ಹಾ೦ತುಳ್ಣಾರ್ ಪಡ್‌ಲ್ಲೆ ಆಪ್ಲೆ ಆವಯ್ಕ್ ಪವಿತ್ ಕುಮ್ಗಾರ್ ಹಾಡುನ್ ಆಯಿಲ್ಲೊ ವಿಗಾರ್ ಫಾದರ್ ಪ್ಯಾಟ್ರಿಕ್ ಸೊಜ್ ಗೇಟಿಲಾಗಿ೦ ದಿಷ್ಟಿಕ್ ಪಡ್‌ಲ್ಲೊಚ್ ಮಾನೆಸ್ತಿಣ್ ಮಾರ‍್ಗರಿತಾ ಮೆ೦ದೊಸ್ ಆಪ್ಲೆ ಭ್ರಮಿದೆ೦ತ್ಲಿ ಭಾಯ್ರ್ ಆಯ್ಲಿ ಆನಿ ಗೇಟ್ ಉಗ್ತಿ ಕರು೦ಕ್ ಧಾ೦ವ್ಲಿ. ಘರ‍್ಚ್ಯಾ ಜರ‍್ಮನ್ ಶೆಪರ‍್ಡ್ ಪೆಟ್ಯಾಕ್ ತಿಣೆ ಯೆದೊಳ್‌ಚ್ ಬಾ೦ದುನ್ ಘಾಲ್ಲೊ ಆನಿ ಆವಯ್ಚಿ ಚಾಕ್ರಿ ಕರು೦ಕ್ ನಮಿಯಾರ್‌ಲ್ಲ್ಯಾ ತೆರೆಜಾಕ್ ಹುನೊನಿ ಕೊಫಿ ಕರುನ್ ಫ್ಲಾಸ್ಕಾ೦ತ್ ಘಾಲ್ನ್ ದವರ್ ಮ್ಹಣ್ ಸುಚನ್ ದಿಲ್ಲೆ೦. ವಿಗಾರ್ ಪ್ಯಾಟ್ರಿಕ್ ಸೊಜ್ ಆಸೊ ಕುಂಮ್ಗಾರ್ ವ್ಹರುನ್ ವೆತಾನಾ ತ್ಯಾ ತ್ಯಾ ಘರಾ೦ನಿ ತಾಕಾ ಕಸಲೆ೦ಯಿ – ಕೇಕ್, ಕೆಕಿ೦ಜ್ಞಾ೦ ಯಾ ಮಾರಿ ಗೋಲ್ಡ್ ಬಿಸ್ಕಿಟ್ಯೊ ದಿಲ್ಯಾರ್‌ಯಿ ಖಾಯ್ನಾತ್‌ಲ್ಲೊ. ಚಡ್ ಮ್ಹಳ್ಯಾರ್ ಎಕ್ ಕಪ್ ಬ್ರೂ ಪಿಯೆತಾಲೊ. ತೊ ಎಕ್ ನೊ ನೊನ್ಸೆನ್ಸ್ ಪಾದ್ರಿ. ಮೊಟೊಚ್ಚ್, ಹಳ್ಟಾನ್ ತೊ೦ದ್ಯಾಳೊ ಆನಿ ತೊ ತೊ೦ದೊ ಕಾ೦ಯ್ ರೊಸಾಳ್ ಖಾಣಾ೦ ಜಾವ್ನ್ ಆಯಿಲ್ಲೊ ನ್ಹಯ್ ಪುಣ್ ತಾಚ್ಯಾ ಖುಶಾಲಿ ಜಿನೊಸಾ ಸ೦ಗಿಚ್ ಆಯಿಲ್ಲೊ ಮ್ಹಣ್ ಶಾಣೆ ಸಮ್ಜಾತಾಲೆ/ಲಿ೦.
ಮ್ಹೊವಾ೦ಚೆ ಪೊಳಿಯೆಪರಿ೦ ತಾಚೆ೦ ಖಾಡ್ ಆನಿ ತಾಚೆ ವೋ೦ಟ್ ಹ್ಯಾ ದಾಟ್ ವಾಡಾವಳಿ೦ತ್ ಲಿಪೊನ್ ಗೆಲ್ಲೆ ತರಿ ತೊ ಉಲಯ್ತಾನಾ ತಾ೦ಬ್ಶೆಚ್, ಪಾತಳ್ ವೊ೦ಟಾ೦-ಪಾಕ್ಳ್ಯೊ ಝಳ್ಕಾತಾಲ್ಯೊ. ಗೇಟ್ ಕಾಡ್ತೆಚ್ ಫಾದರ್ ಪ್ಯಾಟ್ರಿಕ್ ಬಿತರ್ ಆಯ್ಲೊ ಆನಿ ತಾಚ್ಯಾ ಪಾಟಾಪಾಟ್ ಆಯ್ಲೊ ಸಹಾಯಕ್ ಗುರ‍್ಕಾರ್ ಪಾಸ್ಕಲ್. ಆಪ್ಲೆ೦ ನಾ೦ವ್ ತಾಕಾ ಕಾಟ್‌ಶೆ೦ ದಿಸ್ತಾಲೆ೦ ಖ೦ಯ್ ದೆಕುನ್ ತಾಕಾ ಪಾಸ್ಕಲ್ ಮ್ಹಣ್ ಆಪಯ್ಲ್ಯಾರ್ ‘ರಾಸ್ಕಲ್’ ಮ್ಹಳ್ಳ್ಯಾಪರಿ೦ ಆಯ್ಕಾತಾಲೆ೦ ಖ೦ಯ್ ದೆಕುನ್ ಆಪ್ಲೆ೦ ನಾ೦ವ್ ಬದ್ಲು೦ಚಿ ಸಿರೀಯಸ್ ಆಲೋಚನ್ ತೊ ಕರ‍್ತಾಲೊ. ತೊ ವಿಶಯ್ ವೆಗ್ಳೊ, ವೆಗ್ಳೊಚ್ ಆಸು೦.
‘ಗುಡ್‌ಮೊರ‍್ನಿ೦ಗ್ ಫಾದರ್ ಪ್ಯಾಟ್ರಿಕ್, ಬೆಸಾ೦ವ್ ದಿಯಾ.’
‘ಮಾರ‍್ಗರಿತಾ, ಮೈ ಡಿಯರ್!’ ಮ್ಹಣಾಲೊ ಫಾದರ್ ಪ್ಯಾಟ್ರಿಕ್. ‘ತುಕಾ ಡಾಯ್ರೆಕ್ಟ್ ಬೆಸಾ೦ವ್ ದಿತೆಲ್ಯಾಕ್ ಹಾ೦ವೆ೦ ಮ್ಹಜ್ಯಾಚ್ ಕಾಳ್ಜಾಚ್ಯಾ ಉಬೆನ್ ರೆವ್ಡಾವ್ನ್ ಹಾ೦ಗಾಸರ್ ಹಾಡ್ಲಾ ನ್ಹಯ್?’ ತಾಣೆ ಆಪ್ಲ್ಯಾ ಗೊಮ್ಟ್ಯಾ ಭ೦ವ್ತಿ ರೆವ್ಡೊನ್ ಲೋಬಾಚ್ಯಾ ಹರ‍್ದ್ಯಾ ಬಿತರ್ ಘೆಲ್ಲ್ಯಾ ರುಪ್ಯಾಳ್ಯಾ ಸರ‍್ಪಳೆಕ್ ಚಿರ‍್ಪುಟ್ ಮಾರ‍್ಲೆ೦. ‘ಹಾಕಾ ವ್ಹಾವಯಿಲ್ಲೊ ಸಾ೦ತ್ ಕ್ರಿಸ್ತೊಫರ್ ಜಾ೦ವ್ಕ್‌ಯಿ ಹಾ೦ವ್ ಫಾವೊ ನ್ಹಯ್, ತಿ ಕಥಾ ಸತ್ ವ್ಹಯ್ ತರ್.’
‘ಸರ್ವ್ ತಯಾರ್ ಆಸಾ, ಫಾದರ್!’ ತಾಚೆ೦ ಫೊಕಾಣ್ ಸಮ್ಜಾನಾಸ್ತಾ೦ ತರಿ ತಿಣೆ ಪವಿತ್ ಪಾಡ್ತಿಕಲಾಕ್ ಮಾನ್ ಭಾಗಾಯ್ಲೊ.
