“ಬಾಪಾಚೆ, ಪುತಾಚೆ ಆನಿ ಸ್ಪೀರಿತ್ ಸಾಂತಾಚೆ ನಾಂವಿಂ ಆಮೆನ್” ವಿಗಾರಾನ್ ಆಪ್ಲ್ಯಾ ಭಾಂಗ್ರಾಳ್ಯಾ ಲೋಬಾ ಇಡ್ಯಾ ಥಾವ್ನ್ ಆಪ್ಲೊ ಹಾತ್ ಭಾಯ್ರ್ ಕಾಡ್ನ್ ಕಪಾಲಾಚೆರ್ ಖುರ್ಸಾಚೊ ಘುರ್ತ್ ಕಾಡ್ಲೊ ಆನಿ ಆಪ್ಲೊ ಶೆರ್ಮಾಂವ್ ಸುರ್ವಾತಿಲೊ.
ಇಗರ್ಜ್ ಸಗ್ಳಿಚ್ ವಿವಿಧ್ ವೀಜ್ ದಿವ್ಯಾಂನಿ ನೆಟಯ್ಲೆಲಿ ತಿ ಸಗ್ಳಿಚ್ ಪರ್ಜಳ್ಟಾಲಿ ಆಮಾಸೆಕ್ ಆಕಾಸಾರ್ ನಕ್ತಿರಾಂನಿ ಭರ‍್‍ಲ್ಲೊ ಆಕಾಸ್ ಪರ್ಜಳ್ಚೆಪರಿಂ. ಪಾಂಚ್ ಯಾಜಕ್ ತ್ಯಾ ಆಲ್ತಾರಾರ್ ತೆ ಭಾಂಗ್ರಾಳ್ಯಾ ಸಾಡ್ಯಾ ಸಾರ್ಕೆ ಲೋಬ್ ನ್ಹೆಸೊನ್ ಮಿಸಾಕ್ ಆಯ್ತೆ ಜಾಲ್ಲೆ. ವಿಗಾರಾನ್ ಖುರ್ಸಾಚೊ ಘುರ್ತ್ ಕಾಡ್ಟಚ್ ಹೆರ್ ಚೋವ್ಗ್ ಯಾಜಕ್ ತ್ಯಾ ಕದೆಲಾಂನಿ ಬಸ್ಲೆ. ಇಗರ್ಜೆ ಭಾಯ್ರ್ ಆರಾಯಿಲ್ಲ್ಯಾ ಸರ್ವ್ ಪ್ಲಾಸ್ಟಿಕ್ ಕದೆಲಾಂನಿ ಹಾರಿಂ ಹಾರಿಂನಿ ಫಿರ್ಗಜೆಂತ್ಲೊ ಲೋಕ್ ಆಪ್ಲಿ ಬಸ್ಕಾ ಘೆವ್ನ್ ಮಿಸಾಚೆಂ ಬಲಿದಾನ್ ಭೆಟಂವ್ಕ್ ಹಾಜರ್ ಜಾಲ್ಲೊ.
ದಸೆಂಬ್ರಾಚೊ ಮಹಿನೊ ಜಾಲ್ಲ್ಯಾನ್ ಥೊಡ್ಯಾಂಕ್ ಹಿಂವ್ ಖಾತಾಲೆಂ ತರೀ ಪ್ರತ್ಯೇಕ್ ಜಾವ್ನ್ ಗಲ್ಫಾ ಥಾವ್ನ್ ಆಯಿಲ್ಲ್ಯಾ ಸ್ತ್ರೀಯಾಂನಿ ರೂಂದ್ ಗಳ್ಯಾಂಚೆಂ ವಸ್ತುರ್ ಘಾಲ್ಲೆಂ. ಮಟ್ವಿಂ ಆಂಗ್ಲಿಂ ಘಾಗ್ರೆ ನ್ಹೆಸ್‍ಲ್ಲಿಂ ತಾಂಚಿಂ ಭುರ್ಗಿಂ ಆಮ್ಚ್ಯಾ ಯಾಜಕಾಂ ಪ್ರಾಸ್ ಚಡೀತ್ ಪರ್ಜಳ್ಟಾಲಿಂ. ತೆಂ ಮೇಕಪ್, ತೊ ಶೃಂಗಾರ್, ತೆಂ ಭಾಂಗಾರ್, ತಿ ಮುಸ್ತಾಯ್ಕಿ ತ್ಯಾ ಯೆಮ್ಕೊಂಡಾಂತ್ಲ್ಯಾ ಲುಸಿಫೆರಾಕ್ ತಸೆಂ ತಾಚ್ಯಾ ಶಿಮ್ಟೆ-ಸಾಂಗಾತ್ಯಾಂಕ್ ಪರ್ಯಾಂತ್ ಪಾತ್ಕಾಂತ್ ಘಾಲುಂಕ್ ಪ್ರೇತನ್ ಕರುನ್ ಆಸ್‍ಲ್ಲೆಂ.
