ಬಾವೀಸ್ ವರ್ಸಾ೦ಥಾವ್ನ್ ಆಮಿ೦ ಯೆಕಾಮೆಕಾ ಪಳೇತ್ತ್ ಆಸಾ೦ವ್ ಪುಣ್ ಎಕ್‌ಚ್ ಎಕ್ ಸಬ್ದ್ ಆಮಿ೦ ಉಲ೦ವ್ಕ್‌ನಾ೦ವ್; ಎಕ್‌ಚ್ ಎಕ್ ಪಾವ್ಟಿ೦ ಹಾ೦ವೆ೦ ತಿಚೆ ದೊಳೆ ಧರ್‌ಲ್ಲೆನಾ೦ತ್. ‘ತಿಚೆ’ ಮ್ಹಣ್ ಹಾ೦ವೆ೦ ಮ್ಹಳೆ೦ ಕಿತ್ಯಾಕ್ ತಿಕಾ ಗುಲೊಬಿ ರ೦ಗ್ ಆಸ್‌ಲ್ಲ್ಯಾನ್ ತಿ ಎಕ್ ಸ್ತ್ರೀ ಮ್ಹಣ್ ಹಾ೦ವ್ ಸಮ್ಜತಾ೦.
ಕಸಲಿ ಮಜ್ಬೂರಿ! ದೊಳೆ ಘು೦ವ್ಡಾವ್ನ್ ಹಾ೦ವ್ ತಿಕಾ ವಯ್ರ್ ಸಕ್ಲಾ ಪಳೆ೦ವ್ಕ್ ಸಕಾನಾ೦, ತಿರ‍್ಕಾಸ್ ದೊಳೆ ಕರುನ್ ದೊಳ್ಯಾ೦ ಖಾ೦ಚಿ೦ತ್ಲ್ಯಾನ್ ಉಜ್ವ್ಯಾಕ್ ಪಳೆಲ್ಯಾರ್ ಮ್ಹಾಕಾ ವಾರ‍್ಯಾರ್ ಧಲ್ಚೊ ಎಕ್ ಮೆಳ್ಕಟೊ ಪಡ್ದೊ ದಿಸ್ತಾ. ತ್ಯಾ ಪಡ್ದ್ಯಾ ಕುಶಿ೦ತ್ಲ್ಯಾನ್ ಕಸಲೊಗಿ ಅಹಸ್ಯ್ ವಾಸ್ ಯೆತೆಚ್ ಆಸಾ. ದಾವ್ಯಾಕ್ ದೊಳೆ ತಿರ್ಕಾಸ್ಲ್ಯಾರ್ ಆನ್ಯೇಕ್ ಪಡ್ದೊ ದಿಸ್ತಾ ಆನಿ ತಾ೦ತ್ಲ್ಯಾನ್ ಥೊಡೆ ಪಾವ್ಟಿ೦ ಕರ‍್ಪಾಲ್ಲೊ ವಾಸ್ ಯೆತಾ, ಥೊಡೆ ಪಾವ್ಟಿ೦ ರುಚೀಕ್ ವಾಸ್ ಯೆತಾ ಆನಿ ಸಬಾರ್ ಪಾವ್ಟಿ೦ ‘ಹಿಸ್ಸ್ಸ್’ ಆವಾಜಾ ಸ೦ಗಿ೦ ಆ೦ಬೊಟ್ ವಾಸ್ ಯೆತಾ.
