ಅಸ್ತಿತ್ವವಾದ್, ಏಕ್ ಪರಿಚಯ್

ಅಸ್ತಿತ್ವವಾದ್ ಯುರೋಪಾಂತ್ ಜಲ್ಮೊನ್ ಪ್ರಚಲಿತ್ ಜಾಲ್ಲೊ ಏಕ್ ಸಿದ್ಧಾಂತ್. ಡೆನ್ಮಾರ್ಕಾಚೊ ತತ್ವಗ್ಯಾನಿ ಸೋರೆನ್ ಕಿರ್ಕೆಗಾರ್ಡಾನ್ 184೦ವ್ಯಾಂತ್‌ಚ್ ಹಾಚೊ ಉಲ್ಲೇಖ್ ಕರುನ್ ಹ್ಯಾ ವಿಶಿಂ ಬರಯಿಲ್ಲೆಂ ಜಾಲ್ಯಾರೀ, ಹೊ ಏಕ್ ಸಿದ್ಧಾಂತ್ ಜಾವ್ನ್, ಹಾಚೊ ಪ್ರಭಾವ್ 20ವ್ಯಾ ಶತಮಾನಾಂತ್ ಜಾಲೊ ಆನಿ ಚಡ್ ಜಾವ್ನ್ ಸಾಹಿತ್ಯ್ ವಲಯಾಂತ್ ಭಾರಿಚ್ ಚರ್ಚಾಸ್ಪದ್ ಜಾಲೊ. ಇತ್ಲೆಂ ಮಾತ್ರ್ ನ್ಹಯ್, ಹೊ ಸಿದ್ಧಾಂತ್  ನವ್ಯಾ ಚಿಂತ್ಪಾಂಕ್, ಫಾಮಾದ್ ತತ್ವಗ್ಯಾನಿ,ಕವಿ  ತಸೆಂ ಸಾಹಿತಿಂಕ್ ಜಲ್ಮ್ ದೀಂವ್ಕ್ ಸಕ್ಲೊ. ಹೊ ಸಿದ್ಧಾಂತ್ “ಎಕ್ಸಿ‌ಸ್ಟೆನ್ಸಿಯಲಿಸಂ” (Existentialism) ಮ್ಹಣ್ ಸಾಹಿತ್ಯ್ ಲೋಕಾಂತ್ ಪರಿಚಯ್.

ಮಾರ್ಟಿನ್ ಹೈಡಗರ್, ಕಾರ್ಲ್ ಯಾಸ್ಪರ್ಸ್, ಜಾನ್ ಪೌಲ್ ಸಾತ್ರ್, ಸಿಮೋನ್ ದ ಬವಾರ್, ಆಲ್ಬರ್ಟ್ ಕಾಮೂ, ಪಿಯೊದರ್ ದೊಸ್ತೊವಸ್ಕಿ ಇತ್ಯಾದಿ ಅಸ್ತಿತ್ವವಾದಿ ಸಿದ್ಧಾಂತಾಕ್ ಆಪ್ಲ್ಯಾ ಬರ್ಪಾಂನಿ ವಾಪಾರುನ್ ನಾಂವಾಡ್ಲೆಲೆ ಥೊಡೆ ಸಾಹಿತಿ ತಸೆಂ ತತ್ವಗ್ಯಾನಿ.

ಅಸ್ತಿತ್ವವಾದ್ ಮ್ಹಳ್ಯಾರ್ ಕಿತೆಂ?