‘ಬ್ರೂ-ಯಿ ತಯಾರ್ ಆಸಾ?’ ಫಾದರ್ ಪ್ಯಾಟ್ರಿಕ್ ಹಾಸ್ಲೊ. ತೊ ರುಚೀಕ್ ಖಾಣಾ೦-ಫಳಾ೦ಚೊ connosseur. ‘ತು೦ ಕಿತೆ೦ ತ್ಯಾ ಪೊಪಾಯೆಚ್ಯಾ ಆಡ್ಬೊಸ್ರ್ಯಾ ರುಕಾಕ್ ಪಳೆತ್ತ್ ಆಸ್‌ಲ್ಲಿಯ್?’
ಮಾರ‍್ಗರಿತಾ ಚಿಕ್ಕೆಸೆ ಲಜೆಲಿ, ಮಾತ್ಸಿ ದೊಡ್ಲಿ. ‘ಮ್ಹಜ್ಯಾ ಪೊಪಾಯೆಚ್ಯಾ ರುಕಾಕ್ ಫುಲಾ೦ ಪಡ್ಲ್ಯಾ೦ತ್, ಫಾದರ್!’
‘ನವಾಲ್ ಜಾಲೆ೦-ಮೂ!’ ಉದ್ಗಾರ‍್ಲೊ ಫಾದರ್ ಪ್ಯಾಟ್ರಿಕ್. ‘ಸಾ೦.ಜುಜೆಚ್ಯಾ ಬೆತ್ಕಾಟೆಕ್ ಫುಲಾ೦ ಪಡ್‌ಲ್ಲೆಪರಿ೦ ಉಲಯ್ತಾಯ್-ಮೂ? ಜಾ೦ವ್, ಆಯಿಲ್ಲೆ೦ ಕಾಮ್ ಕರ್ತಾ೦ ಹಾ೦ವ್. ಬ್ರೂ ಪಿಯೆತಾನಾ ಉಲೊವ್ಯಾ೦. ತುಜ್ಯಾ ಬ್ರೂ-೦ತ್ ಆಸ್ಚಿ ಮ್ಹಝಾ…ಆಜ್ ಎಕ್ ಫೊರಿನ್ ಬಿಸ್ಕಿಟ್ ಖೆಲ್ಯಾರ್‌ಯಿ ಖೆಲಿ.’ ದೊಳೊ ಮೊಡಿತ್ತ್ ತಾಣೆ ಘರಾ ಕುಶಿನ್ ಮೆಟಾ೦ ಕಾಡ್ಲಿ೦.
ತ್ರ೦ಯ್ಶಿ೦ ವರ್ಸಾ೦ಚ್ಯಾ ಮಾರ‍್ಗರಿತಾಚೆ ಆವಯ್ಕ್ ಪವಿತ್ ಕೊಮು೦ಜ್ಞಾವ್ ದಿತೆಚ್, ಫಾದರ್ ಪ್ಯಾಟ್ರಿಕಾನ್ ತಿಚೆರ್ ಪಿಡೇಸ್ತಾ೦ಚೆರ್ ಕರ‍್ಚೆ೦ ಪ್ರಾರ‍್ಥನ್ ಕೆಲೆ೦ ಆನಿ ತ್ಯಾ ಉಪ್ರಾ೦ತ್ ಮಾರ‍್ಗರಿತಾಚ್ಯಾ ಪೊಶ್ ದಿವಾನ್ಖಾನ್ಯಾ೦ತ್ ಯೆವ್ನ್ ತೊ ‘ಉಫ್’ ಕರುನ್ ಬಸ್ಲೊ. ತಾಣೆ ಎಕ್ ದೀಷ್ಟ್ ಸಹಾಯಕ್ ಗುರ‍್ಕಾರಾಚೆರ್ ಚರಯ್ಲಿ. ಪಾಸ್ಕಲ್, ದಿ ರಾಸ್ಕಲ್-ಮತಿ೦ತ್‌ಚ್ ಮ್ಹಣಾಲೊ ಫಾದರ್ ಪ್ಯಾಟ್ರಿಕ್.
‘ಬ್ರೂ ಹಾಡುನ್ ಯೆತಾ೦, ಫಾದರ್!’ ಮಾರ‍್ಗರಿತಾ ಚಡ್ಪಡ್ಲಿ. ‘ತುರ‍್ತ್ ಕರ್ತಾ೦. ತುಕಾಯಿ ಬ್ರೂ ಆವಡ್ತಾ ನ್ಹಯ್ ಮಾನೇಸ್ತ್ ಪಾಸ್ಕಲ್?’
‘ವ್ಹಯ್, ವ್ಹಯ್,’ ಮ್ಹಣಾಲೊ ಪಾಸ್ಕಲ್. ‘ಸಾಕರ್ ಇಲ್ಲಿಶಿ ಉಣಿ….’
‘ನೊ ಪ್ರೊಬ್ಲೆಮ್,’ ಮ್ಹಣಾಲಿ ಮಾರ‍್ಗರಿಟಾ. ‘ಮ್ಹಜ್ಯಾ ಲಾಗಿ೦ ವಿಲ್ಲಿಚೊ ಶುಗರ್-ಫ್ರೀ ಸ್ಟೊಕ್ ಆಸಾ.’
ವಿಲ್ಲಿ, ಮಾರ‍್ಗರಿತಾಚೊ ಘರ‍್ಕಾರ್, ಆಜೂನ್‌ಯಿ ಕುವೇತಾ೦ತ್ ಬಿಸ್‌ನೆಸಾರ್ ಆಸ್‌ಲ್ಲೊ. ತಿಚ್ಯೊ ತೆಗಿ ಧುವೊ ಬರ‍್ಯಾ ಘರಾಣ್ಯಾ೦ನಿ ‘ಸೆಟಲ್’ ಜಾಲ್ಲ್ಯೊ.
ಮಾರ‍್ಗರಿತಾ ಕಿಚನಾಕ್ ವೆತೆಚ್ ಪಾಸ್ಕಲಾನ್ ವಿಚಾರ‍್ಲೆ೦. ‘ಮೊಲ್ಲಿ ಮೊ೦ತೆರಾಗೆರ್ ವಚು೦ಕ್ ಆಸಾ, ಫಾದರ್?’
ಫಾದರ್ ಪ್ಯಾಟ್ರಿಕಾನ್ ತಾಕಾ ಪ೦ದ್ಲ್ಯಾ ದೊಳ್ಯಾ೦ನಿ ಎಕ್ ದೀಷ್ಟ್ ದಿಲಿ. ‘ವಚ್ಯೆತ್,’ ಮ್ಹಣಾಲೊ ತೊ. ‘ಕುಮ್ಗಾರ್ ದೀವ್ನ್ ಜಾಲೊ ನ್ಹಯ್?’ ತಾಚ್ಯಾ ದೊಳ್ಯಾ೦ನಿ ಎಕ್ ಮಿಣ್ಕುಲೊ ಉದೆಲೊ. ‘ತುಕಾ ಆನಿ ಮೊಲ್ಲಿ ಮೊ೦ತೇರೊಕ್ ಕಿತೆ೦ ಕಾಳ್ಜಾ೦ತ್ ಮೋಗ್?’
‘ಮೋಗ್ ಕಾಳ್ಜಾ೦ನಿ೦ಚ್ ಆಸ್ಚೊ ನ್ಹಯ್, ಫಾದರ್?’ ಪಾಸ್ಕಲ್ ಹಾಸ್ಲೊ. ‘ಆಮ್ಚಿ ಮಾರ‍್ಗರಿತಾಬಾಯ್ ಕಾ೦ಯ್ ಉಲಯ್ನಾ ತರಿ ಮೊಲ್ಲಿ ಮೊ೦ತೇರೊಕ್ ಹಿಚೆರ್ ಆಸ್ಚಿ ಕಾಟ್ಕಾಯ್-‘
‘ಸಿಲ್ಲಿ ಮೊಸೊರ್,’ ತಿದ್ವಿಲೆ೦ ಫಾದರ್ ಪ್ಯಾಟ್ರಿಕಾನ್. ‘ಹಾ೦ವ್ ಜಾಣಾ೦.’
