ಉಜ್ವಾಡ್ ಪಂದ್ರಾಳೆಂ ಆನಿ ಆಶಾವಾದಿ ಪ್ರಕಾಶನ್ ಹಾಣಿಂ ಮಾಂಡುನ್ ಹಾಡ್ಲ್ಲೆಂ ಆದೇಸಾಚೆಂ ’ಕೊಂಕಣಿ ಮಟ್ವ್ಯಾ ಕಾಣಿಯಾಂಚೆಂ ಕಾಮಾಸಾಳ್’, ಮಾರ್ಚ್ 27 ತಾರಿಕೆರ್ ಉಡುಪಿಚ್ಯಾ ದುಖೇಸ್ತ್ ಮಾಯೆಚ್ಯಾ ಇಗರ್ಜೆಚ್ಯಾ ಸಭಾಸಾಲಾಂತ್ ಚಲ್ಲೆಂ. ಸಕಾಳಿಂ ಧಾ ವೊರಾಂಕ್ ಸುರ್ವಾತ್ ಜಾಲ್ಲ್ಯಾ ಹ್ಯಾ ಕಾಮಾಸಾಳಾಚೆಂ ಉಗ್ತಾವಣ್ ಕೆಲ್ಲ್ಯಾ ಉಡುಪಿಚ್ಯಾ ದುಖೇಸ್ತ್ ಮಾಯೆಚ್ಯಾ ಫಿರ್ಗಜೆಚೆ ವಿಗಾರ್ ಮಾ|ಬಾ|ಚಾರ್ಲ್ಸ್ ಮಿನೇಜಸಾನ್ ಅಪ್ಲ್ಯಾ ಉಲವ್ಪಾಂತ್ ’ಆಮ್ಚ್ಯಾ ವೃತ್ತೆಸವೆಂ ಆಮ್ಚಿ ಪ್ರವೃತ್ತಿ ಜಾವ್ನ್ ಆವಯ್ಭಾಸೆಕ್ ಪೋಸ್ ಕರ್ಚಿ ಆಮ್ಚಿ ಮುಳಾವಿ ಜವಾಭ್ದಾರಿ’ ಮ್ಹಣಾಲೊ. ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲ್ಲ್ಯಾ ಶ್ರೀನಿವಾಸ್ ಯುನಿವರ್ಸಿಟೀ ಕೋಲೆಜ್ ಆಫ್ ಇಂಜಿನಿಯರಿಂಗ್ ಆನಿ ಟೆಕ್ನೋಲೊಜಿಚ್ಯಾ ಪ್ರಿನ್ಸಿಪಾಲ್ ಆನಿ ಡೀನ್ ಜಾವ್ನಾಸ್ಚ್ಯಾ ಡೊ|ತೋಮಸ್ ಪಿಂಟೊನ್ ಅಪ್ಲ್ಯಾ ಉಲವ್ಪಾಂತ್ ’ಬರೆಂ ವಾಚಪ್ ಕಶೆಂ ಮನಶಾಚ್ಯಾ ಮತಿಂತ್ ಬರೆಂ ಚಿಂತಪ್ ಉದೆಂವ್ಕ್ ಕುಮೊಕ್ ಕರ್ತಾ ಆನಿ ಕಶೆಂ ಬರೆ ವಿಚಾರ್ ಏಕ್ ಬರಿ ಸಮಾಜ್ ನಿರ್ಮಾಣ್ ಕರುಂಕ್ ಸಕ್ತಾ’ ಮ್ಹಣಾಲೊ. ಉಜ್ವಾಡ್ ಪಂದ್ರಾಳ್ಯಾಚ್ಯಾ ಸಂಪಾದಕ್ ಮಾ|ರೋಯ್ಸನ್ ಫೆರ್ನಾಂಡಿಸಾನ್ ಸ್ವಾಗತ್ ಉಲವ್ಪ್ ಕರುನ್ ಸಯ್ರ್ಯಾಂಚಿ ವಳೊಕ್ ತಶೆಂಚ್ ಆಶಾವಾದಿ ಪ್ರಕಾಶನಾಚ್ಯಾ ಪನ್ನಾಸಾವ್ಯಾ ಪುಸ್ತಕಾಚಿ ಮಟ್ವಿ ವಳೊಕ್ ಕರುನ್ ’ಹ್ಯಾ ಪುಸ್ತಕಾಂತ್ಲೆಂ ಸಾಹಿತ್ಯ್ ಖಂಡಿತ್ ಜಾವ್ನ್ ಕೊಂಕಣಿಂತ್ ಆಸ್ಚ್ಯಾ ಅಪ್ರೂಪ್ ಗಂಭೀರ್ ಸಾಹಿತ್ಯಾಚ್ಯಾ ಪ್ರಕಾರಾಂತ್ಲೆಂ’ ಮ್ಹಣಾಲೊ. ಡೊ|ತೋಮಸ್ ಪಿಂಟೊನ್ ಪುಸ್ತಕಾಚೆಂ ಉಗ್ತಾವಣ್ ಕೆಲೆಂ.
ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಪಾಟಯ್ತಚ್. ಮಟ್ವ್ಯೊ ಕಾಣಿಯೊ, ಆನಿ ತಾಂತ್ಲಿ ತಾಂತ್ರಿಕತಾ ಹ್ಯಾ ವಿಶ್ಯಾಂಚೆರ್ ಖೊಲಾಯೆಚೆಂ ಅಧ್ಯಯನ್ ಮಾ|ಚೇತನ್ ಲೋಬೊನ್ ತಶೆಂಚ್ ವಲ್ಲಿ ಕ್ವಾಡ್ರಸಾನ್ ಚಲವ್ನ್ ವೆಲೆಂ. ಮಂಗ್ಳುರ್ ಉಡುಪಿ, ಕಾರ್ಕಳ್ ಅಶೆಂ ವೆಗ್-ವೆಗಳ್ಯಾ ಗಾಂವಾಥಾವ್ನ್ ಆಯಿಲ್ಲ್ಯಾ ಲಗ್ಬಗ್ 40 ಲೇಖಕಾಂನಿ ಎಕಾಮೆಕಾ ಸಂವಾದ್ ಚಲವ್ನ್ ಮಟ್ವಿ ಕಾಣಿ ಕಶಿ ಆಸುಂಕ್ ಜಾಯ್, ಮಟ್ವ್ಯಾ ಕಾಣಿಯಾಂಚಿಂ ನೇಮಾಂ ಆನಿ ಬಂಧಡೆವಿಶಿಂ ಚರ್ಚಾ ಕೆಲಿ. ತ್ಯೇ ಉಪ್ರಾಂತ್ ಫಿಲ್ಮಾಂ ಆನಿ ಫಿಲ್ಮಾಂಕ್ ಕಾಣಿ ಬರಂವ್ಚಿ ಆನಿ ತಾಚಿ ತಾಂತ್ರಿಕತಾ ಹ್ಯಾ ವಿಶ್ಯಾಚೆರ್ ಮಾ|ರೋಯ್ಸನ್ ಫೆರ್ನಾಂಡಿಸಾನ್ ಅಪುರ್ಭಾಯೆಚಿ ಮಾಹೆತ್ ದಿಲಿ.
ಅಸಲಿಂ ಕಾಮಾಸಾಳಾಂ ಎಕಾ ಸಗ್ಳ್ಯಾ ದಿಸಾಚೆಂ ಆಸ್ಲೆಂ ತರ್ ಭೋವ್ ಬರೆಂ ಆಸ್ಲೆಂ ಅಶೆಂ ಕಾಮಾಸಾಳಾಕ್ ಆಯಿಲ್ಲ್ಯಾಂನಿ ಅಪೇಕ್ಶಾ ಉಚಾರ್ಲಿ, ತಶೆಂಚ್ ಅಸಲಿಂ ಕಾಮಾಸಾಳಾಂ ತವಳ್ ತವಳ್ ಮಾಂಡುನ್ ಹಾಡ್ಚಿ ಗರ್ಜ್ ಆಸುನ್, ಅಸಲ್ಯಾ ಕಾಮಾಸಾಳಾಂನಿ ಕಥಾ ಬರಯ್ತೆಲ್ಯಾಂಕ್ ಅಪ್ಲಿ ಕಥಾ ಸಾದರ್ ಕರುಂಕ್ ಆವ್ಕಾಸ್ ಕರುನ್ ದೀಂವ್ಕ್ ಮಾಗ್ಲೆಂ.
ಕೊಂಕಣಿ ಕಥೆಂಚೆರ್ ಖೊಲಾಯೆನ್ ಅಧ್ಯಯನ್ ಕರ್ಚೆಂ ಕಾಮ್ 2004 ಇಸ್ವೆಂತ್ ಆಶಾವಾದಿ ಪ್ರಕಾಶನಾನ್ ’ದಾಯ್ಜ್.ಕೊಮ್’ ಮುಖಾಂತ್ರ್ ಕುವೆಯ್ಟಾಂತ್ ಸುರ್ವಾತ್ ಕೆಲ್ಲೆಂ. ಪಾಟ್ಲ್ಯಾ ದೋನ್-ತೀನ್ ವರ್ಸಾಂನಿ ಉಜ್ವಾಡ್ ಪಂದ್ರಾಳೆಂ ಆನಿ ಆಶಾವಾದಿ ಪ್ರಕಾಶನಾನ್ ವೆವೆಗ್ಳ್ಯಾ ಪ್ರಕಾರಾಚೆಂ ಕಥೆಂಚೆಂ ಅಧ್ಯಯನ್ ವೆಬಿನಾರಾಂ ಚಲವ್ನ್ ಮಹರಾಶ್ಟ್ರ್, ಗೊಂಯ್, ಕರ್ನಾಟಕ್ ತಶೆಂಚ್ ಕೇರಳಚ್ಯಾ ಕೊಂಕಣಿ ಬರವ್ಪಿ, ವಿಧ್ಯಾರ್ಥಿಂ ಖಾತಿರ್ ಕಥಾಪಾಠ್ ಚಲವ್ನ್ ವೆಲ್ಯಾಂತ್.
ಸಕಾಳಿಂ ಕಾಫಿ ಫಳಾರಾಂತ್ ಸುರ್ವಾತ್ ಜಾಲ್ಲೆಂ ಹೆಂ ಕಾಮಾಸಾಳ್, ದನ್ಪಾರಾಂಚ್ಯಾ ಜೆವ್ಣಾಂತ್ ಅಖೇರ್ ಜಾಲೆಂ.