’ಅಸ್ತಿತ್ವ್’ ಮ್ಹಳ್ಯಾರ್ ಇಂಗ್ಲಿಷ್ ಸಬ್ದ್ ’ಎಕ್ಸಿ‌ಸ್ಟೆನ್ಸ್’(Existence ) ಮ್ಹಳ್ಳ್ಯಾಚೊ ತರ್ಜುಮೊ. ಎಕ್ಸಿ‌ಸ್ಟೆನ್ಸ್ ಮ್ಹಳ್ಯಾರ್ ‘ಆಸ್ಚೆಂ’ ಮ್ಹಳ್ಳೊ ಆರ್ಥ್. ಹೈಡಗರಾನ್ ಸಾಂಗ್ಚೆ ಪ್ರಕಾರ್ ಮನ್ಶ್ಯಾಕ್ ಮಾತ್ರ್ ಅಸ್ತಿತ್ವ್ ಆಸಾ. ಮನಿಸ್ ಮಾತ್ರ್ ಚಿಂತುಂಕ್ ಸಕ್ತಾ ಆನಿ ಆಪ್ಲ್ಯಾ ಜಿಣ್ಯೆಂತ್ ‘ವಿಂಚವ್ಣಿ’ (Choice ) ಪಾಡ್ ಯಾ ಬರಿ ಕರ್ತಾ. ಹ್ಯಾ ದೆಖುನುಂಚ್ ಅತಿತ್ವವಾದಾಚೊ ಪ್ರಮುಖ್ ಹುಸ್ಕೊ ವ್ಯಕ್ತಿ ಕೇಂದ್ರಿತ್ ‘ಸುಟ್ಕಾ’ ಚ್ (independence ) ಜಾವ್ನಾಸಾ. ವ್ಯಕ್ತಿ ಕೇಂದ್ರಿತ್ ಜಾಲ್ಲ್ಯಾನ್ ಮನ್ಶ್ಯಾಕ್ ಪಾತಕ್, ಮರಣ್, ಎಕ್ಸುರ್ಪಣ್, ನಾಸ್ತಿಕ್‌ಪಣ್ ಇತ್ಯಾದಿ ಸವಾಲಾಂ ಧೊಸ್ತಾತ್ ಆನಿ ಹಾಂಚ್ಯೆ ಥಾವ್ನ್ ಸುಟ್ಕಾ ಘೆಂವ್ಕ್ ತೋ ಪೆಚಾಡ್ತಾ.  ಹ್ಯಾ ಪೆಚಾಡ್ಚೆ ಜಿಣಿಯೆಂತ್ ತಾಕಾ ‘ಆಕಂತ್’ (Anxiety ), ‘ಉಬ್ಗಣ್’ (Boredom ) , ‘ವೊಂಕಾರೊ’ (Nausea) ಇತ್ಯಾದಿಚೊ ಅನುಭವ್ ಜಾತಾ.

17ವ್ಯಾ ಶತಮಾನಾಂತ್ ಸುರು ಜಾಲ್ಲೊ   ‘ಪುನರ್ ಉದಯ್’ (Renaissance), 18 ವ್ಯಾಂತ್ಲೊ ‘ವೈಚಾರಿಕ್ ಕಾಳ್’ (Age of Reason ) ಆನಿ ‘ಜ್ನಾನೋದಯ್’ (Enlightenment ), 19 ವ್ಯಾ ಶತಮಾನಾಂತ್ ಜಾಲ್ಲೊ ವೈಜ್ನಾನಿಕ್ ಪ್ರಭಾವ್, ಕೈಗಾರಿಕ್ ಕ್ರಾಂತಿ ಆನಿ 20 ವ್ಯಾ ಶತಮಾನಾಂತ್ ಉದೆಲ್ಲೆಂ ‘ಅಧುನಿಕತಾ’ (Modernism ) ಅಸ್ತಿತ್ವವಾದ್ ಜಲ್ಮೊಂಕ್ ಕಾರಣ್ ಮ್ಹಣ್ ಕಳೊನ್ ಯೆತಾ. ಹಾಕಾ ಪೂರಕ್ ಜಾವ್ನ್ ಪಯ್ಲೆಂ ಜಾಗತಿಕ್ ಝಜ್ (1914-18) ಆನಿ ದುಸ್ರೆಂ ಜಾಗತಿಕ್ ಝಜ್ (1940-45) ಯುರೋಪ್ ರಾಷ್ಟ್ರಾಂನಿ ದುಬ್ಳಿಕಾಯ್,ಅಸಹಾಯಕತಾ, ನಿರಾಸ್, ನಿರುದ್ಯೋಗ್ ಇತ್ಯಾದಿ ಚಡೊನ್ ಲೋಕಾಕ್ ಸಭಾರ್ ಆರ್ಥಿಕ್ ನಷ್ಟ್ ಸೊಸ್ಚೆಂ ಪಡ್ಲೆಂ.

