‘ತುಜೆಂ ಹೋಮ್ವರ್ಕ್ ಜಾಲಾಂ-ವೆ ತರ್?’
‘ಹೊ ಮಾಮ್ಮಿ!’
‘ತ್ಯಾ ಪೆಟ್ಯಾಲಾಗಿಂ ಖೆಳ್ಚೆಂ ರಾವಯ್, ತುಜ್ಯಾ ಬೆಡ್‌ರೂಮಾಕ್ ವಚ್ ಆನಿ ತುಜೆಂ ಹೋಮ್ವರ್ಕ್ ಕರ್ ಆನಿ ಸಂಪಯ್.’
ಪೆಟ್ಯಾನ್ ದಾಂತಾಂ ಮದೆಂ ವೊಡುನ್ ಧರ್‌ಲ್ಲೊ ಆಪ್ಲೊ ಸೊಕ್ಸ್ ಜೇಸನಾನ್ ಸೊಡ್ಲೊ ಆನಿ ತಾಣಿಂ ಖೆಳೊನ್ ಆಸ್‌ಲ್ಲೊ tug-of-war ಖೆಳ್ ಕಯ್ದ್ ಕೆಲೊ ಪುಣ್ ತೊ ತ್ಯಾ ಮೋವ್ ರತನ್‌ಕಾಂಬ್ಳಿಚೆರ್‌ಚ್ ಲೊಳೊನ್ ರಾವ್ಲೊ..
‘ಭುರ‍್ಗ್ಯಾಂಕ್ ಖ್ಹೆಳೊಂಕ್ ಮ್ಹಳ್ಳೆಂ ನಾ? ಥೊಡೆ ಖ್ಹೆಳ್-ತಮಾಸೆ ಪರ್ಯಾಂತ್ ನಾಂತ್?’
‘ಸಗ್ಳೊ ದೀಸ್ ತುಂವೆಂ ಕೆಲ್ಲ್ಯೊ ಘಡಾಮೊಡಿ ಪುರೊ, ಜೇಸನ್!’ ತಾಚೆ ಆವಯ್ನ್ ಮ್ಹಳೆಂ. ‘ಆತಾಂ ತುಂವೆಂ ಹೋಮ್ವರ್ಕ್ ಕರ‍್ಚೊ ವೇಳ್.’
‘ತುಜ್ಯಾ ಆವಯ್ಚಿಂ ಉತ್ರಾಂ ಆಯ್ಕ್!’ ಮ್ಹಳೆಂ ತಾಚ್ಯಾ ಬಾಪಾಯ್ನ್. ‘ತುಂವೆಂ ಹೋಮ್ವರ್ಕ್ ಕರ‍್ಚೆಂ ಕಿತ್ಲ್ಯಾ ಮಹತ್ವಾಚೆಂ ಮ್ಹಳ್ಳೆಂ ತುಂ ಜಾಣಾಂಯ್.’
‘ಹುಮ್ಮ್!’ ಹುಂಕಾರ‍್ಲೊ ಜೇಸನ್. ‘ಹಾಂವೆಂ ಮ್ಹಜೆಂ ಹೋಮ್ವರ್ಕ್ ಕೆಲೆಂ ನಾ ತರ್ ಸಗ್ಳೊ ಸಂಸಾರ್‌ಚ್ ಆಕೇರ್ ಜಾತೊಲೊ ನ್ಹಯ್?’
