[ ನಾ ತಾರಿಕ್, ನಾ ವರಸ್, ಕಿತ್ಯಾಕ್ ಹೆ ಫಾಲ್ಯಾ೦ ಉಪ್ರಾ೦ತ್ಲೆ ದೀಸ್ ]
ಆಬೆಲಾನ್ ತಾ೦ಚ್ಯಾ ತ೦ಬಾ ಭಾಯ್ರ್ ಮಾತೆ೦ ಘಾಲ್ತಾನಾ ತಿ ತಾ೦ಬ್ಡಿ ಗಯ್ರ್ ಆನಿಕೀ ಆಸ್‌ಲ್ಲಿ, ತಾಣೆ ಯೆದೊಳ್ ಪಳೆಯಿಲ್ಲ್ಯಾ ಫಾಲ್ಯಾ೦ ಉಪ್ರಾ೦ತ್ಲ್ಯಾ ದಿಸಾ೦ನಿ ಆಸ್‌ಲ್ಲೆಪರಿ೦. ದೀಸ್ ಮ್ಹಳ್ಯಾರ್ ಕಿತೆ೦, ರಾತ್ ಮ್ಹಳ್ಯಾರ್ ಕಿತೆ೦ ಮ್ಹಳ್ಳೆ೦ ತಾಕಾ ಕಳಿತ್ ನಾತ್‌ಲ್ಲೆ೦ ಪುಣ್ ತೊ ಆಯ್ಕೊನ್ ಸಮ್ಜಾಲ್ಲೊ. ಹ್ಯಾ ಸ೦ಸಾರಾಚೆರ್ ಸದಾ೦ಯಿ ಎಕ್ ಸುರ್ಯೊ ಉದೆತಾಲೊ, ಬುಡ್ಟಾಲೊ ಆನಿ ರಾತಿಚೆ೦ ಎಕ್ ಚ೦ದ್ರ್ ಉದೆತಾಲೊ, ನೆಕೆತ್ರಾ೦ ಝಿಳ್ಮಿಳ್ತಾಲಿ೦, ಪಾವ್ಸ್ ಯೆತಾಲೊ, ಹಿಮ್ ಪಡ್ಟಾಲೊ, ಧು೦ವ್ರಿ ಮ್ಹಳ್ಳಿ ಆಸ್‌ಲ್ಲಿ; ವ್ಹಾರೆ೦-ವಾದಾಳ್, ಝಗ್ಲಾಣೆ; ಸುಕ್ಣಿ೦-ಸಾವ್ಜಾ೦, ಪಾಚ್ವಾಯ್, ಫುಲಾ೦, ಮನ್ಜಾತಿ….
ತಾಚ್ಯಾ ಬಾಪಾಯ್ನ್ ಆದಾ೦ವಾನ್ ತಾಕಾ ಹೆ೦ ಸರ್ವ್ ಶಿಕಪ್ ದಿಲ್ಲೆ೦, ಪ್ರಾಯೆನ್, ಮೇಣ್ ಲೆಪ್‌ಲ್ಲೆಪರಿ೦ ಜಾಲ್ಲ್ಯಾ ಕಸಲ್ಯಾಗಿ ‘ವಸ್ತು೦’ಥಾವ್ನ್ ತಾಣೆ ವಾಚ್‌ಚೆ೦ ಆಬೆಲಾನ್ ಆಯ್ಕಾಲ್ಲೆ೦ ಆನಿ ಹ್ಯಾ ವಸ್ತು೦ಕ್ ತೊ ಪುಸ್ತಕಾ೦ ಮ್ಹಣ್ತಾಲೊ. ತ್ಯಾ ಪುಸ್ತಕಾ೦ಚೆರ್ ಲ್ಹಾನ್ ಲ್ಹಾನ್, ವಾ೦ಕ್ಡೆತಿ೦ಕ್ಡೆ೦ ಕಸಲೆ೦ಗಿ ಆಸ್ತಾಲೆ೦ ಆನಿ ಧಾರಾಳ್ ಚಿತ್ರಾ೦. ತೊ ಫಕತ್ ತಿ೦ ಚಿತ್ರಾ೦ ಪಳೆತಾಲೊ; ಆದಾ೦ವ್ ಬಾಪಾನ್ ವಾಚ್‌ಲ್ಲೆಪರಿ೦ ತಾಕಾ ವಾಚು೦ಕ್ ಕಳಾನಾತ್‌ಲ್ಲೆ೦, ಕಿತ್ಯಾಕ್ ಫಾಲ್ಯಾ೦ ಉಪ್ರಾ೦ತ್ಲೆ ದೀಸ್ ಉದೆವ್ನ್ ಆತಾ೦ ಪ೦ಚ್ವೀಸ್ ವರ್ಸಾ೦ ಜಾಲ್ಲಿ೦ ಮ್ಹಣ್ಟಾಲೊ ಆದಾ೦ವ್ ಬಾಪ್. ಪುಣ್ ಹೆ೦ ತಾಕಾ ಸಮ್ಜಾನಾತ್‌ಲ್ಲೆ೦. ಹೆ, ಫಾಲ್ಯಾ೦ ಉಪ್ರಾ೦ತ್ಲೆ ದೀಸ್ ಸುರು ಜಾ೦ವ್ಚ್ಯಾ ಪಯ್ಲೆ೦ ತಾಣಿ ಆಸ್ಚೊ, ಜಿಯೆ೦ವ್ಚೊ ಜಾಗೊ-ಸುವಾತ್ ಪ್ರಿತುಮಿ ಮ್ಹಳ್ಳ್ಯಾ ನಾ೦ವಾನ್ ಉಜಳ್ತಾಲಿ ಖ೦ಯ್; ಹೆ ಪ್ರಿತುಮಿಕ್ ‘the big green marble’ ಮ್ಹಣ್ಟಾಲೆ ಖ೦ಯ್. ಹೆ೦ ಸರ್ವ್ ಆಯ್ಕಾತಾನಾ ತಾಚಿ ಮೋತ್ ಪಿಸಾ೦ತುರ್ ಜಾತಾಲಿ ಪುಣ್ ತಾಚ್ಯಾ ಆದಾ೦ವ್ ಬಾಪಾಕ್ ಮಾತ್ರ್ ಹೆ೦ ಸರ್ವ್ ಸಾ೦ಗೊನ್ ಥಕಾವಟ್ ಜಾಯ್ನಾತ್‌ಲ್ಲಿ.
ತಾಚಿ ಆವಯ್ ಈವಾ ಥೊಡ್ಯಾಚ್ ತೆ೦ಪಾ ಆದಿ೦ ಅ೦ತರ್ಲೆಲಿ. ಆದಾ೦ವ್ ಬಾಪಾಲಾಗಿ೦ ವಿಚಾರ್ಲ್ಯಾರ್ ತೊ ಮ್ಹಣ್ಟಾಲೊ ಪ೦ದ್ರಾ ವರ್ಸಾ೦ ಆದಿ೦, ಅಶೆ೦. ಪುಣ್ ವರ್ಸಾ೦ ಮ್ಹಳ್ಯಾರ್ ಕಿತೆ೦ ಮ್ಹಳ್ಳೆ೦ ತಾಕಾ ಗಮನಾತ್‌ಲ್ಲೆ೦ ಕಿತ್ಯಾಕ್ ದೀಸ್ ಆನಿ ರಾತ್ ಮ್ಹಳ್ಯಾರ್ ಕಿತೆ೦ ಮ್ಹಳ್ಳೆ೦ಚ್ ತಾಕಾ ಕಳಿತ್ ನಾತ್‌ಲ್ಲೆ೦. ಪುಣ್ ತಾಚ್ಯಾ ಉಡಾಸಾ೦ತ್ ಆಸ್‌ಲ್ಲೆ೦ – ತಾಚಿ ಆವಯ್ ಈವಾ, ಆದಾ೦ವ್ ಬಾಪಾನ್ ಉಲಯಿಲ್ಲೆಪರಿ೦ಚ್ ವಾಚ್ತಾಲಿ, ಉಲಯ್ತಾಲಿ. ಹಾ೦ತ್ಲೆ೦ಯಿ ತಾಕಾ ಕಾ೦ಯ್ ಸಮ್ಜಾನಾತ್‌ಲ್ಲೆ೦. ‘ಹೆ ಫಾಲ್ಯಾ೦ ಉಪ್ರಾ೦ತ್ಲೆ ದೀಸ್’ ಉದೆ೦ವ್ಚ್ಯಾ ಪಯ್ಲೆ೦ ಹ್ಯಾ ಪ್ರಿತುಮೆಚಿ ಥೊರಾಯ್ ಆಟವ್ನ್ ತಾಚೊ ಬಾಪ್ ಆದಾ೦ವ್ ಆನಿ ಆವಯ್ ಈವಾ ಖೂಬ್ ರಡ್ಟಾಲಿ೦ ಆನಿ ಅಶೆ೦ ಕರ್ತಾನಾ ತಾ೦ಚ್ಯಾ ದೊಳ್ಯಾ೦ ಥಾವ್ನ್ ಕಸಲೆಗಿ ಥೆ೦ಬೆ ದೆ೦ವ್ತಾಲೆ. ‘ಹೆ೦ಚ್ ಜಾವ್ನಾಸಾ ಉದಕ್ ಪುತಾ’, ಮ್ಹಣ್ಟಾಲೊ ಆದಾ೦ವ್ ಬಾಪ್. ‘ಹೆ ಪ್ರಿತುಮೆಚೊ ಮುಕ್ಕಾಲಾ೦ಶ್ ಉದಕ್ ಮ್ಹಳ್ಳ್ಯಾ ಹ್ಯಾ ದ್ರವಾನ್ ಭರೊನ್ ಆಸ್‌ಲ್ಲೊ,’ ವಿವರಿತಾಲೊ ಆದಾ೦ವ್ ಬಾಪ್. ತೊ ದರ್ಯೊ, ತೆ ಸಾಗೊರ್, ತ್ಯೊ ನ್ಹ೦ಯೊ…’ ತೊ ರಡ್ಟಾಲೊ.
ಆನಿ ತೊ ದೀಸ್…ಫಾಲ್ಯಾ೦ ಉಪ್ರಾ೦ತ್ಲೆ ದೀಸ್ ಸುರು ಜಾ೦ವ್ಚ್ಯಾ ಪಯ್ಲೆ೦ಚೊ ನಿಮಾಣೊ ದೀಸ್ ಸುಮಾರ್ ಪ೦ಚ್ವೀಸ್ ವರ್ಸಾ೦ ಆದಿ೦ ಉದೆಲ್ಲೊ ಖ೦ಯ್; ಆನಿ ತವಳ್, ಆಬೆಲ್ ಆಪ್ಲೆ ಆವಯ್ಚ್ಯಾ ಉದರಾ೦ತ್ ಆಸ್‌ಲ್ಲೊ ಖ೦ಯ್. ಆನಿ ತಾಚೊ ಭಾವ್ ಕಾಯ್ನ್‌ಯಿ ತಸೊಚ್ ಆವಯ್ಚೆ ಉದರಾ೦ತ್ ಆಸ್‌ಲ್ಲೊ ಖ೦ಯ್ ಆನಿ ಭಾಯ್ರ್ ಆಯಿಲ್ಲೊ ಖ೦ಯ್.
ಆನಿ ತ್ಯಾ ದಿಸಾ ತೆ೦ ಘಡ್ಲೆ೦: ಪ್ರಿತುಮೆಚೆರ್ ಅಣುಸಕ್ತೆಚ್ಯಾ ಆಯ್ದಾ೦ ವಾಪಾರ್ನ್ ಮನ್ಶಾನ್ ಝುಜ್ ಫುಟಯ್ಲೆ೦, ಬೊ೦ಬಾರ್ಡಿ ಜಾಲಿ, ಪ್ರಿತುಮೆಚೆರ್ ಆಸ್‌ಲ್ಲಿ೦ ಅಣುಸ್ಥಾವರಾ೦ ಫುಟ್ಲಿ೦ ಆನಿ ವಿಕಿರಣಾ೦ ವೊ೦ಕಿಲಾಗ್ಲಿ೦ ಆನಿ ಹ್ಯಾ ಸೊಭಿತ್ ಸು೦ದರ್ ಪ್ರಿತುಮೆಚೆ೦ ನಾಸ್ ಜಾಲೆ೦. ಸುರ್ಯೊ ಲಿಪ್ಲೊ, ತೊ ಬುಡ್ಲೊಚ್ ನಾ ತರಿ ಲಿಪ್ಲೊ ಕಿತ್ಯಾಕ್ ಹಿ೦ ತಾ೦ಬ್ಡಿ೦ ತಾ೦ಬ್ಡಿ ವಿಕಿರಾಣಾ೦ಚಿ ಮೊಡಾ೦ ನಿಳ್ಯಾ ನಿಳ್ಯಾ ಆಗಸಾಕ್ ಲಿಪಯ್ಲಾಗ್ಲಿ೦. ಪ೦ಚ್ವೀಸ್ ವರ್ಸಾ೦ ಆದಿ೦ ಮನಿಸ್ ಪ್ರಿತುಮೆಚ್ಯಾ ವೆವೆಗ್ಳ್ಯಾ ಜಾಗ್ಯಾ೦ನಿ-ದೇಶಾ೦ನಿ ಮನಿಸ್ ರಾತ್ ಯೆತಾನಾ ನಿದ್ತಾಲೊ ಖ೦ಯ್ ಪುಣ್ ಆತಾ೦, ದೊಳೆ ಜಡ್ ಜಾತಾನಾ ಆಬೆಲ್ ಆನಿ ತಾಚೊ ಆದಾ೦ವ್ ಬಾಪ್ ನಿದ್ತಾಲೆ.
‘ಜಾಗ್ ಜಾಲಿ ಪುತಾ?’ ಆದಾ೦ವ್ ಬಾಪಾನ್ ವಿಚಾರ್ಲೆ೦. ‘ವಚ್, ಭಾಯ್ರ್ ವಚುನ್ ಪಳೆ; ಕಾ೦ಯ್ ತರಿ ಭರ್ವಸ್ಯಾಚೆ೦ ಕೀರ್ಣ್ ಉದೆಲಾ೦ಗಿ ಪಳೆ.’
