ಉಜ್ಯಾಕ್ ನಾ ದಾಕ್ಷೆಣ್ – ಹ್ಯಾ ಘೋಶಣಾಖಾಲ್ 2011 ವ್ಯಾ ವರ್ಸಾ, ಆಯ್ಚ್ಯಾ ದಿಸಾ ಫೆಬ್ರೆರ್ 05 ವೆರ್ ಸುರ್ವಾತ್ಲೆಲಿ, ಕೊಂಕ್ಣಿ ಸಮಾಜೆಕ್ ಆನಿ ಸಮಗ್ರ್ ಕೊಂಕ್ಣಿ ಸಾಹಿತ್ಯಾಕ್ ಸಮರ್ಪಿತ್ ಜಾಳಿಸುವಾತ್ ಕಿಟಾಳ್, ಖಳನಾಸ್ತಾನಾ ನಿರಂತರ್ ಪ್ರಸಾರಾಚಿಂ ಇಕ್ರಾ ವರ್ಸಾಂ ಸಂಪವ್ನ್ ಆಜ್ ಬಾರಾವ್ಯಾ ವರ್ಸಾಂತ್ ಪ್ರವೇಶ್ ಜಾತೇ ಆಸಾ. ಹ್ಯಾ ಸುವಾಳ್ಯಾರ್ ಪಾಟ್ಲ್ಯಾ ಇಕ್ರಾ ವರ್ಸಾಂನಿ ಕಿಟಾಳಾಚೊ ಪೋಸ್ ಕೆಲ್ಲ್ಯಾ ಅನ್ಭೊಗಿ ತಶೆಂ ನವ್ಯಾ ಬರಯ್ಣಾರಾಂಚೊಂ, ವಾಚ್ಪ್ಯಾಂಚೊಂ, ಇಸ್ತಿಹಾರಾಂ ದೀವ್ನ್, ಪೋಶಕ್ ಜಾವ್ನ್ ಪಾಟಿಂಬೊ ದಿಲ್ಲ್ಯಾ ಉದ್ಯಮಿಂಚೊಂ, ಸಂಸ್ಥ್ಯಾಂಚೊಂ ಆನಿ ಹಿತಯ್ಶಿಂಚೊಂ ಕಾಳ್ಜಾ ಮನಾಃಪಾಸುನ್ ಅಬಾರ್ ಮಾಂದ್ತಾಂ ಆನಿ ದೇವ್ ಬರೆಂ ಕರುಂ ಮ್ಹಣ್ತಾಂ.
ಪಾಟ್ಲ್ಯಾ ದೋನ್ ವರ್ಸಾಂ ಪಾಸುನ್ ಮೊಳಬ್ ಅನಿಶ್ಚಿತತೆಚ್ಯಾ ಮೊಡಾಂನಿ ಭರ್ಲಾಂ. ಕಿತೇಂಯ್ ಉಪಕ್ರಮ್, ಕಾರ್ಯಕ್ರಮ್ ಕರ‍್ಯಾಂ ಮ್ಹಳ್ಯಾರ್ ಅಪಧಯ್ರ್ ಧೊಸ್ತಾ. ಸಗ್ಳಿ ತಯಾರಿ ಕೆಲ್ಲಿಂ ಕಾರ್ಯಕ್ರಮಾಂಯ್ ಅಕೇರಿಚ್ಯಾ ಘಡ್ಯೆ ರದ್ದ್ ಕರ್ಚೆ ತಸಲಿ ಆಕಾಂತಾಚಿ ಪರಿಸ್ಥಿತಿ ನಿರ್ಮಾಣ್ ಜಾಲ್ಯಾ.
2020 ಫೆಭ್ರೆರ್ 5 ತಾರಿಕೆರ್ ಸಂದೇಶ ಸಬಾಸಾಲಾಂತ್ ಕಿಟಾಳ್ ದಶಮಾನೋತ್ಸವ್ ಕಾರ್ಯಕ್ರಮಾಕ್, ಬಸ್ತಿ ಮಾಮಾಚ್ಯಾ ಹಸ್ತುಕಿಂ ಚಾಲನ್ ದಿತಾನಾ ದಶಮಾನೋತ್ಸವ್ ವರ್ಸಾಂತ್, ಲ್ಹಾನ್ ತರೀ ಧಾ ಉಪಕ್ರಮಾಂ ಮಾಂಡುನ್ ಹಾಡಿಜೆ ಮ್ಹಳ್ಳೊ ಠಾವ್ ಹಾಂವೆ ಮನಾಂತ್ ಘೆತ್‌ಲ್ಲೊ. ಪುಣ್ ಪರಿಸ್ಥಿತೆನ್ ಧಾ ಸೊಡ್ಯಾಂ, ವಾರ್ಷಿಕ್ ಕಿಟಾಳ್ ಯುವ ಪುರಸ್ಕಾರ್ ಕಾರ್ಯಕ್ರಮ್ ಕರುಂಕೀ ಸೊಡುಂಕ್ ನಾ.
