“ತೊ ಕಸಲೊ ಈಶ್ಟ್‌ಯಾ ತುಜೊ? ತುಜೊ ನಾಕಾ ಜಾಲ್ಲೊ ವೀಡಿಯೊ ಫೇಸ್‌ಬುಕಾರ್ ಘಾಲುನ್ ಆಮ್ಚ್ಯಾ ಕುಟ್ಮಾಚಿ ಮರ್ಯಾದ್ ಕಾಡ್ನ್ ಗೆಲೊ?”
ಭಯ್ಣಿನ್ ತಾಳೊ ಉಭಾರ್ನ್ ಜೀವನಾಕ್ ಆಪವ್ನ್ ಸರ್ಸರಿತ್ ಪುರ್ಪುರೊಂಕ್ ಧರ್ಲೆಂ.
“ಕೊಣ್ ತೊ? ಬೊಂಬೊಯ್ ಥಾವ್ನ್ ಕಾರಾರ್ ಯೆತಾ ಖಂಯ್, ತವಳ್ ತವಳ್ ಯೆವುನ್ ಗೇಟಿಸಮೊರ್ ಕಾರ್ ರಾವವ್ನ್ ತುಜೆಲಾಗಿಂ ಪುಸುರ್ ಪುಸುರ್ ಉಲವ್ನ್ ವೆತಾ ಆನಿ ತುಜಿ ತಸ್ವೀರ್, ವೀಡಿಯೊ ಕಾಡುನ್ ಫೇಸ್‌ಬುಕಾಚೆರ್ ಘಾಲುನ್ ನಾಂವ್ ಜೊಡ್ತಾ ಆನಿ ಆಮ್ಚಿ ಮರ್ಯಾದ್ ವಾಟೆರ್ ಘಾಲುನ್ ವೆತಾ”
ಜೀವನಾಚ್ಯಾ ಜಿಬೆರ್ ಉತ್ರಾಂ ನಾತ್ಲಿಂ.
ಪಯ್ಲಿಚ್ ಭಾಗ್‌ಲ್ಲಿ ನಿತ್ರಾಣಿ ಕುಡ್, ಆತಾಂ ಉತರ್ ಪ್ರಾಯೆಚ್ಯಾ ಹುಂಬ್ರಾರ್ ದೊಳ್ಯಾಂನಿ ಕಾಳ್ಬಾಣ್ ಪಡ್ಚಿ, ಲೋ ಬಿಪಿ, ಅಸ್ಕತ್ಕಾಯ್ ಭಗ್ಚಿ ಪುಣ್ ತಾಚ್ಯಾಕೀ ವ್ಹಡ್ಲ್ಯಾ ಎಕ್ಸುರ್ಪಣಾಚ್ಯಾ ಪಿಡೆಂತ್ ಜೀವನ್ ದೆದೆಸ್ಪೊರ್ ಜಾಲ್ಲೊ. ಪೆಂಟೆಚ್ಯಾ ರಸ್ತ್ಯಾ ದೆಗೆಲ್ಯಾ ತ್ಯಾ ಪರ್ನ್ಯಾ ಘರಾಂತ್ ಅಜೂನ್ ಎಕ್ಲೊಚ್ ವಸ್ತಿ ಕರುನ್ ಆಸ್ಲೊ. ತಾಚ್ಯಾ ಘರ್ಚ್ಯಾ ಬಗ್ಲೆನ್ ಜೀವನಾಚ್ಯಾ ಎಕ್ಲ್ಯಾಚ್ ಭಯ್ಣಿಚೊ ಬಂಗ್ಲೊ ಉಭೊ ಆಸ್ಲೊ ಆನಿ ತ್ಯಾ ಬಂಗ್ಲ್ಯಾಚಿ ಸಾವ್ಳಿ ಸಯ್ತ್ ತ್ಯಾ ಪರ್ನ್ಯಾ ಘರಾಚೆರ್ ಪಡ್ಚಿ ಮ್ಹಳ್ಯಾರ್ ಎಕಾರಿತಿಚಿ ಕುಮೊಕ್‍ಚ್ ಮ್ಹಣುನ್ ಕಾಳ್ಜಾಮನಾಂತ್ ಪಾತ್ಯೆವ್ನ್ ಆಯಿಲ್ಲಿ ಭಯ್ಣ್.
“ತುಂ ಏಕ್ ಖಂಚ್ಯಾ ಕರ್ಮಾಕ್ ಜಲ್ಮಲ್ಲೊಯ್ ಕೊಣ್ಣಾ, ತುಜೊ ಭಾವ್ ಪಳೆ, ಬರೆಂ ಶಿಕೊನ್ ಬರೆಂ ಕಾಮ್ ಕರ್ತಾ ಆನಿ ತುಂ ಎಕ್ಲೊ ಕಾಣಿ ಕಾಣಿ ಮ್ಹಣೊನ್ ತುಜಿ ಜಿಣಿಂಚ್ ವಾಟೆರ್ ಘಲ್ತಾಯ್. ಆತಾಂ ಆವಯ್-ಬಾಪಾಯ್ಚ್ಯಾ ಗುಸ್ತ್ಯಾರ್ ತರ್ನಾಟ್ಪಣ್ ಆಸ್ತಾಸರ್ ಮರ್ಜೆನ್ ಜಿಯೆತಲೊಯ್, ಫಾಲ್ಯಾಂ ತುವೆಂ ಕಾಣಿ ಬರಯಿಲ್ಲಿ ಪರ್ಗಟ್ ಕೆಲ್ಲಿಂ, ವಾಚ್‌ಲ್ಲಿಂಚ್ ತುಜಿಂ ಖೆಳ್ಕುಳಾಂ ಕರ್ತಲಿಂ” ಜೀವ್ ಆಸ್ತಾನಾ ಅಕ್ಲಾಸಾನ್ ಉಚಾರ್‌ಲ್ಲಿಂ ಉತ್ರಾಂ ಬಾಪಾಯ್ಚಿಂ ಉತ್ರಾಂ ಅಜೂನ್ ಜೀವನಾಚ್ಯಾ ಯಾದಿಂತ್ ಆಸ್ಲಿಂ.
╬ ╬ ╬
ಅಶೆಂ ಮ್ಹಣುನ್ ಜೀವನ್ ಬೆಪರ್ವಾ ಕರುನ್ ಜಿಯೆಲ್ಲೊ ನ್ಹಯ್. ಚಡ್ತಿಕ್ ಶಿಕಪ್ ಜೊಡುಂಕ್ ಸಕ್ಲೊ ನಾ ಪುಣ್ ಅಪ್ಲೆಂ ಸಾಹಿತಿಕ್ ದೆಣೆಂ ವಾಪಾರ್ನ್ ವೆವೆಗಳ್ಯಾ ಪತ್ರಾಂನಿ ಕಾಣಿಯೊ ಬರವ್ನ್ ಫಾಮಾದ್ ಜಾಲೊ. ಪುಣ್ ಕಾಣಿಯೊ ಬರಯಿಲ್ಲ್ಯೊ ತಪ್ಪಾಲಾಚೆರ್ ಧಾಡುಂಕ್ ಸಯ್ತ್ ದುಡು ಅಪ್ಲ್ಯಾ ಬೊಲ್ಸಾಂತ್ಲೊ ಘಾಲುಂಕ್ ಪಡ್ತಾಲೆಂ ಮ್ಹಳ್ಳೆಂ ಅಡ್ಹೂಕ್ ಸತ್ ಜಾಯ್ತ್ಯಾಂಕ್ ಕಳಿತ್ ಆಸ್ಚೆಂ ನಾ. ತಾಂತುಂಯ್ ತ್ಯಾ ಕಳೊ ಸಂಪಾದಕಾನ್ ಹಾಕಾ ಪುರ್ತೊ ಲುಟ್ಲೊ. ಎಕಾ ವಾಟೆನ್ ತುಜಿ ‘ಕಾಣಿ ಫಾಯ್ಸ್ ಕರ್ತಾಂ ಪುಣ್ ಇಲ್ಲ್ಯೊ ವರ್ಗಣ್ಯೊ ಹಾಡ್’ ಅಶೆಂ ಮ್ಹಣುನ್ ಪಯ್ಲೆಂ ಫಿರ್ಗಜೆಂತ್, ಉಪ್ರಾಂತ್ ಶೆಜಾರಿ ಫಿರ್ಗಜೆಂತ್, ವಾರಾಡೊ, ಶೆಜಾರಿ ವಾರಾಡೊ ಮ್ಹಣುನ್ ಶೆಂಬೊರ್, ದೊನ್ಶಿಂ ವರ್ಗಣ್ಯೊ ಹಾಡಂವ್ಕ್ ಸುರು ಕೆಲೆಂ. ಎಕಾ ವಾಟೆನ್ ಕಾಮ್ ನಾ, ಉತ್ಪತ್ ನಾ ತರ್ ಅನ್ಯೇಕಾ ವಾಟೆನ್ ವರ್ಗಣಿ ಜಮಯಿಲ್ಲ್ಯಾಚೆರ್ ಧಾ ಠಕ್ಕೊ ಕಮಿಶನ್ ಮೆಳ್ತಾ ಮ್ಹಳ್ಳ್ಯಾ ಧಯ್ರಾನ್ ಜೀವನಾನ್ ಗಾಂವಾರ್ ಗಾಂವ್ ಭಂವುನ್ ಪತ್ರಾಚೊ ಪ್ರಚಾರ್ ಕರುನ್ ವರ್ಗಣ್ಯೊ ಎಕ್ಟಾಂಯ್ ಕೆಲ್ಯೊ.
