ಟಾಂಯ್…ಟಾಂಯ್…’
ತ್ಯಾ ದೀಸ್ ‘ಎಟಿಮ್’ ಮುಕಾರ್… ಸರಳಾಂ ಆವಾಜ್ ಉಟ್ತಾಸ್ತಾಂ…
ಎಟಿಮ್ ಭಿತರ್ ಆಸ್ಲೆಲೆಂ ಕ್ಲೋಡಿಯಾ…ಕಾನಿಂ ಮೊಬಾಯ್ಲ್ ಧರುನ್ ಭಾಯ್ರ್ ಯೇವ್ನ್ ಆಸ್‌ಲ್ಲೆಂ.
ಹ್ಯಾವೆಳಾ ತೆಂ ಉಲೈತ್ತಾಂ ಉಲೈತಾಂ ತಾಂಬ್ಶೆಂ ಜಾಲ್ಲೆ ತಾಚೆ ಪೊಲೆ…ಮುಖಮಳಾರ್ ಉಮಾಳೊನ್ ಆಸ್ಚೊ ತೊ ವಿಚಿತ್ರ್ ಆನಂದ್…ಕಾಳ್ಜಾಂ ಥಾವ್ನ್ ಉಟೊನ್ ಮುಖಮಳಾರ್ ಆಸ್ಚೊ ತೊ ಎಕಾ ಥರಾಚೊ ವಿಭಿನ್ನ್ ಹಾಸೊ…
ಹೆಂ ಸರ್ವ್ ಸರಳ್ ಧರ್ನ್ ಆಸ್ಲೆಲ್ಯಾ ರಿಶಬಾಚ್ಯಾ ದಿಶ್ಟೆಕ್ ಪಡ್ತಾಸ್ತಾಂ ..ಎಕಾಚ್ಚಾಣೆಂ ತಾಚಿ ಚಾಲ್ ಆನಿಂ ತೊ ಸರಳಾಂ ಆವಾಜ್ ಏಕ್ ಪಾವ್ಟಿಂ ಥಾಂಬ್ಲಿ. ಅಸಲೊ ತೊ ಆನಂದ್ ಹಾಸೊ ತೊ ಕಾಳ್ಜಾ ಉಮಾಳೊ…
ಕ್ಲೋಡಿಯಾ ತಾಚೆ ಸಂಗಿ ಮೊಗಾ ಸಂಭಂಧಾರ್ ಆಸ್ಲೆಲ್ಯಾ ಸಂಧರ್ಭಾರ್ ಮಾತ್ರ್ ತಾಣೆಂ ಪಳೆಲ್ಲೊ.!
ಆನಿ ಆಜ್ ತೊಚ್ಚ್ ಆನಂದ್ …ತೊಚ್ಚ್ ಉಮಾಳೊ…ಹಾಸೊ ..ಪಳೆತಾಂ…
ಅಸಲೆಂ ಆನಂದ್ ಸಂತೊಸ್ಭರಿತ್ ಪರಿಗತ್…ತಾಂಚೆ ವೆಗ್ಳಾಚಾರ್ ಜಾಲ್ಲ್ಯಾ ನಂತರ್ ತಾಣೆಂ ಪಳೆಂವ್ಕ್‌ಚ್ಚ್ ನಾತ್‌ಲ್ಲೊ. ಆನಿಂ ಆಜ್ ಅನಿರೀಕ್ಶಿತ್ ಜಾವ್ನ್ ಪರತ್ ತಾಚ್ಯಾ ಮುಖಮಳಾರ್ ಹೊ ಪಾರ್ಕುನ್ ಆಸ್ತಾನಾಂ…ಖಿಣಾನ್ ತೊ ದುಬಾವಾಕ್ ವಳಗ್ ಜಾಲೊ.!.
ದುಬಾವ್… ‘ಕ್ಲೋಡಿಯಾ ಕಸಲ್ಯಾ ತರೀ ಮತ್ಲಬಿ ವೊಡ್ಣೆಚ್ಯಾ ಆಡ್ ವಾಟೆರ್ ಮೆಟಾಂ ಘಾಲುನ್ ಆಸಾ.!’.
ಮೊಬಾಯ್ಲಾರ್ ತಾಚೆಂ ತೆಂ ಉಮಾಳ್ಯಾಭರಿತ್ ಸಂವಾದ್…ಖಂಡಿತ್ ಜಾವ್ನ್ ಕೈವಾಲಾಗಿಂ ಆಸ್ಚೆಂನಾಂ … ಕಿತ್ಯಾ ಕ್ಲೈವಾ ಸಂಗಿ ಮೇಟ್ ದವರ್ಲೆಲ್ಯಾ ಪ್ರಥಮ್ ಘಡ್ಯೆ ಥಾವ್ನ್ ತೆಂ ಕೆನ್ನಾಂಚ್ಚ್ ಅಸಲ್ಯಾ ಸುಂದರ್ ಉಮಾಳ್ಯಾಂನಿ ನಾತ್‌ಲ್ಲೆಂಚ್ಚ್.
ಕ್ಲೈವಾ ಸಂಗಿ ಲಗ್ನಾ ಜಿಣಿಯೆಂತ್ ಮೇಟ್ ದವರ್‌ಲ್ಲೆಂಚ್ಚ್…ತೆಂ ಸಗ್ಳೆಂಚ್ಚ್ ಆಘಾತೆಚ್ಯಾ ಭಾವಾನಾಂನಿ ಮಿಸ್ಳೊನ್ ಆಸ್ಲೆಂ. ಆನಿ ತೆಂ ಹರ್ಯೆಕ್ ಘಡಿ ಮ್ಹಳ್ಳ್ಯಾಪರಿಂ ಧೆಧೆಸ್ಪರಾರ್‌ಚ್ಚ್ ಆಸ್ತಾಲೆಂ. ಅಶೆಂ ತರ್…
ಆಜ್…ಹ್ಯಾಘಡಿಯೆ ತಾಚೆಂ ತೆ ರಡ್ಣ್ಯಾ ಪೊಲೆ…ಮೊಗಾ ಉಮಾಳ್ಯಾಚ್ಯಾ ತಾಂಬ್ಸಾಣೆರ್ ಕಶೆ ಫುಲ್ಲೆ?!…ತಶೆಂ ತರ್…
ಹೊ ವಿಭಿನ್ನ್ ಆನಂದೆಚೊ ಸಂವಾದ್ ಕೊಣಾಲಾಗಿಂ ಆಸ್ತೊಲೊ?!.
ಅಸಲೊ ಆಪ್ಲೊ ದಬಾವೆಚೊ ಅಂದಾಜ್ ಸಾರ್ಕೊ ವ್ಹಯ್ ತರ್…ಏಕ್ ನಾಂ ಏಕ್ ದೀಸ್ ಹ್ಯಾ ಅನೀತಿಚ್ಯಾ ಸಂಭಂದಾಚಿ ಝಳಕ್…
ಕ್ಲೈವಾಕ್ ಮಾರ್ತೆಲಿಚ್ಚ್!. ಆನಿ ಹಾಚೊ ಪರಿಣಾಮ್ ವಿಪರೀತೆಕ್ ಪಾವೊನ್ ಕ್ಲೋಡಿಯಾಕ್ ಅನ್ವಾರ್ ಹಾಡ್ತೆಲೆಂಚ್ಚ್. ತೊ ಖಟ್ಲ್ಯಾರ್ ಅಸಹಾಯೆಕ್ ಜಾವ್ನ್ ಪಡೊನ್ ಆಸಾ ತರೀ…
ಕ್ಲೋಡಿಯಾಚ್ಯಾ ಗಮನಾ ಭಾಯ್ರ್ ಆಪ್ಲೆ ಗುಪಿತ್ ಪಾಟ್ಲೆವೆಚಿ ಸೊದ್ನಾಂ ಕರುಂಕ್ ಜಾಯ್ ಆಸ್ಚಿ … ಶಾತಿ ಬುದ್ವೊಂಕ್ಕಾಯ್… ತಶೆಂ ಜಾಯ್ ತಶೆಂ ಖರ್ಚುಂಕ್ ಆರ್ಥಿಕ್ ಬಳ್ ಆಸ್ಚೊ ಶ್ರೀಮಂತ್ ಉದ್ಯಮಿ ತೊ.!.
