ಫೂಟ್ಸ್ ಥಾವ್ನ್ ಹೆಡ್ಸಾಕ್ ಯೇಂವ್ಕ್ ರಾಕ್ತಾಂವ್‌ಗೀ ?

ಕ್ರಿಸ್ತಾಂವ್ ಹಾತೀಂ ವಾತೀ ಘೆತಾ
ಬಾವ್‌ಲ್ಲೀಂ ಚಾರ್ ಫುಲಾಂ ಘೆತಾ
ಆನೀ ವಾಟ್‌ಭರ್ ಮ್ಹಣತ್ ವೆತಾ
‘ವೆಗಿಂ ಮರಾ, ಪುರ‍್ತಾಂ ಹಾಂವ್!’
– ಚಾ. ಫ್ರಾ. ದೆಕೊಸ್ತಾ ( ಕವಿತಾ : ಕ್ರಿಸ್ತಾಂವ್) 

ಉಡುಪಿಚ್ಯಾ ಸರ್ಕಾರಿ ಕೊಲೆಜಿ ಥಾವ್ನ್, ‘ಹಿಜಾಬ್’ ಏಕ್ ಕುರ‍್ಹು  ಕಶೆಂ ಘೆವ್ನ್ ಸುರು ಜಾಲ್ಲಿಂ,  ದೆಶಾಚ್ಯಾ ಸಂವಿದಾನಾನ್ ನಾಗರಿಕಾಂಕ್ ದಿಲ್ಲಿಂ ಮುಳಾವಿಂ ಹಕ್ಕಾಂ ಮಸ್ತುಂಚಿಂ ಕರ‍್ತುಬಾಂ ಆಜ್ ಅಖ್ಖ್ಯಾ ದೆಶಾಕ್ ವಿಸ್ತಾರ‍್ಲ್ಯಾಂತ್. ಆರ್ಸೊ ನತಾಲಾಂಚ್ಯಾ ಅಂಕ್ಯಾಂತ್ ‘ನಯ್ತಿಕ್ ಪೊಲಿಸ್‌‌ಗಿರಿ ಕಿತ್ಲಿ ನಯ್ತಿಕ್ ?’ ಮ್ಹಳ್ಳ್ಯಾ ವಿಶೇಸ್  ಲೇಖನಾಂತ್  ಏಕ್ ವಿಶಯ್ ಹಾಂವೆ ಪ್ರಸ್ತಾಪ್ ಕೆಲ್ಲೊ.

ಫಳಾಸಾಂಗಾತಾ ಫಳಾನುಭವಿಂಕ್ ಪ್ರಾಪ್ತ್ ಜಾಲ್ಲೆಂ ಮಹತ್ವಾಚೆಂ ಗಿನ್ಯಾನ್ ಮ್ಹಳ್ಯಾರ್ – ಕಶೆಂ ದೆಶಾಚ್ಯಾ ಸುಟ್ಕೆಝುಜಾಚಿ ಫುಡ್ಕಾಯ್ ಘೆತ್‌ಲ್ಲ್ಯೆ ಪಾಡ್ತಿಕ್ ಫಳ್ ಖಾಂವ್ಚಿ ಆವ್ದಿ ಉತ್ರಾಲಿಗೀ, ತಶೆಂಚ್ ರಥ್‌ಯಾತ್ರಾಚೆಂ ಫಳ್ ಖಾಂವ್ಚಿ ಆವ್ದಿಯ್ ಏಕ್ ದೀಸ್ ಉತರ್ತೆಲಿ. ತವಳ್ ಕಿತೆಂ ? ದೆಕುನ್ ಫಳಾಚಿ ಆವ್ಧಿ ವ್ಯಾಲಿಡಿಟಿ ಪ್ಯಾಕ್ ಆನಿ ರೀಚಾರ್ಚ್ ಬೊವ್ ಗರ್ಜೆಚೆಂ. [ ಆರ್ಸೊ. ಅಂಕೊ: 8 ವರಸ್ : 8 ಪಾನ್ : 42 ]

ಹೆಂ ಬರವ್ನ್ ಪುರ್ತೊ ಮ್ಹಯ್ನೊ ಜಾಂವ್ಕ್ ನಾ ಹಿಜಾಬಾಚ್ಯಾ ನಾಂವಾನ್ ಉಡುಪಿ ಥಾವ್ನ್ ವ್ಯಾಲಿಡಿಟಿ ಪ್ಯಾಕ್ ರಿಜಾರ್ಚ್ ಸುರು ಜಾಲಾಂಶೆ ದಿಸ್ತಾ. ದ್ರೌಪದಿ ಮಾಯೆಚಿ ಅಬರೂ ರಾಕುಂಕ್ ಆಪ್ಲಿ ಸಗ್ಳಿ ತಾಂಕ್ ವ್ಹಾಳಯಿಲ್ಲೊ ಅವ್ತಾರ್ ಪುರುಶ್ ಶ್ರೀ ಕೃಷ್ಣ ದೆವಾಚ್ಯಾ ನಗರಿಂತ್, ಎಕಾ ಪಾತ್ಯೆಣೆಚ್ಯಾ ಚಲಿಭುರ‍್ಗ್ಯಾಂನಿ ಮಾತೆಂ ಧಾಂಪ್ಚ್ಯಾ ವಸ್ತುರಾಚ್ಯಾ ಕುಡ್ಕ್ಯಾಚೆರ್ ವಿವಾದ್ ಸುರು ಜಾಲ್ಲಿ ಗಜಾಲ್ ವರ‍್ತ್ಯಾ ಬೆಜಾರಾಯೆಚಿ. ಬಾಳ್ ಕೃಶ್ಣ  ಸ್ತ್ರೀಯಾಂಚ್ಯಾ  ವಸ್ತುರಾಂ  ಸಾಂಗಾತಾ ಖೆಳ್ತಾಲೊ, ಲೊಣಿ ಚೋರ್ನ್  ಖಾತಾಲೊ. ಪೂಣ್ ದುಸ್ಮಾನಾಂನಿ ಜೆನ್ನಾಂ ಎಕಾ ಸ್ತ್ರ‍ಿಯೆಚ್ಯಾ ವಸ್ತುರಾಚೆರ್ ಹಾತ್ ಘಾಲೊ, ತೊ ವೊಗೊ ರಾವೊಂಕ್ ನಾ. ಸತಾಚ್ಯಾ ಪಾಡ್ತಿನ್ ಘಟ್ ರಾವ್ಲೊ. ವಸ್ತುರ್ ವೊಡ್ತೆಲ್ಯಾಕ್ ವಸ್ತುರ್ ವೋಡ್ನ್ ವೊಳ್ಳೆಂ, ಪೂಣ್ ಶ್ರೀ ಕೃಷ್ಣ ದೆವಾಕ್ ಸ್ತೀಯೆಚೆಂ ಅಬರೂ ರಾಕ್ಚೆಂ ವಸ್ತುರ್ ದೀವ್ನ್ ವೊಳೊಂಕ್ ನಾ. ಅಸಲ್ಯಾ ಎಕಾ ಯುಗಾಚ್ಯಾ ಅವ್ತಾರ್ ಪುರುಶಾಚ್ಯಾ  ನಗರಿಥಾವ್ನ್ ಸುರು ಜಾಲ್ಲೊ ವಸ್ತುರಾಂಚೊ ದ್ವೇಶ್ ಆಜ್ ಅಖ್ಖ್ಯಾ ದೇಶಾಕ್ ವಿಸ್ತಾರ‍್ಲಾ ತಿ ಗಜಾಲ್ ಬೊವ್‌ಚ್ ಬೆಜಾರಾಯೆಚಿ, ಪ್ರತ್ಯೇಕ್ ಜಾವ್ನ್ ಉಡುಪಿ ಜಿಲ್ಲ್ಯಾಂತ್ ಜಲ್ಮೊನ್, ಶಿಕೊನ್, ವಾಡ್‌ಲ್ಲ್ಯಾ ಮ್ಹಾಕಾ ಆನಿ ಮ್ಹಜೆ ತಸಲ್ಯಾ ಜಾಯ್ತ್ಯಾಂಕ್.