‘ಮಾರ‍್ಗರಿತಾ ಬಾಯೆಗೆರ್ ಕುಮ್ಗಾರ್ ವ್ಹರುನ್ ಯೆತಾನಾ ಮೊಲ್ಲಿಬಾಯ್ ಆ೦ಬ್ಶೆತಾ ಮೊಸ್ರಾನ್. ತಿಚ್ಯಾ ಘರಾ೦ತ್‌ಯಿ ಎಕ್ಲಿ ಪಿಡೆಸ್ತಿಣ್ ಆಸ್‌ಲ್ಲಿ ತರ್ ತುಮಿ ಥ೦ಯ್ ಪಯ್ಲೆ ವೆತ್ಯಾತ್ ಆನಿ ತಿಣೆ ದಿಲ್ಲಿ ಕಾಫಿ ಪಿಯೆವ್ನ್ ಮಾರ‍್ಗರಿತಾಗೆಲಿ ಬ್ರೂ ನಾಕಾ ಮ್ಹಣ್ತ್ಯಾತ್. ಅಶೆ೦….’
‘ಅಶೆ೦ಯಿ ಆಸಾ-ವೇ ತರ್?’
‘ತುಮಿ ಹಾ೦ಗಾಸರ್ ಚಾರ್ ವರ್ಸಾ೦ಥಾವ್ನ್ ಆಸಾತ್ ತರಿ, ಫಾದರ್, ಹಾ೦ಚ್ಯಾ ಪೊಲಿಟಿಕ್ಸಾ೦ನಿ ತುಮಿ ನೆ೦ಟೆಚ್’. ಹೆ೦ ಆಯ್ಕೊನ್ ಫಾದರ್ ಪ್ಯಾಟ್ರಿಕ್ ಉಗ್ತ್ಯಾನ್ ಹಾಸ್ಲೊ. ತಾಚೊ ಹಾಸೊ ಪಯ್ಶಿಲ್ಯಾನ್ ಆಯ್ಕಾಲ್ಲೊ ಮಾರ‍್ಗರಿತಾಚೊ ಜರ‍್ಮನ್ ಶೆಪರ‍್ಡ್ ಘೊ೦ಕ್ಲೊ.
ಮಾರ‍್ಗರಿತಾ ಬ್ರೂ ಹಾಡುನ್ ಆಯ್ಲಿ. ‘ಸಾ೦ಗಾತಾಚ್ ಹಾ೦ವೆ೦ ಥೊಡ್ಯೊ ಶುಗರ್ ಫ್ರೀ ಫೊರಿನ್ ಬಿಸ್ಕಿಟ್ಸ್ ಹಾಡ್ಲ್ಯಾರ್ ಫಾದರ್. ಥೊಡ್ಯೊ ಡ್ಯಾನಿಶ್ ಕುಕ್ಕೀಸ್… ನೊ ಪ್ರೊಬ್ಲೆಮ್…’ ಟ್ರೇ, ಟೀಪೊಯಾಚೆರ್ ದವರ‍್ನ್ ತಿ ಬಸ್ಲಿ.
‘ಹು೦,’ ಮ್ಹಣಾಲೊ ಫಾದರ್ ಪ್ಯಾಟ್ರಿಕ್. ‘ತರ್ ತುಜ್ಯಾ ಪೊಪಾಯೆಚ್ಯಾ ರುಕಾಕ್ ಫುಲಾ೦ ಪಡ್ಲ್ಯಾ೦ತ್’
‘ವ್ಹಯ್, ಫಾದರ್,’ ಮ್ಹಣಾಲಿ ಮಾರ‍್ಗರಿತಾ. ‘ರೊಪ್ಯಾ೦ಚೆರ್ ಫುಲಾ೦ ಪಡ್ಲ್ಯಾ೦ತ್, ವ್ಹಯ್. ಪುಣ್ ತಿ ಸರ್ವ್ ಝಡೊನ್ ವೆತಾತ್.’
‘ಕಿತ್ಯಾಕ್ ಆನಿ ಕಶೆ?’ ಆಪ್ಲ್ಯಾ ಲೋಬಾರ್ ಪಡ್‌ಲ್ಲ್ಯಾ ಬಿಸ್ಕಿಟಿಚ್ಯಾ ಪಿಟ್ಯಾಕ್ ಪಾಫುಡ್ಲೆ೦ ಫಾದರ್ ಪ್ಯಾಟ್ರಿಕಾನ್. ತಿ೦ ಕರ‍್ಪಾ೦ ಮಾರ‍್ಗರಿತಾಚ್ಯಾ ಊ೦ಚಿ ಕಾರ‍್ಪೆಟಿರ್ ಪಡ್ತಾನಾ ತೊ ಚುರ‍್ಚುರ‍್ಲೊ.
‘ನೊ ಪ್ರೊಬ್ಲೆಮ್ ಫಾದರ್, ನೊ ಪ್ರೊಬ್ಲೆಮ್,’ ಮ್ಹಣಾಲಿ ಮಾರ‍್ಗರಿತಾ.
‘ತೆ ಸರ್ವ್ ಚೆಡೆ ರೊ೦ಪೆ ಫಾದರ್!’ ತಿಣೆ ವಿವರಿಲೆ೦. ‘ಚೆಡ್ಯಾ ರೊ೦ಪ್ಯಾ೦ಚೆರ್ ಫಳಾ೦ ಉದೆನಾ೦ತ್.
‘ಹು೦! ಸಾದೆ೦ ರಾಜಾ೦ವ್ ನ್ಹಯ್?’ ತೊ ಮ್ಹಣಾಲೊ. ‘ಪುಣ್ ಆತಾ೦ಯಿ ತರಿ ಫಕತ್ ಫುಲಾ೦ ಮಾತ್ರ್ ಪಡ್ಲ್ಯಾ೦ತ್ ನ್ಹಯ್? ಕಿತೆ೦ ಮ್ಹಣ್ತಾಯ್? ತುಜ್ಯಾ ಇತ್ಲ್ಯಾ ಸ೦ತೊಸಾಕ್ ನಿರಸಾಯ್ ಮೆಳಾಶಿ ನಾ ಮ್ಹಣ್ ಕಶೆ೦ ಮ್ಹಣ್ತಾಯ್?’
ಮಾರ‍್ಗರಿತಾ ಪರತ್ ಚಿಕ್ಕೆಸೆ ದೊಡ್ಲಿ. ‘ಹಿ ಸ೦ಗತ್ ಕಾ೦ಯ್ ವ್ಹಡ್ಲಿ ನಿರಾಶಾ ನ್ಹಯ್ ಫಾದರ್ ಪುಣ್ ಮ್ಹಜಿ ಬೊರಿ ಸೆಜಾರ‍್ನ್ ಮೊಲ್ಲಿ ಮೊ೦ತೇರ್ ಆಸಾ ಪಳೆಯಾ…ತಿ ಹರ್‌ಯೆಕ್ ಪಾವ್ಟಿ೦ ಮ್ಹಜ್ಯಾ ರೊ೦ಪ್ಯಾ೦ಕ್ ಫುಲಾ೦ ಪಡ್ತಾನಾ ಮಸ್ಕಿರ‍್ಯೊ ಕರುನ್ ಹಾಸ್ತಾ…….’
‘ಆದ್ಲೆ ಪಾವ್ಟಿ೦,’ ಮಧೆ೦ ಪಡ್ಲೊ ಪಾಸ್ಕಲ್. ‘ಮಾರ‍್ಗರಿತಾಬಾಯೆಚ್ಯಾ ರೊ೦ಪ್ಯಾಕ್ ಫುಲಾ೦ ಪಡ್ತಾನಾ ಮೊಲ್ಲಿ ಮೊ೦ತೇರೊನ್ ಸಲಹಾ ದಿಲ್ಲಿ ಖ೦ಯ್ – ರೊ೦ಪ್ಯಾಚ್ಯಾ ಮಧ್ಗಾತ್ ಎಕ್ ಪರ‍್ನಿ ವ್ಹಾಣ್ ಆನಿ ಝರ್‌ಲ್ಲೊ ಸಾರ‍್ಣಿ ಖು೦ಟೊ ಬಾ೦ದ್ ಅಶೆ೦ – ದೀಷ್ಟ್ ಲಾಗಾನಾಶಿ!’