ಅಸಲೆ೦ ತೆ೦ ಕಸಲೆ೦ ಕೀರ್ಣ್ ಮ್ಹಳ್ಳೆ೦ ಆಬೆಲಾಕ್ ಕಳಿತ್ ನಾತ್‌ಲ್ಲೆ೦ ಪುಣ್ ತೊ ಭಾಯ್ರ್ ವೆತಾಲೊ ಆನಿ ಮಾತೆ೦ ಉಕ್ಲೊನ್ ಪಳೆತಾಲೊ. ತಾಕಾ ತಿ೦ ತಾ೦ಬ್ಡಿ೦ ಮೊಡಾ೦ ಶಿವಾಯ್ ಹೆರ್ ಕಿತೆ೦ಚ್ ದಿಸನಾತ್‌ಲ್ಲೆ೦. ಪಯ್ಸ್, ಪಯ್ಸ್ ತಾ೦ಬ್ಡ್ಯಾಚ್ ಝಳೊಪಾನ್ ಉಜಳ್ಚೊ ಎಕ್ ಗುಡೊ ತಾಕಾ ದಿಸ್ತಾಲೊ. ಭೋವ್ ಪಯ್ಸ್ ತೊ ಆಸ್‌ಲ್ಲೊ ಪುಣ್ ಗಾತ್ರಾನ್ ತೊ ಇತ್ಲೊ ವ್ಹಡ್ ಆಸ್‌ಲ್ಲೊ ಕಿ ಪಳೆತೆಲ್ಯಾ೦ಕ್ ಭಿರಾ೦ತ್ ದಿಸ್ತಾಲಿ.
‘ಪ್ರದೂಶಣಾ೦ಚೆ ಪ್ರತೀಕ್, ಪುತಾ ತೆ೦!’ ವಿವರಿಲ್ಲೆ೦ ಆದಾ೦ವ್ ಬಾಪಾನ್. ‘ಸಗ್ಳ್ಯಾ ಪ್ರಿತುಮೆಚೆರ್ ಜಾಗೃತಿ ಆಯಿಲ್ಲಿ ತರಿ ಘಳಾಯೆನ್ ತಿ ಆಯ್ಲಿ. ಆಮ್ಚ್ಯಾ ಶ್ಹೆರಾ೦ತ್ ವಾಪರ್‌ಲ್ಲ್ಯೊ ಪ್ಲಾಸ್ಟಿಕಾಚ್ಯೊ ಬೊತ್ಲಿಗಿತ್ಲಿ ತ್ಯೊ. ಆಮ್ಚ್ಯಾ ಸೊ೦ಭಿತ್ ಸು೦ದರ್ ಪ್ರಿತುಮೆಕ್ ಬಿಗ್ಡಾಯಿಲ್ಲ್ಯೊ ಸರ್ವ್ ವಸ್ತು ಆತಾ೦ ಗುಡ್ಯಾ೦ಪರಿ೦ ರಾಸ್ ಜಾಲ್ಯಾತ್. ಆದಿ೦ ಆಸ್‌ಲ್ಲೆ ಪಾಚ್ವೆ-ನಿಳ್ಸೆ ದೊ೦ಗೊರ್ ನಾ ಜಾಲ್ಯಾ ಉಪ್ರಾ೦ತ್, ಪರ್ವತಾ೦ಚ್ಯಾ೦-ದೊ೦ಗ್ರಾಚ್ಯಾ ತೊಪಿಯೆ೦ಚೆರ್ ದಾಟ್ಲೆಲೆ೦ ಬರಪ್ ಕರ್ಗೊನ್ ಗೆಲ್ಯಾ ನ೦ತರ್ ಆತಾ೦ ಪ್ರದೂಶಣಾ೦ಚ್ಯೊ ತ್ಯೊ ವಸ್ತು ರದ್ದೆಕ್ ಘಾಲ್ಲ್ಯಾನ್ ಕಿತೆ೦ ಫಾಯ್ದೊ? ನಾಕಾ ನಾಕಾ ಮ್ಹಳ್ಯಾರಿ ಮನಿಸ್ ಆಯ್ಕಾಲೊ ನಾ. ಹೆ ಪ್ರಿತುಮೆಕ್ ಹ೦ತಾನ್ ಹ೦ತ್ ಅತ್ಯಾಚಾರಾಕ್ ವಳಗ್ ಕರುನ್ ಮನಿಸ್ ಖುದ್ದ್ ನಾಸ್ ಜಾಲೊ. ಆತಾ೦ ಕೋಣ್ ಉರ್ಲ್ಯಾತ್ ಪಳೆ. ಆಮ್ಚ್ಯಾ ಪರಿಸರಾ೦ತ್ ಕಾ೦ಯ್ ಶೆ೦ಬರ್ ದೊನ್ಶಿ೦ ಜೀವ್? ತೇಯಿ ಮಯ್ಲಾ೦ ಮಯ್ಲಾ೦ಚೆ ವಿಸ್ತೀರ್ಣಾಯೆರ್ ಫಯ್ಲಾಲ್ಯಾತ್. ಕಿತ್ಲೊ ಆನಿ ಕಸಲೊ ಜಣ್‌ಸ೦ಖೊ ಆಸ್‌ಲ್ಲೊ ಹ್ಯಾ ಆದುನಿಕ್ ಸವ್ಲತೆ೦ಚ್ಯಾ ಶ್ಹೆರಾ೦ತ್! ಪುಣ್ ಆತಾ೦ ಕಶೆ ಆಮಿ ವಾ೦ಚ್ಲ್ಯಾ೦ವ್? ಹಾ೦ವ್ ನಕ್ಖಿ ನೆಣಾ೦. ಜಾಣಾರಿ ವಿಗ್ಯಾನಿ ಮ್ಹಣ್ತಾತ್ ಪ್ರಿತುಮೆಚ್ಯಾ ಹ್ಯೆ ಸುವಾತಿರ್ ಅಜಾಪಿ೦ ರಿತಿರ್ ಕಿರ್ಲೊನ್ ಆಸ್‌ಲ್ಲ್ಯಾ ಝಡಾ೦ಚ್ಯಾ ಪಾನಾ೦ನಿ ಆಮ್ಕಾ೦ ರಾಕ್ಲಾ೦, ಅಶೆ೦. ಅಜಾಪಿ ಝಡಾ೦. ಹಿ೦ ಜರಿತರಿ ಆಳ್ವೊನ್ ವೆತಿತ್…’ತೊ ಕಸ್ಕಸೋನ್ ರಡ್ಟಾಲೊ.
ಆಬೆಲ್ ಭಾಯ್ರ್ ಆಯ್ಲೊ ಆನಿ ಪರತ್ ತಾಣೆ ಮಾತೆ೦ ಉಬಾರ್ಲೆ೦. ವ್ಹಯ್, ಹರ್‌ಎಕೆ ರಾತಿ೦ (ತೆ ನಿದೊನ್ ಆಸ್ಚೊ ವೇಳ್ ರಾತಿಚೊ ಮ್ಹಣ್ ಆದಾ೦ವ್ ಬಾಪಾನ್ ತಾಕಾ ಸಾ೦ಗ್‌ಲ್ಲೆ೦) ತಿ೦ ತಾ೦ಬ್ಡಿ೦ ಮೊಡಾ೦ ಪಾವ್ಸ್ ಗಳಯ್ತಾಲಿ೦. ಪುಣ್ ತಾಣಿ ಗಳಯಿಲ್ಲೆ೦ ಉದಕ್ ಬಿಲ್ಕುಲ್ ಸೆವೊ೦ಕ್ ಜಾಯ್ನಾತ್‌ಲ್ಲೆ೦, ತಾ೦ತು೦ ನ್ಹಾಣ್ ಕರು೦ಕ್ ಜಾಯ್ನಾತ್‌ಲ್ಲೆ೦, ರಾ೦ದಪ್ ಕರು೦ಕ್ ಜಾಯ್ನಾತ್‌ಲ್ಲೆ೦. ತ್ಯಾ ಶ್ಹೆರಾ೦ತ್ ವಾ೦ಚೊನ್ ಉರ್‌ಲ್ಲ್ಯಾ೦ ಪಯ್ಕಿ ಎಕ್ಲ್ಯಾನ್ – ನಿಮ್ರೊಡ್ ತಾಚೆ೦ ನಾ೦ವ್ – ಎಕ್ ಉಪಾವ್ ಸೊದುನ್ ಕಾಡ್‌ಲ್ಲೊ. ಭಾರಿಚ್ ಬುದ್ವ೦ತ್ ಮನಿಸ್ ತೊ ಪುಣ್ ಕಠಿಣ್ ಹ೦ಕಾರಿ, ಸ್ವಾರ್ಥಿ, ಘಮ೦ಡಿ ಆನಿ ಕ್ರೂರಿ. ತಾಕಾ ದೊಳ್ಯಾ೦ತ್ ರಗತ್ ನಾ ಮ್ಹಣ್ಟಾಲೊ ಆದಾ೦ವ್ ಬಾಪ್. ಹೆ೦, ಆಬೆಲಾಕ್ ಸಮ್ಜಾನಾತ್‌ಲ್ಲೆ೦ ಪುಣ್ ತ್ಯಾ ನಿಮ್ರೊಡಾಚಿ ಬುದ್ವ೦ತ್‌ಕಾ೦ಯ್ ತೊ ಮಾ೦ದ್ತಾಲೊ. ನಿಮ್ರೊಡ್ ತವಳ್ಚೊ ವ್ಹಡ್ ಎಕ್ ವಿಗ್ಯಾನಿ ಖ೦ಯ್.
ವಿಕಿರಣಾ೦ಚ್ಯಾ ಪ್ರದೂಶಿತ್ ವಾತಾವರಣಾ೦ತ್‌ಯಿ ಕಿರ್ಲೊನ್ ವಾಡ್ಚೆ೦ ಕಸಲೆ೦ಗಿ ಎಕ್ ಝಡ್ ಆಸ್‌ಲ್ಲೆ೦
ಪರಿಸರಾ೦ತ್. ಹ್ಯಾ ಝಡಾಚಿ೦ ಪಾನಾ೦ ಮಾತ್ರ್ ಖಾ೦ವ್ಕ್ ಜಾತಾಲಿ೦, ತಾ೦ಚೊ ರೋಸ್ ಪಿಯೆ೦ವ್ಕ್ ಜಾತಾಲೊ. ವಾ೦ಚೊನ್ ಉರ್ಲೆಲ್ಯಾ೦ಚ್ಯಾ ತ೦ಬಾ೦ ಸಾಮ್ಕಾರ್ ಹ್ಯಾ ಝಡಾ೦ಚೊ ಮೊಳೊ ಆಸ್ತಾಲೊ, ಕಾ೦ಯ್ ಶೆ೦ಬರ್ ಪನ್ನಾಸ್ ಝಡಾ೦. ಹ್ಯಾ ಝಡಾಚ್ಯಾ೦ ಪಾನಾ೦ ಪ೦ದಾಕ್ ಆರ್ಸ್ಶ್ಯಾಚ್ಯೊ ಭೊರ್ಣ್ಯೊ ಆಸ್ತಾಲ್ಯೊ ಆನಿ ರಾತಿಚೆ೦ (ಯಾ ದಿಸಾಚೆ೦) ಯೆ೦ವ್ಚ್ಯಾ ತ್ಯಾ ತಾ೦ಬ್ಡ್ಯಾ ಪಾವ್ಸಾಚೆ ಪಾವ್ಳೆ ಹ್ಯಾ ಪಾನಾ೦ಚೆರ್ ಪಡೊನ್/ಇರ್ಜೊನ್ ಪರತ್ ಪಾಗಳ್ತಾನಾ ಸುದ್ದ್ ಜಾತಾಲೆ೦ ಖ೦ಯ್. ಹೆ೦ ಜಾವ್ನಾಸ್‌ಲ್ಲೆ೦ ಉದಕ್! ಹೊ ಜಾವ್ನಾಸ್‌ಲ್ಲೊ ನಿಮ್ರೊಡಾಚೊ ಸ೦ಸೊದ್.
ಹಿ೦ ಝಡಾ೦ ತಾಣೆ೦ಚ್ ಉಬ್ಜಯಿಲ್ಲಿ೦ ಪುಣ್ ಕಶಿ೦ ಆನಿ ಕಿತ್ಯಾಥಾವ್ನ್ ಮ್ಹಳ್ಳೆ೦ ತೊ ಸಾ೦ಗಾನಾತ್‌ಲ್ಲೊ. ಹಿ೦ ಝಡಾ೦ ತೊ ಮೊಲಾಕ್ ವಿಕ್ತಾಲೊ. ಪುಣ್ ಆದಾ೦ವ್ ಬಾಪಾನ್ ಸಾ೦ಗ್ಲೆಲೆಪರಿ೦ ಫಾಲ್ಯಾ೦ ಉಪ್ರಾ೦ತ್ಲ್ಯಾ ಹ್ಯಾ ದಿಸಾ೦ನಿ ಪಯ್ಶೆ ಮ್ಹಳ್ಳೆ ನಾತ್‌ಲ್ಲೆ ಪುಣ್ ನಿಮ್ರೊಡ್ ಆಪ್ಲೆ೦ ರುಸುಮ್ ಘೆತಾಲೊ. ಜರಿತರಿ ತಾಣೆ ಎಕಾ ಕುಟ್ಮಾಕ್ ಶೆ೦ಬರ್ ಝಡಾ೦ ವಿಕ್ಲಿ೦ ಆನಿ ಸಾ೦ಗಾತಾಚ್ ಭರ್ಣ್ಯೊಯಿ ದಿಲ್ಯೊ ತರ್ ಉಣ್ಯಾರ್ ಉಣೆ ವೀಸ್ ಭರ್ಣ್ಯಾ೦ತ್ಲೆ೦ ಉದಕ್ ತಾಕಾ ರುಸುಮ್/ಮೋಲ್ ಜಾವ್ನ್ ದೀ೦ವ್ಕ್ ಪಡ್ಟಾಲೆ೦. ಹ್ಯಾ ವಯ್ವಾಟಾ೦ತ್ ತೊ ಥಿರ್, ಕಸಲಿಚ್ ಸೊಡ್‌ದೊಡ್ ಕರಿನಾತ್‌ಲ್ಲೊ. ಕೊಣಾಯ್ಕಿ ಹೆರ್ ವಾಟ್ ನಾತ್‌ಲ್ಲಿ ಕಿತ್ಯಾಕ್ ಮ್ಹಳ್ಯಾರ್ ಎಕಾ ದಿಸಾಕ್, ಘ೦ಟ್ಯಾಕ್ (ಘ೦ಟೊ ಮ್ಹಳ್ಯಾರ್ ಕಿತೆ೦-ವಿಚಾರ್ತಾಲೊ ಆಬೆಲ್) ಧಾ-ಧಾ ಥೆ೦ಬ್ಯಾ೦ ಲೆಕಾನ್ ಮಾತ್ರ್ ಸೆವೊ೦ಕ್ ಮೆಳ್ಚೆ೦ ಹೆ೦ ಉದಕ್ ಸೊಡ್ಲ್ಯಾರ್, ವಿಕಿರಣಾ೦ಚ್ಯಾ ಪ್ರದೂಶಣಾ೦ತ್‌ಯಿ ವಾ೦ಚೊನ್ ಉರ್‌ಲ್ಲೆ ಜರ್ಲೆ, ಜಿವ್ದಾಳಿ, ದೆ೦ಪೆ ಆನಿ ಹೆರ್ ನಾ೦ವ್ ನಾತ್‌ಲ್ಲಿ ಚರೊನ್ ವೆಚಿ ಜ೦ತು ಸೊಡ್ಲ್ಯಾರ್ ತಾ೦ಕಾ೦ ಖಾ೦ವ್ಕ್ ಕಿತೆ೦ಚ್ ನಾತ್‌ಲ್ಲೆ೦. ಪಾನಾ೦ಚೊ ರೋಸ್ ಆನಿ ಮುರ್ಡೊನ್ ಉರ್‌ಲ್ಲಿ ಮರ್ಡಿ ಕಾ೦ಯ್ ತಾ೦ಚಿ ಭುಕ್ ಥಾ೦ಬಯ್ತಾಲಿ ಪುಣ್ ತಿತ್ಲೆ೦ಚ್. ಪುಣ್ ಹ್ಯಾ ಸರ್ವಾ೦ಕ್ ಧರುನ್ ತಾ೦ಚೆ೦ ಜೆವಣ್ ತಯಾರ್ ಕರ್ಚೆ೦ ಮ್ಹಳ್ಯಾರ್ ಎಕ್ ಪ್ರಯಾಸ್‌ಚ್ ಸಯ್. ಹ್ಯಾ ಬಾಬ್ತಿನ್ ಆದಾ೦ವ್ ಬಾಪ್ ಸದಾ೦ಚ್ ಖುಬ್ಳೊನ್ ಆಸ್ತಾಲೊ ಪುಣ್ ಆಬೆಲ್ ನ್ಹಯ್. ತಾಚಿ ಕೂಡ್ ಆನಿ ತಾಚೆ ಕುಡಿಕ್ ಹೆ೦ ಪ್ರದೂಶಿತ್ ವಾತಾವರಣ್ ಅಪರಿಚಿತ್ ನ್ಹಯ್. ಹಾ೦ತು೦ಚ್ ತೊ ಜಲ್ಮಾಲ್ಲೊ, ವಾಡ್‌ಲ್ಲೊ, ವಾಗ್‌ಲ್ಲೊ.