ವೊರಾಂ ರಾತಿಚಿಂ ಬಾರಾ ಜಾಲ್ಲ್ಯಾನ್ ಥೊಡ್ಯೊ ಕೀಡಿ ತ್ಯಾ ರುಕಾಂನಿ ತಾಂಚೆಂಚ್ ಗಾಯನ್ ಗಾವ್ನ್ ಆಸ್‍ಲ್ಲ್ಯೊ. ಏಕಾಚ್ಛಾಣೆ ಆಯಿಲ್ಲ್ಯಾ ಬುಸ್ಸ್ ವಾರ‍್ಯಾಕ್ ಆಲ್ತಾರಾಕ್ ಘಾಲ್ಲೊ ಮಾಟೊವ್ ಮಾತ್ಸೊ ಹಾಲ್ಲೊ ತರೀ ಥೊಡೆ ವೀಜ್ ದಿವೆ ಮಾತ್ರ್ ಹಾಲ್ಲೆ ಶಿವಾಯ್ ಹೆರ್ ಕೋಣ್ಂಚ್ ಹಾಲ್ಲೆನಾಂತ್. ಹೆಣೆ-ತೆಣೆ ಕೋಣ್ ಪೆಲೆ ಪಟಕ್ಕ್ ಕರ್ನ್ ಆಪ್ಲ್ಯಾ ಹಾತಾಂನಿ ತಾಂಚ್ಯಾ ಪಾಂಯಾರ್ ಹಾತಾರ್ ಬಸ್‍ಲ್ಲ್ಯಾ ಜಳಾರಿಂಕ್ ಖಬ್ರೇವೀನ್ ಮಾರ್ನ್ ಆಸ್‍ಲ್ಲಿಂ. ಜಲ್ಮಾಕ್ ಆಂಗಾಕ್ ಸೆಂಟ್ ವಾಪರಿನಾಸ್‍ಲ್ಲೊ ಲಿಗೊರ್ ಲಾಗಿಂ ಬಸ್‍ಲ್ಲ್ಯಾ ಗಲ್ಫ್ ಬಾಯೆಚ್ಯಾ ಸೆಂಟಾಚೊ ಪರ್ಮಳ್ ಘೆವ್ನ್ ಸರ್ಗಾ ಸುಖ್ ಜೊಡುನ್ ಆಸ್‍ಲ್ಲೊ.
ವಿಗಾರಾನ್ ಆಪ್ಲೊ ಶೆರ್ಮಾಂವ್ ಮುಖಾರಿಲೊ, “ತುಮ್ಕಾಂ ಸರ್ವಾಂಕ್ ಹಾಂವ್ ಭಾಗಿ ನತಾಲಾಂಚೆಂ ಫೆಸ್ತ್ ಮಾಗ್ತಾಂ. ತುಮ್ಕಾಂ ತೊ ಬಾಳಕ್ ಜೆಜು ತಾಚಿಂ ಆಶೀರ್ವಾದಾಂ ತುಮ್ಚೆರ್ ಪಾವ್ಸಾಪರಿಂ ವೊತುನ್ ತುಮ್ಚ್ಯಾ ಸಮೃದ್ಧಿಚಿ ವೃದ್ಧಿ ಕರುಂ. ತುಮ್ಚೆಂ ನಂದನ್ ಜಾಂವ್.
ತುಮಿ ಪಳೆಲಾಂಗಿ ತ್ಯಾ ಜೆಜು ಬಾಳ್ಕಾಕ್ ತ್ಯಾ ಗರ್ದನಾಚ್ಯಾ ಗೊಟ್ಯಾಂತ್? ಆಸಾಗಿ ಏಕ್ ಕಾಂಬೊಳ್ ತಾಚ್ಯಾ ಆಂಗಾರ್? ಅಖ್ಯಾ ಸರ್ಗಾ ಸಂಸಾರಾಚೊ ರಾಜಾ ತ್ಯಾ ಗೊರ್ವಾಂಕ್ ಪೊಸ್ಚ್ಯಾ ಗೊಟ್ಯಾಂತ್ ಏಕಾ ಲ್ಹಾನ್‍ಶ್ಯಾ ತೀರ್ ಕುಡ್ಕ್ಯಾಂತ್ ರೆವ್ಡಾವ್ನ್ ಸುಶೆಗ್ ಘೆತಾ.”