ಆನಿ ಮನಿಸ್ ಮ್ಹಣ್ತಾತ್ ಪಳೆ ತೆ, ಥ೦ಯ್ ಯೆತಾತ್, ವೆತಾತ್; ಉಲಯ್ತಾತ್, ಹಾಸ್ತಾತ್, ಝಗಡ್ಟಾತ್ ಆನಿ…ಆಸು೦….ಫುಡೆ೦ ಕಿತೆ೦ ಕಿತೆ೦ ಕರ‍್ತಾತ್. ಮ್ಹಾಕಾ ಕಾ೦ಯಿ೦ಚ್ ಸಮ್ಜಾನಾ. ತಿಕಾ, ಮುಕ್ಲೇಕ್ ಕಾಂಯ್ ಸಮ್ಜಾತಾಗಾಯ್? ಬಾವೀಸ್ ವರ್ಸಾ೦ಥಾವ್ನ್ ಅಶಿ೦ ಉಬಿ೦ ಆಸ್‌ಲ್ಲ್ಯಾ ಆಮ್ಕಾ೦ ಸ೦ಸಾರ್ ಮ್ಹಣ್ಚ್ಯಾಚಿ ವಳಕ್ ನಾ. ಸ೦ಸಾರ್? ತೊ ಮನಿಸ್‌ಗಾಯ್ ಯಾ ….ನಾ, ಮ್ಹಜಿ೦ ಚಿ೦ತ್ನಾ೦ ಫುಡೆ೦ ಸರೊ೦ಕ್ ಸಕಾನಾ೦ತ್
ಪಾ೦ಚ್ ವರ್ಸಾ೦ ಆದಿ೦ ಮ್ಹಜೊ ರ೦ಗ್ ಪಾಚ್ವೊ ಆಸ್‌ಲ್ಲೊ ಪುಣ್ ಆದ್ಲ್ಯಾಚ್ ವರ್ಸಾ ಮ್ಹಾಕಾ ವಯ್ರ್‌ಥಾವ್ನ್ ಸಕಯ್ಲ್ ನಿಳ್ಸ್ಯಾ ರ೦ಗಾನ್ ಮಾಖ್ಲೊ. ಯ್ಯಾಕ್ಕ್! ಮ್ಹಾಕಾ ನಿಳ್ಸೊ ರಂಗ್ ಪಸ೦ದ್ ನಾ. ಇತ್ಲೆ೦ಚ್ ನ್ಹಯ್, ರ೦ಗ್ ಬದ್ಲು೦ಚೆ೦ ಜಾಲ್ಯಾ ಉಪ್ರಾ೦ತ್ ತಾಣಿ೦ ಮ್ಹಜೆರ್ ತೀನ್ ಖಿಳೆ ಮಾರ‍್ಲೆ. ಮ್ಹಾಕಾ ಕಠಿಣ್ ದುಕ್ಲೆ೦. ತಿಕಾಯಿ ಹೆ೦ ಕಳ್ಳೆ೦ ಜಾಯ್ಜೆ….ತಿಚೆ ದೊಳೆ ಭಿಜ್‌ಲ್ಲೆಪರಿ೦ ಅಶೀರ್ ಉದ್ಕಾ-ಶಿರೆ೦ಪರಿ೦ ದೋನ್ ತಿಚ್ಯಾ ಹೆವ್ಶಿಲ್ಯಾನ್ ಆನಿ ತೆವ್ಶಿಲ್ಯಾನ್ ಉದೆಲೆ ಆನಿ ಪಾಜ್ರೊ೦ಕ್ ಲಾಗ್ಲೆ. ಭಾಯ್ರ್ ಶಿರಾ೦ಧಾರಿ೦ಚೊ ಪಾವ್ಸ್ ವೊತ್ತಾಲೊ. ಹು೦.
ಠೊಕ್‌ಲ್ಲ್ಯಾ ತ್ಯಾ ತೀನ್ ಖಿಳ್ಯಾ೦ಕ್ ತಾಣಿ೦ ತೀನ್ ಪಾಯ್ನೆಲಾ೦ ಉಮ್ಕಾಳಾಯ್ಲಿ೦. ತೆಗಾ೦ ದೆವಾಚಿ೦ ಪಾಯ್ಜೆಲಾ೦ ಖ೦ಯ್ ತಿ೦. ಅಶೆ೦ ಮ್ಹಣ್ಚೊ ತಾಳೊ ಮ್ಹಾಕಾ ಆಯ್ಕಾಲೊ. ಥ೦ಯ್ಸರ್ ಯೆತೆಲ್ಯಾ೦ಚ್ಯಾ ತಕ್ಲ್ಯಾ೦ಚೆ ತಾಳ್ವೆ ಮಾತ್ರ್ ಮ್ಹಾಕಾ ದಿಸ್ತಾಲೆ ಆನಿ ದೀಷ್ಟ್ ಸಕಯ್ಲ್ ಕರುನ್ ಹಾಂವ್ ಪಳೆ೦ವ್ಕ್ ಸಕಾನಾತ್‌ಲ್ಲೊ೦. ಮುಕ್ಲೆಕ್‌ಯಿ ತಶೆ೦ಚ್ ಜಾತಾಲೆ೦ ಜಾಯ್ಜೆ. ಅಶೆ೦ ಕಿತ್ಯಾಕ್ ಹಾ೦ವ್ ಮ್ಹಣ್ತಾ೦? ಮುಕ್ಲ್ಯಾ ‘ಗುಲೊಬಿ’ಕ್ ಮ್ಹಣ್ ಮ್ಹಣೊ೦ಕ್ ನಜೊ? ಹು೦. ತರ್ ತಿ ಮ್ಹಾಕಾ ನಿಳ್ಸ್ಯಾಕ್ ಕಿತೆ೦ ಮ್ಹಣ್ ಆಪಯ್ತ್? ಮ್ಹಾಕಾ ಹಾಸೊ೦ಕ್ ಆಯ್ಲೆ೦ ಪುಣ್ ಕಪಾಲಾಕ್ ತೀನ್ ಖ್ಹಿಳೆ ಮಾರ‍್ಲ್ಯಾ ಉಪ್ರಾ೦ತ್ ಹಾಸ್ಚೆ೦ ತರಿ ಕಶೆ೦? ತೇಗ್ ದೇವ್ ಖ೦ಯ್. ಕೋಣ್ ಆಸ್ಯೆತ್? ಹಾಂವೆ೦ ದೆವಾಕ್‌ಚ್ ಪಳೆ೦ವ್ಕ್ ನಾ-ಮೂ? ಗುಲೊಬಿಚೆರ್ ತಾಣಿ೦ ಖ್ಹಿಳೆ ಮಾರುನ್ ತಿ೦ ಪಾಯ್ನೆಲಾ೦ ಉಮ್ಕಾಳಾಯಿಲ್ಲಿ೦ ತರ್…ಛೆ ಛೆ…ಕಸಲೊ ಸ್ವಾರ‍್ಥಿ ಹಾಂವ್? ತಿಕಾ ದುಕ್ಚೆ೦ ನಾ ಆಸ್‌ಲ್ಲೆ೦? ಆನಿ ತಾಣಿ೦ ಪೆಟ೦ವ್ಚ್ಯೊ ತ್ಯೊ ಧು೦ವ್ರಾ೦-ಕಾಡಿಯೊ? ಮ್ಹಜಿ ಸ೦ಗತ್ ಸೊಡ್ಯಾ೦. ಕಿತ್ಯಾಕ್ ಸೊಡ್ಯಾ೦? ತ್ಯೊ ಧು೦ವ್ರಾ ಕಾಡಿಯ್ಯೊ ತುಕಾ ದಣ್ಸಿನಾ೦ತ್? ಪುಣ್ ತು೦ ತುಕಾಚ್ ದಾದ್ಲೊ ಮ್ಹಣ್ ಸಮ್ಜಾತಾಯ್ ನ್ಹಯ್? ದಾದ್ಲೊ?
ಹು೦! ಉಡಾಸ್ ಆಯ್ಲೊ ಮ್ಹಾಕಾ. ತಿ ವಣದ್, ತ್ಯೊ ವಣದಿ….ಆಯಿಲ್ಲ್ಯಾ ಗೆಲ್ಲ್ಯಾ೦ನಿ ತೆ೦ಚ್ ಮ್ಹಣ್ಚೆ೦ ಆಸ್‌ಲ್ಲೆ೦. ಎಕ್ ಪಾವ್ಟಿ೦ ಕೊಣೆ೦ಗಿ – ಪಳೆ, ಹ್ಯೊ ವಣದಿ ಕಿತ್ಲ್ಯೊ ಮೆಳ್ಕಟ್ ಜಾಲ್ಯಾತ್ – ಅಶೆ೦ ಮ್ಹಳ್ಳೆ೦. ತವಳ್ ಆನ್ಯೇಕ್ಲ್ಯಾನ್/ಆನ್ಯೇಕ್ಲೆನ್ ಜಾಪ್ ದಿಲಿ – ಆಮ್ಚಿ೦ ಕರ‍್ತುಬಾ೦ ಲಿಪ೦ವ್ಕ್ ಹ್ಯೊ ವಣದಿ ಪುರೊ. ಹಾ೦, ವ್ಹಯ್. ಕರ‍್ತುಬಾ೦, ಕಸಲಿ೦ ಕರ‍್ತುಬಾ೦? ಮ್ಹಾಕಾ ಸಮ್ಜಾನಾತ್‌ಲ್ಲಿ೦.
ಕಾ೦ಯ್ ಗುಲೊಬಿಕ್ ಸಮ್ಜತಾಗಾಯ್? ತೆ೦ಚ್ ಜಾಣಾ೦.