ದೀಸ್ ಗೆಲ್ಲೆಪರಿಂಚ್ ಮಾರ್ಗಾಯ್ ಚಡುನ್ ಯೆತಾಲಿ. ಜೀವನಾಚಿ ಆವಯ್ ಸರ್ಕಾರಿ ಆಸ್ಪತ್ರೆಂತ್ ನರ್ಸ್ ಜಾವ್ನ್ ಸೆವಾ ದಿತಾಲಿ ರಿಟಾಯರ್ಡ್ ಜಾಲಿ. ಆನಿ ತಿಕಾ ಮೆಳ್ಚ್ಯಾ ಮಯ್ನ್ಯಾಚ್ಯಾ ಪೆನ್ಶನಾಂತ್ ದೊಗಾಂಚೆಂ ಜಿವಿತ್ ಸಾರ್ತಾಲೆಂ. ಅಪ್ಲೊ ಪೂತ್ ಅಜೂನ್ ಅಂಕ್ವಾರ್ ಉರ್ಲಾ ಮ್ಹಳ್ಳಿ ಖಂತ್ ಎಕಾ ವಾಟೆನ್, ಅಪುಣ್ ಮೆಲ್ಲ್ಯಾ ಉಪ್ರಾಂತ್ ಪುತಾಚಿ ಜತನ್ ಕರ್ತಲಿಂ ಕೊಣ್ ಮ್ಹಳ್ಳಿ ಖಂತ್ ದುಸ್ರ್ಯೆ ವಾಟೆನ್ ತಿಕಾ ಧೊಸ್ತಾಲಿ. ಪುಣ್ ಏಕ್ ಆವಯ್ಕ್ ಅಪ್ಲೆಂ ಭುರ್ಗೆಂ ಕೆದ್ನಾಂಯ್ ಜಡ್ ವ ಚಡ್ ಜಾಯ್ನಾ ದೆಕುನ್ ತಿ ಹ್ಯಾಚ್ ಪರ್ನ್ಯಾ ಘರಾಂತ್ ಕಸ್ಟಾನ್ ಜಿಯೆಲಿ.
╬ ╬ ╬
ಹಾಂವ್ ಆನಿ ಜೀವನ್ ಚಡುಣೆ ಎಕಾಚ್ ಪ್ರಾಯೆಚೆ. ಧಾವೆಚ್ಯಾ ಕ್ಲಾಶೆಚ್ಯಾ ಶಿಕ್ಪಾವೆಳಾರ್ ಸಯ್ತ್ ಸೊಭಿತ್ ಅಕ್ಷರಾಂನಿ ಕಾಣಿಯೊ ಬರವ್ನ್ ತ್ಯೊ ವಾಚುಂಕ್ ಮ್ಹಜೆಲಾಗಿಂ ಹಾಡ್ನ್ ಯೆಂವ್ಚ್ಯಾ ಜೀವನಾಚೆರ್ ಮ್ಹಾಕಾ ಕಸ್ಲೊಗೀ ಅಭಿಮಾನ್. ತ್ಯೇ ಉಪ್ರಾಂತ್ ಹಾಂವ್ ಪರ್ಗಾಂವಾಕ್ ಪಾವ್ಲೊಂ. ಜೀವನಾಚೆಂ ವೆಕ್ತಿತ್ವ್ ವೆಗ್ಳೆಂ; ಎಕಾ ರಿತಿಚಿ ದಾಕ್ಶೆಣ್, ಕಾವ್ಜೆಣ್ ಆನಿ ಹೆರಾಂಸವೆಂ ಸಲೀಸಾಯೆನ್ ಭರ್ಸುಂಚೆಂ ವೆಕ್ತಿತ್ವ್ ನ್ಹಯ್. ದೆಕುನ್ ತಾಕಾ ಚಡ್ತಾವಾಂನಿ ‘ಪಿಸೊ’ ಮ್ಹಣುನ್ ತುಕ್ಲಾಂವ್ಚೆಂ ಆಸ್ಲೆಂ. ಜೀವನಾ ಪರಿಂಚ್ ಹೆರ್ ಥೊಡೆ ಜೊವಿನ್, ಪೀಟರ್ ಸಯ್ತ್ ಕಾಣಿಯೊ ಬರಯ್ತಾಲೆ.
ಹಾಂವ್ ಪರ್ಗಾಂವಾಂತ್ಲೊ ಕೆದ್ನಾಂಯ್ ಮಾಂಯ್‌ಗಾಂವಾಕ್ ಪಾವ್‌ಲ್ಲ್ಯೆವೆಳಾರ್, ಸಾಂಗಾತಿ ಬರರ್ಣಾರಾಂಕ್ ಮೆಳ್ಚಿ ಏಕ್ ಪಿಶಿ ಸವಯ್ ಕೆಲ್ಲಿ. ಪ್ರತ್ಯೇಕ್ ಜಾವ್ನ್ ಕಸ್ಟಾಂತ್ ಆಸ್‌ಲ್ಲ್ಯಾಂಕ್. ಆಜ್‌ಕಾಲ್ ದುಡು, ಆಸ್ತ್-ಬದಿಕ್ ಸಗ್ಳ್ಯಾಂಲಾಗಿಂ ಆಸಾ, ಪುಣ್ ಕಿತೆಂಯ್ ನಾ ತರ್ ತೊ ಜಾವ್ನಾಸಾ ವೇಳ್. ದೆಕುನ್ ಹ್ಯಾ ಎಕೆಕಾ ಬರವ್ಪ್ಯಾಂಕ್ ಸೊಧುನ್ ವೆಚೆಂ, ತಾಂಚೆಲಾಗಿಂ ಥೊಡೊ ವೇಳ್ ರಾಂವ್ಚೆಂ, ತಾಂಚೆಂ ಸುಕ್-ದುಕ್ ಆಯ್ಕುಂಚೆಂ ಏಕ್ ವಿಶೇಸ್ ರಿತಿಚೆಂ ಸಮಧಾನ್, ಜ್ಯೆಂ ಕಾಣಿ ಬರವ್ನ್ ಮೆಳಾನಾತ್ಲೆಂ ಸಮಧಾನ್.
ಪುಣ್ ಜೀವನಾಚೊ ಸಂಪರ್ಕ್ ವಿಚಾರುನ್ ಹಾಂವೆಂ ಲೆನಿನಾಕ್ ಫೋನ್ ಕೆಲ್ಲೊ, ಪುಣ್ ಲೆನಿನಾಚಿ ಜಾಪ್ ಫಕತ್ ಹಿ “ತುಕಾ ನಾಕಾಯಾ ತ್ಯಾ ಜೀವನಾಚಿ ಸಳಾವಳ್, ತೊ ಪಿಸೊ ಜಾಲಾ”. ಹೆಂಚ್ ಪ್ರೇತನ್ ಹಾಂವೆಂ ಪೀಟರಾಕ್ ಫೊನಾರ್ ಕಳಯ್ತಾನಾ ಪೀಟರಾನ್ ಸಯ್ತ್ ತೆಂಚ್ ಮ್ಹಳೆಂ “ಅಳೆಯಾ ತುಂ ತಾಚೆಲಾಗಿಂ ವಚಾನಾಕಾ”. ಮ್ಹಾಕಾ ಜೊವಿನಾಚ್ಯಾ ವಾ ಪೀಟರಾಚ್ಯಾ ಉತ್ರಾಂನಿ ಶಿಣ್ ನಾತ್ಲೊ, ಪುಣ್ ಎಕಾರಿತಿಚೆಂ ಅಪ್ರಾದಿ ಚಿಂತಪ್ ಮ್ಹಜ್ಯಾ ಮತಿಂತ್ ಉದೆಲ್ಲೆಂ. “ಹಾಂವ್‌ಯೀ ಹೆರಾಂಪರಿಂ ಚಿಂತುನ್ ಎಕಾ ಗರ್ಜೆವಂತಾಚ್ಯಾ ಕುಮ್ಕೆಕ್ ಗೆಲೊಂ ನಾ ತರ್ ತಾಂಚೆ ಆನಿ ಮ್ಹಜ್ಯೆ ಮಧೆಂ ಕಸ್ಲೊ ತಫಾವತ್?” ದೆಕುನ್ ಏಕ್ ಪಾವ್ಟಿಂ ಬೊಂಬೊಯ್ ಥಾವ್ನ್ ಗಾಂವಾಕ್ ಆಯಿಲ್ಲೆವೆಳಾರ್ ಕಾರ್ ಘೆವ್ನ್ ಆಯಿಲ್ಲೊಂ. ಕಿತ್ಯಾಕ್ ಮ್ಹಳ್ಯಾರ್ ಕಾರಾಚ್ಯಾ ಡಿಕ್ಕಿಂತ್ ಸಭಾರ್ ಕೊಂಕಣಿ ಬೂಕ್ ಆಸ್ಲೆ, ಆನಿ ತೆ ಥೊಡ್ಯಾ ಗರ್ಜೆವಂತಾಂಕ್ ವಾ ವಾಚ್ಪ್ಯಾಂಕ್ ಪಾವಿತ್ ಕರುಂಕ್ ಆಸ್ಲೆ. ಜೀವನಾಚೆಂ ಘರ್ ಮ್ಹಾಕಾ ಕಳಿತ್ ಆಸ್ಲೆಂ ಜಾಲ್ಲ್ಯಾನ್ ಎಕಾ ಸಾಂಜೆಶೆಂ ಜೀವನಾಚ್ಯಾ ಘರ್ಚ್ಯಾ ಗೇಟಿಭಾಯ್ರ್ ಮ್ಹಜೆಂ ಕಾರ್ ರಾವವ್ನ್ ಗೆಟಿಲಾಗಿಂ ಉಭೊ ರಾವುನ್ ’ಜೀವನ್… ಜೀವನ್’ ಮ್ಹಣುನ್ ಉಲೊ ಕೆಲೆಂ.