ಗಲ್ಫ್ ಚಲಿಯೆಚೆಂ ಸೆಂಟ್ ಹುಂಕುನ್ ಆಸ್‍ಲ್ಲ್ಯಾ ಲಿಗೊರಿಕ್ ಏಕಾಚ್ಛಾಣೆ ಜಾಗ್ ಜಾಲಿ. ತಾಚ್ಯಾ ದೊಳ್ಯಾಂಕ್ ಹ್ಯಾ ವಿಗಾರಾನ್ ನ್ಹೆಸ್‍ಲ್ಲ್ಯಾ ಭಾಂಗ್ರಾಳ್ಯಾ ಲೋಬಾಚಿಂ ಕೀರ್ಣಾಂ ಮಾರ್ತಾನಾ ತಸೆಂಚ್ ಹ್ಯಾ ವಿಗಾರಾನ್ ಜೆಜು ಗೊರ್ವಾಂಚ್ಯಾ ಠಾಣ್ಯಾಂತ್ ಜಲ್ಮಾಲಾ ಮ್ಹಣ್ಟಾನಾ ತಾಚ್ಯೆ ಮತಿಂ ಘುಸ್ಪಡ್ ಉದೆಲಿ. ತಾಣೆ ತಾಚೆ ಕಾನ್ ವಿಗಾರಾಚ್ಯಾ ಶೆರ್ಮಾಂವಾರ್ ಖಂಚಯ್ಲೆ ಆನಿ ಆಪ್ಲಿ ದೀಷ್ಟ್ ಮಾತ್ರ್ ಸೆಜಾರ್ಚ್ಯಾ ಗಲ್ಫ್ ಚಲಿಯೆಚೆರ್ ಖಂಚಯ್ಲಿ.
“ದೇವಾಚೊ ಪುತ್ರ್ ಜೆಜು ಕ್ರಿಸ್ತ್, ದುರ್ಬಳ್ಯಾಂಚೊ ರಾಕ್ವಣ್ದಾರ್, ಮನ್ಶಾಕುಳಾಚೊ ಸೊಡ್ವಣ್ದಾರ್ ಅಸಲೆಂ ಆಪೂರ್ವ್ ಜನನ್ ಘೆವ್ನ್ ಹ್ಯಾ ಸಂಸಾರಾಕ್ ಆಯ್ಲೊ ತರ್, ಆಮಿ ತಾಚ್ಯಾ ಪಾಟ್ಲಾವ್ದಾರಾಂನಿ ತಾಚೆಪರಿಂಚ್ ಜಿಯೆಂವ್ಕ್ ಸಾಧ್ಯ್ ನಾ ಕಿತ್ಯಾ? ಆಮಿ ಕಿತ್ಯಾ ಆಜ್ ಹ್ಯಾ ಮಿಸಾಕ್ ಹಾಜರ್ ಜಾತಾನಾ ವಿವಿಧ್ ವೇಸ್ ಪಾಂಗರ್ನ್ ಹಾಂಗಾ ಆಯ್ಲ್ಯಾಂವ್? ಹೊಗಿ ಮಾನ್ ಆಮಿ ಹ್ಯಾ ಆಮ್ಚ್ಯಾ ಬಾಳಕ್ ಜೆಜುಕ್ ದಿಂವ್ಚೊ?” ಲಿಗೊರಿಕ್ ಹ್ಯಾ ಉತ್ರಾಂಚೊ ಮತ್ಲಬ್‍ಚ್ ಕಳಾನಾ ಜಾಲೊ. ಏದ್ಯಾ ವ್ಹಡ್ ಸುಂರ್ಗಾರಾಯಿಲ್ಲ್ಯಾ ಇಗರ್ಜೆ ಬಲ್ಕಾವಾಂತ್ ಎದೊ ವ್ಹಡ್ಲೊ ಮಾಟೊವ್ ಘಾಲ್ನ್ ಹಜಾರೊಂ ಹಜಾರ್ ರುಪಯ್ ಧಿಕ್ಕಾಪಾಲ್ ಕರ್ನ್ ಆತಾಂ ಹೊ ವಿಗಾರ್ ಹೆರಾಂಚೆರ್ ಕಿತ್ಯಾ ಆಪ್ಲೆ ಜಾಳ್ ವೊಂಕ್ತಾ? ಲಿಗೊರಿಕ್ ಹ್ಯಾ ವಿಗಾರಾಚಿ ಪಿಸ್ಕೊಲೊಜಿ ಕಿತೆಂಚ್ ಅರ್ಥ್ ಹಾಡಿನಾ ಜಾಲಿ. ತೊ ತಾಚ್ಯಾ ಉತ್ರಾಂಕ್ ಆಯ್ಕೊನ್ಂಚ್ ರಾವ್ಲೊ.