‘ವ್ಹಯ್ ಫಾದರ್,’ ಮ್ಹಣಾಲಿ ಮಾರ‍್ಗರಿತಾ. ‘ಪುಣ್ ಹಾ೦ವ್ ಅಸಲ್ಯಾ ಸರ್ವ್ ಫಿತಿಸ್ಪೊಣಾ೦ನಿ ಪಾತ್ಯೆನಾ.’
‘I’m sure you don’t,’ಮ್ಹಣಾಲೊ ಫಾದರ್ ಪ್ಯಾಟ್ರಿಕ್.
‘ದೆಕುನ್ ಹ್ಯಾ ಪಾವ್ಟಿ೦ ರೊ೦ಪ್ಯಾಕ್ ಫುಲಾ೦ ಪಡ್ತಾನಾ ಹಾ೦ವೆ೦ ಮೊಲ್ಲಿಕ್ ಸಾ೦ಗ್ಲೆ೦ – ಹ್ಯಾ ಪಾವ್ಟಿ೦ ಫುಲ್ ಆಸ್‌ಲ್ಲೆ೦ ಪೊಪಾಯ್ ಜಾಯ್ತ್ ಜಾಲ್ಯಾರ್ ವಿಗಾರಾ೦ಚ್ಯಾ ಪಾತ್ರೊನ್ ಸಾ೦ತಾಚ್ಯಾ ಫೆಸ್ತಾ ವೆಳಾರ್ ತಿ ಪೊಪಾಯ್ ಬರಿಚ್ ಜೂನ್ ಜಾತೆಲಿ ಆನಿ ತಿ ಫೆಸ್ತಾಚ್ಯಾ ಮಿಸಾ ಉಪ್ರಾ೦ತ್ ಆಮಿ ಸರ‍್ವಾ೦ ವಿಗಾರಾಕ್ ವಿಶ್ ಕರ‍್ತಾನಾ ತಿ ಪೊಪಾಯ್ ಹಾ೦ವ್ ಆಮ್ಚ್ಯಾ ಮೊಗಾಚ್ಯಾ ಪ್ಯಾಟ್ರಿಕ್ ವಿಗಾರಾ೦ಕ್ ಪ್ರೆಸೆ೦ಟ್ ಕರ‍್ತೆಲಿ೦!’
ಫಾದರ್ ಪ್ಯಾಟ್ರಿಕ್ ದೊಳೆ ಅಶೀರ್ ಕರುನ್ ತಿಕಾ ಪಳೆಲಾಗ್ಲೊ. ‘ಹಾ೦ವ್ ಫಾವೊ ನ್ಹಯ್ ತರಿ ಮ್ಹಣ್ತಾ೦ ಅಸಲೊ ಭಾವಾರ‍್ಥ್ ಸಗ್ಳ್ಯಾ ಇಸ್ರಾಯೆಲಾ೦ತ್ ಹಾ೦ವೆ೦ ಪಳೆ೦ವ್ಕ್ ನಾ.’ ತೊ ಮ್ಹಣಾಲೊ.
ಸಹ ಗುರ‍್ಕಾರ್ ಚಿಕ್ಕೆಸೆ ಹಾಸ್ಲೊ.
ತವಳ್, ಮ್ಹಣಾಲೊ ಫಾದರ್ ಪ್ಯಾಟ್ರಿಕ್. ‘But, ಮಾರ‍್ಗರಿತಾ, ತು೦ವೆ೦ ಅಶೆ೦ ಮೊಲ್ಲಿ ಮೊ೦ತೇರೊಕ್ ಸಾ೦ಗ್ಲೆ೦ಯ್?’
‘ವ್ಹಯ್ ಫಾದರ್,’ ತಿಣೆ ಜಾಪ್ ದಿಲಿ ಹರ‍್ಧೆ೦ ಚಿಕ್ಕೆಸೆ ಮುಕಾರ್ ಹಾಡುನ್. ಫಾದರ್ ಪ್ಯಾಟ್ರಿಕಾನ್ ಥಿ೦ಪಿ ಗಿಳ್ಳಿ. ‘ಪಳೆತಾ೦ ಹಾ೦ವ್ ತಿಚೊ ಸಾರ‍್ಣಿಖು೦ಟೊ ಆನಿ ಪರ‍್ನಿ ವ್ಹಾಣ್ ಜಿಕ್ತಾ ಯಾ ಮ್ಹಜೊ ಭಾವಾರ‍್ಥ್.’
ವಿಗಾರ್, ಫಾದರ್ ಪ್ಯಾಟ್ರಿಕಾನ್ ಎಕ್ ಲಾ೦ಬ್ ಸ್ವಾಸ್ ಸೆವ್ಲೊ. ‘ಅಸಲ್ಯಾ ಚಿಲ್ಲರ್ ಸ೦ಗ್ತಿ೦ಕ್ ಭಾವಾರ‍್ಥ್ ದಾವೊ ಜಾವ್ನ್ ಧರು೦ಕ್ ನಜೊ, ಮಾರ‍್ಗರಿತಾ, ಮೈ ಡಿಯರ್.’ ಅಶೆ೦ ಮ್ಹಣ್ತಾನಾ ಫಾದರ್ ಪ್ಯಾಟ್ರಿಕಾಚ್ಯೆ ಮತಿ೦ತ್ ಕಸಲೆ೦ಗಿ ‘ಪ್ಲಸ್-ಮೈನಸ್’ ಇತ್ಯರ್ಥ್ ಜಾತಾಲೆ೦.
***
ಮಾರ‍್ಗರಿತಾಚ್ಯಾ ಪೊ೦ಪಾಯೆ ರೊ೦ಪ್ಯಾಕ್ ಪಿ೦ಪ್ರೆ೦ ಪಡ್ಲೆ೦ಚ್. ಫಕತ್ ಎಕ್ ಪಿ೦ಪ್ರೆ೦!
ಹ್ಯಾ ವರ‍್ವಿ೦ ಕಸಲೆ೦ ಸರ್ವ್ ರುಜು ಜಾಲೆ೦ ತೆ೦ ಆಮಿ ನೆಣಾ೦ವ್ ಪುಣ್ ತೊ ಎಕ್ ರೊ೦ಪೊ ನ್ಹಯ್, ಎಕ್ ರೊ೦ಪಿ ಮ್ಹಣ್ ರುಜು ಜಾಲೆ೦. ಹೆಣೆ೦ ತೆಣೆ೦ ಮ್ಹಣ್ತಾನಾ ಫುಡ್ಲ್ಯಾ ಮ್ಹಯ್‌ನ್ಯಾ೦ನಿ ಮಾರ‍್ಗರಿತಾಚೆ ಆವಯ್ಕ್ ಕುಮ್ಗಾರ್ ಹಾಡುನ್ ಆಯಿಲ್ಲ್ಯಾ ಫಾದರ್ ಪ್ಯಾಟ್ರಿಕಾಕ್ ಆಪ್ಲ್ಯಾ ಪೊಪಾಯೆಚಿ ವಡ್ವಿಗ್ ಸಾ೦ಗ್ಲಿ ಮಾರ‍್ಗರಿತಾನ್ ಆನಿ ದೊಳ್ಯಾ೦ತ್ ತೇಲ್ ಘಾಲುನ್ ಹ್ಯಾ ಪೊಪಾಯೆಚಿ ಜತನ್ ಹಾ೦ವ್ ಘೆತಾ೦, ಅಶೆ೦ ತಿ ಮ್ಹಣಾಲಿ. ನಜೊ ಆಸ್‌ಲ್ಲೆ೦ ತರಿ, ಸ್ತ್ರೀ ಸಹಜತೆನ್ ತಿಣೆ೦ ಮೊಲ್ಲಿ ಮೊ೦ತೇರೊಕ್ ಎಕ್ ದೋನ್ ಪಾವ್ಟಿ೦ ಹ್ಯಾ ಪೊಪಾಯೆಚೆರ್ ಪಿನ್ನ್ ಮಾರ‍್ಲಿಚ್. ಆಸು೦.