ಮ್ಹಾಕಾ ರಾತಿಚಿ ನೀದ್ ಪಡ್ಚಿಚ್ ಮ್ಹಳ್ಳಿಚ್ಚ್ ನಾ. ಕಿತೆ೦ ನ್ಹಯ್ ತರ್ ಕಿತೆ೦ ಥ೦ಯ್ಸರ್ ಘಡೊನ್೦ಚ್ ಆಸ್ತಾ ಪುಣ್ ಆಮಿ ಮಾತೆ೦ ಘು೦ವ್ಡಾವ್ನ್, ಮಾತೆ೦ ಮುಳಾ೦ತ್ ಘಾಲುನ್ ಪಳೆ೦ವ್ಕ್ ಸಕಾನಾ೦ವ್; ತಕ್ಲ್ಯಾ೦ಚೆ ತಾಳ್ವೆ ಮಾತ್ರ್ ಆಮ್ಕಾ೦ ದಿಸ್ತಾತ್ ಮ್ಹಣ್ ಹಾ೦ವೆ೦ ಮ್ಹಳೆ೦, ಮುಕಮಳಾ೦ ದಿಸನಾ೦ತ್. ಪುಣ್ ಹಾ೦, ತಾಳೆ/ಆವಾಜ್ ಆಯ್ಕಾತಾತ್. ಪರಿಹಾಸ್ಯ್ ಆಯ್ಕಾ – ಎಕೆ ರಾತಿ೦ ಎಕಾ ದಾದ್ಲ್ಯಾ ಸಾ೦ಗಾತಾ ಆಯಿಲ್ಲಿ ತಿ ಎಕ್ಲಿ ಮ್ಹಣಾಲಿ. ‘ಹಾ೦ವ್ ತುಜೊ ಮೋಗ್ ಕರ್ತಾ೦, ಡಾರ‍್ಲಿ೦ಗ್!’ ತೊ ದಾದ್ಲೊ ಆ೦ಬೊಟ್ ಹಾಸೊ ಹಾಸ್ಲೊ. ‘ತರ್ ಮ್ಹಜೆಲಾಗ್ಚೆ ಪಾ೦ಯ್ಶಿ೦ ರುಪಯ್ ಕಿತ್ಯಾಕ್ ಘೆತಾಯ್?’ ಅಶೆ೦ ವಿಚಾರಿ ಲಾಗ್ಲೊ. ‘ಆನಿ ಘೆನಾಸ್ತಾ೦ ಕಿತೆ೦?’ ತಿಣೆ೦ ಉತ್ರಾ೦ ಪಾಟಿ೦ ಮಾರ‍್ಲಿ೦. ‘ಮ್ಹಾಕಾ ಆ೦ಜ್ ಮ್ಹಣ್ತಾಯ್, ಮ್ಹಾಕಾ ಪಳೆತಾನಾ ತುಕಾ ಜಿವಾ೦ತ್ ಕಿತೆ೦ ಕಿತೆ೦ ಜಾತಾ ಮ್ಹಣ್ತಾಯ್….’
‘ವ್ಹಯ್ ತೆ೦, ಖರೆ೦ಚ್!’
‘ತರ್ ಘಡಿಯೆ ಘಡಿಯೆ ತ್ಯಾ ಕುಡಾಕ್ ವಚುನ್ ತೆ೦ ಕಸಲೆ೦ಗೀ ಸ೦ಕ್‌ಪಾಷಣ್ ಘೊಟುನ್ ಯೆತಾಯ್ ಆನಿ ಮ್ಹಜೆ೦ ಸತ್ತ್ಯಾನಾಸ್ ಕರ‍್ತಾಯ್?’
‘ಆಮ್ಚ್ಯಾ ತಸಲ್ಯಾ೦ಚೊ ಮೋಗ್ ಮ್ಹಳ್ಯಾರ್ ಹೊಚ್ಚ್ ಮ್ಹಜೆ ರಾಣಿಯೆ!’ ತಾಣೆ ಜಾಪ್ ದಿಲ್ಲಿ. ‘ಹಾಕಾ ಮ್ಹಣ್ತಾತ್ ಮೋಗ್. ಹೊ ನಾತ್‌ಲ್ಲೊ ತರ್ ಆಮಿ ಹ್ಯಾ ವಣದಿ೦ಪರಿ೦ ವರ್ಸಾ೦ಗಟ್ಲ್ಯಾನ್ ಯೆಕಾಮೆಕಾ ಪಳೆವ್ನ್೦ಚ್ ರಾವಜೆ ಆಸ್ತೆ೦. ಸ೦ಕ್‌ಪಾಷಣ್ ಮ್ಹಣಾಲೆ೦ಯ್? ಎಕಾ ದಿಸಾ ಹಾ೦ವ್ ಇ೦೦ಗ್ಲಿಷ್ ಘೊಟ್ಟಾ೦ ಪಳೆ ಆನಿ ಹೆ೦ ಕುಡ್ ಪೊಶ್ ಕರ್ತಾ೦, ಹ್ಯೊ ವಣದಿ ನಿದಾಯ್ತಾ೦…..’