ಥೊಡ್ಯಾಚ್ ವೆಳಾನ್ ಘರಾಭಿತರ್ ಕಾಮ್ ಕರ್ನ್ ಆಸ್ಲೊ ಜೀವನ್ ಉಗ್ತ್ಯಾ ಆಂಗಾರ್ ಭಾಯ್ರ್ ಯೇವ್ನ್ ದಾರ್ ಉಘಡ್ನ್ ಆಯ್ಲೊ ಆನಿ ಮ್ಹಾಕಾ ವಿಚಾರಿಲಾಗ್ಲೊ “ಕಿತೆಂ? ಕಿತ್ಯಾಕ್ ಆಯ್ಲೊಯ್?”
ಹಾಂವ್ ಏಕ್ ಘಡಿ ಮೊನೊ ಜಾಲೊಂ. ಕಾಂಯ್ ತೆಂಪಾ ಥಾವ್ನ್ ಆಮಿ ಮೆಳುಂಕ್ ನಾಂವ್, ಭೊವ್ಶಾ ಮ್ಹಾಕಾ ವ್ಹಳ್ಕೊಂಕ್ ನಾ ಕೊಣ್ಣಾ ಮ್ಹಳ್ಳ್ಯಾ ಚಿಂತ್ಪಾನ್ ಹಾಂವೆಂ ತಾಕಾ ವಿಚಾರ್ಲೆಂ “ತುಕಾ ವ್ಹಳೊಕ್ ಜಾಲಿ?”
“ವ್ಹಯ್, ಪುಣ್ ಕಿತ್ಯಾಕ್ ಆಯ್ಲೊಯ್?” ಪರತ್ ತೆಚ್ ತಾಳ್ಯಾನ್ ಜೀವನಾನ್ ಸವಾಲ್ ಕೆಲೆಂ.
ಹಾಂವೆಂ ಸಮಧಾನೆನ್ ಜಾಪ್ ದಿಲಿ “ಹಾಂವ್ ಹ್ಯಾಚ್ ವಾಟೆಂತ್ಲ್ಯಾನ್ ಪಾಶಾರ್ ಜಾತಾಲೊಂ, ತುಜೊ ಉಡಾಸ್ ಆಯ್ಲೊ ದೆಕುನ್ ತುಕಾ ಮೆಳ್ಯಾಂ ಆನಿ ಹೆ ಮ್ಹಜೆ ಆಯ್ಲೆವಾರ್‌ಚೆ ಥೊಡೆ ಬೂಕ್ ದಿವ್ಯಾಂ ಮ್ಹಣುನ್ ಆಯ್ಲೊಂ” ಅಶೆಂ ಮ್ಹಣುನ್ ಬಂದ್ ಗೆಟಿಭಾಯ್ಲ್ಯಾನ್ ಗೆಟಿಭಿತರ್ ಆಸ್ಚ್ಯಾ ಜೀವನಾಚ್ಯಾ ಹಾತಿಂ ತೆ ಬೂಕ್ ದಿಲೆ ಆನಿ ತಾಣೆಂ ತೆ ಘೆತ್ಲೆ. ಪುಣ್ ಹೆರ್ ಕಿತೆಂಚ್ ಉಲವ್ಣೆಂ ಜಾಲೆಂನಾ ದೆಕುನ್ ಹಾಂವೆಂ ಸಾಂಗ್ಲೆಂ “ಬರೆಂ ಜೀವನ್, ತುಕಾ ಪಳೆಲೆಂ ದೆಕುನ್ ಸಂತೊಸ್ ಜಾಲೊ. ಅನ್ಯೇಕ್ ಪಾವ್ಟಿಂ ಮೆಳ್ಯಾಂ, ಹೆ ಬೂಕ್ ವಾಚುನ್ ತುಜಿ ಪ್ರತಿಕ್ರಿಯಾ ದೀ”
ಹಾಂವ್ ಥಂಯ್ಚೊ ಮ್ಹಜಿ ವಾಟ್ ಮುಕಾರುನ್ ಗೆಲ್ಲೊಂ. ಥೊಡ್ಯಾ ಮಯ್ನ್ಯಾಂನಿ ಪರತ್ ಮ್ಹಾಕಾ ಗಾಂವಾಕ್ ಯೇಂವ್ಕ್ ಪಡ್ಲೆಂ ದೆಕುನ್ ಹಾಂವ್ ಜೀವನಾಕ್ ಮೆಳುನ್ ತಾಕಾ ಥೊಡೆ ಬೂಕ್ ದಿವ್ಯಾಂ ಮ್ಹಣುನ್ ಗೆಲೊಂ. ಪರತ್ ಗೆಟಿಭಾಯ್ರ್ ಕಾರ್ ರಾವವ್ನ್ ಜೀವನಾಕ್ ಉಲೊ ಕೆಲೊ.
ಹ್ಯಾ ಪಾವ್ಟಿಂ ಜೀವನ್ ಏಕ್ ಪರ್ನೆಂ ಶರ್ಟ್ ನ್ಹೆಸುನ್ ಗೆಟಿಭಾಯ್ರ್ ಆಯ್ಲೊ ಆನಿ ಹಾಂವೆಂ ದಿಲ್ಲೆ ಬೂಕ್ ಘೆವ್ನ್, ಆಧ್ಲೆಪಾವ್ಟಿಂ ದಿಲ್ಲ್ಯಾ ಬುಕಾಂತ್ಲ್ಯಾ ಥೊಡ್ಯಾ ವಿಚಾರಾಂಚೆರ್ ಅಪ್ಲೆ ವಿಚಾರ್ ದೀಲಾಗ್ಲೊ. ಹಾಂವೆಂ ಇತ್ಲೆಂಚ್ ವಿಚಾರ್ಲೆಂ “ತುಂ ಕಸೊ ಆಸಾಯ್ ಜೀವನ್, ತುಂ ಕಿತ್ಯಾಕ್ ಬರಯ್ನಾಂಯ್? ಕಸೊ ಜಿಯೆತಾಯ್? ತುಜ್ಯೊ ಪರ್ಗಟ್ ಜಾಲ್ಲ್ಯೊ ಕಾಣಿಯೊ ಖಂಯ್ ಆಸಾತ್…?’
“ಕಿತೆಂ ಸಾಂಗುಂ ತುಕಾ? ಮ್ಹಾಕಾ ತ್ಯಾ ಕಳೊ ಸಂಪಾದಕಾನ್ ಲುಟ್ಲೆಂ, ಸಾಡೆ ಪಾಂಯ್ಶಿಂ ವರ್ಗಣ್ಯೊ ಎಕ್ಟಾಂಯ್ ಕರವ್ನ್ ಏಕ್ ಪಯ್ಸೊ ಸಯ್ತ್ ಕಮಿಶನ್ ದೀನಾಸ್ತಾನಾ ಮ್ಹಾಕಾ ಲೊಕಾಂ ಸಮೊರ್ ಚೋರ್ ಕೆಲೊ. ಆತಾಂ ವರ್ಗಣ್ಯೊ ದಿಲ್ಲೊ ಲೋಕ್ ಮ್ಹಾಕಾ ವಿಚಾರ್ತಾನಾ ತಾಣೆಂ ಅಪ್ಲೆಂ ಪತ್ರ್ ಹೆರಾಂಕ್ ವಿಕುನ್ ಸೊಡ್ಲೆಂ. ಏಕ್ ದೋನ್ ಪಾವ್ಟಿಂ ತಾಕಾ ಮೆಳುಂಕ್ ಗೆಲ್ಲ್ಯೆ ವೆಳಾರ್ ತೊ ಆನಿ ಥೊಡೆ ಗಲ್ಫಾಚೆ ಬರವ್ಪಿ ಮೆಳೊನ್ ಮ್ಹಜಿಂ ನಕ್ಲಾಂ ಕರುನ್ ಮ್ಹಾಕಾ ಹಲ್ಕ್ ಕರಿಲಾಗ್ಲೆ. ಮ್ಹಜೆ ಮನ್ ಮೊಡ್ಲೆಂ, ದೆಕುನ್ ಮ್ಹಾಕಾ ಕಿತೆಂಚ್ ನಾಕಾ ಮ್ಹಣುನ್ ಹಾಂವ್ ಪಯ್ಸ್ ಆಸಾಂ” ಜೀವನಾನ್ ಎಕಾಚ್ ಧಮ್ಮಾರ್ ಸಾಂಗೊನ್ ಸೊಡ್ಲೆಂ.
