ಡಿ ವಿ ಗುಂಡಪ್ಪಾನ್ ಲಿಕ್ಲಲ್ಯಾ ಮಂಕುತಿಮ್ಮನ ಕಗ್ಗ ಹ್ಯಾ ಕಾವ್ಯಾಂ ಘೊಸಾಕ್ ಚಾಕುನ್ ಸಹೃದಯಿಂಕ್ ಪಾಲ್ಪೊಣ್ಸಾಚಿ ಭಾಯ್ಲಿ ಸಾಲ್ ಕಾಡ್ಲ್ಯಾ ಉಪ್ರಾಂತ್ ಭಿತರ್ಲ್ಯಾ ಘರ್ಯಾಂಚೊ ಘೊಸ್ ರುಚಿನ್ ಚುಸುನ್ ಖಾಂವ್ಚೆಂ ಕಲ್ಪನ್ ಯೆತಾ. ’ಕನ್ನಡ ಭಾಗವತ’ ಮ್ಹಣುನ್ಂಚ್ ನಾಂವ್ ಜಾಲ್ಲಿ ಹಿ ಕೃತಿ ಸಂಸ್ರಾಸಾಹಿತಾಕ್ಚ್ ಏಕ್ ವ್ಹಡ್ ದೆಣ್ಗಿ. ಹಾಂವೆಂ ವಾಚುನ್ ಆಯ್ಕುನ್ ಸಮ್ಜೊನ್ ಘೆತ್ಲ್ಲೆಪರಿಂ ಕಗ್ಗ ವಾಚುನ್ ಆಪ್ಲಿ ಜೀಣ್ ಪರಿವರ್ತನ್ ಕೆಲ್ಲೆ ಹಜಾರಾಂನಿ ತರ್ ಕಿತ್ಲ್ಯಾಗೀ ಲೊಕಾನ್ ಹೆಂ ಕಾವ್ಯೆಂ ವಾಚ್ತಾಂ ವಾಚ್ತಾಂ ಜೀವ್ ಹೊಗ್ಡಾವ್ನ್ ಘೆಂವ್ಚೊ ಆಪ್ಲೊ ನಿರ್ಧಾರ್ ಬದ್ಲಿ ಕೆಲ್ಲೊಯ್ ಆಸಾ, ತಸಲಿ ತಾಂಕ್ ಹ್ಯಾ ಅಮರ್ ಕಾವ್ಯಾಚಿ.
ಕಗ್ಗ ಸೊಂಪ್ಯಾ ಉತ್ರಾಂನಿ ವಿಣ್ಲಲ್ಯಾ 945 ಚವ್ಪದಿಂಚೊ (ಚಾರ್ ವೊಳಿಂಚೊ ವೇರ್ಸ್) ಸಾಂಟೊ, ಉತ್ರಾಂ ಸೊಂಪಿಂ, ಹರ್ಯೆಕ್ಲ್ಯಾಕ್ ಸಲೀಸಾಯೆನ್ ಸಮ್ಜೊಂಚಿಂ, ಪೂಣ್ ತಾಂತುಂ ರೊಂಬೊವ್ನ್ ದವರ್ಲಾಂ ತೆಂ ಜಿವಿತಾ ದರ್ಶನ್ ಭೋವ್ ಗುಂಡಾಯೆಚೆಂ. ಹಾಂಗಾಸರ್ ಆಸ್ಚೊ ದಿಷ್ಟಾವೊ ವರ್ತ್ಯಾ ಸಕ್ತೆನ್ ಆನಿ ಶಾಥಿಯೆನ್ ಭರ್ಲಲೊ, ತತ್ವ್ಶಾಸ್ತಿರ್ ಮನ್ಶಾವಾದಾಚೊ ಆನಿ ವೆಕ್ತಿ ಸಂಸಾರ್ ವಾಸ್ತಾವಿಕ್ ತಳಾರ್ ಬಾಂದುನ್ ಹಾಡ್ಚೊ. ದೆಕುನ್ಂಚ್ ಹರ್ಯೆಕ್ಲ್ಯಾಕ್ ತೊ ಚುಂಬಕಾಭಾಶೆನ್ ವೊಡ್ತಾ, ಆಂವಡ್ತಾ. ತ್ಯಾ ನಿಮ್ತಿಂಚ್ ಹ್ಯಾ ಕೃತಿಯೆಚೆ ಎದೊಳ್ ವಿಸಾಂವಯ್ರ್ ಅವೃತ್ತ್ಯೊ ಜಾಲ್ಯೊ ಆನಿ ವಿಶೇಸ್ ಮ್ಹಳ್ಯಾರ್ ಹ್ಯಾ ಕೃತಿಯೆಚೆರ್ ಸಭಾರ್ ವಿಶ್ಲೇಷಣ್ ಕೃತಿಯೊ ಯೇವ್ನ್ ಜಾಲ್ಯೊ.