‘ತುಜೆ೦ ಪುರೊ-ಹಾ೦!’ ತಿಣೆ ಮ್ಹಳ್ಳೆ೦, ಹು೦,ಹೂ೦ ಕರುನ್. ‘ಉಲಯ್ತಾನಾ ಚತ್ರಾಯ್. ವಣದಿ೦ಕ್‌ಯಿ ದೊಳೆ, ಕಾನ್ ಆಸಾತ್ ಮ್ಹಣ್ ಹಾ೦ವೆ೦ ಆಯ್ಕಾಲಾ೦…’
‘ಸಕ್ಕಡ್‌ಯಿ ಆಯ್ಕಾತಾಯ್ ತು೦!’ ತಾಣೆ ಮ್ಹಳೆ೦. ‘ದುಸ್ರೊ ಯೆತಾನಾ ಆನಿ ಕಿತೆ೦ ಮ್ಹಣ್ತಾಯ್ ಕಿತೆ೦ಗಿ? ಹ್ಯಾ ತೀನ್ ಪಾಯ್ನೆಲಾ೦ಕ್‌ಯಿ ಜೀವ್ ಆಸಾ ಮ್ಹಣ್ತೆಲೆ೦ಯ್….’
‘ಖ೦ಚಾ ಕರ‍್ಮಾಕ್ ಉಮ್ಕಾಳಾಯ್ಲ್ಯಾ೦ತ್ ಹಿ೦ ಪಾಯ್ನೆಲಾ೦?’
‘ದೇವ್, ಹಾ೦ಗಾಸರ್‌ಯಿ ಜಾಯ್, ಮ್ಹಜೆ ರಾಣಿಯೆ!’
‘ದೆವಾಕ್ ದೊಳೆ ನಾ೦ತ್ ತರ್?’ ತಿ ಸ್ತ್ರೀ ಮುರ‍್ಮುರ‍್ಲಿ. ‘ಸ ಜೊಡಿ ದೊಳೆ ಆಮ್ಕಾ೦ಚ್ ಪಳೆತಾತ್!’
‘ಪಳೆ೦ವ್ದಿತ್!’ ತೊ ಹಾಸ್ಲೊ. ‘ಇತ್ಲ್ಯೊ ವ್ಹಡ್ ಆನಿ ರೂ೦ದ್ ವಣದಿ ಆಮ್ಕಾ೦ ಪಳೆ೦ವ್ಕ್ ಸಕಾನಾ೦ತ್ ನ್ಹಯ್?’
‘ವ್ಹಡ್ಲೊ ಕೊಮಿಕ್ ಮನಿಸ್ ತು೦! ಯೆ ಆತಾ೦ ಹಾ೦ಗಾಸರ್’ ತಿಣೆ ಮ್ಹಳೆ೦. ‘ದ೦ದ್ಯಾಚೊ ವೇಳ್…ಬೆಕಾರ್ ಉಲವ್ಣ್ಯಾಕ್ ಜಾಗೊ ನಾ.’
ಹ್ಯಾ ದೊಗಾ೦ಚೆ ತಾಳೆ ಆಮ್ಕಾ೦ ಚಡಾವತ್ ಸದಾ೦ಚೆ.
ಫುಡ್ಲೆ೦ ಹಾ೦ವ್ ದೆಕೊ೦ಕ್ ಸಕೊ೦ಕ್ ನಾ ಪುಣ್ ಗುಲೊಬಿಚೊ ಗುಲೊಬಿ ರ೦ಗ್ ತ್ಯಾ ಮಸ್ಕ್ ಉಜ್ವಡಾ೦ತ್‌ಯಿ ಆನಿಕ್‌ಯಿ ಗುಲೊಬಿ ಜಾಲ್ಲೆಪರಿ೦ ಮ್ಹಾಕಾ ದಿಸ್ಲೊ. ತಾಕಾ ಕಾ೦ಯ್ ದಿಸ್ತಾಲೆ೦ಗಾಯ್?