“ತುಕಾ ಕೊಣೆಂಯ್ ಲುಟ್ಚೆಂ ಕಶೆಂ? ತುಜೆ ಪಯ್ಶೆ ಖಾವ್ಯೆತ್ ಪುಣ್ ತುಜೆಂ ನಶಿಬ್, ತುಜೆಂ ಗಿನ್ಯಾನ್ ಕೊಣೆಂಯ್ ಲುಟುಂಕ್ ಜಾತಾವೆ ಜೀವನ್, ಕಿತ್ಯಾಕ್ ತುಂ ಕಂಗಾಲ್ ಜಾತಾಯ್? ತುಜಿಂ ಬರ್ಪಾಂ ಮ್ಹಾಕಾ ದೀ, ಹಾಂವ್ ತಿಂ ಬುಕಾರುಪಾರ್ ಪರ್ಗಟುನ್ ದಿತಾಂ, ಮ್ಹಾಕಾ ಕಿತೆಂಚ್ ನಾಕಾ, ಸಗ್ಳೆಂ ತುಕಾ ಮೆಳುಂದಿ” ಹಾಂವೆಂ ಸಮಧಾನ್ ದೀಂವ್ಕ್ ಧರ್ಲೆಂ.
ಅಶೆಂ ಥೊಡೊವೇಳ್ ಉಲವ್ನ್, ಜೀವನಾಚೆಂ ಮೊಬಾಯ್ಲ್ ನಂಬರ್ ಘೆವ್ನ್ ಹಾಂವ್ ಪಾಟಿಂ ಬೊಂಬೊಯ್ ಗೆಲೊಂ ಪುಣ್ ಮ್ಹಜ್ಯಾ ಮತಿಂತ್ ಏಕ್ ಚಿಂತಪ್ ಆಸ್ಲೆಂ. ಏಕ್ ಸಾಂಗಾತಿ ಬರವ್ಪಿ ಜಾವ್ನ್ ಹಾಂವೆಂ ತರ್‌ಯೀ ಜೀವನಾಚಿ ಮಜತ್ ಕರಿಜಯ್. ದೆಕುನ್ ಜೀವನಾಲಾಗಿಂ ಸಂಪರ್ಕಾರ್ ರಾವುಂಕ್ ಧರ್ಲೆಂ ಆನಿ ಜೀವನಾನ್ ಪರತ್ ಏಕ್ ಕಾಣಿ ಬರವ್ನ್ ಧಾಡ್ಲಿ ಆನಿ ತಿ ಪತ್ರಾಚೆರ್ ಪರ್ಗಟುನ್ ಆಯ್ಲಿ. ಅಶೆಂ ಪರತ್ ಜೀವನ್ ಅಪ್ಲಿ ಪ್ರತಿಭಾ ಮುಕಾರ್ ವರುಂಕ್ ಸಕ್ತಲೊ ಮ್ಹಳ್ಳೊ ಆಶಾವಾದ್ ಮ್ಹಜ್ಯಾ ಮತಿಂತ್ ಆಸ್ಲೊ.
ತವಳ್ ತವಳ್ ಜೀವನ್ ಮ್ಹಾಕಾ ಫೋನ್ ಕರ್ತಾಲೊ ಆನಿ ಥೊಡೆ ಪಾವ್ಟಿಂ ಮಿಸ್‌ಕೋಲ್ ಪಳೆವ್ನ್ ಹಾಂವ್ ತಾಕಾ ಪಾಟಿಂ ಫೊನ್ ಕರ್ತಾಲೊಂ. ಏಕ್ ದೋನ್ ಪಾವ್ಟಿಂ ಜೀವನಾನ್ ಮ್ಹಾಕಾ ಸಾಂಗ್‌ಲ್ಲೆಂಯ್ ಆಸಾ “ತುಂ ಕಿತ್ಯಾ ಮ್ಹಾಕಾ ಸದಾಂಯ್ ಫೊನ್ ಕರ್ತಾಯ್? ಹಾಂವ್ ಥೊಡೆಪಾವ್ಟಿಂ ಕಾಮಾರ್ ಆಸ್ತಾಂ”. ತ್ಯೇ ದಿಸಾ ಉಪ್ರಾಂತ್ ಜೀವನಾಕ್ ಫೋನ್ ಕರ್ಚೊ ಬಂಧ್ ಕೆಲೊ. ಪುಣ್ ತಾಕಾ ಮೆಳುಂಕ್ ವೆತಾಲೊಂ, ತಾಕಾ ಮ್ಹಜೆಸವೆಂ ವ್ಹರುನ್ ಚ್ಯಾ ಪಿಯೆಂವ್ಕ್ ವಾ ನಾಸ್ಟೊ ಕರುಂಕ್ ಹೊಟೆಲಾಕ್ ವ್ಹರ್ತಾಲೊಂ ತಶೆಂಚ್ ಪಾಟಿಂ ಪಾವ್ನ್ ವೆತಾಲೊಂ. ಕಶೆಂ ತರ್‌ಯೀ ತಾಚಿಂ ಬರ್ಪಾಂ ಎಕ್ಟಾಂವ್ನ್ ಏಕ್ ಬುಕಾರುಪಾರ್ ಪರ್ಗಟುನ್ ತಾಕಾ ದಿಲ್ಯಾರ್ ಮ್ಹಜ್ಯಾ ಮತಿಕ್ ಸಮಧಾನ್ ಮ್ಹಣುನ್ ಜೀವನಾಚಿಂ ಬರ್ಪಾಂ ವಿಚಾರ್ತಾನಾ “ಮ್ಹಜ್ಯೊ ಸಗ್ಳ್ಯೊ ಕಾಣ್ಯೊ ಮ್ಹಜ್ಯಾ ಪಪ್ಪಾನ್ ಮಾಡಾಮುಳಾಕ್ ಘಾಲುನ್ ಹುಲ್ಪಾಯ್ಲ್ಯಾತ್” ಮ್ಹಣಾಲೊ.
“ತುಜ್ಯೊ ಕಾಣಿಯೊ ಸೊಧ್ಚಿ ಜವಾಭ್ದಾರಿ ಮ್ಹಜಿ, ಪುಣ್ ತುಜಿ ಕಬ್ಲಾತ್ ಆಸಾವೆ? ಆಸಾ ತರ್ ತುಜಿಂ ಸುರ್ವಿಲಿಂ ಉತ್ರಾಂ ಬರವ್ನ್ ಮ್ಹಾಕಾ ದೀ” ಅಶೆಂ ಮ್ಹಣುನ್ ಹಾಂವ್ ಗೆಲ್ಲೊಂ. ಜೀವನಾಥಾವ್ನ್ ಮ್ಹಾಕಾ ಇತ್ಲೆವೆಗಿಂ ಜಾಪ್ ಯೇತ್ ಮ್ಹಳ್ಳೊ ಭರ್ವಸೊ ನಾತ್ಲೊ ಪುಣ್ ಹಾಂವ್ ಬೊಂಬೊಯ್ ಗೆಲ್ಲೆಪರಿಂಚ್ ತಾಚೆಂ ಫೋನ್ ಆಯ್ಲೆಂ ಆನಿ ಅಪ್ಣಾನ್ ಸುರ್ವಿಲೆಂ ಉತರ್ ಬರಯ್ಲಾಂ ಮ್ಹಣಾಲೊ. ಹಾಂವೆಂ ಫೊನಾಚೆರ್ ತಾಚಿಂ ಸುರ್ವಿಲಿಂ ಉತ್ರಾಂ ಟಾಯ್ಪ್ ಕೆಲಿಂ ಆನಿ ಥೊಡ್ಯಾಚ್ ದಿಸಾಂನಿ ಪರತ್ ಮಂಗ್ಳುರಾಕ್ ಪಾವ್ಲೊಂ. ಚಡ್ ಕರುನ್ ಮಂಗ್ಳುರಾಕ್ ಗೆಲ್ಯಾರ್ ಹಾಂವೆಂ ರಾಂವ್ಚೆಂ ‘ರೆತಿರ್ ಮಂದಿರಾಂತ್’, ದೆಕುನ್ ಎಕಾ ಹಫ್ತ್ಯಾಚೆಂ ಬುಕಿಂಗ್ ಕರುನ್ ರಾವ್ಲೊಂ ಆನಿ ಸದಾಂಯ್ ಎಕೆಕಾ ಲೈಬ್ರೆರಿಂನಿ ವಚುನ್ ಪರ್ನಿಂ ಪತ್ರಾಂ ಉಸ್ತುಂಕ್ ಧರ್ಲಿಂ ಆನಿ ಅಶೆಂ ಚ್ಯಾರ್-ಪಾಂಚ್ ದೀಸ್ ಸಗ್ಳೊ ದೀಸ್ ಸೊಧುನ್ ಸೊಧುನ್, ಕಶ್ಯೊಯ್ ಜೀವನಾಚ್ಯೊ ತೆರಾ-ಚೊವ್ದಾ ಕಾಣಿಯೊ ಸೊಧುನ್ ಕಾಡುನ್, ತ್ಯೊ ಮೊಬಾಯ್ಲಾಂತ್ ಸ್ಕ್ಯಾನ್ ಕರುನ್, ಉಪ್ರಾಂತ್ ಬೊಂಬೊಯ್ ವಚೊನ್ ಟಾಯ್ಪ್ ಕರವ್ನ್, ಉಪ್ರಾಂತ್ ಬುಕಾರುಪಾರ್ ಪರ್ಗಟ್ಚೆ ವೆಳಾರ್ ಜೀವನಾಚಿ ಆವಯ್ ಅಂತರ್‌ಲ್ಲಿ ಆನಿ ಜೀವನ್ ಪುರ್ತೊ ಎಕ್ಸುರೊ ಜಾಲ್ಲೊ.
ಬುಕಾಚ್ಯಾ ಪರ್ಗಟ್ಣೆಕ್ ಜೀವನಾಚೊಚ್ ಸಾಂಗಾತಿ ಲಿಗೋರಿನ್ ಮಜತ್ ಕೆಲ್ಲಿ, ಆನಿ ಥೊಡ್ಯಾ ಬರ್ಯಾ ಮನಾಚ್ಯಾಂನಿ ಮಜತ್ ದಿಲ್ಲಿ. ಪುಣ್ ಕೋವಿಡಾಚೊ ಭಳಾಧಿಕ್ ಮಾರ್ ಸಮೇಸ್ತಾಂಕ್ ಪಡ್ಲೊ ಆನಿ ಜೀವನ್ ಸಯ್ತ್ ಎಕ್ಲೊ. ಎಕ್ಸುರಿ ಜಿಣಿ, ಉತರ್ ಪ್ರಾಯೆಕ್ ಪಾಂವ್ಚಿಂ ಮೆಟಾಂ, ಅಸ್ಕತ್ ಕೂಡ್, ನಿತ್ರಾಣಿ ಜಿನೊಸ್. ಆನಿ ಪರ್ಗಟ್ ಜಾಲ್ಲೆ ಬೂಕ್ ಪ್ರೆಸ್ಸಾಂತ್ ಉರ್ಲೆ.
“ತುಕಾ ಕಿತ್ಲೆ ಬೂಕ್ ಜಾಯ್ ಸಾಂಗ್ ಜೀವನ್, ತೆ ಸಗ್ಳೆ ಬೂಕ್ ತುಜೆಚ್” ಅಶೆಂ ಹಾಂವೆಂ ಪರತ್ ಪರತ್ ಸಾಂಗ್ತಾನಾ ಜೀವನಾಚಿ ನೀರಸ್ ಜಾಪ್ ಜಾವ್ನಾಸ್ಲಿ;
“ತುಜೊ ಬೂಕ್ ಕೊಣಾಕ್ ಜಾಯ್‌ಗಾ? ತುಜ್ಯೊ ಪೊಟ್ಟು ಕಾಣಿಯೊ ವಾಚುಂಕ್ ಕೊಣಾಕ್ ಜಾಯ್? ಮ್ಹಜ್ಯೆಲಾಗಿಂ ಚಣ್ಯಾಂಚಿ ಆಂಗಡ್ ಆಸ್ಲಿ ತರ್ ತೆ ಚಣೆ ಭಾಂದುಂಕ್ ಪುಣಿ ಉಪ್ಕಾರ್ತೆ” ಅಶೆಂ ಮ್ಹಜ್ಯಾ ಗಾಂವ್ಚೆ ಸಾಂಗ್ತಾತ್ ದೆಕುನ್ ಮ್ಹಾಕಾ ಬೂಕ್ ನಾಕಾತ್, ಏಕ್ ವ ದೋನ್ ಬೂಕ್ ದಿಲ್ಯಾರ್ ಪುರೊ ಮ್ಹಣಾಲೊ ದೆಕುನ್ ಹಾಂವೆಂ ಪ್ರೆಸ್ಸಾಕ್ ಸಾಂಗವ್ನ್ ಪಾಂಚ್ ಬುಕಾಂಕ್ ತಾಕಾ ಧಾಡುನ್ ದಿಲೆ.
ಏಕ್ ದೋನ್ ಪಾವ್ಟಿಂ ಜೀವನ್ ಮ್ಹಳ್ಯಾರ್ ಆಯ್ಚ್ಯಾ ಸಮಾಜೆಚಿ ಕರಾಳ್ ಕಾಣಿ. ಕಶೆಂ ಪರಿಸ್ಥಿತೆಚ್ಯಾ ತಾಬೆಂತ್ ಅಪ್ಲ್ಯಾಂ ಸಮೊರ್ ಪರ್ಕಿ ಜಾವ್ನ್ ಜಿಯೆತಲ್ಯಾ ವೆಕ್ತಿನ್ ಸೊಸ್‌ಲ್ಲ್ಯಾ ಮಾನಸಿಕ್ ಸಂಘರ್ಶಾಂಕ್ ರೂಪ್ ರೂಪ್ ದಾಕಂವ್ಚೆಂ ಪಿಂತುರ್.
ಥೊಡೆಪಾವ್ಟಿಂ ಮ್ಹಾಕಾ ಬೊಂಬೊಯ್ ಫೊನ್ ಕರುನ್ ಜೀವನಾನ್ ಧೊಸ್ಚೆಂ ಆಸ್ಲೆಂ “ಮ್ಹಾಕಾ ಮ್ಹಜೆ ಥೊಡೆ ಬೂಕ್ ಮೆಳ್ತಿತ್‌ಗಿ”, ಆನಿ ಹಾಂವೆಂ ತಾಕಾ ತೆ ಧಾಡುನ್ ದಿಂವ್ಚೆ ಆಸ್ಲೆ.
╬ ╬ ╬
ಆಯ್ಲೆವಾರ್ ಗಾಂವಾಕ್ ಪಾವ್ತಾನಾ ಕೋವಿಡೆನಿಮ್ತಿಂ ಮನ್ಶಾಪಣ್ ಸಯ್ತ್ ಕುಸ್ಕೊನ್ ಗೆಲ್ಲೆಂ ಪಳೆಲೆಂ. ಪುಣ್ ಜೀವನಾಕ್ ಮೆಳುಂಕ್ ಜಾಯ್ ಆಸ್ಲೆಂ ದೆಕುನ್ ಸಕಾಳಿಂ ವೆಗಿಂಚ್ ಉಟೊನ್ ರೆತಿರ್ ಮಂದಿರಾಂತ್ಲೊ ಭಾಯ್ರ್ ಸುಟ್ಟಾನಾ ಸಕಾಳ್ಚಿಂ ಪಾವ್ಣೆ ಸಾತ್ ಜಾಲ್ಲಿಂ. ದೆಕುನ್ ವಾಟೆರ್ ಹೊಟೆಲಾಂತ್ ಚಾ ಪಿಯೆವ್ನ್ ನಾಸ್ಟೊ ಕೆಲ್ಲೆಪರಿಂಚ್ ಜೀವನಾಕ್ ಸಯ್ತ್ ನಾಸ್ಟೊ ಪ್ಯಾಕ್ ಕರವ್ನ್ ಜೀವನಾಚ್ಯಾ ಘರಾ ಪಾವ್ತಾನಾ ಸವಾಯ್ ಆಟ್ ಜಾಲ್ಲಿಂ. ಗೇಟಿಭಾಯ್ರ್ ಮ್ಹಜೆಂ ಕಾರ್ ರಾವವ್ನ್ ’ಜೀವನ್… ಜೀವನ್…’ ಅಶೆಂ ಉಲೊ ಕರುನ್ ಹಾಂವ್ ಪಳೆಲಾಗ್ಲೊಂ. ಘರ್ಚಿಂ ದಾರಾಂ ಉಗ್ತಿಂ ಆಸ್ಲಿಂ, ಕಾಂಯ್ ಕಾಮಾರ್ ಆಸ್ತಲೊ ಮ್ಹಣುನ್ ಗೇಟ್ ಉಗ್ತಿ ಕರುನ್ ಘರಾಭಿತರ್ ಪಳೆತಾನಾ ಜೀವನ್ ನಾತ್ಲೊ.
ಬಗ್ಲೆಚ್ಯಾ ಬಂಗ್ಲ್ಯಾಚೊ ದಾದ್ಲೊ ಮ್ಹಣಾಲೊ ’ಕಾಂಯ್ ಭಾಯ್ರ್ ಗೆಲಾಸ್ತಲೊ’.
“ಪುಣ್ ದಾರಾಂ ಉಗ್ತಿಂ ಆಸಾತ್”
“ತೊ ದಾರಾಂ ಉಗ್ತಿಂ ದವರುನ್ ವೆತಾ” ತಾಣೆಂ ಜಾಪ್ ದಿಲಿ.