ದಶಮಾನೋತ್ಸವ್ ವರ್ಸಾಕ್ ಚಾಲನ್ ದಿತಾನಾ, ಬಸ್ತಿ ಮಾಮಾನ್ ಬಾಪಯ್ ಸಾರ್ಕ್ಯಾ ಮಾಯ್ಸಾಸಿ ಉತ್ರಾಂನಿ ಆನಿ ನಿಶ್ಕಲ್ಮಶ್ ಹಾಸ್ಯಾಂನಿ – ಹೆಂ ಕಿಟಾಳಾಚೆಂ ಧಾ ವರ್ಸಾಂಚೆಂ ಕಾರ್ಯಕ್ರಮ್ ನಯ್ರೇ, ಪಂಚ್ವೀಸಾವ್ಯಾ ವರ್ಸಾಚ್ಯಾ ಕಾರ್ಯಕ್ರಮಾಕೀ ಹಾಂವ್‌ಚ್ ಮುಕೆಲ್ ಸಯ್ರೊ , ಕಿತೆಂರೇ ? ಮ್ಹಣ್ ಸಾಂಗ್‌ಲ್ಲೆಂ. ಪೂಣ್, ಇತ್ಲೆಂ ವೆಗಿಂ ಬಸ್ತಿ ಮಾಮ್ ಸಯ್ತ್ ಉಟೊನ್ ವಚತ್ ಮ್ಹಣ್ ಹಾಂವೆಂ ಸಪ್ಣಾಂತೀ ಚಿಂತೂಂಕ್ ನಾ. ಬಸ್ತಿ ಮಾಮಾನ್ 2011 ವರ್ಸಾ ಕಿಟಾಳಾಕ್ ಚಾಲನ್ ದಿತಾನಾ ಮ್ಹಳ್ಳೆಂ ಕಾನ್ ಉತರ್ ಮಾತ್ ಹಾಂವ್ ಅಜೂನ್ ವಿಸ್ರೊಂಕ್ ನಾ – ಅಳೆರೇ, ಉಜ್ಯಾಕ್ ನಾ ದಾಕ್ಶೆಣ್ ಮ್ಹಣ್ ಘರಾಕಡೆ ಸಾಂಬಾಳ್!
ಪಾಟ್ಲ್ಯಾ ಇಕ್ರಾ ವರ್ಸಾಂನಿ – ಎಕಾ ಮಾದ್ಯಮಾನ್ ಸತಾಚಿ ಪಾಡ್ತ್ ಘೆತಾನಾ ಘರಾಕಡೆ ಆನಿ ಘರ್ ಸಾಂಬಾಳ್ಚೆಂ ಕಿತ್ಲ್ಯಾ ಮಹತ್ವಾಚೆಂ ಆನಿ ಕಶ್ಟಾಂಚೆಂ ಮ್ಹಳ್ಳೆಂ ಹಾಂವ್ ಶಿಕ್ಲಾಂ.
ಧೋರಣಾಂತ್ ಸೊಡ್ ದೊಡ್ ಕರಿನಾಸ್ತಾನಾ ನಿಶ್ಟುರ್‌ಪಣಿಂ ಸತಾಚಿ ಪಾಡ್ತ್ ಘೆತ್‌ಲ್ಲ್ಯಾನ್ ಮ್ಹಾಕಾ ಆನಿ ಕಿಟಾಳಾಕ್ ಮೆಳ್‌ಲ್ಲೆಂ ಬಹುಮಾನ್ – ಕೊಂಕ್ಣಿ ಸಮಾಜೆಂತ್ ಅಘೋಷಿತ್ ಬಹಿಷ್ಕಾರ್! ಕಿಟಾಳಾಕ್ ಬರಯ್ನಾಕಾತ್, ಕಿಟಾಳಾಕ್ ಇಸ್ತಿಹಾರಾಂ ದೀನಾಕಾತ್, ಕಿಟಾಳಾಚೆ ಪೋಶಕ್ ಜಾಯ್ನಾಕಾತ್ ಮ್ಹಣ್ ಬರಯ್ಣಾರಾಂಕ್, ಪೋಶಕಾಂಕ್ ಇ – ಮೆಲಾಂ ಗೆಲ್ಯಾಂತ್. (ಮ್ಹಜೆಲಾಗಿಂ ದಾಕ್ಲೆ ಆಸಾತ್, ಹಾಂವ್ ದಾಕ್ಲೆ ನಾಸ್ತಾನಾ ಉಲಯ್ನಾ) ಎಚ್ಚೆಮ್ ಯೆತಾ ಜಾಲ್ಯಾರ್ ತ್ಯಾ ಕಾರ್ಯಕ್ರಮಾಕ್ ಆಮಿ ಯೇನಾಂವ್ ಮ್ಹಣ್ ಸಂಘಟಕಾಂಕ್ ಧಮ್ಕಿ ದಿಲ್ಯಾ. ಕೊಂಕ್ಣೆಚ್ಯಾ ಮಹಾನ್ ಸಂಘಟನಾಂಚ್ಯಾ ಲೆಟರ್‌ಹೆಡ್ಡಾಂನಿ ಎಚ್ಚೆಮ್ ಕೊಂಕ್ಣೆಚೊ ಭಯೋತ್ಪಾದಕ್ ಮ್ಹಣ್ ಘೋಷಣ್ ಕೆಲಾಂ. ಸಂಸಾರಾಂತ್ ಖಂಯ್ಚ್ಯಾಕೀ ಭಿಯೆನಾತ್ಲ್ಯಾಂನಿ ಭಿಯೆಂವ್ಚೆಂ ಸತಾಕ್ ಮಾತ್ ಮ್ಹಳ್ಳೆಂ , ಜೆಜುಥಾವ್ನ್ – ಗಾಂದಿ ಪರ್ಯಾಂತ್ ರುಜು ಜಾಲಾಂ. ದೆಕುನ್ ಮ್ಹಾಕಾ ಭಯೋತ್ಪಾದಕ್ ಮ್ಹಳ್ಳ್ಯಾಂತ್ ಭೆಜಾರ್ ನಾ. ಬಗಾರ್ ಮ್ಹಜೆ ಭಿತರ್ ಅನೀತ್ ಆದಾರ‍್ತೆಲ್ಯಾಂನಿ ಭಿಯೆಂವ್ಕ್ ಕರ್ಚೆಂ ಸತ್ ಆಸಾ ಮ್ಹಳ್ಳೊ ಅಭಿಮಾನ್ ಆಸಾ.