ಉಡುಪಿಚಿ ಗಜಾಲ್ ಆಜ್ ಫಕತ್ ಉಡುಪಿಚಿ ಜಾವ್ನ್ ಉರೊಂಕ್ ನಾ, ಬಗಾರ್ ದೆಶಾಚಿ, ಸಂಸಾರಾಚಿ ಜಾಲ್ಯಾ. ಎಲಿಸಾಂವಾಂಚ್ಯಾ ಕಾಯ್ಲಿರ್ ತಾಪೊನ್ ಆಸ್ಚ್ಯಾ ಉತ್ತರ್ ಪ್ರದೇಶಾಂತ್ ಎಕಾ ರಾಜಕೀ ಪಾಡ್ತಿಚ್ಯಾ  ಸ್ತ್ರೀಯೆನ್  ‘ಹಿಜಾಬಾಕ್ ಹಾತ್ ಲಾಂವ್ಕ್ ಆಯ್ಲ್ಯಾರ್ ಹಾತ್ ಕಾತರ್ನ್ ಉಡಯಾ’ ಮ್ಹಳ್ಳೆಂ ವಾಕ್ಮೂಲ್ ದೀವ್ನ್ ಉಜ್ಯಾಕ್ ತೇಲ್ ವೊತ್ಚೆಂ ಕಾಮ್ ಕೆಲಾಂ. ವಿದ್ಯಾರ್ಥಿ ಸುಪ್ರೀಂ ಕೊಡ್ತಿಕ್ ವಿಷಯ್ ಘೆವ್ನ್ ಗೆಲ್ಲೆ ತವಳ್ ಮುಕೆಲ್ ನಿತಿದಾರ್ ಎನ್. ವಿ. ರಮಣಾನ್ ವಿಷಯ್ ವ್ಹಡ್ಲೊ ಕರಿನಾಕಾತ್ ಮ್ಹಣ್ ಸೂಚ್ಯ್ ಜಾವ್ನ್ ಸಾಂಗ್ಲಾಂ. ಹಾಚೊ ಅರ್ಥ್ ದೆಶಾಚ್ಯಾ ಪರಮೋಚ್ಛ್ ಕೊಡ್ತಿಚ್ಯಾ ಮುಕೆಲ್ ನಿತಿದಾರಾಕ್ ಸಯ್ತ್ ಹೊ ವಿಷಯ್ ವ್ಹಡ್ ಜಾಲ್ಯಾರ್ ದೆಶಾಕ್ ಬರೊ ನಯ್ ಮ್ಹಳ್ಳಿ ಖಬರ್ ಆಸಾ.

ಆತಾಂ, ಇತ್ಲೆಂ ಸರ್ವ್ ಭಂವ್ತಿ ಘಡ್ತಾನಾ, ಕ್ರೀಸ್ತಾಂವ್ ಸಮಾಜ್ ಖಂಯ್ ಆಸಾ?

ಬೋವ್‌ಶಾ ಗಾಡ್ ನಿದೆಂತ್ ಘೊರೆವ್ನ್ ಆಸಾಶೆಂ ದಿಸ್ತಾ. ‘ಮಲಗಿದ ಹೆಬ್ಬುಲಿಯನ್ನು ಕೆಣಕಿದರೆ ಜೋಕೆ’ ಮ್ಹಣ್ ಹಿ ಸಮಾಜ್ ಏಕ್ ಪಾವ್ಟಿಂ ಜಾಗಿ ಜಾಲ್ಲಿ , ಆತಾಂ ಚಿಕಾಗೊಂತ್ ಅಸ್ಚ್ಯಾ ಆಸ್ಟಿನ್ ಪ್ರಭುಚ್ಯಾ ಮುಕೆಲ್ಪಣಾರ್ ತ್ಯಾಗಿ ಮಸೂದ್ಯಾ ವಿರೋಧ್ ಝುಜೊಂಕ್. ಉಪ್ರಾಂತ್ ನಿದೊಂಕ್ ಗೆಲ್ಲೊ  ವಾಗ್ ( ಹೆಬ್ಬುಲಿ ) ಪರ್ತ್ಯಾನ್ ಉಟ್‌ಲ್ಲೊ 2008  ಚರ್ಚ್ ಎಟ್ಯಾಕಾ ವೆಳಾರ್ ಮ್ಹಣ್ಯೆತ್. ತವಳ್ ಜಾಯ್ತೆ ಕ್ರೀಸ್ತಾಂವ್ ತರ್ನಾಟೆ ಪುಲಿಸಾಂಚೆ ಮಾರ್ ಖಾವ್ನ್, ರಗತ್ ವ್ಹಾಳವ್ನ್, ಆಂಗಾರ್ ಕ್ರಿಮಿನಲ್ ಕೇಜಿ ಘೆವ್ನ್, ಜಯ್ಲಾಕ್ ವಚೊನ್ ಆಯ್ಲೆ. ಫೂಣ್ ಆಜ್ ? ತರ್ನಾಟ್ಯಾಂಕ್ ಸೊಡ್ಯಾಂ, ಸೊಡೆಲಿಟಿಚೆ ಸಾಂದೆಯ್ ಎಕಾ ಲ್ಹಾನ್ಶಾ  ಪ್ರತಿಭಟನಾಕ್ ಯೇಂವ್ಕ್ ತಯಾರ್ ನಾಂತ್!  ಕಿತ್ಯಾಕ್ ? ಹ್ಯಾ ವಿಶ್ಯಾಂತ್ ದಿಯೆಸೆಜಿಚ್ಯಾ ವ್ಹಡಿಲಾಂನಿ ತಶೆಂ ಲಾಯಿಕ್ ಮುಕೆಲ್ಯಾಂನಿ ನಿಯಾಳ್ ಘೆಂವ್ಚಿ ಗರ್ಜ್ ಆಸಾ.