ಜಾಪ್ ಜಾವ್ನ್ ವಿಗಾರಾ೦ಚ್ಯಾ ಫೆಸ್ತಾಕ್ ಆನಿಕಿ ದೀಸ್ ಆಸಾತ್ ನ್ಹಯ್, ಮಾರ‍್ಗರಿತಾ? ವಿಚಾರ‍್ಲೆ೦ ಮೊಲ್ಲಿನ್. ತುಜಿ ಪೊಪಾಯ್ ಆತಾ೦ಚ್ ತಾ೦ಬ್ಶೆಲ್ಯಾ. ಎಕಾ ಕಾವ್ಳ್ಯಾನ್ ಖೊ೦ಚ್ ಮಾರ‍್ಲ್ಯಾರ್ ಜಾಲೆ೦ ನ್ಹಯ್? ಉಪ್ರಾ೦ತ್ ಕಾಕಾ ಕಾಕಾ, ಪೊಪಾಯ್ ಖ್ಹಾ!
ಹೆ೦ ಮಾರ‍್ಗರಿತಾಕ್ ದುಕ್ಲೆ೦ ಆನಿ ಆಪ್ಲೆ೦ ಕಾಳಿಜ್ ಹಾಳು ಕರ‍್ಚೆ ಖಾತಿರ್ ತಿಣೆ ಫಾದರ್ ಪ್ಯಾಟ್ರಿಕಾಕ್ ಹೆ೦ ಸಾ೦ಗ್ಲೆ೦. ಫಾದರ್ ಪ್ಯಾಟ್ರಿಕ್ – ತ್ಯಾ ಫಿರ‍್ಗಜಿಚೊ ಬರೊ ಗೊವ್ಳಿ – ತಿಕಾ ಗೂ೦ಡ್ ನದ್ರೆನ್ ಪಳೆಲಾಗ್ಲೊ.
ಪೊಪಾಯ್ ಜೂನ್ ಜಾ೦ವ್ ಯಾ ನಾ ಜಾ೦ವ್, ದೀಸ್ ಧಾ೦ವ್ಲೆಚ್, ವಿಗಾರಾಚ್ಯಾ ಸಾ೦ತಾಚಿ ಪರಬ್ ಆಯ್ಲಿಚ್. ಆಪ್ಲ್ಯಾ ಫೆಸ್ತಾಚ್ಯಾ ಆದ್ಲ್ಯಾ ದಿಸಾ ಮಾರ‍್ಗರಿತಾಚೆ ಆವಯ್ಕ್ ಕುಮ್ಗಾರ್ ವ್ಹರುನ್ ಗೆಲ್ಲ್ಯಾ ತಾಕಾ. ಪಾಟಿ೦ ವೆತಾನಾ ನಾಕಾ ನಾಕಾ ಮ್ಹಳ್ಯಾರಿ ತಾಚಿ ದೀಷ್ಟ್ ತ್ಯಾ ಪೊಪಾಯೆಚೆರ್ ಪಡ್ಲಿ. ಬರಿಚ್ ಸೊರ‍್ಕೆಲ್ಲಿ ಹಿ ಪೊಪಾಯ್ ಆನಿ ಚಿತುರ‍್ಲೆಚೊ ಸೊಬಿತ್ ರ೦ಗ್ ತಿಕಾ ಆಯಿಲ್ಲೊ. ಕಶಿ ತಿ ಪೊಪಾಯ್ ಕಾವ್ಳ್ಯಾ೦ಚ್ಯಾ ದಿಷ್ಟಿಥಾವ್ನ್ ತವಳ್ ಪರ‍್ಯಾ೦ತ್ ಬಚಾವ್ ಉರ‍್ಲಿ ಮ್ಹಳ್ಳೆ೦ ಸವಾಲ್ ಫಾದರ್ ಪ್ಯಾಟ್ರಿಕಾಚ್ಯಾ ಮತಿ೦ತ್ ಉದೆಲೆ೦; ಹ್ಯಾ ಸವಲಾಚ್ಯಾಕಿ ಚಡಿತಾಯೆನ್ ಹಿ ಪೊಪಾಯ್ ಮೊಲ್ಲಿ ಮೊ೦ತೇರೊಚ್ಯಾ ಪಾರ‍್ಪಳ್ ನಾತ್ವಾ೦ಥಾವ್ನ್ ವಾ೦ಚೊನ್ ಉರ‍್ಲಿ ಮ್ಹಳ್ಳೆ೦ ಸವಾಲ್ ಬಳಿಷ್ಟ್ ಆಸ್‌ಲ್ಲೆ೦. ವಾನರಾ೦ಚಿ ಖರಿ ಸ೦ತತ್ ತೆ ನಾತು.
‘ಮ್ಹಾಕಾ ದಿಸ್ತಾ, ಫಾದರ್ ಪ್ಯಾಟ್ರಿಕ್,’ ಮ್ಹಣಾಲೊ ಪಾಸ್ಕಲ್. ‘ತುಮ್ಚ್ಯಾ ಫೆಸ್ತಾಕ್ ಹಿ ಪೊಪಾಯ್ ತುಮ್ಚ್ಯಾ ಬ್ರೇಕ್‌ಫಸ್ಟ್ ಟೇಬಲಾಕ್ ಖ೦ಡಿತ್ ಯೆತೆಲಿ.’ ತೊ ಹಾಸ್ಲೊ. ‘ತುಮ್ಕಾ೦ ಫ್ರೆಶ್ ಫ್ರುಟ್ಸ್ ಮ್ಹಳ್ಯಾರ್ ಭಾರಿಚ್ ಖುಶಿ ನ್ಹಯ್೦ಗಿ?’
‘ಆಬ್ಲೆಸ್ ಬರೊ ನ್ಹಯ್, ಮಿ|ಪಾಸ್ಕಲ್,’ ಮ್ಹಣಾಲೊ ವಿಗಾರ್. ‘ವ್ಹಯ್, ಖಾಣಾ೦ ಪಕ್ವಾನಾ೦ ಮ್ಹಾಕಾ ಬರಿ ಲಾಗ್ತಾತ್ ವ್ಹಯ್ ಪುಣ್ ಮ್ಹಜೆಥ೦ಯ್ ಆಬ್ಲೆಸ್ ನಾ. ಫಿರ‍್ಗಜಿ೦ತ್ಲ್ಯಾ ಭಾವಾರ‍್ಥ್ಯಾ೦ನಿ೦ಚ್ ಮ್ಹಾಕಾ ಹ್ಯೊ ರುಚಿ ಲಾಗಯ್ಲ್ಯಾತ್. ಯೆಸ್, ಥ್ಯಾ೦ಕ್ಯೂ ಮ್ಹಣ್ ತಾಣಿ೦ ದಿಲ್ಲೆ೦ ಖಾವ್ನ್೦ಚ್ ಆಯ್ಲೊ೦ ಮ್ಹಣ್ ಹಾ೦ವ್ ಆಬ್ಲೆಶಿ ಜಾಲೊ೦ ನಾ. ಹಾ೦ವೆ೦ ನಿರಾಕರಿಲೆ೦ ತರ್ ಜಾಣಾ೦ಯ್ ತು೦ ಹ್ಯಾ ಭಾವಾರ‍್ಥ್ಯಾ೦ಕ್ ಕಿತ್ಲೆ೦ ದುಕ್ತಾ ಮ್ಹಣ್. ಹು೦. ಪುಣ್ ಹಾ೦ವ್ ಬರ‍್ಯಾ ಬೊ೦ಕೆತಿಚೊ ರುಚ್‌ಪಿ ಮ್ಹಳ್ಳ್ಯಾ೦ತ್ ಚೂಕ್ ನಾ.’ ಆತಾ೦ ಹಾಸ್ಚಿ ಸರ‍್ತಿ ವಿಗಾರಾ೦ಚಿ.
‘ಆಮಿ ಮಾರ‍್ಗರಿತಾಚ್ಯಾ ಪೊಪಾಯೆ ವಿಶಾ೦ತ್ ಉಲಯ್ತೆಲ್ಯಾ೦ವ್, ಫಾದರ್……’
‘ಹಾ೦, ವ್ಹಯ್ ಪುಣ್ ಆಮ್ಕಾ೦ ಕಸಲೆಚ್ ಛಾನ್ಸಸ್ ಘೆ೦ವ್ಕ್ ಜಾಯ್ನಾ, ಪಾಸ್ಕಲ್!’ ಮ್ಹಣಾಲೊ ಫಾದರ್ ಪ್ಯಾಟ್ರಿಕ್. ‘ಸಾದ್ಯಾ ಭಾವಾರ‍್ಥಾಕ್ ಪಾಲ್ವೊ೦ಕ್ ಆಮಿ ಸೊಡು೦ಕ್ ನಜೊ.’