ಹಾಂವೆಂ ತೆದ್ನಾಂ ಜೀವನಾಕ್ ಥೊಡೆ ಬೂಕ್ ಘೆವ್ನ್ ಆಯ್ಲಾಂ, ದೆಕುನ್ ತೊ ಯೆತಚ್ ಹೆ ಬೂಕ್ ತಾಕಾ ದಿಶ್ಯಾತ್? ಮ್ಹಣುನ್ ಉಪ್ಕಾರ್ ಮಾಗ್ಲೊ ಆನಿ ತಾಣೆಂ ಜಾಯ್ತ್ ಮ್ಹಳೆಂ ದೆಕುನ್ ಹಾಂವೆಂ ತೆ ಬೂಕ್ ತಶೆಂಚ್ ಹಾಡ್‌ಲ್ಲೊ ನಾಸ್ಟೊ ತಾಚ್ಯಾ ಹಾತಿಂ ದೀವ್ನ್ ಹಾಂವ್ ಮುಕಾರ್ ಚಲ್ಲೊಂ. ಡ್ರಾಯ್ವ್ ಕರುನ್ ಆಸ್ತಾನಾ ಕಾಂಯ್ ದೋನ್-ತೀನ್ ಪಾವ್ಟಿಂ ಕೊಣೆಂಗಿ ಫೋನ್ ಕೆಲ್ಲೆಪರಿಂ ಜಾಲೆಂ ಪುಣ್ ಹಾಂವ್ ಮ್ಹಜ್ಯಾ ಗಾಂವಾಕ್ ಪಾವ್‌ಲ್ಲೊಂ. ಆನಿ ಜೀವನಾಚೆಂ ಫೋನ್ ಮಿಸ್ ಕೆಲ್ಲೆಂ ದೆಕುನ್ ಜೀವನಾಕ್ ಫೋನ್ ಕೆಲೊ.
“ಹಲೋ.. ತುಂ ಆಯಿಲ್ಲೊಯ್ಗಿ? ಕಿತ್ಯಾಕ್ ಇತ್ಲೆ ಬೂಕ್ ಸೊಡ್ನ್ ಗೆಲೊಯ್? ಹಾಂವೆಂ ಕಿತೆಂ ಕರಿಜೆ? ಮ್ಹಜ್ಯಾನ್ ಹೆ ಬೂಕ್ ಸೇಲ್ ಕರುಂಕ್ ಜಾಯ್ನಾ. ದೆಕುನ್ ತುಂ ಹೆ ಬೂಕ್ ವ್ಹರ್ನ್ ವಚ್… ಪೋರ್ ಪ್ರೆಸ್ಸಾಕ್ ಗೆಲ್ಲೊಂ, ಥಂಯ್ ತೊ ಪಾದ್ರಿ ಸಯ್ತ್ ಸಾಂಗ್ತಾಲೊ, ಇತ್ಲೆ ಬೂಕ್ ಛಾಪ್ಲ್ಯಾತ್ ಆನಿ ಕಿತ್ಯಾಕ್ ಹಾಂಗಾಚ್ ಸೊಡ್ಲ್ಯಾತ್ ಮ್ಹಣುನ್….” ಜೀವನ್ ಎಕಾಚ್ ಧಮ್ಮಾನ್ ಉಚಾಂಬಳ್ ಜಾವ್ನ್ ಉಲವ್ನ್ ಗೆಲೊ.
ಹಾಂವೆಂ ಜಾಪ್ ದಿವ್ನ್ ಮ್ಹಳೆಂ “ಜೀವನ್, ಸಮಧಾನ್ ಘೆ. ಉಚಾಂಬಳ್ ಜಾಯ್ನಾಕಾ. ತುಕಾ ಬೂಕ್ ದಿಲ್ಲೆ, ಕಾಂಯ್ ಉಪ್ಕಾರಾಕ್ ಪಡ್ತಿತ್ ಮ್ಹಳ್ಳ್ಯಾ ಚಿಂತ್ಪಾನ್ ಶಿವಾಯ್, ತುವೆಂ ಸೇಲ್ ಕರಿಜೆ ಮ್ಹಣುನ್ ನ್ಹಯ್, ಬುಕಾಚಿ ಖಂತ್ ತುಂ ಕಿತ್ಯಾಕ್ ಕರ್ತಾಯ್? ತಿ ಮ್ಹಜಿ ಖಂತ್, ತುಜೊ ಏಕ್ ಬೂಕ್ ನ್ಹಯ್? ಮ್ಹಜೆ ಪನ್ನಾಸ್ ಬೂಕ್ ತರ್ ಹಾಂವೆಂ ಕಿತ್ಲೆಂ ಉಚಾಂಬಳ್ ಜಾಯ್ಜಯ್ ಆಸ್ಲೆಂ?” ಹಾಂವೆಂ ಸಮಧಾನೆನ್ ಸಮ್ಜಾಂವ್ಕ್ ಧರ್ಲೆಂ.
“ಪುಣ್ ಮ್ಹಾಕಾ ಹೆ ಬೂಕ್ ನಾಕಾತ್, ತುಂ ಘೆವ್ನ್ ವಚ್”
“ಬರೆಂ, ಹಾಂವ್ ಆತಾಂ ಮ್ಹಜ್ಯಾ ಗಾಂವಾಕ್ ಪಾವ್ಲಾಂ, ಥೊಡ್ಯಾ ವೆಳಾರ್ ಪಾಟಿಂ ಮಂಗ್ಳುರಾಕ್ ವೆತಾನಾ ತುಕಾ ಮೆಳುನ್ ತೆ ಬೂಕ್ ಪಾಟಿಂ ವ್ಹರ್ತಾಂ, ತುಂ ಸಮಧಾನ್ ಘೆ”
“ಕೆದಾಳಾ ಯೆತಾಯ್? ಖಂಡಿತ್ ಯೆತಾಯ್‌ಮು?” ಜೀವನಾಚ್ಯಾ ತಾಳ್ಯಾಂತ್ ಅಜೂನ್ ಶಿಣ್ ಆಸ್ಲೊ.
“ಹಾಂವ್ ಕೆದಾಳಾ ಯೆತಾಂ ಮ್ಹಳ್ಳೆಂ ನಖ್ಖೆಂ ಸಾಂಗುಂಕ್ ಸಕಾನಾ ಪುಣ್ ಖಂಡಿತ್ ಮ್ಹಜ್ಯಾನ್ ಜಾತಾ ತಿತ್ಲೆವೆಗಿಂ ಯೆತಾಂ” ಅಶೆಂ ಮ್ಹಣುನ್ ಫೋನ್ ಡೀಸ್‌ಕನೆಕ್ಟ್ ಕೆಲೆಂ.
ಥೊಡ್ಯಾಚ್ ವೆಳಾರ್ ಹಾಂವ್ ಪರತ್ ಜೀವನಾಚ್ಯಾ ಘರಾ ಪಾವ್ಲೊಂ, ಪುಣ್ ಪರತ್ ಜೀವನ್ ಘರಾಂತ್ ನಾತ್ಲೊ ದೆಕುನ್ ತಾಕಾ ಫೋನ್ ಕೆಲೊ.
ಫೋನ್ ರಿಸೀವ್ ಕರುನ್ “ಓಹ್ ತುಂ ಆಯ್ಲಾಯ್? ಥಂಯ್ಚ್ ರಾವ್, ಹಾಂವ್ ದೋನ್ ಮಿನುಟಾಂನಿ ಪಾವ್ಲೊಂ” ಅಶೆಂ ಮ್ಹಣುನ್ ಥೊಡ್ಯಾಚ್ ವೆಳಾನ್ ತೊ ಆಯ್ಲೊ.
“ಕಸೊ ಆಸಾಯ್ ಜೀವನ್? ಕಿತೆಂ ರಾಗಾರ್ ಜಾಲಾಯ್? ತುವೆಂಚ್ ಬೂಕ್ ಜಾಯ್ ಮ್ಹಣುನ್ ಸಾಂಗ್ಲೆಂ ದೆಕುನ್ ತುಕಾ ದಿಂವ್ಚಾಕ್ ಬೂಕ್ ಘೆವ್ನ್ ಆಯಿಲ್ಲೊಂ, ನಾಕಾತ್ ತರ್ ವ್ಹಡ್ ನಾ, ಹಾಂವ್ ತೆ ಘೆವ್ನ್ ವೆತಾಂ, ತುಂ ಸಮಧಾನ್ ಘೆ” ಅಶೆಂ ಉಲಯ್ತಾನಾ ತೊ ಮ್ಹಣಾಲೊ.