ಸಮಡ್ತಿಚೆ ವ್ಹಡಿಲ್ ಆನಿ ಮುಕೆಲಿ  –  ಉಡುಪಿಚ್ಯಾ ಹಿಜಾಬಾವರ್ವಿಂ, ಥೊಡ್ಯಾ ತೆಂಪಾಕ್ ತರೀ ಆಮಿ ಮತಾಂತರ್ ಕಾಯ್ದ್ಯಾಚ್ಯಾ ಬೊಯ್ತಾಡಾಥಾವ್ನ್  ಬಚಾವ್ ಜಾಲ್ಯಾಂವ್ ಮ್ಹಣ್ ಭಿತರ್ಲೆ ಭಿತರ್ ಸಮಾದಾನ್ ಪಾವ್‌ಲ್ಲೆ ಜಾಂವ್ಕ್ ಪುರೊ. ಪುಣ್ ಪಂಜಿಮೊಗರುಂತ್ ಮಾಗ್ಣ್ಯಾ ಘರ್ ಕೊಸಾಳ್ತಾನಾ ತಾಂಚ್ಯಾ ಭಿತರ್ಲಿಂ ಆನಿ ಭಾಯ್ಲಿಂ, ಸಗ್ಳಿಂ ಸಮಾಧಾನಾಂ ಕೊಸ್ಳೊನ್ ಪಡ್ಲ್ಯಾಂತ್ ಮ್ಹಣ್ಚ್ಯಾಕ್ ದುಬಾವ್ ನಾ. ಹಿಜಾಬಾ ವಿಶ್ಯಾಂತ್ ಮಟ್ವಿ ತರೀ ಏಕ್ ಅಭಿಪ್ರಾಯ್ ದೀಂವ್ಕ್ ನರ್ಗಾಲ್ಲೆ ಕ್ರೀಸ್ತಾಂವ್ ಮುಕೆಲಿ ಆತಾಂ,  ಪ್ರತಿಭಟನ್ ಚಲವ್ನ್  ‘ಪುಲಿಸ್ ಕಮಿಶನರಾನ್ ಆಮ್ಕಾಂ ನೀತ್ ಕರ್ನ್ ದಿಜೆ ‘ ಮ್ಹಣೊಂಕ್ ಲಾಗ್ಲ್ಯಾತ್. ಆಜ್ ಕ್ರೀಸ್ತಾಂವ್ ಸಮಾಜಾ ತರ್ಫೆನ್ ಉಲಂವ್ಕ್ ದುಸ್ರ್ಯಾ ಪಾತ್ಯೆಣೆಚೊ ಎಕ್ಲೊಯ್ ನಾತ್‌ಲ್ಲಿ ಅನಾಥ್ ಪರಿಸ್ಥಿತಿ ಉಬ್ಜಲ್ಯಾ. ಅಶೆಂ ಕಿತ್ಯಾಕ್ ಜಾಲೆಂ ಮ್ಹಳ್ಯಾರ್, ಕ್ರಿಸ್ತಾಂವಾಂಕ್ ಅನ್ಯಾಯ್ ಜಾತಾನಾ ಸಗ್ಳ್ಯಾ ಪಾತ್ಯೆಣೆಚ್ಯಾಂನಿ ಯೇವ್ನ್ ಉಲಯ್ಜೆ. ಪೂಣ್ ಹೆರ್ ಪಾತ್ಯೆಣೆಚ್ಯಾಂಕ್ ಅನ್ಯಾಯ್ ಜಾತಾನಾ ಮಾತ್ –  ಕ್ರೀಸ್ತಾಂವ್ ಮೌನ್!

ಖಬ್ರೆ ಗಾಂಚ್ : Mangaluru: Christian leaders pay courtesy visit to police commissioner

ಖಬ್ರೆ ಗಾಂಚ್ : Mangaluru: Protest staged over demolishing prayer centre at Panjimogaru

ಆತಾಂ, ಹಾಂಗಾಸರ್ ವಯ್ರ್  ದಿಲ್ಲೆ ಮಾಧ್ಯಮಾಂನಿ ಆಯಿಲ್ಲೆ ದೋನ್ ತಸ್ವಿರ‍್ಯೊ ಪಳಯಾ – ಪಯ್ಲಿ ತಸ್ವೀರ್, ಕೂಳೂರಾಂತ್ ಜಾಲ್ಲ್ಯಾ ಪ್ರತಿಭಟನಾಂತ್ “ಪುಲಿಸ್ ಕಮಿಶನರಾನ್ ಆಮ್ಕಾಂ ನೀತ್ ಕರ್ನ್ ದೀಜೆ” ಮ್ಹಳ್ಳೆ ಮುಕೆಲಿ ತ್ಯಾಚ್ ಪುಲಿಸ್ ಕಮಿಶನರಾಕ್ ಮೆಳೊಂಕ್ ಫುಲಾಂಚೊ ‘ಗುಲ್‌ದಸ್ತಾ’ ಘೆವ್ನ್ ಭೆಟೆಕ್ ಗೆಲ್ಲಿ. ಹಿ ಭೆಟ್ ಮುಕೆಲ್ಯಾಂಕ್ ವಿಸರ್ ಪಡ್ಲ್ಯಾ ಜಾಂವ್ಕ್ ಪುರೊ, ಪೂಣ್ ಪ್ರಜ್ಞಾವಂತ್ ಲೋಕ್ ವಿಸ್ರೊಂಕ್ ನಾ. ಅಮಾಯೆಕ್ ಲೊಕಾಕ್ ಜಮವ್ನ್, ಪ್ರತಿಭಟನ್ ಕರ್ನ್ ಆಜ್ “ಕಮಿಶನರಾನ್ ಆಮ್ಕಾಂ ನೀತ್ ಕರ್ನ್ ದೀಜೆ ” ಮ್ಹಣ್ ಭಾಶಣಾಂ ದಿಂವ್ಚ್ಯಾ ಬದ್ಲಾಕ್ , ತವಳ್ ಫುಲಾಂಚೊಂ ಗುಲ್‌ದಸ್ತಾ ಘೆವ್ನ್ ಗೆಲ್ಲೆ ನಯ್, ಆತಾಂ ಏಕ್ ದೂರ್ ಘೆವ್ನ್ ತ್ಯಾಚ್ ಪುಲಿಸ್ ಕಮಿಶನರಾಲಾಗಿಂ ಹೆ ಮುಕೆಲಿ ಕಿತ್ಯಾಕ್ ವಚಾನಾಂತ್? ಮ್ಹಳ್ಳೆಂ ವಾಜ್ಬಿ ಸವಾಲ್ ಲೊಕಾನ್ ವಿಚಾರ‍್ಚ್ಯಾಂತ್ ಚೂಕ್ ದಿಸಾನಾ.  ದೂರ್ ದೀವ್ನ್, ಪ್ರಕರಣ್ ದಾಖಲ್  ಜಾವ್ನ್, ಪಾರದರ್ಶಕ್ ತನ್ಖಿ ಜಾಂವ್ಚೆಪರಿಂ ಹ್ಯಾ ಮುಕೆಲ್ಯಾಂನಿ ಕಿತ್ಯಾಕ್ ಪುಲಿಸ್ ಕಮಿಶನರಾಚೆರ್ ದಬಾವ್ ಘಾಲುಂಕ್ ನಜೊ ? ಹಿ ಸೊಂಪಿ, ಕಾನುನಾಚಿ ವಾಟ್ ಆಪ್ಣಾಂವ್ಚ್ಯಾ ಬದ್ಲಾಕ್, ಪ್ರತಿಭಟನ್, ಮೈಕಾರ್ ಉಲಂವ್ಚೆಂ, ಭಾಶಣಾಂ, ಮಾಧ್ಯಮಾಂನಿ ತಸ್ವಿರ‍್ಯೊ ಆನಿ ಖಬರ್ ಖಂಯ್ಚ್ಯಾ ಪುರುಶಾರ‍್ತಾಕ್? ಪ್ರತಿಭಟನ್ ಜಾಲೆಂ, ಪತ್ರಾಂನಿ ಖಬರ್ ಛಾಪೊನ್ ಆಯ್ಲಿ … ಸಂಪದ್ಲೆಂ!  ಉಪ್ರಾಂತ್ ಹ್ಯಾ ಮುಕೆಲ್ಯಾಂಕ್ ಸಮುದಾಯಾಚೊಯ್ ಉಡಾಸ್ ಆಸಾನಾ, ಮಾಗ್ಣ್ಯಾಸುವಾತೆಚೋಯ್ ಉಡಾಸ್ ಉರಾನಾ.  ತಾಂಕಾ ಜಾಯ್ ಜಾಲ್ಲಿಂ ಫಕತ್ ಪೇಪರ್ ಕಟ್ಟಿಂಗಾಂ. ಎಲಿಸಾಂವ್ ಯೆತಾನಾ, ಆಪ್ಲೆಂ ಫ್ರೊಫಾಯ್ಲ್ ಬಿಲ್ಡಪ್ ಕರುಂಕ್. ತಿತ್ಲೆಂಚ್!