ಸತಾಚಿ ಪಾಡ್ತ್ ಘೆತಾನಾ ಅಸಲೆಂ ಜಾಯ್ತೆಂ ಭೊಗುಂಕ್ ಮೆಳ್ತಾ ಮ್ಹಳ್ಳಿ ಸೂಕ್ಷ್ಮ್ ಗಜಾಲ್ ಬಸ್ತಿ ಮಾಮಾಕ್ ಬೋವ್‌ಶಾ ತವಳ್‌ಚ್ ಕಳಿತ್ ಆಸ್ಲಿ. ದೆಕುನ್ ಎಕಾ ಮಾಯ್ಪಾಶಿ ಬಾಪಯ್‌ಪರಿಂ ತಾಣಿಂ ಮ್ಹಾಕಾ ಇಕ್ರಾ ವರ್ಸಾಂ ಆದಿಂಚ್ ಕಾನ್ ಉತರ್ ಸಾಂಗ್‌ಲ್ಲೆಂ ಆಸ್ತಲೆಂ ಮ್ಹಣ್ ಆಜ್ ಮ್ಹಾಕಾ ಖರ‍್ಯಾನ್ ಭೊಗ್ತಾ – ಅಳೆರೇ, ಉಜ್ಯಾಕ್ ನಾ ದಾಕ್ಶೆಣ್ ಮ್ಹಣ್ ಘರಾಕಡೆ ಸಾಂಬಾಳ್!
ಖಳನಾತ್ಲ್ಯಾ ನಿರಂತರ್ ಪ್ರಸರಾಚಿಂ ಇಕ್ರಾ ವರ್ಸಾಂ ಸಂಪವ್ನ್ ಬಾರಾವ್ಯಾ ವರ್ಸಾಂತ್ ಕಿಟಾಳ್ ಪ್ರವೇಶ್ ಜಾಂವ್ಚ್ಯಾ ಸುವಾಳ್ಯಾರ್ – ಸತ್ ಉಲಂವ್ಚ್ಯಾ ಮ್ಹಜ್ಯಾ ಧೋರಣಾಂತ್ ಹಾಂವೆ ಸೊಡ್‌ದೊಡ್ ಕರುಂಕ್ ನಾ ಆನಿ ಘರ್‌ಯೀ ಸಾಂಬಾಳ್ಳಾಂ ಮ್ಹಳ್ಳೆಂ ಸಮಾಧಾನ್ ಮ್ಹಾಕಾ ಆಸಾ.
ಪಾಟ್ಲ್ಯಾ ಇಕ್ರಾ ವರ್ಸಾಂನಿ ಏಕ್ ಗಜಾಲ್ ಮಾತ್ ಮ್ಹಾಕಾ ಸ್ಪಶ್ಟ್ ಜಾಲ್ಯಾ – ಸತಾಕ್ ದುಸ್ರಿ ಕೂಸ್ ನಾ! ಜಶೆಂ ಮ್ಹಜ್ಯಾ ಪಸಂದೆಚೊ ಪತ್ರ್‌ಕರ್ತ್ ರವೀಶ್ ಕುಮಾರ್ ಕೆದಾಳಾಯ್ ಸಾಂಗ್ತಾ – सच का दूसरा पार्ट नहीं होता है दोस्त ! ಕೊಂಕ್ಣಿ ಬರ್ಪಾಂನಿ, ಉಲವ್ಪಾಂನಿ ಚಲಾವಣೆರ್ ಆಸ್ಚೆಂ ನೆರೆಟೀವ್ ನಾಣ್ಯಾಚೊ ದೋನ್ ಕುಶಿ ಫಕತ್ ಫಟಿಂಚೆಂ ಪ್ರೊಪೊಗಾಂಡಾ ಮ್ಹಳ್ಳೆಂ ಮ್ಹಾಕಾ ಕೆದಾಳಾಗೀ ನಖ್ಖೀ ಜಾಲಾಂ. ಖಂಯ್ಚೇಂಯ್ ನಾಣೆಂ ತುಮಿ ಘೆಯಾ – ನಾಣ್ಯಾಚಾ ಎಕಾ ಕುಶಿನ್ ಮೋಲ್ ಆಸ್ತಾ, ದುಸ್ರ್ಯಾ ಕುಶಿನ್ ನಾಣೆಂ ಖಂಯ್ಚ್ಯಾ ಪಾಡ್ತಿಚೆಂ (ದೆಶಾಚೆಂ) ಮ್ಹಳ್ಳೆಂ ಆಸ್ತಾ. ದೆಕುನ್ ಸತ್ ನಾಣ್ಯಾಕ್ ಸರ್ ಕರುಂಕ್ ಜಾಯ್ನಾ – ಪಾಡ್ತ್ ಪಳೆವ್ನ್ ಮೋಲ್ ಬಾಂದುಂಕ್, ಮೋಲ್ ಪಳೆವ್ನ್ ಪಾಡ್ತ್ ಘೆಂವ್ಕ್ ಜಾಯ್ನಾ – ಸತ್ ನಾಣೆಂ ನಯ್! ಇತಿಹಾಸ್ ಗೊವಾಯ್ ಆಸಾ – ಜಾಂವ್ ತೀಸ್ ವಾ ತೀನ್, ಜೊ ನಾಣ್ಯಾಂಚ್ಯಾ ಅಬ್ಲೆಸಾಕ್ ಪಡ್ತಾ ಆನಿ ಸತ್ ವಿಕ್ತಾ, ಏಕ್ ನಾ ಏಕ್ ದೀಸ್ – ತಾಕಾ ಗಳ್ಪಾಸ್‌ಚ್ ಗತ್!