‘ತುಜಿ ಜಬಾನ್ ಸಾಂಬಾಳ್, ಹಾಂ, ಜೇಸನ್,’ ತಾಳೊ ಕಾಡ್ಲೊ ತಾಚ್ಯಾ ಬಾಪಾಯ್ನ್, ಲಿವಿಂಗ್ ರೂಮಾಂತ್ಲ್ಯಾ ಪಲಂಗಾರ್ ನಿದೊನ್ ತೊ ಸಾಂಜೆಚೆಂ ಪತ್ರ್ ವಾಚ್ತಾಲೊ. ಕಾರ‍್ಪೆಟಿಚೆರ್ ಲೊಳ್ಚೊ ಜೇಸನ್ ಉಟ್ಲೊ ನಾ. ಆಪ್ಲೆಂ ಉಪ್ರಾಟ್‌ಪಣ್ ಬಾಪಾಯ್ಕ್ ಕಿತ್ಲೆ ಚಾಳಯ್ತಾ ಮ್ಹಳ್ಳೆ ತಾಕಾ ಕಳಿತ್ ಆಸ್‌ಲ್ಲೆಂ. ಹಾಕಾ ಆಪುಣ್ ಆನಿಕೀ ಸತ್‌ಯ್ತೊಲೊಂ ಮ್ಹಳ್ಳೆಂ ಹಠ್ ತಾಚೆ ಥಂಯ್ ಉದೆಲ್ಲೆ ತೆಂ ಬಾಪಾಯ್ಚೊ ಬಳಿಷ್ಟ್ ಜೀವ್ ಆನಿ ಕಲ್ಸಾಂವಾಚೊ ಬೆಲ್ಟ್ ಸುಟಂವ್ಚೊ ವೇಗ್ ಕಳಿತ್ ಆಸ್‌ಲ್ಲ್ಯಾನ್ ಆಪಾಪಿಂಚ್ ಪಿಗಳ್ಳೆಂ. ‘ಆಮಿ ತುಕಾ ಸದಿಳಾಯ್ ದಾಕಯಿಲ್ಲಿ ಚಡ್ ಜಾಲಿ.’ ತಾಚ್ಯಾ ಬಾಪಾಯ್ನ್ ಮುಂದರಿಲೆಂ. ತುಜೆ ಅಂಕ್ ದೆಂವ್ಲ್ಯಾತ್ ಪುಣ್ ಆಜ್ ಥಾವ್ನ್ ಹೆಂ ಬದ್ಲಾತೆಲೆಂ. ಆತಾಂಥಾವ್ನ್ ಸದಾಂನೀತ್ ತುಂ ಯಾಂತ್ರಿಕ್ ರಿತಿರ್ ತುಜೆಂ ಹೋಮ್ವರ್ಕ್ ಕರ‍್ತೊಲೊಯ್ ಆನಿ ಆಮಿಂ ಉಡಾಸ್ ಕರಿತ್ತ್ ರಾಂವ್ಚಿಂನಾಂವ್!’
‘ಕಸಲ್ಯಾ ವರ‍್ತ್ಯಾ ಮಹತ್ವಾಚೆಂ ಹೆಂ ಹೋಮ್ವರ್ಕ್?’ ಜೇಸನಾನ್ ತ್ಯಾ ಮೋವ್ ರತನ್‌ಕಾಂಬ್ಳಿಕ್ ಮುಟಿ ಮಾರ‍್ಲ್ಯೊ. What’s the big deal?’
‘ಮಹತ್ವ್? ಮ್ಹಹತ್ವ್ ತುಕಾ ಎಕ್ ಭದ್ರ್ ಫುಡಾರ್ ದಿಂವ್ಚೊ.’
‘ಮ್ಹಾಕಾ ಸಮ್ಜಾನಾ ಆತಾಂಚ್ಯಾ ಭುರ‍್ಗ್ಯಾಂಚಿ ಮಾನಸಿಕತಾ!’ ಉದ್ಗಾರ‍್ಲಿ ತಾಚಿ ಆವಯ್. ‘ಹೋಮ್ವರ್ಕ್ ಕರ‍್ಚಿ ರೀತ್ ಇತ್ಲಿ ಸಲೀಸ್ ಜಾಲ್ಯಾ, ಹಾಚ್ಯಾಕಿ ವರ‍್ತೆಂ ಕರುಂಕ್ ಅಸಾದ್ಯ್.’