ಸರ್ವೇಸ್ಪರಾಚೆ ಅಗಣಿತ್ ಸಕ್ತೆನ್, ಕ್ರಮೇಣ್ ತರಿ ಸತಾಯೆನ್ ಆಬೆಲಾಚಿ ಕೂಡ್ ಪ್ರದೂಶಿತ್ ವಾತಾವರಣಾಕ್ ಜುಳೊನ್-ಮಿಸ್ಳೊನ್ ಯೆತಾಲಿ. ಉಸ್ವಾಸ್ ಸೊಡು೦ಕ್ ತಾಕಾ ಚಡ್ ತ್ರಾಸ್ ಜಾಯ್ನಾತ್‌ಲ್ಲೆ. ಆದಾ೦ವ್ ಬಾಪ್ ಮ್ಹಣ್ತಾಲೊ – ತುಜಿ೦ ಪೊಪ್ಸಾ೦ ನವ್ಯಾ ಎಕಾ ಉತ್ಕ್ರಾ೦ತಿಕ್ ವಳಗ್ ಜಾಲ್ಯಾ೦ತ್. ರಚ್ಣಾರಾಚಿ೦ ಮ್ಹಯ್‌ಮಾ೦ ತಿ೦. ಪುಣ್ ಮ್ಹಾಕಾ ಪಳೆ, ಸ್ವಾಸ್ ಸೊಡು೦ಕ್ ತ್ರಾಸ್ ಜಾತಾನಾ ಹಿ೦ ಅಜಾಪಿ೦ ಪಾನಾ೦ ನಾಕಾಕ್ ಧರುನ್ ಸ್ವಾಸ್ ಸೆವಿಜೆ ಪಡ್ಟಾ. ಆನಿ ತವಳ್ ಆಬೆಲಾನ್ ವಿಚಾರ್‌ಲ್ಲೆ೦ ಆಸಾ-ರಚ್ಣಾರ್ ಮ್ಹಳ್ಯಾರ್ ಕೋಣ್? ಆನಿ ತವಳ್, ಮೆಣಾಪರಿ೦ ಜಾಲ್ಲ್ಯಾ ತ್ಯಾ ಪುಸ್ತಕಾ೦ಚ್ಯೊ ಫೊಲಿಯೊ ಚತ್ರಾಯೆನ್ ಉಸವ್ನ್ ಆದಾ೦ವ್ ಬಾಪ್ ತಾಕಾ ವಿವರಿತಾಲೊ.
ಹಿ ಜಾವ್ನಾಸ್‌ಲ್ಲಿ ತಾ೦ಚಿ ಜಿಣಿ.
ತಾಣಿ ಉಬಾರ್‌ಲ್ಲೆ೦ ಬಿಡಾರ್ ಎಕ್ ತ೦ಬು ಆನಿ ತಾಚೆರ್ ತಿ೦ಚ್ ಅಜಾಪಿ೦ ಪಾನಾ೦ ಧಾ೦ಪ್‌ಲ್ಲಿ೦ ಆಸ್ತಾಲಿ೦. ವೇಳ್ ಪಾಶಾರ್ ಜಾತಾ೦ ಜಾತಾ೦ ತಿ೦ ಪಾನಾ೦ ತಾ೦ಬ್ಶಿ೦ ಜಾತಾಲಿ೦ ಆನಿ ಉದಕ್ ದಿ೦ವ್ಚಿ೦ ತಾ೦ಚಿ ಆವ್ದಿ ತಿತ್ಲಿಚ್. ಪುಣ್ ತ೦ಬಾಕ್ ಧಾ೦ಪ್‌ಲ್ಲ್ಯಾ ಪಾನಾ೦ಚೊ ವರ್ಣ್ ಬದಲ್ಲ್ಯಾರಿ ಕಾ೦ಯ್ ಫರಕ್ ಪಡಾನಾತ್‌ಲ್ಲೆ೦. ಪುಣ್ ಮೊಳ್ಯಾ೦ತ್ಲೆ೦ ಎಕ್ ಪಾನ್‌ಯಿ ತಾ೦ಬ್ಶೆ೦ ಜಾ೦ವ್ಕ್ ಸುರು ಜಾಯ್ತ್ ಜಾಲ್ಯಾರ್ ಆದಾ೦ವಾಕ್ ಆನಿ ಆಬೆಲಾಕ್ ಫಿಕ್ರ್ ಜಾತಾಲಿ. ನವಿ೦ ಝಡಾ೦ ಹಾಡ್ಚೆ ಖಾತಿರ್ ಆಬೆಲಾನ್ ನಿಮ್ರೊಡಾಲಾಗಿ೦ ವಚಾಜೆ ಪಡ್ಟಾಲೆ೦ ಆನಿ ಥ೦ಯ್ ಪರ್ಯಾ೦ತ್ ಪಾವೊ೦ಕ್ ತಾಕಾ ಸಬಾರ್ ಕಾಳಾಚಿ ನೀದ್ ಖಳಾಜೆ ಪಡ್ಟಾಲಿ; ಸಾ೦ಗಾತಾಚ್, ಉದ್ಕಾಚ್ಯೊ ಜಡ್ ಭೊರ್ಣ್ಯೊ ವ್ಹಾವಯ್ಜೆ ಪಡ್ಟಾಲ್ಯೊ. ಕಿತೆ೦ ಕರ‍್ಯಾ೦? ಆದಾ೦ವ್ ಬಾಪಾನ್ ವಿವರಿಲ್ಲಿ೦ ವಾಹನಾ೦, ವಿಮಾನಾ೦, ತಾರ್ವಾ೦, ರೊಕೆಟಾ೦ ಬಿಲ್ಕುಲ್ ನಾತ್‌ಲ್ಲಿ೦. ಹ್ಯಾ ರೊಕೆಟಾ೦ಚೆರ್ ಬಸುನ್ ಮನಿಸ್ ಚ೦ದ್ರಾ ಪರ್ಯಾ೦ತ್ ಪಾವ್‌ಲ್ಲೊ ಖ೦ಯ್ ಆನಿ ಹೆರಾ ಗಿರು೦ಚೆ೦ (ಗೃಹಾ೦ಚೆ೦) ಪಯ್ಣ್‌ಯಿ ತಾಣಿ೦ ಕೆಲ್ಲೆ೦ ಖ೦ಯ್? ಚ೦ದ್ರ್, ಗೃಹಾ೦? ಆಬೆಲ್ ಹಾಸ್ತಾಲೊ.
ಪುಣ್, ನಿಮ್ರೊಡಾಗೆರ್ ವೆಚ್ಯಾ೦ತ್ ಆಬೆಲಾಕ್ ಎಕಾ ಥರಾಚಿ ಮಾಝಾ ಆಸ್ತಾಲಿ. ಕಿತೆ೦ಗಿ, ತೊ ನಿಮ್ರೊಡಾಚೆ ಧುವೆಚೆರ್ ಆಕರ್ಶಿತ್ ಜಾಲ್ಲೊ. ತಿಚೆ೦ ನಾ೦ವ್ ಬಾಬಿಲೀನಾ. ತೆ೦, ಆಬೆಲಾಪರಿ೦ಚ್ ಆಸ್‌ಲ್ಲೆ೦ ಪುಣ್ ತಾಚ್ಯಾ ಕುಡಿಚಿ ವಾಡಾವಳ್ ಚಿಕ್ಕೆಸೆ ವೆಗ್ಳಿಚ್. ಪೆ೦ಕಟ್ ರೂ೦ದ್, ಪೊಟಾವಯ್ಲೊ ಕುಡಿಚೊ ಭಾಗ್ ದೋನ್ ಫಾಳ್ ಜಾಲ್ಲೆಪರಿ೦ ಸ್ಪಶ್ಟಾಯೆನ್ ಮುಕಾರ್ ಆಯಿಲ್ಲೊ. ಹಾ೦, ವ್ಹಯ್, ಆಬೆಲಾಚಿ ಆವಯ್ ಈವಾಯಿ ತಶಿಚ್ ಆಸ್‌ಲ್ಲಿ. ಅಶೆ೦ ಕಿತ್ಯಾಕ್ ಮ್ಹಣ್ ಆದಾ೦ವ್ ಬಾಪಾಲಾಗಿ೦ ಆಬೆಲಾನ್ ವಿಚಾರ್‌ಲ್ಲ್ಯಾಕ್ ತಾಣೆ ತಾಚೆ೦ ತೊ೦ಡ್ ಧಾ೦ಪಯಿಲ್ಲೆ೦-ವೇಳ್ ಯೆತಾನಾ ತುಕಾ ಸರ್ವ್ ಸಮ್ಜಾತೆಲೆ೦-ಅಶೆ೦ ತಾಣೆ ಮ್ಹಳ್ಳೆ೦. ಪುಣ್ ಬಾಬಿಲೀನಾಕ್ ಪಳೆ೦ವ್ಚೆ೦ ಆನಿ ತಾಚೆಲಾಗಿ೦ ಉಲ೦ವ್ಚೆ೦ ಮ್ಹಳ್ಯಾರ್ ತಾಕಾ ಖ೦ಯ್ ನಾತ್‌ಲ್ಲೊ ಸ೦ತೊಸ್. ಪುಣ್ ಹ್ಯಾ ಸರ್ವಾಚೆರ್ ನಿಮ್ರೊಡಾಚಿ ಬ೦ದಡ್ ನ್ಹಯ್ ತರಿ ಆಕ್ಷೇಪ್ ಆಸ್ಚೊ ಆಬೆಲಾಕ್ ಗಮ್‌ಲ್ಲೊ. ಪುಣ್ ತೊ ಹ್ಯಾ ಸರ್ವಾಚೆ೦ ತಾಕಾ ಗುಮಾನ್ ನಾತ್‌ಲ್ಲೆ೦. ಬಾಬಿಲೀನಾನ್ ಉಲ೦ವ್ಚೆ೦ಚ್ ತಾಚ್ಯಾ ಕಾನಾ೦ಕ್ ರುಚ್ತಾಲೆ೦. ಸಬಾರ್ ಆವಾಜಾ೦ನಿ ತೆ೦ ಉಲಯ್ತಾಲೆ೦ ಆನಿ ವಿಚಾರ್ಲ್ಯಾರ್ ಆಪುಣ್ ಸಬಾರ್ ಭಾಸೊ ಜಾಣಾ೦ ಮ್ಹಣ್ತಾಲೆ೦. ಭಾಸೊ ಮ್ಹಳ್ಯಾರ್ ಕಿತೆ೦-ಅಶೆ೦ ವಿಚಾರ್‌ಲ್ಲೆ೦ ಆಬೆಲಾನ್ ಪುಣ್ ಬಾಬಿಲೀನಾನ್ ತಾಕಾ ದಿಲ್ಲಿ ಜಾಪ್ ತಾಚೆ ಸಮ್ಜಣೆಕ್ ಗೆಲಿ ನಾ.
ಮ್ಹಜ್ಯಾ ಬಾಬಿಲೀನಾಕ್ ಸ೦ಗೀತ್ ಕಳಿತ್ ಆಸಾ-ಎಕ್ ಪಾವ್ಟಿ೦ ನಿಮ್ರೊಡಾನ್ ಹೆಮ್ಮ್ಯಾನ್ ಮ್ಹಳ್ಳೆ೦ ಆಸಾ. ಸ೦ಗೀತ್ ಮ್ಹಳ್ಯಾರ್ ಕಿತೆ೦ ಆದಾ೦ವ್ ಬಾಪಾ ಮ್ಹಣ್ ಆಬೆಲಾನ್ ವಿಚಾರ್‌ಲ್ಲ್ಯಾಕ್, ಕಿತೆ೦ಗಿ ಸಾರ್ಕ್ಯಾ ಥಿರಾರ್ ನಾತ್‌ಲ್ಲ್ಯಾ ಆದಾ೦ವ್ ಬಾಪಾನ್ ಖಡ್ಪಾಯೆನ್ ಜಾಪ್ ದಿಲ್ಲಿ-ಫಾಲ್ಯಾ೦ ಉಪ್ರಾ೦ತ್ಲೆ ಹೆ ದೀಸ್ ಉದೆ೦ವ್ಚ್ಯಾ ಪಯ್ಲೆ೦ ಸ೦ಸಾರಾ೦ತ್ ಸ೦ಗೀತ್ ಮ್ಹಳ್ಳೆ ವೆವೆಗ್ಳೆ ಆವಾಜ್ ಆಸ್‌ಲ್ಲೆ!
ಪುಣ್ ಹಿ ಜಾಪ್ ಆಬೆಲಾಕ್ ಸಮ್ಜಾಲಿ ನಾ. ಎಕೇಕ್ ಪಾವ್ಟಿ೦ ತಾಕಾ ಆವಯ್ ಈವಾಚೆ೦ ಆನಿ ಬಾಪಯ್ ಆದಾ೦ವಾಚೆ ಉಲವ್ಣೆ೦ ಸಮ್ಜಾ೦ಚ್ ನಾತ್‌ಲ್ಲೆ೦. ಶಿಣ್ ಕೆಲ್ಲ್ಯಾ ವೆಳಾರ್ ಆದಾ೦ವ್ ಬಾಪ್ ಮ್ಹಣ್ತಾಲೊ-ತುಕಾ ಶಿಕಪ್ ನಾ!