‘ಹಾ೦ವ್ ಸಮ್ಜಾಲೊ೦ ನಾ, ಫಾದರ್.’ ಹಾತ್ ಉದಾರೆ ಕೆಲೆ ಸಹ ಗುರ‍್ಕಾರಾನ್. ‘ಹಾ೦ವ್ ತುಮ್ಚೆತಿತ್ಲೊ ಬುದ್ವ೦ತ್ ನ್ಹಯ್, ಫಾದರ್.’
‘ತೆ೦ ಹಾ೦ವ್ ಜಾಣಾ೦,’ ಮ್ಹಣಾಲೊ ಫಾದರ್ ಪ್ಯಾಟ್ರಿಕ್. ‘ಲಾಗಿ೦ ಸರ್, ತುಕಾ ಹಾ೦ವ್ ಸಮ್ಜಯ್ತಾ೦!’ ಪಾಸ್ಕಲಾಕ್ ತಾಣೆ ಲಾಗಿ೦ ಆರಾಯ್ಲೊ.
***
ಸಕಾಳಿ೦ ಫುಡೆ೦ ಉಟ್‌ಲ್ಲ್ಯಾ ಮಾರ‍್ಗರಿತಾನ್ ಖ೦ಚಾ ಖ೦ಚಾ ಗೊವೆತಾ೦ನಿ ಸೊದುನ್ ತಾ೦ಬ್ಡ್ಯಾ ಫಿ೦ತಾ೦ಚೊ ಕುಡ್ಕೊ ಸೊದುನ್ ಕಾಡ್ಲೊ. ತ್ಯಾ ಫಿ೦ತಾನ್ ಪಿಸೊಳ್ಯಾ ಸಾರ‍್ಕೊ ಆಕಾರ್ ಕರುನ್ ಪೊಪಾಯೆಕ್ ಬಾ೦ದುನ್ ತಿ ವಿಗಾರಾ೦ಕ್ ಅರ‍್ಪು೦ಚಿ ಆಲೋಚನ್ ತಿಚಿ. ಮೊಲ್ಲಿ ಮೊ೦ತೇರೊ ಹಾಸ್ಲ್ಯಾರ್ ಹಾಸು೦ದಿ. ಎಕ್ ಕಾನ್ವೆತ್ ಘೆವ್ನ್ ತಿ ಆಪ್ಲ್ಯಾ ವೆಜಿಟೇಬಲ್ ಗಾರ‍್ಡನಾಕ್ ಧಾ೦ವ್ಲಿ. ಮಿಸಾಚೆ೦ ಕಾಪಡ್ ನೆಸ್ಲ್ಯಾ ಉಪ್ರಾ೦ತ್ ಕಾ೦ಯ್ ಪೊಪಾಯ್ ಲು೦ವೊ೦ಕ್ ಗೆಲ್ಯಾರ್ ಕಾಪ್ಡಾಚೆರ್ ದೀಕ್ ಉಸ್ಳತ್ ಮ್ಹಳ್ಳೆ೦ ಭೆ೦ ತಿಕಾ. ತಾ೦ಬ್ಡ್ಯಾ ಫಿ೦ತಾಚೊ ‘ಬೊವ್’ ತಯಾರ್ ಕರ‍್ತಾನಾ ಆಪ್ಲ್ಯಾ ಪಾತಿಯೆಣೆಕ್‌ಯಿ ಫುಲಾ೦ ಪಡ್‌ಲ್ಲೆಪರಿ೦ ತಿಕಾ ಭೊಗ್ಲೆ೦.
ಎಕಾ ಹಾತಾ೦ತ್ ತೊ ‘ಬೊವ್’ ಆನಿ ದುಸ್ರ್ಯಾ೦ತ್ ಕಾನ್ವೆತ್ ಘೆವ್ನ್ ವೆಜಿಟೇಬಲ್ ಗಾರ‍್ಡನಾಕ್ ಪಾವ್‌ಲ್ಲ್ಯಾ ಮಾರ‍್ಗರಿತಾಕ್ ಎಕ್ ಧಖೊ ರಾಕೊನ್ ಆಸ್‌ಲ್ಲೊ.
ಪೊಪಾಯೆಚ್ಯಾ ರುಕಾರ್ ಪೊಪಾಯ್ ನಾತ್‌ಲ್ಲಿ!
…………….
‘ಫಾದರ್, ಪ್ಯಾಟ್ರಿಕ್!’ ಸ೦ತೊಸಾಚ್ಯಾ ಉಮಾಳ್ಯಾ೦ನಿ ದಾಟೆಲ್ಲೊ ತಾಳೊ ಆಯ್ಕೊನ್ ಫಾದರ್ ಪ್ಯಾಟ್ರಿಕ್ ಭಾಯ್ರ್ ಸೊಪ್ಯಾರ್ ಆಯ್ಲೊ.
ದೆದೆಸ್ಪ್ರಾರ್ ಜಾಲ್ಲ್ಯಾ ಎಕಾ ಮಾರ‍್ಗರಿತಾಚೊ ತೊ ಜಾವ್ನಾಸ್ತೊಲೊ ಮ್ಹಣ್ ತಾಣೆ ಕೆಲ್ಲೊ ಅ೦ದಾಜ್ ಫಟ್ ಜಾಲ್ಲೊ. ಸೊಪ್ಯಾರ್, ಮಾನೆಸ್ತಿಣಿ ಮೊಲ್ಲಿ ಮೊ೦ತೇರೊ ಉಬಿ ಆಸ್‌ಲ್ಲಿ ಆನಿ ಕಸಲ್ಯಾಗಿ ಉದ್ವೇಗಾನ್ ಕಾ೦ಪ್ತಾಲಿ ಪುಣ್ ತಿಚ್ಯಾ ಮುಕಮಳಾರ್ ಜಯ್ತಾಚೊ ಹಾಸೊ ಆಸ್‌ಲ್ಲೊ.
ಆನಿ ತಿಚ್ಯಾ ಹಾತಾ೦ತ್ ಎಕ್ ಪೊಪಾಯ್ ಆಸ್‌ಲ್ಲಿ.
‘ಕಿತೆ೦ ಮೊಲ್ಲಿ?’ ವಿಚಾರ‍್ಲೆ೦ ಫಾದರ್ ಪ್ಯಾಟ್ರಿಕಾನ್. ‘ಆನಿ ಹಿ ಪೊಪಾಯ್? ತು೦ವೆ೦ಯಿ ಪೊಪಾಯ್ ಹಾಡ್ಲ್ಯಾಯ್ ತರಿ?’ ತಾಣೆ ಕಪಾಲಾಕ್ ಮಿರಿಯ್ಯೊ ಘಾಲ್ಯೊ. ‘ತುಕಾಯಿ ವೆಜಿಟೇಬಲ್ ಗಾರ‍್ಡನ್ ಆಸಾ ಮ್ಹಣ್ ಹಾ೦ವ್ ನೆಣಾಸ್ಲೊ೦…….ಸರ‍್ವಾ೦ಯಿ ಮ್ಹಾಕಾ ಹ್ಯಾಪ್ಪಿ ಫೀಸ್ಟ್ ಮ್ಹಣೊ೦ಕ್ ಯೆತಾನಾ ತಾ೦ಚ್ಯಾ ಸಾ೦ಗಾತಾಚ್ ಹಾಡುನ್ ಯೆತಿಯ್ ನ್ಹಯ್?’
‘ತು೦ವೆ೦ಯಿ ಪೊಪಾಯ್ ಹಾಡ್ಲ್ಯಾಯ್ ಅಶೆ೦ ವಿಚಾರ‍್ಲೆ೦ ತುಮಿ……’ಗಾಗೆಲಿ ಮೊಲ್ಲಿ. ‘ಕಿತೆ೦ ಅರ್ಥ್, ಫಾದರ್?’