ಜರ್ಮನಿಚೊ ಸರ್ವಾಧಿಕಾರ್ ಹಿಟ್ಲರಾಚೆಂ ‘ನಾಝಿ’ ಸಿದ್ಧಾಂತ್ ಆನಿ ಹ್ಯಾ ವರ್ವಿಂ ಜಾಲ್ಲಿ ಜುದೆಂವಾಚಿ ಖುನಿ, ವ್ಯಕ್ತಿ ಸ್ವಾತಂತ್ರ್ಯಾಕ್ ಅಡ್ಕಳ್ ಇತ್ಯಾದಿ ಜಾವ್ನ್ ಲೋಕ್ ಏಕಾ ಥರಾನ್ ‘ಭ್ರಮನಿರಸಣ್’ ಜಾಲೊ. ಹ್ಯಾ ಸರ್ವಾಂ ಮಧೆಂ ಮನ್ಶ್ಯಾಚ್ಯೆ ಜಿಣ್ಯೆಚೊ ಆರ್ಥ್ ಕಸಲೊ? ದೇವ್ ನಿಜಾಯ್ಕೀ ಅಸಾಗೀ? ಇತ್ಯಾದಿ ಸವಾಲಾಂ ಉದೆಲಿಂ. ಹ್ಯಾ ಮಧೆಂ ಫ್ರೆಂಚ್ ಮಹಾಕ್ರಾಂತಿ ಜಾಲ್ಲ್ಯಾನ್ ರಾಯ್ ದೆವಾಚೊ ರೂಪ್ ನ್ಹಯ್ ಮನಿಸ್, ಸ್ವಾರ್ಥಿ, ಹಟ್ಟಿ ಮ್ಹಳ್ಳೆಂ ಸತ್ ಲೋಕಾಕ್ ಕಳ್ಳೆಂ. ಸರ್ವಾಧಿಕಾರಿ ರಾಯಾ ವಿರೋಧ್ ಚಳ್ವಳ್ ಜಾವ್ನ್ ಆಂದೋಲನ್ ಚಲ್ಲೆಂ. ಪರಿಣಾಮ್ ಜಾವ್ನ್ ಯೂರೊಪ್ ರಾಷ್ಟ್ರಾಂನಿ ‘ಪ್ರಜಾತಂತ್ರ್’ (Democracy) ಚಡ್ ಆರ್ಥಾಭರಿತ್ ಜಾಂವ್ಕ್ ಪಾವ್ಲೆಂ ಹೆಂ ಸಕ್ಕಡ್ ಜಾಂವ್ಕ್ ವ್ಯಕ್ತಿ ಸ್ವಾತಂತ್ಯ್ರ್ ಗರ್ಜೆಚೆಂ,ಪ್ರಸ್ತುತ್ ಮ್ಹಳ್ಳಿ ಅಭಿಪ್ರಾಯ್ ದೃಡ್ ಜಾಲಿ. ದೇವ್, ಧರ್ಮ್,ನೀತ್ ಇತ್ಯಾದಿ ವಿಶಿಂ ಸವಾಲಾಂ ಉದೆವ್ನ್ ಜಾಪ್ ಆಪ್ಣಾಂವ್ಕ್ ಲೋಕ್ ಆಶೆಲೊ.

ಅಸ್ತಿತ್ವವಾದ್ ಸಿದ್ಧಾಂತಾ ಪಾಟ್ಲಿ ಚರಿತ್ರಾ ಕಸಲಿ?