ಚರ್ಚ್ ಎಟ್ಯಾಕ್, ಪಬ್ಬ್ ಎಟ್ಯಾಕ್, ಕೊಂಕ್ಣೆಂತ್ ಲಿಪಿಯೆಚೊ ಗೊಂಗೊ, ಕೊಂಕ್ಣೆಚ್ಯಾ ನಾಂವಾನ್ ಪೋಟ್ ಭರ್ಚೆ ಉಪದೆಸ್, ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸ್ ಸರ್ಲ್ಯಾ ಉಪ್ರಾಂತೀ ತಾಕಾ ಖುರ್ಸಾರ್ ಮಾರುಂಕ್ ಕೆಲ್ಲಿಂ ಪ್ರೇತನಾಂ, ಕೊಂಕ್ಣಿ ಬರಯ್ಣಾರಾಂ ಮಧೆಂ ದುಸ್ಮಾನ್ಕಾಯ್ ವೊಂಪುನ್ ಕೆಲ್ಲಿ ದೆಸ್ವಾಟ್, ಅಕಾಡೆಮಿಂತ್ ಉದ್ಯಮಿಂಕ್ ರಿಗವ್ನ್ ಕೆಲ್ಲಿ ವೀದ್ ವಾವ್ಳಿ, ಚಿಕ್‌ಮಗ್ಳುರಾಂತ್ ಕನ್ನಡ ಮಿಸಾಂ ನಾಕಾತ್ ಮ್ಹಣ್ ಬೊಬಾಟುನ್, ಕನ್ನಡ ಲಿಪಿಚಿ ಗಜಾಲ್ ಯೆತಾನಾ ಕೊಂಕಣಿ – ಕನ್ನಡ ಭಾಯಿ – ಭಾಯಿ ಮ್ಹಣ್ ಮಾರ್‌ಲ್ಲೆಂ ಯೂ ಟರ್ನ್, ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿ ರಾಕ್ಚ್ಯಾ ನಾಂವಾನ್ ಭಾಶೆಚ್ಯಾ ಮೊವಾಲ್ಯಾಂನಿ ಕೆಲ್ಲಿಂ ಅತರ್ವಣಾಂ – ಅಶೆಂ ಕಿತ್ಲೆಶೆ ಗಜಾಲಿ ದಾಖ್ಲ್ಯಾಂ ಸಮೇತ್ ಕೊಂಕ್ಣಿ ಸಮಾಜೆ ಮುಕಾರ್, ದಾಕ್ಶೆಣೆವಿಣೆ, ಭಿಯಾವಿಣೆ ಕಿಟಾಳಾನ್ ದವರ‍್ಲ್ಯಾತ್. ಆತಾಂಯ್ ದವರುನ್ ಆಸಾಂವ್.
ಪಾಟ್ಲ್ಯಾ ವರ್ಸಾಂನಿ, ತೀಸ್ ಹಜಾರ್ ಲೊಕಾಕ್ ಆನಿ ತೆಗಾಂ ಭಿಸ್ಪಾಂಕ್ ಸಾಂಗಾತಾ ಘಾಲ್ನ್ ಸಮುದಾಯಾಚೆಂ ಸಕ್ತೆ ಪ್ರದರ್ಶನ್ ಕರುಂಕ್ ಗೆಲ್ಲೆ ಮುಕೆಲಿ , ಕೊರ್ಪೊರೇಶನ್ ಎಲಿಸಾಂವ್ ಜಾಲ್ಲೆಂಚ್ ಪ್ರೆಸ್ ಕೊನ್ಪರೆನ್ಸ್ ಆಪವ್ನ್ ಕ್ರೀಸ್ತಾಂವ್ ಸಮಾಜೆಚೆ ಮುಕೆಲಿ ಮ್ಹಣ್ ಗಾಜಯಿಲ್ಲೆ ಮಾನೆಸ್ತ್, ಕ್ರೀಸ್ತಾಂವ್ ಸಮಾಜೆಚೆರ್ ಖರ‍್ಯಾನ್ ಅನ್ವಾರ್ ಯೆತಾನಾ , ಲೇಡಿ ಹಿಲ್ ಸರ್ಕಲಾಚೆಂ ನಾಂವ್ ಬದ್ಲಿತಾನಾ, ಖಬ್ರೆ ಶಿವಾಯ್ ಸಾಂ. ಲುವಿಸ್ ಕೊಲೆಜ್ ರಸ್ತೊ ಮುಲ್ಕಿ ಸುಂದರರಾಮ ಶೆಟ್ಟಿ ರಸ್ತೊ ಜಾತಾನಾ, ಖಂಯ್ಚ್ಯಾ ಬಿಳಾಂನಿ ಲಿಪೊನ್ ಬಸ್‌ಲ್ಲೆ ? ಕ್ರೀಸ್ತಾಂವ್ ಸಮುದಾಯಾಚೆರ್ ವ್ಹಡ್ ಕಂಟಕ್ ಕಸೊ ಕನ್ವೆಡ್ತರ್ ಕಾಯ್ದೊ ಯೆತಾನಾ ಜಾಂವ್ ಪ್ರೆಸ್ ಕೊನ್ಪರೆನ್ಸ್ ಆಪಯಿಲ್ಲೆ ಮುಕೆಲಿ, ಜಾಂವ್ ಸಕ್ತೆ ಪ್ರದರ್ಶನ್ ಆಯೋಜನ್ ಕೆಲ್ಲೆಂ ಸಂಘಟನ್ ವಾ ತೀಸ್ ಹಜಾರ್ ಲೊಕಾಚೆ ಪ್ರತಿನಿಧಿ ತೇಗ್ ಬಿಸ್ಪ್ – ಸಗ್ಳಿಂ ಇಂದ್ರಿಯಾಂ ಬಂದ್ ಕರುನ್ ಕಿತ್ಯಾಕ್ ಬಸ್ಲೆ ? ಏಕ್ ವಾಕ್ಮೂಲ್ ದೀಂವ್ಕ್ ಸಯ್ತ್ ಹಾಂಕಾ ಕಿತ್ಯಾಕ್ ಫುಟ್ವಾಲೆಂ ನಾ? ಹಾಂಚ್ಯಾ ಹಾತಾಂತ್ ಸಮುದಾಯ್ ಕಿತ್ಲೊ ಸುರಕ್ಷಿತ್ ? ಮ್ಹಣ್ ಉಗ್ತ್ಯಾನ್ ಸವಾಲಾಂ ವಿಚಾರ್ಲ್ಯಾಂತ್. ಸವಾಲಾಂ ವಿಚಾರ್ಚೆಂ ಆಮ್ಚೆಂ ಕಾಮ್ ಆನಿ ತೆಂ ಆಮಿ ನಿಷ್ಠೆನ್ ಕೆಲಾಂ. ಫುಡಾರಾಂತೀ ಕರ‍್ತೆಲ್ಯಾಂವ್.