ಅಸಲ್ಯಾ ಆಪ್ಲ್ಯಾ ಚತುರ್ ಮಾಂಡಾವಳೆಂತ್…ಕ್ಲೈವ್…
ಕ್ಲೋಡಿಯಾಕ್ ಆಪ್ಲ್ಯಾ ನಿಯಂತ್ರಣೆಚ್ಯಾ ಭಂಧಡೆಂತ್ ದವರ್ಚೊ ಆವ್ಕಾಸ್‌ಯೀ ಆಸಾ…ಯಾ ಗಡ್ ಉತ್ರಾಲೆಂ ತರ್ ಕ್ಲೋಡಿಯಾಚ್ಯಾ ಜಿವಾಕ್ ಅಪಾಯ್ ಹಾಡ್ಚೊ ತಸಲೊ ಸಂಧರ್ಭ್ ಉದೆಂವ್ಕ್‌ಯೀ ಪುರೊ!
ಹ್ಯಾ ದೆಕುನ್… ಕ್ಲೈವ್ ಅಸಲ್ಲ್ಯಾ ಅಪಾಯೆ ಸಂಗ್ತೆಕ್ ದೆಂವುನ್ ಕ್ಲೋಡಿಯಾ ಅಪಾಯೆಂತ್ ಶಿರ್ಕೊಂವ್ಚ್ಯಾ ಫುಡೆಂ…
ಕ್ಲೋಡಿಯಾಚ್ಯಾ ಬಚಾವೆಕ್ ಆಫುಣ್ ಚುರುಕ್ ಜಾಂವ್ಕ್ ಜಾಯ್! ಆನಿ ಅಸಲ್ಯಾಂ ಸಂಗ್ತೆಂಕ್ ಜಾಯ್ ಪುರ್ತೆಂ ಚತುರ್ಪಣ್ ಆಪ್ಣೆಂ ಉಪಯೋಗ್ಸುಂಕ್ ಜಾಯ್.
ಪ್ರಸ್ತುತ್…ಕ್ಲೋಡಿಯಾ ಥಂಯ್… ರಿಶಭಾಚಿ ಮೊಗಾ ದಾವ್ ಪರತ್ ಉಮಾಳೊನ್ ಆಸ್‌ಲ್ಲಿ. ಹೆಂ ಆಜ್ ಮಾತ್ರ್ ನ್ಹಂಯ್ ಕೆನ್ನಾಂ ತರೀ ಕ್ಲೋಡಿಯಾಚೆರ್ ಅಪಾಯೆಚಿಂ ಖುಣಾಂ ದಿಸ್ತಾಸ್ತಾಂ…ಅಸಲಿ ಮೊಗಾ ದಾವ್ ತಾಚೆ ಥಂಯ್ ಜಾಗಿ ಜಾತೆಲಿ.!
ಆತಾಂ ಪ್ರಸ್ತುತ್ ಕ್ಲೋಡಿಯಾ ಥಂಯ್ ಉಬಿ ಜಾಲ್ಲ್ಯಾ ಅನ್ವಾರಾ ಸಾವ್ಳೆಕ್ ಫುಡ್ ಕರ್ಚ್ಯಾಕ್ ಆಪುಣ್ ತಯಾರ್ ಜಾಲ್ಲ್ಯಾ ತವಳ್ ಆಪ್ಣಾಕ್ ಗರ್ಜ್ ಆಸ್ಚೊ ಆರ್ಥಿಕ್ ಸಹಕಾರ್…ಆಪ್ಣಾಚೆಂ … ‘ಜರ್ ಹಾಂವ್ ಸಾಂಗಿನ್ ತರ್’…‘ಬ್ಲ್ಯಾಕ್ ಮೇಯ್ಲ್’ …ಆಪ್ಣಾಕ್ ಜೋಡ್ನ್ ದಿತೆಲೆಂ.!’ ಮ್ಹಣ್ ರಿಶಭ್ ಮತಿಂ ಲೇಖ್ ಘಾಲಿಲಾಗ್ಲೊ.
ನೀಜ್ ತರ್ ಪ್ರ ಸ್ತುತ್ಚಿ ಹಿ ಘಂಭೀರ್ ಪರಿಗತ್… ಕ್ಲೈವ್ ಆನಿ ರಿಶಭಾಚ್ಯಾ ಪರ್ದ್ಯಾ ಪಾಟ್ಲ್ಯಾ ಮೌನ್ ಝುಜಾಂತ್ ಮಿಸ್ಳೊನ್ ಆಸ್‌ಲ್ಲಿ.!
ಅಸಲ್ಲ್ಯಾ ವೆಳಾ …ರಿಶಬಾಚ್ಯಾ ಕಾಳ್ಜಾ ಥಳಾರ್ ಆಸ್ಚೊ ಮೋಗ್ ಆತಾಂ ಪರತ್ ಜಿವೊ ಜಾಲ್ಲೊ.!…ಅಸಲ್ಲ್ಯಾ ಪರಿಗತೆರ್…
ಕ್ಲೈವ್ ಆನಿ ಕ್ಲೋಡಿಯಾಚ್ಯಾ ಸಂಗ್ತೆ ಥಂಯ್ ಕಾರ್ಯಾಳ್ ಜಾಂವ್ಕ್ ತೊ ಮನಾಂತ್‌ಚ್ಚ್ ಚುರುಕ್ ಜಾಲೊ. ಆನಿ ಅಸಲ್ಯಾ ಚುರುಕತೆಂತ್ …
‘ಪ್ರಪ್ರಥಮ್ ಜಾವ್ನ್… ಕ್ಲೋಡಿಯಾಚಿ ತಶೆಂ ಕ್ಲೈವಾಚ್ಯಾ ದುಬಾವಿ ಮನಸ್ಥಾಪಾವಿಶಿಂ… ಖರೊಖರ್ ಗಜಾಲ್ ಕಳುಂಕ್ ಗುಪಿತ್ ತಪಾಸಣ್ ಗರ್ಜೆಚೆಂ ಜಾವ್ನಾಸಾ. ಆನಿ ಹ್ಯಾ ಖಾತಿರ್ ಪರ್ದ್ಯಾ ಪಾಟ್ಲ್ಯಾನ್ ಸೊದ್ನಾಂ ಕರುಂಕ್ ಹಾಣೆಂ ನಿರ್ಧಾರ್ ಕೆಲೊ.
ಆನಿ ಅಸಲ್ಲ್ಯಾ ಸೊದ್ನಾಂಕ್ … ಆಪ್ಣೆಂ ಎಕಾ ಫಾವೊತ್ಯಾ ವೆಕ್ತಿಕ್ ತಲಾಸ್ ಕರುಂಕ್ ಜಾಯ್!.’
ಅಸಲ್ಯಾ ಚಿಂತ್ನಾಂನಿ…ತೊ ತಸಲಿ ಸಾಮರ್ಥ್ಯ್ ಆಸ್ಚ್ಯಾ ವೆಕ್ತಿಚ್ಯಾ ವಿಂಚೊವ್ಣೆಕ್ ತಯಾರ್ ಜಾಲೊ. ಆನಿ ತಸಲಿ ಸಾಮರ್ಥ್ಯ್ ಆಸ್ಲೆಲ್ಯಾ ಸಮರ್ಥ್ ವೆಕ್ತಿಕ್ ತೊ…
ಮತಿಂತ್‌ಚ್ಚ್ ಆಪ್ಲ್ಯಾ ಕೊಲೆಜೆ ದಿಸಾಂ ಥಾವ್ನ್ ಜಾಣಾಂ ಆಸ್ಚ್ಯಾ ವೆಕ್ತಿಂ ಮಧೆಂ ಸೊಧುಂಕ್ ಲಾಗ್ಲೊ.
