್ಹಳ್ಳೆಂ ಹಾಣಿ ವಾಚ್ಲಾಂಗೀ ? ಜೋರ್ಜ್ ಫೆರ್ನಾಂಡಿಸಾಕ್ ಜೋರ್ಜ್ ಫೆರ್ನಾಂಡಿಸ್ ಕೆಲ್ಲೊ ಮಂಗ್ಳುರ್ಚೊಚ್ ಪಿ. ಡಿಮೆಲ್ಲೊ ಕೋಣ್ ಮ್ಹಣ್ ಒಳಕ್ ತರೀ ಆಸಾಗೀ ? ಮುಂಬಯ್ ಶಹರಾಚ್ಯಾ ಮಧ್ಗಾತ್ ಆಸ್ಚ್ಯಾ ಜಯ್ತ್ ಪ್ರದಾನ್ ರಸ್ತ್ಯಾಕ್ ಪಿ. ಡಿಮೆಲ್ಲೊಚೆಂ ನಾಂವ್ ಕಿತ್ಯಾಕ್ ದವರ್ಲಾಂ ಆನಿ ಕಿತ್ಯಾಕ್ ಪಿ. ಡಿಮೆಲ್ಲೊಚಿ ವ್ಯಾಲಿಡಿಟಿ ಮಹಾರಾಷ್ಟ್ರಾಂತ್ ಅಜೂನ್ ಚಾಲು ಆಸಾ ಮ್ಹಳ್ಳೆ ವಿಶ್ಯಾಂತ್ ಕಾಂಯ್ ಸಮ್ಜೊನ್ ಘೆಂವ್ಚೆಂ ಪ್ರೇತನ್ ತರೀ ಕೆಲಾಂಗೀ ?
ಜೋರ್ಜ್ ಫೆರ್ನಾಂಡಿಸಾಚೆರ್ ತಿತ್ಲೋಯ್ ಅಭಿಮಾನ್ ಆಸಾ ಜಾಲ್ಯಾ ಪಯ್ಲ್ಯಾನ್ ಪಯ್ಲೆಂ ತುಮ್ಚ್ಯಾ ಸಂಘಟನಾಚ್ಯಾ ದಫ್ತರಾಂತ್ ತಾಚಿ ಏಕ್ ಫೊಟ್ರೇಟ್ ದವರಾ. ತುಮ್ಚ್ಯಾ ಘರಾಕ್ ತಾಚೆಂ ನಾಂವ್ ದಿಯಾ. ತುಮ್ಚ್ಯಾ ಘರ್ಚ್ಯಾ ಆಂಗ್ಣಾಂತ್, ಕಾಶ್ಯಾಚಿ ಮ್ಹಾರಗ್ ಜಾತಾ ಜಾಲ್ಯಾರ್ ಪಿಒಪಿಚಿ ತರೀ ಏಕ್ ಇಮಾಜ್ ಉಬಾರಾ! ತವಳ್ ತುಮ್ಕಾಂ ಜೋರ್ಜ್ ಫೆರ್ನಾಂಡಿಸಾಚ್ಯಾ ನಾಂವಾರ್ ರಸ್ತೊ ವಿಚಾರುಂಕ್ ‘ಮೋರಲ್ ವ್ಯಾಲಿಡಿಟಿ’ ಪ್ರಾಪ್ತ್ ಜಾತಾ. ತುಮ್ಚ್ಯಾ ಘರಾಂತ್, ತುಮ್ಚ್ಯಾ ಬುಕ್ ಶೆಲ್ಪಾಂತ್ ತುಮ್ಕಾಂ ಜೋರ್ಜ್ ಫೆರ್ನಾಂಡಿಸ್ ನಾಕಾ, ತುಮ್ಚ್ಯಾ ಘರಾಂತ್ ಜೋರ್ಜ್ ಫೆರ್ನಾಂಡಿಸಾಚಿ ಏಕ್ ಪೋಟ್ರೇಟ್ ದವರ್ನ್, ತುಮ್ಚ್ಯಾ ಭುರ್ಗ್ಯಾಂಕ್, ನಾತ್ರಾಂಕ್ ತಾಚಿ ಒಳಕ್ ಕರ್ನ್ ದೀಂವ್ಕ್ ನಾಕಾ ಜಾಲ್ಯಾರ್ … ಲೊಕಾಮಾಯೆನ್ ವಾಪಾರ್ಚ್ಯಾ ರಸ್ತ್ಯಾಕ್ ತಾಚೆಂ ನಾಂವ್, ಪುತ್ಳೊ, ಫಲಕ್ ವಿಚಾರುಂಕ್ ತುಮಿ ಕೋಣ್ ? Who you are ?