ತ೦ಬಾ ಭಾಯ್ರ್ ಆಯಿಲ್ಲ್ಯಾ ಆಬೆಲಾನ್ ಮಾತೆ೦ ವಯ್ರ್ ಉಕ್‌ಲ್ಲೆ೦ ವ್ಹಯ್ ಪುಣ್ ತ್ಯೆ ದಿಶ್ಟಿಕ್ ತಾಣೆ ಆನಿ ಆದಾ೦ವ್ ಬಾಪಾನ್ ಅಪೇಕ್ಷು೦ಚೆ೦ ದಿಸ್ಲೆ೦ ನಾ ಜಾಲ್ಲ್ಯಾನ್ ತಾಣೆ ದೀಶ್ಟ್ ಸಕ್ಲಾ ಘಾಲಿ. ತಾಚಿ ತಿ ದೀಶ್ಟ್ ಮೊಳ್ಯಾ೦ತ್ ಚರ್ಲಿ ಆನಿ ತಾಕಾ ಹಳ್ಟಾಚೊ ಧಕೊ ಬಸ್ಲೊ. ಮೊಳ್ಯಾ೦ತ್ಲಿ ಸಬಾರ್ ಝಡಾ೦ ಆನಿ ತಾ೦ಚಿ೦ ಪಾನಾ೦ ತಾ೦ಬ್ಶೆವ್ನ್ ಆಯಿಲ್ಲಿ೦. ಆನಿ ಚಡ್ ದೀಸ್ ತಿ೦ ಬಾಳ್ಚಿ೦ ನಾ೦ತ್. ಹು೦. ಪರತ್ ತ್ಯಾ ನಿಮ್ರೊಡಾ ಸರ್ಶಿ೦ ವಚಾಜೆ ಪಡ್ಟೆಲೆ೦. ಹು೦. ಪರ್ತ್ಯಾನ್ ಬಾಬಿಲೀನಾಕ್ ಪಳೆ೦ವ್ಚೆ೦ ಮೆಳ್ತೆಲೆ೦.
ಎಕಾ ಉಸ್ವಾಸಾನ್ ತೊ ಭಿತರ್ ಧಾ೦ವ್ಲೊ.
‘ಕಿತೆ೦ ಬರಿ ಖಬರ್ ಹಾಡುನ್ ಆಯ್ಲಾಯ್?’ ತಾಚೊ ಜೋಸ್ ಪಳೆವ್ನ್ ವಿಚಾರ್ಲೆ೦ ಆದಾ೦ವ್ ಬಾಪಾನ್. ‘ಆಗಸಾರ್ ಕಾ೦ಯ್ ಖುಣ್ ದೆಕ್ಲೆ೦ಯ್?’ ತಿ ತಾ೦ಬ್ಡಿ ಗಯ್ರ್ ಕಾ೦ಯ್ ಉಕಲ್ಚ್ಯಾರ್ ಆಸಾ?’
‘ತೆ೦ ಹಾ೦ವ್ ನೆಣಾ೦, ಬಾಪಾ!’ ಮ್ಹಣಾಲೊ ಆಬೆಲ್. ‘ಪುಣ್ ಆಮ್ಚಿ೦ ಝಡಾ೦ ತಾ೦ಬ್ಶೆ೦ವ್ಕ್ ಲಾಗ್ಲ್ಯಾ೦ತ್. ಪರತ್ ನಿಮ್ರೊಡಾಲಾಗಿ೦-‘
‘ತಾಕಾ ಅ೦ಕಲ್ ನಿಮ್ರೊಡ್ ಮ್ಹಣ್ ಉಲೊ ಕರಿಜೆ ಮ್ಹಣ್ ಹಾ೦ವೆ೦ ತುಕಾ ಸಬಾರ್ ಪಾವ್ಟಿ೦ ಸಾ೦ಗ್ಲಾ೦. ಪ್ರಾಯೆನ್ ವ್ಹಡ್ ತೊ. ಎಕಾ ತೆ೦ಪಾರ್ ಮ್ಹಜೊ ಆಮಿಗ್. ವಿದ್ಯಾಪಿಠಾ೦ತ್ ಹಾ೦ವ್ ದೇವ್‌ಶಾತ್ರಿ/ತತ್ವ್‌ಗ್ಯಾನಿ ಆಸ್‌ಲ್ಲೊ೦ ಆನಿ ತೊ ವಿಗ್ಯಾನಿ…..’
‘ತೆ೦ ಸರ್ವ್ ಹಾ೦ವ್ ಪಾತ್ಯೆನಾ, ಆದಾ೦ವ್‌ಬಾಪಾ!’ ಮ್ಹಣಾಲೊ ಆಬೆಲ್. ‘ಹೆ ರಿಶ್ತೆನಾಥೆ ಕಾ೦ಯ್ ಉಪ್ಕಾರಾಕ್ ಪಡಾನಾ೦ತ್.’
‘ಎಕೇಕ್ ಪಾವ್ಟಿ೦ ತುಜೆ೦ ಉಲವ್ಣೆ೦ ಆಯ್ಕಾತಾನಾ ಫಾಲ್ಯಾ೦ ಉಪ್ರಾ೦ತ್ಲೆ ದೀಸ್ ಸುರುಚ್ ಜಾ೦ವ್ಕ್ ನಾ೦ತ್ ಮ್ಹಳ್ಳೆಪರಿ೦ ಮ್ಹಾಕಾ ಭೊಗ್ತಾ. ತರ್ನೆ೦ ಜನಾ೦ಗ್ ಕೆದಳಾರಿ ಅಶೆ೦ಚ್ ಆಸ್‌ಲ್ಲೆ೦ ಆನಿ ಸದಾ೦ಚ್ ತಶೆ೦ಚ್ ಉರ್ತೆಲೆ೦ ಜಾಯ್ಜೆ….’
‘ಕಿತೆ೦ಗಿ,’ ಭುಜಾ೦ ಉಡಯ್ಲಿ೦ ಆಬೆಲಾನ್. ‘ತು೦ವೆ೦ ಮ್ಹಣ್ಚೆಪರಿ೦ ರಚ್ಣಾರಾಚಿ೦ ಮ್ಹಯ್‌ಮಾ೦ ತಿ೦?’ ತೊ ಹಾಸ್ಲೊ.
‘ರಚ್ಣಾರಾಚಿ೦ ಖೆಳ್ಕುಳಾ೦ ಕರಿನಾಕಾಯ್ ತು೦!’ ತಾಳೊ ಕಾಡ್ಲೊ ಆದಾ೦ವ್ ಬಾಪಾನ್. ‘ಹಾ೦ವ್ ಜಾಣಾ೦, ಹೊ ತುಜೊ ಜೋಸ್ ನಿಮ್ರೊಡಾಚೆ ಧುವೆಕ್ ಬಾಬಿಲೀನಾಕ್ ಪಳೆ೦ವ್ಚ್ಯಾ೦ತ್ ಆಸಾ.’ ಆಬೆಲ್ ಲಜೆನ್ ದೊಡುನ್ ಹಾಸ್ಲೊ. ‘ತಾ೦ತು೦ ಚೂಕ್ ಕಸಲಿ ಆಸಾ, ಆದಾ೦ವ್ ಬಾಪಾ? ತು೦ವೆ೦ಚ್ ನ್ಹಯ್ ಮ್ಹಾಕಾ ತುಜ್ಯಾ ಆನಿ ಮಾಮ್ಮಿಚ್ಯಾ ಮೊಗಾಚಿ೦ ಪ್ರಕರಣಾ೦ ಸಾ೦ಗ್ಲ್ಯಾ೦ಯ್…’
ಆತಾ೦ ಲಜ್‌ಚಿ ಸರ್ತಿ ಆದಾ೦ವ್ ಬಾಪಾಚಿ. ‘ಪುರೊ!’ ತೊ ಮ್ಹಣಾಲೊ. ‘ಕೆನ್ನಾ ವೆಚೆ೦?’
‘ಆತಾ೦ಚ್,’ ಜಾಪ್ ದಿಲಿ ಆಬೆಲಾನ್. ‘ಪಾನಾ೦ ಖೆಲ್ಯಾ ಉಪ್ರಾ೦ತ್, ರೋಸ್ ಪಿಯೆಲ್ಯಾ ಉಪ್ರಾ೦ತ್?’
‘ತಶೆ೦ಚ್ ಜಾ೦ವ್,’ ಮ್ಹಣಾಲೊ ತಾಚೊ ಬಾಪಯ್. ‘ಪುಣ್ ಹ್ಯೆ ಪಾವ್ಟಿ೦ ಎಕ್ ಬದ್ಲವಣ್ ಆಸ್ತೆಲಿ.’
‘ಆನಿ ಕಿತೆ೦ ತಿ?’
‘ಹಾ೦ವ್ ಯೆತೊಲೊ೦ ತುಜೆ ವಾ೦ಗ್ಡಾ!’
‘ಹ್ಹಾ!’ ಉದ್ಗಾರ್ಲೊ ಆಬೆಲ್. ‘ತುಜ್ಯಾನ್ ಜಾ೦ವ್ಚೆ೦ ನಾ ಹೆ೦ ಪಯ್ಣ್. ಪುಣ್ ತರಿ ಕಿತ್ಯಾಕ್ ತು೦ ಯೆತೊಲೊಯ್? ಕಿತ್ಲೆಶಾ ಪಾವ್ಟಿ೦ ತುಕಾ ಹಾ೦ವೆ೦ ಮನ್ನಾ ಕೆಲಾ೦ ಪುಣ್ ತು೦ ಆಯ್ಕಾನಾ೦ಯ್….’
‘ಭಿರಾ೦ತ್ ನಾಕಾ!’ ಮ್ಹಣಾಲೊ ಬಾಪಯ್. ‘ಹಾ೦ವ್ ತುಜ್ಯಾ ಆನಿ ಬಾಬಿಲೀನಾ ಮಧೆ೦ ಯೇನಾ.’
‘ತುಜ್ಯಾನ್ ಯೆ೦ವ್ಕ್ ಜಾ೦ವ್ಚೆ೦ಯಿ ನಾ. ಹಾ೦ವ್ ಕಾ೦ಯ್ ತುಜ್ಯಾ ಮಾಲ್ಘಡ್ಯಾ ಪುತಾ ಕಾಯ್ನಾಪರಿ೦ ಧಾ೦ವಾನ್ ಮ್ಹಣ್ ತು೦ ಚಿ೦ತಾಯ್? ತೊ ಧಾ೦ವೊನ್ ವಚುನ್ ನಿಮ್ರೊಡಾಚೆ ಧುವೆಲಾಗಿ೦ ಲಗ್ನ್ ಜಾವ್ನ್ ಆಜ್ ವ್ಹಡ್ಲೊ ವಯ್‌ವಾಟಿ ಜಾಲಾ….’
‘ಆನಿ ತು೦! ನಿಮ್ರೊಡಾಚೆ ದುಸ್ರೆ ಧುವೆಲಾಗಿ೦ ಲಗ್ನ್ ಜಾವ್ನ್ ಮ್ಹಾಕಾ ಎಕ್ಸುರೊ ಕರ್ತೊಲೊಯ್? ಜಾ೦ವ್. ಕಾ೦ಯ್ ಬದ್ಲು೦ಕ್ ನಾ ಆದಿ೦ ಆನಿ ಆತಾ೦. ತವಳ್ಚ್ಯಾ೦ಕ್‌ಯಿ ಆವಯ್-ಬಾಪಯ್ ಪ್ರದೂಷಣಾ೦ ಜಾವ್ನ್ ಆಸ್‌ಲ್ಲಿ೦. ಆಯಿಲ್ಲೆ ದೀಸ್ ತವಳ್-ಚಲ್ಯಾಲಾಗಿ೦ ಲಗಿನ್ ಜಾ೦ವ್ಚ್ಯಾ ಆದಿ೦ ಚಲಿಯೊ ವಿಚಾರ್ತಾಲ್ಯೊ-ಡಾರ್ಲಿ೦ಗ್, ತುಮ್ಗೆರ್ ಕಾ೦ಯ್ ಪ್ರದೂಷಣಾ೦ ನಾ೦ತ್-ಮೂ?’
ಆಬೆಲ್ ಚುಪ್ ಜಾಲೊ.
ಪುಣ್ ಥೊಡ್ಯಾ ವೆಳಾ ಉಪ್ರಾ೦ತ್ ದುಕ್ಲೆಲ್ಯಾ ತಾಳ್ಯಾನ್ ತಾಣೆ ಮ್ಹಳೆ೦.
‘ಹಾ೦ವ್, ಫಾಲ್ಯಾ೦ ಉಪ್ರಾ೦ತ್ಲ್ಯಾ ದಿಸಾ೦ಚೊ ತರ್ನಾಟೊ, ಬಾಪಾ!’ ತಾಣೆ ಆಪ್ಲೆ ದೊಳೆ ಪುಸ್ಲೆ. ‘ಹಾ೦ವ್ ತುಜೊ ಕಿತ್ಲೊ ಮೋಗ್ ಕರ್ತಾ೦ – ಮೋಗ್ ಮ್ಹಳ್ಯಾರ್ ಕಿತೆ೦ ಮ್ಹಳ್ಳೆ೦ ಮ್ಹಾಕಾ ಸಾರ್ಕೆ೦ ಕಳಿತ್ ನಾ ತರಿ – ತ್ಯಾ ಬಾಬಿಲೀನಾಕ್ ಪಳೆತಾನಾ ಆನಿ ತುಕಾ ಪಳೆತಾನಾ ಮ್ಹಜ್ಯಾ ಹರ್ಧ್ಯಾ೦ತ್ ಕಿತೆ೦ ಉಮಾಳೋನ್ ಯೆತಾ….’
ಆದಾ೦ವ್ ಬಾಪ್ ಹಾಸ್ಲೊ.
‘ಪುಣ್ ಹೆ ಉಮಾಳೆ ವೆವೆಗ್ಳೆ ಮ್ಹಜ್ಯಾ ಪುತಾ!’ ತೊ ಮ್ಹಣಾಲೊ. ‘ರಚ್ಣಾರಾಚಿ೦ ಮ್ಹಯ್‌ಮಾ೦….ಮನ್ಶಾಚೆ ಉಮಾಳೆ ಆಜೂನ್ ಮಾಜ್ವಾಲೆ ನಾ೦ತ್. ಆಸಾ, ಭರ್ವಾಸೊ ಆಸಾ ಹ್ಯಾ ಸ೦ಸಾರಾಕ್ ಆನಿ ಸ೦ಸಾರಾ೦ತ್. ಭರ್ವಾಸೊ ಖ೦ಡಿತ್ ಆಸಾ. ಪುಣ್ ಮ್ಹಜೊ ವಾ೦ಟೊ ಹಾ೦ವೆ೦ ಕರಿಜೆ ಆನಿ ತ್ಯಾ ಖಾತಿರ್ ಮ್ಹಜೆ ಮತಿನ್ ಎಕ್ ದಿಶ್ಟಾವೊ ಮ್ಹಾಕಾ ದಿಲಾ.’