“ಹಾಂವ್ ಬರೊ ನಾ, ಲೋ ಬಿಪಿ ಜಾವ್ನ್ ಎಕ್ಸುರೊ ಜಿಯೆಂವ್ಕ್ ಭಿಯೆತಾಂ. ದೆಕುನ್ ಆಶ್ರಮಾಕ್ ವೆಚ್ಯಾರ್ ಆಸಾಂ. ದೆಕುನ್ ಮ್ಹಾಕಾ ಹೆ ಬೂಕ್ ನಾಕಾತ್”
ಹಾಂವ್ ಸಮ್ಜಲೊಂ, ಆನಿ ತೆ ಬೂಕ್ ಪಾಟಿಂ ಘೆಂವ್ಚ್ಯಾದಿಂ ಇತ್ಲೆಂಚ್ ಸಾಂಗ್ಲೆಂ; “ಅಳೆ ಜೀವನ್, ಹಾಂವ್ ಆಸಾಂ ಬೊಂಬೊಯ್, ತುಂ ಆಸಾಯ್ ಗಾಂವಾಂತ್, ದೆಕುನ್ ಫಾಲ್ಯಾಂ ತುಕಾ ತುಜೆ ಬೂಕ್ ಜಾಯ್ ಮ್ಹಣ್ ಭಗ್ಲೆಂ ತರ್, ಮ್ಹಾಕಾ ಧಾಡುಂಕ್ ತ್ರಾಸ್ ಜಾತಾತ್, ತ್ರಾಸ್ ಜಾಲ್ಯಾರೀ ವ್ಹಡ್ ನಾ ಪುಣ್ ವೇಳ್ ಜಾತಾ ದೆಕುನ್ ತುಕಾ ಥೊಡೆ ಬೂಕ್ ದಿವ್ಯಾಂ ಮ್ಹಣುನ್ ಆಯಿಲ್ಲೊಂ”
ಹೆಂ ಆಯ್ಕುನ್ ಜೀವನ್ ಮ್ಹಣಾಲೊ “ತರ್ ಮ್ಹಾಕಾ ಅನಿ ಥೊಡೆ ಬೂಕ್ ದೀ”
ಹಾಂವೆಂ ಪರತ್ ಥೊಡೆ ಬೂಕ್ ತಾಕಾ ದಿಲೆ ಆನಿ ತಾಚೆಲಾಗಿಂ ಉಲವ್ನ್ ತಾಚಿ ತಸ್ವೀರ್ ಕಾಡ್ಲಿ ಆನಿ ತಾಚೆಂ ಉಲವ್ಪ್ ಮೊಬಾಯ್ಲಾಂತ್ ರೆಕೋರ್ಡ್ ಕೆಲೆಂ.
ಎಕಾ ಸಾಂಗಾತಿ ಬರವ್ಪ್ಯಾಕ್ ಮೆಳುನ್ ತಾಚೆಲಾಗಿಂ ಥೊಡೊ ವೇಳ್ ಖರ್ಚಿಲ್ಲೆಂ ಸಮಧಾನ್ ಮಾತ್ರ್ ಮ್ಹಜೆಲಾಗಿಂ ಆಸ್ಲೆಂ ದೆಕುನ್ ತೊ ವೀಡಿಯೊ ಫೇಸ್‌ಬುಕಾಚೆರ್ ಘಾಲೊ.
ಥೊಡ್ಯಾಚ್ ವೆಳಾನ್ ತೊ ವೀಡಿಯೊ ಎಕೆಕ್ಲ್ಯಾನ್ ಶೇರ್ ಕರುಂಕ್ ಧರ್ಲೆಂ. ಸಾಂಗಾತಿ ನಿಶಾಂತ್ ಆನಿ ಲಿಗೋರಿನ್ ಕಮೆಂಟ್ಸ್ ಕೆಲೆ, ಸಭಾರಾಂನಿ ಸುಕೆ ಸಯ್ಲಾಪ್ ಉಚಾರ್ಲೆ ಪುಣ್ ದೋನ್ ದಿಸಾಂನಿಚ್ ಹೊ ವೀಡೊಯೊ ವೈರಲ್ ಜಾಲೊ.
╬ ╬ ╬
ಗಾಂವಾಕ್ ಯೇವ್ನ್ ಮ್ಹಜೊ ಪಾಂಚ್ವೊ ದೀಸ್, ಸಕಾಳಿಂ ಉಟ್ತಾನಾ ತೀನ್ ಮಿಸ್-ಕಾಲ್ಸ್ ಆಸ್ಲಿಂ. ಪಳೆತಾತಾ ತಾಂತುಂ ಏಕ್ ಜೀವನಾಚೆಂ. ದೆಕುನ್ ಜೀವನಾಕ್ ಫೋನ್ ಕರ್ತಾನಾ ಜೀವನ್ ಪುರ್ತೊ ದೆದೆಸ್ಪೊರ್ ಜಾಲ್ಲೊ ದಿಸ್ಲೆಂ.
“ತುವೆಂ ಮ್ಹಜೊ ವೀಡಿಯೊ ಫೇಸ್‌ಬುಕಾರ್ ಘಾಲ್ಲೊ, ಲೊಕಾಂನಿ ವಾಟ್ಸಾಪಾಚೆರ್ ಕೊಣಾಕ್ ಕೊಣಾಕ್ ಧಾಡುನ್ ಕುಟ್ಮಾಚಿ ಮರ್ಯಾದ್ ಕಾಡ್ಲಿ ಮ್ಹಣುನ್ ಭಯ್ಣ್ ಮ್ಹಜೆರ್ ಪುರ್ಪುರ್ತಾಲೆಂ”
ಆಯ್ಕುನ್ ಮ್ಹಜ್ಯಾ ತಳ್ಮಟ್ಯಾಕ್ ಮಾರ್‌ಲ್ಲೆಪರಿಂ ಭಗ್ಲೆಂ.
“ಜೀವನ್. ತುಜಿ ಭಯ್ಣ್ ಕೊಣ್ ಮ್ಹಾಕಾ ಕಳಿತ್ ನಾ, ತುಕಾ ಭಯ್ಣ್ ಆಸಾ ಮ್ಹಣುನ್ ಆತಾಂಚ್ ಮ್ಹಾಕಾ ಕಳ್ಚೆಂ, ಪುಣ್ ಏಕ್ ಸಾಂಗ್, ತುಜ್ಯಾ ಕುಟ್ಮಾಚಿ ಮರ್ಯಾದ್ ಕಾಡುಂಕ್ ಹಾಂವ್ ಬೊಂಬೊಯ್ ಥಾವ್ನ್ ಗಾಡಿಯೆರ್ ಯೇವ್ನ್ ತುಕಾ ಮೆಳುಂಕ್ ಆಯ್ಲಾಂ ಮ್ಹಣ್ ತುಂ ಚಿಂತಾಯ್?” ಹಾಂವೆಂ ಖಾಲ್ತೆಪಣಿಂ ವಿಚಾರ್ಲೆಂ.
“ನಾ, ತೆಂ ಹಾಂವ್ ಸಮ್ಜತಾಂ, ಪುಣ್ ಮ್ಹಜಿ ಭಯ್ಣ್ ಯೆವ್ನ್ ಮ್ಹಜೆರ್ ಫುಟ್ಲೆಂ, ಆಮ್ಚ್ಯಾ ಕುಟ್ಮಾಚಿ ಮರ್ಯಾದ್ ಕಾಡ್ಲಿ ತಾಣೆಂ, ತಾಕಾ ವೀಡಿಯೊ ಕಾಡಿಜೆ ತರ್ ಬರೆಂ ನ್ಹೆಸವ್ನ್ ಕಾಡ್ಯೆತೊ ನೆ? ತೆಂ ಪರ್ನೆಂ ಘರ್ ಸಗ್ಳೆಂ ದಿಸ್ತಾ ಆನಿ ಆಮ್ಚಿ ಮರ್ಯಾದ್ ಸಗ್ಳಿ ಕಾಡ್ಲ್ಯಾ ತಾಣೆ” ಅಶೆಂ ಮ್ಹಜೆರ್ ಶಿಣ್ಲೆಂ.
“ಜೀವನ್.. ತುಜ್ಯಾ ಕುಟ್ಮಾಚಿ ಮರ್ಯಾದ್ ಕಾಡುನ್ ಮ್ಹಾಕಾ ಕಿತೆಂ ಆಸ್ತ್ ಮೆಳ್ತಾ ತುಂಚ್ ಸಾಂಗ್, ಜರ್ ಮ್ಹಜ್ಯಾ ವೀಡಿಯೊವರ್ವಿಂ ಕೊಣಾಯ್ಚಿ ಮರ್ಯಾದ್ ವೆತಾ ಮ್ಹಣುನ್ ತಿಂ ಚಿಂತಾತ್ ತರ್ ಹಾಂವ್ ತೊ ವೀಡಿಯೊ ಡಿಲೀಟ್ ಕರ್ತಾಂ, ಕಿತ್ಯಾಕ್ ಮ್ಹಳ್ಯಾರ್ ಮ್ಹಜೊ ಇರಾದೊ ಕೊಣಾಯ್ಚಿಯ್ ಮರ್ಯಾದ್ ಕಾಡ್ಚಿ ವ ಕೊಣಾಯ್ಕೀ ಧುಂಪಂವ್ಚಿ ನ್ಹಯ್, ಬಗರ್ ತುಜ್ಯಾ ಸಭಾರ್ ಅಭಿಮಾನಿಂಕ್ ತುಜಿ ಖಬರ್ ಪಾವಂವ್ಚಿ ಮಾತ್ರ್. ಆನಿ ತುಂ ಜಾಣಾಂಯ್ ನಿಶಾಂತ್ ಆನಿ ಲಿಗೋರಿನ್ ತುಜೆವಿಶಿಂ ಬರೆಂಚ್ ಬರಯ್ಲಾಂ” ಹಾಂವೆಂ ಸಮಾಧಾನಿ ಜಾಪ್ ದಿಲಿ.