“ಆಯ್ಕಾಲ್ಲೆಂಗಿ ತುಮಿ ಕಿತ್ಲ್ಯಾ ಕಷ್ಟಾಂನಿ ತ್ಯಾ ಸಾಂ ಜುಜೆನ್ ತ್ಯಾ ಭರ‍್‍ಲ್ಲಿ ಗುರ್ವಾರ್ನ್ ಮರಿಯೆಕ್ ತ್ಯಾ ಕಾತ್ತ್ಯಾಚಾ ಪಾಟಿರ್ ಬಸವ್ನ್ ಇತ್ಲ್ಯಾ ಕಷ್ಟಾಂನಿ ಜೆರುಜಲ್ಯಾ ಥಾವ್ನ್ ಬೆತ್ಲೆಹೆಮಾಕ್ ಹಾಡ್‍ಲ್ಲೆಂ? ಜಾಣಾಂತ್ಗಿ ತುಮಿ ತ್ಯಾ ವಾಟೆರ್ ಆಸ್‍ಲ್ಲೆ ತೆ ಕಾಂಟೆ-ಖುಂಟೆ, ದೊಂಗೊರ್-ಗುಡೆ, ಝಾಡಾಂ-ಬೊಲಿಂ ಉತ್ರೊನ್ ತೊ ಚಲೊನ್ಂಚ್ ಆಯಿಲ್ಲೊ? ಕಿತ್ಲೊ ಸೊಸ್ಣಿಕಾಯೆಚೊ ಮನಿಸ್ ತೊ ಸಾಂ ಜುಜೆ ಜಾವ್ನಾಸ್ಲೊ? ಆಂಕ್ವಾರ್ ಮರಿ ತ್ಯಾ ಮಧ್ಯಾನೆಚೆ ರಾತಿಂ ಹಿಂವಾನ್ ಆಂಕುಡ್ಟಾಲಿ ತರೀ ತಿಕಾ ಪಾಂಗ್ರೊಂಕ್ ಆಮ್ಚ್ಯೆಪರಿಂ ಕಾಂಬೊಳ್ ನಾಸ್‍ಲ್ಲಿ. ತಿಚ್ಯಾ ಪರ್ನ್ಯಾ ವಸ್ತ್ರಾಚೆರ‍್‍ಚ್ ತಿಣೆ ತಿ ವಾಟ್ ಆಪ್ಲೊ ಪೂತ್ ಜೆಜು ಖಾತಿರ್ ಮುಖಾರ್ಸುನ್ ವ್ಹೆಲಿ.”
ಏಕಾ ಪಾತಳ್ ವೋಲಿ ಭಿತರ್ ಗುಟ್ಲಿ ಮಾರ್ನ್ ನೀದ್ ಕಾಡ್ಚ್ಯಾ ಲಿಗೊರಿಕ್ ಕಾಂಬೊಳ್ ಮ್ಹಳ್ಯಾರ್ ಕಿತೆಂ ತೆಂ ಗಮನಾಕ್ ಗೆಲೆಂ ನಾ. ತೊ ವಿಗಾರಾಚಿಂ ಉತ್ರಾಂ ಆಯ್ಕೊನ್ಂಚ್ ರಾವ್‍ಲ್ಲೊ.
“ಜೆಜು ಜಾವ್ನಾಸ್‍ಲ್ಲೊ ದುರ್ಬಳ್ಯಾಂಚೊ ರಾಯ್ ದೆಖುನ್ಂಚ್ ತೊ ದುರ್ಬಳ್ಯಾಂತ್ಲೊ ದುರ್ಬಳೊ ಜಾವ್ನ್ ಹ್ಯಾ ಸಂಸಾರಾಕ್ ಆಯ್ಲೊ. ಆಮಿಂ ತಾಚೊ ಪಾಟ್ಲಾವ್ ಕರ್ಯಾಂ; ಆಮ್ಚ್ಯಾಂತ್ಲೆಂ ಥೊಡೆಂ ಹೆರಾಂಕ್ ದಿವ್ಯಾಂ; ಥೊಡೆಂ ತ್ಯಾ ಜೆಜುಚೆಂ ಘರ್ ಜಾವ್ನಾಸ್ಚ್ಯಾ ಹ್ಯಾ ಆಮ್ಚ್ಯಾ ಇಗರ್ಜೆಕ್ ದಿವ್ಯಾಂ; ತೊ ತುಮ್ಕಾಂ ಹಜಾರ್ ವಾಂಟ್ಯಾಂನಿ ತೆಂ ಪಾಟಿಂ ಮೆಳ್ಚೆಪರಿಂ ಕರ್ತಲೊ ಆಪ್ಲ್ಯಾ ಆಶೀರ್ವಾದಾಂನಿ.”