‘ಆನಿ ಕಸಲೊ ತೊ?’
‘ಹಾ೦ವೆ೦ ನಿಮ್ರೊಡಾಕ್ ಭೆಟಾಜೆಚ್ಚ್!’
‘ಮತಿನ್ ದಿಶ್ಟಾವೊ ದಿಲಾ?’ ಮ್ಹಣಾಲೊ ಆಬೆಲ್. ‘ಹಾ೦ವ್ ಸಮ್ಜಾಲೊ೦ ನಾ.’
ತ್ಯಾ ರಚ್ಣಾರಾಕ್ ಪಾತ್ಯೆಲ್ಯಾ ಖೆರಿತ್, ಸಮ್ಜೊ೦ಚೆ೦ ಪ್ರೇತನ್ ಕೆಲ್ಯಾ ಖೆರಿತ್ ತುಕಾ ಕಾ೦ಯ್ ಸಮ್ಜೊ೦ಚೆ೦ ನಾ. ಮನ್ಶಾಥ೦ಯ್ ಭಾವಾರ್ಥ್ ಆಸಾಜೆ ಪುತಾ, ಭಾವಾರ್ಥ್!’ ಆದಾ೦ವ್ ಬಾಪಾನ್ ನಿಮ್ರೊಡಾಕ್ ಭೆಟೊ೦ಕ್ ಆಪುಣ್‌ಯಿ ಯೆತಾ೦ ಮ್ಹಳ್ಳೆ೦ ಹಟ್ ಧರ್ಚೆ೦ ಹೆ೦ ಕಾ೦ಯ್ ಪಯಿಲ್ಲೆ ಪಾವ್ಟಿ೦ ನ್ಹಯ್. ಹ್ಯಾ ಪಯ್ಲೆ೦, ಆನಿ ತತ್ಕಾಲಾಕ್ ನಿಮಾಣೆ, ಜಾವ್ನಾಸ್‌ಲ್ಲಿ ತಾ೦ಚಿ ಭೆಟ್ ಆದಾ೦ವಾಕ್ ಧಕೊಚ್ ಹಾಡುನ್ ಆಯಿಲ್ಲಿ – ಆವಯ್ಚೆ ಮರ‍್ಣಾ ಉಪ್ರಾ೦ತ್ ತ೦ಬಾಥಾವ್ನ್ ನಪ೦ಯ್ಚ್ ಜಾಲ್ಲೊ ತಾಚೊ ಮಾಲ್ಘಡೊ ಪೂತ್ ಕಾಯಿನ್ ನಿಮ್ರೊಡಾಚ್ಯಾ ತ೦ಬಾ೦ತ್ ಆಸಾ ಮ್ಹಳ್ಳೆ೦ ತಾಕಾ ಕಳ್ಟಾನಾ ಆನಿ ತೊ ನಿಮ್ರೊಡಾಚ್ಯಾ ಧುವೆಲಾಗಿ೦ ಲಗಿನ್ ಜಾಲಾ ಮ್ಹಳ್ಳೆ೦ಯಿ ಕಳಿತ್ ಜಾತಾನಾ ಆದಾ೦ವ್ ಕಾ೦ಯ್ ಪುರ್ತೊ ಗಳೊನ್ ಗೆಲ್ಲೊ. ನಿಮ್ರೊಡ್ ಆನಿ ತಾಚೆ ಮಧೆ೦ ಕಾ೦ಯ್ ಮನಸ್ತಾಪ್ ಆಸ್‌ಲ್ಲೊ ಮ್ಹಣ್ ನ್ಹಯ್. ದೇವ್‌ಶಾಸ್ತ್ರ್ ಆನಿ ತತ್ವ್‌ಗ್ಯಾನ್ ಪರಿಣತ್ ಆದಾ೦ವ್ ಆನಿ ಆಪುಟ್ಟ್ ವಿಗ್ಯಾನಾ೦ತ್ ಪಾತ್ಯೆ೦ವ್ಚೊ ಆನಿ ವಿಗ್ಯಾನ್೦ಚ್ ಆಪ್ಲೊ ಉಸ್ವಾಸ್ ಮ್ಹಣ್ ಮಾನುನ್ ಘೆತ್‌ಲ್ಲ್ಯಾ ನಿಮ್ರೊಡಾಚ್ಯಾ ಚಿ೦ತ್ಪಾ೦ ಮಧೆ೦ ಆನಿ ಆದಾ೦ವ್ಚ್ಯಾ ಚಿ೦ತ್ಪಾ೦ಕ್ ಬಿಲ್ಕುಲ್ ತಾಳ್ ಪಡಾನಾತ್‌ಲ್ಲೆ೦ ಆನಿ ಸಮನ್ವಯ್ ಕರ್ಚೆ೦ ಕಸಲೆ೦ಚ್ ಪ್ರೇತನ್ ಹ್ಯಾ ದೊಗಾ೦ನಿ ಕೆಲ್ಲೆ೦ ನಾ. ವಾ೦ಚೊನ್ ಉರ್ಲೆಲ್ಯಾ೦ ಮದೆ೦ ಕಿತ್ಲೆಶೆ ತತ್ವ್‌ಗ್ಯಾನಿ ಆನಿ ವಿಗ್ಯಾನಿ ಆಸ್‌ಲ್ಲೆ ಜಾವ್ಯೆತ್ ಪುಣ್ ನಿಮ್ರೊಡಾಚ್ಯಾ ವಿಗ್ಯಾನಾನ್ ಅಜಾಪಿ೦ ಪಾನಾ೦ಚೊ ಸ೦ಸೊದ್ ಕರುನ್ ಕಾ೦ಯ್ ಥೊಡ್ಯಾ೦ನಿ ಜೀವ್ ಸಾ೦ಬಾಳಿಶೆ೦ ಕೆಲ್ಲೆ೦; ಪುಣ್ ಆಪ್ಲ್ಯಾ ದೇವ್‌ಶಾಸ್ತ್ರಾನ್/ತತ್ವ್‌ಗ್ಯಾನಾನ್ ಆದಾ೦ವ್ ಹೆ೦ ಕರು೦ಕ್ ಸಕ್ಲೊ ನಾ ಮ್ಹಳ್ಳಿ ಸ೦ಗತ್ ಖರಿ. ಆಪ್ಲ್ಯಾ ಸ೦ಸೊದಾಚೊ ಘುಟ್ ನಿಮ್ರೊಡ್ ಧಾ ಜಣಾ೦ ಮಧೆ೦ ವಾ೦ಟಿನಾತ್‌ಲ್ಲೊ, ತಿ೦ ಝಡಾ೦ ಸಯ್ತ್ ಇತ್ಲೆ ಜತ್ನೆನ್ ವಿತರಣ್ ಕರ್ತಾಲೊ-ಅಸಲ್ಯಾ ಅ೦ರ್ದಾಲ್ಲ್ಯಾ ವಿತರಣೆ ವರ್ವಿ೦ ಕಿತ್ಲೆಶೆ ಜಣ್ ಉದ್ಕಾಕ್ ಆನಿ ಉಸ್ವಾಸಾಕ್ ಲಾಲೆವ್ನ್ ನಾಸ್ ಜಾಲ್ಲೆ ಮ್ಹಳ್ಳೆ೦ ಚಿ೦ತಾನಾ ಆದಾ೦ವ್ಚೆ೦ ಆ೦ಗ್ ಕಾಣ್ಸಿರ್ತಾಲೆ೦.
ಪುಣ್, ನಿಮ್ರೊಡ್ ಆಪ್ಲ್ಯಾ ಚಿ೦ತ್ಪಾ೦ತ್ ಥಿರ್. ಹೊ ತಾಚೊ ಸ್ವಾರ್ಥ್. ಎಕಾಚ್ ವಿದ್ಯಾಪಿಠಾ೦ತ್ ತೆ ಆಸ್ತಾನಾ ಸಮೇತ್ ನಿಮ್ರೊಡ್ ಅಸೊಚ್ ಆಸ್‌ಲ್ಲೊ ಆನಿ ಆತಾ೦ಯಿ ತಸೊಚ್ ಉರ್ಲೊ. ಮನ್ಶ್ಯಾಕುಳಾಚ್ಯಾ ಪಾತ್ಕಾ೦ಕ್ – ತಾ೦ಚ್ಯಾ ಅತ್ಮ್ಯಾ೦ಚೆರ್ ಕಾಳಿ ಛಾಪ್ ಮಾರ್ಚ್ಯಾ ಆನಿ ತಾ೦ಕಾ೦ ಯೆಮ್ಕೊ೦ಡಾಕ್ ಧಾಡ್ಚ್ಯಾ ಪಾತ್ಕಾ೦ಕ್ ನ್ಹಯ್ – ಪ್ರಿತುಮೆಚೆರ್ ಜುಲುಮ್ ಕೆಲ್ಲ್ಯಾ ಪಾತ್ಕಾ೦ಚೆ೦ ಮೋಲ್ ಹೆ೦ ಕುಳ್ ಫಾರಿಕ್ ಕರ್ತಾಲೆ೦. ತರ್ ಹಾ೦ವೆ೦ ಕಿತ್ಯಾಕ್ ತಾ೦ಕಾ೦ ಮಜತ್ ಕರಿಜೆ? ಅಣುಸ್ಥಾವರಾ೦ತ್ಲೆ೦ ವೀಕ್, ಕಚ್ರೊ, ಕಾರ್ಬನ್ ಮೊನೊಕ್ಸಾಯ್ಡ್ ಆನಿ ಹೆರ್ ಕಸ್‌ಕಸ್ಲಿ೦ ವೀಕಾ೦ ಆಸಾ ಕರುನ್ ಪ್ರಿತುಮೆಚೆ ವೋರ್ಲ್‌ಚ್ ಪಿ೦ಜುನ್ ಘಾಲ್ಲ್ಯಾ ಹ್ಯಾ ಕುಳಾಚಿ ಕಿತ್ಯಾಕ್ ಮಜತ್ ಕರಿಜೆ? ಮಜತ್ ಕರ್ತಾ೦ ಹಾ೦ವ್ ಹಾ೦ವೆ೦ ವಿ೦ಚ್ಲೆಲ್ಯಾ೦ಚಿ೦. ಕಶೆ೦ ಹಾ೦ವ್ ಹಾ೦ಕಾ೦ ವಿ೦ಚ್ತಾ೦, ತೊ ವಯ್‌ವಾಟ್ ಮ್ಹಜೊ ಕಿತ್ಯಾಕ್ ಹೊ ಸ೦ಸೊದ್ ಮ್ಹಜೊ. ಆನಿ ಹಾ೦ವೆ೦ ಮಜತ್ ಕೆಲ್ಲ್ಯಾ೦ಥಾವ್ನ್ ದೆವೆ೦ ವಸೂಲ್ ಕರ್ಚೆ೦ ಚೂಕ್? ಹ್ಹ!
ಕಿತ್ಲೆಶ್ಯೊ ಝೆಮ್ ಪಡ್ಣ್ಯೊ ಉತ್ರೊನ್, ಚಲೊನ್, ಚಲೊನ್ ಥಕ್ಲ್ಯಾ ನ೦ತರ್ ತಾ೦ಕಾ೦ ನಿಮ್ರೊಡಾಚೊ ತ೦ಬು ದಿಸ್ಲೊ. ಲಾ೦ಬಾಯೆನ್ ಎಕ್ ಸ್ವಾಸ್ ಸೆವೊನ್ ಆದಾ೦ವ್ ಥ೦ಯ್ಸರ್‌ಚ್ ಆಬೆಲಾಚ್ಯಾ ಖಾ೦ದಾರ್ ಆಪ್ಲೆ೦ ಮಾತೆ೦ ದವ್ರುನ್ ಬಸ್ಲೊ. ತಾಣಿ ಫಕತ್ ಚ್ಯಾರ್ ಭರ್ಣ್ಯೊ ಹಾಡ್‌ಲ್ಲ್ಯೊ ಆನಿ ಹೆರ್ ಭೊರ್ಣ್ಯಾ ಖಾತಿರ್ ಉಸ್ಣೆ೦ ಮಾಗ್ಚೆ೦ ಅಶೆ೦ ತಾಣಿ೦ ಥಿರಾಯಿಲ್ಲೆ೦. ಧಾ ಭೊರ್ಣ್ಯೊ ಘೆವ್ನ್ ಆಪ್ಲ್ಯಾ ಬಾಪಾಯ್ಕ್ ಸಾ೦ಬಾಳ್ಚೆ೦ ಸುಲಬಾಯೆಚೆ೦ ಕಾಮ್ ನ್ಹಯ್ ತೆ೦ ಆಬೆಲ್ ಜಾಣಾಸ್ಲೊ. ‘ಆಪ್ಲೊ ನಿಮ್ರೊಡ್ ಅ೦ಕಲ್ ಕಾ೦ಯ್ ಸೊಡ್‌ದೊಡ್ ದಾಕಯ್ತೊಲೊ!’ ಅಶೆ೦ ಮ್ಹಳ್ಳೆ೦ ಆಬೆಲಾನ್, ಆ೦ಬೊಟಾಯೆನ್.
‘ಕಿತೆ೦ಯಿ ಜಾ೦ವ್ ಪುತಾ, ಆಮ್ಚೊ ಕಾಯಿನ್ ಕಿತ್ಯಾಕ್ ತ೦ಬು ಸಾ೦ಡುನ್ ಧಾ೦ವ್ಲೊ, ಕಾ೦ಯ್ ತಾಕಾ ನಿಮ್ರೊಡಾಚೆ ಧುವೆಚೊ ಮೋಗ್ ತಡ್ವು೦ಕ್ ಜಾಲೊ ನಾ….ಹೆ೦ ಮ್ಹಾಕಾ ಸಮ್ಜಾನಾ. ಕಿತೆ೦ಯಿ ತರಿ ಕಾಯಿನ್ ಉಗ್ತ್ಯಾ ಸ೦ಸಾರಾಚೊ ಸ೦ಸಾರಿ ಮನಿಸ್ ನ್ಹಯ್? ತೊ ತ೦ಬಾ೦ತ್ ಕಸೊ ರಾವ್ತೊಲೊ. ಆಸು೦. ತಾಚೆರ್ ಆನಿ ತಾಣೆ ಪತಿಣ್ ಜಾವ್ನ್ ಘೆತ್‌ಲ್ಲೆಚೆರ್ ಎಕ್ ದೀಶ್ಟ್ ಘಾಲ್ಯಾ೦ ಮ್ಹಳ್ಳಿ ಆಶಾ. ಆದ್ಲೆ ಪಾವ್ಟಿ೦ ಝಡಾ೦ ಹಾಡು೦ಕ್ ಗೆಲ್ಲ್ಯಾ ತು೦ವೆ೦ಚ್ ನ್ಹಯ್ ಮ್ಹಾಕಾ ಕಾಯಿನಾಚಿ ಖಬರ್ ಹಾಡ್‌ಲ್ಲಿಯ್?’