ಅಸ್ತಿತ್ವವಾದ್ ಜಲ್ಮೊಂಕ್ ಪಾಶ್ಚಾತ್ಯ್ ರಾಷ್ಟ್ರಾಂನಿ ತೆದ್ನಾಂ ತೆದ್ನಾಂ ಉಬ್ಜಾಲ್ಲಿಂ ಥರಾವಳ್ ಚಿಂತ್ಪಾಂ ಯಾ ಸಿದ್ಧಾಂತಾಂ ಕಾರಣ್ ಜಾಲ್ಯಾಂತ್. ಹಾಂತು ಪ್ರಮುಖ್ ಜಾವ್ನ್ ಅಸ್ತಿತ್ವವಾದ್ ಏಕ್ ಸಿದ್ಧಾಂತ್ ಜಾವ್ನ್ ಜಲ್ಮೊಂಕ್ ಪ್ರಯೋಗ್ ವಾದ್ (Empiricism), ಮಾನವತಾವಾದ್ ( Humanism), ಪ್ರಯೋಜನ್ ವಾದ್ (Pragmatism) ಶೂನ್ಯವಾದ್’ (Nihilism), ಆನಿ ಅರಾಜಕವಾದ್ ( Anarchism) ಇತ್ಯಾದಿ ಸಿದ್ಧಾಂತ್ ಸಯ್ತ್ ಕಾರಣ್ ಜಾಲ್ಯಾತ್. ಪ್ರಯೋಗ್ ವಾದ್ ಮ್ಹ ಳ್ಯಾರ್ ಅನುಭವ್. ಜಾನ್ ಲಾಕ್, ಜಾರ್ಜ್ ಬರ್ಕ್ಲಿ ಆನಿ ಡೇವಿಡ್ ಹ್ಯೂಮ್ ಪ್ರಮುಖ್ ಜಾವ್ನ್ ಹ್ಯಾ ಸಿದ್ಧಾಂತಾ ಪಾಟ್ಲೆ ಚಿಂತ್ಪಿ. ಮಾನವತಾವಾದ್ ಸಂಸಾರಾಚೊ ಅತೀ ಪುರಾತನ್, ಲೊಕಾಮೊಗಾಳ್ ಆನಿ ಸಾರ್ವಕಾಲೀಕ್ ಸಿದ್ಧಾಂತ್. ವೋಲ್ಟೇರ್, ಬಟ್ರಂಡ್ ರಸೆಲ್, ಜೆರೆಮಿ ಬೆಂಥಮ್ ಇತ್ಯಾದಿ ಚಿಂತ್ಪಿ ಹ್ಯಾ ಸಿದ್ಧಾಂತಾಚೆ ಪ್ರತಿವಾದಿ. ಪ್ರಯೋಗ್‌ವಾದ್ ಸಿದ್ಧಾಂತಾಕ್ ಪಾಟಿಂಬೊ ದಿಲ್ಲ್ಯಾ ಪಯ್ಕಿ ವಿಲಿಯಂ ಜೇಮ್ಸ್, ಸಿ,ಎಸ್.ಪರ್ಸ್ ಆನಿ ಜಾನ್ ಡ್ಯೂವಿ ಇತ್ಯಾದಿ ಪ್ರಮುಕ್ ಚಿಂತ್ಪಿ. ಪ್ರಯೋಜನ್‌ವಾದಿ ಸಂದಾಂಚ್ ಆವ್ಕಾಸಾಂಕ್ ರಾಕೊನ್ ಅಸ್ತಾ. ಶೂನ್ಯವಾದ್ ಖಂಚಾಯ್ ಮೌಲ್ಯಾಂಕ್ ಒಪ್ವಾನಾ ಆನಿ ದೇವ್,ಸರ್ಕಾರ್ ಆನಿ ಸಮಾಜೆಕೀ ಸಯ್ತ್ ವಿರೋಧ್ ಕರ್ತಾ.

ಹ್ಯಾಚ್ ವಗ್ತಾ ಜರ್ಮನಿಂತ್ ಆದರ್ಶ್ ವಾದ್ (Idealism ) ಸಿದ್ಧಾಂತ್ ಸಯ್ತ್ ಅಸ್ತಿತ್ವವಾದ್ ಜಲ್ಮೊಂಕ್ ಆನ್ಯೆಕ್ ಕಾರಣ್ ಜಾತಾ . ಸತ್ ಮ್ಹಳ್ಯಾರ್ ಕಿತೆಂ, ಸತಾಕ್ ಕಸೆಂ ಪಳೆಂವ್ಚೆಂ ಇತ್ಯಾದಿ ಸವಾಲಾಂ ಆದರ್ಶ್ ವಾದಿ ಇಮಾನ್ಯುವೆಲ್ ಕಾಂಟ್, ಹೆಗೆಲ್ ಇತ್ಯಾದಿ ಕ್ರಿಸ್ತಾಂವ್ ತತ್ವ ಜ್ಞಾನಿಂನಿ ವಿಚಾರ್ಲಿಂ.

ಅಸ್ತಿತ್ವವಾದ್ ಸಿದ್ಧಾಂತಾಂತ್ ದೋನ್ ಪಂಗಡ್ ಆಸಾತ್, ದೆವಾಕ್ ಪಾತ್ಯೆಂವ್ಹೊ ‘ಆಸ್ತಿಕ್’ ಪಂಗಡ್ ಆನಿ ಪಾತ್ಯೆನಾತ್ಲೊ ‘ನಾಸ್ತಿಕ್’ ಪಂಗಡ್. ಹ್ಯಾ ದೊನೀ ಪಂಗ್ಡಾಚ್ಯೆ ಮೋಗ್-ದ್ವೇಷ್, ಪಾತ್ಯೆಣಿ-ದುಭಾವ್, ಸುಖ್-ದೂಖ್, ಆಶಾ-ನಿರಾಶಾ ಇತ್ಯಾದಿಂಕ್ ಆಪ್ಲ್ಯಾ ಜಿಣ್ಯೆಂತ್ ಭರ್ಸುನ್ ಜಿಯೆತಾತ್. ಆಸ್ತಿಕ್ ಪಂಗಡ್ ಆಪ್ಣೆಂ ಆನಿ ದೆವಾ ಮಧೆಂ ಕಸಲೊ ಸಂಬಂಧ್ ಮ್ಹಣ್ ಸೊದ್ಚೆಂ ಪ್ರಯತನ್ ಕೆಲ್ಯಾರ್, ನಾಸ್ತಿಕ್ ಪಂಗಡ್ ದೇವ್ ಕಿತ್ಯಾಕ್ ನಾಕಾ ಮ್ಹಣ್ ಸಾಂಗ್ಚೆಂ  ಸಾಹಸ್ ಕರ್ತಾ. ಕಿರ್ಕೆ ಗಾರ್ಡ್ ಆಸ್ತಿಕ್ ವಾದಿ ಜಾಲ್ಯಾರ್ ಫ್ರೆಡ್ರಿಕ್ ನೀತ್ಸೆನ್ ದೆವಾಕ್, ಧರ್ಮಾಕ್ ನೆಗಾರ್ ಕೆಲೆಂ.

