ಎಡಿ ನೆಟ್ಟೊಕ್ ಕೊಂಕಣಿ ಲೇಖಕ್ ಸಂಘ್, ಕರ್ನಾಟಕಾಚಿ ಪಯ್ಲಿ ಸಾಹಿತ್ಯ್ ಪ್ರಶಸ್ತಿ

ಮಾಲ್ಘಡೊ ಕೊಂಕಣಿ ಲೇಖಕ್ ಎಡಿ ನೆಟ್ಟೊ ಹಾಕಾ, ಕೊಂಕಣಿ ಲೇಖಕ್ ಸಂಘ್, ಕರ್ನಾಟಕ್ ಹಾಂಚಿ ಪಯ್ಲಿ ಸಾಹಿತ್ಯ್ ಪ್ರಶಸ್ತಿ ಫಾವೊ ಜಾಲ್ಯಾ. ಸುಕ್ರಾರಾ 11 ಮಾರ್ಚ್ 2022 ವೆರ್ ಮಂಗ್ಳುರ್ಚ್ಯಾ ಪ್ರೆಸ್ ಕ್ಲಬ್ಬಾಂತ್ ಅಪಯಿಲ್ಲ್ಯಾ ಪತ್ರಿಕಾ ಪರಿಷದೆಂತ್ ಕೊಂಕ್ಣಿ ಲೇಖಕ್ ಸಂಘ್, ಕರ್ನಾಟಕ್ ಹಾಚೊ ಸಂಚಾಲಕ್ ರಿಚರ್ಡ್ ಮೊರಾಸ್ ಹಾಣೆ ಹಿ ಪ್ರಶಸ್ತಿ ಜಾಹೀರ್ ಕೆಲಿ.

ಹ್ಯಾ ಸಂದರ್ಭಾರ್ ಉಲವ್ನ್ ರಿಚರ್ಡ್ ಮೊರಾಸ್ ಮ್ಹಣಾಲೊ ” ಕೊಂಕಣಿ ಭಾಸ್ ಆನಿ ಸಾಹಿತ್ಯಾಕ್ ಉತ್ತೇಜನ್ ದೀವ್ನ್, ವಾಡಂವ್ಚ್ಯಾ ಉದ್ದೇಶಾನ್ 2018 ವ್ಯಾ ವರ್ಸಾ ‘ಕೊಂಕಣಿ ಲೇಖಕ್ ಸಂಘ್, ಕರ್ನಾಟಕ್’ ಸುರ್ವಾತ್ಲೊ. 2022 ವ್ಯಾ ವರ್ಸಾ, ಕೊಂಕಣಿ ಸಾಹಿತ್ಯಾಕ್ ಅಪಾರ್ ದೆಣ್ಗಿ ದಿಲ್ಲ್ಯಾ ಎಕಾ ಲೇಖಕಾಕ್ ವಿಂಚುನ್ ಪ್ರಶಸ್ತಿ ಪಾಟವ್ನ್ ಮಾನ್ ಕರ್ಚೊ ನಿರ್ಧಾರ್ ಘೆತ್ಲೊ. ತೆ ಪರ್ಮಾಣೆ ಕೊಂಕ್ಣೆಚೊ ಮಾಲ್ಘಡೊ ಲೇಖಕ್ ಎಡಿ ನೆಟ್ಟೊ ಹಾಕಾ ಕೊಂಕಣಿ ಲೇಖಕ್ ಸಂಘ್, ಕರ್ನಾಟಕ್ ಪಯ್ಲಿ ಸಾಹಿತ್ಯ್ ಪ್ರಶಸ್ತಿ ಫಾವೊ ಜಾತಾ. ಹಿ ಪ್ರಶಸ್ತಿ ರುಪಯ್ 25,000/- ನಗದ್, ಮಾನ್ ಪತ್ರ್ ಆನಿ ಯಾದಿಸ್ತಿಕಾ ಆಟಾಪ್ತಾ”