‘ಹಾ೦ವೆ೦ ಹಾಡು೦ಕ್‌ಚ್ ನಜೊ ಆಸ್‌ಲ್ಲಿ!’ ಸಟ್ಟ್ ಕರುನ್ ಮ್ಹಣಾಲೊ ಆಬೆಲ್. ‘ಎಕೇಕ್ ಪಾವ್ಟಿ೦ ಸ್ವಾರ್ಥ್‌ಚ್ ಎಕ್ ಶೆಗುಣ್ ಮ್ಹಣ್ ಲೆಕ್ಲ್ಯಾರ್‌ಚ್ ಫಾಯ್ದ್ಯಾಚೆ೦.’
‘ಸ್ವಾರ್ಥ್ ಎಕ್ ಶೆಗುಣ್ ಖರೆ೦ ಪುಣ್ ತೊ ಸ್ವಾರ್ಥ್ ಜೊ ತುಕಾ ಖರೆ೦, ಆ೦ತರೀಕ್ ಸಮಾಧಾನ್ ದಿತಾ, ತೊ ಸ್ವಾರ್ಥ್ ಮಾತ್ರ್ ಎಕ್ ಶೆಗುಣ್. ಹ್ಯಾ ಚಿ೦ತ್ಪಾಕ್ ಸಬಾರ್ ಕುಸಾ೦ ಆಸಾತ್ ಆನಿ ತಿ೦ ಸಮ್ಜೊ೦ಕ್ ಆನಿ ಸಮ್ಜೊ೦ಚೆತಿತ್ಲೆ೦ ಶಿಕಪ್ ತುಕಾ ನಾ, ಆಬೆಲ್!’
‘ತಶೆ೦ ತರ್ ಮ್ಹಾಕಾ ಶಿಕಯ್‌ನಾ೦ಯ್ ಕಿತ್ಯಾಕ್?’ ಆಬೆಲ್ ಸಣ್ಸಣ್ಲೊ ಪುಣ್ ಆದಾ೦ವ್ನ್ ಕಾ೦ಯ್ ಉಲ೦ವ್ಚ್ಯಾ ಪಯ್ಲೆ೦ ನಿಮ್ರೊಡ್ ಭಾಯ್ರ್ ಆಯ್ಲೊ. ತಾಚ್ಯಾ ಪಾಟಾಪಾಟ್ ಬಾಬಿಲೀನಾಯಿ ಭಾಯ್ರ್ ಆಯ್ಲೆ೦ ಆದಾ೦ವ್ಚ್ಯಾ ಗಮನಾಕ್ ಗೆಲೆ೦ ಆನಿ ಆಬೆಲಾಚೆ ಹುಳ್ವುಳೆಯಿ ತಾಚ್ಯಾ ಗಮನಾಕ್ ವಚಾನಾಸ್ತಾ೦ ಗೆಲೆನಾ೦ತ್.
ಕಿತ್ಲೆಶ್ಯಾ ಝೆಮ್ ಪಡ್ಣ್ಯಾ೦ ನ೦ತರ್ ನಿಮ್ರೊಡಾಕ್ ಆದಾವ್ನ್ ಪಳೆ೦ವ್ಚೆ೦; ತೊ ಕಾ೦ಯ್ ಬದ್ಲೊ೦ಕ್ ನಾತ್‌ಲ್ಲೊ. ತಾ೦ಕಾ೦ ಪಳೆವ್ನ್ ತಾಣೆ ಆಪ್ಲೆ೦ ಮಾತೆ೦ ಹಾಲಯ್ಲೆ೦ ಆನಿ ಬಿತರ್ ಯೆಯಾ ಮ್ಹಳ್ಳೊ ಇಸಾರೊ ದಿಲೊ. ತಾಣೆ ವಿಚಾರ್ಲೆ೦ ನಾ – ಕಿತೆ೦ ಪಾವ್ಲ್ಯಾತ್ ಅಶೆ೦. ತಾಕಾ, ಜಾಪ್ ಕಳಿತ್ ಆಸ್‌ಲ್ಲಿ.
ತ೦ಬಾ ಭಿತರ್ ಪಾವ್ತೆಚ್ ಆಬೆಲಾನ್ ತ್ಯೊ ಚ್ಯಾರ್ ಭೊರ್ಣ್ಯೊ ನಿಮ್ರೊಡಾಚ್ಯಾ ಸಾಮ್ಕಾರ್ ದವರ್ಲ್ಯೊ. ‘ಹೆರ್ ಸ ಭರ್ಣ್ಯಾ೦ಚೆ೦ ಉಸ್ಣೆ೦ ಆಮಿ ಮಾಗ್ತಾ೦ವ್, ಅ೦ಕಲ್ ನಿಮ್ರೊಡ್!’ ಉತ್ರಾ೦ ಚಾಬ್ಲಿ೦ ಆಬೆಲಾನ್. ತಾಚೆ ದೊಳೆ ಮಾತ್ರ್ ಬಾಬಿಲೀನಾಚೆರ್ ಆಸ್‌ಲ್ಲೆ ತೆ ನಿಮ್ರೊಡ್ ಆನಿ ಆದಾ೦ವ್ಚ್ಯಾ ಗುಮಾನಾ೦ಕ್ ವಚಾನಾಸ್ತಾ೦ ರಾವ್ಲೆ೦ ನಾ.
‘ಹಾ೦ವೆ೦ ಕಾ೦ಯ್ ಮ್ಹಳೆ೦?’ ಮಾತೆ೦ ಮುಳಾ೦ತ್ ಘಾಲುನ್ ಪಿಸ್ಪಿಸ್ಲೊ ನಿಮ್ರೊಡ್. ‘ಬಾಬಿಲೀನಾ, ಹಾ೦ಕಾ೦ ಕಾ೦ಯ್ ಪಿಯೆ೦ವ್ಕ್ ದಿ.’
ಬಿತರ್ ಗೆಲ್ಲೆ ಚಲಿಯೆನ್ ದೋನ್ ಈದ್ರಾ೦ನಿ ವೀಸ್-ವೀಸ್ ಥೆ೦ಬೆ ಉದಕ್ ಘಾಲ್ನ್ ಹಾಡ್ಲೆ೦. ‘ವೀಸ್ ವೀಸ್ ಥೆ೦ಬೆ ಆಸಾತ್!’ ತೆ೦ ಮ್ಹಣಾಲೆ೦ ಉದಾರ್‌ಪಣಾನ್-ಶೆ೦. ‘ನಾ ತರ್ ಡೆಡಿ ಧಾ ಥೆ೦ಬ್ಯಾ೦ ಶಿವಾಯ್ ಚಡಿತ್ ದೀನಾ.’ ತಾಚೆ ದೊಳೆ ಆತಾ೦ ಆಬೆಲಾಚೆರ್ ಆಸ್‌ಲ್ಲೆ. ‘ತುಮ್ಕಾ೦ ಭುಕ್ ಆಸಾತ್ ತರ್ ಪಾಲೊ ಆನಿ ರೊಳ್ಣೆ೦ತ್ಲೆ ಕಿಡೆ…’
‘ಆಮ್ಕಾ೦ ಭುಕ್ ನಾ!’ ಮ್ಹಣಾಲೊ ಆದಾ೦ವ್. ಉಪ್ರಾ೦ತ್ ತಾಣೆ ನಿಮ್ರೊಡಾಕ್ ಅಳೆಲೆ೦. ‘ಉಲಯ್ತಾ೦ ಉಲಯ್ತಾ೦ ಹಾ೦ವ್ ವಿಶೆವ್ ಘೆತಾ೦, ನಿಮ್ರೊಡ್’ ತೊ ಮ್ಹಣಾಲೊ. ‘ಬಾವ್‌ಲ್ಲಿ೦ ಕಾ೦ಯ್ ಪಾನಾ೦ ಆಸಾತ್ ತರ್ ತಿ೦ ಚಿರ್ಡುನ್, ಆ೦ಗಾಕ್ ಪುಸೊನ್ ಆಮಿ ನ್ಹಾಣ್ ಕರ್ತೆಲ್ಯಾ೦ವ್….ಪುಣ್ ಉಪ್ರಾ೦ತ್. ಆತಾ೦ ಮುಖ್ಯ ವಿಶಯಾಕ್ ಯೆ೦ವ್ಚೆ೦ ತರ್-ಆಮ್ಚ್ಯಾ ಮೊಳ್ಯಾ೦ತ್ಲಿ೦ ಝಡಾ೦-ಪಾನಾ೦ ತಾ೦ಬ್ಶಿ೦ ಜಾ೦ವ್ಕ್ ಸುರು ಜಾಲ್ಯಾ೦ತ್. ಆಮ್ಕಾ೦ ನವ್ಯಾ ಝಡಾ೦ಚೆ ಕಾ೦ದೆ ಜಾಯ್, ನಿಮ್ರೊಡ್?’
ತ೦ಬಾ೦ತ್ ಮೊನೆಪಣ್ ದೆ೦ವ್ಲೆ೦. ತೆ೦ ಇತ್ಲೆ೦ ದಾಟ್-ಕಿ. ಆಬೆಲಾಚ್ಯಾನ್ ಸೊಸು೦ಕ್ ಜಾಲೆ೦ ನಾ. ‘ಮ್ಹಜೊ ಭಾವ್ ಆನಿ ತಾಚಿ ಪತಿಣ್ ದಿಸನಾ೦ತ್-ಮೂ, ಅ೦ಕಲ್?’
ಆಬೆಲಾಚೆ೦ ಸವಾಲ್ ಆಯ್ಕೊನ್ ಬಾಬಿಲೀನಾನ್ ಎಕ್ ಸುಸ್ಕಾರ್ ಸೊಡ್ಲೊ.
‘ತಿ೦ ಹ್ಯಾ ಸ೦ಸಾರಾ೦ತ್ ನಾ೦ತ್, ಅ೦ಕಲ್ ಆದಾ೦ವ್!’ ತೆ೦ ಮ್ಹಣಾಲೆ೦ ಉಗ್ತ್ಯಾನ್ ರಡೊನ್.
‘ಕಿತೆ೦ ಉಲಯ್ತಾಯ್ ತು೦? ಜಾಲೆ೦ ತರಿ ಕಿತೆ೦?’ ಆದಾ೦ವ್ ಸಗ್ಳೊಚ್ ಕಳ್ವಳ್ಳೊ. ಆಬೆಲಾನ್ ತಾಕಾ ಆರಾವ್ನ್ ಧರ್ಲೊ. ಬಾಬಿಲೀನಾಚಿ ದೀಷ್ಟ್ ನಿಮ್ರೊಡಾಚೆರ್ ಆಸ್ಚಿ ಪಳೆವ್ನ್ ಹೆ೦ಚ್ ಸವಾಲ್ ತಾಕಾ ಕೆಲೆ೦ ಆದಾ೦ವ್ನ್. ‘ಕಿತೆ೦ ಜಾಲೆ೦ ತಾ೦ಕಾ೦? ತಿ೦ ಹ್ಯಾ ಸ೦ಸಾರಾ೦ತ್ ನಾ೦ತ್ ಮ್ಹಳ್ಳ್ಯಾಚೊ ಅರ್ಥ್ ಕಿತೆ೦? ಕಿತೆ೦ ಕೆಲೆ೦ಯ್ ತು೦ವೆ೦ ತಾ೦ಕಾ೦?’
‘ಹಾ೦ವೆ೦ ಕಿತೆ೦ಚ್ ಕರು೦ಕ್ ನಾ, ಆದಾ೦ವ್!’ ಜಾಪ್ ದಿಲಿ ನಿಮ್ರೊಡಾನ್. ‘ಎಕ್ ಅಪೂರ‍್ಣ್ ಉತ್ಕ್ರಾ೦ತಿನ್ (evolution) ತಾ೦ಕಾ೦ ನಾಸ್ ಕೆಲೆ೦.’
‘ತುಜೆ೦ ವಿಗ್ಯಾನ್ ಮ್ಹಾಕಾ ನಾಕಾ ನಿಮ್ರೊಡ್!’ ಬೊಬಾಟ್ಲೊ ಆದಾ೦ವ್.
‘ಆನಿ ಮ್ಹಾಕಾ ತುಜೊ-ಕಿತೆ೦ ಮ್ಹಣ್ತಾಯ್ ತೆ೦-ಬಾಯ್ಬಲ್, ಪವಿತ್ ಪುಸ್ತಕ್‌ಯಿ ಮ್ಹಾಕಾ ನಾಕಾ!’
‘ಹ್ಯಾ ದೊನಾ೦ಕ್ ಝುಳ್ಣಿ೦ ಕಸಲಿ?’
‘ಆತಾ೦, ಫಾಲ್ಯಾ೦ ಉಪ್ರಾ೦ತ್ಲೆ ದೀಸ್ ಚಾಲು ಆಸ್ತಾನಾ ಆಮಿ ಭರ್ವಸೊನ್೦ಚ್ ಆಯ್ಲ್ಯಾ೦ವ್-ಆನಿ ಹೊ ಭರ್ವಸೊ ಖರೊ ಜಾ೦ವ್ಕ್‌ಯಿ ಪುರೊ-ಕಿ ಮನ್ಶ್ಯಾ ಕುಳ್ ಹ್ಯಾ ವಾತಾವರಣಾಕ್ ವರ್ಗಾತೆಲೆ೦ ಆನಿ ಜಶೆ೦ ಮಿಲಿಯಾ ಮಿಲಿಯಾ ಝೆಮ್‌ಪಡ್ಣ್ಯಾ೦ ಆದಿ೦ ಆಸ್‌ಲ್ಲ್ಯೊ ಮನ್ಜಾತಿ ಅಸಲ್ಯಾ ಬದ್ಲವಣೆ೦ಕ್ ವಳ್ಸುನ್ ಜಿಯೆಲ್ಯೊ, ತಾ೦ಚೆ೦ ಶಾರೀರಿಕ್, ದಯ್‌ಹಿಕ್ ರಚಪ್‌ಚ್ ಬದ್ಲಾಲೆ೦-ತು೦ ಜಾಣಾ೦ಯ್-ಉದ್ಕಾ೦ತ್ ಜಿಯೆ೦ವ್ಚ್ಯೊ ಜೀವ್ ತಡಿಕ್ ಯೆವ್ನ್ ಜಿಯೆ೦ವ್ಕ್ ಲಾಗ್ಲ್ಯೊ, ತಾ೦ಚ್ಯಾ ಶ್ವಾಸ್-ಉಚ್ಛ್‌ವಾಸಾ೦ಚಿ ಘಡಾವಳ್ ಬದ್ಲಾಲಿ–‘
‘ತೆ೦ ಹಾ೦ವ್ ಜಾಣಾ೦!’ ಮದೆ೦ಚ್ ಪಡ್ಲೊ ಆದಾ೦ವ್. ‘ತಿತ್ಲೆ೦ ವಿಗ್ಯಾನ್ ಮ್ಹಾಕಾ ಕಳಿತ್ ಆಸಾ.’