ಪೂಣ್, ಸರ್ವ್ ಮತ್, ಧರ್ಮ್ ತಿರಸ್ಕಾರ್ ಕರುನ್ ಅಸ್ತಿತ್ವ್ ವಾದ್ ಸಿದ್ಧಾಂತಾಕ್ ವಿವಿಂಗಡ್ ಆರ್ಥ್ ದೀಂವ್ಕ್ ಪೆಚಾಡ್ಲೆಲೆ ಆನಿ ಅಸ್ತಿತ್ವಾಚ್ಯಾ ಪರಿಣಾಮಾಂಕ್ ಸೊದ್ನಾಂ ಕೆಲ್ಲ್ಯಾ ಪಯ್ಕಿ ಪ್ರಮುಖ್ ಜಾವ್ನ್ ಫ್ರೆಂಚ್ ಬರವ್ಪಿ ಸಾತ್ರ್ ಆನಿ ಕಮೂ. ತರೀ ಹಾಂಚ್ಯೆ ದೊಗಾಂ ಮಧೆಂ ವಿರೋಧಾಬಾಸ್ ದಿಸ್ತಾ. ಸಾತ್ರಾಕ್ ವ್ಯಕ್ತಿ ಸ್ವಾತಂತ್ರ್ಯ್ ಗರ್ಜೆಚೆಂ ನ್ಹಯ್ ಮ್ಹಣ್ ಪಾತ್ಯೆಂವ್ಚ್ಯಾ ಮಾಕ್ಸಿಸಂ ವಿಶಿಂ ಮೊವಾಳಾಯ್ ಆಸ್ಲ್ಯಾರ್ ಕಮೂಕ್ ನಾ. ಸಾತ್ರ್ ದೇವ್ ನಾ, ದೆಖುನ್ ಮನಿಸ್ ಸ್ವತಂತ್ರ್ ಆನಿ ವಿಂಚವ್ಣಿ ಕರುಂಕ್ ಸಕ್ತಾ ಮ್ಹಣ್ ಸಾಂಗ್ತಾ. ಪೂಣ್ ತಾಣೆ ಏಕ್ ವಿಂಚವ್ಣಿ ಕೆಲ್ಯಾ ಮಾಗಿರ್ ತಿ ವಿಂಚವ್ಣಿ ಸಫಲ್ ಯಾ ಅಸಫಲ್ ಜಾಲ್ಯಾರೀ ಅಪುಣುಂಚ್ ತಾಕಾ ಜವಾಬ್ದಾರ್ ಮ್ಹಣ್ ಒಪ್ವಾಜಾಯ್ ಮ್ಹಣ್ ಸಾತ್ರ್ ಮ್ಹಣ್ತಾ. ಪೂಣ್ ಕಮೂ, ದೇವ್ ನಾ , ಪೂಣ್ ಮೌಲ್ಯಾಂ ಆಸಾತ್ ಮ್ಹಣ್ ಒಪ್ವಾತಾ. ದೆಖುನ್ ಮನ್ಶ್ಯಾನ್ ಮೌಲ್ಯಾಂ ಖಾತಿರ್ ಪುಣೀ ಬದ್ಧ್ ಜಾವ್ನ್ ಜಿಯೆಜಾಯ್ ಮ್ಹಳ್ಳಿ ಅಭಿಪ್ರಾಯ್ ಉಚಾರ್ತಾ. ದೆವಾಕ್ ರಚ್ಲೆಲೆಂ ಮಾತ್ರ್ ನ್ಹಯ್ ತಾಕಾ ಜಿವೆಶಿಂ ಮಾರ್ಲೆಲೆಂಯ್ ಸಯ್ತ್ ಮನ್ಶ್ಯಾನ್ಂಚ್. ದೆಖುನ್ ಮನಿಸ್ ದೆವಾಚಾಕೀ ಪರ್ನೊ ಜಾತಾ ಆನಿ ನವೊಯ್ ಜಾತಾ. ದೇವ್ ನಾತ್ಲೆಲ್ಯಾ ಅವಸ್ತ್ಯಾಂತ್ ಆಪ್ಲ್ಯಾ ಉಣ್ಯಾಪಣಾಂಕ್ ಮನಿಸ್‌ಚ್ ಕಾರಣ್ ಜಾತಾ ಮ್ಹಣ್ ಮಿಶೆಲ್ ಫೂಕೋ ಆಪ್ಲ್ಯಾ (The Order of Things,1970) ಕೃತಿಯೆಂತ್ ಸಾಂಗ್ತಾ.