ಮುಕಾರುನ್ ತಾಣೆ ಮ್ಹಳೆಂ ” 2022 ಮಾರ್ಚ್ 28 ತಾರಿಕೆರ್ ಸಾಂಜೆಚ್ಯಾ 6.30 ವ್ಹರಾರ್, ಬಜ್ಜೋಡಿ – ನಂತೂರ್ ಸಂದೇಶ ಸಭಾಸಾಲಾಂತ್ ಚಲ್ಚ್ಯಾ ಕಾರ್ಯಾಂತ್ ಹಿ ಪ್ರಶಸ್ತಿ ಪ್ರದಾನ್ ಕರ್ತೆಲ್ಯಾಂವ್. ಪ್ರಶಸ್ತಿ ಪ್ರದಾನ್ ಕಾರ್ಯಾಕ್ ಸಂದೇಶ ಪ್ರತಿಷ್ಠಾನಾಚೊ ನಿರ್ದೇಶಕ್ ಮಾ| ಬಾ| ಫ್ರಾನ್ಸಿಸ್ ಆಸಿಸ್ ಅಲ್ಮೇಡಾ, ಮುಕೆಲ್ ಸಯ್ರೊ ಜಾವ್ನ್, ಮಂಗ್ಳುರ್ ವಿಶ್ವವಿದ್ಯಾಲಯಾಚೊ ಪ್ರಾಧ್ಯಾಪಕ್ ದನಂಜಯ್ ಕುಂಬ್ಳೆ, ಮಾನಾಚೊ ಸಯ್ರೊ ಜಾವ್ನ್ ಹಾಜರ್ ಆಸ್ತಲೆ. ಹ್ಯಾ ಕಾರ್ಯಾಕ್ ಸರ್ವ್ ಕೊಂಕ್ಣಿ ಮೋಗಿಂಕ್ ಮೊಗಾಚೊ ಯೆವ್ಕಾರ್ ಆಸಾ  “

ಪತ್ರಿಕಾ ಪರಿಷದೆಂತ್ ಸಮಿತಿ ಸಾಂದೊ ಡೊಲ್ಫಿ ಎಫ್. ಲೋಬೊ, ಸಲಹಾ ಸಮಿತಿ ಸಾಂದೊ ಜೆ. ಎಫ್. ಡಿ’ಸೊಜಾ ಆನಿ ಸಂಘಟನ್ ಸಮಿತಿಚೊ ಸಾಂದೊ ಟೈಟಸ್ ನೊರೊನ್ಹಾ ಹಾಜರ್ ಆಸ್ಲೆ.

ಎಡಿ ನೆಟ್ಟೊ ಹ್ಯಾಚ್ ನಾಂವಾನ್ ಕೊಂಕ್ಣಿ ಸಮಾಜೆಂತ್ ಒಳ್ಕೆಚೊ ಎಡ್ವಿನ್ ಮರಿಯಾಣ್ ನೆಟ್ಟೊ ಹಾಚೊ ಜಲ್ಮ್ ಎಪ್ರಿಲ್ 10, 1938 ವೆರ್ ಮಂಗ್ಳುರ್ಚ್ಯಾ ಜೆಪ್ಪುಂತ್ ಜಾಲೊ. ತಾಚೊ ಬಾಪುಯ್ ದೆ| ಆಮಾಂಡೊ ನೆಟ್ಟೊ ಏಕ್ ನಟ್ ತಶೆಂ ಬ್ಯಾಂಡ್ ಮಾಸ್ಟರ್ ಜಾವ್ನಾಸ್ಲೊ. ಆವಯ್ ದೆ| ಫ್ರಾನ್ಸಿಸ್ಕಾ ನೆಟ್ಟೊ, ಗೃಹಿಣಿ. ಸಾಂ. ಜೋಸೆಫ್ ಇಸ್ಕೊಲ್, ಜೆಪ್ಪು ಹಾಂಗಾಸರ್ 8 ವ್ಯಾ ಕ್ಲಾಶಿ ಪರ್ಯಾಂತ್ , ಉಪ್ರಾಂತ್ ಸಾಂ. ಲುವಿಸ್ ಹೈಸ್ಕೂಲಾಂತ್ 11 ವ್ಯಾ ಕ್ಲಾಶಿ ಪರ್ಯಾಂತ್ ತಾಣೆ ಶಿಕಪ್ ಜೊಡ್ಲೆಂ.