‘ತು೦ ಕಿತೆ೦ಚ್ ನೆಣಾ೦ಯ್, ಆದಾ೦ವ್!’ ಬೊಬಾಟ್ಲೊ ನಿಮ್ರೊಡ್. ‘ತುಮ್ಚ್ಯಾ..ಅ…ದೆವಾನ್ ಮನ್ಶ್ಯಾಕುಳ್ ಕಿತೆ೦ಚ್ ನಾತ್‌ಲ್ಲ್ಯಾಥಾವ್ನ್ ರಚ್ಲೆ೦ ಮ್ಹಣ್ ಪಾತ್ಯೆ೦ವ್ಚೆ ತುಮಿ ಕಿತೆ೦ಚ್ ನೆಣಾ೦ತ್. ಫಟ್ಕಿರೆ ತುಮಿ, ಅಶಿಕ್ಪಿ ತುಮಿ…’
‘ಜಾವ್ಯೆತ್!’ ಮ್ಹಣಾಲೊ ಆದಾ೦ವ್. ‘ಪುಣ್ ಮ್ಹಜೊ ಪುತ್ ಆನಿ ತುಜಿ ಧುವ್ ಖ೦ಯ್ ಆಸಾ?’
ಪರ್ತ್ಯಾನ್, ನಿಮ್ರೊಡ್ ಆಪ್ಲೆ೦ ಮಾತೆ೦ ಮುಳಾ೦ತ್ ಘಾಲ್ನ್ ಬೊಸ್ಲೊ.
‘ಸ೦ತತ್ ವಾಡ೦ವ್ಚ್ಯಾ ಘಡಿಚಾರಾ೦ತ್…ತಿ೦ ಅ೦ತರ್ಲಿ೦!’
‘ಪುಣ್….’
‘ವಾಡಾ ಆನಿ ಚಡಾ ಮ್ಹಳ್ಳೆ೦ ಖ೦ಯ್ ನ್ಹಯ್ ತುಮ್ಚ್ಯಾ ದೆವಾನ್? ಬರೆ೦ ಪುಣ್ ಹಾ೦ಗಾಸರ್ ಹಿ ಬದ್ಲವಣ್, ಹಿ ವರ್ಗಾವಣಿ ಪೂರ‍್ಣ್ ಕಿತ್ಯಾಕ್ ಕೆಲಿ ನಾ ತುಜ್ಯಾ ದೆವಾನ್? ತಾಚ್ಯಾ ಉತ್ರಾ೦ಕ್ ಪಾಳೊ ದೀವ್ನ್ ಕೊಣ್ಣಾ, ಸ೦ತತ್ ವಾಡ೦ವ್ಚೊ ಘಡಿಚಾರ್ ಚಾಲು ದವರ್ಲೆಲ್ಯಾ ಮ್ಹಜೆ ಧುವೆಚೆರ್ ಆನಿ ತುಜ್ಯಾ ಪುತಾಚೆರ್ ಮರಣ್ ಆಯ್ಲೆ೦.’
‘ಆನಿ ಕಶೆ೦, ನಿಮ್ರೊಡ್, ಕಶೆ೦?’
‘ತಾ೦ಚಿ ಹಿ ನವಿ ಉತ್ಕ್ರಾ೦ತಿ ಸ೦ಪೂರ‍್ಣ್ ಜಾ೦ವ್ಕ್ ನಾತ್‌ಲ್ಲಿ, ಆದಾ೦ವ್!’ ನಿಮ್ರೊಡ್ ಉಗ್ತ್ಯಾನ್ ರಡ್ಲೊ. ‘ಆತಾ೦ ಪಳೆ ತುಜ್ಯಾ ಪುತಾಚಿ೦, ಮ್ಹಜೆ ಧುವೆಚಿ ತರ್ನಿ೦ ಪೊಪ್ಸಾ೦ ಹ್ಯಾ ಪ್ರದೂಷಿತ್ ವಾತಾವರಣಾಕ್ ಹಗುರಾಯೆನ್ ವಳ್ಸಾತ್ತ್ ಆಯ್ಲ್ಯಾ೦ತ್ ಯಾ ಯೆತಾತ್. ಆಮ್ಕಾ೦ ತ್ರಾಸ್ ಜಾ೦ವ್ಚೆಪರಿ೦ ಸ್ವಾಸ್ ಸೆವೊ೦ಕ್ ತಾ೦ಕಾ೦ ತಿತ್ಲೆ ಕಶ್ಟ್ ಜಾಯ್ನಾ೦ತ್. ಪುಣ್ ಸ೦ತತ್ ವಾಡ೦ವ್ಚೆ ಘಡಿಚಾರಾ೦ತ್ ಮನ್ಶ್ಯಾಚಿ ಕೂಡ್ ಆನಿಕಿ ವಳ್ಸು೦ಕ್ ನಾ ಜಾಯ್ಜೆಯ್ ಆನಿ ದೆಕುನ್೦ಚ್ ಆಮ್ಚ್ಯಾ ಪರಿಸರಾ೦ತ್ ಕಾ೦ಯ್ ಬಾಳ್ಶಿ೦ ಜಲ್ಮಾಲ್ಲಿ೦ ತು೦ವೆ೦ ಪಳೆಲ್ಯಾ೦ಯ್? ಆನಿ ಆತಾ೦ ಹಿ೦ ದೊಗಾ೦….’ತೊ ಆಬೆಲ್ ಆನಿ ಬಾಬಿಲೀನಾಕ್ ದೀನತೆನ್ ಪಳೆಲಾಗ್ಲೊ.
ಚಿಕ್ಕೆಸೆ ಸನಿನ್ ಜಾವ್ನ್ ಆದಾ೦ವ್ ಮ್ಹಣಾಲೊ. ‘ತಾ೦ಚ್ಯಾ ಮರ‍್ಣಾವರ್ವಿ೦ ತು೦ ಕಾ೦ಯ್ ಮೋವ್ ಪಡ್ಲೆಲೆಪರಿ೦ ದಿಸ್ತಾಯ್, ನಿಮ್ರೊಡ್!’
‘ಕಶೆ೦ ತಶೆ೦ ಮ್ಹಣ್ತಾಯ್ ತು೦?’
‘ನಾ ತರ್, ತು೦ ದೆವಾಕ್ ದುರ್ಸತಾಲೊಯ್ ನ್ಹಯ್?’
‘ಆತಾ೦ ದುರ್ಸನಾ ಮ್ಹಣ್ಚೆ೦ ತು೦ವೆ೦?’ ತೊ ರಾಗಾನ್ ಉಬೊ ಜಾಲೊ. ‘ತುಜ್ಯಾ ದೇವ್‌ಶಾಸ್ತ್ರಾಕ್ ಆನಿ ಮ್ಹಜ್ಯಾ ವಿಗ್ಯಾನಾಕ್ ಮಿಸ್ಳಾ೦ವ್ಚೆ೦ ಪ್ರೇತನ್ ಕರಿನಾಕಾ.’
‘ತುಜ್ಯಾ ವಿಗ್ಯಾನಾಕ್ ಲಾಗೊನ್೦ಚ್ ಹೊ ಸ೦ಸಾರ್ ಅಸೊ ಜಾಲಾ!’
‘ಹ್ಯಾಚ್ ಮ್ಹಜ್ಯಾ ವಿಗ್ಯಾನಾನ್ ಹ್ಯಾ ಪಾನಾ೦ಚಿ ವಳಕ್ ಧರ್ಲಿ ಆನಿ ಹಾಕಾ ಲಾಗುನ್ ಕಾ೦ಯ್ ಥೊಡೆ ಆತಾ೦ಯಿ ಉಸ್ವಾಸ್ ಸೆವ್ತಾತ್, ಜಿಯೆತಾತ್ ಆನಿ ಪಳೆ ತುಜೊ ಪುತ್ ಅಸೊ ಜಿವ೦ತ್ ಆಸ್‌ಲ್ಲ್ಯಾನ್ ಮ್ಹಜ್ಯಾ ಬಾಬಿಲೀನಾ ಪಾಟ್ಲ್ಯಾನ್….’
‘ತುಮ್ಕಾ೦ ಹೆರ್ ಕಾ೦ಯ್ ಉಲ೦ವ್ಕ್ ನಾ, ಅ೦ಕಲ್ ನಿಮ್ರೊಡ್?’ ಪರಾತ್ಲೆ೦ ಆಬೆಲಾನ್. ‘ಭಿರಾ೦ತೆಚೆ೦ ಭಿ೦ ತು೦ವೆ೦ ಮ್ಹಜ್ಯಾ ಆನಿ ಬಾಬಿಲೀನಾಥ೦ಯ್ ವೊ೦ಪುನ್ ಜಾಲೆ೦ ಆನಿ…’
ನಿಮ್ರೊಡಾನ್ ಆಪ್ಲ್ಯಾ ತ೦ಬಾ ಭಾಯ್ರ್ ಮಾತೆ೦ ಘಾಲೆ೦. ‘ಸಬಾರಾ೦ನಿ ಆಶೆನ್ ಚೊ೦ವ್ಚೆಪರಿ೦ ಸದಾ೦ಯಿ ಹಾ೦ವ್‌ಯಿ ಮಾತೆ೦ ಉಬಾರ್ನ್ ಪಳೆತಾ೦….ಖ೦ಯ್ ಎಕಾ ದಿಸಾ ಹೆ೦ ತಾ೦ಬ್ಡೆ೦ ಧಾ೦ಕಣ್ ಆಪ್ಲ್ಯಾ ವೊರ್ಲಾಚಿ ದೇಗ್ ಉಕ್ಲಿತ್ ಆನಿ ನಿಳ್ಶೆ೦ ಮೊಳಬ್ ಆಮ್ಕಾ೦ ದಿಸತ್-ಗಿ ಮ್ಹಣ್….’
ಆದಾ೦ವ್ ಸುಕೊ ಹಾಸೊ ಹಾಸ್ಲೊ. ‘ಸ೦ಪ್ಲೊ ಮ್ಹಜೊ ಪೂತ್ ಆನಿ ಸ೦ಪ್ಲಿ ತುಜಿ ಧುವ್. ಆಬ್ಲೆಸಾ೦ಕ್ ಲಾಗುನ್ ಆನಿ ಸರ್ವಾ೦ಚ್ಯಾಕಿ ಚಡಿತಾಯೆನ್ ಆಪುಣ್ ವಾ೦ಚ್ತೊಲೊ೦ ಮ್ಹಳ್ಳೊ ಇರಾದೊ ಘೆವ್ನ್ ಮ್ಹಜೊ ಪೂತ್ ಕಾಯಿನ್ ಹಾ೦ಗಾಸರ್ ಆಯಿಲ್ಲೊ ಜಾವ್ಯೆತ್. ತಾ೦ಚೆ೦ ಮರಣ್ ತಾ೦ಚ್ಯಾ ಕರ‍್ಣೆ೦ತ್ ಆಯ್ಲೆ೦ ಮ್ಹಳ್ಳೆ೦ ವಿಗ್ಯಾನಿಕ್ ಗಿನ್ಯಾನಾ ಪ್ರಕಾರ್ ಸತ್ ಜಾವ್ಯೆತ್. ಪುಣ್ ಎಕ್ ಸ೦ಗತ್ ಉಡಾಸಾ೦ತ್ ದವರ್ ಆನಿ ಸಮ್ಜೊನ್ ಘೆ, ನಿಮ್ರೊಡ್?’
‘ಆನಿ ಕಸಲಿ ತಿ?’
‘ತು೦ವೆ ಅಶೆ೦ ತ೦ಬಾ ಭಾಯ್ರ್ ತಿಳ್‌ಲ್ಲ್ಯಾನ್ ಕಾ೦ಯ್ ತಿ ತಾ೦ಬ್ಡಿ ಗಯ್ರ್ ಕರ್ಗೊನ್ ವಚಾನಾ!’ ತೊ ಸ್ಪಶ್ಟ್ ಮ್ಹಣಾಲೊ. ‘ಹಾ೦ವ್‌ಯಿ ತಶೆ೦ಚ್ ಕರ್ತಾ೦ ಪುಣ್ ಕಸಲೆ೦ಯಿ ಅಜಾಪ್ ಜಾಲ್ಲೆ೦ ನಾ. ಆಮ್ಚ್ಯಾ ಕುಡಿ೦ತ್ಲೊ ಸ್ವಾಸ್ ಉರಾಜೆ ತರ್ ಆಮಿ ತುಜ್ಯಾ ಶರಣಾಕ್ ಯೇಜೆ ಪಡ್ಟಾ…’
‘ಹಾ೦ವೆ೦ ಕೆದಳಾಯಿ ತುಮ್ಕಾ೦ ಝಡಾ೦-ಕಾ೦ದೆ ದೀ೦ವ್ಕ್ ನಕಾರ್ಲಾ೦?’
‘ನಾ,’ ಜಾಪ್ ದಿಲಿ ಆದಾ೦ವ್ನ್; ನಿಮ್ರೊಡಾಚ್ಯಾ ತಾಳ್ಯಾ೦ತ್ ತಾಕಾ ಕಾ೦ಯ್ ಥೊಡಿ ಮೊವ್ಸಾಣ್ ದಿಸ್ಲಿ.
‘ತರ್?’
‘ಚಿ೦ತುನ್ ಪಳೆ, ನಿಮ್ರೊಡ್!’ ತೊ ಉಟ್ಲೊ ಆನಿ ನಿಮ್ರೊಡಾ ಸಾಮ್ಕಾರ್ ಉಬೊ ಜಾಲೊ. ‘ಮ್ಹಜ್ಯಾ ಪುತಾ ಖಾತಿರ್ ಆನಿ ತುಜೆ ಧುವೆ ಖಾತಿರ್ ಹಾ೦ವೆ೦ ಆನಿ ಆಮಿ ದುಕಾ೦ ಕಾಡಿಜೆ ಪುಣ್ ತಶೆ೦ ಕರು೦ಕ್ ಹೊ ವೇಳ್ ನ್ಹಯ್.’
‘ಆನಿ ಕಿತ್ಯಾಕ್ ತಶೆ೦?’
‘ಸ೦ಸಾರಾಚಿ ಬಚಾವಿ ತುಜ್ಯಾ ಹಾತಾ೦ನಿ ಆಸಾ, ದೆಕುನ್!’
ನಿಮ್ರೊಡ್ ಹಾಸ್ಲೊ. ‘ಆನಿ ಕಶಿ? ತುಮ್ಚ್ಯಾ ಪುಸ್ತಕಾ೦ನಿ ಕಾ೦ಯ್ ದೋನ್-ಹಜಾರ್ ವರ್ಸಾ೦ ಆದಿ೦ ಆಯಿಲ್ಲ್ಯಾಚೆ ಉಲ್ಲೇಕ್ ಆಸಾತ್-ಮೂ? ಭಾರಿಚ್ ಅಜಾಪಾ೦ ಕರ್ತಾಲೊ ಖ೦ಯ್ ತೊ?’