“ಐ ಡೋಂಟ್ನೊ ವೊಟ್ ಪ್ರೀಸ್ಟ್ ಈಜ್ ಸೇಯಿಂಗ್ ಮಾಮ್ಮಿ” ಸೆಜಾರ್ಚೆಂ ಗಲ್ಫ್ ಚೆಡುಂ ಆಪ್ಲ್ಯಾ ಆವಯ್ಲಾಗಿಂ ಉಲಯ್ತಾನಾ ಲಿಗೊರಿನ್ ಚಿಂತ್ಲೆಂ ಕೀ ತೆಂ ತಾಚೆಲಾಗಿಂಚ್ ಉಲಯ್ತಾ ಮ್ಹಣ್. ವಿಗಾರಾಚೆರ್ ದೀಷ್ಟ್ ಖಂಚಯಿಲ್ಲ್ಯಾ ಲಿಗೊರಿನ್ ಏಕಾಚ್ಛಾಣೆ ತ್ಯಾ ಚಲಿಯೆಚ್ಯಾ ತೋಂಡಾಕ್ ಪಳೆವ್ನ್, “ಐ ಡೋಂಟ್ನೊ” ಮ್ಹಣ್ಟಾನಾ ತ್ಯಾ ಚೆಡ್ವಾಕ್ ರಾಗ್ ಯೇವ್ನ್ ಆಪ್ಲ್ಯಾ ಆವಯ್ಕ್ ಲಿಗೊರಿಲಾಗಿಂ ಬಸೊಂಕ್ ಸಾಂಗ್ಲೆಂ ಆನಿ ತೆಂ ಆಪ್ಲಿ ಆವಯ್ ಬಸ್‍ಲ್ಲ್ಯಾ ಕದೆಲಾಚೆರ್ ಬಸ್ಲೆಂ.
ಲಿಗೊರಿಕ್ ಕಾಂಪ್ ಉಟ್ಲಿ; ಆಪುಣ್ ಶಿರಿಗುಂಡಿಂತ್ ಶಿರ್ಕಾಲೊಂ ಮ್ಹಣ್ ಆಕಾಂತ್ಲೆಲ್ಯಾ ಲಿಗೊರಿನ್ ಕೃತಕ್ ಖೊಂಕ್ಲಿ ಕಾಡ್ನ್ ತೊ ತ್ಯಾ ಕದೆಲಾ ಥಾವ್ನ್ ಉಟೊನ್ ಪಾಟಿಂ ಮರಿಯೆಚ್ಯಾ ಗ್ರೊಟ್ಟ್ಯಾಲಾಗಿಂ ವಚೊನ್ ಬಸ್ಲೊ.
ಹಾಂಗಾಸರ್ ಸಭಾರ್ ಯುವಜಣ್ ಸಿಗ್ರೆಟ್ ವೊಡುನ್ ಆಸ್‍ಲ್ಲೆ. ಥೊಡ್ಯಾಂಚ್ಯಾ ಹಾತಿಂ ಬಿಯರಿಚೆ ಕಂರ್ಡೆ ಆಸ್‍ಲ್ಲೆ. ಲಿಗೊರಿಕ್ ಆತಾಂ ವಿಗಾರಾಚ್ಯಾ ಶೆರ್ಮಾಂವಾಚಿ ಸಂಪೂರ್ಣ್ ವಿಸರ್ ಪಡ್ಲಿ. ತಾಕಾ ಉಗ್ಡಾಸ್ ಆಯ್ಲೊ ಏಕ್ ಪಾವ್ಟಿ ಕೊಣಾಚ್ಯಾಗೀ ಕಾಜಾರಾಕ್ ಆಪವ್ಣೆ ನಾಸ್ತಾಂ ತ್ಯಾ ಡೊನ್ ಬೊಸ್ಕೊ ಹೊಲಾಕ್ ವಚೊನ್ ಕದೆಲಾರ್ ಬಸೊನ್ ಪಾಶಾರ್ ಕೆಲ್ಲಿ ಗ್ಲಾಸಾಂತ್ಲಿ ಬಿಯರ್ ಚಾಕ್‍ಲ್ಲೊ.