ಹ್ಯಾ ಆದಿಂಯ್ ಹಾಂವೆ ಬರಯಿಲ್ಲೆಂ ಆಸಾ; ಆತಾಂ, ಪರ್ತ್ಯಾನ್ ಬರಯ್ತೇ ಆಸಾಂ – ಮಂಗ್ಳುರಿ ಕ್ರಿಸ್ತಾಂವ್ ಸಮಾಜಾಂತ್ ಆಸ್ಚೆ ತಿತ್ಲ್ಯಾ ಮಾಪಾನ್, ನಾಂವ್ ಆನಿ ಪ್ರಚಾರಾ ಪಾಟ್ಲ್ಯಾನ್ ಧಾಂವ್ಚೊ, ಮೆಜಾವಯ್ಲೆಂ ಪಿಲ್ಯಾದ್ ಕಾಡ್ನ್ ನಾಂವ್ ಜೊಡುಂಕ್ ಸೊದ್ಚೊ, ಏಕ್ ವೆದಿ, ಸನ್ಮಾನ್, ಬಿರುದ್ ಮೆಳ್ತಾ ಜಾಲ್ಯಾರ್ ಖಂಯ್ಚ್ಯಾ ಹಂತಾಕೀ ದೆಂವೊಂಕ್ ತಯಾರ್ ಅಸ್ಚೊ, ಕೊರೊಡಾಂನಿ ದುಡು ಖರ್ಚ್ ಕರುಂಕ್ ತಯಾರ್ ಆಸ್ಚೊ ಲೋಕ್ ಹಾಂವೆ ಖಂಯ್ಚ್ಯಾಯ್ ಹೆರ್ ಸಮಾಜಾಂತ್ ಪಳೆಂವ್ಕ್ ನಾ. ಕೊಣೆಂ ಆಯ್ಕೊಂಕ್ ನಾತ್ಲಿಂ, ರತ್ನ್, ಸಾಮ್ರಾಟ್, ( … ಮಾತ್ತಿ ಗೊಬೊರ್ ) ಮ್ಹಣ್ ನವಿಂ ನವಿಂ ಬಿರುದಾಂ ರಚುನ್, ಪರ್ಗಟ್ ಸಭಾ ಆಪವ್ನ್, ಬಿಸ್ಪಾಂ ಕರ್ನಾಂ ಸನ್ಮಾನ್ ಕರವ್ನ್ , ವೆದಿ ಆನಿ ಮೈಕ್ ದೀಂವ್ಕ್ಚ್ ಮ್ಹಣ್ ಜಲ್ಮೊನ್ ಜಿಯೆಂವ್ಚಿಂ ಸಂಘಟನಾಂ ಮಂಗ್ಳುರಿ ಕ್ರಿಸ್ತಾಂವ್ ಸಮಾಜಾಂತ್ ಆಸ್ಚೆ ತಿತ್ಲಿಂ ಹೆರ್ ಸಮಾಜಾಂನಿ ನಾಂತ್. ಮಂ.ಕ್ರಿ. ಸಮಾಜಾಚೆಂ ನಾಂವಾಚೆಂ ಪಿಶೆಂ ಕಿತ್ಲೆಂ ಅತಿರೇಕಾಕ್ ಗೆಲಾಂ ಮ್ಹಣ್ ಸಮ್ಜಾಜೆ ಜಾಲ್ಯಾರ್, ಎಕೊಡಿ ಭಂವ್ಡಿ ಉಡುಪಿ ದಿಯೆಸೆಜಿಂತ್ ಮಾರ್ನ್ ಯೆಯಾ. ಘರಾಂತ್ ಕೋಣ್ ಎಕ್ಲೊ ಮರೊಂಕ್ ನಾ, ಗಲ್ಫಾಂತ್ಲ್ಯಾ ಭುರ್ಗ್ಯಾಂನಿ ಮೆಳೊನ್ ತಾಚ್ಯಾ ನಾಂವಾರ್ Late … Memorial ಮ್ಹಣ್ ಬಸ್ಸ್ಟೇಂಡ್ ಬಾಂದುನ್ ಜಾಲೆಂಚ್. ಥೊಡೆಕಡೆ ಬಸ್ಸ್ಟೇಂಡ್ ಬಾಂದ್ಚೊ ದರ್ವಡ್ ಪಳಯ್ತಾನಾ ಮರೊಂಕ್ಚ್ ರಾಕೊನ್ ಆಸ್ಲ್ಲೆಗಾಯ್? ಮ್ಹಣ್ ದುಬಾವ್ ಸುರು ಜಾತಾ! ಕ್ರೀಸ್ತಾಂವ್ ಸಮಾಜಾಂತ್ಲೆಂ ‘ಪಿಶೆಂಪಣ್’ ಪಳೆವ್ನ್ ಆತಾಂ ಹೆರ್ ಸಮಾಜಾಂತ್ಲೆಂಯ್ ಶಿಕ್ಲ್ಯಾತ್. ( ಕ್ರಿಸ್ತಾಂವ್ ಸಮಾಜಾಂತ್ಲ್ಯಾ ಕಾಜಾರಾಂಕ್ ಸೀಮಿತ್ ಆಸ್ಲ್ಲಿ ಎಮ್ಸಿ ಸಂಸ್ಕೃತಿ ಆತಾಂ ಹೆರ್ ಸಮಾಜಾಂಕೀ ವಿಸ್ತಾರ್ಲ್ಯಾ) ಕ್ರಿಸ್ತಾಂವ್ ಸಮಾಜಾಂತ್ಲ್ಯಾ ಥೊಡ್ಯಾಂಚ್ಯಾ ಹ್ಯಾ ಬುದಿವರ್ವಿಂ ಆಜ್ ಎಕುಣ್ ಸಮಾಜೆಚೆಂ ಸಮಾದಾನ್ ಪಿಡ್ಡ್ಯಾರ್ ಜಾಲಾಂ. ನಾಂವ್ ಆನಿ ಪ್ರಚಾರಾಕ್ ಲಬ್ದಾಲ್ಲ್ಯಾ ಕ್ರೀಸ್ತಾಂವ್ ಸಮಾಜೆಂತ್ಲ್ಯಾ ಥೊಡ್ಯಾಂಕ್ ಲಾಗ್ಲ್ಲಿ ಪಿಡಾ ಆಜ್ ಅಖ್ಖ್ಯಾ ಸಮಾಜಾಂತ್ ವಿಸ್ತಾರುನ್, ಆತಾಂ ಭಸ್ಮಾಸುರಪರಿಂ ಮಂಗ್ಳುರಿ ಕ್ರೀಸ್ತಾಂವ್ ಸಮಾಜೆಕ್ಚ್ ಗ್ರಾಸಿತೇ ಆಸಾ. ಸಾಂ. ಲುವಿಸ್ ಕೊಲೆಜ್ ರಸ್ತೊ ಮುಲ್ಕಿ ಸುಂದರ ರಾಮ ಶೆಟ್ಟಿ ರಸ್ತೊ ಜಾಲೊ, ಲೇಡಿ ಹಿಲ್ ನಾರಾಯಣ ಗುರು ವೃತ್ತ ಜಾಲೆಂ. ಆತಾಂ ತುಮ್ಕಾಂ ಜೋರ್ಜ್ ಫೆರ್ನಾಂಡಿಸ್ ರಸ್ತೊ ಜಾಯ್ ನೆ ? ಫಲ್ಯಾಂ ಫಾದರ್ ಮುಲ್ಲರ್ ರಸ್ತ್ಯಾಕೀ ಸಂಚಿಕಾರ್ ಯೆತಲೊ.