‘ಹೊ!’ ಉದ್ಗಾರ‍್ಲೊ ಜೇಸನ್. ‘ಮತ್ಲಬ್, ತುಮ್ಚ್ಯಾ ಕಾಳಾರ್ ಹೋಮ್ವರ್ಕ್ ಕರುಂಕ್ ರಗ್ತಾಚೊ ಘಾಮ್ ತುಮಿಂ ಪಿಳ್ಟಾಲ್ಯಾತ್?’
‘ಖಂಡಿತ್ ಜಾವ್ನ್ ಪಿಳ್ಟಾಲ್ಯಾಂವ್!’ ಪಲಂಗಾವಯ್ಲೊ ಉಟೊನ್ ತಾಚೊ ಬಾಪಯ್ ಹೆವ್ಶಿನ್ ಆಯ್ಲೊ. ‘ತುಮ್ಕಾಂ ಆಸ್ಚೆ ತಸಲೆ ಐಶ್‌ಆರಾಮ್ ಆನಿ ಸವ್ಲತ್ಯೊ ಆಮ್ಕಾಂ ನಾತ್‌ಲ್ಲ್ಯೊ. ತ್ಯಾ ಶಿವಾಯ್ ಆಮಿಂ ಆಮ್ಚ್ಯಾ ಆವಯ್-ಬಾಪಾಂಯ್ಕ್ ಪಾಟಿಂ ಉಲಯ್‌ನಾತ್‌ಲ್ಲ್ಯಾಂವ್.’
‘ಆಜ್‌ಕಾಲ್ ವಾಡೊನ್ ಯೆಂವ್ಚೆಂ ಮ್ಹಳ್ಯಾರ್ ಎಕ್ ಪ್ರಾಚಿತ್‌ಚ್ ಸಯ್. ಆಮ್ಕಾಂ ಆಸ್ಚೆ ಉಬ್ದೆಸ್ ಆನಿ ಮತಿಚೆರ್ ಆಸ್ಚೊ ದಾಬ್ ತುಮ್ಕಾಂ ಕಳಿತ್ ನಾ!’ ಖೆಂಚ್ಲೊ ಜೇಸನ್.
‘ದೆಕುನ್ಂಚ್ ಹಾಂವ್ ತುಕಾ ಫಿಚಾರ್ ಕರ‍್ತಾಂ!’ ಬಾಪಾಯ್ನ್ ಮ್ಹಳೆಂ. ‘ವಚ್ ತುಜ್ಯಾ ರುಮಾಕ್ ಆನಿ ಕರ್ ತುಜೆಂ ಹೋಮ್ವರ್ಕ್. ತ್ಯಾ ಉಪ್ರಾಂತ್‌ಯಿ ತುಕಾ ಭಾಯ್ರ್ ಯೆಂವ್ಕ್ ನಾ, ಸಗ್ಳಿ ರಾತ್ ತುಂ ಭಿತರ್‌ಚ್ ಆಸ್ತೊಲೊಯ್.’
‘ತಸಲೊ ಕಸಲೊ ಅಪ್ರಾದ್ ಹಾಂವೆಂ ಕೆಲಾ?’
‘ತುಂ ಬರ‍್ಯಾನ್ ಜಾಣಾಂಯ್ ತುಂವೆಂ ಕಿತೆಂ ಕೆಲಾಂಯ್ ಆನಿ ಕರಿತ್ತ್ ಆಯ್ಲ್ಯಾಯ್ ಮ್ಹಣ್!’ ಬಾಪಾಯ್ನ್ ಮ್ಹಳೆಂ. ‘ಜೀಬ್ ಆನಿ ಉತ್ರಾಂ ಸಾಂಬಾಳ್. ತುಜ್ಯಾ ನಂಜಾಳಿ ಉತ್ರಾಂನಿ ಹಾಂವ್ ಥಕೊನ್ ಗೆಲಾಂ.’