ತಸಲ್ಯಾ ಸೊದ್ನೆ ಚಿಂತ್ಪಾರ್ ತೊ ಆಸ್ತಾನಾಂಚ್ಚ್ …ಕ್ಲೋಡಿಯಾಚೊ ತಾಳೊ ತಾಕಾ ಆಯ್ಕಾಲೊ…
“ರಿಶಭ್…”
ಆತಾಂ ಹೊ ಜಾಗೊ ಜಾಲೊ. ಉಪ್ರಾಂತ್ಲ್ಯಾ ಥೊಡ್ಯಾ ವೆಳಾನ್ ತಾಂಚಿ ಎಕಾಮೆಕಾಚಿ ಮುಖಾಮುಖಿ ಮುಲಾಕತ್ ಜಾತಾಸ್ತಾಂ…
“ರಿಶಭ್…ಆತಾಂ ಆಯ್ಕ್.. ಮ್ಹಾಕಾ ಮಹಿನ್ಯಾ ಮಹಿನ್ಯಾಕ್ ಅಶೆಂ ತುಕಾ ಭೆಟುಂಕ್ ಯೇಂವ್ಕ್ ಜಾಯ್ನಾಂ.”
ಆನಿ ಕ್ಲೋಡಿಯಾನ್ ಹಾಕಾ ಸಾಂಗ್ಲೆಲಿ ರೀತ್, ಹಾಕಾ ಕಿತ್ಯಾಕ್‌ಗೀ ಎಕಾ ಥರಾನ್ ಆಪ್ಣಾಕ್ ಗಣ್ಣೆ ಕರಿ ನಾತ್ಲೆಲೆಪರಿಂ ಕರುನ್ ಸಾಂಗ್ಲೆಲಿಪರಿಂ ಭೊಗ್ಲೆಂ. ಆನಿ ಹೆಂ ಮತಿಂ ಜಿರೊವ್ನ್ ರಿಶಭ್ ಚಿಂತುಂಕ್ ಲಾಗ್ಲೊ…
‘ಸಾದೆಂ ಭೊಳೆಂ ಸೌಮ್ಯ್ ಕ್ಲೋಡಿಯಾ…ಆತಾಂ ಶ್ರೀಮಂತೆಚ್ಯಾ ಖೊಂವ್ಳಾನಿಂ ರೆವೊಡ್ನ್ ಗೆಲಾಂ.!’ ಆನಿ ಹ್ಯಾ ಚಿಂತ್ನಾಂ ಬರಾಬರ್ ತಸೊಚ್ಚ್ ಏಕ್ ಘಡಿ…ತೊ ತಾಕಾಚ್ಚ್ ಪಳೆಂವ್ಕ್ ಪಡ್ಲೊ…
‘ದೊಳ್ಯಾಂಕ್ ಕಾಳಿಂ ಚೆಶ್ಮಾಂ…ನಾಕಾಕ್ ಮಾರ್ಚೊ ಉಂಚ್ಲ್ಯಾ ದರ್ಜೆಚೊ ಪರ್ಫ್ಯೂಮ್ … ಧೊಂಪ್ರಾ ವಯ್ರ್ ಆಸ್ಚೊ ತಾಚೊ ಪಿಂಕ್ ಮಟ್ವೊ ಸ್ಕರ್ಟ್ …ಗೊರ್ಶೆ ಪುಡ್ಪುಡಿತ್ ಜಾಂಗಾ … ತಾಚೆ ತೆ ಉಗ್ತೆ ಬಾವ್ಳೆ … ಸ್ಕರ್ಟ್-ಟೋಪಾಚಿ ಗಡ್ ಮಿರ್ವೊನ್ ಆಸ್ಚ್ಯಾರೂಂದ್ ಗಳ್ಯಾಂತ್ಲ್ಯಾನ್ ಭಾಯ್ರ್ ತಿಳ್ಚಿಂ … ತಾಚಿಂ ತಿಂ ಪುಡ್ಪುಡಿತ್ ಉಬಾರ್ ಸ್ಥನಾಂ…
ಹೆಂ ಸಗ್ಳೆಂ ಲಾಗ್ಶಿಲ್ಯಾನ್ ಪಳೆವ್ನ್ ಆಸ್ಚೊ ರಿಶಬ್…
‘ಹಾಕಾ ಪಳೆಲ್ಲೆ ದೊಳೆ… ಕ್ಲೋಡಿಯಾಚ್ಯಾ ಕುಡಿಚೆರ್… ಮತಿಂತ್‌ಚ್ಚ್ ಲೈಂಗಿಕ್ ಭೋಗ್ ಕರ್ತಿತ್.!.’ ಮ್ಹಳ್ಳ್ಯಾ ಉದ್ರೇಕಿ ಚಿಂತ್ಪಾನ್ ಆಪ್ಲಿ ದೀಶ್ಟ್ ಕ್ಲೋಡಿಯಾ ಥಾವ್ನ್ ಬದ್ಲುಂಕ್ ಉರ್ಡಾಲಾಗ್ಲೊ.
ಅಶೆಂ ಕ್ಲೋಡಿಯಾಚ್ಯಾ …ಉಗ್ತ್ಯಾ ನ್ಹೆಸ್ಣಾವರ್ವಿಂ ತಾಳ್ಣೆಕ್ ವೊಡ್ಚಿ ವೋಡ್ … ಆನಿ ತಾಚ್ಯಾ ಶ್ರೀಮಂತಿಕೆಚ್ಯಾ ಘಮಂಡ್ಪಣಾಚೆರ್ ಮತಿಂತ್‌ಚ್ಚ್ ದುರ್ಸೊನ್ ಎಕಾ ಥರಾಚ್ಯಾ ಕಾಂಟಾಳ್ಯಾನ್ ಆಸ್ಲೊಲೊ ರಿಶಭ್…ಯಾಂತ್ರಿಕಾಯೆನ್ ಉಚಾರಿಲಾಗ್ಲೊ…
“ಕ್ಲೋಡಿಯಾ… ತುಂ ಬದ್ಲಾಲಾಂಯ್.!”
“ಹುಂ ಹಾಂವ್ ಬದ್ಲಾಲ್ಯಾಂ … ತ್ಯಾದೀಸ್ ತುಂವೆಂ ಮ್ಹಳ್ಳೆಂಯ್ ನ್ಹಂಯ್ ರಿಶಭ್…‘ಹಾಂವ್ ಬದ್ಲಾಲಾಂ.!’ ಮ್ಹಣ್.” ಯಾದ್ ದೀಲಾಗ್ಲೆಂ ಕ್ಲೋಡಿಯಾ… ರಿಶಭಾನ್ ಆಪ್ಣಾಚ್ಯಾ ದಾರ್ವಾಟ್ಯಾರ್ ದಿಲ್ಲಿ ಧಮ್ಕಿ ತಾಕಾ ಉಗ್ಡಾಸ್ ಕರುನ್. ಆನಿಂ ಮುಂದರಿಲಾಗ್ಲೆಂ…
“ದೆಕುನ್ ಆತಾಂ ಹಾಂವ್‌ಯೀ ಬದ್ಲಾಲ್ಯಾಂ. ತುಜೆಪರಿಂ ಹಾಂವ್‌ಯೀ ಬದ್ಲಾಲ್ಯಾಂ.
ಚಾರ್ ಮೊಣೊದೆಂ ಮಧೆಂ ಆದ್ಲೆ ಮೋಗಾ ದೀಸ್.ನಿಯಾಳೊನ್ …ಆನಿಂ ಆತಾಂಚೆಂ ಧೆಧೆಸ್ಪರಾನ್ ಸರೋನ್ ಆಸ್ಚೆಂ ನಿರಾಶೆಚೆಂ ಲಗ್ನಾಂ ಜಿವಿತ್ ಮತಿಂ ಜಿರೊವ್ನ್…ದುಖಾಂ ಗಳವ್ನ್ ಬಸ್ಚೆಂ ನ್ಹಂಯ್ …ಬಗಾರ್…
ಪಾಕಾಟೆ ಉಸವ್ನ್ ಪಿಂಜ್ರ್ಯಾ ಭಾಯ್ರ್ ಸುಖ್ ಸಾಗೊರಾಂತ್ಲ್ಯಾ ಸ್ವತಂತ್ರತಾ ಆರಾವ್ನ್ ಉಬೊನ್ ರಾವೊಂಕ್ ಜಾಯ್….ಮ್ಹಳ್ಳ್ಯಾಆನಂದಾಚ್ಯಾ ಉದ್ದೇಶಾನ್ ಆತಾಂ ಹಾಂವ್ ಬದ್ಲಾಲ್ಯಾಂ…ಸಂಪೂರ್ಣ್ ಬದ್ಲ್ಯಾಲ್ಯಾಂ.”