ಪಾಟ್ಲ್ಯಾ ದಿಸಾಂನಿ, ಸಮುದಾಯಾಚೆರ್ ಇತ್ಲಿಂ ಅನ್ವಾರಾಂ ಯೆತಾನಾ, ನವ್ಯಾ ಬಿಸ್ಪಾನ್ ಹುದ್ದೊ ಘೆತ್‌ಲ್ಲೊಚ್ ಮಾದ್ಯಮಾಂನಿ ಗಾಜಯಿಲ್ಲೆಂ ಬಂಧುತ್ವ ಖಂಯ್ ಲಿಪ್ಲೆಂ ? ಭಿಷಪ್ ಮಂಗಳೂರಿನ ಅತೀ ದೊಡ್ಡ ಭೂ ಮಾಲೀಕ, ನಿವೃತ್ತಿಯ ನಂತರ್ ಭಿಷಪ್ಪರ ವಾಸಕ್ಕೆ 17 ಕೋಟಿ ಬಂಗಲೆ ಮ್ಹಣ್ ಆರೋಪ್ ಮಾಂಡ್‌ಲ್ಲ್ಯಾಚಾ ಆನಿ ಘರ್ ವಾಪಸಿ ಕರ್ತಾಂವ್ ಮ್ಹಣ್ ಉಗ್ತ್ಯಾನ್ ಧಮ್ಕಿ ದಿಲ್ಲ್ಯಾಚ್ಯಾ ಆಂಗ್ಣಾಕ್, ಮಂಗ್ಳುರ್ಚೊ ಧರ್ಮಾಧ್ಯಕ್ಷ್, ಸಮುದಾಯಾಚೊ ಪರಮೋಚ್ಛ್ ವ್ಹಡಿಲ್, ಕಾರ್ಯಾಚೊ ಅಧ್ಯಕ್ಷ್ ಜಾವ್ನ್ ಕಿತ್ಯಾಕ್ ಗೆಲೊ ? ತಾಚ್ಯಾ ಆಂಗ್ಣಾಂತ್ ಪಾನ್ ಪೊಡ್ ಉದ್ಕಾಚೊ ಸತ್ಕಾರ್ ಘೆಂವ್ಚೆಂ, ಪದಾಂ ಮ್ಹಣ್ತೆಲ್ಯಾಂಚ್ಯಾ ಮಾತ್ಯಾಕ್ ಮುಕುಟ್ ಖೊವಂವ್ಚೆಂ ಸಮುದಾಯಾಚ್ಯಾ ಪರಮೋಚ್ಛ್ ಧಾರ್ಮಿಕ್ ವ್ಹಡಿಲಾಚೆಂ, ಎಕಾ ಧರ್ಮಾಧ್ಯಕ್ಷಾಚೆಂ ಕಾಮ್‌ಗೀ ? ಮ್ಹಣೊನ್ ಉಗ್ತ್ಯಾನ್ ಸವಾಲ್ ಕೆಲಾಂ.
ಸಮಾಜಾಚೆಂ ಪ್ರತಿನಿಧಿತ್ವ್ ಕರ್ತೆಲ್ಯಾಂನಿ, ಸಮಡ್ತ್ ಆನಿ ಸಂಸ್ಕೃತಿಚ್ಯಾ ನಾಂವಾನ್ ಕೊಂಕ್ಣಿ ಲೊಕಾಕ್ ಭಾನಾಯ್ತಾನಾ, ಸೂಂಬೆ ಕರ್ತಾನಾ ಜಾಗಂವ್ಚೆಂ ಕಾಮ್ ಸತಾಚ್ಯಾ ಪಾಡ್ತಿನ್ ಕಾಮ್ ಕರ್ಚ್ಯಾ ಮಾದ್ಯಮಾಚೆಂ ಮ್ಹಳ್ಳೆಂ ಕಿಟಾಳ್ ವಿಸ್ರೊಂಕ್ ನಾ, ಫುಡಾರಾಂತೀ ವಿಸರ್ಚೆಂ ನಾ. ತಶೆಂ ಮ್ಹಣ್ ಖೊಲಾಯೇನ್ ಅಧ್ಯಯನ್ ಕರಿನಾಸ್ತಾನಾ ಖಂಯ್ಚೀಂಯ್ ಬರ್ಪಾಂ ಅಮ್ಸೊರಾನ್ ಕಿಟಾಳಾರ್ ಫಾಯ್ಸ್ ಕೆಲ್ಲಿಂ ನಾಂತ್. ಫುಡಾರಾಂತೀ ಫಾಯ್ಸ್ ಜಾಮ್ವ್ಚಿಂ ನಾಂತ್.
ಕಿಟಾಳಾರ್ ಫಾಯ್ಸ್ ಜಾಂವ್ಚ್ಯಾ ವಿಶ್ಲೇಷಣಾಂನಿ ಆಸ್ಚಿ ವಸ್ತುನಿಶ್ಟತಾ ಪಾರ್ಕುನ್, ಪಾಟ್ಲಾವ್ ಕರ್ಚೊ ಏಕ್ ವ್ಹಡ್ ವಾಚ್ಪ್ಯಾಂಜಮೊ ಆಜ್ ಸಂಸಾರ್‌ಭರ್ ಆಸಾ. ದೆಕುನ್ ಹ್ಯಾ ಮಾದ್ಯಮಾರ್ ಫಾಯ್ಸ್ ಜಾಂವ್ಚ್ಯಾ ಬರ್ಪಾಂಕ್ ಏಕ್ ಸಮಾಜಿಕ್ ಅಭಿಪ್ರಾಯ್ ರೂಪಿತ್ ಕರ್ಚಿ ತಾಂಕ್ ಆಸಾ. ಜಾಲ್ಲ್ಯಾನ್ ಏಕ್ ಉತರ್ ಬರಂವ್ಚೆ ಪಯ್ಲೆಂ ದೋನ್ ಪಾವ್ಟಿಂ ಚಿಂತಿಜೆ ಪಡ್ತಾ. ದಾಕ್ಲೆ ವರವ್ನ್ ಪಳಂವ್ಚೊ ಕಾಯ್ದೊಯ್ ಆಮ್ಕಾಂ ಬಾಂದ್ತಾ. ಸಮಾಜಿಕ್ ಜವಾಬ್ದಾರಿ ಆಸ್ಚ್ಯಾ ಮಾದ್ಯಮಾಂನಿ ಹೆಂ ವಿಸ್ರೊಂಕ್ ಜಾಯ್ನಾ.