ಜೇಸನ್ ಉಟ್ಲೊ ಆನಿ ಕದಮಾಂ ಆಪ್ಟೊನ್ ಆಪ್ಲ್ಯಾ ರೂಮಾಕ್ ಗೆಲೊ. ತಾಚೊ ಪೆಟೊ ‘ಕೊಕ್ಕೊ’ ಶಿಮ್ಟಿ ಹಾಲಯ್ತ್ ತಾಚೊ ಪಾಟ್ಲಾವ್ ಕರಿಲಾಗ್ಲೊ.
***
ಜೇಸನಾಚಿ ಪಾವ್ಲಾಂ ಪಳೆತ್ತ್ ತಿ ರಾವ್ಲಿಂ. ತಾಕಾ ಆಮಿ ಶಿಕಯಿಲ್ಲಿ ಶಿಸ್ತ್ ಖಂಯ್ ಗೆಲ್ಯಾ? ಹೊ ಚಲೊ ಕಿತ್ಯಾಕ್ ಅಸೊ ಜಾಲಾ? ತಾಕಾ ಆಮಿ ಜಿಣಿಯೆಚಿಂ ತತ್ವಾಂ ಶಿಕಯ್ಲ್ಯಾಂತ್, ವಾವ್ರಾಚಿಂ ಆನಿ ಸಾದನಾಂಚಿಂ ಮಹತ್ವಾಂ ಸಮ್ಜಯ್ಲ್ಯಾಂತ್. ನಾಸಮ್ಜಣೆನ್ ಮಾತಿಂ ಹಾಲಯಿತ್ತ್ ತಿಂ ಜೆಂ ಕರುನ್ ಆಸ್‌ಲ್ಲಿಂ ತಾಕಾ ಪಾಟಿ ಗೆಲಿಂ.
ಬಾಪಾಯ್ನ್ ಆಪ್ಲೆಂ ಗಮನ್ ಸಾಂಜೆಚ್ಯಾ ವಾರ‍್ತಾಪತ್ರಾರ್ ಪರತ್ ಚರಯ್ಲೆಂ. ತೆಂ ವಾರ‍್ತಾಪತ್ರ್ ಲಿವಿಂಗ್ ರುಮಾಚ್ಯಾ ಸೀಲಿಂಗಾಚೆರ್ ವಾಚುಂಕ್ ಜಾಂವ್ಚ್ಯಾ ಸವ್ಕಾಸಾಯೆನ್ ಚಲೊಂನ್ಂಚ್ ಆಸ್‌ಲ್ಲೆಂ. ತೊ ಎಕಾ ಶೂನ್ಯ್ ಗುರುತಾಕರ‍್ಶಣ್ (zero gravity) ದಿಂವ್ಚ್ಯಾ ತ್ಯಾ ಪಲಂಗಾರ್ ಧರ‍್ಣಿಥಾವ್ನ್ ದೋನ್ ಪುಟ್ ವಯ್ರ್ ಉಪೆತಾಲೊ. ಥೊಡ್ಯಾ ವೆಳಾನ್ ತಾಣೆ ಹುಕುಮ್ ದಿಲಿ –ಆತಾಂ ಮ್ಹಾಕಾ ಖ್ಹೆಳಾಂಗ್ಣಾಚಿಂ ಪಾನಾಂ ಪಳೆಂವ್ಕ್ ಜಾಯ್. ಖ್ಹೆಳಾಂಗ್ಣಾಚ್ಯಾ ವರ‍್ದೆಂಚೆಂ ಆನಿ ಚಿತ್ರಾಂಚೆಂ ಪ್ರಥಮ್ ಪಾನ್ ಸೀಲಿಂಗಾರ್ ಉದೆಲೆಂ!