“ಪೂಣ್ ಹಾಂವ್ ಸಾಂಗ್ತಾಂ”…ತಕ್ಶಣ್ ಪುಸ್ಪುಸ್ಲೊ ರಿಶಭ್… “ಗಡ್ ಮಿರ್ವೊನ್ ಬದ್ಲಾನಾಕಾ…”
“ತುಂಯೀ ಗಡ್ ಮಿರ್ವೊನ್ ವೊಚಾನಾಕಾ. ತುಜಿ ಆತಾಂಚಿ ಪರಿಗತ್ ಮತಿಂತ್ ದವರುನ್… ತುಜ್ಯಾ ಫಾತ್ರಾ ಕಾಳ್ಚಾಚೆರ್ ನಿಯಂತ್ರಣ್ ದವರ್.” ರಿಶಬಾಕ್ ಹಲ್ಕ್ ಕರುನ್ ಮ್ಹಳ್ಳೆಂಪರಿಂ ತಾಳೊ ಕಾಡುನ್, ಪಾಟಿಂ ಜಾಪ್ ದೀಲಾಗ್ಲೆಂ ಕ್ಲೋಡಿಯಾ.
“ತುಂ ಪಾಟಿಂ ಉಲೈತಾಯ್ ಕ್ಲೋಡಿಯಾ. ತುಜೊ ಹೊ ಹಂಕಾರ್ ನಿಯಂತ್ರಣೆರ್ ದವರ್.” ರಾಗಾನ್ ಉಸ್ಮಡ್ಲೊ ರಿಶಭ್.
“ರಿಶಭ್… ತುಂ ಕಿತೆಂ ಕ್ಲೈವ್ ಧಮ್ಕಿ ದೀವ್ನ್ ಆಸ್ಚೆಪರಿಂ…ತುಂಯೀ ಮಾಕಾ ಧಮ್ಕಿತಾಯ್.?!”
ರಿಶಭಾಕ್ ಹೆಂ ಆಯ್ಕಾತಾನಾಂ …ಕ್ಲೈವ್ ಆನಿಂ ಕ್ಲೋಡಿಯಾ ಮಧೆಂ ಯೊದೊಳ್‌ಚ್ಚ್ ಮನಸ್ಥಾಪಾಚೆಂ ಭಿಂ ವೊಂಪೊನ್ ಜಾಲಾಂ ಮ್ಹಳ್ಳೆಂ ಮನದಟ್ಟ್ ಜಾಲೆಂ.
‘ಜರ್ ಹೆಂ ವ್ಹಯ್ ತರ್ … ಯೆದೊಳ್‌ಚ್ಚ್ ಕ್ಲೈವ್ ಆಪ್ಲ್ಯಾ ಅಸಹಾಯೆಕತೆಚ್ಯಾ ನಿರಾಶೆ ಧೆಧೆಸ್ಪರಾನ್ ಮನೋಖಿನ್ನತೆಕ್ ಒಳಗ್ ಜಾಲಾ ಆಸ್ತೊಲೊ. ಆನಿಂ ಹ್ಯಾ ‘ಕ್ರೋಧಾಚ್ಯಾ ಸೊರ್ಮುಂಡೆಂತ್ ಜಳೊನ್ ಆಸ್ಚೆಂ ಕೇಂಡ್’ ತೊ ಜಾವ್ನ್ ಆಸಾ ಜಾವ್ಯೆತ್.!
ಹ್ಯಾ ಪರಿಗತೆರ್ ತೊ…ಕ್ಲೋಡಿಯಾಚೆರ್ ನಿಯಂತ್ರಣ್ ಹಾಡ್ಚ್ಯಾ ಉಚಾಂಬಳೆರ್ ತಡ್ಪಡೊನ್ ಆಸ್ತೊಲೊ. ಆನಿ ಹೆಂ ಖಂಡಿತ್ ಜಾವ್ನ್ ಕ್ಲೋಡಿಯಾಕ್…ಅಪಾಯ್ ಹಾಡ್ಚೆ ತಸಲೆಂ.! ’ ಅಸಲ್ಯಾ ಚಿಂತ್ಪಾರ್ ರಿಶಭ್ ಆಸ್ತಾಂ…ಕ್ಲೋಡಿಯಾಚೆ ವೋಂಟ್ ಪರತ್ ವೆಗ್ಳೆ ಜಾಲೆ…
“ರಿಶಭ್ …ಮಾಕಾ ವೊಚೊಂಕ್ ವೇಳ್ ಜಾಲೊ… ಆತಾಂ ಹಾಂವೆಂ ಸಾಂಗ್ಚೆಂ ಆಯ್ಕ್…”
ಹೆಂ ಆಯ್ಕಾತಾಂ ರಿಶಭ್…‘ಕಿತ್ಲ್ಯಾ ವೆಗ್ಗಿಂ ಆಮಿಂ ನಿರೀಕ್ಶಿತ್ ಕರಿನಾತ್ಲೆಲಿ ಹಿ ಪರಿಗತ್ ಆಮ್ಚೆಂ ಮಧೆಂ ಉದೆಲೆಂ.!…ಎಕಾ ಸಂಧರ್ಭಾರ್ ಆಮಿಂ…ಸಾಂಜ್ ಜಾತಾಂ ಜಾತಾಂ…
‘ಆನಿಕೀ…ಇಲ್ಲೊ ವೇಳ್…ಆನಿಕೀ…ಆನಿಕೀ …ಆನಿಕೀ ಇಲ್ಲೊ ವೇಳ್ ಹಾಂಗಾಚ್ಚ್ ರಾಂವ್ಯಾ…’ ಮ್ಹಣ್ಚೊ ವಿಂಗಡ್ ಸರೊಂಕ್ ಅಸಾಧ್ಯ್ ಜಾಂವ್ಚೊ ಅಪರಿಮಿತ್ ಮೊಗಾ ಸಂಭಂಧಾಚೊ ವೇಳ್ ಆಸ್‌ಲ್ಲೊ!’ ಅಶೆಂ ಚಿಂತೊನ್ ಪುಸ್ಪುಸ್ಲೊ…
“ಕ್ಲೋಡಿಯಾ…ಮ್ಹಜೆಂ ವಿದ್ರೂಪ್ ಮುಖಮಳ್…ತುಕಾ ಕಾಂಟಾಳೊ ಹಾಡ್ತಾ ಆಸ್ತೊಲೊ…ಒ.ಕೆ ಸಾಂಗ್ ಆತಾಂ…ಕಿತೆಂ ತೆಂ…?”
ಹೆಂ ಆಯ್ಕಾಲ್ಲೆಂ ಕ್ಲೋಡಿಯಾ…ಸಟ್ಟ್ ಕರುನ್ ರಿಶಭಾಚ್ಯಾ ಲಾಗಿಂ ಆಯ್ಲೆಂ…ಬೊವ್ ಲಾಗಿಂ ಆಯ್ಲೆಂ!…ಆನಿ ಎಕಾಚ್ಚಾಣೆಂ ಹಾಣೆಂ ನಿರೀಕ್ಶಿತ್ ಕರಿನಾತ್ಲೆಪರಿಂ ತಾಚೊ ಹಾತ್ ಬಳಾನ್ ಧರಿಲಾಗ್ಲೆಂ.!.
ಆನಿ ತ್ಯಾಘಡ್ಯೆ…ಎಕಾಚ್ಚಾಣೆಂ ರಿಶಭ್ ಧಿಘ್ಭ್ಯಾಂತ್ ಜಾಲೊ!. ಆನಿ ತಾಚಾ ಹಾತಾಂತ್ಲೊ ಸರಳ್ ಧರ್ನಿರ್ ಗಳ್ಳೊ.