ಕೊಂಕ್ಣಿ ಸಾಹಿತಿಂಕ್ ಆನಿ ಕಲಾಕಾರಾಂಕ್ ಉಗ್ತ್ಯಾನ್ ಅಕ್ಮಾನ್ ಜಾತಾನಾ, ಬರವ್ನ್ ಪ್ರತಿರೋಧ್ ದಾಖಲ್ ಕರ್ಚೆ ಬರಾಬರ್, ಸಮಾನ್ ಚಿಂತ್ಪಾಚ್ಯಾ ಮನ್ಶ್ಯಾಂಕ್ ಸಾಂಗಾತಾ ಘೆವ್ನ್ ಸರ್ಕಾರಾಕ್ ಬರವ್ನ್, ಪ್ರಕರಣ್ ದಾಖಲ್ ಕರ್ನ್, ಸರ್ಕಾರಿ ಕೊಡ್ತಿಂನಿ – ಹೆಳ್‌ಲ್ಲ್ಯಾ ವಕೀಲಾಂಚ್ಯಾ ಮುಕಾರ್ ರಾವೊನ್ ವಾದ್‍ ಮಾಂಡ್ಚೆಂ ಕಾಮ್‌ಯೀ ಕಿಟಾಳಾನ್ ಕೆಲಾಂ. ಫಲಿತಾಂಶ್ – ಕೊಂಕ್ಣಿ ಸಮಾಜೆಕ್ ಅನ್ಯಾಯ್ ಕರ್ತೆಲ್ಯಾಂಕ್ ಬಜೆಟಾಂತ್ ಭಾಸಾಯಿಲ್ಲೆಂ ಕೊರೊಡಾಂಚೆಂ ಅನುದಾನ್ ಸರ್ಕಾರಾನ್ ಪಾಟಿಂ ಕಾಡ್ಲಾಂ. ಹಿ ಸತಾಕ್ ಲಾಭ್‌ಲ್ಲಿ ಜೀಕ್ ! ಕಿಟಾಳ್ ಆನಿ ಆರ್ಸೊ ಮಾದ್ಯಮ್, ಕೊಂಕ್ಣಿ ಸಾಹಿತಿ – ಕಲಾಕಾರಾಂಚ್ಯಾ ಮ್ಹಿನತೆಕ್ ಮೆಳ್‌ಲ್ಲೊ ಫಳ್!
ಧೋರಣಾಂತ್ ಸೊಡ್‌ದೊಡ್ ಕರಿನಾಸ್ತಾನಾ, ಸೀಮಿತ್ ಸಂಪನ್ಮೂಳಾಂನಿ, ಕೊಂಕ್ಣಿ ತಸಲ್ಯಾ ಎಕಾ ಪ್ರಾದೇಶಿಕ್ ಭಾಶೆಂತ್, ಏಕ್ ಮಾದ್ಯಮ್ ನಿರಂತರ್ ಚಲಂವ್ಚೆಂ ಮ್ಹಳ್ಯಾರ್ ಖಂಯ್ಚ್ಯಾಯ್ ಪಂಥಾಹ್ವಾನಾಕ್ ಉಣೆಂ ನಯ್. ಆಜ್‌ಯೀ ಅಸಲಿಂ ಪಂಥಾಹ್ವಾನಾಂ ಕಿಟಾಳ್ ಫುಡ್ ಕರುನ್ ಆಸಾ. ಫರಕ್ ಇತ್ಲೊಚ್ ಕೀ – 2011 ವ್ಯಾ ವರ್ಸಾಚ್ಯಾ ತುಲನಾಂತ್ ಆಜ್ ಕಿಟಾಳಾಕ್ ಕೊಂಕ್ಣಿ ಲೊಕಾಥಾವ್ನ್ ಮೆಳ್ಚೊ ಪಾಟಿಂಬೊ ತಿದೊಡೊ ಜಾಲಾ ಮಾತ್ ನಯ್ ಕಿಟಾಳ್ ಸತಾಚ್ಯಾ ಪಾಡ್ತಿನ್ ರಾವೊಂಕ್ ಪಾಟಿಂ ಸರಾನಾ ಮ್ಹಳ್ಳಿ ಪಾತ್ಯೆಣಿ ಕೊಂಕ್ಣಿ ಲೊಕಾಥಂಯ್ ಥಿರ್ ಜಾಲ್ಯಾ. ಹಿ ಪಾತ್ಯೆಣಿ ಉರವ್ನ್ ಘೆಂವ್ಚಿ ಆನಿ ಘಟ್ ಕರ್ಚೆಂ ಹರ್ ಪ್ರೇತನ್ ಹ್ಯಾ ವರ್ಸಾಯ್ ಕಿಟಾಳ್ ಖಂಡಿತ್ ಕರ್ತಲೆಂ ಮ್ಹಣ್ ಭಾಸಾಯ್ತಾಂ.