ವಿಗಾರಾನ್ ತಾಚೊ ಶೆರ್ಮಾಂವ್ ಮುಖಾರುನ್ ವೆತಾನಾ ತಾಚೆ ಕಾನ್ಪಾಟೆ ನೀಟ್ ಜಾಲೆ, ಶಿಂತಿದ್ ಸಾರ್ಕೆಂ ಜಾಲೆಂ. ತಾಣೆ ತಾಚ್ಯಾ ಹರ್ ಉತ್ರಾಂಚೊ ಉಲ್ಲೇಖ್ ಕೆಲೊ ಮಾತ್ರ್ ನಂಯ್ ಮೀಸ್ ಜಾತಚ್ ವಿಗಾರಾಕ್ ವಚೊನ್ ಭೆಟೊಂಕ್ ತಾಣೆ ಚಿಂತ್ಲೆಂ. ಇತ್ಲೊ ಬರೊ ದುರ್ಬಳ್ಯಾಂಚೊ ಶೆರ್ಮಾಂವ್ ದಿಲ್ಲೊ ವಿಗಾರ್ ತಾಚೊ ತ್ಯಾ ಭಾಂಗ್ರಾಳ್ಯಾ ಲೋಬಾ ಭಿತರ್ ಕಿತ್ಯಾ ಲಿಪ್ಲಾ ಮ್ಹಳ್ಳೆಂ ಏಕ್ ವಿಶೇಷ್ ಸವಾಲ್ ಕಸೆಂ ತಾಕಾ ಜಾಲೆಂ. ವಿಗಾರಾನ್ ಆಪ್ಲ್ಯಾ ಭಾಂಗಾರಾಚೊ ಲೇಪ್ ದಿಲ್ಯಾ ತ್ಯಾ ಜಿಗ್ಗ್ ಕಾಲ್ಸಿಂತ್ಲೊ ವಾಯ್ನ್ ವಯ್ರ್ ಅರ್ಪಿತಾನಾ ತಾಣೆ ಆಪ್ಲಿ ತಕ್ಲಿ ಬಾಗಾಯ್ಲಿ. ತಾಚ್ಯಾ ಮಾತ್ಯಾರ್ ದಾಗ್ ದಿಲ್ಲ್ಯಾಪರಿಂ ಭೊಗ್ತಾನಾ ತೊ ಆಪ್ಲೊ ಹಾತ್ ಮಾತ್ಯಾರ್ ಪುಸ್ತಾನಾ ತಾಕಾ ಏಕಾ ಜಳ್ಚ್ಯಾ ಸಿಗ್ರೆಟಿಚ್ಯಾ ಕುತ್ಯೆಚೊ ಸ್ಪರ್ಶ್ ಜಾಲೊ. ಕೊಣೆ ಪೊಕ್ರಿ ತರ್ನಾಟ್ಯಾನ್ ತಿ ಕುತಿ ತಾಚ್ಯಾ ಮಾತ್ಯಾರ್ ಉಡವ್ನ್ ಸೊಭಾಯ್ ಚಾಕೊನ್ ಆಸ್‍ಲ್ಲೆ. ಕಿತೆಂಗಿ ದುರ್ಬಳೊ ಜಾವ್ನ್ ಜಲ್ಮಾಲ್ಲ್ಯಾ ಲಿಗೊರಿಕ್ ಖಂಯ್ ಗೆಲ್ಯಾರೀ ಸಮಾಧಾನ್ ನಾಸ್‍ಲ್ಲೆಂ. ಆನಿ ಹಾಂಗಾಸರ್ ವಿಗಾರ್ ದುರ್ಬಳ್ಯಾಂ ವಿಶ್ಯಾಂತ್ ಉಲವ್ನ್ಂಚ್ ವೆತಾನಾ ತಾಕಾ ತಾಚ್ಯಾ ಆಂಗಾರ್ ಕಾತ್ಕುತ್ಲಿ ಚರ‍್‍ಲ್ಲ್ಯಾಪರಿಂ ಜಾಲೆಂ. ತಿ ವಿಶೇಷ್ ಖೊರೊಚ್ ತಾಣೆ ಭೊಗ್ಲಿ ತ್ಯಾ ವಿಗಾರಾಚ್ಯಾ ಶೆರ್ಮಾಂವಾಪರಿಂ – “ಹಾಂವೆ ಸಾಂಗ್‍ಲ್ಲ್ಯಾಪರಿಂ ಕರಾ, ಹಾಂವ್ ಕಿತೆಂ ಕರ್ತಾಂ ತೆಂ ತುಮ್ಕಾಂ ಪಡೊನ್ ವಚೊಂಕ್ ಫಾವೊ ನಾ” ಮ್ಹಳ್ಳ್ಯಾಪರಿಂ.