ಆನಿ ತಿ ಆವಯ್ ಅಸಲ್ಯಾ ಸೆಟಿಚೆರ್ ಆರಾಮ್ ಕರ‍್ತಾಲಿ – ತಿಣೆ ಹರ್‌ಯೆಕ್ ಪಾವ್ಟಿಂ ಬಸ್ಚಿ ದಶಾ ಬದ್ಲಿಲ್ಲ್ಯಾ ತವಳ್ ತಿ ಸೆಟಿ ತಿಚ್ಯಾ ಕುಡಿಕ್ ಸುಶೆಗ್ ದಿಂವ್ಚೆಪರಿಂ ಆಕೃತಿ ಬದ್ಲಿತಾಲಿ. ಎಕಾ ಪಾವ್ಟಿ ಆಂಗಾಚಿ ವೋಳ್ ಕಾಡುನ್ ತಿಣೆ ಲಿವಿಂಗ್ ರುಮಾಂತ್ಲ್ಯಾ ಕಂಪ್ಯೂಟರಾಕ್ ಹುಕುಮ್ ದಿಲಿ –ಮ್ಹಾಕಾ ಶೇಕ್ಸ್‌ಪಿಯೆರಾಚೊ ಒಥೆಲ್ಲೊ ನಾಟಕ್ ಪಳೆಂವ್ಕ್ ಜಾಯ್.
ಖಿಣಾ ಬಿತರ್ ನಾಟಕಾಂತ್ಲೆ ಪಾತ್ರ್ ಹೊಲೊಗ್ರಾಮ್ ರುಪಾಂನಿ (A hologram-is a moving three-dimensional representation of a person or object, normally used in communication or entertainment) ನಾಟಕ್ ಖ್ಹೆಳೊಂಕ್ ಲಾಗ್ಲೆ. ತಿಚ್ಯಾ ಹಾತಾ- ತಾಳ್ವೆಂತ್ ಎಕ್ ಚೆಂಡು ಆಸ್‌ಲ್ಲೊ ಆನಿ ತಿ, ಹೊ tension ball ಚಿರ‍್ಡುನ್ಂಚ್ ಆಸ್‌ಲ್ಲಿ – ಮಾನಸಿಕ್ ಆನಿ ಶಾರೀರಿಕ್ ದಾಬ್ ಉಣೊ ಕರುಂಕ್.
ಯೆಕಾಚಾಣೆ ತಿಣೆಂ ಮ್ಹಳೆಂ. ‘ಆಮಿ ಕಾಂಯ್ ಆಮ್ಚ್ಯಾ ಚಲ್ಯಾಕ್ ಅನಾವಶೆಂ ಆನಿ ಚಡಿತ್ ಕಠಿಣಾಯೆನ್ ಶಿಸ್ತ್ ಶಿಕಯ್ನಾಂವ್-ಮೂ, ಡಾರ‍್ಲಿಂಗ್?’
‘ತ್ಯಾ ಚಲ್ಯಾನ್ ಜಿಣಿ ಮ್ಹಳ್ಯಾರ್ ಕಿತೆಂ ಮ್ಹಣ್ ಶಿಕಾಜೆ ಆನಿ ಸಮ್ಜಾಜೆ!’ ತೊ ಮ್ಹಣಾಲೊ ಸ್ಪಷ್ಟ್ ತಾಳ್ಯಾನ್. ‘ಕಸಲಿಚ್ ಸದಿಳಾಯ್ ಆಮಿ ದಾಕಂವ್ಕ್ ನಜೊ.’ ತಾಣೆ, ಸರ‍್ಕಾರಾನ್ ವಿತರಣ್ ಕೆಲ್ಲ್ಯಾ ಎಕಾ robot -ಚಿ (ಯಂತ್ರ್‌ಮಾನವ್) ಫಿರ‍್ಕಿ ದಾಂಬ್ಲಿ ಆನಿ ತ್ಯಾ ಯಂತ್ರಾನ್ ತಾಕಾ ಎಕ್ ಹುನೊನಿ ಸೆಂಡ್‌ವಿಚ್ ಹಾಡ್ನ್ ದಿಲಿ. ತಿ ರೊಸಾಳ್ ಸೆಂಡ್‌ವಿಚ್ ಘೆವ್ನ್ ತೊ ಆಪ್ಲೆ ಪತಿಣೆಲಾಗಿಂ ಮ್ಹಣಾಲೊ. ‘ಆಮ್ಚೊ ಚಲೊ ಮ್ಹಣ್ತಾ ತಾಕಾ ಟೆನ್ಶನ್ ಆನಿ ಮಾನಸಿಕ್ ದಾಬ್ ಆಸಾ ಮ್ಹಣೊನ್. ದೋನ್ ಮಿನುಟಾಂಚೆಂ ಹೋಮ್ವರ್ಕ್ ಕರುಂಕ್ ಹೊ ಅಶೆಂ ಮ್ಹಣಾತ್ ತರ್, ಖಳ್ಮಿತ್‌ನಾಸ್ತಾಂ ಚಾರ್ ಘಂಟೆ ಕಾಮ್ ಕರ‍್ಚ್ಯಾ ಹಾಂವೆಂ ಕಿತೆಂ ಮ್ಹಣಾಜೆ?’ ತೊ ಕಂಪ್ಯೂಟರಾ ಕುಶಿನ್ ತೊಂಡ್ ಕರಿಲಾಗ್ಲೊ. ‘ಪಾಟ್ ಫುಟ್ಲ್ಯಾ ಮ್ಹಜಿ!’ ಉಪ್ರಾಂತ್ ತಾಣೆ ಕಂಪ್ಯೂಟರಾಕ್ ಹುಕುಮ್ ದಿಲಿ – ಮ್ಹಜ್ಯಾ ಪಾಟಿಕ್ ಕಿರ‍್ಣಾಂ ಪಾಟಯ್.
ತಾಚ್ಯಾ ಪಲಂಗಾಥಾವ್ನ್, ಅದೃಶ್, ದಾಬ್-ವೋಳ್ ನರಮ್ ಕರ‍್ಚಿಂ ಕಿರ‍್ಣಾಂ ಸುಟ್ಲಿಂ ಆನಿ ತಾಚ್ಯಾ ಥಕ್ಲೆಲ್ಯಾ ಕುಡಿಕ್ ಮಾಲಿಸ್ ಕರಿಲಾಗ್ಲಿಂ.
‘ಜೆಂ ಕಿತೆಂ ಆಮಿ ಆಮ್ಚ್ಯಾ ಜೇಸನಾಕ್ ಆನಿ ಜೇಸನಾ ಖಾತಿರ್ ಕರ‍್ತಾಂವ್…ತೆಂ ಸಾರ‍್ಕೆಂ ಮ್ಹಣ್ ಹಾಂವ್ ಪಾತ್ಯೆತಾಂ.’
‘ತಾಣೆ ಸಂಸಾರಾಂತ್ಲಿ ಜಿಣಿ ಸಗ್ಳಿಚ್ ಸುಶೆಗಾಂಚಿ ಆನಿ ಸುಲಬಾಯೆಚಿ ಮ್ಹಣ್ ಫಟ್ಕಿರ‍್ಯಾ ಆಂವ್ಡ್ಯಾಂನಿ ವಾಡ್ಚೆಂ ನಾಕಾ….ಡಾರ‍್ಲಿಂಗ್, ಕುಡಿಕ್ ಸುಶೆಕ್ ಲಾಬ್ಲೊ? ಆತಾಂಚ್ ಝೆಮೆತಾಯ್-ಮೂ?’ ತೊ ಹಾಸ್ಲೊ.
‘ಸುಖಾಳ್ ನೀದ್ ಕಾಡ್. ಆಮ್ಚ್ಯಾ ರಾತಿಚ್ಯಾ ಸುಶೆಗಾಂ ಖಾತಿರ್ ಹೊ ಕಂಪ್ಯೂಟರ್ ಹಾಂವ್ ಪ್ರೊಗ್ರಾಮ್ ಕರ‍್ತಾಂ ಆನಿ….’
***
ಆಪ್ಲ್ಯಾ ರುಮಾಂತ್ ಜೇಸನ್ ಸಗ್ಳೊಚ್ ಖತ್ಕತ್ತಾಲೊ.