‘ಟಾಂಯ್.. ಟಡಾಂಯ್…’
ಆನಿ ಹೊ ಸರಳಾ ಆವಾಜ್ ಥಾಂಬ್ಚ್ಯಾ ಆದಿಂ… ಕ್ಲೋಡಿಯಾ ಘದ್ಘದ್ಯಾ ತಾಳ್ಯಾನ್ ಮ್ಹಣಾಲೆಂ…
“ರಿಶಭ್… ತುಂ ಫಾತ್ರಾ ಕಾಳ್ಜಾಚೊ. ಮ್ಹಾಕಾ ಪಳೆಲ್ಲ್ಯಾ ಘಡ್ಯೆ ತುಂ ಧಾರುಣ್ ಜಾತಾಯ್…ಆನಿ ತುಜ್ಯಾ ಮುಖಮಳಾಚ್ಯಾ ಘಾಯಾವಿಶಿಂ ಸಾಂಗುನ್… ಮ್ಹಜ್ಯಾ ಕಾಳ್ಜಾಕ್ ಭಾಲೆ ತೊಪ್ತಾಯ್. ಆನಿ ಮ್ಹಾಕಾ ದುಕೈತಾಯ್.!”
“ಸ್ಸೋ…ಸೋರ್ರಿ ಕ್ಲೋಡಿಯಾ “ ತಕ್ಶಣ್ ಎಕಾಚ್ಚಾಣೆಂ ಬಡ್ಭಡ್ಲೊ ರಿಶಭ್.
ಪೂಣ್ ಉದ್ವೇಗಾಚ್ಯಾ ಊಂಚ್ ಹಂತಾರ್ ಆಸ್ಲೆಂಲೆಂ ತೆಂ ಥಂಡ್ ಜಾಲೆಂನಾಂ. “ಅನಿವಾರ್ಯ್ ಪರಿಸ್ತೆತೆನ್ ಆಮ್ಕಾಂ ವೆಗ್ಳಾಚಾರ್ ಕರುನ್ ಜಾಲಾಂ. ಹೆಂ ಆನಿ ಹಾಚೊ ಪರಿಣಾಮ್ ಮ್ಹಜ್ಯಾ ಅಸಹಾಯೆಕತೆಚ್ಯಾ ಜಿಣಿಯೆಚ್ಯೆರ್ ಜಾವ್ನ್…ಹಾಂವೆಂ ಭೊಗ್ಚಿ ಹಿ ಧೆಧೆಸ್ಪರಾಚಿ ಅಸಹಾಯೆಕತಾ…ಎಕ್ಸುರತಾ…ತಿ ಸೊಸುಂಕ್ ಅಸಾಧ್ಯ್ ಜಾಲ್ಲಿ ದೂಕ್ ಜಾಣಾಂ ಆಸೊನ್ ತುಂ…”
“ನಾಂ..ನಾಂ…ಸೊ…ಸೊರ್ರಿ ಕ್ಲೋಡಿಯಾ…” ಪರತ್ ಮಧೆಂಚ್ಚ್ ಗಾಗೆಲೊ ರಿಶಭ್… “ಹ್ಯಾ ಮುಕಾರ್ ಕೆದಿಂಚ್ಚ್ ಆನಿ ಕೆದಿಂಚ್ಚ್ ತುಕಾ ದುಕೈನಾಂ.” ಬಡ್ಬಡ್ಲೊ ರಿಶಬ್ ಕ್ಲೋಡಿಯಾಚ್ಯಾ ಹಾತಾಂತ್ಲೊ ಆಪ್ಲೊ ಹಾತ್ ನಿಸ್ರಾಂವ್ಚ್ಯಾ ಪ್ರೇತನಾರ್. ಪೂಣ್ ಕ್ಲೋಡಿಯಾನ್ ಸೊಡ್ಲೆಂನಾಂ…
“ರಿಶಭ್…ತುಂ ಮ್ಹಜ್ಯಾ ಕಾಳ್ಜಾಂತ್ ಸದಾಂ…ಆನಿ ಸದಾಂಚ್ಚ್ ಆಸಾಯ್. ಪೂಣ್ ರಿಶಭ್ ಮ್ಹಾಕಾ ತುಂ ಸಾಂಗ್… ಹ್ಯಾ ಪರಿತೆರ್ ಆಮ್ಕಾಂ ಪರತ್ ಏಕ್ ಜಾಂವ್ಕ್ ಸಾಧ್ಯ್ ಆಸಾ…?!…ಸಾಂಗ್ ರಿಶಭ್ …ಸಾಂಗ್…”
ಹ್ಯಾ ಸವಾಲಾಕ್ ರಿಶಭ್ ಮೌನ್ ಜಾಲೊ. ಆನಿ ತ್ಯಾಘಡ್ಯೆ…ದೊಗಾಂಯ್ಚ್ಯಾ ದೊಳ್ಯಾಂನಿಂ ದುಖಾಂ ಉದೆವ್ನ್ …ಪೊಲೆ ಭಿಜಾ ಲಾಗ್ಲೆ.
ಹ್ಯಾವೆಳಾ ಎಸಿಡ್ ಘಾಯಾಂಚ್ಯ್ಯಾ ರಿಶಭಾಚ್ಯಾ ಮುಖಮಳಾರ್…ತಾಚ್ಯಾ ಭೊಗ್ಣಾಂಚಿ ಗುಂಡಾಯ್ ಪಾರ್ಕುಂಕ್ ಕ್ಲೋಡಿಯಾಕ್ ಅಸಾಧ್ಯ್ ಜಾಲೆಂ!.
ತವಳ್… ‘ರಿಶಭಾಚ್ಯಾ ಹ್ಯಾ ಕಶ್ಟಾಂ ಬಿರ್ಮೊತೆಚ್ಯಾ ಪರಿಗತೆಕ್ ಕಾರಣ್…ಫೆಡ್ರಿಕ್.!’ ಮ್ಹಳ್ಳೆಂ ಪರತ್ ತಾಚ್ಯಾ ಮತಿಕ್ ಧೊಸ್ತಾಸ್ತಾನಾಂ …ತಾಚೆ ವಯ್ಲ್ಯಾ ಕ್ರೋಧಾನ್ ತೆಂ ಖಡ್ಕಡೊಂಕ್ ಲಾಗ್ಲೆಂ.
ತ್ಯಾ ಆಯಿನ್ನ್ ಘಡ್ಯೆ ರಿಶಭಾಚ್ಯಾ ಕಾಳ್ಜಾಂತ್‌ಯೀ … ‘ಕ್ಲೋಡಿಯಾಚ್ಯಾ ಧೆಧೆಸ್ಪರಾಚ್ಯಾ ಅಸಹಾಯೆಕ್ ಎಕ್ಸುರ್ಪಣಾಕ್ …ಫೆಡ್ರಿಕ್ ಕಾರಣ್.!’ ಮ್ಹಳ್ಳ್ಯಾ ರಾಗಾನ್ …ತಾಚೆ ವಯ್ಲೊ ಫಾರಿಕ್ಪಣಾಚೊ ಉಜೊ ಹಾಚ್ಯಾ ಕಾಳ್ಜಾ ಮತಿಂತ್ ಪೆಟುಂಕ್ ಲಾಗ್ಲೊ.
ಆನಿ ಹ್ಯಾ ಘಡ್ಯೆ ತಾಂಚ್ಯಾ ತ್ಯಾ ಭೊಗ್ಣಾಂನಿಂ… ತಿಂ ದೊಗಾಂಯ್ ಕಠಿಣ್ ಮೌನಾತೆಂತ್ ಬುಡ್ಲಿಂ.
ಅಸಲ್ಯಾ ಮೌನತೆಂತ್… ಯೆದೊಳ್ ಎಕಾಮೆಕಾ ಧರುನ್ ಆಸ್ಲೆಲೆ ತಾಂಚೆ ಹಾತ್… ಕೆನ್ನಾಂ ಕಶೆಂ ವೆಗ್ಳೆ ಜಾಲೆ ಮ್ಹಳ್ಳೆಂ ತಿಂ ನೆಣಾಂಚ್ಚ್ ಜಾಲಿಂ.