ಆತಾಂ, ವ್ಯಕ್ತಿ ಮ್ಹಳ್ಯಾರ್ ಕೋಣ್ ಆನಿ ಸ್ವಾತಂತ್ರ್ಯ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳಿಂ ಸವಲಾಂ ಉದೆತಾತ್. ಸಾಮಾನ್ಯ್ ಆರ್ಥಾರ್ ವ್ಯಕ್ತಿ ಮ್ಹಳ್ಯಾರ್ ಮನಿಸ್. ಪೂಣ್ ಹರ್ ಏಕ್ ವ್ಯಕ್ತಿ ಹೆರ್ ವ್ಯಕ್ತಿ ಥಾವ್ನ್ ವಿಭಿನ್ನ್. ಹೆರಾಕ್ಲಿಟಾಸಾನ್ ಸಾಂಗ್ಚೆ ಬರಿ ಮನಿಸ್, ದರ್ಯಾ ತಡಿರ್ ಅಸ್ತಾನಾ ಹರ್ಯೆಕ್ ಪಾವ್ಟಿಂ ಲ್ಹಾರಾಂನಿ ಹಾಡ್ಚೆಂ ಉದಾಕ್ ನವೆಂಚ್ ಜಾವ್ನಾಸ್ತಾ ಆನಿ ಸುರ್ಯೊ ಹರ್ಯೆಕಾ ಘಡ್ಯೆ ಬದ್ಲುನುಂಚ್ ಅಸ್ತಾ. ಹ್ಯಾಚ್ ಪರಿಂ ವ್ಯಕ್ತಿ ಏಕ್‌ಚ್ ನ್ಹಯ್ ಆನಿ ತಾಚಿ ಚಿಂತ್ಪಾಂ ವಿಂಚವ್ಣ್ಯೊ ಬದ್ಲುನ್ಂಚ್ ಆಸ್ತಾತ್. ಮನ್ಸ್ಯಾನ್  ‘ಆಪ್ಲೆಂಪಣ್’ (Identity) ಸೊದ್ಚೆಂಚ್ ಅಸ್ತಿತ್ವವಾದಿಚೊ ಏಕ್ ವಾಂಟೊ.

ತರ್, ಹ್ಯಾ ಸಿದ್ಧಾಂತಾಚೊ ಮಹತ್ವ್ ಕಸಲೊ?

ಥೊಡ್ಯಾನಿ ಸಾಂಗ್ಚಾ ಪ್ರಕಾರ್ ಮನ್ಶ್ಯಾಚಿ ಸಗ್ಳಿ ಜಿಣಿಂಚ್, ತಾಕಾ ಸಂಬಂಧ್ ಜಾಲ್ಲ್ಯಾ ಸಂಸಾರಾಕ್ ಏಕಾ ಗುಂತ್ಲೆಲ್ಯಾ ಝೆಲ್ಯಾ ಬರಿ ಹೊ ಸಿದ್ಧಾಂತ್ ಪಳೆತಾ. ಜಿಣ್ಯೆಂತ್ ಯೆಂವ್ಚಿ ಖಂತ್, ದೂಖ್ ಯಾ ಅಸಯಾಕತಾ ಇತ್ಯಾದಿ ಜಿಣಿ ಏಕ್ ದುರಂತ್ ನ್ಹಯ್ ಮ್ಹಣ್ ಹೊ ಸಿದ್ಧಾಂತ್ ಸಾಂಗಿನಾ. ಆಶಾ ಆನಿ ನಿರಾಶಾಂಚ್ಯೆ ಲಡಾಯೆ ಥಾವ್ನ್ ಸುಟ್ಕಾ ಘೆಂವ್ಚೆಂ ಚಿಂತಾಪ್ ಹೊ ಸಿದ್ಧಾಂತ್ ದಿತಾ. ದೇವ್ ಆಸ್ಲ್ಯಾರೀ ಯಾ ನಾತ್ಲ್ಯಾರೀ, ಮನ್ಶ್ಯಾನ್ ಆಪ್ಲ್ಯಾ ವ್ಯಕ್ತಿ ಸ್ವಾತಂತ್ರ್ಯಾ ಖಾತಿರ್ ಆಪ್ಲ್ಯಾ ಜಿಣ್ಯೆಂತ್ ಝುಜೊಂಕ್ ಜಾಯ್. ಅಸ್ತಿತ್ವ್ ವಾದ್ ಏಕ್ ತತ್ವಜ್ಞಾನ್ ಮ್ಹಣ್ಚಾಕೀ ತತ್ವಜ್ಞಾನಾಕ್  ಚಲಂವ್ಚೆಂ ಏಕ್ ವಿಧಾನ್ ಮ್ಹಣ್ಯೆತ್.