ಜೊರ್ಜ್ ಫೆರ್ನಾಂಡಿಸಾಚೆರ್ ತುಮ್ಕಾಂ ಖರ್ಯಾನ್ ಅಭಿಮಾನ್ ಆಸಾ ಆನಿ ತುಮಿ ಕರ್ಚೆಂ ಕಾಮ್ ತುಮಿ ‘ಚಲಾವಣೆ’ರ್ ಉರೊಂಕ್ ತುಮ್ಚ್ಯಾ ‘ಪಬ್ಲಿಸಿಟಿಕ್’ ನಯ್ ತರ್, ತಾಚ್ಯಾ ನಾಂವಾರ್ ಥೊಡ್ಯಾ ದುಬ್ಳ್ಯಾ ಭುರ್ಗ್ಯಾಂಕ್ ಶಿಕ್ಪಾಕ್ ಕುಮಕ್ ಕರಾ, ಖಂಯ್ಚ್ಯಾ ತರೀ ಎಕಾ ದುಬ್ಳ್ಯಾ ಕುಟ್ಮಾಕ್ ಘರ್ ಬಾಂದುನ್ ದಿಯಾ, ಚಡಿತ್ ದುಡು ಆಸಾ ತರ್ ಜೋರ್ಜ್ ಫೆರ್ನಾಂಡಿಸಾಚ್ಯಾ ನಾಂವಾರ್ ಏಕ್ ಕೊಲೊನಿ ಬಾಂದಾ, ತ್ಯಾ ಸ್ಕೊಲರ್ಶಿಪ್ಪಾಂಕ್, ತ್ಯಾ ಕೊಲೊನಿಕ್, ಕೊಲೊನಿಚ್ಯಾ ರಸ್ತ್ಯಾಕ್ ಆನಿ ರಸ್ತ್ಯಾಚ್ಯಾ ಲೈಟ್ ಖಾಂಬ್ಯಾಕೀ ಜಾಯ್ ಜಾಲ್ಯಾರ್ ಜೋರ್ಜ್ ಫೆರ್ನಾಂಡಿಸಾಚೆಂಚ್ ನಾಂವ್ ದಿಯಾ. ಹೆಂ ಖಂಯ್ಚೇಂಯ್ ತುಮ್ಕಾಂ ಫಟಾನಾ ಜಾಲ್ಯಾರ್, ದೋನ್ ವರ್ಸಾಂ ತರೀ ಜೋರ್ಜ್ ಫೆರ್ನಾಂಡಿಸಾನ್ ಸೆಮಿನರಿಚೆಂ ಶಿತ್ ಖೆಲಾಂ ನಯ್ ? ವರ್ಸಾಕ್ ಎಕಾ ಸೆಮಿನರಿಸ್ತಾಚೊ ಖರ್ಚ್ ತರೀ ಪಳಯಾ! ಅಸಲೆಂ ಸಮಾಜೆಕ್ ಉಪ್ಕಾರಾಕ್ ಪಡ್ಚೆಂ ಕಾಮ್ ಕರ್ಚೆಂ ಸೊಡ್ನ್, ಆತಾಂ ಸಮಾದಾನೆನ್ ನಿದೊನ್ ಆಸ್ಚ್ಯಾ ರಸ್ತ್ಯಾಕ್ ತಾಚೆಂ ನಾಂವ್ ದಿಯಾ, ರಯ್ಲ್ ಥಳಾಚೆಂ ನಾಂವ್ ಬದ್ಲಿಯಾ ಮ್ಹಣ್ ಗಾಂದಿಲ್ ಮುಸಾಂಚ್ಯಾ ಪಟ್ಟಾಕ್ ಫಾತರ್ ಮಾರ್ಚೆಂ ಕಾಮ್ ಕಿತ್ಯಾಕ್ ಕರುಂಕ್ ವೆತಾತ್ ? ಉಡಾಸ್ ಆಸುಂ … ತುಮಿ ಫಾತರ್ ಮಾರ್ತಾತ್ ಆನಿ ಧಾಂವ್ತಾತ್. ಉಚಾಂಬೋಳ್ ಗಾಂದಿಲ್ ಮೂಸ್ ಬಿಶಪ್ ವಿಕ್ಟರ್ ರೋಡಾಥಾವ್ನ್ ಧರುನ್ ಫಾದರ್ ಮುಲ್ಲರ್ ರೋಡಾ ಪರ್ಯಾಂತ್ ಸಗ್ಳ್ಯಾನ್ ವೀದ್ವಾವ್ಳಿ ಸುರು ಕರ್ತಾತ್. ಹ್ಯಾ ಲುಕ್ಸಾಣಾಕ್ ಜವಾಬ್ದಾರ್ ಕೋಣ್ ?