1956 ವ್ಯಾ ವರ್ಸಾ 18 ವರ್ಸಾಂಚ್ಯಾ ಪ್ರಾಯೆರ್ ತೋ ಭಾರತೀಯ್ ವಾರ‍್ಯಾಸಯ್ನಾಂತ್ ಭರ್ತಿ ಜಾಲೊ. ದೇಶಾಚ್ಯಾ ಗಡಿಯೆಯ್ ಸುರಕ್ಶಾ ಸಾಂಬಾಳ್ಚೆ ಜವಾಬ್ದಾರೆಂತ್ 1962 ಚೀನಾ ಝುಜ್, 1965 ಪಾಕಿಸ್ತಾನ್ ಝುಜ್, 1971 ಬಾಂಗ್ಲಾ ಝುಜಾಂತ್ ತಾಣೆ ವಾಂಟೊ ಘೆತ್ಲಾ. ನಿರಂತರ್ 37 ವರ್ಸಾಂ ವಾರ‍್ಯಾಸಯ್ನಾಂತ್ ಸೆವಾ ದೀವ್ನ್, ಮಿಸ್ಸಾಯ್ಲ್ ಅಧಿಕಾರಿ ಜಾವ್ನ್ 1993 ವ್ಯಾ ವರ್ಸಾ ತಾಣೆ ನಿವೃತ್ತಿ ಜೊಡ್ಲಿ. ದೀರ್ಘ್ ಆನಿ ಪ್ರಾಮಾಣಿಕ ಸೆವೆಖಾತಿರ್ ತಾಕಾ ರಾಷ್ಟ್ರಪತಿ ಪುರಸ್ಕಾರ್ ಆನಿ 5 ಮಿಲಟರಿ ಪದಕಾಂ ಪ್ರಾಪ್ತ್ ಜಾಲ್ಯಾಂತ್.

ನಾಟಕಿಸ್ತ್, ಸಂಗೀತ್‌ಗಾರ್ ಆನಿ ಸಂಗೀತ್ ಸಜಯ್ಣಾರ್ ಬಾಪಯ್ಚ್ಯಾ ಪ್ರಭಾವಾನ್ ತಾಣೆ 5 ವರ್ಸಾಂಚ್ಯಾ ಪ್ರಾಯೆ ಥಾವ್ನ್‌ಚ್ ಜೆಪ್ಪು ನಾಟಕ್ ಸಂಘಚ್ಯಾ ನಾಟಕಾಂನಿ, ಇಸ್ಕೊಲಾಂತ್ ನಟನಾಂತ್ ಆನಿ ಸಂಗೀತಾಂತ್ ಆಪ್ಲೆಂ ತಾಲೆಂತ್ ದಾಕಂವ್ಕ್ ಸುರು ಕೆಲೆಂ. ಸಾಂಗಾತಾ ನಾಟ್ಕುಳೆ ಬರವ್ನ್ ಪ್ರದರ್ಶನ್ ಕೆಲೆಂ. ಖೆಳಾಪಂದ್ಯಾಟಾಂತೀ ಮುಕಾರ್ ಆಸ್‌ಲ್ಲೊ ತೋ ಹೈಸ್ಕೂಲಾಂತ್ 8 ವ್ಯಾ ಕ್ಲಾಶಿಂತ್ ತಶೆಂ 11 ವ್ಯಾ ಕ್ಲಾಶಿಂತ್ ಫುಟ್ಬಾಲ್ ಟೀಮಾಚೊ ಕ್ಯಾಪ್ಟನ್ ಜಾವ್ನಾಸ್ಲೊ. ಹೈಸ್ಕೂಲಾಚಿ ಪತ್ರಿಕಾ ’ಲಿಟಲ್‌ಮ್ಯಾನ್’ ಹಾಂತು ಕನ್ನಡ ಭಾಶೆಂತ್ ತೋ ಕಥಾ ಬರಯ್ತಾಲೊ. ಬಾಳ್ಪಣಾರ್‌ಚ್ ಬಾಪಯ್ನ್ ಹಾಡ್ಚ್ಯಾ ಚಂದಮಾಮ, ಕಥಾವಳಿ, ಬಾಲಮಿತ್ರ ಅಸಲ್ಯಾ ಪತ್ರಿಕಾಂ ವಾಚನಾಥಾವ್ನ್ ಸುರು ಜಾಲ್ಲಿ ವಾಚ್ಚಿ ಪಿಸಾಯ್ ಹೈಸ್ಕೂಲಾಂತ್ ಕಾದಂಬರಿ ಬರಂವ್ಚೆ ಪರ್ಯಾಂತ್ ಪಾವ್ಲಿ.