ಹಿ ಕೃತಿ ಭುರ್ಗ್ಯಾಪಣಾರ್ ಥಾವ್ನ್ ಆಮಿ ಸರ್ವಾಂನಿ ಪರ್ತ್ಯಾಂ ಪರ್ತ್ಯಾಂ ವಾಚ್ಲ್ಯಾ ಆನಿ ಹರ್ಯೆಕ್ ಪಾವ್ಟಿಂ ವಾಚ್ತಾಂ ನವೊ ಉಜ್ವಾಡ್ ಆಮ್ಕಾಂ ಲಾಬ್ಲಾ. ಹ್ಯಾ ಕೃತಿಯೆವಿಶಿಂ ವಿಶೇಷ್ ಭಕ್ತಿಪಣ್ ಆಮ್ಚೆ ಥಂಯ್ ವಾಡ್ಲ್ಲೆಂಯ್ ಆಸಾ. ಭುರ್ಗ್ಯಾಂಚ್ಯಾ ಭಾಷಣಾಂನಿ ವಾ ಮಹಾನ್ ಪಂಡಿತಾಂಚ್ಯಾ ಪ್ರವಚನಾಂನಿ ವಾಪಾರುಂಕ್ ಫಾವೊ ತೆ ಕವಿತೆ ವೇರ್ಸ್ ಹಾಂಗಾಸರ್ ಆಸಾತ್. ಅಸಲಿ ಹಿ ಮಾನಾಧಿಕ್ ತಶೆಂಚ್ ಮಹಾನ್ ಕೃತಿ ಕೊಂಕ್ಣೆಕ್ ಭಾಶಾಂತರ್ ಕರುಂಕ್ ಕಾಂಯ್ ಧಾ ವರ್ಸಾಂ ಥಾವ್ನ್ ಹಾಂವ್ ವಾವ್ರುನ್ ಆಸಾಂ. ’ಹಿ ಕೃತಿ ಭಾಶಾಂತರ್ ಕರ್ಚ್ಯಾ ಪವಿತ್ರ್ ವಾವ್ರಾಕ್ ಹಾಂವ್ ಫಾವೊ ಕಿತೆಂ?’ ಮ್ಹಣ್ಚೆಂ ಸವಾಲ್ ಮ್ಹಾಕಾ ತವಳ್ ತವಳ್ ಧೊಸುನ್ ಹೆಂ ಕಾಮ್ ಸಭಾರ್ ಪಾವ್ಟಿಂ ಹಾಂವೆಂ ಠಳ್ಲ್ಲೆಂ ಆಸಾ. ತರಿ ಮ್ಹಜ್ಯಾ ಲೊಕಾಂಚ್ಯಾ ಭಾಶೆಂತ್ ಹಿ ಕೃತಿ ಯೇಜೆ ಮ್ಹಣ್ಚ್ಯಾ ಆತುರಾಯೆನ್ ಹೊ ವಾವ್ರ್ ಹಾಂವೆಂ ಪರ್ತ್ಯಾಂ ಪರ್ತ್ಯಾಂ ಮುಂದರಿಲೊ. ಕರ್ನಾಟಕ್ ಸರ್ಕಾರಾಚ್ಯಾ ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರಾನ್ ಹಿ ಕೃತಿ ಪರ್ಗಟ್ಲ್ಯಾ.