ಆತಾಂ ಹಾಂಗಾಸರ್ ವಯ್ರ್ ದಿಲ್ಲೊ ವಿಡಿಯೊ ( ಸಂಪೂರ್ಣ್ ವಿಡಿಯೊ ಫೇಸ್‌ಬುಕಾರ್ ಹ್ಯಾ ಗಾಂಚಾಚೆರ್ ಆಸಾ: https://fb.watch/ab-tRSD-lf/ ) ಪಳವ್ಯಾಂ – ಜಿಲ್ಲಾಧಿಕಾರಿಚ್ಯಾ ದಫ್ತರಾ ಮುಕಾರ್ ಪ್ರತಿಭಟನಾಕಾರಾಂಕ್ ಉದ್ದೇಸುನ್ ಉಲಂವ್ಚೊ ಮಾನೆಸ್ತ್, ಮಂಗ್ಳುರ್ ದಿಯೆಸೆಜಿಚೊ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿ. ತಾಣೆ ಆಪ್ಲ್ಯಾ ಉಲವ್ಪಾಂತ್ ಬೊವ್ ಆಪತ್ತೆಚೊ  ‘ಮೊಬ್’ (Mob)  ಮ್ಹಳ್ಳೊ ಸಬ್ದ್  ಕಿತ್ಯಾಕ್ ವಾಪಾರ್ಲೊ ಮ್ಹಣ್ ಮ್ಹಾಕಾ ಅನಿಕೀಯ್  ಸಮ್ಜೊಂಕ್ ನಾ!  ಮೊಬಾಥಾವ್ನ್ ಮೆಳ್ಚೆಂ ‘ಮೊಬ್ ಜಸ್ಟೀಸ್’ ಶಿವಾಯ್ ದುಸ್ರಿ ನೀತ್ ಮೆಳೊಂಕ್ ಸಾಧ್ಯ್ ನಾ! ದೆಶಾಚ್ಯಾ ಸಂವಿದಾನಾಚೆರ್ ಥಿರ್ ಆನಿ ಥೋರ್ ಭರ್ವಸೊ ದವರ‍್ಲೆಲ್ಯಾ ಆಮ್ಕಾಂ ಆಜ್ ಗರ್ಜ್ ಆಸ್ಚೆಂ ‘ಮೊಬ್ ಜಸ್ವೀಸ್’ ನಯ್ ಮ್ಹಳ್ಳಿ ಪ್ರಾಥಮಿಕ್ ಗಜಾಲ್ ಮುಳಾನ್  ಸಮ್ಜೊನ್ ಘೆಂವ್ಚಿ ಆನಿ ತಿ ಪಾಳ್ಚಿ ಗರ್ಜ್ ಆಜ್ ಪಯ್ಲೆಂಚ್ಯಾ ಪ್ರಾಸ್ ದೊಡ್ತ್ಯಾನ್ ಆಸಾ ತೆಂ ಕೊಣೆಂಯ್ ವಿಸ್ರೊಂಕ್ ನಜೊ!  ಹ್ಯಾ ದೆಶಾಕ್ ಮತೀಯ್ ಮೂಳ್‌ಭೂತ್‌ವಾದ್ ಕಿತ್ಲೊ ಮಾರೆಕಾರ್‌ಗೀ ‘ಮೊಬ್ ಜಸ್ಟೀಸ್’  ತಾಚೆಪ್ರಾಸ್ ಚಡ್ ಮಾರೆಕಾರ್,  ಮಾಗೀರ್ ತೆಂ ಬಹುಸಂಖ್ಯಾತಾಂಚೆಂ ಆಸುಂ ವಾ ಉಣ್ಯಾಸಂಕ್ಯಾತಾಂಚೆಂ! ದೆಕುನ್ ಪರ‍್ಗಟ್ ವೆದಿಂನಿ ಉತ್ರಾಂ ಆನಿ ಭಾಸ್ ವಾಪಾರ್ತಾನಾ ಚತ್ರಾಯ್ ಸಾಂಬಾಳ್ಚೀಯ್ ಗರ್ಜ್ ಆಸಾ. ಆಸುಂ, ತಿ ದುಸ್ರಿಚ್ ಗಜಾಲ್.

ಕಿಟಾಳಾರ್ 2019 ದಸೆಂಬ್ರಾಂತ್ – ಕೆನರಾ ಕ್ರಿಸ್ತಾಂವಾಂಚಿ ದಾಕ್ಷೆಣೆಚಿ ಪಿಡಾ ಆನಿ ನಾಗರಿಕತಾ ಕಾಯ್ದೊ ! ಮ್ಹಳ್ಳ್ಯಾ ಅಗ್ರ್‌ಲೇಖನಾಂತ್ ಹಾಂವೆ ಬರಯಿಲ್ಲೆಂ ಆಸಾ –

ಆತಾಂ ಚಲೊನ್ ಆಸ್ಚೊ ನಾಗರಿಕತಾ ಕಾಯ್ದ್ಯಾಚೊ ವಿವಾದ್‌ಚ್ ಪಳವ್ಯಾಂ – ಬಿಸ್ಪ್, ಪಾದ್ರಿ, ಸಿಸ್ಟರಾಂ ಕಿತ್ಯಾಕ್ ಉಲಯ್ನಾಂತ್? ಕಿತ್ಯಾಕ್ ಲೊಕಾಕ್ ಸಾಂಗಾನಾಂತ್? ಕಿತ್ಯಾಕ್ ರಸ್ತ್ಯಾಕ್ ದೆಂವಾನಾಂತ್ ? ಕಿತ್ಯಾಕ್ ಪ್ರತಿಭಟನ್ ಕರಿನಾಂತ್? ಮ್ಹಣ್ ಸವಾಲ್ ವಿಚಾರ್ತೆಲ್ಯಾ ಎಕ್ಲ್ಯಾನ್ ತರೀ, ಪಾಟ್ಲ್ಯಾ ದಿಸಾಂನಿ ಮಂಗ್ಳುರ್ಚ್ಯಾ ಪ್ರೆಸ್ ಕ್ಲಬ್ಬಾಂತ್ ಅಖ್ಖ್ಯಾ ಕರ್ನಾಟಕಾಚ್ಯಾ ಕ್ರೀಸ್ತಾಂವ್ ಸಮಾಜೆಚೆ ಅಧಿಕೃತ್ ಪ್ರತಿನಿಧಿ ಜಶೆಂ ಉಲಯಿಲ್ಲ್ಯಾ ಎಕ್ಲ್ಯಾಕ್ ತರೀ CAA ವಾ NRC ವಿಶ್ಯಾಂತ್ ತುಮ್ಚಿ ಅಬಿಪ್ರಾಯ್ ಕಿತೆಂ ಮ್ಹಣ್ ವಿಚಾರ್ಲಾಂಗೀ? ಆತಾಂ ಕಿತ್ಯಾಕ್ ತುಮಿ ಪ್ರೆಸ್ ಕೊನ್ಪರೆನ್ಸ್ ಕರಿನಾಂತ್ ಮ್ಹಣ್ ಸವಾಲ್ ಕೆಲಾಂಗೀ ? ನಾ ತರ್ ಕಿತ್ಯಾಕ್ ಕರುಂಕ್ ನಾ? ಸಮಾಜಿಕ್ ಜಾಳಿಜಾಗ್ಯಾಂನಿ ಬಿಸ್ಪಾಂಕ್, ಪಾದ್ರಿಂಕ್, ಮಾದ್ರಿಂಕ್ ತೊಂಡಾಕ್ ಅಯಿಲ್ಲೆಪರಿಂ ಯೆಟ್ತೆಲ್ಯಾಂಕ್ ಕೆನಾರಾಂತ್ ಪಾಟ್ಲ್ಯಾ ಎಕಾ ವರ್ಸಾ ಪಾಸುನ್, ಕ್ರೀಸ್ತಾಂವ್ ಸಮಾಜೆಂತ್ ಸಮಾಜಿಕ್ ಆನಿ ರಾಜಕೀ ಮಾಳಾರ್ ಕಸಲ್ಯೊ ವಾಡಾವಳಿ ಜಾವ್ನ್ ಆಸಾತ್ ಮ್ಹಳ್ಳೆವಿಶ್ಯಾಂತ್ ಬೋವ್ಶಾ ಖಬರ್ ನಾ. ವಾ ಖಬರ್ ಅಸ್ಲ್ಯಾರೀ, ದಾಕ್ಷೆಣೆಕ್ ವಾ ಭಿಂಯಾಕ್ ಉಲಂವ್ಕ್ ನಾಕಾ ಜಾಂವ್ಕೀ ಪುರೊ!