ಜಿಣ್ಯೆಂತ್ ಯೆಂವ್ಚಾ ಥೊಡ್ಯಾ ಘುಂವ್ಡೆಂ ವರ್ವಿಂ ವ್ಯಕ್ತಿಚೆಂ ‘ವ್ಯಕ್ತಿತ್ವ್’ ರೂತಾ ಜಾತಾ ಯಾ ವ್ಯಕ್ತಿತ್ವಾಚೊ ವಾಂಟೊ ಜಾತಾ. ಹ್ಯಾ ಘುಂವ್ಡೆಂತ್ ತ್ಯಾ ವ್ಯಕ್ತಿನ್ ಕೆಲ್ಲಿ ವಿಂಚವ್ಣ್ ತಾಚ್ಯೆ ಮುಖ್ಲೆ ಜಿಣ್ಯೆಚೆರ್ ಪ್ರಭಾವ್ ಘಾಲ್ತಾ. ಆಮೆರಿಕಾಚೊ ಕವಿ ಟಿ,ಎಸ್. ಎಲಿಯೆಟ್ ಇಂಗ್ಲೆಂಡಾಕ್ ಶಿಕ್ಪಾ ಖಾತಿರ್ ಗೆಲ್ಲೊ ಥೈಂಚ್ ಉರ್ಲೊ ಆನಿ ಕಥೊಲಿಕ್ ಜಾಲೊ. ಉಪ್ರಾಂತ್ ಆಮೆರಿಕಾ ಪಾಟಿಂ ಯೇವ್ನ್ ಪ್ರೊತೆಸ್ತಂಟ್ ಜಾಲೊ. ಇನಾಸ್ ಲೊಯೋಲಾ ಆಸ್ಪತ್ರೆಂತ್ ಅಸ್ತಾನಾ ಸಾಂತಾಚ್ಯೊ ಜಿಣ್ಯೆ ಕಥಾ ವಾಚುನ್ ಅಪುಣೀ ತಾಂಚೆ ಬರಿ ಕಿತ್ಯಾಕ್ ಜಾಂವ್ಕ್ ನ್ಹಜೊ ಮ್ಹಣ್ ಚಿಂತುನ್ ಕೆಲ್ಲ್ಯಾ ವಿಂಚವ್ಣೆ ವರ್ವಿಂ ಜೆಜ್ವಿತ್ ಮೇಳ್ ಜಲ್ಮಾಲೊ. ತೆರೆಸಾನ್ ಆಪ್ಲೊ ದೇಶ್ ಸೊಡ್ನ್ ಕೊಲ್ಕಾತ್ತಾಚ್ಯೆ ದುಬ್ಳ್ಯಾಂ ಖಾತಿರ್ ಆಪ್ಲಿ ಜಿಣಿ ಸಮರ್ಪಿತ್ ಕೆಲಿ ಆನಿ ಮಿಶನರೀಸ್ ಆಫ್ ಚಾರಿಟಿ ಸಂಸ್ಥೊ ಜಲ್ಮಾಲೊ ಆನಿ ತಿ ಸಾಂತ್ ಜಾಲಿ. ಆಂಗ್ಲಿಕಾನ್ ಜಾವ್ನಾಸ್ಲೆಲ್ಯಾ ಕಾರ್ಡಿನಲ್ ಜಾನ್ ಹೆನ್ರಿ ನ್ಯೂಮನ್ ಕಥೊಲಿಕಾಂಚೊ ವಿರೋಧ್ ಕರೀತ್ತ್ ಅಸ್ಲೊಲೊ ಉಪ್ರಾಂತ್ ಕಥೊಲಿಕ್ ಜಾಲೊ. ದಕ್ಷಿಣ್ ಆಫ್ರಿಕಾಂತ್ ವಕೀಲ್ ಜಾವ್ನಾಸುಲ್ಲೊ ಕರಮ ಚಂದ್ ರೈಲಾಚೆರ್ ಪಯ್ಣಾಕ್ ಟಿಕೆಟ್ ಅಸ್ಲ್ಯಾರೀ ಗೊರೊ ನ್ಹಯ್ ಮ್ಹಳ್ಲ್ಯಾ ಕಾರಾಣಾಕ್ ಲಾಗೊನ್ ತಾಕಾ ಭಾಯ್ರ್ ಲೊಟುನ್ ಘಾಲ್ಲೆಂ. ಹ್ಯಾ ಘಡಿತಾ ಉಪ್ರಾಂತ್ ತಾಣೆಂ ಕೆಲ್ಲಿ ವಿಂಚವ್ಣಿಂಚ್ ಭಾರಾತಾಕ್ ಬ್ರಿಟಿಷಾಂ ಥಾವ್ನ್ ಸುಟ್ಕಾ ಮೆಳ್ಚ್ಯಾಕ್ ಕಾರಾಣ್ ಜಾತಾ. ಶಾರುಕ್ ಖಾನ್ ಸದಾಂಯ್ ತೀಸ್ ರುಪಯ್ ರೀಣ್ ಘೆವ್ನ್ ಬೊಂಬೈಚಾ ಸಿನೆಮಾ ಸಂಸಾರಾಕ್ ರಿಗ್ಚೆಂ ಸ್ವಪಾಣ್ ಪಳೆತಾ ಅನಿ ಮುಖಾರ್ ಬಾಲಿವುಡಾಚೊ ಬಾದ್‌ಶಹಾ ಜಾವ್ನ್ ನಾಂವಾಡ್ತಾ.  ಅಸಲಿಂ ಸಭಾರ್ ನಿದರ್ಶಾನಾಂ ದಿವ್ಯೆತ್.