ಡಿವಿಜಿ ಏಕ್ ವಳಕ್ :
ದೇವನಹಳ್ಳಿ ವೆಂಕಟರಮಣಯ್ಯ ಗುಂಡಪ್ಪ ಸಾಹಿತ್ ಸಂಸಾರಾಂತ್ ಡಿವಿಜಿ ಮ್ಹಣುನ್ಂಚ್ ಅಭಿಮಾನಾನ್ ವಳ್ಕಿಚೊ. ಹೊ ಮಹಾಣ್ ಮನ್ಶಾವಾದಿ ತತ್ವ್ಶಾಸ್ತ್ರಿ ಕವಿ. 17-03- 1887 ಇಸ್ವೆಂತ್ ಮುಳಬಾಗಿಲಾಂತ್ ತಾಚೊ ಜನ್ಮ್ ಜಾಲೊ.
’ಮಂಕುತಿಮ್ಮನ ಕಗ್ಗ’ ಆನಿ ’ಮರುಳ ಮುನಿಯನ ಕಗ್ಗ’ ಲೊಕಾ ಜಿಬೆರ್ ಸದಾಂ ಘೊಳ್ಚ್ಯೊ ಡಿವಿಜಿಚ್ಯೊ ದೋನ್ ಕೃತಿಯೊ ತರಿ ಹೆರ್ ಸಭಾರ್ ಮಹತ್ವಾಚ್ಯೊ ಕೃತಿಯೊ ತಾಣೆಂ ಲಿಕ್ಲ್ಯಾತ್. ’ವಸಂತ ಕುಸುಮಾಂಜಲಿ’, ’ನಿವೇದನಾ’, ’ಉಮರನ ಒಸಗೆ’, ’ಶ್ರೀ ರಾಮ ಪರೀಕ್ಷಣಮ್’, ’ಗೀತಾ ಶಾಕುಂತಲಾ’ ಹ್ಯಾಪಯ್ಕಿ ಮಹತ್ವಾಚೆ ಕಾವ್ಯಾಂ ಸಂಗ್ರಹ್. ’ಬಾಳಿಗೊಂದು ನಂಬಿಕೆ’, ’ಸಾಹಿತ್ಯ ಶಕ್ತಿ’, ’ಜೀವನ ಸೌಂದರ್ಯ ಮತ್ತು ಸಾಹಿತ್ಯ’ ನಾಮ್ಣೆಚೆ ಪ್ರಬಂಧ್ ಗ್ರಂಥ್. ತಾಚ್ಯಾ ನಾಟಕಾಂ ಪಯ್ಕಿ ’ವಿಧ್ಯಾರಣ್ಯ ವಿಜಯ’, ’ತಿಲೋತ್ತಮೆ’, ನಾಂವಾಡ್ದಿಕ್ ಜಾಲ್ಯಾತ್. ’ದಿವಾನ್ ರಂಗಾಚಾರ್ಲು’, ’ಮೈಸೂರಿನ ದಿವಾನರು’, ’ಹಲವು ಮಹನೀಯರು’, ’ಗೋಪಾಲ ಕೃಷ್ಣ ಗೋಖಲೆ’ ಅಸಲೆ ಜಿಣ್ಯೆ ಚರಿತ್ರಾಯ್ ತಾಣೆ ಲಿಕ್ಲ್ಯಾತ್. ’ರಾಜ್ಯಾಂಗ ತತ್ವಗಳು’, ’ರಾಜ್ಯಶಾಸ್ತ್ರ’, ‘Probity in Public Life’, ‘Principles of Constitution’ ಅಸಲೆ ಅಧ್ಯಯನ್ ಗ್ರಂಥ್ಯಿ ತಾಚೆಥಾವ್ನ್ ಉದೆಲ್ಯಾತ್. ’ಪುರುಷ ಸೂಕ್ತ’, ’ಈಶೋಪನಿಷದ್’, ’ದೇವರು’ ಅಸಲೆ ತತ್ವ್ಶಾಸ್ತಿರಾಚೆ ಗ್ರಂಥ್ಯಿ ತಾಣೆ ಬರಯ್ಲ್ಯಾತ್. ’ಇಂದ್ರವಜ್ರ’, ’ಬೆಕ್ಕೋಜಿ’ ತಾಣೆ ರಚ್ಲ್ಲೆಂ ಭುರ್ಗ್ಯಾಂ ಸಾಹಿತ್.