ಭಾರತೀಯ್ ವಾರ‍್ಯಾಸಯ್ನಾಂತ್ ಫುಟ್ಬಾಲ್ ಟೀಮಾಚೊ ಸಾಂದೊ, ಗಿಟಾರ್ ವಾದಕ್, ಗಾವ್ಪಿ ಜಾವ್ನ್ ಆಪ್ಲೆಂ ತಾಲೆಂತ್ ಊರ್ಜಿತ್ ಕೆಲ್ಲ್ಯಾ ತಾಚೆಂ ವಾಚಪ್ ಆನಿ ಬರಪ್ 1956 ಪಾಸುನ್ ಆಜ್ ಮೆರೆನ್ ಚಾಲುಚ್ ಆಸಾ. 1956 ವ್ಯಾ ವರ್ಸಾ ಘರಾ ಯೆಂವ್ಚ್ಯಾ ‘ಮಿತ್ರ್’, ‘ಝೆಲೊ’, ‘ಪಯ್ಣಾರಿ’, ಪತ್ರಾಂಚ್ಯಾ ಪ್ರಭಾವಾಂತ್ ತಾಚೆಥಂಯ್ ಉಬ್ಜಾಲ್ಲಿ ಕೊಂಕ್ಣೆಂತ್ ಬರಂವ್ಚಿ ಆಸಕ್ತ್ ಆಜ್‌ಯೀ ಖಾಯಮ್ ಆಸಾ.

1956 ವ್ಯಾ ವರ್ಸಾ ತಾಚಿ ಪ್ರಥಮ್ ಕವಿತಾ ‘ನಾಂವಾನ್ ಆಪಯ್ತಾತ್ ತುಕಾ ಸ್ಟೆಲ್ಲಾ’ ಮಿತ್ರ್ ಹಫ್ತ್ಯಾಳ್ಯಾರ್ ಫಾಯ್ಸ್ ಜಾಲಿ. ಬಾಪುಯ್ ಆನಿ ಭಾವ್ ನಾಟಕಿಸ್ತ್ ಲುವಿ ನೆಟ್ಟೊ ಹಾಂಚ್ಯಾ ಪ್ರೋತ್ಸಾವಾನ್ ಆನಿ ಶ್ರೇಷ್ಠ್ ಕೊಂಕಣಿ ಸಾಹಿತಿ ದೆ| ಜೊ. ಸಾ. ಅಲ್ವಾರಿಸ್ ಹಾಚ್ಯಾ ಮಾರ್ಗದರ್ಶನಾಂತ್ ಕಥಾ – ಲೇಖನಾಂ ಬರಂವ್ಚೆಂ ಮುಕಾರುನ್ ಗೆಲೆಂ. ಭಾರತೀಯ್ ವಾರ‍್ಯಾಸಯ್ನಾಂತ್ ಆಸ್ತಾನಾ ಅಸ್ಸಾಂ, ಕಾಶ್ಮೀರ್, ಪಂಜಾಬ್, ರಾಜಸ್ಥಾನಾಂತ್ ಕಾಮ್ ಕರುನ್ ಆಸ್ತಾನಾ ಸಯ್ತ್ ಕಥಾ – ಲೇಖನಾಂ ಮಾರಿಫಾತ್ ಮಾಯ್ಗಾಂವಾ ಸಾಂಗಾತಾ ತಾಚೊ ಆತ್ಮೀಯ್ ಸಂಬಂದ್ ನಿವೃತ್ತೆ ಪರ್ಯಾಂತ್ ಮುಕಾರುನ್ ಗೆಲೊ. ಪಾಟ್ಲ್ಯಾ 66 ವರ್ಸಾಂನಿ ತಾಚೆ ಲಿಖ್ಣೆಥಾವ್ನ್ 3031 ಕೃತಿಯೊ ಉದೆಲ್ಯಾತ್. 530 ಕಥಾ, 2464 ಲೇಖನಾಂ, 26 ಕವಿತಾ, 9 ಕಾದಂಬರಿ ತಾಣೆ ಬರಯ್ಲ್ಯಾತ್. ದೋನ್ ಕಥಾ ಸಂಗ್ರಹ್ ಫಾಯ್ಸ್ ಜಾಲ್ಯಾತ್.