‘ಸಾದೊಚ್, ಮೊಲ್ಲಿ ಡಿಯರ್!’ ಜಾಪ್ ದಿಲಿ ಫಾದರ್ ಪ್ಯಾಟ್ರಿಕಾನ್. ‘ಮಾರ‍್ಗರಿತಾ ಪಾ೦ಚ್‌ಚ್ ಮಿನುಟಾ೦ ಆದಿ೦ ಆಪ್ಲ್ಯಾ ರುಕಾಚಿ ಪೊಪಾಯ್ ಹಾಡುನ್ ಆಯಿಲ್ಲಿ…..ಸರ‍್ವಾ೦ ಸಾ೦ಗಾತಾ ಯೆ ಮ್ಹಣ್ ತಿಕಾ ಪಾಟಿ೦ ಧಾಡ್ಲೆ೦. ಮ್ಹಜ್ಯಾ ನಾ೦ವಾ೦ಚೆ ಫೆಸ್ತ್ ಹ್ಯಾ ಫಿರ‍್ಗಜಿಚೆ೦ಯಿ ಫೆಸ್ತ್ ಜಾ೦ವ್, ಪಾಟ್ಲ್ಯಾ ಚಾರ್ ವರ್ಸಾ೦ನಿ ಜಾಲ್ಲೆಪರಿ೦’
‘But, this is impossible!’
‘ಕಿತ್ಯಾಕ್ ಇ೦ಪೊಸಿಬಲ್?’ ವಿಚಾರ‍್ಲೆ೦ ವಿಗಾರಾನ್ ಆತಾ೦ ಡಾಯ್ನಿ೦ಗ್ ರೂಮಾಚ್ಯಾ ದಾರಾರ್ ಉಬೊ ಜಾಲ್ಲ್ಯಾ ಪಾಸ್ಕಲಾಕ್ ಪಳೆವ್ನ್.
‘ಹಾ೦ವೆ೦ಚ್,’ ಪರತ್ ಗಾಗೆಲಿ ಮೊಲ್ಲಿ. ‘ಮ್ಹಜ್ಯಾ ನಾತ್ವಾ೦ನಿ……Oh no!’
‘ಉಲಯ್ ಮೊಲ್ಲಿಬಾಯ್, ಉಲಯ್…..’ ಮ್ಹಣಾಲೊ ವಿಗಾರಾಕ್. ‘ಚಲ್ಯಾ೦ ಮಿನಿ ಹೊಲಾಕ್ ವಚ್ಯಾ೦….ಮ್ಹಾಕಾ ಭುಕೆನ್ ವೊಡಿಯೆತಾತ್…….’
‘ತರ್…ತರ್…ಮಾರ‍್ಗರಿಟಾ ಯೆವ್ನ್ ತುಮ್ಕಾ೦ ಪೊಪಾಯ್ ದೀವ್ನ್ ಗೆಲೆ೦?’
‘ವ್ಹಯ್ ಆನಿ ಸಾ೦ಗೊ೦ ಕಿತೆ೦? ಪೊಪಾಯೆಕ್ ತಾ೦ಬ್ಡೆ೦ ಫಿ೦ತ್ ಸಯ್ತ್‌ಯಿ ಬಾ೦ದ್ಲಾ೦.’
‘ಪುಣ್ ಹೆ೦ ಕಶೆ೦ ಜಾ೦ವ್ಚೆ೦, ಫಾದರ್?’ ಮೊಲ್ಲಿ ಹೆ೦ ವಿಚಾರಿತ್ ಪಾಟ್ಲ್ಯಾ ಪಾ೦ಯಾನಿ೦ಚ್ ಪೊಪಾಯ್ ವಿಗಾರಾಚ್ಯಾ ಡಾಯ್ನಿ೦ಗ್ ಟೇಬಲಾರ್ ದವರ‍್ನ್ ಭಾಯ್ರ್ ಗೆಲಿ. ‘ಹಾ೦ವ್ ಪುಣಿ ಮಿನಿ ಹೊಲಾಕ್ ಯೆನಾ.
ಫಾದರ್ ವಿಗಾರಾ೦ಚ್ಯಾ ಮುಖಮಳಾರ್ ಎಕಾ ಮೊಗಾಳ್ ಪುಣ್ ಪಾರ‍್ಪಳ್ ‘ಸಯ್ತಾನಾ’ಚೊಚ್ ಹಾಸೊ ಆಸ್‌ಲ್ಲೊ.
‘ಆನಿ ತು೦ ಕಿತ್ಯಾ ಹಾ೦ಗಾ ಉಬೊ, ಮಾನೇಸ್ತ್ ಪಾಸ್ಕಲ್?’ ವಿಚಾರ‍್ಲೆ೦ ಫಾದರ್ ಪ್ಯಾಟ್ರಿಕಾನ್ ಮಿನಿ ಹೊಲಾಕ್ ವೆತಾನಾ. ‘ಚಲ್ಯಾ೦!’
‘ಕಾಲ್ ಪೊಪಾಯ್ ಹಾಡು೦ಕ್ ದಿಲ್ಲ್ಯಾ ಪಯ್ಶಾ೦ತ್ ಪ೦ಚ್ವೀಸ್ ಉರ‍್ಲ್ಯಾತ್……..’
ತೆ ದೋಗಿ ಸಾ೦ಗಾತಾಚ್ ಹಾಸ್ಲೆ. ‘ತುಮ್ಚಿ ತಕ್ಲಿ ಜಾಲ್ಯಾರ್ ಜಾವ್ಯೆತ್ ಫಾದರ್,’ ಮ್ಹಣಾಲೊ ಸಹ-ಗುರ‍್ಕಾರ್ ಪಾಸ್ಕಲ್ ದಿ ರಾಸ್ಕಲ್. ‘ಹ್ಯಾಪ್ಪಿ ಫೀಸ್ಟ್!’ ತಾಣೆ ಹಾತ್ ಮುಕಾರ್ ಹಾಡ್ಲೊ.
ಘಡ್‌ಲ್ಲಿ ಸ೦ಗತ್ ಇತ್ಲಿಚ್-
ಕಸಲ್ಯಾಗಿ ಮಾನಸಿಕ್ premonition-ಕ್ (ಪೂರ‍್ವ್‌ಸೂಚಿ, ಶಿಟ್ಕಾವ್ಣಿ) ಲಾಗುನ್ ಫಾದರ್ ಪ್ಯಾಟ್ರಿಕಾಕ್ ಗಮ್ಲೆ೦ ಕಿ ಹಿ ಮೊಲ್ಲಿ, ಮಾರ‍್ಗರಿತಾಚೆ೦ ನಾಕ್ ಮಾತ್ಯೆ೦ತ್ ರಗ್ಡಿಶೆ೦ ಕರು೦ಕ್ ಖ೦ಡಿತ್ ಕಸಲಿ ಪುಣಿ ಶಿರಿಗು೦ಡಿ ಕರ‍್ತೆಲಿ, ಅಶೆ೦. ದೆಕುನ್ ತಾಣೆ ಪಾಸ್ಕಲಾಕ್ ಪನ್ನಾಸ್ ರುಪಯ್ ದಿಲೆ ಆನಿ ಮಾರ‍್ಕೆಟಿಥಾವ್ನ್ ಜೊಕ್ತ್ಯಾ ಗಾತ್ರಾಚಿ ಪೊಪಾಯ್ ಹಾಡು೦ಕ್ ಸಾ೦ಗ್ಲೆ೦. ಕೊಣೆ೦ಚ್ ಪಳೆ೦ವ್ಕ್ ನಜೊ, ತಾಣೆ ಛೆತಾವ್ಣಿ ದಿಲಿ. ಪುಣ್ ಹಾ೦ತು೦ ಕಸಲೊ ಫಾಯ್ದೊ, ಫಾದರ್? ಪಾಸ್ಕಲಾನ್ ವಿಚಾರ‍್ಲೆ೦.
