ಬೆತ್ಲೆಹೆಮ್

ಹಾ೦ವ್ ಎಕ್ ಲೇಕಕ್.
ಮ್ಹಜಿ ಲಿಕ್ಣಿ ಸ್ವತ೦ತ್ರ್, ಸಿ೦ತಿಮೆ೦ತಾ೦ ಮೋವ್ ಆನಿ ಕಲ್ಪನ್ ಸಕತ್ ಇಟಾಳ್ ಮ್ಹಣ್ ಮ್ಹಜೆ ವಾಚ್ಪಿ ಮ್ಹಣ್ತಾತ್, ವರವ್ಣಿ ದಿತಾತ್.
ಪುಣ್ ಸಬಾರ್ ಪಾವ್ಟಿ೦ ಹಜಾರಾ೦ಚೆ ಮೆಳಿ೦ತ್ ಆಸ್ಲ್ಯಾರಿ ಹಾ೦ವ್ ಎಕ್ಸುರೊ೦ ಜಾತಾ೦, ಚುಕೊನ್ ವೆತಾ೦, ಭಾಯ್ರ್ ಪಡ್ತಾ೦. ಮ್ಹಾಕಾಚ್ ಹಾ೦ವ್ ಸೊದ್ತಾ೦ ಆನಿ ಮ್ಹಾಕಾಚ್ ವೇ೦ಗ್ ಮಾರು೦ಕ್ ಆಶೆತಾ೦.
ಚುಕೊನ್ ಗೆಲ್ಲೊ ವ ತುಟೊನ್ ಗೆಲ್ಲೊ ಕಸಲೊಗಿ ಎಕ್ ಗಾ೦ಚ್ ಮ್ಹಜ್ಯೆ ಜಿವಿತಾ೦ತ್ ಆಸಾ ಮ್ಹಣ್ ಹಾ೦ವ್ ಪಾತಿಯೆತಾ೦.
ಆಮ್ಚ್ಯಾ ವಿಸ್ತಾರ್ ಭಾಗಿಯೆಚ್ಯಾ ಪೆ೦ಟಾಳೆರ್ ಬಸುನ್ ಹಾ೦ವ್ ಅನ೦ತ್ ಆಗಸಾವಯ್ಲಿ೦ ಮೊಡಾ೦ ಮೆಜ್ತಾ೦ ಆನಿ ಗುಪಿತ್ ರಡ್ತಾ೦.
ತೆನ್ನಾ ಮಾಮ್ಮಿ ಮ್ಹಜೆ ಸರ್ಶಿ೦ ಯೆತಾ, ಮ್ಹಾಕಾ ಆರಾಯ್ತಾ ಆನಿ ಮಾತೆ೦ ಪೊಶೆವ್ನ್ ಮ್ಹಾಕಾ “ಬೆತ್ಲೆಹೆಮಾ”ಕ್ ಆಪವ್ನ್ ವರ್ತಾ.
‘ಬೆತ್ಲೆಹೆಮ್’ ಆಮ್ಚೊ ತೆರಾ ಕಮ್ರ್ಯಾ೦ಚೊ ಬ೦ಗ್ಲೊ. ಶೆ೦ಬರ್ ವರ‍್ಸಾ೦ಚಿ ಚರಿತ್ರಾ ಆಸಾ ಹ್ಯಾ ಬ೦ಗ್ಲ್ಯಾಕ್. ಪುಣ್ ಆತಾ೦ ಹಾ೦ತು೦ ಆಸ್ಚಿ೦ ಫಕತ್ ಆಮಿ೦ ತೆಗಾ೦. ಮಾಮ್ಮಿ, ಡೆಡಿ ಆನಿ ಹಾ೦ವ್. ತೆಗಾ೦ಕ್ ಆಮ್ಕಾ೦, ಪಾ೦ಚ್ ಜಣಾ೦ ಕಾಮಾಚಿ೦. ಕಾಳ್ ಬದಲ್ಲಾ ಆನಿ ಆಮಿ ತಾ೦ಕಾ೦ ಕಾಮಾಚಿ೦ ಮ್ಹಣಾನಾ೦. ಘರ್‌ದಾರ್ ಸಾ೦ಬಾಳು೦ಕ್ ಮಜತ್ ದಿ೦ವ್ಚಿ೦ ಮನ್ಶಾ೦ ತಿ೦. ತಾ೦ಕಾಯಿ ಸ್ಥಾನ್ ಆಸಾ, ಮಾನ್ ಆಸಾ ತಸೊಚ್ ಸಾ೦ಬಾಳ್ ಆಸಾ. ಮ್ಹಜ್ಯಾ ಡೆಡಿಕ್ ಚಾ – ಪಾನಾ೦ಚ್ಯೊ ಎಸ್ಟೇಟಿ ಆಸಾತ್. ತೀನ್ ಕಾರಾ೦ ಆಸಾತ್, ಎಕ್ ಖಾಸ್ಕಿ ವಿಮಾನ್ ಆಸಾ.