ಹಾಂವೆ 2019 ವ್ಯಾ ವರ್ಸಾ ಬರಯಿಲ್ಲೆಂಚ್ ಪ್ರತಿಭಟನಾ ವೆಳಾರ್ ಮಂಗ್ಳುರ್ ದಿಯೆಸೆಜಿಚ್ಯಾ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿನ್ ಆಪ್ಲ್ಯಾ ಭಾಶಣಾಂತ್ ಮ್ಹಳಾಂ. ಆಮಿ ಉಲಯ್ಜೆ ಆಸ್‌ಲ್ಲೆಂ, ಉಲಂವ್ಕ್ ನಾತ್‌ಲ್ಲಿ ಆಮ್ಚಿ ಚೂಕ್! ಕೌತುಕಾಯೆಚಿ ಗಜಾಲ್ ಮ್ಹಳ್ಯಾರ್ ಪ್ರತಿಭಟನಾಕ್ ಜಮ್ಲೆಲ್ಯಾಂ ಪಯ್ಕಿ ನೊವೊದ್ ಠಕ್ಕೆ ಮಾದ್ರಿ. ಆನಿ ಮಾದ್ರಿಂಕ್ ತಾಣೆ ಶಾಭಾಸ್‌ಗಿರಿ ದಿಲ್ಯಾ! ಬರೆಂಚ್. ಹ್ಯಾ ದೆಶಾಂತ್ ಉಣ್ಯಾಸಂಕ್ಯಾತಾಂಚಿಂ ಪರಿಸ್ಥಿತಿ ಕಿತ್ತೂನ್ ಯೇವ್ನ್ ಪಾವ್ಲ್ಯಾ ಮ್ಹಳ್ಯಾರ್ – ಮುಳಾವ್ಯಾ ಹಕ್ಕಾಂ ಖಾತಿರ್ ಝುಜೊಂಕ್ ಆಜ್ ಸ್ತ್ರ‍ಿಯಾಂನಿ ರಸ್ತ್ಯಾಕ್ ದೆಂವಾಜೆ ಪಡ್ಲಾಂ. ಹಿಜಾಬಾ ಖಾತಿರ್ ಝುಜ್ಚಿಂ ಚಲಿಭುರ್ಗಿಂ ಜಾಂವ್  ವಾ  ಮತಾಂತರ್ ಕಾಯ್ದ್ಯಾ ವಿರೋದ್ ಝುಜ್ಚ್ಯೊ ಮಾದ್ರಿ! ಆಸುಂ…

ಮುಕಾರುನ್ ತೋ ಮ್ಹಣ್ತಾ – ಕ್ರೀಸ್ತಾಂವ್ ಲೋಕ್ – ಸೊಸ್ಣಿಕ್. ಎಕಾ ಪೊಲ್ಯಾಕ್ ಮಾರ್ಲ್ಯಾರ್ ದುಸ್ರೊ ಪೊಲೊ ದಾಕಂವ್ಚೆ ತಿತ್ಲೆ  ಭೊಳೆ ಮ್ಹಣ್ತಾತ್ ಆಮ್ಕಾಂ. ನಾಗರಿಕತಾ ಕಾಯ್ದೊ ಯೆತಾನಾ ಉಲಂವ್ಕ್ ನಾಂವ್, ಕೃಷಿ ಕಾಯ್ದೊ ಯೆತಾನಾಂಯ್ ಉಲಂವ್ಕ್ ನಾಂವ್, ಮತಾಂತರ್ ಕಾಯ್ದೊ ಯೆತಾನಾಂಯ್ ಕ್ರೀಸ್ತಾಂವ್, ಪ್ರೊಟೆಸ್ಟಂತ್ ಶಾಬೀತ್ ಮ್ಹಣ್ ಚಿಂತೂನ್ ವೊಗೆ ಬಸ್ಲ್ಯಾಂವ್, ಆತಾಂ ತೆ ಆಮ್ಚ್ಯಾ ಸಿಸ್ಟರಾಂನಿ ಚಲಂವ್ಚ್ಯಾ ಇಸ್ಕೊಲಾಂಕ್ ಆಯ್ಲ್ಯಾತ್… ನಮ್ಮ ಪಾದಬುಡಕ್ಕೆ ಬಂದಿದೆ, already come to our foots.

ಆಮ್ಚೇರ್ ಅನ್ಯಾಯ್ ಜಾತಾನಾ ಆಮಿ ಸಾಂಗಾತಾ ಮೆಳೊನ್ ಪ್ರತಿಭಟನ್ ಕರಿಜೆ ಮ್ಹಣ್ ತೋ ಸಂಪಯ್ತಾ.

ಆತಾಂ, ಜಿಲ್ಲಾಧಿಕಾರಿ ದಫ್ತರಾಚ್ಯಾ ಗೇಟಿಲಾಗಿಂ, ಹೆಂ ಪ್ರತಿಭಟನ್ ಚಲ್‌ಲ್ಲೆಂ 2021 ದಸೆಂಬರ್ 29 ತಾರಿಕೆರ್. Better late than never, ಎನ್.ಆರ್.ಸಿ, ಕೃಷಿ ಕಾಯ್ದೊ , ಮತಾಂತರ್ ನಿಶೇದ್ ಕಾಯ್ದೊ ಅಶೆಂ ಉಲಯ್ಜೆ ಜಾಲ್ಲ್ಯಾ ವೆಳಾರ್ ಉಲಯ್ಜೆ ಆಸ್‌ಲ್ಲೆಂ, ಉಲಯ್ನಾಸ್ತಾನಾ ರಾವ್‌ಲ್ಲೆಂ ಚೂಕ್ ಮ್ಹಣ್ ಆತಾಂ ತರೀ ಕಳ್ಳೆಂ ನೇ ? ಫುಡಾರಾಂತ್ ತರೀ ಉಲಯ್ತಿತ್ ಮ್ಹಣ್ ಚಿಂತ್ಲ್ಯಾರ್ – ಆತಾಂ ಹಿಜಾಬ್ ಸಂಕಷ್ಟ್ ಯೆತಾನಾ, ಸಮುದಾಯಾಚೆ ವ್ಹಡಿಲ್ ಆನಿ ಮುಕೆಲಿ ಪರ್ತ್ಯಾನ್ ಮೌನ್ ಪಾಂಗುರ್ನ್ ಬಸ್ಲ್ಯಾತ್‌ !  ತರ್ ಹಾಣಿ ಉಲಂವ್ಚೆಂ ಕೆದಾಳಾ? ವಿಡಿಯೊಂತ್ ಮಾದ್ರಿಂಕ್ ಶಾಭಾಸ್‌ಗಿರಿ ದಿಲ್ಲಿ, ಆಮಿ ಉಲಯ್ಜೆ ಆಸ್ಲೆಂ ಮ್ಹಣ್ ಪಶ್ಚಾತ್ತಾಪಾಚ್ಯಾ ತಾಳ್ಯಾನ್ ಉಲಯಿಲ್ಲೆಂ ಪೂರಾ ಫಕತ್ ದಾಕಂವ್ಕ್ ಮಾತ್ ?