ಪಾಟ್ಲ್ಯಾ ಇಕ್ರಾ ವರ್ಸಾಂನಿ ಕಿಟಾಳಾಕ್ ಶರ‍್ತಾಂವೀಣ್ ಪಾಟಿಂಬೊ ಆನಿ ಅನ್‌ಲಿಮಿಟೆಡ್ ಮೋಗ್ ದಿಲ್ಲ್ಯಾ ತುಮ್ಕಾಂ – ಮೊಗಾಚ್ಯಾ ವಾಚ್ಪ್ಯಾಂಕ್ ತಶೆಂ ಬರಯ್ಣಾರಾಂಕ್ ಆನಿ ಇಸ್ತಿಹಾರಾಂ ದೀವ್ನ್ ಪೋಶಕ್ ಜಾವ್ನ್ ಆಮ್ಕಾಂ ವಾಡಯಿಲ್ಲ್ಯಾ ಹಿತಯ್ಶಿಂಕ್, ಸಂಘ್ – ಸಂಸ್ಥ್ಯಾಂಕ್, ಮನಾಃಪಾಸುನ್ ದೇವ್ ಬರೆಂ ಕರುಂ ಮ್ಹಣ್ತಾಂ. ತುಮ್ಚೆಂ, ತುಮ್ಚ್ಯಾ ಕುಟ್ಮಾಚೆಂ ಆನಿ ವೆಪಾರ್ ವಯ್ವಾಟಾಚೆಂ ಸದಾಂಚ್ ಬರೆಂ ಜಾಂವ್ ಮ್ಹಣ್ ಆಶೆತಾಂ. Thank You very much. ದಯಾಕರುನ್ ತುಮ್ಚಿ ಸಲಹಾ, ಸುಚನಾಂ ಆನಿ ಸಂದೇಶ್ ಹಾಂಗಾಸರ್ ಸಕಯ್ಲ್ ದಿಲ್ಲ್ಯಾ ಕಮೆಂಟ್ ಬೊಕ್ಸಾಂತ್ ದಾಡುನ್ ದಿಯಾ.
ಧಾರ್ಮಿಕಾಂಚ್ಯಾ ದಬಾವಾಕ್ ವಾ ದಾನಿಂಚ್ಯಾ ಪ್ರಭಾವಾಕ್ ಪಡಾನಾಸ್ತಾನಾ, ಕೊಂಕ್ಣಿ ಪತ್ರಿಕೋದ್ಯಮಾಂತ್ ದಾಕ್ಶೆಣೆವೀಣ್ ಆಪ್ಲೆ ವಿಚಾರ್ ಮಾಂಡುನ್ ನಿರಂತರ್ ಪ್ರಸಾರಾಚಿಂ ಇಕ್ರಾ ವರ್ಸಾಂ ಸಂಪವ್ನ್ ಬಾರಾವ್ಯಾ ವರ್ಸಾಂತ್ ಪ್ರವೇಶ್ ಜಾಂವ್ಚ್ಯಾ ಕಿಟಾಳಾಚ್ಯಾ ಸ್ವತಂತ್ರ್ ಪತ್ರಿಕೋದ್ಯಮಾಂತ್ ತುಮ್ಕಾಂಯ್ ವಾಂಟೆಲಿ ಜಾಂವ್ಕ್ ಮನ್ ಆಸಾ ತರ್, ತುಮ್ಚಿ ಕುಮಕ್ ಧಾಡ್ಯೆತ್. ಸ್ವತಂತ್ರ್ ಪತ್ರಿಕೋದ್ಯಮಾಚೊ ಕಿಟಾಳ್ ವಾವ್ರ್ ತುಮ್ಕಾಂ ಮೆಚ್ವಲೊ ತರ್ ತುಮ್ಚ್ಯಾ ಒಳ್ಕೆಚ್ಯಾ ಹೆರಾಂಕ್ ಏಕ್ ಉತರ್ ಸಾಂಗ್ಯೆತ್, ಶಿಫಾರಸ್ ಕರ್ಯೆತ್. ಕುಮಕ್ ಇತ್ಲಿಚ್ ದೀಜಾಯ್ ಮ್ಹಣ್ ಕಸಲೀಯ್ ಬಂದಡ್ ನಾ. ಫುಲ್ ವಾ ಫುಲಾಚಿ ಪಾಕ್ಳಿ. ತುಮ್ಚ್ಯಾ ಬರ‍್ಯಾಮನಾಕ್ ದೇವ್ ಬರೆಂ ಮ್ಹಣ್ತಾಂ, ಕುಮಕ್ ಧಾಡುಂಕ್ / ಚಡಿತ್ ವಿವರಾಕ್ ಹ್ಯಾ ಪಾನಾಕ್ ಭೆಟ್ ದಿಯಾ : SUPPORT KITTALL
► ಎಚ್ಚೆಮ್, ಪೆರ್ನಾಳ್
ಸಂಪಾದಕ್ / ಪ್ರಕಾಶಕ್
Congratulations HM. Wish you the very best and more success in the coming years. However, I must I agree with Philip. What is truth or fact may depend on viewpoint. One man’s freedom fighter may be another man’s terrorist. This being said, I believe you have been sincere to your beliefs and have not been afraid to call spade what you think is a a spade. Just remember discretion is the better part of valour. As a fellow Pernalite and a well wisher, I am proud of what you have been able to achieve.
Congratulations and all the best HM and team!
ಕೀಟಾಳ್, ನಾಂವಾ ತಾಕೀದ್ ಪತ್ರ್, ಬೊರಿಂ ಲೇಖನಾ ,ಸಾಮಾಜೆಂತ್ ಕಿತೆಂ ಘಡ್ತಾ ತ್ಶಾ ವಿಷಾಂತ್ ಕಿತೆಂಯ್ ಪಾಟಿ ಫುಡೆ ಕರಿನಾಸ್ತಾನ ಸಾರ್ಕೆ ಉಲ್ಲೇಖ ಕರ್ತಾ, ಪರ್ಬಿ ಕೀಟಾಳ್ ಪತ್ರಾಕ್ ಸಂಪಾದಕ್ ಆನಿಂ ಮಂಡಳಿಕ್, ದೇವ್ ಬೊರೆಂ ಕರುಂ.
Since I am closely associated with kittall I very well know the hardships faced by HM to keep afloat on troubling waters and sometimes stormy situations and yet he successfully moving ahead with its ultimate goal that is to provide the best information and sometimes exposing the dirt without fear. It was definitely not easy to run a konkani webportal with so many hurdles but HM has managed the kittall boat on the waters moving ahead steadily and firmly adhering to the media ethics. On this 12th year wishing you all success in future.