ಪಾಂಚ್ ವರ್ಸಾಂ ಆದಿಂ ಹಾಡ್‍ಲ್ಲ್ಯಾ ತ್ಯಾ ಪರ್ನ್ಯಾ ಮೊಚ್ಯಾಂಕ್ ತೆಂ ಕಾಳೆಂ ಪೊಲಿಶ್ ಮಾರ್ನ್ ಇಲ್ಲೆ ಜಿಗ್ಗ್ ಕೆಲ್ಲೆ ಲಿಗೊರಿನ್. ಬ್ಯಾಂಕಾಂತ್ ಪಿಯೊನಾಚೆಂ ಕಾಮ್ ಕರುನ್ ಆಪ್ಲೆಂ ಲ್ಹಾನ್ ಕುಟಾಮ್ ಪೊಸುನ್ ಆಸ್‍ಲ್ಲ್ಯಾ ತಾಕಾ ಖರ್ಚುಂಕ್ ಹಾತಿಂ ವಿಶೇಷ್ ಪಯ್ಶೆಯ್ ನಾಸ್‍ಲ್ಲೆ. ವಿಶೇಷ್ ಗ್ರೇಸ್ತಾಂನಿ ದುರ್ಬಳ್ಯಾಂ ವಿಶ್ಯಾಂತ್ ಉಲಯ್ತಾನಾ ತಾಕಾ ಖಂಯ್ ನಾಸ್‍ಲ್ಲೊ ರಾಗ್ ಯೆತಾಲೊ; ಪುಣ್ ಕರ್ಚೆಂ ಕಿತೆಂ? ತಾಚೊ ಆವಾಜ್ ಆಯ್ಕೊಂಕ್ ಕೋಣ್ಂಚ್ ನಾಸ್‍ಲ್ಲೆ.
ಮೀಸ್ ಗಮ್ಮತ್ ಜಾಲೆಂ; ವೊಲ್ಟಿಚೆಂ ಕೋಯರ್ ಸಗ್ಳೊ ಸಂಸಾರ್ ಹಾಲಂವ್ಕ್ ಸಕ್ಲೆಂ. ಲಿಗೊರಿನ್‍ಯ್ ತೆಂ, “ಬಾಳ್ ಜಲ್ಮಾಲಾ, ಸಂಸಾರ್ ಫಾಂಕ್ಲಾ” ಗೀತ್ ತಾಚ್ಯೆಸ್ಥಕಿಂ ಗಾಯ್ಲೆಂ. ಆತಾಂ ತೊ ತ್ಯಾ ತರ್ನಾಟ್ಯಾಂ ಥಾವ್ನ್ ಪಯ್ಸ್ ರಾವ್‍ಲ್ಲೊ. ಹೆ ಗಿರೆಸ್ತಾಂಚೆ ಪಿಲೆ ಕಿತೇಂಯ್ ಕರ್ತಿತ್ ಮ್ಹಳ್ಳಿ ಭಿರಾಂತ್ ತಾಕಾ ಆಸ್‍ಲ್ಲಿ.
ಲಿಗೊರಿಚಿ ಪತಿಣ್ ಸ್ಟೆಲ್ಲಾ ಖಂಯ್ಸರ್ಗಿ ಬಸೊನ್ ಆಸ್‍ಲ್ಲೆಂ. ಮೀಸ್ ಜಾತಚ್ ಕಷ್ಟಾಂನಿ ತಾಕಾ ತಾಣೆ ಸೊಧುನ್ ಕಾಡ್ಲೆಂ ಆನಿ “ಹಾಂಗಾಚ್ ರಾವ್ ಸಾಯ್ಬಿನಿ ಹಾಂವ್ ಆತ್ತಾಂ ವಿಗಾರಾಕ್ ಬರೆಂ ಫೆಸ್ತ್ ಮಾಗೊನ್ ಯೆತಾಂ ಮ್ಹಣ್” ಸಾಂಗ್ಲೆಂ.