ಮುನ್ಸಿಪಾಲಿಟಿ ಎಲಿಸಾಂವಾ ಉಪ್ರಾಂತ್ ಪತ್ರಿಕಾ ಗೋಷ್ಠಿ ಆಪವ್ನ್ ಕ್ರೀಸ್ತಾಂವಾಂಕ್ ಅಖ್ಖ್ಯಾ ಕರ್ನಾಟಕಾಂತ್ ಬಳ್ ಆಸಾ ಮ್ಹಣ್ ಗಾಜಯಿಲ್ಲೆ ಕ್ರೀಸ್ತಾಂವ್ ಸಮಜಾಚೆ ಪ್ರತಿನಿಧಿ,  ನವ್ಯಾ ಬಿಸ್ಪಾಚೆಂ ಪಟ್ಟಾಭಿಷೇಕ ಜಾಲ್ಲೆಂಚ್ ‘ಬಂದುತ್ವ’ ಮ್ಹಣ್  ಬ್ರ್ಯಾಂಡಿಂಗ್ ಸುರು ಕೆಲ್ಲೆ  ಬ್ರಾಂಡಿಂಗ್  ಅಂಬಾಸಿಡರ್, ತೇಗ್ ಬಿಸ್ಪ್ ಆನಿ ತೀಸ್ ಹಜಾರ್ ಲೊಕಾಕ್ ಎಕ್ಟಾಂಯ್ ಕರ್ನ್ ಸಕ್ತೆ ಪ್ರದರ್ಶನ್ ಕೆಲ್ಲೆಂ ಲಾಯಿಕಾಂಚೆಂ ಬಳಿಷ್ಠ್ ಸಂಘಟನ್ ಕಥೊಲಿಕ್ ಸಭಾ, ಆಜ್ ಖಂಯ್ ಆಸಾತ್ ? ಕೊಣೀ ಕಿತ್ಯಾಕ್ ಉಲಯ್ನಾಂತ್ ? ತುಮಿ ಉಲಂವ್ಚೆಂ ತುಮ್ಚ್ಯಾ foots ಕ್ ಆಯ್ಲ್ಯಾರ್ ಮಾತ್ ? ವಾ …

ಕಾಂಯ್ ಪರ್ತ್ಯಾನ್ ನೊವೊದ್ ಠಕ್ಕೆ ಧಯ್ರಾದೀಕ್ ಮಾದ್ರಿ ಯೇವ್ನ್ ಪ್ರತಿಭಟನ್ ಕರ‍್ತಾನಾ ಆಪಯ್ತಿತ್, ವಚೊನ್ ತಾಂಕಾ ಶಾಬಾಸ್‌ಗಿರಿ ದೀವ್ನ್ ಆಯ್ಲ್ಯಾರ್ ಆಪ್ಲೆಂ ಕಾಮ್ ಜಾಲೆಂ ಮ್ಹಣ್ ಲೆಕಾಂ ಘಾಲ್ನ್ ಬಸ್ಲ್ಯಾತ್‌‌ಗೀ ಕಿತೆಂ ? ಮತಾಂತರ್ ನಿಶೇದ್ ಕಾಯ್ದ್ಯಾಚೆರ್ ಜಿಲ್ಲಾಧಿಕಾರಿ ದಫ್ತರಾ ಮುಕಾರ್ ಪ್ರತಿಭಟನ್ ಮಾಂಡುನ್ ಹಾಡ್‌ಲ್ಲ್ಯಾ – ವಿದ್ಯಾ ದಿನಕರ್, ಫಾ| ವಿನೋದ್ ಮಸ್ಕರೇನ್ಹಸ್ ಆನಿ ಶಬ್ಬೀರ್ ಹಾಂಕಾಯ್ ಪ್ರತಿಭಟನಾಂತ್ ಉಲಯಿಲ್ಲ್ಯಾ ದಿಯೆಸೆಜಿಚ್ಯಾ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿನ್ ಅಭಿನಂದನ್ ಪಾಟಯಿಲ್ಲೆಂ. ಆಜ್ ತಾಣಿಂಯ್ ಉಲಂವ್ಚೆಂ ಆಯ್ಕಾನಾ. ಹ್ಯಾ ಮಧೆಂ ದಕ್ಷಿಣ ಕನ್ನಡ ಜಿಲ್ಲ್ಯಾಚೊ ಆದ್ಲೊ ಜಿಲ್ಲಾಧಿಕಾರಿ ಸಸಿಕಾಂತ್ ಸೆಂಥಿಲ್ ಉಲಯ್ಲಾ. ತಾಕಾ ಆಯ್ಕೊನ್ ಹ್ಯಾ ದೇಶಾಂತ್ ಥೊಡೆ ತರೀ ಪ್ರಜ್ಞಾವಂತ್ ಮನಿಸ್ ಜಾಗೆ ಆಸಾತ್ ಮ್ಹಣ್ ಸಮಾದಾನ್ ಜಾಲೆಂ.

ರಾನಾಕ್ ಪಡ್‌ಲ್ಲೊ ಉಜೊ, ನಾಡಾಕ್ ಪಾಸ್ರೊಂಕ್ ವೇಳ್ ಲಾಗಾನಾ. ಹಿಜಾಬ್ ನೆಗಾರ‍್ಚ್ಯಾ ಪಾಟ್ಲ್ಯಾನ್ ಸಂವಿದಾನಾನ್ ಹ್ಯಾ ದೆಶಾಚ್ಯಾ ನಾಗರಿಕಾಂಕ್ ದಿಲ್ಲಿಂ ಮುಳಾವಿಂ ಹಕ್ಕಾಂ ಮಸ್ತುಂಚೆಂ ಕಾಮ್ ಎದೊಳ್‌ಚ್ ಚಾಲು ಜಾಲಾಂ. ಹಾಂವೆ ಪಳಯಿಲ್ಲ್ಯಾ ಥೊಡ್ಯಾ ವಿಡಿಯೊಂನಿ ಹಿಜಾಬ್ ನೆಸ್‌ಲ್ಲಿಂ ಭುರ್ಗಿಂ ಅಧ್ಯಾಪಕಾಂಕ್, ಲೊಕಾಪ್ರತಿನಿಧಿಂಕ್, ಮಾಧ್ಯಮ್ ಪ್ರತಿನಿಧಿಂಕ್ ಆಡ್ದೊಸ್ ಮಾಗ್ತಾತ್ – “ಕೇಸರಿ ಶೆಲೊ ಘಾಲ್ತೆಲಿಂ ಘಾಲುಂದಿತ್ ಸರ್. ಆಮಿ ಆಡಾಯ್ನಾಂವ್.” ಪೂಣ್ ತುಲನಾಂತ್ ಕೇಸರಿ ಘಾಲ್ಲಿಂ ಭುರ್ಗಿಂ ಕಿತೆಂ ಮ್ಹಣ್ತಾತ್ ?  ‘ತಾಣಿಂ ಹಿಜಾಬ್ ಕಾಡಿಜೆ, ತವಳ್ ಆಮಿ ಕೇಸರಿ ಕಾಡ್ತಾಂವ್ !’  ಹ್ಯಾ ಮಧೆಂ ಜಾಯ್ತಿಂ ಹೆರ್ ಪಾತ್ಯೆಣಿಚಿಂ ಭುರ್ಗಿಂ, ಪ್ರತೇಕ್ ಜಾವ್ನ್ ಚಲಿಭುರ್ಗಿಂ, ಹಿಜಾಬ್ ಘಾಲ್ಚ್ಯಾ ಭುರ್ಗ್ಯಾಂಕ್ ಧಯ್ರ್ ದಿತೇ ಆಸಾತ್.  ‘ಕಿತ್ಯಾಕ್ ತಾಂಕಾ ಭೆಶ್ಟೆಂಚ್  ಧೊಸ್ತಾತ್ ? ತಿಂ ಭಿರ್ಮತ್ ಪಯ್ಲೆಂ ಥಾವ್ನ್ ಹಿಜಾಬ್ ಘಾಲ್ನ್ ಆಯ್ಲ್ಯಾಂತ್, ತಿ ತಾಂಚಿ ಪಾತ್ಯೆಣಿ ನ್ಹಯ್‌ಗೀ, ತಾಂಚಿ ಪಾತ್ಯೆಣಿ ತಿಂ ಪಾಳುಂದಿತ್. ಆಮ್ಕಾಂ ಕಾಂಯ್ ಧೊಶಿ ನಾಂತ್’ ಮ್ಹಣ್ ಪರ‍್ಗಟ್ ವಿನಂತಿ ಕರುನ್ ಆಸಾತ್. ಅಸಲಿಂ ಉತ್ರಾಂ ಆಯ್ಕಾತಾನಾ ಸಂಸಾರಾಂತ್ ಮನ್ಶ್ಯಾಪಣ್ ಪುರ್ತೆಂ ಮರೊಂಕ್ ನಾ ಮ್ಹಳ್ಳೊ ಭರ್ವಸೊ ಕಾಳ್ಜಾಮನಾಂತ್ ಉದೆತಾ.