Congratulations and all the best. Keep up the good and effective work.
ಬಾರಾವ್ಯೆ ವರ್ಸುಗೆಚ್ಯಾ ಸಂಭ್ರಮಾಕ್ ಹಾಂವ್ ತುಮ್ಕಾಂ ಸರ್ವ್ ಯಶ್ ಆಶೇತಾಂ ಆನಿ ಫುಡಾರಾಂತ್ ಬರೆಂ ಆಂವ್ಡೆತಾಂ. ಪತ್ರಿಕೋದ್ಯಮಾಂತ್ ಸತಾಕ್ ಸೊಧುನ್ ವೆಚೆಂ ಮ್ಹಳ್ಯಾ ಕಾಂಟ್ಯೆರ್ ಚಲೊನ್ ವೆಚೆಂ ತಸೆಂ. ಹಾಂತುಂ ಖಂಡಿತ್ ಜಾವ್ನ್ ದೂಖ್ ಭೊಗಾಜಾಯ್ ಪಡ್ಟಾ ಆನಿ ಸೊಸಿಜಾಯ್ ಪಡ್ಟಾ. ತುಜ್ಯಾ ಮಿಸಾಂವಾಕ್ ದೇವಾಚೆಂ ಆಶೀರ್ವಾದ್. ಕಿಟಾಳ್ ಸದಾಂಚ್ ಆಪ್ಲೊ ಉಜ್ವಾಡ್ ಫಾಂಕಿವಂತ್ ದವ್ರುಂ.
ಭಾರವ್ಯಾ ವರ್ಸುಗೆಚಾ ಸಂದರ್ಭಾ ವೆಳಿಂ ಶುಭಾಶಯ್ ಹೆಚ್ಚೆಮ್.
ಉಜ್ಯಾಕ್ ನಾ ದಾಕ್ಷೆಣ್! ಕೊಂಕ್ಣಿ ಸಮಾಜೆಕ್ ಆನಿ ಸಮಗ್ರ್ ಕೊಂಕ್ಣಿ ಸಾಹಿತ್ಯಾಕ್ ಸಮರ್ಪಿತ್ ಜಾಳಿಸುವಾತ್ ಕಿಟಾಳ್, ಖಳನಾಸ್ತಾನಾ ನಿರಂತರ್ ಪ್ರಸಾರಾಚಿಂ ಇಕ್ರಾ ವರ್ಸಾಂ ಸಂಪವ್ನ್ ಬಾರಾವ್ಯಾ ವರ್ಸಾಂತ್ ಪ್ರವೇಶ್ ಜಾತಾ ದೆಕುನ್ ಪೊರ್ಬಿ. ಹ್ಯಾ ಇಕ್ರಾ ವರ್ಸಾಂನಿಂ, ಕಿಟಾಳಾಕ್ ಕೊಂಕ್ಣಿ ಲೊಕಾಥಾವ್ನ್ ಮೆಳ್ಚೊ ಪಾಟಿಂಬೊ ತಿದೊಡೊ ಜಾಲಾ ತಿ ಬೊರಿ ಖಬೊರ್. ದೆಕುನ್, ಪರತ್ ಕಾಳ್ಜಾಥಾವ್ನ್ ಶಿಭಾಸಹ್ಯ್ ದಿತಾಂ.
ಹ್ಯಾ ಸುವಾಳ್ಯಾರ್ – ಸತ್ ಉಲಂವ್ಚ್ಯಾ ಧೋರಣಾಂತ್ ಸಂಪಾದ್ಪಿ ಎಚ್ಚೆಮಾನ್ ಸೊಡ್‌ದೊಡ್ ಕರುಂಕ್ ನಾ ಆನಿ ಘರ್‌ಯೀ ಸಾಂಬಾಳ್ಳಾಂ ಮ್ಹಣ್ ಆಯ್ಕೊನ್ ಖುಶ್ ಜಾಲೊಂ. ಕಿಟಾಳ್ ಸತಾಚ್ಯಾ ಪಾಡ್ತಿನ್ ಸದಾಂ ರಾವೊಂಕ್ ಪಾಟಿಂ ಸರಾನಾ ಜಾಂವ್.
ಸತಾಕ್ ದುಸ್ರಿ ಕೂಸ್ ನಾಂ ತೆಂ ಖರೆಂ. ಪೂಣ್, ಸತ್ ಮ್ಹಳ್ಯಾರ್ ಕಿತೆಂ? ಸಾದಾರ್ಣ್ ಜಾವ್ನ್, ಹರ್ಯೆಕಾ ವಿಷಯಾಂತ್ ಸತಾಂ (facts), ಭಕ್ತಿಪಣಾಂ (beliefs) ಆನಿಂ ಅಭಿಪ್ರಾಯೊ (opinions) ಮ್ಹಣ್ ಥರ್ ಆಸಾತ್. ದೆಕುನ್ ಸಾವದಾನ್! ತೆದೊಳ್ ಪರ್ಯಾಂತ್, ಹ್ಯಾ ತಿನಾಂಚ್ಯೆಂ ಮಿಶ್ರಣ್ ಜಾವ್ನಾ. ಮುಕಾರ್-ಯ್ ಜಾಯ್ನಾ ಜಾಂವ್. ಸತಾಚ್ಯಾ ಧೊರಣಾಂತ್, ನಿತಲ್ ಆನಿಂ ನಿರ್ಮಲ್ ಉದ್ದೇಸ್ ಆಸೊಂ. ದ್ವೇಷ್ ನಹಿಂ.
ಸರ್ವ್ ಬೊರೆಂ ಮಾಗೊನ್,
ಫಿಲಿಪ್ ಮುದಾರ್ತ್, ನವಿ ಮುಂಬಯ್
06-02-2022
Wish you all the best.
Congratulations on 12th anniversary of Kittal. Com.
Congratulations HM as Kittall webportal steps into the twelfth year of its journey. Under your leadership Kittall has reached new heights of informative and fearless journalism with truth as it’s foundation. Keep up the good work which has been appreciated by many genuine readers.