“ವ್ಹಯ್ ತೆಂ ಮ್ಹಣಾಲೆಂ, ನಿಶಾಂತ್ ಆನಿ ಲಿಗೋರಿನ್ ಸಯ್ತ್ ಜೀವನಾಚೆಂ ಪಕ್ಷ್ ಘೆತ್ಲಾಂ, ಆಮ್ಚಿ ಕುಟ್ಮಾಚಿ ಮರ್ಯಾದ್ ಕಾಡ್ಲಿ ತ್ಯಾ ತುಜ್ಯಾ ಬೊಂಬೊಯ್‌ಗಾರಾನ್”
╬ ╬ ╬
ಹಾಂವ್ ಬೊಂಬೊಯ್ ಪಾವುನ್ ಆತಾಂ ಹಫ್ತೊ ಉತರ್ಲಾ. ಫೇಸ್‌ಬುಕಾಚೆರ್ ಘಾಲ್ಲೊ ವೀಡಿಯೊ ಡಿಲೀಟ್ ಕೆಲಾ. ಜೀವನ್ ಆಶ್ರ್ಯಾಕ್ ಪಾವ್ಲಾ.
“ತುಜಿ ಭಯ್ಣ್ ತುಜ್ಯಾ ಘರಾಲಾಗಿಂ ಆಸೊನ್ ತುಕಾ ಆಶ್ರ್ಯಾಂತ್ ಘಾಲಾಗಿ?” ಮ್ಹಣುನ್ ಗಾಂವ್ಚ್ಯಾ ಲೊಕಾಂನಿ ತಾಕಾ ಫೊನ್ ಕರುನ್ ಧೊಸುಂಕ್ ಧರ್ಲಾಂ.
ಹಾಂವ್ ಮರ್ಯಾದ್ ಮಾಪ್ಚೆಂ ಪ್ರಯತ್ನ್ ಕರುನ್ ಆಸಾಂ. ತಾಕ್ಡೆಚ್ಯಾ ಎಕಾ ಕುಶಿಂತ್ ಜೀವನಾಕ್ ದವರ್ಲಾ ತರ್, ಅನ್ಯೇಕಾಂತ್ ಎಕಾ ಪಾಟ್ಲ್ಯಾನ್ ಎಕ್ಲ್ಯಾಕ್ ದವರ್ನ್ ತುಕುನ್ ಆಸಾಂ; ಜೊವಿನ್, ಪೀಟರ್, ನಿಶಾಂತ್, ಲಿಗೋರಿ, ಜೀವನಾಚಿ ಭಯ್ಣ್, ಕಳೊ ಸಂಪಾದಕ್ ಆನಿ ತೊ ವೈರಲ್ ವೀಡಿಯೊ ಅಪ್‌ಲೋಡ್ ಕೆಲ್ಲೊ ಹಾಂವ್!
► ವಲ್ಲಿ ಕ್ವಾಡ್ರಸ್, ಅಜೆಕಾರ್
ಜೀವನಾಚಿಂ ಕಾಣಿ ಏಕ್ ನೈಜಿ ವಿಶೇಷ್ ಶೈಲಿನ್ ರಚ್ಲ್ಯಾ.
ಅಭಿನಂದನ್.
ಬರಯ್ಣಾರಾಂಚಿ ಆರ್ಥಿಕ್ ಸ್ಥಿತಿ ಚಡುಣೆಂ ಸುದ್ರಾಲ್ಲ್ಯಾ ಹ್ಯಾ ಕಾಳಾರ್ ಜೀವನಾ ತಸಲೆ ಅಜೂನ್ ಥೊಡೆ ಜಿಯೆವ್ನ್ ಆಸಾತ್ ತಶೆಂ ಭಗ್ತಾ ಹಿ ಕಾಣಿ ವಾಚ್ತಾನಾ. ಜೀವನ್ ಏಕ್ ಬರೊ ಬರವ್ಪಿ ಜಾವ್ನಾಸ್‌‌‌ಲ್ಲೊ ಮ್ಹಣ್ಚ್ಯಾಂತ್ ಕಾಂಯ್ಚ್ ದುಬಾವ್ ನಾ. ಪುಣ್ ತೊ ಕೊನ್ಶಾಂತ್ ಪಡೊಂಕ್ ಸಾಹಿತಿಕ್ ಸಹಕಾರ್ ಮೆಳಾನಾತ್‌‌‌‌‌‌ಲ್ಲೆಂಚ್ಚ್ ಕಾರಣ್ ಮ್ಹಣ್ ವಿಂಗಡ್ ಸಾಂಗ್ಚಿ ಗರ್ಜ್ ನಾ. ಚಡಾವತ್ ಹ್ಯೆ ಸಮಾಜೆಚ್ಯಾ ಬರವ್ಪ್ಯಾಂಕ್ ಪ್ರತ್ಯೇಕ್ ಜಾವ್ನ್ ಘರ್ಚ್ಯಾಂ ಥಾವ್ನ್ ಪ್ರೋತ್ಸಾಹ್ ಮೆಳಾನಾ ಮ್ಹಣ್ಚ್ಯಾಕ್ ಜೀವನ್ ಎಕ್ಲೊ ಸಾಕ್ಸ್ ತರ್, ಆನ್ಯೇಕಾ ರಿತಿನ್ ಶೆಜಾರಿ ವಠಾರಾ ಥಾವ್ನ್ ‘ಬರವ್ಪಿ ಅರ್ಧೆ ಪಿಶೆ’ ಮ್ಹಳ್ಳೆಂ ಅಣ್ಕಾಣೆಂಯೀ ಆಯ್ಕೊಂಕ್ ಮೆಳ್ತಾ ಮ್ಹಣ್ತಾನಾ ಜೀವನಾ ತಸಲ್ಯಾ ಬರವ್ಪ್ಯಾಕ್ ಬರಂವ್ಚಿ ಉರ್ಬಾ ಕುಸ್ಕೊಂಚ್ಯಾಂತ್ ವಿಶೇಸ್ ದಿಸಾನಾ. ಪುಣ್ ಫಕತ್ ಎಕಾ ಸಂಪಾದಕಾನ್ ಧಗೊ ದಿಲ್ಲ್ಯಾಫರಾ ಸರ್ವ್ ಸಂಪದ್ಲೆಂ ಮ್ಹಣ್ ತಿಂತೆರ್ ಸಕಯ್ಲ್ ದವರ್ಚ್ಯಾಂತ್ ಪಿಶೆಂಪಣ್ ಅಶೆಂ ಭಗ್ತಾ. ಹೆಂ ಏಕ್ ಕಾರಣ್ ದೀವ್ನ್ ಆಪ್ಲ್ಯಾ ತಾಲೆಂತಾಕ್ ಕುರಾಡ್ ಮಾರ್ಚ್ಯಾಂತ್ ಅರ್ಥ್ ನಾ ಮ್ಹಣ್ ಭಗ್ತಾ. ಅಶೆಂ ತರ್ ತಾಚಿ ಗತ್‌‌‌ಯೀ ಏಕ್ ಕಾಣಿಂಚ್ಚ್ ಜಾವ್ನ್ ಉರ್ತಾ ಮ್ಹಣ್ಚ್ಯಾಂತ್ ಕಾಂಯ್ಚ್ ದುಬಾವ್ ನಾ.
Very well written Vally baab. Very sad to read. Surprised that even in today’s world such things happen. Dignity is more important than a human life. Human values are taken over by money. Today’s Harsh reality. Well done.
ಕಾಣಿ ಎಕಾಚ್ಚ್ ಧಂಬಾರ್ ವಾಚುನ್ ಕಾಡ್ಲಿ . ತುವೆಂ ನೀಜ್ ಘಡಿತ್ ಕಾಣಿಯೆ ರುಪಾರ್ ವಾಚ್ಪ್ಯಾ ಮುಕಾರ್ ದವರ್ಲಾಂಯ್. ಎಕಾ ಬರ್ಯಾ ಬರೊವ್ಪ್ಯಾ ಥಾವ್ನ್ ಪರತ್ ತಾಣೆಂ ಬರಂವ್ಚಿ ಉಮೆದ್ ದಿಲ್ಯಾಯ್. ಉದ್ದೇಶ್ ಬರೊ ಆಸೊನ್ ಉಪ್ಕಾರ್ ಕೆಲ್ಯಾರೀ ಪರಿಸ್ಥಿತೆಕ್ ಲಾಗೊನ್ ಕಶೆಂ ಆಮ್ಕಾಂ ದುರ್ಸೊಣೆಂ ಅಯ್ಕುಂಕ್ ಮೆಳ್ತಾ ಮ್ಹಳ್ಳ್ಯಾಕ್ ತುಜಿ ಕಾಣಿಂಚ್ಚ್ ಏಕ್ ಉತ್ತೀಮ್ ನಿದರ್ಶನ್ .