ಆಪ್ಲಿಂ ಉಶಿಂ ಬಳಾನ್ ವಣದಿಕ್ ಮಾರ‍್ಲಿಂ ತರಿ ತಾಕಾ ಸಮಾದಾನ್ ಜಾಲೆಂ ನಾ.
‘ತಾಂಕಾಂ ಸಮ್ಜಾನಾ!’ ತಾಣೆಂ ಮ್ಹಳೆಂ ಕೊಕ್ಕೊ-ಕ್ ಪಳೆವ್ನ್. ‘ಯುವಕ್ ಜಾವ್ನ್ ವಾಡೊನ್ ಯೆಂವ್ಚೆಂ ಸುಲಬಾಚೆಂ ಮ್ಹಣ್ ತಿಂ ಚಿಂತಾತ್. ಸಗ್ಳೊ ದೀಸ್, ಹೋಮ್ವರ್ಕ್, ಹೋಮ್ವರ್ಕ್. ಶಿಟ್ಟ್!’
ಪುಣ್ ತಾಚ್ಯಾ ಪ್ರಸ್ತುತ್ ಪರಿಗತಿಂತ್ ತಾಕಾ ಚುಕಾರಿ ದಿಸ್ಲಿ ನಾ.
ಆಪ್ಲ್ಯಾ ಹೋಮ್ವರ್ಕ್ ಡಿಸ್ಕ್ ಪ್ಲೇಯರಾಂತ್ ತಾಣೆ ಎಕ್ ಡಿಸ್ಕ್ ರಿಗಯ್ಲಿ.
ಪ್ಲೇಯರಾಚೆ ಲಾಂಬ್ ಲೀಡ್ಸ್ ತಾಣೆ ಆಪ್ಲ್ಯಾ ಮಾತ್ಯಾ-ತಾಳ್ವೆರ್ ಆಸ್‌ಲ್ಲ್ಯಾ ಯು.ಎಸ್.ಬಿ – ಪೋರ‍್ಟಾಂತ್ ರಿಗಯ್ಲೆ ಆನಿ ಆಪ್ಣೆಂ ಕರುಂಕ್ ಆಸ್ಚೆಂ ಹೋಮ್ವರ್ಕ್ ಡೌನ್‌ಲೋಡ್ ಕರುಂಕ್ ಸುರು ಕೆಲೆಂ.
ಹುಂ. ತೊ ಯು.ಎಸ್.ಬಿ. ಪೋರ‍್ಟ್ ತೊ ಭೋವ್ ಲ್ಹಾನ್ ಬಾಳ್ಶೆಂ ಆಸ್ತಾನಾಂಚ್ ಶಸ್ತ್ರ್‌ಕ್ರಿಯೆಂ ಕರುನ್ ತಾಚ್ಯಾ ಖಟ್ಟ್ಯಾಂತ್ ಬಸಯಿಲ್ಲೊ – ಎಕ್ ಮಾಮೂಲಿ, ಸಾದೆಂ ಶಸ್ತ್ರ್‌ಕ್ರಿಯೆಂ, ಸರ‍್ವ್ ಬಾಳ್ಶ್ಯಾಂಕ್ ಕರ‍್ಚೆಂ.
ಪುಣ್ ಕಿತೆಂ ಕರ‍್ಯಾಂ?
ಹ್ಯಾ ಪ್ರಗತೆಕ್ ಲಾಗುನ್ ಫಕತ್ ದೋನ್ ಮಿನುಟಾಂಚೆಂ ಹೋಮ್ವರ್ಕ್ ಡೌನ್‌ಲೊಡಿಂಗ್ ತಾಚ್ಯಾ ತ್ಯಾ ದಿಸಾಚ್ಯಾ ಸರ‍್ವ್ ಮಿನುಟಾಂಚ್ಯಾಕಿ ಲಾಂಬ್ ಮ್ಹಣ್ ತಾಕಾ ಭೊಗ್ಲೆಂ!
– ಎಡ್ವಿನ್ ಜೆ. ಎಫ್. ಡಿ’ಸೊಜಾ