ಇಕ್ರಾ ವರ್ಸಾಚೆ೦ ಪ್ರಾಯೆರ್ ಮ್ಹಜೆಂ ಪ್ರಥಮ್ ಲೇಕನ್ ಛಾಪುನ್ ಆಯಿಲ್ಲೆ೦ ಆನಿ ಸ೦ತೊಸಾನ್ ಹಾ೦ವ್ ರಾತ್‌ಬರ್ ನಿದ್ಲೊ೦ ನಾ. ಆತಾ೦ ಮ್ಹಾಕಾ ಚವೀಸ್ ಉತರ್‌ಲ್ಯಾ೦ತ್; ಹಾ೦ವ್ ಗಿರೇಸ್ತ್, ಸ್ಪುರದ್ರೂಪಿ ಆನಿ ಹೆರಾ೦ಕ್ ಮೊಸ್ರಾಕ್ ಘಾಲ್ಚ್ಯಾ ಸೊಬಾಯೆಚೆ೦ ಮ್ಹಜೆ೦ಚ್ ಪ್ರೇಮಿಕಾ ಮ್ಹಾಕಾ ಆಸಾ. ತರಿ, ಆತಾ೦ಯ್, ಲೇಕಕ್ ಜಾವ್ನ್ ಇತ್ಲಿ೦ ಪ್ರಗತಿಪರ್ ವರ್ಸಾ೦ ಹಾ೦ವೆ೦ ಪಾಶಾರ್ ಕೆಲಿ೦ ತರಿ ಮ್ಹಜೆ೦ ಖ೦ಚೆ೦ಯಿ ಲೇಕನ್ ಛಾಪುನ್ ಯೆತಾನಾ ಹಾ೦ವ್ ಇಕ್ರಾ ವರ್ಸಾ೦ಚೊಚ್ ಜಾತಾ೦ ಆನಿ ಸ೦ತೊಸಾನ್ ನಾಚ್ತಾ೦. ದಿವಾನ್‌ಖಾನ್ಯಾ೦ತ್ ಸ್ಕೊಚ್ ಘೆವ್ನ್ ಬಸುನ್ ಆಸ್ಚೊ ಡೆಡಿ ಮ್ಹಾಕಾ ತಿರ್ಶ್ಯಾ ದೊಳ್ಯಾ೦ನಿ ಪಳೆತಾ.
ಮ್ಹಜಿ ಮಾಮ್ಮಿ ವಿಶಿಶ್ಟ್ ಆನಿ ವಿಚಿತ್ರ್ ಕಾಲೆತಿಚಿ. ತಿಚೆಥ೦ಯ್ ಮ್ಹಾಕಾ ಆಸ್ಚೊ ಅಬಿಮಾನ್ ಮ್ಹಜ್ಯಾ ಕಾಳ್ಜಾಕ್ ಒಕ್ತಾಚೆ೦ ಬಳ್ ಆನಿ ಕುಡಿಕ್ ಕಾವ್ಜೆಣಿ ಹಾಡುನ್ ಯೆತಾ. ತಿಕಾ ಪಳೆತಾನಾ ಅಮೇರಿಕಾ೦ತ್ಲ್ಯಾ ‘ಸ್ಟ್ಯಾಚು ಒಫ್ ಲಿಬರ್ಟಿ’ ಚೊ ಉಡಾಸ್ ಮ್ಹಾಕಾ ಯೆತಾ. ತೀಕ್ಶ್ಣ್, ಗ೦ಬೀರ್, ಕಸಲೆ೦ಚ್ ತಿಚೆ ನದ್ರೆಥಾವ್ನ್ ಚುಕೊನ್ ವಚಾನಾ. ಬರ‍್ಯಾ೦ತ್ಲೆ೦ ಬರೆ೦ ತಿಕಾ ಜಾಯ್ ಆನಿ ಪಯಿಲ್ಲೆಪಾವ್ಟಿ೦ ಮ್ಹಜ್ಯಾ ಪ್ರೇಮಿಕಾಕ್ ಘೆವ್ನ್ ಹಾ೦ವ್ ತಿಚೆ ಸಾಮ್ಕಾರ್ ಉಬೊ ಜಾಲ್ಲೆವೆಳಿ೦ “ಬರ‍್ಯಾ೦ತ್ಲ್ಯಾ ಬರ‍್ಯಾಕ್ ಬರ‍್ಯಾ೦ತ್ಲೆ೦ ಬರೆ೦ಚ್ ಮೆಳಜೆ”, ಅಶೆ೦ ತಿ ಮ್ಹಣಾಲಿ. ಉಪ್ರಾ೦ತ್ ತಿಣೆ ಮ್ಹಜ್ಯಾ ಪ್ರೇಮಿಕಾಕ್ ಲಾಗಿ೦ ಆರಾಯ್ಲೆ೦ ಆನಿ ತಿಚ್ಯಾ ಕಪಾಲಾಚೊ ಉಮೊ ಘೆತ್ಲೊ. “ಹ್ಯಾ ಪಿಶ್ಯಾ ಲೇಕಕಾಕ್ ತು೦ ಬರ‍್ಯಾನ್ ಸಾ೦ಬಾಳ್”, ತಿ ಮ್ಹಣಾಲಿ. ಮ್ಹಾಕಾಯಿ ಜಬ್ಬೊರ್ ಆಶಾ ಆಯ್ಲಿ ತಿಕಾ ವೆ೦ಗೊನ್ ಉಮೊ ಘೆ೦ವ್ಚಿ; ಪುಣ್ ಕಸಲೆಗಿ ಸಕ್ತೆನ್ ಮ್ಹಾಕಾ ಪಾಟಿ೦ ಧರ್ಲೊ.
ಕಸಲೊಗಿ ಗಾ೦ಚ್ ಘಡ್ಸು೦ಕ್ ಆಯ್ಕಾನಾತ್‌ಲ್ಲೊ.
ಲೇಕಕ್ ತರಿ, ಮ್ಹಜೆ ಪ್ರೇಮಿಕಾಕ್ ವಿವರು೦ಕ್ ಹಾ೦ವ್ ಸಕಾನಾ. ರೊಮಾ೦ತ್ ಸಿಸ್ಟಾಯ್ನ್ ಚ್ಯಾಪಲಾ೦ತ್ ಬಸುನ್ ಆಸ್ಚ್ಯಾ ತರ್ನ್ಯಾ ಕಲಾಕಾರಾ೦ಕ್ ಹಾ೦ವೆ೦ ಪಳೆಯಿಲ್ಲೆ೦. ತಾ೦ಕಾ೦ ತ್ಯಾ ಚ್ಯಾಪಲಾ೦ತ್ಲ್ಯಾ ಪಿ೦ತುರಾ೦ನಿ ಮಿನುಟಾಕ್ ಎಕ್ ನವೆಸಾ೦ವ್ ದಿಸ್ತಾ ಖ೦ಯ್, ತಿ೦ ಪಿ೦ತುರಾ೦ ಪಯಿಲ್ಲೆಪಾವ್ಟಿ೦ ಪಳೆಲ್ಲೆಪರಿ೦. ಮ್ಹಜ್ಯಾ ಪ್ರೇಮಿಕಾಥ೦ಯ್‌ಯಿ ಅಶೆ೦ಚ್. ಹರ್‌ಯೆಕ್ ಪಾವ್ಟಿ೦ ತಿಕಾ ಹಾ೦ವ್ ಪಳೆತಾನಾ, ಪಯಿಲ್ಲೆಪಾವ್ಟಿ೦ ಪಳೆಯಿಲ್ಲೆಪರಿ೦ ಮ್ಹಾಕಾ ಭೊಗ್ತಾ.
ಸತ್ತಾವೀಸ್ ವರ್ಸಾ೦ಚೆ ಪ್ರಾಯೆರ್ ತೆವೀಸ್ ವರ್ಸಾ೦ಚೆ ತಿಚೆಲಾಗಿ೦ ಹಾ೦ವ್ ಲಗ್ನ್ ಜಾಲೊ೦. ಹಿ ಪ್ರಾಯ್ ಆಮಿ೦ಚ್ ವಿ೦ಚುನ್ ಕಾಡ್ಲೆಲಿ. ಆಮ್ಚೆ೦ ಲಗ್ನ್ ಜಾವ್ನ್ ಸ ಮ್ಹಯ್‌ನ್ಯಾ೦ಚೆ ಆವ್ದೆಕ್ ಆಮಿ ವಿದೇಶಾ೦ಚೆ ಭ೦ವ್ಡೆಕ್ ಗೆಲ್ಯಾ೦ವ್.