ತಾಚ್ಯಾ ಸಾಹಿತ್ಯ್ ಸೆವೆಕ್, 1992 ವ್ಯಾ ವರ್ಸಾ ರಾಕ್ಣೊ ಸನ್ಮಾನ್, 2002 ವ್ಯಾ ವರ್ಸಾ ‘ದಿವೊ’ ಪ್ರಶಸ್ತಿ, 2005 ವ್ಯಾ ವರ್ಸಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, 2006 ವ್ಯಾ ವರ್ಸಾ ಕುವೇಯ್ಟ್ ಕೊಂಕಣಿ ಟ್ಯಾಲೆಂಟ್ಸ್ ಪ್ರಶಸ್ತಿ, 2008 ವ್ಯಾ ವರ್ಸಾ ದಾಯ್ಜಿ ದುಬಯ್ ಪ್ರಶಸ್ತಿ, 2010 ವ್ಯಾ ವರ್ಸಾ ಕೊಂಕ್ಣಿ ಕುಟಮ್ ಬಾಹ್ರೇಯ್ನ್ ಪ್ರಶಸ್ತಿ, 2018 ವ್ಯಾ ವರ್ಸಾ ಸಂದೇಶ ಪ್ರಶಸ್ತಿ ಫಾವೊ ಜಾಲ್ಯಾತ್.

1970 ವ್ಯಾ ವರ್ಸಾ ಮಿಲಾರ್ಚ್ಯಾ ರೋಜಾ ಮರಿಯಾ ಡಿಸಿಲ್ವಾ ಸಂಗಿ ಲಗ್ನಾಬಾಂದಾಂತ್ ಎಕ್ವಟ್ಲೆಲ್ಯಾ ತಾಕಾ ಏಕ್‌ಚ್ ಧುವ್ – ಜಾಸ್ಮಿನ್ ಲೋನಾ. ಪ್ರಸ್ತುತ್ ಜೆಪ್ಪುಂತ್ ಕುಟ್ಮಾಚ್ಯಾ ಮಾಲ್ಗಡ್ಯಾ ಘರಾಂತ್ ಆಪ್ಲಿ ಪತಿಣ್, ಧುವ್  ಆನಿ  ಜಾಂವಯ್ ಆಲಿಸ್ಟರ್ ಮಾರೆರಾ ಆನಿ ನಾತ್ರಾಂ – ಶಾನ್ ಮತ್ತು ಅದಿತ್ ಹಾಂಚೆ ತೋ ಸಂತೃಪ್ತೆಚೆಂ ನಿವೃತ್ತ್ ಜೀವನ್ ಸಾರುನ್ ಆಸಾ.

ಕಿಟಾಳ್ ಮಾಲ್ಘಡೊ ಲೇಖಕ್ ಎಡಿ ನೆಟ್ಟೊಕ್ ಅಭಿನಂದನ್ ಆನಿ ಉಲ್ಲಾಸ್ ಪಾಟಯ್ತಾ ಆನಿ ಬರೆಂ ಮಾಗ್ತಾ.