ಭ್ರಮಿದ್ ಮ್ಹಜಿ, ಹು೦. ಕಿತೆ೦, ಹಾ೦ವ್ ಕಾ೦ಯ್ ಮುಕ್ಲ್ಯಾ ಗುಲೊಬಿಚೆರ್ ಮೊಗಾರ್ ಪಡ್ಲಾ೦? ಆವೊಯ್! ಹಾ೦ವ್ ಕಿತೆ೦ ಜಾಣಾ೦ ಮೊಗಾ ವಿಷಾ೦ತ್? ತೊ ದಾದ್ಲೊ ಮ್ಹಣ್ತಾಲೊ ನ್ಹಯ್? ಆಮ್ಚ್ಯಾ ತಸಲ್ಯಾ೦ಚೊ ಮೋಗ್ ಹೊಚ್ಚ್ ರಾಣಿಯೆ, ಅಶೆ೦? ತಿ೦ ತಸಲಿ೦ ತರ್ ಆಮಿ೦ ಕಸಲಿ೦? ಆಮಿ೦ ತಸಲಿ೦, ಅಸಲಿ೦, ಕಸಲಿ೦ಯಿ ತರ್ ಆಮ್ಚೊ ಮೋಗ್ ಕಸಲೊ? ಹಾ೦ವ್ ನೆಣಾ೦. ಭುಜಾ೦ ಉಡೊವ್ಯಾ೦ ಮ್ಹಳ್ಯಾರ್, ತೆ೦ಯೀ ಜಾಯ್ನಾ. ತರ್ ಅಸಲಿ೦ ಚಿ೦ತ್ನಾ೦ ಕಶಿ೦ ಮ್ಹಜೆ ಭಿತರ್ ಉಬ್ಜಾತಾತ್? ಫಾತ್ರಾ ಕಾಳಿಜ್ ಮ್ಹಳ್ಳೆ೦ ಹಾ೦ಗಾಸರ್‌ಚ್ ಆಯ್ಕಾಲಾ೦ ಪುಣ್ ಮ್ಹಾಕಾ ದಿಸ್ತಾ ಫಾತ್ರಾ ಭಿತರ್‌ಯಿ ಎಕ್ ಕಾಳಿಜ್ ಆಸಾ, ತೆ೦ ರಡ್ಟಾ, ಮೊಗಾನ್ ತೊವ್ತಾ ಆನಿ ಕಸಲೆ೦ಯಿ ಮೊವಾಳ್, ರೊಸಾಳ್ ಆನಿ ಉಬಾಳ್ ಪಟ್ಲುನ್ ಧರು೦ಕ್ ಆಶೆತಾ.
ಕೊಣಾಕ್? ಬಾವೀಸ್ ವರ್ಸಾ೦ಚ್ಯಾ ಮ್ಹಜ್ಯಾ ಸಾ೦ಗಾತಿಣಿಕ್?
ಹಾ೦! ತಿತ್ಲ್ಯಾರ್ ಪಾವ್ಲೊಯ್ ತು೦? ಸಾ೦ಗಾತಿಣ್? ಅಜ್ಯಾಪ್‌ಚ್ ಜಾಯ್ಜೆ ಅಶೆ೦ ಘಡೊ೦ಕ್.
ಕಿತ್ಯಾಕ್ ನಜೊ? ಅಜ್ಯಾಪಾ೦ ಖಾತಿರ್ ದೆವಾಕ್ ಧು೦ವ್ರಾ ಕಾಡಿಯೊ ಲಾವ್ನ್ ಮಾಗಾನಾ೦ತ್? ಹಾ೦ಗಾಸರ್‌ಚ್ ಯೆ೦ವ್ಚಿ೦ ಹ್ಯಾ ಪಾಯ್ನೆಲಾ೦ಕ್ ಪಳೆವ್ನ್ ಹಾತ್ ಜೊಡಿನಾ೦ತ್, ಮಾಗಾನಾ೦ತ್? ಗರೀಬಾಯೆಕ್ ಲಾಗುನ್, ಹೆರಾ೦ನಿ ಫಸಯಿಲ್ಲ್ಯಾಕ್ ಲಾಗುನ್, ಮ್ಹಜ್ಯಾಚ್ ಮಸ್ತೆಕ್ ಲಾಗುನ್ ಹಾ೦ವ್ ಹಾ೦ಗಾಸರ್ ಪಾವ್ಲ್ಯಾ೦ ದೆವಾ; ಮ್ಹಜ್ಯಾ ಪುತಾಚ್ಯಾ ಪಿಡೆಕ್ ಲಾಗುನ್…ಹಿ೦ ಮಾಗ್ಣಿ೦ ಹಾ೦ವೆ೦ ಆಯ್ಕಾಲ್ಯಾ೦ತ್ ಆನಿ ತವಳ್ ಮ್ಹಾಕಾ ಹ್ಯಾ ತೀನ್ ಖಿಳ್ಯಾ೦ನಿ೦ ಉಬ್ಜಯಿಲ್ಲ್ಯಾ ಘಾಯಾ೦ಕ್ ಮುಲಾಮ್ ಸಾರಯಿಲ್ಲೆಪರಿ೦ ಜಾತಾ……
ಆನಿ ಎಕಾ ದಿಸಾ ಧಾ-ಬಾರಾ ಜಣಾ೦ಚೊ ಪ೦ಗಡ್ ಹಾ೦ಗಾಸರ್ ರಿಗ್ಲೊ.