ಅಸಲ್ಲ್ಯಾ ತ್ಯಾ ಎಕಾ ಘಡ್ಯೆ…ಕ್ಲೋಡಿಯಾಕ್ ಜಾಗೊವ್ನ್ ರಿಶಭ್ ಮ್ಹಣಾಲೊ… “ಆತಾಂ ತುಂ ಸಾಂಗ್ ಕ್ಲೋಡಿಯಾ …ಕಿತೆಂ ತುಕಾ ಸಾಂಗೊಂಕ್ ಆಸ್‌ಲ್ಲೆಂ.?.
ಹ್ಯಾ ವೆಳಾ ಕ್ಲೋಡಿಯಾನ್ ದಿಲ್ಲಿ ಜಾಪ್ ಆಯ್ಕೊನ್ ರಿಶಭ್ ಥಟಕ್ಕ್ ಜಾಲೊ!.
“ರಿಶಭ್…” ಮ್ಹಣಾಲೆಂ ಕ್ಲೋಡಿಯಾ…ಮ್ಹಜಿ ಆನಿ ತುಜಿ ಹಿ ಎಟಿಎಮ್ ಭೆಟ್ ಮಹಿನ್ಯಾಚ್ಯಾ ಪಯಿಲ್ಲ್ಯಾ ತಾರ್ಕೆರ್‌ಚ್ಚ್ ಜಾಯ್ಜಾಯ್ ಮ್ಹಳ್ಳೆಂ ಪಾಳುಂಕ್ ಮಾಕಾ ಬೋವ್ ಕಶ್ಟಾಂಚೆಂ ಜಾತಾ. ಹ್ಯಾ ಖಾತಿರ್…“ತುಜ್ಯಾ ಬ್ಯಾಂಕ್ ಎಕೌಂಟಾಕ್ ಥೊಡೊ ‘ಎಮೌಂಟ್’ ಹಾಂವ್ ಧಾಕಲ್ ಕರ್ತಾಂ”.
ಆನಿಂ ಕ್ಲೋಡಿಯಾನ್ ಸಾಂಗ್ಲೊಲೊ ತೊ ಎಮೌಂಟ್ ಆಯ್ಕಾತಾನಾಂ… ರಿಶಭ್ ಥಟಕ್ಕ್ ಜಾಲ್ಲೊ!.
‘ಪಂದ್ರಾ ಲಾಖ್ …!’
♥ ♥ ♥
ರಿಶಭ್…
ಕ್ಲೋಡಿಯಾ ಆನಿ ಕ್ಲೈವಾಚ್ಯಾ ಜಿವಿತಾಂತ್ಲ್ಯಾ ಪ್ರಸ್ತುತ್ಚ್ಯಾ ಖರ್ರ್ಯಾ ಜಿವಿತಾವಿಶಿಂ ಜಾಣಾಂ ಜಾಂವ್ಚ್ಯಾ ಸವಿಸ್ತಾರ್ ಸೊದ್ನಾಂ ಖಾತಿರ್ … ಪಾವೊತ್ಯಾ ವೆಕ್ತಿಕ್ ವಿಂಚುನ್ ಕಾಡ್ಚ್ಯಾಂತ್ ಸಫಲ್ ಜಾಲ್ಲೊ.
ಆಗಸ್ಟರ್…ಅಗಸ್ಟರ್ ಮಿರಾಂಡಾ.
ನೀಜ್ ಜಾವ್ನ್ …ಕ್ಲೋಡಿಯಾಚೆಂ ಪ್ರಸ್ತುತ್ಚೆಂ ಆದುನಿಕ್ ‘ಫೆಶನ್’ ಮಿಸ್ಳಾಲ್ಲೆಂ ನ್ಹೆಸಾಣ್ … ತ್ಯಾತೆಕಿತ್ ಹಾಸ್ತೆಂ ಉಡ್ತೆಂ ವರ್ತನ್, ಹೆಂ ಸರ್ವ್ ತಾಚ್ಯೊ ಉಡ್ತೆಯ್ಯೊ ಗಜಾಲಿ ಪಾರ್ಕಿತಾನಾಂ ರಿಶಾಭಾಕ್ …
‘ಕ್ಲೋಡಿಯಾ ಲಗ್ನಾ ಭಾಯ್ಲ್ಯಾ…ಘಾಡ್ ಸಂಭಂದಾರ್ ಆಸಾ ಕೊಣ್ಣಾ.?!’ ಮ್ಹಳ್ಳ್ಯಾ ದುಬಾವಾಕ್ ಕಾರಣ್ ದಿತಾಲೆಂ.!.
ಕ್ಲೋಡಿಯಾಚ್ಯೊ ಅಸಲ್ಯೊ ವಿಪರೀತ್ ಗಜಾಲಿ… ಕ್ಲೈವಾ ವರ್ವಿಂ ತಾಕಾ ಅನ್ವಾರ್ ಹಾಡೊಂಕ್ ಸಾಧ್ಯ್ ಆಸಾ ಮ್ಹಳ್ಳೆಂ ತೆಂ ರಿಶಭಾಕ್ ಖಚಿತ್ ಜಾಲ್ಲೆಂ. ಆನಿ ಹಾಕಾ ಪೂರಕ್ ಜಾವ್ನ್ …
ಯೆದೊಳ್‌ಚ್ಚ್ ಕ್ಲೈವ್ ದುಬಾವಾಕ್ ವಳಗ್ ಜಾವ್ನ್ … ತೊ ಕಾಂಯ್ ಆಪ್ಲ್ಯಾ ಖಾಸ್ಗಿ ಮನ್ಶಾ ಥಾವ್ನ್ ಕ್ಲೋಡಿಯಾಚೊ ಗುಪಿತ್ ಪಾಟ್ಲಾವ್ ಕರುನ್ ಆಸಾ…?!. ಮ್ಹಳ್ಳ್ಯಾ ದುಬಾವಾರ್…
‘ಅಸಲ್ಲ್ಯಾ ಸಂಗ್ತೆಂಚ್ಯಾ ಪರಿಣಾಮೆ ಥಾವ್ನ್ ಉದೆಂವ್ಚ್ಯಾ ಅಪಾಯೆ ಥಾವ್ನ್… ಬಿಂದಾಸ್ ಜಿವಿತ್ ಸಾರುನ್ ಆಸ್ಚ್ಯಾ ಕ್ಲೋಡಿಯಾಕ್ ಬಚಾವ್ ಕರುಂಕ್ ಜಾಯ್.! ಪೂಣ್ ತ್ಯಾ ಪಯ್ಲೆಂ…
ಕ್ಲೋಡಿಯಾಚಿ ಖರಿ ಗಜಾಲ್ ಕಳಿತ್ ಜಾಂವ್ಕ್ ಜಾಯ್. ತ್ಯಾ ನಂತರ್ ತಾಕಾ ಜಾಗೊಂವ್ಕ್ ಜಾಯ್. ತ್ಯಾಚ್ಚ್ ಪರ್ಮಾಣೆಂ…
ಕೈವಾಚ್ಯಾ ಕಾಳ್ಜಾ ಮತಿಂತ್…ಕ್ಲೋಡಿಯಾವಿಶಿಂ ಘುಂವೊನ್ ಆಸ್ಚ್ಯೊ ಗುಪಿತ್ ಸಂಗ್ತ್ಯೊಯೀ ಜಾಣಾಂ ಜಾಂವ್ಕ್ ಜಾಯ್.
ಅಸಲ್ಯಾ ದೋನ್ ಗಜಾಲ್ಯಾಂವಿಶಿಂ ಖರೋಖರ್ ಜಾಣಾ ಜಾಂವ್ಕ್…
ಕುಡಿಚ್ಯಾ ಬಳಾನ್ ಆಪ್ಲ್ಯಾ ಫುಡ್ಲ್ಯಾಂಕ್ ಹಾಲಂವ್ಚೊ ತೊ ಆದ್ಲೊ ರಿಶಬ್….ಆತಾಂ ತಸ್ಲ್ಯಾಚ್ಚ್ ಮತಿಚ್ಯಾ ಬಳಾನ್ ತೊ…‘ಡಿಟೆಕ್ಟಿವ್’ ಚಿಂತ್ನಾಂಚೊ ಚತುರ್ ವೆಕ್ತಿ ಜಾಲೊ!.