ಲಿಗೊರ್ ವಿಗಾರಾಕ್ ಮೆಳೊಂಕ್ ಕುಜ್ನಾ ತೆವ್ಶಿಂ ವೆತಾನಾ ಮೀಸ್ ಜಾವ್ನ್ ವೀಸ್ ಮಿನುಟಾಂ ಜಾಲ್ಲಿಂ. ಥಂಯ್ಸರ್ ತಾಕಾ ಇಗರ್ಜೆಚೊ ಬೊಟ್ಲೆರ್ ಬಾವ್ತಿಸಾಮ್ ಮೆಳ್ಳೊ, ಲಿಗೊರಿನ್ ವಿಗಾರ್ ಖಂಯ್ ಆಸಾ ಮ್ಹಣ್ಟಾನಾ, “ವಿಗಾರ್ ಕುಜ್ನಾಂತ್ ಆಸಾ ಲಿಗೊರಿ, ಆತಾಂ ತೊ ತುಕಾ ಉಲಂವ್ಕ್ ಮೆಳ್ಚೊನಾ. ಬ್ಯಾಂಕಾ ಥಾವ್ನ್ ಕಾಯ್ ತಾಕಾ ದೀಂವ್ಕ್ ಪಯ್ಶೆ ಹಾಡ್ನ್ ಆಯ್ಲಾಯ್ ತರ್ ಹಾಂವ್ ತುಕಾ ತಾಚೆರ‍್ಶಿಂ ವ್ಹರ್ತಾಂ. ವಿಗಾರ್ ಆತಾಂ ತಾಚೊ ಬೊಕ್ರ್ಯಾಚ್ಯಾ ಪಾಂಯಾಂಚೊ ಸೂಪ್ ಪಿಯೆವ್ನ್ ನಿದೊಂಕ್ ವೆತಲೊ, ತುಕಾ ಕಿತೆಂ ಸ್ಟೆಲ್ಲಾಕ್ ಘೆವ್ನ್ ಘರಾ ವಚೊಂಕ್ ಜಾಯ್ನಾಯೆ?” ಬೊಟ್ಲೆರಾನ್ ಲಿಗೊರಿಕ್ ಸಮಾಧಾನ್ ಕೆಲೆಂ.
“ತರ್ ಹಾಂವ್ ಕಾಜಿತೊರಾಕ್ ಮೆಳೊಂಕ್ ವಚೊಂ?” ಲಿಗೊರಿಚ್ಯಾ ಸವಾಲಾಕ್ ಬಾವ್ತಿಸಾಮಾನ್ ಜವಾಬ್ ದಿಲಿ. “ತೊ ವಯ್ರ್ ಮಾಳ್ಯೆರ್ ನಿದೊಂಕ್ ಗೆಲಾ ಆಸ್ತೊಲೊ. ವಯ್ರ್
ಏಸಿಚೊ ಆವಾಜ್ ಆಯ್ಕಾಲ್ಯಾರ್ ತುಂ ತಾಕಾ ಧೊಸುಂಕ್ ವಚಾನಾಕಾ; ತೊ ನಿದ್ಲಾ ಆಸ್ತೊಲೊ” ಮ್ಹಳೆಂ ತಾಣೆ.
ಬಾವ್ತಿಸಾಮಾನ್ ಸಾಂಗ್‍ಲ್ಲ್ಯಾಪರಿಂಚ್ ಕಾಜಿತೊರ್ ಹವ್ಯಾ ನಿಯಂತ್ರಿತ್ ಕುಡಾಂತ್ ನೀದ್ ಕಾಡ್ಟಾ. ಲಿಗೊರಿಕ್ ವಿಗಾರಾಚ್ಯಾ ಉತ್ರಾಂಚೊ ಉಗ್ಡಾಸ್ ಆಯ್ಲೊ -’ತೊ ಜೆಜು ಪಳೆ ತ್ಯಾ ಗೊಟ್ಯಾಂತ್-ಗೊರ್ವಾಂಚ್ಯಾ ಮಾಟ್ಯಾಂತ್ ಜಲ್ಮಾಲೊ….” ಆನಿ ಆತಾಂ ಹಾಂಗಾಸರ್? ಗೊಟೊಯ್ ನಾ, ಮಾಟೆಂಯ್ ನಾ; ಫಕತ್ ಗಿರೆಸ್ತ್‍ಕಾಯೆಚೆಂ ಕಾಟೆಂ ಮಾತ್ರ್. ಲೋಕಾಕ್ ಸಾಂಗ್ಚೆಂ ಏಕ್ ಆನಿ ಆಪ್ಣೆ ಕರ್ಚೆಂ ಬೊಲ್ತೆಂಚ್. ಹಾಂಚ್ಯೆಲಾಗಿಂ ಉಲಂವ್ಚಾ ಬದ್ಲಾ ಆಪುಣ್ ಸ್ಟೆಲ್ಲಾಕ್ ತ್ಯಾ ಪಾತಳ್ ವೋಲಿ ಭಿತರ್ ಗುಟ್ಲಾವ್ನ್ ನಿದ್ಲ್ಯಾರ‍್‍ಚ್ ಬರೆಂ ಮ್ಹಣ್ ಚಿಂತುನ್ ಲಿಗೊರಿನ್ ಆಪ್ಲ್ಯಾ ಘರ್ಚಿ ವಾಟ್ ಧರ್ಲಿ
– ಆಸ್ಟಿನ್ ಪ್ರಭು, ಚಿಕಾಗೊ