ಪಾಟಿ೦ ಯೆತೆಚ್ ಆಮಿ ಯಾ ಹೆರ್ ಕೊಣೆ೦ಯಿ ಚಿ೦ತಿನಾತ್‌ಲ್ಲೆ೦ ಘಡೊನ್ ಗೆಲೆ೦. ಮ್ಹಜೊ ಡೆಡಿ ಆನಿ ಮಾಮಿ ತಾ೦ಚ್ಯಾ ಖಾಸ್ಕಿ ವಿಮಾನಾಚ್ಯಾ ಅವ್ಘಡಾ೦ತ್ ಅ೦ತರ್ಲಿ೦. ಕರೋಡಾ೦ಚ್ಯಾ ವಯ್ವಾಟಾಚೊ ಹಾ೦ವ್ ಎಕ್ಸುರೊ ಧನಿ ಜಾಲೊ೦ ಆನಿ ಹ್ಯಾ ‘ಬೆತ್ಲೆಹೆಮಾ’ಚೊ ರಾಯ್. ವಯ್ವಾಟ್ ವಕೀಲಾ೦ ಮುಕಾ೦ತ್ರ್ ಹಾತ್ ಬದ್ಲಿತಾನಾ ಮಾಮ್ಮಿಚ್ಯಾ ಖಾಸ್ಕಿ ಕಮ್ರ್ಯಾ೦ತ್ ತಿಚಿ ಎಕ್ ಪುರಾತನ್ ಡಾಯ್ರಿ ಮ್ಹಾಕಾ ಮೆಳ್ಳಿ. ತಿ ವಾಚ್ತಾನಾ ಮ್ಹಜಿ ಅ೦ತರ್‌ಮುಳಾ೦ ಭು೦ಯ್ಕಾ೦ಪೆಕ್ ವಳಗ್ ಜಾಲಿ೦ :
ಹಾ೦ವ್ ತಾ೦ಚೊ ಖರೊ ಪೂತ್ ನ್ಹಯ್. ಹಾ೦ವ್ ಸ ಮ್ಹಯ್ನ್ಯಾ೦ಚೆ ಬಾಳ್ ಆಸ್ತಾನಾ ಖ೦ಚ್ಯಾಗಿ ಎಕಾ ಅನಾಥ್ ಆಸ್ರ್ಯಾ೦ತ್ಲೊ ಪೊಸ್ಕೊ ಕರುನ್ ತಾಣಿ೦ ಮ್ಹಾಕಾ ಆಪ್ಣಾಯಿಲ್ಲೊ. ಪುಣ್ ನಾತ್‌ಲ್ಲೆ ಹೆರ್ ಕಸಲೆಯಿ ವಿವರ್ ತ್ಯೆ ಡಾಯ್ರಿ೦ತ್; ತರಿ ಆತಾ೦ ತೊ ಚುಕೊನ್ ಗೆಲ್ಲೊ ಗಾ೦ಚ್ ಕಸಲೊ ಮ್ಹಣ್ ಮ್ಹಾಕಾ ಸಮ್ಜೊ೦ಕ್ ಸುರು ಜಾಲ್ಲೆ೦.

***
ಹ್ಯಾ ನೆಮಾಳ್ಯಾ೦ತ್ ಹೆ೦ ಮ್ಹಜೆ೦ ಅ೦ಕಣ್ ಕಾಯಾಮ್.
ಪುಣ್ ಹ್ಯೆ ಪಾವ್ಟಿ೦ ಮ್ಹಜಿ೦ ಖಾಸ್ಕಿ ಸಿ೦ತಿಮೆ೦ತಾ೦ ಲಿಕ್ಚಿ ಪರ್ವಣ್ಗಿ ಸ೦ಪಾದಕಾನ್ ಮ್ಹಾಕಾ ದಿಲ್ಯಾ ಆನಿ ಹಾ೦ವ್ ಲಿಕ್ತಾ೦.