ಆತಾಂ ಹ್ಯಾ ಡಿಟೆಕ್ಟಿವ್ ಚತುರ್ಪಣಾರ್…ಆಪ್ಲ್ಯಾ ಮುಕ್ಲ್ಯಾ ಸೊದ್ನಾಂಕ್ ಏಕ್ ನಕ್ಶಾ ತಯಾರ್ ಕರಿಲಾಗ್ಲೊ. ಆನಿ ತ್ಯಾ ಪರ್ಮಾಣೆಂ…ತಾಣೆಂ ಹ್ಯಾ ಸೊದ್ನೆಂಕ್ ವಿಂಚ್ಲೆಲ್ಯಾ…ಅಗಸ್ಟರಾಕ್…
‘…. ‘ಆಪುಣ್ ಕೋಣ್?’ ಮ್ಹಳ್ಳೆಂ ತಾಕಾ ಕಳಿತ್ ಜಾಂವ್ಕ್ ನೊಜೊ!’ ಮ್ಹಳ್ಳಿ ಮಾಂಡಾವಳ್ ರಿಶಭ್ ಕರಿಲಾಗ್ಲೊ. ಆನಿ ಹ್ಯಾಖಾತಿರ್…
ಅಗಸ್ಟರಾಕ್ ಮುಖಾಮುಖಿ ಮೆಳ್ಚೆಂ ಚುಕೊವ್ನ್…ಆಪುಣ್ ತಾಚೆ ಸಂಗಿಂ ಪರ್ದ್ಯಾಪಾಟ್ಲ್ಯಾ ಸಂಪರ್ಕಾಕ್ ತಯಾರ್ ಜಾಲೊ.
ಆನಿ ಹ್ಯಾ ಪರ್ದ್ಯಾ ಪಾಟ್ಲ್ಯಾ ಸಂಪರ್ಕಚೆಂ ಪ್ರಥಮ್ ಮೇಟ್ ಜಾವ್ನ್… ತೊ ಪೋಸ್ಟ್ ಆಫಿಸಾಚ್ಯಾ ‘ಪಬ್ಲಿಕ್ ಟೆಲಿಫೋನ್ ಬೂತ್’ ಭಿತರ್ ಮೇಟ್ ದವರಿಲಾಗ್ಲೊ.
ಥಂಯ್ಸರ್…ಟೆಲಿಫೋನ್ ರಿಸೀವರ್ ಹಾತಿಂ ಘೆವ್ನ್ …ಯದೊಳ್ ಭೆಟಾನಾತ್ಲೆಲ್ಯಾ ಆಗಸ್ಟರಾಚಿಂ ಮೊಬಾಯ್ಲ್ ನಂಬ್ರಾ ಘುಂವ್ಡಾಯ್ಲಾಗ್ಲೊ. ಆನಿ ಆಪ್ಲೆ ವೋಂಟ್ ವೆಗ್ಳೆ ಕರಿಲಾಗ್ಲೊ.
“ಹಾಲೊ…ಆಗಸ್ಟರ್ ?”
“ಹುಂ …ಕೋಣ್?!”
“ಹಾಂವ್ ಕೋಣ್ ಮ್ಹಣ್ ತುಕಾ ಕಳ್ಚ್ಯಾ ಫುಡೆಂ … ‘ಮಾಕಾ ತುಜೆ ಲಾಗಿಂ ಕಸಲಿ ಗರ್ಜ್?’ ಮ್ಹಳ್ಳೆಂ ಆಯ್ಕೊಂಕ್ ತುಂ ತಯಾರ್ ಜಾ.”
“ಮ್ಹಳ್ಯಾರ್?!” ಏಕ್ ಪಾವ್ಟಿಂ ಆಗಸ್ಟರ್ ಗೊಂದೊಳಾಕ್ ಶಿರ್ಕಾಲೊ. ಆನಿ ಮ್ಹಣಾಲೊ… “ಒ.ಕೆ. ಸಾಂಗ್…”.
“ತರ್ ಆಯ್ಕ್…ಆತಾಂ ತುಂವೆ ಫಕತ್ ಹಾಂವೆ ಸಾಂಗ್ಚ್ಯಾ ದೊಗಾಂ ವೆಕ್ತಿಂಚೊ ಗುಪಿತ್ ಪಾಟ್ಲಾವ್ ಕರುಂಕ್ ಜಾಯ್. ಆನಿಂ ತ್ಯಾವಿಶಿಂ ಸವಿಸ್ತಾರ್ ವಿಶಯ್ ಮ್ಹಾಕಾ ತಿಳ್ಸುಂಚೊ. ಆತಾಂ ಸಾಂಗ್…
ಹ್ಯಾ ಮ್ಹಜ್ಯಾ ತುಜ್ಯಾ ಮಧ್ಲ್ಯಾ ‘ಖರಾರೆ ಕೊಂಟ್ರ್ಯಾಕ್ಟಾಕ್’ ತುಜೆ ‘ಚಾರ್ಜ್’ ಕಿತ್ಲೆ ಮ್ಹಣ್ ಸಾಂಗ್.”
“ಹ್ಯಾ ಪಯ್ಲೆಂ…ತೊ ಜಾಗೊ ವಿಳಾಸ್ ಆನಿ ಥೊಡೊ ವಿವರ್ ದಿ.” ಆತುರಾಯೆನ್ ಬಡ್ಬಡ್ಲೊ ಆಗಸ್ಟರ್.
ಘಡ್ಯೆನ್ ರಿಶಭಾನ್… ಆಪ್ಣಾಕ್ ಜಾಯ್ ಆಸ್ಚೊ ವಿವರ್ ತಾಕಾ ದಿಲೊ. ಆನಿ ಮ್ಹಣಾಲೊ…
“ಆತಾಂ ಹ್ಯಾ ಮ್ಹಜ್ಯಾ ಖರಾರೆಕ್ ತುಜಿ ಸಮ್ಮತಿ ಕಳ್ಚ್ಯಾ ಖಾತಿರ್…ಮಾಕಾ ತುಜೆ ‘ಚಾರ್ಜ್’ ಸಾಂಗ್. ನಾಂತರ್ ಹಾಂವೆ ಯೆದೊಳ್‌ಚ್ಚ್ ವಿಂಚ್ಲೆಲ್ಯಾ ದುಸ್ರ್ಯಾ ವೆಕ್ತಿಕ್ ಕೋಲ್ ಕರ್ಚ್ಯಾ ಅಮ್ಸೊರಾರ್ ಹಾಂವ್ ಆಸಾಂ…
ದೆಕುನ್ ವೆಳಾಕ್ ಬರೊಚ್ಚ್ ಮಹತ್ವ್ ಆಸ್ಚ್ಯಾ ಹ್ಯಾ ಮ್ಹಜ್ಯಾ ಖರಾರೆಂತ್… ತುಂವೆಂ…”
“ಸಧ್ಧ್ಯಾಕ್ ಧಾ ಹಜಾರ್.” ಆತಾಂ ಮಧೆಂಚ್ಚ್ ವೆವೆಗ್ಗಿಂ ಮ್ಹಣಾಲಾಗ್ಲೊ…ಆಗಸ್ಟರ್.
“ಸಧ್ಧ್ಯಾಕ್ ಪಾಂಚ್ ಹಜಾರ್ ಹಾಂವ್ ದಿತಾ…ಆನಿ ಕಾಮ್ ಪುರ್ತೆಂ ಜಾಲ್ಯಾ ನಂತರ್ ತುಕಾ ಆನಿ ‘ಪಂದ್ರಾ ಹಜಾರ್’ ಹಾಂವ್ ದಿತಾಂ.”