ಹ್ಯಾ ಸಗ್ಳ್ಯಾ ಮಧೆಂ, ಕ್ರೀಸ್ತಾಂವ್ ಸಮಾಜ್ ಖಂಯ್ ಆಸಾ? ಕ್ರೀಸ್ತಾಂವ್  ಸಮಾಜಾಚೆಂ Stand ಕಿತೆಂ ? ಅವ್ಕಾಸ್‌ವಾದಿ ಮುಕೆಲ್ಯಾಂಕ್ ಸೊಡ್ಯಾಂ, ಐಸಿವೈಮ್, ವೈಸಿಎಸ್ ಮ್ಹಣ್ ಕ್ರೀಸ್ತಾಂವ್ ತರ್ನಾಟ್ಯಾಂಚಿಂ  ಇತ್ಲಿಂ ಸಂಘಟನಾಂ ಆಸಾತ್ ? ಹ್ಯಾ ತರ್ನಾಟ್ಯಾಂಚೆಂ stand ಕಿತೆಂ ? ಬಹುಸಂಖ್ಯಾತ್ ಭುರ್ಗಿಂ ಸಯ್ತ್ ಸಂತ್ರಸ್ತ್ ಭುರ್ಗ್ಯಾಂಕ್ ಧಯ್ರ್/ ಸಾಂಗಾತ್ ಭಾಸಾಯ್ತಾನಾ, ಎಕಾ ಕ್ರೀಸ್ತಾಂವ್ ಭುರ್ಗ್ಯಾನ್ ತರೀ ಸಾಂಗಾತ್/ ಧಯ್ರ್ ಭಾಸಾಯ್ಲೆಂ ? ಮ್ಹಜ್ಯಾ  ಗುಮಾನಾಕ್ ಯೇಂವ್ಕ್ ನಾಂ. ತುಮ್ಚ್ಯಾ ಗುಮಾನಾಕ್ ಆಯ್ಲ್ಯಾರ್ ದಯಾಕರ‍್ನ್  ಕಳಯಾ.

ವರ‍್ತ್ಯಾ ಬೆಜಾರಾಯೆಚಿ ಗಜಾಲ್, ತರೀ ಸಾಂಗಾಜೆಚ್ ಪಡ್ತಾ – ಸ್ಟ್ಯಾಂಡ್ ಘೆಂವ್ಚಿ ಗಜಾಲ್ ಕಿತ್ಲಿ ಸೀರಿಯಸ್ ಮ್ಹಳ್ಳೆಂ ಬಿಗ್ ಬೊಸ್ ರಿಯಾಲಿಟಿ ಶೋಂತ್ಲೆ  ಸ್ಪರ್ಧಿಕ್ ಸಮ್ಜಾಲ್ಲೆಂ ತಿತ್ಲೆಂಯ್ ಆಮ್ಚ್ಯಾ ಸಮುದಾಯಾಚೆ ವ್ಹಡಿಲ್‌ ಸಮ್ಜೊಂಕ್ ಸಕೊಂಕ್ ನಾಂತ್! ಜರಿ ಸಮ್ಜಾಲ್ಲೆ – ದಿಯೆಸೆಜಿರ್ ಬೆಬುನ್ಯಾದ್ ಆರೋಪ್ ಮಾಂಡುನ್, ನಿರಂತರ್ ಬಿಸ್ಪಾಕ್ ಧೊಸ್‌ಲ್ಲ್ಯಾಚಾ ಆಂಗ್ಣಾಕ್  ತೆ ಪಾನ್ ಪೊಡ್ ಉದ್ಕಾಚೊ ಸತ್ಕಾರ್ ಘೆಂವ್ಕ್ ವೆತೇ ನಾಂತ್. ದೆಕುನ್ ತರ್ನಾಟ್ಯಾ ಥಾವ್ನ್ ಧರುನ್ ಮಾಲ್ಘಡ್ಯಾ ಪರ್ಯಾಂತ್, ಬಾವಾಡ್ತಿ ಲೊಕಾಕ್ ಸಮುದಾಯಾಚ್ಯಾ ವ್ಹಡಿಲಾಂಚೆರ್ 2008  ಆಸ್‌ಪಾಸ್ ಆಸ್‌ಲ್ಲೊ ವಿಶ್ವಾಸ್ ಆಜ್ ನಾ ಜಾಲಾ. ‘ಅಕೆರಿಕ್ ತೆ ತೆ ಏಕ್‌ಚ್ ಸಾಯ್ಭಾ – ಮಧೆಂ ಗೆಲ್ಲೆ ಆಮಿ  ಭೆಶ್ಟೆಂ ನಿಶ್ಟುರ್’ ಮ್ಹಳ್ಳೆಂ ನಿರ‍್ಲಿಪ್ತ್  ಚಿಂತಪ್ ಭಾವಾಡ್ತಿ ಲೊಕಾಥಂಯ್ ಎದೊಳ್‌ಚ್ ಪಾಲೆಂವ್ಕ್ ಸುರು ಜಾಲಾಂ.