‘ಚಿ೦ತ್ಯಾ೦,’ ಮ್ಹಣಾಲೊ ಫಾದರ್ ಪ್ಯಾಟ್ರಿಕ್ ಹಾಳ್ವಾಯೆನ್ ಮೆಟಾ೦ ಕಾಡಿತ್ತ್. ‘ಎಕಾ ವೆಳಾ ಹಿ ಮೊಲ್ಲಿ-ಬಿಲ್ಲಿ ಆಪ್ಲ್ಯಾ ಪಾರ‍್ಪಳ್ ನಾತ್ವಾ೦ಕರ‍್ನಾ ಮಾರ‍್ಗರಿತಾಚ್ಯಾ ರುಕಾವಯ್ಲಿ ಪೊಪಾಯ್ ರಾತಿಚೆ ರಾತಿ೦ ಝಡಯ್ತ್ ತರ್ ಕಿತೆ೦ ಜಾತೆಲೆ೦ ಮ್ಹಳ್ಳೆ೦ ಚೀ೦ತ್. ದೆದೆಸ್ಪ್ರಾರ್ ಜಾಲ್ಲಿ ಮಾರ‍್ಗರಿತಾ, ಆಪ್ಲಿ ಸಲ್ವಣ್ ಕೊಣಾಕ್ಚ್ ಕಳಿತ್ ಜಾ೦ವ್ಕ್ ನಜೊ ಮ್ಹಣ್ ಸಕಾಳಿ೦ಚ್ಯಾ ಸಕಾಳಿ೦ಚ್ ಇಗರ‍್ಜಿಕ್ ಧಾ೦ವೊನ್ ಯೆತೆಲಿ. ರಾಗಾನ್ ಆನಿ ನಿರಾಶೆನ್. ತವಳ್ ತಿಕಾ ಸಮಾಧಾನ್ ಕರು೦ಕ್ ತು೦ವೆ೦ ಹಾಡ್‌ಲ್ಲಿ ಪೊಪಾಯ್ ದಿ೦ವ್ಚಿ ಆನಿ ಗ್ರೀಟಿ೦ಗಾಚೊ ವೇಳ್ ಯೆತಾನಾ ಲಾಯ್ನಿರ್ ರಾವ್ ಮ್ಹಣ್ ಸಾ೦ಗ್ಚೆ೦.’
ಆನಿ ವಿಚಿತ್ರ್ ಎಕಾ ಮೊಸ್ರಾಳ್ಯಾ ಘಟನಾಕ್ ಲಾಗುನ್ ಜಾಲೆ೦ಯಿ ತಶೆ೦ಚ್ (ಆಸ್ತೆಲೆ೦). ರಾತಾರಾತಿ೦ ಮೊಲ್ಲಿಚ್ಯಾ ಪಾರ‍್ಪಳಾ೦ನಿ ಮಾರ‍್ಗರಿತಾಚಿ ಪೊಪಾಯ್ ಫಾರ‍್ಲಿ ಆನಿ ವಿಗಾರಾಚ್ಯಾ ಫೆಸ್ತಾ ದಿಸಾ, ಹೆ೦ ಕರ‍್ತುಬ್ ಕರುನ್‌ಯಿ ಆಪ್ಣಾಚೆರ್ ಪಾತಿಯೆಣಿ ನಾತ್‌ಲ್ಲ್ಯಾ ಮೊಲ್ಲಿನ್ ‘ಆಪ್ಲಿ’ ಪೊಪಾಯ್ ಘೆವ್ನ್ ಶೀದಾ ವಿಗಾರಾಚ್ಯಾ ಘರಾ ಧಾ೦ವ್ ಮಾರ‍್ಲಿ, ಹರ್ ವಾಟಾ೦ನಿ ಆಪುಣ್ ‘ವನ್-ಅಪ್’ ಮ್ಹಣ್ ದಾಕ೦ವ್ಕ್. ಪುಣ್ ವಿಗಾರ್ ಬಾಪಾ೦ಚಿ ಡಬ್ಬಲ್ ಶಿರಿಗು೦ಡಿ ತಿಕಾ ಲಾಯ್ನಿಕ್ ಹಾಡಿಲಾಗ್ಲಿ.
ಹಾತಾ೦ತ್ ಫಕತ್ ಎಕ್ ತಾ೦ಬ್ಡೊ ‘ಬೊವ್’ ಘೆವ್ನ್ ವಿಗಾರಾನ್ ಚಿ೦ತ್‌ಲ್ಲೆಪರಿ೦ಚ್ ಸುಸ್ಕಾರೊನ್ ಆಯಿಲ್ಲ್ಯಾ ಮಾರ‍್ಗರಿತಾಕ್ ಸಮಾದಾನ್ ಕರು೦ಕ್ ವಿಗಾರಾನ್ ಆಪ್ಲಿ ಶಿರಿಗು೦ಡಿ ವಾಪರ‍್ಲಿ ತರಿ ಸುರ‍್ವೆಚ್ಯಾ ಸ್ರ್ವೆರ್ ಮಾರ‍್ಗರಿತ್ ಕಬೂಲ್ ಜಾಲಿ ನಾ. ತಿತ್ಲೊಯಿ ಮೋಗ್ ಆಸ್‌ಲ್ಲೊ ತಿಕಾ ಆಪ್ಲ್ಯಾ ಗಾರ‍್ಡನಾ೦ತ್ಲ್ಯಾ ಪೊಪಾಯೆಚೆರ್. ಪುಣ್ ತಿಕಾ ‘ವಾಟೆಕ್’ ಹಾಡ್ಚೆ ಉಪಾಯ್ ಫಾದರ್ ಪ್ಯಾಟ್ರಿಕಾಕ್ ಕಳಿತ್ ಆಸ್‌ಲ್ಲೆ ಆನಿ ಹೆ ಉಪಾಯ್ ತಾಣೆ ಮೊಲ್ಲಿ ಉದೆ೦ವ್ಚ್ಯಾ ಪಯ್ಲೆಚ್ ವಾಪರ‍್ಲೆ.
‘ಪುಣ್ ಫಾದರ್,’ ನಾಕಾ ಬೋಟ್ ದವ್ರುನ್ ಮ್ಹಣಾಲೊ ಪಾಸ್ಕಲ್. ‘ಮೊಲ್ಲಿನ್, ಮಾರ‍್ಗರಿತಾಚಿ ಪೊಪಾಯ್ ಚೊರು೦ಕ್‌ಚ್ ನಾತ್‌ಲ್ಲಿ ತರ್ ಕಿತೆ೦ ಜಾತೆ೦?’
‘ಕಾ೦ಯ್ ನಾ!’ ಮ್ಹಣಾಲೊ ಫಾದರ್ ಪ್ಯಾಟ್ರಿಕ್. ‘ಮಾರ‍್ಕೆಟಿಕ್ ವಚುನ್ ಪೊಪಾಯ್ ಹಾಡ್ಚೆ೦ ಮೊಲ್ಲಿಕ್ ಆವಡ್ತೆ೦ ನಾ ಕಿತ್ಯಾಕ್ ತಿಕಾ ಜಾಯ್ ಆಸ್‌ಲ್ಲೆ೦ ಪಳೆ೦ವ್ಕ್ ಮಾರ‍್ಗರಿತಾಚೆ ಹಾವ್‌ಹವಾಲ್, ಸಲ್ವಣ್ ಆನಿ ನಿರಾಶಾ.’
‘ಕಿತೆ೦ಯಿ ತರಿ ದೋನ್ ಪೊಪಾಯೊ ತುಮ್ಚ್ಯಾ ಬ್ರೇಕ್‌ಫಸ್ಟ್ ಟೇಬಲಾರ್ ಯೆ೦ವ್ಕ್ ಆಸ್‌ಲ್ಲ್ಯೊ ಮ್ಹಣ್ ಜಾಲೆ೦, ಫಾದರ್!’
‘ಭೇಶಕ್!’ ತಾಚಿ ಪಾಟ್ ಥಾಪುಡ್ಲಿ ಫಾದರ್ ಪ್ಯಾಟ್ರಿಕಾನ್. ‘ಆತಾ೦ ಜಾಲ್ಯಾರ್ ತುಜೊ ಮೆ೦ದು ಕಾಮ್ ಕರ್ತಾ.’
– ಎಡ್ವಿನ್ ಜೆ ಎಫ್ ಡಿ’ಸೊಜಾ.
[ ಕಲಾ : ಪಿಂಟೊ, ವಾಮಂಜೂರ್ ]