“ಖರಾರೆಂತ್ ತುಜೆಂ ಹೆಂ ಉದಾರ್ಪಣ್ ಪಳೆತಾನಾಂ… ಹ್ಯಾ ಮಿಸ್ತೆರಾಚೆಂ ವರ್ತುಲ್ ಥೊಡೆಂ ವ್ಹಡ್‌ಚ್ಚ್ ಆಸ್ತೆಲೆಂ ಮ್ಹಣ್ ಮ್ಹಾಕಾ ಭೊಗ್ತಾ.”
“ಆಗಸ್ಟರ್…ಆತಾಂ ತುಂ… ‘ಜಾಯ್ತ್ ವಾ ಜಾಯ್ನಾಂ’ ಹ್ಯಾ ದೊನಾಂ ಭಿತರ್ ಏಕ್ ತಿಳ್ಸುನ್ ಅಕೇರ್ ಕರ್.”
“ಜಾಯ್ನಾಂ ಮ್ಹಣ್ ಸಾಂಗಿನಾಂ. ಪೂಣ್ ಮ್ಹಜೆಂ ಕಾಮ್ ತುಕಾ ಸಮಧಾನ್ ದೀತ್ ತರ್ ಚಡಿತ್ ದಿತಾಲೊಯ್ ಮ್ಹಳ್ಳ್ಯಾ ಭರ್ವಶ್ಯಾರ್ ಹಾಂವ್ ತುಜೆಂ ಖರಾರ್ ವೊಪ್ತಾಂ.”
ಖಿಣಾನ್ ರಿಶಭ್ … ಆಪ್ಣೆಂ ವಿಣ್ಲೆಂಲೆಂ ನಕ್ಶಾ ತಾಕಾ ಸಾರ್ಕೆಂ ಥರಾನ್ ವಿವರಿಲಾಗ್ಲೊ.
♥ ♥ ♥
ರಿಶಭ್ ಆನಿ ಆಗಸ್ಟರಾಚ್ಯಾ ಖರಾರೆ ಪರ್ಮಾಣೆಂ…
ರಿಶಭಾನ್ ಸಾಂಗ್ಲೆಲ್ಲ್ಯಾ ಫಲಾಣ್ಯಾ ವೆಳಾ ಆಗಸ್ಟರ್…‘ಬ್ಲ್ಯೂ ಟೇಲ್’ ತಾಳ್ಯಾಲಾಗಿಂ ಪಾವ್ಲೊ. ಆನಿ ಥಂಯ್ಸರ್…
ಲೊಕಾಚಿ ಜಾಗ್ ಮಾಗ್ ನಾತ್ಲೆಲ್ಯಾ ವರೆ ವಿಂಗಡ್ ಆಸ್ಲೆಲ್ಯಾ…‘ಎಂಡ್ ಪೋಂಯ್ಚ್’ ಜಾಗ್ಯಾರ್… ರಿಶಬಾನ್ ಸಾಂಗ್ಲೆಲ್ಯಾ ಫಲಾಣ್ಯಾ ಗಾರ್ಡನ್ ಬಾಂಕಾಲಾಗಿಂ ಗೆಲೊ. ಆನಿ ಬಸ್ಲೊ.
ಬಸ್ತಾನಾಂಚ್ಚ್ ತಾಚ್ಯಾ ಪಾಂಯಾಂಕ್ ಆದಾಳ್ಳೆಂ…ಏಕ್ ವೇಸ್ಟ್ ಬೋಕ್ಸ್.
ಖಿಣಾನ್ ಹೊ ಬಾಗ್ವಾಲೊ ಆನಿ ರಿಶಬಾಚ್ಯಾ ದಿಲ್ಲ್ಯಾ ಹಿಶಾರೆ ಪರ್ಮಾಣೆಂ…ತೊ ತ್ಯಾ ಬೋಕ್ಸಾಂತ್ ತಿಳಿಲಾಗ್ಲೊ. ಥಂಯ್ಸರ್ ತ್ಯಾ ಬೊಕ್ಸಾಂತ್ ಆಸ್‌ಲ್ಲೊ…ಏಕ್ ಕಾಗ್ದಾ ಮುದೊ.
ಖಿಣಾನ್ ಆಗಸ್ಟರಾನ್…ಭಂವ್ತಿ ಏಕ್ ಜಾಗ್ರುತ್ಕಾಯೆಚಿ ದೀಶ್ಟ್ ಭಂವ್ಡಾಯ್ಲಿ. ಆನಿ ಥೊಡ್ಯಾಚ್ಚ್ ಸೆಕುಂದಾನಿಂ ತೊ ಕಾಗ್ದಾ ಮುದೊ ಆಪ್ಲ್ಯಾ ಜಾಕೆಟೆಚ್ಯಾ ಬೊಲ್ಸಾಕ್ ದೆವೊಯ್ಲೊ. ಆನಿ ತಸೊಚ್ಚ್ ಥಂಯ್ಚ್ ಬಸೊನ್ ಆಸ್ಲೊಲೊ ತೊ…
ವೊಂಟಾಕ್ ವ್ಹೆಲ್ಲಿ ಸಿಗ್ರೆಟ್ ಪೆಟೈಲಾಗ್ಲೊ. ಆನಿ ಸಿಗ್ರೆಟಿಚೊ ಧುಂವೊರ್ ಸೊಡ್ತಾಂ ಸೊಡ್ತಾಂ ತಪಾಸಣೆಚ್ಯಾ ದಿಶ್ಟೆನ್ ಭಂವ್ತಿ ಪಳೆಲಾಗ್ಲೊ. ಉಪ್ರಾಂತ್ ತ್ಯಾ ಧುವೊರಾ ಮಧೆಂ…ಜಾಕೆಟೆಂತ್ಲೊ ಕಾಗ್ದಾ ಮುದೊ ಭಾಯ್ರ್ ಕಾಡುನ್ ತಪಾಸಿಲಾಗ್ಲೊ. ತ್ಯಾ ಕಾಗ್ದಾ ಮುದ್ಯಾಂತ್…ಆಸ್‌ಲ್ಲೆಂ…
ಏಕ್ ‘ಮೊಬಾಯ್ಲ್ ಸಿಮ್’… ಆನಿ ಪಾಂಚ್ ಹಜಾರ್ ರುಪ್ಯಾಂಚೊ ಏಕ್ ಬಂಡಲ್.!.
ಉಪ್ರಾಂತ್ ಸಟ್ಟ್ ಕರುನ್ ತೊ ಉಬೊ ಜಾಲೊ. ಆನಿ ಎಕಾಚ್ಚ್ ಸೆಕುಂದಾನ್ …ತೊ ಆಪ್ಲ್ಯಾ ಬೈಕಾಲಾಗಿಂ ಮೆಟಾಂ ಘಾಲುಂಕ್ ಲಾಗ್ಲೊ.
ಆನಿ ಆಗಸ್ಟರಾಚ್ಯಾ ಹ್ಯಾ ಪಯಿಲ್ಲ್ಯಾ ಮೆಟಾ ಥಾವ್ನ್ …ರಿಶಬಾನ್ ಮಾಂಡ್ಲೆಲ್ಯಾ ನಕ್ಶಾಚಿ ಚಾಲ್ ಆರಂಭ್ ಜಾಲ್ಲಿ.!
ತೊ ಮೆಟಾಂ ಘಾಲ್ತಾಂ ಘಾಲ್ತಾಂ…ರಿಶಭಾನ್ ಗುಪಿತ್ ಧಾಡ್ಲೆಲೆಂ ತೆಂ ‘ಸಿಮ್’ ಆಪ್ಲ್ಯಾ ಮೊಬಾಯ್ಲಾಕ್ ಘಾಲಿತ್ತ್ ರಾವ್ಲೊ. ಆನಿ ಹ್ಯಾ ವೆಳಾ…
ಥೊಡ್ಯಾಚ್ಚ್ ಅಂತರಾರ್… ಆಡೊಸಾರ್ ಆಸ್ಚೆ ಏಕ್ ಜೊಡಿ ದೊಳೆ… ಹಾಚೆರ್‌ಚ್ಚ್ ದೀಶ್ಟ್ ಘಾಲುನ್ ಆಸ್ಲೆ!.
ಮುಂದರ್ಸುನ್ ಆಸಾ ►