“ನತಾಲಾ೦ಚೆ ಪರ್ಬೆಕ್ ಫಕತ್ ಎಕ್ ಮಯ್ನೊ ಉರ್ಲಾ ಆನಿ ಮ್ಹಾಕಾ ತುಮಿ ಜಾಯ್, ಮಾಮ್ಮಿ, ಡೆಡಿ ! ಹಾ೦ವ್ ನೆಣಾ೦ ಖ೦ಯ್ ಪುಣ್ ಖ೦ಯ್‌ಸರ್ ಪುಣಿ ತುಮ್ಚೆ ಪಯ್ಕಿ ಎಕ್ಲೊ/ಎಕ್ಲಿ ಜೀವ೦ತ್ ಆಸ್ತೆಲಿ೦ ಮ್ಹಣ್ ಹಾ೦ವ್ ಪಾತಿಯೆತಾ೦. ತುಮಿ೦, ಮ್ಹಜಿ೦ ಖರಿ೦ ಆವಯ್ -ಬಾಪಯ್. ಹೆ೦ ವಾಚುನ್ ತುಮಿ ಖ೦ಡಿತ್ ಹ್ಯಾ ನತಾಲಾ೦ಕ್ ‘ಬೆತ್ಲೆಹೆಮಾ’ಕ್ ಯೆತೆಲ್ಯಾತ್ ಮ್ಹಣ್ ಹಾ೦ವ್ ಜಾಣಾ೦. ತುಮ್ಚೆ೦ ನಾ೦ವ್ ಗಾ೦ವ್, ವಿಳಾಸ್ ಠಿಕಾಣೆ೦ ಹಾ೦ವ್ ನೆಣಾ೦. ಪುಣ್ ಹಾ೦ಗಾಸರ್ ಮ್ಹಜೆ೦ ನಾ೦ವ್, ಗಾ೦ವ್, ‘ಬೆತ್ಲೆಹೆಮಾ’೦ತ್ ಮ್ಹಾಕಾ ವಾಗಯಿಲ್ಲ್ಯಾ೦ಚೆ೦ ನಾ೦ವ್ ಹಾ೦ವೆ೦ ದಿಲಾಂ.
ತುಮ್ಚೆ೦ ಯೆಣೆ೦ ಮ್ಹಜ್ಯಾ ವಾ೦ಟ್ಯಾಕ್ ಜಾವ್ನ್ ಆಸ್ತೆಲೆ೦ ತ್ಯಾ ತೆಗಾ೦ ರಾಯಾ೦ಚ್ಯಾ ಯೆಣ್ಯಾಪರಿ೦!”

***
ಮೊಗಾಚ್ಯಾ ಪುತಾ,
ಹಿ೦ ಉತ್ರಾ೦ ಹಾ೦ವ್ ಲಿಕ್ತಾನಾ ಫಾ೦ತ್ಯಾಚಿ೦ ಚ್ಯಾರ್ ವ್ಹಾಜ್ಲ್ಯಾ೦ತ್.
ಸೊಬಿತ್ ಆನಿ ದೆವಾಳ್ ರಿತಿರ್ ತು೦ವೆ೦ ಬಾ೦ದ್‌ಲ್ಲ್ಯಾ ‘ಬೆತ್ಲೆಹೆಮಾ’ಚ್ಯಾ ಗರ್ದನಾಚ್ಯಾ ಗೊಟ್ಯಾ೦ತ್ ಹೆ೦ ಪತ್ರ್ ತುಕಾ ಮೆಳ್ತಾನಾ ಮ್ಹಜೆ೦ ತೀನ್ ಘ೦ಟ್ಯಾ೦ಚೆ೦ ಪಯ್ಣ್ ಸ೦ಪ್ಲಾ೦ ಆಸ್ತೆಲೆ೦. ಆನಿಕಿ ಮ್ಹಾಕಾ ಘ೦ಟೆ ಆನಿ ಮಯ್ಲಾ೦ ವಚು೦ಕ್ ಆಸಾ.

ತುಜೆ೦ ಅಸ್ಪಶ್ಟ್ ಅ೦ಕಣ್ ವಾಚ್ತಾನಾ ತುಜೆ ತಸಲ್ಯಾ ಕರೋಡ್‌ಪತಿಚಿ ಆವಯ್-ಬಾಪಯ್ ಜಾ೦ವ್ಕ್ ತುಜ್ಯಾ ಬ೦ಗ್ಲ್ಯಾ ಸಾಮ್ಕಾರ್ ಎಕ್ ಲಾಯ್ನ್೦ಚ್ ಆಸ್ತೆಲಿ ಮ್ಹಣ್ ಹಾ೦ವ್ ಪಾತಿಯೆಲ್ಲಿ೦. ಪುಣ್ ಕಾಲ್ಚ್ಯೆ ಸಾ೦ಜೆರ್ ಸ ಘ೦ಟ್ಯಾರ್, ತ್ಯಾ ಹಿ೦ವಾಳಾ೦ತ್ ತುಜ್ಯಾ ಬ೦ಗ್ಲ್ಯಾಚಿ ಕಾ೦ಪಿಣ್ ವ್ಹಾಜಯ್ತಾನಾ ತಸಲಿ ಕಸಲಿಯಿ ಲಾಯ್ನ್ ನಾತ್‌ಲ್ಲಿ ಪಳೆವ್ನ್ ಮ್ಹಜೊ ಸ್ವಾರ್ಥ್ ಥ೦ಡ್ ಜಾಲೊ.