ಹ್ಯಾ ವ್ಯಕ್ತಿಂನಿ ಕೆಲ್ಲಿ ವಾಂವ್ಟ್, ಪರಿಶ್ರಮಾ ಪಾಟ್ಲ್ಯಾನ್ ತಾಣಿಂ ವ್ಯಕ್ತಿ ಸ್ವಾತಂತ್ರ್ಯ್ ಮ್ಹಣ್ ಕೆಲ್ಲೊ ನಿರ್ಧಾರ್ ಯಾ ವಿಂಚವ್ಣಿಂಚ್ ಕಾರಣ್ ಮ್ಹಣ್ ಅಸ್ತಿತ್ವವಾದ್ ಪಾತ್ಯೆತಾ. ಥೊಡ್ಯಾ ವ್ಯಕ್ತಿಂನಿ ಕೆಲ್ಲ್ಯೊ ಚೂಕ್ ಯಾ ಪಾಡ್ ವಿಂಚವ್ಣ್ಯೊ ತಾಂಕಾ ನಾಸ್ ಕರುಂಕೀ ಸಕ್ತಾತ್ ಮ್ಹಳ್ಳೆಂ ಚರಿತ್ರೆಂತ್ ಪಳೆವ್ಯೆತ್. ಪೂಣ್ ಕೆಲ್ಲಿ ವಿಂಚವ್ಣಿ ಸಫಲ್ ಯಾ ಅಸಫಲ್ ಜಾತಾನಾ ವಿಂಚವ್ಣಿ ಕೆಲ್ಲ್ಯಾ ವ್ಯಕ್ತಿನ್ ಜವಾಬ್ದಾರ್ ಘೆಜಾಯ್ ಮ್ಹಣ್ ಅಸ್ತಿತ್ವವಾದಾಚೆಂ ಧೋರಣ್.

(ಮುಖ್ಲ್ಯಾ ಭಾಗಾಂತ್, ಅಸ್ತಿತ್ವವಾದಿಚೆ ಶಿಲ್ಪಿ ಜಾವ್ನಾಸ್ಲೆಲ್ಯಾ ಥೊಡ್ಯಾಂಚಿ ಪರಿಚಯ್ ಕರ್ಯಾಂ. ಮುಕಾರುನ್ ವೆತಾ).

► ಉಬ್ಬಾ, ಮೂಡ್ ಬಿದ್ರಿ