ಪತ್ರ್ಗಾರಿಕೆಂತ್ ವರ್ತೆಂ ನಾಂವ್ ಡಿವಿಜಿನ್ ಕೆಲ್ಲೆಂ ’ಭಾರತ್’ ಆನಿ ’ಕರ್ನಾಟಕ’ ಮ್ಹಣ್ಚಿಂ ಪತ್ರಾಂ ತಾಣೆ ಸುರ್ವಾತುನ್ ಚಲಯಿಲ್ಲಿಂ. ’ಸುಮತಿ ಗ್ರಂಥಮಾಲೆ’ ಮ್ಹಣ್ಚ್ಯಾ ಲ್ಹಾನ್ ಪುಸ್ತಕಾಂಝೆಲ್ಯಾಕ್ಯಿ ತಾಣೆ ಪತ್ರ್ಗಾರಿಕಾ ನದ್ರೆನ್ ಪರ್ಗಟ್ಲಾಂ. ಸಾರ್ವಜಣಿಕ್ ಜಿವಿತಾಂತ್ ಪ್ರಾಮಾಣಿಕ್ಪಣ್ ವಾಡೊಂವ್ಚ್ಯಾಕ್ ಆಪ್ಲ್ಯಾ ಆದರ್ಶ್ ಮುಕೆಲ್ಯಾ ಗೋಪಾಲ್ ಕೃಷ್ಣ ಗೋಖಲೆಚ್ಯಾ ನಾಂವಾನ್ ತಾಣೆ ’ಗೋಖಲೆ ಇನ್ಸ್ಟಿಟ್ಯೂಟ್ ಆಫ್ ಪಬ್ಲಿಕ್ ಅಪೇರ್ಸ್’ (ಗೋಖಲೆ ಸಾರ್ವಜನಿಕ ವಿಚಾರ ಸಂಸ್ಥೆ) ಸುರ್ವಾತ್ಲೆಂ
ತಾಚ್ಯಾ ಶ್ರೀಮದ್ ಭಗವದ್ಗೀತಾ ತಾತ್ಪರ್ಯ (ಜೀವನ ಧರ್ಮ ಯೋಗ) ಕೃತಿಯೆಕ್ ಸಾಹಿತ್ ಅಕಾಡಮಿ ಪ್ರಶಸ್ತಿ ಲಾಬ್ಲ್ಯಾ. 1932 ಇಸ್ವೆಂತ್ ಮಡ್ಕೇರಿ ಚಲ್ಲ್ಲ್ಯಾ 18 ವ್ಯಾ ಕನ್ನಡ ಸಾಹಿತ್ ಸಮ್ಮೇಳನಾಚೊ ಅಧ್ಯಕ್ಷ್ ಜಾಲ್ಲ್ಯಾ ತಾಕಾ 1974 ಇಸ್ವೆಂತ್ ಪದ್ಮಭೂಷಣ್ ಪ್ರಶಸ್ತಿ ಲಾಬ್ಲಿ. ತಾಚಿ ಏಕ್ ಟಪ್ಪಾಲ್ಚೀಟ್ಯಿ ಭಾರತ್ ಸರ್ಕಾರಾನ್ ಪರ್ಗಟ್ಲ್ಯಾ.