ಹಾ೦ವ್ ಸ್ವಾರ್ಥಿ ಸ್ತ್ರೀ, ಪುತಾ.
‘ಮಾ೦’ ಮ್ಹಳ್ಳ್ಯಾ ಎಕಾ ಸಬ್ದಾಕ್ ವರ್ಸಾ೦ಥಾವ್ನ್ ಸ್ವಾರ್ಥಾನ್ ಆಶೆಲ್ಲಿ೦ ಹಾ೦ವ್. ಆತಾ೦ ಪಾಶಾರ್ ಜಾಲ್ಲ್ಯಾ ಧಾ ಘ೦ಟ್ಯಾ೦ನಿ ತು೦ವೆ೦ ಆನಿ ತುಜೆ ಪತಿಣಿನ್ ಹೊ ಅಬಾವ್ ಪರಿಪೂರ್ಣ್ ರಿತಿರ್ ಭರ್ಲಾ.
ಆನಿ ಆತಾ೦, ಹಾ೦ವೆ೦ ಹಾ೦ಗಾಸರ್ ರಾ೦ವ್ಚೆ೦ ಸಾರ್ಕೆಂ ನ್ಹಯ್. ತು೦ವೆ೦ ಮ್ಹಾಕಾ ಸೊಧುನ್ ಕಾಡ್ಚೆ೦ ಕಸಲೆ೦ಚ್ ಪ್ರೇತನ್ ಕರು೦ಕ್ ನಜೊ ಆನಿ ಕರಿಸೊನಾ ಮ್ಹಳ್ಳಿ ಭಾಸ್ ತು೦ವೆ೦ ಹ್ಯೆ ರಾತಿ೦ ಮ್ಹಕಾ ದೀಜೆ, ಹಾ೦ವ್ ತುಜ್ಯಾ ಸಾಮ್ಕಾರ್ ನಾ ತರಿ.
ಹಾ೦ವ್ ಹಾ೦ಗಾಸರ್ ಎಕ್ಸುರಿ೦ಚ್, ಹ್ಯಾ ತುಜ್ಯಾ ‘ಬೆತ್ಲೆಹೆಮಾ’೦ತ್ ರಾವೊ೦ಕ್ ಆಶೆಲಿ೦ ಫಕತ್ ಥೊಡ್ಯಾ ಘ೦ಟ್ಯಾ೦ಕ್. ತ್ಯೆ ಖಾತಿರ್ ತುಮ್ಕಾ೦ ಹಾ೦ವೆ೦ ವತ್ತಾಯೆನ್ ಮದ್ಯಾನೆಚ್ಯಾ ಮಿಸಾಕ್ ದಾಡ್ಲೆ೦ ಆನಿ ತ್ಯಾ ಉಪ್ರಾ೦ತ್ ತುಮಿ೦ ‘ಕ್ರಿಸ್‌ಮಸ್ ಬೊಲ್’ ಹಾಕಾಯಿ ವಚಾಜೆ ಮ್ಹಣ್ ಹಾ೦ವೆ೦ ಕಡ್ಡಾಯ್ ಕೆಲಿ.
ಆತಾ೦ ಹಾ೦ವ್ ವೆತಾ೦.
ಠಿಕಾಣೊ ಆನಿ ವಿಳಾಸ್ ಕಳಯ್‌ನಾಸ್ತಾ೦ ಹಾ೦ವ್ ವೆತಾ೦ ತರಿ ಥೊಡ್ಯೊ ಸ೦ಗ್ತಿ ತುಕಾ ಕಳ೦ವ್ಕ್ ಅಪೇಕ್ಶಿತಾ೦:
ಯೆದೊಳ್ಚೆ ಭಿತರ್ ಹಾ೦ವ್ ತುಜಿ ಖರಿ ಆವಯ್ ನ್ಹಯ್ ಮ್ಹಳ್ಳೆ೦ ತುಮ್ಕಾ೦ ದೊಗಾ೦ಯ್ಕಿ ಕಳಿತ್ ಜಾಲಾ೦. ಆವ್ಚಿತ್ ದಾರಾರ್ ಉಬಿ ಜಾಲ್ಲ್ಯೆಕ್ ಪಾಟಿ೦ ಫುಡೆ೦ ಪಳೆನಾಸ್ತಾ೦, ದಾಕ್ಲೆ ರುಜ್ವಾತಿ ವಿಚಾರಿನಾಸ್ತಾ೦ ‘ಮಾ೦’ ಮ್ಹಣೊನ್ ತುಮಿ೦ ಮ್ಹಾಕಾ ಗೊಪಾ೦ತ್ ಘೆತ್ಲೆ೦ ತರಿ ಫಟ್ವೊ೦ಚೆ ತಿತ್ಲೊ ಭೆರೊ ತು೦ ನ್ಹಯ್.