ಸಂಸಾರಾಂತ್ಲೆಂ ಖಂಯ್ಚೇಯ್ ಧರ್ಮ್ ಅನ್ಯೇಕಾ ಧರ್ಮಾಚ್ಯಾಕ್ ದ್ವೇಶುಂಕ್ ಶಿಕಯ್ನಾಂ. ಆಪುಣ್ ಮ್ಹಜೆಂ ಧರ್ಮ್ ಪಾಳುಂಕ್ ಹಿಜಾಬ್ ನ್ಹೆಸ್ತಾಂ ಮ್ಹಣ್ಚ್ಯಾಂತ್ ಅನ್ಯೇಕಾ ಧರ್ಮಾ ವಿಶ್ಯಾಂತ್ ಮ್ಹಾಕಾ ತರೀ ಕುಸ್ಕುಟಾಚೊ ದ್ವೇಶ್ ದಿಸಾನಾ. ಹ್ಯಾ ದೆಶಾಂತ್ ಜಾಯ್ತೆ ಹೆರ್ ಪಾತ್ಯೆಣೆಚ್ಯೊ ಸ್ತ್ರೀಯೊ ಮಾತೆಂ ಮಾತ್ ನಯ್, ಸಗ್ಳೆಂ ಮುಖಮಳ್ ಪಾಲ್ವಾಂತ್ ಲಿಪಯ್ತಾತ್. ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾಚೆಂ ಪದ್‌ಚ್ ಆಸಾ ‘ ಮಾತೆಂಬೊರ್ ಪಾಂಗೊರ್ ಡೊರಿನಾ, ಬಾಯೆ ತುಂ ಮಿಸಾಕ್ ವೆತಾನಾ, ಮಾಗೊಂಕ್ ವೆತಾಯ್ ತುಂ, ತುಕಾ ಹೊ ವೇಸ್ ಸೊಭಾನಾ’ ಶಾಳ್ ಆನಿ ಕೊಲೆಜ್ ಶಿಕ್ಪಾಚೆಂ ಮಂದಿರ್ ಮ್ಹಣ್ತಾನಾ,  ಮಾತೆಂ ದಾಂಪುನ್ ಗೆಲ್ಲ್ಯಾಂತ್ ಮ್ಹಾಕಾ ತರೀ ಕಾಂಯ್ ಚೂಕ್ ದಿಸಾನಾ. ಕೇಸರಿ ಜಾಲ್ಯಾರ್ ಕೇಸರಿ, ನೀಲಿ ಜಾಲ್ಯಾರ್ ನೀಲಿ –  ಬಹುಸಂಖ್ಯಾತ್ ಚಲಿ ಭುರ್ಗ್ಯಾಂನಿಂ ಆಮಿಂಯ್ ಮಾತೆಂ ಧಾಂಪುನ್ ಯೆತಾಂವ್ ಮ್ಹಳ್ಯಾರ್ ತಾಂಕಾಯ್ ಶಿಕ್ಪಾಸಂಸ್ಥ್ಯಾಂನಿ ಖಂಡಿತ್ ಅವ್ಕಾಸ್ ದೀಜೆ. ನಾಂ ಮ್ಹಣ್ಚೆಂ ನಯ್. ದಿಗಂಬರ್ ಜಯ್ನ್ ಮುನಿ ಆಂಗಾರ್ ಕಿತೆಂಚ್ ನ್ಹೆಸಾನಾಂತ್. ತಿ ತಾಂಚಿ ಪಾತ್ಯೆಣಿ. ಹ್ಯಾ ಆಚರಣಾಂತ್ ಹೆರ್ ಪಾತ್ಯೆಣೆಚ್ಯಾ ಲೊಕಾಚೊ ದ್ವೇಶ್ ನಾ. ತಾಂಚೆ ಆಚರಣ್ ತೆ ಹೆರಾಂಚೆರ್ ಥಾಪಿನಾಂತ್. ತಾಂಚ್ಯಾ ಆಚರಣಾಂತ್ ಕೊಣಾಕ್‌ಚ್ ಧೊಶಿ ನಾಂತ್. ಕಾನುನ್ ವೆವಸ್ತೆಕ್ ಕಸಲೆಚ್ ರಗ್ಳೆ ಜಾಯ್ನಾಂತ್.

ಪೂಣ್  ತುಲನಾಂತ್,  ‘ಹಾಂವೆ ಕೇಸರಿ ಶೆಲೊ ಘಾಲ್ಚೊ ತಾಣಿ ಹಿಜಾಬ್ ಘಾಲ್ಲೆಂ ಕಾಡುಂಕ್’ ಮ್ಹಣ್ಚ್ಯಾಂತ್ ಆಪ್ಲ್ಯಾ ಧರ್ಮಾಚ್ಯಾ ಮೊಗಾಪ್ರಾಸ್ ಅನ್ಯೆಕಾ ಧರ್ಮಾಚೊ ದ್ವೇಶ್ ಮಾತ್ ಉಟೊನ್ ದಿಸ್ತಾ. ಆನಿ ಹೊ ದ್ವೇಶ್ ಮಾತ್ ಕಾನುನ್ ವೆವಸ್ತಾ ಭಂಗಯ್ತಾ. ಸದ್ದ್ಯಾಕ್ ಹೆಂ ಇತ್ಲ್ಯಾಕ್ ರಾಂವ್ಚೆಪರಿಂ ದಿಸಾನಾ. ಹಾಂಗಾಸರ್, ದೊಳ್ಯಾಂಕ್ ತೊಪ್ತಾ ಫಕತ್ ಎಕಾ ಪಾತ್ಯೆಣೆಚ್ಯಾ ಚಲಿಭುರ್ಗ್ಯಾಂನಿ ನ್ಹೆಸ್ಚೆಂ ಹಿಜಾಬ್ ಮಾತ್ ನಯ್, ದೆಶಾಚೊ ಬಾವ್ಟೊ ಸಯ್ತ್ ಆಯ್ಚ್ಯಾ ಭುರ್ಗ್ಯಾಂಕ್  ನಾಕಾ ಜಾಲಾ. ದೆಶಾಚ್ಯಾ ಬಾವ್ಟ್ಯಾಂತ್ ಆಸ್ಚೊ ಭಾರತಾಚ್ಯಾಚ್ ಮಾತ್ಯೆಚೊ ಶ್ರೇಷ್ಠ್ ರಾಯ್ – ಸಾಮ್ರಾಟ್ ಅಶೋಕಾಚೊ ಚಕ್ರ ಸಯ್ತ್ ನಾಕಾ ಜಾಲಾ. ಬಾವ್ಟ್ಯಾಂತ್ಲ್ಯಾ ಪಾಚ್ವ್ಯಾ ಆನಿ ಧವ್ಯಾ ರಂಗಾಚೆರ್ ಭಿತರ್ಲ್ಯಾ ಭಿತರ್ ದ್ವೇಶ್ ಖತ್ಕತೊನ್ ಆಸಾ. ಕೆನ್ನಾಂ ಹ್ಯಾ ದ್ವೇಶಾಚೊ ವಿಸ್ಪೋಟ್ ಜಾಯ್ತ್  ಸಾಂಗೊಂಕ್ ಜಾಯ್ನಾ – ತಸಲಿ ಆಕಾಂತಾಚಿ ಪರಿಸ್ಥಿತಿ ದಾರಾರ್ ಉಭಿ ಜಾಲ್ಯಾ. 

ಆಜ್ ದೆಶಾಚೊ ಬಾವ್ಟೊಚ್ ನಾಕಾ ಮ್ಹಳ್ಳೆ,  ಫಾಲ್ಯಾಂ ಆಮ್ಚ್ಯಾ ಭುರ್ಗ್ಯಾಂಕ್ ಭುತಿಯೆಂತ್ ಮಾಸಾಚೆಂ/ ಮಾಸ್ಳೆಚೆಂ ನಿಸ್ತೆಂ ದಿಲ್ಯಾರ್ ಖಾಂವ್ಕೀ ಆಡ್ಕಳ್ ಹಾಡ್ತಿತ್. ತೆದೊಳ್ ಪರ್ಯಾಂತ್ ವೊಗೆ ಬಸ್ಚೆಂ ? ಇತ್ಲ್ಯಾ ವಿಷಮ್ ಪರಿಸ್ಥಿತೆಂತೀ ಕ್ರೀಸ್ತಾಂವ್ ಸಮುದಾಯಾಚೆಂ ಮುಕೆಲ್ಪಣ್ ಘೆತ್‌ಲ್ಲ್ಯಾಂಕ್ ಉತರ್ ಸುಟಾನಾ ಜಾಲ್ಯಾರ್, ದಿಯೆಸೆಜಿಚ್ಯಾ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿನ್ ಸರ್ವಜಣಿಕ್ ಪ್ರತಿಭಟನಾಂತ್ ಸಾಂಗ್‌ಲ್ಲೆಪರಿಂ ಆಜ್ foots ಕ್ ಆಯಿಲ್ಲೆಂ, ಫಾಲ್ಯಾಂ heads ಕ್ ಯೆತಾನಾ ಕಿತೆಂ ಕರ್ತೆಲ್ಯಾತ್? ತವಳ್ ತುಮ್ಚೆ ಪಕ್ಷೆನ್ ಉಲಂವ್ಕ್ ಇಶ್ಟ್ ಸೊಡ್ಯಾಂ, ದಿಯೆಸೆಜಿಚ್ಯಾ ಸಂಪರ್ಕ್ ಅಧಿಕಾರಿನ್  ಸಾಂಗ್ಚೆ ತಸಲೆ ಅಜೆಂಡಾಚೆ ದುಸ್ಮಾನ್‌ಯೀ ಮೆಳ್ಚೆನಾಂತ್!

► ಎಚ್ಚೆಮ್