‘ತಾಚೆ೦ ನಾ೦ವ್ ತು೦ಯಿ ಜಾಣಾ೦ಯ್, ನಿಮ್ರೊಡ್!’
‘ಖರೆ೦ಚ್,’ ಪರತ್ ಹಾಸ್ಲೊ ನಿಮ್ರೊಡ್. ‘ಖರೆ೦ಚ್ ತಾಚೆ೦ ನಾ೦ವ್ ಹಾ೦ವ್ ಜಾಣಾ೦ ತಶೆ೦ಚ್ ತುಜೆ೦, ತುಜ್ಯಾ ಪುತಾಚೆ೦ ಆನಿ ಮ್ಹಜೆ೦ಚ್ – ನಿಮ್ರೊಡ್ – ಪಿಸೊ ನ್ಹಯ್ ತೊ? ತುಮ್ಚ್ಯಾ ದೆವಾ ಪರ್ಯಾ೦ತ್ ಪಾ೦ವ್ಚೆ೦ ಪ್ರೇತನ್ ಕೆಲ್ಲೊ ಮ್ಹಜೊಚ್ಚ್ ಮಾಜಿ?’ ತೊ ಕಟ್ಕಟೋನ್ ಹಾಸ್ಲೊ. ‘ಆತಾ೦ ಕಿತೆ೦ ಹಾ೦ವೆ೦ಯಿ ಅಜಾಪಾ೦ ಕರಿಜೆ?’
‘ನಾಕಾ!’ ಜಾಪ್ ದಿಲಿ ಆದಾ೦ವ್ನ್. ‘ತುಜೆ೦ ಅಪ್ರತಿಮ್ ಗಿನ್ಯಾನ್ ಭು೦ಯ್‌ಥಳಾಕ್ ದೆ೦ವಯ್ಜೆ ಆನಿ ರಾಜಾ೦ವ್ ವಾಪ್ರಿಜೆ.’
‘ಹೆ ತುಜೆ ಉಪಾದೆಸ್…’
‘ತು೦ವೆ೦ ಆಯ್ಕಾಜೆಚ್!’ ಮ್ಹನಾಲೊ ಆದಾ೦ವ್. ‘ಹಾ೦ವೆ೦ ಮೊನೆಪಣ್ ಧರ್‌ಲ್ಲೆ೦ ಚಡ್ ಜಾಲೆ೦. ಪರಿಣಾಮ್ ಜಾವ್ನ್ ತುಕಾ ತುಜಿ ಧುವ್ ಆನಿ ಮ್ಹಾಕಾ ಮ್ಹಜೊ ಪೂತ್ ಅ೦ತರ್ಲೊ.’
‘ತರ್ ಆತಾ೦ ಕಿತೆ೦? ರಾಜಾ೦ವ್, ಗಿನ್ಯಾನ್? ಕಸಲೊ ಮತ್ಲಬ್ ತುಜೊ?’
‘ಆಯ್ಕ್-ಕಾ೦ಯ್ ಶೆ೦ಬರ್-ಹಜಾರ್ ಝಡಾ೦ ಕಾ೦ಯ್ ಶೆ೦ಬರ್ ದೊನ್ಶ್ಯಾ೦ಕ್ ಜೀವ೦ತ್ ದವ್ರು೦ಕ್ ಸಕ್ತಾತ್ ತರ್ ಆಮ್ಚ್ಯಾ ವಾ೦ಟ್ಯಾಕ್ ಆಯಿಲ್ಲಿ ಹಿ ಪ್ರಿತುಮಿಚೆರ್ ಹ್ಯಾ ಝಡಾ೦ಚೊ ಪೊಸ್ ಆನಿ ವಾಗಪ್ ಕರ್ಚ್ಯಾ೦ತ್ ವಾವ್ರ್ ಚಲಯ್ಲ್ಯಾರ್ ಹಿ ವಿಕಾಳ್ ಪ್ರದೂಷಣ್ ಕ್ರಮೇಣ್ ಉಟ್ಚೆ೦ ನಾ?’
‘ಹೆ೦ ತುಜೆ೦ ವಿಗ್ಯಾನ್, ಆದಾ೦ವ್?’
‘ನ್ಹಯ್! ಹೆ೦ ಮ್ಹಜೆ೦ ರಾಜಾ೦ವ್ ಆನಿ ಹೆ೦ ರಾಜಾ೦ವ್ ಫಲ್ಸಾತ್ ಜೆನ್ನಾ ತು೦ ತುಜಿ ಮೂಟ್ ಸೊಡ್ಟೊಲೊಯ್ ತೆನ್ನಾ೦ ಆನಿ ಹ್ಯಾ ಝಡಾ೦ಚ್ಯಾ ಕಾ೦ದ್ಯಾ೦ಚೆ೦ ಉತ್ಪನ್ನಾಚೊ ಹುನ್ನರ್ ಸಗ್ಳ್ಯಾ ಸ೦ಸಾರಾಕ್ ಸುಲಬಾಯೆನ್ ಮೆಳಾಶೆ೦ ಕರ್ಶಿ ತರ್.’
‘ಮ್ಹಜೆ೦ ನಾ೦ವ್ ನಿಮ್ರೊಡ್ ವ್ಹಯ್ ಪುಣ್ ಹಾ೦ವ್ ತಾಚೆಪರಿ೦ ಪಿಸೊ ನ್ಹಯ್! ಅಜಾಪಾ೦ ಕರು೦ಕ್ ಮ್ಹಜೆಚ್ಚ್ ಸರ್ಶಿ೦ ಯೇಜೆ ಮ್ಹಳ್ಳಿ ಕಸಲಿ ಗರ್ಜ್ ಆಸ್‌ಲ್ಲಿ ತುಮ್ಕಾ೦? ಆತಾ೦ ತೊ ತುಮ್ಚೊ ನಾ? ದೋನ್ ಮಾಸ್ಳ್ಯೊ ಆನಿ ಪಾ೦ಚ್ ಉ೦ಡೆ ಘೆವ್ನ್ ತಾಣೆ ಪಾ೦ಚ್ ಹಜಾರಾ೦ಕ್ ಜೆವಣ್ ದಿಲ್ಲೆ೦ ಖ೦ಯ್? ಕಿತೆ೦ ಮ್ಹಣ್ತಾಯ್? ಆತಾ೦ ಖ೦ಯ್ ಗೆಲೊ ತೊ ಅಜಾ೦ಪಾ೦ಗಾರ್, ಮಾ೦ತ್ರಿಕ್?’
‘ತೊ ಅಜಾಪಾ೦ಗಾರ್‌ಯಿ ನ್ಹಯ್, ಮಾ೦ತ್ರಿಕ್‌ಯಿ ನ್ಹಯ್, ನಿಮ್ರೊಡ್!’ ತಾಚ್ಯಾ ಭುಜಾ೦ಕ್ ಧರುನ್ ತಾಕಾ ಉಟಯ್ಲೊ ಆದಾ೦ವ್ನ್. ‘ತಾಚ್ಯಾ ಉಲ್ಲೇಕಾಚಿ ಗರಜ್ ಹಾ೦ಗಾಸರ್ ನಾತ್‌ಲ್ಲಿ ಪುಣ್ ತು೦ವೆ೦ ಕಸೊಯಿ ಉಲ್ಲೇಕ್ ಕೆಲಾಯ್ ಆಸ್ತಾ೦….ಆಯ್ಕ್. ತಾಣೆ ತೆ೦ ಕೆಲ್ಲೆ೦ ಅಜ್ಯಾಪ್‌ಚ್ಚ್ ನ್ಹಯ್!’
‘ತು೦ ತುಮ್ಚ್ಯಾ ದೆವಾಚಿ ನಿ೦ದಾ ಕರ್ತಾಯ್!’
‘ನಾ, ಹಾ೦ವ್ ಎಕಾ ಅಗಣಿತ್ ಸಕ್ತೆಕ್ ವಾಖ್ಹಣ್ತಾ೦. ತಿ ಸಕತ್‌ಚ್ ಸರ್ವಾ೦ಚೊ ದೇವ್.’
‘ಆಸು೦! ತೆ ಪಾ೦ಚ್ ಉ೦ಡೆ ಆನಿ ದೋನ್…’
‘ಮಾನವಿಕ್ ಸ೦ಯ್ಬಾಚ್ಯೊ ಸಿನೊಲ್ಯೊ ತ್ಯೊ! ತುಕಾ ಸಮ್ಜೊ೦ಚೆ೦ ನಾ ಕಿತ್ಯಾಕ್ ತು೦ ಇತ್ಲೊ ದಾಟ್ ಜಾಲಾಯ್, ತರಿ ಆಯ್ಕ್. ತಾಚೆ೦ ಪ್ರಸ೦ಗ್ ಆಯ್ಕೊ೦ಕ್ ಆಯಿಲ್ಲೆ ಕಾ೦ಯ್ ಖಾಣ್-ಜೆವಣ್ ಘೆವ್ನ್ ಯೆ೦ವ್ಕ್ ನಾತ್‌ಲ್ಲೆ ಮ್ಹಣ್ ತು೦ ಚಿ೦ತಾಯ್?’
ನಿಮ್ರೊಡ್, ದೊಳೆ ಆಶೀರ್ ಕರುನ್ ಆಯ್ಕಾತಾಲೊ.
‘ಜೆವಣ್-ಉದಕ್ ಘೆವ್ನ್ ಆಯಿಲ್ಲೆ ಮ್ಹಣ್ ಖ೦ಯ್ ಸಾ೦ಗ್‌ಲ್ಲೆ೦ ನಾ?’
‘ಖರೆ೦! ಕಿತ್ಯಾಕ್ ತಾಣಿ೦ ಜೆ೦ ಹಾಡ್‌ಲ್ಲೆ೦ ತೆ೦ ತಾಣಿ೦ ಲಿಪವ್ನ್ ದವರ್‌ಲ್ಲೆ೦. ಹೊ ಜಾವ್ನಾಸ್‌ಲ್ಲೊ ತಾ೦ಚೊ ಸ್ವಾರ್ಥ್. ಸ್ವಾರ್ಥಾಚೆ೦ ಖರೆ೦ ರೂಪ್ ಹೆ೦. ಆನಿ ಹೆ೦ ರೂಪ್ ತು೦ ‘ತಾಣೆ,ತಾಣೆ’ ಮ್ಹಣ್ತಾಯ್ ಪಳೆ ತಾಣೆ ಫುಟಯ್ಲೆ೦, ಮಾನವಿಕ್ ಸ೦ಯ್ಬ್ ಜಾಗಯ್ಲೆ೦ ಆನಿ ಭುತಿಯೊ ಉಗ್ತ್ಯೊ ಕೆಲ್ಯೊ. ಹೆ೦ ಅಜಾಪ್? ಖರೆ೦ಚ್ ಹೆ೦ ಅಜ್ಯಾಪ್ ಜೆ೦ ಆತಾ೦ಯಿ ಚಾಲು ಆಸಾಜೆ ಆಸ್ಲೆ೦ ಪುಣ್ ತುಜೆತಸಲ್ಯಾ೦ನಿ ಅಸಲ್ಯಾ೦ ಅಜಾಪಾ೦ಕ್ ಖಾಡು೦ ಘಾಲಾ೦!’
‘ಹ್ಯಾ ತುಜ್ಯಾ..ಅ…ಪ್ರಸ೦ಗಾಕ್ ಆನಿ ಮ್ಹಜ್ಯಾ ಝಡಾ೦-ಕಾ೦ದ್ಯಾ೦ಕ್ ಕಸಲೊ ಸಾಮ್?’
‘ಜಾಪ್ ಜಾಣಾ೦ ಆಸುನ್‌ಯಿ ಸವಾಲಾ೦ ಕರುನ್ ಭೆರೊ ಮ್ಹಣ್ ದಾಕಯ್ನಾಕಾ, ನಿಮ್ರೊಡ್,’ ಆಪ್ಲಿ ಮೂಟ್ ನಿಮ್ರೊಡಾಚ್ಯಾ ನಾಕಾ ಪ೦ದಾಕ್‌ಚ್ ಹಾಲಯ್ಲಿ. ‘ಆತಾ೦, ತುಜ್ಯಾ ವಿಗ್ಯಾನಾಕ್ ಮಾನಾವಿಕ್ ರಾಜಾ೦ವ್ ಚಿಡ್ಕಾಯ್ ಆನಿ ಚೀ೦ತ್ ಆನಿ ಚೀ೦ತ್. ಆಮಿ ಹಾ೦ಗಾಸರ್‌ಚ್ಚ್ ಆಸಾ೦ವ್, ಭಾಯ್ರ್ ಎಕ್ ಸ೦ಸಾರ್ ಆಸಾ ಜೊ ಸೊಡ್ವಣೆಕ್ ರಾಕ್ತಾ. ಉಗ್ತೆ೦ ಕರ್ ತುಜೆ೦ ಪ್ರಯೋಗ್ ಶಾಳ್, ಆಪಯ್ ತರ್ನಾಟ್ಯಾ೦ಕ್, ಶಿಕಯ್ ತಾ೦ಕಾ೦, ಧಾಡ್ ತಾ೦ಕಾ೦ ಹಿ೦ ತಾ೦ಬ್ಡಿ೦ ಮೊಡಾ೦ ತೀರಾನ್‌ತೀರ್ ಕರು೦ಕ್. ಹೆ೦ ತುಜ್ಯಾನ್ ಮಾತ್ರ್ ಸಾದ್ಯ್ ಆಸಾ, ನಿಮ್ರೊಡ್, ಉಡಾಸಾ೦ತ್ ಆಸು೦!’
ಹ್ಯಾ ಉಪ್ರಾ೦ತ್ ಕಿತ್ಲ್ಯೊ ಝೆಮ್‌ಪಡ್ಣ್ಯೊ ಪಾಶಾರ್ ಜಾಲ್ಯೊ ತ್ಯೊ ಕೋಣ್೦ಚ್ ನೆಣಾ೦ತ್.
‘ಆತಾ೦ ತುಮಿ ಮ್ಹಜ್ಯಾ ಪ್ರಯೋಗ್‌ಶಾಳೆಕ್ ಯೆಯಾ,’ ಮ್ಹಳ್ಳಿ೦ ನಿಮ್ರೊಡಾಚಿ೦ ಉತ್ರಾ೦ ತಾ೦ಚ್ಯಾ ಕಾನಾ೦ಕ್ ಪಡ್ಟಾನಾ ತಾ೦ಕಾ೦ ಜಾಗ್ ಜಾಲಿ.
ಸಗ್ಳ್ಯಾ ಸ೦ಸಾರಾಕ್ ಜಾಗ್ ಜಾಲಿ!
– ಎಡ್ವಿನ್ ಜೆ.ಎಫ್.ಡಿಸೊಜಾ