ಕಿತೆ೦ಗಿ, ಕಸಲೊಗಿ ಎಕ್ ಗಾ೦ಚ್ ಹ್ಯೆ ನತಾಲಾ೦ಚೆ ರಾತಿ೦ ಘಡ್ಸು೦ಕ್ ಆಸ್‌ಲ್ಲೊ ಆನಿ ತೊ ಘಡ್ಸಾಲೊ.
ಹಾ೦ವ್ ಎಕಾ ಪ್ರಾಯ್ವ೦ತಾ೦ಚ್ಯಾ ಘರಾಥಾವ್ನ್ ಆಯ್ಲ್ಯಾ೦!
ಹೊ ದೇಶ್ ಸುದ್ರಾಲಾ ಆನಿ ಆಮ್ಕಾ೦ ಪ್ರಾಯೆಸ್ತಾ೦ಕ್ ಮ್ಹಾತಾರಿ೦/ಮ್ಹಾತಾರೆ ಮ್ಹಣಾನಾ೦ತ್. ಬಗಾರ್ ‘ಸೀನಿಯರ್ ಸಿಟಿಜನ್ಸ್’ ಮ್ಹಣ್ತಾತ್. ಹ್ಯಾಚ್ ಸುದ್ರಾಪಾಕ್ ಲಾಗೊನ್ ಮ್ಹಜ್ಯಾ ಚವ್ಗಾ೦ ಭುರ್ಗ್ಯಾ೦ನಿ ಮ್ಹಾಕಾ ಪ್ರಾಯೆಸ್ತಾ೦ಚ್ಯಾ ನ್ಹಯ್ ಸೀನಿಯರ್ ಸಿಟಿಜನ್ಸಾ೦ಚ್ಯಾ ಘರಾ೦ತ್ ದಾಕಲ್ ಕೆಲೆ೦, ಅಟ್ರಾ ವರ್ಸಾ೦ ಆದಿ೦. ಹಾ೦ವ್ ತಾ೦ಕಾ೦ ದುರ್ಸಾನಾ ಕಿತ್ಯಾಕ್ ತಾತಾ೦ಕಾ೦ ತಾತಾ೦ಚ್ಯೊ ವಾಟೊ ಆಸಾತ್.

ಪುಣ್ ಮೊಗಾಕ್ ಆ೦ವ್ಡೆ೦ವ್ಚೆ೦ ಸ್ವಾರ್ಥಿಪಣ್ ತರ್ ಹಾ೦ವ್ ಖ೦ಡಿತ್ ಜಾವ್ನ್ ಸ್ವಾರ್ಥಿ. ತುಮಿ೦ ಮ್ಹಜೆಥ೦ಯ್ ಕಿತೆ೦ ದೆಕ್ಲಾ೦ ತೆ೦ ಹಾ೦ವ್ ನೆಣಾ೦ ಪುಣ್ ಹಾ೦ವೆ೦ ‘ಬೆತ್ಲೆಹೆಮ್’ ದೆಕ್ಲಾ೦,
ತುಜ್ಯಾ ಹ್ಯಾ ‘ಬೆತ್ಲೆಹೆಮಾ’೦ತ್. ಮ್ಹಜೆ ಜಾಣ್ವಾಯೆ ಪ್ರಕಾರ್ ಹ್ಯಾ ಸಬ್ದಾಚೊ ಅರ್ಥ್ ಜಾವ್ನಾಸಾ ಸಮಾದಾನೆಚೊ ಗರ್ಭ್, ಆವಯ್ಚ್ಯಾ ಗರ್ಭಾಪರಿ೦. ಹಾ೦ತು೦ ಆಸ್‌ಲ್ಲಿ೦ ನೋವ್ ಮ್ಹಯ್‌ನೆ ಪರ್‌ಯಾ೦ತ್ ಪುಣಿ ಬೆಫಿಕಿರೆನ್ ವಾಡ್ತಾತ್, ಕಿತೆ೦ಚ್ ತಾ೦ಕಾ೦ ಉಣೆ೦ ನಾ.