ಕ್ರೀಸ್ತಾಂವ್ ಸಮಾಜಾಚೆ ಅಧಿಕೃತ್ ಪ್ರತಿನಿಧಿ ಜಾವ್ನಾಸ್ಚ್ಯಾ ದಿಯೆಸೆಜಿಚ್ಯಾ ವ್ಹಡಿಲಾನ್, ಕ್ರೀಸ್ತಾಂವ್ ಸಮಾಜಾಂತ್ಲ್ಯಾ ಪ್ರಜ್ಞಾವಂತ್ ನಾಗರಿಕಾಂನಿ ಆತಾಂ ತರೀ ಜಾಗೆ ಜಾವ್ನ್ ಹ್ಯಾ ವಿಶಯಾಚೆರ್ ಗಂಬೀರ್ ಚರ್ಚಾ ಕರ್ಚಿ ಗರ್ಜ್ ಆಸಾ. ಫುಡಾರಾಂತ್ ಕ್ರೀಸ್ತಾಂವ್ ಸಮಾಜಾಚೆಂ ಪ್ರತಿನಿಧಿತ್ವ್ ಕರ್ಚ್ಯಾ ಕೊಣಾಯ್ಚ್ಯಾಯ್ ನಾಂವಾರ್ ರಸ್ತೊ, ನಿಲ್ದಾಣ್ ಜಾಯ್ ತರ್, ಸಗ್ಳ್ಯಾಂನಿ, ಮ್ಹಳ್ಯಾರ್ ದಿಯೆಸೆಜಿಚ್ಯಾ ವ್ಹಡಿಲಾನ್, ಜೆಜ್ವಿತ್ ಪಾದ್ರಿಂನಿ, ಎ.ಸಿ. ಸಿಸ್ಟರಾಂನಿ ಆನಿ ಬಿಸ್ಪಾಚೆಂ ಬೆಸಾಂವ್ ಘೆವ್ನ್ ನಾಮ್ಪತ್ರ್ ದಾಕಲ್ ಕರುಂಕ್ ವೆಚ್ಯಾ ಕ್ರಿಸ್ತಾಂವ್ ಫುಡಾರ್ಯಾಂನಿ … ಸಾಂಗಾತಾ ಬಸೊನ್ ವಿಚಾರ್ ವಿನಿಮಯ್ ಕರ್ನ್ ನಿರ್ಧಾರ್ ಘೆಂವ್ಚಿ ಗರ್ಜ್ ಆಸಾ. ಉಪ್ರಾಂತ್ ಸಗ್ಳ್ಯಾಂನಿ ಸಾಂಗಾತಾ ಮೆಳೊನ್ ಪ್ರೆಸ್ ಕೊನ್ಪರೆನ್ಸ್. ಕೊಣಾ ಎಕ್ಲ್ಯಾಚಾ ಪಬ್ಲಿಸಿಟಿಚ್ಯಾ ಆಶೆಕ್, ಚಲಾವಣೆರ್ ಉರ್ಚ್ಯಾ ಹೊರ್ಬೊಸಾಕ್ ಅಖ್ಖ್ಯಾ ಕ್ರೀಸ್ತಾಂವ್ ಸಮಾಜಾಚಿ ಕಿತ್ಯಾಕ್ ಬಲಿ ದಿತಾತ್? ತುಮ್ಚ್ಯಾ ಪ್ರಚಾರಾಚ್ಯಾ ಪಿಶ್ಯಾಕ್ ಗಾಂವ್ಚೆಂ ಶಾಂತಿ ಸಮಾದಾನ್ ಕಿತ್ಯಾಕ್ ಕದ್ವಳಾಯ್ತಾತ್ ?
– ಎಚ್ಚೆಮ್, ಪೆರ್ನಾಲ್
Dear Mr. HM, Most of the time the views expressed by you are relevant and makes us to sit back and think.I appreciate your divergent thought process. But i feel this article of yours has been one sided. As you have the right to oppose the idea of naming a road for Late George Fernandes .The other party also has a right to express or put forward a demand. The demand may happen or may not happen but they have expressed their view and you also have a right to express it. But thinking that this move will result in other roads getting renamed or removed does not make any sense. If the road is named after MS Shetty or circle is named after Narayana Guru ,does the crdibility of St. Aloysius college or Ladyhill school decline. Does anybody knows who is Jagnath Joshi- for whom a road name was changed recently. I feel the division between our catholic writer community is being expressed in your thoughts as people belonging to this group or that group. Divergent thought of writers is also good .Otherwise how our konakani or kannada language could have grown interms of Navya Vs Navodaya dialogues. I once again repeat that dualism is the way of life
You are 100% right.. The names of the existing roads are vanishing without trace due to political pressure, what is the point in keeping George Fernandes name to another road and after some years it will changed into another name?. As you suggested sponsor some charitable deeds under his name n let the needy benefit from the funds generated.
Finally I do not understand why our Bishop should involve in these issues? He has many others religious obligations to fulfill and not support these self proclaimed leaders..
ನಿಜಾಕಿ ಸಾರ್ಕಿ ಸವಾಲಾಂ ವಿಚರ್ಲಾಯ್ ಹೆನ್ರಿ ಬಾಬ್
ಪೊಯ್ಲ್ಯಾನ್ ಹಾಂಚಾ ಫುಡಾರ್ ಫೊಂಡಾಕ್ ನಾವ್ ಕೊಂಕಣ್ ಸಮಾಜೆಚೆ ಮಾಲ್ಘ್ಡಾಡ್ಯಂಚೆ ಪಡಾಜೆ.
ಮೂಸಾಂಕ್ ಫಾತರ್ ಉಡಯಿಲ್ಯಾರ್ ಯಾ ದುವರ್ ಫುಂಕ್ಲ್ಯಾರಿ ಲುಕ್ಸಾನ್ ಖಂಡಿತ್.