‘ಹೊ ದ೦ದೊ ಹಾ೦ಗಾಸರ್ ಬಿಲ್ಕುಲ್ ಚಲ್ಚೊ ನಾ!’ ಮ್ಹಣಾಲೊ ಯೆಕ್ಲೊ. ‘ಹಾ೦ವೆ೦ ಹೆ೦ ಪರಿಸರ್ ಕರೋಡಾ೦ನಿ ಮೊಲಾಕ್ ಘೆತ್ಲಾ೦. ಹಾ೦ಗಾಸರ್ ಎಕ್ ಸ್ಟಾರ್ ಹೊಟೆಲ್ ಉಬಾರ‍್ತೊಲೊ೦….’
ಹಾ೦! ತೊಚ್ಚ್ ಸದಾ೦ಚೊ ತಾಳೊ!
ಹಾ೦ವ್ ಖಿಣಾನ್ ವಳ್ಕಾಲೊ; ಮುಕ್ಲಿಯಿ ವಳ್ಕಾಲಿಗಾಯ್?
‘ಪುಣ್, ಸೇಟ್…’ ಹ್ಯಾ ತಾಳ್ಯಾಕ್ ಹಾ೦ವ್ ವಳ್ಕಾತಾ೦. ಹಾ೦ಗಾಚಿ ಜೆರಾಲ್ ಆ೦ಟಿ ತಿ.
‘ಪುಣ್ ಕಿತೆ೦? ತುಕಾ ದಿಲ್ಲೆ೦ ರುಸುಮ್ ಪಾವನಾ?’ ತೊ ತಾಳೊ ವಿಚಾರ‍್ತಾ. ‘ಯೆದೊಳ್ ಪರ‍್ಯಾ೦ತ್ ಸದಾ೦ಚೊ ಗಿರಾಯ್ಕಿ ಹಾ೦ವ್…’
‘ತಶೆ೦ ನ್ಹಯ್, ಸೇಟ್! ಪುಣ್ ಹೊ ದ೦ದೊ ಫಾಯ್ದ್ಯಾಚೊ, ತುಜ್ಯಾ ಸ್ಟಾರ್ ಹೊಟೆಲಾ೦ತ್…’
‘ಹು೦! ಶಾಣಿ ಆಸಾಯ್ ತು೦, ಮದಾಮ್ಯೆ’, ಸೇಟ್ ಮ್ಹಣಾಲೊ ಮೆಚ್ವಣೇನ್. ‘ಚಿ೦ತುನ್ ಪಳೆತಾ೦. ತ್ಯಾ ಫುಡೆ೦ ಹ್ಯೊ ಮೆಳ್ಕಟ್ ವಣದಿ ಕೊಸ್ಳಾಯ್ಜೆ, ಸೊರೊ ಕಾಡ್ಚೆ೦ ಹೆ೦ ಕಿಚನ್ ಹುಲ್ಪಾಯ್ಜೆ ಆನಿ ಹೆ೦ ಟೊಯ್ಲೆಟ್….ಹೊರ್ರಿಬಲ್…ಕಿತ್ಲ್ಯೊ ಪಿಡಾ ಆಸಾತ್‌ಗೀ ಹಾ೦ಗಾಸರ್….. ಹೆ೦ ಸರ್ವ್ ಧರ‍್ಣಿಸಮಾ ಕರಿಜೆ ಆನಿ ಸಮಾಜೆಕ್ ಕಾಳೊ ತಿಬೊ ಜಾವ್ನಾಸ್ಚೊ ಹೊ ಪ್ಲೊಟ್ ಕ್ಲಿಯರ್ ಕರಿಜೆ. ಥೊಡೊ ಪುಣಿ ಸುಶೆಕ್ ಮೆಳೊ೦ದಿ ಹ್ಯಾ ವಣದಿ೦ಕ್. ಕೊಸಾಳ್ತಾನಾ ಯೆಕಾಮೆಕಾಚೆ ವೆ೦ಗೆ೦ತ್ ತರೀ ಪಡೊ೦ದಿ೦ತ್. ಕಿತ್ಲಿ೦ ವರ್ಸಾ೦ಥಾವ್ನ್ ಯೆಕಾಮೆಕಾ ಪಳೆವ್ನ್ ರಾವ್ಲ್ಯಾ೦ತ್‌ಗಿ, ಕಸಲೆ೦ ಸರ್ವ್ ತಾಣಿ೦ ದೆಕ್ಲಾ೦ ಆನಿ ಆಯ್ಕಾಲಾ೦ಗಿ. ಕಸಲೆ೦ ಪೊಶ್ ಚಿ೦ತಪ್ ಮ್ಹಜೆ೦ ನ್ಹಯ್‌ಗಿ ಮದಾಮ್? ಹಾ೦ವ್ ಕೊಮೆಡಿಯನ್ ಮ್ಹಣ್ ಮ್ಹಣ್ತಾತ್. ಸ೦ಸಾರ್‌ಚ್ ಎಕ್ ಕೊಮಿಕ್ ಕ್ಲಬ್. ವಣದಿ೦ ಭಿತರ್ ಎಕ್ ಕ್ಲಬ್, ವಣದಿ೦ ಭಾಯ್ರ್ ಎಕ್ ಕ್ಲಬ್. ಆಜ್ ಹಾ೦ವ್ ವ್ಹಡ್ಲೊ ಮನಿಸ್, ವ್ಹಡ್ಲೊ ಕೊಮೆಡಿಯನ್….’
‘ಹೆ೦ ಸರ್ವ್ ಮ್ಹಾಕಾ ಸಮ್ಜಾನಾ, ಸೇಟ್.’
‘ಸಮ್ಜೊ೦ಚೆ೦ ನಾ ಪುಣ್ ಹ್ಯಾ ವಣದಿ೦ಕ್ ಸಮ್ಜಾತಾ.’ ತಾಣೆ ಮ್ಹಳೆ೦ ವ್ಹಡ್ಲ್ಯಾ ಹಾಸ್ಯಾನ್. ‘ತ್ಯೊ ಯೆಕಾಮೆಕಾಚ್ಯಾ ವೆ೦ಗೆ೦ತ್ ಕೊಸ್ಳೊನ್ ಪಡೊ೦ಕ್ ರಾಕ್ತಾತ್. ನಾ, ನಾ, ಮದಾಮ್…..ತುಕಾ ಸಮ್ಜಾನಾ. ಸ೦ಸಾರಾರ್ ಕೊಮೆಡಿ ಜಾಯ್ಜೆ, ಮ್ಹಜೆ ತಸಲೊ ಕೊಮೆಡಿಯನ್ ಆಸಾಜೆ. ಹಾ೦ವೆ೦ಚ್ ಬಸಯಿಲ್ಲಿ೦ ಹಿ೦ ತೀನ್ ಪಾಯ್ನೆಲಾ೦; ಸ೦ಸಾರಾನ್ ಮಾ೦ದ್ಚೆ ತೇಗ್ ಅವ್ವಲ್ ಜಿನ್ಸಾ೦ಚೆ ದೇವ್ ಹೆ. ಹಾಣಿ೦ ಆತಾ೦ ಹಾ೦ಗಾಸರ್ ಉಮ್ಕಳೋನ್ ಆಸ್‌ಲ್ಲೆ೦ ಪುರೊ. ಕಶಿ ಆಸಾ ಮ್ಹಜಿ ಕೊಮೆಡಿ?
– ಎಡ್ವಿನ್ ಜೆ ಎಫ್ ಡಿ ಸೊಜಾ
ಕಿಟಾಳಾರ್ ಎಡ್ವಿನಾಚ್ಯೊ ವಿಂಚ್ಣಾರ್ ಮಟ್ವ್ಯೊಕಥಾ :
♦ ಭಾಂಗಾರ್ ಧುಂಪ್ ಆನಿ ದೋನ್ ಥೆಂಬೆ ವಾಯ್ನ್
♦ ಏಕ್ ಕಫ್ ಹುನೊನಿ ಕೊಫಿ
ಕಿಟಾಳಾರ್ ಎಡ್ವಿನಾಚಿ ಕಾದಂಬರಿ :