ಜರ್ತರ್ ತುಕಾ ಉಣೆಪಣ್ ಬೊಗ್ಲಾ೦ ತರ್ ಹಿ ತುಜಿ ಚೂಕ್ ಸಮ್ಜಣಿ.
ಥೊಡ್ಯಾ ಘ೦ಟ್ಯಾ೦ಕ್ ತುಜಿ ಆವಯ್ ಜಾಲ್ಲ್ಯೆಕ್ ತುಕಾ ಎಕ್ ತಿದ್ವಣಿ ದಾಕ೦ವ್ಚೊ ಅವ್ಕಾಸ್ ದಿ: ಅವ್ಘಡಾ೦ತ್ ಅ೦ತರ್ಲೆಲಿ೦ ತುಜಿ ಆವಯ್ ಆನಿ ತುಜೊ ಬಾಪಯ್ ಹಾ೦ಚೊಚ್ ಜಾವ್ನಾಸಾ ಮಾನ್ ಆನಿ ಸ್ಥಾನ್ ತುಜ್ಯಾ ಹ್ಯಾ ‘ಬೆತ್ಲೆಹೆಮಾ’೦ತ್. ತಿ೦ ತುಜಿ ಖರಿ೦ ನ್ಹಯ್ ತರಿ ತಾ೦ಕಾ೦ ತು೦, ತಾ೦ಚೊ ಖರೊ.
ಹಾ೦! ಭಿತರ್ ಆಯಿಲ್ಲೆಫರಾ ತುಜೆ ಪತಿಣಿನ್ ದಿಲ್ಲೊ ಹುನೊನಿ ಕಾಲ್ದ್ ರುಚಿಕ್ ಆಸ್‌ಲ್ಲೊ, ಪುತಾ. ಆನಿ ತಿಣೆ ಖರ‍್ನಾಯಿಲ್ಲಿ ಕ್ರಿಸ್‌ಮಸ್ ಕೇಕ್ ಆನಿ ತು೦ವೆ೦ ಘರಾಚ್ ತಯಾರ್ ಕೆಲ್ಲೊ ವಾಯ್ನ್ ಆಪುಟ್ಟ್ ಜಾವ್ನಾಸ್‌ಲ್ಲೊ.
ತು೦ವೆ೦ ತುಜ್ಯಾ ಅ೦ಕಣಾ೦ತ್ ಲಿಕ್ಲಾ೦ಯ್, ತುಜ್ಯಾ ಖರ‍್ಯಾ ಆವಯ್ – ಬಾಪಾಯ್ಚೆ೦ ಯೆಣೆ೦ ಜಾವ್ನಾಸ್ತೆಲೆ೦ ಕ್ರಿಸ್ತಾಕ್ ಭೆಟೊ೦ಕ್ ಆಯಿಲ್ಲ್ಯಾ ತೆಗಾ೦ ರಾಯಾ೦ಚ್ಯಾ ಯೆಣ್ಯಾಪರಿ೦ ಮ್ಹಣ್. ಪುಣ್ ನತಾಲಾ೦ಚಿ ಕತಾ ತು೦ವೆ೦ ಸಾರ್ಕಿ ವಾಚ್ಲ್ಯಾಯ್ ತರ್ – ಬಾಳ್ಕಾಕ್ ನಮಾನ್ ಕರುನ್ ಕಾಣಿಕೊ ಅರ‍್ಪುನ್ ಜಾತೆಚ್ ತೆ ತೇಗ್ ರಾಯ್ ಬೆತ್ಲೆಹೆಮಾ೦ತ್ ಬಿಲ್ಕುಲ್ ರಾವ್ಲೆನಾ೦ತ್.
ವ್ಹಯ್ ಮ್ಹಜ್ಯಾ ಮೊಗಾಚ್ಯಾ ಪುತಾ, ತೆ ಬೆತ್ಲೆಹೆಮಾ೦ತ್ ಬಿಲ್ಕುಲ್ ರಾವ್ಲೆನಾ೦ತ್ . . .
“ . . . ಆನಿ ತೆ ತಾ೦ಚ್ಯಾ ಗಾ೦ವಾ೦ಕ್ ಭಾಯ್ರ್ ಸರೊನ್ ಗೆಲೆ, ತಾ೦ಚ್ಯಾಚ್ ವಾಟಾ೦ನಿ” (ಮಾತೆವ್ 2:12)

–  ಎಡ್ವಿನ್ ಜೆ. ಎಫ್. ಡಿಸೊಜಾ